3.

Pedped in Katak ko an Priesthood

3.0

Kadkad In

Priesthood ej mālim eo im kajoor eo an Anij. Kōn priesthood eo, Jemedwōj Ilan̄ ej kōttōprak jerbal eo An “n̄an kakūrm̧ool jab wabanban im mour indeeo an armej” (Moses 1:39). Anij ej leļo̧k mālim im kajoor eo n̄an ļaddik im leddik ro Nejin ioon laļ in n̄an jipan̄ kōm̧m̧m̧ane jerbal in (lale jebta 1).

3.1

Jepļaaktok eo an Priesthood

Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kabun̄ eo de eo ioon laļ in kōn mālim eo an priesthood. Rikanaan Josep Smith ekar bōk Priesthood eo an Aron im ki ko an jān Jon Ripeptaij (lale Katak im Bujen Ko 13:1). Ekar bōk Melkisedek Priesthood eo im ki ko an jān Rijilōk ro Piter, Jemes, im Jon (lale Katak im Bujen Ko 27:12–13).

Ilo Kirtland Tampeļ, Moses, Elias, im Ilaija raar waļokļo̧k n̄an Josep Smith im kar leļo̧k n̄an e elōn̄ļo̧k mālim remenin aikuj n̄an kōttōprak jerbal eo an Anij ilo raan ko āliktata (lale Katak im Bujen Ko 110:11–16).

Kajjojo uwaan Būreejtōnji eo Kein Kajuon im Doulul eo an Jon̄oulruo Rijilōk ro rej kabwijer aolep ki kein an priesthood eo rainin. Ritōl rein rej kūr im kōmālim membōr ro jet an Kabun̄ in n̄an kōjerbal mālim eo im kajoor in priesthood eo an Anij n̄an jipan̄ ilo jerbal in lo̧mo̧o̧r eo An im mour ijo eutiej tata.

3.2

Kōjeraam̧m̧an ko an Priesthood

Kōn bujen ko im kain̄i ko an priesthood eo, Anij ej kōm̧m̧an bwe en wōr kōjeraam̧m̧an ko reļļap n̄an ajri ro Nejin. Kōjeraam̧m̧an kein ekitbuuj:

• Peptaij im membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.

• Menin Letok eo an Jetōb Kwojarjar.

• Bōk m̧ōttan kwojkwoj eo.

• Mālim eo im kajoor eo n̄an jerbal ilo kūr ko im ijjitōn̄ ko an Kabun̄ in.

• Bōk kōjeraam̧m̧an ko an petriak im kōjeraam̧m̧an ko jet an priesthood eo kōn kemour, kaenōm̧m̧an, im tōl.

• Bōk menin letok kwojarjar eo kōn kajoor eo an Anij ilo tampeļ eo.

• Liāp n̄an ro uwaan baam̧le an juon n̄an indeeo.

• Kallim̧ur eo an mour indeeo.

Ajri ro nejin Anij remaron̄ bōk kōjeraam̧m̧an kein an priesthood eo im en̄jake eļap lan̄lōn̄ ilo aer mour kōn gospel eo an Jisōs Kraist.

3.3

Melkisedek Priesthood im Priesthood eo an Aron

Ilo Kabun̄ in, priesthood eo ewōr ruo m̧ōttan: Melkisedek Priesthood im Priesthood Aron (lale Katak im Bujen Ko 107:1).

3.3.1

Melkisedek Priesthood

Melkisedek Priesthood eo ej “Priesthood Ekwōjarjar, ilo̧kan Laajrak an eo Nejin Anij” (Katak im Bujen Ko 107:3). Ej kajoor eo me ļaddik ro im leddik ro nejin Anij remaron̄ eromļo̧k āinwōt E (lale Katak im Bujen Ko 84:19–21; 132:19–20).

“Melkisedek Priesthood eo ej kabwijer jim̧we ko an presidency.” Ewōr ippān “kajoor im maron̄ ioon aolep opij ko ilo kabun̄ in ilo aolep dettan ko an laļ, n̄an jerbal ilo men ko an jetōb” (Katak im Bujen Ko 107:8). Kōn mālim in, ritōl ro an Kabun̄ in rej tōl im kōm̧m̧ani aolep jerbal ko an jetōb ilo Kabun̄ in (lale Katak im Bujen Ko 107:18).

Būreejtōn eo an Kabun̄ in ej pris eo eutiej ej tōl ioon Melkisedek Priesthood eo (lale Katak im Bujen Ko 107:65–67 Stake būreejtōn eo ej pris eo eutiej ej tōl ilo stake eo (lale Katak im Bujen Ko 107:8, 10; bar lale jebta 5 ilo bok in bōk meļeļe in). Bisop eo ej pris eo eutiej ej tōl ilo ward eo (lale Katak im Bujen Ko 107:17; bar lale jebta 7 ilo bok in bōk meļeļe in).

N̄an meļeļe ko kōn opiij ko im eddo ko an Melkizedek Priesthood, lale 8.1.

3.3.2

Priesthood eo an Aron

Priesthood eo an Aron ej “etoto eo tok n̄an … Melkisedek Priesthood” (Katak im Bujen Ko 107:14). Ej kitbuuj ki ko an:

• Jerbal ko an enjeļ raņ.

• gospel eo n̄an ukweļo̧k.

• Kōm̧m̧ani kain̄i ko itulik, ekoba peptaij kōn jeorļo̧k in jerawiwi ko.

(Lale Katak im Bujen Ko 13:1; 84:26–27; 107:20.)

Bisop eo ej būreejtōn eo an Priesthood eo an Aron ilo ward eo (lale Katak im Bujen Ko 107:15).

Kōn meļeļe ko kōn opij ko im eddo ko an Priesthood eo an Aron, lale 10.1.3).

3.4

Mālim eo an Priesthood

Mālim eo an priesthood ej mālim eo n̄an bōk jikin Anij im jerbal ilo Etan. Ilo Kabun̄ in, aolep mālim an priesthood eo rej kōjerbali ium̧win tōl eo an ro me rej kabwijer ki ko an priesthood eo.

Em̧m̧aan ro rōrreo uwaan Kabun̄ in rej bōk mālim eo an priesthood kōn leļo̧k im ekkapit an priesthood eo n̄an opij ko an priesthood. Aolep membōr ro an Kabun̄ in remaron̄ kōjerbal mālim in ijjitōn̄ eo ilo aer kōjenolo̧k ak kappeik er n̄an jipan̄ ilo kōtōprak jerbal eo an Anij. Membōr ro rej lokjak n̄an Anij im n̄an ro E ekar jitōn̄ er n̄an tōl kōn ekōjkan aer kōjerbal mālim eo An (lale 3.4.4).

3.4.1

Ki ko an Priesthood

Ki ko an priesthood rej mālim eo n̄an kōjbwebweik kōjerbal priesthood eo ilo etan ajri ro nejin Anij. Kōjerbal aolep mālim an priesthood eo ilo Kabun̄ in ej tōl jān ro me rej kabwijer ki ko an priesthood (lale Katak im Bujen Ko 65:2).

3.4.1.1

Ro Me Rej Kabwijer Ki Ko An Priesthood

Jisōs Kraist ej kabwijer aolep ki ko an priesthood eo. Ium̧win tōl eo An, ki ko an priesthood eo rej liļo̧k n̄an em̧m̧aan ro n̄an kōjerbale ilo kūr ko rejenolo̧k n̄an kōtōprak jerbal eo an Anij, āinwōt kar kōmeļeļeik itulaļ.

Irooj ekar leļo̧k ioon kajjojo Rijilōk ro An aolep ki ko me rej iookļo̧k aelōn̄ in kiin̄ eo an Anij ioon laļ in. Rijilōk eo emour etotata an pād, Būreejtōn eo an Kabun̄ in, ej armej eo de eo ioon laļ in kar kōmālimi n̄an kōjerbal aolep ki ko an priesthood eo (lale Katak im Bujen Ko 81:1–2; 107:64–67, 91–92; 132:7).

Ium̧win tōl eo an Būreejtōn eo an Kabun̄ in, ritōl rein an priesthood eo kar liļo̧k ki ko an bwe ren maron̄ tōl ilo eria in eddo ko aer.

• Būreejtōn ro an stake im district.

• Bisop ro im branch būreejtōn ro.

• Būreejtōn ro an Melkisedek Priesthood im Priesthood eo an Aron.

• Būreejtōn ro an tampeļ.

• Būreejtōn ro an Mijen im jikin kaminene eo an mijenede.

• Būreejtōn ro an jikin eo ilo bwebwenato an Kabun̄ in.

Ritōl rein rej bōk ki ko an priesthood eo n̄e rej kōjenolo̧k er n̄an kūr ko aer.

Ki ko an priesthood eo rejjab liļo̧k n̄an ro jet, ekoba rikakpilōklōk ro n̄an ritōl ro an priesthood ijo jokwe ie ak būreejtōn ro an doulul ko an Kabun̄ in. Ritōl rein kar leļo̧k mālim in ijjitōn̄ eo ke kar kōjenolo̧k er im ke raar bōk ijjitōn̄ ko ium̧win tōl eo an ro me rej kabwijer ki ko an priesthood eo. Būreejtōn ro an doulul ko an Kabun̄ in rej tōl ium̧win tōl eo an ro me rej kabwijer ki ko an priesthood eo (lale 4.2.4).

3.4.1.2

Laajrak eo n̄an Jerbal eo an Anij

Kii ko an priesthood rej kanooj lale bwe jerbal in lo̧mo̧o̧r eo an Anij im mour ijo eutiej tata ej dedeļo̧k ilo juon jekjek eo ekoņ (lale Katak im Bujen Ko 42:11; 132:8). Ro me rej kabwijer ki ko an priesthood rej tōl jerbal eo an Irooj ilowaan eria in eddo eo aer. Mālim in tōl in ej em̧m̧an wōt n̄an eddo ko rejenolo̧k an kūr eo an ritōl eo. N̄e ritōl ro an priesthood rej kōtļo̧k er jān kūr ko aer, ejako aer kabwijer ki kein.

Aolep ro rej jerbal ilo Kabun̄ in rej kōjenolo̧k er ak kappeik er ium̧win tōl eo an juon eo ej kabwijer ki ko an priesthood.

3.4.2

Leļo̧k im Ekkapit an Priesthood eo

Ium̧win tōl eo an ro me rej kabwijer ki ko an priesthood eo, Priesthood eo an Aron im Melkisedek Priesthood eo rej leļo̧k n̄an em̧m̧aan membōr ro rōrreo an Kabun̄ in (lale Katak im Bujen Ko 84:14–17). Ālkin leļo̧k priesthood eo ejetjet, armej eo ej ekkapit n̄an juon opij ilo priesthood jab eo, eo āinwōt tikōn ak elder. Juon rikabwijer priesthood eo ej kōjerbal priesthood eo ekkar n̄an jim̧we ko im jerbal ko an opij jab eo (lale Katak im Bujen Ko 107:99).

Kajjojo em̧m̧aan ilo Kabun̄ eo an Jisōs Kraist rej aikuj in kajjjieon̄ n̄an erreo n̄an bōk im kōjerbale Melkisedek Priesthood eo n̄an jerbal n̄an ro jet. N̄e juon em̧m̧aan ej bōk priethood in, ej kōm̧m̧ane juon bujen n̄an tiljek ilo kakūrm̧ool eddo ko an priesthood eo an. Ej barāinwōt bōk jān Anij juon kanejnej, ak kallim̧ur, kōn kōjeraam̧m̧an ko indeeo (lale Katak im Bujen Ko 84:33–44; lale barāinwōt Unin Tōl eo n̄an Jeje Ko Rekwōjarjar, “Kanejnej im Bujen eo an Priesthood eo”).

N̄an meļeļe ko kōn leļo̧k im ekkapit an priesthood eo, lale 8.1.1, 10.6, 18.10, im 38.2.5.

3.4.3

Ijjitōn̄ eo an Mālim eo an Priesthood n̄an Jerbal ilo Kabun̄ in

Mālim eo an priesthood n̄an jerbal ilo Kabun̄ in ej jitōn̄ membōr ro ilo wāween in:

• Jān kōjenolo̧k n̄an juon kūr an Kabun̄ in

• Jān kappeik jān ritōl ro rej tōl an Kabun̄ in

3.4.3.1

Kōjenolo̧k

N̄e membōr ro an Kabun̄ in rej kōjenolo̧k er ium̧win tōl eo an ro me rej kabwijer ki ko an priesthood eo, rej leļo̧k n̄an er mālim jān Anij n̄an jerbal ilo kūr jab eo. N̄an waanjon̄ok:

• Juon kōrā eo ej kūr im kōjenolo̧k e jān bisop eo āinwōt būreejtōn eo an Doulul eo an Kōrā ro ilo ward eo ej leļo̧k n̄an e mālim eo n̄an tōl jerbal eo an Doulul eo an Kōrā ro ilo ward eo.

• Juon em̧m̧aan ak juon kōrā eo ej kūr im kōjenolo̧k e jān juon membōr in bisoprik eo āinwōt juon rūkaki in Būraimere ej leļo̧k n̄an e mālim eo n̄an katakin ajri in Būraimere eo ilo ward eo.

Aolep ro kūr im kōjenolo̧k er rej jerbal ium̧win tōl eo an ro me rej tōl ieor (lale 3.4.1.2).

N̄e membōr ro an Kabun̄ in rej kōtļo̧k er jān juon kūr, ejako an pād ippāer mālim eo ej kobaļo̧k ippān.

Kōn elōn̄ļo̧k meļeļe ko kōn kōjenolo̧k membōr ro n̄an kūr ko an Kabun̄ in, lale 18.11.

3.4.3.2

Kappe

Ritōl ro rej tōl an Kabun̄ in remaron̄ leļo̧k mālim eo kōn kappe. N̄e em̧m̧aan ro im kōrā ro rej bōk kappe kein, rej leļo̧k n̄an er mālim eo jān Anij n̄an jerbal. N̄an waanjon̄ok:

• Būreejtōnji eo Kein Kajuon im Doulul eo an Jon̄oulruo Rijilōk ro rej leļo̧k mālim eo n̄an Jiljilimjuonn̄oul ro me kappeik n̄an jerbale eria ko im n̄an tōl ilo kweilo̧k ko reļļap an stake.

• Mijen būreejtōn ro rej leļo̧k mālim n̄an em̧m̧aan im kōrā mijenede ro me kappeik er n̄an tōl im kamineneik mijenede ro jet.

• Mālim eo ej leļo̧k n̄an membōr ro an Kabun̄ in n̄an jerbal āinwōt jerbal in karejar jeid im jatid m̧aan im kōrā. Menin ej waļo̧k n̄e rej kappe ium̧win tōl an bisop eo jān būreejtōn eo an doulul eo an elder ro ak būreejtōn eo an Doulul eo an Kōrā ro.

Mālim eo me jitōn̄ kōn ijjitōn̄ ewōr jon̄an n̄an eddo ko rejenolo̧k im aitokan ijjitōn̄ eo.

Kōn meļeļe ko reļļapļo̧k kōn ijjitōn̄ n̄an kappeik, lale 4.2.5.

3.4.4

Kōjerbal Mālim eo an Priesthood ilo Jim̧we

Ritōl ro an Kabun̄ in im membōr ro rej kōjerbal mālim eo an priesthood kar leļo̧k ioon ak leļo̧k n̄an kōjeraam̧m̧an mour ko an ro jet.

Mālim in maron̄ kōjerbale wōt ilo jim̧we (lale Katak im Bujen Ko 121:36. Ej kōjerbale kōn wōt jeļā ņae, meanwōd, meoeo, ettā bōro, iakwe, im jouj (lale Katak im Bujen Ko 121: 41–42). Ritōl ro rej kapilōk ippān ro jet ilo juon jetōb in juon wōt im kappukōt ankilaan Irooj kōn revelesōn (lale Katak im Bujen Ko 41:2). Kōn meļeļe ko kōn kapilōk ippān ro jet, lale 4.4.3.

Ro me rej kōjerbal mālim eo an priesthood eo rejjab kipel ankilaer ioon ro jet. Rejjab kōjerbale n̄an jibadbad ko an ļōmņak kōn juon make. Eļan̄n̄e juon armej ej kōjerbale mālim in ilo jab jimwe, “lan̄ ko make rej jenlo̧k [im] Jetōb eo an Irooj ej būrom̧ōj” (Katak im Bujen Ko 121:37

Jet kūr ko ilo Kabun̄ in ekoba ie juon eddo n̄an tōl. Kōn meļeļe ko kōn tōl ilo Kabun̄ in, lale 4.2.4.

3.5

Kajoor an Priesthood

Kajoor in priesthood eo ej kajoor an Anij, eo E ej kōjerbale n̄an kōjeraam̧m̧an ajri ro Nejin. Kajoor in preisthood eo an Anij ej jiōbļo̧k wōt n̄an aolep membōr in Kabun̄ in—kōrā im em̧m̧aan—ilo aer kōjparok bujen ko raar kōm̧m̧ani Ippān. Membōr ro rej kōm̧m̧ane bujen kein ilo aer bōk kain̄i ko an priesthood eo. (Lale Katak im Bujen Ko 84:19–20.)

Kōjeraam̧m̧an ko an kajoor an priesthood eo me membōr ro remaron̄ bōke ekitbuuj:

• Tōl n̄an mour ko aer.

• Revelesōn n̄an jeļā ekōjkan kakūrm̧ool jerbal eo raar ekkapit n̄ane, kōjenolo̧k, ak ijjitōn̄ eo n̄an kōm̧m̧ane.

• Jipan̄ im kōkajoorļo̧k n̄an eromļo̧k āinwōt Jisōs Kraist im Jemedwōj Ilan̄.

3.5.1

Bujen ko

Bujen ej juon kallim̧ur ekwojarjar ikōtaan Anij im ajri ro Nejin. Anij ej letok jekjek ko n̄an bujen eo, im ajri ro Nejin rej errā n̄an pokake jekjek kein. Anij ej kallim̧ur n̄an kōjeraam̧m̧an ajri ro Nejin ilo aer kakūrm̧ool bujen eo.

Membōr ro rej kōm̧m̧ani bujen ko ippān Anij ilo aer bōk kain̄i ko an lo̧mo̧o̧r im mour āinwōt Anij (lale 18.1). Aolep ro rej niknik n̄an jem̧lo̧kin ilo kōjparok bujen ko aer renaaj bōk mour indeeo (lale 2 Nipai 31:17–20; Katak im Bujen Ko 14:7).

Ro jinen im jemān, ritōl ro an Kabun̄ in, im ro jet rej jipan̄ kajjojo armej m̧aanjabpopo n̄an kōm̧m̧ani bujen ko ilo aer bōk kain̄i ko an gospel eo. Rej kanooj lale bwe armej en meļeļe bujen ko ļeo ak lio enaaj kōm̧m̧ane. Ālkin an juon armej kōm̧m̧ane juon bujen, rej jipan̄ ļeo ak lio kōjparoke. (Lale Mosaia 18:8–11, 23–26).

3.5.2

Kain̄i ko

Kain̄i ej juon jerbal ekwojarjar kar kōm̧m̧ane kōn mālim eo an priesthood. Kain̄i ko rej aolep iien m̧ōttan gospel eo an Jisōs Kraist (lale Jenesis 1:28; Moses 6:64–65).

Ilo elōn̄ kain̄i ko, kajjojo armej ej kōm̧m̧ani bujen ko ippān Anij. Waanjon̄ak ko ekoba peptaij, kwojkwoj eo, menin letok kwojarjar, im kain̄i an liāp m̧are eo. Ilo kain̄i ko jet āinwōt kōjeraam̧m̧an ko an petriak ak kōjeraam̧m̧an rinan̄inmej, kajjojo armej rejjab kōm̧m̧ani bujen ko, bōtaab rej bōk tōl im kōkajoor n̄an kōjprok bujen ko.

Kain̄in ko ewōr meļeļe in kōkaļļeier me ej tōlļo̧k kajjojo armej n̄an Jemedwōj Ilan̄ im Jisōs Kraist. Ilo kain̄i ko me ekitbuuj bujen ko, kōkaļļe eo ej jipan̄ kajjojo armej meļeļe kallim̧ur ko rej kōm̧m̧ani im kōjeraam̧m̧an ko rej būki kōn tiljek eo aer.

Kajjojo kain̄i rej kōtļo̧k an kajjojo armej bōk kōjeraam̧m̧an ko ilo jetōb relļap. Irooj ekar kwaļok, “ilo kain̄i ko ie [an priesthood eo], kajoor in āinwōt anij ej waļo̧k” (Katak im Bujen Ko 84:20). Kain̄i ko an lo̧mo̧o̧r im mour āinwōt Anij rej menin aorōk n̄an mour indeeo. N̄an elōn̄ļo̧k meļeļe ko, lale 18.1.

Armej ro kajjojo remour rej bōk kain̄i ko an lo̧mo̧o̧r im mour āinwōt Anij n̄an er make. Ijo emaron̄, rej bar jepļaakļo̧k n̄an tampeļ eo n̄an kōm̧m̧ane kain̄i kein ilo etan ro me em̧ōj aer kar mej. N̄an meļeļe ko reļļapļo̧k kōn kōm̧m̧ani kain̄i ko n̄an ro remej, lale jepta 28.

3.6

Priesthood eo im M̧weo

Aolep membōr in Kabun̄ in me rej kōjparok bujen ko aer—kōrā ro, em̧m̧aan ro, im ajri ro—rej jeraam̧m̧an kōn kajoor in priesthood eo an Anij ilo im̧ōko im̧wer n̄an kōkajoorļo̧k er make im baam̧le ko aer (lale 3.5). Kajoor in enaaj jipan̄ membōr ro n̄an kōm̧m̧ane jerbal in lo̧mo̧o̧r eo an Anij im mour āinwōt Anijj ilo mour ko aer make im baam̧le ko (lale 2.2).

Em̧m̧aan ro me rej kabwijer Melkisedek Priesthood eo remaron̄ leļo̧k kōjeraam̧m̧an ko an priesthood n̄an ro uwaan baam̧le eo aer n̄an leļo̧k tōl, kōmour, im kaenōm̧m̧an. N̄e aikuji, ro uwaan Kabun̄ in remaron̄ barāinwōt kappukōt kōjeraam̧m̧an kein jān ro uwaan nukun baam̧le eo, jeid im jatid m̧aan in jerbal in karejar, ak ritōl ro an Kabun̄ in ijo jokwe ie. N̄an elōn̄ļo̧k meļeļe ko kōn kōjeraam̧m̧an ko an priesthood, lale 18.13 im 18.14.