23.

Kwaļo̧k Gospel eo im Kōkajoorļo̧k Membōr ro Rekāāl im Ro Rej Kab Bar Ro̧o̧ltok

23.0

Kadkad in

Karuwaineneik aolep n̄an bōk gospel eo ej m̧ōttan jerbal in lo̧mo̧o̧r eo an Anij im mour ijo eutiej tata (lale 1.2 ilo bok in bōk meļeļe in; Matu 28:19–20). Menin ekoba:

• Bōk koņaan ilo jerbal in mijenede im jerbal āinwōt mijenede ro.

• Jipan̄ membōr rekāāl ilo Kabun̄ in im rej kab bar ro̧o̧ltok im eddōkļo̧k ilo iaļ in bujen eo.

23.1

Kwaļo̧k Gospel eo

23.1.1

Iakwe

Jej aolep ajri ro nejin Jemedwōj Ilan̄, eo eweppān an iakwe ajri ro Nejin. E ej leļo̧k n̄an aolep iien em̧m̧an n̄an obrak kōn An iakwe kōn Jisōs Kraist im gospel eo An (lale Jon 3:16; 2 Nipai 26:24–28; Alma 26:37; Laajrak in Tōmak ko 1:3).

Juon wāween jej kwaļo̧k ad iakwe n̄an Anij ej ilo ad iakwe im jerbal n̄an ajri ro Nejin (lale Matu 22:36–39; 25:40). Jej kajjieon̄ n̄an iakwe im jerbal āinwōt an kar Jisōs Kraist kōm̧m̧ane. Iakwe in ej im̧we kōj n̄an tōbar im jipan̄ armej ro jān aolep kabun̄ ko, kūl ko, im m̧anit ko (lale Jerbal 10:34; 2 Nipai 26:33).

23.1.2

Jeere

Kōnke jej iakwe Anij im ajri ro Nejin, jej make kōņaan jeere kōjeraam̧m̧an ko E ekar litok n̄an kōj (lale Jon 13:34–35) im jipan̄ aintok Israel. Jej pukōt n̄an jipan̄ armej en̄jake lan̄lōn̄ eo me jej en̄jake (lale Alma 36:24). Āinwōt rikaļoor ro an Jisōs Kraist, jej kotak meram eo An (lale 3 Nipai 18:24–25). Jej kōnono anemkoj kōn Rilo̧mo̧o̧r im kareel eo An ilo mour ko ad (lale Katak im Bujen Ko 60:2).

Jej kwaļo̧k iakwe, m̧ool ko an gospel, iien, en̄jake ko, im būrookraam̧ ko an Kabun̄ in n̄an kōjeraam̧m̧an ajri ro nejin Anij im jipan̄ er epakeļo̧k Rilo̧mo̧o̧r eo. Jej kwaļo̧k kaki men kein ilo wāween ko rejejjet im watōki remman āinwōt m̧ōttan ļo̧k iiaio ko ad make, ilo online, im ko jet.

23.1.3

Karuwainene

Rilo̧mo̧o̧r ej karuwaineneik aolep n̄an bōk gospel eo An im m̧aanjabpopo n̄an mour indeeo (lale Alma 5:33–34). Āinwōt rikaļoor ro An, jej ļoor waanjon̄ak eo An, karuwaineneik aolep n̄an “itok n̄an Kraist, im weeppān ilo e” (Moronai 10:32).

Jej jar kōn im̧we im tōl kōn wāween karuwaineneik ro jet n̄an:

• Itok im loe kōjeraam̧m̧an ko rej n̄an aolep ilo ejelok kalijōklok ilo Jisōs Kraist, gospel eo An, im Kabun̄ eo An (lale Jon 1:37–39, 45–46).

• Itok im jerbal n̄an armej ro rej pād ilo aikuj.

• Itok im erom̧ uwaan Kabun̄ eo kar kōjepļaaktok an Jisōs Kraist.

N̄e karuwainene ko ad rej pedped ioon aikuj ko im itok limo ko an juon armej, kōrā ak m̧aan epidodo aer wōnm̧aeik karuwainene kein. Enan̄in aolep iien, karuwainene ej āinwōt meļeļe in kobaik baam̧le eo ad, ro m̧ōttad, im ro ruturid ilo ta eo emōj ad kōm̧m̧ane. N̄an waanjon̄ak, jemaron̄ karuwaineneik er n̄an:

• Kobatok ippām ilo im̧ōko im̧ōm n̄an m̧akūtkūt ko.

• Kobatok ippām n̄an kabun̄jar im ekkatak gospel eo,

• Etal n̄an m̧akūtkūt ko rejenolo̧k, ko āinwōt kōjeraam̧m̧an nin̄nin̄ ak peptaij.

• Bōk koņaad ilo ward im m̧akūtkūt ko an jukjuk in pād eo ak jerbal in jipan̄, ekoba būroojāāk ko kar ejaaki jān JustServe.org (ijo ekkar).

• Bōk koņaad ilo būrookraam̧ ko im m̧akūtkūt ko an Kabun̄ in. Men kein remaron̄ kobaik m̧akūtkūt ko an Būraimere, m̧akūtkūt ko an jodikdik ro, menmenbwij an baam̧le, kūlaaj ko an un̄n̄are-peid make, BYU-Pathway Wordlwide eo, im kūlaaj in katak riit, jeje im kajin Pelle.

• Bwebwenato ippān full-time mijenede ro im ron̄jake enaan ko aer.

N̄an ļōmņak ko rellepļo̧k im kein katakin ko, lale

• share.ChurchofJesusChrist.org.

• “Sharing the Gospel [Jaketok Jaketa Gospel eo]” ilo Gospel Library.

• Ilo “Koba ippān Membōr ro” jekjōn eo ilo jebta 9 in Kwaļo̧k Gospel eo Aō: Juon Unin Tōl n̄an Jaketo Jaketak Gospel eo an Jisōs Kraist.

Ward ko im stake ko remaron̄ ejake iien ko rem̧m̧an n̄an membōr ro n̄an karuwaineneik ro jet. Wāween ko n̄an kōm̧m̧ane menin ekoba iien ko im m̧akūtkūt ko bōk eddoier im kwaļo̧k kein jipan̄ ko an Kabun̄ in ippān jukjuk in pād eo ijo jokwe ie.

Ritōl ro an ward im stake rej kapilōk ippān doon n̄an kile (1) aikuj ko ilo jukjuk in pād eo im (2) kwaļo̧k kein jipan̄ ko an Kabun̄ in. N̄an elōn̄ļo̧k meļeļe, lale “Sharing Church Resources” ilo Gospel Library eo.

Pedped ko kōn iakwe, jeere, im karuwainene ej bar jerbal n̄an kōkajoorļo̧k membōr ro rekāāl im ro rej kab bar ro̧o̧ltok.

23.2

Kōkajoor Membōr ro Rekāāl

Kobatok ilo Kabun̄ in ej jim̧or aiboojoj im idajon̄jon̄ n̄an elōn̄. Ej bōktok kōjeraam̧m̧an ko reļļap, bōtaab ej bar aikuji jon̄ok ko n̄an tōmak ko rekāāl, iminene ko rekāāl, im jemjerā ko rekāāl (lale 1 Tessalonika 1:6).

Kajjojo membōr ro rekāāl rej aikuj m̧ōttā ippān ro jet, iien ko repello̧k im rem̧m̧an n̄an jerbal, im naajrik jetōb. Āinwōt membōr ro an Kabun̄ in, jej leļo̧k n̄an membōr ro rekāāl ad iakwe im jipan̄ (lale Mosaia 18:8–10). Jej jipan̄ er en̄jake juon en̄jake ke rej uwaan Kabun̄ in. Jej jipan̄ er eddōkļo̧k ilo iaļ in bujen eo im lukkuun “oktak tok n̄an Irooj” (Alma 23:6). Jej jipan̄e er “naajdik er jān em̧m̧an eo an naan in Anij, n̄an kōjparok er ilo wāween ejim̧we, … atartar make ioon em̧m̧an ko an Kraist” (Moronai 6:4).

Jemaron̄ barāinwōt jipan̄ membōr ro rekāāl:

• Ekkatak im en̄jake lan̄lōn̄ eo kōn juon rikaļoor an Jisōs Kraist.

• Ekkatak ekōjkan kile im̧we ko jān Jetōb Kwojarjar.

• Ejaake juon iminene in jar im ekkatak jeje ko rekwojarjar an juon make im an baam̧le.

• Jeere gospel eo ippān baam̧le eo aer im ro m̧ōttaer.

• Kappukōt āt ko an rūtto ro aer etto im m̧aanjabpopo n̄an bōk kain̄i ko an tampeļ n̄an er.

• Eddōkļo̧k ilo kakūrm̧ool ijjitōn̄ ko an Kabun̄ in im bōk koņaer ilo elōn̄ iien ko jet rem̧m̧an Kabun̄ in ej lelo̧k.

23.3

Kōkajoorļo̧k Membōr ro rej Kab Bar Ro̧o̧ltok

Jet membōr rej kāālet n̄an bōjrak jān aer bōk koņaer ilo Kabun̄ in. “Bwe n̄an rein,” Rilo̧mo̧o̧r ekar ba, “naaj wōnm̧aanļo̧k wōt im jipan̄; bwe kom̧ij jab jeļā eļan̄n̄e ak ta renaaj ro̧o̧l im ukeļo̧k, im itok n̄an Eō kōn aolepān kōttōpar in bōro, im Inaaj kōmour er; im kom̧ naaj wāween eo n̄an bōktok lo̧mo̧o̧r n̄an er” (3 Nipai 18:32). Naan kein rej jerbal n̄an aolep ro me, kōn jabdewōt un, aikuj in wōnm̧aanļo̧k wōt n̄an kōm̧m̧an jerbal in karejar.

Membōr ro me rejjab lukkuun bōk koņaer āinwōt renaaj bar ro̧o̧ltok eļan̄n̄e ewōr aer jem̧jerā ko rekajoor ippān membōr ro an Kabun̄ in. Ad iakwe im rejtak emaron̄ jipan̄ er anjo̧ ioon apan̄ ko. Āinwōt membōr ro rekāāl, rej aikuj jem̧jerā, iien ko rem̧m̧an im repeļļo̧k n̄an jerbal, im naajdik jetōb. Meļeļe kōn jekjek ko aer im apan̄ ko emaron̄ jipan̄ kōj jerbal in karejar n̄an er ilo ad jeļā kea im iakwe.

23.4

Kōm̧m̧ani Kweilo̧k in Kōtōbalbal ko Wiik Otemjeļo̧k

Aolep wiik, kweilo̧k ko ralikar em rekadu kitier rej kōm̧m̧an n̄an loloorjake kijejeto ko n̄an kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. Eļan̄n̄e ritōl eo an mijen ilo ward eo ej kūr, e ej kōjeikik kweilo̧k kein. N̄e ejjab, membōr eo an būreejtōnji eo an doulul eo an elder ro ej bōk eddo in jerbal in kōjeikik.

Ro jet me rej ruwainene ekoba:

• Membōr ro emōj kappeik er an būreejtōnji eo an Doulul eo an Kōrā ro im doulul eo an elder ro.

• Mijenede ro an ward eo.

• Juon rijipan̄ ilo doulul eo an pris ro (ak būreejtōn eo an doulul eo an rūkaki ro ak tikōn ro eļan̄n̄e ejjeļo̧k pris ro ilo ward eo).

• Juon membōr in būreejtōnji eo erūtto tata an kūlaaj eo an Doulul eo an Jiron̄ ro.

• Mijenede ro rej jerbal aolep raan.

Kweilo̧k in kōtōbalbal ko wiik otemjeļo̧k rej pedped ioon aikuj ko an kajjojo armej. Kweilo̧k in ekkā an kōnono kōn unin kōnono kein emen:

• Ekōjkan jipan̄ ro me kar katakin er jān mijenede ro. Menin ekitbuuj bōk koņaan ilo katakin, jipan̄ armej ro kōm̧m̧an im kōjparok kallim̧ur ko, im rie iien peptaij ko rej itok wōt.

• Ekōjkan jipan̄ ro me rej kab peptaij.

• Ekōjkan jipan̄ membōr ro rej bar ro̧o̧ltok

• Ekōjkan jipan̄ membōr ro lo elōn̄ļo̧k armej ro n̄an katakin

Kweilo̧k kein remaron̄ kōm̧m̧an ilo an armej lukkuun jelm̧aeik doon ak kōm̧m̧an ilo mejatoto jān joko rettoļo̧k. Loloorjake m̧akūtkūt ko emaron̄ barāinwōt kōm̧m̧an ilo wāween ko jet, ekoba talboon ko, text, im email ko.

23.5

Ritōl ro an Stake

23.5.1

Būreejtōnji eo an Stake

Stake būreejtōn eo ej kabwijer kii ko ilo stake eo n̄an kwaļo̧k gospel eo im kōkajoorļo̧k membōr ro rekāāl im rej kab bar ro̧o̧ltok. E im rikakpilōklōk ro an rej leļo̧k aolepān tōl ko n̄an kijejeto kein. E ej kanooj lale bwe jerbal in ej ļeļōn̄tak n̄an ekōnono kake aolep iien ilo kweilo̧k ko an stake.

Ekkā ilo allōn̄ otemjeļo̧k, stake būreejtōn eo ej kweilo̧k ippān mijen būreejtōn eo n̄an kōtōbalbal kijejeto ko ikōtaan ritōl ro an stake im ritōl ro an ward im mijenede ro rej jerbal aolep raan. Ro jet remaron̄ pād ekoba:

• Rikakpilōklōk ro ilo stake eo im mijen būreejtōnji ro .

• Kile ko̧o̧njeļ ro reutiej n̄an ļeļo̧k eddo ioer.

• Būreejtōn eo an Doulul eo an Kōrā ro an stake eo.

• Mijenede ro kar kappeik er jān mijen būreejtōn eo.

23.5.2

Kamiti an Ritōl Rūtto ilo Stake eo

kamiti an ritōl rūtto ilo stake eo ekoba:

• Stake būreejtōnji eo.

• Būreejtōnji eo an Doulul eo an Kōrā an Stake

• High ko̧o̧njeļ ro kar jitōn̄ er n̄an jerbal ippān doulul eo an elder ro.

Ritōl rein rej kōmeļeļeik im rejtake būreejtōnji ko an an doulul eo an elder ro im Doulul an Kōrā ro ilo kijejeto ko aer n̄an jaketo jaketak gospel eo im kōkajoorļo̧k membōr ro rekāāl im rej bar ro̧o̧ltok (lale 23.6.2). Naan in kōmeļeļe ko remaron̄ bōk jikier ilo jekjek an juon douļuļ ak kajjojo armej. Ritōl ro an ward mijen remaron̄ ruwaineneik n̄an bōk naan in kōmeļeļe in.

N̄an elōn̄ļo̧k meļeļe kōn kweilo̧k ko an kamiti in, lale 29.3.8.

23.5.3

Ko̧o̧njeļ ro Reutiej

Stake būreejtōnji emaron̄ kappeik ko̧o̧njeļ ro routiej n̄an kōmeļeļeik im rejtake būreejtōnji ro an doulul eo an elder ro im ritōl ro an ward mijen. Juon ak elōn̄ļo̧k ko̧o̧njeļ ro reutiej remaron̄ kappeik er n̄an tōl kijejeto kein. Ijoke, aolep high ko̧o̧njeļ ro ewōr aer eddo n̄an ward ko im doulul ko kar jitōn̄ er.

23.5.4

Būreejtōnji eo an Doulul eo an Kōrā ro an Stake

Ium̧win tōl eo an stake būreejtōn eo, būreejtōnji eo an Doulul eo an Kōrā ro ilo stake eo rej kōmeļeļeik im rejtake būreejtōnji ro an Doulul eo an Kōrā ro ilo ward ilo eddo ko aer n̄an kwaļo̧k gospel eo im kōkajoorļo̧k membōr ro rekaāl im ro rej kab bar ro̧o̧ltok.

23.6

Ritōl ro an Ward

23.6.1

Bisorpik eo

Bisoprik eo ej jerbal ippān doulul eo an elder ro im būreejtōnji ro an Doulul eo an Kōrā ro ilo aer tōl kijejeto ko an ward eo ilo kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. Ritōl rein rej kōkapilōklōk doon aolep iien.

Bisoprik eo ej kanooj lale bwe kijejeto kein ren kōnono kaki im loloorjake ilo kweilo̧k ko an ward ko̧o̧njeļ eo im ko̧o̧njeļ eo an jodikdik ro. Bisoprik eo ej barāinwōt etale im kōmālim karōk eo an ward eo n̄an jaketo jaketak gospel eo im kōkajoorļo̧k membōr ro rekāāl im ro rej bar ro̧o̧ltok (lale 23.6.6).

Bisoprik eo ej kapilōk ippān stake būreejtōn eo n̄an kōmelet eļan̄n̄e n̄an kūr juon ritōl mijen an ward eo (lale 23.6.3 n̄an meļeļe ko reļļapļo̧k).

Bisop eo ej intōrpiuiki membōr ro rekāāl ilo iiō eo ejetjet n̄an bōk juon peba in mālim n̄an deļo̧n̄e tampeļ n̄an bōk jikin n̄an kōm̧m̧ani peptaij im kapene ko (lale 26.4.12). E ej barāinwōt intōpriuik ļaddik ro ilo iiō ko rejetjet n̄an bōk Priesthood eo an Aron (lale 38.2.9.1). E ekkar an kōm̧m̧ane intōrpiu kein ilowaan juon wiik in an membōr m̧ōj an kapen.

Bisoprik eo ej loloorjake ritōl ro jet n̄an kanooj lale bwe membōr ro rekāāl im ro rej kab bar ro̧o̧ltok ren wōr aer iien em̧m̧an n̄an jerbal. Kain iien kein rem̧m̧an remaron̄ jipan̄ membōr rein eddōkļo̧k ilo jetōb im en̄jake kajoor eo an Irooj ilo mour ko aer. Jerbal in jipan̄ emaron̄ barāinwōt jipan̄ membōr ro en̄jake lan̄lōn̄ im kalōk jemjerā ko repaak ippān ro jet ilo ward eo.

Iien ko rem̧m̧an an jerbal in jipan̄ rej aikuj pedped ioon aikuj ko im maron̄ ko an membōr eo. Ilo jekjek ko jet, juon kūr emaron̄ ekkar. IIo ko jet, juon ijjitōn̄ eo ejjab kanooj ļap (formal) ejetjet tata.

23.6.2

Būreejtōnji ro an Doulul eo an Elder ro im Doulul eo an Kōrā ro

Būreejtōnji ro an doulul eo an elder ro im Doulul eo a Kōrā ro rej tōl kijejeto ko raan n̄an raan an ward eo n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok (lale 8.2.3 im 9.2.3). Būreejtōnji eo an doulul eo an elder ro rej tōl kijejeto kein n̄an membōr ro an doulul eo an elder ro. Būreejtōnji eo an Doulul eo an Kōrā ro ej tōl kijejeto ko n̄an membōr ro an Doulul eo an Kōrā ro. Rej jerbal ippān doon n̄an tōl kijejeto kein ippān ward ko̧o̧njeļ eo, ium̧win tōļ eo an bisop eo.

Ritōl rein ewōr ippāer eddo kein rej ellaajrak:

• Jipan̄ im̧we membōr ro n̄an iakwe ajri ro nejin Anij, n̄an kwaļo̧k gospel eo, im n̄an karuwaineneik ro jet n̄an bōk kōjeraam̧m̧an ko an Rilo̧mo̧o̧r (lale 23.1).

• Bōk kapilōk ippān membōr ro an dolulul eo ak Doulul eo an Kōrā ro kōn wāween kwaļo̧k gospel eo. Ekōnono kōn wāween n̄an pukōt armej ro n̄an mijenede ro n̄an katakin im ekōjkan n̄an rejtake armej ro me em̧ōj katakin er. Kapilōk ippān doon kōn aikuj ko an membōr ro rekāāl im ro rej ro̧o̧ltok im ekōjkan n̄an leļo̧k jipan̄.

• Kappeik rikarejar m̧aan im kōrā ro n̄an jerbal in karejar n̄an membōr ro rekāāl im ro rej kab ro̧o̧ltok (lale 21.2.1). Rikarejar m̧aan im kōrā ro rej jerbal in karejar maron̄ barāinwōt jitōn̄ er n̄an armej ro mijenede ro rej katakin er (menin ej kōm̧m̧an ilo jerbaļ in ippān doon ko ippān mijenede ro). Eļan̄n̄e emaron̄, ritōl ro rej kappeik membōr ro me raar ak remaron̄ ejake jemjerā ko repaake doon ippān armej rein kajjojo. Ritōl ro rej kōketak m̧aan ro im kōrā ro rej jerbal in karejar n̄an leļo̧k iakwe im jipan̄ āinwōt an Kraist.

• Leļo̧k iien ko repeļļo̧k im rem̧m̧an n̄an membōr ro rekāāl im rej kab bar ro̧o̧ltok n̄an jerbal āinwōt rikarejar m̧aan im kōrā ro. N̄an eļapļo̧k kōn jerbal in karejar, lale jebta 21.

• Jipan̄ ward ko̧o̧njeļ eo ejake juon karōk n̄an jaketo jaketak gospel eo im kōkajoorļo̧k membōr ro rekāāl im membōr ro rej bar ro̧o̧ltok (lale 23.6.6).

• Tōl jerbal eo an ritōl mijen an ward eo. Eļan̄n̄e ritōl in ejjab kūr, juon membōr in būreejtōnji eo Doulul eo an elder ro ej bōk eddo in (lale 23.6.3)

Būreejtōn eo an doulul eo an elder ro im būreejtōn eo an Doulul eo an Kōrā ro kajjo iaer rej jitōn̄ juon membōr in būreejtōnji eo n̄an jipan̄ tōl kijejeto kein. Būreejtōnji membōr rein ruo rej jerbal ippān doon. Rej pād ilo kweilo̧k in kōtōbalbal ko wiik otemjeļo̧k (lale 23.4).

23.6.3

Ritōl eo an Mijen ilo Ward

Bisoprik eo ej arto artak ippān stake būreejtōn eo n̄an kōmelet eļan̄n̄e n̄an kūr juon ritōl mijen an ward eo. Eļan̄n̄e rej kāālet n̄an kōdepakpaklo̧k kūr in, bisoprik eo ej bōk kapilōk ippān doulul eo an elder ro im būreejtōnji eo an Doulul eo an Kōrā ro ilo kāālet wōn eo n̄an kūri.

Ritōl mijen an ward eo ej aikuj in juon rikabwijer Melkisedek Priesthood eo. Eļan̄n̄e juon ritōl mijen an ward eo ejjab kūr, juon membōr in doulul eo an elder ro ej bōk eddo in.

Ritōl eo an mijen ilo ward eo ej rie būreejtōnji eo an doulul eo an elder ro im būreejtōnji eo an Doulul eo an Kōrā ro ilo eddo in mijenede ko aer. E ej barāinwōt wōr eddo kein ippān:

• Loloorjake jerbal eo an ward membōr eo im ritōl ro, ward mijenede ro, im full-time mijenede ro. Menin ekoba jerbal in tōl kijejeto ko n̄an katakin, m̧akūtkūt in peptaij ko, im kijejeto ko n̄an kōkajoorļo̧k membōr ro rekāāl. Emaron̄ barāinwōt koba karōk wāween ko n̄an jipan̄ membōr ro an ward eo kwaļo̧k kōn gospel eo.

• Tōl kweilo̧k in kweilo̧k in kōtōbalbal ko wiik otemjeļo̧k (lale 23.4).

• Etal n̄an kweilo̧k ko an ward koonjeļ eo n̄e karuwaineneiki.

• Jipan̄ ward ko̧o̧njeļ eo ejake im jerbali karōk eo an ward eo n̄an kwaļo̧k kōn gospel eo im kōkajoorļo̧k membōr ro rekāāl im membōr ro rej bar ro̧o̧ltok (lale 23.6.6).

• Kappukōt iien ko rem̧m̧an n̄an jipan̄ mijenede ro rej jerbal aolep raan kakūrm̧ool jibadbad eo aer kōn jaketo jaketak gospel eo im kalōk jemjerā ko ippān membōr ro. Ijo kōmālim, menin emaron̄ kitbuuj m̧ōn̄ā ippān membōr ro (kāālet ippān baam̧le ko rejjab aolep membōr im membōr ro rekāāl im rej bar ro̧o̧ltok n̄e emaron̄ (lale 24.6.2.3).

• Jerbal ippān ritōl eo ej lale tampeļ im menmenbwij an baam̧le ilo ward eo im rikapilōk ro n̄an jipan̄ ro rej ekkatak gospel eo, membōr ro rekāāl, im membōr ro me rej kab bar rooltok bwe ren bōk koņaer ilo jerbal in tampeļ im menmenbwij an baam̧le.

23.6.4

Mijenede ro an Ward

Mijenede ro an ward eo rej jipan̄ membōr ro an ward eo en̄jake lan̄lōn̄ n̄e rej kwaļo̧k gospel eo āinwōt kar kōmeļeļeik ilo 23.1. Rej jerbal ium̧win tōl eo an ritōl eo an mijen ward eo ak membōr eo an būreejtōnji eo an doulul eo an elder ro me rej bōk eddo in jerbal in. Būreejtōn ro an doulul eo an elder ro im Doulul eo an Kōrā ro emaron̄ elmakote membōr ro me remaron̄ jerbal.

Mijenede ro an ward eo rej katakin kōn naan im waanjon̄ak kōn ekōjkan n̄an iakwe ro jet, kwaļo̧k tōmak eo aer, im karuwaineneik ro jet n̄an bōk kōjeraam̧m̧an ko an gospel eo. Rej barāinwōt jipan̄ membōr ro an ward eo jerbal in karejar n̄an membōr ro rekāāl im rej kab bar ro̧o̧ltok.

Mijenede ro an ward eo rej bōk koņaer ilo kweilo̧k in kōtōbalbal ko wiik otemjeļo̧k (lale 23.4).

23.6.5

Ward Ko̧o̧njeļ eo im Ko̧o̧njeļ eo an Jodikdik ro an Ward eo

Kwaļo̧k kōn gospel eo im kōkajoorļo̧k membōr ro rekāāl im ro rej ro̧o̧ltok aikuj in kōnono kake iien otemjej ilo kweiļo̧k ko an ko̧o̧ņjeļilo ward eo. Bisop eo emaron̄ kajjitōk ippān doulul eo an elder ro ak būreejtōn eo an Doulul eo an Kōrā ro n̄an tōl iien ekōnono kein, ko rej aikuj pedped ioon kajjojo armej. Bisop eo emaron̄ karuwaineneik ritōl eo an mijen ward eo n̄an pād ilo kweilo̧k ko an ward ko̧o̧njeļ eo.

Ko̧o̧njeļ eo emaron̄ arto artake karōk eo an ward n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok. Rej barāinwōt bōk an doon lōmņak kōn ijjitōn̄ ko me aikuj in loloorjaki ilo aolep doulul ko. Kein jipan̄ ko āinwōt kein maron̄ jipan̄ ilo iien ekōnono kein:

• My Covenant Path [Iaļ in Bujen eo Aō]. Kein jipan̄ in ej jipan̄ membōr ro rekāāl im ro rej bar ro̧o̧ltok eddōkļo̧k ilo iaļ in bujen o eo ilo allōn̄ ko 12 n̄an 24 im̧aan tata ālkin peptaij ak ālkin bar ro̧o̧ltok n̄an bōk koņaan ilo gospel eo. My Covenant Path [Iaļ in Bujen eo Aō] ewōr ilo Gospel Library eo.

• Rekoot in Eddōkļo̧k an Iaļ in Bujen eo. Ritōl ro an ward eo im mijenede ro rej jerbal aolep kōjerbal kein jipan̄ in n̄an ļo̧o̧ke im lale eddōkļo̧k eo an membōr ro rekāāl im ro rej bar ro̧o̧ltok im kōn armej ro kar katakin jān mijenede ro. Eddōkļo̧k an Iaļ in Bujen eo ej pād n̄an ritōl ro an ward eo kōn Member Tools app eo im Leader and Clerk Resources (LCR). Mijenede ro rej jerbal aolep raan rej delo̧n̄e im kwaļo̧k meļeļe ko jān Eddōkļo̧k an Iaļ in Bujen eo kōn Preach My Gospel app eo.

N̄an meļeļe ko reļļapļo̧k kōn ward ko̧o̧njeļ eo, lale 29.2.5

Ko̧o̧njeļ eo an jodikdik ro an ward eo ej leļo̧k m̧adjake eo ejenolo̧k n̄an (1) jodikdik ro me rekāāl im membōr ro rej bar ro̧o̧ltok im (2) jodikdik ro kar katakin er jān mijenede ro. Ko̧o̧njeļ eo ej barāinwōt ekōnono kōn wāween ko jodikdik ro remaron̄ bōk koņaer ilo karōk eo an ward eo n̄an jaketo jaketak gospel eo im kōkajoorļo̧k aolep membōr ro rekāāl im rej bar ro̧o̧ltok. N̄an eļapļo̧k kōn ward ko̧o̧njeļ eo an jodikdik, lale 29.2.6

23.6.6

Karōk eo an Ward n̄an Kwaļo̧k kōn Gospel eo im Kōkajoorļo̧k Membōr ro Rekāāl im Ro rej Kab Bar Ro̧o̧ltok

Kajjojo ward ej aikuj wōr juon an karōk em̧m̧an n̄an kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. Karōk in emaron̄ jipan̄ tōl kweilo̧k ko, jerbal in jipan̄, im m̧akūtkūt. Earon̄ kobaik karōk ko im ļōmņak ko n̄an:

• Jipan̄ aolep en̄jake karuwainene ilo kweilo̧k ko im m̧akūtkūt ko an ward eo.

• Jipan̄ membōr ro jelā kōn lan̄lōn̄ in kwaļo̧k gospel eo.

• Rie armej ro kar katakin er jān mijenede ro.

• Jipan̄ membōr ro rekāāl im ro rej kab bar ro̧o̧ltok eddōkļo̧k ilo jetōb.

Būreejtōn ro an Doulul eo an elder ro im būreejtōn ro an Doulul eo an Kōrā ro rej jipan̄ ward ko̧o̧njeļ eo ejake karōk eo. Ritōl eo an ward mijen eo ej barāinwōt jipan̄. Bisop eo ej etale im kōmalimi.

Membōr ro an ward ko̧o̧njeļ eo rej bōk jerbal in tōļ bun̄tōn im̧aan ilo jerbale karōk eo. Rej riboot kōn eddōkļo̧k eo ilo kweilo̧k ko an ward ko̧o̧njeļ eo. Rej bar kōkāāl kōttōpar eo n̄e emenin aikuj.