2.

Jipan̄ Kajjojo Armej im Baam̧le ko ilo Jerbal in Lo̧mo̧o̧r eo an Anij im Mour Ijo Eutiej Tata

2.0

Kadkad In

Āinwōt juon ritōl ilo Kabun̄ eo an Jisōs Kraist, kwoj jipan̄ kajjojo armej im baam̧le ko n̄an kadedeikļo̧k jerbal in lo̧mo̧o̧r im mour ilo aiboojoj eo eutiejtata an Anij (lale 1.2). Kōttōpar eo ilōn̄tata an jerbal in ej n̄an jipan̄ aolep ajri ro nejin Anij bōk kōjeraam̧m̧an ko an mour indeeo im m̧ōņōņō n̄an indeeo.

Eiten aolepān jerbal in lo̧mo̧or eo an Anij im mour ijo eutiej tata ej dedeļo̧k jān baam̧le eo. N̄an aolep membōr ro an Kabun̄ in, jerbal in ej pedped wōt ilo m̧ōko. Jebta in enaaj jipan̄ eok bōk juon visōn kōn:

• Jerbal eo an baam̧le ilo karōk eo an Anij.

• Jerbal in lo̧mo̧o̧r eo an Anij im mour ijo eutiej tata ilo m̧weo.

• Jem̧jerā eo ikōtaan m̧weo im Kabun̄ in,

2.1

Jerbal eo an Baam̧le ilo Karōk eo an Anij

Baam̧le eo ej ekkapit jān Anij im ej dilepen karōk eo An. Kajjojo iaad “ej juon jetōb jitōnbōro likao im jiron̄ nejin jined im jemed ilan̄ [ewōr] juon mour kwojarjar im jipadpad ippān (“Baam̧le eo: Juon Naan in Kean̄ n̄an Laļ in,” ChurchofJesusChrist.org). Jej m̧ōttanļo̧k baam̧le ko aer. Jekar mour ippāer m̧okta jān ad kar ļotak tok n̄an laļ in.

Āinwōt m̧ōttan karōk eo An, Jemedwōj Ilan̄ ekar ejaake baam̧le ko ioon laļ in. Jibadbad eo an n̄an baam̧le ko n̄an bōktok m̧ōņōņō n̄an kōj. Baam̧le ko rej letok iien ko rem̧m̧an n̄an ekkatak, eddōkļo̧k, jipan̄, ukweļo̧k, im jeorļo̧k bōd. Remaron̄ jipan̄ kōj kōppopo n̄an mour indeeo.

Ilo mour in, elōn̄ armej ewōr jon̄an iien ko aer rem̧m̧an n̄an jem̧jerā ko aer ilowaan baam̧le eo eļap iakwe ie. Ejjeļo̧k juon baam̧le ejjab iioon apan̄ kein, metak, im burom̧ōj. Kajjojo armej im baam̧le ko rej kōmourur tōmak eo aer ilo Irooj im kajjieon̄ mour ekkar n̄an m̧ool ko E ekar kwaļo̧k kōn baam̧le eo. Rilo̧mo̧o̧r ekar kallim̧ur bwe E enaaj jipan̄ ineek eddo ko an aolep ro rej itok n̄an E (lale Matu 11:28–30).

Karōk eo ekam̧ōņōņō an Jemedwōj Ilan̄ ej kalikkar bwe aolep ajri ro Nejin renaaj wōr aer iien em̧m̧an n̄an bōk gospel eo An im bōk kōjeraam̧m̧an ko An (lale Katak im Bujen Ko 137:7–10). Aolep ro rej kōm̧m̧an im kōjparok bujen ko ippān Anij remaron̄ en̄jake lan̄lōn̄ im “aenōm̧m̧an ilo laļ in, im mour indeeo ilo laļ eo ej itok” (Katak im Bujen Ko 59:23; barāinwōt lale Mosaia 2:41).

Kallim̧ur eo an Anij kōn mour indeeo ekoba m̧are n̄an indeeo, ajri ro, im aolep kōjeraam̧m̧an ko jet an juon baam̧le n̄an indeeo. Kallim̧ur in ej jerbal n̄anro rejjan̄in m̧are kiiō ak ejjeļo̧k aer baam̧le ilo Kabun̄ in (lale 38.1.4). Kōjeraam̧m̧an kein rej n̄an aolep ro me rej kajjieon̄ in mour āinwōt ro rikaļooran Jisōs Kraist.

2.1.1

Baam̧le ko n̄an Indeeo

Baam̧le ko n̄an indeeo rej ejaak n̄e membōr ro ilo Kabun̄ in rej kōm̧m̧an bujen ko ilo aer bōk kain̄i in liāp ko ilo tampeļ. Kōjeraam̧m̧an ko an baam̧le n̄an indeeo ralikkar ilo an membōr ro kōjparok bujen ko im ukweļo̧k n̄e rej likjab ilo kōm̧m̧an ko aer. Ritōl ro an Kabun̄ in rej jipan̄ membōr ro kōppopo n̄an bōk kain̄i kein im kautiej bujen ko aer.

Kajjojo armej remaron̄ kakūrm̧ool jon̄an jerbal ko ilo juon baam̧le indeeo. Aolep jerbal ko an baam̧le rekwojarjar im aorōk. Jerbal kein emaron̄ koba jinen im jemān, leddik im ļaddik, sister im brother eo nejin, aunty im uncle, im jibun im jim̧aan. Kakūrm̧ool jerbal kein ilo iakwe ejipan̄ ajri ro nejin Anij eddōkļo̧k n̄an bōk mour indeeo.

Juon m̧ōttan kakkobaba n̄an ejaake baam̧le ko n̄an indeeo ej kōm̧m̧ani kain̄i ko ilo tampeļ me ej kōtļo̧k an membōr ro liāp n̄an ro nukuier etto.

Kōn jeļā in kōn karōk eo an Anij, membōr ro rej kappukot kōjeraam̧m̧an ko an juon baam̧le indeeo.

2.1.2

Ļeo im Lio Pālele

M̧are eo ikōtaan juon em̧m̧aan im juon kōrā ej ekkapit jān Anij (lale Katak im Bujen Ko 49:15). Jibadbad eo an ļeo im lio pālele ej n̄an eddōkļo̧k ippān doon n̄an mour indeeo (lale 1 Korint 11:11).

Juon iaan men ko remenin aikuj n̄an bōk mour indeeo ej n̄an juon m̧aan im juon kōrā n̄an deļon̄e bujen eo an selestial m̧are (lale Katak im Bujen Ko 131:1–4). Juon ripālele ej kōm̧m̧ane bujen in n̄e rej bōk kain̄i in m̧are im liāp ilo tampeļ. Bujen in ej pedped eo an baam̧le indeeo. N̄e m̧ool ilo kōjparoke, ej kōtļo̧k bwe m̧are ko ren n̄an indeeo. Āliktata, remaron̄ erom̧ āinwōt Anij (lale Katak im Bujen Ko 132:19–20).

Anij ekar kakien ļōmaro im lim̧aro pālele n̄an dāpdep wōt ippān doon (lale Jenesis 2:24; Katak im Bujen Ko 42:22). Ilo eoon in, naan in dāpdep ej meļeļein n̄an lukkuun wūjlepļo̧k an im m̧ool n̄an juon armej. Ripālele ro em̧ōj aer m̧are rej dāpdep ippān doon ilo aer iakwe im jipan̄ doon.

Dāpdep ekoba barāinwōt m̧ool ikōtaan ļeo im lio pālele. Kwaļo̧k en̄jake im kōņaan ikōtaan ļeo im lio pālele ej jibadbad eo bwe en aiboojoj im ekwojarjar. Ej ekkapit jān Anij n̄an kōm̧anm̧an eo an ajri ro im n̄an kwaļo̧k iakwe ikōtaan ļeo im lio pālele. Meanwōd im kautiej—jab ļōmņak kōn e make—ej aikuj tōl jem̧jerā in en̄jake im kōņaan eo ikōtaer.

Anij ekar kakien bwe kōņaan ilo kanniōk ej n̄an wōt m̧are eo ikōtaan ļeo im lio pālele. Pād wōt ilo erreo ikkijeen kōņaan ilo kanniōk m̧okta jān m̧are im m̧ool wōt n̄an m̧are ej jipan̄ kajjojo bwe ren en̄jake m̧ool in m̧ōņōņō im kattoļo̧k jorrāān ko ilo jetōb, en̄jake, im ilo ānbwin. Jinen im jemān ajri ro im ritōl ro an Kabun̄ in kar kapilōk er n̄an kōm̧m̧ane aolep men ko remaron̄e n̄an kōkajoorļo̧k katak in. (Lale 38.6.5.)

Juon ripālele ej kappukot bwe ren juon wōt ilo aer ejaake baam̧le ko aer (lale Jenesis 2:24). Erom̧ juon wōt ilo m̧are ej aikuji juon m̧ōttā eo epoļōmān, ajeeje eddo ko aer. Ļeo im lio pālele rej jon̄an wōt juon im̧aan mejān Anij. Juon ej aikuj jab kabojooj n̄an eo juon. Kāālet ko aer rej aikuj kōm̧m̧an wōt kōn bōro kuk im iakwe, kōn aolepān aer jim̧or maron̄.

Adam im Iv rekar kwaļo̧k juon waanjon̄o̧k n̄an ļeo im lio pālele. Rekar jerbal, jar, im kabun̄ jar ippān doon (lale Moses 5:1, 4). Rekar katakin ajri ro nejier gospel eo im burom̧ōj ippān doon kōn mellijon̄ ko aer (lale Moses 5:12, 27). Rekar bōro kuk ippān doon im ippān Anij.

2.1.3

Jinen im Jemān Ajri ro im Ajri ro

Kien eo m̧oktata an Anij n̄an Adam im Iv āinwōt ļeo im lio pālele ej kar n̄an timo̧o̧n im wōrļo̧k (lale Jenesis 1:28). Rikanaan ro ilo raan ko āliktata rekar katakin bwe “kien eo an Anij ej bwe ajri ro Nejin ren timo̧on im wōrļo̧k ioon laļ ejjeļo̧k oktak” (“Baam̧le Eo: Juon Naan In Kean̄ N̄an Laļ In”; barāinwōt lale Katak im Bujen Ko 49:16–17).

Ej juon jeraam̧m̧an ekwojarjar im eddo n̄an ļeo im lio pālele n̄an kea kōn ajri ro ro rekar keotak er ak kōkajiririki er. Jinen im jemān ajri ro rej kōkaajririi nejier ejjeļo̧k oktak kōjeraam̧m̧an im eddo ko aer āinwōt jinen im jemān ajri ro me lukkuun jinen im jemān ajri ro.

Ļeo im lio pālele me eļap iakwe ippāerro rej ippān doon im leļo̧k ijo em̧m̧antata n̄an karuttotak im kōkajririik ajri ro. Jekjek ko an kajjojo remaron̄ bōbrae jinen im jemān ajri ro jān aer karuttoļo̧k ajri ro nejier ippān doon. Ijoke, Irooj enaaj kōjeraam̧m̧an er ilo aer kappukot jipan̄ eo An im kajjieon̄ n̄an kōjparok bujen ko aer Ippān.

Jinen im jemān ajri ro ewōr juon aer jerbal eaorōk n̄an jipan̄ ajri ro nejier kōppopo n̄an bōk kōjeraam̧m̧an ko an mour indeeo. Rej katakin ajri ro nejier n̄an iakwe im jerbal n̄an Anij im ro jet (lale Matu 22:36–40). Rej katakin er n̄an jar n̄an Jemedwōj Ilan̄ im ekkatak naan an Anij (lale Alma 37:36–37, 44–46). Rej jipan̄ ajri ro nejier meļeļe katak eo kōn tōmak ilo Jisōs Kraist, ukweļo̧k, peptaij, im bōk menin letok eo an Jetōb Kwojarjar (lale Katak im Bujen Ko 68:25). Rej barāinwōt jipan̄ er kōppopo n̄an kōm̧m̧an bujen ko ilo aer bōk kain̄i ko an lo̧mo̧o̧r im mour ilo aiboojoj eo eutiejtata.

“Kajjojo jemen juon baam̧le rej tōl baam̧le ko aer ilo io̧kwe im jim̧we im ej aer eddo n̄an kōpooj menin aikuj ko an mour im kōjparok baam̧le ko aer.” (“Baam̧le Eo: Juon Naan in Kean̄ n̄an Laļ in”). N̄e ejjeļo̧k ļeo pālele ak jemān baam̧le eo ilo m̧weo, jinen baam̧le eo ej tōl baam̧le eo.

Tōl ilo baam̧le eo ej juon eddo n̄an jipan̄ tōl ro uwaan baam̧le eo bar jepļaak im mour ippān Anij. Menin ej bōk jikin ilo ad jipan̄ im katakin kōn jouj, meanwōd, ettā, im kōn iakwe em̧ool, ļoor waanjon̄o̧k eo an Jisōs Kraist (lale Matu 20:26–28). Tōl ilo baam̧le eo ekoba tōl ro uwaan baam̧le eo ilo jar aolep iien, ekkatak gospel eo, im m̧ōttan ko jet n̄an kabun̄jar. Jinen im jemān ajri ro rej jerbal ippān doon ilo bōro kuk n̄an kakūrm̧ool eddo kein.

“Kajjojo jinen juon baam̧le eddo eo aer eaorōk ej n̄an kōkkaajririik ajri ro nejier” (“Baam̧le Eo: Juon Naan in Kean̄ n̄an Laļ in”). N̄an kōkkaajriri meļeļein n̄an naajdik, katakin, im jipan̄, ļoor waanjon̄o̧k eo an Rilo̧mo̧o̧r (lale 3 Nipai 10:4). Bōro kuk ippān ļeo pālele, juon m̧am̧a ej jipan̄ baam̧le eo an ekkatak m̧ool ko an gospel im kōļapļo̧k tōmak ilo Jemedwōj Ilan̄ im Jisōs Kraist. Rej ippān doon n̄an ejaake juon mejatoto in iakwe ilowaan baam̧le eo.

“Ilo eddo kein rekwojarjar, ro jemen im jinen rej kalim̧ur n̄an jipan̄ doon āinwōt m̧ōttā ro rej juon wōt” (“Baam̧le Eo: Juon Naan in Kean̄ n̄an Laļ in”). Rej lukkuun jar im kapilōk doon im ippān Irooj.

2.2

Jerbal in Lo̧mo̧o̧r eo an Anij im Mour Ijo Eutiej Tata ilo M̧weo

Būreejtōnji eo Kein Kajuon ekar ba: “M̧weo ej pedped eo n̄an mour jim̧we” (First Presidency letter, Feb. 11, 1999). Ilo m̧ōko m̧weer, kajjojo armej im baam̧le ko rej bōk koņaer ilo jipan̄ Anij kadedeļo̧k jerbal in lo̧mo̧o̧r eo An im mour ijo eutiej tata.

N̄an jipan̄ membōr ro ilo kōm̧m̧ane jerbal in lo̧mo̧o̧r eo an Anij im mour ijo eutiej tata ilo mweo, ritōl ro an Kabun̄ in rej kōketak er n̄an ejake juon em̧ ijo Jetōb ej pād ie. Rej barāinwōt kapilōk membōr ro n̄an kautiej raan in Jabōt, ekkatak im katak gospel eo ilo m̧weo, im kōm̧m̧an nokon in jota ko kajjojo wiik. Ritōl ro rej kwaļo̧k aorōk in n̄an jipan̄ kajjojo armej ro me ejabwe jipan̄ ak kapilōk jān ro uwaan baam̧le ko aer make.

2.2.1

Juon Em̧ Ijo Jetōb Ej Pād Ie

Ro uwaan Kabun̄ in kar kapilōk er n̄an kōm̧m̧an bwe m̧ōko m̧ōer en juon jikin kajoor ilo jetōb im lan̄lōn̄. Remaron̄ karuwaineneik Jetōb eo an Irooj n̄an m̧ōko m̧ōer kōn kijejeto ko reļam waan.

2.2.2

Kōjparok Raan in Jabōt

Anij ekar kakien ajri ro Nejin n̄an “keememej raan in Jabōt, bwe kwōn kokwōjarjar e” (Exodus 20:8). Ro uwaan Kabun̄ in rej koba ippān doon ilo raan in Jabōt n̄an bōk kwojkwoj eo n̄an kakeememej Jisōs Kraist im Pinmuur eo An (lale Katak im Bujen Ko 59:12). Raan in Jabōt ej juon raan in ekkatak gospel im katakin ilo kabun̄ im ilo m̧ōko. Membōr ro remaron̄ kajoorļo̧k ilo raan in Jabōt ilo aer bōk koņaer ilo m̧akūtkūt ko āinwōt kein:

• Kabun̄jar ko an kajjojo armej ilo aer jar im jitlo̧k.

• Ekkatak gospel eo im ekkatak.

• Jerbal in Karejar im jipan̄ ro jet.

• Menmenbwij an Baam̧le.

• Iien Kam̧ōņōņō ko an Baam̧le.

• Iien Koba Ippān Doon ko Jet Rekkar

2.2.3

Ekkatak Gospel eo im Ekkatak ilo M̧weo

Katakin im ekkatak Gospel eo rej men jej mije ilo m̧ōko im Kabun̄ in ej rie. Ritōl ro an Kabun̄ in rej kapilōk aolep membōr ro n̄an ekkatak gospel eo ilo m̧ōko ilo raan in Jabōt im ilo aolepān wiik eo. Ekkatak gospel eo ilo m̧weo ej kōkajoorļo̧k kajjojo armej im baam̧le ko. Ej kam̧wūlaļļo̧k oktak eo ad n̄an Jemedwōj Ilan̄ im Jisōs Kraist.

Juon ekkatak kōn jeje ko rekwojarjar āinwōt an laajrak ilo Itok, Ļoor Eō ej elmakote kūlaaj in ekkatak gospel eo ilo m̧weo.

Kajjojo armej im baam̧le ko rej kappukot im̧we ilo aer kāālet n̄an ekkatak ta eo enaaj em̧m̧antata n̄an tōpar aikuj ko aer. Ilo kakkobaba n̄an eoon in jeje ko rekwojarjar kar elmakote ilo Itok, Ļoor Eō, remaron̄ jar ilo ļōmņak in ekkatak:

• Bok in Mormon im jeje ko jet rekwojarjar.

• Ennaan ko jān kweilo̧k eo eļap.

• Māākjiin ko an Kabun̄ in im bok ko jet rej kōketak jetōb ko ad.

2.2.4

Nokon in Jota im M̧akūtkūt ko Jet

Rikanaan ro ilo Raan Ko Āliktata rekar kapilōk ro uwaan Kabun̄ in n̄an kōm̧m̧ani nokon in jota ko kajjojo wiik. En̄in ej juon iien ekwojarjar n̄an kajjojo armej im baam̧le ko n̄an ekkatak gospel eo, kōkajoorļo̧k naan in kam̧ool ko, kalōk bōro kuk, im lan̄lōn̄ ippān doon.

Nokon in jota ej jabdewōt iien ekkar n̄an jekjek ko membōr ro rej pād ie. Emaron̄ kōm̧m̧an ilo raan in Jabōt ak raan im iien ko jet. Menin emaron̄ kitbuuj:

• Ekkatak gospel eo im kōmeļeļe eo ( Itok, Ļoor Eō kein katak ko me maron̄ kōjerbali n̄e rekōņaan).

• Jipan̄ ro Jet

• Al ak kōjan̄jan̄ Al im al ko an Būraimere (lale jebta 19).

• Jipan̄ ro uwaan baam̧le oe ilo Eddōkļo̧k eo an Ajri ro im Jodikdik ro.

• Juon baam̧le ej kweiļo̧k ippān doon n̄an kōm̧m̧ani kōttōpar ko, ņa mejļan būrabļōm ko, im loloorjake jikejuuļ ko.

• Makūtkūt in kōmmourruur ko.

Membōr ro rej make iaaer im ro jet remaron̄ aiin doon ilo kurup ko ejjab ilo iien kabun̄jar ko ilo raan in Jabōt n̄an bōk koņaer ilo nokon in jota im kōkajoorļo̧k doon ilo aer ekkatak. gospel eo. Itok, Ļoor Eō emaron̄ erom̧ juon kein jipan̄ n̄an ro me rej ikdeleel n̄an ekkatak ippān doon.

N̄an letok iien n̄an baam̧le ko n̄an ippān doon, ritōl ro rej aikuj kōm̧m̧an bwe ren jab boub ilo joteen in Mande otemjej jān kweilo̧k im m̧akūtkūt ko an Kabun̄ in.

Ritōl ro rej kapilōk membōr ro n̄an niknik ilo kōm̧m̧ani nokon in jota ko im joļo̧k iien ippān doon āinwōt baam̧le ko (lale Katak im Bujen Ko 64:33). Menin ekoba iien m̧on̄ā ippān doon, jerbal im jipan̄ doon, im m̧akūtkūt in kōmourruur ko.

2.2.5

Jipan̄ Kajjojo Armej

Ritōl ro an Kabun̄ in rej jipan̄ membōr ro me rej aikuj bar jipan̄. Ritōl ro rej jipan̄ membōr rein im baam̧le ko aer bwe en wōr aer iien em̧m̧an n̄an m̧ōttāik ro jet, en̄jake in iiaio ko, im eddōkļo̧k ilo jetōb. Ritōl ro rej kapilōk im jipan̄ er ilo kijejeto ko aer n̄an ekkatak im mour kōn gospel eo an Jisōs Kraist. Ritōl ro rej barāinwōt leļo̧k n̄an er iien ko rem̧m̧an n̄an jerbal im jipan̄ ilo Kabun̄ in.

2.3

Jem̧jerā eo ikōtaan M̧weo im Kabun̄ in

Jerbal in lo̧mo̧o̧r eo an Anij im mour ijo eutiej tata ej dilepān m̧weo im rie jān Kabun̄ in. Pedped in katak ko rej ellaajrak maron̄ kōjerbali ilo jem̧jerā ko ikōtaan m̧weo im Kabun̄ in.

• Ritōl ro im rūkaki ro rej kautiej eddo ko an jinen im jemān ajri ro im jipan̄ er. Ritōl ro im rūkaki ro rej ejaake im dāpij wejāpdik in kōnono ippān jinen im jemān ajri ro.

• Jet kweilo̧k an Kabun̄ in remenin aikuj ilo kajjojo ward ak branch eo. Men kein ekoba kweilo̧k in kwojkwoj eo im kūlaaj ko im kweilo̧k ko an doulul ko me rej kōm̧m̧an ilo raan in Jabōt. Kweilo̧k ko jet rellōn̄, m̧akūtkūt ko, im būrokūraam̧ ko rejjab menin aikuj. Ritōl ro rej karōki n̄e aikuj n̄an jipan̄ kakke aikuj ko an kajjojo armej im baam̧le ko. Ritōl ro rej lale jekjek ko an jikin eo im kein jipan̄ ko.

• Kajjojo armej im baam̧le ko rej ļōmņak kōn jekjek ko repād ie n̄e rej kōm̧m̧ani jokāālet ko aer ikkijeen bōk koņaer ilo būrokūraam̧ ko an Kabun̄ in me rejjab lukkuun menin aikuj.

• Irooj enaaj kōjeraam̧m̧an membōr ro ilo aer jipan̄ im kōm̧m̧an kaarmejete ko ilo Kabun̄ eo An. Ijoke, jon̄an iien ko juļo̧k ilo iien jar ko an Kabun̄ in rejjab kadikļo̧k maron̄ ko an membōr ro n̄an kakūrm̧ool eddo ko aer ilo m̧ōko m̧ōer, ilo jikin jerbal, im ijoko jet. Ritōl ro im membōr ro rejjab aikuj eddodo kōn elōn̄ eddo ko an Kabun̄ in. Barāinwōt jab kajjitōk ippāer n̄an kōm̧m̧an kaarmejet ko reļļap im reban maron̄ n̄an jipan̄ būrokūraam ko an Kabun̄ in ak m̧akūtkūt ko.

Āinwōt an membōr ro ļoor pedped in katak kein im unoojdikdik eo an Jetōb, Jemedwōj Ilan̄ enaaj kōjeraam̧an kijejeto ko aer.