26.

Mga Rekomend sa Templo

26.0

Pasiuna

Ang pagsulod sa balay sa Ginoo usa ka sagrado nga pribilehiyo. Ang mga lider sa ward ug sa stake moawhag sa tanang miyembro nga mahimong takos ug maghupot og balido nga rekomend sa templo bisan kon wala sila magpuyo duol sa templo.

Ang mga lider sa Simbahan mohimo sa tanang paningkamot sa pagseguro nga ang tanan nga mosulod sa balay sa Ginoo takos nga mobuhat niini (tan-awa sa Salmo 24:3–5). Ang awtorisado nga mga lider sa pagkapari mopahigayon og mga interbiyo sa rekomend sa templo ug mo-isyu og mga rekomend sa templo sa mga miyembro kinsa motubag sa mga pangutana sa interbiyo sa haom ug kinasingkasing nga paagi (tan-awa sa 26.3 Ang Ginoo nagsaad nga kon kadtong mosulod sa Iyang balay mga limpyo, ang Iyang presensya maanaa didto (tan-awa sa Doktrina ug mga Pakigsaad 97:15–16).

Ang mga miyembro kinahanglan nga adunay balido nga rekomend sa templo aron makasulod sa templo. Ang mga bata nga ubos sa 8 anyos kinsa iselyo ngadto sa ilang mga ginikanan o moobserbar sa pagselyo sa ilang mga igsoon ngadto sa ilang mga ginikanan wala magkinahanglan og rekomend (tan-awa sa 26.4.4).

Kini nga kapitulo naghatag og mga instruksiyon alang sa mga lider kinsa mo-isyu og mga rekomend sa templo. Ang bishop magpakitambag sa iyang presidente sa stake kon siya adunay mga pangutana kalabot sa mga rekomend sa templo nga wala matubag dinhi niini nga kapitulo. Ang presidente sa stake mahimong mokontak sa Buhatan sa Unang Kapangulohan kalabot sa mga pangutana.

26.1

Mga Matang sa mga Rekomend sa Templo

Ang usa ka balido nga rekomend nagtugot sa usa ka miyembro sa pagsulod sa tanang templo. Ang mga lider sa pagkapari moseguro nga ang mga miyembro nakadawat sa sakto nga rekomend alang sa ilang mga sirkumstansya. Adunay tulo ka matang sa mga rekomend:

1. Rekomend sa templo alang sa wala matugahan nga mga miyembro. Kini nga mga rekomend mao ang alang sa wala matugahan nga mga miyembro kinsa naselyo ngadto sa ilang mga ginikanan o sa pagpahigayon og puli nga mga bunyag ug mga kompirmasyon. Kini gi-isyu pinaagi sa Leader and Clerk Resources (LCR). Alang sa dugang nga impormasyon, tan-awa sa 26.4

2. Rekomend sa templo alang sa buhi nga mga ordinansa. Kini nga mga rekomend alang sa mga miyembro nga modawat sa ilang kaugalingong pagtuga o iselyo ngadto sa kapikas. I-isyu kini gikan sa libro sa rekomend 2. Ang rekomend sa mga ordinansa alang sa mga buhi ipasukip ngadto sa regular nga rekomend sa templo alang sa natugahan nga mga miyembro (gihulagway sa ubos). Ang templo motipig sa rekomend sa ordinansa sa mga buhi sa diha nga ipahigayon ang ordinansa. Ang miyembro motipig sa regular nga rekomend ug mogamit niini kon mobalik sa templo.

3. Rekomend sa templo alang sa natugahan nga mga miyembro. Kini nga mga rekomend mao ang alang sa mga miyembro kinsa natugahan na kaniadto. Kini maisyu pinaagi sa LCR. Nagtugot kini sa usa ka miyembro nga makaapil sa tanang ordinansa sa templo alang sa patay. Gamiton usab kini kon ang usa ka natugahan nga miyembro iselyo ngadto sa buhi o patay na nga mga ginikanan o mga anak. Alang sa dugang nga impormasyon, tan-awa sa 26.3.

26.2

Pag-amping sa mga Rekomend sa Templo

26.2.1

Mga Lider sa Pagkapari Nag-amping sa mga Rekomend sa Templo

Ang mga lider sa pagkapari kinsa awtorisado nga magbaton og mga libro sa rekomend sa templo kinahanglang moamping niini pag-ayo. Walay laing tawo nga mahimong mogamit niini. Kon ang Simbahan mo-update sa mga libro sa rekomend sa templo, ang mga lider mogisi sa dili na magamit nga mga libro.

Ang mga lider sa pagkapari mosiguro usab nga ang wala tugoti nga mga indibidwal dili maka-access sa impormasyon sa rekomend sa templo diha sa LCR.

26.2.2

Nawala o Gikawat nga mga Rekomend

Ang bishop mohangyo sa mga miyembro sa pagpahibalo kaniya sa labing dali nga mahimo kon ang ilang rekomend nawala o gikawat. Kon ang miyembro takos gihapon, ang bishop o ang gisangonan nga magtatambag o ang klerk mo-log in sa LCR aron sa pagprinta pag-usab sa rekomend. Ang bag-ong rekomend mo-expire sa samang petsa sa orihinal.

Usahay ang usa ka miyembro kansang rekomend nawala o gikawat wala na magsunod sa mga sumbanan sa katakos. Niini nga mga sitwasyon, ang bishop mokanselar sa rekomend dihadiha dayon (tan-awa sa 26.2.3).

26.2.3

Mga Naghupot og Rekomend Kinsa Wala Magsunod sa mga Sumbanan sa Katakos

Kon ang bishop mitino nga ang usa ka miyembro kinsa adunay magamit nga rekomend wala magsunod sa mga sumbanan sa katakos (tan-awa sa 26.3), iyang pangayoon ang rekomend gikan sa miyembro. Siya mogamit sa LCR sa pagkanselar sa rekomend. Kon wala kini nga sistema, ang bishop mokontak sa opisina sa templo aron ipakanselar ang rekomend.

26.3

Kinatibuk-ang mga Lagda sa Pag-isyu og mga Rekomend sa Templo

Ang awtorisado nga mga lider sa pagkapari mopahigayon og mga interbiyo sa dili pa ang usa ka miyembro makadawat og rekomend sa templo. Ang mga instruksiyon anaa sa LCR. Ang mga lider sa pagkapari kinahanglang mo-isyu lamang og rekomend kon ang miyembro nakatubag sa mga pangutana sa rekomend sa templo sa tukma nga paagi.

Ang mga interbiyo sa rekomend sa templo nagtugot sa mga miyembro sa pagpakita nga aduna silay pagpamatuod ug naningkamot sa pagsunod sa mga sugo sa Dios ug pagsunod sa Iyang mga propeta. Ang mga lider sa pagkapari momatuod usab, pinaagi sa interbiyo, nga ang miyembro takos. Tan-awa sa 26.3.3 alang sa dugang nga impormasyon mahitungod sa pagpahigayon og mga interbiyo sa rekomend sa templo.

Sa mga stake, ang usa ka sakop sa kapangulohan sa stake o klerk sa stake mo-activate sa rekomend sa templo diha sa LCR human kini ma-isyu. Sa mga district, ang usa ka sakop sa kapangulohan sa misyon o mission clerk mo-activate sa rekomend. Ang mga rekomend alang sa mga puli nga bunyag ug kompirmasyon ma-activate kon kini i-imprinta sa usa ka sakop sa bishopric o sa presidente sa branch. Siya mogamit sa LCR sa pag-printa sa mga rekomend.

26.3.1

Mga Interbiyo sa Rekomend sa Templo alang sa mga Miyembro sa mga Ward ug mga Branch

Sa usa ka ward, ang bishop o usa ka gisangonan nga magtatambag mopahigayon sa mga interbiyo sa rekomend sa templo ug mo-isyu og mga rekomend ngadto sa mga takos. Sa usa ka branch, ang presidente sa branch lamang ang mopahigayon sa mga interbiyo sa rekomend sa templo ug mo-isyu og mga rekomend.

Sa usa ka ward, ang bishop personal nga mointerbiyo sa mga miyembro kinsa:

• Modawat sa ilang kaugalingong tuga (tan-awa sa 27.1 ug 27.2).

• Iselyo ngadto sa kapikas (tan-awa sa 27.3).

Sa dinalian nga mga sitwasyon nga dili makahimo ang bishop, siya mahimong motugot sa usa sa iyang mga magtatambag sa pagpahigayon niini nga mga interbiyo.

Sa dagko nga mga ward sa mga young single adult, ang mga bishop mahimong motugot og sinati nga mga magtatambag sa pagpahigayon niini nga mga interbiyo.

Sa dili pa mo-isyu og rekomend sa mga sitwasyon nga gilista sa ibabaw, ang bishop morebyo sa rekord sa miyembro aron sa pagsuta nga wala kini maglakip og notasyon mahitungod sa mga restriksiyon sa pagkamiyembro sa Simbahan. Alang sa mga miyembro nga modawat sa ilang kaugalingong tuga o iselyo ngadto sa kapikas, siya usab moseguro nga:

• Ang bunyag ug kompirmasyon sa tawo narekord diha sa rekord sa pagkamiyembro.

• Ang mga igsoong lalaki nakadawat sa Melchizedek nga Pagkapari.

Usahay, ang mga petsa sa bunyag ug kompirmasyon sa miyembro o ordinasyon sa Melchizedek nga Pagkapari wala marekord. Niini nga mga sitwasyon, ang mga ordinansa kinahanglang masuta ug marekord, maaprobahan, o ipahigayon pag-usab (tan-awa sa 38.2.6).

Human sa interbiyo sa usa ka sakop sa bishopric o sa presidente sa branch, usa ka sakop sa kapangulohan sa stake mointerbiyo sa mga miyembro kinsa nagpuyo sulod sa stake. Siya mopirma sa mga rekomend niadtong mga takos. Usa ka sakop sa kapangulohan sa misyon mopahigayon sa ikaduhang interbiyo alang sa mga miyembro kinsa nagpuyo sa usa ka district. Siya usab mopirma sa mga rekomend niadtong mga takos. Ang usa ka presidente sa district dili mopahigayon og mga interbiyo sa rekomend sa templo gawas kon gitugotan sa Unang Kapangulohan.

Ang presidente sa stake o misyon personal nga mo-interbiyo sa mga miyembro kinsa:

• Modawat sa ilang kaugalingong tuga.

• Iselyo ngadto sa kapikas.

Kon ang presidente sa stake dili makahimo, mahimo niyang tugutan ang iyang mga magtatambag sa pagpahigayon niini nga mga interbiyo.

Ang presidente sa misyon mahimong motugot sa iyang mga magtatambag sa pagpahigayon niini nga mga interbiyo kon gikinahanglan.

Sa usa ka stake sa young single adult, ang presidente sa stake mahimong motugot sa iyang mga magtatambag sa pagpahigayon niini nga mga interbiyo.

26.3.2

Mga Interbiyo sa Rekomend sa Templo alang sa mga Miyembro diha sa Hilit nga mga Dapit

Ang ubang mga miyembro nagpuyo sa mga dapit nga magkinahanglan og mahal nga pagbiyahe o lisod kaayo nga makahimamat og usa ka sakop sa kapangulohan sa stake o misyon. Niini nga mga sitwasyon, ang usa ka sakop sa kapangulohan sa stake o misyon mahimong makigkita sa miyembro sa birtuwal nga paagi aron mopahigayon og interbiyo alang sa rekomend sa templo (tan-awa sa 31.4). Ang lider mopirma sa rekomend sa digital nga paagi kon ang miyembro takos. Usa ka sakop sa bishopric o ang presidente sa branch moprinta dayon sa rekomend ug mohatag niini ngadto sa miyembro.

Kini nga palisiya magamit usab sa mga sakop sa militar kinsa anaa sa hilit nga mga dapit.

26.3.3

Pagpahigayon og Interbiyo sa Rekomend sa Templo

Ang templo mao ang balay sa Ginoo. Ang pagsulod sa templo ug pag-apil sa mga ordinansa usa ka sagrado nga pribilehiyo. Kini nga pribilehiyo gigahin alang niadtong kinsa andam sa espirituhanong paagi ug naningkamot sa pagsunod sa mga sumbanan sa Ginoo, sama sa gitino sa awtorisado nga mga lider sa pagkapari.

Sa paghimo niini nga pagtino, ang mga lider sa pagkapari mointerbiyo sa miyembro gamit ang mga pangutana nga anaa sa ubos. Ang mga lider kinahanglang dili modugang o motangtang sa bisan unsa nga mga kinahanglanon. Hinoon, sila mahimong mopahiangay sa mga pangutana ngadto sa pangidaron ug mga sirkumstansiya sa miyembro.

Usahay ang mga miyembro adunay mga pangutana panahon sa interbiyo sa rekomend sa templo. Ang lider sa pagkapari mahimong mopasabot og sukaranang mga baroganan sa ebanghelyo. Mahimo usab siyang motabang sa mga miyembro nga makasabot sa mga pangutana sa rekomend sa templo kon gikinahanglan. Hinoon, dili niya i-presentar ang iyang personal nga mga tinuohan, mga gusto, o interpretasyon isip doktrina o palisiya sa Simbahan.

Ang mga interbiyo sa rekomend sa templo kinahanglang dili dali-dalion. Kinahanglan kining pribado. Hinoon, ang tawo nga giinterbiyo mahimong modapit sa kapikas, ginikanan, o laing hamtong sa pagtambong.

26.3.3.1

Mga Pangutana sa Interbiyo alang sa Rekomend sa Templo

1. Ikaw ba adunay pagtuo ug pagpamatuod sa Dios, ang Amahan sa Kahangtoran; sa Iyang Anak, si Jesukristo; ug sa Espiritu Santo?

2. Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?

3. Ikaw ba adunay pagpamatuod sa Pagpahiuli sa ebanghelyo ni Jesukristo?

4. Ikaw ba nagpaluyo sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag ug isip mao ang bugtong tawo sa yuta nga gitugotan sa pagdumala sa tanang yawe sa pagkapari?

   Ikaw ba nagpaluyo sa Unang Kapangulohan ug sa Korum sa Napulog Duha ka Apostoles isip mga propeta, mga manalagna, ug mga tigpadayag?

   Ikaw ba nagpaluyo sa ubang Kinatibuk-ang mga Awtoridad ug sa lokal nga mga lider sa Simbahan?

5. Ang Ginoo miingon nga ang tanang butang “himoon nga limpyo” sa Iyang atubangan (Doktrina ug mga Pakigsaad 42:41).

   Ikaw ba naningkamot alang sa moral nga kalimpyo sa imong mga hunahuna ug kinaiya?

   Ikaw ba nagsunod sa balaod sa kaputli?

6. Ikaw ba nagsunod sa mga pagtulon-an sa Simbahan ni Jesukristo diha sa imong pribado ug publiko nga kinaiya kauban sa mga sakop sa imong pamilya ug sa uban?

7. Ikaw ba nagsuporta o nag-awhag og bisan unsa nga mga pagtulon-an, mga binuhatan, o doktrina nga nahisupak niadtong gidawat sa Ang Simbahan ni Jesukristo sa mga Santos sa Ulahing mga Adlaw?

8. Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?

9. Ikaw ba naningkamot nga magmatinuoron sa tanan nimong gibuhat?

10. Ikaw ba hingpit nga tigbayad og eksakto nga ikapulo?

    Alang sa bag-ong mga miyembro nga nagtinguha og rekomend aron makapahigayon og puli nga mga bunyag ug mga kompirmasyon: Andam ka ba nga mosunod sa sugo sa pagbayad sa ikapulo?

11. Ikaw ba nakasabot ug nagsunod sa Pulong sa Kaalam?

12. (Kini nga pangutana laktawan ra kon mag-interbiyo og usa ka bata o usa ka batan-on.) Ikaw ba adunay pinansyal o laing mga obligasyon ngadto sa kanhi asawa o mga anak?

    Kon oo, kasamtangan ba nimong natuman kadtong mga obligasyon?

13. (Kini nga pangutana laktawan ra kon mag-interbiyo og usa ka miyembro nga wala pa matugahi.) Gituman ba nimo ang mga pakigsaad nga imong gihimo sa templo?

14. (Kini nga pangutana laktawan ra kon mag-interbiyo og usa ka miyembro nga wala pa matugahi.) Imo bang gitahod ang imong sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory? (Basaha ang pamahayag bahin sa “Pagsul-ob sa Garment sa Templo” nga gilakip sa ubos ngadto sa matag miyembro.)

15. Aduna bay bug-at nga mga sala sa imong kinabuhi nga kinahanglang iresolbar uban sa mga awtoridad sa pagkapari isip kabahin sa imong paghinulsol?

16. Ikaw ba nagkonsiderar sa imong kaugalingon nga takos nga mosulod sa balay sa Ginoo ug moapil sa mga ordinansa sa templo?

26.3.3.2

Pagsul-ob sa Garment sa Templo

Ang Unang Kapangulohan mihatag sa mosunod nga giya bahin sa pagsul-ob sa garment:

“Ang garment sa balaan nga pagkapari nagpahinumdom kanato sa tabil diha sa templo, ug kana nga tabil nagsimbolo ni Jesukristo. Sa higayon nga imong isul-ob ang imong garment, imong gisul-ob ang usa ka sagrado nga simbolo ni Jesukristo. Ang pagsul-ob niini usa ka panggawas nga pagpahayag sa imong kinahiladman nga pasalig sa pagsunod Kaniya. Ang garment usa usab ka pahinumdom sa imong mga pakigsaad sa templo. Kinahanglan nimong isul-ob ang garment matag adlaw ug gabii sa tibuok nimong kinabuhi. Kon gikinahanglan kining huboon alang sa mga kalihokan nga dili makataronganon nga mabuhat samtang nagsul-ob sa garment, paninguha sa pagsul-ob og balik niini sa labing daling panahon. Samtang ikaw maghupot sa imong mga pakigsaad, lakip ang sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory, ikaw adunay mas dako nga akses sa kaluoy, proteksiyon, kalig-on, ug gahom sa Manluluwas.”

Kon ang mga miyembro adunay mga pangutana mahitungod sa pagsul-ob og garment, giyahi sila ngadto sa 38.5.

26.3.3.3

Dugang nga Direksyon

Ang lider sa pagkapari mopasabot pag-ayo ngadto sa miyembro sa panginahanglan sa pagpanalipod sa iyang rekomend. Kinahanglan nga dili gayod kini pahulaman ug kinahanglang i-report dayon ngadto sa nag-isyu kon mawala o gikawat.

26.4

Pag-isyu og mga Rekomend sa Templo alang sa Wala Matugahi nga mga Miyembro

26.4.1

Kinatibuk-ang mga Lagda

Sa usa ka ward, ang bishop o usa ka gisangonan nga magtatambag mointerbiyo sa mga miyembro nga wala matugahi alang sa mga rekomend sa templo. Sa usa ka branch, ang presidente sa branch lamang ang mopahigayon og mga interbiyo alang sa rekomend sa templo. Ang lider mosunod sa mga lagda diha sa 26.3. Siya mo-isyu og rekomend kon ang tawo takos.

Ang mga rekomend sa templo giisyu ngadto sa wala matugahi nga mga miyembro sumala sa mosunod:

• Alang sa mga miyembro nga nag-edad og 11 ug pataas nga bunyagan ug kompirmahan alang sa mga patay. (Batan-ong babaye ug mga batan-ong lalaki nga naordinahan mao ang makaangkon og rekomend sa templo sugod sa Enero sa tuig nga sila mag-12 anyos.)

• Alang sa mga miyembro nga nag-edad og 8 hangtod sa 20 aron maselyo ngadto sa ilang mga ginikanan. Ang mga bata nga ubos sa edad nga 8 wala magkinahanglan og rekomend aron maselyo ngadto sa ilang mga ginikanan (tan-awa sa 26.4.4).

• Alang sa mga miyembro nga nag-edad og 8 hangtod 20 nga makaobserbar sa mga pagselyo sa ilang buhi nga mga igsoon, mga anak sa ilang ama-ama o ina-ina, o mga igsoon diha sa amahan o inahan lamang, ngadto sa ilang mga ginikanan.

Mga miyembro kinsa natugahan na kaniadto nga wala maisyuhi og bisan unsa nga mga rekomend gipasabot niini nga seksiyon.

Ang usa ka lalaki nga miyembro sa Simbahan kinsa igo na ang pangidaron sa paghupot sa pagkapari kinahanglang i-orden ngadto sa usa ka katungdanan sa pagkapari sa dili pa siya makadawat og rekomend sa templo.

Kon moisyu og usa ka rekomend sa templo, ang usa ka sakop sa bishopric o presidente sa branch motagsa-tagsa og interbiyo sa tawo. Hinoon, ang tawo mahimong modapit og ginikanan o laing hamtong sa pagtambong.

26.4.2

Mga Rekomend sa Templo alang sa Bag-ong Nabunyagan nga mga Miyembro

Ang bishop mointerbiyo sa bag-ong mga miyembro kinsa anaa sa saktong edad aron modawat og rekomend nga adunay limitasyon ang paggamit alang sa mga bunyag ug mga kompirmasyon sa patay lamang. Siya mopahigayon niini nga interbiyo dili madugay human sa kompirmasyon sa miyembro, kasagaran sulod sa usa ka semana (tan-awa sa 26.4.1). Alang sa mga lalaki, kini nga interbiyo mahimong mapahigayon isip kabahin sa interbiyo aron makadawat sa Aaronic nga Pagkapari. Ang lalaki nga mga miyembro sa Simbahan kinahanglang i-orden ngadto sa usa ka katungdanan sa pagkapari sa dili pa makadawat og usa ka rekomend sa templo.

Ang takos nga hamtong nga mga miyembro mahimong makadawat sa ilang kaugalingong pagtuga usa ka hingpit nga tuig human makompirmahan isip miyembro sa Simbahan (tan-awa sa 27.2.1.1).

26.4.3

Mga Rekomend sa Templo alang sa Puli nga mga Bunyag ug mga Kompirmasyon Lamang

Ang mga rekomend sa templo nga giisyu alang sa mga puli nga bunyag ug mga kompirmasyon mahimong gamiton lamang alang niana nga katuyoan. Kini nga mga rekomend iprinta gamit ang LCR. Kini nagkinahanglan lamang sa pirma sa miyembro ug sa usa ka sakop sa bishopric o sa presidente sa branch.

Alang sa impormasyon mahitungod sa pag-iskedyul og mga bunyag ug mga kumpirmasyon alang sa mga patay, tan-awa sa 28.2.1.

26.4.4

Mga Rekomend sa Templo alang sa Pagselyo sa Buhi nga mga Anak ngadto sa mga Ginikanan

Ang wala matugahi nga mga miyembro nga nag-edad og 8 hangtod 20 isyuhan og rekomend sa templo aron moapil sa mga pagselyo sumala sa mosunod:

• Aron iselyo ngadto sa ilang mga ginikanan

• Aron moobserbar sa pagselyo sa ilang buhi nga mga igsoon, mga anak sa ilang ama-ama o ina-ina, o mga igsoon diha sa amahan o inahan lamang, ngadto sa ilang mga ginikanan

Kadtong mga naisyuhan og mga rekomend sa templo aron makaapil sa mga pagselyo giinterbiyo sa usa ka sakop sa bishophic o sa presidente sa branch. Sila usab interbiyohon sa usa ka sakop sa kapangulohan sa stake o misyon.

Usa ka sakop sa bishopric o presidente sa branch mo-printa niining mga rekomend gamit ang LCR. Ang mga rekomend sa templo alang sa mga pagselyo mahimong giisyu alang sa indibidwal nga mga anak o alang sa grupo sa mga bata sa sama nga pamilya. Ang sama nga rekomend mahimong gamiton sa paglista sa mga bata kinsa iselyo ug kadtong mag-obserbar lamang.

Ang mga bata nga ubos sa edad nga 8 wala magkinahanglan og rekomend aron maselyo ngadto sa ilang mga ginikanan. Wala usab sila magkinahanglan og rekomend aron sa pag-obserbar sa pagselyo sa ilang mga igsoon, mga anak sa ama-ama o ina-ina, o mga igsoon diha sa amahan o inahan lamang, ngadto sa ilang mga ginikanan.

Ang mga miyembro nga nag-edad og 21 o pataas tingali maselyo ngadto sa ilang mga ginikanan o mag-obserbar lamang sa pagselyo kon sila (1) natugahan na ug (2) adunay balido nga rekomend sa templo.

Tan-awa sa 27.4.4 ug 38.4.2 alang sa dugang nga mga palisiya sa pag-obserbar sa pagselyo ug sa pagkaselyo ngadto sa mga ginikanan.

26.5

Pag-isyu og mga Rekomend sa Templo diha sa Espesyal nga mga Sirkumstansya

26.5.1

Mga Miyembro nga Modawat sa Ilang Kaugalingong Pagtuga

Mga instruksyon alang sa pag-isyu og rekomend ngadto sa usa ka tawo nga modawat sa iyang kaugalingong pagtuga gihatag diha sa libro 2 nga rekomend sa templo. Ang mga takos nga mga miyembro nga nagtinguha sa pagdawat sa ilang kaugalingong pagtuga mahimong mobuhat sa ingon kon sila nakatuman sa tanan sa mosunod nga mga kondisyon:

• Sila dili mominos sa 18 anyos.

• Sila nakakompleto o wala na mag-eskwela sa high school, secondary school, o katugbang niini.

• Usa ka tuig na ang milabay sukad sa ilang kompirmasyon.

• Sila mobati og tinguha nga modawat ug motahod sa sagrado nga mga pakigsaad sa templo sa ilang tibuok kinabuhi.

Dugang pa, ang usa ka lalaki kinahanglang maghupot sa Melchizedek nga Pagkapari sa dili pa modawat sa iyang pagtuga. Alang sa impormasyon mahitungod sa mga miyembro nga nangandam sa pagdawat sa ilang kaugalingong pagtuga, tan-awa sa 25.2.8. Alang sa impormasyon kon kinsa ang mahimong modawat sa pagtuga, tan-awa sa 27.2.1.

26.5.2

Bag-ong Nabunyagan nga mga Miyembro

Ang takos nga hamtong nga mga miyembro mahimong makadawat sa ilang kaugalingong pagtuga usa ka hingpit nga tuig human makompirmahan isip miyembro sa Simbahan (tan-awa sa 27.2.1.1). Ang mga lider sa Pagkapari moseguro nga ang petsa sa pagdawat sa miyembro sa pagtuga kinahanglang sa labing minos usa ka hingpit nga tuig human sa petsa sa iyang kompirmasyon, dili petsa sa bunyag. Ang Unang Kapangulohan lamang ang motugot sa mga eksepsiyon.

Ang bag-o nga mga miyembro kinsa mga takos kinahanglang isyuhan og rekomend sa templo alang sa puli nga mga bunyag ug mga kompirmasyon lamang (tan-awa sa 26.4.2).

26.5.3

Batan-ong mga Misyonaryo nga Mipauli gikan sa Pagserbisyo nga Layo sa Panimalay

Sa dili pa ang usa ka batan-on nga misyonaryo nga nagserbisyo layo sa panimalay mokompleto sa iyang pagserbisyo, ang presidente sa misyon mopahigayon og interbiyo sa rekomend sa templo. Kon ang misyonaryo takos, moisyu siya og rekomend. Ang presidente sa misyon mobutang og petsa ug mo-activate sa rekomend aron nga kini mo-expire tulo ka bulan gikan sa petsa sa pagpauli sa misyonaryo.

Ang bishop mointerbiyo sa namauli nga mga misyonaryo aron sa pag-isyu og bag-o nga rekomend sa templo duol sa kataposan sa tulo ka bulan nga panahon sa pag-expire. Sa dinalian nga mga sitwasyon nga dili makahimo ang bishop, siya mahimong motugot sa usa sa iyang mga magtatambag sa pagpahigayon niini nga mga interbiyo.

Sa dagko nga mga ward sa mga young single adult, ang mga bishop mahimong motugot og sinati nga mga magtatambag sa pagpahigayon niini nga mga interbiyo.

Ang namauli nga mga misyonaryo makigkita dayon sa usa ka sakop sa kapangulohan sa stake alang sa interbiyo sa rekomend sa templo.

Niini nga mga interbiyo sa rekomend sa templo, ang bishop ug sakop sa kapangulohan sa stake morebyo usab sa tambag nga gihatag diha sa interbiyo sa pag-release sa misyonaryo (tan-awa sa 24.8.2). Ilang hisgotan ang pag-uswag sa mipauli nga misyonaryo, kahimtang, ug kasamtangan nga calling sa Simbahan. Sila usab moawhag kaniya sa pagpadayon diha sa tibuok kinabuhi nga dalan sa espirituwal nga paglambo ug pagserbisyo.

Kon ang mipauli nga misyonaryo walay calling sa Simbahan, ang bishop ug presidente sa stake moseguro nga adunay ikahatag nga calling. Ang namauli nga mga misyonaryo mahimong irekomendar nga moserbisyo isip mga worker sa ordinansa sa templo o mga volunteer kon adunay templo sa duol (tan-awa sa 25.5).

26.5.4

Mga Miyembro Nga Wala Magpuyo sa Samang Ward sulod sa Dili Mominos Usa ka Tuig

Kon ang usa ka miyembro wala magpadayon og puyo sa samang ward sulod sa dili mominos usa ka tuig, ang bishop morebyo sa rekord sa miyembro aron sa pagsuta nga wala kini maglakip og notasyon mahitungod sa mga restriksiyon sa pagkamiyembro sa Simbahan.

Ang bishop o usa ka gisangonan nga magtatambag mokontak sa kanhi bishop sa dili pa mopahigayon og interbiyo sa rekomend sa templo. Kon ang usa ka magtatambag masayod nga adunay kompidensiyal nga impormasyon, iyang taposon ang panag-istoryahanay. Siya mopahibalo sa iyang bishop sa pagkontak sa kanhi bishop sa dili pa ang interbiyo.

26.5.5

Human sa Diborsiyo, Panagbulag, o Pagpawalay Bili sa Kaminyoon [Annulment]

Ang bishop ug presidente sa stake mahimong dasigon sa pag-interbiyo sa usa ka miyembro kinsa diborsyado o legal nga nakigbulag o kansang kaminyoon napawalay bili sukad sa kataposang pagdawat og rekomend sa templo. Atol niini nga interbiyo sila motabang sa paglig-on sa miyembro sa espirituwal nga paagi. Sila usab mosuta sa padayong katakos sa miyembro alang sa templo.

26.5.6

Mga Miyembro Kansang Suod nga mga Paryente Dayag nga Misupak sa Simbahan o Nahisakop sa mga Grupo nga Miapostasiya

Ang mga bishop ug ilang mga magtatambag kinahanglang sensitibo kon moisyu og mga rekomend ngadto sa mga miyembro kansang suod nga mga paryente dayag nga misupak sa Simbahan o nahisakop sa mga grupo nga miapostasiya. Ang mga miyembro niini nga mga sirkumstansiya kinahanglang dili mobati nga dili sila mahimo nga maghupot og rekomend sa templo tungod sa ilang mga kaabin nga pamilya. Sila kinahanglang awhagon nga magmentinar og mahigugmaon nga relasyon sa suod nga mga paryente. Mahimo silang isyuhan og rekomend sa templo kon ilang matubag ang mga pangutana sa rekomend sa templo sa haom ug kinasingkasing nga paagi.

26.5.7

Mga Indibidwal nga Mikonsiderar sa Ilang Kaugalingon isip Transgender

Ang mga ordinansa sa templo dawaton sumala sa biyolohikanhon nga sekso nga natawhan sa usa ka tawo. Ang takos nga mga miyembro nga wala mopadayon sa paghimo sa pagpaopera, medikal o sosyal nga kausaban sa iyang sekso nga natawhan mahimong makadawat og rekomend sa templo ug mga ordinansa sa templo. (Alang sa kahulogan sa sosyal nga kausaban, tan-awa sa 38.6.23.)

Ang mga miyembro nga nakahimo og mga lakang ngadto sa kausaban ug unya naghimo og kausaban balik ngadto sa ilang sekso nga natawhan ug takos ug mapasaligon nga mosunod sa mga sugo sa Dios mahimong makadawat og rekomend sa templo ug mga ordinansa sa templo.

Ang mga bishop makigtambag sa presidente sa stake aron sa pagtubag sa indibidwal nga mga sitwasyon uban sa kasensitibo ug Kristohanong gugma. Ang mga presidente sa stake ug sa misyon mangayo og tambag gikan sa Kapangulohan sa Area.

Alang sa dugang nga impormasyon, tan-awa sa 38.6.23

26.5.8

Mga Miyembro nga Nakabuhat og Seryoso nga Sala

Ang miyembro nga nakabuhat og seryoso nga sala dili makadawat og rekomend sa templo hangtud nga siya nakahinulsol (tan-awa sa 32.6). Ang gidugayon sa panahon tali sa sala ug sa pag-isyu og rekomend mag-agad sa diskresyon sa bishop ug presidente sa stake. Kinahanglan nga igo gayud ang pagtino nga ang tawo tinuod nga naghinulsol.

26.5.9

Mga Miyembro Kinsa Gidawat Pag-usab human sa Pagbakwi ug Pagluwat sa Pagkamiyembro diha sa Simbahan

26.5.9.1

Mga Miyembro nga Wala pa Matugahi

Human ang usa ka miyembro kinsa wala pa matugahi kaniadto gidawat pag-usab pinaagi sa bunyag ug kompirmasyon, ang bishop mahimong mointerbiyo kaniya aron makadawat og rekomend alang sa puli nga mga bunyag ug mga kompirmasyon nga adunay limitasyon ang paggamit (tan-awa sa 26.4.2). Kini nga interbiyo kasagaran mahitabo sulod sa usa ka semana gikan sa kompirmasyon sa miyembro. Mga miyembro nga lalaki kinahanglan gayod nga ma-orden ngadto sa usa ka katungdanan sa pagkapari sa dili pa makadawat og rekomend sa templo.

Kining mga miyembro dili maisyuhan og mga rekomend sa pagdawat sa ilang kaugalingong tuga hangtod sa usa ka tuig human sa petsa sa pagkadawat nila pag-usab ngadto sa Simbahan pinaagi sa bunyag ug kompirmasyon.

26.5.9.2

Mga Miyembro nga Natugahan na Kaniadto

Ang mga miyembro kinsa natugahan na kaniadto dili makadawat og bisan unsang matang sa rekomend hangtod nga ang ilang mga panalangin sa templo napahiuli na pinaagi sa ordinansa sa pagpahiuli sa mga panalangin (tan-awa sa 32.17.2). Kon ang ilang mga panalangin gipahiuli, sila mahimong isyuhan og rekomend sa templo alang sa natugahan nga mga miyembro.