“26. Pepa Faataga o le Malumalu,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2024).
“26. Pepa Faataga o le Malumalu,” Tusitaulima Aoao.
Ata
epikopo o loo faatalanoaina se alii
26.
Pepa Faataga o le Malumalu
26.0
Faatomuaga
O le ulufale atu i le maota o le Alii o se avanoa paia. E fautuaina e taitai o uarota ma siteki ia tagata uma o le Ekalesia ia agavaa ma ia i ai se pepa faataga o le malumalu o loo aoga, e tusa lava pe latou te le nonofo latalata i se malumalu.
E faia e taitai o le Ekalesia ia taumafaiga uma ia iloa ai o i latou uma e ulu atu i le maota o le Alii e agavaa e ulu atu (tagai i le Salamo 24:3–5). E faatautaia e taitai perisitua ua faatagaina ia faatalanoaga o pepa faataga o le malumalu ma tuuina atu pepa faataga o le malumalu i tagata e tali atu talafeagai ma le faamaoni i fesili o le faatalanoaga (tagai i le 26.3 Ua folafola mai e le Alii afai e mama i latou o e ulu atu i Lona maota, o le a i ai o Ia iina (tagai i le Mataupu Faavae ma Feagaiga 97:15–16).
E tatau ona i ai se pepa faataga o le malumalu o loo aoga o tagata o le au paia e ulu atu ai i se malumalu. O tamaiti e i lalo ifo o le 8 tausaga o e o le a faamauina i o latou matua pe maimoaina foi le faamauina o o latou tei i o latou matua e le moomia ni pepa faataga o le malumalu (tagai i le 26.4.4).
O le mataupu lenei o loo tuuina atu ai faatonuga mo taitai o e tuuina atu pepa faataga o le malumalu. E fefautuaai le epikopo ma lona peresitene o le siteki pe afai e i ai ni ana fesili e uiga i pepa faataga o le malumalu e le o taliina i le mataupu lenei. E mafai e le peresitene o le siteki ona faafesootai le Ofisa o le Au Peresitene Sili i ni fesili.
26.1
Ituaiga o Pepa Faataga o le Malumalu
O se pepa faataga aoga o le malumalu e faatagaina ai se tagata o le Ekalesia e ulu atu i malumalu uma lava. E faamautinoa e taitai perisitua ua maua e tagata uma o le ekalesia le pepa faataga sa’o mo o latou tulaga. E tolu ituaiga o pepa faataga:
Pepa faataga o le malumalu mo tagata e le’i maua faaeega paia. O nei pepa faataga e mo tagata o le ekalesia e lei maua faaeega paia o e o le a faamauina i o latou matua po o le a faatinoina papatisoga sui ma faamauga. E tuuina atu e ala i le Punaoa mo Taitai ma Failautusi (PTF). Mo nisi faamatalaga, tagai i le 26.4.
Pepa faataga o le malumalu mo sauniga o e o soifua. O nei pepa faataga e mo tagata e mauaina o latou lava faaeega paia pe faamauina i se toalua. E tuuina atu mai le tusi 2 o pepa faataga. O le pepa faataga mo sauniga mo e o soifua e faapipii i se pepa faataga masani o le malumalu mo tagata o le ekalesia ua maua faaeega paia (o loo faamatala atu i lalo). E taofi e le malumalu le pepa faataga mo sauniga mo e o soifua pe a ua faatinoina le sauniga. E taofi e le tagata le pepa faataga masani ma faaaoga pe a toe foi ane i le malumalu.
Pepa faataga o le malumalu mo tagata ua uma ona maua faaeega paia. O nei pepa faataga e mo tagata o le ekalesia sa maua muamua faaeega paia. E tuuina atu e ala i le PTF. E faatagaina ai se tagata o le Ekalesia e auai i sauniga uma o le malumalu mo e ua maliliu. E faaaogaina foi pe a faamauina se tagata ua maua faaeega paia i matua po o fanau o soifua pe ua maliliu foi. Mo nisi faamatalaga, tagai i le 26.3.
26.2
Malupuipuia o Pepa Faataga o le Malumalu
26.2.1
Malupuipuia Pepa Faataga o le Malumalu e Taitai Perisitua
O taitai perisitua ua faataga ona i ai ia tusi o pepa faataga o le malumalu e tatau ona matuai malupuipuia lelei [ia tusi]. E le tatau ona i ai se isi tagata e tago i ai. Pe a oo ina faafouina e le Ekalesia ia tusi o pepa faataga o le malumalu, e susunuina e taitai ia tusi ua tuai.
E faamautinoa foi e taitai perisitua e le maua e tagata e lei faatagaina ia faamatalaga o pepa faataga o le malumalu i luga o le PTF.
26.2.2
Pepa Faataga Leiloloa pe Gaoia
E talosagaina e le epikopo tagata o le ekalesia e vave logo atu o ia pe afai e leiloa pe gaoia se pepa faataga. Afai o loo agavaa pea le tagata, e alu atu le epikopo po o se fesoasoani ua tofia po o se failautusi i le PTF e toe lolomi le pepa faataga. O le a faamutaina le aoga o le pepa faataga fou i le aso lava e tasi e pei o le uluai pepa faataga.
O nisi taimi o se tagata o le ekalesia ua leiloa pe gaoia lana pepa faataga ua le toe ola i tulaga faatonuina o le agavaa. I nei tulaga, e faaleaogaina ai loa lava e le epikopo le pepa faataga (tagai i le 26.2.3).
26.2.3
O E Umia Pepa Faataga e Le o Ola i Tulaga Faatonuina o le Agavaa
Afai ua tonu i le epikopo ua le o soifua ma ola se tagata o le au paia o i ai se pepa faataga aoga i tulaga faatonuina o le agavaa (tagai i le 26.3), na te talosagaina le pepa faataga mai le tagata. Na te faaaogaina le PTF e faaleaogaina ai le pepa faataga. Afai e le o maua le polokalama lea, e faafesootai e le epikopo le ofisa o le malumalu e faaleaogaina le pepa faataga.
26.3
Taiala Aoao mo le Tuuina Atu o Pepa Faataga o le Malumalu
O taitai perisitua ua faatagaina e faatautaia ia faatalanoaga o le agavaa a o lei mafai ona maua e se tagata se pepa faataga o le malumalu. O loo maua faatonuga i le PTF. E na o le pau le taimi e tuu atu ai e taitai perisitua se pepa faataga pe afai e tali atu ma le talafeagai e le tagata ia fesili o le pepa faataga o le malumalu.
O faatalanoaga o pepa faataga o le malumalu e mafai ai e tagata o le Ekalesia ona ta’u atu e i ai sa latou molimau ma o loo taumafai malosi e usitai i poloaiga a le Atua ma mulimuli i Ana perofeta. E faamautu foi e taitai perisitua, e ala i le faatalanoaga ua agavaa se tagata. Tagai i le 26.3.3 mo nisi faamatalaga e uiga i le faatautaia o faatalanoaga o pepa faataga o le malumalu.
I siteki, o se tasi o le au peresitene o le siteki po o se failautusi a le siteki e faaolaina le pepa faataga o le malumalu i le PTF pe a uma ona tauaaoina atu. I itu, o se tasi o le au peresitene o le misiona po o se failautusi o le misiona e faaolaina le pepa faataga o le malumalu. E faaola pepa faataga mo papatisoga sui ma faamauga mo e ua maliliu pe a lolomi e se tasi o le au epikopo po o le peresitene o le paranesi. Na te faaaogaina le PTF e lolomi ai pepa faataga.
26.3.1
O Faatalanoaga o Pepa Faataga o le Malumalu mo Tagata o le Au Paia i Uarota ma Paranesi
I se uarota, o le epikopo po o se fesoasoani ua tofia na te faatautaia ia faatalanoaga mo pepa faataga o le malumalu ma tuuina atu ia pepa faataga ia i latou e agavaa. I se paranesi, e na o le peresitene o le paranesi e faatautaia ia faatalanoaga o pepa faataga o le malumalu ma tuuina atu ia pepa faataga.
I se uarota, o le epikopo lava ia e faatalanoaina tagata o e:
O loo mauaina o latou lava faaeega paia (tagai i le 27.1 ma le 27.2).
I tulaga faavavevave pe afai e le o avanoa le epikopo, e mafai ona ia faatagaina se tasi o ona fesoasoani e faatautaia nei faatalanoaga.
I uarota tetele o talavou nofofua matutua, e mafai e epikopo ona faataga ni fesoasoani ua i ai le poto masani e faatautaia nei faatalanoaga.
A o lei tuuina atu se pepa faataga i tulaga o loo lisi atu i luga, e iloilo e le epikopo le pepa faamaumau o le tagata ia faamaonia ai e le o i ai se faamatalaga faaopoopo e uiga i ni tapuia’iga o le avea ai ma tagata o le Ekalesia. Mo tagata e mauaina o latou lava faaeega paia pe faamauina i se toalua, na te faamautinoaina foi:
O loo tusifaamaumauina le papatisoga ma le faamauga o le tagata i pepa faamaumau.
Ua uma ona maua e uso le Perisitua Mekisateko.
O nisi taimi, e le o tusifaamaumauina ia aso o le papatisoga ma le faamauga o se tagata po o le faauuga i le Perisitua Mekisateko. I nei tulaga, e tatau ona faamaonia ia sauniga ma tusifaamaumau, faamaonia, pe toe faatino (tagai i le 38.2.6).
A maea le faatalanoaga e se tasi o le au epikopo po o le peresitene o le paranesi, ona faatalanoa lea e se uso o le au peresitene o le siteki ia tagata e nonofo i totonu o se siteki. Na te sainia ia pepa faataga o i latou e agavaa. O se uso o le au peresitene o le misiona e faatautaia le faatalanoaga lona lua mo tagata e nonofo i totonu o se itu. Na te sainia foi ia pepa faataga o i latou o e agavaa. E le faatautaia e le peresitene o le itu ni faatalanoaga o pepa faataga o le malumalu sei vagana ua faatagaina ai e le Au Peresitene Sili.
O le peresitene o le steki po o le misiona na te faatalanoaina ia tagata o e:
Mauaina o latou lava faaeega paia.
Faamauina i se toalua.
Afai e le o avanoa le peresitene o le siteki, e mafai ona ia faatagaina se tasi o ona fesoasoani e faatautaia nei faatalanoaga.
E mafai e se peresitene o le misiona ona faatagaina se tasi o ona fesoasoani e faatautaia nei faatalanoaga pe a manaomia ai.
I se siteki a talavou matutua nofofua, e mafai e le peresitene o le siteki ona faataga ona fesoasoani e faatautaia nei faatalanoaga.
O Faatalanoaga o Pepa Faataga o le Malumalu mo Tagata i Eria Mamao Ese
O nisi tagata o le ekalesia e nonofo i eria e moomia ai femalagaaiga taugata pe faigata tele ona feiloai i se tasi o le au peresitene o le siteki po o le misiona. I nei tulaga, e mafai e se tasi o le au peresitene o le siteki po o le misiona ona feiloai i auala faanei ona po ma le tagata e faatautaia se faatalanoaga o pepa faataga o le malumalu (tagai i le 31.4). E saini faaeletonika e le taitai le pepa faataga pe afai e agavaa le tagata. Ona lolomi lea e se tasi o le au epikopo po o le peresitene o le paranesi le pepa faataga ma tuu atu i le tagata.
E faatatau foi lenei aiaiga faavae i tagata o le ekalesia e i le militeli o e o i eria mamao ese.
Ata
talavou i fafo o le malumalu
26.3.3
Faatautaia o se Faatalanoaga mo Pepa Faataga o le Malumalu
O le malumalu o le maota o le Alii. O le ulufale atu i le malumalu ma auai i le faatinoina o sauniga iina o se avanoa paia. O lenei avanoa ua faapolopoloina mo i latou ua saunia faaleagaga ma tauivi e ola i tulaga faatonuina a le Alii, e pei ona filimaotiina ai e taitai perisitua ua faatagaina.
Ina ia faia lenei filimaotiga, e faatalanoa e taitai perisitua le tagata e faaaoga ai fesili o loo i lalo. E le tatau i taitai ona faaopoopo pe aveese soo se tulaga manaomia. Peitai, e mafai ona latou fetuunaia ia fesili i tausaga ma tulaga o le tagata o le au paia.
O nisi taimi e i ai fesili a tagata i le taimi o se faatalanoaga mo se pepa faataga o le malumalu. E mafai e le taitai perisitua ona faamalamalama atu ia mataupu faavae muamua o le talalelei. E mafai foi ona ia fesoasoani i tagata ia malamalama i fesili o le pepa faataga o le malumalu pe a manaomia ai. Peitai, e le tatau ona ia tuuina atu ona lava talitonuga faaletagata, mea e fiafia iai, po o ana lava faaliliuga po o faauigaga e fai ma aoaoga faavae po o aiaiga faavae a le Ekalesia.
E le tatau ona faanatinatia ia faatalanoaga o pepa faataga o le malumalu. E tatau ona faatuma’oti. Peitai, e mafai e le tagata o loo faatalanoaina ona valaaulia se toalua, se matua po o se isi tagata matua ia i ai.
26.3.3.1
Fesili o le Faatalanoaga o Pepa Faataga o le Malumalu
E i ai sou faatuatua ma sau molimau i le Atua, le Tama Faavavau; o Lona Alo, o Iesu Keriso; ma le Agaga Paia?
E i ai sau molimau i le Togiola a Iesu Keriso ma Lana matafaioi i le avea ai ma ou Faaola ma Togiola?
E i ai sau molimau i le Toefuataiga o le talalelei a Iesu Keriso?
E te lagolagoina le Peresitene o Le Ekalesia a Iesu Keriso o le Au Paia o Aso e Gata Ai o le perofeta, tagatavaai, ma tali faaaliga ma ua na o ia lava le tagata i le lalolagi ua faatagaina e faaaogaina ki uma o le perisitua?
E te lagolagoina uso o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga?
E te lagolagoina isi Au Pulega Aoao ma taitai o le Ekalesia i le lotoifale?
O e tauivi mo le mamā atoa i ou mafaufauga ma amioga?
O e usiusitai i le tulafono o le ola mamā?
O e mulimuli i aoaoga a le Ekalesia a Iesu Keriso i au amioga faalilolilo ma amioga i nofoaga faitele i tagata o lou aiga ma isi?
O e lagolagoina pe faalauiloa atu soo se aoaoga, o faiga masani, po o aoaoga faavae e feteenai ma aoaoga a Le Ekalesia a Iesu Keriso o le Au Paia o Aso e Gata Ai?
O e tauivi ia tausia le paia o le aso Sapati, i le aiga ma i le lotu; auai i au sauniga; saunia ma taumafa ma le agavaa i le faamanatuga; ma soifua i lou olaga ia ogatusa ma tulafono ma poloaiga o le talalelei?
O e tauivi ina ia faamaoni i mea uma e te faia?
O oe o se tagata e totogi atoa le sefuluai?
Mo tagata fou o le ekalesia o loo sailia se pepa faataga e faatino ai sui papatisoga ma faamauga: O e naunau e usitai i le poloaiga e totogi le sefuluai?
O e malamalama ma usiusitai i le Upu o le Poto?
(O lenei fesili e lē faaaogaina pe a faatalanoaina se tamaitiiti po o se talavou.) O i ai ni au matafaioi tautupe po o nisi matafaioi i se toalua muamua po o le fanau?
Afai o le ioe, o e tausia i le taimi nei na matafaioi?
(O lenei fesili e lē faaaogaina pe a faatalanoaina se tagata e le’i maua faae’ega paia.) Pe e te tausia feagaiga na e osia i le malumalu?
(O lenei fesili e lē faaaogaina pe a faatalanoaina se tagata e le’i maua faaeega.) Pe e te faamamaluina lou avanoa paia e ofu ai le ofusa e pei ona faatonuina ai i sauniga amata? (Faitau le faamatalaga “Ofuina o le Ofusa o le Malumalu” o loo aofia atu i lalo, i tagata taitasi.)
O i ai ni agasala ogaoga i lou olaga o manaomia ona foiaina ma taitai perisitua o se vaega o lou salamo?
Pe e te manatu ua e agavaa e te ulu atu i le maota o le Alii ma auai i sauniga o le malumalu?
26.3.3.2
Ofuina o le Ofusa o le Malumalu
Ua tuuina mai e le Au Peresitene Sili le taitaiga lenei i le ofuina o le ofusa:
“O le ofusa o le perisitua paia e faamanatu mai ai ia i tatou le veli i le malumalu, ma o lena veli o se faatusa o Iesu Keriso. Pe a e ofuina lou ofusa, ua e ofuina se faatusa paia o Iesu Keriso. O le ofuina o se faailoaga lea i fafo o lau tautinoga i totonu e mulimuli ia te Ia. O le ofusa foi o se faamanatu o a outou feagaiga i le malumalu. E tatau ona e ofuina le ofusa i le ao ma le po i lou olaga atoa. A tatau ona aveese mo gaoioiga e le mafai ona faia a o ofuina le ofusa, saili e toefaamaulu i se taimi vave lava. A o e tausia au feagaiga, e aofia ai le avanoa paia e ofuina ai le ofusa e pei ona faatonuina ai i sauniga amata, o le a e maua atili ai le alofa mutimutivale, puipuiga, malosi, ma le mana o le Faaola.”
Afai e i ai ni fesili a tagata o le au paia e uiga i le ofuina o le ofusa, faasino i latou i le 38.5.
26.3.3.3
Faatonuga Faaopoopo
E faamamafa atu e le taitai perisitua i le tagata o le au paia le manaomia ona malupuipuia o lana pepa faataga. E le tatau lava ona tuu atu i se tasi ma e tatau ona lipoti vave atu i lē na tauaaoina atu pe afai e leiloa pe gaoia.
26.4
Tuuina Atu o Pepa Faataga o le Malumalu i Tagata o le Ekalesia e Lei Maua Faaeega Paia
26.4.1
Taiala Lautele
I se uarota, e faatalanoa e le epikopo po o se fesoasoani ua tofia ia tagata o le au paia e lei maua faaeega paia mo pepa faataga o le malumalu. I se paranesi, e na o le peresitene o le paranesi e faatautaia ia faatalanoaga o pepa faataga o le malumalu. E mulimuli le taitai i taiala o loo i le 26.3. Na te tuuina atu se pepa faataga pe afai e agavaa le tagata.
O pepa faataga o le malumalu e tuuina atu i tagata o le ekalesia e lei maua faaeega paia pei ona ta’ua i lalo:
Mo tagata o le ekalesia ua 11 tausaga ma matutua atu ina ia papatiso ma faamauina mo e ua maliliu. (E agavaa tamaitai talavou ma alii talavou ua faauuina mo se pepa faataga o le malumalu e amata atu ia Ianuari o le tausaga e atoa i ai lo latou ta’i 12.)
Mo tagata o le ekalesia e 8 tausaga e oo i le 20 ina ia faamauina i o latou matua. O tamaiti e i lalo o le 8 tausaga le matutua e lē manaomia ni pepa faataga ina ia faamauina ai i o latou matua (tagai i le 26.4.4).
Mo tagata o le ekalesia e 8 tausaga e oo i le 20 ina ia molimauina le faamauina o o latou tei o loo ola, tei e lē tina pe tama faatasi, po o tei e tina pe tama faatasi i o latou matua.
O tagata o le ekalesia ua uma ona maua faaeega paia e lē tuuina atu i ai soo se pepa faataga o loo faamalamalama atu i le vaega lenei.
O se alii o le Ekalesia ua lava le matua e umia ai le perisitua e tatau ona faauuina i se tofi o le perisitua a o le’i tuuina atu i ai se pepa faataga o le malumalu.
Afai e tuuina atu se pepa faataga o le malumalu, e faatalanoa e se uso o le au epikopo po o le peresitene o le paranesi le tagata na o ia. Peitai, e mafai e le tagata ona valaaulia se matua po o se isi tagata matua ia i ai.
26.4.2
Pepa Faataga o le Malumalu mo Tagata o le Ekalesia Faato’a Papatiso
E faatalanoa e le epikopo tagata fou o le ekalesia ua talafeagai lo latou matua ia maua se pepa faataga o le malumalu mo na’o papatisoga sui ma faamauga. Na te vave faatautaia lenei faatalanoaga pe a mavae le faamauga o le tagata, e masani lava i totonu o se vaiaso (tagai i le 26.4.1). Mo alii, o lenei faatalanoaga e mafai ona faia o se vaega o le faatalanoaga mo le mauaina o le Perisitua Arona. O alii o le Ekalesia e tatau ona faauuina i se tofi i le perisitua a o le’i mauaina se pepa faataga o le malumalu.
O tagata matutua agavaa o le ekalesia e mafai ona maua o latou lava faaeega paia i le atoa ai o le tausaga e tasi talu ona mae’a ona faamauina o se tagata o le Ekalesia (tagai i le 27.2.1.1).
26.4.3
Pepa Faataga o le Malumalu mo Na o Papatisoga Sui ma Faamauga
O pepa faataga o le malumalu e tuuina atu e faia ai papatisoga sui ma faamauga, e na’o le faamoemoega lava lena e mafai ona faaaogaina ai. O nei pepa faataga e lolomi e faaaoga ai le PTF. E na o le saini a le tagata o le ekalesia ma se tasi o le au epikopo po o le peresitene o le paranesi e moomia.
Mo faamatalaga e uiga i le faatulagaina o papatisoga ma faamauga mo e ua maliliu, tagai i le 28.2.1.
26.4.4
Pepa Faataga o le Malumalu mo le Faamauina o Fanau o Loo Ola i Matua
O tagata o le ekalesia e lei maua faaeega paia mai le 8 tausaga e oo i le 20 e tuuina atu i ai pepa faataga o le malumalu e auai ai i faamauga e pei ona ta’ua i lalo:
Ia faamauina i o latou matua.
E maimoa ai i le faamauga o o latou tei o loo ola, tei e le tina pe tamā faatasi, po o tei e tina pe tamā faatasi, i o latou matua
O i latou e tuuina atu i ai pepa faataga o le malumalu e auai ai i faamauga e faatalanoaina e se uso o le au epikopo po o le peresitene o le paranesi. E faatalanoaina foi i latou e se tasi o le au peresitene o le siteki po o le misiona.
E lolomiina e se tasi o le au epikopo po o le peresitene o le paranesi nei pepa faataga e faaaoga ai le PTF. E mafai ona tuuina atu ia pepa faataga o le malumalu mo faamauga mo tamaiti taitoatasi pe mo se vaega o tamaiti i totonu o le aiga e tasi. O le pepa faataga lava lea e tasi e mafai ona faaaoga e lisi ai tamaiti o e e faamauina ma tamaiti o e maimoaina le faamauga.
O tamaiti e i lalo o le 8 tausaga le matutua e lē manaomia ni pepa faataga ina ia faamauina ai i o latou matua. Latou te lē manaomia foi se pepa faataga e maimoa ai i le faamauga o o latou tei, o tei e lē tina pe tamā faatasi, po o tei e tina pe tamā faatasi i o latou matua.
O tagata o le ekalesia ua 21 tausaga pe matutua atu, na pau le taimi e mafai ai ona faamau i o latou matua pe maimoaina se faamauga pe afai ua latou (1) maua faaeega paia ma (2) i ai se pepa faataga aoga o le malumalu.
Tagai i le 27.4.4 ma le 38.4.2 mo aiaiga faavae faaopoopo i le maimoaina o faamauga ma le faamauina i matua.
Ata
talavou o loo u’uina pepa faataga o le malumalu i fafo o le malumalu
26.5
Tuuina Atu o Pepa Faataga o le Malumalu i Tulaga Fapitoa
26.5.1
Tagata o le Ekalesia e Mauaina o Latou Lava Faaeega Paia
O faatonuga mo le tuuina atu o se pepa faataga i se tagata e mauaina ona lava faaeega paia, o loo i totonu o le tusi 2 o pepa faataga o le malumalu. O tagata agavaa o le ekalesia o e naunau ia maua o latou lava faaeega paia, e mafai pe a latou ausia uma ia tulaga nei:
Ia le itiiti ifo ma le 18 tausaga le matutua.
Ua mae’a pe ua latou le o toe i ai i le a’oga maualuga, a’oga tulagalua, po o le maualuga talitutusa.
Ua atoa lelei le tausaga e tasi talu ona fai o latou faamauga.
Ua latou lagona se naunautaiga e maua ma faamamaluina feagaiga o le malumalu i le gasologa o o latou olaga.
E le gata i lea, e tatau i se alii ona umia le Perisitua Mekisateko a o lei maua ona faaeega paia. Mo faamatalaga e uiga i tagata o loo sauniuni mo le mauaina o o latou lava faaeega paia, tagai i le 25.2.8. Mo faamatalaga e uiga i le ua mafai ona maua le faaeega paia, tagai i le 27.2.1.
26.5.2
O Tagata Fou Faatoa Papatiso
O tagata matutua agavaa o le ekalesia e mafai ona maua o latou lava faaeega paia i le atoa ai o le tausaga e tasi talu ona mae’a ona faamauina o se tagata o le Ekalesia (tagai i le 27.2.1.1). E faamautinoa e taitai perisitua o le aso o le a maua ai e le tagata lona faaeega paia, o le a le itiiti ifo ma le tasi le tausaga atoa talu mai le aso o lona faamauga, ae le o le aso o le papatisoga. E na o le Au Peresitene Sili e mafai ona faatagaina ni tuusaunoaga.
O tagata fou o le ekalesia ua agavaa, e ao ona tuuina atu i ai se pepa faataga o le malumalu e mo na o papatisoga sui ma faamauga (tagai i le 26.4.2).
26.5.3
O Faifeautalai Talavou Ua Toe Foi Mai Mea Sa Galulue ai i Fafo Atu
A o le’i mae’a le auaunaga a se faifeautalai talavou e galue i fafo atu o le aiga, e faatautaia e le peresitene o le misiona se faatalanoaga mo se pepa faataga o le malumalu. Afai e agavaa le faifeautalai, na te tuuina atu ia te ia se pepa faataga o le malumalu. E tuu e le peresitene o le misiona le aso ma tatala le faaaogaina o le pepa faataga ina ia uma le aoga i le tolu masina mai le aso e toe foi ai le faifeautalai i le aiga.
E faatalanoa e le epikopo ia faifeautalai ua toe foi mai, e tuuina atu ai se pepa faataga fou o le malumalu pe a tulata i le faaiuga o le vaitau e tolu masina lea e uma ai le aoga. I tulaga faavavevave pe afai e le o avanoa le epikopo, e mafai ona ia faatagaina se tasi o ona fesoasoani e faatautaia nei faatalanoaga.
I uarota tetele o talavou nofofua matutua, e mafai e epikopo ona faataga ni fesoasoani ua i ai le poto masani e faatautaia nei faatalanoaga.
Ona feiloai lea o faifeautalai ua toe foi mai ma se tasi o le au peresitene o a latou siteki mo se faatalanoaga o se pepa faataga o le malumalu.
I nei faatalanoaga mo pepa faataga o le malumalu, e iloiloina ai foi e le epikopo ma le sui o le au peresitene o le siteki ia fautuaga na tuuina atu i le faatalanoaga o le faifeautalai ina ua faamalolo (tagai i le 24.8.2). Latou te talanoaina le alualu i luma o le faifeautalai ua foi mai, o lona soifua manuia, ma le valaauga i le taimi nei i le Ekalesia. Latou te faamalosiauina foi o ia ia faaauau pea i luga o se ala i le soifuaga atoa o le tuputupu ae faaleagaga ma le auauna atu.
Afai e leai se valaauga o le faifeautalai ua foi mai i le Ekalesia, e faamautinoa e le epikopo ma le peresitene o le siteki ua tuuina atu i ai se tofiga. E mafai ona fautuaina atu faifeautalai ua foi mai e galulue o ni tagata fai sauniga o le malumalu pe volenitia pe afai e lata ane se malumalu (tagai i le 25.5).
26.5.4
O Tagata o le Ekalesia E Lei Nonofo i le Uarota e Tasi mo le Le Itiiti Ifo ma le Tausaga e Tasi
Afai e le’i nofo pea lava se tagata o le Ekalesia i le uarota e tasi mo le le itiiti ifo i se tausaga, e iloiloina e le epikopo le pepa faamaumau o le tagata e faamaonia ai e le o i ai ni faamatalaga faaopoopo e uiga i ni tapuia’iga o le avea ai ma tagata o le Ekalesia.
E faafesootai e le epikopo po o se fesoasoani ua tofia le epikopo talu ai, a o lei faatautaia se faatalanoaga mo se pepa faataga o le malumalu. Afai e iloa e se fesoasoani se faamatalaga e le faalauaiteleina, na te faamutaina loa le talanoaga. Na te faailoa atu i lona epikopo e faafesootai le epikopo talu ai a o lei faia se faatalanoaga.
26.5.5
Pe a Maea ona Tatala le Faaipoipoga, Tete’a, po o le Faaleaogaina Aloaia
E ono uunaia le epikopo ma le peresitene o le siteki e faatalanoa se tagata sa tatala se faaipoipoga pe ua tete’a faaletulafono, pe faaleaogaina aloaia se faaipoipoga talu mai le mauaina o se pepa faataga talu ai o le malumalu. I le taimi o lea faatalanoaga, la te fesoasoani e faamalosi faaleagaga le tagata. La te faamaoniaina foi le agavaa faifai pea o le tagata mo le malumalu.
26.5.6
O Tagata o le Ekalesia e Tetee Faalauaitele o Latou Tauaiga i le Ekalesia pe Auai Foi i Vaega Liliuese
E ao i epikopo ma o latou fesoasoani ona matua nofouta pe a tuuina atu pepa faataga i tagata o le ekalesia e tetee faalauaitele o latou tauaiga i le Ekalesia pe auai foi i ni vaega liliuese. O tagata o le Ekalesia e i ai i nei tulaga, e le tatau ona faia ia latou lagona faapea e le mafai ona maua se pepa faataga o le malumalu ona o fegalegaleaiga a o latou aiga. E ao ona fautuaina i latou ia tumau i se sootaga alofa ma o latou tauaiga vavalalata. E mafai ona tuuina atu ia i latou se pepa faataga o le malumalu pe afai latou te tali atu ma le talafeagai ma le faamaoni i fesili o pepa faataga o le malumalu.
26.5.7
O Tagata Ua Faailoa Mai o Ē Ua Faafoliga i le Itupa Faafeagai
E maua ia sauniga o le malumalu e tusa ai ma le itupa na fanau mai ai se tagata. O tagata agavaa o le ekalesia e le o tulitulimatagauina se taotoga, suiga faafomai, po o se fesuiaiga faaagafesootai ia ese ai mai i le itupa na fananau mai ai, e mafai ona maua se pepa faataga o le malumalu ma sauniga o le malumalu. (Mo se faauigaga o le suiga faaagafesootai, tagai i le 38.6.23.)
O tagata o le ekalesia na faia laasaga mo suiga o itupa ona toe sui ai foi lea i o latou itupa moni na fananau mai ai, ma ua agavaa ma tuuto atu i le tausiga o poloaiga a le Atua e mafai ona maua se pepa faataga o le malumalu.
E fefautuaai epikopo ma le peresitene o le siteki e talanoaina ai ma le matua faaeteete ma le alofa faaKeriso ia tulaga taitasi. E sailia e peresitene o siteki ma misiona ia fautuaga mai le Au Peresitene o le Eria.
O Tagata o le Ekalesia o Ē na Faia Se Agasala Matuia
O se tagata o le Ekalesia na faia se agasala matuia e le mafai ona mauaina se pepa faataga o le malumalu sei iloga ua salamo o ia (tagai i le 32.6). O le vaitau i le va o le agasala ma le tuuina atu o se pepa faataga o le malumalu e tuu atu i le faautautaga a le epikopo ma le peresitene o le siteki. E tatau ona lava le taimi ina ia iloiloina ai le salamo faamaoni o le tagata.
26.5.9
O Tagata o le Ekalesia o Ē na Toe Faaulufale Mai ina ua mavae le Soloia po o le Faamavaega mai le Avea ma Tagata o le Ekalesia
26.5.9.1
O Tagata o le Ekalesia e Le’i Mauaina Muamua Faaeega Paia
A maea ona toefaaulufale mai se tagata o le Ekalesia e le’i maua muamua faaeega paia, e ala i le papatisoga ma le faamauga, e mafai e le epikopo ona faatalanoa o ia ia maua se pepa faataga mo papatisoga sui ma faamauga (tagai i le 26.4.2). E masani lava o lenei faatalanoaga e faia i totonu o le vaiaso e tasi o le faamauga o le tagata. O alii o le ekalesia e tatau ona faauuina i se tofi i le perisitua a o le’i mauaina se pepa faataga o le malumalu.
O nei tagata o le ekalesia e le mafai ona tuuina atu i ai ni pepa faataga e maua ai o latou lava faaeega paia sei iloga e atoa le tausaga e tasi talu ona mae’a le toe faaulufaleina mai i le Ekalesia e ala i le papatisoga ma le faamauga.
26.5.9.2
O Tagata o le Ekalesia Na Maua Muamua Faaeega Paia
O tagata o le Ekalesia na maua muamua ia faaeega paia, e le mafai ona maua soo se ituaiga o pepa faataga o le malumalu seia vagana ua toefuatai o latou faamanuiaga o le malumalu e ala i le sauniga o le toefuataiga o faamanuiaga (tagai i le 32.17.2). Pe a oo ina toefuatai o latou faamanuiaga, e mafai ona tuuina atu i ai se pepa faataga o le malumalu mo tagata o le ekalesia ua maua faaeega paia.