25.

Buhat sa Templo ug Family History diha sa Ward ug Stake

25.0

Pasiuna

Ang templo mao ang balay sa Ginoo. Ang mga ordinansa ug mga pakigsaad sa templo mopanalangin sa mga anak sa Langitnong Amahan. Ang Langitnong Amahan nagdapit sa Iyang tanang anak nga mopasarang ug modawat og mga ordinansa sa templo.

Ang paghiusa sa mga pamilya alang sa kahangtoran kabahin sa buhat sa Dios sa kaluwasan ug kahimayaan (tan-awa sa 1.2). Ang buhat sa templo ug family history mao ang paagi sa paghiusa ug pagsilyo sa mga pamilya alang sa kahangtoran (tan-awa sa Mateo 16:19). Kini nga buhat naglakip sa:

• Paghimo og mga pakigsaad samtang kita modawat sa atong kaugalingong mga ordinansa sa templo (tan-awa sa Isaias 55:3; Doktrina ug mga Pakigsaad 84:19–23).

• Pagdiskobre sa atong namatay na nga mga katigulangan ug sa pagpahigayon og mga ordinansa alang kanila diha sa templo aron sila makahimo og mga pakigsaad uban sa Dios (tan-awa sa Malaquias 4:5–6; 1 Mga Taga-Corinto 15:29; Doktrina ug mga Pakigsaad 128:15–18).

• Pag-adto sa templo sa Ginoo kanunay, kon posible, sa pagsimba sa Dios ug sa pagpahigayon og mga ordinansa alang sa atong mga katigulangan (tan-awa sa Lucas 24:52–53; Doktrina ug mga Pakigsaad 109:13–14).

Kini nga kapitulo naggiya sa mga lider ug sa mga miyembro sa Simbahan kon unsaon sa paghiusa ang mga pamilya alang sa kahangtoran pinaagi sa buhat sa templo ug family history. Ang dugang nga impormasyon anaa sa “Mga Templo,” “Puli nga Bunyag,” ug “Family History” (Mga Hilisgotan ug mga Pangutana, Librarya sa Ebanghelyo).

25.1

Pag-apil sa Miyembro ug Lider diha sa Buhat sa Templo ug sa Family History

Ang mga miyembro sa Simbahan adunay mga pribilehiyo ug responsibilidad sa pagtabang sa paghiusa sa ilang mga pamilya alang sa kahangtoran. Sila moandam sa ilang mga kaugalingon sa paghimo og mga pakigsaad samtang sila modawat og mga ordinansa sa templo. Sila maningkamot sa pagtuman niadto nga mga pakigsaad.

Sila usab motabang sa mga sakop sa pamilya nga makasabot, modawat, ug maningkamot sa pagtuman sa mga pakigsaad sa templo. Ang mga ginikanan adunay nag-unang responsibilidad sa pagtabang sa ilang mga anak nga makasinati sa mga panalangin sa pagserbisyo sa templo ug family history alang sa namatay na nga mga sakop sa pamilya.

Ang mga miyembro sa Simbahan giawhag sa pag-ila sa ilang namatay na nga mga kaparyentihan kinsa wala makadawat sa mga ordinansa sa templo. Ang mga miyembro dayon mopahigayon sa mga ordinansa alang niadto nga mga kaparyentihan (tan-awa sa Doktrina ug mga Pakigsaad 128:18). Didto sa kalibotan sa espiritu, ang namatay na nga mga indibidwal makapili sa pagdawat o pagsalikway sa mga ordinansa nga gipahigayon alang kanila.

Ang mga miyembro modapit usab sa pamilya ug mga higala nga magkat-on mahitungod sa ilang mga katigulangan ug modiskobre sa ilang mga istorya.

Adunay daghang himan aron matabangan ang mga miyembro sa ilang buhat sa templo ug family history. Ang pipila niini gihulagway diha sa 25.4.1 ug 25.4.2.

Ang mga lider sa Simbahan mosuporta sa mga miyembro sa ilang mga paningkamot sa templo ug family history sama sa gihulagway sa 25.2 ug 25.3.

25.1.1

Indibidwal nga Responsibilidad alang sa Pagsimba diha sa Templo

Ang mga miyembro motino alang sa ilang kaugalingon kanus-a ug unsa ka sagad nga makasimba sa templo. Ang mga lider dili moestablisar og mga quota o sistema sa pag-report alang sa pagsimba diha sa templo.

Ang indibidwal nga mga miyembro ug mga pamilya nga adunay balido nga mga rekomend sa templo mahimong motambong sa bisan asa nga templo kon gusto nila. Mahimo sila nga magpa-eskedyul og appointment sa templo. Tan-awa sa temples.ChurchofJesusChrist.org alang sa impormasyon sa pagkontak sa matag templo.

25.1.2

Mga Pagbiyahe ngadto sa Templo sa Ward ug Stake

Ang matag yunit sa Simbahan gisangonan ngadto sa usa ka distrito sa templo. Ang naorganisar nga mga pagbisita sa ward o stake ngadto sa mga templo sa gawas sa gisangonan nga distrito sa templo wala iawhag.

Ang tanang pagbiyahe ngadto sa templo sa ward ug sa stake kinahanglang i-eskedyul sa templo. Tan-awa sa temples.ChurchofJesusChrist.org alang sa impormasyon sa pagkontak sa matag templo.

25.2

Pag-organisar sa Buhat sa Templo ug Family History diha sa Ward

Ang mga lider sa ward aduna sa mosunod nga mga responsibilidad alang sa buhat sa templo ug family history diha sa ward:

• Motabang sa indibidwal nga miyembro sa pag-andam sa paghimo og mga pakigsaad ngadto sa Dios pinaagi sa pagdawat sa mga ordinansa sa templo (tan-awa sa 27.1).

• Moawhag sa mga miyembro nga mosimba diha sa balay sa Ginoo kanunay kutob sa itugot sa ilang mga sirkumstansiya.

• Moawhag sa mga indibidwal ug mga pamilya sa pagkat-on sa doktrina ug mga panalangin sa buhat sa templo ug family history.

• Moseguro nga ang mga doktrina ug mga panalangin sa buhat sa templo ug family history gitudlo kanunay atol sa mga miting sa Simbahan. Kini nga buhat naghiusa sa mga pamilya alang sa kahangtoran.

• Moawhag sa mga miyembro nga magkat-on mahitungod sa ilang mga katigulangan ug magpahigayon og mga ordinansa sa templo alang kanila.

• Mosuporta sa mga ginikanan sa pagtabang sa ilang mga anak nga moapil sa buhat sa templo ug family history.

• Moawhag sa tanang kabatan-onan ug hamtong nga mga miyembro, lakip na sa bag-ong mga miyembro, nga magbaton og balido nga rekomend sa templo.

Tan-awa sa kapitulo 26 alang sa impormasyon mahitungod sa mga rekomend sa templo.

25.2.1

Bishopric

Ang bishopric makigsabot sa mga kapangulohan sa korum sa mga elder ug sa Relief Society samtang mangulo sila sa mga paningkamot sa ward alang sa templo ug family history. Kini nga mga lider magtinambagay kanunay.

Ang bishopric aduna usab sa mosunod nga dugang nga mga responsibilidad alang sa buhat sa templo ug family history:

• Makigsabot sa mga kapangulohan sa korum sa mga elder ug sa Relief Society samtang mangulo sila sa buhat sa ward alang sa templo ug family history (tan-awa sa 25.2.2).

• Moseguro nga ang buhat sa templo ug family history nasabotan diha sa mga miting sa konseho sa ward ug sa konseho sa kabatan-onan sa ward.

• Morebyo ug moaprobar sa plano alang sa templo ug family history sa ward (tan-awa sa 25.2.6).

• Modumala sa organisasyon sa mga kurso sa pagpangandam alang sa templo (tan-awa sa 25.2.8).

• Moisyu og mga rekomend sa templo (tan-awa sa kapitulo 26).

Ang bishopric mokonsulta sa presidente sa stake sa pagtino kon motawag ba og lider sa ward alang sa templo ug family history (tan-awa sa 25.2.3 alang sa dugang nga impormasyon).

25.2.2

Mga Kapangulohan sa Korum sa mga Elder ug Relief Society

Ang mga kapangulohan sa korum sa mga elder ug Relief Society mangulo sa inadlaw-adlaw nga mga paningkamot alang sa templo ug family history diha sa ward (tan-awa sa 8.2.4 ug 9.2.4). Ang kapangulohan sa korum sa mga elder mangulo niini nga mga paningkamot alang sa mga sakop sa korum sa mga elder. Ang kapangulohan sa Relief Society mangulo sa mga paningkamot alang sa mga sakop sa Relief Society. Sila magtambayayong sa pagpangulo niini nga mga paningkamot uban sa konseho sa ward, ubos sa pagpakigsabot sa bishop.

Kini nga mga lider aduna sa mosunod nga dugang nga mga responsibilidad:

• Mohangyo sa consultant sa ward alang sa templo ug family history sa pagtabang sa mga miyembro sa ward kinsa bag-o lang nakadawat sa mga tawag sa misyon sa pagpangita ug pag-andam sa mga ngalan sa patay nga mga katigulangan alang sa mga ordinansa sa templo.

• Motabang sa konseho sa ward nga mopalambo ug moimplementar sa plano sa ward alang sa templo ug family history (tan-awa sa 25.2.6).

• Moseguro nga ang buhat sa templo ug family history naplano ug na-report diha sa mga miting sa konseho sa ward ug sa mga miting sa pakigsabot sa ward alang sa templo ug family history.

• Mogiya sa trabaho sa lider sa ward alang sa templo ug family history. Kon kini nga lider wala matawag, ang usa ka sakop sa kapangulohan sa korum sa mga elder ang motuman niini nga tahas (tan-awa sa 25.2.3

Ang matag usa sa mga presidente sa korum sa mga elder ug sa Relief Society mosangon og sakop sa kapangulohan sa pagtabang sa pagpangulo sa buhat sa templo ug family history diha sa ward. Kining duha ka sakop sa kapangulohan magtambayayong. Sila motambong og mga miting sa pakigsabot sa ward alang sa templo ug family history (tan-awa sa 25.2.7).

25.2.3

Lider sa Ward alang sa Templo ug Family History

Ang bishopric mokonsulta sa presidente sa stake sa pagtino kon motawag ba og lider sa ward alang sa templo ug family history. Kon sila mohukom sa paghatag niini nga calling, ang bishopric makigtinambagay sa mga presidente sa korum sa mga elder ug sa Relief Society sa pagtino kinsa ang tawagon. Kini nga tawo kinahanglan nga usa ka tighupot sa Melchizedek nga Pagkapari. Kon kini nga lider dili matawag, ang usa ka sakop sa kapangulohan sa korum sa mga elder mohimo niini nga tahas.

Ang lider sa ward alang sa templo ug family history mosuporta sa mga kapangulohan sa korum sa mga elder ug sa Relief Society sa ilang mga responsibilidad sa templo ug family history. Siya usab aduna sa mosunod nga mga responsibilidad:

• Makigsabot sa mga paningkamot sa templo ug family history uban sa mga lider sa organisasyon sa ward, lakip sa mga kapangulohan sa korum sa kabatan-onan ug sa mga klase.

• Mangulo sa mga miting sa pakigsabot sa ward alang sa templo ug family history (tan-awa sa 25.2.7).

• Motambong og mga miting sa konseho sa ward kon dapiton.

• Motabang sa konseho sa ward nga mopalambo ug moimplementar sa plano sa ward alang sa templo ug family history (tan-awa sa 25.2.6).

• Motudlo sa mga consultant sa ward alang sa templo ug family history. Makigsabot sa ilang mga paningkamot aron matabangan ang mga miyembro sa pagpangita sa mga ngalan sa mga katigulangan ug magpahigayon og mga ordinansa sa templo alang kanila.

• Makigtambayayong sa lider sa misyon sa ward ug sa mga misyonaryo sa pagtabang niadtong nagkat-on sa ebanghelyo, sa bag-ong mga miyembro, ug sa mibalik nga mga miyembro nga moapil sa buhat sa templo ug family history (tan-awa sa 23.2 ug 23.3).

• Kon mahimo, mosangon og mga consultant sa ward alang sa templo ug family history sa pagserbisyo diha sa sentro sa family history (tan-awa sa 25.3.6).

25.2.4

Mga Consultant sa Ward alang sa Templo ug Family History

Ang mga consultant sa ward alang sa templo ug family history moserbisyo ubos sa direksyon sa lider sa ward alang sa templo ug family history. Ang bishopric motawag niining mga miyembro sa pagserbisyo. Mga hamtong ug kabatan-onan mahimong tawagon. Ang mga presidente sa elders quorum, Relief Society, ug Young Women mahimong mosugyot kinsa ang makaserbisyo.

Ang mga konsultant motudlo sa uban sa yanong mga paagi kon unsaon sa pag-apil sa buhat sa templo ug family history. Sila aduna sa mosunod nga mga responsibilidad:

• Motabang sa mga miyembro nga mangandam sa pagdawat og mga ordinansa sa templo ug sa paghimo og mga pakigsaad sa templo.

• Motabang sa mga miyembro nga makasinati sa mga panalangin sa pagdiskobre sa ilang mga katigulangan ug sa pagpahigayon sa mga ordinansa sa templo alang kanila. Kini nga mga kasinatian importante kaayo alang niadtong nagkat-on sa ebanghelyo, sa bag-o ug mibalik nga mga miyembro, ug kadtong nag-andam sa pagdawat sa usa ka rekomend sa templo alang sa puli nga mga bunyag ug mga kumpirmasyon.

• Moapil sa mga miting sa pagpakigsabot alang sa templo ug family history (tan-awa sa 25.2.7

• Moserbisyo diha sa lokal nga sentro sa FamilySearch kon gisangonan (tan-awa sa 25.3.6).

Ang mga kapanguhaan sa pagtabang sa mga konsultant sa templo ug family history gilista diha sa 25.4.1 ug 25.4.2.

25.2.5

Konseho sa Ward

Ang mga sakop sa konseho sa ward mainampoon nga mopalambo ug moimplementar sa plano sa ward alang sa templo ug family history. Alang sa impormasyon mahitungod sa plano, tan-awa sa 25.2.6.

Ang bishop mahimong modapit sa lider sa ward alang sa templo ug family history nga motambong sa mga miting sa konseho.

25.2.6

Plano sa Ward alang sa Templo ug Family History

Ang matag ward kinahanglang adunay yanong plano alang sa templo ug family history. Kini nga plano nagtabang sa mga miyembro sa ward, lakip sa kabataan ug kabatan-onan, sa pagpangandam sa pagsimba diha sa balay sa Ginoo ug sa pag-apil diha sa buhat sa family history kutob sa itugot sa ilang sirkumstansiya.

Ang mga presidente sa korum sa mga elder ug Relief Society motabang sa konseho sa ward sa paghimo og plano. Ang lider sa ward alang sa templo ug family history motabang usab. Sa paghimo og plano, sila:

• Mainampoong mokonsiderar sa mga panginahanglan sa mga miyembro ug sa magamit nga mga kapanguhaan.

• Moila og mga aksiyon nga himoon niana nga tuig.

• Motino unsaon sa pag-implementar sa plano ug mohimo og mga buluhaton sumala niini.

Ang mga ehemplo kon unsa ang mahimong ilakip sa plano gilista sa ubos:

• Motabang sa piho nga mga miyembro nga mangandam sa pagdawat og mga ordinansa sa templo.

• Motabang sa mga miyembro nga mohimo sa ilang mga family tree diha sa FamilySearch.org o sa FamilySearch Family Tree app (tan-awa sa 25.4.1).

• Motabang sa mga miyembro sa paggamit sa Andam na nga mga Ordinansa nga feature sa FamilySearch.org o sa FamilySearch Family Tree app aron dad-on ang ngalan sa katigulangan ngadto sa templo.

• Mopaapil sa bag-o ug mibalik nga mga miyembro, kabatan-onan, ug kabataan sa buhat sa templo ug family history.

Ang plano sa ward alang sa templo ug family history kinahanglang dili moestablisar og mga quota o sistema sa pag-report alang sa pagsimba diha sa templo (tan-awa sa 25.1.1).

Ang bishop morebyo ug moaprobar sa plano. Ang mga miyembro sa konseho sa ward maoy mangulo sa pag-implementar niini. Sila mo-report sa kalamboan diha sa mga miting sa konseho sa ward. Sila usab mo-update sa plano kon gikinahanglan.

25.2.7

Mga Miting sa Pagpakigsabot sa Ward alang sa Templo ug Family History

Mubo dili pormal nga mga miting sa pagsabot-sabot sa ward alang sa templo ug family history ang himoon kanunay. Ang lider sa ward alang sa templo ug family history mopahigayon niini nga mga miting.

Ang uban nga dapiton maglakip sa:

• Gisangonan nga mga sakop sa mga kapangulohan sa Relief Society ug sa korum sa mga elder.

• Usa ka kaabag sa korum sa mga priest (o presidente sa korum sa mga teacher o sa mga deacon kon walay priest diha sa ward).

• Usa ka sakop sa kapangulohan sa labing edaran nga klase sa Young Women.

• Mga consultant sa templo ug family history.

Ang tanan kinsa motambong, lakip sa kabatan-onan, magtinambagay isip managsama nga mga partisipante. Ang katuyoan niini nga mga miting mao ang:

• Pagsabot-sabot sa mga paningkamot sa pag-implementar sa plano sa ward alang sa templo ug family history (tan-awa sa 25.2.6).

• Pagplano unsaon sa pagtabang sa piho nga mga miyembro sa ward nga mangandam sa pagdawat og mga ordinansa sa templo.

• Pagplano unsaon sa pagtabang sa piho nga mga miyembro sa ward sa ilang buhat sa templo ug family history.

Kini nga mga miting mahimong himoon nga personal nga magkita o dili personal nga magkita. Ang pagsabot-sabot mahimo usab nga mahitabo sa ubang mga paagi, lakip sa mga tawag sa telepono, mga text, ug mga email.

25.2.8

Kurso sa Pagpangandam alang sa Templo

Ubos sa direksyon sa bishop, ang kurso sa pagpangandam alang sa templo mahimong i-organisar aron sa pagtabang sa mga miyembro nga mangandam sa paghimo og mga pakigsaad samtang sila modawat sa mga ordinansa sa templo. Kini nga mga kurso himoon dili sa naandan nga mga miting sa Dominggo sa usa ka panahon nga hamugaway alang sa mga miyembro. Kini mahimong himoon sa meetinghouse o sa panimalay.

Ang mga sakop sa konseho sa ward mainampoong mopili og mga miyembro nga dapiton nga moapil sa matag kurso. Kini nga mga kurso mas makatabang ilabi na alang sa mosunod nga mga tawo:

• Bag-ong mga miyembro

• Mga miyembro nga nag-andam nga modawat sa ilang kaugalingong tuga o i-silyo

• Mga miyembro nga mibalik sa kalihokan sa Simbahan

• Natugahan nga mga miyembro kinsa wala makabag-o sa ilang mga rekomend sa templo sulod sa dugay-dugay nga panahon

Ang bishopric motawag og usa o daghan nga mga magtutudlo alang sa pagpangandam sa templo. Ang mga leksiyon ug mga instruksiyon alang sa pag-organisar sa kurso anaa diha sa Gitugahan gikan sa Kahitas-an: Manwal sa Magtutudlo sa Seminar sa Pagpangandam alang sa Templo. Ang mga partisipante hatagan og mga kopya sa Pagpangandam sa Pagsulod sa Balaan nga Templo Alang sa personal nga pagtuon ug mga kapanguhaan sa leksiyon, tan-awa sa temples.ChurchofJesusChrist.org.

25.3

Pag-organisar sa Buhat sa Templo ug Family History diha sa Stake

Ang mga lider sa stake mosuporta sa mga lider sa ward ug sa mga miyembro sa ilang mga paningkamot sa templo ug family history.

25.3.1

Kapangulohan sa Stake

Ang presidente sa stake naghupot sa mga yawe alang sa buhat sa Dios sa kaluwasan ug kahimayaan diha sa stake. Siya ug ang iyang mga magtatambag aduna sa mosunod nga mga responsibilidad alang sa aspeto niana nga buhat sa templo ug family history:

• Motabang sa mga miyembro nga makaandam sa paghimo og sagrado nga mga pakigsaad samtang sila modawat og mga ordinansa sa templo (tan-awa sa 27.1).

• Moawhag sa mga miyembro nga mosimba diha sa balay sa Ginoo kanunay kutob sa itugot sa ilang mga sirkumstansiya.

• Moseguro nga ang mga doktrina ug mga panalangin sa buhat sa templo ug family history gitudlo kanunay diha sa mga miting sa stake. Kini nga buhat naghiusa sa mga pamilya alang sa kahangtoran.

• Moawhag sa mga miyembro nga magkat-on mahitungod sa ilang mga katigulangan ug magpahigayon og mga ordinansa sa templo alang kanila.

• Mopahigayon og mga interbiyo alang sa rekomend sa templo (tan-awa sa kapitulo 26).

Niini nga regular nga miting uban sa matag presidente sa korum sa mga elder, ang usa ka sakop sa kapangulohan sa stake mohisgot sa buhat sa templo ug family history diha sa ward (tan-awa sa 8.3.1). Ang mga magtatambag sa kapangulohan sa korum sa mga elder ug ang high councilor nga gisangonan ngadto sa korum mahimong motambong.

25.3.2

Komitiba sa Pagpangulo sa Hamtong diha sa Stake

Ang komitiba sa pagpangulo sa hamtong sa stake naglakip sa:

• Kapangulohan sa stake.

• Kapangulohan sa Relief Society sa stake.

• Mga high councilor nga gisangonan nga makigtambayayong sa korum sa mga elder.

Kini nga mga lider motudlo ug mosuporta sa mga kapangulohan sa korum sa mga elder ug sa Relief Society sa ilang mga responsibilidad alang sa buhat sa templo ug family history (tan-awa sa 25.2.2). Ang instruksiyon mahimong mahitabo diha sa grupo o sa indibidwal nga paagi. Ang mga lider sa ward alang sa templo ug family history mahimong dapiton aron modawat niini nga instruksiyon.

Alang sa pa dugang mahitungod niini nga mga miting sa komitiba, tan-awa sa 29.3.8.

25.3.3

Mga High Councilor

Ang kapangulohan sa stake mahimong mosangon og mga high councilor sa pagtudlo ug pagsuporta sa mosunod nga mga tawo sa ilang mga responsibilidad alang sa buhat sa templo ug family history:

• Mga kapangulohan sa korum sa mga elder

• Mga lider sa ward alang sa templo ug family history

• Mga consultant sa stake alang sa templo ug family history

• Mga koordinitor sa sentro sa FamilySearch

Usa o daghang high councilor mahimong sangonan sa pagpangulo niini nga mga paningkamot. Hinoon, ang tanang high councilor aduna niini nga mga responsibilidad alang sa mga ward ug mga korum diin sila gisangonan.

Ang mga high councilor mahimong motabang sa mga lider sa ward alang sa templo ug family history sa pagtudlo sa mga consultant sa ward alang sa templo ug family history. Ang mga high councilor mahimong abagan sa mga consultant sa stake alang sa templo ug family history.

Ang kapangulohan sa stake mahimong mosangon og high councilor sa pagpakigsabot sa boluntaryo nga mga paningkamot sa family history sa stake (tan-awa sa 25.4.3). Siya ug ang laing high councilor mahimong sangonan sa pagdumala sa buhat diha sa mga sentro sa FamilySearch (tan-awa sa 25.3.6).

25.3.4

Kapangulohan sa Relief Society sa Stake

Ubos sa direksiyon sa presidente sa stake, ang kapangulohan sa Relief Society sa stake motudlo ug mosuporta sa mga kapangulohan sa Relief Society sa ward sa ilang mga responsibilidad alang sa buhat sa templo ug family history (tan-awa sa 9.2.4).

25.3.5

Mga Consultant sa Stake alang sa Templo ug Family History

Ang mga consultant sa templo ug family history sa stake mosuporta sa buhat sa templo ug family history sa tibuok stake. Sila moserbisyo ubos sa direksyon sa kapangulohan sa stake ug usa o daghang high councilor nga gisangonan ngadto sa buhat sa templo ug family history.

Kini nga mga consultant mosuporta sa mga high councilor ug sa kapangulohan sa Relief Society sa stake sa ilang mga paningkamot sa pagtudlo sa uban sa buhat sa templo ug family history (tan-awa sa 25.3.3 ug 25.3.4). Sila usab mahimong hatagan sa mosunod nga mga buluhaton:

• Motabang sa pagtudlo ug pagsuporta sa mga miyembro sa templo ug family history nga mga calling sa ward.

• Motabang sa pagpakigsabot bahin sa boluntaryo nga mga paningkamot gamit ang FamilySearch.org o sa FamilySearch apps (tan-awa sa 25.4.3).

• Moserbisyo diha sa mga sentro sa FamilySearch (tan-awa sa 25.3.6).

25.3.6

Mga Sentro sa FamilySearch

Kon adunay mga kapanguhaan, ang stake mahimong moorganisar og usa o daghang sentro sa FamilySearch. Kini nga mga sentro mao ang motabang sa mga bisita sa pagdiskobre, pagkolekta og impormasyon mahitungod sa, ug paghiusa sa buhi ug namatay na nga mga sakop sa pamilya pinaagi sa mga ordinansa sa templo. Si bisan kinsa mahimong mogamit niini nga mga sentro.

Ang presidente sa stake motawag og koordinitor sa sentro sa FamilySearch sa pagdumala sa mga paningkamot diha sa matag sentro sa FamilySearch. Ang matag sentro sa kasagaran atimanon sa mga consultant alang sa templo ug family history sa gisangonan nga stake ug ward. Ang mga sentro sa FamilySearch kinahanglang bukas sa kombenyente nga mga panahon. Ang mga sentro sa FamilySearch duol sa mga templo mopahiangay sa ilang mga eskedyul aron mohaom sa eskedyul sa lokal nga templo.

Isip eksepsiyon, ang dagko nga mga sentro sa FamilySearch dumalahon sa Kapangulohan sa Area.

25.3.7

Koordinitor sa Sentro sa FamilySearch

Ang koordinitor sa sentro sa FamilySearch mohan-ay sa inadlaw nga pagpadagan sa sentro sa FamilySearch. Moserbisyo siya ubos sa direksiyon sa presidente sa stake o sa gisangonan nga high councilor. Ang mga responsibilidad mahimong maglakip niadtong gilista sa ubos:

• Motabang sa mga miyembro sa pag-andam og mga ngalan sa pamilya aron makapahigayon sila sa mga ordinansa diha sa balay sa Ginoo.

• Makigsabot bahin sa mga kalihokan sa sentro aron matabangan ang mga miyembro sa Simbahan ug ang mga bisita diha sa komunidad sa pagdiskobre sa ilang mga katigulangan.

• Makigtambayayong (1) sa high councilor nga gisangonan sa pagsuporta sa buhat sa templo ug family history ug (2) sa espesyalista sa teknolohiya sa stake sa pagtubag sa mga panginahanglan sa pagpadagan sa sentro ug sa pagmintinar sa mga kapanguhaan niini.

Ang Giya sa Paggamit sa Sentro sa FamilySearch naghatag og giya kon unsaon sa pagpadagan sa sentro sa FamilySearch.

25.3.8

Mga Tigtambag sa Area Temple ug Family History

Ang mga Kapangulohan sa Area mahimong motawag og mga tigtambag sa area temple ug family history. Kon itugot sa mga sirkumstansiya, usa ka tawo o usa ka magtiayon mahimong tawagon alang sa matag konseho sa pakigsabot. Ang mga tigtambag sa kasagaran moserbisyo sulod sa tulo hangtod sa lima ka tuig.

Ang Kapangulohan sa Area mahimong mosangon sa mga Kapitoan [Seventies] sa Area sa pakigsabot sa buhat niining mga tigtambag diha sa mga konseho sa pakigsabot. Ang buhat sa mga tigtambag kinahanglang mopahiuyon sa gitutokan sa area.

Sumala sa gisugo sa Kapangulohan sa Area ug Kapitoan sa Area, ang mga tigtambag motabang sa mga presidente sa stake sa pagtuman sa ilang mga responsibilidad alang sa buhat sa templo ug family history. Ang mga tigtambag moabag sa mga presidente sa stake sa pagtudlo sa mga tawo nga moserbisyo sa mosunod nga mga calling mahitungod sa ilang mga responsibilidad:

• Mga high councilor

• Mga kapangulohan sa Relief Society sa stake

• Mga komitiba sa pagpangulo sa mga hamtong sa stake

• Mga consultant sa stake alang sa templo ug family history

• Mga koordinitor sa sentro sa FamilySearch

Ang mga tigtambag mahimong sangonan sa pagtabang sa mga kapangulohan sa stake sa pag-andam sa mga miyembro alang sa pagsimba diha sa bag-ong gipahibalo nga mga templo sulod sa area. Ang uban nga mga responsibilidad tingali maglakip sa pagtudlo sa mga lider sa stake diha sa mga baroganan ug mga buhat sa templo ug sa buhat sa family history. Kini naglakip sa:

• Unsaon sa pagtabang sa mga miyembro sa ilang unang kasinatian sa puli nga mga bunyag ug mga kompirmasyon (tan-awa sa 23.2).

• Unsaon sa pagtabang sa mga miyembro nga nangandam sa pagdawat sa ilang kaugalingong pagtuga o maselyo (tan-awa sa 25.2.8, 27.2, 27.3, and 27.4).

• Unsaon sa pag-organisar sa buhat sa templo ug family history diha sa stake ug mga ward (tan-awa sa 25.3 ug 25.2).

• Unsaon sa pagsuporta sa mga kapangulohan sa elders quorum ug Relief Society sa ilang mga responsibilidad (tan-awa 25.2.2).

• Sa unsang paagi ang buhat sa templo ug family history makapanalangin sa mga kabataan ug kabatan-onan (tan-awa sa 10.2.4, 11.2.4, ug 12.2.4).

• Unsaon sa pagtabang sa mga miyembro nga makabaton og usa ka makahuloganon nga kasinatian sa family history (tan-awa sa Temple and Family History Leadership Instruction

• Unsaon sa pagpahigayon og epektibong mga miting sa pagpakigsabot alang sa templo ug family history (tan-awa sa 25.2.7).

• Unsaon sa pagtabang ang mga leader sa ward sa pagplano ug pagtakda og mga tumong (tan-awa sa 25.2.6).

25.4

Mga Kapanguhaan sa Family History

25.4.1

FamilySearch.org, Andam na nga mga Ordinansa, ug FamilySearch nga mga App

FamilySearch.org mao ang website sa Simbahan aron matabangan ang mga miyembro sa pagpangita ug sa pag-andam sa mga ngalan sa ilang mga katigulangan alang sa mga ordinansa sa templo. Ang Andam na nga mga Ordinansa usa ka feature diha sa FamilySearch.org nga mohatag og sayon nga paagi sa pagdawat og mga ngalan sa pamilya o uban nga mga ngalan nga dad-on ngadto sa templo.

Ang site mohatag usab og dugang nga mga kapanguhaan. Naglakip kini sa pagdiskobre, pagpakigbahin, ug pagpreserbar sa mga istorya ug mga litrato sa mga katigulangan.

Kini nga mga kapanguhaan anaa usab diha sa FamilySearch Family Tree app ug FamilySearch Memories app. Tan-awa sa FamilySearch apps alang sa tanang anaa nga mga app.

25.4.2

Akong Pamilya: Mga Istorya Nga Naghiusa Namo [My Family: Stories That Bring Us Together]

Ang booklet nga Akong Pamilya: Mga Istorya Nga Naghiusa Namo motabang sa mga tawo sa pagkolekta ug pagpreserbar sa mga ngalan ug mga istorya sa pamilya. Makatabang usab kini sa mga miyembro nga magsugod sa pag-andam og mga ngalan sa pamilya alang sa mga ordinansa sa templo.

Ang pisikal nga mga kopya sa booklet mahimong ma-order sa store.ChurchofJesusChrist.org.

25.4.3

Boluntaryo nga mga Kalihokan sa Family History

Ang “Get Involved” nga tab diha sa FamilySearch.org motugot sa mga boluntaryo nga moapil sa mosunod nga mga kalihokan:

• Pag-index, nga usa ka proseso sa pagsulod sa impormasyon gikan sa usa ka sinulat nga rekord sa kasaysayan ngadto sa masiksik nga database diha sa FamilySearch.org.

• Pagrebyo sa mga rekord kon tukma ba.

• Pagpalambo sa katukma sa Family Tree.

Kadtong moapil niini nga mga kalihokan naghimo niining posible sa uban nga makadiskobre sa ilang mga katigulangan ug makapahigayon og mga ordinansa sa templo alang kanila.

Bisan kinsa mahimong makaapil sa boluntaryo nga mga kalihokan diha sa FamilySearch.org. Kini mahimong maanindot kaayo nga kasinatian alang sa mosunod:

• Kabatan-onan

• Mga young adult

• Mga miyembro nga dili makatambong kanunay sa mga miting sa Simbahan

• Bag-ong mga miyembro

• Kinatibuk-ang publiko

Ang kapangulohan sa stake mahimong mosangon og usa ka consultant sa stake alang sa templo ug family history o usa ka high councilor sa pagpakigsabot niini nga buhat.

25.5

Pagrekomendar ug Pagtawag og mga Temple Worker

25.5.1

Pagrekomendar og mga Temple Worker

Ang potensiyal nga mga temple worker mailhan sa mosunod nga mga paagi:

• Mga miyembro nga giila sa bishop o sa laing lider sa ward

• Mga miyembro kinsa moduol sa bishop mahitungod sa pagserbisyo

• Mga miyembro nga girekomendar sa presidente sa templo, sa matron, o sa laing lider sa templo

• Mga miyembro kinsa nangandam o bag-ong miuli gikan sa misyonaryo nga pagserbisyo (tan-awa sa kapitulo 24)

Ang mga ngalan sa potensiyal nga mga temple worker isumiter gamit ang Recommend Temple Worker tool. Kini nga himan anaa sa mga bishop, mga presidente sa stake, ug mga kapangulohan sa templo. Ang proseso sa pagsumiter og mga ngalan gilatid sa ubos.

Kon ang mga sakop sa kapangulohan sa templo moila og potensiyal nga temple worker, sila mosumiter sa ngalan sa tawo ngadto sa bishop gamit ang himan nga Recommend Temple Worker.

Kon ang usa ka bishop moila og usa ka potensiyal nga temple worker o makadawat og rekomendasyon gikan sa presidente sa templo, siya makigsulti sa miyembro mahitungod sa oportunidad sa pagserbisyo. Siya morebyo sa mga gikinahanglan alang sa mga temple worker (tan-awa sa 25.5.2). Kon ang bishop ug ang miyembro mobati nga tukma ang oportunidad, ang bishop mokompleto ug mosumiter sa rekomendasyon gamit ang himan nga Recommend Temple Worker. Ang miyembro kinahanglang makasabot nga ang nasumiter nga rekomendasyon wala magseguro nga siya pagatawagon o sangonan isip usa ka temple worker.

Ang rekomendasyon rebyohon pa sa presidente sa stake. Kon ang presidente sa stake motugot sa rekomendasyon, siya mosumiter niini ngadto sa presidente sa templo alang sa pagrebyo gamit ang Recommend Temple Worker tool.

Ang mga miyembro kinsa gitawag o gisangonan isip mga temple worker sa kasagaran mopasalig og regular nga oras sa pagserbisyo diha sa templo matag semana. Ang mga lider kinahanglang maglikay sa pag-isyu og dugang nga mga calling nga makabalda sa abilidad sa mga miyembro sa pagserbisyo diha sa templo.

Ang Recommend Temple Worker tool nagpakita usab sa mga bishop ug mga presidente sa stake sa lista sa tanang miyembro gikan sa ilang mga ward o mga stake kinsa kasamtangang nagserbisyo isip mga temple worker.

25.5.2

Mga Kinahanglanon alang sa mga Temple Worker

Ang mga temple worker motabang sa pagpahigayon og mga ordinansa o motabang sa mga buluhaton sa pagdumala sa templo. Aron marekomendar isip usa ka temple worker, ang usa ka miyembro kinahanglang makatuman sa mosunod nga mga kwalipikasyon:

• Nagpuyo sa distrito sa templo diin siya moserbisyo.

• Natugahan, nagtuman sa mga pakigsaad sa templo, ug adunay balido nga rekomend sa templo.

• Adunay lig-on nga pagpamatuod sa gipahiuli nga ebanghelyo ni Jesukristo.

• Pisikal nga makahimo sa pagpangalagad sa mga ordinansa nga walay tabang.

• Takos sa pagtahod diha sa Simbahan ug sa komunidad.

• Maayong makig-uban sa ubang mga tawo.

• Kasaligan ug anaa sa maayong panglawas.

• Sa kasamtangan walay nakabutang nga annotation sa iyang rekord sa pagkamiyembro.

Agi og dugang, ang bishop mosiguro sa mosunod:

• Kon ang pagkamiyembro sa tawo pormal nga gibutangan og restriksyon, siya mahimong irekomendar isip usa ka temple worker dili moubos sa lima ka tuig human tangtanga ang mga restriksyon. (Tan-awa sa 32.11.3 ug 32.16.1.)

• Kon ang pagkamiyembro sa usa ka wala matugahi nga tawo gibakwi, o kon ang tawo miluwat sa pagkamiyembro, siya mahimong irekomendar isip usa ka temple worker dili moubos sa lima ka tuig human gidawat pag-usab ngadto sa Simbahan. (Tan-awa sa 32.11.4, 32.14.9, 32.16.1, ug 32.16.2.)

• Kon ang pagkamiyembro sa usa ka natugahan nga tawo gibakwi, o kon ang tawo miluwat sa pagkamiyembro, siya mahimong irekomendar isip usa ka temple worker dili moubos sa lima ka tuig human sa pagdawat sa pagpahiuli sa mga panalangin. (Tan-awa sa 32.11.4, 32.14.9, ug 32.17.2.)

25.5.3

Pagtawag ug Pag-set Apart og mga Temple Worker

Human makadawat ang presidente sa templo og rekomendasyon alang sa usa ka tawo nga moserbisyo isip usa ka temple worker, ang usa ka sakop sa kapangulohan sa templo o ang usa ka tawo nga iyang gisangonan mointerbiyo sa tawo. Kon nadasig, ang tawo nga nagpahigayon sa interbiyo motawag niadtong kinsa makahimo sa pagserbisyo isip mga temple worker ug mo-set apart kanila.