“24. Mga Rekomendasyon ug Pagserbisyo sa mga Misyonaryo,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2024).
“24. Mga Rekomendasyon ug Pagserbisyo sa mga Misyonaryo,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw.
24.
Misyonaryo nga mga Rekomendasyon ug Pagserbisyo
24.0
Pasiuna
Sa karaang mga panahon, ang Ginoo mihatag sa sugo sa pagpundok sa Israel gikan “sa tibuok kalibotan, [pag]bunyag [n]ila sa ngalan sa Amahan, sa Anak ug sa Espiritu Santo” (Mateo 28:19; tan-awa usab sa bersikulo 20). Ang Ginoo mibag-o niana nga sugo niining ulahing mga adlaw (tan-awa sa Doktrina ug mga Pakigsaad 39:11; 68:6–8; 112:28–30). Ang tanang miyembro sa Simbahan nakigsaad panahon sa bunyag nga mahimong mga saksi sa Dios ug mangalagad sa uban (tan-awa sa Mosiah 18:8–10).
Ang pagserbisyo sa Ginoo isip usa ka misyonaryo usa ka sagrado nga pribilehiyo. Makahatag kini og mahangtorong mga panalangin ngadto sa tawo ug niadtong iyang giserbisyohan (tan-awa sa Doktrina ug mga Pakigsaad 18:14–16).
Ang mga tawag sa misyon naglakip sa usa ka buluhaton sa pagtudlo sa ebanghelyo, pagsuporta sa buhat sa mga departamento o mga yunit sa Simbahan, o pagserbisyo sa lokal nga komunidad.
Ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. Alang sa mga batan-ong lalaki nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari (tan-awa sa Doktrina ug mga Pakigsaad 36:1, 4–7).
Ang Ginoo modawat usab sa takos, makahimo nga mga batan-ong babaye sa pagserbisyo og mga misyon kon magtinguha sila. Alang sa mga batan-ong babaye, ang misyon usa ka gamhanan, apan opsiyonal, nga oportunidad. Ang pagpangandam alang sa misyon makapanalangin sa usa ka batan-ong babaye kon siya modesisyon man sa pagserbisyo isip usa ka misyonaryo o dili.
Ang senior nga mga misyonaryo gikinahanglan ug giawhag usab sa pagpangandam sa pagserbisyo.
24.1
Ang Tawag sa Pagserbisyo
Ang matag misyonaryo gitawag sa pagtabang sa Langitnong Amahan ug ni Jesukristo sa Ilang buhat. Ang mga misyonaryo nagrepresentar ni Jesukristo ug sa Iyang gipahiuli nga Simbahan. Sila dili hakog nga moserbisyo sa Ginoo sa paghago uban ang gugma ngadto sa Iyang mga anak. Ang pangtudlo ug pangserbisyo nga mga misyon pareho nga makapanalangin sa misyonaryo ug sa uban. (Tan-awa sa Mateo 16:25; 22:36–40.)
Ang mga tawag sa misyon ihatag ngadto sa mga miyembro nga nagtinguha nga moserbisyo, takos, ug makahimo. Kini nga mga miyembro maningkamot sa pagserbisyo sa Ginoo uban sa ilang tibuok “kasingkasing, gah[o]m, hunahuna ug kusog.” Sila mopalambo og “hugot nga pagtuo, pagla[o]m, gugma nga putli ug gugma.” Sila mohimo sa ilang “bug-os nga tinguha ngadto sa himaya sa Dios.” Samtang buhaton nila kining mga butanga, ang Ginoo mohimo nilang takos alang sa buhat. (Doktrina ug mga Pakigsaad 4:2, 5; tan-awa usab sa mga bersikulo 1–7.)
Ang mga misyonaryo nagrepresentar sa Ginoo ug kinahanglan gayod nga tawagon pinaagi sa tukma nga awtoridad (tan-awa sa Doktrina ug mga Pakigsaad 42:11; Ang mga Artikulo sa Hugot nga Pagtuo 1:5). Ang tawag aron moserbisyo og misyon sa kasagaran ihatag sa Presidente sa Simbahan. Alang sa senior nga pangserbisyo nga mga misyonaryo, ang tawag ihatag sa presidente sa stake.
24.2
Mga Buluhaton sa Misyonaryo
Ang tawag nga moserbisyo isip usa ka misyonaryo naglakip sa piho nga buluhaton. Kini nga mga buluhaton managlahi kaayo. Kini sa kasagaran maglakip sa:
-
Usa ka buluhaton isip pangtudlo nga misyonaryo o pangserbisyo nga misyonaryo.
-
Usa ka dapit.
-
Gidugayon sa pagserbisyo.
Ang matag buluhaton gigiyahan sa pagpadayag mao nga motukma kini ngadto sa misyonaryo ug sa mga panginahanglan sa mga anak sa Dios.
Ang usa ka buluhaton mahimong mausab pinaagi sa padayon nga pagpadayag kon ang sirkumstansiya mausab. Ang piho nga buluhaton importante. Hinoon, ikaduha ra kini ngadto sa tawag sa pagserbisyo isip usa ka misyonaryo. (Tan-awa sa Doktrina ug mga Pakigsaad 80:3.)
24.2.1
Batan-ong mga Misyonaryo nga Nagtudlo
Ang batan-ong pangtudlo nga mga misyonaryo sangonan nga motudlo sa ebanghelyo layo sa panimalay. Kini nga mga pagsangon gihimo sa mga Apostoles pinaagi sa pagpadayag. Kini nga mga misyonaryo nagserbisyo ubos sa direksyon sa presidente sa misyon.
Ang dili minyo nga mga lalaki nga nag-edad og 18–25 mahimong moserbisyo isip pangtudlo nga mga misyonaryo. Sila sa kasagaran moserbisyo sulod sa 24 ka bulan.
Ang dili minyo nga mga babaye nga nag-edad og 19–29 mahimong moserbisyo isip pangtudlo nga mga misyonaryo. Sila sa kasagaran moserbisyo sulod sa 18 ka bulan.
24.2.2
Batan-ong Pangserbisyo nga mga Misyonaryo
Ang batan-ong pangserbisyo nga mga misyonaryo sangonan nga moserbisyo sa Simbahan ug sa komunidad samtang anaa nagpuyo sa ilang balay. Kini nga mga pagsangon gihimo sa mga Apostoles pinaagi sa pagpadayag. Ihatag kini ngadto sa mga momisyon kansang mga kahimtang mohaom gayod alang sa pangserbisyo nga misyon (tan-awa sa 24.3.3).
Kini nga mga indibidwal adunay sama nga mga sumbanan alang sa pagpangandam ug katakos niadtong kinsa sangonan ngadto sa usa ka pangtudlo nga misyon. Ang tanang batan-ong mga kandidato nga misyonaryo irekomendar sa samang proseso.
Ang pangserbisyo nga mga misyonaryo moserbisyo sa lokal nga paagi ubos sa direksiyon sa presidente sa misyon, uban sa hugot nga suporta sa mga lider sa pangserbisyo nga misyon. Ang presidente sa stake mohatag og suporta sa eklesiyastikanhong mga butang (tan-awa sa 24.7.3).
Uban sa tabang sa ilang mga lider sa pangserbisyo nga misyon, ang matag pangserbisyo nga misyonaryo makadawat og mga buluhaton nga nahiangay sa iyang mga kahimtang. Ang mga buluhaton nakabase usab sa mga oportunidad sa pagserbisyo (tan-awa sa 24.7.1). Kini nga mga misyonaryo moserbisyo kutob sa makaya sa ilang kapasidad.
Ang dili minyo nga mga lalaki nga nag-edad og 18–25 mahimong moserbisyo isip pangserbisyo nga mga misyonaryo. Sila sa kasagaran moserbisyo sulod sa 24 ka bulan.
Ang dili minyo nga mga babaye nga nag-edad og 19–29 mahimong moserbisyo isip pangserbisyo nga mga misyonaryo. Sila sa kasagaran moserbisyo sulod sa 18 ka bulan.
Ang mga pangserbisyo nga misyon alang sa batan-ong mga misyonaryo wala sa tanang dapit sa kalibotan. Alang sa lista sa mga dapit diin ang pangserbisyo nga misyon anaa, tan-awa sa ChurchofJesusChrist.org/service-missionary. Kana nga website naghatag usab og dugang nga impormasyon bahin sa pangserbisyo nga mga misyon. Kon wala ang pangserbisyo nga mga misyon, ang batan-ong mga miyembro mahimong moserbisyo sa samang kapasidad sa senior nga mga misyonaryo (tan-awa sa 24.2.4).
24.2.3
Senior nga mga Misyonaryo
Ang magtiayon nga mga miyembro nga nag-edad og 40 ug pataas mahimong tawagon isip senior nga mga misyonaryo isip magtiayon kon sila wala nay mga anak nga nagsalig kanila.
Ang dili minyo nga mga babaye nga nag-edad og 40 ug pataas mahimo usab tawagon isip senior nga mga misyonaryo kon wala silay mga anak nga nagpuyo uban nila.
Ang dili minyo nga mga lalaki nga nag-edad og 40 pataas dili mahimong moserbisyo isip senior nga mga misyonaryo. Hinoon, sila mahimong moserbisyo isip senior nga pangserbisyo nga mga misyonaryo. (Tan-awa sa 24.2.4.)
Ang tanang senior nga mga misyonaryo giawhag sa pagpangita og mga tawo nga katudloan ug sa pagtabang kanila nga mangandam alang sa bunyag. Ang senior nga mga misyonaryo mahimo usab nga sangonan sa pagsuporta sa:
-
Mga miyembro ug mga lider sa area ug sa lokal nga dapit.
-
Mga area, mga departamento sa Simbahan, ug mga pasilidad sa Simbahan.
-
Manggihatagon nga mga organisasyon.
Ang senior nga mga misyonaryo sa kasagaran moserbisyo sa layo sa panimalay sulod sa 6–23 ka bulan. Kadtong moserbisyo sa gawas sa ilang gipuy-an nga nasod sa kasagaran moserbisyo sulod sa dili mominos sa 18 ka bulan.
Ang senior nga mga misyonaryo dili hangyoon sa pagtrabaho sa samang oras, sa pagpahigayon sa tanang sama nga mga kalihokan, o paghimo sa samang gipaabot nga himoon sa batan-ong mga misyonaryo. Sa gihapon, ang ilang pagserbisyo malisod. Tungod niini nga rason, kinahanglan nga sila himsog kaayo nga moserbisyo. Kinahanglan usab nga sila makasarang sa pinansyal nga kuwalipikasiyon (tan-awa sa 24.3.4.2).
Ang mga bishop, mga presidente sa stake, ug ang ubang mga lider mainampoong mokonsiderar kinsa ang moserbisyo. Ang mga bishop o ang mga presidente sa stake mahimong mointerbiyo niini nga mga miyembro aron sa pagtino sa ilang panahon ug modapit kanila sa pag-andam sa pagserbisyo.
Ang mga buluhaton alang sa senior nga mga misyonaryo gihatag pinaagi sa pagpadayag ngadto sa Apostoles. Ang mga lider mahimong morekomendar og piho nga mga matang sa mga buluhaton alang sa senior nga mga misyonaryo. Hinoon, ang mga lider kinahanglang dili mohimo og mga pasalig mahitungod sa buluhaton nga ilang madawat. Ang mga kandidato mahimong mopahayag sa ilang gusto nga buluhaton apan kinahanglang andam sa pagdawat sa bisan unsa nga buluhaton.
Alang sa dugang nga impormasyon, tan-awa sa SeniorMissionary.ChurchofJesusChrist.org.
24.2.4
Senior nga Pangserbisyo nga mga Misyonaryo
Agi og dugang ngadto sa mga calling diha sa ilang kaugalingong ward o stake, ang mga miyembro mahimong moserbisyo sa Ginoo isip senior nga pangserbisyo nga mga misyonaryo. Kini nga mga misyonaryo makahatag og bililhong pagserbisyo diha sa mga departamento, mga pasilidad, ug mga misyon sa Simbahan (tan-awa sa 24.7.1). Sila nagpuyo ra sa ilang balay.
Ang mga lalaki ug mga babaye nga nag-edad og 26 ug pataas mahimong tawagon isip senior nga pangserbisyo nga mga misyonaryo.
Agi og dugang, ang mga batan-ong lalaki nga nag-edad og 18–25 ug mga batan-ong babaye nga nag-edad og 19–25 mahimong moserbisyo sa samang kapasidad sa senior nga mga misyonaryo kon sila nagpuyo diin walay pangserbisyo nga mga misyon alang sa mga batan-ong misyonaryo. Sila mahimong moserbisyo usab kon sila minyo o nakaserbisyo na isip usa ka batan-ong pangtudlo nga misyonaryo o pangserbisyo nga misyonaryo.
Ang senior nga pangserbisyo nga mga misyonaryo tawagon sa ilang presidente sa stake. Sila moserbisyo ubos sa iyang direksyon. Ang gidaghanon sa oras sa ilang pagserbisyo matag semana magdepende sa ilang kapasidad, mga oportunidad sa pagserbisyo sa ilang dapit, ug direksyon gikan sa Kapangulohan sa Area.
Ang mga buluhaton sa senior nga pangserbisyo nga mga misyonaryo aprobahan sa presidente sa stake. Siya motambag sa misyonaryo ug sa uban ug mainampoong magtinguha og pagpadayag mahitungod sa matag buluhaton. Siya mahimong morebyo sa SeniorMissionary.ChurchofJesusChrist.org kon magtino og mga buluhaton.
Alang sa dugang nga impormasyon mahitungod sa senior nga pangserbisyo nga mga misyonaryo, tan-awa sa 24.7.
24.2.5
Katingbanan sa mga Buluhaton sa Misyonaryo
Ang mosunod nga talaan nagtingob sa mga matang sa mga buluhaton sa misyonaryo.
|
Batan-ong Pangtudlo nga Misyonaryo |
Batan-ong Pangserbisyo nga Misyonaryo |
Senior nga Misyonaryo |
Senior nga Pangserbisyo nga Misyonaryo | |
|---|---|---|---|---|
|
Tawagon sa | Batan-ong Pangtudlo nga Misyonaryo Presidente sa Simbahan | Batan-ong Pangserbisyo nga Misyonaryo Presidente sa Simbahan | Senior nga Misyonaryo Presidente sa Simbahan | Senior nga Pangserbisyo nga Misyonaryo Presidente sa stake |
|
Sangonan sa | Batan-ong Pangtudlo nga Misyonaryo Usa ka Apostol | Batan-ong Pangserbisyo nga Misyonaryo Usa ka Apostol | Senior nga Misyonaryo Usa ka Apostol | Senior nga Pangserbisyo nga Misyonaryo Presidente sa stake |
|
I-set apart sa | Batan-ong Pangtudlo nga Misyonaryo Presidente sa stake | Batan-ong Pangserbisyo nga Misyonaryo Presidente sa stake | Senior nga Misyonaryo Presidente sa stake | Senior nga Pangserbisyo nga Misyonaryo Presidente sa stake o magtatambag |
|
Nagpuyo | Batan-ong Pangtudlo nga Misyonaryo Layo sa panimalay | Batan-ong Pangserbisyo nga Misyonaryo Diha sa panimalay | Senior nga Misyonaryo Layo sa panimalay o diha sa panimalay | Senior nga Pangserbisyo nga Misyonaryo Diha sa panimalay |
|
Eklesiyastikanhong lider | Batan-ong Pangtudlo nga Misyonaryo Presidente sa misyon o presidente sa makasaysayanong dapit | Batan-ong Pangserbisyo nga Misyonaryo Presidente sa stake | Senior nga Misyonaryo Presidente sa misyon, templo, o sa makasaysayanong dapit; o Presidente sa Area | Senior nga Pangserbisyo nga Misyonaryo Presidente sa stake |
|
Mo-report ngadto sa | Batan-ong Pangtudlo nga Misyonaryo Presidente sa misyon o presidente sa makasaysayanong dapit | Batan-ong Pangserbisyo nga Misyonaryo Presidente sa misyon, mga lider sa pangserbisyo nga misyon | Senior nga Misyonaryo Presidente sa misyon, templo, o sa makasaysayanong dapit; Presidente sa Area; direktor sa sentro sa mga bisita; o manedyer sa departamento o sa mga pasilidad sa Simbahan | Senior nga Pangserbisyo nga Misyonaryo Manedyer sa operasyon sa buluhaton sa pagserbisyo |
|
Mga kinahanglanon nga edad | Batan-ong Pangtudlo nga Misyonaryo 18–25 (mga lalaki) | Batan-ong Pangserbisyo nga Misyonaryo 18–25 (mga lalaki) | Senior nga Misyonaryo 40 o pataas kon minyo o kon usa ka dili minyo nga igsoong babaye | Senior nga Pangserbisyo nga Misyonaryo 26 o pataas |
24.3
Pagpangandam ug Pagpasarang sa Pagserbisyo og Misyon
Ang umaabot nga mga misyonaryo giawhag sa pagserbisyo og mga misyon tungod sa ilang gugma alang sa Ginoo ug sa Iyang mga anak. Kinahanglan nga mapamilyar nila ang mga pangutana sa interbiyo alang sa misyonaryo nga rekomendasyon.
24.3.1
Pagkakabig ngadto kang Jesukristo
Ang umaabot nga mga misyonaryo maningkamot sa pagpalig-on sa ilang pagkakabig ngadto ni Jesukristo ug sa Iyang gipahiuli nga ebanghelyo. Sila:
-
Maningkamot sa pagpalig-on sa ilang hugot nga pagtuo sa Langitnong Amahan ug ni Jesukristo.
-
Mopalig-on sa ilang pagpamatuod sa gipahiuli nga ebanghelyo ni Jesukristo (tan-awa sa Alma 5:45–47).
-
Mosunod sa doktrina ni Kristo pinaagi sa “[p]agpili sa paghinulsol ug sa pagbuhat sa matar[o]ng” (Alma 13:10; tan-awa usab sa 2 Nephi 31:9–21).
-
Mag-ampo, magtuon sa mga kasulatan (ilabi na sa Basahon ni Mormon) ug sa mga pagtulon-an sa buhing mga propeta, ug motuman sa mga sugo (tan-awa Alma 17:2–3).
-
Moapil sa buhat sa templo ug family history (tan-awa sa Doktrina ug mga Pakigsaad 109:22).
-
Moapil sa seminary o institute (alang sa kabatan-onan ug mga young adult).
24.3.2
Pagtuman sa mga Sumbanan sa Katakos
Ang umaabot nga mga misyonaryo maningkamot nga mahimong takos sa pagpakig-uban sa Espiritu. Gikinahanglan kini alang sa epektibo nga misyonaryo nga pagserbisyo (tan-awa sa Doktrina ug mga Pakigsaad 42:13–14). Ang pagpasarang alang sa pagpakig-uban sa Espiritu naglakip sa pagkalimpyo gikan sa sala (tan-awa sa Helaman 4:24; Doktrina ug mga Pakigsaad 38:42).
24.3.2.1
Paghinulsol
Ang paghinulsol ug kapasayloan sa sala mao ang mga gasa nga magamit sa tanang anak sa Dios. Kini nga mga gasa nahimong posible pinaagi sa matubsanong gahom ni Jesukristo. Ang paghinulsol nagkinahanglan sa pagpakita og hugot nga pagtuo diha ni Kristo, pagbaton og tinuod nga katuyoan, ug pagtuman sa mga sugo. Kini naglakip sa pagkumpisal ug pagbiya sa sala. Alang sa seryoso nga mga sala, ang paghinulsol nagkinahanglan og pagkompisal ngadto sa bishop o sa presidente sa stake (tan-awa sa 32.3 ug 32.4 niini nga tamdanan nga basahon).
Ang usa ka tawo kinsa maghinulsol pasayloon ug mahimong malimpyohan pinaagi sa Pag-ula ug grasya ni Jesukristo. Ang Ginoo dili na mahinumdom sa sala. “Ug unsa ka dako ang iyang hingpit nga kalipay diha sa kalag nga naghinulsol!” (Doktrina ug mga Pakigsaad 18:13; tan-awa usab sa Isaias 43:25; Jacob 6:5; Alma 34:15–17; Helaman 5:10–11; Doktrina ug mga Pakigsaad 58:42–43; ug 32.1 niini nga tamdanan nga basahon.)
Ang mga miyembro kinsa nagtinguha nga moserbisyo og misyon kinahanglang moduol ngadto sa Manluluwas samtang sila maghinulsol ug mangandam sa pagserbisyo. Mahimo usab nga magtinguha sila sa mahigugmaong tabang sa mga miyembro sa pamilya ug lokal nga mga lider sa Simbahan.
Ang kandidato sa pagkamisyonaryo kinahanglan gayod nga nakahinulsol sa seryoso nga sala sa dili pa ang presidente sa stake mosumiter sa iyang rekomendasyon (tan-awa sa 32.6–32.8; tan-awa usab sa 24.4.4). Ang proseso sa paghinulsol naglakip og igong panahon nga ang tawo mopakita pinaagi sa matarong nga pagpuyo nga siya nakadawat sa espiritu ni Kristo ngadto sa kapasayloan sa mga sala (tan-awa sa Doktrina ug mga Pakigsaad 20:37). Ang presidente sa stake makigtambag sa Kapangulohan sa Area (o sa Area Seventy nga ilang gitudlo) kon siya adunay mga pangutana mahitungod sa gidugayon sa panahon alang sa paghinulsol.
24.3.2.2
Ulahi nga mga Pagkumpisal
Ang usa ka tawo kinsa nakadawat sa tawag sa misyon o nagsugod sa misyonaryo nga pagserbisyo nga wala maghinulsol sa seryoso nga sala kinahanglan magpabilin sa panimalay o mopauli. Depende sa mga sirkumstansiya, siya mahimong moserbisyo human sa paghinulsol (tan-awa sa 24.6.3.2).
24.3.3
Pisikal, Mental, ug Emosyonal nga Kahimsog
Ang misyonaryo nga buhat mahagiton. Ang pisikal, mental, ug emosyonal nga mga panginahanglan mahimong makaluya. Ang mga misyonaryo sa kasagaran nagtrabaho sa dili pamilyar nga mga kondisyon. Ang kahimsog maapektahan tungod sa kausaban sa diyeta, klima, o mga kondisyon sa pagpuyo. Ang eskedyul sa misyonaryo bug-at usab nga trabaho. (Tan-awa sa Alma 17:5; 26:27–28, 30.)
Ang batan-ong pangtudlo nga mga misyonaryo kinahanglan gayod nga mapasaligon ug makahimo sa pisikal, sa mental, ug sa emosyonal nga paagi sa pagtrabaho sa tanang misyonaryo nga eskedyul. (Tan-awa sa Mga Sumbanan sa Misyonaryo alang sa mga Disipulo ni Jesukristo [2019], 2.4.)
Ang batan-ong pangserbisyo nga mga misyonaryo motrabaho sa eskedyul nga gihimo kutob sa makaya sa ilang mga talento, mga kahanas, ug mga kapasidad.
Ang umaabot nga mga misyonaryo mangandam sa pagserbisyo pinaagi sa paglig-on sa ilang pisikal, mental, ug emosyonal nga kahimsog. Sila usab maningkamot sa pagpalambo og kamadawaton ug pagbarog pinaagi sa kinaugalingong paningkamot.
Ang mga lider kinahanglang sensitibong motambag sa usa ka kandidato mahitungod sa iyang mga hagit sa kahimsog sa dili pa mosumiter og rekomendasyon. Ang pipila ka kandidato magkinahanglan tingali nga modawat og propesyonal nga pag-atiman alang sa ilang mga hagit sa kahimsog (tan-awa sa 31.3.6). Ang usa ka kandidato kinsa giresitahan og tambal kinahanglang mopasalig nga moinom niini sa iyang tibuok nga pagserbisyo sumala sa direksyon sa usa ka propesyonal nga tig-atiman sa panglawas.
24.3.4
Pinansyal
Ang pinansyal nga sakripisyo kabahin sa misyonaryo nga pagserbisyo (tan-awa sa Marcos 1:17–18; Alma 15:16). Ang mga misyonaryo ug ang ilang mga pamilya adunay nag-unang responsibilidad sa pagtampo sa pinansyal ngadto sa misyonaryo nga pagserbisyo. Sila kinahanglan nga mohimo sa angay nga pagpangandam ug sakripisyo. Sila kinahanglang makabarog pinaagi sa kinaugalingong paningkamot sa pinansyal nga paagi kutob sa mahimo sa pagtuman sa gipasalig nga kontribusyon.
24.3.4.1
Paggasto sa Batan-ong mga Misyonaryo nga Nagserbisyo Layo sa Panimalay
Ang batan-ong mga kandidato kinsa nag-andam sumala sa ilang abilidad kinahanglang dili langayon sa pagserbisyo tungod sa pinansyal nga mga rason. Kadtong kinsa nagkinahanglan og tabang sa pinansyal aron makahatag sa gipaabot nga mga pasalig nga kontribusyon makadawat niini gikan sa kabanay ug mga higala.
Kon ang panginahanglan anaa gihapon, ang bishop o presidente sa stake mahimong mohangyo sa mga miyembro sa ward ug stake sa paghatag og kontribusyon ngadto sa pundo sa misyonaryo sa ward.
Ang mga pundo sa lokal nga mga badyet ug sa halad sa puasa sa yunit dili mahimong gamiton.
Pasalig sa binulan nga kontribusyon. Ang batan-ong pangtudlo nga mga misyonaryo ug ang ilang mga pamilya mohatag og piho nga kantidad matag bulan aron sa pagtabang sa mga galastohan sa programa sa misyonaryo. Ang kantidad gitakda sa usa sa duha ka paagi:
-
Ang mga misyonaryo nga gikan sa pipila ka nasod moapil sa programa sa giangay nga kontribusyon. Kini nagpasabot nga managsama ang kantidad nga ihatag alang sa matag misyonaryo bisan asa pa siya magserbisyo. Ang kantidad gitakda didto sa punoang buhatan sa Simbahan. Ang mga lider mahimong mokontak sa Departamento sa Misyonaryo (tan-awa sa 24.9.3) o sa buhatan sa area alang sa listahan sa mga nasod niini nga programa ug sa giangay nga kantidad.
-
Sa ubang mga nasod, ang bishop, presidente sa stake, misyonaryo, ug ang pamilya magtinambagay mahitungod sa binulan nga kantidad sa kontribusyon. Ang bishop ug ang presidente sa stake mokonsiderar sa giya gikan sa Kapangulohan sa Area. Sila moawhag og tukmang pinansyal nga sakripisyo ug pagbarog pinaagi sa kinaugalingong paningkamot base sa mga kahimtang sa misyonaryo ug sa iyang pamilya. Sila magsabot sa kantidad sa kontribusyon ug mosulat niini diha sa rekomendasyon sa misyonaryo. Ang misyonaryo ug ang iyang pamilya mopasalig nga mosunod niini. Ang uban mahimong mohatag lamang niini nga kantidad kon sila nagpuyo sa nasod nga natawhan sa misyonaryo (tan-awa sa “Pundo sa Misyonaryo sa Ward” sa ulahing bahin niini nga seksiyon).
Ang mga kontribusyon ihatag ngadto sa pundo sa misyonaryo sa ward. Ang mga bishop moseguro nga ang mga pundo nahatag matag bulan. Ang mga pundo nga lapas sa binulan nga kantidad kinahanglan dili ihatag og sayo. Ang mga pundo nga gihatag og sayo dili mauli kon ang usa ka misyonaryo mopauli og sayo.
Mga galastohan diha sa natad. Matag bulan, ang batan-ong mga misyonaryo makadawat og igong mga pundo gikan sa misyon aron makasangkap og pagkaon, transportasyon, ug ubang mga galastohan sa pagpuyo. Kini nga mga pundo sagrado. Ang mga misyonaryo mogamit lamang niini alang sa mga katuyoan nga may kalabotan sa misyon. Kinahanglang dili nila kini gamiton alang sa personal nga mga galastohan, o ipadala ngadto sa mga sakop sa pamilya o sa uban. Iuli sa mga misyonaryo ngadto sa misyon ang bisan unsa nga kwarta nga wala nila kinahanglana.
Ang mga misyonaryo mogamit sa personal nga mga pundo aron ibayad sa ubang mga galastohan. Kining personal nga mga galastohan kinahanglang gamay ra. (Tan-awa sa Mga Sumbanan sa Misyonaryo alang sa mga Disipulo ni Jesukristo, 4.8.)
24.3.4.2
Paggasto sa Senior nga mga Misyonaryo nga Nagserbisyo nga Layo sa Panimalay
Pasalig sa binulan nga kontribusyon. Ang senior nga mga misyonaryo nga nagserbisyo nga layo sa panimalay mohatag ngadto sa pundo sa misyonaryo sa ilang kaugalingong ward matag bulan. Kini nga mga kontribusyon makatabang sa mga galastohan sa kapuy-an ug sa sakyanan (tan-awa usab sa “Dugang nga mga galastohan” sa ulahing bahin niini nga seksiyon). Ang kantidad sa kontribusyon alang sa kapuy-an nakabase sa kasagaran nga bayranan diha sa matag misyon. Kini nga mga kantidad tingali mas dako o mas minos kaysa kantidad sa gisangkap sa Simbahan nga kapuy-an.
-
Ang senior nga mga misyonaryo gikan sa mga nasod nga moapil sa programa sa giangay nga kontribusyon mohatag sa gitakda nga kantidad nga gilista diha sa pakete sa tawag.
-
Sa ubang mga nasod, ang bishop, presidente sa stake, ug ang misyonaryo magtinambagay mahitungod sa binulan nga kantidad sa kontribusyon. Ang mga lider moawhag og tukma nga pinansyal nga sakripisyo base sa mga kahimtang sa misyonaryo. Sila mouyon sa kantidad ug isulat kini sa rekomendasyon sa misyonaryo. Kini nga kantidad kinahanglang dili mominos sa kantidad nga naestablisar alang sa senior nga mga misyonaryo sa Kapangulohan sa Area (sa pagpakigkonsulta sa Departamento sa Misyonaryo). Ang uban kinsa nagpuyo sa natawhan nga nasod sa misyonaryo mahimo usab nga mohatag niini nga kantidad.
Ang mga bishop moseguro nga ang mga pundo nahatag matag bulan. Ang mga pundo nga lapas sa binulan nga kantidad kinahanglan dili ihatag og sayo.
Dugang nga mga galastohan. Agi og dugang ngadto sa pasalig sa binulan nga kontribusyon, nga makatabang sa pagbayad sa mga bayranan sa kapuy-an ug sakyanan, ang senior nga mga misyonaryo kinahanglan gayod nga hingpit nga mobayad sa tanang ubang mga galastohan, lakip sa pagkaon, personal nga mga aytem, ug gasolina sa sakyanan.
24.3.4.3
Paggasto sa mga Misyonaryo nga Nagserbisyo diha sa Iyang Dapit
Ang mga misyonaryo nga nagserbisyo diha sa iyang dapit mao ang responsable sa ilang tanang pinansyal nga mga panginahanglan. Kadtong kinsa nagkinahanglan og pinansyal nga tabang makadawat niini gikan sa mga sakop sa pamilya ug mga higala. Ang mga pundo sa ward o stake dili mahimong gamiton alang sa mga panginahanglan nga may kalabotan sa misyon.
24.3.4.4
Insurance ug mga Galastohang Medikal
Ang tanang misyonaryo, lakip na ang batan-ong pangtudlo nga mga misyonaryo, hugtanong giawhag nga ipadayon ang ilang anaa na nga medikal nga insurance kon mahimo.
Ang mga misyonaryo nga nagserbisyo sa ilang dapit kinahanglang mosangkap sa ilang kaugalingong medikal ug ubang matang sa insurance. Ang senior nga mga misyonaryo nga nagserbisyo nga layo sa panimalay kinahanglan usab nga aduna niini. Ang senior nga mga misyonaryo kinsa moserbisyo sa gawas sa ilang kaugalingong nasod mahimong mokuha og insurance pinaagi sa Senior Service Medical Plan.
24.3.5
Tahas sa mga Sakop sa Pamilya ug mga Lider sa Pag-andam og mga Misyonaryo
Ang mga sakop sa pamilya, mga bishop, ug ubang mga lider motabang sa kabatan-onan sa pagpangandam sa pagserbisyo sa misyon. Ang mga bishop modapit sa matag batan-ong lalaki aron mahimong misyonaryo, ingon man sa matag batan-ong babaye nga nagtinguha sa pagserbisyo.
-
Motabang kanila nga mahimong epektibo nga miyembro nga mga misyonaryo sa pagpakigbahin sa ebanghelyo sa dili pa sila modawat og tawag sa pagserbisyo.
-
Mohatag kanila og mga oportunidad sa pagserbisyo ug sa pagtudlo.
-
Makigsabot og mga oportunidad alang kanila nga mokuyog sa full-time nga mga misyonaryo.
-
Modapit sa nagserbisyo karon nga mga misyonaryo o sa uban kinsa nagserbisyo og mga misyon sa pagpakigbahin sa ilang mga kasinatian sa pagtudlo ug pagserbisyo.
-
Mohigugma ug modasig sa matag tawo sa pagpangandam nga moserbsiyo og misyon.
-
Moawhag kanila sa paghalad og dugang nga panahon sa pag-ampo ug pagtuon sa mga kasulatan, ilabi na sa Basahon ni Mormon.
-
Moorganisar og kurso sa misyonaryo nga pagpangandam.
Ang mga sakop sa pamilya ug ang mga lider moawhag sa senior nga mga miyembro sa pagkonsiderar og senior nga misyonaryo nga pagserbisyo. Kini mahimong maglakip sa pagtabang kanila nga:
-
Morebyo sa ilang pisikal ug pinansyal nga abilidad sa pagserbisyo og misyon, sa layo gikan sa ilang dapit o samtang nagpuyo ra sa ilang panimalay.
-
Moila og misyonaryo nga mga oportunidad nga ilang matuman.
-
Mahimong epektibo nga miyembro nga misyonaryo sa pagpakigbahin sa ebanghelyo sa dili pa sila modawat og tawag sa pagserbisyo.
-
Makasabot sa panalangin nga ihatag sa misyonaryo nga pagserbisyo ngadto sa ilang pamilya (tan-awa sa Doktrina ug mga Pakigsaad 31:5–6).
Ang mga miyembro sa pamilya ug ang mga lider moawhag sa tanang kandidato sa pagkamisyonaryo sa pagtuon sa:
-
Ang Basahon ni Mormon ug ang ubang mga kasulatan.
-
Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo.
Ang mga sakop sa pamilya ug ang mga lider motabang sa tanang kandidato nga mopasalig sa pagsunod sa mga sumbanan sa misyonaryo. Sila moawhag sa mga kandidato sa pagtuon sa tamdanan nga basahon sa mga sumbanan sa misyonaryo nga may kalabotan sa malagmit nilang buluhaton:
-
Alang sa batan-ong pangtudlo nga mga misyonaryo: Mga Sumbanan sa Misyonaryo alang sa mga Disipulo ni Jesukristo
-
Alang sa batan-ong pangserbisyo nga mga misyonaryo: Missionary Standards for Disciples of Jesus Christ—Service Missions [Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyon]
-
Alang sa tanang misyonaryo: ang mga seksiyon nga “Gamita ang Teknolohiya sa Matarong nga Paagi” ug “Sunda ang mga Pag-amping sa Paggamit sa Teknolohiya” diha sa kapitulo 2 sa Isangyaw ang Akong Ebanghelyo.
24.4
Pagrekomendar og mga Misyonaryo
Ang pipila ka kandidato wala magpuyo kanunay sa ward sa dili mominos usa ka tuig. Niini nga mga sitwasyon, ang bishop makigsulti na daan sa proseso sa rekomendasyon sa bishop sa iyang ward kaniadto.
24.4.1
Mga Pagsusi sa Kahimsog
Ang misyonaryo nga buhat malisod sa pisikal, sa mental, ug sa emosyonal. Ang tanang kandidato kinahanglan nga adunay medikal nga mga propesyonal nga mosusi sa ilang pagkaandam sa kahimsog.
Ang mga pagsusi sa kahimsog rebyohon sa buhatan sa area ug sa Departamento sa Misyonaryo. Usahay, ang mga problema sa kahimsog makaapekto sa abilidad sa usa ka tawo nga moserbisyo nga layo sa panimalay. Sa pipila ka sitwasyon, ang rekomendasyon mahimong ibalik uban sa mga instruksiyon kon sa unsa nga paagi ang tawo makapalambo sa iyang pagkaandam sa kahimsog.
24.4.2
Mga Porma sa mga Interbiyo ug Rekomendasyon
Ang bishop ug ang presidente sa stake mopahigayon og ganid, espirituwal nga pagsiksik, ug makapabayaw nga mga interbiyo sa matag kandidato. Sila mogamit sa mga pangutana sa interbiyo alang sa misyonaryo nga rekomendasyon. Sila maghisgot sa:
-
Pagpamatuod sa kandidato bahin ni Jesukristo ug sa Iyang gipahiuli nga ebanghelyo (tan-awa sa 24.3.1).
-
Pagtuman sa kandidato sa mga sumbanan sa katakos (tan-awa sa 24.3.2).
-
Pagkaandam sa pisikal, mental, ug emosyonal nga kahimsog sa kandidato (tan-awa sa 24.3.3).
-
Pagkaandam sa kandidato sa pinansyal nga paagi (tan-awa sa 24.3.4).
Ang bishop ug ang presidente sa stake morebyo usab sa impormasyon mahitungod sa mga sumbanan sa katakos ug pagkaandam sa kahimsog diha sa Missionary Online Recommendation System. Kon ang usa ka presidente sa stake sa Estados Unidos o Canada adunay mga pangutana, siya mokontak sa Departamento sa Misyonaryo (tan-awa sa 24.9.3). Sa ubang dapit, siya mokontak sa buhatan sa area. Ang bishop ug ang presidente sa stake dili modugang og bisan unsa nga mga sumbanan sa pagkaangayan. Ni sila mousab sa interbiyo nga mga pangutana.
Ang impormasyon diha sa porma sa rekomendasyon makatabang sa proseso sa pagpadayag sa mga tawag sa misyon. Ang mga lider moseguro nga ang tanang impormasyon nga gipangayo hingpit nga gibutyag.
Kon ang bishop ug ang presidente sa stake adunay mga kabalaka mahitungod sa pagtuman sa kandidato sa mga sumbanan sa katakos o mahitungod sa iyang pagkaandam sa kahimsog, sila magtinambagay sa usag usa ug uban sa tawo. Uban sa pagtugot sa batan-ong kandidato sila mahimo usab nga makigtinambagay uban sa iyang mga ginikanan. Ang bishop ug ang presidente sa stake dili mosumiter sa rekomendasyon hangtod nga ang tawo nakahinulsol sa seryoso nga sala (tan-awa sa 24.3.2.1). Depende sa pisikal, mental, o emosyonal nga kahimsog sa tawo, sila mahimong maghisgot sa posibilidad nga masangonan isip usa ka pangserbisyo nga misyonaryo.
Sa dinalian nga mga sitwasyon kon ang bishop o ang presidente sa stake wala diha, siya mahimong motugot sa iyang mga magtatambag sa pagpahigayon niini nga mga interbiyo.
Sa mga district, ang presidente sa misyon o ang usa ka gisangonan nga magtatambag mointerbiyo ug morekomendar sa mga kandidato sa pagkamisyonaryo. Ang mga presidente sa district dili mopahigayon niini nga mga interbiyo.
24.4.3
Pagsumiter og mga Rekomendasyon
Ang presidente sa stake mahimong mosumiter og rekomendasyon alang sa usa ka batan-ong kandidato sa pagkamisyonaryo hangtod 150 ka adlaw sa dili pa ang petsa sa iyang pagsugod. Ang presidente sa stake mahimong mosumiter og rekomendasyon alang sa usa ka senior nga kandidato sa pagkamisyonaryo hangtod siyam ka bulan sa dili pa ang petsa sa iyang pagsugod. Ang petsa sa pagsugod kinahanglan gayod kon natuman na ang tanan sa mosunod nga mga kahimtang:
-
Ang tawo miabot sa kwalipikado nga edad sa pagserbisyo.
-
Ang tawo nakompirmahan nga usa ka miyembro sa Simbahan sa dili mominos usa ka tuig.
-
Ang tawo nakakompleto o wala na mag-eskwela sa high school, sekondarya, o susama niini. (Magamit lamang kini sa batan-ong mga kandidato sa pagkamisyonaryo nga dili pa 19 anyos sa petsa sa ilang pagsugod.)
Ang batan-ong mga kandidato sa pagkamisyonaryo ug ang ilang presidente sa stake magplano kon kanus-a isumiter sa presidente sa stake ang rekomendasyon. Sila mahimong mogamit sa Submission Planning Tool ug sa Mission Release Date Planning Tool alang sa panabang.
Ang mga rekomendasyon sa pagkamisyonaryo sa kasagaran isumiter pinaagi sa kaugalingong ward ug stake. Ang mga bishop sa ward sa mga tawo nga nagpuyo sa layo gikan sa kaugalingong ward, sama sa ward sa young single adult, mahimong moproseso sa rekomendasyon sa pagkamisyonaryo. Sila kinahanglan nga makigsulti una sa bishop gikan sa kaugalingong ward. Ang kaugalingong ward kinahanglang malista isip ang naghatag og pundo nga ward.
24.4.4
Kadtong Dili Makahimo sa Pagserbisyo isip Full-Time nga mga Misyonaryo
Usahay ang usa ka miyembro nga nagtinguha sa pagserbisyo ug girekomendar alang sa misyonaryo nga pagserbisyo dili matawag isip pangtudlo nga misyonaryo o pangserbisyo nga misyonaryo. Tungod tingali kini sa mga hagit sa kahimsog, wala makatuman sa mga sumbanan sa katakos, legal nga mga isyu, o ubang mga sirkumstansiya. Ang bishop ug ang presidente sa stake mopahayag og gugma ug pasalamat sa pagkaandam sa miyembro sa pagserbisyo. Ang mga lider mahimong motubag sa mga pangutana ngadto sa Departamento sa Misyonaryo sa 801-240-2179 o Missionary.Prefield@ChurchofJesusChrist.org.
Ang presidente sa stake ug ang bishop moawhag sa miyembro sa pagpadayon diha sa dalan sa pakigsaad isip tibuok kinabuhi nga disipulo ni Jesukristo. Sila usab awhagon sa pagpadayon sa ubang importante nga mga paningkamot, sama sa edukasyon o panarbaho alang sa batan-ong mga miyembro.
24.5
Human Makadawat og Tawag sa Misyon
Ang bag-ong gitawag nga mga misyonaryo giawhag sa pagbasa ug pagbasa pag-usab sa Basahon ni Mormon sa dili pa magsugod sa ilang misyon. Sila mosunod sa tambag ni Haring Benjamin nga “magbantay sa inyong mga kaugalingon, ug sa inyong mga hunahuna, ug sa inyong mga pulong, ug sa inyong mga buhat” (Mosiah 4:30).
Sila motubag dayon ngadto sa mga instruksiyon nga gihatag diha sa tawag. Sila magtuon sa doktrina ug mga baroganan dha sa mga kasulatan ug diha sa Isangyaw ang Akong Ebanghelyo, nga maghatag og gibug-aton sa kapitulo 3. Sila kinahanglan nga morebyo usab sa booklet nga Pag-adjust ngadto sa Misyonaryo nga Kinabuhi o Pagpahiangay ngadto sa Kinabuhi sa Pangserbisyo nga Misyonaryo: Booklet nga Kapanguhaan. Sila ug ang mga sakop sa ilang pamilya magtuon usab sa mga kahimtang sa ilang serbisyohan.
Ang mga sakop sa pamilya ug ang mga lider mosuporta sa mga misyonaryo niini nga mga paningkamot. Sila usab mohatag og gibug-aton sa kaimportante sa paghimo og maayo ug pagpabilin nga takos sa Espiritu.
24.5.1
Pagtuga diha sa Templo ug Tulumanon sa Templo
Ang bag-ong gitawag nga mga misyonaryo giawhag sa pagdawat sa pagtuga sa dali nga panahon kutob sa mahimo ug sa pagtambong sa templo sa kanunay kutob sa itugot sa kahimtang (tan-awa sa Doktrina ug mga Pakigsaad 43:15–16; 105:33). Magamit kini sa pangtudlo nga mga misyonaryo ug sa pangserbisyo nga mga misyonaryo kon tukma sa ilang mga kahimtang. Alang sa impormasyon sa pagdawat sa pagtuga, tan-awa sa 27.2.
Ang bag-ong natawag nga mga misyonaryo mahimong moserbisyo isip mga worker sa ordinansa sa templo sa dili pa sila magsugod sa misyonaryo nga pagserbisyo kon angay (tan-awa sa 25.5).
24.5.2
Mga Panagtigom alang sa Sakramento
Ang bishopric modapit sa bag-ong gitawag nga mga misyonaryo nga mamulong diha sa panagtigom alang sa sakramento sa dili pa sila mosugod sa ilang misyon. Kini usa ka naandan nga panagtigom alang sa sakramento. Ang gitutokan mao ang sakramento ug ang Manluluwas. Ang misyonaryo kinahanglang dapiton sa pagpamulong mahitungod ni Jesukristo, sa Iyang gipahiuli nga ebanghelyo, ug sa hingpit nga kalipay sa pagpakigbahin sa ebanghelyo ug sa pagserbisyo sa uban.
Ang mga sakop sa pamilya ug mga higala sa misyonaryo kasagaran dili dapiton sa pagpamulong. Ang naandan nga oras sa miting dili lugwayan.
Ang mga miyembro ug ang mga lider kinahanglang maglikay sa bisan unsa nga makabalda gikan sa sagrado nga matang sa tawag sa misyon o mogasto og wala kinahanglana nga galastohan. Pananglitan, sila kinahanglan nga dili:
-
Moprinta og espesyal nga mga programa sa panagtigom alang sa sakramento.
-
Magporma og linya human sa panagtigom alang sa sakramento aron mangaon.
-
Maghimo og mga open house, gawas sa mga panagpundok sa pamilya. Kon ang panagpundok sa pamilya pagahimoon, girekomendar nga dili kini magkasumpaki sa mga miting sa Dominggo.
24.5.3
Pag-set Apart sa mga Misyonaryo
Ang presidente sa gigikanan nga stake mo-set apart sa matag misyonaryo nga duol na sa petsa sa iyang pagsugod sa misyon kutob sa mahimo. Sa dinalian nga mga sitwasyon kon ang presidente sa stake dili makahimo, siya mahimong motugot sa usa sa iyang mga magtatambag sa pag-set apart sa mga misyonaryo. Siya mahimo usab nga motugyan sa responsibilidad sa pag-set apart sa senior nga pangserbisyo nga mga misyonaryo ngadto sa usa ka magtatambag.
Ang presidente sa misyon o usa sa iyang mga magtatambag mo-set apart sa mga misyonaryo kinsa gitawag gikan sa mga district sa iyang misyon. Ang presidente sa district dili maka-set apart og mga misyonaryo.
Ang usa ka igsoong lalaki kinsa moserbisyo nga layo sa panimalay kinahanglang nakadawat sa Melchizedek nga Pagkapari sa dili pa i-set apart isip usa ka misyonaryo. Ang usa ka igsoong lalaki kinsa moserbisyo isip usa ka pangserbisyo nga misyonaryo kinahanglang naghupot sa Melchizedek nga Pagkapari kon angay sa iyang mga sirkumstansiya. Alang sa mga instruksiyon sa ordinasyon ngadto sa usa ka katungdanan diha sa Melchizedek nga Pagkapari, tan-awa sa 18.10.
Sa dili pa i-set apart ang usa ka misyonaryo, ang presidente sa stake o ang usa ka gisangonan nga magtamtabag mointerbiyo kaniya. Kon ang misyonaryo wala na magtuman sa mga sumbanan sa katakos o kon adunay mga kausaban sa kahimsog nga makaapekto sa pagserbisyo sa misyonaryo, siya dili i-set apart. Ang presidente sa stake mokontak sa Departamento a Misyonaryo (tan-awa sa 24.9.3) o sa buhatan sa area alang sa giya.
Ang pag-set apart kinahanglang usa ka espesyal nga kasinatian. Ang mga sakop sa pamilya ug suod nga mga higala mahimong motambong. Ang presidente sa stake motabang kanila nga makasabot ug mobati sa kasagrado ug kaimportante sa tawag sa pagserbisyo isip usa ka representante ni Jesukristo ug sa Iyang gipahiuli nga Simbahan.
Ang pag-set apart ug ang nag-uban nga panalangin kinahanglang dili irekord. Hinoon, ang misyonaryo giawhag sa pagsulat diha sa iyang journal mahitungod sa kasinatian ug sa paghinumdom sa mga bahin sa panalangin nga makahuloganon kaayo.
Ang presidente sa stake mopasabot nga ang tawo kinahanglang mosunod sa mga sumbanan sa misyonaryo human ma-set apart.
Ang pag-set apart sa usa ka misyonaryo mao ang pagtawag sa pagserbisyo, dili alang sa piho nga misyonaryo nga buluhaton. Kon ang usa ka buluhaton sa misyonaryo nausab, siya dili i-set apart pag-usab. Kon ang usa ka misyonaryo i-release ug unya giaprobahan nga mobalik sa pagserbisyo (tan-awa sa 24.6.3.2), siya i-set apart pag-usab isip usa ka misyonaryo.
24.6
Pagserbisyo nga Layo sa Panimalay
24.6.1
Mobiya padulong ngadto sa Natad sa Misyon
Ang Simbahan mao ang mobayad sa pagbiyahe alang sa batan-ong mga misyonaryo nga nagtudlo padulong ug gikan sa missionary training center (MTC) ug sa buluhaton sa misyon. Ang Simbahan mao ang mobayad usab niini nga mga galastohan alang sa senior nga mga misyonaryo kinsa moserbisyo layo sa panimalay sulod sa labaw sa usa ka tuig.
Ang mga sakop sa kabanay sa misyonaryo mahimong modala sa misyonaryo ngadto sa MTC. Apan, wala sila paabota nga mobuhat sa ingon. Ang MTC walay miting alang sa mga pamilya nga manamilit sa ilang mga misyonaryo.
Alang sa kasegurohan sa tugpahanan ug sa ubang mga rason, ang mga pamilya ug ang uban wala awhaga nga makigkita sa mga misyonaryo diha sa mga tugpahanan kon ang mga misyonaryo mobiya sa MTC padulong ngadto sa ilang buluhaton sa misyon.
24.6.2
Diha sa Natad
24.6.2.1
Pagpahiluna sa mga Misyonaryo
Ang mga presidente sa stake ug misyon magtinambagay mahitungod sa panginahanglan alang sa mga misyonaryo diha sa piho nga mga ward ug mga branch. Wala kinahanglana nga ang mga misyonaryo sangonan ngadto sa matag yunit. Ang pipila ka yunit mahimong adunay labaw sa usa ka managkompanyon. Ang presidente sa misyon motino sa pagpahiluna sa mga misyonaryo.
24.6.2.2
Pagserbisyo sa Miyembro ug Komunidad
Ang mga presidente sa stake ug misyon magtinambagay mahitungod kon sa unsang paagi nga ang mga misyonaryo makaserbisyo ngadto sa mga miyembro ug sa komunidad. Sila mahimong mogamit sa JustServe.org kon diin kini anaa.
24.6.2.3
Kapuy-an, mga Pagkaon, ug Transportasyon
Ang mga presidente sa stake ug misyon motino kon o hangtod asa kutob ang lokal nga mga miyembro mohatag og kapuy-an ug mga pagkaon alang sa mga misyonaryo. Ang paghatag og kapuy-an ug mga pagkaon kinahanglan nga dili makapabug-at sa lokal nga mga miyembro.
Wala paabota nga ang mga miyembro mosangkap kanunay og transportasyon alang sa mga misyonaryo, kadtong ilang gitudloan, o kadtong kinsa bag-o lang gibunyagan.
Ang Kapangulohan sa Area mahimong motanyag og giya alang sa pagsangkap og kapuy-an, mga pagkaon, ug transportasyon alang sa mga misyonaryo sa dapit.
24.6.2.4
Mga Misyonaryo diha sa mga Katungdanan sa Branch
Sa panagsa nga mga sitwasyon, ang mga misyonaryo nga layo sa panimalay mahimong sangonan nga moserbisyo sa mga katungdanan sa branch. Kon ang usa ka branch anaa sa usa ka stake, ang misyonaryo i-set apart ubos sa direksyon sa kapangulohan sa stake, uban sa pagtugot sa presidente sa misyon.
Kon ang usa ka branch anaa sa usa ka district, ang misyonaryo dili i-set apart. Ang awtoridad sa pagserbisyo sa usa ka yunit nga gisangon ngadto sa misyon nalakip sa pag-set apart isip usa ka misyonaryo. Kon ang mga elder mopahigayon og kalihokan nga nagkinahanglan og mga yawe sa pagkapari, sila mohimo sa ingon uban sa gitugyan nga awtoridad gikan sa presidente sa misyon.
24.6.2.5
Mga Hangyo sa Pagsuporta sa Uban sa Pinansyal nga Paagi o sa Pag-eskwela o sa Paglangyaw
Ang mga misyonaryo ug ang ilang mga pamilya kinahanglang dili mohatag og pinansyal nga suporta alang niadtong kinsa nagpuyo diin magserbisyo ang mga misyonaryo, lakip ang pinansyal nga suporta alang sa pag-eskwela. Ni ang mga misyonaryo ug ang ilang mga pamilya moesponsor og mga tawo nga gustong molangyaw ngadto sa laing mga nasod (tan-awa sa 38.8.19).
24.6.2.6
Tambal
Ang mga misyonaryo mao ang responsable alang sa bisan unsa nga tambal nga ilang gikinahanglan. Ang mga sakop sa pamilya o ang uban kinahanglang dili mopadala o mopahatod og tambal ngadto sa mga misyonaryo. Kon ang tambal wala diha sa misyon, ang misyonaryo magpakitambag sa presidente sa misyon.
24.6.2.7
Kamatayon sa Duol nga Sakop sa Pamilya
Kon ang usa ka sakop sa duol nga pamilya sa usa ka misyonaryo namatay, ang misyonaryo mahimong mopili nga temporaryong mopauli alang sa haya. Hinoon, sa kasagaran ang misyonaryo gitambagan nga magpabilin diha sa natad. Kon posible, siya mahimong motan-aw sa tulumanon sa haya pinaagi sa sibya sa internet.
Kon ang usa ka misyonaryo mopili nga mopauli alang sa haya, ang presidente sa misyon mokontak sa Departamento sa Misyonaryo.
24.6.2.8
Mga Rekord sa Pagkamiyembro ug Ikapulo
Ang kaugalingong ward sa misyonaryo mohupot sa rekord sa pagkamiyembro. Ang kaugalingong ward morekord usab sa iyang kahimtang sa ikapulo. Ang mga misyonaryo dili mobayad og ikapulo gikan sa mga pundo sa suporta nga ilang nadawat gikan sa misyon. Hinoon, sila mobayad og ikapulo kon sila adunay bisan unsa nga personal nga kinitaan.
24.6.3
Pagpauli gikan sa usa ka Misyon
24.6.3.1
Pagpauli sumala sa Orihinal nga Eskedyul
Ang mga misyonaryo ug ang mga sakop sa ilang pamilya kinahanglan nga dili mohangyo og sayo nga mga pag-release o mga pagpalugway sa pagserbisyo alang sa personal nga kakomportable.
Ang batan-ong mga misyonaryo kinahanglang mobiyahe diretso sa balay gikan sa ilang mga misyon. Ang bisan unsa nga pagbiyahe tugotan lamang kon ang misyonaryo ubanan bisag usa lang ka ginikanan o tigbantay.
Ang mga misyonaryo dili i-release hangtod sila mo-report ngadto sa ilang presidente sa stake. Sila mosunod sa mga sumbanan sa misyonaryo hangtod nianang higayona.
24.6.3.2
Pagpauli og Sayo
Ang pipila ka pangtudlo ug pangserbisyo nga mga misyonaryo gi-release og sayo tungod sa kahimsog, katakos, o ubang mga rason. Ang mga bishop ug ang mga presidente sa stake mohatag og espesyal nga suporta ngadto niini nga mipauli na nga mga misyonaryo. Ang mga lider motabang kanila nga maningkamot nga mobalik ang kahimsog o mobalik ngadto sa pagserbisyo kon posible.
Alang sa dugang nga impormasyon mahitungod sa pagtapos og sayo sa pangserbisyo nga mga misyonaryo, tan-awa sa 24.7.5.
Alang sa pangtudlo ug pangserbisyo nga mga misyonaryo nga andam na nga mobalik sa pagserbisyo, ang presidente sa stake mokontak sa Departamento sa Misyonaryo sa pagrekomendar niini (tan-awa sa 24.9.3). Ang pipila ka pangtudlo ug pangserbisyo nga mga misyonaryo nga mobalik sa pagserbisyo idestino ngadto sa laing pangtudlo nga misyon o ngadto sa pangserbisyo nga misyon.
Kon ang pagbalik ngadto sa pagserbisyo dili posible, ang mga lider moawhag sa miyembro sa pagpadayon diha sa dalan sa pakigsaad isip usa ka tibuok kinabuhi nga disipulo ni Jesukristo. Ang mga lider moawhag usab sa pagpadayon sa ubang importante nga mga paningkamot, sama sa edukasyon o panarbaho alang sa batan-ong mga misyonaryo.
24.7
Pangserbisyo nga mga Misyon
24.7.1
Pag-ila og mga Oportunidad alang sa Pangserbisyo nga mga Misyonaryo
Alang sa senior nga pangserbisyo nga mga misyonaryo, ang bishop, presidente sa stake, ug ang mga misyonaryo magtinambagay aron sa pag-ila og lokal nga mga oportunidad sa pagserbisyo.
Alang sa batan-ong pangserbisyo nga mga misyonaryo, ang mga lider sa pangserbisyo nga misyon motino og tukmang mga oportunidad sa pagserbisyo. Ang mga ginikanan o mga tigbantay sa misyonaryo sa kasagaran moapil sa panaghisgotan.
Ang pagserbisyo mahimong ihatag sa personal nga paagi o dili sa personal nga paagi gamit ang teknolohiya. Ang mga lider mahimong mogamit sa mosunod nga mga kapanguhaan sa pagpangita og impormasyon mahitungod sa mga oportunidad sa pagserbisyo:
-
Internet: ChurchofJesusChrist.org/service-missionary o SeniorMissionary.ChurchofJesusChrist.org
-
Telepono: 1-801-240-4914
24.7.2
Kapuy-an ug Transportasyon
Ang pangserbisyo nga mga misyonaryo magpuyo sa ilang kaugalingong panimalay o uban sa laing sakop sa pamilya nga giaprobahan sa Departamento sa Misyonaryo. Sila ang mosangkap o makigsabot alang sa ilang kaugalingong transportasyon ngadto sa dapit nga ilang serbisyohan kon gikinahanglan.
Ang pangserbisyo nga mga misyonaryo kinahanglang dili matulog o magpuyo sa gipuy-an sa pangtudlo nga mga misyonaryo.
24.7.3
Pagbansay ug Pagdumala
Ang pangserbisyo nga mga misyonaryo bansayon ug dumalahon sa dapit diin sila magserbsiyo. Makadawat usab sila og inadlaw-adlaw nga pagdumala, tabang, ug pagbansay mahitungod sa ilang mga katungdanan gikan sa lider sa pangserbisyo nga misyon (alang sa batan-ong pangserbisyo nga mga misyonaryo) o sa tigdumala sa ilang buluhaton sa pagserbisyo (alang sa senior nga pangserbisyo nga mga misyonaryo).
Ang presidente sa stake mao ang eklesiyastikanhong lider alang sa senior ug batan-ong pangserbisyo nga mga misyonaryo. Siya ug ang bishop mopahigayon og regular nga interbiyo alang sa katakos uban sa batan-ong pangserbisyo nga mga misyonaryo. Sila mopahigayon usab og mga interbiyo alang sa mga rekomend sa templo, pag-orden ngadto sa mga katungdanan sa pagkapari, ug patriyarkal nga mga panalangin kon gikinahanglan.
Ang presidente sa misyon ug ang iyang asawa mao ang mopahimutang sa espirituwal ug pamatasan nga mga gilaoman sa misyon. Sila regular nga makigtambag sa mga lider sa pangserbisyo nga misyon nga nagdumala sa eskedyul, mga buluhaton, ug kinatibuk-ang kahimsog sa misyonaryo. Manag-uban sila sa pagtabang sa misyonaryo nga makasabot ug mosunod sa mga sumbanan sa pangserbisyo nga misyonaryo.
Ang presidente sa misyon mopasa sa mga butang bahin sa personal nga katakos ngadto sa presidente sa stake sa misyonaryo.
Ang batan-ong pangserbisyo nga mga misyonaryo dili motambong sa MTC. Makadawat sila og birtuwal nga pagbansay, uban sa pagbansay diha sa ilang mga lugar nga serbisyohan.
Alang sa dugang pa mahitungod sa pagbansay ug pagdumala, tan-awa sa Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyon.
24.7.4
Pangserbisyo nga mga Misyonaryo diha sa mga Calling sa Ward o Stake
Ang bishop o ang presidente sa stake mahimong mohatag og mga calling sa ward o stake ngadto sa pangserbisyo nga mga misyonaryo kon ang mga calling dili makasamok sa mga buluhaton sa misyon o sa eskedyul. Alang sa batan-ong pangserbisyo nga mga misyonaryo, kini nga mga lider makigsabot sa mga lider sa pangserbisyo nga misyon.
24.7.5
Pagtapos sa usa ka Pangserbisyo nga Misyon
Ang batan-ong pangserbisyo nga mga misyonaryo kasagaran tawagon sa pagserbisyo sulod sa 18 o 24 ka bulan. Gilaoman kini nga ang matag misyonaryo mokompleto sa panahon sa pagserbisyo nga nakabutang sa iyang buluhaton.
Sa pipila ka kahimtang, human madawat sa usa ka misyonaryo ang tawag, ang misyonaryo, mga ginikanan, ug mga lider sa pangserbisyo nga misyon mahimong magtinambagay aron sa pagtino og alternatibo nga petsa sa pag-release. Ang mga lider sa pangserbisyo nga misyon mosumiter og bisan unsa nga gisugyot nga kausaban niini nga petsa ngadto sa presidente sa misyon. Kon iyang aprobahan ang kausaban, ang mga lider sa pangserbisyo nga misyon mopahibalo sa presidente sa stake sa misyonaryo bahin sa bag-ong petsa sa pag-release.
Usahay ang usa ka pangserbisyo nga misyonaryo kinahanglang motapos og sayo sa iyang misyon tungod sa kahimsog, katakos, o ubang mga rason. Niini nga mga sitwasyon, ang presidente sa stake mopahibalo sa presidente sa misyon, sa mga lider sa pangserbisyo nga misyon, ug sa mga espesyalista sa pangserbisyo nga misyon sa area. Ang presidente sa stake mokontak dayon sa gisangon diha sa field nga representante sa Departamento sa Misyonaryo nga rebyohon ug aprobahan ang matag sayo nga pag-release sa gisangon nga Kinatibuk-ang Awtoridad.
Alang sa impormasyon mahitungod sa usa ka pangserbisyo nga misyonaryo nga potensiyal nga mobalik sa pagserbisyo, tan-awa sa 24.6.3.2.
Ang pangserbisyo nga mga misyon alang sa batan-ong mga misyonaryo dili molapas sa 24 ka bulan alang sa mga lalaki. Kini nga mga misyon dili molapas sa 18 ka bulan alang sa mga babaye.
Ang senior nga pangserbisyo nga mga misyonaryo mahimong mopalugway sa ilang pagserbisyo ngadto sa petsa nga giuyonan sa presidente sa stake, sa manedyer sa operasyon, ug sa misyonaryo.
24.8
Human sa Misyonaryo nga Pagserbisyo
24.8.1
Mga Rekomend sa Templo
24.8.1.1
Batan-ong mga Misyonaryo nga Nagserbisyo Layo sa Panimalay
Alang sa instruksiyon bahin sa mga rekomend sa templo alang sa batan-ong mga misyonaryo nga mopauli, tan-awa sa 26.5.3.
24.8.1.2
Ang Senior nga mga Misyonaryo nga Nagserbisyo Layo sa Panimalay
Ang presidente sa misyon mahimong mopahigayon og interbiyo alang sa rekomend sa templo kon gikinahanglan. Kon ang misyonaryo takos, ang presidente sa misyon moisyu og bag-o nga rekomend nga matapos ang pagkabalido sulod sa duha ka tuig.
24.8.1.3
Pangserbisyo nga mga Misyonaryo
Ang batan-on ug senior nga pangserbisyo nga mga misyonaryo kinahanglang makigsabot sa lokal nga mga lider alang sa mga interbiyo sa pagbag-o sa mga rekomend sa templo (tan-awa sa 26.3.1).
24.8.2
Interbiyo sa Pag-release sa Misyonaryo
Ang presidente sa stake mo-release sa pangtudlo ug pangserbisyo nga mga misyonaryo ug mopahigayon sa interbiyo sa pag-release. Ang usa sa iyang mga magtatambag mahimong mo-release sa senior nga pangserbisyo nga mga misyonaryo. Sa mga district, sa kasagaran ang presidente sa misyon o ang gisangonan nga magtatambag mo-release sa mga misyonaryo. Alang sa mga eksepsiyon, tan-awa sa 6.3.
Ang mosunod nga mga lagda alang niini nga interbiyo makatabang.
-
Modayeg nila alang sa pagserbisyo og misyon.
-
Modapit nila sa pagpakigbahin sa mga kasinatian sa misyon.
-
Moawhag nila sa pagpadayon isip tibuok kinabuhi nga disipulo ni Jesukristo.
-
Motambag nila sa paglig-on sa maayong mga kinaiya nga ilang napalambo isip usa ka misyonaryo.
-
Moawhag nila sa pagsunod sa Espiritu kada adlaw ug magpuyo nga madungganon.
-
Moawhag nila sa pagkonsiderar ug pag-andam alang sa umaabot, lakip sa edukasyon ug panarbaho alang sa batan-ong mga misyonaryo. Motabang nila nga mohimo og mga tumong ug mohimo og mga plano kon gikinahanglan. Morebyo sa pag-uswag diha sa Akong Plano uban sa batan-ong mga misyonaryo.
-
Likayan ang pagsaad og piho nga mga panalangin isip usa ka ganti alang sa misyonaryo nga pagserbisyo.
-
Moawhag nila sa pagpakabuhi nga kanunay nga takos sa rekomend sa templo.
24.8.3
Mga Report ug Pagpamulong sa Misyonaryo diha sa Panagtigom alang sa Sakramento
Ang mga presidente sa stake ug district modapit sa bag-ong na-release nga pangtudlo ug pangserbisyo nga mga misyonaryo sa pag-report sa ilang serbisyo diha sa miting sa high council o konseho sa district. Ang mga bishop mahimo usab nga modapit sa bag-ong na-release nga mga misyonaryo sa pag-report diha sa miting sa konseho sa ward.
Kon angay alang sa distansiya o ubang mga sirkumstansiya, ang bag-ong na-release nga mga misyonaryo mahimong mohatag sa ilang mga report gamit ang teknolohiya o diha lamang sa miting sa konseho sa ward.
Ang bishopric moeskedyul og panahon alang sa bag-ong na-release nga pangtudlo ug pangserbisyo nga mga misyonaryo sa pagpamulong diha sa panagtigom alang sa sakramento. Ang miting usa ka normal nga panagtigom alang sa sakramento. Ang bishopric moseguro nga ang mga baroganan diha sa 24.5.2 gisunod.
Ang bag-ong gi-release nga mga misyonaryo mahimong mamulong diha sa mga panagtigom alang sa sakramento sa ubang mga ward kon gidapit sa usa ka sakop sa kapangulohan sa stake o district. Mahimo usab sila nga dapiton sa usa ka sakop sa high council o konseho sa district.
24.8.4
Mga Calling
Ang mga lider mohatag dayon og mga buluhaton ug mga calling sa pagpangalagad ngadto sa bag-ong na-release nga pangtudlo ug pangserbisyo nga mga misyonaryo. Kini naglakip nga makonsiderar isip worker sa ordinansa sa templo kon angay (tan-awa sa 25.5).
24.9
Mga Kapanguhaan alang sa mga Rekomendasyon ug Pagserbisyo sa Misyonaryo
24.9.1
Mga Manwal ug mga Porma
-
Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo
-
Mga Sumbanan sa Misyonaryo alang sa mga Disipulo ni Jesukristo
-
Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyon
-
Pagpahiangay ngadto sa Kinabuhi sa Pangserbisyo nga Misyonaryo: Booklet nga Kapanguhaan
-
Mga pangutana sa interbiyo alang sa misyonaryo nga rekomendasyon
-
My Plan: A Guide for the Returned Missionary and Mentor [Ang Akong Plano: Usa ka Giya alang sa Mipauli na nga Misyonaryo ug sa Tigmatuto]
24.9.2
Mga Website
-
MissionaryRecommendations.ChurchofJesusChrist.org (magamit lamang sa lokal nga mga lider ug mga kandidato sa pagkamisyonaryo)
24.9.3
Impormasyon sa Pagkontak
Departamento sa Misyonaryo:
-
Telepono: 1-801-240-2222 o 1-800-453-3860, ekstensiyon 2-2222
Opisina sa Pangserbisyo nga Misyon:
-
Telepono: 1-801-240-4914 o 1-800-453-3860, ekstensiyon 2-4914