21.

Pagpangalagad

21.0

Pasiuna

Ang pagpangalagad nagpasabot sa pagserbisyo sa uban sama sa gibuhat sa Manluluwas (tan-awa sa Mateo 20:26–28). Gihigugma, gitudloan, giampo, gihupay, ug gipanalanginan Niya kadtong nagpalibot Kaniya (tan-awa sa Mga Buhat 10:38). Isip mga disipulo ni Jesukristo, kita magtinguha sa pagpangalagad sa mga anak sa Dios.

Gusto sa Ginoo nga ang tanang miyembro sa Iyang Simbahan makadawat sa ingon nga pag-amuma. Alang niini nga rason, ang mga naghupot sa pagkapari gisangonan isip tigpangalagad nga mga igsoong lalaki ngadto sa matag miyembro nga pamilya. Ang tigpangalagad nga mga igsoong babaye gisangonan ngadto sa matag hamtong nga igsoong babaye. Kini nga mga buluhaton motabang sa pagseguro nga ang mga miyembro sa Simbahan nahinumdoman ug naatiman (tan-awa sa Moroni 6:4).

Ang pagpangalagad usa ka importanteng paagi nga atong matuman ang mga sugo sa paghigugma sa Dios ug sa paghigugma sa atong mga silingan (tan-awa sa Mateo 22:36–40). Usa usab kini ka mahinungdanong paagi sa pagtabang nga matuman ang buhat sa Dios sa kaluwasan ug kahimayaan.

Ang mga kapangulohan sa korum sa mga elder ug Relief Society motabang sa tigpangalagad nga mga igsoong lalaki ug mga igsoong babaye nga makat-on unsaon sa pagpangalagad sa uban. Mohatag usab sila og inspirasyon, giya, ug suporta. Mahimo nila kini diha sa mga interbiyo sa pagpangalagad (tan-awa sa 21.3), sa mga miting sa Dominggo, ug sa personal nga pag-istoryahanay. Magtinguha sila og inspirasyon gikan sa mga kasulatan, niini nga kapitulo, ug sa ministering.ChurchofJesusChrist.org.

21.1

Mga Responsibilidad sa Tigpangalagad nga mga Igsoong Babaye ug mga Igsoong Lalaki

Ang tigpangalagad nga mga igsoong babaye ug mga igsoong lalaki nagrepresentar sa Ginoo. Motabang usab sila sa mga miyembro nga mobati sa gugma ug suporta sa bishop ug sa mga lider sa Relief Society o sa korum. Sila kinahanglang “[mag]bantay”sa mga miyembro sa Simbahan ug “magpaduol ug maglig-on kanila” (Doktrina ug mga Pakigsaad 20:53).

Ang tigpangalagad nga mga igsoong babaye ug mga igsoong lalaki aduna sa mosunod nga mga responsibilidad alang sa mga indibidwal ug mga pamilya nga gisangon kanila:

• Motabang kanila sa paglig-on sa ilang hugot nga pagtuo diha sa Langitnong Amahan ug ni Jesukristo.

• Motabang kanila nga mangandam sa paghimo ug pagtuman og sagradong mga pakigsaad sa Dios samtang modawat sila sa mga ordinansa. Kon gikinahanglan, motabang sa mga ginikanan sa pag-andam sa ilang mga anak sa pagdawat sa mga ordinansa ug pagtuman sa mga pakigsaad.

• Moila sa mga panginahanglan ug mohatag og Kristohanong gugma, pag-amuma, ug pagserbisyo. Motanyag og tabang ug kahupayan sa mga panahon sa espirituwal o temporal nga panginahanglan. Mohisgot sa mga panginahanglan atol sa mga interbiyo sa pagpangalagad ug sa ubang panahon.

• Motabang kanila nga makabarog sa kinaugalingon nga paningkamot sa espirituwal ug temporal nga paagi.

Alang sa dugang pa mahitungod sa mga responsibilidad sa tigpangalagad nga mga igsoong babaye ug mga igsoong lalaki, tan-awa sa Santiago 1:27, Mosiah 23:18, ug Doktrina ug mga Pakigsaad 20:47, 59.

Ang tigpangalagad nga mga igsoong babaye ug mga igsoong lalaki mainampoong magtinguha sa giya sa Espiritu. Makigtambag usab sila niadtong ilang giserbisyohan aron makasabot kon unsaon nga labing makatabang kanila sa pagtubag sa ilang mga panginahanglan.

Ang tigpangalagad nga mga igsoong babaye ug mga igsoong lalaki mopahiangay sa ilang mga paningkamot ngadto sa mga panginahanglan ug mga sirkumstansiya niadtong ilang giserbisyohan. Ang personal nga mga pagbisita giawhag, nga magkonsiderar sa mga kahimtang sama sa seguridad, gilay-on, ug pagkaangay sa kultura. Ang tigpangalagad nga mga igsoong babaye ug mga igsoong lalaki makatabang usab sa ubang mga paagi. Naglakip kini sa pagtawag sa telepono, mga video call, mga text, mga email, mga sulat, social media, pagkontak diha sa simbahan, ug mga buhat sa pagserbisyo.

Tingali adunay mga panginahanglan nga dili matubag sa tigpangalagad nga mga igsoong lalaki o mga igsoong babaye nga sila lang. Sa ingon nga mga sitwasyon, makigtambag sila sa usa ka sakop sa kapangulohan sa Relief Society o korum sa mga elder.

21.2

Pag-organisar sa Pagpangalagad

Ang Manluluwas mihatag sa Iyang mga disipulo og makahuloganong mga buluhaton (tan-awa sa Lucas 10:1–17; tan-awa usab sa 4.2.6 niini nga tamdanan nga basahon). Sa pagsunod niini nga sundanan, makadawat kita og mga buluhaton sa pagpangalagad sa piho nga mga indibidwal ug mga pamilya. Ang naorganisar nga paagi sa pagpangalagad makahatag sa matag tawo og mga oportunidad nga mobati sa gugma sa Manluluwas.

21.2.1

Paghimo og mga Buluhaton

Ang mga kapangulohan sa korum sa mga elder ug sa Relief Society mainampoong mokonsiderar sa mga buluhaton alang sa tigpangalagad nga mga igsoong lalaki ug mga igsoong babaye. Sila maghunahuna sa mga kalig-on ug mga panginahanglan sa mga miyembro. Sila usab mokonsiderar sa mga panginahanglan sa mga bata sa pamilya. Sila sa kasagaran mosangon sa duha ka igsoong lalaki o duha ka igsoong babaye isip managkompanyon. Sila mangayo sa pagtugot sa bishop alang sa mga managkompanyon ug mga buluhaton sa pagpangalagad.

Kon maghimo niini nga mga desisyon, ang mga lider mokonsiderar sa mosunod:

• Ang mapahinungurong tigpangalagad nga mga igsoong lalaki ug mga igsoong babaye kinahanglang sangonan ngadto sa mga miyembro nga adunay labing dakong panginahanglan. Tingali maglakip kini sa bag-ong mga miyembro, mga ginikanan nga walay kapikas, mga biyuda, mga biyudo, ug dili kaayo aktibo nga mga miyembro.

• Ang mga batan-on mahimong moserbisyo isip mga kompanyon sa mga hamtong sumala sa mga lagda diha sa 21.2.2.

• Ang managtiayon mahimong sangonan nga magkauban nga mangalagad ngadto sa usa ka tawo o pamilya.

• Ang mga kapangulohan sa stake ug mga bishopric moatiman sa tanang miyembro sa stake o ward. Tungod niini, sa kasagaran dili sila sangonan isip tigpangalagad nga mga igsoong lalaki. Ang presidente sa stake motino kon ang mga high councilor ug functioning nga patriyarka sangonan ba.

Human ang bishop makahatag og pagtugot, ang usa ka sakop sa kapangulohan sa korum sa mga elder mopadangat sa mga buluhaton ngadto sa tigpangalagad nga mga igsoong lalaki, lakip sa mga batan-ong lalaki. Ang usa ka sakop sa kapangulohan sa Relief Society mopadangat sa mga buluhaton ngadto sa tigpangalagad nga mga igsoong babaye, lakip sa mga batan-ong babaye.

Kini nga mga lider makigtambag sa tigpangalagad nga mga igsoong lalaki o mga igsoong babaye mahitungod sa mga kalig-on, mga panginahanglan, ug mga hagit niadtong ilang pangalagaran. Ang mga lider moawhag sa tigpangalagad nga mga igsoong lalaki o mga igsoong babaye sa pagsabot sa mga panginahanglan niadtong gisangon kanila, dayon magtinguha og inspirasyon kon unsaon nga labing maayong makaserbisyo.

Ang tigpangalagad nga mga igsoong lalaki ug mga igsoong babaye dili tawagon, paluyohan, o i-set apart. Ang ilang pagserbisyo kabahin sa ilang pakigsaad nga ilang gihimo sa bunyag (tan-awa sa Mosiah 18:8–11).

21.2.2

Mga Buluhaton sa Pagpangalagad alang sa Kabatan-onan

Bisan sa wala pa sila makadawat og mga buluhaton sa pagpangalagad, ang mga batan-on mangalagad ngadto sa uban pinaagi sa pagserbisyo kanila sa Kristohanong mga paagi. Ang pagserbisyo sa batan-on isip tigpangalagad nga igsoong babaye o igsoong lalaki mahimong dakong bahin sa pagtabang nga matuman ang buhat sa Dios sa kaluwasan ug kahimayaan.

Ang usa ka batan-ong babaye mahimong moserbisyo isip tigpangalagad nga kompanyon ngadto sa usa ka igsoong babaye sa Relief Society kon ang batan-ong babaye andam ug makahimo. Mahimo siyang mosugod sa pagserbisyo sa tuig nga siya mag-edad na og 14. Ang kapangulohan sa Relief Society makigtambag sa batan-ong babaye, sa iyang mga ginikanan, ug sa kapangulohan sa Young Women samtang ilang ikonsiderar ang mga buluhaton sa pagpangalagad.

Kasagaran usa kini ka panalangin ngadto sa igsoong babaye nga adunay batan-ong babaye nga mangalagad kaniya. Mahimo usab kining usa ka panalangin ngadto sa batan-ong babaye.

Ang usa ka batan-ong lalaki moserbisyo isip tigpangalagad nga kompanyon ngadto sa usa ka naghupot sa Melchizedek nga Pagkapari kon siya na-orden sa katungdanan sa teacher o priest. Ang bishop motino kon ang batan-ong lalaki takos ug andam nga maordenahan. (Tan-awa sa 10.1.3.2.) Ang kapangulohan sa korum sa mga elder makigtambag sa batan-ong lalaki, sa iyang mga ginikanan, ug sa bishopric samtang ilang ikonsiderar ang mga buluhaton sa pagpangalagad.

Sa ubang mga sitwasyon, ang kabatan-onan mahimong sangonan isip ikatulong sakop sa tigpangalagad nga managkompanyon. Ang mga lider mahimong mosangon sa kabatan-onan nga motabang sa pagpangalagad ngadto sa pipila o sa tanang indibidwal ug mga pamilya nga gisangon sa managkompanyon.

Ang kabatan-onan walay tigpangalagad nga mga igsoong lalaki o mga igsoong babaye nga isangon kanila. Modawat sila og mapangalagarong pag-atiman gikan sa tigpangalagad nga mga igsoong lalaki sa ilang pamilya. Ang kapangulohan sa ilang klase o korum ug ang hamtong nga mga lider mangalagad usab kanila. Kon ang ilang mga ginikanan dili mga miyembro sa Simbahan apan bukas nga modawat og pagpangalagad, ang kapangulohan sa korum sa mga elder mahimong mosangon og tigpangalagad nga mga igsoong lalaki ngadto kanila. Sa samang paagi, ang kapangulohan sa Relief Society mahimong mosangon og tigpangalagad nga mga igsoong babaye ngadto sa inahan.

Ang lagda sa Simbahan nga duha ka responsable nga mga hamtong nga anaa kauban sa batan-on dili magamit diha sa tigpangalagad nga mga kompanyon. Hinoon, ang mga lider mogamit og kaalam ug magtinguha og inspirasyon kon mosangon og batan-on isip mga kompanyon sa mga hamtong. Magtinguha usab sila og giya gikan sa bishop. Kon ang usa ka batan-on isangon ngadto sa usa ka kompanyon kinsa dili iyang ginikanan, ang mga lider kinahanglang mokompirma nga ang mga ginikanan dili mosupak sa buluhaton.

Ang hamtong nga mga kompanyon kinahanglan maglikay og mga sitwasyon nga mahimong masaypan sa pagsabot. Kinahanglang mag-amping sila sa mga sitwasyon nga usa ka hamtong ug usa ka batan-on ra ang anaa. Motabang sila sa batan-on nga makaangkon og luwas ug nindot nga kasinatian sa pagpangalagad.

21.2.3

Full-Time nga mga Misyonaryo

Kon tugotan sa presidente sa misyon, ang full-time nga mga misyonaryo makatabang sa pagpangalagad. Ang mga lider sa ward makahangyo sa iyang pagtugot pinaagi sa presidente sa stake. Ang full-time nga mga misyonaryo sangonan sa kasagaran sa pagbisita sa bag-ong mga miyembro, mga pamilya nga dili tanan miyembro, ug dili kaayo aktibo nga mga miyembro.

21.3

Mga Interbiyo sa Pagpangalagad

Ang Manluluwas adunay yano apan makahuloganong interbiyo kang Pedro mahitungod sa pagpakaon sa Iyang mga karnero (tan-awa sa Juan 21:15–17). Ang mga interbiyo sa pagpangalagad mahimong susama nga oportunidad. Nagtugot usab kini sa mga lider sa paghimo og ehemplo sa pagpangalagad.

Ang presidente sa korum sa mga elder ug ang iyang mga magtatambag mointerbiyo sa tigpangalagad nga mga igsoong lalaki. Ang presidente sa Relief Society ug ang iyang mga magtatambag mointerbiyo sa tigpangalagad nga mga igsoong babaye. Ang minyo nga magtiayon nga gisangonan sa pagpangalagad mahimong makigmiting sa mga lider sa korum sa mga elder o sa Relief Society o sa duha.

Kini nga mga interbiyo ipahigayon dili mominos kausa matag tulo ka bulan. Mahimo kining ipahigayon bisan kanus-a sulod sa tulo ka bulan. Mas maayo, ang mga interbiyo himoon sa personal ug mag-uban ang mga sakop sa magkompanyon. Ang mga batan-on nga adunay mga buluhaton sa pagpangalagad kinahanglang ilakip kon mahimo.

Ang interbiyo sa pagpangalagad dili kinahanglan nga dugay aron mahimong epektibo. Ang mga katuyoan niini mao ang:

• Pagtinambagay mahitungod sa mga kalig-on, mga panginahanglan, ug mga hagit sa gisangon nga mga indibidwal ug mga pamilya.

• Paghisgot og mga paagi sa pagtabang og mga tawo nga mangandam sa pagdawat sa mga ordinansa kon gikinahanglan.

• Pagkonsiderar kon sa unsang paagi nga makatabang ang korum sa mga elder, Relief Society, konseho sa ward, ug uban pa.

• Pagpangalagad ngadto sa tigpangalagad nga mga igsoong lalaki ug mga igsoong babaye. Pagpakita og gugma ug pagdayeg. Pagtudlo ug pag-awhag nila. Pagtabang nila nga molambo sa ilang kapasidad sa pagdawat ug pagbuhat ubos sa pagpadayag sa ilang pagserbisyo.

Kon wala pay mga interbiyo, ang tigpangalagad nga mga igsoong lalaki ug mga igsoong babaye makig-istorya sa mga lider kon gikinahanglan. Mahimo silang mopaambit og kompidensiyal nga impormasyon direkta sa bishop.

Ang mga lider mogamit sa Leader and Clerk Resources aron sa pag-report sa mga interbiyo sa pagpangalagad.

21.4

Pagkoordinar sa mga Paningkamot sa Pagpangalagad

Ang Relief Society ug ang korum sa mga elder makigbahin sa buhat sa pagpangalagad. Himoon nila kini nga buhat nga magkahiusa.

Ang mga kapangulohan sa Relief Society ug korum sa mga elder magmiting dili mominos sa matag tulo ka bulan. Morebyo sila sa unsay ilang nakat-onan sa mga interbiyo sa pagpangalagad (tan-awa sa 21.3). Mokoordinar usab sila sa mga buluhaton sa pagpangalagad. Ang duha ka presidente makigbahin sa responsibilidad sa pag-organisar ug pagpahigayon sa miting.

Sa mga yunit nga diyotay ra ang aktibong mga miyembro, ang mga kapangulohan sa Relief Society ug korum sa mga elder mahimong mohukom nga dili mosangon og tigpangalagad nga mga igsoong babaye ug tigpangalagad nga mga igsoong lalaki ngadto sa ubang mga miyembro. Ang mga lider mohimo niini nga desisyon ug magtinguha sa pagtugot sa bishop. Kon ang usa ka igsoong babaye gihatagan og tigpangalagad nga mga igsoong babaye apan dili tigpangalagad nga mga igsoong lalaki, ang mga lider moseguro nga aduna siyay kapangayoan og panalangin sa pagkapari.

Ang mga presidente sa Relief Society ug korum sa mga elder magmiting labing minos matag tulo ka bulan uban sa bishop. Maghisgot sila sa mga panginahanglan sa mga miyembro sa ward. Maghisgot usab sila sa posibleng mga kausaban sa mga buluhaton sa pagpangalagad.

Kon gikinahanglan, ang mga presidente sa Relief Society ug korum sa mga elder mohisgot diha sa konseho sa ward sa impormasyon nga gipaambit sa tigpangalagad nga mga igsoong babaye ug mga igsoong lalaki. Sa ilang pagbuhat niini, motahod sila sa mga hangyo sa mga miyembro alang sa pagkakompidensyal niini. Sumala sa pagpakigsabot sa bishop, ang konseho sa ward mohimo og mga plano sa pagserbisyo ug pagpanalangin sa mga miyembro sa ward. Ang konseho sa kabatan-onan sa ward maghisgot usab sa pagpangalagad (tan-awa sa 29.2.6).