23.

Pagpakigbahin sa Ebanghelyo ug Pagpalig-on sa Bag-o ug Mibalik nga mga Miyembro

23.0

Pasiuna

Ang pagdapit sa tanan nga modawat sa ebanghelyo kabahin sa buhat sa Dios sa kaluwasan ug kahimayaan (tan-awa sa 1.2 niini nga tamdanan nga basahon; Mateo 28:19–20). Kini naglakip sa:

• Pag-apil sa misyonaryo nga buhat ug pagserbisyo isip mga misyonaryo.

• Pagtabang sa bag-o ug mibalik nga mga miyembro sa Simbahan nga mouswag subay sa dalan sa pakigsaad.

23.1

Pagpaambit sa Ebanghelyo

23.1.1

Gugma

Kitang tanan mga anak sa Langitnong Amahan, kinsa hingpit nga nahigugma sa Iyang mga anak. Mitanyag Siya sa tanan sa oportunidad nga mapuno sa Iyang gugma pinaagi ni Jesukristo ug sa Iyang ebanghelyo (tan-awa sa Juan 3:16; 2 Nephi 26:24–28; Alma 26:37; Ang mga Artikulo sa Hugot nga Pagtuo 1:3).

Ang usa ka paagi nga atong mapakita ang atong gugma alang sa Dios mao ang paghigugma ug pagserbisyo sa Iyang mga anak (tan-awa sa Mateo 22:36–39; 25:40). Maningkamot kita sa paghigugma ug pagserbisyo sama ni Jesukristo. Kini nga gugma nagdasig nato sa pagtabang sa mga tawo sa tanang relihiyon, kaliwatan, ug kultura (tan-awa sa Mga Buhat 10:34; 2 Nephi 26:33).

23.1.2

Pagpaambit

Tungod kay gihigugma nato ang Dios ug ang Iyang mga anak, kita natural nga gustong mopaambit sa mga panalangin nga Iyang gihatag kanato (tan-awa sa Juan 13:34–35) ug motabang sa pagpundok sa Israel. Magtinguha kita sa pagtabang sa mga tawo nga mobati sa hingpit nga kalipay nga atong gibati (tan-awa sa Alma 36:24). Isip mga disipulo ni Jesukristo, atong ipataas ang Iyang kahayag (tan-awa sa 3 Nephi 18:24–25). Dayag kitang mosulti bahin sa Manluluwas ug sa Iyang impluwensiya sa atong mga kinabuhi (tan-awa sa Doktrina ug mga Pakigsaad 60:2).

Kita mopakigbahin og gugma, mga kamatuoran sa ebanghelyo, panahon, mga kasinatian, ug mga programa sa Simbahan sa pagpanalangin sa mga anak sa Dios ug sa pagtabang kanila nga mopaduol ngadto sa Manluluwas. Kita mopaambit niining mga butanga sa normal ug sa natural nga mga paagi isip kabahin sa personal, online, ug sa ubang mga inter-aksiyon.

23.1.3

Pagdapit

Ang Manluluwas nagdapit sa tanan nga modawat sa Iyang ebanghelyo ug moandam alang sa kinabuhing dayon (tan-awa sa Alma 5:33–34). Isip Iyang mga disipulo, kita mosunod sa Iyang ehemplo, magdapit sa tanan nga “[mo]duol ngadto ni Kristo, ug [mag]hingpit diha kaniya” (Moroni 10:32).

Mag-ampo kita alang sa inspirasyon ug giya kon unsaon sa pagdapit sa uban sa:

• Pagduol ug pagtan-aw sa mga panalangin nga anaa pinaagi ni Jesukristo, sa Iyang ebanghelyo, ug sa Iyang Simbahan (tan-awa sa Juan 1:37–39, 45–46).

• Pagduol ug pagserbisyo sa mga tawo nga nanginahanglan.

• Pagduol ug pagpasakop sa gipahiuli nga Simbahan ni Jesukristo.

Kon ang atong mga pagdapit gibase sa mga panginahanglan ug mga tinguha sa tawo, siya tingali modawat niadtong mga pagdapit. Kasagaran, ang pagdapit yano nga nagpasabot sa paglakip sa atong pamilya, mga higala, ug mga silingan sa unsay gibuhat na nato. Pananglitan, kita makadapit kanila sa:

• Pag-apil kanato diha sa atong mga panimalay alang sa mga kalihokan.

• Pag-apil kanato sa pagsimba ug pagkat-on sa ebanghelyo.

• Pagtambong sa espesyal nga mga kalihokan, sama sa pagpanalangin sa usa ka bata o bunyag.

• Pag-apil sa mga kalihokan o pagserbisyo sa ward ug sa komunidad, lakip sa mga proyekto nga naorganisar pinaagi sa JustServe.org (kon diin anaa).

• Pag-apil sa mga programa ug mga kalihokan sa Simbahan. Kini maglakip sa mga kalihokan sa Primary, mga kalihokan sa kabatan-onan, family history, mga kurso sa pagbarog pinaagi sa kinaugalingong paningkamot, BYU–Pathway Worldwide, ug mga kurso sa pagsulat ug pagbasa ug sa Iningles.

• Pagpakigkita sa full-time nga mga misyonaryo ug maminaw sa ilang mensahe.

Alang sa dugang nga mga ideya ug mga kapanguhaan, tan-awa sa:

• share.ChurchofJesusChrist.org.

• “Pagpakigbahin sa Ebanghelyo” diha sa Gospel Library.

• Ang “Makighiusa sa mga Miyembro” nga seksiyon sa kapitulo 9 sa Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo.

Ang mga ward ug mga stake makahimo og natural nga mga oportunidad alang sa mga miyembro sa pagdapit sa uban. Ang mga paagi sa paghimo niini naglakip sa pagpasiugda og mga kalihokan ug pagpakigbahin sa mga kapanguhaan sa Simbahan ngadto sa lokal nga komunidad.

Ang mga lider sa ward ug stake magtinambagay sa pag-ila sa (1) mga kinahanglanon diha sa komunidad ug sa (2) mga kapanguhaan sa Simbahan nga ipakigbahin. Alang sa dugang nga impormasyon, tan-awa sa“Sharing Church Resources” diha sa Gospel Library.

Ang mga baroganan sa paghigugma, pagpakigbahin, ug pagdapit magamit usab sa pagpalig-on sa bag-o ug mibalik nga mga miyembro.

23.2

Pagpalig-on sa Bag-ong mga Miyembro

Ang pagpasakop sa Simbahan talagsaon ug mahagiton alang sa kadaghanan. Kini nagdala og daghang panalangin, apan nagkinahanglan usab kini og kausaban ngadto sa bag-ong mga pagtuo, bag-ong mga kinaiya, ug bag-ong mga relasyon (tan-awa sa 1 Mga Taga-Tesalonica 1:6).

Ang matag bag-ong miyembro nagkinahanglan og panaghigala, mga oportunidad sa pagserbisyo, ug espirituwal nga pag-amuma. Isip mga miyembro sa Simbahan, kita mohatag sa bag-ong mga miyembro sa atong gugma ug suporta (tan-awa sa Mosiah 18:8–10). Kita motabang kanila nga mobati nga nahisakop sa Simbahan. Kita motabang kanila nga mouswag subay sa dalan sa pakigsaad ug mahimong mas lig-on nga “nakabig ngadto sa Ginoo” (Alma 23:6). Kita motabang kanila nga “maam[o]mahan pinaagi sa maayo nga pulong sa Dios, aron sa pag-agak kanila sa matar[o]ng nga dalan, … mosalig lamang diha sa mga maayo nga buhat ni Kristo” (Moroni 6:4).

Kita makatabang usab sa bag-ong mga miyembro sa:

• Pagkat-on ug pagsinati sa hingpit nga kalipay nga mahimong disipulo ni Jesukristo.

• Pagkat-on unsaon sa pag-ila sa mga pag-aghat gikan sa Espiritu.

• Pagpalambo og kinaiya sa personal ug pamilya nga pag-ampo ug sa pagtuon sa kasulatan.

• Pagpaambit sa ebanghelyo ngadto sa ilang pamilya ug mga higala.

• Pagpangita sa mga ngalan sa mga katigulangan ug pag-andam sa pagdawat sa mga ordinansa sa templo alang kanila.

• Pagtubo pinaagi sa pagtuman sa mga buluhaton sa Simbahan ug pag-apil sa daghang laing oportunidad nga gitanyag sa Simbahan.

23.3

Pagpalig-on sa Mibalik nga mga Miyembro

Ang pipila ka miyembro mipili sa paghunong sa pag-apil sa Simbahan. “Ngadto kanila,” miingon ang Manluluwas, “kamo magpadayon sa pag-alagad; kay kamo wala masay[o]d kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila; ug kamo mao ang hinungdan sa pagdala og kaluwasan ngadto kanila” (3 Nephi 18:32). Kini nga mga pulong magamit ngadto sa tanan kinsa, alang sa bisan unsa nga rason, kinahanglan nga mopadayon sa pagpangalagad.

Ang mga miyembro kinsa wala moapil sa hingpit tingali mas mobalik kon sila adunay lig-on nga mga relasyon uban sa mga miyembro sa Simbahan. Ang atong gugma ug suporta makatabang kanila nga mabuntog ang mga hagit. Sama sa bag-ong mga miyembro, sila kinahanglan og panaghigala, mga oportunidad sa pagserbisyo, ug espirituwal nga pag-amuma. Ang pagsabot sa ilang mga sirkumstansiya ug mga hagit makatabang kanato sa pagpangalagad ngadto kanila uban ang pagkasensitibo ug gugma.

23.4

Pagpahigayon og Sinemana nga mga Miting sa Pakigsabot

Matag semana, ang mubo nga dili pormal nga mga miting himoon aron masabotan ang mga paningkamot sa pagpaambit sa ebanghelyo ug pagpalig-on sa bag-o ug mibalik nga mga miyembro. Kon ang usa ka lider sa misyon sa ward gitawag, siya ang mopahigayon niini nga mga miting. Kon dili, ang mga sakop sa kapangulohan sa korum sa mga elder kinsa mohimo niini nga tahas mao ang mopahigayon.

Ang uban nga dapiton maglakip sa:

• Gisangonan nga mga sakop sa mga kapangulohan sa Relief Society ug sa korum sa mga elder.

• Mga misyonaryo sa ward.

• Usa ka kaabag sa korum sa mga priest (o presidente sa korum sa mga teacher o sa mga deacon kon walay priest diha sa ward).

• Usa ka sakop sa kapangulohan sa labing edaran nga klase sa Young Women.

• Full-time nga mga misyonaryo.

Ang sinemana nga mga miting sa pakigsabot nagtutok diha sa mga panginahanglan sa mga indibidwal. Kini nga miting kasagaran naglangkob sa mosunod nga upat ka hilisgotan:

• Unsaon sa pagtabang niadtong gitudloan sa mga misyonaryo. Kini mahimong maglakip sa pag-apil diha sa pagtudlo, pagtabang sa mga tawo sa paghimo ug pagtuman sa mga pasalig, ug sa pagsuporta sa umaabot nga mga tulumanon sa bunyag.

• Unsaon sa pagtabang niadtong bag-ohay lang nga nabunyagan

• Unsaon sa pagtabang sa mibalik nga mga miyembro

• Unsaon sa pagtabang sa mga miyembro sa pagpangita og daghan pa nga mga tawo nga katudloan

Kini nga mga miting mahimong himoon nga personal nga magkita o dili personal nga magkita. Ang pagsabot-sabot mahimo usab nga mahitabo sa ubang mga paagi, lakip sa mga tawag sa telepono, mga text, ug mga email.

23.5

Mga Lider sa Stake

23.5.1

Kapangulohan sa Stake

Ang presidente sa stake naghupot sa mga yawe diha sa stake alang sa pagpakigbahin sa ebanghelyo ug pagpalig-on sa bag-o ug mibalik nga mga miyembro. Siya ug ang iyang mga magtatambag mohatag sa kinatibuk-ang direksyon alang niini nga mga paningkamot. Siya moseguro nga kini nga buhata nahisgotan kanunay diha sa mga miting sa stake.

Kasagaran kada bulan, ang presidente sa stake makigkita sa presidente sa misyon sa pagpakigsabot sa mga paningkamot tali sa mga lider sa stake ug ward ug sa mga full-time nga mga misyonaryo. Ang uban kinsa mahimong motambong maglakip sa:

• Mga magtatambag sa mga kapangulohan sa stake o misyon.

• Gisangon nga mga high councilor.

• Presidente sa Relief Society sa stake.

• Mga misyonaryo nga gisangonan sa presidente sa misyon.

23.5.2

Komitiba sa Pagpangulo sa Hamtong diha sa Stake

Ang komitiba sa pagpangulo sa hamtong sa stake naglakip sa:

• Kapangulohan sa stake.

• Kapangulohan sa Relief Society sa stake.

• Mga high councilor nga gisangonan nga makigtambayayong sa korum sa mga elder.

Kini nga mga lider motudlo ug mosuporta sa mga kapangulohan sa korum sa mga elder ug sa Relief Society sa ward sa ilang mga paningkamot sa pagpaambit sa ebanghelyo ug pagpalig-on sa bag-o ug mibalik nga mga miyembro (tan-awa sa 23.6.2). Ang instruksiyon mahimong mahitabo diha sa grupo o sa indibidwal nga paagi. Ang mga lider sa misyon sa ward mahimong dapiton aron modawat niini nga instruksiyon.

Alang sa pa dugang mahitungod niini nga mga miting sa komitiba, tan-awa sa 29.3.8.

23.5.3

Mga High Councilor

Ang kapangulohan sa stake mahimong mosangon og mga high councilor sa pagtudlo ug pagsuporta sa mga kapangulohan sa korum sa mga elder ug sa mga lider sa misyon sa ward. Usa o daghang high councilor mahimong sangonan sa pagpangulo niini nga mga paningkamot. Hinoon, ang tanang high councilor aduna niini nga mga responsibilidad alang sa mga ward ug mga korum diin sila gisangonan.

23.5.4

Kapangulohan sa Relief Society sa Stake

Ubos sa direksyon sa presidente sa stake, ang kapangulohan sa Relief Society sa stake motudlo ug mosuporta sa mga kapangulohan sa Relief Society sa ward sa ilang mga responsibilidad sa pagpakigbahin sa ebanghelyo ug pagpalig-on sa bag-o ug mibalik nga mga miyembro.

23.6

Mga Lider sa Ward

23.6.1

Bishopric

Ang bishopric makigsabot sa mga kapangulohan sa korum sa mga elder ug sa Relief Society samtang sila mangulo sa mga paningkamot sa ward sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro. Kini nga mga lider magtinambagay kanunay.

Ang bishopric moseguro nga kini nga mga paningkamot nahisgotan ug nasabotan diha sa mga miting sa konseho sa ward ug sa konseho sa kabatan-onan sa ward. Ang bishopric usab morebyo ug moaprobar sa plano sa ward alang sa pagpakigbahin sa ebanghelyo ug pagpalig-on sa bag-o ug mibalik nga mga miyembro (tan-awa sa 23.6.6).

Ang bishopric mokonsulta sa presidente sa stake sa pagtino kon motawag ba og lider sa misyon sa ward (tan-awa sa 23.6.3 alang sa dugang nga impormasyon).

Ang bishop mointerbiyo sa bag-ong mga miyembro sa tukma nga edad alang sa rekomend sa templo aron sa pagpahigayon og puli nga mga bunyag ug mga kumpirmasyon (tan-awa sa 26.4.2). Siya usab mointerbiyo sa kaigsoonan sa tukma nga edad sa pagdawat sa Aaronic nga Pagkapari (tan-awa sa 38.2.9.1). Siya sa kasagaran mopahigayon niini nga mga interbiyo sulod sa semana sa kompirmasyon sa miyembro.

Ang bishopric makigsabot sa ubang mga lider aron sa pagseguro nga ang bag-o ug mibalik nga mga miyembro adunay mga oportunidad sa pagserbisyo. Ang mao nga mga oportunidad makatabang niini nga mga miyembro nga motubo sa espirituwal nga paagi ug mobati sa gahom sa Ginoo sa ilang mga kinabuhi. Ang pagserbisyo makatabang usab sa mga miyembro nga mobati og hingpit nga kalipay ug molig-on sa suod nga mga relasyon sa uban diha sa ward.

Kini nga mga oportunidad sa pagserbisyo kinahanglang ibase sa mga panginahanglan ug mga abilidad sa miyembro. Sa pipila ka sitwasyon, ang calling tukma. Sa uban, ang dili kaayo pormal nga buluhaton mao ang labing maayo.

23.6.2

Mga Kapangulohan sa Korum sa mga Elder ug Relief Society

Ang mga kapangulohan sa korum sa mga elder ug Relief Society mangulo sa inadlaw-adlaw nga mga paningkamot sa pagpaambit sa ebanghelyo ug sa paglig-on sa bag-o ug mibalik nga mga miyembro (tan-awa sa 8.2.3 ug 9.2.3). Ang kapangulohan sa korum sa mga elder mangulo niini nga mga paningkamot alang sa mga sakop sa korum sa mga elder. Ang kapangulohan sa Relief Society mangulo sa mga paningkamot alang sa mga sakop sa Relief Society. Sila magtambayayong sa pagpangulo niini nga mga paningkamot uban sa konseho sa ward, ubos sa pagpakigsabot sa bishop.

Kini nga mga lider aduna sa mosunod nga mga responsibilidad:

• Motabang sa pagdasig sa mga miyembro sa paghigugma sa mga anak sa Dios, sa pagpaambit sa ebanghelyo, ug sa pagdapit sa uban nga modawat sa mga panalangin sa Manluluwas (tan-awa sa 23.1).

• Magtinambagay uban sa mga sakop sa korum o Relief Society mahitungod kon unsaon sa pagpaambit sa ebanghelyo. Mohisgot unsaon sa pagpangita og mga tawo nga katudloan sa mga misyonaryo ug unsaon sa pagsuporta sa mga tawo nga gitudloan. Magtinambagay mahitungod sa mga panginahanglan sa bag-o ug mibalik nga mga miyembro ug unsaon sa paghatag og suporta.

• Mosangon sa tigpangalagad nga mga igsoong lalaki ug mga igsoong babaye ngadto sa bag-o ug mibalik nga mga miyembro (tan-awa sa 21.2.1). Ang tigpangalagad nga mga igsoong lalaki ug mga igsoong babaye mahimo usab nga sangonan ngadto sa mga tawo nga gitudloan sa mga misyonaryo (buhaton kini sa pagpakigsabot sa mga misyonaryo). Kon posible, ang mga lider mosangon sa mga miyembro kinsa aduna o makapalambo og suod nga mga panaghigala niini nga mga indibidwal. Ang mga lider moawhag sa tigpangalagad nga mga igsoong lalaki ug mga igsoong babaye sa paghatag og Kristohanong gugma ug suporta.

• Mohatag sa bag-o ug mibalik nga mga miyembro og mga oportunidad sa pagserbisyo isip tigpangalagad nga mga igsoong babaye o mga igsoong lalaki. Alang sa dugang nga impormasyon, tan-awa sa kapitulo 21.

• Motabang sa konseho sa ward nga makapalambo og plano sa pagpakigbahin sa ebanghelyo ug pagpalig-on sa bag-o ug mibalik nga mga miyembro (tan-awa sa 23.6.6).

• Mangulo sa buhat sa lider sa misyon sa ward. Kon kini nga lider wala matawag, ang usa ka sakop sa kapangulohan sa korum sa mga elder maoy mohimo niini nga tahas (tan-awa sa 23.6.3).

Ang presidente sa korum sa mga elder ug ang presidente sa Relief Society ang matag usa mosangon sa usa ka sakop sa kapangulohan sa pagtabang nga mangulo niini nga mga paningkamot. Kining duha ka sakop sa kapangulohan magtambayayong. Sila motambong sa sinemana nga mga miting sa pakigsabot (tan-awa sa 23.4).

23.6.3

Lider sa Misyon sa Ward

Ang bishop mokonsulta sa presidente sa stake sa pagtino kon motawag ba og lider sa misyon sa ward. Kon sila mohukom sa paghatag niini nga calling, ang bishopric makigtinambagay sa mga presidente sa korum sa mga elder ug sa Relief Society sa pagtino kinsa ang tawagon.

Ang lider sa misyon sa ward kinahanglan nga usa ka naghupot og Melchizedek nga Pagkapari. Kon kini nga lider sa misyon sa ward dili matawag, ang usa ka sakop sa kapangulohan sa korum sa mga elder maoy mohimo niini nga tahas.

Ang lider sa misyon sa ward mosuporta sa kapangulohan sa korum sa mga elder ug kapangulohan sa Relief Society sa ilang misyonaryo nga mga responsibilidad. Siya usab aduna sa mosunod nga mga responsibilidad:

• Makigsabot sa buhat sa mga miyembro ug mga lider sa ward, mga misyonaryo sa ward, ug full-time nga mga misyonaryo. Kini maglakip sa pagpakigsabot sa mga paningkamot sa pagtudlo, mga tulumanon sa bunyag, ug sa mga paningkamot sa pagpalig-on sa bag-ong mga miyembro. Kini usab maglakip sa pagplano sa mga paagi sa pagtabang sa mga miyembro sa ward sa pagpaambit sa ebanghelyo.

• Mangulo sa sinemana nga mga miting sa pakigsabot (tan-awa sa 23.4).

• Motambong og mga miting sa konseho sa ward kon dapiton.

• Motabang sa konseho sa ward sa pagpalambo ug pag-implementar sa plano sa ward alang sa pagpakigbahin sa ebanghelyo ug pagpalig-on sa bag-o ug mibalik nga mga miyembro (tan-awa sa 23.6.6).

• Mangita og mga oportunidad sa pagtabang sa full-time nga mga misyonaryo nga matuman ang ilang katuyoan pinaagi sa pagpakigbahin sa ebanghelyo. ug pagpalig-on sa mga relasyon ngadto sa mga miyembro. Kon gitugotan, kini mahimong maglakip sa pagpangaon uban sa mga miyembro (mas maayo kon uban sa mga pamilya nga dili tanan miyembro sa simbahan ug sa bag-o ug mibalik nga mga miyembro kon mahimo; tan-awa sa 24.6.2.3).

• Makigtambayayong uban sa lider ug mga consultant sa ward alang sa templo ug family history sa pagtabang niadtong kinsa nagkat-on sa ebanghelyo, bag-o nga mga miyembro, ug sa mibalik nga mga miyembro nga moapil sa buhat sa templo ug family history.

23.6.4

Mga Misyonaryo sa Ward

Ang mga misyonaryo sa ward motabang sa mga miyembro sa ward nga makasinati sa hingpit nga kalipay sa pagpakigbahin sa ebanghelyo sumala sa gihulagway sa 23.1. Sila moserbisyo ubos sa direksyon sa lider sa misyon sa ward o sa sakop sa kapangulohan sa korum sa mga elder kinsa mohimo niini nga tahas. Ang mga presidente sa korum sa mga elder ug Relief Society mahimong mosugyot og mga miyembro nga makaserbisyo.

Ang mga misyonaryo sa ward motudlo pinaagi sa pulong ug ehemplo unsaon sa paghigugma sa uban, mopaambit sa ilang hugot nga pagtuo, ug modapit sa uban sa pagdawat sa mga panalangin sa ebanghelyo. Sila motabang usab sa mga miyembro sa ward nga mangalagad ngadto sa bag-o ug mibalik nga mga miyembro.

Ang mga misyonaryo sa ward moapil sa sinemana nga mga miting sa pakigsabot (tan-awa sa 23.4).

23.6.5

Konseho sa Ward ug Konseho sa Kabatan-onan sa Ward

Ang pagpakigbahin sa ebanghelyo ug pagpalig-on sa bag-o ug mibalik nga mga miyembro kinahanglang hisgotan kanunay diha sa mga miting sa konseho sa ward. Ang bishop mahimong mohangyo sa presidente sa korum sa mga elder o sa Relief Society nga mangulo niini nga mga panaghisgotan, nga kinahanglang motutok sa mga indibidwal. Ang bishop mahimong modapit sa lider sa misyon sa ward nga motambong sa mga miting sa konseho.

Ang konseho mahimong mohisgot sa plano sa ward alang sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro. Sila mohisgot usab sa mga buluhaton nga kinahanglang sabotan sa tanang organisasyon. Ang mga kapanguhaan sama sa mosunod makatabang niini nga mga panaghisgotan:

• Akong Dalan sa Pakigsaad [My Covenant Path]. Kini nga kapanguhaan makatabang sa bag-o ug mibalik nga mga miyembro nga mouswag subay sa dalan sa pakigsaad atol sa 12 ngadto 24 ka bulan human sa bunyag o human sa pagbalik ngadto sa pag-apil sa ebanghelyo. Ang Akong Dalan sa Pakigsaad [My Covenant Path] anaa sa Librarya sa Ebanghelyo [Gospel Library].

• Rekord sa Pag-uswag sa Dalan sa Pakigsaad. Ang mga lider sa ward ug ang full-time nga mga misyonaryo mogamit niini nga kapanguhaan aron irekord ug tan-awon ang pag-uswag sa bag-o ug mibalik nga mga miyembro ug sa mga tawo nga gitudloan sa mga misyonaryo. Ang Pag-uswag sa Dalan sa Pakigsaad magamit sa mga lider sa ward pinaagi sa Member Tools nga app ug sa Leader and Clerk Resources (LCR). Ang full-time nga mga misyonaryo makagamit ug makapakigbahin sa impormasyon gikan sa Pag-uswag sa Dalan sa Pakigsaad pinaagi sa Isangyaw ang Akong Ebanghelyo nga app.

Alang sa dugang pa mahitungod sa konseho sa ward, tan-awa sa 29.2.5

Ang konseho sa kabatan-onan sa ward mohatag og espesyal nga pagtagad ngadto sa (1) kabatan-onan nga bag-o ug mibalik nga mga miyembro ug (2) kabatan-onan nga gitudloan sa mga misyonaryo. Ang konseho maghisgot usab sa mga paagi nga ang kabatan-onan makaapil sa plano sa ward alang sa pagpakigbahin sa ebanghelyo ug pagpalig-on sa tanang bag-o ug mibalik nga mga miyembro. Alang sa dugang pa mahitungod sa konseho sa kabatan-onan sa ward, tan-awa sa 29.2.6

23.6.6

Plano sa Ward alang sa Pagpakigbahin sa Ebanghelyo ug sa Pagpalig-on sa Bag-o ug Mibalik nga mga Miyembro

Ang matag ward kinahanglang adunay yanong plano alang sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro. Kini nga plano makatabang sa paggiya sa mga miting, tulumanon, ug mga kalihokan. Mahimong maglakip kini sa mga plano ug mga ideya alang sa:

• Pagtabang sa tanan nga mobati nga giabi-abi diha sa mga miting ug mga kalihokan diha sa ward.

• Pagtabang sa mga miyembro nga makasinati og hingpit nga kalipay sa pagpakigbahin sa ebanghelyo.

• Pagsuporta sa mga tawo nga gitudloan sa mga misyonaryo.

• Pagtabang sa bag-o ug mibalik nga mga miyembro nga mouswag sa espirituwal nga paagi.

Ang mga presidente sa korum sa mga elder ug Relief Society motabang sa konseho sa ward sa paghimo sa plano. Ang lider sa misyon sa ward motabang usab. Ang bishop morebyo ug moaprobar niini.

Ang mga miyembro sa konseho sa ward mangulo sa pag-implementar sa plano. Sila mo-report sa kalamboan diha sa mga miting sa konseho sa ward. Sila usab mo-update sa plano kon gikinahanglan.