20.

Mga Kalihokan

20.1

Mga Katuyoan

Ang mga kalihokan sa Simbahan makapapundok sa mga miyembro ug sa uban isip mga “kauban na sa katawhan sa Dios” (Mga Taga-Efeso 2:19). Ang mga katuyoan alang sa mga kalihokan mahimong maglakip sa mosunod:

• Pagpalig-on sa hugot nga pagtuo diha ni Jesukristo.

• Paglingaw-lingaw ug pagpalambo sa panaghiusa.

• Paghatag og mga oportunidad alang sa personal nga pag-uswag.

• Paglig-on sa mga Indibidwal ug mga pamilya.

• Pagtabang sa mga miyembro nga moapil sa buhat sa Dios sa kaluwasan ug kahimayaan (tan-awa sa 1.2).

Ang pipila ka ehemplo sa mga kalihokan sa Simbahan maglakip sa:

• Pagserbisyo nga mopanalangin sa uban ug mopalig-on sa mga relasyon sa komunidad.

• Misyonaryo nga buhat, buhat sa templo, ug buhat sa family history.

• Mga oportunidad sa pagpalambo og pagbarog pinaagi sa kinaugalingong paningkamot ug mga kahanas sa pagpangulo.

• Edukasyon ug bokasyonal nga pagbansay.

• Mga kalihokan sa gawas.

• Mga oportunidad sa pagpalambo sa mga talento ug pagpasalamat sa mga arte sa kultura.

• Mga sport ug paugnat sa kusog.

• Mga kasaulogan sa espesyal nga mga okasyon, sama sa mga holiday o makasaysayanong mga kalihokan sa Simbahan o sa lokal.

Sumala sa gigamit niini nga tamdanan nga basahon, ang pulong Kalihokan sa Simbahan nagpasabot sa usa ka kalihokan nga gipasiugdahan sa yunit sa Simbahan, korum, o organisasyon.

20.2

Pagplano og mga Kalihokan

Sa dili pa magplano og usa ka kalihokan, ang mga lider mokonsiderar sa espirituwal ug temporal nga mga panginahanglan sa mga miyembro. Ang mga lider magtinguha og giya sa Espiritu sa pagtino unsa nga matang sa kalihokan nga makatabang sa pagtubag niadto nga mga panginahanglan.

20.2.1

Responsibilidad alang sa Pagplano og mga Kalihokan

Alang sa impormasyon mahitungod sa pagplano og mga kalihokan sa stake ug sa daghang stake, tan-awa sa 20.3.

Ang mga kalihokan sa ward mahimong maplano sa bisan unsa sa mosunod nga mga paagi, base sa lokal nga mga panginahanglan:

• Ang konseho sa ward mahimong modumala sa pagplano.

• Ang konseho sa ward mahimong mosangon og piho nga mga organisasyon sa pagtabang sa pagplano og usa o daghang mga kalihokan.

• Kon gikinahanglan ug kon adunay igong mga miyembro, ang bishopric mahimong moorganisar og komitiba sa mga kalihokan alang sa ward. Ang kabatan-onan mahimong tawagon isip mga sakop sa komitiba. Kini nga komitiba molihok ubos sa direksyon sa konseho sa ward. Ang konseho sa ward mosangon og usa sa mga sakop niini nga mao kanunay ang mokontak sa komitiba sa mga kalihokan.

Alang sa impormasyon mahitungod sa pagplano og mga kalihokan sa kabatan-onan sa ward, tan-awa sa 10.2.1.3 ug 11.2.1.3.

20.2.2

Pagdapit sa Tanan sa Pag-apil

Kadtong kinsa magplano og mga kalihokan kinahanglang modapit sa tanan, ilabi na sa bag-ong mga miyembro, sa dili kaayo aktibo nga mga miyembro, kabatan-onan, mga single adult, mga tawo nga adunay mga kakulangan, ug mga tawo sa ubang mga tinuohan. Kadtong kinsa magplano kinahanglan nga sensitibo sa pisikal nga mga limitasyon sa mga partisipante. Kinahanglan nga sensitibo usab sila sa mga kalainan sa kultura ug pinulongan.

Kadtong kinsa magplano og mga kalihokan mangita og mga paagi alang sa mga partisipante nga makaapil. Pananglitan, sila mahimong modapit sa mga miyembro ug sa uban sa paggamit sa ilang mga kahanas ug mga talento diha sa kalihokan.

Samtang ang pagpundok diha sa mga kalihokan mahimong usa ka panalangin, ang mga miyembro kinahanglan nga dili mobati nga obligado nga motambong sa matag kalihokan. Ang mga kalihokan kinahanglan nga dili makahatag og kabug-at sa mga lider ug sa mga miyembro.

20.2.3

Mga Sumbanan

Ang mga kalihokan sa Simbahan kinahanglan nga makabayaw ug mohatag og gibug-aton sa mga butang nga “mahiyason, matahom, o maayo og dungog o dalaygon” (Mga Artikulo sa Hugot nga Pagtuo 1:13). Ang mga kalihokan dili maglakip og bisan unsa nga supak sa mga pagtulon-an sa Simbahan. Ang mga kalihokan dili maglakip og media o ubang kalingawan nga makapahimo sa bisan unsa nga dili angay nga ingon og madawat ra.

Ang mga butang nga supak sa Pulong sa Kaalam dili itugot sa mga kalihokan sa Simbahan o sa mga lugar sa Simbahan. Ang mga tawo nga ubos sa impluwensya sa alkohol o sa ubang mga drugas kinahanglang dili moapil sa mga kalihokan sa Simbahan. Kon ang maong sitwasyon mahitabo, ang mga lider moasikaso sa mapuanguron nga paagi.

20.2.4

Balanse ug Pagkalain-lain

Ang mga lider magplano og balanse sa mga kalihokan, lakip sa pagserbisyo, mga arte sa kultura, ug pisikal nga mga kalihokan (tan-awa sa 20.1). Ang mga miyembro kinahanglan nga adunay mga oportunidad sa pag-apil sa mga kalihokan nga makapadani sa ilang mga tinguha. Sila kinahanglan nga mosuporta sa uban sa ilang mga tinguha.

Ang mosunod nga mga seksiyon naghatag og mga ehemplo sa maayo nga mga kalihokan.

20.2.4.1

Pagserbisyo

Ang mga kalihokan sa pagserbisyo naghatag og mga oportunidad sa pagpakita og gugma alang sa uban, pagbati og hingpit nga kalipay sa pagtabang kanila, ug sa pagpalambo sa mga komunidad.

Kini nga mga kalihokan maglakip sa pagbisita sa mga tawo nga masakiton ug magul-anon, pagpaanindot sa mga gambalay ug mga nataran sa Simbahan, ug pag-apil sa mga proyekto sa komunidad. Kon anaa, ang JustServe.org nagsugyot og mga oportunidad sa pagserbisyo diha sa komunidad.

Ang mga kalihokan sa pagserbisyo kinahanglan mosunod sa mga lagda sa kasegurohan (tan-awa sa 20.7.6.1

20.2.4.2

Mga Arte sa Kultura

Ang mga arte sa kultura nga mga kalihokan naghatag og mga oportunidad alang sa mga miyembro sa pagpalambo ug pagpaambit sa ilang mga talento. Kini nga mga kalihokan nag-awhag usab og pagkamamugnaon, pagsalig, ug kooperasyon. Kini mahimong maglakip sa pagpasundayag sa mga arte ug mga craft, mga pasundayag sa mga talento, o sayaw, musika, ug drama. Kini mahimong maglakip usab sa mga kasaulogan sa kultura, mga holiday, lokal o kinatibuk-an nga kasaysayan sa Simbahan.

20.2.4.3

Kalingawan, Kahimsog, Paugnat sa Kusog, ug mga Sport

Isip mga indibidwal, mga pamilya, ug mga grupo sa Simbahan, ang mga miyembro giawhag sa pag-apil sa mga kalihokan nga makatampo sa ilang kahimsog ug kabaskog. Ang pipila ka makalingaw nga mga kalihokan sa Simbahan mahimong planohon aron ang mga sakop sa pamilya makaapil.

Alang sa impormasyon mahitungod sa mga kalihokan sa sport, tan-awa sa 20.5.9.

20.2.5

Pag-eskedyul og mga Kalihokan

Ang mga kalihokan sa Simbahan kinahanglang planohon og sayo-sayo kon mahimo. Ang mga lider kinahanglang mopahibalo sa mga ginikanan sa mga kalihokan alang sa kabataan ug kabatan-onan.

Ang mga kalihokan kinahanglan nga himoon sa resonable nga oras. Kinahanglan nga mahuman kini og sayo aron ang mga partisipante makabiyahe pauli nga luwas.

Kon ang usa ka kalihokan himoon sa meetinghouse o sa lain nga pasilidad sa Simbahan, ang pasilidad kinahanglan nga ireserba og sayo aron malikayan ang mga panagdungan sa eskedyul.

Ang mga gabii sa Lunes gireserba alang sa mga kalihokan sa pamilya (tan-awa sa 20.5.3).

20.2.6

Paggahin og Pundo alang sa mga Kalihokan

Kadaghanan sa mga kalihokan kinahanglang yano ug gamay ra o walay magasto. Ang bisan unsa nga mga galastohan kinahanglan nga aprobahan una sa bishopric o sa kapangulohan sa stake.

Ang mga miyembro sa kasagaran dili mobayad sa pag-apil og mga kalihokan. Alang sa mga palisiya ug mga lagda sa paggahin og pundo sa mga kalihokan, tan-awa sa 20.6.

20.3

Mga Kalihokan sa Stake, Daghang Stake, ug sa Area

20.3.1

Kinatibuk-ang mga Lagda

Kadaghanan sa mga kalihokan sa Simbahan himoon diha sa lebel sa ward. Ang mga lider giawhag usab sa paghimo og mga kalihokan sa stake ug sa daghang stake matag karon ug unya kon ang mao nga mga kalihokan makatabang sa pagtuman sa mga katuyoan diha sa 20.1.

Ang mga kalihokan sa stake ug sa daghang stake kinahanglan nga makahatag og kaayohan alang sa kabatan-onan, sa dili minyo nga mga miyembro, ug sa mga babaye, ilabi na sa mga dapit nga gamay ra ang mga miyembro. Ang maayo nga pagkaplano nga mga kalihokan sa stake ug sa daghang stake makahatag sa mga miyembro og mas lapad nga pundok sa panaghigala. Ang mga lider moila sa mga panginahanglan niadtong ilang giserbisyohan ug mokonsiderar kon ang mga kalihokan sa stake o daghang stake makatabang ba sa pagtubag niadtong mga panginahanglan. Kini nga mga lider dayon morekomendar og mga kalihokan ngadto sa kapangulohan sa stake.

20.3.2

Mga Kalihokan sa Stake

Ang mga kapangulohan sa Young Men, Young Women, Relief Society, ug Primary sa stake magsugod sa proseso sa pagplano og mga kalihokan sa stake alang sa ilang mga organisasyon.

Ang komitiba sa mga young single adult sa stake magsugod sa proseso sa pagplano sa mga kalihokan sa stake alang sa mga young single adult.

Kon ang usa ka komitiba sa single adult sa stake naorganisar, ang mga sakop sa komitiba magsugod sa proseso sa pagplano og mga kalihokan alang sa mga single adult.

Kon ang usa ka komitiba sa mga kalihokan sa stake naorganisar, sila makaplano og mga kalihokan sa stake ug makaserbisyo isip usa ka kapanguhaan sa mga organisasyon sa stake sa pagplano sa ilang mga kalihokan sumala sa gilatid sa 20.3.2.1.

Ang tanan nga mga kalihokan sa stake magkinahanglan og pagtugot gikan sa kapangulohan sa stake. Kini sabotan diha sa mga miting sa konseho sa stake.

Ang mga lider sa stake mopahibalo sa mga lider sa ward sa mga kalihokan sa stake sa sayo pa. Sila usab moseguro nga ang mga kalihokan sa stake modugang sa mga kalihokan sa ward kay sa makigkompetensya niini.

20.3.2.1

Komitiba sa mga Kalihokan sa Stake

Ang kapangulohan sa stake mahimong moorganisar og komitiba sa mga kalihokan sa stake aron sa pagtabang sa konseho sa stake sa pagplano sa mga kalihokan sa stake. Ang komitiba sa mga kalihokan sa stake naglangkob sa usa ka tsirman (usa ka high councilor) ug mga sakop sa komitiba (tan-awa sa 20.3.2.2 ug 20.3.2.3). Ang kapangulohan sa stake modapit usab sa ubang mga miyembro sa pagtabang sa pagplano og usa o daghan nga mga kalihokan.

20.3.2.2

Tsirman sa Komitiba sa mga Kalihokan sa Stake

Kon ang kapangulohan sa stake mo-organisar og komitiba sa mga kalihokan sa stake, sila mosangon og usa ka high councilor nga mahimong tsirman sa komitiba. Ang iyang mga responsibilidad maglakip sa:

• Pagmintenar og kalendaryo sa mga kalihokan sa stake.

• Pagdumala sa mga sakop sa komitiba sa pagplano og mga kalihokan sa stake.

• Pagrekomendar og detalyado nga badyet sa mga kalihokan sa stake ngadto sa kapangulohan sa stake sa dili pa mosugod ang matag tuig. Kini nga badyet wala maglakip sa mga kalihokan nga alang sa indibidwal nga mga organisasyon sa stake.

• Pagserbisyo isip usa ka kapanguhaan ngadto sa mga lider sa organisasyon sa stake kon sila magplano og mga kalihokan.

20.3.2.3

Mga Sakop sa Komitiba sa mga Kalihokan sa Stake

Usa ka sakop sa kapangulohan sa stake o usa ka gisangonan nga high councilor mahimong motawag og mga miyembro nga moserbisyo sa komitiba sa mga kalihokan sa stake. Sila moserbisyo ubos sa direksyon sa tsirman sa komitiba. Ang mga sakop sa komitiba motabang sa pagplano ug pag-organisar og mga kalihokan diha sa stake.

20.3.3

Mga Kalihokan sa Daghang Stake [Multistake] ug sa Area

Sa mga dapit nga gamay ra ang kabatan-onan, ang mga lider kinahanglan nga maghimo og mga kalihokan sa daghang stake matag karon ug unya aron ang kabatan-onan makabenepisyo gikan sa pagpakigsosyal sa mas dako nga mga grupo. Ang mga kalihokan sa Area alang sa kabatan-onan mahimo usab nga himoon panagsa.

Ang kanunay nga mga kalihokan sa daghang stake kinahanglan himoon alang sa mga young single adult diin ang panagpundok dili magkinahanglan og daghan nga panahon o galastohan. Ang mga kalihokan sa Area alang sa mga young single adult mahimo usab nga himoon panagsa.

Alang sa impormasyon mahitungod sa mga kalihokan sa daghang stake alang sa mga miyembro nga dili minyo, tan-awa sa 14.2.1.3.

Ang mga kalihokan sa daghang stake kinahanglan nga yano ug nagkalain-lain.

Kon ang presidente sa stake mobati nga ang kalihokan sa daghang stake makahatag og kaayohan sa mga miyembro sa ilang mga stake, sila mahimong mangayo og pagtugot gikan sa Kapangulohan sa Area. Sa dili pa mosugyot og kalihokan sa daghang stake, ang mga presidente sa stake motino kon kini mao ba ang labing maayong paagi sa pagtubag sa mga panginahanglan nga ilang nakita. Ang mga presidente sa stake mokonsiderar usab sa galastohan, panahon, ug biyahe nga gikinahanglan sa kalihokan. Sila usab mokonsiderar sa kasegurohan (tan-awa sa 20.7.6).

Ang mga miting aron sabotan ang pagplano sa mga kalihokan sa daghang stake mahimong himoon sa dili pa o human sa mga miting sa area council ug sa coordinating council (tan-awa sa 5.2.3 ug 5.2.4). Kon gikinahanglan, dugang nga mga lider—lakip sa mga presidente sa Relief Society, Young Men, Young Women sa stake—mahimong dapiton sa pagtambong.

Ang Kapangulohan sa Area mahimong mosangon sa mga presidente sa stake o mga Area Seventy sa pagdumala sa mga komitiba nga magplano ug mopatuman sa mga kalihokan sa daghang stake o area. Ang mga kapangulohan sa stake mahimong motawag sa mga miyembro sa ilang mga stake sa pag-alagad niini nga mga komitiba.

Ang paggahin og pundo alang sa mga kalihokan sa daghang stake magagikan sa mga pundo sa badyet sa miapil nga mga stake. Ang paggahin og pundo alang sa mga kalihokan sa area magagikan sa mga badyet sa area o sa punoang buhatan sa Simbahan kon aprobahan.

20.3.4

Pagsunod sa mga Palisiya sa Simbahan alang sa Pagbiyahe

Ang mga kalihokan sa stake, daghang stake, ug area kinahanglang magsunod sa mga palisiya sa Simbahan alang sa pagbiyahe (tan-awa sa 20.7.7). Ang pagbiyahe alang sa mga komperensiya sa FSY kinahanglan nga magsunod sa mga palisiya sa pagbiyahe gawas kon ang tigdumala sa FSY mohatag sa lokal nga mga lider og lain nga mga instruksiyon.

20.4

Komperensiya sa Kabatan-onan

Sugod sa Enero sa tuig nga sila mag-edad og 14, ang mga batan-ong lalaki ug ang mga batan-ong babaye gidapit sa pag-apil sa komperensiya sa kabatan-onan. Ang mga komperensiya sa kabatan-onan sa kasagaran himoon makausa sa matag tuig sa lebel sa ward o sa stake. Kini usab mahimong himoon sa lebel sa multistake o sa lebel sa area. Sa tuig nga ang kabatan-onan gisangonan nga motambong sa komprensiya sa FSY, ang mga stake ug mga ward kinahanglan nga dili maghimo og mga komperensiya sa kabatan-onan.

Ang mga katuyoan sa komperensiya sa kabatan-onan mao ang pagtabang sa kabatan-onan sa:

• Pagpalig-on sa hugot nga pagtuo diha ni Jesukristo.

• Paglig-on sa mga pagpamatuod.

• Pagpalambo og mga talento.

• Pakig-amigo og bag-ong mga higala.

• Paglingaw-lingaw uban sa kabatan-onan kinsa nagpaambit og susama nga mga tinuohan ug mga sumbanan.

Ang kabatan-onan makakat-on usab og mga kahanas sa pagpangulo samtang sila motabang sa pagplano og mga komperensiya sa kabatan-onan.

Ang mga komperensiya sa kabatan-onan sa ward planohon ug ipahigayon sa komitiba sa ward alang sa konseho sa kabatan-onan, ubos sa direksyon sa bishopric (tan-awa sa 29.2.6). Ang bishopric mokuha sa pagtugot sa kapangulohan sa stake kabahin sa mga plano alang sa komperensiya sa kabatan-onan sa ward.

Ang mga komperensiya sa kabatan-onan sa stake planohon ug ipatuman sa komitiba sa pagpangulo sa kabatan-onan alang sa stake (tan-awa sa 29.3.9). Ang kabatan-onan kinahanglan nga dapiton sa pagtabang sa komitiba kutob sa mahimo.

Ang mga komperensiya sa kabatan-onan gahinan og pundo gikan sa badyet sa stake o ward. Ang mga miyembro kinahanglan nga dili pangayoan og bayad alang sa mga komperensiya sa kabatan-onan (tan-awa sa 20.6).

Samtang ang mga lider ug kabatan-onan magplano og komperensiya sa kabatan-onan, sila kinahanglan nga mosunod sa mga palisiya niini nga kapitulo ug sa mosunod nga mga lagda:

• Magpili og tema sa ebanghelyo, sama sa usa ka kasulatan, nga modasig sa kabatan-onan ug motabang kanila nga makasabot sa mga gidahoman sa komperensiya. Ang tinuig nga tema sa kabatan-onan sa Simbahan mahimong gamiton isip tema sa komperensiya. Ang bishopric o kapangulohan sa stake kinahanglan nga moaprobar sa tema.

• Magplano og mga kalihokan nga nahisubay sa tema.

• Mokuha og pagtugot sa bishopric o kapangulohan sa stake alang sa tanang mga mamumulong ug mga kalihokan. Ang mga mamumulong kinahanglan nga mga miyembro sa Simbahan kinsa motudlo pinaagi sa Espiritu. Tan-awa sa 38.8.18 alang sa ubang mga lagda kalabot sa mga mamumulong.

• Kon ang usa ka kalihokan giplano alang sa Dominggo, kinahanglan nga kini angay alang sa adlaw nga Igpapahulay. Ang mga miting sa pagpamatuod, mga panaghisgotan uban sa bishopric, o ang susama nga mga miting gitugotan. Hinoon, ang mga panagtigom alang sa sakramento dili himoon—ug ang sakramento dili ipangalagad—sa gawas sa mga meetinghouse sa ward o stake. Ang bisan unsa nga mga eksepsiyon kinahanglan nga alang sa gipasiugdahan sa Simbahan nga kalihokan ug kinahanglan nga aprobahan sa Kapangulohan sa Area. Ang mga grupo kinahanglan nga dili mobiyahe paingon o gikan sa komperensiya sa kabatan-onan sa Dominggo.

• Moseguro nga adunay igo nga pagdumala sa hamtong sa tanang higayon (tan-awa sa 20.7.1).

• Mosunod sa tanang mga lagda sa kasegurohan nga anaa sa 20.7.6.

Ang hamtong nga mga lider dapiton sa pagtambong kutob sa mahimo sa komperensiya. Kini naglakip sa mga sakop sa bishopric o kapangulohan sa stake, kapangulohan sa Young Women sa ward o stake, ug kapangulohan sa Young Men sa stake. Ang mga tigtambag sa Young Women ug Young Men mahimo usab nga dapiton sa pagtambong.

20.5

Mga Palisiya ug mga Lagda alang sa Pagpili ug Pagplano og mga Kalihokan

Ang mga lider moseguro nga ang mosunod nga mga palisiya ug mga lagda gisunod sa pagpili ug pagplano og mga kalihokan sa Simbahan.

20.5.1

Komersyal o Politikanhong mga Kalihokan

Ang mga kalihokan nga himoon alang sa bisan unsa nga komersyal o politikanhong katuyoan dili tugotan (tan-awa sa 35.5.6.1 ug 35.5.6.3).

20.5.2

Mga Sayaw ug Musika

Sa tanang sayaw, sininaan, pamustura, suga, mga estilo sa pagsayaw, mga pulong, ug musika kinahanglang makatampo ngadto sa kahimtang diin ang Espiritu sa Ginoo mahimong maanaa (tan-awa sa Alang sa Kalig-on sa mga Kabatan-onan: Usa ka Giya sa Paghimo og mga Pagpili).

Ang mga lider mogamit sa porma sa Performance Contract kon magsuhol og banda, orkestra, o disc jockey. Kini nga kontrata makatabang sa pagseguro nga ang kinaiya ug musika angay alang sa mga sayaw sa Simbahan. Ang mga lider mohimo og klaro nga mga kasabotan pinaagi sa sulat nga mopasalig nga kadtong kinsa mosangkap sa musika kinahanglan nga mosunod sa mga sumbanan sa Simbahan diha sa mga kalihokan sa Simbahan.

20.5.3

Mga Gabii sa Lunes

Ang mga miyembro giawhag sa paghimo og mga kalihokan sa pamilya sa Lunes o sa ubang mga panahon. Walay mga kalihokan sa Simbahan, mga miting, mga tulumanon sa bunyag, nga himoon human sa alas 6:00 sa hapon sa mga adlawng Lunes.

Ang mga lider moseguro nga ang mga gambalay sa Simbahan ug ubang mga pasilidad sirado sa mga gabii sa Lunes. Ang mga salo-salo ug ubang susama nga mga kalihokan dili himoon sa mga pasilidad sa Simbahan sa mga gabii sa Lunes.

Isip usa ka eksepsiyon, ang mga ward sa young single adult ug ang mga ward sa single adult mahimong maghimo og mga kalihokan sa mga gabii sa Lunes, lakip diha sa mga gambalay sa Simbahan. Usa ka eksepsiyon mahimo usab nga himoon kon ang Bisperas sa Bag-ong Tuig matumong sa Lunes (tan-awa sa 20.5.4).

20.5.4

Mga Kalihokan sa Bisperas sa Bag-ong Tuig

Kon ang ward or stake nagplano og kalihokan sa Bisperas sa Bag-ong Tuig, ug kon ang Bisperas sa Bag-ong Tuig maatol sa Sabado, Dominggo, o Lunes, ang mga lider kinahanglan nga motuman sa mosunod nga mga lagda.

Sabado. Ang presidente sa stake moeskedyul og laing Dominggo sa paghimo sa adlaw sa puasa. Ang kalihokan mahimong molapas sa tungang gabii. Hinoon, kinahanglan nga hunungon dayon kini aron ang mga partisipante makatambong sa mga miting sa Dominggo.

Dominggo. Ang mga kalihokan sa Simbahan mahimong planohon sa Sabado, Disyembre 30. Ang mga lagda sa miaging parapo magamit. Ang mga pamilya mahimong awhagon sa pagsaulog sa Bisperas sa Bag-ong Tuig sa ilang mga panimalay. Ang mga kalihokan kinahanglan nga angay alang sa adlaw nga Igpapahulay.

Lunes. Ang presidente sa stake o ang bishop mahimong motugot sa paggamit sa mga gambalay sa Simbahan sa gabii sa Lunes.

20.5.5

Tibuok Gabii nga mga Kalihokan

Ang pagtugot gikan sa mga ginikanan o mga magbalantay gikinahanglan alang sa tanang gipasiugdahan sa Simbahan nga tibuok gabii nga mga kalihokan nga naglakip sa kabatan-onan (tan-awa sa 20.7.4).

Ang tibuok gabii nga mga kalihokan sa Simbahan alang sa gihiusa nga mga grupo sa mga batan-ong lalaki ug mga batan-ong babaye kinahanglan nga aprobahan sa bishop ug presidente sa stake. Mao usab alang sa mga kalihokan alang sa mga lalaki ug mga babaye nga dili minyo nga mga miyembro. Ang mao nga mga kalihokan kinahanglan nga talagsa ra. Ang mga ehemplo naglakip sa mga komperensiya sa kabatan-onan, mga komperensiya sa FSY, o mga pagbisita sa templo nga kinahanglan nga mobiyahe og lagyo nga mga distansiya.

Ang mga lalaki ug mga babaye nga mga partisipante ug ang mga lider kinahanglan nga adunay lahi nga mga katulganan. Hinoon, ang minyo nga magtiayon mahimong mag-usa ra og kwarto o tolda. Ang matag kabatan-onan kinahanglan nga adunay iyang kaugalingon nga higdaanan o sleeping bag.

Kon ang mga lider nga hamtong ug kabatan-onan magdungan sa paggamit sa mga pasilidad sa tibuok gabii, sama sa usa ka kabin o tolda, sila kinahanglang sama og sekso sa kabatan-onan.

Ang batan-on dili mahimong moestar sa samang tolda o kwarto sa usa ka hamtong kon usa lang ka hamtong ang anaa. Hinuon, ang usa ka batan-on mahimong moestar sa usa ka tolda o kwarto uban sa iyang ginikanan o tigbantay.

Ang tanang tibuok gabii nga mga kalihokan sa Simbahan kinahanglang maglakip og dili mominos duha ka hamtong nga mga lider.

Igong gidaghanon sa mga hamtong nga naghupot sa pagkapari kinahanglang anaa sa tanang higayon atol sa tibuok gabii nga mga kalihokan aron sa paghatag og suporta ug panalipod. Alang sa mga kalihokan sa Young Women, ang mga lider sa pagkapari kinahanglan nga magpabilin sa mga pasilidad nga lahi sa mga batan-ong babaye.

Ang mga lider mosulat sa Event and Activity Plan [Porma sa Kalihokan] alang sa tanan nga tibuok gabii nga mga kalihokan.

Ang tibuok gabii nga mga kalihokan sa mga meetinghouse sa Simbahan o sa mga nataran sa meetinghouse wala itugot.

Alang sa dugang nga impormasyon, tan-awa sa “FAQs—What Should I Do?” sa ChurchofJesusChrist.org.

20.5.6

Paghulagway sa Dios

Ang Dios nga Amahan ug ang Espiritu Santo dili ihulagway diha sa mga miting, mga drama, o sa mga musika.

Kon ang Manluluwas ihulagway, kinahanglang himoon kini nga may labing balaanong pagtahod ug kaligdong. Ang kaigsoonan lamang nga adunay labing maayo nga personal nga kinaiya ang ikonsiderar alang sa bahin niini. Ang tawo nga naghulagway sa Manluluwas kinahanglan nga dili mokanta o mosayaw. Kon magsulti, siya kinahanglan mogamit lamang sa direkta nga mga kinutlo sa mga kasulatan nga gipamulong sa Manluluwas. Sa kataposan sa pasundayag, siya kinahanglan nga mag-ilis dayon sa naandan nga mga sinina.

Ang Manluluwas kinahanglang dili ihulagway sa mga bata sa usa ka pag-drama gawas sa eksena sa Pagkatawo.

20.5.7

Mga Pag-ampo ug Debosyonal diha sa mga Kalihokan

Ang tanang mga kalihokan kinahanglan nga buksan ug kon angay, taposon sa pag-ampo. Usa ka himno, usa ka espirituwal nga pamalandong, o pakigpulong sa usa ka lider o partisipante mahimong iapil.

20.5.8

Pagbalaan sa Adlawng Igpapahulay

Walay mga kamping, mga kalihokan sa sport, o mga kalihokan sa paglingaw-lingaw ang himoan og eskedyul sa Dominggo. Ni ang mga grupo sa kabatan-onan ug ang uban mobiyahe padulong o gikan sa mga kamping o mga komperensiya sa kabatan-onan atol sa Dominggo.

Isip usa ka eksepsiyon, kon ang kasegurohan o mga galastohan sa pagbiyahe seryoso nga mga problema, ang pipila ka kalihokan sa kabatan-onan mahimong himoon human dayon sa mga miting sa pagsimba sa Dominggo. Kini nga mga kalihokan kinahanglan nga ilahi gikan sa eskedyul nga miting sa Dominggo. Kini kinahanglan nga nagsubay sa pagtuman sa diwa sa Igpapahulay. Ang pagtugot gikan sa bishop ug presidente sa stake gikinahanglan.

20.5.9

Mga Sport

Ang mga kalihokan sa Simbahan sa sport naghatag og mga oportunidad alang sa pisikal nga kalihokan ug pagpakigdait. Kini naghatag og gibug-aton sa pag-apil, pagka-sport, ug pagpalambo sa kahanas. Kon ang kalihokan maglakip og kompetisyon, kinahanglan nga himoon ang tanang paningkamot aron malikayan ang panagbingkil. Ang tanang mga sakop sa team kinahanglan nga kanunay adunay mga oportunidad nga makadula, bisan unsa pa ang lebel sa kahanas.

Ang kapangulohan sa stake modumala sa mga kalihokan sa mga sport nga gipasiugdahan diha sa ilang stake. Sila usab moestablisar og mga lagda nga (1) motino sa edad diin ang mga magdudula mahimong moapil sa mga sport diha sa Simbahan ug (2) modeterminar sa katakos sa magdudula. Ang mao nga mga desisyon kinahanglan nga himoon sa dili pa magsugod ang dula.

Kon ang mga kalihokan sa sport sa daghang stake pagahimoon, ang Kapangulohan sa Area o ang gisangonan nga mga Area Seventy ang modumala niini. Kini nga mga kalihokan ipahigayon sa mga espesyalista sa sport kinsa gitawag sa tinugyanan nga mga presidente sa stake nga gitudlo sa Kapangulohan sa Area. Ang mga sangka sa sport sa area wala itugot.

Ang mga partisipante sa mga kalihokan sa sport diha sa Simbahan dili kinahanglan nga mga miyembro sa Simbahan. Hinoon, sila kinahanglan nga nagpuyo sulod sa mga utlanan sa yunit ug mouyon sa pagsunod sa mga sumbanan ug mga palisiya sa Simbahan atol sa mga kalihokan.

Kon maggamit og mga uniporme sa team, kinahanglan nga kini yano, dili mahal, ug angay alang sa kalihokan. Kinoloran nga mga T-shirt o mabali-bali nga mga sinina sa kasagaran igo na. Ang mga uniporme kinahanglan nga bayaran gikan sa badyet sa stake o ward.

Ang pagpresentar sa team o sa indibidwal nga mga ganti o mga trophy wala iawhag.

20.5.10

Mga Pagbisita sa Templo

Ang mga pagbisita sa templo i-organisar diha sa lebel sa ward o stake sulod sa gisangonan nga distrito sa templo.

Ang naorganisar nga mga pagbisita sa ward o stake ngadto sa mga templo sa gawas sa gisangonan nga distrito sa templo wala iawhag. Ang maong mga pagbisita magkinahanglan sa pagtugot sa kapangulohan sa stake. Ang tibuok gabii nga mga pagbisita sa templo nagkinahanglan usab og pagtugot sa kapangulohan sa stake.

Ang mga pagbisita sa templo kinahanglan nga nagsunod sa mga palisiya sa pagbiyahe sa 20.7.7. Ang tibuok gabii nga mga pagbisita sa templo kinahanglan usab nga magsunod sa mga polisiya sa 20.5.5.

20.5.11

Wala Tugoti nga mga Kalihokan

Ang mga yunit sa Simbahan dili mahimong mopasiugda og mga kalihokan nga wala mahisubay sa mga lagda niini nga kapitulo. Kini naglakip sa:

• Mga kalihokan nga adunay taas og risgo sa kadaot o sakit (tan-awa sa 20.7.6).

• Mga kalihokan nga magkinahanglan og dilli kasagaran nga galastohan o pagbiyahe (tan-awa sa 20.7.7).

• Mga programa sa ehersisyo nga adunay musika, mga pulong, sinina, o ubang mga elemento nga wala mahisubay sa mga sumbanan sa Simbahan.

Kon ang usa ka bishop adunay pangutana mahitungod kon ang usa ka kalihokan angay ba, siya mangutana sa presidente sa stake. Ang mga presidente sa stake mopaabot sa mga pangutana ngadto sa Kapangulohan sa Area.

20.6

Mga Palisiya ug mga Lagda alang sa Paggahin og Pundo sa mga Kalihokan

Ang mga lider moseguro nga ang mosunod nga mga palisiya ug mga lagda gisunod diha sa paggahin og pundo sa tanang kalihokan sa Simbahan.

20.6.1

Mga Kalihokan nga Bayran sa Pundo sa Badyet sa Ward o Stake

Ang mga pundo sa badyet sa ward o stake kinahanglan nga gamiton sa pagbayad sa tanan nga mga kalihokan—uban sa posible nga mga eksepsiyon diha sa 20.6.2.

Ang mga miyembro dili mosangkap sa mga materyal, mga suplay, abang o bayranan sa pagsalmot, o pamasahe sa transportasyon nga layo nga ilang kaugalingon nga gasto. Ang mga miyembro maoy moangkon sa pagkaon kon ang pagbuhat sa ingon dili makapabug-at.

20.6.2

Paggahin og Pundo alang sa Pagkamping sa Kabatan-onan

Kon ang badyet sa ward o stake walay igong pundo alang sa mga kalihokan nga gilista sa ubos, ang mga lider mahimong mohangyo sa mga partisipante nga mobayad sa bahin o tanan niini:

• Usa ka tinuig nga gilugwayan nga kamping sa Aaronic nga Pagkapari o susamang kalihokan

• Usa ka tinuig nga gilugwayan nga kamping sa Young Women o susamang kalihokan

Ang galastohan o biyahe sa tinuig nga kamping kinahanglan nga dili dako kaayo. Ang kakulang sa personal nga mga pundo kinahanglan dili makapugong sa miyembro sa pag-apil.

Kon ang mga pundo gikan sa mga badyet sa ward o stake ug gikan sa mga partisipante dili paigo alang sa mga kamping, ang bishop mahimong motugot og usa ka tinuig nga kalihokan sa pagpangita og pundo. Kini nga kalihokan kinahanglan nga magsunod sa mga lagda diha sa 20.6.5.

Alang sa impormasyon mahitungod sa paggahin og pundo sa dako nga kalihokan sa daghang stake o sa area alang sa mga young single adult, tan-awa sa 14.2.1.3.

20.6.3

Paggahin og Pundo alang sa mga Komperensiya sa FSY

Ang kabatan-onan mahimong hangyoon nga mohatag og bayad sa pagtambong sa For the Strength of Youth (FSY) nga mga komperensiya. Kon ang kantidad maoy hinungdan nga dili makaapil ang batan-on, ang bishop mahimong mogamit sa mga pundo sa badyet aron ibayad sa tanan o kabahin niini. Tan-awa sa FSY.ChurchofJesusChrist.org.

20.6.4

Paggahin og Pundo alang sa Ekipo ug mga Suplay

Kon posible, ang ekipo ug mga suplay nga gikinahanglan sa ward sa tinuig nga kamping sa kabatan-onan paliton gamit ang mga pundo sa badyet sa ward. Kon kini nga pundo dili paigo, ang bishop motugot og usa ka tinuig nga kalihokan sa pagpangita og pundo. Kini nga kalihokan kinahanglan nga magsunod sa mga lagda diha sa 20.6.5.

Ang ekipo ug mga suplay nga gipalit gamit ang mga pundo sa badyet sa ward o sa kwarta nakuha gikan sa kalihokan sa pagpangita og pundo alang sa gamit sa Simbahan lamang. Kini dili alang sa personal nga gamit.

20.6.5

Mga Kalihokan sa Pagpangita og Pundo

Ang mga galastohan alang sa mga kalihokan sa stake ug ward sa kasagaran bayran gikan sa mga pundo sa badyet. Hinoon, ang presidente sa stake o bishop mahimong motugot og kalihokan sa pagpangita og pundo matag tuig alang sa mosunod lamang nga mga katuyoan:

• Aron sa pagtabang sa pagbayad alang sa mga kalihokan nga gilista diha sa 20.6.2 ug 20.6.3.

• Aron sa pagtabang sa pagpalit og ekipo nga gikinahanglan sa yunit alang sa tinuig nga kamping sama sa gilatid diha sa 20.6.4.

Kon ang pagpangita og pundo himoon, kinahanglan nga kini makahatag og makahuluganon nga mithi o pagserbisyo.

Ang mga lider moseguro nga ang mga pundo nga naangkon giapud-apod sa makiangayon nga paagi. Ang badyet alang sa mga korum sa Aaronic nga Pagkapari gibase sa gidaghanon sa mga batan-ong lalaki diha sa ward. Ang badyet alang sa mga batan-ong babaye gibase sa gidaghanon sa mga batan-ong babaye diha sa ward.

Ang mga kontribusyon sa mga kalihokan sa pagpangita og pundo boluntaryo. Ang mga lider kinahanglang moseguro nga ang mga miyembro dili mobati nga obligado nga mohatag.

Ang mga yunit nga magpasiugda og mga kalihokan sa pagpangita og pundo kinahanglang dili mo-advertise o mo-solicit lapas sa ilang mga utlanan. Dili sila mamaligya og mga produkto o mga pagserbisyo sa kada balay.

Ang mga ehemplo sa mga kalihokan sa pagpangita og pundo nga wala itugot maglakip sa:

• Mga kalihokan nga mobayad og buhis.

• Mga kalihokan nga nakompleto pinaagi sa pagsuhol, sa mga empleyado o pinaagi sa kontrata.

• Kalingawan diin ang stake o ward ang mobayad sa tigpasundayag alang sa ilang serbisyo.

• Pagbaligya og mga butang o serbisyo gikan sa usa ka komersyal nga negosyo.

• Mga dula aron modaog, sama sa mga raffle, lotto, ug bingo.

• Mga kalihokan nga dili luwas.

Ang bisan unsa nga mga eksepsiyon niini nga mga instruksiyon kinahanglan nga aprobahan sa Kapangulohan sa Area.

20.7

Mga Palisiya ug mga Lagda sa Seguridad alang sa mga Kalihokan

Ang mga lider moseguro nga ang mosunod nga mga palisiya ug mga lagda gisunod diha sa tanang mga kalihokan sa Simbahan.

20.7.1

Pagdumala nga adunay Hamtong

Dili mominos sa duha ka mga hamtong ang kinahanglan gayod nga anaa sa tanang mga kalihokan sa Simbahan nga tambongan sa kabataan ug kabatan-onan. Dugang nga mga hamtong tingali gikinahanglan depende sa gidak-on sa grupo, sa mga kahanas nga gikinahanglan alang sa kalihokan, o ubang mga bahin. Ang mga ginikanan giawhag sa pagtabang.

Ang tanan kinsa nagtrabaho uban sa kabataan o kabatan-onan kinahanglan nga mokompleto sa pagbansay sa pagpanalipod sa kabataan ug kabatan-onan. Tan-awa sa ProtectingChildren.ChurchofJesusChrist.org.

20.7.2

Kinahanglanon nga Edad alang sa Pag-apil sa mga Kalihokan sa Kabatan-onan

Uban sa pagtugot sa ilang mga ginikanan, ang kabatan-onan mahimong motambong og tibuok gabii nga mga kamping sugod sa Enero sa tuig nga sila mag-edad og 12. Sila mahimong motambong og mga sayaw, mga komperensiya sa kabatan-onan, ug mga komperensiya sa FSY sugod sa Enero sa tuig nga sila mag-edad og 14.

20.7.3

Insurance

20.7.3.1

Insurance sa Personal nga Sakyanan

Tan-awa sa 20.7.7.

20.7.3.2

Personal nga Insurance sa Panglawas ug Aksidente

Sa daghang mga bahin sa kalibotan, ang insurance coverage sa panglawas ug aksidente makuha gikan sa mga employer o sa programa sa gobyerno. Ang mga miyembro nga aduna niini nga coverage kinahanglan nga mogamit sa tanan nga mga benepisyo kon sila makaangkon og kadaot atol sa kalihokan sa Simbahan sa dili pa mangayo og tabang gikan sa insurance sa kalihokan sa Simbahan (tan-awa sa 20.7.3.4).

20.7.3.3

Personal nga Liability Insurance

Ang Simbahan nagtambag sa mga miyembro ug sa mga lider kinsa nagdumala sa mga kalihokan sa Simbahan sa pagpanalipod sa ilang kaugalingon, kon posible, pinaagi sa pagdala og resonable nga mga kantidad sa liability insurance. Ang mao nga insurance makuha pinaagi sa homeowners insurance o sa ubang mga palisiya. Alang sa dugang nga impormasyon, tan-awa sa “FAQs—What Should I Do?” sa ChurchofJesusChrist.org.

20.7.3.4

Programa sa Tabang Medikal sa Kalihokan sa Simbahan

Sa Estados Unidos ug Canada, ang programa sa Church Activity Medical Assistance (CAMA) [Programa sa Tabang Medikal sa Kalihokan sa Simbahan] naghatag og ikaduha nga medikal ug dental nga tabang alang sa mga kadaot nga maangkon samtang nag-apil sa usa ka kalihokan sa Simbahan. Naghatag usab kini og tabang sa paglubong kon gikinahanglan. Kini nga programa gihimo aron sa pagdugang, dili puli, sa kaugalingong insurance sa panglawas ug aksidente. Alang sa dugang nga impormasyon, tan-awa sa “FAQs—What Should I Do?” sa ChurchofJesusChrist.org.

Kon ang usa ka aksidente mahitabo atol sa gipasiugdahan sa Simbahan nga kalihokan, ang mga lider motino kon gikinahanglan ba ang CAMA. Si bisan kinsa nga lider mahimong mo-report og insidente diha sa Global Incident Reporting system sa incidents.ChurchofJesusChrist.org. Kon ang lider moingon nga ang pagtambal lapas sa first aid gikinahanglan, ang bishop pahibaloon ug makadawat og impormasyon sa pagpalista. Ang bishop mokonsiderar sa abilidad sa tawo sa pagbayad sa medikal nga mga galastohan sa bisan unsang laing paagi, sama sa personal nga insurance coverage o ubang mga kapanguhaan. Mahimo niyang tugotan ang mga pundo sa CAMA kon gibati niya nga kini angay.

Alang sa dugang nga impormasyon, tan-awa sa Church Activity Medical Assistance Handbook. Aron makakuha niini nga tamdanan nga basahon, kontaka ang:

Deseret Mutual Benefit Administrators

P.O. Box 45530

Salt Lake City, UT 84145-0530

Telephono: 1-801-578-5650 o 1-800-777-1647

Email: [e-mail]

Website: dmba.com/churchactivity

20.7.3.5

Mga Sertipiko sa Insurance

Ang Simbahan sa kasagaran hangyoon sa paghatag og ebidensya sa insurance alang sa mga kalihokan. Moabot kini nga mga hangyo tungod sa mga kasabotan sa pag-abang, mga kontrata, o mga pagtugot nga may kalabotan sa mga kalihokan.

Sa Estados Unidos ug Canada, ang mga lider mahimong mokuha og sertipiko nga nagpakita og ebidensya sa insurance diha sa InsuranceCertificates.ChurchofJesusChrist.org. Sa gawas sa Estados Unidos ug Canada, ang mga lider kinahanglang mokontak sa buhatan sa area. Ang mga hangyo maglakip sa:

• Ngalan ug address sa organisasyon nga nagkinahanglan sa ebidensya sa insurance.

• Paghulagway ug nahimutangan sa pasilidad, kon nag-abang og pasilidad.

• Ang mga kinutoban sa liability gikinahanglan.

• Ubang importante nga impormasyon mahitungod sa kalihokan.

Ang mga lider kinahanglan magplano og sayo pa sa paghatag og panahon sa pagpangandam sa mga sertipiko.

20.7.4

Pagtugot sa Ginikanan

Ang kabataan ug kabatan-onan dili mahimong moapil sa kalihokan sa Simbahan nga walay pagtugot sa ilang mga ginikanan ug mga magbalantay. Alang sa mga kalihokan sa Simbahan nga maglakip og tibuok gabii nga pag-estar, layo nga biyahe, o mas taas kay sa ordinaryo nga mga risgo, sinulat nga pag-uyon gikinahanglan. Ang pipila ka kalihokan magkinahanglan og dugang nga pagplano aron makunhoran ang mga risgo. Ang kasegurohan kinahanglan mao gayod kanunay ang usa ka importante nga hunahunaon. Tan-awa sa 20.7.6.1.

Ang mga ginikanan ug ang mga magbalantay mohatag niini nga pagtugot pinaagi sa pagpirma sa porma sa Permission and Medical Release. Ang tawo kinsa modumala sa kalihokan kinahanglan nga adunay porma nga pinirmahan alang sa matag partisipante.

20.7.5

Mga Report sa Abuso

Ang bisan unsa nga pag-abuso nga mahitabo atol sa kalihokan sa Simbahan kinahanglan nga ireport ngadto sa sibil nga mga awtoridad. Ang bishop kinahanglan nga kontakon dayon. Ang mga instruksiyon alang sa mga miyembro anaa sa 38.6.2.7. Ang mga instruksiyon alang sa mga bishop anaa sa 38.6.2.1.

Alang sa mga kahulogan sa pag-abuso, tan-awa sa 38.6.2.3 ug 38.6.2.4.

20.7.6

Mga Panagana sa Kasegurohan ug Pagtubag sa Aksidente, ug Pagreport sa Aksidente

20.7.6.1

Mga Panagana sa Kasegurohan

Ang mga lider ug mga partisipante magmabinantayon sa pagsusi sa mga kalihokan aron sa pagseguro nga gamay ra ang risgo sa kadaot o sakit. Ang mga kalihokan kinahanglan nga minos og risgo sa kadaot sa kabtangan. Atol sa mga kalihokan, ang mga lider kinahanglan nga maningkamot sa pagseguro sa kasegurohan. Pinaagi sa epektibong pagplano ug pagsunod sa mga panagana sa kasegurohan, maminosan sa mga lider ang risgo sa mga aksidente.

Ang mga kalihokan kinahanglang maglakip sa angay nga pagbansay ug tukma nga pagdumala. Kini kinahanglan usab nga angay alang sa edad, mga abilidad, ug kahingkod sa mga partisipante.

Ang mga lider motudlo sa tanan nga mga partisipante sa angay nga mga buhatonon sa kasegurohan alang sa kalihokan. Kon ang mga kalihokan magkinahanglan og piho nga pisikal nga mga kahanas o kasinatian, tingali gikinahanglan nga makakuha og linain nga pagbansay o sa paggamit sa propesyonal nga mga giya.

Ang mga lider kinahanglan nga andam alang sa mga emerhensiya. Sila kinahanglan nga makahibalo nang daan kon unsaon sa pagkontak sa lokal nga tigpatuman sa balaod ug mga serbisyo sa emerhensiya. Alang sa dugang nga impormasyon, tan-awa sa “FAQs—What Should I Do?” sa ChurchofJesusChrist.org.

20.7.6.2

Pagtubag sa Aksidente

Kon ang usa ka aksidente o kadaot mahitabo sa kabtangan sa Simbahan o atol sa usa ka kalihokan sa Simbahan, ang mga lider motuman sa mosunod nga mga lagda, kon magamit:

• Paghatag sa unang tabang [first aid]. Kon ang tawo nagkinahanglan og dugang nga medikal nga pag-atiman, mokontak sa pang-emerhensiya nga medikal nga pagserbisyo. Mokontak usab sa ginikanan, magbalantay, o sa ubang duol nga kabanay ug sa bishop o sa presidente sa stake.

• Kon adunay usa ka tawo nga nawala o namatay, mopahibalo dayon sa lokal nga tigpatuman sa balaod. Mokooperar sa hingpit kanila.

• Mohatag og emosyonal nga suporta.

• Dili mobabag o moawhag og legal nga mga aksiyon. Dili mohimo og mga pasalig nga gikan sa Simbahan.

• Mokolekta ug mohipos sa mga ngalan sa mga saksi, sa ilang impormasyon sa pagkontak, mga istorya sa unsay nahitabo, ug mga litrato.

• Moreport sa aksidente (tan-awa sa 20.7.6.3).

20.7.6.3

Pag-report sa Aksidente

Ang mosunod nga mga sitwasyon kinahanglan nga i-report sa online diha sa incidents.ChurchofJesusChrist.org. Ang bishop, presidente sa stake, o miyembro nga iyang itudlo kinsa nakahibalo sa insidente mohimo dayon sa report.

• Ang usa ka aksidente o kadaot nahitabo diha sa kabtangan sa Simbahan o atol sa kalihokan sa Simbahan.

• Ang usa ka tawo kinsa miapil sa kalihokan sa Simbahan nawala.

• Ang kabtangan sa pribado, sa publiko, o sa Simbahan nadaot atol sa usa ka kalihokan sa Simbahan.

• Naghulga o nagpaabot og legal nga aksiyon.

Kon ang usa ka kalihokan miresulta sa usa ka seryoso nga kadaot, pagkaangol, o nawala nga tawo, ang presidente sa stake, bishop, o miyembro nga iyang gitudlo mohimo dayon sa usa sa mosunod nga mga aksiyon:

• Sa Estados Unidos ug Canada, unang motawag sa Risk Management Division sa punoang buhatan sa Simbahan (1-801-240-4049 o 1-800-453-3860, extension 2-4049; human sa mga oras tingtrabaho o sa kataposan sa semana, tawag sa 1-801-240-1000 o 1-800-453-3860, ug ang operator mokontak dayon og usa ka tawo). Dayon mokontak sa Kapangulohan sa Area.

• Sa gawas sa Estados Unidos ug Canada, mopahibalo sa buhatan sa area.

Ang presidente sa stake o ang bishop moreport usab sa mga kadaot ug danyos nga naglakip sa mga pasilidad o kabtangan sa Simbahan ngadto sa manedyer sa mga pasilidad sa Simbahan.

Alang sa dugang nga impormasyon, tan-awa sa “FAQs—What Should I Do?” sa ChurchofJesusChrist.org.

20.7.6.4

Insurance ug mga Pangutana

Kon ang usa ka kadaot mahitabo atol sa kalihokan sa Simbahan, ang mga lider motino kon magamit ba ang programa sa Church Activity Medical Assistance (tan-awa sa 20.7.3.4).

Sa pipila ka mga sitwasyon, ang presidente sa stake o ang bishop mahimong adunay mga pangutana mahitungod sa mga isyu sa kasegurohan o mga bayronon batok sa Simbahan. Ang presidente sa stake (o ang bishop ubos sa iyang direksyon) mopadangat sa mga pangutana ngadto sa Risk Management Division o sa buhatan sa area.

20.7.7

Biyahe

Ang pagbiyahe alang sa mga kalihokan sa Simbahan kinahanglan nga aprobahan sa bishop o sa presidente sa stake. Ang pagbiyahe kinahanglan nga dili makapabug-at sa mga miyembro.

Ang mga partisipante kinahanglang dili mobiyahe og layo nga mga lugar (sulod sa pipila ka oras) alang sa mga kalihokan. Ang bisan unsang mga eksepsiyon magkinahanglan og pagtugot gikan sa Kapangulohan sa Area. Kon ang Kapangulohan sa Area moaprobar sa maong pagbiyahe, ang mga miyembro kinahanglan nga dili maoy mogasto niini (tan-awa sa 20.6).

Ang mga buhat sa pagbiyahe ug ang aplikasyon sa mga lagda niini nga seksiyon kinahanglan nga pareho sa mga yunit sa samang area o coordinating council. Ang mga presidente sa stake mahimong maghisgot ug magkauyon sa mga buhat sa pagbiyahe atol sa mga miting sa coordinating council.

Ang mga lider mosulat sa porma sa Event and Activity Plan alang sa mga kalihokan nga naglakip og lagyo nga biyahe.

Kon ang kalihokan sa Simbahan alang sa kabatan-onan maglakip og lagyo nga biyahe o pag-istar og tibuok gabii, ang mga ginikanan o mga magbalantay kinahanglan nga mohatag og sinulat nga pagtugot alang sa ilang mga anak nga moapil (tan-awa sa 20.7.4). Responsable nga hamtong nga modumala kinahanglan nga anaa (tan-awa sa 20.7.1).

Kon mahimo, ang mga grupo sa Simbahan kinahanglan nga mogamit sa komersyal nga transportasyon alang sa lagyo nga biyahe. Kinahanglan nga kini adunay lisensya ug adunay liability insurance.

Kon ang grupo sa Simbahan mobiyahe sakay sa pribado nga de pasahero nga mga sakyanan, ang matag sakyanan kinahanglan nga maayo og kondisyon. Ang matag tawo kinahanglan nga mogamit og seat belt. Ang matag drayber kinahanglan nga lisensyado, responsable nga hamtong. Ang tanang sakyanan ug mga drayber kinahanglan nga adunay resonable nga kantidad sa liability insurance sa sakyanan. Kinahanglan nga himoon ang mga plano aron sa pagseguro nga ang mga drayber magpabilin nga abtik ug alerto. Kutob sa mahimo, ang usa ka hamtong kinahanglan nga dili mag-inusara uban sa usa ka batan-on sa sulod sa sakyanan gawas kon ang batan-on iyang anak.

Ang mga organisasyon sa Simbahan dili manag-iya o mopalit og mga awto o mga bus alang sa grupo nga pagbiyahe.

Ang usa ka lalaki o babaye kinahanglan nga dili mobiyahe nga sila rang duha alang sa mga kalihokan, mga miting, o mga buluhaton alang sa Simbahan gawas kon sila minyo ngadto sa usag usa o ang duha pulos dili minyo.

Alang sa dugang nga impormasyon, tan-awa sa “FAQs—What Should I Do?” sa ChurchofJesusChrist.org.

20.8

Mga Palisiya sa Pagdumala sa Kalihokan

Ang mga lider moseguro nga ang mosunod nga mga palisiya ug mga lagda gisunod kon magdumala og mga kalihokan sa Simbahan.

20.8.1

Mga Materyal nga Adunay Katungod sa Sinulat

Tan-awa sa 38.8.11

20.8.2

Pag-abang og Dili mga Pasilidad sa Simbahan alang sa mga Kalihokan

Kon ang mga pasilidad sa Simbahan dili paigo alang sa usa ka kalihokan sa stake o daghang stake, mahimong moabang og mga pasilidad uban ang pagtugot gikan sa presidente sa stake. Ang maong mga paghangyo dumalahon sa manedyer sa mga pasilidad sa Simbahan.

Ang lokal nga mga yunit mahimong hangyoon sa pagpakita sa ebidensya sa liability insurance kon mag-abang o maggamit og mga pasilidad nga wala panag-iyaha sa Simbahan. Alang sa impormasyon mahitungod kon unsaon sa pagkuha og sertipiko sa insurance, tan-awa sa 20.7.3.5.

20.8.3

Mga Kalihokan nga Mabuhisan

Ang mga lider moseguro nga ang mga kalihokan dili makaparisgo sa kahimtang sa Simbahan nga walay buhis. Alang sa mga lagda, tan-awa sa 34.8.1.