2.

Panangsuporta kadagiti Indibidual ken Pamilia iti Aramid ti Pannakaisalakan ken Pannakaitan-ok

2.0

Pakauna

Kas maysa a lider iti Simbaan ni Jesucristo, suportaram dagiti indibidual ken pamilia iti panangipatungpal iti aramid ti Dios iti pannakaisalakan ken pannakaitan-ok (kitaen iti 1.2). Ti kangrunaan a panggep daytoy nga aramid ket mangtulong iti amin nga annak ti Dios nga umawat kadagiti bendision ti agnanayon a biag ken ti pakabuklan ti rag-o.

Maipatungpal ti kaaduan nga aramid ti pannakaisalakan ken pannakaitan-ok babaen iti pamilia. Para iti amin a miembro ti Simbaan, naisentro daytoy nga aramid iti pagtaengan. Daytoy a kapitulo ti mangtulongto kenka a manggun-od iti maysa a pannirigan:

• Ti akem ti pamilia iti plano ti Dios.

• Ti aramid ti pannakaisalakan ken pannakaitan-ok iti pagtaengan.

• Ti pagnaigan ti pagtaengan ken ti Simbaan.

2.1

Ti Akem ti Pamilia iti Plano ti Dios

Inordenan ti Dios ti kaamaan ket kangrunaan daytoy iti planona. Tunggal maysa kadatayo “maipatpateg nga espiritu nga anak a lalaki wenno babai dagiti nailangitan a nagannak [nga addaan] iti nadiosan a kababalin ken pagtungpalan (“Ti Kaamaan: Maysa a Waragawag iti Lubong,” ChurchofJesusChrist.org). Pasettayo ti pamiliada. Nagnaedtayo kadakuada sakbay a nayanaktayo iti daga.

Kas paset ti planona, impasdek ti Nailangitan nga Ama dagiti pamilia iti daga. Panggepna a mangisangbay ti pamilia iti ragsak kadatayo. Dagiti pamilia ti mangted kadagiti gundaway tapno masursuruan, dumur-as, agserbi, agbabawi, ken mamakawan. Makatulongda kadatayo nga agsagana para iti agnanayon a biag.

Iti daytoy a biag, adu a tao ti addaan iti limitado a gundaway para iti naayat a panaglilinnangen ti pamilia. Awan ti pamilia a nawaya manipud kadagiti karit, sakit, ken liday. Aramaten dagiti indibidual ken pamilia ti pammati iti Apo ket ikarigatanda ti agbiag a mayannurot kadagiti kinapudno nga impalgakna maipanggep iti pamilia. Inkari ti Mangisalakan a tumulongto a makipagbaklay kadagiti dagensen ti amin nga umasideg Kenkuana (kitaen iti Mateo 11:28–30).

Ipanamnama ti plano ti Nailangitan nga Ama iti ragsak a maaddaanto dagiti amin nga annakna iti gundaway nga umawat iti ebangheliona ken umawat kadagiti kaindaklanan a bendisionna (kitaen iti Doktrina ken Katulagan 137:7–10). Amin nga agaramid ken agtungpal kadagiti katulagan iti Dios ket makapadas iti rag-o ken “kappia iti daytoy a lubong, ken agnanayon a biag iti umay a lubong” (Doktrina ken Katulagan 59:23; kitaen met iti Mosiah 2:41).

Mairaman iti kari ti Dios iti agnanayon a biag ti agnanayon a kallaysa, annak, ken amin a dadduma pay a bendision ti maysa nga agnanayon a pamilia. Mayaplikar daytoy a kari kadagitay agdama nga awan pay asawana wenno awan pamiliana iti Simbaan (kitaen iti 38.1.4). Nupay saan nga ammo ti husto nga oras ken wagas a pakaawatan dagiti bendision ti pannakaisalakan, naipanamnama dagitoy a bendision kadagitay agganetget nga agbiag kas disipulo ni Jesucristo.

2.1.1

Dagiti Agnanayon a Pamilia

Mabukel dagiti agnanayon a pamilia no agaramid dagiti miembro ti Simbaan kadagiti katulagan no umawatda kadagiti pangilantip nga ordinansa iti templo. Maragpat dagiti bendision ti maysa nga agnanayon a pamilia no tungpalen dagiti miembro ti pamilia dagita a katulagan ken agbabawida no agbasolda. Dagiti lider ti Simbaan ti mangtulong kadagiti miembro nga agsagana nga umawat kadagitoy nga ordinansa ken mangdayaw kadagiti katulaganda.

Mabalin ti tunggal tao a mangipatungpal iti sumagmamano nga akem iti maysa nga agnanayon a pamilia. Sagrado ken napateg ti amin nga akem iti pamilia. Mairaman kadagitoy nga akem ti ina ken ama, anak a babai ken anak a lalaki, ikit ken uliteg, ken lelang ken lelong. Ti pannakaipatungpal dagitoy nga akem iti ayat ket mangtulong kadagiti annak ti Dios a dumur-as iti agnanayon a biag.

Ti nayon nga aspeto iti panangipasdek kadagiti agnanayon a pamilia ket panangannong kadagiti ordinansa iti templo a mangpalugod kadagiti miembro a mailantip kadagiti pimmusayen a kapuonanda.

Addaan iti pannakaawat iti plano ti Dios, agkalikagum a gun-oden dagiti miembro dagiti bendision ti maysa nga agnanayon a pamilia. Iraman daytoy ti panagsagana nga agbalin a maikari, managayat nga asawa ken nagannak.

2.1.2

Agassawa

Inordenan ti Dios ti panagasawa ti maysa a lalaki ken maysa a babai (kitaen iti Doktrina ken Katulagan 49:15). Naisangrat ti agassawa a dumur-as a sangkamaysa iti agnanayon a biag (kitaen iti 1 Taga Corinto 11:11).

Maysa kadagiti naidawat a kasapulan iti pananggun-od iti agnanayon a biag ket ti iseserrek ti maysa a lalaki ken maysa a babai iti katulagan ti celestial a kallaysa (kitaen iti Doktrina ken Katulagan 131:1–4). Aramiden ti agassawa daytoy a katulagan no awatenda ti pangilantip nga ordinansa iti kallaysa iti templo. Daytoy a katulagan ti pundasion ti maysa nga agnanayon a pamilia. No sipupudno a matungpal, daytoy ti mangpalugod iti panagasawada nga agpaut iti agnanayon. Kamaudiananna, makapagbalinda a kas iti Dios (kitaen iti Doktrina ken Katulagan 132:19–20).

Binilin ti Dios dagiti agassawa a makinaig iti tunggal maysa (kitaen iti Genesis 2:24; Doktrina ken Katulagan 42:22). Iti daytoy a konteksto, ti balikas a makinaig kaipapananna ti agbalin a naan-anay a napasnek ken napudno iti maysa a tao. Makinaig dagiti nagkallaysa nga agassawa babaen ti panagayat ken panagserbi iti tunggal maysa.

Mairaman pay iti pannakinaig ti naan-anay a kinapudno iti nagbaetan dagiti agassawa. Naisangrat nga agbalin a nangayed ken sagrado ti pisikal nga intimasia iti nagbaetan dagiti agassawa. Inordenan ti Dios daytoy para iti panagparsua kadagiti annak ken para iti pangyebkasan iti ayat dagiti agassawa. Ti kinadungngo ken respeto—saan a kinamanagimbubukod—ti mangtarabay iti nasinged a relasionda.

Imbilin ti Dios a mailatang ti seksual nga intimasia para iti kallaysa iti maysa a lalaki ken maysa a babai. Ti panagtalinaed a natarnaw mainaig iti seks sakbay ti kallaysa ken napudno bayat ti panagdenna kas agassawa ket mangtulong kadagiti indibidual nga agbalin a napudno a naragsak ken maliklikan ti espiritual, emosional, ken pisikal a pannakadangran. Maallukoy dagiti nagannak ken lider ti Simbaan nga aramidenda ti amin a kabaelanda a mangpatibker iti daytoy a pannursuro. (Kitaen iti Moroni 38.6:5.)

Agkalikagum ti agassawa nga agkaykaysa iti panangipasdek iti pamiliada (kitaen iti Genesis 2:24). Ti panagkaykaysa iti panagasawa ket agkasapulan iti naan-anay a panagkadua, panagtinnulong kadagiti pagrebbengan. Agpadpada dagiti agassawa iti imatang ti Dios. Nasken a saan rimbawan ti maysa ti sabali. Nasken a maaramid dagiti pangngeddengda iti kaykaysa ken ayat, a naan-anay ti pannakiramanda nga agpada.

Nangipakita da Adan ken Eva iti pagwadan para kadagiti agassawa. Nagtinnulongda a nagtrabaho, naggiddan a nagkararag, ken nagdaydayawda (kitaen iti Moises 5:1, 4). Insuroda dagiti annakda iti ebanghelio ket sangkamaysa a nagladingitda kadagiti pannubokda (kitaen iti Moises 5:12, 27). Nagkaykaysada iti tunggal maysa ken iti Dios.

2.1.3

Dagiti Nagannak ken Annak

Sakbay a makaawat dagiti annak ti Dios iti “saan nga ipapatay ken agnanayon a biag,” nasken nga umawatda iti mortal a bagi (Moises 1:39). Ti umuna a bilin ti Dios kada Adan ken Eva kas agassawa ket maaddaan iti annak (kitaen iti Genesis 1:28). Insuro dagiti propeta iti ud-udina nga aldaw a “ti bilin ti Dios para kadagiti annakna nga agpaadu ken punnuenda ti daga ket sitatalinaed a bilin” (“Ti Kaamaan: Maysa a Waragawag iti Lubong”; kitaen met iti Doktrina ken Katulagan 49:16–17).

Daytoy ti maysa a sagrado a pribilehio ken pagrebbengan para iti agassawa a mangaywan kadagiti ubbing a kabaelanda nga ipasngay wenno amponen. Maipada dagiti bendision ken pagrebbengan dagiti nagampon a nagannak kas kadagiti nangipasngay a nagannak.

Agtinnulong dagiti naayat nga agassawa a mangipaay iti kasayaatan a pagyanan para iti panangpatanor ken panangpadakkel kadagiti annak. Adda dagiti kasasaad ti tunggal maysa a mabalin a manglapped kadagiti nagannak iti panagtinnulongda a mangpadakkel kadagiti annakda. Nupay kasta, bendisionanto ida ti Apo no agpatulongda Kenkuana ken ikarigatanda ti agtungpal kadagiti katulaganda Kenkuana.

Adda napateg a pagrebbengan dagiti nagannak a mangtulong kadagiti annakda nga agsagana nga umawat kadagiti bendision ti agnanayon a biag. Isuroda dagiti annakda a mangipateg ken agserbi iti Dios ken iti dadduma (kitaen iti Mateo 22:36–40). Suruanda ida nga agkararag iti Nailangitan nga Ama ken agadal iti balikas ti Dios (kitaen iti Alma 37: 36–37, 44–46). Tulonganda dagiti annakda a makaawat iti doktrina ti pammati ken ni Jesucristo, panagbabawi, panagbuniag, ken ti sagut ti Espiritu Santo (kitaen iti Doktrina ken Katulagan 68:25). Tulonganda pay ida nga agsagana a mangaramid kadagiti katulagan no umawatda kadagiti ordinansa ti pannakaisalakan ken pannakaitan-ok.

“Dagiti amma ti mangidaulo kadagiti kaamaanda iti ayat ken kinalinteg ken pagrebbenganda ti mangted kadagiti kasapulan ti biag ken pannakasaluad dagiti kaamaanda” (“Ti Kaamaan: Maysa a Waragawag iti Lubong”). No awan ti asawa a lalaki wenno ama iti pagtaengan, ti ina ti mangidaulo iti pamilia.

Ti panangidaulo iti pamilia ket ti pagrebbengan a tumulong a mangiturong kadagiti miembro ti pamilia nga agsubli tapno makipagnaed iti sidong ti Dios. Maaramid daytoy babaen ti panagserbi ken panangisuro nga addaan iti kinadungngo, kinapakumbaba, ken natarnaw nga ayat, a mangsursurot iti pagwadan ni Jesucristo (kitaen iti Mateo 20:26–28). Ti panangidaulo iti pamilia ket iramanna ti panangidaulo kadagiti miembro ti pamilia iti kanayon a panagkararag, panagadal iti ebanghelio, ken dadduma pay nga aspeto ti panagdaydayaw. Agtinnulong dagiti nagannak iti panagkaykaysa a mangipatungpal kadagitoy a pagrebbengan.

“Kangrunaan a pagrebbengan dagiti inna ti mangpadakkel kadagiti annakda” (“Ti Kaamaan: Maysa a Waragawag iti Lubong”). Ti mangpadakkel ket kaipapananna ti mangtaraon, mangisuro, ken mangsuporta, a mangsursurot iti pagwadan ti Mangisalakan (kitaen iti 3 Nephi 10:4). Iti pannakikaysa iti asawana, tumulong ti maysa nga ina iti pamiliana a masursuruan kadagiti kinapudno ti ebanghelio ken mangpapigsa iti pammati iti Nailangitan nga Ama ken ni Jesucristo. Sangkamaysada a mangpadur-as iti aglawlaw nga addaan iti ayat iti pamilia.

“Kadagitoy sagrado a pagrebbengan, obligasion dagiti amma ken inna nga agtinnulong iti tunggal maysa kas agkadua nga agpada” (“Ti Kaamaan: Maysa a Waragawag iti Lubong”). Nainkararagan nga agiinnumanda ken makiumanda iti Apo. Agtitinnulongda nga agaramid kadagiti pangngeddeng iti panagkaykaysa ken ayat, a naan-anay ti pannakiraman ti agpada.

2.2

Ti Aramid ti Pannakaisalakan ken Pannakaitan-ok iti Pagtaengan

Kinuna ti Umuna a Panguluen, “Ti pagtaengan isu ti pagibasaran ti maysa a nalinteg a panagbiag” (surat ti Umuna a Panguluen, Peb. 11, 1999). Kadagiti pagtaenganda, makiraman dagiti indibidual ken pamilia iti aramid ti pannakaisalakan ken pannakaitan-ok. Buklen daytoy nga aramid ti uppat a nadiosan a naidutok a pagrebbengan:

• Panagbiag iti ebanghelio ni Jesucristo (kitaen iti 1.2.1)

• Panangaywan kadagiti agkasapulan (kitaen iti 1.2.2)

• Panangawis iti amin nga umawat iti ebanghelio (kitaen iti 1.2.3)

• Panamagkaykaysa kadagiti pamilia para iti kinaagnanayon (kitaen iti 1.2.4)

Tapno mangsuporta kadagiti miembro iti panangitrabaho iti aramid ti pannakaisalakan ken pannakaitan-ok iti pagtaengan, allukoyen ida dagiti lider ti Simbaan a mangipasdek iti pagtaengan a pagnaedan ti Espiritu. Allukoyenda pay dagiti miembro a mangdayaw iti aldaw ti Sabbath, agadal ken agsursuro iti ebanghelio iti pagtaengan, ken mangangay iti linawas a home evening. Mangted dagiti lider iti naisangsangayan a panangyunay-unay iti panangsuporta kadagiti indibidual a mabalin a saan a tinulongan wenno pinaregta dagiti miembro ti pamilia.

2.2.1

Maysa a Pagtaengan a Pagnaedan ti Espiritu

Maallukoy dagiti miembro ti Simbaan a mamagbalin kadagiti pagtaenganda a maysa a lugar ti naespirituan a pigsa ken rag-o. Maawisda iti Espiritu ti Apo iti pagtaenganda babaen dagiti gagangay a panagkagumaan. Makapagbalin ti tunggal pagtaengan a maysa a “balay a pagkararagan, pagayunuan, balay ti pammati, balay a pagadalan, balay ti gloria, balay ti urnos, balay ti Dios” (Doktrina ken Katulagan 88:119).

2.2.2

Panagtungpal iti Sabbath

Binilin ti Dios dagiti annakna a “laglagipenyo ti aldaw a panaginana tapno santificarenyo” (Exodo 20:8). Aguummong dagiti miembro ti Simbaan iti aldaw ti Sabbath a makiranud iti sakramento kas panglaglagip ken ni Jesucristo ken ti Pannubbotna (kitaen iti Doktrina ken Katulagan 59:12). Ti Sabbath ket maysa nga aldaw a panagsursuro ken panangisuro iti ebanghelio iti simbaan ken iti pagtaengan. Mabalin a mapapigsa dagiti miembro bayat ti pannakiramanda kadagiti aktibidad kas iti:

• Bukod a panagdaydayaw babaen ti panagkararag ken panagayuno.

• Panagadal ken panagsursuro iti ebanghelio.

• Ministering ken panagserbi iti dadduma.

• Family history.

• Naragsak nga oras ti pamilia.

• Dadduma pay a maitutop a panaguummong.

2.2.3

Panagadal ken Panagsursuro iti Ebanghelio iti Pagtaengan

Ti panangisuro ken panagsursuro iti ebanghelio ket maisentro ti pagtaengan ken suportaran ti Simbaan. Allukoyen dagiti lider ti Simbaan ti amin a miembro nga agadal iti ebanghelio iti pagtaengan iti aldaw ti Sabbath ken iti unos ti makalawas. Ti panagadal iti ebanghelio iti pagtaengan ti mangpapigsa kadagiti indibidual ken pamilia. Daytoy ti mangpauneg iti kumbersion iti Nailangitan nga Ama ken ni Apo Jesucristo.

Ti panagadal kadagiti nasantuan a kasuratan kas nabalabala iti Umaykayo, Sumurot Kaniak—Para kadagiti Indibidual ken Pamilia ket naisingasing a kurso ti panagadal iti ebanghelio iti pagtaengan. Itunos tiUmaykayo, Sumurot Kaniak dagiti adalen iti Primary, Sunday School, Young Women, korum ti Aaronic Priesthood, ken seminary iti panagadal iti ebanghelio iti pagtaengan.

Agkalikagum a gun-oden dagiti indibidual ken pamilia iti pammaregta no pilienda nga adalen no anianto ti kasayaatan a mangipaay kadagiti kasapulanda. Kas nayon kadagiti binatog ti nasantuan a kasuratan a naisingasing iti Umaykayo, Sumurot Kaniak, mabalin a nainkararagan nga ibilangda ti panagadal:

• Ti Libro ni Mormon ken dadduma pay a nasantuan a kasuratan.

• Dagiti mensahe iti sapasap a komperensia.

• Dagiti magasin iti Simbaan ken dadduma pay a makaitandudo a linaon.

2.2.4

Home Evening ken Dadduma Pay nga Aktibidad

Binalakadan dagiti propeta iti ud-udina nga aldaw dagiti miembro ti Simbaan a mangangay iti linawas a home evening. Daytoy ti sagrado a gundaway para kadagiti indibidual ken pamilia nga agsursuro iti ebanghelio, mangpapigsa kadagiti pammaneknekda, mangbangon iti panagkaykaysa, ken agragsak iti tunggal maysa.

Mayannatup ti home evening segun kadagiti kasasaad dagiti miembro. Mabalin a maangay daytoy iti aldaw ti Sabbath wenno dadduma pay nga aldaw ken panawen. Mabalin nga iraman daytoy ti:

• Panagadal ken panangisuro iti ebanghelio (mabalin a mausar dagiti material iti Umaykayo, Sumurot Kaniak no tarigagayan).

• Panagserbi iti dadduma.

• Panagkanta wenno panagpatugtog kadagiti himno ken kanta iti Primary (kitaen iti kapitulo 19).

• Panangsuporta kadagiti miembro ti pamilia iti Panangpadur-as kadagiti Ubbing ken Agtutubo.

• Ti konseho ti pamilia a mangituding kadagiti panggep a tun-oyen, mangrisut kadagiti problema, ken makitinnunos kadagiti iskediul.

• Dagiti aktibidad iti panagaliwaksay.

Makapaguummong dagiti agmaymaysa a miembro ken dadduma pay iti ruar iti gagangay a serbisio a pagdaydayaw iti Sabbath tapno makiraman iti home evening ken mangpapigsa iti tunggal maysa babaen ti panagadal iti ebanghelio. Mabalin a tiUmaykayo, Sumurot Kaniak ti maysa a resource wenno pagadawan para kadagiti agtarigagay nga aggigiddan nga agadal.

Mangted dagiti lider iti naisangsangayan nga atension iti panangtulong kadagiti agdadamo iti panangangay iti home evening ken panagadal iti ebanghelio.

Kas nayon iti home evening, allukoyen dagiti lider dagiti pamilia a mangipangpangruna iti oras a panagkakaduada iti unos ti makalawas. Mabalin nga iraman daytoy ti aggigiddan iti pannangan, agtitinnulong iti panagtrabaho ken panagserbi, ken dagiti aktibidad iti panagaliwaksay.

Tapno mangted iti oras para iti panagkakadua dagiti pamilia, nasken a pagtalinaeden dagiti lider ti rabii ti Lunes a nawaya kadagiti miting ken aktibidad iti Simbaan.

Allukoyen dagiti lider dagiti miembro nga agtultuloy ti panangangayda iti home evening ken panangbubos iti oras a panagkakaduada kas pamilia (kitaen iti Doktrina ken Katulagan 64:33).

2.2.5

Panangsuporta kadagiti Indibidual

Tumulong dagiti lider ti Simbaan kadagiti miembro nga agkurang iti suporta ti pamilia. Mairaman kadagiti miembro a mabalin nga agkasapulan iti nayon a suporta:

• Dagiti ubbing, agtutubo, ken nataengan a saan nga aktibo a makiramraman dagiti pamiliada kadagiti miting ken aktibidad iti Simbaan.

• Dagiti saan pay a naasawaan a nataengan iti amin nga edad, agraman dagiti awan asawana a nagannak ken balo a miembro.

Tumulong dagiti lider kadagitoy a miembro ken iti pamiliada a maaddaan kadagiti gundaway para iti pannakisinninged, makaay-ayo a padas iti pannakilangen, ken naespirituan a panagdur-as. Allukoyen ken tulongan ida dagiti lider kadagiti panagkagumaanda nga agsursuro ken agbiag iti ebanghelio ni Jesucristo. Mangted pay dagiti lider kadakuada iti gundaway nga agserbi iti Simbaan.

2.3

Ti Pagnaigan ti Pagtaengan ken ti Simbaan

Naisentro iti pagtaengan ti aramid ti pannakaisalakan ken pannakaitan-ok ken suportaran ti Simbaan. Maaramat dagiti sumaganad a pagbatayan iti pagnaigan ti pagtaengan ken ti Simbaan.

• Dayawen dagiti lider ken mannursuro ti akem dagiti nagannak ken tulonganda ida. Ipasdek ken pagtalinaeden dagiti lider ken mannursuro ti nasamay a pannakisaritada kadagiti nagannak.

• Siguraduen dagiti lider a makasuporta dagiti miting, aktibidad, ken programa ti Simbaan kadagiti indibidual ken pamilia iti panangitrabaho iti aramid ti pannakaisalakan ken pannakaitan-ok iti pagtaenganda.

• Kasapulan ti sumagmamano a miting iti Simbaan iti tunggal ward wenno branch. Iraman dagitoy ti miting ti sakramento ken dagiti miting iti klase ken korum a maang-angay iti Sabbath. Saan a kasapulan ti adu a dadduma pay a miting, aktibidad, ken programa. Dagti lider ti mangurnos kadagitoy no kasapulan tapno makatulong a mangipaay iti kasapulan dagiti indibidual ken pamilia. Nasken nga ibilang dagiti lider dagiti lokal a kasasaad ken pamataudan [resources].

• Ibilang dagiti indibidual ken pamilia dagiti kasasaadda no agar-aramidda kadagiti pangngeddeng maipapan ti pannakiramanda kadagiti programa ti Simbaan a saan a kasapulan.

• Ti panagserbi ken pannakiraman iti Simbaan ket agkasapulan iti sangkapaset a sakripisio. Paraburanto ti Apo dagiti miembro bayat ti panagserbi ken panagsakripisioda iti Simbaanna. Nupay kasta, ti dagup ti panawen a naited iti panagserbi iti Simbaan saan koma a makasinga iti kabaelan dagiti miembro a mangipatungpal kadagiti pagrebbenganda iti pagtaengan, iti trabaho, ken iti sadino man. Nasken a saan a marigatan dagiti lider ken miembro iti adu unay a pagrebbengan iti Simbaan. Wenno saan a nasken a maidawat kadakuada a mangaramid iti nalabes a panagsakripisio tapno mangsuporta kadagiti programa wenno aktibidad iti Simbaan.

No suroten dagiti miembro dagitoy a pagbatayan ken dagiti parikna ti Espiritu, bendisionanto ti Nailangitan nga Ama dagiti panagkagumaanda.