“31. Mga Interbiyo ug Ubang mga Miting sa mga Miyembro,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2024).
“31. Mga Interbiyo ug Ubang mga Miting sa mga Miyembro,” Kinatibuk-ang Tamdanan nga Basahon.
31.
Mga Interbiyo ug Ubang mga Miting sa mga Miyembro
31.0
Pasiuna
Si Jesukristo kanunay nga nangalagad ngadto sa uban sa tinagsa-tagsa (tan-awa, pananglitan sa Juan 4:5–26; 3 Nephi 17:21). Siya nahigugma sa matag usa sa mga anak sa Dios. Siya motabang kanila sa tinagsa-tagsa.
Isip usa ka lider sa Simbahan ug sulugoon ni Jesukristo, ikaw usab adunay mga oportunidad sa pagtabang sa mga anak sa Dios, sa tinagsa-tagsa, diha sa ilang espirituhanong paglambo. Usa ka importante nga paagi nga mabuhat nimo kini mao ang mga pag-interbiyo ug ubang tinagsa-tagsa nga mga miting. Pipila sa imong labing makahuloganong pagserbisyo mahitabo nga tinagsa-tagsa. Dinhi niini nga mga sitwasyon, ikaw makahatag og Kristohanon nga gugma, nga mopataas sa “mga kamot sa nawad-an og paglaom” ug molig-on sa “mga tuhod nga mahuyang” (Doktrina ug mga Pakigsaad 81:5).
Dinhi niini nga kapitulo, ang termino nga interbiyo nagpasabot sa miting tali sa usa ka lider ug usa ka indibidwal aron sa pagtino kon ang tawo kinahanglan ba nga moapil sa usa ka ordinansa o modawat og calling (tan-awa sa 31.2). Sa kinatibuk-an, kini nga mga interbiyo ipahigayon sa usa ka sakop sa bishopric o kapangulohan sa stake. Ang termino nga interbiyo nagpasabot usab sa mga interbiyo sa pagpangalagad nga ipahigayon sa usa ka sakop sa Relief Society o kapangulohan sa korum sa mga elder (tan-awa sa 21.3).
Agi og dugang niini nga mga interbiyo, adunay daghan pa nga mga rason nga ang usa ka lider sa Simbahan makigmiting sa indibidwal nga mga miyembro (tan-awa sa 31.3). Pananglitan, ang bishopric kanunay nga nag-eskedyul og mga miting uban sa matag usa sa kabatan-onan sa ward (tan-awa sa 31.3.1). Bisan kon ikaw wala magserbisyo sa bishopric, ang bishop mahimong mohangyo nimo nga makigkita sa usa ka miyembro nga anaa sa panginahanglan aron mahatagan og padayong suporta ug pangalagad. O ang usa ka miyembro mahimong moduol nimo kon siya nag-atubang og personal nga hagit o sa pamilya.
Kini nga kapitulo makatabang sa tanang lider kinsa adunay mga oportunidad sa pakigmiting sa indibidwal nga mga miyembro. Kini nga mga lider mahimong maglakip sa Relief Society, korum sa mga elder, ug mga lider sa Young Women, tigpangalagad nga mga igsoong lalaki ug mga igsoong babaye, o uban pa nga gisangonan sa bishop.
31.1
Giya nga mga Baruganan
31.1.1
Mangandam sa Espirituwal nga Paagi
Kon ikaw adunay responsibilidad sa pakigmiting sa usa ka miyembro, ang Ginoo mopanalangin nimo og inspirasyon nga imong kinahanglanon kon ikaw magtinguha niini. Andama ang imong kaugalingon sa espirituhanong paagi pinaagi sa pag-ampo, pagtuon sa kasulatan, ug matarong nga pagpakabuhi. Paminaw sa mga paghunghong sa Espiritu Santo. Siya mogiya nimo pinaagi sa mga impresyon, mga hunahuna, ug mga pagbati. Siya makatabang nimo nga mahinumdoman ang mga pagtulon-an nga imong gitun-an diha sa mga kasulatan ug mga pulong sa mga propeta sa ulahing mga adlaw nga makatabang sa tawo nga imong pakigmitingan (tan-awa sa Doktrina ug mga Pakigsaad 84:85; 100:5–8).
Ang Gospel Library adunay koleksiyon sa Mga Kapanguhaan sa Pagpanambag. Samtang mangandam ka sa pakigmiting sa usa ka miyembro, ikonsiderar ang pagrebyo sa impormasyon mahitungod sa mga hilisgotan nga magamit niya.
Ang Espiritu Santo makagiya usab sa miyembro nga imong pakigmitingan. Mahimo nimong ikonsiderar usab ang pagdapit niya nga mangandam sa espirituhanong paagi alang sa inyong miting.
Ikonsiderar ang pag-ampo uban sa miyembro sa inyong pagsugod sa miting. Makadapit kini og diwa sa pagkamapaubsanon ug hugot nga pagtuo samtang magkahiusa kamo sa pagpangayo og tabang sa Dios (tan-awa sa Doktrina ug mga Pakigsaad 6:32; 29:6).
Atol sa interbiyo o miting, ang isyu o pangutana mahimong motumaw nga mobati ka nga dili andam sa pagtubag. Mahimo ka nga mosugyot nga ikaw ug ang miyembro mangayo og giya sa Ginoo—pananglitan, pinaagi sa pagtuon, pag-ampo, ug pagpuasa. Mahimo usab nga moadto ka sa mahinungdanong impormasyon diha sa Mga Kapanguhaan sa Pagpanambag o Life Help diha sa Gospel Library. Dayon mahimo kamo nga magkita pag-usab aron maghisgot og dugang pa nianang butanga.
Kon ang miyembro nakabuhat og seryoso nga sala, paadtoa siya sa bishop.
31.1.2
Motabang sa Miyembro nga Mobati sa Gugma sa Dios
Isip usa ka lider, ikaw nagrepresentar sa Manluluwas. Ang usa ka importante nga bahin sa Iyang misyon mao ang pagpadangat sa gugma sa Dios ngadto sa Iyang mga anak (tan-awa sa Juan 3:16–17). Kon ang mga miyembro moduol nimo alang sa interbiyo o alang sa tabang sa usa ka personal nga hagit, kasagaran unsay ilang kinahanglan gayod nga mahibaloan mao nga masayod nga ang Langitnong Amahan nahigugma nila. Kini nga gugma makapalig-on nila ug makadasig nila nga moduol ngadto ni Kristo, maghinulsol sa sala, ug mohimo og maayo nga mga pagpili.
Ang mga kasulatan ug ang mga pulong sa mga propeta sa ulahing mga adlaw magdapit sa Espiritu ug magtudlo sa putli nga doktrina. Gamita kini kanunay, uban sa kasensitibo ug gugma, kon ikaw makigmiting sa mga miyembro. Gamita kini sa pagdasig ug pag-awhag, dili sa pagpanghimaraot, pagpamugos, o pagpanghadlok (tan-awa sa Lucas 9:56).
Pag-eskedyul og daghang oras alang sa miting. Ang miyembro kinahanglang dili mobati nga busy kaayo ka. Hatagi siya sa imong tibuok nga pagtagad.
31.1.3
Motabang sa Miyembro nga Modangop sa Gahom sa Manluluwas
Si Jesukristo midala diha Kaniya sa atong mga sala “nga Siya makapapas sa [atong] mga kalapasan sumala sa gahom sa Iyang pagluwas” (Alma 7:13). Siya usab midala diha Kaniya sa atong mga kasakit, sakit, ug mga balatian “nga siya mahimo nga masayod … unsaon sa pagtabang ang iyang mga katawhan” (tan-awa sa Alma 7:11–12).
Moawhag sa mga miyembro nga moduol ngadto Kaniya. Motabang nila nga modangop sa Iyang gahom sa paglig-on, paghupay, ug pagtubos. Kini nga gahom moabot pinaagi sa paggamit sa hugot nga pagtuo diha ni Jesukristo, pagsunod sa Iyang ehemplo, pagdawat sa mga ordinansa sa pagkapari, pagtuman sa mga pakigsaad, ug paglihok sa mga pag-aghat gikan sa Espiritu Santo.
31.1.4
Motabang sa Miyembro nga Mobati nga Komportable ug Luwas
Ang ubang mga miyembro adunay mga kasinatian nga nakapahimo nila nga mobati og kahigwaos o dili mahimutang kon makigkita og lider sa Simbahan. Pangita og mga paagi sa pagtabang nila nga mobati nga kalma, luwas, ug komportable. Pagpakisayod gikan sa miyembro kon unsay imong mahimo aron makatabang.
Hatagi kanunay ang miyembro og opsiyon nga adunay kuyog nga laing tawo atol sa usa ka interbiyo o miting. Kon makigmiting sa usa ka miyembro sa kaatbang og sekso, o usa ka bata, o usa ka batan-on, siguroa nga adunay kuyog nga ginikanan o laing hamtong. Siya mahimong moapil sa miting o maghulat sa gawas sa lawak, depende kon unsay gusto sa miyembro nga imong pakigmitingan.
Kasagaran, ang mga lider makigmiting sa mga miyembro sa personal alang sa mga interbiyo ug mohatag og espirituhanong tabang ug pagpangalagad. Sa pagdesisyon kon asa magmiting, ang mga lider mangita og usa ka lugar diin ang Espiritu Santo maanaa ug ilang mapabiling kompidensiyal ang mga butang. Kini mahimong usa ka lawak klasehanan o opisina diha sa meetinghouse. Ang panimalay sa lider o sa miyembro mahimo usab nga tukmang lugar aron magmiting. Sa pagtino sa lokasyon, ang mga lider mokonsiderar sa ilang kaugalingong seguridad ug sa seguridad sa miyembro. Alang sa impormasyon mahitungod sa pakigmiting sa miyembro sa virtual nga paagi, tan-awa sa 31.4.
Ang laing importante nga bahin sa pagtabang sa mga miyembro nga mobati nga luwas mao ang pagpabiling kompidensiyal sa mga butang. Ipaniguro sa miyembro nga ang inyong panagsultihanay magpabiling kompidensiyal.
Ayaw ipaambit ang kompidensiyal nga impormasyon ni bisan kinsa—lakip na sa imong asawa o ubang mga lider sa Simbahan—gawas kon ang miyembro mohatag og pagtugot. Ipadayon nga mapabiling kompidensiyal kana nga mga butang bisan kon ma-release na ka. Ang pagbutyag sa mga kompidensiyal makadaot sa hugot nga pagtuo, pagsalig, ug pagpamatuod sa miyembro. Ang mga miyembro kasagaran mas mangayo og tabang sa mga lider sa Simbahan kon sila mahibalo nga unsay ilang ipaambit magpabiling kompidensiyal.
Alang sa dugang nga impormasyon mahitungod sa pagkakompidensiyal, lakip na sa legal nga impormasyon, tan-awa sa 32.4.4.
31.1.5
Mangutana og Dinasig nga mga Pangutana ug Maminaw og Maayo
Kon makigmiting sa usa ka miyembro, mangutana og mga pangutana nga makatabang nimo nga makasabot sa iyang sitwasyon. Hatagi ang miyembro og mga oportunidad nga gawasnong mapahayag ang iyang mga hunahuna ug mga pagbati.
Samtang mag-istorya ang miyembro, paminaw og maayo. Magtinguha nga hingpit nga makasabot sa dili pa motubag. Kon gikinahanglan, pangutana og sunod-sunod nga mga pangutana aron masiguro nga ikaw nakasabot. Apan dili kinahanglang mag-imbestigar.
Ang pagpaminaw makatabang sa pag-establisar og pagsalig. Makatabang kini sa uban nga mobati nga nasabtan, gihatagan og bili, ug gihigugma. Sa kasagaran ang mga tawo nagkinahanglan og usa ka tawo nga ilang kasaligan nga maminaw kanila samtang sila nanglimbasog sa ilang mga hagit. Ang pagpaminaw makatabang usab nimo nga mabuksan ang imong kasingkasing ngadto sa mga pag-aghat sa Espiritu Santo.
31.1.6
Moawhag og Pagbarog pinaagi sa Kinaugalingong Paningkamot
Tungod sa imong gugma sa mga miyembro, tingali gusto ka nga motanyag dihadiha dayon og mga solusyon sa ilang mga problema. Hinoon, ikaw mas makapanalangin nila pinaagi sa pagtabang nila sa pagpangita og ilang kaugalingong mga solusyon ug paghimo sa ilang kaugalingong mga desisyon (tan-awa sa Doktrina ug mga Pakigsaad 9:8).
Tabangi sila sa pag-analisar sa ilang mga problema o mga pangutana diha sa konteksto sa mga doktrina sa ebanghelyo ni Jesukristo ug sa plano sa kaluwasan. Tudloi sila kon unsaon sa pagpangayo og giya sa Ginoo pinaagi sa mga kasulatan, mga pulong sa buhing mga propeta, ug personal nga pagpadayag. Niini nga paagi, ikaw nagtabang sa mga miyembro nga maandam sa pag-atubang sa ubang mga hagit sa umaabot. Sila usab mahimong mas maayo sa pagtabang sa uban, lakip na sa ilang mga pamilya.
31.1.7
Mosuporta sa mga Paningkamot sa Paghinulsol
Usahay ang usa ka miyembro mahimong mangayo og tabang sa paghinulsol sa sala. Ikaw adunay daghang mahimo sa pagdasig og hugot nga pagtuo diha ni Jesukristo ug pag-awhag sa miyembro nga mangayo og kapasayloan.
Ang bishop o presidente sa stake lamang ang makatabang sa usa ka tawo sa pagsulbad sa seryoso nga mga sala. Ang pipila niini gilista diha sa 32.6. Kon ang miyembro nakahimo og bisan asa niini nga mga sala, siya kinahanglang makigkita sa bishop o presidente sa stake diha-diha dayon.
Ang matag bishop ug presidente sa stake mao ang “maghuhukom sa Israel” (Doktrina ug mga Pakigsaad 107:72). Pinaagi niini nga awtoridad sila motabang sa mga miyembro sa paghinulsol sa sala ug pagduol ngadto ni Kristo, kinsa mopasaylo sa sala (tan-awa sa 32.1 ug 32.3).
Niini nga mga responsibilidad, kini nga mga lider nagrepresentar sa Ginoo. Sila maningkamot sa paggamit sa “paghukom diin [Siya] mihatag nganha [kanila]” (3 Nephi 27:27). Sila motudlo nga ang paghinulsol naglakip sa paggamit sa hugot nga pagtuo diha ni Jesukristo, pagbaton og mahinulsolon nga espritu, pagsalikway sa sala, pagpangayo og kapasayloan, pagpahiuli, ug pagsunod sa mga sugo uban sa gibag-o nga pasalig.
Aron matabangan sila nga matuman ang ilang tahas, ang mga bishop ug mga presidente sa stake gipanalanginan og espirituhanong gasa sa pag-ila. Kini nga gasa makatabang nila sa pag-ila sa kamatuoran, pagsabot sa gibati sa miyembro, ug pagkahibalo sa iyang mga panginahanglan (tan-awa sa 1 Mga Hari 3:6–12; Doktrina ug mga Pakigsaad 46:27–28).
Bisan kon adunay pagkompisal nga mahitabo uban sa usa ka “maghuhukom sa Israel,” uban sa pagtugot sa miyembro, ang ubang mga lider makahatag og suporta sa iyang mga paningkamot sa paghinulsol. Kini makatabang gayod ilabi na kon ang paghinulsol nagkinahanglan og igong panahon. Tan-awa sa kataposang bahin sa 32.8.1 alang sa mga lagda.
31.1.8
Tukmang Paagi sa Pagresponde sa Pag-abuso
Ang pag-abuso dili mahimong tugotan sa bisan unsa nga matang. Mohatag og seryoso nga pagtagad sa mga report bahin sa pag-abuso. Kon kamo makahibalo nga ang usa ka tawo giabusohan, i-report ang pag-abuso ngadto sa sibil nga mga awtoridad ug magpakitambag sa bishop. Ang mga lagda alang sa pag-report ug pagresponde sa pag-abuso gihatag diha sa 38.6.2.
Alang sa impormasyon mahitungod kon unsay buhaton sa mga bishop ug sa mga presidente sa stake kon makahibalo sa bisan unsa nga pag-abuso, tan-awa sa 38.6.2.1.
Alang sa impormasyon mahitungod sa pagtabang sa mga biktima sa pag-abuso, tan-awa sa “Pag-abuso (Tabang alang sa Biktima)” diha sa Mga Kapanguhaan sa Pagpanambag. Mahimo usab nimong paadtoon ang mga miyembro sa makatabang nga mga kapanguhaan mahitungod sa pag-abuso diha sa Tabang sa Kinabuhi.
Alang sa impormasyon mahitungod sa pagtabang sa mga biktima sa pagpanglugos o sa ubang sekswal nga pag-ataki, tan-awa sa 38.6.18.2.
31.2
Mga Interbiyo
31.2.1
Mga Katuyoan sa mga Interbiyo
Sa kinatibuk-an, ang mga lider sa Simbahan mointerbiyo sa mga miyembro aron sa pagtino kon sila:
-
Andam na ba sa pagdawat o pag-apil sa usa ka ordinansa.
-
Kinahanglan na ba nga tawagon sa usa ka katungdanan sa Simbahan.
Kasagaran sa mga interbiyo nga ingon niini nga matang ipahigayon sa usa ka sakop sa bishopric o sa kapangulohan sa stake. Dili kini mahimong idelegar ngadto sa laing mga lider sa ward. Hinoon, ang usa ka presidente sa stake mahimong modelegar sa pipila ka interbiyo ngadto sa mga high councilor sama sa gilatid diha sa Tsart sa mga Calling (tan-awa sa 30.8).
31.2.2
Mga Matang sa mga Interbiyo
Ang bishop gitawag isip “usa ka maghuhukom sa kadaghanan” diha sa iyang ward (Doktrina ug mga Pakigsaad 107:74; tan-awa usab sa 7.1.3). Ang presidente sa stake nagserbisyo usab isip usa ka maghuhukom sa kadaghanan (tan-awa sa 6.2.3). Kini nga mga lider naghupot og mga yawe sa pagkapari sa paghatag og awtoridad sa mga ordinansa. Tungod niini nga mga rason, adunay piho nga mga interbiyo nga sila lamang ang makapahigayon. Sila makadelegar sa ubang mga interbiyo ngadto sa mga magtatambag. Ang mosunod nga talaan naglista kon kinsa ang makapahigayon sa matag interbiyo.
|
Kinsa ang makapahigayon sa interbiyo |
Katuyoan sa interbiyo |
|---|---|
Kinsa ang makapahigayon sa interbiyo Bishop lamang | Katuyoan sa interbiyo
|
Kinsa ang makapahigayon sa interbiyo Bishop o usa ka magtatambag nga iyang sangonan | Katuyoan sa interbiyo
|
Kinsa ang makapahigayon sa interbiyo Presidente sa stake lamang | Katuyoan sa interbiyo
|
Kinsa ang makapahigayon sa interbiyo Presidente sa stake o usa ka magtatambag nga iyang sangonan | Katuyoan sa interbiyo
|
Ang full-time nga mga misyonaryo mointerbiyo sa mga kinabig alang sa bunyag ug kompirmasyon (tan-awa sa 31.2.3.2).
Ang mga sakop sa mga kapangulohan sa korum sa mga elder ug sa Relief Society mopahigayon og mga interbiyo sa pagpangalagad (tan-awa sa 21.3).
31.2.3
Mga Interbiyo alang sa Bunyag ug Kompirmasyon
31.2.3.1
Mga Bata Kinsa mga Miyembro nga Anaa na sa Rekord [Member of Record]
Ang bishop mao ang naghupot sa mga yawe sa pagkapari alang sa pagbunyag sa 8 anyos nga mga miyembro nga anaa sa rekord diha sa iyang ward. Tungod niini nga rason, siya og ang gisangonan nga magtatambag mointerbiyo sa mosunod nga mga tawo alang sa bunyag:
-
Mga bata nga nag-edad og 8 kinsa mga member of record.
-
Mga bata nga nag-edad og 8 kinsa dili mga miyembro nga anaa sa rekord apan adunay ginikanan o tigbantay nga miyembro.
-
Mga miyembro nga anaa na sa rekord nga nag-edad og 9 ug pataas kansang bunyag nalangan tungod sa intelektuwal nga mga kakulangan.
Diha sa interbiyo, ang sakop sa bishopric mosiguro nga ang bata nakasabot sa mga katuyoan sa bunyag (tan-awa sa 2 Nephi 31:5–20). Siya usab mosiguro nga ang matag bata nakasabot sa pakigsaad sa bunyag ug mapasaligon nga mosunod niini (tan-awa sa Mosiah 18:8–10). Wala na siya magkinahanglan og gipiho nga mga lista sa mga pangutana. Dili kini usa ka inetrbiyo sa pagtino sa katakos, tungod kay ang “mga bata wala magkinahanglan sa paghinulsol.” (Moroni 8:11).
Ang pagtugot sa mga ginikanan o mga tigbantay gikinahanglan sa dili pa bunyagan ang usa ka menor de edad (tan-awa sa 38.2.8.2).
31.2.3.2
Mga Kinabig
Ang presidente sa misyon mao ang naghupot sa mga yawe sa pagkapari alang sa pagbunyag sa mga kinabig. Tungod niini nga rason, ang usa ka full-time nga misyonaryo mointerbiyo sa:
-
Mga tawo nga nag-edad og 9 ug labaw pa kinsa wala gayod mabunyagi ug makompirmahi. Tan-awa sa 31.2.3.1 alang sa usa ka eksepsiyon niadtong adunay intelektuwal nga mga kakulangan.
-
Mga bata nga nag-edad og 8 ug pataas kansang mga ginikanan dili mga miyembro sa Simbahan.
-
Mga bata nga nag-edad og 8 ug pataas kinsa adunay ginikanan nga bunyagan ug kompirmahan usab.
Ang misyonaryo nga lider sa district o lider sa zone mao ang mopahigayon sa interbiyo. Alang sa impormasyon mahitungod sa mga sitwasyon nga nagkinahanglan og espesyal nga pagtugot, tan-awa sa 38.2.8.6.
Ang matag umaabot nga kinabig kinahanglan usab nga makigkita sa bishop sa dili pa ang bunyag. Hinoon, ang bishop dili mointerbiyo niya alang sa bunyag. Dili usab siya motino sa katakos. Ang katuyoan niini nga miting mao ang pag-ugmad og relasyon ngadto sa tawo.
Diha sa interbiyo, ang misyonaryo mosunod sa giya sa Espiritu aron sa pagtino kon ang tawo nakatuman ba sa mga kwalipikasyon nga gihulagway diha sa Doktrina ug mga Pakigsaad 20:37 (tan-awa usab sa Mosiah 18:8–10; Moroni 6:1–4). Ang misyonaryo mogamit sa mosunod nga mga pangutana. Siya mopahiangay niini ngadto sa pangidaron, kahamtong, ug sirkumstansiya sa tawo.
-
Motuo ka ba nga ang Dios mao ang atong Amahan sa Kahangtoran? Motuo ka ba nga si Jesukristo mao ang Anak sa Dios ug ang Manluluwas ug Manunubos sa kalibotan?
-
Motuo ka ba nga ang Simbahan ug ang ebanghelyo ni Jesukristo gipahiuli pinaagi ni Propeta Joseph Smith? Motuo ka ba nga si [kasamtangang Presidente sa Simbahan] usa ka propeta sa Dios? Unsa man ang kahulogan niini nganha kanimo?
-
Unsa man ang kahulogan sa paghinulsol nganha kanimo? Mibati ka ba nga nahinulsolan na nimo ang imong nangagi nga mga sala?
-
Ikaw natudloan nga ang pagkamiyembro sa Ang Simbahan ni Jesukristo sa mga Santos sa Ulahing mga Adlaw naglakip sa pagtuman sa mga sumbanan sa ebanghelyo. Unsa ang imong nasabtan mahitungod sa mosunod nga mga sumbanan? Andam ka bang mosunod niini?
-
Ang balaod sa kaputli, nga nagdili sa bisan unsa nga sekswal nga mga relasyon nga gawas sa legal nga kaminyoon tali sa usa ka lalaki ug sa usa ka babaye
-
Ang balaod sa ikapulo
-
Ang Pulong sa Kaalam
-
Ang pagbalaan sa adlaw nga Igpapahulay, naglakip sa sinemanang pag-ambit sa sakramento ug sa pagserbisyo sa uban
-
-
Nakahimo ka ba sukad og bug-at nga krimen? Kon mao, anaa ka ba karon sa probation o parole?
-
Nakaapil ka ba sukad sa usa ka aborsyon? (tan-awa sa 38.6.1).
-
Kon bunyagan ka, ikaw makigsaad sa Dios nga ikaw andam sa pagdala diha sa imong kaugalingon sa ngalan ni Kristo, pagserbisyso sa uban, pagbarog isip usa ka saksi sa Dios sa tanang panahon, ug pagsunod sa Iyang mga sugo sa tibuok nimong kinabuhi. Andam ka ba nga mohimo niini nga pakigsaad ug maningkamot nga magmatinud-anon niini?
Alang sa mga instruksiyon kon ang tawo mohatag og positibo nga tubag ngadto sa ika-5 o ika-6 nga pangutana, tan-awa sa 38.2.8.6. Tan-awa usab sa 38.2.8.7.
Kon ang tawo andam na sa bunyag, ang tig-interbiyo mosulat diha sa Rekord sa Bunyag ug Kompirmasyon (tan-awa sa 18.8.3).
31.2.4
Mga Interbiyo Alang sa Pag-orden ngadto sa Katungdanan sa Aaronic nga Pagkapari
Ang bishop mao ang naghupot sa mga yawe sa pagkapari alang sa pagtugyan sa Aaronic nga Pagkapari. Siya mao usab ang naghupot sa mga yawe alang sa pag-orden ngadto sa mga katungdanan sa pagka-deacon, pagka-teacher, ug pagka-priest. Ang bishop o usa ka gisangonan nga magtatambag mointerbiyo niadtong kinsa i-orden nga mga deacon, o mga teacher sa pagtino kon sila andam ba sa espirituhanong paagi. Ang bishop mointerbiyo niadtong kinsa i-orden nga mga priest.
Alang sa dugang nga impormasyon, tan-awa sa 18.10.2.
31.2.5
Mga Interbiyo sa Rekomend sa Templo
Ang templo mao ang balay sa Ginoo. Ang pagsulod sa templo ug pag-apil sa mga ordinansa usa ka sagrado nga pribilehiyo. Kini nga pribilehiyo gigahin alang niadtong kinsa andam sa espirituhanong paagi ug naningkamot sa pagsunod sa mga sumbanan sa Ginoo, sama sa gitino sa awtorisado nga mga lider sa pagkapari.
Sa paghimo niini nga pagtino, ang mga lider mointerbiyo sa miyembro gamit ang mga pangutana diha sa LCR (tan-awa usab sa mga lagda diha sa 26.3). Ang mga lider kinahanglang dili modugang o motangtang sa bisan unsa nga mga kinahanglanon. Hinoon, sila mahimong mopahiangay sa mga pangutana ngadto sa pangidaron ug mga sirkumstansiya sa miyembro.
31.2.6
Mga Interbiyo alang sa Pag-orden ngadto sa Katungdanan sa Melchizedek nga Pagkapari
Ang presidente sa stake mao ang naghupot sa mga yawe sa pagkapari alang sa pagtugyan sa Melchizedek nga Pagkapari. Siya mao usab ang naghupot sa mga yawe alang sa pag-orden ngadto sa mga katungdanan sa pagka-elder ug pagka-high priest.
Uban sa pagtugot sa kapangulohan sa stake, ang bishop mointerbiyo sa miyembro gamit ang mga pangutana sa ubos. Sa dili pa mobuhat sa ingon, siya mosuta nga ang rekord sa pagkamiyembro sa tawo walay gilakip nga komentaryo bahin sa restriksiyon, restriksiyon sa ordinansa, o restriksiyon sa pagkamiyembro sa Simbahan.
Kon, human sa interbiyo, ang bishop mobati nga ang miyembro andam na nga ma-orden, siya mokompleto ug mosumiter sa Melchizedek Priesthood Ordination Record [Rekord sa Ordinasyon sa Melchizedek nga Pagkapari]. Dayon ang usa ka sakop sa kapangulohan sa stake mointerbiyo sa miyembro, nga mogamit usab sa mga pangutana sa ubos.
Ang usa ka lalaki nga modawat sa Melchizedek nga Pagkapari mosulod diha sa panumpa ug pakigsaad sa pagkapari. Kini gihulagway diha sa Doktrina ug mga Pakigsaad 84:33–44. Atol sa mga interbiyo, ang bishop ug sakop sa kapangulohan sa stake mosiguro nga ang miyembro nakasabot niini nga panumpa ug pakigsaad ug mouyon sa pagsunod niini. Ang lider mangutana dayon sa mosunod nga mga pangutana:
-
Ikaw ba adunay pagtuo ug pagpamatuod sa Dios, ang Amahan sa Kahangtoran; sa Iyang Anak, si Jesukristo; ug sa Espiritu Santo?
-
Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?
-
Ikaw ba adunay pagpamatuod sa Pagpahiuli sa ebanghelyo ni Jesukristo?
-
Ikaw ba nagpaluyo sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag ug isip mao ang bugtong tawo sa yuta nga gitugotan sa pagdumala sa tanang yawe sa pagkapari?
Ikaw ba nagpaluyo sa Unang Kapangulohan ug sa Korum sa Napulog Duha ka Apostoles isip mga propeta, mga manalagna, ug mga tigpadayag?
Ikaw ba nagpaluyo sa ubang Kinatibuk-ang mga Awtoridad ug sa lokal nga mga lider sa Simbahan?
-
Ang Ginoo miingon nga ang tanang butang “himoon nga limpyo” sa Iyang atubangan (Doktrina ug mga Pakigsaad 42:41).
Ikaw ba naningkamot alang sa moral nga kalimpyo sa imong mga hunahuna ug kinaiya?
Ikaw ba nagsunod sa balaod sa kaputli?
-
Ikaw ba nagsunod sa mga pagtulon-an sa Simbahan ni Jesukristo diha sa imong pribado ug publiko nga kinaiya kauban sa mga sakop sa imong pamilya ug sa uban?
-
Ikaw ba nagsuporta o nag-awhag og bisan unsa nga mga pagtulon-an, mga binuhatan, o doktrina nga nahisupak niadtong gidawat sa Ang Simbahan ni Jesukristo sa mga Santos sa Ulahing mga Adlaw?
-
Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?
-
Ikaw ba naningkamot nga magmatinuoron sa tanan nimong gibuhat?
-
Ikaw ba hingpit nga tigbayad og eksakto nga ikapulo?
-
Ikaw ba nakasabot ug nagsunod sa Pulong sa Kaalam?
-
Ikaw ba adunay pinansyal o laing mga obligasyon ngadto sa kanhi asawa o mga anak?
Kon oo, kasamtangan ba nimong natuman kadtong mga obligasyon?
-
Aduna bay bug-at nga mga sala sa imong kinabuhi nga kinahanglang iresolbar uban sa mga awtoridad sa pagkapari isip kabahin sa imong paghinulsol?
-
Imo bang giisip ang imong kaugalingon nga takos nga maordinahan sa katungdanan sa Melchizedek nga Pagkapari?
31.3
Ubang mga Oportunidad alang sa mga Lider aron Makigmiting sa mga Miyembro
Ang mga lider adunay daghang oportunidad nga makigmiting sa indibidwal nga mga miyembro. Pananglitan:
-
Ang mga miyembro mahimong mohangyo nga makigkita sa usa ka lider sa Simbahan kon sila magkinahanglan og espirituhanon nga giya o adunay bug-at nga personal nga mga problema. Sa pipila ka sitwasyon, ang lider mahimong mobati nga giaghat aron makigsabot og usa ka miting uban sa miyembro. Ang mga miyembro wala awhaga sa pagkontak sa Kinatibuk-ang mga Awtoridad mahitungod sa personal nga mga butang (tan-awa sa 38.8.25).
Aron makagahin og daghang panahon uban sa kabatan-onan, ang bishop mahimong modelegar sa pipila niini nga mga miting ngadto sa ubang mga lider sa ward. Ang mga sakop sa mga kapangulohan sa Relief Society, korum sa mga elder, ug Young Women labing makatabang. Hinoon, ang bishop dili mahimong modelegar sa mga butang nga nagkinahanglan sa iyang tahas isip maghuhukom sa kadaghanan, sama sa paghinulsol sa bug-at nga sala.
-
Ang bishop o usa ka tawo nga iyang gisangonan makigmiting sa mga miyembro nga adunay temporal nga mga panginahanglan (tan-awa sa 31.3.4 ug 22.6).
-
Ang presidente sa korum sa mga elder makigmiting sa matag sakop sa korum sa tinagsa-tagsa kausa sa usa ka tuig. Sila maghisgot sa kahimtang sa miyembro ug sa iyang pamilya. Sila maghisgot usab sa iyang mga katungdanan sa pagkapari. (Tan-awa sa 8.3.3.2.)
-
Ang presidente sa Relief Society makigmiting sa matag sakop sa Relief Society kausa sa usa ka tuig. Sila maghisgot sa kahimtang sa igsoong babaye ug sa iyang pamilya. (Tan-awa sa 9.3.2.2.)
-
Ang usa ka sakop sa bishopric makigmiting sa matag 11 anyos samtang siya ibalhin gikan sa Primary ngadto sa korum sa mga deacon o sa klase sa Young Women. Atol niini nga miting ang sakop sa bishopric mointerbiyo usab sa mga batan-ong lalaki sa pagdawat sa Aaronic nga Pagkapari (tan-awa sa 18.10.2).
-
Ang usa ka sakop sa bishopric makigmiting sa mga miyembro nga mosulod sa serbisyo sa militar (tan-awa sa 38.9.2).
-
Ang usa ka sakop sa bishopric makigmiting sa matag batan-on kaduha sa usa ka tuig (tan-awa sa 31.3.1).
-
Ang usa ka sakop sa bishopric makigmiting sa matag young single adult labing minos kausa sa usa ka tuig (tan-awa sa 31.3.2).
-
Ang mga sakop sa kapangulohan sa stake, bishopric, ug ubang mga lider kanunay nga makigmiting sa mga lider nga nagserbisyo ubos sa ilang direksyon (tan-awa sa 31.3.3).
Kon ang mga lider makigmiting sa mga miyembro, sila mosunod sa mga baroganan diha sa 31.1.
Alang sa mapuslanong impormasyon mahitungod sa piho nga mga hilisgotan nga mahimong motumaw kon makigmiting sa mga miyembro, tan-awa sa Mga Kapanguhaan sa Pagpanambag diha sa Gospel Library. Ang mga lider mahimo usab nga mopaadto sa mga miyembro ngadto sa impormasyon diha sa Tabang sa Kinabuhi.
31.3.1
Pakigmiting sa Kabatan-onan
Ang labing importanting responsibilidad sa bishop mao ang pagtabang sa bag-ong henerasyon diha sa iyang ward nga molambo sa espirituhanong paagi. Ang usa ka importante nga paagi nga mahimo niya kini mao ang pakigmiting sa kabatan-onan sa tinagsa-tagsa (o kuyog sa usa ka hamtong; tan-awa sa 31.1.4). Ang bishop o usa sa iyang mga magtatambag makigmiting sa matag batan-on kaduha sa usa ka tuig. Labing minos ang usa niini nga mga miting kinahanglan nga uban sa bishop. Sa sinugdanan sa tuig nga ang batan-on moedad og 16, ang duha ka miting nianang tuiga kinahanglan nga uban sa bishop kon mahimo.
Agi og dugang niini nga mga miting, ang kabatan-onan kinahanglang mobati nga libreng makigtambag sa bishop bisan kanus-a sila manginahanglan og giya ug suporta. Ang bishop maningkamot sa pag-ugmad og lig-on, masaligong mga relasyon uban sa kabatan-onan aron komportable sila nga makigtambag uban niya.
Ang presidente sa Young Women adunay responsibilidad usab sa pagpangalagad ngadto sa tagsa-tagsa ka batan-ong babaye. Siya makahimo niini pinaagi pakigmiting sa mga batan-ong babaye sa tinagsa-tagsa (o kuyog sa usa ka hamtong; tan-awa sa 31.1.4).
Kon sila makigmiting sa kabatan-onan, ang mga lider mosunod sa mga baroganan diha sa 31.1. Daghan niini nga mga baroganan importante gayod kaayo kon makigmiting sa kabatan-onan.
31.3.1.1
Pagpakigkomunikar sa mga Ginikanan
Diha sa ilang mga paningkamot sa paglig-on sa kabatan-onan, ang mga lider makigtinabangay gayod sa mga ginikanan. Sila magtinguha sa pagsuporta sa mga ginikanan diha sa ilang responsibilidad sa pagtudlo sa ilang mga anak sa ebanghelyo ni Jesukristo.
Ang mga lider mopaambit sa mosunod nga impormasyon ngadto sa batan-on ug sa iyang mga ginikanan sa dili pa ang una nila nga miting:
-
Ang mga ginikanan adunay nag-unang responsibilidad sa pagtudlo ug pag-amuma sa ilang mga anak.
-
Ang bishop o usa sa iyang mga magtatambag makigmiting sa matag batan-on kaduha sa usa ka tuig. Ang presidente sa Young Women mahimo usab nga makigmiting og panagsa sa matag batan-ong babaye. Dinhi niini nga mga miting, ang mga lider mahimong motubag sa mga pangutana, mohatag og suporta, mohatag og mga buluhaton, ug mohisgot sa mga hilisgotan diha sa 31.3.1.2.
-
Aron matabangan ang kabatan-onan nga maandam sa espirituwal nga paagi, ang mga interbiyo gikinahanglan alang sa sagradong mga butang sama sa mga rekomend sa templo, mga ordinasyon sa pagkapari, ug mga tawag nga magmisyon. Ang mga lider makigtambayayong sa mga ginikanan sa pagtabang sa kabatan-onan nga maandam alang niining mga interbiyo.
-
Ang mga ginikanan moawhag sa ilang mga anak nga makigkita sa bishop o laing lider sa Simbahan kon magkinahanglan sila og espirituhanon nga giya o paghinulsol.
-
Kon ang usa ka batan-on makigmiting sa usa ka lider, kinahanglan nga adunay kuyog nga ginikanan o laing hamtong. Ang batan-on mahimong modapit sa hamtong nga moapil sa miting o maghulat sa gawas.
31.3.1.2
Mga Hilisgotan nga angayng Hisgotan
Ang labing mahinungdanong katuyoan sa mga miting uban sa kabatan-onan mao ang pagpalig-on sa hugot nga pagtuo diha sa Langitnong Amahan ug ni Jesukristo ug pagtabang sa kabatan-onan nga mosunod Kanila. Kini nga mga pakigmiting kinahanglang makapadasig og espirituhanong mga kasinatian. Ang mga lider maningkamot sa pagtabang sa matag batan-on nga mobati nga gihigugma, giawhag, ug gidasig nga mas mahisama sa Manluluwas.
Ang batan-on ug ang lider mahimong maghisgot:
-
Sa espirituhanong mga kasinatian nga makapalig-on sa pagpamatuod sa batan-on bahin sa Langitnong Amahan, ni Jesukristo, ug sa gipahiuli nga ebanghelyo.
-
Giunsa sa pagtuman sa batan-on ang iyang mga pakigsaad sa bunyag.
-
Sa mga pagpangandam sa batan-on sa paghimo ug pagtuman sa mga pakigsaad sa templo.
-
Sa personal nga mga tumong sa batan-on nga mahisama sa Manluluwas diha sa tanang aspeto sa kinabuhi (tan-awa sa “Kabataan ug Kabatan-onan”).
-
Sa kaimportante sa personal ug pamilya nga pag-ampo ug pagtuon sa kasulatan.
-
Kon unsaon sa pagpalig-on sa mga relasyon ngadto sa mga ginikanan ug ubang mga sakop sa pamilya.
-
Ang mga baroganan diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili.
-
Sa mga paagi nga ang batan-on makaapil sa buhat sa Dios mahitungod sa kaluwasan ug kahimayaan (tan-awa sa 1.2).
-
Uban sa usa ka batan-ong lalaki, sa iyang mga kasinatian sa pagtuman sa iyang mga katungdanan sa pagkapari ug sa iyang pagpangandam aron ma-orden ngadto sa sunod nga katungdanan sa pagkapari.
-
Sa mga panalangin sa pag-apil sa seminary.
-
Pagpangandam sa pagserbisyo og full-time nga misyon (tan-awa sa 24.0 ug 24.3). Ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. Alang sa mga batan-ong lalaki nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari (tan-awa sa Doktrina ug mga Pakigsaad 36:1, 4–7). Ang Ginoo modawat usab sa takos, makahimo nga mga batan-ong babaye sa pagserbisyo og mga misyon kon magtinguha sila. Alang sa mga batan-ong babaye, ang misyon usa ka gamhanan, apan opsiyonal, nga oportunidad. Ang pagpangandam alang sa misyon makapanalangin sa usa ka batan-ong babaye kon siya modesisyon man sa pagserbisyo isip usa ka misyonaryo o dili.
Ang mga lider kinahanglang sensitibo niadtong dili makahimo sa pagserbisyo isip full-time nga mga misyonaryo (tan-awa sa 24.4.4).
Alang sa impormasyon mahitungod sa pangserbisyo nga mga misyon, tan-awa sa 24.2.2.
Kon maghisgot sa pagkamasulundon sa mga sugo, ang mga lider mahimong mogamit sa mga pangutana sa interbiyo alang sa rekomend sa templo ug sa booklet nga Alang sa Kalig-on sa mga Kabatan-onan. Siguroon nila nga ang panaghisgotan mahitungod sa moral nga kalimpyo wala mag-awhag og pagkakuryoso o pag-eksperimento.
31.3.2
Pagpakigkita sa mga Young Single Adult
Ang bishop mohatag og taas nga prayoridad sa espirituhanong paglambo sa mga single adult diha sa iyang ward. Siya o ang gisangonan nga magtatambag makigmiting sa matag young single adult labing minos kausa sa usa ka tuig.
Ang sakop sa bishopric ug ang young single adult mahimong maghisgot sa mahinungdanon nga mga butang diha sa 31.3.1.2. Sila mahimo usab nga maghisgot sa mga butang nga adunay espesyal nga importansya ngadto sa mga young adult, sama sa pagpalambo sa pagbarog pinaagi sa kinaugalingong paningkamot.
31.3.3
Makigmiting sa mga Miyembro aron Hisgotan ang Ilang mga Calling ug mga Responsibilidad
Ang mga kapangulohan sa stake, mga bishopric, ug ubang mga lider makigmiting sa tinagsa-tagsa sa mga miyembro kinsa mo-report ngadto nila mahitungod sa ilang calling. Pananglitan:
-
Ang presidente sa stake kanunay nga makigmiting sa matag bishop diha sa stake (tan-awa sa 6.2.1.2).
-
Ang usa ka sakop sa kapangulohan sa stake kanunay nga makigmiting sa matag presidente sa korum sa mga elder diha sa stake (tan-awa sa 8.3.1).
-
Ang bishop makigmiting kada bulan sa presidente sa Relief Society (tan-awa sa 9.3.1). Siya usab kanunay nga makigmiting sa presidente sa korum sa mga elder ug presidente sa Young Women (tan-awa sa 8.3.1 ug 11.3.1).
-
Ang usa ka sakop sa bishopric kanunay nga makigmiting sa presidente sa Primary ug presidente sa Sunday School (tan-awa sa 12.3.1 ug 13.2.1).
-
Ang mga sakop sa kapangulohan sa korum sa mga elder ug kapangulohan sa Relief Society makigmiting sa tigpangalagad nga mga igsoong lalaki ug tigpangalagad nga mga igsoong babaye (tan-awa sa 21.3).
Dinhi niini nga mga miting, ang lider modasig ug motudlo sa miyembro sa iyang mga responsibilidad. Ang lider mopahayag og pasalamat alang sa pagserbisyo sa miyembro ug mohatag og pag-awhag. Ang miyembro mo-report bahin sa kalamboan ug kahimtang sa mga tawo nga iyang giserbisyohan. Dungan nilang hisgotan ang mga tumong, mga hagit, ug mga oportunidad. Kon magamit, sila morebyu usab sa mga badyet ug mga galastohan.
31.3.4
Makigmiting sa mga Miyembro aron Hisgotan ang Temporal nga mga Panginahanglan ug Pagbarog pinaagi sa Kinaugalingong Paningkamot
Ang pag-amuma alang sa uban mao ang kabahin sa buhat sa Dios mahitungod sa kaluwasan ug kahimayaan (tan-awa sa 1.2). Kon ang mga lider makigmiting sa mga miyembro kinsa adunay temporal nga mga panginahanglan, sila nagtabang nila nga matubag ang mubo nga termino nga mga panginahanglan ug nag-ugmad og taas nga termino nga pagbarog pinaagi sa kinaugalingong paningkamot (tan-awa sa 22.3).
Ang bishop mahimong mosangon sa uban diha sa ward, sama sa mga kapangulohan sa Relief Society ug sa korum sa mga elder, nga makigmiting sa mga miyembro kinsa adunay temporal nga mga panginahanglan. Hinoon, ang bishop lamang ang mahimong moaprobar sa paggamit sa mga pundo sa mga halad sa puasa (tan-awa sa 22.6.1).
Ang dugang nga mga baroganan ug mga palisiya alang sa pagtabang niadtong adunay temporal nga mga panginahanglan gihulagway diha sa kapitulo 22.
31.3.5
Makigmiting sa Miyembro mahitungod sa Kaminyoon ug Diborsiyo
Ang mga lider sa Simbahan kinahanglang dili motambag sa usa ka tawo kon kinsa ang minyoan. Dili usab siya motambag sa usa ka tawo kon idiborsiyo ba o dili ang iyang kapikas. Bisan kon ang diborsiyo mao ang tukma nga opsiyon sa pipila ka sitwasyon, kana nga mga desisyon magpabilin gayod nga iya sa indibidwal.
Nagsunod sa giya sa Espiritu, ang mga lider sa Simbahan kasagaran makahimamat og mga magtiayon ug mga indibidwal nga gustong magbulag o magdiborsiyo. Ang mga lider magtinguha usab sa pagtabang sa usa ka magtiayon sa pagpalig-on sa ilang kaminyoon. Sila motudlo mahitungod sa kalig-on ug kaayohan nga moabot gikan sa pagtuman sa mga pakigsaad nga ilang gihimo uban sa Ginoo ug pagsunod sa Iyang mga pagtulon-an. Kini nga mga pagtulon-an naglakip sa hugot nga pagtuo, paghinulsol, kapasayloan, gugma, ug pag-ampo.
Ang usa ka miyembro kinsa bulag sa iyang kapikas o anaa sa proseso nga magdiborsiyo kinahanglang dili makigdeyt hangtod nga mahuman ang diborsiyo.
31.3.6
Propesyonal nga Pagtambag ug Pagtambal
Ang mga lider sa Simbahan wala gitawag aron mahimong propesyonal nga mga tigtambag o mohatag og pagtambal. Ang tabang nga ilang ihatag espirituhanon, magpokus diha sa makapalig-on, makahupay, matubsanong gahom ni Jesukristo. Agi og dugang niining importante ug dinasig nga tabang, ang pipila ka miyembro mahimong makabenepisyo gikan sa propesyonal nga pagtambag kon aduna. Kini nga pagtambag o pagtambal makatabang sa mga miyembro nga makasabot ug makatubag sa mga hagit sa kinabuhi sa himsog nga mga paagi.
Ang pagpakigkita og propesyonal nga magtatambag aron makaangkon og pagsabot ug mga kahanas alang sa emosyonal nga kaayohan dili timailhan sa kahuyang. Hinoon, kini mahimong timailhan sa pagkamapainubsanon ug kalig-on.
Ang mga miyembro kinahanglan nga magmabinantayon sa pagpili og inila nga propesyonal nga mga magtatambag kinsa adunay tukma nga lisensya. Ang mga magtatambag kinahanglang motahod sa kabubut-on, mga hiyas, ug mga pagtuo niadtong nagtinguha og tabang. Ang pag-apil niini nga mga hiyas angay sa propesyonal nga pagtambag.
Kon ang mga miyembro mangayo og tambag mahitungod sa pisikal nga kasuod, ang mga bishop mahimong mopaadto nila sa mga propesyonal nga espesyalista sa ingon nga pagtambag ug kansang mga gituohan ug mga binuhatan nahiuyon sa doktrina sa Simbahan.
Ang Simbahan supak sa bisan unsa nga pagtambal, lakip sa pag-usab o pag-ayo nga pagtambal alang sa sekswal nga kahimtang o pag-ila sa gender, kana nagpahimutang sa usa ka tawo ubos sa pang-abuso nga mga binuhatan. (Tan-awa sa “Same-Sex Attraction” ug “Transgender” diha sa Life Help.)
Sa Estados Unidos ug Canada, ang mga bishop ug ang mga presidente sa stake mahimong mokontak sa Family Services aron sa pagpangita og mga kapanguhaan sa paghatag og propesyonal nga tambag nga nagsubay sa mga baroganan sa ebanghelyo. Ang impormasyon sa pagkontak gihatag diha sa ubos:
1-801-240-1711
1-800-453-3860, ekstensiyon 2-1711
FamilyServices.ChurchofJesusChrist.org
Sa ubang mga dapit, ang mga lider mahimong mokontak sa kawani sa Family Services o sa manager sa welfare ug self-reliance diha sa buhatan sa area.
Kon ang mga miyembro dili makabayad alang sa propesyonal nga pagtambag sa ilang kaugalingon o pinaagi sa insurance, ang mga bishop mahimong mogamit sa mga halad sa puasa sa pagtabang (tan-awa sa 22.4).
31.4
Makigmiting sa mga Miyembro sa Virtual nga Paagi
Kasagaran, ang mga lider makigmiting sa mga miyembro sa personal alang sa mga interbiyo ug mohatag og espirituhanong tabang ug pagpangalagad. Kon ang personal nga pakigmiting dili praktikal, ang mga lider mahimong makigmiting sa mga miyembro sa birtuwal nga paagi alang sa mga interbiyo ug mohatag og espirituhanong tabang ug pagpangalagad.
Ang mga interbiyo ug ubang mga miting tali sa mga lider ug mga miyembro kinahanglang dili irekord.
Bahin sa personal nga mga pag-interbiyo ug mga miting, ang miyembro mahimong modapit og laing tawo nga mokuyog atol sa virtual nga interbiyo o miting.
Kon ang interbiyo alang sa rekomend sa templo ipahigayon sa birtuwal nga paagi, ang lider mopirma sa rekomend sa digital nga paagi kon ang miyembro takos. Usa ka sakop sa bishopric o ang presidente sa branch moprinta dayon sa rekomend ug mohatag niini ngadto sa miyembro.