“29. Mga Miting sa Simbahan,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2024).
“29. Mga Miting sa Simbahan,” Kinatibuk-ang Tamdanan nga Basahon.
29.
Mga Miting sa Simbahan
29.0
Pasiuna
Ang mga Santos sa Ulahing mga Adlaw magpundok aron sa pagsimba, paghatag og kaayohan sa usag usa, ug sa pagtudlo ug pagkat-on sa ebanghelyo (tan-awa sa Alma 6:6; Moroni 6:5–6). Ang Manluluwas misaad, “Kay kon may duha o tulo nga magkatigom sa akong ngalan, anaa ako uban kanila” (Mateo 18:20). Ang panagtigom mao ang usa ka paagi nga ang atong mga kasingkasing “nabugkos diha sa pagkahiusa ug diha sa gugma” (Mosiah 18:21).
Ang mga miting sa pagpangulo makatabang sa mga lider nga magtinambagay ug magsabot sa mga paningkamot sa pagserbisyo sa uban. Hinoon, ang paghimo og miting kinahanglang dili mopuli sa pagserbisyo ug pagpangalagad sama sa gibuhat ni Jesukristo. Ang mga paagi sa pagtabang sa Dios diha sa Iyang buhat sa kaluwasan ug kahimayaan mahimong maplano diha sa usa ka miting, apan kini mas labing matuman sa gawas sa miting.
29.1
Pagplano ug Pagpahigayon og mga Miting
Ang mga lider magplano ug mopahigayon og mga miting “samtang sila gigiyahan sa Espiritu Santo, sumala sa mga sugo ug pagpadayag sa Dios” (Doktrina ug mga Pakigsaad 20:45; tan-awa usab sa Moroni 6:9; Doktrina ug mga Pakigsaad 46:2). Sila mangita og mga paagi sa pagdapit sa impluwensya sa Espiritu sa ilang mga miting.
Ang mga lider moseguro nga ang gidaghanon ug gitas-on sa mga miting dili makahatag og kabug-at alang sa mga miyembro o sa ilang mga pamilya. Pananglitan, ang mga miting kinahanglan dili makahimo nga ang mga pamilya maglisod sa paggahin og panahon nga magkauban atol sa Igpapahulay nga adlaw.
Ang mga lider moseguro usab nga ang mga miting nagtutok sa unsay labing importante. Pananglitan, ang mga panagtigom alang sa sakramento kinahanglang motutok sa sakramento ug sa pagpalig-on sa hugot nga pagtuo diha kang Jesukristo. Ang mga miting sa kapangulohan ug mga miting sa konseho motutok sa pagpalig-on sa mga indibidwal ug sa mga pamilya.
Ang tigdumalang opisyal mao ang mopahigayon sa miting. O siya mahimong mohangyo og laing tawo, sama sa usa ka magtatambag, sa pagpahigayon ubos sa iyang direksyon.
Usahay adunay mahitabo atol sa miting nga ang tigdumalang opisyal mobati sa panginahanglan nga mohatag og katin-awan. Pananglitan, adunay usa ka tawo nga nagtudlo og dili sakto nga doktrina. Kon kana mahitabo, ang tigdumalang opisyal kinahanglang mohimo og katin-awan nga dili mopakaulaw ni bisan kinsa.
29.2
Mga Miting sa Ward
29.2.1
Panagtigom alang sa Sakramento
29.2.1.1
Pagplano sa Panagtigom alang sa Sakramento
Ang bishopric moplano ug mopahigayon sa panagtigom alang sa sakramento. Sila moseguro nga ang gitutokan sa miting mao ang sakramento ug pagpalig-on sa hugot nga pagtuo diha kang Jesukristo.
Ang panagtigom alang sa sakramento molungtad og usa ka oras. Kini mahimong maglakip sa mosunod:
-
Prelude nga musika (tan-awa sa 19.3.2 alang sa mga lagda). Ang musika nga may balaang pagtahod sa dili pa magsugod ang miting makadapit sa espiritu sa pagsimba.
-
Pagtimbaya ug pag-abi-abi.
-
Pag-ila sa tigdumalang mga awtoridad o ubang mga lider kinsa nagbisita. Ang nangulong mga awtoridad ug nagbisita nga mga high councilor kinahanglang dapiton sa paglingkod sa atubangan. Ang Kinatibuk-ang Opisyales dapiton usab sa paglingkod sa atubangan gawas kon sila nagtambong sa ilang kaugalingong ward.
-
Mga Pahibalo. Kini kinahanglang dili kaayo daghan. Ang kadaghanan mahimong iimprinta, ipaambit sa eletronik nga paagi, o ipaambit sa ubang mga miting.
-
Atimanonon sa ward ug stake, sama sa mosunod:
-
Pagpaluyo ug pag-release sa mga opisyal ug mga magtutudlo (tan-awa sa 30.3 ug 30.6).
-
Pagpresentar sa mga ngalan sa kaigsoonan nga ordinahan ngadto sa usa ka katungdanan sa Aaronic nga Pagkapari (tan-awa sa 18.10.3).
-
Pag-ila sa bag-ong mga miyembro sa ward, lakip sa bag-ong mga kinabig. Human sa pipila ka pulong sa pasiuna, ang tawo nga nagpahigayon mohangyo sa kongregasyon sa pagpakita pinaagi sa pagpataas sa kamot nga sila moabi-abi sa miyembro nganha sa ward.
Kon ang mga bata nga anaa na sa rekord bunyagan ug kompirmahan, sila ipaila diha sa panagtigom alang sa sakramento. Hinoon, dili kinahanglan nga sila ipresentar aron abi-abihon diha sa ward.
-
-
Paghatag og ngalan ug pagpanalangin sa mga bata (tan-awa sa 18.6). Kini sa kasagaran himoon sa miting sa pagpuasa ug pagpamatuod (tan-awa sa 29.2.2).
-
Pagkompirma sa bag-ong mga kinabig (tan-awa sa 18.8).
-
Himno sa sakramento ug pagpangalagad sa sakramento. Ang sakramento mao ang importante nga bahin sa miting. Ang ubang bahin sa miting kinahanglang dili makapuli niini. Kini nga ordinansa mao ang usa ka oportunidad alang sa mga miyembro sa pagtumong sa ilang mga hunahuna ngadto sa Manluluwas ug sa Iyang sakripisyo alang kanila. Kinahanglan nga kini usa ka sagrado nga panahon sa espirituwal nga pagbag-o.
Ang lamesa sa sakramento kinahanglang andamon sa dili pa magsugod ang miting. Ang bishopric moseguro nga ang sakramento napanalanginan ug napaambit nga may balaang pagtahod ug sa hapsay nga paagi. Kadtong kinsa nangalagad sa sakramento nagrepresentar ni Jesukristo.
Alang sa dugang pa mahitungod sa pagpangandam, pagpanalangin, ug pagpaambit sa sakramento, tan-awa sa 18.9.
Alang sa impormasyon mahitungod sa pagpangalagad sa sakramento sa dili kasagaran nga mga sitwasyon, tan-awa sa 29.2.1.5 ug 18.9.1.
-
Mga mensahe sa ebanghelyo ug pagpanganta sa kongregasyon o ubang musika. Ang mga mensahe ug musika kinahanglang nahiangay sa sagrado nga matang sa sakramento. Alang sa impormasyon mahitungod sa pagpili og mga mamumulong, tan-awa sa 29.2.1.4. Alang sa impormasyon mahitungod sa mga pagpili og musika sa mga panagtigom alang sa sakramento, tan-awa sa 19.3.2.
-
Panapos nga himno ug pag-ampo.
-
Postlude nga musika.
Ang biswal nga mga tabang ug audiovisual nga mga materyal kinahanglang dili gamiton sa mga panagtigom alang sa sakramento (tan-awa sa 38.8.3).
29.2.1.2
Pagdumala sa Panagtigom alang sa Sakramento
Ang bishop modumala sa panagtigom alang sa sakramento gawas kon ang usa ka sakop sa kapangulohan sa stake, usa ka Area Seventy sa iyang dapit, o usa ka Kinatibuk-ang Awtoridad motambong. Kon ang bishop ug ang iyang mga magtatambag dili makatambong sa panagtigom alang sa sakramento, ang presidente sa stake motudlo kinsa ang modumala. Sa kasagaran siya motudlo sa presidente sa korum sa mga elder. Hinuon, mahimo siya nga modapit og laing naghupot sa Melchizedek nga Pagkapari.
29.2.1.3
Panahon sa dili pa ang Miting
Sa dili pa magsugod ang miting, ang mga miyembro sa kongregasyon mangandam sa espirituwal nga paagi alang sa sakramento. Sila makahimo niini pinaagi sa hilom nga pag-ampo ug pagpamalandong. Ang mga lider mopakita og ehemplo sa balaang pagtahod.
Usa ka sakop sa bishopric modapit sa mga kapangulohan sa klase sa Young Women sa pag-organisar sa kabatan-onan aron mangalagad pinaagi sa pag-abiabi sa mga bisita ug sa mga miyembro sa ilang pagsulod sa chapel. Ang kabatan-onan maningkamot sa pagtimbaya sa mga miyembro pinaagi sa ngalan. Sila mopasiugda usab og balaang pagtahod pinaagi sa pagtubag sa mga pangutana ug sa pagtabang sa mga tawo sa pagpangita og malingkoran kon gikinahanglan.
29.2.1.4
Pagpili og mga Mamumulong
Ang bishopric mopili og mga mamumulong sa panagtigom alang sa sakramento. Sa kasagaran modapit sila og mga miyembro sa ward, lakip na sa kabatan-onan ug kabataan (tan-awa sa 38.8.18). Ang presidente sa stake mosangon sa mga high councilor o mga sakop sa mga kapangulohan sa organisasyon sa stake sa pagpamulong. Ang presidente sa stake motino kapila himoon ang maong mga buluhaton.
Ang bishopric mohatag og imbitasyon sa pagpamulong sa layo pa ang miting. Ang mga mamumulong mopamatuod ni Jesukristo ug sa Iyang ebanghelyo gamit ang mga kasulatan (tan-awa sa Doktrina ug mga Pakigsaad 42:12; 52:9). Ang mga mensahe kinahanglang makapalig-on sa pagtuo ug nahiangay sa sagrado nga kinaiyahan sa sakramento.
Alang sa impormasyon mahitungod sa bag-ong natawag ug bag-ong mipauli nga mga misyonaryo nga mamulong sa panagtigom alang sa sakramento, tan-awa sa 24.5.2 ug 24.8.3.
Ang bishopric moeskedyul og usa ka panagtigom alang sa sakramento matag tuig alang sa pasundayag sa mga bata sa Primary. Alang sa impormasyon mahitungod niini nga pasundayag, tan-awa sa 12.1.6.
29.2.1.5
Mga Tulumanon sa Sakramento sa Dili Kasagaran nga mga Sitwasyon
Ang matag miyembro nagkinahanglan og espirituwal nga mga panalangin nga moabot gikan sa pag-ambit sa sakramento. Hinoon, ang pipila ka miyembro dili makatambong sa panagtigom alang sa sakramento tungod kay sila natanggong sa ilang panimalay, sa ospital, o sa pasilidad sa pag-atiman. Ang bishop mahimong mosangon og mga naghupot sa pagkapari sa pagpangalagad sa sakramento niini nga mga miyembro (tan-awa sa 18.9.1).
Sa pipila ka sitwasyon, ang bishop mahimong motugot nga isibya ang panagtigom alang sa sakramento alang niadtong dili makatambong. Alang sa impormasyon, tan-awa sa 29.7.
Kon ang mga miyembro nagbiyahe o temporaryong nagpuyo layo sa panimalay, sila kinahanglan nga motambong og panagtigom alang sa sakramento sa duol nga ward kon mahimo. Ang mga tulumanon sa sakramento kinahanglang dili himoon dungan sa mga reunion sa pamilya, mga bakasyon, o sa ubang mga kalihokan nga wala pasiugdahi sa Simbahan.
29.2.2
Miting sa Pagpuasa ug Pagpamatuod
Sa usa ka miting sa pagpuasa ug pagpamatuod, walay gisangonan nga mga mamumulong o espesyal nga mga pinili nga musika. Hinoon, ang tawo nga nagpahigayon mohatag og mubo nga pagpamatuod. Dayon siya modapit sa mga miyembro sa kongregasyon sa paghatag sa ilang mga pagpamatuod. Ang paghatag og pagpamatuod nagpasabot sa pagpahayag sa mga kamatuoran sa ebanghelyo pinaagi sa Espiritu Santo. Ang mga pagpamatuod kinahanglan nga mubo aron daghang mga tawo ang makaapil.
Ang gagmay nga mga bata mahimong mohatag og pagpamatuod sa miting sa pagpuasa ug pagpamatuod. Mas labing maayo alang kanila nga makat-on sa pagbuhat sa ingon diha sa panimalay hangtod nga sila makahatag og pagpamatuod nga walay tabang gikan sa uban.
Ubos sa direksyon sa bishop, ang mga bata kasagaran hatagan og ngalan ug panalanginan atol sa miting sa pagpuasa ug pagpamatuod (tan-awa sa 29.2.1.1).
29.2.3
Komperensiya sa Ward
Ang komperensiya sa ward planohon aron matubag ang lokal nga mga panginahanglan. Kini naglakip sa panagtigom alang sa sakramento nga giplano sa presidente sa stake. Ang presidente sa stake sa kasagaran modumala sa miting, ug usa ka sakop sa bishopric sa kasagaran ang mopahigayon.
Atol niini nga miting, ang usa ka sakop sa kapangulohan sa stake o high council mopresentar sa mga ngalan sa mga lider sa kinatibuk-an, sa stake, ug sa ward alang sa pagpaluyo. Siya mogamit sa porma sa Mga Opisyales nga Gipaluyohan, nga giandam sa klerk sa ward. Ang bishop ug ang presidente sa stake sa kasagaran mamulong sa miting.
Ang ward sa kasagaran mohimo og regular nga mga miting sa pagkapari ug sa organisasyon isip kabahin sa komperensiya sa ward. Ang mga lider sa stake mohatag og instruksiyon ug tabang. Sila mangalagad ngadto sa mga lider ug mga miyembro sa ward.
Mahitungod sa komperensiya sa ward, ang kapangulohan sa stake makigmiting sa bishopric. Silang tanan morebyo sa kauswagan sa buhat sa Dios sa kaluwasan ug kahimayaan diha sa ward. Kini nga miting mahimong himoon sa Dominggo nga komperensiya sa ward o sa laing panahon.
29.2.4
Miting sa Bishopric
Ang bishopric moplano ug mopahigayon niini nga mga miting. Ang mga butang nga ikonsiderar maglakip sa:
-
Pagpakigsabot sa buhat sa Dios sa kaluwasan ug kahimayaan diha sa ward.
-
Pagpalig-on sa mga indibidwal ug mga pamilya diha sa ward—ilabi na sa kabatan-onan ug kabataan.
-
Pag-ila sa mga miyembro kinsa makaandam sa pagdawat og mga ordinansa, lakip sa mga ordinasyon sa pagkapari.
-
Pag-ila sa mga miyembro nga tawagon ngadto sa mga katungdanan sa ward.
-
Pag-ila sa mga miyembro kinsa mahimong irekomendar ngadto sa presidente sa stake aron moserbisyo isip mga misyonaryo.
-
Pagrebyo sa mga instruksiyon gikan sa mga kasulatan, mga lider sa Simbahan, ug niini nga tamdanan nga basahon.
Ang ubang mga butang mahimong maglakip sa mga organisasyon ug mga programa sa ward, sa badyet sa ward, mga report sa mga buluhaton, ug mga plano alang sa umaabot nga mga miting ug mga kalihokan.
29.2.5
Miting sa Konseho sa Ward
Ang bishop moplano, modumala ug mopahigayon sa mga miting sa konseho sa ward. Kon siya wala, siya mahimong mosangon sa usa sa magtatambag sa pagdumala ug pagpahigayon. Hinoon, ang konseho dili mohimo og dagkong mga desisyon kon wala ang bishop.
Ang konseho sa ward magtinguha sa pagtabang sa tanan nga mga miyembro sa ward nga makaangkon og espirituwal nga kalig-on, makadawat sa makaluwas nga mga ordinansa, makatuman sa mga pakigsaad, ug mahimong mapahinungoron nga mga sumusunod ni Jesukristo (tan-awa sa Moroni 6:4–5). Atol sa mga miting sa konseho sa ward, ang mga sakop sa konseho moplano ug makigsabot niini nga buhat. Sila motino kon sa unsa nga paagi nga ang mga kalig-on ug mga abilidad sa mga miyembro sa ward makapanalangin niadtong nanginahanglan. Sila magtinguha sa giya sa Espiritu samtang sila maghiusa pinaagi sa gugma ug pagpakabana alang sa mga miyembro sa ward.
Ang mga lider sa organisasyon sa ward motambong sa mga miting sa konseho sa ward sa duha ka mga kapasidad:
-
Isip mga sakop sa konseho sa ward kinsa motabang sa pagpanalangin sa tanang miyembro sa ward.
-
Isip mga representante sa ilang mga organisasyon.
Kon sila magpundok, ang mga sakop sa konseho sa ward maghisgot sa mga butang nga makahatag og kaayohan sa hiniusang mga paningkamot sa tibuok konseho. Ang matag sakop sa konseho giawhag sa pagpaambit sa iyang mga hunahuna ug inspirasyon niini nga mga butang.
Ang mga miting sa konseho sa ward sa kasagaran dili molapas sa usa ka oras. Sila magsugod sa pag-ampo ug mubo nga mga report sa mga buluhaton sa miaging mga miting. Gilista sa ubos mao ang mga butang nga mahimong hisgotan. Tingali walay igo nga panahon sa paghisgot niining tanan sa matag miting. Ang bishop mohatag og prayoridad sa mga butang nga labing gikinahanglan sa pagpanalangin sa mga indibidwal ug mga pamilya.
-
Pagsunod sa ebanghelyo ni Jesukristo. Pagtabang sa tanang miyembro nga molig-on sa hugot nga pagtuo, modawat sa makaluwas nga mga ordinansa, ug motuman sa ilang mga pakigsaad.
-
Pag-atiman niadtong nanginahanglan. Pagpakigbahin sa mga kapanguhaan ug mga kahanas aron mopanalangin sa mga indibidwal, mga pamilya, ug sa komunidad. Pagtabang sa mga miyembro sa ward nga makabarog pinaagi sa kinaugalingon nga paningkamot. (Tan-awa sa kapitulo 22.)
-
Pagdapit sa tanan nga modawat sa ebanghelyo. Pagrebyo sa kalamboan niadtong kinsa nagkat-on sa ebanghelyo, ingon man usab sa bag-o ug mibalik nga mga miyembro. Paghisgot og mga paagi nga ang mga miyembro makapaambit sa ebanghelyo ngadto sa uban. (Tan-awa sa kapitulo 23.)
-
Paghiusa sa mga pamilya alang sa kahangtoran. Pagrebyo sa kalamboan sa mga miyembro kinsa nag-andam nga modawat sa mga ordinansa sa templo. Pagplano og mga paagi sa pagtabang og dugang nga mga miyembro nga makakuha og rekomend sa templo. Paghisgot og mga paagi nga ang mga miyembro moapil sa buhat sa templo ug family history. (Tan-awa sa kapitulo 25.)
Samtang ang mga sakop sa konseho sa ward maghisgot niining mga butanga, ilang hunahunaon ang mga panginahanglan ug mga kalig-on sa mga miyembro nga ilang giserbisyohan. Sila makahibalo mahitungod niini nga mga panginahanglan ug mga kalig-on diha sa mga miting sa kapangulohan, sa mga panaghisgot uban sa mga sakop sa ilang organisasyon (lakip sa mga interbiyo sa pagpangalagad), ug pinaagi sa ilang kaugalingong mga paningkamot. Agi og dugang, ang Leader and Clerk Resources adunay mga himan ug mga report nga makatabang sa mga lider nga makahibalo sa kalamboan sa mga miyembro. Ang mga sakop sa konseho kinahanglan nga mohimo nga kompidensyal sa bisan unsa nga pribado o sensitibo nga impormasyon (tan-awa sa 4.4.6).
Ang konseho sa ward kinahanglang makaila sa kabataan ug kabatan-on diha sa ward ug sa ilang mga sitwasyon sa panimalay. Sila mohatag og piho nga pagtagad niadtong kinsa walay suporta sa ebanghelyo diha sa panimalay.
Human sa usa ka panaghisgot, ang bishop mahimong mohukom sa angay nga aksiyon o molangan sa desisyon samtang mangita pa og dugang nga impormasyon ug giya. O siya modala niini ngadto sa lahi nga konseho, sama sa bishopric. Tan-awa sa 4.4.3.
Usahay ang konseho sa ward motino nga ang usa ka kalilhokan sa ward mahimong makatabang nga matubag ang mga panginahanglan sa mga miyembro. Ang konseho sa ward mahimong modumala sa pagplano sa mga kalihokan sa ward. Hinoon, kadaghanan sa pagplano himoon sa dili pa ug human sa mga miting sa konseho. Alang sa dugang nga impormasyon mahitungod sa mga kalihokan, tan-awa sa kapitulo 20.
Human makauli ang full-time nga mga misyonaryo, sila mahimong dapiton sa pagreport bahin sa ilang mga misyon ngadto sa konseho sa ward (tan-awa sa 24.8.3).
Aron masabtan ang mga baroganan nga naggiya sa mga miting sa konseho diha sa Simbahan, ang tanang sakop sa konseho kinahanglang magtuon sa 4.3 ug 4.4.
29.2.6
Miting sa Konseho sa Kabatan-onan sa Ward
Ang bishop mahimong mopahigayon og mga miting sa konseho sa kabatan-onan sa ward. O siya mahimong mosangon og laing tawo sa pagbuhat sa ingon, sama sa usa sa iyang mga kaabag sa korum sa mga priest o sa presidente sa labing taas og edad nga klase sa Young Women. Ang mga miting sa konseho sa kabatan-onan sa ward naghatag og mga oportunidad sa kabatan-onan sa pagpangulo. Ang bishopric o ang ubang mga lider makatabang kanila sa pag-andam niini nga mga miting atol sa mga miting sa kapangulohan sa korum o klase.
Sa dili pa ang matag miting, ang bishop ug ang tawo nga nagpahigayon morebyo sa mga butang nga hisgotan. Kini nga mga butang mahimong maglakip sa mosunod:
-
Ang buhat sa Dios sa kaluwasan ug kahimayaan.
-
Mga panginahanglan sa kabatan-onan sa ward ug mga paagi sa pagtubag niini.
-
Mga paningkamot sa pagtabang sa kabatan-onan kinsa dili kaayo aktibo o bag-o nga mga miyembro.
-
Mga kalihokan, lakip sa mga oportunidad sa pagserbisyo niadtong nanginahanglan. Kadaghan sa pagplano himoon diha sa mga miting sa kapangulohan sa korum o klase (tan-awa sa kapitulo 20).
-
Pagpangalagad (tan-awa sa kapitulo 21).
-
Pagtudlo sa bag-ong gitawag nga mga kapangulohan sa korum o klase.
Aron masabtan ang mga baroganan nga naggiya sa mga miting sa konseho diha sa Simbahan, ang tanang sakop sa konseho kinahanglang magtuon sa 4.3 ug 4.4.
29.2.7
Ubang mga Miting ug mga Klase sa Ward
Ang mga miting alang sa mga korum sa pagkapari ug sa ilang mga kapangulohan gihulagway diha sa kapitulo 8 ug 10.
Ang mga miting sa mga igsoong babaye sa Relief Society ug sa ilang mga lider gihulagway diha sa kapitulo 9.
Ang mga miting alang sa mga batan-ong babaye ug sa ilang mga lider gihulagway diha sa kapitulo 11.
Ang mga miting alang sa mga bata sa Primary ug sa ilang mga lider gihulagway diha sa kapitulo 12.
Ang mga klase sa Sunday School gihulagway diha sa 13.3.
Ang mga miting sa konseho sa magtutudlo gihulagway diha sa 17.4.
Ang mga miting sa pagpakigsabot alang sa buhat sa pagpakigbahin sa ebanghelyo ug pagpalig-on sa bag-o ug mibalik nga mga miyembro gihulagway diha sa 23.4.
Ang mga miting sa pagpakigsabot alang sa buhat sa templo ug family history gihulagway diha sa 25.2.7
29.2.8
Mga Eskedyul sa mga Miting sa Dominggo
Ang mga ward mogamit sa usa sa mosunod nga duha ka oras nga mga eskedyul alang sa mga miting sa Dominggo.
Plano 1
|
60 minutos |
Panagtigom alang sa sakramento |
|---|---|
|
10 minutos |
Pagbalhin ngadto sa mga klase ug mga miting |
|
50 minutos |
Sa tanang Dominggo: Primary, lakip sa nursery (tan-awa sa 12.2.1.2) Una ug ikatulo nga mga Dominggo sa bulan: Sunday School (tan-awa sa 13.3) Ikaduha ug ikaupat nga mga Dominggo: mga miting sa korum sa pagkapari (tan-awa sa 8.2.1.2 ug 10.2.1.2), mga miting sa Relief Society (tan-awa sa 9.2.1.2), ug mga miting sa Young Women (tan-awa sa 11.2.1.2) Ikalima nga mga Dominggo: mga miting alang sa kabatan-onan ug mga hamtong. Ang bishopric motino sa hilisgotan ug mosangon sa mga magtutudlo (kasagaran mga sakop sa ward o stake). Sila usab motino kon ang kabatan-onan ug mga hamtong, lalaki ug babaye, maglahi ba o magtipon. |
Plano 2
|
50 minutos |
Sa tanang Dominggo: Primary, lakip sa nursery (tan-awa sa 12.2.1.2) Una ug ikatulo nga mga Dominggo sa bulan: Sunday School (tan-awa sa 13.3) Ikaduha ug ikaupat nga mga Dominggo: mga miting sa korum sa pagkapari (tan-awa sa 8.2.1.2 ug 10.2.1.2), mga miting sa Relief Society (tan-awa sa 9.2.1.2), ug mga miting sa Young Women (tan-awa sa 11.2.1.2) Ikalima nga mga Dominggo: mga miting alang sa kabatan-onan ug mga hamtong. Ang bishopric motino sa hilisgotan ug mosangon sa mga magtutudlo (kasagaran mga sakop sa ward o stake). Sila usab motino kon ang kabatan-onan ug mga hamtong, lalaki ug babaye, maglahi ba o magtipon. |
|---|---|
|
10 minutos |
Pagbalhin ngadto sa panagtigom alang sa sakramento |
|
60 minutos |
Panagtigom alang sa sakramento |
Kon duha ka ward ang magmiting sa sama nga gambalay ug ang usa o ang duha adunay gamay ra kaayo nga kabataan o kabatan-onan, mas maayo alang sa kabataan o kabatan-onan nga magtipon nga motambong sa mga klase sa Dominggo. Ang mga eskedyul sa mga miting sa Dominggo sa mga ward mahimong magsapaw sumala sa gipakita sa ubos.
Kini nga plano mahimong ikonsiderar usab kon ang duha ka ward nagggamit og lahi nga mga pinulongan apan ang kabataan ug kabatan-onan nagsulti og pareha nga pinulongan.
Ang paggamit niini nga plano nagkinahanglan og pagtugot sa presidente sa stake. Kon siya motugot, ang bishop sa matag ward makigmiting sa mga lider sa organisasyon aron mangayo sa ilang tambag mahitungod sa pag-implementar niini.
Ang duha ka bishopric magmiting sa pagtino kinsa nga mga miyembro gikan sa matag ward ang tawagon nga moserbisyo sa mga korum ug mga organisasyon. Ang matag bishop magpabilin nga presidente sa iyang korum sa priest, apan ang duha ka bishop magpuli-puli sa pagdumala sa mga miting sa korum sa Dominggo. Ang bishop gikan sa duha ka ward motambong sa hiniusang mga miting sa konseho sa kabatan-onan sa ward. Human maimplementar ang plano, ang mga lider magpadayon sa pagmiting kanunay sa pagpakigsabot sa ilang mga paningkamot.
29.2.9
Pasko sa Pagkabanhaw ug Pasko
Sa Dominggo sa Pasko sa Pagkabanhaw, ang panagtigom alang sa sakramento mao lamang ang miting nga ipahigayon. Ingon usab kon ang Adlaw sa Pasko matumong og Dominggo. Kon ang Pasko matumong og laing adlaw sa semana, ang panagtigom alang sa sakramento mao lamang ang miting nga ipahigayon sa Dominggo nga hapit na ang Pasko—kasagaran sa Dominggo sa wala pa—ingon nga gitino sa kapangulohan sa stake.
Sa ubang mga lugar, ang mahinungdanong dili pang-Kristiyano nga kasaulogan importante kaayo sa kultura. Kon kana nga kasaulogan matumong og Dominggo, ang Kapangulohan sa Area mahimong motugot sa mga bishop sa pagpahigayon lamang og panagtigom alang sa sakramento nianang adlawa.
Ang mga kapangulohan sa stake mahimong mokonsulta sa mga bishop sa pagtino kon usbon ba ang mga oras sa pagsugod alang sa mga panagtigom alang sa sakramento niini nga mga Dominggo.
29.3
Mga Miting sa Stake
29.3.1
Komperensiya sa Stake
Ang mga komperensiya sa stake i-eskedyul sa Presidente sa Korum sa Napulog Duha ka Apostoles. Sa kasagaran ang presidente sa stake modumala sa usa ka komperensiya matag tuig ug ang gisangonan nga Area Seventy o Kinatibuk-ang Awtoridad modumala sa lain.
Ang tigdumalang opisyal mogiya sa tanang pagplano alang sa komperensiya. Siya moaprobar nang daan sa mga partisipante ug sa mga pinili nga musika. Alang sa impormasyon mahitungod sa musika sa komperensiya sa stake, tan-awa sa 19.3.4.
Kon ang usa ka Area Seventy o Kinatibuk-ang Awtoridad ang modumala, siya modapit sa presidente sa stake sa pagsugyot og mga hilisgotan alang sa instruksiyon diha sa komperensiya. Kon ang presidente sa stake ang modumala, siya ug ang iyang mga magtatambag mopili og mga hilisgotan. Ang kapangulohan sa stake mahimong mohisgot sa posible nga mga hilisgotan uban sa konseho sa stake. Sa paghimo niini nga mga pagpili, ang kapangulohan sa stake mokonsiderar sa mga hilisgotan nga gihatagan og gibug-aton sa Unang Kapangulohan bag-ohay lang.
Samtang ang presidente sa stake mohimo og mga paghan-ay alang sa komperensiya sa stake, siya mahimong mohangyo sa mga korum sa pagkapari ug sa ubang mga organisasyon, mga indibidwal, ug mga pamilya sa pagtabang. Pananglitan, sila mahimong sangonan sa pagpahimutang sa mga lingkoranan, maoy mahimong mga tigtimbaya [usher], ug molimpyo sa gambalay.
Ang matag komperensiya sa stake kasagaran maglakip sa mosunod nga mga miting:
-
Usa ka miting sa Area Seventy o Kinatibuk-ang Awtoridad (kon gisangonan), ug sa kapangulohan sa stake. Ang klerk sa stake ug executive secretary motambong usab.
-
Usa ka miting sa pagpangulo sa pagkapari diha sa stake (tan-awa sa 29.3.3). Ang tigdumalang awtoridad motino kon kini nga miting himoon ba sa Sabado o Dominggo. Usa ka sakop sa kapangulohan sa stake ang mopahigayon.
-
Usa ka sesyon sa Sabado sa gabii alang sa tanang miyembro sa stake nga nag-edad og 18 ug pataas. Depende sa lokal nga mga sirkumstansiya, kini nga miting mahimong himoon sa Dominggo kon aprobahan sa tigdumalang awtoridad. Usa ka sakop sa kapangulohan sa stake ang mopahigayon.
-
Usa ka kinatibuk-ang sesyon, nga himoon sa Dominggo, alang sa tanang miyembro ug sa uban kinsa gusto nga motambong. Ang presidente sa stake mopahigayon ug mamulong niini nga miting. Sobra sa usa ka Dominggo nga kinatibuk-ang sesyon ang mahimong himoon kon walay igong lugar alang sa tanan sa usa ka sesyon. Ang mga bata motambong uban sa ilang mga pamilya, dili sa usa ka lahi nga miting.
Kon gikinahanglan, ang mga sesyon sa komperensiya mahimong isibya ngadto sa mga meetinghouse o sa ubang mga dapit diha sa stake. Sa ubang mga miyembro tingali magkinahanglan nga ang komperensiya isibya ngadto sa ilang mga panimalay. Alang sa dugang nga impormasyon mahitungod sa pagsibya sa mga miting, tan-awa sa 29.7.
Ang mga mamumulong sa kinatibuk-ang sesyon kinahanglang dili mogamit og mga tabang sa biswal o audiovisual nga mga materyal (tan-awa sa 38.8.3).
Kon ang Kinatibuk-ang mga Opisyales, ang presidente ug matron sa templo, ang presidente sa misyon ug kompanyon, o ang patriyarka sa stake motambong, sila kinahanglang molingkod sa atubangan. Mao usab alang sa mga magtatambag sa mga kapangulohan sa templo ug misyon (ug ilang mga kapikas) kon sila motambong puli sa presidente sa templo o misyon.
Sa usa ka komperensiya sa stake matag tuig, ang usa ka sakop sa kapangulohan sa stake mopresentar sa mga opisyal sa kinatibuk-an, sa area, ug sa stake alang sa pagpaluyo. Siya mogamit sa porma sa Mga Opisyales nga Gipaluyohan, nga giandam sa klerk sa stake. Sa kasagaran kini himoon sa unang komperensiya sa stake nianang tuiga.
Kon ang mga opisyal sa stake gitawag o gi-release nga wala pa ang komperensiya sa stake, sila ipresentar alang sa pagpaluyo o sa pagpahayag og pasalamat sa sunod nga komperensiya sa stake. O kini mahimong himoon sa panagtigom alang sa sakramento sa matag ward. Tan-awa sa 30.3 ug 30.6.
Ang mga kaigsoonan nga girekomendar nga ordinahan nga mga elder o mga high priest ipresentar alang sa pagpaluyo diha sa usa ka komperensiya sa stake. Kon ang usa ka igsoong lalaki kinahanglan nga ordinahan sa dili pa ang sunod nga komperensiya sa stake, siya mahimong paluyohan diha sa panagtigom alang sa sakramento sa iyang ward. Dayon ang iyang ngalan ipresentar alang sa pagratipika diha sa komperensiya sa stake (tan-awa sa 18.10.3).
29.3.2
Kinatibuk-ang Miting sa Pagkapari sa Stake
Ang kapangulohan sa stake moplano ug mopahigayon og kinatibuk-ang miting sa pagkapari sa stake. Sila mainampoong mopili og mga hilisgotan ug mga mamumulong.
29.3.3
Miting sa Pagpangulo sa Pagkapari sa Stake
Ang kapangulohan sa stake moplano ug mopahigayon sa mga miting sa pagpangulo sa pagkapari diha sa stake. Ang han-ay niini nga mga miting mahimong mausab. Ang tanang partisipante mahimong magpabilin alang sa tibuok miting. O, human sa pipila ka kinatibuk-ang instruksiyon, sila mahimong maglain ngadto sa gagmay nga mga grupo alang sa piho nga instruksiyon base sa ilang mga calling ug mga buluhaton.
Ang kapangulohan sa stake ug ang ubang mga lider sa stake sa kasagaran mohatag sa instruksiyon. Ang mga lider sa ward, lakip sa mga lider sa mga babaye, mahimo usab nga dapiton sa paghatag og instruksiyon panagsa.
29.3.4
Mga Miting sa Pagpangulo sa Stake
Ang mga kapangulohan sa organisasyon sa stake moplano ug mopahigayon og mga miting sa pagpangulo sa stake. Ang han-ay niini nga mga miting mahimong mausab. Ang tanang lider mahimong magpabilin alang sa tibuok miting. O, human sa pipila ka kinatibuk-ang instruksiyon, sila mahimong maglain ngadto sa gagmay nga mga grupo alang sa piho nga instruksiyon base sa ilang mga calling ug mga buluhaton.
Ang mga lider sa organisasyon, ang mga sakop sa kapangulohan sa stake, o ubang mga lider sa stake sa kasagaran mohatag sa instruksiyon. Ang mga lider sa organisasyon sa ward mahimo usab nga dapiton sa paghatag sa instruksiyon panagsa.
Ang kapangulohan sa Young Men sa stake dili mopahigayon og miting sa pagpangulo sa stake. Ang instruksiyon alang niadtong nagserbisyo sa mga korum sa Aaronic nga Pagkapari ihatag diha sa mga miting sa pagpangulo sa pagkapari sa stake (tan-awa sa 29.3.3).
29.3.5
Miting sa Kapangulohan sa Stake
Ang presidente sa stake moplano ug mopahigayon sa mga miting sa kapangulohan sa stake. Ang mga butang nga ikonsiderar maglakip sa:
-
Buhat sa Dios sa kaluwasan ug kahimayaan diha sa stake.
-
Pagpalig-on sa mga indibidwal ug mga pamilya diha sa stake.
-
Mga panginahanglan ug mga kalig-on sa mga ward, mga korum sa mga elder, ug sa ubang mga organisasyon sa stake.
-
Rekomendasyon sa bishop sa mga lalaki nga ordinahan nga mga elder.
-
Mga miyembro nga tawagon ngadto sa mga katungdanan sa stake ug pipila ka mga katungdanan sa ward sumala sa gilatid diha sa 30.8.
-
Mga rekomendasyon sa bishop sa mga miyembro nga moserbisyo og mga misyon.
-
Mga instruksiyon gikan sa mga kasulatan, sa mga lider sa Simbahan, ug niini nga tamdanan nga basahon.
Ang ubang mga butang mahimong maglakip sa mga kalihokan ug mga programa sa stake, sa badyet sa stake, mga report sa mga buluhaton, ug mga plano alang sa umaabot nga mga miting.
29.3.6
Miting sa High Council
Ang kapangulohan sa stake magplano ug mophigayon sa mga miting sa high council. Kini nga mga miting mahimong maglakip sa:
-
Pagdawat og instruksiyon gikan sa kapangulohan sa stake bahin sa doktrina ug mga buluhaton.
-
Pagtinambagay mahitungod sa pagpalig-on sa mga indibidwal ug mga pamilya diha sa stake. Ang Leader and Clerk Resources (LCR) adunay mga himan ug mga report nga makatabang sa mga lider nga makahibalo sa kauswagan sa mga miyembro.
-
Paghisgot unsaon sa pagtabang nga matuman ang buhat sa Dios sa kaluwasan ug kahimayaan diha sa stake.
-
Pag-report sa mga buluhaton.
-
Pagpakitambag uban sa kapangulohan sa stake ug pagpaluyo sa ilang mga desisyon sa pag-orden og kaigsoonan isip mga elder ug mga high priest.
-
Pagpakitambag uban sa kapangulohan sa stake ug sa pagpaluyo sa ilang mga desisyon sa paghatag og mga calling.
-
Pagtabang sa pagplano sa mga miting sa pagpangulo sa pagkapari diha sa stake (tan-awa sa 29.3.3).
-
Pagpaminaw sa mga report gikan sa mipauli na nga mga misyonaryo (tan-awa sa 24.8.3).
Usahay ang mubo nga miting sa high council mahimong sundan dayon sa usa ka miting sa konseho sa stake (tan-awa sa 29.3.7). Kini makatabang sa pagpakunhod sa gidaghanon sa mga miting nga tambongan sa mga lider.
Aron masabtan ang mga baroganan nga naggiya sa mga miting sa konseho diha sa Simbahan, ang tanang sakop sa konseho kinahanglang magtuon sa 4.3 ug 4.4.
Alang sa impormasyon mahitungod sa mga partisipante nga moapil sa miting nga dili personal nga magkita [remotely], tan-awa sa 29.7
29.3.7
Miting sa Konseho sa Stake
Ang presidente sa stake moplano ug mopahigayon sa mga miting sa konseho sa stake. Niini nga mga miting, ang mga sakop sa konseho mahimong:
-
Modawat og instruksiyon gikan sa kapangulohan sa stake bahin sa doktrina ug sa ilang mga buluhaton.
-
Magtinambagay mahitungod sa pagpalig-on sa mga indibidwal ug mga pamilya diha sa stake. Ang LCR adunay mga himan ug mga report nga makatabang sa mga lider nga makahibalo sa kauswagan sa mga miyembro.
-
Maghisgot sa kinatibuk-an nga panan-awon alang sa buhat sa Dios sa kaluwasan ug kahimayaan diha sa stake.
-
Maghisgot sa temporal nga mga panginahanglan sa mga miyembro sa stake ug unsaon sa pagtabang kanila nga makabarog pinaagi sa kinaugalingong paningkamot. Moila og mga kapanguhaan nga anaa diha sa komunidad ug stake. Ang mga sanglitanan mahimong maglakip sa lokal nga mga eskwelahan ug sa BYU–Pathway Worldwide. (Tan-awa sa 22.12 ug 22.13.)
-
Maghimo ug magmentinar sila og yanong plano aron ang stake makatubag sa mga emerhensiya (tan-awa sa 22.9.1.3).
-
Magplano og mga paagi alang sa mga miyembro sa stake sa paghatag og serbisyo diha sa komunidad (tan-awa sa 22.9.1). Kon anaa, ang JustServe.org nagsugyot og mga oportunidad sa pagserbisyo alang sa komunidad.
-
Mo-report sa mga organisasyon, mga kalihokan, ug mga programa sa stake.
Usahay ang miting sa konseho sa stake mahimong sundan dayon og mubo nga miting sa high council (tan-awa sa 29.3.6). Kini makatabang sa pagpakunhod sa gidaghanon sa mga miting nga tambongan sa mga lider.
Aron masabtan ang mga baroganan nga naggiya sa mga miting sa konseho diha sa Simbahan, ang tanang sakop sa konseho kinahanglang magtuon sa 4.3 ug 4.4.
Alang sa impormasyon mahitungod sa mga partisipante nga moapil sa miting nga dili personal nga magkita [remotely], tan-awa sa 29.7
29.3.8
Miting sa Komitiba sa Pagpangulo sa mga Hamtong diha sa Stake
Ang komitiba sa pagpangulo sa mga hamtong diha sa stake mosuporta sa korum sa mga elder ug sa mga kapangulohan sa Relief Society sa ward sa ilang trabaho. Ang mga sakop sa komitiba mohatag og espesyal nga gibug-aton sa mga paningkamot sa ward diha sa pagpangalagad, pagpakigbahin sa ebanghelyo, pagpalig-on sa bag-o ug mibalik nga mga miyembro, ug sa pag-apil diha sa buhat sa templo ug family history.
Agi og dugang, kini nga komiti makigsabot sa mga paningkamot sa stake kalabot sa kaayohan ug pagbarog pinaagi sa kinaugalingong paningkamot, lakip sa JustServe.org (kon anaa) ug BYU–Pathway Worldwide (tan-awa sa 22.13).
Ang kapangulohan sa stake moplano ug mopahigayon og mga miting sa komitiba sa pagpangulo sa mga hamtong diha sa stake. Kini nga mga miting mahimong isumpay sa mga miting sa konseho sa stake. Pananglitan, sa kataposan sa ubang mga miting sa konseho sa stake, ang komitiba sa pagpangulo sa stake mahimong magmiting aron sa pagpadayon sa paghisgot mahitungod sa piho nga mga butang.
29.3.9
Miting sa Komitiba sa Pagpangulo sa Kabatan-onan diha sa Stake
Ang komitiba sa pagpangulo sa kabatan-onan diha sa stake mosuporta sa mga bishopric, mga kapangulohan ug mga tigtambag sa Young Women, ug mga tigtambag sa korum sa Aaronic nga Pagkapari diha sa ilang buhat uban sa kabatan-onan. Ang hamtong nga mga lider sa komitiba mohatag og espesyal nga gibug-aton sa pagpaapil sa kabatan-onan diha sa buhat sa Dios sa kaluwasan ug kahimayaan.
Ang komitiba sa pagpangulo sa kabatan-onan diha sa stake aduna sa mosunod nga dugang nga mga responsibilidad:
-
Pagplano og serbisyo ug mga kalihokan. Kini mahimong maglakip sa mga komperensiya sa kabatan-onan, mga sayaw, mga debosyonal, mga proyekto sa pagserbisyo, ug mga kalihokan sa daghang mga stake. (Alang sa mga ideya sa pagserbisyo, tan-awa sa JustServe.org kon anaa.) Ang kabatan-onan kinahanglang mangulo sa pagplano ug pagpatuman niini nga mga kalihokan. Ang mga kalihokan sa stake kinahanglang dili kaayo kanunay nga makahatag na hinoon og kabug-at sa mga ward. Kini nga mga kalihokan kinahanglang dugang lang sa mga kalihokan sa ward, dili makigkompetensya niini. Ang mga lider sa ward kinahanglang pahibaloon og sayo-sayo sa mga kalihokan sa stake.
-
Magplano og mga paagi sa pagsuporta sa mga komperensiya sa Alang sa Kalig-on sa Kabatan-onan.
-
Makigsabot sa mga paningkamot sa stake kalabot sa Programa sa Kabataan ug Kabatan-onan
Ang usa ka sakop sa kapangulohan sa stake modumala sa mga miting sa komitiba sa pagpangulo sa kabatan-onan diha sa stake. Siya ang mopahigayon, o siya mahimong mosangon og lain nga mohimo sa ingon, lakip ang kabatan-onan. Kini nga mga miting mahimong isumpay sa mga miting sa konseho sa stake. Pananglitan, sa kataposan sa pipila ka mga miting sa konseho, ang komitiba sa pagpangulo sa kabatan-onan mahimong magmiting aron sa pagpadayon sa panaghisgot mahitungod sa piho nga mga butang.
29.3.10
Miting sa Konseho sa mga Bishop sa Stake
Ang mga butang nga hisgotan mahimong maglakip sa:
-
Pagtabang sa kabatan-onan nga mouswag sa espirituwal nga paagi.
-
Mogamit sa mga halad sa puasa sa pag-atiman alang niadtong nanginahanglan. Motabang sa mga miyembro nga makabarog pinaagi sa kinaugalingong paningkamot (tan-awa sa kapitulo 22, ilabi na sa 22.11). Mopakigbahin og impormasyon mahitungod sa mga kapanguhaan nga anaa sa komunidad.
-
Motabang sa mga miyembro nga maghinulsol ug mosinati og kausaban sa kasingkasing (tan-awa sa kapitulo 32).
-
Modumala sa mga panalapi sa Simbahan (tan-awa sa kapitulo 34).
Ang presidente sa stake ang mangulo niini nga miting. Motabang siya sa mga bishop sa pagkat-on ug pagtuman sa ilang nag-unang mga responsibilidad (tan-awa sa 7.1). Modapit usab siya sa mga bishop sa pagpakigtambag mahitungod sa instruksiyon gikan mga lider sa Simbahan.
Kini nga miting dili mopuli sa regular nga mga interbiyo sa presidente sa stake uban sa matag bishop (tan-awa sa 6.2.1.2).
Aron masabtan ang mga baroganan nga naggiya sa mga miting sa konseho diha sa Simbahan, ang tanang sakop sa konseho kinahanglang magtuon sa 4.3 ug 4.4.
29.3.11
Ubang mga Miting sa Stake
Mga miting sa komite sa single adult sa stake ug komite sa young single adult sa stake gihulagway diha sa 14.1.1.2.
29.4
Mga Miting sa Coordinating Council
Ang Area Seventy mangulo sa mga miting ug mogiya sa panaghisgotan. Ang tanan nga motambong makigtinambagay isip managsama nga mga partisipante (tan-awa sa Doktrina ug mga Pakigsaad 88:122).
Niini nga mga miting, ang mga partisipante:
-
Magtinguha og pagpadayag kon unsaon nga labing maayong maimplementar ang direksyon sa Unang Kapangulohan, sa Korum sa Napulog Duha ka Apostoles, ug sa Kapangulohan sa Area.
-
Makigsabot mahitungod sa buhat sa Dios sa kaluwasan ug kahimayaan sulod sa ilang konseho.
-
Magtinambagay mahitungod sa temporal ug espirituwal nga kaayohan sa mga miyembro ug unsaon sa pagtabang kanila nga mahimong tinuod nga mga sumusunod ni Jesukristo.
-
Motudlo ug mohatag og kaayohan sa usag usa.
-
Makigsabot mahitungod sa atimanonon sa daghang stake.
29.5
Mga Lubong ug Ubang mga Tulumanon alang sa Patay
Kon ang usa ka miyembro sa Simbahan mamatay, ang bishop mahimong motanyag sa pagpahigayon og tulumanon sa pagtabang sa paghupay sa mga buhi ug paghatag og pasidungog ngadto sa namatay. Ang mga tulumanon alang sa mga tawo kinsa namatay magkalahi sumala sa relihiyon, kultura, tradisyon, ug lokal nga balaod. Ang mosunod nga mga instruksiyon makatabang sa mga bishop sa pagplano og nakasentro sa ebanghelyo nga mga tulumanon alang sa namatay samtang nagtahod niini nga mga kalainan.
29.5.1
Kinatibuk-ang mga Baroganan
Ang kamatayon usa ka importante nga bahin sa plano sa Langitnong Amahan sa kaluwasan (tan-awa sa Alma 12:24–27). Tungod ni Jesukristo, ang tanan mabanhaw. Ang importante nga katuyoan sa mga tulumanon sa Simbahan alang sa mga namatay mao ang pagpamatuod bahin sa plano sa kaluwasan, ilabi na sa Pag-ula ug Pagkabanhaw sa Manluluwas. Kini nga mga tulumanon kinahanglan nga ligdong, espirituwal nga mga kasinatian.
Ang mga miyembro sa Simbahan kinahanglang motahod sa mga praktis sa ubang mga relihiyon panahon sa kamatayon. Hinoon, dili sila moapil sa mga ritwal o mga tradisyon nga supak sa mga sugo o mga sumbanan sa Simbahan. Ang mga lider sa Simbahan kinahanglan dili molakip sa mga ritwal sa ubang mga relihiyon o mga grupo diha sa mga tulumanon sa Simbahan alang sa namatay.
Ang mga miyembro gitambagan batok sa mga praktis o mga tradisyon nga mahimong makapabug-at sa mga buhi. Ang mao nga mga praktis mahimong maglakip sa grabe nga pagbiyahe, detalyado nga mga pahibalo, pagbayad ngadto sa pamilya, dugay mahuman nga mga paghudyaka, ug sobra nga mga kasaulogan sa anibersaryo.
Ang mga miyembro sa Simbahan nga moapil sa mga tulumanon alang sa namatay na kinahanglang dili modawat og bayad.
Ang mga lider ug mga miyembro sa Simbahan mosunod sa lokal nga mga balaod mahitungod sa unsay buhaton kon adunay mamatay.
29.5.2
Pagtanyag og Tabang ngadto sa Pamilya
Isip disipulo ni Jesukristo, ang mga lider ug mga miyembro sa Simbahan kinahanglan nga “[mag]bang[o]tan uban niadto nga nagbang[o]tan; … ug [mo]hupay niadtong nagkinahanglan sa kahupayan” (Mosiah 18:9). Kon ang usa ka miyembro mamatay, ang bishop mobisita sa pamilya aron sa paghatag og kahupayan. Mahimo siyang mohangyo sa iyang mga magtatambag sa pagkuyog kaniya. Siya usab mopahibalo sa mga presidente sa korum sa mga elder ug sa Relief Society.
Ang bishop motanyag og tabang gikan sa mga miyembro sa ward, lakip sa korum sa mga elder ug Relief Society. Pananglitan, ang mga miyembro sa ward mahimong:
-
Mopahibalo sa mga higala ug mga kabanay.
-
Motabang sa pag-andam sa talaan sa namatay.
-
Motabang sa pagplano sa haya o sa ubang mga tulumanon.
-
Motabang sa pag-asikaso sa morge ug sa sementeryo, kon mahimo.
-
Mosul-ob og sinina sa patay nga lawas alang sa lubong (tan-awa sa 38.5.10).
-
Moandam sa pagkaon.
29.5.3
Mga Pagtan-aw (Kon Naandan)
Usahay ang pagtan-aw sa lawas sa namatay himoon diha sa meetinghouse sa Simbahan sa dili pa ang tulumanon sa haya. Kinahanglang ablihan sa mga lider ang meetinghouse alang sa mga tigdumala sa haya nga dili mominos usa ka oras sa dili pa magsugod ang nakaeskedyul nga pagtan-aw.
Human sa pagtan-aw, ang pag-ampo sa pamilya mahimong ihalad kon gusto sa pamilya. Ang lungon kinahanglan sirad-an sa dili pa ang tulumanon sa haya.
29.5.4
Mga Tulumanon sa Haya (Kon Naandan)
Kon ang haya alang sa usa ka miyembro nga himoon sa gambalay sa Simbahan, ang bishop mopahigayon niini. Kon kini himoon sa panimalay, sa morge, o sa daplin sa lubnganan, ang pamilya mahimong mohangyo sa bishop sa pagpahigayon niini. Ang magtatambag sa bishop mahimong mopahigayon kon ang bishop dili makahimo. Alang sa impormasyon mahitungod sa mga tulumanon nga ipahigayon diha sa gambalay sa Simbahan alang sa usa ka tawo nga dili miyembro sa Simbahan, tan-awa sa 29.5.6.
Ang haya nga gipahigayon sa bishop, sa gambalay man sa Simbahan o sa laing lugar, usa ka miting sa Simbahan ug usa ka relihiyoso nga tulumanon. Kinahanglan nga kini usa ka espirituwal nga okasyon. Ang bishop moawhag sa mga partisipante nga imentenar ang diwa sa balaang pagtahod ug kaligdong.
Kon ang bishop mopahigayon sa haya, siya o usa sa iyang mga magtatambag modumala sa pagplano sa tulumanon. Siya mokonsiderar unsay gusto sa pamilya, moseguro nga ang haya yano ug ligdong, dunay musika ug mubo nga mga pakigpulong nga nasentro sa ebanghelyo. Ang kahupayan nga gitanyag ni Jesukristo tungod sa Iyang Pag-ula ug Pagkabanhaw kinahanglan nga hatagan og gibug-aton. Ang mga sakop sa pamilya wala kinahanglana nga mamulong o moapil sa tulumanon.
Ang mga haya mao ang oportunidad sa paghatag og pasidungog ngadto sa namatay. Hinoon, ang mao nga mga pasidungog kinahanglang dili modominar sa tulumanon. Usa ka espesyal nga panagpundok sa pamilya, lahi gikan sa tulumanon sa haya, sa kasagaran usa ka mas maayo nga sitwasyon kon ang pamilya gusto og mas dugang panahon sa pagpaambit niini nga mga pasidungog o mga handomanan.
Ang pasundayag sa video kinahanglan dili mahimong kabahin sa tulumanon sa haya nga himoon diha sa chapel.
Ang mga haya kinahanglang magsugod sa saktong oras. Sa kasagaran, dili kini molungtad og sobra sa 1.5 ka oras, isip usa ka katahoran niadtong kinsa motambong.
Kon ang usa ka sakop sa kapangulohan sa stake, usa ka Area Seventy sa iyang dapit, o usa ka Kinatibuk-ang Awtoridad motambong sa haya, siya ang modumala. Ang tawo nga nagpahigayon mokonsulta kaniya sa sayo pa ug moila kaniya atol sa tulumanon. Ang tigdumalang opisyal kinahanglan dapiton sa paghatag sa panapos nga pakigpulong kon siya gusto.
Ang mga tulumanon sa haya kasagaran dili himoon sa Dominggo.
Sa pipila ka sitwasyon, ang mga bishop mahimong makigsabot sa mga punerarya sa paghatag og ligdong, matinahoron nga mga pagserbisyo sa haya ug sa lubong nga dili magpaganansya kon ang mga galastohan bayran gikan sa mga pundo sa halad sa puasa.
Alang sa impormasyon mahitungod sa mga misyonaryo nga mopauli aron motambong sa lubong, tan-awa sa 24.6.2.7. Alang sa mga lagda mahitungod sa pagpasibya ug pagrekord sa mga lubong, tan-awa sa 29.7.
29.5.5
Paglubong o Pagsunog sa Patay nga Lawas [Cremation]
Kon posible, ang namatay nga mga sakop kinsa natugahan kinahanglan nga ilubong o sunugon nga nagsul-ob og sinina sa templo. Alang sa impormasyon mahitungod sa sinina sa templo alang sa lubong ug pagsul-ob og sinina sa patay, tan-awa sa 38.5.10.
Kon mahimo, usa ka sakop sa bishopric mohatod ngadto sa sementeryo. Kon ang lubnganan ipahinungod, siya mokonsulta sa pamilya ug mohangyo og usa ka naghupot sa Melchizedek nga Pagkapari sa pagpahigayon sa pagpahinungod. Ang mga instruksiyon gihatag diha sa 18.16. Kon gusto sa pamilya, mahimong mohalad og pag-ampo diha sa daplin sa lubong.
Alang sa impormasyon mahitungod sa pagpahinungod sa dapit diin ibutang ang abo sa gisunog nga miyembro, tan-awa sa 18.16.2. Alang sa ubang mga lagda mahitungod sa pagsunog, tan-awa sa 38.7.2.
29.5.6
Mga Tulumanon alang Niadtong Dili mga Miyembro sa Simbahan
Ang bishop mahimong motanyag nga gamiton ang meetinghouse sa Simbahan alang sa tulumanon sa haya sa usa ka tawo nga dili miyembro sa Simbahan. Kon ang namatay nga tawo sakop sa laing simbahan, ang tulumanon mahimong himoon sa paagi nga gihulagway niana nga simbahan. Kon ang pamilya magtinguha, ang tulumanon mahimong ipahigayon sa pari gikan niana nga simbahan, basta kini ligdong ug angay. Hinoon, ang mga ritwal sa ubang mga simbahan o mga organisasyon dili mahimong ipahigayon sa meetinghouse sa Simbahan.
29.6
Mga Pag-ampo sa mga Miting sa Simbahan
Ang mga pag-ampo kinahanglan nga mubo, yano, ug gigiyahan sa Espiritu. Si bisan kinsa nga nabunyagan nga miyembro sa Simbahan mahimong mohalad og pangbukas o panapos nga pag-ampo. Ang mga bata kinsa wala mabunyagi mahimong mag-ampo diha sa Primary. Ang mga lider kinahanglang maglikay sa paghangyo sa bana ug asawa nga mag-ampo sa sama nga miting.
Ang mga miyembro kinahanglang mag-ampo gamit ang mga pulong nga nagpadayag og gugma ug pagtahod alang sa Langitnong Amahan. Sa Iningles, naglakip kini sa mga pulingalan [pronouns] nga Thee, Thy, Thine, ug Thou kon motawag Kaniya.
29.7
Pagsibya sa mga Miting ug Paghimo og Virtual nga mga Miting
Ang mga miyembro sa Simbahan kinahanglang maningkamot sa pagtambong sa mga miting sa personal nga paagi. Adunay kaayohan diha sa panagpundok nga makapalambo sa pagsimba ug makatabang sa paghiusa sa mga miyembro (tan-awa sa 29.0).
Kon dili kini posible tungod sa kahimtang sa panglawas o ubang mga rason, ang pagsibya ug pagpahigayon og birtuwal nga mga miting makapahimo niini nga posible nga makaapil kadtong dili makatambong. Alang sa kaayohan niini nga mga miyembro ug sa uban, ang bishop mahimong motugot sa pagsibya [livestreaming] sa mga panagtigom alang sa sakramento (tan-awa sa 29.2.1.5), mga tulumanon sa bunyag, mga lubong, ug ubang mga miting sa ward. Ang presidente sa stake mahimong motugot sa pagsibya sa mga komperensiya sa stake (tan-awa sa 29.3.1) ug ubang mga miting sa stake. Alang sa giya mahitungod sa pagsibya sa sakramento ug ubang mga ordinansa, tan-awa sa 38.2.3.
Sa samang paagi, kon ang mga miyembro dili personal nga makatambong sa mga klase sa Dominggo o sa mga miting sa pagpangulo, ang bishop o presidente sa stake mahimong motugot niini nga mga miyembro nga moapil sa birtuwal nga paagi.
Ang mga espesyalista sa teknolohiya sa stake ug ward makatabang sa mga lider sa pagpahimutang sa pagsibya ug virtual nga mga miting (tan-awa sa 33.10). Kini nga mga indibidwal makatabang usab sa mga miyembro nga makatambong niini nga mga miting.
Ang mga pagrekord sa sibya sa mga miting sa ward ug stake kinahanglang papason nianang adlawa human sa miting.
29.8
Mga Litrato ug mga Pagrekord og Video atol sa mga Miting
Aron mapreserbar ang kasagrado sa mga miting sa Simbahan, kinahanglan nga walay usa nga molitrato o morekord pinaagi sa video sa mga panagtigom alang sa sakramento o sa mga komperensiya sa stake.
Alang sa dugang nga impormasyon mahitungod sa mga pagrekord sa pagsibya sa mga miting, tan-awa sa 29.7.
29.9
Pag-interpretar alang sa mga Miting
Ang Ginoo gusto nga ang tanan makasabot sa ebanghelyo pinaagi sa iyang kaugalingong pinulongan (tan-awa sa Doktrina ug mga Pakigsaad 90:11). Diha sa mga stake diin ang mga miyembro namulong og sobra sa usa ka lumad nga pinulongan, ang usa ka sakop sa kapangulohan sa stake mahimong motawag og koordinitor sa pag-interpretar. Ang bishop mahimong motawag og mga tig-interpretar diha sa ward.
Alang sa dugang nga impormasyon, tan-awa sa Church Interpretation Training and Best Practices diha sa ChurchofJesusChrist.org.