27.

Mga Ordenansa sa Templo para sa mga Buhay

27.0

Pambungad

Mula pa noong unang panahon, tuwing may mga tao sa mundo na tapat na sumasampalataya sa Diyos, binibiyayaan Niya sila ng mga tipan at mga ordenansa sa templo. Minsan ay pinapayagan Niyang maisagawa ang Kanyang mga banal na ordenansa sa labas ng mga templo kapag walang inilaang templo (tingnan sa Genesis 28:12–22; Exodo 24; Exodo 25:8–9; Eter 3). Ngunit tuwing itinatatag ng Panginoon ang Kanyang Simbahan, inuutusan Niya ang Kanyang mga tao na magtayo ng bahay “sa [Kanyang] pangalan.” Doon ay inihahayag Niya ang Kanyang mga ordenansa at ang mga kaluwalhatian ng Kanyang kaharian at itinuturo Niya ang landas tungo sa kaligtasan. (Tingnan sa 2 Cronica 3–5; 2 Nephi 5:16; Doktrina at mga Tipan 97:10–16; 124:29–39.)

Ang templo ang bahay ng Panginoon. Inaakay tayo nito sa ating Tagapagligtas na si Jesucristo. Sa mga templo, tayo ay nakikibahagi sa mga sagradong ordenansa at gumagawa ng mga tipan sa Ama sa Langit na nagbibigkis sa atin sa Kanya at sa ating Tagapagligtas. Inihahanda tayo ng mga tipan at mga ordenansang ito na bumalik sa piling ng Ama sa Langit at mabuklod sa ating pamilya sa walang-hanggan.

Sa loob ng templo, makatatanggap din ang matatapat na anak ng Diyos ng mga dakilang pagpapala para sa buhay na ito. Sa mga tipan at mga ordenansa sa templo, “ang kapangyarihan ng kabanalan ay makikita” (Doktrina at mga Tipan 84:20). Ang templo ay isang banal na lugar kung saan ang mga miyembro ay maaaring sumamba, matuto, at tumanggap ng patnubay at kapanatagan (tingnan sa Doktrina at mga Tipan 109:13–16). Maaaring matanggap ng mga taong dumadalo sa templo ang kapangyarihan ng Diyos para makatulong sa pagsasakatuparan ng Kanyang gawain (tingnan sa Doktrina at mga Tipan 109:22–23; tingnan din sa 3.5 ng hanbuk na ito).

Ang mga tipan at mga ordenansa sa templo ay sagrado. Ang mga simbolong kaugnay ng mga tipan sa templo ay hindi dapat pag-usapan sa labas ng templo. Hindi rin natin dapat pag-usapan ang mga banal na impormasyon na ipinagtipan natin sa templo na hindi ipapaalam sa iba. Gayunman, maaari nating pag-usapan ang mga pangunahing layunin at doktrina ng mga tipan at mga ordenansa sa templo at ang mga espirituwal na damdaming nadarama natin sa loob ng templo.

Tinatalakay ng mga lider ng ward at stake ang impormasyon na matatagpuan sa kabanatang ito sa mga miyembrong naghahandang tumanggap ng ordenansa ng endowment o pagbubuklod.

27.1

Pagtanggap ng mga Ordenansa sa Templo

27.1.1

Paghahanda sa Pagtanggap ng mga Ordenansa sa Templo

Dapat ihanda ng mga miyembro ang kanilang mga sarili sa espirituwal para tumanggap ng mga ordenansa sa templo at para gumawa at tumupad ng mga tipan sa templo.

Ang mga magulang ang may pangunahing responsibilidad na tulungan ang kanilang mga anak na maghandang tumanggap ng mga ordenansa sa templo. Ang mga magulang ay sinusuportahan ng mga lider ng stake at ward, mga ministering brother at mga ministering sister, at mga kamag-anak sa tungkuling ito.

Regular na hinihikayat ng mga lider ng stake at ward ang mga miyembro na maghandang tanggapin ang kanilang mga ordenansa sa templo. Binibigyang-diin din ng mga lider ang kahalagahan ng pagtupad sa mga tipan sa templo at pananatiling karapat-dapat sa at pagkakaroon ng temple recommend.

Ang mga materyal na makatutulong sa mga miyembro na maghandang tumanggap ng mga ordenansa sa templo ay makukuha sa temples.ChurchofJesusChrist.org.

Ang mga miyembrong naghahandang tumanggap ng sarili nilang endowment o naghahandang mabuklod sa kanilang asawa ay hinihikayat na dumalo sa isang temple preparation course (tingnan sa 25.2.8).

Nakikipagkita ang mga miyembro sa kanilang bishop at stake president para tumanggap ng recommend para sa mga ordenansa para sa buhay kapag sila ay:

• Tatanggap ng sarili nilang endowment.

• Ibubuklod sa kanilang asawa.

Para sa impormasyon tungkol sa pagbibigay ng mga temple recommend sa mga sitwasyong ito, tingnan ang 26.1 at 26.3.1.

27.1.2

Pag-iskedyul ng mga Ordenansa sa Templo

Ang mga miyembrong nagpaplanong tumanggap ng sarili nilang endowment o mabuklod ay dapat na maagang magpa-iskedyul sa templo kung saan nila nais isagawa ang ordenansa. Tingnan ang temples.ChurchofJesusChrist.org para sa contact information ng bawat templo.

27.1.3

Mga Miyembrong May mga Pisikal na Kapansanan

Ang mga karapat-dapat na miyembrong may mga pisikal na kapansanan ay maaaring tanggapin ang lahat ng mga ordenansa sa templo (tingnan sa 38.2.5). Ang mga miyembrong ito ay hinihikayat na dumalo sa templo kasama ang kanilang mga kamag-anak o kaibigan na nakatanggap na ng endowment na katulad nila ng kasarian na makatutulong sa kanila. Ang mga tutulong ay dapat na mayroong current temple recommend. Kung ang mga miyembro ay hindi masasamahan ng isang kapamilya o kaibigan, maaari silang tumawag sa templo nang maaga para malaman kung anong mga paghahanda ang maaaring gawin. Tingnan ang temples.ChurchofJesusChrist.org para sa contact information ng bawat templo.

Ang mga service animal at emotional support animal ay hindi pinapayagang pumasok sa mga templo. Maaaring kontakin ng mga stake president ang Temple Department sa [e-mail] kung mayroon silang mga katanungan.

27.1.4

Tulong sa Pagsasalin o Interpretasyon

Kung kailangan ng mga miyembro ng tulong sa pagsasalin o interpretasyon, dapat nilang kontakin nang maaga ang templo para alamin kung mayroon nito. Tingnan ang temples.ChurchofJesusChrist.org para sa contact information ng bawat templo.

27.1.5

Damit na Isusuot sa Pagpunta sa Templo

Kapag pupunta sa templo, ang mga miyembro ay dapat magsuot ng damit na karaniwang isinusuot nila sa sacrament meeting. Dapat iwasan nilang magsuot ng damit na kaswal o damit na hindi natatakpan ang temple garment. Dapat din nilang iwasang magsuot ng mga damit na masyadong pormal, tulad ng tuxedo. Ang tagubiling ito ay pinakamainam na maituturo ng mga magulang, mga ministering brother at mga ministering sister, at ng mga lider ng ward at stake habang naghahanda ang mga miyembro na sumamba sa templo.

Tingnan ang 27.3.2.6 para sa impormasyon tungkol sa mga damit na isusuot para sa pagbubuklod sa templo.

Tingnan ang 38.5 para sa impormasyon tungkol sa:

• Damit na isusuot sa mga ordenansa ng endowment at pagbubuklod.

• Pagkuha, pagsusuot, at pangangalaga ng mga ceremonial temple clothing at temple garments.

27.1.6

Pag-aalaga sa mga Bata

Ang mga bata ay dapat sinusubaybayan ng adult kapag sila ay nasa bakuran ng templo. May mga temple worker na maaaring sumubaybay sa mga bata sa mga sumusunod na sitwasyon lamang:

• Kung ibubuklod sila sa kanilang mga magulang

• Kung manonood sila ng pagbubuklod ng kanilang mga kapatid o kinakapatid (stepsibling o half sibling) sa kanilang mga magulang

27.1.7

Pakikipag-usap sa mga Miyembro Pagkatapos Nilang Tumanggap ng mga Ordenansa sa Templo

Ang mga miyembro ay kadalasang may mga tanong pakatapos nilang tumanggap ng mga ordenansa sa templo. Ang mga kapamilyang nakatanggap na ng endowment, bishop, iba pang mga lider ng ward, at mga ministering brother at mga ministering sister ay maaaring makipagkita sa mga miyembro para pag-usapan ang kanilang karanasan sa templo.

Hinihikayat din ng mga lider ang mga miyembro na hanapin ang mga sagot sa kanilang mga katanungan sa pamamagitan ng inspirasyon ng Espiritu Santo. Sa loob ng templo, ang Espiritu ay makapagbibigay ng mga sagot sa marami sa mga tanong ng mga miyembro tungkol sa kanilang karanasan sa templo.

Ang mga materyal na makatutulong sa pagsagot sa mga tanong ay makukuha sa temples.ChurchofJesusChrist.org.

27.2

Ang Endowment

Ang salitang endowment ay nangangahulugang “isang kaloob.” Ang endowment sa templo ay literal na kaloob mula sa Diyos na paraan para mapagpala Niya ang Kanyang mga anak. Ang endowment ay matatanggap lamang sa mga banal na templo. Ang ilan sa mga kaloob na natatanggap ng mga miyembro sa pamamagitan ng endowment sa templo ay kinabibilangan ng:

• Higit na kaalaman tungkol sa mga layunin at mga turo ng Panginoon.

• Kakayahang gawin ang lahat ng nais ng Ama sa Langit na gawin ng Kanyang mga anak.

• Banal na patnubay habang naglilingkod sa Panginoon, sa kanilang mga pamilya, at sa iba pa.

• Karagdagang pag-asa, kapanatagan, at kapayapaan.

Ang lahat ng ipinangakong mga pagpapala sa endowment ay may bisa sa buhay na ito at sa kawalang-hanggan. Ang katuparan ng mga pagpapalang ito ay nakasalalay sa katapatan sa ebanghelyo ni Jesucristo.

Ang pagtanggap ng endowment ay mayroong dalawang bahagi. Sa unang bahagi, tinatanggap ng tao ang mga paunang ordenansa na tinatawag na initiatory. Ang initiatory ay binubuo ng tatlong ordenansa: paghuhugas, pagpapahid ng langis, at pagkakaloob ng kasuotan (tingnan sa Exodo 29:4–9). Kabilang dito ang mga espesyal na pagpapala na nauugnay sa banal na pamana at potensyal ng tao.

Sa initiatory, ang miyembro ay binibigyan ng tagubilin na magsuot ng temple garment. Ang garment ay sagradong simbolo ni Jesucristo. Ito rin ay isang paalala ng mga tipan sa templo. Kapag tinutupad ng mga miyembro ang kanilang mga tipan, kabilang na ang sagradong pribilehiyong magsuot ng garment ayon sa tagubilin, mas matatanggap nila ang awa, proteksyon, lakas, at kapangyarihan ng Tagapagligtas. Para sa karagdagang impormasyon tungkol sa garment, tingnan ang 38.5.

Sa pangalawang bahagi ng endowment, itinuturo ang plano ng kaligtasan, kabilang na ang Paglikha, ang Pagkahulog nina Adan at Eva, at ang Pagbabayad-sala ni Jesucristo. Ang mga miyembro ay tumatanggap din ng mga tagubilin kung paano makabalik sa piling ng Panginoon.

Sa endowment, ang mga miyembro ay inaanyayahang gumawa ng mga sumusunod na sagradong tipan:

1. Ipamuhay ang batas ng pagsunod at sikaping sundin ang mga kautusan ng Ama sa Langit.

2. Sundin ang batas ng pagsasakripisyo, na ang ibig sabihin ay pagsasakripisyo upang suportahan ang gawain ng Panginoon at magsisi nang may bagbag na puso at nagsisising espiritu.

3. Sundin ang batas ng ebanghelyo ni Jesucristo, na ang ibig sabihin ay:

   • Magkaroon ng pananampalataya kay Jesucristo.

   • Magsisi araw-araw.

   • Gumawa ng mga tipan sa Diyos sa pamamagitan ng pagtanggap ng mga ordenansa ng kaligtasan at kadakilaan.

   • Magtiis hanggang wakas sa pamamagitan ng pagtupad sa mga tipan.

   • Magsikap na ipamuhay ang dalawang dakilang utos. Ang mga ito ay “ibigin mo ang Panginoon mong Diyos nang buong puso mo, at nang buong kaluluwa mo, at nang buong pag-iisip mo” at “ibigin mo ang iyong kapwa na gaya ng iyong sarili” (Mateo 22:37, 39).

4. Sundin ang batas ng kalinisang puri, na ang ibig sabihin ay hindi pagkakaroon ng seksuwal na relasyon sa labas ng legal na kasal sa pagitan ng isang lalaki at isang babae, na ayon sa batas ng Diyos.

5. Sundin ang batas ng paglalaan, na ang ibig sabihin ay ilalaan ng mga miyembro ang kanilang oras, mga talento, at lahat ng ipinagkaloob sa kanila ng Panginoon para sa pagtatayo ng Simbahan ni Jesucristo sa mundo.

Bilang kapalit, nangangako ang Ama sa Langit na yaong mananatiling tapat sa kanilang mga tipan sa templo ay pagkakalooban ng “kapangyarihan mula sa kaitaasan” (Doktrina at mga tipan 38:32, 38; tingnan din sa Lucas 24:49; Doktrina at mga tipan 43:16).

27.2.1

Sino ang Maaaring Tumanggap ng Endowment

Lahat ng adult na miyembro ng Simbahan na may pananagutan ay inaanyayahang maghanda para sa at tanggapin ang kanilang sariling endowment. Lahat ng paunang kinakailangang mga ordenansa ay dapat naisagawa at naitala na bago maaaring tanggapin ng mga miyembro ang endowment (tingnan sa 26.3.1). Tingnan ang 27.2.2 para sa impormasyon tungkol sa pagpapasiya kung kailan tatanggapin ng endowment.

27.2.1.1

Bagong Binyag na mga Miyembro

Ang mga karapat-dapat na adult na bagong miyembro ay maaaring tanggapin ang kanilang endowment makalipas ang hindi bababa sa isang buong taon mula sa petsa ng kanilang kumpirmasyon (tingnan sa 26.5.2).

27.2.1.2

Mga Miyembrong ang Asawa ay Hindi pa Nakatanggap ng Endowment

Ang isang karapat-dapat na miyembro, na ang asawa ay hindi pa nakatanggap ng endowment, ay maaaring tanggapin ang sarili niyang endowment kapag natugunan ang sumusunod na mga kondisyon:

• Ang asawang hindi pa nakatanggap ng endowment ay nagbigay ng pahintulot.

• Ang miyembro, bishop, at stake president ay panatag na ang mga tatanggaping responsibilidad na kaakibat ng mga tipan sa templo ay hindi magiging sagabal sa pagsasama nilang mag-asawa.

Naaangkop ang mga kondisyong ito miyembro man ng Simbahan ang asawa o hindi.

27.2.1.3

Mga Miyembrong May mga Kapansanan sa Pag-iisip

Ang mga miyembrong mayroong mga kapansanan sa pag-iisip ay maaaring tumanggap ng sarili nilang endowment kapag:

• Natanggap nila ang lahat ng paunang kinakailangang mga ordenansa (tingnan sa 26.3.1).

• May kakayahan sila sa pag-iisip na maunawaan, gawin, at tuparin ang kaugnay na mga tipan.

Kakausapin ng bishop ang miyembro at, kung angkop, ang kanyang mga magulang. Hinahangad niya rin ang patnubay ng Espiritu. Maaari siyang sumangguni sa stake president. Maaaring iparating ng stake president ang mga tanong sa Office of the First Presidency kung kinakailangan. Tingnan sa 38.2.4.

27.2.2

Pagpapasiya kung Kailan Tatanggapin ang Endowment

Ang desisyong tanggapin ang endowment ay personal at dapat gawin nang may panalangin. Ang endowment ay isang pagpapalang may hatid na kapangyarihan at paghahayag para sa lahat ng maghahandang tanggapin ito. Maaaring piliin ng mga miyembro na tanggapin ang sarili nilang endowment kapag natugunan nila ang lahat ng sumusunod na mga kondisyon:

• Sila ay hindi bababa sa 18 taong gulang.

• Nakapagtapos na o hindi na sila dumadalo ng high school, secondary school, o ng katumbas nito.

• Nakalipas na ang isang buong taon mula noong sila ay nakumpirma.

• Mayroon silang hangaring tanggapin at tuparin ang mga sagradong tipan sa templo sa buong buhay nila.

Ang mga miyembrong nakatanggap na ng mission call o naghahandang mabuklod sa templo ay dapat tanggapin ang endowment. Kinakausap din ng bishop ang iba pang mga adult na miyembro na nais tanggapin ang endowment.

Bago magbigay ng temple recommend para sa miyembro na tatanggap ng endowment, dapat madama muna ng bishop at stake president na ang tao ay handa para maunawaan at tuparin ang mga sagradong tipan sa templo. Ang pagpapasiya para sa pagiging karapat-dapat na ito ay ginagawa para sa bawat tao. Ang mga lider ay hindi gumagawa ng pangkalahatang pamantayan, tulad ng nakalista sa ibaba, kapag nagpapasiya kung ang isang tao ay handa nang tanggapin ang endowment:

• Maabot ang isang partikular na edad

• Aalis ng tahanan para pumasok sa kolehiyo, magtrabaho, o maglingkod sa military

• Nagnanais na mapanood ang pagbubuklod sa templo ng isang kapamilya o kaibigan

27.2.3

Pagpaplano at Pag-iiskedyul ng Endowment

27.2.3.1

Pagtanggap ng Recommend para sa mga Ordenansa para sa Buhay

Ang isang miyembro ay dapat tumanggap ng recommend para sa mga ordenansa para sa buhay upang makapasok sa templo at matanggap ang endowment. Para sa impormasyon tungkol sa mga recommend na ito, tingnan ang 26.5.1.

27.2.3.2

Pagkontak sa Templo

Ang mga miyembrong nagpaplanong tumanggap ng endowment ay dapat kontakin nang maaga ang templo upang ipa-iskedyul ang ordenansa (tingnan sa 27.1.2). Ang templo ay magbibigay ng mga tagubilin, kabilang na ang impormasyon tungkol sa kasuotan sa templo, kapag naka-iskedyul na ang ordenansa.

27.2.3.3

Mga Escort para sa mga Miyembrong Tatanggap ng Endowment

Ang mga miyembrong tatanggap ng sarili nilang endowment ay maaaring anyayahan ang isang miyembrong nakatanggap na ng endowment para gumanap bilang escort at tumulong sa kanila sa sesyon ng endowment. Ang escort ay dapat mayroong current temple recommend. Ang templo ay maaaring magbigay ng isang escort kung kinakailangan.

27.3

Pagbubuklod ng Mag-asawa

“Ang pamilya ay inorden ng Diyos. Ang kasal sa pagitan ng lalaki at babae ay mahalaga sa Kanyang walang hanggang plano” (“Ang Mag-anak: Isang Pagpapahayag sa Mundo”). Ang pagbubuklod sa templo ay nagbubuklod sa mag-asawa sa buhay na ito at sa buong kawalang-hanggan. Ang mga mag-asawang nabuklod sa templo ay pinangangakuan ng kaluwalhatian at kagalakan sa buong kawalang-hanggan (tingnan sa Doktrina at mga Tipan 132:19–20). Matatanggap nila ang mga pagpapalang ito kung sila ay magiging tapat sa mga tipang ginagawa nila sa templo. Sa pamamagitan ng ordenansang ito, ang kanilang mga anak ay maaari ding maging bahagi ng kanilang walang hanggang pamilya.

Hinihikayat ng mga lider ng Simbahan ang mga miyembro na maghandang maikasal at mabuklod sa templo. Sa mga lugar na hindi kinikilala ng batas ang kasal sa templo, ang mga awtorisadong lider o iba pang awtorisadong tao ay maaaring magsagawa ng kasal na sibil na susundan naman ng pagbubuklod sa templo (tingnan sa 38.3). Maaari din itong gawin kung ang kasal sa templo ay magiging dahilan para madama ng mga magulang o malalapit na kapamilya na hindi sila kabilang dahil hindi sila makadadalo sa seremonya sa templo.

27.3.1

Sino ang Maaaring Mabuklod sa Templo

Lahat ng miyembrong may pananagutan na walang asawa ay inaanyayahang maghanda para sa pagbubuklod sa templo. Ang mga ikinasal sa sibil na seremonya ay hinihikayat na mabuklod para sa buhay na ito at sa kawalang-hanggan sa templo sa sandaling maging handa na sila. Ang mga miyembro ay kailangang tumanggap muna ng endowment bago sila mabuklod (tingnan sa 27.2).

Ang mga ibubuklod sa templo ay dapat na (1) ikinasal na sa sibil na seremonya bago mabuklod o (2) sabay na ikakasal at ibubuklod sa templo. Tingnan sa 27.3.2.

27.3.1.1

Mga Miyembrong Ibinuklod sa Dating Asawa

Tingnan sa 38.4.1.

27.3.1.2

Mga Miyembrong May mga Kapansanan sa Pag-iisip

Ang mga miyembrong may kapansanan sa pag-iisip ay maaaring ibuklod sa kanilang asawa, nobyo, o nobya kung:

• Natanggap na nila ang lahat ng paunang kinakailangang mga ordenansa, kabilang na ang endowment (tingnan sa 27.2.1.3).

• May kakayahan sila sa pag-iisip na maunawaan, gawin, at tuparin ang kaugnay na mga tipan.

Kakausapin ng bishop ang miyembro at ang kanyang asawa, nobyo, o nobya. Hinahangad niya rin ang patnubay ng Espiritu. Maaari siyang sumangguni sa stake president. Maaaring iparating ng stake president ang mga tanong sa Office of the First Presidency kung kinakailangan. Tingnan sa 38.2.4.

27.3.2

Pagpaplano at Pag-iiskedyul ng Pagbubuklod sa Templo

27.3.2.1

Pagtanggap ng Recommend para sa mga Ordenansa para sa Buhay

Ang isang miyembro ay dapat makatanggap ng recommend para sa mga ordenansa para sa buhay upang maibuklod sa kanyang asawa. Para sa impormasyon tungkol sa mga recommend na ito, tingnan ang 26.3.

27.3.2.2

Pagkontak sa Templo

Ang mga miyembrong nagpaplanong mabuklod sa asawa ay dapat kontakin nang maaga ang templo upang ipa-iskedyul ang ordenansa (tingnan sa 27.1.2). Ang templo ay magbibigay ng mga tagubilin kapag naka-iskedyul na ang ordenansa.

27.3.2.3

Pagkuha ng Marriage License

Bago ikasal, dapat munang kumuha ang magkasintahan ng legal na marriage license na balido sa lugar kung saan isasagawa ang kasal. Kung plano ng magkasintahan na ikasal at ibuklod sa iisang seremonya, dapat nilang dalhin ang balidong marriage license sa templo.

Hindi na kailangang magdala ng marriage license sa templo kung sila ay ibubuklod pagkatapos ng kasal na sibil. Sa halip ay ibinibigay nila ang petsa at lugar ng kanilang kasal na sibil bilang bahagi ng record verification process.

27.3.2.4

Mga Escort para sa mga Ikakasal

Ang ikakasal na babae ay maaaring samahan ng isang babaeng nakatanggap na ng endowment na tutulong sa kanya sa dressing room. Maaari din itong gawin ng isang lalaking nakatanggap na ng endowment para sa ikakasal na lalaki. Ang escort ay dapat mayroong current temple recommend. Ang templo ay maaaring magbigay ng isang escort kung kinakailangan.

27.3.2.5

Sino ang Nagsasagawa ng Pagbubuklod sa Templo

Ang pagbubuklod sa templo ay karaniwang isinasagawa ng isang sealer na nakatalagang maglingkod sa templo kung saan ibubuklod ang mag-asawa. Kung ang isang kapamilya o kaibigan ay mayhawak ng awtoridad na magbuklod at nakatalagang maglingkod sa templo kung saan ibubuklod ang mag-asawa, maaari nila siyang anyayahan na isagawa ang pagbubuklod.

Maaari ding hingin ng isang sealer ang pag-apruba ng Unang Panguluhan para magsagawa ng pagbubuklod ng kanyang mga direktang inapo (mga anak, apo, at apo sa tuhod) sa isang templo kung saan hindi siya nakatalagang maglingkod. Dapat ay matanggap niya ang liham mula sa Unang Panguluhan na nagbibigay ng awtorisasyon para sa gayong pagbubuklod. Ipakikita niya sa templo ang sulat.

Ang mga miyembro ay hindi hinihikayat na hilingan ang mga General Authority na magsagawa ng kanilang pagbubuklod sa templo.

27.3.2.6

Angkop na Kasuotan para sa Pagbubuklod sa Templo

Damit ng Babae na Ikakasal. Ang damit na isusuot ng ikakasal na babae sa loob ng templo ay dapat kulay puti, disente ang disensyo at tela, at walang maraming palamuti. Dapat din nitong matakpan ang temple garment. Ang maninipis na tela (sheer fabric) ay dapat lagyan ng karagdagang tela sa ilalim nito.

Upang tumugma sa iba pang mga damit na isinusuot sa loob ng templo, ang damit ng ikakasal na babae ay dapat may mahabang manggas o manggas na abot hanggang sa may pagitan ng siko at kamay. Ang mga damit ay dapat walang mahabang buntot (train) maliban kung maaari itong tanggalin para sa seremonya ng pagbubuklod.

Ang templo ay maaaring magpahiram ng damit kung kailangan o gusto.

Damit ng Lalaki na Ikakasal. Sa sermonya ng pagbubuklod, ang lalaki ay nagsusuot ng karaniwang kasuotan sa templo (tingnan sa 38.5.1 at 38.5.2). Maaari siyang magsuot ng pormal na damit sa labas ng templo para sa pagpaparetrato pagkatapos ng seremonya.

Damit ng mga Bisita. Ang mga dumadalo sa seremonya ng pagbubuklod ay dapat magsuot ng damit na katulad ng isusuot nila sa sacrament meeting. Dapat iwasan nilang magsuot ng damit na kaswal o damit na hindi natatakpan ang temple garment. Dapat din nilang iwasang magsuot ng mga damit na masyadong pormal, tulad ng tuxedo.

Ang mga miyembrong dadalo sa isang pagbubuklod nang diretso mula sa isang endowment session ay maaaring magsuot ng ceremonial temple clothing.

Dapat ibahagi ng mga mag-asawa ang impormasyong ito sa kanilang mga bisita bago pa ang pagbubuklod.

Mga bulaklak. Ang mag-asawa at mga bisita nila ay dapat walang dala o suot na mga bulaklak sa seremonya ng pagbubuklod. Ang mga bulaklak ay maaaring isuot sa labas ng templo para sa pagpaparetrato pagkatapos ng seremonya. Dapat ibahagi ng mga mag-asawa ang impormasyong ito sa kanilang mga bisita bago pa ang pagbubuklod.

27.3.2.7

Pagpapalitan ng mga Singsing Pagkatapos ng Pagbubuklod sa Templo

Ang pagpapalitan ng mga singsing ay hindi bahagi ng seremonya ng pagbubuklod sa templo. Gayunman, ang mga mag-asawa ay maaaring magpalitan ng mga singsing pagkatapos ng seremonya sa sealing room. Ang mga mag-asawa ay hindi dapat magpalitan ng mga singsing sa ibang oras o lugar sa loob ng templo o sa bakuran ng templo. Ang paggawa nito ay maaaring maging dahilan para maalis ang atensyon sa seremonya.

Ang mga mag-asawang ikinasal at ibinuklod sa iisang seremonya ay maaaring magpalitan ng mga singsing sa ibang oras para sa mga kapamilya na hindi nakadalo sa pagbubuklod sa templo. Ang pagpapalitan ng singsing ay dapat naaayon sa kagalang-galang na katangian ng isang pagbubuklod sa templo. Hindi dapat gayahin sa pagpapalitan ng mga singsing ang anumang bahagi ng seremonya ng pagbubuklod sa templo. Ang mag-asawa ay hindi dapat magpalitan ng mga pangako pagkatapos mabuklod sa templo.

Ang mga mag-asawang ikinasal sa sibil na seremonya bago ang kanilang pagbubuklod sa templo ay maaaring magpalitan ng mga singsing sa sibil na seremonya, sa kanilang pagbubuklod sa templo, o sa parehong seremonya.

27.3.3

Kasal sa Loob ng Templo para sa Buhay na Ito Lamang

Ang layunin ng templo ay pangasiwaan ang mga ordenansa para sa kawalang-hanggan. Dahil dito, ang mga kasal para sa buhay na ito lamang ay hindi na isinasagawa sa mga templo.

Para sa patakaran tungkol sa pagbubuklod ng mag-asawa na ikinasal sa templo para sa buhay na ito lamang, tingnan ang 38.4.1.7.

27.3.4

Sino ang Maaaring Dumalo sa Isang Pagbubuklod sa Templo

Ang kanilang malalapit na kapamilya at kaibigan lamang ang dapat anyayahan ng mga mag-asawa sa kanilang pagbubuklod sa templo. Ang mga miyembrong may pananagutan ay dapat nakatanggap na ng endowment at mayroong current temple recommend para makadalo.

Ang ilang mga member of record ay hindi binibinyagan dahil sa kapansanan sa pag-iisip, at ang ilan ay binibinyagan ngunit hindi binibigyan ng endowment para sa kaparehong kadahilanan. Sila ay maaaring iawtorisa ng stake president na mapanood ang pagbubuklod sa templo ng kanilang mga buhay na kapatid kung sila ay:

• Edad 18 pataas.

• May kakayahang manatiling mapitagan habang isinasagawa ang seremonya.

Ang stake president ay susulat ng isang liham na nagsasabi na ang tao ay awtorisadong mapanood ang pagbubuklod. Ang sulat na ito ay ipakikita sa templo.

Ang mga miyembro ay kailangang nakatanggap na ng endowment at may current temple recommend para mapanood ang pagbubuklod ng kanilang mga magulang.

Para sa impormasyon tungkol sa kung sino ang maaaring dumalo sa pagbubuklod ng mga buhay na anak sa mga magulang, tingnan ang 27.4.5.

27.3.5

Mga Reception sa Kasal

Tingnan ang 38.3.4 para sa impormasyon tungkol sa pagdaraos ng mga reception sa kasal sa mga gusali ng Simbahan.

27.4

Pagbubuklod ng mga Nabubuhay na Anak sa mga Magulang

Ang mga anak na isinilang matapos mabuklod ang kanilang ina sa isang asawang lalaki sa loob ng templo ay isinilang sa loob ng tipan ng pagbubuklod na iyon. Hindi nila kailangang matanggap ang ordenansa ng pagbubuklod sa mga magulang.

Ang mga anak na hindi isinilang sa loob ng tipan ay maaaring maging bahagi ng isang walang-hanggang pamilya sa pamamagitan ng pagbubuklod sa kanilang tunay na mga magulang o mga magulang na umampon sa kanila. Ang mga anak na ito ay may karapatan sa kaparehong mga pagpapala na para bang sila ay isinilang sa loob ng tipan.

Tingnan ang 38.4.2 para sa mga patakaran tungkol sa pagbubuklod ng mga anak sa mga magulang.

27.4.1

Pagbibigay ng Recommend para sa Pagbubuklod ng Nabubuhay na mga Anak sa mga Magulang

Kailangan ng mga miyembrong may pananagutan na edad 8 pataas ang isang recommend para maibuklod sa kanilang mga magulang. Kailangan din nila ng recommend para mapanood ang pagbubuklod ng kanilang mga nabubuhay na kapatid o kinakapatid (stepsibling o half sibling) sa kanilang mga magulang (tingnan sa 27.4.4). Ang mga batang edad 8 pataas ay dapat nabinyagan at nakumpirma na para makatanggap ng temple recommend. Ang mga lalaking edad 11 na magiging 12 taong gulang sa taon kung kailan gagawin ang ordenansa o mas matanda pa ay kinakailangan ding magkaroon muna ng priesthood.

Ang mga miyembrong edad 21 pataas ay dapat nakatanggap na ng endowment at mayroong current temple recommend para mabuklod sa kanilang mga magulang.

Ang mga taong hindi pa nabibinyagan o hindi pa nakakatanggap ng endowment dahil sa kapansanan sa pag-iisip ay maaaring iawtorisa ng stake president na mabuklod sa kanilang mga magulang. Ang stake president ay susulat ng isang liham na nagsasabi na ang tao ay awtorisadong mabuklod. Ang sulat na ito ay ipakikita sa templo.

Tingnan ang 26.4.4 para sa impormasyon tungkol sa pagbibigay ng recommend sa mga bata.

27.4.2

Pagkontak sa Templo

Ang mga mag-asawang nagnanais na maibuklod sa kanila ang kanilang mga anak, o ang mga anak na nagnanais na maibuklod sa kanilang mga yumaong magulang, ay dapat kontakin nang maaga ang templo upang ipa-iskedyul ang ordenansa (tingnan sa 27.1.2). Sa ilang pagkakataon, maaaring kailanganin munang isagawa ang ibang mga ordenansa sa templo bago maaaring maganap ang pagbubuklod.

27.4.3

Pag-aalaga sa mga Bata

Tingnan sa 27.1.6.

27.4.4

Sino ang Maaaring Magsagawa ng Pagbubuklod ng mga Buhay na Anak sa mga Magulang

Ang pagbubuklod ng mga buhay na anak sa mga magulang ay karaniwang isinasagawa ng isang sealer na nakatalaga sa templo kung saan isasagawa ang pagbubuklod. Kung ang isang kapamilya o kaibigan ay mayhawak ng awtoridad na magbuklod at nakatalagang maglingkod sa templo kung saan isasagawa ang pagbubuklod, maaari siyang anyayahan na isagawa ang pagbubuklod.

Maaari ding hingin ng isang sealer ang pag-apruba ng Unang Panguluhan para magsagawa ng pagbubuklod ng mga buhay na anak sa mga magulang para sa kanyang mga direktang inapo (mga anak, apo, at apo sa tuhod) sa isang templo kung saan hindi siya nakatalagang maglingkod. Dapat ay matanggap niya ang liham mula sa Unang Panguluhan na nagbibigay ng awtorisasyon para sa gayong pagbubuklod. Ipakikita niya sa templo ang sulat.

Ang mga miyembro ay hindi hinihikayat na hilingan ang mga General Authority na magsagawa ng pagbubuklod ng mga buhay na anak sa mga magulang.

27.4.5

Sino ang Maaaring Dumalo sa Pagbubuklod ng mga Buhay na Anak sa mga Magulang

Para mapanood ang pagbubuklod ng kanilang mga buhay na kapatid o kinakapatid (stepsibling o half sibling) sa kanilang mga magulang, ang mga miyembrong hindi pa nakatanggap ng endowment na wala pang 21 taong gulang ay dapat isinilang sa loob ng tipan o nabuklod na sa kanilang mga magulang. Bukod pa rito, ang mga batang edad 8 pataas ay dapat nabinyagan at nakumpirma na at dapat mayroong current temple recommend (tingnan sa 26.4.4). Ang mga lalaking edad 11 na magiging 12 taong gulang sa taon kung kailan gagawin ang ordenansa o mas matanda pa ay kinakailangan ding magkaroon muna ng priesthood.

Ang mga miyembrong edad 21 pataas ay dapat nakatanggap na ng endowment at mayroong current temple recommend para mapanood ang gayong mga pagbubuklod.

Ang mga miyembrong may asawa na wala pang 21 taong gulang ay hindi kailangang tumanggap ng endowment para mapanood ang gayong mga pagbubuklod. Gayunman, dapat mayroon silang current temple recommend (tingnan sa 26.4.4).

Ang ilang mga member of record ay hindi binibinyagan dahil sa kapansanan sa pag-iisip, at ang ilan ay binibinyagan ngunit hindi binibigyan ng endowment para sa kaparehong kadahilanan. Maaari silang bigyan ng awtorisasyon ng stake president na mapanood ang pagbubuklod ng kanilang mga buhay na kapatid, stepsibling, o half-sibling sa kanilang mga magulang. Ang stake president ay susulat ng isang liham na nagsasabi na ang tao ay awtorisadong mapanood ang pagbubuklod. Ang sulat na ito ay ipakikita sa templo.