“24. Fautuaina Atu o Faifeautalai ma le Auaunaga,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2024).
“24. Fautuaina Atu o Faifeautalai ma le Auaunaga,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai.
24.
Fautuaina Atu o Faifeautalai ma le Auaunaga
24.0
Faatomuaga
I aso anamua, na tuuina mai ai e le Alii le poloaiga e faapotopoto Isaraelu mai “nuu uma lava, ma papatiso atu ia te i latou i le suafa o le Tama, ma le Alo, ma le Agaga Paia” (Mataio 28:19); tagai foi i le fuaiupu e 20). Ua toefaafouina e le Alii lena poloaiga i nei aso e gata ai (tagai i le Mataupu Faavae ma Feagaiga 39:11; 68:6–8; 112:28–30). E osifeagaiga tagata uma o le Ekalesia i le taimi o le papatisoga e avea ma molimau o le Atua ma ia auauna atu i isi (tagai i le Mosaea 18:8--10).
Ina ia auauna atu i le Alii o se faifeautalai o se avanoa paia. E aumaia ai faamanuiaga e faavavau i le tagata ma i latou e auauna atu i ai (tagai i le Mataupu Faavae ma Feagaiga 18:14–16).
O valaauga i misiona o se tofiga e a’oa’o atu le talalelei, lagolago le galuega a matagaluega po o iunite o le Ekalesia, pe auauna atu i le nuu i le lotoifale.
Ua talosagaina e le Alii ia alii talavou uma e agavaa ma malolosi, e saunia ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua (tagai i le Mataupu Faavae ma Feagaiga 36:1, 4–7).
E talia foi e le Alii ia tamaitai talavou agavaa ma malolosi e auauna atu i ni misiona pe a latou mananao i ai. Mo tamaitai talavou, o se misiona o se avanoa mamana, ae tuu i le faitalia. O le saunia mo se misiona o le a faamanuiaina ai se tamaitai talavou pe na te filifili e auauna atu o se faifeautalai pe leai.
E manaomia foi faifeautalai matutua ma e uunaia e saunia e auauna atu.
24.1
O Le Valaauga e Auauna Atu
E valaauina faifeautalai taitasi e fesoasoani i le Tama Faalelagi ma Iesu Keriso i le La galuega. O faifeautalai e fai ma sui o Iesu Keriso ma Lana Ekalesia toefuataiina. Latou te auauna atu ma le lē manatu faapito i le Alii i se galuega o le alofa i Ana fanau. O misiona talai ma misiona o auaunaga e faamanuiaina uma ai le faifeautalai ma isi. (Tagai i le Mataio 16:2522:36–40
E tuuina atu valaauga o misiona i tagata o le ekalesia o ē ua mananao e auauna atu, ua agavaa, ma e gafatia. E taumafai malosi nei tagata o le Ekalesia e auauna atu i le Alii ma o latou “loto atoa, manatu, mafaufau, ma le malosi atoa.” Latou te atia’e le “faatuatua, faamoemoe, alofa mama ma le alofa.” Latou te taulai atu ma le “manatu tasi i le mamalu o le Atua.” A o latou faia nei mea, o le a faaagavaaina i latou e le Alii mo le galuega. (Mataupu Faavae ma Feagaiga 4:2, 5; tagai foi i fuaiupu 1-7.)
O faifeautalai e fai ma sui o le Alii ma e tatau ona valaauina i le pule tatau (tagai i le Mataupu Faavae ma Feagaiga 42:11; Mataupu Faavae o le Faatuatua 1:5). O le valaauga e auauna atu i se misiona e masani ona tuuina atu e le Peresitene o le Ekalesia. Mo faifeau matutua mo auaunaga, e tuuina atu le valaauga e le peresitene o le siteki.
24.2
Tofiga Faafaifeautalai
O le valaauga e auauna atu o se faifeautalai e aofia ai se tofiga patino. E matuai eseese lava nei tofitofiga. E masani ona aofia ai:
-
O se tofiga a lē o se faifeautalai e aoao atua po o se faifeautalai mo auaunaga.
-
Se nofoaga.
-
Le umi o se auaunaga.
O tofiga taitasi e taialaina e ala i faaaliga ina ia fetaui lelei ma le faifeautalai ma manaoga o fanau a le Atua.
E ono suia se tofiga e ala i faaaliga faifai pea pe a suia foi tulaga o mea o tutupu. E taua se tofiga patino. Peitai, e lona lua i le valaauga e auauna atu o se faifeautalai. (Tagai i le Mataupu Faavae ma Feagaiga 80:3.)
24.2.1
Faifeautalai Talavou e Aoaoina [Lesona]
O faifeautalai talavou e tofia e a’oa’o atu le talalelei i se mea mamao ese mai le aiga. O nei tofiga e faia e Aposetolo e ala i faaaliga. O nei faifeautalai e auauna atu i lalo o le taitaiga a se peresitene o le misiona.
O alii nofofua ua ta’i 18–25 tausaga e mafai ona auauna atu o ni faifeautalai e a’oa’oina [lesona]. E masani ona latou auauna atu mo le 24 masina.
O tamaitai nofofua ua ta’i 19–29 e mafai ona auauna atu o ni faifeautalai e a’oa’oina [lesona]. E masani ona latou auauna atu mo le 18 masina.
24.2.2
Faifeautalai Talavou mo Auaunaga
O faifeautalai talavou mo auaunaga e tofia e auauna atu i le Ekalesia ma nuu a o nonofo i o latou aiga. O nei tofiga e faia e Aposetolo e ala i faaaliga. E tuuina atu i tagata o o latou tulaga e sili ona talafeagai mo se misiona mo auaunaga (tagai i le 24.3.3).
O nei tagata taitoatasi e tutusa o latou tulaga faatonuina mo sauniuniga ma le agavaa ma i latou o e tofia i misiona e a’oa’oina [lesona]. O faifeau faaolioli talavou uma e fautuaina atu e ala i le faagasologa lava e tasi.
O faifeautalai mo auaunaga e auauna atu i le lotoifale i lalo o le taitaiga a se peresitene o le misiona, faatasi ai ma le lagolagosua vavalalata a taitai o misiona mo auaunaga. E tuuina atu e le peresitene o le siteki le lagolago i mataupu faale-ekalesia (tagai i le 24.7.3).
Faatasi ai ma le fesoasoani a o latou taitai o misiona mo auaunaga, e maua ai e faifeautalai mo auaunaga taitasi ia tofitofiga e talafeagai i ona tulaga. O tofiga e fua foi i avanoa e auauna atu ai (tagai i le 24.7.1). O nei faifeautalai e auauna atu i le tulaga atoatoa o lo latou gafatia.
O alii nofofua ua ta’i 18–25 tausaga e mafai ona auauna atu o ni faifeautalai mo auaunaga. E masani ona latou auauna atu mo le 24 masina.
O tamaitai nofofua ua ta’i 19–29 e mafai ona auauna atu o ni faifeautalai mo auaunaga. E masani ona latou auauna atu mo le 18 masina.
O misiona mo auaunaga mo faifeautalai talavou e le’i avanoa mo eria uma o le lalolagi. Mo se lisi o eria ua avanoa ai misiona mo auaunaga, tagai i le ChurchofJesusChrist.org/service-missionary. O loo maua foi i le uepisaite isi faamatalaga e uiga i misiona mo auaunaga. O nofoaga e le o avanoa ai misiona mo auaunaga, e mafai e tagata talavou o le ekalesia ona auauna atu i le polokalama lava e tasi e pei o faifeautalai matutua mo auaunaga (tagai i le 24.2.4).
24.2.3
Faifeau Faamisiona Matutua
O tagata o le Ekalesia ua ta’i 40 tausaga ma matutua atu e mafai ona tofia o ni faifeautalai matutua o se ulugalii pe afai e leai ni fanau o faalagolago ia i latou.
O tamaitai nofofua ua ta’i 40 tausaga ma luga atu, e mafai ona tofia o ni faifeautalai matutua pe afai e leai ni a latou fanau o nonofo i le fale.
O alii nofofua ua ta’i 40 tausaga ma matutua atu e le mafai ona auauna atu o ni faifeautalai matutua. Peitai, e mafai ona auauna atu o ni faifeautalai matutua mo auaunaga. (Tagai i le 24.2.4.)
O faifeautalai matutua uma e fautuaina e sue ni tagata e a’oa’o ma fesoasoani ia i latou e sauniuni mo papatisoga. E mafai foi ona tofia faifeautalai matutua e lagolago:
-
Tagata o le Ekalesia ma taitai eria ma le lotoifale.
-
Eria, matagaluega a le Ekalesia, ma fale ma fanua o le Ekalesia.
-
Faalapotopotoga o Foai Alofa.
O faifeautalai matutua e masani lava ona auauna mamao ese mai le aiga mo le 6–23 masina. O i latou e auauna atu i fafo atu o o latou atunuu e nonofo ai e masani lava ona auauna atu e le itiiti ifo ma le 18 masina.
O faifeau faamisiona matutua, e le talosagaina le tutusa o itula e galulue ai, faatino uma gaoioiga e tasi, pe ausia foi ia faamoemoega e pei o faifeautalai talavou. Ae, o le latou auaunaga e mamafatu lava. Ona o lenei le mafuaaga, e tatau ai ona lava lo latou soifua maloloina e auauna atu ai. E tatau foi ona latou ausia agavaa tautupe (tagai i le 24.3.4.2).
O epikopo, peresitene o siteki, ma isi taitai e lauiliuina ma le agaga tatalo pe o ai e mafai ona auauna atu. O epikopo po o peresitene o siteki e mafai ona faatalanoaina nei tagata o au paia e filimaoti ai lo latou avanoa ma valaaulia i latou e sauniuni e auauna atu.
O tofitofiga mo faifeautalai matutua e tuuina atu e ala i faaaliga i Aposetolo. E mafai e taitai ona fautuaina atu ni ituaiga patino o tofitofiga mo faifeautalai matutua. Ae peitai, e le tatau i taitai ona faia ni tautinoga e uiga i le tofiga o le a latou mauaina. E mafai e sui faaolioli ona faaali atu se mea e fiafia i ai mo se tofiga ae e tatau ona loto e talia soo se tofiga.
Mo nisi faamatalaga, tagai i le SeniorMissionary.ChurchofJesusChrist.org.
24.2.4
Faifeautalai Matutua mo Auaunaga
E faaopoopo i valaauga i o latou uarota po o siteki tumau, e mafai e tagata o le au paia ona auauna atu i le Alii o ni faifeautalai matutua mo auaunaga. E tuu atu e nei faifeautalai ia auaunaga taua i matagaluega a le Ekalesia, fale ma fanua, ma misiona (tagai i le 24.7.1). E nonofo i o latou aiga.
O alii ma tamaitai ua ta’i 26 tausaga ma matutua atu e mafai ona tofia e avea ma faifeautalai matutua mo auaunaga.
Ma le isi, o alii talavou ua ta’i 18–25 tausaga ma tamaitai talavou ua ta’i 19–25 tausaga e mafai ona auauna atu i le polokalama a faifeautalai matutua mo auaunaga pe afai e nonofo i nofoaga e le o avanoa ai misiona mo auaunaga mo faifeautalai talavou. E mafai foi ona latou auauna atu pe afai ua faaipoipo pe ua uma foi ona auauna atu o ni faifeautalai talavou e a’oa’o atua [lesona] po o auaunaga.
O faifeautalai matutua mo auaunaga e valaauina e le peresitene o le siteki. Latou te galulue i lalo o lana taitaiga. O le telē o le taimi latou te auauna atu ai i vaiaso taitasi e faalagolago i lo latou gafatia, avanoa mo auaunaga i lo latou eria, ma le taitaiga mai le Au Peresitene o le Eria.
O tofitofiga o faifeautalai matutua mo auaunaga e faamaonia e le peresitene o le siteki. Na te fefautuaai ma le faifeautalai ma isi ma sailia ma le agaga tatalo ia faaaliga e uiga i tofiga taitasi. E mafai ona ia iloiloa le SeniorMissionary.ChurchofJesusChrist.org pe a fuafuaina ia tofitofiga.
Mo nisi faamatalaga e uiga i faifeautalai matutua mo auauanga, tagai i le 24.7.
24.2.5
Aotelega o Tofiga Faafaifeautalai
O le siata lea o loo aotele atu ai ituaiga o tofiga faafaifeautalai.
|
Faifeautalai Talavou e A’oa’oina [Lesona] |
Faifeautalai Talavou mo Auaunaga |
Faifeautalai Matutua |
Faifeautalai Matutua mo Auaunaga | |
|---|---|---|---|---|
|
E valaauina e le | Faifeautalai Talavou e A’oa’oina [Lesona] Peresitene o le Ekalesia | Faifeautalai Talavou mo Auaunaga Peresitene o le Ekalesia | Faifeautalai Matutua Peresitene o le Ekalesia | Faifeautalai Matutua mo Auaunaga Peresitene o le siteki |
|
E tofia e | Faifeautalai Talavou e A’oa’oina [Lesona] Se Aposetolo | Faifeautalai Talavou mo Auaunaga Se Aposetolo | Faifeautalai Matutua Se Aposetolo | Faifeautalai Matutua mo Auaunaga Peresitene o le siteki |
|
E vaetofia e le | Faifeautalai Talavou e A’oa’oina [Lesona] Peresitene o le siteki | Faifeautalai Talavou mo Auaunaga Peresitene o le siteki | Faifeautalai Matutua Peresitene o le siteki | Faifeautalai Matutua mo Auaunaga Peresitene o le siteki po o se fesoasoani |
|
E nofo | Faifeautalai Talavou e A’oa’oina [Lesona] Mamao ese mai le aiga | Faifeautalai Talavou mo Auaunaga I le aiga | Faifeautalai Matutua Mamao ese mai le aiga po o i le aiga | Faifeautalai Matutua mo Auaunaga I le aiga |
|
Taitai faale-ekalesia | Faifeautalai Talavou e A’oa’oina [Lesona] Peresitene o le misiona po o le peresitene o le nofoaga faaletalafaasolopito | Faifeautalai Talavou mo Auaunaga Peresitene o le siteki | Faifeautalai Matutua Peresitene o le misiona, malumalu, po o le peresitene o le nofoaga faaletalafaasolopito, po o le Peresitene o le Eria | Faifeautalai Matutua mo Auaunaga Peresitene o le siteki |
|
E lipoti atu i le | Faifeautalai Talavou e A’oa’oina [Lesona] Peresitene o le misiona po o le peresitene o le nofoaga faaletalafaasolopito | Faifeautalai Talavou mo Auaunaga Peresitene o le misiona, e ala i taitai misiona mo auaunaga | Faifeautalai Matutua Peresitene o le misiona, malumalu, po o le peresitene o le nofoaga faasolopito; Peresitene o le Eria, faatonu o le nofoaga tutotonu mo tagata asiasi mai, po o se pule o le matagaluega po o fale ma fanua o le Ekalesia | Faifeautalai Matutua mo Auaunaga Pule o le faafoega o tofitofiga mo auaunaga |
|
Tulaga manaomia o tausaga | Faifeautalai Talavou e A’oa’oina [Lesona] 18–25 (alii) | Faifeautalai Talavou mo Auaunaga 18–25 (alii) | Faifeautalai Matutua 40 pe matutua atu pe afai ua faaipoipo pe o se tuafafine nofofua | Faifeautalai Matutua mo Auaunaga 26 pe matutua atu |
24.3
Sauniuni ma le Agavaa e Auauna Atu i se Misiona
E fautuaina faifeautalai faaolioli e auauna atu i misiona ona o lo latou alolofa i le Alii ma Ana fanau. E tatau ona latou faamasani i fesili o faatalanoaga mo le fautuaina atu o faifeautalai.
24.3.1
Liua ia Iesu Keriso
O faifeautalai faaolioli e taumafai malosi e faamalolosia o latou liua ia Iesu Keriso ma Lana talalelei toefuataiina. Latou te:
-
Galulue e faamalolosia lo latou faatuatua i le Tama Faalelagi ma Iesu Keriso.
-
Faamalolosia a latou molimau e uiga i le talalelei toefuataiina a Iesu Keriso (tagai i le Alema 5:45–47).
-
Ola i le aoaoga faavae a Keriso e ala i le “filifili e salamo ma galueaiina le amiotonu” (Alema 13:10; tagai foi i le 2 Nifae 31:9–21).
-
Tatalo, suesue tusitusiga paia (aemaise le Tusi a Mamona), ma a’oa’oga a perofeta soifua, ma tausi poloaiga (tagai i le Alema 17:2–3).
-
Auai i galuega o malumalu ma talafaasolopito o aiga (tagai i le Mataupu Faavae ma Feagaiga 109.22).
-
Auai i le seminare po o le inisitituti (mo autalavou ma talavou matutua).
24.3.2
Ausia o Tulaga Faatonuina o le Agavaa
O faifeautalai faaolioli e taumafai malosi ia agavaa mo le mafutaga a le Agaga. E manaomia lenei mea mo le mataalia o le galuega faafaifeautalai (tagai i le Mataupu Faavae ma Feagaiga 42:13-14). O le agavaa mo le mafutaga a le Agaga e aofia ai le mama mai agasala (tagai i le Helamana 4:24; Mataupu Faavae ma Feagaiga 38:42).
24.3.2.1
Salamo
O le salamo ma le faamagaloga o agasala o meaalofa ia o loo avanoa mo fanau uma a le Atua. Ua mafai ona maua nei meaalofa e ala i le mana togiola a Iesu Keriso. O le salamo e manaomia ai le faatino o le faatuatua ia Keriso, i ai le manatu moni, ma le tausiga o poloaiga. E aofia ai le ta’uta’u atu ma le lafoa’i o agasala. Mo agasala matuia, o le salamo e manaomia ai le tautau atu i le epikopo po o le peresitene o le siteki (tagai i le 32.3 ma le 32.4 i le tusitaulima lenei).
O se tagata ua salamo e faamagaloina ma faamamaina e ala i le Togiola ma le alofa tunoa o Iesu Keriso. E le toe manatuaina e le Alii le agasala. “Ua matua tele lava lona olioli i le agaga e salamo!” (Mataupu Faavae ma Feagaiga 18:13; tagai foi i le Isaia 43:25; Iakopo 6:5; Alema 34:15–17; Helamana 5:10–11; Mataupu Faavae ma Feagaiga 58:42–43; ma le 32.1 i le tusitaulima lenei.)
O tagata o le Ekalesia e mananao e faamisiona e tatau ona liliu atu i le Faaola a o latou salamo ma sauniuni e auauna atu. E mafai foi ona latou sailia le fesoasoani alofa a tagata o le aiga ma taitai o le Ekalesia i le lotoifale.
O se faifeautalai faaolioli e tatau ona salamo i agasala matuia a o le’i mafai e le peresitene o le siteki ona auina atu lana talosaga (tagai i le 32.6–32.8; tagai foi i le 24.4.4). O le faagasologa o le salamo e aofia ai le lava o le taimi mo le tagata e faaalia ai e ala i le ola amiotonu ua ia maua le agaga o Keriso e oo atu i le faamagaloga o agasala. (tagai i le Mataupu Faavae ma Feagaiga 20:37). E fefautuaai le peresitene o le siteki ma le Au Peresitene o le Eria (po o le Fitugafulu Eria latou te tofia) pe afai e i ai ni ana fesili e uiga i le umi o le taimi e manaomia mo le salamo.
24.3.2.2
Solitulafono e Tuai Ona Ta’uta’u Atu
O se tagata ua maua se valaauga o le misiona pe ua amata le auaunaga faafaifeautalai e aunoa ma le salamo mai agasala matuia, e ono manaomia ona nofo ai pea i le fale pe toe foi i le fale. E faalagolago i tulaga, e mafai ona auauna atu o ia pe a uma ona salamo (tagai i le 24.6.3.2).
24.3.3
Soifua Maloloina Faaletino, Faalemafaufau, ma Faalelagona
O le galuega faafaifeautalai e lu’itauina. O tulaga manaomia faaletino, faalemafaufau, ma faalelagona e mafai ona atuatuvale ai. O faifeautalai e tele ina galulue i tulaga e le masani ai. E ono aafia ai le soifua maloloina ona o le suiga o meaai, tau, po o tulaga e nonofo ai. O le faatulagaga o le faasologa o taimi o le faifeautalai e mamafatu foi. (Tagai i le Alema 17:5; 26:27–28, 30.)
E tatau i faifeautalai talavou e a’oa’oina [lesona] ona tautino atu atoa ma ia gafatia faaletino, faalemafaufau, ma faalelagona ona galue i le faatulagaga atoa a le faifeautalai faamisiona. (Tagai i le Tulaga Faatonuina Faafaifeautalai mo So’o o Iesu Keriso [2019], 2.4.)
E galulue faifeautalai talavou mo auaunaga i se faasologa ua faatulagaina i le mea e gata mai ai a latou taleni, tomai, ma gafatia.
O faifeautalai faaolioli e sauniuni e auauna atu e ala i le faamalolosia o o latou soifua maloloina faaletino, faalemafaufau ma faalelagona. Latou te galulue foi e atia’e le malosi e fetuutuunai ai ma ola-tutoatasi.
Atonu e manaomia ona fefautuaai ma le faautauta ia taitai ma se sui faaolioli e uiga i ona lu’itau faalesoifua maloloina a o le’i auina atu se fautuaga. Atonu e i ai ni sui faaolioli e ono manaomia ona maua se tausiga faapolofesa mo o latou lu’itau faalesoifua maloloina (tagai i le 31.3.6). O se sui faaolioli ua tuu atu i ai se talavai faafomai e tatau ona faamaoni a’ia’i e inu ana fualaau i lana auaunaga atoa e pei ona faatonuina ai e se polofesa faalesoifua maloloina.
24.3.4
Tupe
O le ositaulaga i mea tautupe o se vaega o le galuega faafaifeautalai (tagai i le Mareko 1:17–18; Alema 15:16). Ua i ai i faifeautalai ma o latou aiga le tiutetauave taua muamua o le foai atu i mea tautupe i le auaunaga faafaifeautalai. E tatau ona latou faia tapenaga talafeagai ma le osigataulaga. E tatau ona tutoatasi i latou i mea tautupe ina ia mafai ona latou ausia tautinoga mo saofaga.
24.3.4.1
Faatupeina o Faifeautalai Talavou e Auauna Mamao Ese mai Aiga
O sui talavou faaolioli o e ua saunia e tusa ai ma o latou gafatia e le tatau ona faatuai ona auauna atu ona o ni mafuaaga tautupe. O i latou e manaomia le fesoasoani tautupe ina ia faafetaia’ia ai tautinoga mo saofaga, e mafai ona maua mai i aiga lautele ma uo.
Afai o totoe pea se tulaga manaomia, e mafai e le epikopo po o le peresitene o le siteki ona talosaga atu i tagata o le au paia i le uarota po o le siteki e foai atu i le tupe mo faifeautalai a le uarota.
E le mafai ona faaaoga ai tupe o paketi a le iunite i le lotoifale ma tupe o le taulaga anapogi.
Tautinoga mo saofaga faalemasina. O faifeautalai talavou e a’oa’oina [lesona] ma o latou aiga e saofaga i se aofaiga patino i masina taitasi e fesoasoani ai mo le totogiina o tau o le polokalama faafaifeautalai. Ua faatulaga le aofaiga i se tasi o ala nei e lua:
-
O faifeautalai mai nisi o atunuu e auai i le polokalama ua faalaugatasia le saofaga. O lona uiga o le aofaiga lava e tasi ua tuu atu mo faifeautalai taitoatasi e tusa lava po o fea e auauna atu ai o ia. O le laumua o le Ekalesia e faailoaina mai le aofaiga. E mafai e taitai ona faafesootai le Matagaluega o Faifeautalai (tagai i le 24.9.3) po o le ofisa o le eria mo se lisi o atunuu e i lenei polokalama ma le aofaiga ua faalaugatasiaina.
-
I isi atunuu, e fefautuaai ai le epikopo, peresitene o le siteki, faifeautalai, ma le aiga e uiga i le aofaiga o saofaga faalemasina. E iloilo e le epikopo ma le peresitene o le siteki le taitaiga mai le Au Peresitene Eria. Latou te fautuaina le ositaulaga tautupe ma le ola-tutoatasi talafeagai e faavae i luga o tulaga o le faifeautalai ma lona aiga. Latou te malilie i se aofaiga o le saofaga ma tusifaamaumau i le pepa talosaga a le faifeautalai. E tautino atu le faifeautalai ma lona aiga latou te mulimulita’ia le tautinoga. E na o le pau le ala e mafai ai foi e isi ona saofaga i lenei aofaiga pe afai o loo latou nonofo i le atunuu moni o le faifeautalai (tagai i le “Tupe a Faifeautalai a le Uarota” o loo mulimuli mai i le vaega lenei).
O saofaga e totogi i le tupe mo faifeautalai faamisiona a le uarota. E faamaonia e epikopo, o loo tuuina atu tupe i masina taitasi. O tupe e sili atu ma le aofaiga e totogi faalemasina, e le tatau ona vave totogia. O tupe e vave ona totogi atu i saofaga e le mafai ona toe faafoi atu pe afai e vave ona toe faafoi atu i le fale se faifeautalai.
Tupe faaalu i le galuega tala’i. O masina taitasi, e maua ai e faifeautalai talavou ia tupe mai le misiona mo a latou meaai maloloina, femalagaaiga, ma isi tupe faaalu e ola ai. O nei tupe e paia. E na o faamoemoega e faatatau i le misiona e faaaoga ai e faifeautalai na tupe. E le tatau ona faaaoga mo le totogiina o ni mea faaletagata lava ia, teu, pe auina atu i tagata o le aiga po o isi. E toe faafoi atu e faifeautalai i le misiona soo se tupe latou te le manaomia.
E faaaoga e faifeautalai tupe a le tagata lava ia e taulima ai isi tupe faaalu. E tatau ona tuuitiitia tupe faaalu faaletagata lava ia. (Tagai i le Tulaga Faatonuina Faafaifeautalai mo Soo o Iesu Keriso, 4.8).
24.3.4.2
Faatupeina o Faifeautalai Matutua e Auauna Mamao Ese mai Aiga
Tautinoga mo saofaga faalemasina. O faifeautalai matutua e auauna mamao ese mai le aiga, latou te saofaga i le tupe mo faifeautalai a o latou uarota tumau i masina taitasi. O nei saofaga e fesoasoani i le totogiina o fale ma tupe faaalu o taavale (tagai foi i le “Tupe faaalu faaopoopo” i se taimi mulimuli ane i le vaega lenei). O aofaiga o saofaga mo fale e fua i tau averesi i misiona taitasi. O nei aofaiga atonu e sili atu pe itiiti ifo nai lo le tau o fale e tuuina atu e le Ekalesia.
-
O faifeautalai matutua mai atunuu o loo auai i le polokalama o saofaga laugatasia e saofagā atu i se aofaiga ua atofa atu i le ta’ui o le valaauga.
-
I isi atunuu, e fefautuaai faatasi le epikopo, peresitene o le siteki, ma le faifeautalai, e uiga i le aofaiga o saofaga faalemasina. E uunaia e taitai le ositaulagaina o mea tautupe e fua i tulaga o le faifeautalai. Latou te malilie i se aofaiga ma tusifaamaumau i le pepa talosaga a le faifeautalai. O lea aofaiga e tatau ona le itiiti ifo ma le aofaiga ua faavaeina e le Au Peresitene o le Eria mo faifeautalai matutua (i le feutagaiga ma le Matagaluega o Faifeautalai). E mafai foi e isi o loo nonofo i le atunuu tumau o le faifeautalai ona saofaga i lenei aofaiga.
E faamaonia e epikopo o loo foai atu tupe i masina taitasi. E le tatau ona vave totogia tupe e sili atu ma le aofaiga faalemasina.
Tupe faaalu faaopoopo. E faaopoopo atu i le saofaga faalemasina na tautinoina, lea e fesoasoani i le totogiina o fale ma tupe faaalu o taavale, e tatau i faifeautalai matutua ona totogi atoa isi tupe faaalu e aofia ai ma meaai, mea e patino i le tagata, ma le kesi o taavale.
24.3.4.3
Faatupeina o Faifeautalai e Auauna Atu mai le Fale
O faifeautalai e auauna atu mai le fale e nafa ma o latou manaoga uma tautupe. O i latou e manaomia le fesoasoani tautupe e mafai ona maua mai tagata o o latou aiga ma uo. E le mafai ona faaaogaina tupe mo faifeautalai a le uarota po o le siteki mo manaoga tau i le misiona
24.3.4.4
Inisiua Faafomai ma Tupe Faaalu
O faifeautalai uma, e aofia ai faifeautalai talavou o loo aoao atu, ua uunaia malosi ina ia tausia a latou inisiua faafomai o loo i ai pe a mafai.
O faifeautalai e auauna atu mai le fale, e tatau ona i ai a latou lava inisiua faafomai ma isi. O faifeautalai matutua e auauna mamao ese mai aiga e tatau foi ona i ai lenei inisiua. O faifeautalai matutua o e o le a auauna atu i fafo atu o o latou atunuu tumau, e mafai ona maua se inisiua e ala i le Senior Service Medical Plan.
24.3.5
Matafaioi a Tagata o le Aiga ma Taitai i le Sauniaina o Faifeautalai
E fesoasoani tagata o le aiga, epikopo, ma isi taitai i le autalavou ia saunia e auauna atu i se misiona. E valaaulia e epikopo ia alii talavou taitasi e avea ma se faifeautalai, faapea foi ma tamaitai talavou taitasi o e mananao e auauna atu.
-
Fesoasoani ia i latou ia avea ma faifeautalai mataalia o le au paia i le faasoaina atu o le talalelei ae latou te le’i mauaina se valaauga e auauna atu.
-
Saunia ni avanoa mo i latou e auauna ma a’oa’o atu ai.
-
Faatulaga ni avanoa mo i latou e o faatasi ai ma faifeautalai faamisiona.
-
Valaaulia faifeautalai o loo auauna i le taimi nei po o isi ua mae’a misiona e faasoa mai o latou aafiaga i le a’oa’o atu ma le auauna atu.
-
Alolofa ma musuia tagata taitasi ia sauniuni e auauna atu i se misiona.
-
Fautuaina i latou e tuuto atu se taimi faaopoopo i le tatalo ma suesuega o tusitusiga paia, aemaise lava o le Tusi a Mamona.
-
Faatulaga se vasega o sauniuniga a le faifeautalai.
E fautuaina e tagata o le aiga ma taitai ia tagata matutua e mafaufau i le auaunaga faafaifeautalai matutua. E mafai ona aofia ai le fesoasoani ia i latou:
-
E iloilo lo latou gafatia faaletino ma mea tautupe e auauna ai i se misiona, pe o ese mai le aiga po o le faia a o nonofo ai i le aiga.
-
E faailoa avanoa faafaifeautalai e mafai ona latou faataunuuina.
-
Ia avea ma faifeautalai mataalia o le au paia i le faasoaina atu o le talalelei ae latou te le’i mauaina se valaauga e auauna atu.
-
Ia malamalama i faamanuiaga o le auaunaga faafaifeautalai o le a i ai i o latou aiga (tagai i le Mataupu Faavae ma Feagaiga 31:5–6).
E fautuaina e tagata o le aiga ma taitai ia faifeautalai faaolioli uma e suesue:
-
O Le Tusi a Mamona ma isi tusitusiga paia.
-
Talai Lau Talalelei: O Se Taiala i le Faasoaina Atu o le Talalelei a Iesu Keriso.
E fesoasoani tagata o le aiga ma taitai i sui faaolioli uma ia tautino e mulimuli i tulaga faatonuina faafaifeautalai. Latou te uunaia sui faaolioli e suesue i le tusitaulima o tulaga faatonuina faafaifeautalai e faatatau i o latou tofiga atonu e tofi i ai:
-
Mo faifeautalai talavou e a’oa’oina [lesona]: Tulaga Faatonuina Faafaifeautalai mo So’o o Iesu Keriso
-
Mo faifeautalai talavou o auaunaga: Tulaga Faatonuina Faafaifeautalai mo Soo o Iesu Keriso—Misiona mo Auaunaga
-
Mo faifeautalai uma: o vaega “Faaaoga ma le Amiotonu Tekinolosi” ma le “Mulimuli i Puipuiga mo le Faaaogaina o Tekinolosi” i le mataupu e 2 o le Tala’i La’u Talalelei.
24.4
Fautuaina Atu o Faifeautalai
E i ai nisi sui faaolioli e le’i nonofo ai pea i le uarota mo le le itiiti ifo ma le tasi le tausaga. I tulaga nei, e vave feutagai ai le epikopo i le faagasologa o le talosaga ma le epikopo o le uarota na i ai talu ai le tagata.
24.4.1
Iloiloga Faalesoifua Maloloina
E mamafatu le galuega faafaifeautalai i le faaletino, faalemafaufau, ma faalelagona. E manaomia sui faaolioli uma ia iloiloina e polofesa faafomai lo latou saunia faalesoifua maloloina.
O iloiloga faalesoifua maloloina e toeiloiloina e le ofisa o le eria ma le Matagaluega o Faifeautalai. O nisi taimi, o atugaluga faalesoifua maloloina e mafai ona aafia ai le gafatia o se tagata e auauna atu i se nofoaga e mamao ese mai le aiga. I nisi o tulaga, e ono toe faafoi mai le talosaga faatasi ma ni faatonuga i le ala e mafai ai e le tagata ona faaleleia lona saunia faalesoifua maloloina.
24.4.2
Fomu o Faatalanoaga ma le Talosaga
E faatautaia e le epikopo ma le peresitene o le siteki ia faatalanoaga mae’ae’a, ia vailiili faaleagaga ma siitia, ma sui faaolioli taitasi. Latou te faaaogaina le fesili o faatalanoaga mo le fautuaina atu o faifeautalai. Latou te talanoaina le:
-
Molimau a le sui faaolioli e uiga ia Iesu Keriso ma Lana talalelei toefuataiina (tagai i le 24.3.1).
-
Ausiaina e le sui faaolioli o tulaga faatonuina o le agavaa (tagai i le 24.3.2).
-
Saunia faaletino, faalemafaufau, ma faalelagona o le sui faaolioli (tagai i le 24.3.3).
-
Saunia i mea tautupe (tagai i le 24.3.4).
E iloiloina foi e le epikopo ma le peresitene o le siteki ia faamatalaga e uiga i le saunia i tulaga faatonuina o le agavaa ma le soifua maloloina i le Polokalama mo le Fautuaina atu o Faifeautalai i le Initoneti. Afai e i ai ni fesili a se peresitene o le siteki i le Iunaite Setete ma Kanata, na te faafesootaia le Matagaluega o Faifeautalai (tagai i le 24.9.3). O isi atunuu, na te faafesootaia le ofisa o le eria. E le faaopoopoa e le epikopo ma le peresitene o le siteki se isi tulaga faatonuina mo le agavaa. Latou te le suia foi fesili o le faatalanoaga.
O faamatalaga ua i ai i le fomu mo le fautuaina atu, ua saofagā i le faagasologa faalefaaaliga o valaauga mo misiona. Ia mautinoa foi e taitai ua faailoa uma atu ia faamatalaga o loo talosagaina.
Afai e i ai ni atugaluga o le epikopo ma le peresitene o le sieki e uiga i le ausiaina e le sui faaolioli o tulaga faatonuina o le agavaa, pe uiga foi i le saunia faalesoifua maloloina, latou te fefautuaai faatasi ma le tagata. Faatasi ma le faatagaga a se sui faaolioli, e mafai foi ona latou fefautuaai faatasi ma ona matua. E le tatau i le epikopo ma le peresitene o le siteki ona auina atu se pepa o talosaga se’i iloga ua salamo le tagata i se agasala matuia (tagai i le 24.3.2.1). E faalagolago i le soifua maloloina faaletino, faalemafaufau, pe faalelagona o le tagata, e mafai ona latou talanoaina le avanoa e tofia ai e avea ma se faifeautalai mo auaunaga.
I tulaga faavavevave pe afai e le o avanoa le epikopo po o le peresitene o le siteki, e mafai ona ia faatagaina se tasi o ona fesoasoani e faatautaia nei faatalanoaga.
I itu, o le peresitene o le misiona po o se fesoasoani e tofia, e faatalanoaina ma fautuaina atu faifeautalai faaolioli. E le faia e peresitene o itu nei faatalanoaga.
24.4.3
Auina Atu o Fautuaga
E mafai e le peresitene o le siteki ona auina atu se pepa o talosaga mo se faifeautalai talavou faaolioli e oo i le 150 aso a o le’i oo i lona aso e avanoa ai. E mafai e le peresitene o le siteki ona auina atu se pepa o talosaga mo se faifeautalai matua e oo i le iva masina a o le’i oo i lona aso e avanoa ai. O le aso e avanoa ai e tatau o se taimi ua ausia uma ai tulaga nei:
-
Ua aulia e le tagata le tausaga e agavaa ai mo le auaunaga.
-
Ua faamauina le tagata o se tagata o le Ekalesia mo le lē itiiti ifo ma le tasi le tausaga.
-
Ua mae’a le a’oga maualuga a le tagata, pe ua le o toe i ai foi i le a’oga maualuga, a’oga tulagalua, po o se a’oga e tutusa ma le maualuga lena. (E faatatau lenei mea mo na o faifeautalai talavou e oo atu i le aso e avanoa ai e talai ae lei atoa le 19 tausaga.)
E fuafua e faifeautalai talavou faaolioli ma o latou peresitene o le siteki po o afea e tatau ai i le peresitene o le siteki ona auina atu le fautuaga [po o le talosaga]. E mafai ona latou faaaogaina le Submission Planning Tool ma le Mission Release Date Planning Tool mo se fesoasoani.
E masani ona auina atu fautuaga o se faifeautalai e ala atu i le uarota ma le siteki tumau o le tagata. O epikopo o uarota e ese mai uarota tumau, e pei o se uarota a talavou nofofua matutua, e mafai ona faagasoloina le talosaga a se faifeautalai. E tatau ona latou feutagai muamua ma le epikopo o le uarota tumau. O le uarota tumau e tatau ona tusia o le uarota e faatupeina.
24.4.4
O i Latou e Le Mafai ona Auauna Atu o ni Faifeautalai Faamisiona
O nisi taimi o se tagata o le ekalesia e manao e auauna atu ma ua fautuaina atu mo le galuega faafaifeautalai, e le mafai ona valaauina o se faifeautalai e aoao atu po o se faifeautalai mo auaunaga. E ono afua ona o luitau faalesoifua maloloina, lē ausia tulaga faatonuina o le agavaa, faafitauli faaletulafono, po o isi tulaga. E faailoa atu e le epikopo ma le peresitene o le siteki le alofa ma le lotofaafetai i le lotonaunau o le tagata e auauna atu. E mafai e taitai ona talanoaina fesili i le Matagaluega a Faifeautalai i le 801-240-2179 po o le Missionary.Prefield@ChurchofJesusChrist.org.
E fautuaina e le peresitene o le siteki ma le epikopo le tagata ia tulimatai atu i luma i luga o le ala o feagaiga e avea ma se soo o Iesu Keriso i lona olaga atoa. La te fautuaina foi le tulitulimatagauina o isi taumafaiga taua, e pei o le a’oga po o galuega mo talavou o le Ekalesia.
24.5
Pe A Mavae Ona Maua se Valaauga Faamisiona
O faifeautalai faamisiona fou faato’ā valaauina e fautuaina ia faitau pe toe faitau le Tusi a Mamona a o le’i amataina a latou misiona. Latou te mulimuli i fautuaga a le Tupu o Peniamina ia “vaavaaia outou lava, ma o outou mafaufauga, ma a outou upu, ma a outou galuega” (Mosaea 4:30).
Latou te tali vave atu loa lava i faatonuga e tuuina mai i le valaauga. Latou te suesue i aoaoga faavae ma mataupu faavae i tusitusiga paia ma i le Talai Lau Talalelei, ma tuuina atu le faamamafa i le mataupu e 3. Latou te iloiloina foi le tamaitusi o le Fetuunai i le Olaga Faafaifeautalai po o le Fetuunai i le Olaga Faafaifeautalai mo Auaunaga: Tamaitusi o Punaoa. E suesue foi e i latou ma tagata o o latou aiga ia tulaga o le a latou galulue ai.
E lagolagoina e tagata o le aiga ma taitai ia faifeautalai i nei taumafaiga. Latou te faamamafaina foi le taua o le faia o mea lelei ma le tumau ona agavaa mo le Agaga.
24.5.1
Faaeega Paia o le Malumalu ma Auaunaga i le Malumalu
Ua fautuaina faifeautalai faatoa valaauina ina ia maua faaeega paia o le malumalu i le vave e mafai ai ma ia auai soo atu i le malumalu pe a faatagaina ai e tulaga (tagai i le Mataupu Faavae ma Feagaiga 43:15–16; 105:33). E faatatau lenei mea i faifeautalai e aoao atu ma i faifeautalai mo auaunaga pe a talafeagai ai mo o latou tulaga. Mo faamatalaga i le mauaina o faaeega paia, tagai i le 27.2.
O faifeautalai faato’ā valaauina, o ē ua maua faaeega paia, e mafai ona auauna atu o ni tagata faisauniga i le malumalu a o le’i amataina le galuega faafaifeautalai pe a talafeagai ai (tagai i le 25.5).
24.5.2
Lotu Faamanatuga
E valaaulia e le au epikopo ia faifeautalai faato’ā valaauina e lauga i le lotu faamanatuga a o le’i amataina a latou misiona. O se lotu faamanatuga masani lava lea. O le taulaiga e tatau ona i luga o le faamanatuga ma le Faaola. E tatau ona valaaulia le faifeautalai e lauga e uiga ia Iesu Keriso, o Lana talalelei toefuataiina, ma le olioli i le faasoaina atu o le talalelei ma le auauna atu i isi.
E le masani ona valaaulia tagata o le aiga o le faifeautalai ma uo e lauga. E le tatau ona toe faaopoopo le taimi masani o le sauniga.
E tatau i tagata o le ekalesia ma taitai ona aloese mai soo se mea e ono tata’i ese ai mai le natura paia o se valaauga faamisiona po o le fatuina o se mea e le tatau ai e faaalu ai tupe. Mo se faataitaiga, e le tatau ona latou:
-
Lolomiina ni polokalama faapitoa o le lotu faamanatuga.
-
Faatulaga ni laina faaaloalo pe a mae’a le lotu faamanatuga.
-
Fai ni faletatala, se’i vagana ai mo faatasiga faaleaiga. Afai e faia se faatasiga faaleaiga, e fautuaina ia ‘aua ne’i feteenai ma sauniga o le Aso Sa.
24.5.3
Vaetofiaina o Faifeautalai
O le peresitene o le siteki tumau e vaetofiaina faifeautalai taitasi i le latalata e mafai ai i le aso e amata ai lana misiona. I tulaga faavavevave pe afai e le o avanoa le peresitene o le siteki, e mafai ona ia faatagaina se tasi o ona fesoasoani e vaetofiaina faifeautalai. E mafai foi ona ia faamatuu atu i se fesoasoani le tiutetauave mo le vaetofiaina o faifeautalai matutua mo auaunaga.
O le peresitene o le misiona po o se tasi o ona fesoasoani e vaetofiaina faifeautalai e valaauina mai itu o lana misiona. E le vaetofiaina e le peresitene o le itu ia ni faifeautalai.
O se uso o le a auauna mamao ese mai le aiga, e tatau ona maua le Perisitua Mekisateko a o le’i vaetofiaina o ia o se faifeautalai. O se uso o le a galue o se faifeautalai mo auaunaga, e tatau ona umia le Perisitua Mekisateko pe a talafeagai ma ona tulaga. Mo faatonuga e uiga i le faauuga i se tofi i le Perisitua Mekisateko, tagai i le 18.10.
I se taimi ae toeitiiti vaetofia se faifeautalai, e faatalanoa ai o ia e le peresitene o le siteki po o se fesoasoani ua tofia. Afai ua le o ausia e le faifeautalai ia tulaga faatonuina o le agavaa pe ua i ai ni suiga i le soifua maloloina e ono aafia ai le galuega faafaifeautalai, e le vaetofiaina o ia. E faafesootai e le peresitene o le siteki le Matagaluega o Faifeautalai (tagai i le 24.9.3) po o le ofisa o le eria mo se taitaiga.
O le vaetofiaina e tatau ona avea ma se aafiaga faapitoa. E mafai ona auai atu i ai aiga ma uo mamae. E fesoasoani le peresitene o le siteki ia latou malamalama ma lagonaina le paia ma le taua o le valaauga e auauna atu o se sui o Iesu Keriso ma Lana Ekalesia toefuataiina.
O le vaetofiaina ma faamanuiaga e aumai faatasi ai e le tatau ona pu’eina. Ae peitai, e fautuaina le faifeautalai ina ia faamaumau i totonu o lana lava tusi talaaga le aafiaga ma tusi ia manatua vaega o faamanuiaga sa sili ona ‘anoa.
E faamalamalama atu e le peresitene o le siteki e faapea, e tatau i le tagata ona mulimulita’i i tulaga faatonuina o faifeautalai pe a maea ona vaetofiaina.
O le vaetofiaina o se faifeautalai, e mo le valaauga e auauna atu, ae le mo se tofiga patino o le faifeautalai. Afai e suia le tofiga o se faifeautalai, e le toe vaetofiaina. Afai e faamalolo se faifeautalai ma ua faamaonia mulimuli ane e toe foi i le galuega (tagai i le 24.6.3.2), e toe vaetofia o ia o se faifeautalai.
24.6
Auauna Atu i Nofoaga e Mamao Ese mai le Aiga
24.6.1
Tuua mo le Galuega Faamisiona
E totogi e le Ekalesia tau mo faifeautalai talavou e a’oa’oina [lesona] e malaga atu ai ma toefoi mai mai le nofoaga autu mo le a’oa’oina o faifeautalai (NAF) ma le tofiga o le misiona. E totogi foi e le Ekalesia nei tau mo faifeautalai matutua o e auauna atu i nofoaga e mamao ese mai aiga mo le silia ma le tasi le tausaga.
E mafai e tagata patino o le aiga ona aumaia se faifeautalai i se NAF. Ae peitai, e le o faamoemoe latou te faia lena mea. E leai se sauniga a le NAF mo aiga e faatofa ai i a latou faifeautalai.
Mo le malupuipuiga i le malaevaalele ma nisi mafuaaga, e le fautuaina ai aiga ma isi e faafeiloai faifeautalai i malaevaalaele pe a tuua e faifeautalai le NAF mo o latou tofiga i le misiona.
24.6.2
I le Galuega
24.6.2.1
O Mea e Tuu ai Faifeautalai
E fefautuaai peresitene o siteki ma misiona e uiga i le manaomia o faifeautalai i uarota ma paranesi patino. E le o manaomia le tofia o faifeautalai i iunite uma. O nisi iunite e ono i ai ni soa e sili atu ma le tasi. O le peresitene o le misiona e filimaotia eria e tuu i ai faifeautalai.
24.6.2.
Tautua mo Tagata o le Au Paia ma Nuu
E fefautuaai peresitene o siteki ma misiona pe faapefea ona tuuina atu e faifeautalai le tautua i tagata o le au paia ma nuu. E mafai ona latou faaaogaina le JustServe.org i nofoaga e maua ai.
24.6.2.3
O Fale, Taumafa, ma Auala o Femalagaaiga
E filimaoti e le peresitene o le siteki ma le peresitene o le misiona pe saunia e tagata o le au paia i le lotoifale ia fale ma meataumafa mo faifeautalai pe o le a foi le tele e saunia ai. O le saunia o fale po o taumafa e le tatau ona avea ma avega mamafa i tagata o le au paia i le lotoifale
E le o faamoemoeina tagata o le Ekalesia e saunia e le aunoa auala o femalagaaiga mo faifeautalai, o e latou te a’oa’oina, po o i latou faato’ā papatisoina.
E mafai e le Au Peresitene o le Eria ona ofo atu se taitaiga mo le sauniaina o fale, meataumafa, ma auala o femalagaiga mo faifeautalai i le eria.
24.6.2.4
Faifeautalai i Tofiga i Paranesi
I tulaga e le masani ai, e mafai ona tofia faifeautalai o loo galulue mamao ese mai o latou aiga, e auauna atu i tofiga i paranesi. Afai o se paranesi o loo i totonu o se siteki, e vaetofia le faifeautalai i lalo o le taitaiga a le au peresitene o le siteki, ma le faamaoniga a le peresitene o le misiona.
Afai o se paranesi o loo i totonu o se itu, e le vaetofiaina le faifeautalai. O le pule e galue ai i se iunite ua tofia i le misiona, ua aofia ai i le vaetofiaina o se faifeautalai. Afai e faatino e alii faifeautalai se galuega e manaomia ai ki o le perisitua, latou te faia i le pule faamatuu mai le peresitene o le misiona.
24.6.2.5
O Talosaga e Lagolago Isi i Tulaga Tautupe po o A’oga po o Malaga i Isi Atunuu
E le tatau i faifeautalai ma o latou aiga ona tuuina atu se lagolago tautupe mo i latou e nonofo i nofoaga o loo galulue ai faifeautalai, e aofia ai ma le lagolago tautupe mo a’oga. E le tatau foi i faifeautalai ma o latou aiga ona lagolagoina tagata e mananao e malaga i isi atunuu (tagai i le 38.8.19).
24.6.2.6
Vailaau ma Fualaau Faafomai
O le tiutetauave o faifeautalai le maua o a latou vailaau ma fualaau faafomai latou te ono moomia. E le tatau i tagata o aiga po o isi ona auina atu pe tiliva atu ni vailaau ma fualaau faafomai i faifeautalai. Afai e le o maua fualaau po o vailaau faafomai i le misiona, e fefautuaai le faifeautalai ma le peresitene o le misiona.
24.6.2.7
Maliu o se Tagata Patino o le Aiga
Afai e maliu se tagata patino o le aiga o le faifeautalai, e mafai e le faifeautalai ona filifili e toe foi i le fale mo se taimi lē tumau mo le falelauasiga. Peitai, e masani lava ona fautuaina le faifeautalai e nofo ai pea i le galuega. Pe a oo ina mafai, e mafai ona ia maimoaina sauniga o le maliu e ala i le initoneti.
Afai e filifili le faifeautalai e toefoi i le fale mo le maliu, e faafesootai e le peresitene o le misiona le Matagaluega o Faifeautalai.
24.6.2.8
Pepa Faamaumau ma Sefuluai
E tuu ai pea pepa faamaumau i le uarota tumau o le faifeautalai. E faamaumau foi e le uarota tumau lona tulaga o sefuluai. E le totogia e faifeautalai ia sefuluai mai tupe lagolago latou te maua mai le misiona. Peitai, latou te totogia le sefuluai pe afai e i ai lava ni a latou tupe maua patino.
24.6.3
Toe foi i le Aiga mai se Misiona
24.6.3.1
Toe Foi i le Aiga e pei ona Faatulagaina Ai Muamua
E le tatau i faifeautalai ma o latou aiga ona talosagaina ina ia vave faamalolo mai pe faaopoopo foi le taimi o le auaunaga ona o ni tulaga e talafeagai mo le tagata lava ia.
E tatau i faifeautalai ona malaga sa’o i le aiga mai i a latou misiona. Soo se isi faigamalaga e ese mai ai, atonu e faato’ā mafai ona faamaoniaina pe afai e malaga faatasi le faifeautalai ma se tasi o matua po o le tagata o loo tausiaina.
E le faamaloloina ia faifeautalai se’i iloga ua latou lipoti atu i lo latou peresitene o le siteki. Latou te mulimulita’ia tulaga faatonuina faafaifeautalai se’ia oo i lena taimi.
24.6.3.2
Toe Vave Faafoi i le Fale
O nisi faifeautalai e aoao atu ma faifeautalai mo auaunaga e vave faamalolo ona o le soifua maloloina, agavaa, po o isi mafuaaga. E tuu atu e epikopo ma peresitene o siteki le lagolago faapitoa i faifeautalai nei ua toe faafoi mai. E fesoasoani taitai ia i latou e galulue ia toe maua le ola maloloina pe toe foi i le galuega pe a mafai ai.
Mo nisi faamatalaga e uiga i le vave faamutaina o se misiona o auaunaga, tagai i le 24.7.5.
Mo faifeautalai aoao atu po o faifeautalai mo auaunaga ua saunia e toe foi i le galuega, e faafesootai e le peresitene o le siteki le Matagaluega o Faifeautalai e fautua atu lenei mea (tagai i le 24.9.3). O nisi faifeautalai e toe fo’i i le galuega e ono toe tofia i se misiona ese e aoao atu [lesona], po o se misiona mo auaunaga.
Pe a le mafai ona toe foi i le galuega, e fautuaina e taitai le tagata ia fetaomi atu pea i luma i luga o le ala o feagaiga e avea o se soo o Iesu Keriso i lona olaga atoa. E fautuaina foi e taitai le tulitulimatagauina o isi taumafaiga taua, e pei o le a’oga po o galuega mo faifeautalai talavou.
24.7
Misiona mo Auaunaga
24.7.1
Faailoaina o Avanoa mo Faifeautalai mo Auaunaga
Mo faifeautalai matutua mo auaunaga, e fefautuaai le epikopo, peresitene o le siteki, ma le faifeautalai e faailoa ai avanoa i le lotoifale e auauna atu ai.
Mo faifeautalai talavou o auaunaga, e faailoa mai e taitai misiona o auaunaga ni avanoa talafeagai e auauna atu ai. E masani ona auai matua po o tagata e vaaia le faifeautalai i le talanoaga.
E mafai ona tuuina atu le auaunaga i le i ai tino o le tagata, pe o se nofoaga mamao foi e faaaoga ai tekinolosi. E mafai e taitai ona faaaoga punaoa nei e sue ai faamatalaga e uiga i avanoa e auauna atu ai:
-
Initoneti: ChurchofJesusChrist.org/service-missionary po o le SeniorMissionary.ChurchofJesusChrist.org
-
Telefoni: 1-801-240-4914
24.7.2
Fale ma Auala o Femalagaaiga
O faifeautalai mo auaunaga e nonofo i o latou lava fale, po o se tasi o tauaiga, e faamaonia e le Matagaluega o Faifeautalai. Latou te saunia pe faatulagaina a latou lava auala o femalagaaiga i le nofoaga o le auaunaga pe a manaomia.
E le tatau i faifeautalai talavou o auaunaga ona faaalu le po pe nonofo i fale o faifeautalai e aoao atu.
24.7.3
A’oa’oga Faamasani ma le Vaavaaiga
O faifeautalai mo auaunaga e a’oa’o faamasani ma vaavaaia i le nofoaga e auauna atu ai. Latou te maua foi le vaavaaiga mai lea aso i lea aso, fesoasoani, ma aoaoga e uiga i o latou tiute mai taitai misiona mo auaunaga (mo faifeautalai talavou mo auaunaga) po o le pule o o latou tofiga faaleauaunaga (mo faifeautalai matutua mo auaunaga).
O le peresitene o le siteki o le taitai faaleekalesia mo faifeautalai matutua ma talavou o auaunaga. O ia ma le epikopo e faia faatalanoaga masani o le agavaa ma faifeautalai talavou o auaunaga. Latou te faatautaia foi faatalanoaga mo pepa faataga o le malumalu, faauuga i le perisitua, ma faamanuiaga faapeteriaka pe a tatau ai.
E faatuina e le peresitene o le misiona ma lona faletua ia faamoemoega faaleagaga ma faaleamio o le misiona. Latou te fefautuaai e le aunoa ma taitai misiona o auaunaga o e vaaia le faasologa o taimi a faifeautalai, tofiga, ma le soifua maloloina atoa. Latou te fesoasoani faatasi i le faifeautalai ia malamalama ma mulimuli i tulaga faatonuina o faifeautalai o auaunaga.
E faasino atu e le peresitene o le misiona mataupu o le agavaa patino i le peresitene o le siteki a le faifeautalai.
E le auai atu faifeautalai talavou o auaunaga i se NAF. Latou te maua aoaoga faatekinolosi, faatasi ai ma aoaoga faamasani i o latou nofoaga o auaunaga.
Mo nisi faamatalaga e uiga i aoaoga faamasani ma le vaavaaiga, tagai i le Tulaga Faatonuina Faafaifeautalai mo Soo o Iesu Keriso—Misiona Auauna Atu.
24.7.4
Faifeautalai mo Auaunaga i Valaauga i Uarota po o Siteki
E mafai e le epikopo po o le peresitene o le siteki ona tuu atu valaauga o le uarota po o le siteki i faifeautalai mo auaunaga pe afai e le faalavelaveina e valaauga ia tofiga po o taimi o le misiona. Mo faifeautalai talavou mo auaunaga, e galulue faatasi nei taitai ma le taitai o misiona mo auaunaga.
24.7.5
Faai’uina o se Misiona o Auaunaga
O faifeautalai talavou mo auaunaga e masani lava ona valaauina e auauna atu mo le 18 po o le 24 masina. Ua faamoemoe o le a faamaeaina e faifeautalai taitasi le taimi o le auaunaga o loo faailoa atu i lona tofiga.
I nisi o tulaga, a uma ona maua e se faifeautalai le valaauga, e mafai e le faifeautalai, matua, ma taitai o misiona ona fefautuaai faatasi e faailoa mai se isi aso e faamalolo ai. E auina atu e taitai o misiona o auaunaga soo se suiga ua fautuaina atu i lenei aso i le peresitene o le misiona. Afai na te faamaoniaina le suiga, e logo e taitai o misiona o auaunaga le peresitene o le siteki a le faifeautalai le aso fou e faamalolo ai.
O nisi taimi e manaomia ai e se faifeautalai mo auaunaga ona faamuta lana misiona i se taimi vave ona o le soifua maloloina, agavaa, po o isi mafuaaga. I nei tulaga, e logo e le peresitene o le siteki le peresitene o le misiona, taitai o misiona o auaunaga, ma tagata tomai faapitoa o le misiona o auaunaga i le eria. Ona faafesootai lea e le peresitene o le siteki le sui ua tofia i le misiona i le Matagaluega a Faifeautalai ina ia vave iloiloina ma faamaonia e se Pulega Aoao ua tofia.
Mo faamatalaga e uiga i se faifeau faamisiona o auaunaga e ono toe foi mai i le auaunaga, tagai i le 24.6.3.2.
O misiona mo auaunaga a faifeautalai talavou, e le sili atu ma le 24 masina mo alii. O nei misiona e le sili atu ma le 18 masina mo tamaitai.
E mafai e faifeautalai matutua mo auaunaga ona faaumiumi atu la latou tautua i se aso e malilie i ai le peresitene o le siteki, pule o le faafoega, ma le faifeautalai.
24.8
Pe a Mae’a le Auaunaga a le Faifeautalai
24.8.1
Pepa Faataga o le Malumalu
24.8.1.1
Faifeautalai Talavou e Auauna Mamao Ese mai le Aiga
Mo faatonuga e uiga i pepa faataga o malumalu mo faifeautalai talavou e toe fo’i i le fale, tagai i le 26.5.3.
24.8.1.2
Faifeautalai Matutua e Auauna Mamao Ese mai le Aiga
E mafai e le peresitene o le misiona ona faatautaia se faatalanoaga mo se pepa faataga o le malumalu pe a manaomia ai. Afai e agavaa le faifeautalai, e tuuina atu e le peresitene o le misiona se pepa faataga fou e uma le aoga i tausaga e lua.
24.8.1.3
Faifeautalai mo Auaunaga
E tatau i faifeautalai talavou ma matutua mo auaunaga ona faatulaga e ala i taitai i le lotoifale mo faatalanoaga e faafou pepa faataga o le malumalu (tagai i le 26.3.1).
24.8.2
Faatalanoaga mo le Faamalologa o Faifeautalai
E faamalolo e le peresitene o le siteki ia faifeautalai aoao atu ma faifeautalai mo auaunaga ma faatautaia se faatalanoaga o le faamalologa. E mafai e se tasi o ona fesoasoani ona faamalolo ia faifeautalai matutua mo auaunaga. I itu, e masani lava o le peresitene o le misiona po o se fesoasoani e tofia, e faamaloloina faifeautalai. Mo tuusaunoaga, tagai i le 6.3.
E mafai ona fesoasoani ia taiala nei mo lenei faatalanoaga.
-
Faamalo atu ia i latou mo le auauna atu i se misiona.
-
Valaaulia i latou e faasoa mai o latou aafiaga i le misiona.
-
Fautuaina i latou e faaauau pea le avea o se soo o Iesu Keriso i le olaga atoa.
-
Fautuaina i latou e atia’e ni mausa lelei sa latou atia’eina o se faifeautalai.
-
Fautuaina i latou e mulimuli i le Agaga i aso taitasi ma ola faamamaluina.
-
Fautuaina i latou e mafaufau ma sauniuni mo le lumanai, e aofia ai a’oga ma galuega mo faifeautalai talavou. Fesoasoani ia i latou e faatutu sini ma faia fuafuaga e pei ona manaomia. Iloilo le alualu i luma i le O La’u Fuafuaga faatasi ai ma faifeautalai talavou.
-
Aloese mai le folafola atu o ni faamanuiaga patino faapea o se taui mo le galuega faamisiona.
-
Fautuaina i latou ia ola agavaa e le aunoa mo se pepa faataga o le malumalu.
24.8.3
Lipoti a Faifeautalai ma Lauga i Lotu Faamanatuga
E valaaulia e peresitene o siteki ma itu ia faifeautalai aoao atu ma faifeautalai mo auaunaga faato’ā faamalolo mai e lipoti atu e uiga i la latou auaunaga i se fonotaga a fautua maualuga po o le aufono a le itu. E mafai foi e epikopo ona valaaulia faifeautalai faato’ā faamalolo mai e lipoti atu i se fonotaga a se aufono a le uarota.
O mea e talafeagai ai mo le mamao po o isi tulaga, e mafai e faifeautalai faato’ā faamalolo mai ona tuuina atu a latou lipoti e faaaoga ai tekinolosi pe na o se fonotaga a le aufono a se uarota.
E faatulaga e le au epikopo se taimi mo faifeautalai aoao atu ma faifeautalai mo auaunaga faato’ā faamalolo mai e lauga ai i se lotu faamanatuga. O le sauniga, o se sauniga faamanatuga masani lava. E faamautinoa e le au epikopo o loo mulimulitaia mataupu faavae i le 24.5.2.
E mafai ona lauga faifeautalai faato’ā faamalolo mai i lotu faamanatuga i isi uarota pe a valaaulia ai e se sui o le au peresitene o le siteki po o le itu. E mafai foi ona valaaulia i latou e se uso o le au fautua maualuga po o se aufono a le Itu.
24.8.4
Valaauga
Ia vave ona tuu atu e taitai ni tofiga faaleauaunaga ma valaauga i faifeautalai aoao atu ma faifeautalai mo auaunaga faato’ā faamalolo mai. E aofia ai le iloiloina o i latou o ni tagata fai sauniga o le malumalu pe a talafeagai ai (tagai i le 25.5).
24.9
Punaoa mo le Fautuaina Atu o Faifeautalai ma le Auaunaga
24.9.1
Tusi Lesona ma Fomu
-
Talai Lau Talalelei: O Se Taiala i le Faasoaina Atu o le Talalelei a Iesu Keriso
-
Tulaga Faatonuina Faafaifeautalai mo Soo o Iesu Keriso—Faifeautalai mo Auaunaga
-
Fetuunaiga i le Olaga Faafaifeautalai mo Auaunaga: Tamaitusi o Punaoa
-
O La’u Fuafuaga: O Se Taiala mo Faifeautalai Ua Toe Fo’i Mai ma Faufautua
24.9.2
Uepisaite
-
MissionaryRecommendations.ChurchofJesusChrist.org (avanoa mo na o taitai i le lotoifale ma faifeautalai faaolioli)
24.9.3
Faamatalaga e Faafesootai Ai
Matagaluega o Faifeautalai:
-
Telefoni: 1-801-240-2222 po o le 1-800-453-3860, laina 2-2222
Ofisa o le Misiona o Auaunaga:
-
Telefoni: 1-801-240-4914 po o le 1-800-453-3860, laina 2-4914