21.

Jerbal in Karejar

21.0

Kadkad in

Jerbal in karejar meļeļein jipan̄ ro jet āinwōt kar Rilo̧mo̧o̧r (lale Matu 20:26–28). E ekar iakwe, katakin, jar, kaeņōm̧m̧an, im kōjeraam̧m̧an ro Ipeļaakin (lale Jerbal 10:38). Āinwōt rikaļoor ro an Jisōs Kraist, jej kappukot n̄an jerbal in karejar n̄an ajri ro nejin Anij.

Irooj ej kōņaan bwe aolep membōr ro an Kabun̄ in ren bōk kain kea rōt in. Kōn un in, rikabwijer priesthood ro rej jitōn er āinwōt karejar m̧aan n̄an kajjojo m̧ōn membōr. Karejar kōrā ro rej jitōn̄ er n̄an kajjojo kōrā erūtto. Ijjitōn̄ kein rej jipan̄ lukkuun lale jen keeememej im kear kōn ro rej uwaan Kabun̄ in (lale Moronai 6:4).

Jerbal in karejar ej juon wāween eo eaorōk jej kōjparok kien ko n̄an iakwe Anij im n̄an iakwe ro rūtūrir (lale Matu 22:36–40). Ej barāinwōt juon wāween elukkuun aorōk n̄an jipan̄ kadedeļo̧k jerbal in lo̧mo̧o̧r eo an Anij im mour ijo eutiej tata.

Būreejtōnji ro an Doulul eo an em̧m̧aan ro im Doulul eo an Kōrā ro rej jipan̄ rikarejar m̧aan im rikarejar kōrā ro ekkatak wāween n̄an jerbal in karejar n̄an ro jet. Rej barāinwōt bōk im̧we, tōl, im rie. Remaron̄ kōm̧m̧ane menin ilo iien intōrpiu ko an jerbal in karejar (lale 21.3), ilo Iien Jar ko ilo Jabōt, im ilo bwebwenato ko ad make. Rej kappukot im̧we jān jeje ko rekwojarjar, jebta in, im ministering.ChurchofJesusChrist.org.

21.1

Eddo ko an Rikarejar Kōrā im M̧aan ro

Rikarejar kōrā im m̧aan ro rej bōk jikin ilo etan Irooj. Rej barāinwōt jipan̄ membōr ro en̄jake iakwe im rie an bisop eo im Doulul eo an Kōrā ro im ritōl ro an em̧m̧aan ro. Er rej “emmejraake ” ro uwaan Kabun̄ in im “pād ippāer im kōkakajoorļo̧k er” (Katak im Bujen Ko 20:53).

Rikarejar kōrā ro im m̧aan ro ewōt aer eddo ko me rej elaajrak n̄an kajjojo im baam̧le ko me kar jitōn̄ er n̄an loļo̧k:

• Jipan̄ er kōkajoorļo̧k tōmak ko aer ilo Jemedwōj Ilan̄ im Jisōs Kraist.

• Jipan̄ kōpooj er n̄an kōm̧m̧an im kōjparok bujen ko ippān Anij ilo aer bōk kain̄i ko. N̄e emenin aikuj, jipan̄ pāāren ro kōpooj er n̄an bōk kain̄i ko im kōjparok bujen ko.

• Jeļā kōn aikuj ko im kwaļo̧k iakwe, kea, im jipan̄ āinwōt an Kraist. Leļo̧k jipan̄ im kaeņōm̧m̧an ilo iien aikuj ko aer ilo mour in jetōb im kanniōk jim̧or. Kōnono kōn aikuj ko ilo iien intōrpiu ko an jerbal in karejar im ilo iien ko jet.

• Jipan̄ er un̄n̄are peier make ilo mour in jetōb im kanniōk jim̧or.

N̄an meļeļe ko reļļapļo̧k kōn eddo ko an rikarejar kōrā im m̧aan ro, lale Jemes 1:27, Mosaia 23:18, im Katak im Bujen Ko 20:47, 59.

Rikarejar kōrā im m̧aan ro rej jar ilo aer kappukot tōl eo an Jetōb. Rej barāinwōt kapilōk ippān ro rej jipan̄ er n̄an meļeļe wāween eo em̧m̧an tata n̄an jipan̄ er tōpar ak kakke aikuj ko aer.

Rikarejar kōrā im m̧aan rej ukukot n̄an kakkare kijejeto ko aer n̄an aikuj ko im jekjek ko an ro rej jerbal ak jipan̄ er. Rej rōjan̄ n̄an kōm̧m̧an loļo̧k ko an juon make, lale wāween ko āinwōt kōjparok, ettoļo̧k, im ekkar n̄an manit. Rikarejar kōrā im m̧aan ro remaron̄ bar jipan̄ ilo wāween ko jet. Men kein ekitbuuj taļeboon call, bitio call, text, email, jeje ilo leta, im social media, tōpar er ilo m̧ōn jar eo, im jerbal in jipan̄ ko.

Ewōr aikuj ko me rikarejar m̧aan ak kōrā ro rejjab maron̄ ioon doon makeļo̧k iaer. Ilo kain jekjek rōt in, rej ko̧o̧njeļ ippān juon membōr in būreejtōnji eo an Doulul eo an Kōrā im doulu eo an em̧m̧aan ro.

21.2

Ejaak im Kōjeikiik Jerbal in Karejar

Rilo̧mo̧o̧r ekar letk n̄an rikaļoor ro An ijjitōn̄ ak eddo ko eļap unier (lale Luk 10:1–17; bar lale 4.2.6 ilo bok in). Ļoor jekjek in, jej bōk ijjitōn̄ in jerbal in karejar n̄an kajjojo armej im baam̧le ko. Juon wāween jino kōjeikiik n̄an jerbal in karejar ej jipan̄ leļo̧k n̄an kajjojo iien em̧m̧an n̄an en̄jake iakwe eo an Rilo̧mo̧o̧r.

21.2.1

Kōm̧m̧an Ijjitōn̄ Ko

Būreejtōnji eo an Doulul eo an em̧m̧an ro im Doulul eo an Kōrā ro rej jar ilo aer kōm̧m̧ani ijjitōn̄ ko n̄an rikarejar kōrā im m̧aan ro. Rej bar lale kajoor im m̧ōjņo ko an membōr ro. Rej barāinwōt ļōmņak kōn aikuj ko an ajri ro ilo baam̧le eo. Ekkā aer jitōn̄ ruo brother ak ruo sister bwe ren kōmpānien. Rej bōk mālim an bisop eo ikkijeen kōmpānien im ijjitōn̄ ko an jerbal in karejar.

N̄e kōm̧m̧ani kālet kein, ritōl ro rej ļōmņak kōn laajrak in:

• Rikarejar m̧aan im kōrā ro rej wūjepļo̧k aer rej aikuj jitōn̄ er n̄an loļo̧k membōr ro me elukkuun ļap aikuj eo aer ak relukkuun m̧ōjņo. Rein emaron̄ koba membōr ro rekāāl, pāāren ro ejjeļo̧k pāleer, kōrā ro ejjeļo̧k pāleer, em̧m̧aan ro ejjeļo̧k pāleer, im membōr ro me rejāniknik.

• Jodikdik ro remaron̄ jipan̄ āinwōt kōmpānien n̄an rūtto ro ekkar n̄an laajrak in tōl ko ilo 21.2.2.

• Ripālele ro reddik maron̄ jitōn̄ er n̄an jerbal in karejar ippān doon n̄an juon armej ak juon baam̧le.

• Stake būreejtōnji im bisoprik rej kea kōn membōr ro ilo stake ak ward. Kōn menin, ilo m̧ool rejjab ijjitōn̄ āinwōt rikarejar m̧aan. Stake būreejtōn eo ej kālet eļan̄n̄e high ko̧o̧njeļ ro im petriak ro rej ebbōk ijjitōn̄.

Ālkin an bisop eo kōmālimi, juon membōr in doulul eo an em̧m̧aan ro rej leļo̧k ijjitōn̄ ko n̄an rikarejar m̧aan ro, ekoba likao ro. Juon membōr in būreejtōnji eo an Doulul eo an Kōrā ro ej leļo̧k ijjitōn̄ ko n̄an rikarejar kōrā ro, ekoba jiron̄ ro.

Ritōl rein rej ko̧o̧njeļ ippān rikarejar m̧aan im kōrā ro kōn kajoor, m̧ōjņo, im apan̄ ko an ro me rej loļo̧k er ak jerbal in karejar n̄an er. Ritōl ro rej rōjan̄ rikarejar m̧aan ak kōrā ro n̄an meļeļe aikuj ko an ro me em̧ōj kar jitōn̄ er n̄an loļo̧k er, innem kappukot im̧we kōn wāween eo em̧m̧antata n̄an jipan̄.

Rikarejar m̧aan im kōrā ro rejjab kūr er, rejjab rejtak, ak kōjenolo̧k er. Jerbal in jipan̄ ko aer rej m̧ōttan ļo̧k bujen eo rekar kōm̧m̧ane ke rekar peptaij (lale Mosaia 18:8–11).

21.2.2

Ijjitōn̄ ko an jerbal in karejar n̄an Jodikdik ro

M̧okta jān aer bōk ijjitōn̄ ko an jerbal in karejar, jodikdik ro rej jerbal in karejar n̄an ro jet ilo aer jipan̄ er ilo wāween ko āinwōt an Kraist. Jerbal in jipan̄ eo an jodikdik ro āinwōt rikarejar kōrā ak m̧aan maron̄ juon m̧ōttan eļap an jipan̄ kadedeļo̧k jerbal in lo̧mo̧o̧r eo an Anij im mour ijo eutiej tata.

Juon jiron̄ eo emaron̄ kōmpānion ippān juon sister ilo Doulul eo an Kōrā n̄e jiron̄ eo ej kōņaan im emaron̄. Liin emaron̄ jino jerbal ilo iiō eo ej tōpar 14. Būreejtōnji eo an Doulul eo an Kōrā ro rej ko̧o̧njeļ ippān jiron̄ eo, ro jinen im jemān, im būreejtōnji eo an Doulul eo an Jiron̄ ro ilo aer ļōmņak kōn ijjitōn̄ ko an jerbal in karejar.

Ekkā an juon kōjeram̧m̧an n̄an juon sister n̄an m̧ōttāiki jiron̄ eo me ej jerbal in karejar n̄an e. Emaron̄ barāinwōt erom̧ juon kōjeram̧m̧an n̄an jiron̄ ro.

Juon likao ej jerbal āinwōt juon kōmpānion ilo jerbal in karejar n̄an juon rikabwijer Melkisedek Priesthood n̄e ej ekkapit n̄an opij eo an rūkaki ak pris. Bisop eo ej kālet eļan̄n̄e likao eo ej erreo im pojak n̄an ekkapit. (Lale 10.1.3.2.) Būreejtōnji eo an doulul eo an em̧m̧aan ro rej ko̧o̧njeļ ippān likao eo, ro jinen im jemān, im bisoprik eo ilo aer ļōmņak kōn ijjitōn̄ ko an jerbal in karejar.

Ilo bar jet jekjek, jodikdik ro remaron̄ bōk ijjitōn̄ āinwōt kein kajilu ak en jilu armej ilo juon kōmpānion an jerbal in karejar. Ritōl ro remaron̄ jitōn̄ jodikdik ro n̄an jipan̄ jerbal in karejar n̄an jet ak aolep kajjojo im baam̧le ko me kar jitōn̄ er n̄an kōmpānien.

Jodikdik ro ejjeļo̧k aer rikarejar m̧aan ak kōrā kar jitōn̄e n̄an er. Rej bōk kea ilo aer jerbal in karejar jān rikarejar m̧aan ro an baam̧le eo. Kūlaaj ko aer ak būreejtōnji eo an doulul eo im ritōl ro rerūtto rej barāinwōt jerbal in karejar n̄an er. Eļan̄n̄e ro jineer im jemāer rejjab membōr in Kabun̄ in ak rej kōtļo̧k n̄an jerbal in karejar remaron̄ jitōn̄ rikarejar m̧aan n̄aan baam̧le eo. Ejjeļo̧k oktak, Būreejtōnji eo an Doulul eo an Relief Society remaron̄ jitōn̄ rikarejar kōrā ro bwe ren kōmpānien ippān jineer.

Unin tōl eo an Kabun̄ in ej kwaļo̧k bwe n̄e ruo rūtto ro me rej m̧ōttaik juon jodikdik ejjab jerbal n̄an ijjitōn̄ ko ikkijeen kōmpānien in jerbal in karejar. Mekarta, ritōl ro rej aikuj kōjerbal mālōtlōt im kappukot im̧we eo n̄e kappeik jodikdik ro āinwōt ro n̄an kōmpānien ippān rūtto ro. Rej barāinwōt kappukot tōl jān bisop eo. N̄e juon jodikdik kar jitōn̄ er n̄an kōmpānien ippān juon eo me ejjab an pāāren, ritōl ro rej aikuj lukkuun lale bwe pāāren ro ren jab abōņōņō kōn ijjitōn̄ eo.

Kōmpānien ro rerūtto rej aikuj jab kōjekdooni jekjek ko me remaron̄ jab meļeļe kaki. Rej kea ilo jekjek ko an juon im juon. Rej jipan̄ jodikdik ro bwe bōk en̄jake ko rejokņe im rem̧m̧an kōn jerbal in karejar.

21.2.3

Mijenede ro rej Jerbal Aolep Raan

Eļan̄n̄e mijen būreejtōn eo ej kōmālimi, mijinede ro rej jerbal aolep raan remaron̄ jipan̄ kōn jerbal in karejar. Ritōl ro an ward eo remaron̄ bōk kōmālimi eo an jān stake būreejtōn eo. Mijinede ro me rej jerbal aolep raan ekkā jitōn̄ er n̄an jerbal in karejar n̄an membōr ro rekāāl, baam̧le ko me jet wōt uwaer rej membōr, im membōr ro me rejaniknik.

21.3

Intōrpiu ko ikkijeen Jerbal in Karejar

Rilo̧mo̧o̧r ekar kōm̧m̧an intōrpiu ekabwilōn̄lōn̄ im eļam waan ippān Piter kōn naajdik sip ko An (lale Jon 21:15–17). Intōrpiu ko ikkijeen jerbal in karejar emaron̄ erom̧ juon iien em̧m̧an ejjeļo̧k oktak. Rej kōtļo̧k bwe ritōl ro ren kwaļo̧k juon waanjon̄ak kōn jerbal in karejar.

Būreejtōn eo an Doulul eo an Elder ro im rikakpilōklōk ro an rej intōrpiu ippān rikarejar m̧aan ro. Būreejtōn eo an Doulul eo an Kōrā ro im rikakpilōklōk ro an rej intōrpiuiki rikarejar kōrā ro. Ripālele ro em̧ōj aer m̧are kar jitōn̄ er bwe ren jerbal in karejar ippān doon remaron̄ kweilo̧k ippān juon iaan ritōl ro an doulul eo an elder ro ak Doulul eo an Kōrā ak jim̧or.

Intōrpiu kein rej kōm̧m̧an diktata juon kōttan ilo juon kuwata. Remaron̄ kōm̧m̧ane jabdewōt iien ilo kuwata eo. Kōņaan eo, intorpiu kein rej kōm̧m̧an ilo ad lukkuun jelm̧ae armej ro im ippān jim̧or kōmpānien ro jim̧or. Jodikdik ro kōn ijjitōn̄ in jerbal in karejar rej aikuj bar kobaiki n̄e emaron̄.

Intōrpiu in jipan̄ ko rejjab aikuj in lukkuun aitok im wājabdik. Unin kōttōpar ko n̄an:

• Kapilok kōn kajoor ko, aikuj ko, im apan̄ ko an ro kajjojo ro kar jitōn̄ er ak baam̧le ko.

• Kōnono kōn wāween ko n̄an jipan̄ armej ro kōpopo n̄an bōk kain̄i ko eļan̄n̄e emenin aikuj.

• Ļōmņak kōn wāween an Doulul eo an elder ro, Doulul eo an kōrā ro, ward ko̧o̧njeļ eo, im ro jet maron̄ jipan̄.

• Jerbal in karejar n̄an m̧aan im kōrā ro rej kōm̧m̧an jerbal in karejar. Kwaļok iakwe im kam̧m̧olol. Katakin im Rōjan̄ er. Jipan̄ er eddōkļo̧k ilo jon̄an maron̄ ko aer n̄an bōk im m̧akūtkūt kōn revelesōn ilo jerbal ko aer.

Ijjeļo̧k intōrpiu ko, rikarejar m̧aan im kōrā ro rej kōnono ippān ritōl ro n̄e emenin aikuj. Remaron̄ kwaļo̧k meļeļe ko rettiņo̧ kajju n̄an ippān bisop eo.

Ritōl ro rej kōjerbal Leader and Clerk Resources n̄an riboote intōrpiu ko ikkijeen jerbal in karejar.

21.4

Kōjeikiik Kijejeto ko ikkijeen Jerbal in Karejar

Doulul eo an Kōrā ro im Doulul eo an elder ro rej jipan̄ doon kōn jerbal in karejar. Rej kōm̧m̧ane menin ilo bōro kuk.

Doulul eo an Kōrā ro im Doulul eo an Elder ro rej kweilo̧k ippān doon diktata aolep kuwata. Rej etale ta ko rekar ekkatak ilo intōrpiu ko ikkijeen jerbal in karejar (lale 21.3). Rej barāinwōt kōjeikiik ijjitōn̄ ko ikkijeen jerbal in karejar. Būreejtōn ro ruo rej jipan̄ doon kōn eddo eo ilo aer ejaake im tōl kweilo̧k eo.

Ilo iunit ko ippān jejjo membōr ro rekajoor, Doulul eo an Kōrā ro im Doulul eo an Elder ro remaron̄ kālet n̄an jab jitōn̄ jim̧or rikarejar kōrā im rikarejar m̧aan n̄an jet membōr. Ritōl ro rej kōm̧m̧ane kālet in ippān doon im bōk mālim jān bisop eo. Eļan̄n̄e juon kōrā kar jitōn̄ rikarejar kōrā n̄an jerbal in karejar n̄an e ak ejjab rikarejar m̧aan, ritōl ro rej lukkuun lale bwe emaron̄ wōr juon eo emaron̄ kajjitōk ippān n̄an leļo̧k juon kōjeraam̧m̧an an priesthood.

Būreejtōn ro an Doulul eo an Kōrā ro im doulul eo an elder ro rej kweilo̧k ippān doon diktata aolep kuwata ippān bisop eo. Rej kōnono kōn aikuj ko an membōr ro ilo ward eo. Rej kōnono kōn oktak ko remaron̄ bōk jikier ilo ijjitōn̄ ko an jerbal in karejar.

N̄e emenin aikuj, Būreejtōn eo an Doulul eo an Kōrā ro im Doulul eo an Elder ro rej kōnono ippān ward ko̧o̧njeļ eo meļeļe ko rekar bōki jān rikarejar kōrā ro im rikarejar m̧aan ro. Ilo aer kōm̧m̧ane, rej kwaļo̧k kajjitōk ko an membōr ro n̄an kōm̧m̧ani ilo ittiņo. Āinwōt kōtōbalbale jān bisop eo, ward ko̧o̧njeļ eo ej kōm̧m̧ani karōk ko n̄an jerbal im kōjeram̧m̧an membōr ro an ward eo Ko̧o̧njeļ eo an jodikdik ro an ward eo rej barāinwōt ekōnono kōn jerbal in karejar eo (lale 29.2.6).