27.

Kain̄i ko an Tampeļ n̄an Ro Remour

27.0

Kadkad in

Jān tōre ko etto, n̄e juon armej etiljek em̧ōj an pād ioon laļ in, Anij em̧ōj an kōjeraam̧m̧an er kōn bujen ko an tampeļ im kain̄i ko. Jet iien Ekar kōtļo̧k bwe kain̄i ko rekwojarjar An rej kōm̧m̧an itunam̧ōj in tampeļ ko ke ekar ejjeļo̧k tampel kar aje (lale Jenesis 8:12–22; Exodus 24; Exodus 25:8–9; Ether 3). Ak aolep iien Irooj ekar ejaake Kabun̄ eo An, E ekar kakien armej ro An n̄an kalōk juon em̧ “ilo [Etan].” Ijeņ Ekar kwaļo̧k kain̄i ko An im aibojooj eo an aelōn̄ in kiin̄ eo An im katakin kōn iaļ eo n̄an lo̧mo̧o̧r. (Lale 2 Kronikel 3–5; 2 Nipai 5:16; Katak im Bujen Ko 97:10–16; 124:29–39.)

Tampeļ eo ej m̧weo im̧ōn Irooj. Ej kajitļo̧k kōj n̄an ad Rilo̧mo̧o̧r, Jisōs Kraist. Ilo tampeļ ko, jej bōk koņaad ilo kain̄i ko rekwojarjar im kōm̧m̧ani bujen ko ippān Jemedwōj Ilan̄ me ej liāpe kōj n̄an Ippān im n̄an ad Rilo̧mo̧o̧r. Bujen im kain̄i kein rej kōpooj kōj n̄an jepļaakļo̧k n̄an ippān Jemedwōj Ilan̄ im n̄an liāp āinwōt baam̧le ko n̄an indeeo.

Ilo tampeļ, kōjeraam̧m̧an ko reļļap rej barāinwōt pojak n̄an ajri ro retiljek nejin Anij ilo mour in. Ilo bujen im kain̄i ko ilo tampeļ, “kajoor in āinwōt anij ej waļo̧k” (Katak im Bujen Ko 84:20). Tampeļ ej juon jikin ekwojarjar ijo membōr ro remaron̄ kabun̄ jar, im bōk tōl im kaenōm̧m̧an ie (lale Katak im Bujen Ko 109:13–16). N̄an ro rej pād ilo tampeļ remaron̄ bōk kajoor eo an Anij n̄an jipan̄ kōttōprak jerbal in An (lale Katak im Bujen Ko 109:22–23; bar lale 3.5 ilo bok in bōk meļeļe eļap).

Bujen ko im kain̄i ko ilo tampeļ rekwojarjar. Kōkaļļe ko me rej m̧ōttanļo̧k bujen ko ilo tampeļ rej aikuj jab kōnono kaki ilo nabōj in tampeļ. Barāinwōt jej jab aikuj kōnono kaki meļeļe ko rekwojarjar im jej kallim̧ur kaki ilo tampeļ eo n̄an jab kwaļo̧ki. Ijoke, jemaron̄ kōnono kōn un dikdik ko katak ko ikkijeen bujen ko ilo tampeļ im en̄jake ko an jetōb me jej en̄jaki ilo tampeļ.

Ritōl ro an ward im stake rej kōnono kōn meļeļe ko ilo jebta in ippān membōr ro me rej kōppopo n̄an bōk menin letok kwojarjar eo ak kain̄i in liāp ko.

27.1

Bōk Kain̄i ko ilo Tampeļ

27.1.1

M̧aanjabpopo n̄an Bōk Kain̄i ko ilo Tampeļ

Membōr ro ej aikuj kōpooj er make n̄an bōk kain̄i ko an tampeļ im n̄an kōm̧m̧an im kautiej bujen ko ilo tampeļ.

Jinen im jemān ajri ro ewōr juon aer eddo eaorōk n̄an jipan̄ ajri ro nejier kōppopo n̄an bōk kain̄i ko ilo tampeļ. Ritōl ro an stake im ward eo, rikarejar m̧aan im kōrā ro, im ro uwaan baam̧le nokon ko rej rie jinen im jemān ajri ro ilo eddo in.

Ritōl ro an stake im ward emakijkij aer rōjan̄ membōr ro n̄an kōppopo n̄an bōk kain̄i ko aer make ilo tampeļ. Ritōl ro rej barāinwōt kōmejajaik aorōk eo an kautiej bujen ko an tampeļ im pād wōt ilo erreo im wōr juon peba in mālim an tampeļ.

Bok in jipan̄ ko n̄an jipan̄ membōr ro kōpooj er n̄an bōk kain̄i ko an tampeļ me rej pojak ilo temples.ChurchofJesusChrist.org.

Membōr ro me rej kōppopo n̄an bōk menin letok kwojarjar eo aer make ak n̄an liāp n̄an eo pāleen rej rōjan̄ er n̄an bōk koņaer ilo juon kūlaaj in kōppopo n̄an tampeļ (lale 25.2.8).

Membōr ro rej ioon bisop eo aer im stake būreejtōn eo n̄an bōk juon mālim n̄an kain̄i ko an ro remour n̄e rej:

• Bōk menin letok kwojarjar eo aer make ak endowment.

• Liāp ippān eo pāleen

N̄an meļeļe ko kōn kōm̧m̧an mālim ko n̄an deļon̄e tampeļ ilo jekjek kein, lale 26.1 im 26.3.1

27.1.2

Jikejuuļi Kain̄i ko ilo Tampeļ

Membōr ro rej ļōmņak in bōk menin letok kwojarjar eoaer make ak n̄an liāp rej aikuj jikejuuļi kain̄i eo m̧okta ippān tampeļ eo rej ļōmņak in etal n̄an e. Lale temples.ChurchofJesusChrist.org n̄an meļeļe ko n̄an kepaake tampeļ ko.

27.1.3

Membōr ro im Ewōr Utam̧we ilo Ānbwin

Membōr ro rej mour erreo ro ewōr wūtam̧we ilo ānbwinnier remaron̄ bōk kain̄i ko ilo tampeļ (lale 38.2.5). Membōr rein kar kapilōk er n̄an pād ilo tampeļ ippān ro nukuer me em̧ōj aer bōk menin letok kwojarjar ak ro m̧ōttāer ro remaron̄ jipan̄ er. Ro me rej jipan̄ ej aikuj wōr juon aer mālim ekāāl n̄an deļon̄e tampeļ. N̄e membōr ro rejjab maron̄ wōr juon nukun ak m̧ōttan, remaron̄ kūrļo̧k tampeļ eo m̧okta n̄an lale ta eo remaron̄ kōm̧m̧ane. Lale temples.ChurchofJesusChrist.org n̄an meļeļe ko n̄an kepaake tampeļ ko.

Kidu in jipan̄ ko im mennin mour ko n̄an jipan̄ en̄jake ko rejjab kōtļo̧k aer deļo̧n̄ ilo tampeļ ko. Stake Būreejtōn ro remaron̄ kepaake Temple Department eo ilo [e-mail] eļan̄n̄e elōn̄ aer kajjitōk.

27.1.4

Rijipan̄ Ukook ak Ukōt Ainikien

N̄e membōr ro rej aikuj rijipan̄ ukook ak ukot ainikien, rej aikuj kepaak tampeļ eo m̧okta n̄an lale n̄e elōn̄ emaron̄ jipan̄. Lale temples.ChurchofJesusChrist.org n̄an meļeļe ko n̄an kepaake tampeļ ko.

27.1.5

Nuknuk ko n̄an Kōņaki n̄an juon Tampeļ

N̄e jej etal n̄an juon tampeļ, membōr ro rej aikuj kanōk kain nuknuk ko me rej kaņōki n̄an etal im jar ak kweilo̧k in kwojkwoj eo. Rej aikuj jab kaņōk nuknuk ko me rejjab karbōb ak rejjab noje karmen ko an tampeļ me rej kaņōki. Rej aikuj jab kaņōk nuknuk ko me relukkuun ļe jān jon̄an aer karbōb, āinwōt tuxedos. Kōmeļeļe in em̧m̧an tata n̄e jinen im jemān ajri ro rej katakin kaki, rikarejar m̧aan im kōrā ro, im ritōl ro an ward im stake āinwōt an membōr ro kōppopo n̄an kabun̄ jar ilo tampeļ.

Lale 27.3.2.6 n̄an meļeļe ko kōn nuknuk ko jej kaņōki n̄an juon liāp an tampeļ.

Lale 38.5 n̄an meļeļe ko kōn:

• Nuknuk ko jej kaņōki ilo iien bōk kain̄i ko an menin letok kwojarjar eo ak endowment im liāp.

• Bōki, kaņōki, im kōjparoki nuknuk in ceremony ko ilo tampeļ ak kaarmen ko.

27.1.6

Kōjparok Ajri

Rūtto ro rej aikuj jipan̄ lale ajri ro eļan̄n̄e rej pād ilo meļan ko an tampeļ. Rijerbal ro ilo tampeļ rej aikuj pojak im lale ajri ro ilo iien ko wōt me jekjek kein rej elaajrak rej bōk jikier:

• Eļan̄n̄e ro jinen im jemān ajri ro rej liāp

• Eļan̄n̄e rej pād lale liāp an ro jeier im jatier remour, step sister ak brother ro, ak half sister ak brother ro n̄an ro jineer im jemāer.

27.1.7

Kweilo̧k ippān Membōr ro Ālkin Aer Bōk Kain̄i ko an Tampeļ

Membōr ro ekkā an wōr aer kajjitōk ālkin aer bōk kain̄i ko ilo tampeļ. Ro uwaan baam̧le eo me em̧ōj aer bōk menin letok kwojarjar ak endowment, ritōl ro jet an ward eo, im rikarejar m̧aan im kōrā ro remaron̄ ioon membōr ro n̄an kōnono kōn en̄jake ko aer ilo tampeļ.

Ritōl ro rej bar rōjan̄ membōr ro n̄an kappukot uwaak ko n̄an kajjitōk ko aer kōn im̧we o an Jetōb Kwojarjar. Ilo tampeļ, Jetōb emaron̄ letok uwaak ko n̄an elōn̄ kajjitōk ko me emaron̄ wōr ippān membōr ro kōn en̄jake ko aer ilo tampeļ.

Bok in jipan̄ ko n̄an jipan̄ uwaaki kajjitōk ko rej pād ilo temples.ChurchofJesusChrist.org.

27.2

Menin Letok Kwojarjar Eo

Naan eo menin letok kwojarjar ej meļeļein “juon menin letok.” Menin letok kwojarjar eo ilo tampeļ ej lukkuun juon menin letok jān Anij ilo An kōjeraam̧m̧an ajri ro Nejin. Menin letok kwojarjar eo, jemaron̄ bōke wōt ilo tampeļ ko rekwojarjar. Jet iaan menin letok ko me membōr ro ej bōke ilo aer bōk menin letok kwojarjar eo ilo tampeļ ekoba:

• Jeļāļo̧kjeņ eo eļapļo̧k kōn jibadbad im katak ko an Irooj.

• Kajoor n̄an kōm̧m̧ane aolep men ko me Jemedwōj Ilan̄ ej kōņaan bwe ajri ro Nejin ren kōm̧m̧ane.

• Tōl eo ekwojarjar n̄e jerbal n̄an Irooj, baam̧le ko aer, im ro jet.

• Kōļapļo̧k kōjatdikdik, kaeņōm̧m̧an, im aeņōm̧m̧an.

Aolep kōjeraam̧m̧an ko kar kallim̧ur kaki kōn menin letok kwojarjar eo rej itok ilo kajoor jim̧or ilo mour in im n̄an mour indeeo. Kūrm̧ool in kōjeraam̧m̧an kein rej pedped wōt ioon ad tiljek ilo gospel eo an Jisōs Kraist.

Menin letok kwojarjar eo ej itok im jej bōke ilo ruo m̧ōttan ko. Ilo m̧ōttan eo kein kajuon, armej eo ej bōk kain̄i eo jinoin tata ņa etan initiatory. Initiatory eo ekitbuuj jilu kain̄i ko: karreeo, ekkapit, im kanuknuk (lale Exodus 29:4–9). Ekoba kōjeraam̧m̧an ko rejeņoļo̧k me rej iookļo̧k jolet eo ekwojarjar an juon armej im ta ko me emaron̄ kōm̧m̧ani ak erom̧.

Ilo iien ekapit eo, naaj kōmeļeļeik membōr eo n̄an kōņak tampeļ kaarmen eo. Kaarmen eo ej juon kakōļļe ekwojarjar kōn Jisōs Kraist. Ej barāinwōt juon kakeememej in bujen ko an tampeļ. N̄e membōr ro rej kōjparok bujen ko aer, ekoba jeraam̧m̧an eo ekwojarjar n̄an kōņak kaarmen eo āinwōt kar kōmeļeļeiki, renaaj bōk eļapļo̧k maron̄ n̄an en̄jake tūriam̧o, kōjparok, kajoor, im kajoor eo an Rilo̧mo̧o̧r eo. N̄an elōn̄ļo̧k meļeļe ko kōn kaarmen eo, lale 38.5,.

Ilo m̧ōttan eo kein karuo in menin letok kwojarjar eo, rej katakin kōn karōk in lo̧mo̧o̧r eo, ekoba Kōm̧anm̧an eo, Wōtļo̧keo an Adam im Iv, im Pinmuur eo an Jisōs Kraist. Membōr ro rej barāinwōt bōk kōmeļeļe ko kōn wāween n̄an jepļaaktok n̄an im̧aan mejān Irooj.

Ilo bōk menin letok kwojarjar eo, membōr ro rej karuwaineneik er n̄an kōm̧m̧ani bujen ko rekwojarjar āinwōt kein ilaļ:

1. Mour kōn kien pokae im kajjieon̄ jon̄an ad maron̄ n̄an kōjparok kien ko an Jemedwōj Ilan̄.

2. Pokake kien wūjlepļo̧k ak kaarmejet, eo me ej meļeļein wūjlepļo̧k n̄an rie jerbal eo an Irooj im ukweļo̧k kōn juon bōro erub im jetōb ettā.

3. Pokake kien eo an gospel eo an Jisōs Kraist, eo ej meļeļe in:

   • Kōjerbal tōmak ilo Jisōs Kraist.

   • Ukweļo̧k kajjojo raan.

   • Kōm̧m̧ani bujen ko ippān Anij kōn bōk kain̄i ko an lo̧mo̧o̧r im mour ijo eutiej tata.

   • Niknik n̄an jem̧ļo̧kin kōn kōjparok bujen ko.

   • Kajjieon̄ n̄an mour kōn kien ko reļļap ruo. Erkein rej kwōn “yokwe Irooj am̧ Anij kōn aolepen būruom̧, im kōn aolepen am̧ im kōn am̧ ļōmņak otemjej “kwōn yokwe ri turum̧ im āinwōt kwe” (Matu 22:37, 39).

4. Kōjparok kein erreo, eo ej meļeļe in bōjrak jān jemerā ko an m̧ōm̧ aan kanniōk itulikin m̧are eo kōmālim ikōtaan juon em̧m̧aan im juon kōrā, eo ej ekkar n̄an kien an Anij.

5. Kōjparok kien wūjlepļo̧k, eo ej meļeļe bwe membōr ro rej ajeļo̧k iien ko aer, taļōn ko, im aolep men otemjeļo̧k me Irooj ekar kōjeraam̧m̧an er n̄an kalōk Kabun̄ eo an Jisōs Kraist ioon laļ in.

Ilo kōro̧o̧ltok, Jemedwōj Ilan̄ ej kallim̧ur bwe ro rej pād wōt ilo tiljek n̄an bujen tampeļ ko aer renaaj bōk menin letok kwojarjar “kōn kajoor jān ijo eutiej”(Katak im Bujen Ko 38:32, 38; bar lale Luk 24:49; Katak im Bujen Ko 43:16).

27.2.1

Wōn ro Remaron̄ Bōk Menin Letok Kwojarjar Eo

Aolep membōr ro rerūtto an Kabun̄ in me rej bōk eddo rej ruwainene n̄an kōppopo n̄an im bōk bōk menin letok kwojarjar eo aer make. Aolep kain̄i ko me remenin aikuj bwe ren kōm̧m̧an m̧okta rej aikuj kōm̧m̧an im rekoot m̧okta jān an membōr ro maron̄ bōk menin letok kwojarjar eo (lale 26.3.1). Lale 27.2.2 n̄an meļeļe ko kōn kālet n̄aat n̄an bōk menin letok kwojarjar eo.

27.2.1.1

Membōr Kāāl ro im Rejkab Peptaij

Membōr ro rekāāl me rej mour erreo remaron̄ bōk menin letok kwojarjar eo diktata juon iiō jān iien eo kar kapene er (lale 26.5.2).

27.2.1.2

Membōr ro me Ro Pāleer Rejjan̄in Bōk Menin Letok Kwojarjar

Juon membōr eo ej mour erreo eo me eo pāleen ejjan̄in bōk menin letok kwojarjar emaron̄ bōk menin letok kwojarjar eo an make n̄e jekjek kein rej elaajrak rej iooni:

• Eo pāleen me ejjan̄in bōk menin letok kwojarjar eo ej leļo̧k n̄an e mālim.

• Membōr eo, bisop eo, im stake būreejtōn eo rej lōke bwe eddo eo ej itok ippān bujen ko ilo tampeļ reban juon menin katarpok m̧are eo aer.

Jekjek kein rekkar wōt n̄e eo pālele ej juon membōr in Kabun̄ in ak ejjab.

27.2.1.3

Membōr ro me Ewōr Utam̧we ko ilo Kōļmenļo̧kjen

Membōr ro im ewōr utam̧we ko ilo kōļmenļo̧kjeņ remaron̄ bōk menin letok kwojarjar eo aer make eļan̄n̄e:

• Em̧ōj aer bōk aolep kain̄i ko m̧okta ko remenin aikuj (lale 26.3.1).

• Ewōr aer maron̄ ilo kōļmenļo̧kjeņ n̄an meļeļe, kōm̧m̧an, im kōjparok bujen ko remenin aikuj.

Bisop eo ej kapilōk membōr im, n̄e emaron̄, ro jinen im jemān. Ej barāinwōt kappukot tōl an Jetōb. Bisop ro rej bōk kapilōk ippān stake būreejtōn eo. Stake būreejtōn eo emaron̄ kajju kajjitōkļo̧k kajjitōk ko n̄an Opij eo an Būreejtōnji eo an Kein Kajuon eļan̄n̄e ekkar. Lale 38.2.4.

27.2.2

Kāālet N̄aat eo n̄an Bōk Menin Letok Kwojarjar Eo

Kāālet eo n̄an bōk menin letok kwojarjar eo ej an juon make im ej kōm̧m̧an ilo lukkun an armej eo jar kake. Menin letok kwojarjar eo ej jon kōjeraam̧m̧an kōn kajoor im revelesōn n̄an aolep ro rej kōppopo n̄an bōke. Membōr ro remaron̄ kāālet n̄an bōk menin letok kwojarjar eo aer make n̄e rej pād ilo jekjek kein rej elaajrak:

• Er rej 18 iiō dettaer.

• Em̧ōj aer kar kadedeļo̧k ak rejjab pād ilo high school, college, ak GED.

• Juon iiō likio in jān iien eo kar kapene er.

• Rej en̄jake juon ikdeleel n̄an bōk im kautiej bujen ko ilo tampeļ rekwojarjar ilo aolep mour ko aer.

Membōr ro me em̧ōj kūr er n̄an juon mijen ak rej kōppopo n̄an liāp ilo tampeļ rej aikuj bōk menin letok kwojarjar. Bisop ej barāinwōt kapilōk ippān membōr ro jet rerūtto ro rej ikdelel n̄an bōk menin letok kwojarjar eo.

Mokta jān kōm̧m̧an juon mālim n̄an deļo̧n̄e tampeļ an juon membōr n̄an bōk menin letok kwojarjar eo, bisop eo im stake būreejtōn rej aikuj en̄jake bwe armej eo ej kōppopo n̄an meļeļe im kōjparok bujen ko ilo tampeļ me rekwojarjar. Kōmaron̄ in ej ļōme kajjojo n̄an kajjojo armej. Ritōl ro rejjab kōjerbal karōk ko rekkar, āinwōt ko em̧ōj kōlaajraki ilaļ, n̄e kāālet n̄e juon armej ej kōppopo n̄an bōk menin letok kwojarjar eo:

• Tōpar jon̄an iiō eo ekkar

• Em̧m̧akūt jān kaļaj, jikin jerbal, ak jikin jerbal in tariņae

• Ikdeleel n̄an lale liāp ilo tampeļ an ro nukud ak ro m̧ōttad

27.2.3

Karōk im Jikejuuļi Iien Bōk Menin Letok Kwojarjar Eo

27.2.3.1

Bōk juon Mālim n̄an Kain̄i ko an ro Remour

Juon membōr ej aikuj bōk juon mālim n̄an kain̄i ko an ro remour n̄an deļon̄e juon tampeļ im bōk menin letok kwojarjar eo. N̄an meļeļe ko reļļapļo̧k kōn mālim kein, lale 26.5.1.

27.2.3.2

Kūrļo̧k ak kepaakeļo̧k Tampeļ eo

Membōr ro rej karōk n̄an bōk menin letok kwojarjar eo rej aikuj kepaakeļo̧k tampeļ eo m̧okta n̄an jikejuuļi kain̄i eo (lale 27.1.2). Tampeļ eo enaaj letok kōmeļeļe ko, ekoba meļeļe ko kōn nuknuk ko an tampeļ, n̄e iien eo em̧ōj karōke ej jikejuuļ.

27.2.3.3

Rikajineet ro n̄an Membōr ro rej Bōk Menin Letok Kwojarjar eo

Membōr ro rej bōk menin letok kwojarjar eo aer make remaron̄ karuwaineneik juon membōr em̧ōj an bōk menin letok kwojarjar eo ak en leddik n̄e leddik men en ej bōk menin letok kwojarjar eo ak n̄e ļaddik en bar ļaddik n̄an jerbal āinwōt juon rikajineet im jipan̄ er ilo m̧wen̄an in bōk menin letok kwojarjar. Rikajineet eo ej aikuj wōr juon an peba in mālim ekāāl n̄an deļon̄e tampeļ. Tampeļ emaron̄ letok juon rikajineet eļan̄n̄e emenin aikuj.

27.3

Liāp eo an Ļeo im Lio Pālele

“Baam̧le eo ej ekkapit jān Anij. Mare ikōtaan em̧m̧aan im kōrā eļap tokjān n̄an karōk eo An indeeo” (“Baam̧le Eo: Juon Naan in Kean̄ n̄an Laļ in”). Juon liāp an tampeļ ej kobaik ļeo im lio pālelel ippān doon n̄an iien im aolep indeeo. Ripālele ro ro rej liāp ilo tampeļ kar kallim̧uri er kōn aibojooj im lan̄lōn̄ ilo mour indeeo (lale Katak im Bujen Ko 132:19–20 Renaaj bōk kōjeraam̧m̧an kein eļan̄n̄e rej tiljek n̄an bujen ko raar kōm̧m̧ani ilo tampeļ eo. Kōn kain̄i in, ajri ro nejier remaron̄ barāinwōt m̧ōttan baam̧le eo aer indeeo.

Ritōl ro an Kabun̄ in rej rōjan̄ membōr ro n̄an kōppopo n̄an m̧are im liāp ilo juon tampeļ. Ijoko m̧are ko an tampeļ jab maron̄ kūli jān kien eo, ritōl ro remaron̄ kōm̧m̧an m̧are ko ilo kien m̧okta im ālkin wōt ej kōm̧m̧an liāp ko ilo tampeļ (lale 38.3). Jon̄ak in emaron̄ bar kōm̧m̧an n̄e ro jineer im jemeer ak lukkuun baam̧le ko aer repaak tata rej en̄jake aer jab ruwainene ak m̧ōttan ļo̧k m̧are ko ilo tampeļ.

27.3.1

Wōn Ro Remaron̄ Liāp ilo juon Tampeļ

Aolep membōr ro an Kabun̄ in me ribōk eddo ro rejjan̄in membōr rej ruwainene n̄an kōppopo n̄an juon liāp an tampeļ. Ro rekar m̧are ilo kien rej rōjan̄ er n̄an liāp n̄an iien im n̄an mour indeeo ilo tampeļ ilo iien eo rej pojak. Membōr ro rej aikuj bōk menin letok kwojarjar m̧okta jān aer maron̄n liāp (lale 27.2).

Ripālele ro rekar liāp ilo tampeļ eo rej aikuj in (1) kar m̧are ilo kien m̧okta jān aer liāp ak (2) kar m̧are im liāp ilo ejja iien kōm̧are eo ilo tampeļ eo. Lale 27.3.2.

27.3.1.1

Membōr ro Me Rekar Liāp n̄an Eo Pālāer Mokta

Lale 38.4.1.

27.3.1.2

Būratōr ro im Ewōr M̧ōjno in Kōļmenļo̧kijen ko ippāer

Membōr ro me ewōr utam̧we ko ilo kōļmenļo̧kjen ko remaron̄ liāp n̄an ro pālāer, ro jeraer eļan̄n̄e:

• Rej kōm̧m̧ani ak bōk aolep kain̄i ko remenin aikuj m̧okta, ekoba menin letok kwojarjar eo (lale 27.2.1.3).

• Ewōr aer maron̄ ilo kōļmenļo̧kjeņ n̄an meļeļe, kōm̧m̧an, im kōjparok bujen ko remenin aikuj.

Bisop eo ej kapilōk membōr eo im eo pāleen, ak eo jeran. Ej jerbal ium̧win karōk eo an bisoprik eo. Bisop ro rej bōk kapilōk ippān stake būreejtōn eo. Stake būreejtōn eo emaron̄ kajju kajjitōkļo̧k kajjitōk ko n̄an Opij eo an Būreejtōnji eo an Kein Kajuon eļan̄n̄e ekkar. Lale 38.2.4.

27.3.2

Karōk im Jikejuuļi juon Liāp ilo Tampeļ

27.3.2.1

Bōk juon Peba in Mālim N̄an Deļo̧n̄e Tampeļ eo n̄an Kain̄i ko an ro Remour

Juon membōr ej aikuj bōk juon mālim n̄an kain̄i ko an ro remour n̄an liāp ippān eo pālele. N̄an meļeļe kōn mālim kein, lale 26.3.

27.3.2.2

Kūrļo̧k ak kepaakeļo̧k Tampeļ eo

Membōr ro rej karōk n̄an liāp ippān eo pāleer rej aikuj kepaak tampeļ eo m̧okta n̄an jikejuuļi kain̄i eo (lale 27.1.2). Tampeļ eo enaaj bōktok kōmeļeļe ko n̄e iien eo em̧ōj karōk ej jikejuuļ.

27.3.2.3

Bōk juon License in Mare

Mokta jān m̧are, ripālele ro rej aikuj kōm̧m̧ane juon m̧are eo emālim ilo kien ijo mare eo enaaj kōm̧m̧an. Eļan̄n̄e ripālele ro rej karōk n̄an jim̧or m̧are im liāp ilo iien kōm̧m̧ane ejja kōjeraam̧m̧an eo, rej aikuj bōktok juon aer license in m̧are ekāāl n̄an tampeļ eo.

Ripālele ro rej liāp ālkin juon m̧are ilo kien rejjab aikuj boktok juon license in m̧are n̄an tampeļ eo. Ijjeļo̧kin, rej letok raan eo im n̄āāt eo rekar kōm̧m̧an m̧are eo aer ilo kien āinwōt m̧ōttan ļo̧k rekoot in kam̧ool ko.

27.3.2.4

Rikajineet ro an Lio Ej Mare im Ļeo ej Mare

Juon sister eo em̧ōj an bōk menin letok kwojarjar emaron̄ jipan̄ lio ej m̧are n̄an jipan̄ e ilo ruum in jikin jānij nuknuk. Juon brother eo em̧ōj an bōk menin letok kwojarjar emaron̄ kōm̧m̧an ejja menin wōt n̄an ļeo ej m̧are. Rikajineet eo ej aikuj wōr juon an peba in mālim ekāāl n̄an deļon̄e tampeļ. Tampeļ emaron̄ letok juon rikajineet eļan̄n̄e emenin aikuj.

27.3.2.5

Wōn eo ej Kōm̧m̧ane Liāp eo Ilo Tampeļ

Juon liāp ilo tampeļ ekkā an kōm̧m̧an jān juon eo ej liāp im em̧ōj jitōn̄e n̄an tampeļ eo ijo ripālele ro renaaj liāp ie. Eļan̄n̄e juon uwaan baam̧le eo ak m̧ōttamaer ej kabwijer mālim in liāp eo im kar kappeik n̄an tampeļ eo ijo ripālele ro renaaj m̧are ie ak liāp, rej maron̄ karuwaineneik tok n̄an kōm̧m̧ane liāp eo.

Juon riliāp emaron̄ kajjitōk mālim jān Būreejtōnji eo an Kein Kajuon n̄an kōm̧m̧an juon liāp n̄an ro bwijjin (ajri ro, ajri ro jibūn, im ajri ro jibūn jibūn) ilo juon tampeļ ijeļļo̧kin juon eo kar kappeiki n̄an kōm̧m̧ane. Ej aikuj bōk juon leta in mālim jān Būreejtōnji eo Kein kajuon n̄an kajjojo kain liāp ko. Ej kwaļo̧k leta eo ilo tampeļ.

Membōr ro rej kaipilōk n̄an aer jab kajitūkin Riutiej ro an Kabun̄ in n̄an kōm̧m̧ane liāp ko aer ilo tampeļ.

27.3.2.6

Nuknuk ko Rekkar n̄an juon Liāp ilo Tampeļ

Nuknuk an Lio ej Mare. Aolep nuknuk in m̧are ko an kōrā me naaj kōņaki ilowaan tampeļ eo ej aikuj in mouj, mejo̧kunkun ilo aer kōm̧m̧ane im ed eo, im ejjeļo̧k kainōknōk ko ie. Ej barāinwōt aikuj pinej kaarmen in tampeļ ko. Ed ko remeni ej aikuj wōr m̧ōttan ko kiji ium̧wier.

N̄an kajjejet n̄an nuknuk ko jet me rej kaņōki ilo tampeļ, nuknuk an lio ej m̧are ej aikuj aitok pein ak kaduļo̧k jidik pein. Nuknuk eo an kōrā eo ejjab aikuj in wōr mōttan ko rej ellaak ippān nuknuk ak wutikļo̧k ilo iien jar in m̧are eo ilo tampel.

Tampeļ eo emaron̄ leļo̧k juon nuknuk n̄e emenin aikuj ak n̄e rekōņaan.

Nuknuk an Ļeo ej Mare. Ļeo ej m̧are ej kaņōk nuknuk in tampeļ eo ilo iien liāp eo (lale 38.5.1 im 38.5.2). Emaron̄ kaņōk nuknuk ko rekkar im karbōb inabōj in tampeļ n̄an pija ālkin wōt iien kam̧are eo.

Nuknuk an Rutiej ro. Ro rej pād ilo juon iien liāp rej aikuj ekkaņōk nuknuk ko āierḷọk wōt ko remaron̄ in kaņōki n̄an juon iien kweilo̧k in kwojkwoj. Rej aikuj jab kaņōk nuknuk ko me rejjab karbōb ak rejjab noje karmen ko an tampeļ me rej kaņōki. Rej aikuj jab kaņōk nuknuk ko me relukkuun ļe jān jon̄an aer karbōb, āinwōt tuxedos.

Membōr ro im rej itok n̄an iien m̧are ko kaju jān juon m̧wen̄an in endowment maron̄ kōņak nuknuk in tampeļ ko rekar kōņaki m̧oktaļo̧k.

Ripālele ro rej aikuj kwaļo̧k meļeļe in n̄an ri lotok ro aer m̧okta jān liāp eo.

Ut ko. Ripālele ro im ri lotok ro aer rejjab aikuj kōņak ut ko ilo iien liāp eo. Ut ko remaron̄ kanōki inabōj in tampeļ eo n̄an pija ālkin wōt m̧are eo. Ripālele ro rej aikuj kwaļo̧k meļeļe in n̄an ri lotok ro aer m̧okta jān liāp eo.

27.3.2.7

Jānij Riin̄ ālikin juon Liāp ilo Tampeļ

Kōļaak riin̄ ejjab laajrak in m̧ōttan būrookraam̧ in m̧are eo ilo tampeļ. Ijoke, rim̧are ro remaron̄ jāniji riin̄ ko ālikin iien m̧are eo ilowaan ruum in liāp eo. Ripālele ro rejjab aikuj kōļaak riin̄ ilo jabdewōt iien ak jikin ilo juon tampeļ ak ilo melan ko an tampeļ. Kōm̧m̧ane menin emaron̄ kadikļo̧k aorōk iien eo eaorōk.

Ripālele ro em̧ōj aer m̧are im liāp ilo ejja iien in wōt remaron̄ jānij riin̄ ko tokālik n̄an karōke/kakwoņ ro uwaan baam̧le ko im rekar jab maron̄ pād ilo juon liāp an tampeļ. Ejenij riin̄ eo ej aikuj jejjet n̄an utiej eo an liāp eo an tampeļ eo. Ejenij riin̄ eo ejjab aikuj ukot jabdewōt m̧ōttan ko an iien liāp eo. Ripālele ro rej jab aikuj kwaļokkallim̧ur ko aer ālkin kar liāp eo ilo tampeļ .

Ripālele ro me rekar m̧are ilo kien m̧okta jān aer mare ilo tampeļ me rej liāp remaron̄ kōļaak riin̄ ilo iien m̧are eo aer ilo kien, ak juon iien m̧are kein.

27.3.3

M̧are ilo juon Tampeļ n̄an Mour in Wōt

Jibadbad eo an tampeļ ej n̄an kōm̧m̧ani kain̄i ko n̄an mour indeeo. Kōn un in, m̧are n̄an mour in wōt rejjab kiiō kōm̧m̧an ilowaan tampeļ ko.

N̄an kakien ko kōn liāp an ripālele ro rekar m̧are ilo tampeļ n̄an iien wōt, lale 38.4.1.7.

27.3.4

Wōn Ro Remaron̄ Pād ilo juon Liāp an Tampeļ

Ripālele ro rej aikuj karuwaineneik ro wōt nukuier repaaktata im m̧ōttaer n̄an juon liāp ilo tampeļ. Membōr ro rej bōk eddo 8 iiō im rūttoļo̧k rej aikuj juon mālim n̄an liāp n̄an ro jineer im jemāer.

Jet membōr ro ewōr aer rekoot rejjab peptaij kōn wōt nan̄inmej in kōļmenļo̧kjeņ, im jet rej peptaij bōtaab rejjab bōk menin letok kwojarjar eo kōn wōt ejja un in wōt. Stake būreejtōn eo emaron̄ kōmālim er n̄an lale liāp eo ilo tampeļ eo an ro jeier ak jatier eļan̄n̄e rej:

• 18 iiō dettaer.

• Rej maron̄ pād wōt ilo aer ikōn̄ ilo (ceremony) iien eo.

Stake būreejtōn eo ej je juon leta kwaļo̧k bwe armej eo emālim n̄an lale liāp eo. Leta in ej waļo̧k ilo tampeļ.

Membōr ro rej aikuj bōk menin letok kwojarjar im ewōr juon mālim n̄an deļon̄e tampeļ n̄an lale liāp an ro jineer im jemāer.

Kōn meļeļe ko reļļap ļo̧k kōn wōn ro remaron̄ pād ilo juon iien liāp an ajri ro remour n̄an jineer im jemāer, lale27.4.5.

27.3.5

Iien M̧ōn̄ā ak Mōņōņō ko Ālkin M̧are ko

Lale 38.3.4 n̄an meļeļe ko n̄an kōm̧m̧ani m̧ōn̄ā eo ālikin m̧are ko ilo im̧ōn jar ko an Kabun̄ in.

27.4

Liāpe Ajri ro Nejier Remour ippān Ro Jineer im Jemāer

Ajri ro raar ļotak ālikin an jiner liāp ippān juon em̧m̧aan ilo tampel rej barāinwōt ļotak ilo bujen ko an liāp eo. Rejjab aikūj in ekkapit in liāp ñan ippān jinen im jemen.

Ajri ro im raar jab ļotak ilo bujen eo remaron̄ m̧ōttan ļo̧k juon baam̧le indeeo ilo aer liāp n̄an m̧ool in jineer im jemāer ak ro rekar kōkaajririiki er. Ajri kein me rekkar n̄an ejja kōjeram̧m̧an kein āinwōt ro rekar ļotak ilo bujen eo.

Lale 38.4.2 n̄an kakien kōn liāpe ajri ro n̄an ro jineer im jemāer.

27.4.1

Leļo̧k juon Mālim n̄an Deļo̧n̄e Tampeļ n̄an Liāp Ajri ro Remour n̄an Ro Jineer im Jemāer

Membōr ro rejino bōk eddo ro me 8 iiō dettaer im rūttoļo̧k rej aikuj juon peba in mālim n̄an aer liāp n̄an ro jineer im jemeer. Rej bar aikuj juon mālim n̄an pād ilo iien liāp an ro jeier im jatier remour, step brother im sister ak nej jeier im jatier n̄an ro jineer im jemeer (lale 27.4.4). Ajri ro me 8 aer iiō im rūttoļo̧k rej aikuj peptaij im kapen im aikuj wōr juon aer peba in mālim n̄an deļon̄e tampeļ. Ļaddik ro me rej 11 im rej tōpar 12 ilo iiō in kain̄i eo rej aikuj barāinwōt kabwijer priesthood eo.

Membōr ro rej 21 aer iiō ak rūttoļo̧k rej aikuj bōk menin letok kwojarjar eo im bōk juon peba in mālim an tampeļ kāāl n̄an liāp n̄an ro jineer im jemeer.

Stake būreejtōn eo emaron̄ kōmālim armej ro rekar jab peptaij ak bōk menin letok kwojarjar kōn wōt wutam̧we ko ilo kōļmenļo̧kjeņ n̄an liāp n̄an ro jineer im jemeer. Stake būreejtōn eo ej je juon leta kwaļo̧k bwe armej eo emālim n̄an lale liāp eo. Leta in ej waļo̧k ilo tampeļ.

Lale 26.4.4 n̄an meļeļe ko kōn kōm̧m̧an mālim n̄an ajri ro.

27.4.2

Kūrļo̧k ak kepaakeļo̧k Tampeļ eo

Juon ripālele eo ekōņaan liāp ippān ajri ro nejier, ak ajri ro rej ikdeleel n̄an liāp n̄an ro jineer im jemeer me em̧ōj aer mej, rej aikuj kepaake tampeļ eo m̧okta n̄an jikejuuļi kain̄i eo (lale 27.1.2). Ilo jet jekjek ko, kain̄i ko jet ilo tampeļ remaron̄ aikuj kōm̧m̧an m̧okta jān an liāp eo bōk jikin.

27.4.3

Kōjparok ajri

Lale 27.1.6.

27.4.4

Wōn ej Kōm̧m̧ane Liāp eo an Ajri ro Remour n̄an ro Jineer im Jemeerer

Juon liāp an ajri ro remour n̄an jineer im jemāer ekkā an kōm̧m̧an jān juon ri liāp eo em̧ōj jitōn̄ n̄an tampeļ eo ijo renaaj liāp ie. Eļan̄n̄e juon uwaan baam̧le eo ak m̧ōttam̧ ej kabwijer mālim in liāp eo im kar kappeik n̄an tampeļ eo ijo liāp eo enaaj kōm̧m̧an ie, baam̧le eo emaron̄ karuwaineneik ļeo n̄an kōm̧m̧ane liāp eo.

Juon riliāp emaron̄ bareinwōt kajjitōk mālim an Būreejtōnji eo an Kein Kajuon n̄an kōm̧m̧an juon liāp an ajri ro remour n̄an jineer im jemāer im rej bwijjin (ajri ro nejin, ajri ro jibūn, im ajri ro jibūn jibūn) ilo juon tampeļ ijeļļo̧kin juon eo kar kappeiki n̄ane. Ej aikuj bōk juon leta in mālim jān Būreejtōnji eo Kein kajuon n̄an kajjojo kain liāp ko. Ej kwaļo̧k leta eo ilo tampeļ.

Ejako an membōr ro kajjitōk ippān Ritōl ro Routiej an Kabun̄ in n̄an kōm̧m̧ane liāp eo an ro nejier remour n̄an ro jineer im jemeer.

27.4.5

Ro Me Remaron̄ Pād ilo Juon Liāp an Ajri ro Remour Nejin Jineer im Jemāer

N̄an lale liāp an jemjān jemjati ro remour, ro nej jeier im jatier,ak jemjān jatin ro kōn jinier ak jemeer, ajri ro ium̧win 21 iiō dettaer rej aikuj in ļotak ilo bujen eo ak kar liāp n̄an ro jinier im jemāer. Ilo kakobaba, ajri ro 8 aer iiō im rūttoļo̧k rej aikuj peptaij im kapen im aikuj wōr juon aer peba in mālim an tampeļ kāāl (lale 26.4.4). Ļaddik ro me rej 11 im rej tōpar 12 ilo iiō in kain̄i eo rej aikuj barāinwōt kabwijer priesthood eo.

Membōr ro 21 aer iiō ak rūttoļo̧k rej aikuj kar bōk menin letok kwojarjar eo im wōr juon an peba in mālim an tampeļ kāāl n̄an lale kain kōjeraam̧m̧an kein.

Membōr ro em̧ōj aer m̧are ro reddikļo̧k jān 21 rejjab aikuj in bōk menin letok kwojarjar eo an tampeļ n̄an lale liāp eo. Ijoke wōt ke, rej aikuj wōt aer juon peba in mālim an tampeļ kāāl (lale 26.4.4).

Jet membōr ro ewōr aer rekoot rejjab peptaij kōn wōt nan̄inmej in kōļmenļo̧kjeņ, im jet rej peptaij bōtaab rejjab bōk menin letok kwojarjar eo kōn wōt ejja un in wōt. Stake būreejtōn eo emaron̄ kōmālimi er n̄an aer lale liāp eo an ro jeier im jatier remour, step sister ak brother ro, ak half sister ak brother ro n̄an ro jineer im jemāer. Stake būreejtōn eo ej je juon leta kwaļo̧k bwe armej eo emālim n̄an lale liāp eo. Leta in ej waļo̧k ilo tampeļ.