27.

Otenanti n te Tembora ibukiia Aika a Maiu

27.0

Kabwarabwaraana

Inanon taai ake ngkoa, ngke a mena aomata aika a kakaonimaki iaon te aba, e kakabwaiaiia te Atua ma berita ao otenanti aika tabu n te tembora. E a tia n tabetai ni kariai Ana otenanti aika a tabu bwa a na karaoaki itinanikun te tembora ngkana akea te tembora ae e tia ni katabuaki (taraa Karikani Bwai 28:12–22; Te Otinako 24; Te Otinako 25:8–9; Ita 3). Ma ngke e a tia te Uea ni katea Ana Ekaretia, E tuangiia Ana aomata bwa a na katea te auti “nakon [Arana].” Ikanne E katea Ana otenanti ao mimitongin Abanueana ao reireia te kawai ibukin te kamaiuaki. (Taraa 2 Rongorongos 3–5; 2 Nibwaai 5:16; Reirei ao Berita aika Tabu 97:10–16; 124:29–39.)

Te tembora bon Ana auti te Uea. E kairiira nakon ara Tia Kamaiu, Iesu Kristo. Inanon taian tembora, ti iri ni karaoi otenanti aika tabu ao ni karaoi berita aika tabu ma Tamara are i Karawa are e kabaeira nakon te Tia Kamaiu. Berita aika tabu ao otenanti a katauraoira n oki nako mweengan Tamara are i Karawa ao ni kabaeaki ni kabane bwa utu n aki toki.

Inanon taian tembora, kakabwaia aika moan te korakora a tauraoi naba nakoia natin te Atua aika a kakaonimaki n te maiu aei. Inanon berita ao otenanti aika a tabu, “Ngaia are, e kaotaki mwaakan te aro n Atua n taian otenanti mai iai” (Reirei ao Berita aika Tabu 84:20). Te tembora bon te tabo ae tabu te tabo ike a taromauri iai membwa, n reirei, ao ni karekea te kairiiri ao te raunnano (taraa Reirei ao Berita aika Tabu 109:13–16). Naake a nanako n te tembora a kona ni karekea mwaakan te Atua ni buoka ni kakoroa nanon Ana mwakuri (taraa Reirei ao Berita aika Tabu 109:22–23; taraa naba 3.5 inanon te aeniboki aei).

Berita aika tabu ao otenanti a tabu. Kanikinaa a irekereke ma berita aika tabu n te tembora a riai n aki maroroakinaki itinanikun te tembora. Ti riai naba n aki marooroakina te rongorongo ae tabu are ti berita iai n te tembora bwa ti na aki kaotia. E ngae n anne, ti kona ni maroroakina aan botoniango ao reirei ibukin berita aika tabu ao otenanti ao namakin n tamnei ake ti karekei inanon te tembora.

Taan kairiiri n te uoote ao n te titeiki a maroroakina te mwakoro aei ma membwa ke a katauraoi ni karekei aia entaumente ke otenanti ibukin te kabaeaki.

27.1

Karekean Otenanti n te Tembora

27.1.1

Katauraoi ni Karekei Otenanti n te Tembora

A riai membwa ni katauraoiia n tamneia ni karekei otenanti n te tembora ao ni karaoi ao ni karinei berita aika tabu n te tembora.

Kaaro iai moan tabeia ni buokiia natiia mwaane bwa a na tauraoi ni karekea te Nakoanibonga ae te Merekitereka. Taan kairiiri n te titeiki ao uoote, taari ao aine n ibuobuoki, utu ni kaan ae mwaiti kaaina a boutokaia kaaro n te katabeaki aei.

Taan kariiri n te titeiki ao uoote a katoa tai ni kaungaia membwa ni katauraoiia ni karekei oin aia otenanti n te tembora. A katuruturua taan kairiiri kakawakin karinean berita aika tabu ao n teimatoa n tau ibukin ao ni karekean te beba ni kariaia nakon te tembora.

Bwaai n ibuobuoki ni buokiia membwa ni katauraoiia ni karekei otenanti n te tembora a tauraoi n temples.ChurchofJesusChrist.org.

Membwa ake a katauraoiia ni karekei oin aia entaumente ke ni kabaeaki nakoia buuia a kaungaaki bwa a na ira te reirei ibukin te katauraoi nakon te tembora (taraa 25.2.8).

Membwa a kaitibo ma aia bitiobi ao te beretitenti n te titeiki bwa a na karekei aia beba ni kariaia ibukin otenanti aika maiu ngana a kona:

• Membwa ake a reke oin aia entaunmente.

• Ni kabaeakiia nakon kainnabaia.

Ibukin rongorongon karaoan beba ni kariaia nakon te tembora n aro aikai, taraa 26.1 ao 26.3.1.

27.1.2

Bairean Tain Otenanti n te Tembora

Membwa ake a baireia bwa a na karekei oin aia entaumente ke ni kabaeaki ke ni mare a na moantaai ni bairea tain te otenanti ma te tembora are a na nako iai. Taraa temples.ChurchofJesusChrist.org ibukin te reitaki ibukin tembora n tatabeua nako.

27.1.3

Membwa aika a aki Toamau Bwain Rabwataia

Membwa aika a tau ake aki toamau n rabwataia a na kona n reke aia otenanti ni kabane n te tembora (taraa 38.2.5). Naake a na kaea te tembora ake iai kainanoia ae onoti a kaungaaki bwa a na nakon te tembora ma kaain aia utu ke raraoia ake tii te arona rikiia ni kona ni buokiia ngkana a kainnanoia. Naake a ibuobuoki a riai n reke aia beba ni kariaia nakon te tembora ae tuai bane taina. Ngkana membwa aki kona n reke angan te nako n te tembora ma kaain te utu ke ma raoraoia, a na moantaai membwa n tareboonia te tembora n taraia bwa tera babaire ake a na kona ni karaoaki. Taraa temples.ChurchofJesusChrist.org ibukin te reitaki ibukin tembora n tatabeua nako.

Maan aika a kabonganaaki ibukin te taromauri ao maan aika a na boutoka aron te namakin aki kariaiakakaki inanon te tembora. A kona beretitenti n te titeiki n tareboonia te Tabo n Tararua ibukin te Tembora n [e-mail] ngkana iai aia titiraki.

27.1.4

Te Ibuobuoki ibukin te Rairairi ke te Raitaeka

Ngkana membwa a kainnanoa buokaia n te raitaeka n te tembora, a riai ni moantaai n reitaki ma te tembora n taraia ngkana e tauraoi. Taraa temples.ChurchofJesusChrist.org ibukin te nambwa n reitaki ibukin tembora n tatabeua nako.

27.1.5

Kunnikai Aika A na Bwainaki Nakon te Tembora

Membwa ake a nakon te tembora a riai ni bwaina te aeka ni kunikai ae a bwainna nakon te botaki n toa. A riai n aki bwainii kuunikai n aki akaaka ke are e na aki kona ni kamanoa te kaamenti n te tembora. A riai naba n aki bwainii kunnikai ake a rangi n riao tarakiia, n aron te tuxedo. Te kaetieti aei e reiakinaki raoi irouia kaaro, taari mwane ao aine n ibuobuoki, ao taan kairiiri n te uoote ao titeiki ngkai a katauraoiia membwa n taromauri inanon te tembora.

Taraa 27.3.2.6 ke te rongorongo ibukin kunnikaim ae kona bwainna nakon te mare n te tembora ke te kabaeaki.

Taraa 38.5 ibukin rongorongon taekan:

• Kunnikaim ae kona bwainna n tain te entaumente ao otenanti ibukin te kabaeaki.

• Karekean, bwainan, ao tararuan kunnikain te tembora ao kamenti ibukin te nebonebo.

27.1.6

Tararuakia Ataei

E riai n iai ikawai aika a na tararuaiia ataei ngkana a mena iaon tanon te tembora. Taan mwakuri n te tembora a tauraoi n tararuaiia ataei n aro aikana imwiina:

• Ngkana a tia ni kabaeaki nakoia kaaro

• Ngkana a mataku ni kabaeakia tariia ma mwaaneia aika a maiu, tariia ao mwaaneia kauaei, ke tariia ma mwaaneia bwa titebo tamaia ke titebo tinaia irouia aia karo

27.1.7

Boowi ma Membwa imwiin Karekean aia Otenanti n te Tembora

Angin te tai a na iai aia titiraki membwa imwin reken aia otenanti n te tembora. Kaain te utu ake a tia n entaute, te bitiobi, ke taan kariiri n te uoote ake tabeman, ao taari mwaane ao aine n ibuobuoki a na bootaki ni kaitibo ma membwa ni maroroakin aia taneiai n te tembora.

Taan kairiiri a kaungaia naba membwa bwa a na kakaei kaekaan aia titiraki rinanon ana kairi te Tamnei ae Raoiroi. Inanon te tembora, e kona te Tamnei ni katauraoi kaekaan titiraki aika a mwaiti mairouia membwa ibukin aia taneiai n te tembora.

Bwaai n ibuobuoki ni buoka kaekaan titiraki a tauraoi n temples.ChurchofJesusChrist.org.

27.2

Te Entaumente

Te taeka entaumente nanona te “bwaintangira.” Te entaumente n te tembora bon te bwaintangira mairoun te Atua are e a kakabwaiaiia iai natina. E tii kona n reke te entaumente inanon tembora aika a tabu. Tabeua bwaintangira ake a karekei membwa rinanon entaumente n te tembora e raonaki ma:

• Te atatai ae moan korakora ibukin ana kantaninga te Uea ao ana reirei.

• Te mwaaka ni karaoi bwaai ni kabane ake E tangiria Tamara are i Karawa bwa a na karaoia Natina.

• Kaetieti mai ieta ngkana ko beku ibukin te Uea, aia utu, ao tabeman.

• Karikirakea te kantaninga, raunnano, ao te rau.

Kakabwaia ni kabane ake a beritanaki ibukin te entaumente a kamatoaaki n te maiu aei ao n aki toki. Kakoroan bukin kakabwaia aikai a katan iaon te kakaonimaki nakon ana euangkerio Iesu Kristo.

Te entaumente e karekeaki naba inanon uoua mwakoro. N te moan mwakoro, e karekea te otenanti te aomata are e aranaki bwa te moan waaki. Iai i nanon te moan waaki teniua otenanti: te tebokaki, te kabiraki, ao te kunnikaiaki (taraa Te Otinako 29:4–9). E raonaki ma kakabwaia aika a onoti n irekereke ma rikin te aomata ae mairoun te Atua ao ana konabwai.

N tain karaoan te moan waaki, e karaoa te berita ae tabu te aomata bwa e na kabongana kunnikain te tembora. Te kamenti e tei ibukin ana reitaki ae onoti teuanne ke neienne ma te Atua ao te motinnano n ongeaaba n taian berita aika tabu ake a karaoaki n te tembora. Ngkana a kakaonimaki membwa nakon aia berita aika tabu ao ni kabongana raoi te kamenti ni maiuia ae bwanin, e na riki bwa te bwai ni kamanomano. Ibukin rongorongon riki kabonganaan ao tararuan te kaamenti, taraa 38.5.5.

N te kauoua n itera ibukin te entaumente, e reiakinaki te baire ni kamaiu, n raonaki ma te Karikibwai, Bwakan Atam ao Ewa, ana Mwakuri ni Kamaiu Iesu Kristo, Kitanan te Koaua, ao Kaokan bwai. A karekei naba kaetieti membwa bwa a na kanga aroia n oki nako matan te Uea.

N te entaumente, a kaoaki membwa bwa a na karaoi berita aika tabu n aron aikai:

1. Maiuakina tuan te ongeaaba ao ni kataia ni kawakin ana tua Tamara are i Karawa.

2. Ongeaaba n tuan te anga karea, are nanona te anga karea ni boutoka ana mwakuri te Uea ao n rairananom ma te uruaki n nano ao te tamnei ae raraoma.

3. Ongeaaba nakon tuan ana euangkerio Iesu Kristo, nanona:

   • Karikirakean te onimaki iroun Iesu Kristo.

   • Rairannano ni katoa bong.

   • Karaoi berita aika tabu ma te Atua man karekean otenanti ibukin te kamaiuaki ao te karietataaki.

   • Teimatoa ni uaa te toki man kawakinan berita aika tabu.

   • Kekeiaki ni kawakini moan tua ake a korakora ake uoua. Aikai are “ko na tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea” ao “ko na tangira raom n ai aron tangiram i bon i roum”(Mataio 22:37, 39).

4. Kawakina tuan te itiaki, nanona bwa aki karaoan te wenenibure itinanikun te mare i marenan te mwaane ao te aine ni kaineti ma ana tua te Atua.

5. Kawakina tuan te anganano, are nanona bwa membwa anganano ni katabua aia tai, tarena, ao bwaai ni kabane ake e a tia te Uea ni kakabwaiaia iai nakon katean ana Ekaretia Iesu Kristo iaon te aba.

Imwiin te tai, e berita Tamara are i Karawa bwa naake a teimatoa ni kakaonimaki nakon aia berita aika tabu n te tembora a na bwaintangiraaki “ma te mwaaka mai eta” (Reirei ao Berita aika Tabu 38:32, 38; taraa naba Ruka 24:49; Reirei ao Berita aika Tabu 43:16).

27.2.1

Antai Ake A na Reke Aia Entaumente

Ni kabane kaain te Ekaretia ake a bukintaeka a kaoaki bwa a na katauraoiiia ibukin ao ni karekei oin aia entaumente. Ni kabane otenanti aika a kantaningaaki a riai ni karaoaki ao ni karinaki n te rekooti imwaain ae a na kona ni karekea aia entaumente membwa (taraa 26.3.1). Taraa 27.2.2 ibukin rongorongon taekan baireana nninngai ae e na reke iai te entaumente.

27.2.1.1

Membwa Aika A Tibwa Bwabetitoaki

Membwa ikawai aika a tau a na karekei aia entaumente teuana te ririki ae bwanin man bongin te namwakaina are a kamatoaaki iai (taraa 26.5.2).

27.2.1.2

Membwa Ake A Tuai n Reke Aia Entaumente Buuia

Te membwa ae tau are e tuai n reke ana entaumente buuna e kona ni karekea oin ana entaumente teuanne ke neienne ngkana e iri nanon bwaai aikai:

• Te buu are e tuai n reke ana entaumente teuanne ke neienne e na anga ana kariaia.

• Te membwa, bitiobi, ao te beretitenti n te titeiki a na onimakinna raoi bwa te katabeaki e kantaningaaki ma berita aika tabu n te tembora e na aki riki bwa kakiriweean te mare.

A kaineti aro aikai ngkana te buu te membwa n te Ekaretia ke ngkana tiaki.

27.2.1.3

Membwa Ake Iai Mamaaran Aia Iango

A kona membwa aika iai mamaran aia iango ni karekei oin aia entaunmente:

• A bane n reke aia otenanti aika a kantaningaaki (taraa 26.3.1).

• Iai konabwain aia iango n ota, ni karaoi, ao ni kawakin berita aika tabu aika a irekereke.

E na marooro te bitiobi ma te membwa ao, ngkana e kona, ana karo teuanne ke neienne. E mwakuri iaan ana kaetieti te Tamnei. E na marooro ma te beretitenti n te titeiki. Te beretitenti n te titeiki e na kanakoi titiraki nakon aia Aobiti te Moan Beretitentii ngkana e riai. Taraa 38.2.4.

27.2.2

E Baireaki Nningai ae na Karekeaki iai te Entaumente

Te babaire ni karekean te entaumente e onoti ao e riai ni karaoaki ma te tataromwaaka. Te entaumente bon te kakabwaia ibukin te mwaaka ao te kaotioti nakoia ni kabane ake a tauraoi ni karekea. Membwa a kona ni karekei oin aia entaumente ngkana a bane n iri nanon bwaai aikai:

• A koro 18 aia ririki.

• A tia ni kabwanina ke aikoa manga kaea te reirei ae rietata, kauarinan n reirei, ke ae ti tearona.

• E a bane teuana te ririki ae bwanin n te tai are a kamatoaaki iai.

• Iai nanoia ni kan karekea ao ni karinei berita aika tabu n te tembora ni maiuia ae bwanin.

Membwa are a karekei weteaia nakon te mwakuri ni mitinare ke a katauraoiia bwa a na kabaeaki n te tembora a riai moa n reke aia entaumente. E na marooro naba te bitiobi ma membwa aika a ikawai ake iai nanoia ni kan karekei aia entaumente.

Imwaain karaoan te beba ni kariaia nakon te tembora ibukiia membwa bwa a na reke aia entaumente, e riai te bitiobi ao te beretitenti n te titeiki n iai ana namakin bwa e a tauraoi te aomata anne n ota ao ni kawakin berita aika tabu ibukin te tembora. Te kona anne ni karekea te entaumente e baireaki ni kaonoti ibukin temanna ma temanna. Taan kairiiri aki kabonganageneralized criteria, n aron akana a karinanaki inanon, ngkana e baireaki bwa e a tauraoi te aomata anne ni karekea ana entamente:

• Rokom n te roro ae riai

• Kitanan te mweenga ibukin te kuura n reirei, te mwakuri, ke te mwakuri n te taanganibuaka

• Tangiria ni mataku n tain kabaekiia kaain te utu n te tembora ke te raoraom

27.2.3

Babaire ao Bairean Tain te Entaumente

27.2.3.1

Butimwaean Beba ni Kariaia ibukin Otenanti Ibukiia aika a Maiu

E riai te membwa ni karekea ana beba ni kariaia ibukin otenanti ibukiia aika a maiu bwa a na rin n te tembora ao ni karekea aia entaumente. Ibukin riki rongorongon beba ni kariaia aikai, taraa 26.5.1.

27.2.3.2

Reitaki ma te Tembora

Membwa ake a baireia bwa a na karekei aia entaumente a riai ni moantaai n reitaki ma te tembora ni babaire ibukin tain te otenanti (taraa 27.1.2). Te tembora e na katauraoi kaetieti, n raonaki ma rongorongon taekan kunnikain te tembora, ngke e baireaki taina.

27.2.3.3

Taan Tararua ibukiia Membwa Ake A Reke Aia Entaumente

Membwa ake a reke oin aia entaumente a kona ni kaoia membwa ae raoia ni mwaane ke n aine ake a tia n entaaute n riki bwa te tia tabeakina ao ni buokiia n tain te tetere ni karaoan aia entaumente. E riai te tia ibuobuoki n iai ana beba ni kariaia nakon te tembora ae tuai bane taina. E kona te tembora ni katauraoa te tia ibuobuoki ngkana e kainnanoaki.

27.3

Kabaeakin te Buu Mwaane ao te Buu Aine

“Te utu e riki n tabu iroun te Atua. Te mare imarenan te mwaane ao te aine e kakawaki ibukin Ana babaire ae akea tokina” (“Te Utu: Te Katanoata nakon te Aonaaba”). Te kabaeaki n te tembora e reita te buumwaane ao te buuaine ibukin taai ngkai ao te maiu ae akea tokina. Taanga ake a kabaeaki n te tembora a beritanaki te mimitong ao te kimwareirei ni karokoa akea tokina (taraa Reirei ao Berita aika Tabu 132:19–20 A na karekei kakabwaia aikai ngkana a kakaonimaki nakon aia berita aika tabu ake a karaoi n tembora. Rinanon te otenanti aei, a kona iai natiia taanga n riki bwa mwakoron aia utu n te maiu are akea tokina.

Taan kairiiri n te Ekaretia a na kaungaia membwa bwa aonga n tauraoi ibukin te mare n te tembora ao ni mareaki ao ni kabaeaki n te tembora. N taabo ake aki kinaki iaan te tua taian mare n tembora, a kona taan kairiiri ni karaoa te mare n te tua ake a rimwiaki ma te kabaebae n te tembora (taraa 38.3). E kona naba te banna aei n iraki ngkana te mare n te tembora e na karikiia kaaro ke aia utu aika kaan ma n namakinna ae a katukaki ibukina ngkai aki kona n ira te nebonebo n te tembora.

27.3.1

Antai ae E na Kabaeaki n te Tembora

Ni kabane kaain te Ekaretia ake a na bukintaeka ake a tuai ni mare a kaoakii bwa a na katauraoiia ni kabaeaki n te tembora. Naake a tia ni mare n te tua a kaungaaki bwa a na kabaeaki n te tembora ibukin ngkai ao n aki toki n te tai ae waekoa ngkana a tauraoi. A riai membwa n reke aia entaumente imwaain ae a kabaeaki (taraa 27.2).

Taanga ake a kabaeaki n te tembora a riai n (1) mare n te tua imwaain ae a kabaeaki ke (2) ni mare ao ni kabaeaki n te aro n nebonebo naba anne n te tembora. Taraa 27.3.2.

27.3.1.1

Membwa Ake A Kabaeaki nakon Buuia are Mai Imwaaina

Taraa 38.4.1.

27.3.1.2

Membwa Ake Iai Mamaaran Aia Iango

Membwa ake iai mamaaran aia iango a kona ni kabaeaki nakon buuia, aia kabae te aine, aia kabae te mwaane ngkana:

• A bane n tia n reke aia otenanti aika a kantaningaaki, n raonaki ma te entaumente (taraa 27.2.1.3).

• Iai konabwain aia iango n ota, ni karaoi, ao ni kawakin berita aika tabu aika a irekereke.

E na marooro te bitiobi ma te membwa teuanne ke neienne buuna, ana kabae te mwaane, ke ana kabae te aine. E mwakuri iaan ana kaetieti te Tamnei. E na marooro ma te beretitenti n te titeiki. Te beretitenti n te titeiki e na kanakoi titiraki nakon aia Aobiti te Moan Beretitentii ngkana e riai. Taraa 38.2.4.

27.3.2

Te Babaire ao Bairean Tain te Mare n te Tembora ke te Kabaeaki

27.3.2.1

Butimwaean Beba ni Kariaia ibukin Otenanti Ibukiia aika a Maiu

E riai te membwa ni karekea ana beba ni kariaia ibukin otenanti ibukiia aika a maiu bwa a na rin n te tembora ao ni karekea aia entaumente. Ibukin rongorongon riki beba ni kariaia aikai, taraa 26.3.

27.3.2.2

Reitaki ma te Tembora

Membwa ake a baireia bwa a na karekei aia entaumente a riai ni moantaai n reitaki ma te tembora ni bairea tain te otenant (taraa 27.1.2). Te tembora e na katauraoi kaetieti, n raonaki ma rongorongon taekan kunnikain te tembora ngke e baireaki taina.

27.3.2.3

Karekan te Raitienti ibukin te Mare

Imwaain ae a mare, a riai taanga ni karekea aia raitienti ae boou ibukin mareakiia n te tua n te tabo are e karaoaki iai aia mare. Ngkana a baireia taanga bwa a na kaai ni mare ao ni kabaeaki n tain te nebonebo n aekan naba anne, a riai n uota aia raitienti ae boou ibukin aia mare nakon te tembora.

Taanga ake a kabaeaki mwiin mareakiia n te tua a aki kainnanoia bwa a na uota aia raitienti ibukin mareakiia nakon te tembora. N oneanmwiina, a katauraoa bongin te namwakaina ao te tabo are a mareaki iai n te tua bwa iteran te kakoaua ibukin karaoan te mare.

27.3.2.4

Taan Ibuobuoki ibukin te Tia Mare te Aine ao te Mwaane

Te aine are e a tia n entaute e na raona te tia mare te aine ni buokiia n oneia n te ruu n onoono. Te mwaane are e a tia n entaute e na karaoa naba anne ibukin te tai ni mare te mwaane. E riai te tia ibuobuoki n iai ana beba ni kariaia nakon te tembora ae tuai bane taina. E kona te tembora ni katauraoa te tia ibuobuoki ngkana e kainnanoaki.

27.3.2.5

Antai ae Karaoa te Mare n te Tembora ke te Kabaeaki

Te mare n te tembora ke te kabaebae e taneiai ni karaoaki iroun te tia karaoa te kabaebae are e katabeaki nakon te tembora ike a na mareaki ke ni kabaeaki iai taanga. Ngkana kaain te utu ke te tia mwakuri ae a kinaa iai kariaiakana ni karaoa te kabaebae ao e katabeaki nakon te tembora ike a na mareaki ke ni kabaeaki iai taangaa, a kona ni kaoa teuanne bwa e na karaoa te mare ke te kabaebae.

Te tia karaoa te kabaebae e na ukora naba aia kariaia te Moan Beretitentii ni karaoa te kabaebae ibukin kanoaia ana bakatibu (ataei, tiibu ataei, ao tibumwamwanu ataei) n te tembora nakon riki teuana are e katabeaki iai. E riai ni karekea te reta ni kariaia mairoun te Moan Beretitentii ibukin kabaebae n tatabeua nako. E na kaota te reta aei n te tembora.

Iai te bwarannano irouia membwa ni butiakiia Mataniwi ni Kabuta ibukin karaoan aia mare ke aia kabaebae n te tembora.

27.3.2.6

Te Kunnikai ae Riai ibukin te Mare n te Tembora ke te Kabaeaki

Kunnikain te Tia Mare te Aine. Ni kabane kunnikai ake a bwainaki n te tembora a na bane ni mainaina, tararaoi karaoakiia ao bon te kunnikai, ao akea katikiraoakiia aika a bati. E riai naba ni katana te kaamenti n te tembora. Bon te kunnikai raoi ae riai n rainiiaki.

Ni kaboraoaki ma kunnikai ake tabeua ake a bwainaki n te tembora, e riai ni mwarairai bain ana kunnikai te tia mare ke te kunnikai ae te teniua-te kuata marain baina. A riai kunnikai n aki uaaki i aontano ti ngkana e kona ni kabaeaki nako eta ke ni kanakoaki n tain te nebonebo ae tabu n te tembora.

E na katauraoi kunikai te tembora ngkana e kainnanoaki ke n tangiraki.

Kunnikain te Tia Mare te Mwaane. Te tia mare te mwaane e na bwaini kunnikain te tembora ae taneiai te aba iai n tain te nebo n te mare ke te kabaeaki (taraa 38.5.1 ao 38.5.2). E kona ni bwainna ni kunnikai ae bon tararaoi itinanikun te tembora ibukin te rawetamnei imwin te nebonebo.

Kunnikain te Iruwa. Naake a ira te nebonebo ibukin te mare ao te kabaeaki a riai ni kunnikainiia ni bon aekan naba kunnikai ake a na bwanii nakon te bootaki n toa. Membwa ake a roko ibukin te kabaeaki n te mare man te tetere ibukin te entaunmente a kona ni bwainiia ni kunnikain te tembora.

A riai taanga n tibwaua raoi te rongorongo aei ma iruwa imwaain te mare ke te kabaeaki.

Taian Uee. A riai taanga ao iruwa n aki kabonganai taian uee n tain te mare ke n tain te nebonebo ibukin te kabaeaki. A kona ni kabonganaaki taian uee itinanikun te tembora ibukin te rawetamnei imwiin te nebonebo. A riai taanga n tibwaua raoi te rongorongo aei ma iruwa imwaain te mare ke te kabaeaki.

27.3.2.7

Kaibibitakin Mwaamwa imwiin te Mare n te Tembora ke te Kabaeaki

Kaibibitakin mwamwa bon tiaki mwakoron te nebonebo ibukin te kabaeaki n te tembora. E ngae n anne, a kona ni kaibibita aia mwamwa taanga imwiin te bootaki n te ruu ni kabaebae. A riai taanga n aki kaibibiti aia mwamwa n te tai teuana ke tabo inanon te tembora ke itinanikun te tembora. Karaoan aei e kona ni kameerea kakawakin te nebonebo.

Taanga ake a mareaki ao ni kabaeaki n te aeka n nebonebo anne a kona ni kaibibiti aia mwamwa n te tai teuana imwiina ni kanakoraoia ma kaain te utu ake a aki n roko ni kaea te mare n te tembora. Kaibibitakin te mwamwa e na titebo ma kakawakin karinean te mare n te tembora. Te kaibibiti aei e na aki riki bwa te katooto n iteran nako te mare n te tembora ke te nebonebo ibukin te kabaeaki. A riai taanga n aki kaibibiti imwiin tiaia ni mareaki ke ni kabaeaki n te tembora.

Taanga ake a mare n te ta imwaain kabaeakiia n te tembora a kona ni kaibibiti aia mwamwa n tain te nebonebo n te tua, n aia tai ni kabaeaki n te tembora, ke inanon nebonebo aika uoua aikai.

27.3.3

Te Mare n te Tembora Ti Ibukin te Maiu Aei

Te kantaninga ibukin te tembora bwa e na karaoi otenanti aika akea tokiia. Ibukin bukina aei, ao maare ibukin ti te tai aei aikoa kona ni manga karaoaki inanon tembora.

Te tua ibukin kabaeakiia taanga ake a mare n te tembora ti ibukin te maiu aei, taraa 38.4.1.6.

27.3.4

Antai Ae E na Ira te Mare n te Tembora ke te Kabaeaki

A riai taanga ni kaoia aia utu ni kaan ao raoraoia nakon te mare n te tembora ke te kabaeaki. Membwa ake a bukintaeka a riai n entaute ao n iai aia beba ni kariaia nakon te tembora ae tuai bane taina bwa a na iria.

Tabeman membwa ake bungiaki ni iai aia rekooti a aki bwabetitoaki ni kaineti ma iremwen aia iango, ao tabeman a bwabetitoaki ma aki entaute ibukin naba riaina anne. Te beretitenti n te titeiki e kona n anga te kariaia nakoia bwa a kona ni mataku n te mare n te tembora ke kabaeakia tariia ao mwaneia ake a maiu ngkana a:

• A tia ni koro 18 aia ririki ni maiu.

• A kona n teimatoa n rau ma ni karinerine n tain te bootaki ae mimitong.

E na korea te reta te beretitenti n te titeiki ni kaotia bwa iai kariaiakan te aomata ni mataku n te kabaebae. Te reta aio e na uotaki nakon te tembora.

A riai membwa n entaute ao n iai aia beba ni kariaia nakon te tembora ni mataku ni kabaeakiia aia karo.

27.3.5

Bootaki Ibukin Te Mare

Taraa 38.3.4 ibukin rongorongon karaoan bootaki ibukin te mare n ana kateitei te Ekaretia.

27.4

Kabaeakiia Naati Aika a Maiu Nakoia Kaaro

Ataei ake a bungiaki imwiin are e a tia ni kabaeaki tinaia nakon buuna n te tembora a bungiaki n te berita ae tabu n te kabaeaki anne. A aki kainnanoa karekean te otenanti ni kabaeaki nakoia aia karo.

Ataei ake aki bungiaki inanon te berita ae tabu a kona n riki bwa mwakoron te utu ae akea tokina man kabaeakiia nakoia ae bon oin aia karo ke ake a tabekaki irouia. Ataei aikai a na karekei aekan kakabwaia aikai n aroia naake a bungiakin te berita ae tabu.

Taraa 38.4.2 ibukin kaetieti n taekan kabaeakiia ataei nakoia aia karo.

27.4.1

Karaoan Beba ni Kariaia Ibukin Kabaeakiia Ataei Aika a Maiu nakoia Kaaro

Ataei aika 8 aia ririki ao ake iaona a kainnanoa te beba ni kariaia ni kabaeaki nakoia aia karo. A kainnanoa naba te beeba ni kariaia ni mataku ni kabaeakia taria ma mwaaneia aika a maiu, taria ao mwaaneia kauaei, ke tariia ma mwaaneia bwa titebo tamaia ke titebo tinaia irouia aia karo (taraa 27.4.4). Ataei n te ririki ae 8 ao iaona a riai ni bwabetitoaki ao ni kamatoaaki ni karekea te beba ni kariaia nakon te tembora. Mwaane ake tao 11 aia ririki ao a koro 12 aia ririki n te tai are e karaoaki iai aia otenanti a riai naba n iai irouia te nakoanibonga.

Membwa ake 21 aia ririki ke iaona riki a na riai n entaute ao n iai aia beeba ni kariaia nakon te tembora ni kona ni kabaeaki nakoia aia karo.

Te beretitenti n te titeiki e na anga ana kariaia nakoia aomata ake a tuai ni bwabetitoaki ke entaute ni kaeti ma aki toamaun aia iango bwa a na kabaeaki nakoia aia karo. E na korea te reta te beretitenti n te titeiki ni kaotia bwa iai kariaiakan te aomata ni kabaebae. Te reta aio e na uotaki nakon te tembora.

Taraa 26.4.4 ibukin rongorongo ni karaoan beba ni kariaia nakoia ataei.

27.4.2

Reitaki ma te Tembora

Taanga ake a tangiria ni kabaeaki ma natiia, ke ataei ae iai nanoia ni kan kabaeaki nakoia aia karo ake a tia ni mate, a riai ni moantaai n reitaki ma te tembora ni bairea tain te otenanti (taraa 27.1.2). N tabeua kaeiti, tabeua otenanti n te tembora a na kainnanoa karaoakiia imwaain ae karaoaki te kabaebae.

27.4.3

Tararuakia Ataei

Taraa 27.1.6.

27.4.4

Antai ae E na Ira Kabaeakiia Naati nakoia Kaaro

N tarakin aron kabaeakin mwaaneia ma tariia, ai mwaneia ma tariia, ke ai mwaneia ma tariia aika itera nakoia aia karo, membwa ake a mena aia ririki iaan 21 a riai ni bungiaki inanon te berita ae tabu ke ni kabaeaki nakoia aia karo. Irarikin anne, ataei ake 8 aia ririki ao ake iaona riki a riai ni bwabetitoaki ao ni kamatoaaki ao n riai n iai aia beba ni kariaia nakon te tembora ae tuai bane taina (taraa 26.4.4). Mwaane ake tao 11 aia ririki ao a koro 12 aia ririki n te tai are e karaoaki iai aia otenanti a riai naba n iai irouia te nakoanibonga.

Membwa ake 21 aia ririki ke a ikawai riki a na tia n entaute ao n iai aia beeba ni kariaia nakon te tembora ae tuai bane taina ni mataku ni kabaebae akanne.

Membwa ake a tia ni mare ke ni koro 21 aia ririki ke a ikawai riki a riai n tia n entaute ni mataku n aron kabaebae akanne. Ma, a riai n iai aia beeba ni kariaia nakon te tembora ae tuai bane taina (taraa 26.4.4).

Tabeman membwa ake bungiaki ni iai aia rekooti a aki bwabetitoaki ni kaineti ma iremwen aia iango, ao tabeman a bwabetitoaki ma aki entaute ibukin naba riaina anne. E kona n anga te kairiaia te beretitenti n te titeiki nakoia n matakuakina te kabaebae irouia tariia ma mwaneia aika a maiu, tariia ma mwaneia mairouia aine ke mwaane ake a iein ma tamaia ke tinaia, ke tariia ma mwaaneia bwa titebo tamaia ke titebo tinaia irouia aia karo. E na korea te reta te beretitenti n te titeiki ni kaotia bwa iai kariaiakan te aomata ni mataku n te kabaebae. Te reta aio e na uotaki nakon te tembora.