Kūr ko im Bok in Bōk Meļeļe ko
29. Kweilo̧k ko ilo Kabun̄ in

“29. Kweilo̧k ko ilo Kabun̄ in,” Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata (2024).

“29. Kweilo̧k ko ilo Kabun̄ in,” Bok in Bōk Meļeļe Eļap.

m̧am̧a eo im leddik eo nejin ilo kweilo̧k in kwojkwoj eo

29.

Kweilo̧k ko ilo Kabun̄ in

29.0

Kadkad in

Armej ro Rekwojarjar ilo Raan Ko Āliktata rej kweilo̧k ippān doon n̄an kabun̄jar, kōketak doon, im katakin im ekkatak kōn gospel eo (lale Alma 6:6; Moronai 6:5–6). Rilo̧mo̧o̧r eaar kallim̧ur, “Bwe ijo ruo ak jilu rej kweilo̧klo̧k ilo eta, Ij pād eoļōpaer” (Matu 18:20) Kweilo̧k ippān doon ej juon wāween būruwōd remaron̄ “kuk ippān doon ilo bōrokuk im ilo iakwe n̄an doon” (Mosaia 18:21).

Kweilo̧k ko an ritōl rejipan̄ ritōl ro ko̧o̧njeļ ippān doon im loloorjake kijejeto ko n̄an jerbal n̄an ro jet. Ijo wōt ke, kōm̧m̧ane juon kweilo̧k ejjab aikuj in bōk jikin jerbal im jerbal in karejar eo āinwōt an kar Jisōs Kraist kōm̧m̧ane. Wāween ko n̄an jipan̄ Anij ilo jerbal in lo̧mo̧o̧r eo an An im mour ijo eutiej tata maron̄ in karōk ilo juon kweilo̧k, ak ekkā an dedeļo̧k itulikin kweilo̧k eo.

29.1

Ļōmake im Kōjeikik Kweilo̧k ko

Ritōl ro rej karōk im kōjeikiik kweilo̧k ko “āinwōt an Jetōb Kwojarjar tōl er, ekkar n̄an kien im revelesōn ko an Anij” (Katak im Bujen Ko 20:45; lale barāinwōt Moronai 6:9; Katak im Bujen Ko 46:2). Rej pukōt wāween ko n̄an karuwaineneiktok im̧we eo an Jetōb ilo kweilo̧k ko aer.

Ritōl ro rej kanooj lale bwe jon̄an im aitokan kweilo̧k ko ren jab kadodoik membōr ro ak baam̧le ko aer. N̄an waanjon̄ak, kweilo̧k ko rejjab aikuj in kōm̧m̧an bwe en pen n̄an baam̧le ko n̄an an wōr aer iien ippān doon ilo raan in Jabōt.

Ritōl ro rej barāinwōt kanooj lale bwe kweilo̧k ko ren pedped wōt ioon ta eo aorōk tata. N̄an waanjon̄ak, kweilo̧k in kwojkwoj ko rej aikuj pedped wōt ioon kwojkwoj eo im kalōk tōmak ilo Jisōs Kraist. Kweilo̧k ko an būreejtōnji im kweilo̧k ko an ko̧o̧njeļ ren pedped wōt ioon kōkajoorļok kajjojo armej im baam̧le ko.

Opija eo ej tōl emaron̄ kōjeikik kweilo̧k eo. Ak e ļeo ak e lio remaron̄ kajjitōk ippān bar juon, eo āinwōt rikakpilōklōk eo, n̄an kōjeikik ium̧win tōl eo an.

Ilo jet iien men ko rej waļo̧k ilo juon iien kweilo̧k me opija eo ej tōl ej en̄jake juon aikuj n̄an kalikkare. N̄an waanjon̄ak, juon emaron̄ in katakin katak eo ebōd. Eļan̄n̄e ej waļo̧k, opija eo ej tōl ej aikuj in kailikkare ilo an jab kajook jabdewōt.

29.2

Kweilo̧k ko an Ward

29.2.1

Kweilo̧k in Kwojkwoj eo

29.2.1.1

Karōke Kweilo̧k in Kwojkwoj eo

Bisoprik eo ej kōtōbaļe im kōjeikik kweilo̧k in kwojkwoj eo. Rej kanooj lale bwe jibadbad eo an kweilo̧k eo ej ikijen kwojkwoj eo im kalōk tōmak ilo Jisōs Kraist.

Kweilo̧k in kwojkwoj eo aitokan ej juon awa. Emaron̄ koba men kein rej ellaajrak:

  1. Kōjan̄ ainikien kōjan̄jan̄ wōt m̧oktak jān ijjino (lale lale 19.3.2 n̄an unin tōl ko). Al kōjan̄jan̄ in kautiej ko m̧okta jān an ijjino kweilo̧k eo emaron̄ akjoketok juon jitbōn kabun̄jar.

  2. Iak iakwe im karuwainene.

  3. Kile routiej ro an Kabun̄ in im rej tōl ak ritōl ro jet me rej lotok. Routiej ro an Kabun̄ rej tōl in im high ko̧o̧ņjeļ ro rej lotok rej aikuj karuwaineneik er n̄an jijet ijo im̧aan. Opija ro Routiej rej barāinwōt ruwainene n̄an jijet ijo im̧aan ijello̧kin n̄e rej etal n̄an ward eo aer.

  4. Kōjjeļā ko. Kōjjeļā kein rej aikuj kadu. Elōn̄ wōt iaer remaron̄ būriini, kwaļo̧k ilo jekjek in electronic, ak kwaļo̧ki ilo kweilo̧k ko jet.

  5. Al in kōppeļļo̧k im jar. Lale 19.3.2 im 29.6.

  6. Pejnej ko an ward im stake, āinwōt kein rej ellaajrak:

    • Rejtake im kōtļo̧k opija ro im rūkaki ro (lale 30.3 im 30.6).

    • Jake m̧aantak etan em̧m̧aan ro rejitōn bōro n̄an ekkapit n̄an juon opij ilo Priesthood eo an Aron (lale 18.10.3).

    • Kile membōr ro rekāāl an ward eo, ekoba rioktak ro rekāāl. Ālkin jet naan kwaļo̧k kadkad, armej eo ej kōjeikik ej kajjitōk ippān jarlepju eo n̄an kwaļo̧k ilo aer kotak peier ke rej karuwaineneik membōr eo n̄an ward eo.

      N̄e ajri ro me ewōr aer rekoot rej peptaij im kapene, rej kile er ilo iien kweilo̧k in kwojkwoj eo. Ijo wōt ke, rejjab aikuj in kajutak er n̄an karuwaineneik er tok n̄an ward eo.

  7. Leļo̧k āt im kōjeraam̧m̧an ajri ro (lale 18.6). Menin ekkā an dedeļo̧k ilo kweilo̧k in jitlo̧k im kwaļo̧k naan in kam̧ool eo (lale 29.2.2).

  8. Kapen rioktak ro rekāāl (lale 18.8).

  9. Al in kwojkwoj ko im leto letak eo an kwojkwoj eo. Kwojkwoj eo ej men eo eaorōk tata jej aikuj mije ilo kweilo̧k eo. M̧ōttan ko jet ilo kweilo̧k eo rejjab aorōk in wōt iien kwojkwoj eo. Kain̄i in ej juon iien em̧m̧an n̄an membōr ro n̄an kaiookļo̧k ļōmņak ko aer n̄an Rilo̧mo̧o̧r im katok eo An n̄an er. Ej aikuj juon iien ekwojarjar n̄an kōkāāl ilo mour in jetōb.

    Tebōļ in kwojkwoj eo ej aikuj pojak m̧okta jān an jino kweilo̧k in kwojkwoj eo. Bisop eo ej kanooj lale bwe kwojkwoj eo en kōjeraam̧m̧an im leto letak ilo juon wāween kautiej im emeļak. Ro me rej kōm̧m̧ane kwojkwoj eo rej jutak ilo etan Jisōs Kraist.

    N̄an meļeļe ko kōn m̧aanjabpopo, kōjeraam̧m̧an, im letok letak kwojkwoj eo, lale 18.9.

    N̄an meļeļe ko kōn leto letak kwojkwoj eo ilo jekjek ko reinjuon, lale 29.2.1.5 im 18.9.1.

  10. Ennaan ko an gospel eo im al eo an jarlepju eo ak al ko jet. Ennaan ko im al ko rej aikuj in jokkun wōt juon ippān paaktok kwojarjar eo an kwojkwoj eo. N̄an meļeļe ko kōn ekāālel rikōnono ro, lale 29.2.1.4. N̄an eļapļo̧k meļeļe kōn al ko kāāleti ilo kweilo̧k in kwojkwoj eo, lale 19.3.2.

  11. Al im jar in ikkilōk.

  12. Al kōjan̄jan̄ ko ālkin jar.

Kein alooj ko im kein ron̄jake ko rej aikuj jab kōjerbali ilo kweilo̧k in kwojkwoj ko (lale 38.8.3).

29.2.1.2

Tōl ilo Kweilo̧k in Kwojkwoj eo

Bisop eo ej tōl ilo kweilo̧k in kwojkwoj eo ijello̧kin wōt n̄e ewōr juon membōr in stake būreejtōnji, Eria Jiljilimjuonn̄oul eo ilo eria eo an, ak juon Ritōl ro Routiej an Kabun̄ in ej pād. Eļan̄n̄e bisop eo im rikakpilōklōk ro an rejjab maron̄ pād ilo kweilo̧k in kwojkwoj eo, stake būreejtōn ej jitōn̄ wōn eo ej tōl. Ekkā an jitōn̄ būreejtōn eo an doulul eo an elder ro. Ijoke wōt ke, e emaron̄ kūrtok bar juon rikabwijer Melkisedek Priesthood eo.

29.2.1.3

Awa eo m̧okta jān Kweilo̧k eo

M̧okta jān an ijjino kweilo̧k eo, ro uwaan jarlepju eo rej kōppopo ilo jetōb n̄an kweilo̧k eo. Rej maron̄ kōm̧m̧ane menin ilo aer ikōn̄ im jar im kejokļo̧kjeņ. Ritōl ro rej kōm̧m̧ane juon waanjon̄ak in kautiej.

Juon membōr in bisoprik eo ej karuwaineneik būreejtōni ko an Doulul eo an Jiron̄ n̄an karōk jerbal in karejar ko an jodikdik ro ilo aer karuwaineneik rilotok im membōr ro tok n̄an lowaan im̧ōn jar eo. Jodikdik ro rej kajeon̄ n̄an iakiakwe membōr ro kōn etaer. Rej kajeon̄ bar kwaļok kautiej ilo aer uwaake kajjitōk ko im jipan̄ armej ro kappok aer jea n̄e rej aikuij.

29.2.1.4

Ekāālel Rikōnono ro.

Bisoprik eo ej ekāālel rikōnono ro n̄an kweilo̧k in kwojkwoj eo. Emakijkij wōt aer kajjitōk ippān ro uwaan ward eo, ekoba jodikdik ro (lale 38.8.18). Stake būreejtōņ eo emaron̄ jitōn̄ high ko̧o̧njeļ ro ak membōr ro an būreejtōnji ro an doulul ko n̄an ekōnono. Stake būreejtōn eo ej kwaļo̧k emakijkij in kain ijjitōn̄ rot in.

Bisoprik eo ej leļo̧k kūr ko n̄an ekōnono m̧oktaļo̧k jān kweilo̧k eo. Rikōnono ro rej kwaļo̧k naan in kam̧ool kōn Jisōs Kraist im katakin kōn gospel eo An ilo aer kōjerbal jeje ko rekwojarjar (lale Katak im Bujen Ko 42:12; 52:9). Ennaan ko rej aikuj kalōk tōmak im jokkun wōt juon ippān aao eo ekwojarjar eo an kwojkwoj eo.

N̄an meļeļe ko kōn mijenede ro ej kab m̧ōj kūr er ak ro rej kab ro̧o̧ltok me rej kōnono ilo kweilo̧k in kwojkwoj eo, lale 24.5.2 im 24.8.3.

Bisoprik eo ej jikejuuļi juon kweilo̧k in kwojkwoj kajjojo iiō kōn iien kwaļo̧k ak presentation jān ajri ro ilo Būraimere. N̄an elōn̄ļo̧k meļeļe ko kōn iien kwaļo̧k in, lale 12.1.6.

em̧m̧aan eo ej kōnono ioon lokatok eo

29.2.1.5

pija ej bōk jikin, unin tōl ko n̄an ukukōti
 IIen Kwojkwoj ko ilo Jekjek ko Roktak

Aolep membōr ro rej aikuji kōjeraam̧m̧an ko an jetōb me rej itok jān bōk m̧ōttan kwojkwoj eo. Ijo wōt ke, jet membōr rejjab maron̄ pād ilo kweilo̧k in kwojkwoj eo kōnke rej pād wōt ilo im̧ōko im̧weer, ilo juon aujpitōļ, ilo juon im̧ōn lale rūtto. Bisop eo emaron̄ kappeik rikabwijer priesthood eo n̄an kōm̧m̧ane kwojkwoj eo n̄an membōr rein (lale 18.9.1).

Ilo jet jekjek, bisop eo emaron̄ kōmālim kweilo̧k in kwojkwoj eo ilo stream n̄an ro rejjab maron̄ kobatok. N̄an meļeļe ko, lale 29.7.

N̄e membōr ro rej ito itak ak jokwe ettoļo̧k jān m̧weo im̧weer ilo jidik iien, rej aikuj etal n̄an kweilo̧k in kwojkwoj eo ilo juon ward epaak eļan̄n̄e remaron̄. Iien kwojkwoj ko rejjaba ikuj kōm̧m̧an ilo ippān iien koba ko an baam̧le, iien kakkije (vacation), ak m̧akūtkūt ko jet rejjab kōmālim jān Kabun̄ in

29.2.2

Kweilo̧k in Jitlo̧k eo im Kwaļo̧k Naan in Kam̧ool eo

Ilo juon kweilo̧k in jitlo̧k im kwaļo̧k naan in kam̧ool, ejjeļo̧k rikōnono ro kar jitōn̄ er ak al ko kāāleti rejenolo̧k. Ijello̧kin, armej eo ej kōjeikik ej kwaļo̧k juon naan in kam̧ool ekadu. Innām ej karuwaineneik membōr ro an jarlepju eo n̄an kwaļo̧k naan in kam̧ool ko aer. N̄an kwaļo̧k naan in kam̧ool ej meļeļe in n̄an kean̄ kōn m̧ool ko an gospel eo āinwōt im̧we jān Jetōb Kwojarjar eo. Naan in kam̧ool ko rej aikuj in kadu bwe en lōn̄ armej ro ren maron̄ bōk koņaer.

Ajri ro reddik rej ruwainene n̄an kwaļo̧k naan in kam̧ool eo aer ilo kweilo̧k in jitlo̧k im kwaļo̧k naan in kam̧ool eo. Emaron̄ em̧m̧an tata n̄an er n̄an ekkatak n̄an kōm̧m̧ane āindein ilo m̧weo m̧ae iien eo rej maron̄ kwaļo̧k naan in kam̧ool ilo an ejjeļo̧k jipan̄ jān jabdewōt.

Ium̧win tōl eo an bisop eo, ekkā leļo̧k etan ajri ro im kōjeraam̧m̧an ilo kweilo̧k in jitlo̧k im kwaļo̧k naan in kam̧ool (lale 29.2.1.1).

29.2.3

Kweilo̧k eo eļap an Ward

Kweilo̧k eo eļap an ward ej karōk n̄an tōpar aikuj ko ijo jokwe ie. Ej koba kweilo̧k in kwojkwoj eo kar karōke jān stake būreejtōn eo. Stake būreejtōn eo ekkā an tōl ilo kweilo̧k eo, im juon membōr in bisoprik eo ekkā an kōjeikik.

Iien kweilo̧k in, juon membōr in stake būreejtōnji eo ak aae ko̧o̧njeļ eo ej kwalo̧k etan ritōl ro routiej, ritōl ro an stake, im ritōl ro an ward n̄an rejetak. E ej kōjerbal Officer Sustained form eo, kar kōpooje jān ward kūļōk eo. Bisop eo im stake būreejtōn eo ekkā aer kōnono ilo kweilo̧k eo.

Ward eo ej kōm̧m̧ane kweilo̧k ko an priesthood im doulul eo āinwōt m̧ōttan kweilo̧k eo eļap an ward eo. Ritōl ro an stake remaron̄ letok naan in kōmeļeļe im jipan̄. Rej jerbal in karejar n̄an ritōl ro an ward eo im membōr ro,

Ejja ekkejelļo̧k wōt ippān kweilo̧k eo eļap an ward eo, stake būreejtōnji eo ej kweilo̧k ippān bisoprik eo. Ippān doon rej etale eddōkļo̧k eo an jerbal in lo̧mo̧o̧r eo An im mour ijo eutiej tata ilo ward eo. Kweilo̧k in emaron̄ kōm̧m̧an ilo raan in Jabōt im ej kōm̧m̧ān kweilo̧k eo an ward ak ilo bar juon iien.

29.2.4

Kweilo̧k eo an Bisoprik

Bisop eo ej karōk im kōjeikik kweilo̧k ko an bisoprik. Jerbal ko n̄an ļōmņak kaki remaron̄ koba:

  • Loloorjake jerbal in lo̧mo̧o̧r eo an Anij im mour ijo eutiej tata ilo ward eo.

  • Kōkajoorļo̧k kajjojo armej im baam̧le ko ilo ward eo—eļap tata jodikdik ro im ajri ro.

  • Kile membōr ro me remaron̄ pojak n̄an bōk kain̄i ko, ekoba ekkapit ko an priesthood eo.

  • Kile membōr ro n̄an kūr er n̄an jerbal ko ilo ward eo.

  • Kile membōr ro me emaron̄ leļo̧k etaer n̄an stake būreejtōn eo n̄an jerbal āinwōt mijenede ro.

  • Etale naan in kōmeļeļe ko jān jeje ko rekwojarjar, ritōl ro an Kabun̄ in, im bok in bōk meļeļe in.

Aitōm ko jet remaron̄ koba doulul ko an ward eo im būrookraam̧ ko, bajōt eo an ward eo, riboot ko kōn ijjitōn̄ ko, im karōk ko kōn kweilo̧k ko rej itok wōt im m̧akūtkūt ko.

kweilo̧k eo an ward ko̧o̧njeļ

29.2.5

Kweilo̧k eo an Ward Ko̧o̧njeļ eo

Karōk ko an bisop eo, ej tōl, im kōjeikiik kweilo̧k ko an ward ko̧o̧njeļ eo. Eļan̄n̄e ej jako, emaron̄ jitōn̄ juon rikakpilōklōk n̄an tōl im kōjeikiik. Ijoke, ko̧o̧njeļ ejjab kōm̧m̧ani kāālet ko reļļap n̄e ejako bisop eo.

Ward ko̧o̧njeļ eo ej kappukot n̄an jipan̄ aolep membōr ro kalōk kajoor ilo jetōb, bōk kain̄i in lo̧mo̧o̧r ko, kōjparok bujen ko, im erom̧ rikaļoor ro rej wūjlepļo̧k an Jisōs Kraist (lale Moronai 6:4–5). Ilo iien kweilo̧k ko an ward ko̧o̧njeļ eo, ro uwaan ko̧o̧njeļ eo rej karōk im kōtōbalbal jerbal in. Rej kāālet ippān doon ekōjkan kōkajoorļo̧k im kōmaron̄ ro uwaan ward eo maron̄ kōjeraam̧m̧an ro rej pād ilo aikuj. Rej kappukot tōl eo an Jetōb ilo aer bōro kuk ilo iakwe im n̄ūrbōktak kōn membōr ro an ward eo.

Ritōl ro ilo doulul ko an ward eo rej pād ilo kweilo̧k in ko̧o̧njeļ ko ilo ruo eddo ko:

  1. Āinwōt ro uwaan ward ko̧o̧njel eo me rej jipan̄ kōjeraam̧m̧an aolep ro uwaan ward eo.

  2. Āinwōt ro rej itok ilo etan doulul ko aer.

N̄e rej kweilo̧k ippān doon, ro uwaan ward ko̧o̧njeļ eo rej ekōnono kōn jerbal ko me renaaj jeraam̧m̧an jān kijejeto ko reippān doon an aolepān ko̧o̧njeļ eo. Kajjojo membōr in ko̧o̧njeļ eo ej kōketak n̄an kwaļo̧k ļōmņak eo an im im̧we eo ilo jerbal kein.

Kweilo̧k ko an ward ko̧o̧njeļ ekkā aer jab aitokļo̧k jān juon awa. Rej ijjino kōn juon jar im ribbot ko ilo tukaduier kōn ijjitōn̄ ko jān kweilo̧k ko im̧aanļok. Ellaajrak ijin ilaļ rej aitōm ko me maron̄ ekōnono kaki. Ejjab bwe iien n̄an ekōnono kōn aolepāer ilo aolep kweilo̧k. Bisop ej likūt jerbal ko raorōk m̧oktata me eļap aikuji n̄an kōjeraam̧m̧an kajjojo armej im baam̧le ko.

  • Mour kōn gospel eo an Jisōs Kraist. Jipan̄ aolep membōr ro kalōk tōmak, bōk kain̄i in lo̧mo̧o̧r ko, im kōjparok bujen ko aer.

  • Kea kōn ro rej aikuj. Kwaļo̧k kein jipan̄ kko im kapeel ko n̄an kōjeraam̧m̧an kajjojo armej, baam̧le ko, im jukjuk in pād eo. Jipan̄ membōr ro ilo ward eo erom un̄n̄are peier make. (Lale jepta 22.)

  • Karuwaineneik aolep n̄an bōk gospel eo. Etale eddōkļo̧k eo an ro rej ekkatak kōn gospel eo, barāinwōt membōr ro rekāāl im membōr ro rej bar ro̧o̧ltok. Ekōnono kōn wāween ko memebōr ro remaron̄ kwaļo̧k gospel eo ippān ro jet. (Lale jepta 23.)

  • Kobaik baam̧le ko n̄an mour indeeo. Etale eddōkļo̧k eo an membōr ro me rej m̧aanjabpopo n̄an bōk kain̄i ko an tampeļ. Karōk wāween ko n̄an jipan̄ elōn̄ļo̧k membōr karbōb n̄an bōk juon peba in mālim inn deļon̄e tampeļ. Ekōnono kōn wāween ko membōr ro remaron̄ bōk koņaer ilo jerbal in tampeļ im menmenbwij an baam̧le. (Lale jepta 25.)

Ilo an ro uwaan ward ko̧o̧njeļ eo ekōnono kōn jerbal kein, rej ļōmņak kōn aikuj ko im kōkajoorļo̧k ko an membōr ro rej jerbal n̄an er. Remaron̄ ekkatak kōn aikuj ko im kajoorļo̧k ko ilo kweilo̧k ko an būreejtōnji eo, ilo ekōnono ko ippān membōr ro an doulul ko aer (ekoba intōrpiu an jerbal in karejar ko), im kōn kijejeto in jerbal in karejar ko aer make. Ilo kakobaba, Leader and Clerk Resources ewōr ie kein jerbal ko im riboot ko me remaron̄ jipan̄ ritōl ro jeļā kōn eddōkļo̧k eo an membōr ro. Mem̧bōr ro an ko̧o̧njeļ eo rej aikuj dāpij wōt ittiņo eo an jabdewōt meļeļe an juon make ak raorōk (lale 4.4.6).

Ward ko̧o̧njeļ rej aikuj jeļā kōn ajri ro im jodikdik ro ilo ward eo im jekjek ko aer ilo im̧weo im̧weer. Rej kanooj leļo̧k aer n̄an ro me ejjeļok rejtak an gospel n̄a er ilo m̧weo im̧weer.

Ālkin juon iien ekōnono, bisop eo emaron̄ jim̧or jokāālet wāween eo n̄an ņa mejļan ak karum̧wijļo̧k ekōnono eo ilo an pukōt eļapļo̧k meļeļe im unin tōl. Ak emaron̄ leļo̧k jerbal eo n̄an bar juon ko̧o̧ņjeļ, eo āinwōt an bisoprik eo. Lale 4.4.3.

Jet iien ward ko̧o̧njeļ eo emaron̄ kōmlet bwe juon m̧akūtkūt an ward e emaron̄ jipan̄ tōpar aikuj ko an membōr ro. Ward ko̧o̧njeļ eo emaron̄ bōk eddo in karōk m̧akūtkūt ko an ward eo. Ijo wōt ke, eļapļo̧k wōt iaan karōk eo ej kōm̧m̧an m̧okta im ālkin kweiļo̧k ko an ko̧o̧njeļ eo. Kōn meļeļe ko reļļapļo̧k kōn m̧akūtkūt ko, lale jepa 20.

Ālkin an mijenede ro rej jerbal aolep raan ro̧o̧ltok n̄an kapijuknen, maron̄ kajjitōk ippāer n̄an riboot kōn mijen eo aer n̄an ward ko̧o̧ņjeļ eo (lale 24.8.3).

N̄an meļeļe kōn pedped in katak ko me rej tōl kweilo̧k ko ko̧o̧njeļ eo ilo Kabun̄ in, aolep ro uwaan ko̧o̧ņjeļ eo rej aikuj ekkatak 4.3 im 4.4.

4:37

29.2.6

Kweilo̧k an Ko̧o̧njeļ eo an Jodikdik an Ward eo

Bisop eo emaron̄ kōjeikik kweilo̧k ko an ko̧o̧njeļ an jodikdik ro an ward eo. Ak e emaron̄ kappeik bar juon n̄an kōm̧m̧ane, ro āinwōt rijjipan̄ ro an an doulul eo an pris ro ak būreejtōn eo an kūlaaj eo erūtto tata an Doulul eo an Jiron̄ ro. Kweilo̧k ko an ko̧o̧njeļ eo an jodikdik ro an ward ej letok iien ko rem̧m̧an n̄an jodikdik ro n̄an tōl. Bisoprik eo ak ritōl ro jet remaron̄ jipan̄ er m̧aanjabpopo n̄an kweilo̧k kein ilo kweilo̧k ko an būreejtōnji eo an doulul eo ak kūlaaj eo.

M̧okta jān kajjojo kweilo̧k, bisop eo im armej eo ej kōjeikik rej etale aitōm ko n̄an ekōnono kaki. Aitōm kein remaron̄ koba men kein:

  • Jerbal in lo̧mo̧o̧r eo an Anij im mour ijo eutiej tata.

  • Aikuj ko an jodikdik ro ilo ward eo im wāween ko n̄an ņa mejļaer.

  • Kijejeto ko n̄an pukōtļo̧k jodikdik ro me rejeniknik ak membōr ro rekāāl.

  • M̧akūtkūt ko, ekoba iien ko rem̧m̧an n̄an jerbal n̄an ro rej pād ilo aikuj. Elōn̄ wōt iaan karōk ko rej kōm̧m̧an ilo kweilo̧k ko an būreejtōnji eo an doulul eo ak kūlaaj eo (lale jebta 20).

  • Jerbal in karejar (Lale jebta 20

  • Kajineet būreejtōnji ro rekāāl me rej kab kūr er n̄an doulul im kūlaaj ko.

N̄an meļeļe kōn pedped in katak ko me rej tōl kweilo̧k ko an ko̧o̧njeļ eo ilo Kabun̄ in, aolep ro uwaan ko̧o̧ņjeļ eo rej aikuj ekkatak 4.3 im 4.4.

29.2.7

Kweilo̧k ko im Kūlaaj ko Jet an Ward eo

Kweilo̧k ko n̄an doulul ko an priesthood eo im būreejtōnji ro aer rej kōmeļeļeik ilo jebta ko 8 im 10.

Kweilo̧k ko n̄an kōrā ro ilo Doulul eo an Kōrā ro im ritōl ro aer rej kōmeļeļeik ilo jebta 9.

Kweilo̧k ko n̄an jiron̄ ro im ritōl ro aer rej kōmeļeļeik ilo jebta 11.

Kweilo̧k ko n̄an ajri ro ilo Būraimere im ritōl ro aer rej kōmeļeļeik ilo jebta 12.

Kūlaaj ko an Jabōt Jikuuļ rej kōmeļeļeik ilo 13.3.

Kweilo̧k ko an ko̧o̧njeļ eo an rūkaki rej kōmeļeļeik ilo 17.4.

Kweilo̧k in kōtōbalbal ko n̄an jerbal in jaketo jaketak gospel eo im kōkajoorļo̧k membōr ro rekāāl im membōr ro rej bar ro̧o̧ltok rej kōmeļeļeik ilo 23.4.

Kweilo̧k in kōpeļaak ko n̄an jerbal in tampeļ im menmenbwij an baam̧le rej kōmeļeļeik ilo 25.2.7

kweilo̧k an ward koonjeļ

29.2.8

pija ej bōk jikin, laajrak in tōl n̄an ukukōt wāween tōl ko ekkar n̄an jekjek ko
 Jikejuuļ ko n̄an Kweilo̧k ko ilo Jabōt

Ward ko rej kōjerbal juon iaan jikejuuļ ko ruo-awa n̄an kweilo̧k ko ilo Jabōt.

Karōk 1

60 minit ko

Kweilo̧k in kwojkwoj eo

10 minit

Iien jānji n̄an kūlaaj ko im kweilo̧k ko

50 minit

Aolep Jabōt ko: Būraimere, ekoba nursery eo (lale 12.2.1.2).

Jabōt juon im jilu ilo juon allōn̄: Jabōt Jikuuļ (lale 13.3).

Jabōt ruo im emān: kweilo̧k ko an doulul eo an priesthood (lale 8.2.1.2 im 10.2.1.2), kweilo̧k ko an Doulul eo an Kōrā ro (lale 9.2.1.2), kweilo̧k ko an Doulul eo an Jiron̄ ro (lale 11.2.1.2)

Jabōt Ļalem: kweilo̧k ko n̄an jodikdik ro im rūtto ro. Bisoprik eo ej kālet unin kōnono eo im jitōn̄ rūkaki ro (ekkā an ro uwaan ward eo ak stake eo). Rej barāinwōt kālet eļan̄n̄e jodikdik ro im rūtto ro, m̧aan im kōrā ro, rej kweilo̧k makeļo̧k ak ippān doon.

Karōk 2

50 minit

Aolep Jabōt ko: Būraimere, ekoba nursery eo (lale 12.2.1.2).

Jabōt juon im jilu ilo juon allōn̄: Jabōt Jikuuļ (lale 13.3).

Jabōt ruo im emān: kweilo̧k ko an doulul eo an priesthood (lale 8.2.1.2 im 10.2.1.2), kweilo̧k ko an Doulul eo an Kōrā ro (lale 9.2.1.2), kweilo̧k ko an Doulul eo an Jiron̄ ro (lale 11.2.1.2)

Jabōt Ļalem: kweilo̧k ko n̄an jodikdik ro im rūtto ro. Bisoprik eo ej kālet unin kōnono eo im jitōn̄ rūkaki ro (ekkā an ro uwaan ward eo ak stake eo). Rej barāinwōt kālet eļan̄n̄e jodikdik ro im rūtto ro, m̧aan im kōrā ro, rej kweilo̧k makeļo̧k ak ippān doon.

10 minit

Iien jānij eo n̄an kweilo̧k in kwojkwoj eo

60 minit ko

Kweilo̧k in kwojkwoj eo

N̄e ruo ward ko rej kweilo̧k ilo ejja im̧ōn jar eo wōt im juon ak erro jim̧ro ewōr jejjo wōt ajri ro ak jodikdik ro, maron̄ kōņaan bwe ajri ro im jodikdik ro ren etal n̄an kūlaaj ko ilo Jabōt ippān doon. Jikejuuļ in kweilo̧k ko ilo Jabōt an ward eo remaron̄ kaitokļo̧k āinwōt an waļo̧k itulaļ.

kaitokļo̧k jikejuuļ in kweilo̧k eo

Karōk in maron̄ in bar ļōmņak kake eļan̄n̄e ruo ward ko rej kōjerbal kajin ko roktak bōtaab ajri ro im jodikdik ro rej kōnono juon wōt kain kajin.

Kōjerbal karōk in ej aikuji mālim eo an stake būreejtōn eo. Eļan̄n̄e emālim, bisop eo an kajjojo ward rej kweilo̧k ippān ritōl ro an doulul ko n̄an pukōt kapilōk eo aer n̄an kōm̧m̧ane menin.

Bisoprik ro ruo rej kweilo̧k ippān doon n̄an kōmelet ewi wōt membōr ro jān kajjojo ward rej aikuj kūr n̄an jerbal ilo doulul ko im ra ko. Kajjojo bisop rej pād wōt ilo aer būreejtōn n̄an doulul eo an pris ro, bōtaab ruo bisop remaron̄ kotaik doon n̄an tōl ilo kweilo̧k in Jabōt ko an doulul eo. Bisop ro jān ward ko jim̧or rej pād ilo kweilo̧k ko an ko̧o̧njeļ an jodikdik ro an ward eo rej koba ippān doon. Ālkin kōjerbal karōk eo, ritōl ro rej wōnm̧aanļo̧k n̄an kweilo̧k iien otemjej n̄an loloorjake kijejeto ko aer.

29.2.9

Easter im Kūrijm̧aj

Ilo Jabōt in Easter, kweilo̧k in kwojkwoj eo ej kweiļo̧k eo de eo ej kōm̧m̧an. Ej bar eindrein n̄e raan in Kūrijm̧aj ej wawa ilo raan in Jabōt. Eļan̄e Kūrijm̧aj ej wawa ilo bar juon raan ilo wiik eo, kweilo̧k in kwojkwoj eo ej iien kweiļok eo de eo im ej kōm̧m̧an ilo Jabōt eo iturun raan in Kūrijm̧aj —ekkā an Jabōt eo im̧aan —āinwōt karōk jen stake būreejtōnji eo.

Ilo jet jikin ko, juon holiday eļap ej lukun aurōk. Eļan̄e juon holiday rōt in ej wawa ilo Jabōt, Area Būreejtōnji eo emaron̄ kemalim bisop ro n̄an kōm̧m̧ane kweilo̧k in kwojkwoj eo wōt ilo raan eo.

Stake būreejtōnji eo emaron̄ kepaak bisop ro n̄an lale eļan̄e remaron̄ karōk iien ijjino kweilo̧k in kwojkwoj ko ilo Jabōt kein.

29.3

Kweilo̧k ko an Stake

29.3.1

Kweilo̧k eo eļap an stake

Kweilo̧k ko reļļap an stake rej jikejuuļ jān Būreejtōn eo an Doulul eo an Jon̄oulruo Rijilōk ro. Ekka wōt an stake būreejtōn eo tōl ilo juon kweilo̧k kajjojo iiō im juon Eria Jiljilimjuonn̄oul ak Ritōl eo Eutiej an Kabun̄ in ej tōl ilo bar eo juon.

Opija eo ej tōl ej kōjbwebweik aolep karōk ko n̄an kweilo̧k eo eļap. E ej kōmālim ro rej bōk koņaer im al ko kāāleti m̧oktaļo̧k. N̄an meļeļe ko reļļapļo̧k kōn al ilo kweilo̧k eo eļap an stake, lale 19.3.4.

N̄e juon Eria Jiljilimjuonn̄oul ak Ritōl eo Eutiej an Kabun̄ in ej tōl, e emaron̄ kajjitōk ippān stake būreejtōn eo n̄an elmakote unin kōnono ko n̄an naan in kōmeļeļe ilo kweilo̧k eo eļap. Ñe stake būreejtōn eo ej tōl, e im rikakpilōklōk ro an rej kāālet unin kōnono ko. Stake būreejtōnji eo emaron̄ ekōnono kōn unin kōnono ko rekkar ippān ko̧o̧njeļ eo an stake. N̄an kōm̧m̧ane kālet kein, stake būreejtōnji eo ej ļōmņake unin kōnono ko me Būreejtōnji eo ekar kōmejajaik kōn aorōk ilo raan ko ļo̧k.

Ilo an stake būreejtōn eo kōm̧m̧ani karōk ko n̄an kweilo̧k eo eļap an stake eo, e emaron̄ kajjitōk ippān doulul ko an priesthood im doulul ko jet, kajjojo armej, im baam̧le ko n̄an jipan̄. N̄an waanjon̄ak, remaron̄ jitōn̄ er n̄an karōki jea ko, kōpooj rijipan̄ tōl armej ro, im karreoik im̧ōn jar eo.

Kajjojo kweilo̧k ko reļļap an stake ekkā aer koba kweilo̧k kein:

  • Juon kweilo̧k an Eria Jiljilimjuonn̄oul eo ak Ritōl Riutiej an Kabun̄ in (eļan̄n̄e kappeik) im stake būreejtōnji eo. Stake kūļōk im rijeje eo eutiej rej barāinwōt pād.

  • Juon kweilo̧k an ritōl an priesthood eo (lale 29.3.3). Ritōl eo eutiej ej tōl ej kālet eļan̄n̄e kweilo̧k in ej kōm̧m̧an ilo Jādede ak Jabōt. Juon uwaan stake būreejtōnji eo ej kōjeikiki.

  • Juon m̧wen̄an an joteen Jādede eo n̄an aolep ro uwaan stake eo 18 im rūttoļo̧k. Ilo ad pedped ioon wāween ko ilo juon āne, kweilo̧k emaron̄ kōm̧m̧an ilo Jabōt eļan̄n̄e kar kōmālimi jān ritōl eo eutiej me ej tōl. Juon uwaan stake būreejtōnji eo ej kōjeikiki.

  • Juon m̧wen̄an eļap, ej kōm̧m̧an ilo Jabōt, n̄an aolep membōr ro im ro jet me rej kōņaan pād. Stake būreejtōn eo ej kōjeikik im ej kōnono ilo kweilo̧k in. Elōn̄ļo̧k jān juon m̧wen̄an eļap an Jabōt emaron̄ in kōm̧m̧ane eļan̄n̄e ejabwe ruum̧ n̄an aolep ilo juon m̧wen̄an. Ajri ro rej pād ippān baam̧le ko aer, ejjab ilo juon kweilo̧k ejeņolo̧k.

Ñe ej menin aikuj, m̧wen̄an ko an kweilo̧k eo eļap maron̄ stream i n̄an im̧ōn jar ko ak jikin ko jet ilo stake eo. Jet membōr remaron̄ aikuji kweilo̧k eo eļap n̄an an stream n̄an im̧ōko im̧weer. N̄an meļeļe ko kōn kweilo̧k ko rej stream, lale 29.7.

Rikōnono ro ilo m̧wen̄an eo eļap rejjab aikuj kōjerbal kein alooj ko ak kein ron̄jake ko (lale 38.8.3).

Eļan̄n̄e Opija ro Routiej, tampeļ būreejtōn eo im matron eo, mijen būreejtōn eo im eo karejeran, ak stake petriak eo rej pād, rej aikuj jijet ijo im̧aan. Menin ej bar jetjet n̄an rikakpilōklōk ro ilo būreejtōnji ro an tampeļ im mijen (im ro pāleer) eļan̄n̄e rej pād ilo aer bōk jikin tampeļ ak mijen būreejtōn eo.

Ilo juon kweilo̧k eo an stake kajjojo iiō, juon membōr in stake būreejtōnji eo ej kwaļo̧k etan opija ro routiej, eria, im stake eo n̄an rejetak. E ej kōjerbal Officers Sustaining form eo, kar kōpooje jān stake kūļōk. Menin ekkā an kōm̧m̧an ilo kweilo̧k eo eļap an stake jinointata ilo iiō eo.

Eļan̄n̄e opija ro an stake rej kūr ak kōtļo̧k ikōtaan kweilo̧k ko reļļap an stake, rej kwaļo̧k etaer n̄an rejetak ak juon kakōļļe in kam̧m̧oolol ilo kweilo̧k eo tok juon eļap an stake eo. Ak menin emaron̄ kōm̧m̧ane ilo kweilo̧k in kwojkwoj eo ilo kajjojo ward. Lale 30.3 im 30.6.

Em̧m̧aan ro me kar rie bwe ren ekkapit elder ro ak pris ro routiej rej jake m̧aanļok n̄an rejetak ilo juon kweilo̧k eļap an stake. Eļan̄n̄e juon būratōr ej aikuj in ekkapit m̧okta jān kweilo̧k eo eļap an stake eo tok juon, maron̄ rejtake ilo kweilo̧k in kwojkwoj eo ilo ward eo an. Innām etan ej jake m̧aanļo̧k n̄an rie ilo juon kweilo̧k eļap an stake eo (lale 18.10.3).

29.3.2

Kweilo̧k eo Eļap an Stake an Priesthood

Stake būreejtōnji eo ej karōk im ej kōjeikik kweilo̧k ko reļļap an priesthood ilo stake eo. Rej kanooj jar ilo kāāleti unin kōnono ko im rikōnono ro.

29.3.3

Kweilo̧k an Ritōl an Priesthood ilo Stake eo

Stake būreejtōnji ej ļōmake im kōjeikik kweilo̧k ko an ritōl an priesthood eo. Karōkan kweilo̧k kein remeļak: Aolep ro rej bōk koņaer remaron̄ kweilo̧k ippān doon n̄an aolepān kweilo̧k eo Ak, ālkin jet naan in kōmeļeļe n̄an aolep, remaron̄ jenolo̧k n̄an kumi ko reddikļo̧k n̄an naan in kōmeļeļe ko rejenolo̧k pedped ioon kūr ko im ijjitōn̄ ko.

Stake būreejtōnji eo im ritōl ro jet an stake eo ekkā wōt aer litok naan in kōmeļeļe ko. Ritōl ro an ward, ekoba kōrā ritōl ro, maron̄ barāinwōt karuwaineneik er n̄an litok naan in kōmeļeļe ko ilo jet iien.

29.3.4

Kweilo̧k ko an Ritōl an Stake eo

Būreejtōnji ko an doulul ko an stake eo rej ļōmake im kōjeikik kweilo̧k ko an ritōl ilo stake eo. Karōkan kweilo̧k kein remeļak: Aolep ritōl ro remaron̄ in kweilo̧k ippān doon ilo aolepān kweilo̧k eo. Ak, ālkin jet naan in kōmeļeļe n̄an aolep, remaron̄ jenolo̧k n̄an kumi ko reddikļo̧k n̄an naan in kōmeļeļe ko rejenolo̧k pedped ioon kūr ko im ijjitōn̄ ko.

Ritōl ro an doulul ko, ro uwaan stake būreejtōnji eo, ak ritōl ro jet ekkā wōt aer litok naan in kōmeļeļ ko. Ritōl ro an doulul ko an ward eo remaron̄ barāinwōt kajjitōk n̄an letok naan in kōmeļeļe ko ilo jet iien.

Būreejtōnji eo an Doulul eo an Likao ro ejjab kōm̧m̧ane juon kweilo̧k an ritōl ilo stake eo. Naan in kōmeļeļe ko n̄an ro rej jerbal ippān doulul ko an Priesthood eo an Aron ej leļo̧k ilo kweilo̧k ko an ritōl an priesthood ilo stake eo (lale 29.3.3).

29.3.5

Kweilo̧k eo an Stake Būreejtōnji eo

Stake būreejtōn eo ej ļōmake im kōjeikik kweilo̧k ko an stake būreejtōnji eo. Jerbal ko n̄an ļōmņak kaki remaron̄ koba:

  • Jerbal in lo̧mo̧o̧r eo an Anij im mour ijo eutiej tata ilo stake eo.

  • Kōkajoorļo̧k kajjojo armej im baam̧le ko ilo stake eo.

  • Aikuj ko im kajoor ko an ward ko, doulul eo an elder ro, im doulul ko jet ilo stake eo.

  • Elmakot ko an bisop eo kōn em̧m̧aan ro n̄an kapit er elder ro.

  • Membōr rej kūr er n̄an jerbal ko ilo stake eo im jet jerbal ko ilo ward eo āinwōt kar kōllaajraki ilo 30.8.

  • Elmakot ko an bisop eo kōn membōr ro rej tōn jerbali mijen ko.

  • Naan in kōmeļeļe ko jān jeje ko rekwojarjar, ritōl ro an Kabun̄ in, im bok in bōk meļeļe in.

Aitōm̧ ko jet maron̄ koba m̧akūtkūt ko im būrookraam̧ ko an stake eo, bajet eo an stake eo, riboot ko kōn ijjitōn̄ ko, im karōk ko n̄an kweilo̧k ko rej itok wōt.

29.3.6

Kweilo̧k eo an High Ko̧o̧njeļ

Stake būreejtōnji eo ej ļōmake im kōjeikik kweilo̧k ko an high ko̧o̧njeļ. Kweilo̧k kein remaron̄ koba:

  • Bōk naan in kōmeļeļe jān stake būreejtōnji eo kōn katak ko im ijjitōn̄ ko.

  • Kapilōk ippān doon kōn kōkajoorļo̧k kajjojo armej im baam̧le ko ilo stake eo. Leader and Clerk Resources (LCR) ewōr ie kein jerbal ko im ripoot ko me remaron̄ jipan̄ ritōl ro jeļā kōn eddōkļo̧k eo an membōr ro.

  • Ekōnono kōn ekōjkan jipan̄ kadedeļo̧k jerbal in lo̧mo̧o̧r eo an Anij im mour ijo eutiej tata ilo stake eo.

  • Riboot kōn ijjitōn̄ ko.

  • Kapilōk ippān stake būreejtōnji eo im rejtake jokāālet ko aer n̄an kapit em̧m̧aan ro rejitōn bōro āinwōt elder ro im pris ro reutiej.

  • Kapilōk ippān stake būreejtōnji eo im rejtake jokāālet ko aer n̄an ilo̧k kūr ko.

  • Jipan̄ ļōmaki kweilo̧k ko an ritōl an priesthood ilo stake eo (lale 29.3.3).

  • Ron̄jake riboot ko jān mijenede ro raar ro̧o̧ltok (lale 24.8.3).

Jet iien juon kweilo̧k ekadu an aae ko̧o̧njeļ eo emaron̄ in kōm̧m̧an ālkin wōt kōn juon kweilo̧k an stake ko̧o̧njeļ eo (lale 29.3.7). Menin emaron̄ jipan̄ kadikļo̧k oran kweilo̧k n̄an ritōl ro n̄an aer pād.

N̄an meļeļe kōn pedped in katak ko me rej tōl kweilo̧k ko an ko̧o̧njeļ eo ilo Kabun̄ in, aolep ro uwaan ko̧o̧ņjeļ eo rej aikuj ekkatak 4.3 im 4.4.

N̄an meļeļe ko kōn ro rej bōk koņaer koba ilo kweilo̧k jān ettoļo̧k, lale 29.7

29.3.7

Kweilo̧k eo an Stake Ko̧o̧njeļ eo

Stake būreejtōn ej ļōmake im kōjeikik kweilo̧k ko an stake ko̧o̧njeļ eo. Ilo kweilo̧k kein, ro uwaan ko̧o̧njeļ remaron̄ in:

  • Bōk naan in kōmeļeļe ko jān ippān stake būreejtōnji eo kōn katak ko im ijjitōn̄ ko aer.

  • Ko̧o̧njeļ ippān doon kōn kōkajoorļo̧k kajjojo armej im baam̧le ko ilo stake eo. LCR eo ewōr ie kein jerbal ko im riboot ko me remaron̄ jipan̄ ritōl ro n̄an jeļā kōn eddōkļo̧k eo an membōr ro.

  • Ekōnono kōn aolepān visōn eo n̄an jerbal in lo̧mo̧o̧r eo an Anij im mour ijo eutiej tata ilo stake eo.

  • Ekōnono kōn aikuj ko an kanniōk an membōr ro an stake eo im ekōjkan n̄an jipan̄ er n̄an erom un̄are peid make. Kile kein jipan̄ ko rej pād ilo jukjuk in pād eo im stake eo. Waanjon̄ak ko remaron̄ koba jikuuļ ko ijo jokwe ie im BYU–Pathway Worldwide eo. (Lale 22.12 im 22.13).

  • Ejaake im dāpij wōt juon karōk eļem waan n̄an stake eo n̄an ņa mejļan iien idin̄ ko (lale 22.9.1.3).

  • Karōk wāween ko n̄an ro uwaan stake eo n̄an leļo̧k jerbal in jipan̄ eo ilo jukjuk in pād eo (lale 22.9.1). Ijo ewōr ie, JustServe.org ej elmakot iien ko rem̧m̧an n̄an jerbal in jipan̄ ko ilo jukjukin pād eo.

  • Riboot kōn doulul ko, m̧akūtkūt ko, im būrookraam̧ ko an stake eo.

Jet iien juon kweilo̧k an stake ko̧o̧njeļ eo emaron̄ in kōm̧m̧an ālkin wōt juon kweilo̧k ekadu an aae ko̧o̧ņjeļ eo (lale 29.3.6). Menin emaron̄ jipan̄ kadikļo̧k oran kweilo̧k n̄an ritōl ro n̄an aer pād.

N̄an meļeļe kōn pedped in katak ko me rej tōl kweilo̧k ko an ko̧o̧njeļ eo ilo Kabun̄ in, aolep ro uwaan ko̧o̧ņjeļ eo rej aikuj ekkatak 4.3 im 4.4.

N̄an meļeļe ko kōn ro rej bōk koņaer koba ilo kweilo̧k jān ettoļo̧k, lale 29.7

29.3.8

pija ej bōk jikin, laajrak in tōl n̄an ukukōt wāween tōl ko ekkar n̄an jekjek ko
 Kweilo̧k eo an Kamiti eo an Ritōl Rūtto an Stake eo

Kamiti eo an ritōl rūtto an stake eo rej rejtake būreejtōnji ro an doulul eo an elder ro im Doulul eo an Kōrā ro ilo ward eo ilo jerbal eo aer. Ro uwaan kamiti eo rej leļo̧k kōketak eo ainjuon n̄an kijejeto ko an ward ilo jerbal in karejar, leto letak gospel eo, kōkajoorļo̧k membōr ro rekāāl im ro rej kab bar ro̧o̧ltok, im bōk koņaer ilo jerbal in tampeļ im menmenbwij an baam̧le.

Ilo kakobaba, kamiti in ej loloorjake kijejeto ko an stake eo reiookļo̧k menin jeraam̧m̧an ko im un̄n̄are peid make, ekoba JustServe.org (ijo ewōr ie) im BYU–Pathway Worldwide (lale 22.13).

Stake būreejtōnji eo ej karōk im kōjeikik kweilo̧k ko an kamiti eo an ritōl rūtto an stake eo. Kweilo̧k kein remaron̄ dam̧oļo̧k in kweilo̧k ko an stake ko̧o̧njeļ eo. N̄an waanjon̄ak, ilo jem̧ļo̧k in jet kweilo̧k ko an stake ko̧o̧njeļ eo, kamiti eo an ritōl rūtto emaron̄ in kweilo̧k n̄an wōnm̧aanļo̧k wōt kōn juon iien ekōnono kōn jerbal ko rejenolo̧k.

kweilo̧k eo an ko̧o̧njeļ eo an jodikdik ro

29.3.9

pija ej bōk jikin, laajrak in tōl n̄an ukukōt wāween tōl ko ekkar n̄an jekjek ko
 Kweilo̧k eo an Kamiti eo an Ritōl Jodikdik ro an Stake eo

Kamit in ritōl an stake eo ej rie bisoprik ro, būreejtōnji ko an Doulul eo an Jiron̄ ro im rikakpilōklōk ro, im rikapilōk ro an doulul eo an Priesthood eo an Aron ilo jerbal eo aer ippān jodikdik ro. Ritōl ro rōrūtto ilo kamiti eo rej leļo̧k katak ko raorōk n̄an kobaik jodikdik ro ilo jerbal in lo̧mo̧o̧r eo an Anij im mour ijo eutiej tata.

Kamiti eo an ritōl jodikdik ro an stake ewōr ippāer eddo kein:

  • Karōk jerbal in jipan̄ im m̧akūtkūt ko. Men kein emaron̄ koba kweilo̧k ko reļļap an jodikdik ro, eeb ko, nokon ko, būroojāāk in jerbal in jipan̄ ko, im m̧akūtkūt ko an elōn̄ļo̧k jān juon stake. (Kōn ļōmņak ko n̄an jerbal in jipan̄, lale JustServe.org ijo ewōr ie.) Jodikdik ro rej aikuj tōl ilo karōke im kōm̧m̧ani m̧akūtkūt kein. Makūtkūt ko an Stake rej aikuj jab in emakijkij aer kōm̧m̧an bwe renej likūt juon inene ak eddo ioon ward ko. M̧akūtkūt kein rej aikuj jipan̄ m̧akūtkūt ko an ward, im rejjab jiāe ippāer. Ritōl ro an ward rej aikuj kōjeļļāik er kōn m̧akūtkūt ko an stake eļap iien m̧oktaļo̧k.

  • Karōk wāween ko n̄an rie For the Strength of Youth conferences.

  • Kōtōbalbal kijiejeto ko an stake reiookļo̧k būrookraam̧ eo an Ajri ro im Jodikdik ro

Juon membōr in stake būreejtōnji eo ej laleļo̧k kweilo̧k ko an kamiti eo an ritōl jodikdik ro an stake eo. E emaron̄ kōjeikiik, ak emaron̄ jitōn̄ bar juon n̄an kōm̧m̧ane, ekoba jodikdik ro. Kweilo̧k kein remaron̄ dam̧oļo̧k ko a kweilo̧k ko an stake ko̧o̧njeļ eo. N̄an waanjon̄ak, ilo jem̧ļo̧kin jet kweilo̧k ko an stake ko̧o̧njeļ eo, kamiti eo an ritōl jodikdik ro an stake emaron̄ in wōnm̧aanļo̧k wōt ilo iien ekōnono eo kōn jerbal ko rejenolo̧k.

29.3.10

Kweilo̧k eo an Stake Ko̧o̧njeļ Ippān Bisop ro

Jerbal ko n̄an iien ekōnono eo remaron̄ koba:

  • Jipan̄ jodikdik ro eddōkļo̧k ilo jetōb.

  • Kōjerbal joortak in jitlo̧k ko n̄an kea kōn ro rej pād ilo aikuj. Jipan̄ membōr ro kalōk un̄n̄are peid make (lale jebta 22, eļaptata 22.11) Kwaļo̧k meļeļe ko kōn kein jipan̄ ko rej pād ilo jukjuk in pād eo.

  • Jipan̄ membōr ro ukweļo̧k im en̄jake juon oktak in bōro (lale jebta 32).

  • Kōpeļaak jāān ko an Kabun̄ in (lale jebta 24).

Stake būreejtōn eo ej tōl kweilo̧k in. Ej jipan̄ bisop ro ekkatak im kakūrm̧ool eddo ko aer (lale 7.1). Ej barāinwōt kūrtok bisop ro n̄an ko̧o̧njel kōn naan in kōmeļeļe ko jān ritōl ro an Kabun̄ in.

Kweilo̧k in ejjab bōk jikin iien intōrpiu ko aolep iien an stake būreejtōn eo ippān kajjojo bisop (lale 6.2.1.2).

N̄an meļeļe kōn pedped in katak ko me rej tōl kweilo̧k ko an ko̧o̧njeļ eo ilo Kabun̄ in, aolep ro uwaan ko̧o̧ņjeļ eo rej aikuj ekkatak 4.3 im 4.4.

kweilo̧k eo an bisoprik

29.3.11

Kweilo̧k ko Jet an Stake

Kweilo̧k ko an kamiti eo an ritto ro rejjan̄in m̧are ilo stake im stake kamiti eo an rūm̧man ded ro rej kōmeļeļe ilo 14.1.1.2.

29.4

Kweilo̧k ko an Ko̧o̧njeļ in Loloorjake eo

Eria Jiljilimjuonn̄oul eo ej tōl kweilo̧k ko im kapidodoik iien ekōnono eo. Aolep ro rej pād ilo ko̧o̧njel eo ippān doon rej juon wōt ilo bōk koņaer. (lale Katak im Bujen Ko 88:122).

Ilo kweilo̧k kein, ro rej bōk koņaer rej:

  • Pukōt revelesōn kōn ekōjkan kōjerbal ilo jetjet tata katak ko im tōl eo an Būreejtōnji eo Kein Kajuon, Doulul eo an Jon̄oulruo Rijilōk ro, im Eria Būreejtōnji eo.

  • Kōtōbalbal jerbal in lo̧mo̧o̧r eo an Anij im mour ijo eutiej tata ilowaan ko̧o̧njeļ eo aer.

  • Kapilōk ippān doon kōn menin jipan̄ eo ilo kanniōk im jetōb an membōr ro im ekōjkan jipan̄ er erom rikaļoor ro rem̧ool an Jisōs Kraist.

  • Katakin im kōkōm̧anm̧anļo̧k doon.

  • Kōtōbalbal jerbal ko an elōn̄ļo̧k jān juon stake.

29.5

Ilomej ko im M̧akūtkūt ko Jet n̄an Eo Emej

N̄e juon membōr in Kabun̄ in ej mej, bisop eo maron̄ kajjitōk ippān n̄an kōm̧m̧ane m̧akūtkūt ko n̄an jipan̄ kaenōm̧m̧an ro remour im kwaļo̧k tūriam̧o n̄an eo emej. M̧akūtkūt kein n̄an armej eo me emej roktak ekkar n̄an kabun̄, m̧anit, iminene, im kakien ko ijo jokwe. Naan in kōmeļeļe kein maron̄ jipan̄ biosp ro karōk m̧akūtkūt ko rej pedped ioon gospel eo n̄an eo emej ilo aer kautiej wōt oktak kein.

29.5.1

Pedped in Katak ko n̄an Aolep

Mej ej juon m̧ōttan aorōk an karōk in lo̧mo̧o̧r eo an Jemedwōj Ilan̄ (lale 2 Alma 12:24–27). Kōnke kōn Jisōs Kraist, aolep renaaj jerkakpeje. Juon un aorōk an m̧akūtkūt ko an Kabun̄ in n̄an eo emej ej n̄an kam̧ool kōn karōk in lo̧mo̧o̧r eo, eļap tata Pinmuur eo im Jerkakpeje eo an Rilo̧mo̧o̧r eo. M̧akūtkūt kein rej aikuj in ilo kautiej, en̄jake ko ilo jetōb.

Ro uwaan Kabun̄ in rej aikuj kwaļo̧k kautiej n̄an iminene ko an kabun̄ ko jet ilo iien mej ko. Ijo wōt ke, rej aikuj jab kobaļo̧k ilo m̧antin kabun̄ ko ak iminene ko me rej jūm̧ae kien ko ak jon̄an ko an Kabun̄ in. Ritōl ro an Kabun̄ in rejjab kobaik m̧antin kabun̄ ko an kabun̄ ko jet ak kumi ko ilo m̧akūtkūt ko n̄an eo emej.

Membōr ro kar kapilōk er ņae iminene ko im m̧anit ko me rej erom juon inene n̄an ro remour. Kain iminene kein remaron̄ koba em̧m̧akūt eo eļap wōņāān, kōjjeļļā n̄an aolep eļap wōņaer, kōļļā ko n̄an baam̧le eo, iien kojota ko aittok, im iien keememe in ānbōjri ko eļap joļo̧k n̄ani.

Membōr in Kabun̄ in me rej bōk kuņaer ilo iien ilomej ko n̄an ro remej rej aikuj jab bōk kōļļā.

Ritōl ro an Kabun̄ in im membōr ro rej pokake kakien ko ijo jokwe ie kōn ta eo n̄an kōm̧m̧ane n̄e juon ej mej.

29.5.2

Leļo̧k Jipan̄ n̄an Baam̧le eo

Āinwōt rikalooran ro an Jisōs Kraist, ritōl ro ilo Kabun̄ in im ro uwaan ‘mōnōnō in jan̄ ippān ro rej jan̄ … im kaenōm̧m̧an ro rej pād ilo aikuj in aenōm̧m̧an” (Mosaia 18.9 N̄e juon membōr ej mej, biosp eo ej loļo̧k baam̧le eo n̄an leļo̧k kaenōm̧m̧an. E emaron̄ kajjitōk ippān rikakpilōklōk ro an n̄an etal ippānļo̧k. E ej barāinwōt kōjjeļāik būreejtōn ro an doulul eo an elder ro im Doulul eo an Kōrā ro.

Bisop eo ej leļo̧k jipan̄ jān ro uwaan ward eo, ekoba doulul eo an elder ro im Doulul eo an Kōrā ro. N̄an waanjon̄ak, ro uwaan ward eo remaron̄ in:

  • Kōjjeļāik ro m̧ōttaer im nukier.

  • Jipan̄ kōpooj juon bwebwenato ekadu in mour eo an eo emej.

  • Jipan̄ ļōmake iien ilomej eo im m̧akūtkūt ko jet.

  • Jipan̄ kōm̧m̧ani koņ ko ilo jikin mej eo im uliej eo, n̄e epojak.

  • Kanuknuk ānbwin eo n̄an kallūb eo (lale 38.5.8).

  • Kōpooj m̧ōn̄ā ko.

29.5.3

Iien Lale ānbwin ko (Ijo Ekkar n̄an M̧anit)

Jet iien iien lale ānbwin eo an eo emej ej kōm̧m̧an ilo juon im̧ōnjar an Kabun̄ in m̧okta jān m̧akūtkūt in ilomej eo Ritōl ro rej aikuj kōpeļļo̧k im̧ōnjar eo n̄an rijeban ro an jikin mej eo diktata juon awa m̧okta jān iien ijjino lale eo ānbwin eo kar jikejuuļi.

Ālkin aer lale anbwin eo, juon iien jar an baam̧le emaron̄ kōm̧m̧an eļan̄n̄e baam̧le eo kōņaan. Bo̧k in rimej eo ej aikuj kilōk m̧okta jān m̧aūtkūt in ilomej eo.

29.5.4

M̧akūtkūt in Ilomej ko (Ijo Ekkar n̄an M̧anit)

N̄e enaaj wōr juon ilomej n̄an membōr ej kōm̧m̧an ilowaan mōn jar eo an Kabun̄ in, bisop eo ej tōl iien eo. Eļan̄n̄e ilomej eo ej kōm̧m̧an ilo m̧weo, ak ilo juon jikin rimej, ak ilo ulej eo, baam̧le eo emaron̄ kajjitōk ippān bisop eo n̄an kōjeikik iien eo. Juon rikakpilōklōk an bisop eo emaron̄ kōjeikiki eļan̄n̄e bisop eo ejjab maron̄. N̄an elōn̄ļo̧k meļeļe ko kōn iien ilomej ko kōm̧m̧ani ilo juon im̧ōn Kabun̄ in n̄an juon armej eo me ejjab membōr in Kabun̄ in, lale 29.5.6.

Juon ilomej eo kōjeikik jān bisop eo, men̄e ilo juon im̧ōn jar an Kabun̄ in ak bar juon jikin, ej juon kweilo̧k an Kabun̄ in im juon m̧akūtkūt in kabun̄ in. Ej aikuj in juon iien eo ejetōbtōb Bisop eo ej kōketak ro rej bōk koņaer n̄an dāpij wōt juon jitbōn jeļā ņae im kautiej.

N̄e juon bisop ej kōjeikik juon ilomej, e ak juon iaan rikakpilōklōk ro an rej eddoik karōk in m̧akūtkūt eo. E ej ļōmņak kōn kōņaan ko an baam̧le eo, kanooj lale bwe ilomej eo en ļam waan im ilo kautiej, kōn al ko im kōnono ko rekkadu rej pedped wōt ioon gospel eo. Kaenōm̧m̧an eo kar letok jān Jisōs Kraist kōnke kōn Pinmuur eo im Jerkakpeje eo An. Ro uwaan baam̧le eo rejjab aikuj in kōnono ak ijello̧kin bōk koņaer ilo m̧akūtkūt eo.

Ilomej ko rej juon iien em̧m̧an n̄an kwaļo̧k kautiej n̄an eo emej. Ijo wōt ke, kain kautiej kein rejjab aikuj in bōk aolepān m̧akūtkūt eo. Juon iien koba an baam̧le aorōk, jenolo̧k jān m̧akūtkūt in ilomej eo, ej ekkā an juon jekjek eļan̄n̄e baam̧le ej kōņaan eļapļo̧k iien n̄an kwaļo̧k kautiej ko ak ememļo̧kjeņ ko.

Kwaļo̧k pija in alooj ko rejjab aikuj in m̧ōttan m̧akūtkūt in ilomej eo ej kōm̧m̧an ilo jikin jar eo.

Ilomej ko rej aikuj ijjino ilo jetjet in awa. Ilo m̧ool, rej aikuj jab aitokļo̧k jān 1.5 awa ko, āinwōt juon kautiej n̄an ro me rej pād ie.

Eļan̄n̄e juon membōr in stake būreejtōnji eo, juon Eria Jiljilimjuonn̄oul ilo eria eo an, ak juon Ritōl eo Eutiej an Kabun̄ in ej pād ilo ilomej eo, e eo ej tōl. Armej eo ej kōjeikik ej kōnono ippān m̧oktakļo̧k jān iien eo im kwaļo̧k bwe ej pād ilo m̧akūtkūt eo. Opija eo ej tōl ej aikuj in kar kajjitōk ippān n̄an kwaļo̧k ennaan in ikkilōk ko eļan̄n̄e ej kōņaan.

Ilomej eo ejjab kijon̄ in kōm̧m̧an ilo raan in Jabōt.

Ilo jet jejek ko, bisop eo emaron̄ kōm̧m̧an karōk ippān rijerbal ro an im̧ōn mej eo n̄an kōm̧m̧ane m̧akūtkūt in ilomej eo bwe en karbōb, ilo kautiej im iien kallūb eo n̄an kōļļāik wōņaan eo eļan̄n̄e jon̄an wōņāān eo kar kōļļāik jān jāān in joortak in jitlo̧k eo.

N̄an meļeļe ko kōn mijenede ro rej ro̧o̧ltok n̄an ijo jikin n̄an pād ilo juon ilomej, lale 24.6.2.7). Kōn unin tōl ko kōn kadiwōjļo̧k ilomej eo ilo stream im rekooti lale 29.7.

29.5.5

Kallūb ak Ittil

Ijo emaron̄, membōr ro remej me raar bōk menin letok kwojarjar eo rej aikuj in kallūb ak ittil ilo nuknuk in tampeļ ko. N̄an meļeļe ko kōn nuknuk in kallūb in tampeļ im kanuknuk rimej, lale 38.5.8.

Eļan̄n̄e emaron̄, juon membōr in bisoprik eo ej etal ippān iien em̧m̧akūt eo n̄an uliej eo. Eļan̄n̄e renaaj aje jikin kallūb eo, ej kōnono ippān baam̧le eo im kajitōk ippān juon eo ej kabwijer Melkisedek Priesthood eo n̄an kōm̧m̧ane kōjeraam̧m̧an eo. Naan in kōmeļeļe ko rej waļo̧k ilo 18.16. Eļan̄n̄e baam̧le ej kōņaan, juon jar ilo turin lōb eo emaron̄ kōm̧m̧an.

N̄an meļeļe ko kōn aje jikin eo ijo melokaarar ko an membōr kar tile rej likūt ie, lale 18.16.2. Kōn unin tōl ko jet kōn ittil, lale 38.7.2.

29.5.6

Iien ilomej n̄an Ro Rejjab Membōr in Kabun̄ in

Bisop eo emaron̄ kōtļo̧k kōjerbal m̧ōn jar eo n̄an m̧akūtkūt in ilomej eo an armej eo ejjab juon membōr in Kabun̄ in. Eļan̄n̄e armej eo emej ej uwaan bar juon kabun̄, m̧akūtkūt in ilomej eo emaron̄ ekkā an kōm̧m̧an ilo jekjek eo kar kōm̧eļeļeik jān kabun̄ eo. Eļan̄n̄e baam̧le eo ej kōņaan, m̧akūtkūt in ilomej eo emaron̄ kōjeikik jān rūkaki eo an kabun̄ eo, kōm̧m̧ane ilo kautiej im jetjet. Ijo wōt ke, m̧anit ko an kabun̄ ko jet ak doulul ko remaron̄ jab kōm̧m̧ani ilo im̧ōn jar eo an Kabun̄ in.

29.6

Jar ko ilo Kweilo̧k ko an Kabun̄ in

Jar ko ilo kweilo̧k ko an Kabun̄ in rej aikuj kadu, ļam waan, im tōl jān Jetōb eo. Jabdewōt membōr in Kabun̄ in me ekar peptaij emaron̄ kōm̧m̧ane juon jar in kōppeļo̧k ak ikkilōk. Ajri ro me rejjab peptaij maron̄ jar ilo Būraimere. Ritōl ro rej aikuj jab kajjitōk aolep iien kajjitōk ippān juon ļeo pālele ak lio pālele n̄an jar ilo ejja kweilo̧k eo wōt.

Membōr ro rej aikuj jar kōjerbal naan ko me rej kwaļo̧k iakwe im kautiej n̄an Jemedwōj Ilan̄. Ilo kajin In̄lij, menin ekoba kōjerbal naan ko Thee, Thy, Thine, im Thou n̄e kōnono kōn E.

29.7

Kweilo̧k ko Kōjerbal Stream im Kōm̧m̧an Kweilo̧k ko Kōjerbal Kamputōr

Ro uwaan Kabun̄ in rej aikuj kajjieon̄ n̄an pād im kobaļo̧k ilo in kabun̄ jar ko. Ewōr juon em̧m̧an in kuktok ippen doon eo im ej kōkajoorļo̧k kabun̄ jar eo im jipan̄ kobaiktok membōr ro ilo juon (lale 29.0).

Eļan̄e ejjab maron̄ tōbrak menin kōn utam̧we in ājmour ak ko jet, kweilo̧k ko rej kōm̧m̧an online remaron̄ kobaiktok ro im rejjab maron̄ pād. N̄an em̧m̧anļo̧k eo an membōr rein im ro jet, bisop eo emaron̄ kemālim duwojtok an kweiļo̧k in kwojkwoj ko online (lale 29.2.1.5), jerbal in peptaij ko, ilomej ko, im kweilo̧k ko jet an ward. Stake būreejtōn eo emaroc kemālim duwojtok an kweilo̧k eo eļap an Stake ilo online (see 29.3.1) im kweilo̧k ko jet an stake. N̄an bōk jipan̄ kōn kobaļo̧k online ilo kweilōk in kwojkwoj eo im kain̄i ko jet , lale 38.2.3.

Ejja āinwōt, n̄e membōr ro rejjab maron̄ pād ilo Jabōt kūlaaj ko ak kweilo̧k ko an ritōl, bisop ak stake būreejtōn eo emaron̄ ke mālim membōr rein n̄an bōk koņaer online.

Ward im stake technology specialist ro remaron̄ jipan̄ ritōl ro kōm̧m̧ane kweilo̧k ko ilo stream ko im kamputōr. (lale 33.10) Rein kajjojo remaron̄ barāinwōt jipan̄ membōr deļo̧n̄e kweilo̧k kein.

Kanne stream ko an kweilo̧k ko an ward eo im stake rej aikuj in jeri ilowaan wōt juon raan ālkin kweilo̧k eo.

29.8

Pija ko im Rekoote Pija in Alooj an Kweilo̧k ko

N̄an dāpij kwojarjar eo an kweilo̧k ko an Kabun̄ in, en ejjeļo̧k juon en bōk pija ko ak rekoote pija in alooj ko an kweilo̧k in kwojkwoj eo ak kweilo̧k ko reļļap an stake eo.

N̄an meļeļe kōn kōm̧m̧an rekoot in kweilo̧k ko, lale 29.7.

29.9

Ukok n̄an Kweilo̧k ko

Irooj ej kōņaan bwe aolep ren meļeļe gospel eo ilo kajin eo an make (lale Katak im Bujen Ko 90:11). Ilo stake ko ijo membōr ro rej kōnono elōn̄ļo̧k jān kajin eo aer make, juon membōr in stake būreejtōnji eo emaron̄ kūr juon rikōtōbalbal ukook n̄an stake. Juon bisop emaron̄ kūr rukook ro an ward eo.

N̄an elōn̄ļo̧k meļeļe ko, lale Church Interpretation Training and Best Practices ilo ChurchofJesusChrist.org.