“32. Salamo ma Fono o Tagata o le Ekalesia,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2024).
“32. Salamo ma Fono o Tagata o le Ekalesia,” Tusitaulima Aoao.
32.
Salamo ma Fono o Tagata o le Ekalesia
32.0
Faatomuaga
O le tele o le salamo e tupu i le va o se tagata, le Atua, ma i latou na aafia i agasala a se tagata. Peitai, o nisi taimi e manaomia ai e se epikopo po o se peresitene o le siteki ona fesoasoani i tagata o le Ekalesia i a latou taumafaiga ia salamo.
Pe a fesoasoani i tagata ia salamo, o epikopo ma peresitene o siteki e alolofa ma amana’ia. Latou te mulimuli i le faataitaiga a le Faaola, o lē sa si’iina a’e tagata taitasi ma sa fesoasoani ia fulitua mai le agasala ae liliu atu i le Atua (tagai i le Mataio 9:10–13; Ioane 8:3–11).
E pei ona otooto atu i lalo, o lenei mataupu ua faatulagaina e taiala ai taitai e ala i faai’uga autu ma faatinoga e tatau ai e fesoasoani ai i se tasi ia salamo mai se agasala matuia ma fesoasoani ai e puipuia isi.
-
O le Matafaioi a le Ekalesia i le Fesoasoani i se Tagata ia Salamo. OVaega 32.1–32.4 o loo faamatala atu ai le a’oa’oga faavae a le Alii e uiga i le salamo ma le faamagaloga. O nei vaega o loo faamalamalama atu ai foi ia faamoemoega e tolu o tapuia’iga po o le soloia mai le avea ma tagata o le Ekalesia. E le gata i lea, o loo faamalamalama atu ai foi le matafaioi a epikopo ma peresitene o siteki e fesoasoani ai i le salamo.
-
Filimaotiina o le Faatulagaga mo le Fesoasoani i se Tagata ia Salamo. OVaega 32.5–32.7 o loo avatu ai taiala mo le faia o faai’uga pe o se fono o le tagata o le ekalesia po o se fautuaga patino o se tulaga talafeagai lea e fesoasoani ai i se tagata ia salamo.
-
Faatautaiga o Fautuaga Patino. O leVaega 32.8 o loo avatu ai taiala mo fautuaga patino e faia e le epikopo po o le peresitene o le siteki. O loo faamalamalama atu ai foi tapuia’iga māmā i le avea ai ma tagata o le Ekalesia.
-
Faatautaiga o Fono o Tagata o le Ekalesia. OVaega 32.9–32.14 o loo faamalamalama atu ai po o ai lē e i ai le tiutetauave mo fono o tagata o le ekalesia, auala e faatautaia ai, ma faai’uga e mafai ona faia. O loo faamalamalama atu ai foi taunuuga o na faai’uga.
-
Toefaafoisia o Avanoa o le Avea ma Tagata o le Ekalesia. OVaega 32.15–32.17 o loo faamalamalama atu ai le auala e mafai ai e se tagata ona toefuatai atu avanoa o le avea ma tagata auai o le Ekalesia e ala i le salamo.
Se’i vagana ua ta’ua, o faasinoga i peresitene o siteki e faatatau foi i peresitene o le misiona. O faasinoga i epikopo e faatatau foi i peresitene o paranesi.
Ua faauigaina e le Au Peresitene Sili ia aiaiga faavae ma faagasologa mo le salamo i agasala matuia. E lagolagoina le Au Peresitene Sili e le Ofisa o Faamaumauga e le Faalauaiteleina a le Ekalesia. E mafai e le peresitene o le siteki po o le epikopo ona faafesootai lena ofisa i fesili faaletaitai po o aiaiga faavae. E mafai foi e lena ofisa ona tuuina atu faatonuga i le auala e auina atu ai talosaga i le Ofisa o le Au Peresitene Sili. O loo tuuina atu i lalo ia faamatalaga e faafesootai ai:
Telefoni: 1-801-240-2053 po o le 1-800-453-3860, laina 2-2053
Vili fua (telefoni GSD): 855-537-4357
O LE MATAFAIOI A LE EKALESIA I LE FESOASOANI I SE TAGATA IA SALAMO
32.1
Salamo ma le Faamagaloga
Na fetalai mai le Alii e faapea, “e le mafai e se mea ua le mama ona mautofi i le malo o le lagi” (Alema 11:37; tagai foi i le 3 Nifae 27:19). O a tatou agasala e afua ai ona tatou lē mama—le agavaa e mau i le afioaga o lo tatou Tama Faalelagi. E aumaia ai foi ia i tatou le lototiga i lenei olaga.
O le tulafono a le Atua o le faamasino tonu e manaomia ai se taunuuga pe a tatou agasala (tagai i le Alema 42:14, 17–18). Peitai, o Lana fuafuaga sili o le alofa mutimutivale “e mafai ona faamalie ai manaoga o le faamasinotonu, ma siosiomia ai i [tatou] i lima o le saogalemu” (Alema 34:16; tagai foi i le Mosaea 15:9).
Ina ia faataunuuina Lana fuafuaga o le alofamutimutivale, na auina mai ai e le Tama Faalelagi Lona Alo Pele e Toatasi na Fanaua, o Iesu Keriso, e togiola mo a tatou agasala (tagai i le Alema 42:15). Sa puapuagatia Iesu i le faasalaga e moomia e le tulafono o le faamasinotonu mo a tatou agasala (tagai i le Mataupu Faavae ma Feagaiga 19:15–19; tagai foi i le Alema 42:24–25). E ala i lea taulaga, na faaalia ai e le Tama ma le Alo lo La’ua alofa e le i’u mo i tatou (tagai i le Ioane 3:16).
Pe a tatou faaaoga le “faatuatua e oo i le salamo,” e faamagaloina i tatou e le Tama Faalelagi, ma tuuina mai ai le alofa mutimutivale e ala i le Togiola a Iesu Keriso (Alema 34:15; tagai foi i le Alema 42:13). Pe a ua faamamaina i tatou ma faamagaloina, e mafai ona tatou mautofi i le malo o le Atua i le i’uga (tagai i le Isaia 1:18; Mataupu Faavae ma Feagaiga 58:42).
O le salamo e sili atu nai lo na o le suia o le amio. O le liliu ese lea mai le agasala ma agai atu i le Tama Faalelagi ma Iesu Keriso. E tau atu i se suiga o le loto ma le mafaufau (tagai i le Mosaea 5:2; Alema 5:12–14; Helamana 15:7). E ala i le salamo, tatou te avea ai ma tagata fou, ua toefaalelei ma le Atua (tagai i le 2 Korinito 5:17–18; Mosaea 27:25–26).
O le avanoa e salamo ai o se tasi lea o faamanuiaga silisili ua tuuina mai e le Tama Faalelagi ia i tatou e ala i le meaalofa o Lona Alo.
32.2
O Faamoemoega o Tapuia’iga po o le Soloia Mai le Avea ma Tagata Auai o le Ekalesia
Pe a ua papatiso se tagata, e avea o ia o se itutino o le “aiga o le Atua” (Efeso 2:19). O le feagaiga o le papatisoga e aofia ai se folafolaga e tauivi malosi e ola e tusa ai ma aoaoga ma poloaiga a Keriso. Pe a oo ina sese se tagata, na te faatino lona faatuatua ia Iesu Keriso ma salamo, ma faalagolago i Lona alofa mutimutivale e faamalosia ai ma faamagaloina.
Afai e solia e se tagata se agasala matuia, e fesoasoani le epikopo po o le peresitene o le siteki ia te ia ia salamo. I le avea ai o se vaega o lenei faagasologa, e ono manaomia ona ia tapui mai nisi o avanoa o le avea ma tagata auai o le Ekalesia mo se taimi. I nisi o tulaga, e ono manaomia ona ia soloia le tagata mai le avea ai ma se tagata auai o le Ekalesia mo se taimi.
O le tapui po o le soloia o se tagata mai le avea ma tagata o le Ekalesia e le o faamoemoe e faasala ai. Ae, o nei faatinoga o nisi taimi e tatau ai ina ia fesoasoani ai i se tagata ia salamo ma ia lagona ai se suiga o le loto. E avatu ai foi i se tagata le taimi e sauniuni ai faaleagaga e toefaafou ma toe tausi ana feagaiga.
O le epikopo po o le peresitene o le siteki e vaavaaia ia tapuia’iga po o le soloia mai le avea ma tagata o le Ekalesia e pei ona otooto atu i le 32.5–32.14. O ia faatinoga e o faatasi ma tuutuuga o le salamo. Pe a salamo faamaoni se tagata, e mafai ona toefuatai atu ia te ia avanoa o le avea ma tagata o le Ekalesia.
Pe afai ua tatau ai le tapuia’iga po o le soloia mai le avea ma tagata o le Ekalesia, e mulimuli le epikopo po o le peresitene o le siteki i le taitaiga a le Agaga Paia ma faatonuga o loo i le mataupu lenei. E galue o ia i se agaga o le alofa (tagai i le 32.3).
O tapuia’iga mai le avea ma tagata o le Ekalesia e faale-ekalesia, ae le faale-malo pe faasolitulafono. E na o le tulaga o se tagata i le Ekalesia e aafia ai. (Tagai i le Mataupu Faavae ma Feagaiga 134:10.)
O faamoemoega e tolu o tapuia’iga po o le soloia mai le avea ma tagata auai o le Ekalesia o loo ta’ua i lalo.
32.2.1
Fesoasoani e Puipuia Isi
O le faamoemoega muamua o le fesoasoani lea e puipuia isi. O nisi taimi e faaalia ai e se tagata se taufaamata’u faaletino pe faaleagaga. O amioga faatautala e faamalieina ai tuinanau, faamanu’aina faaletino, sauaga faalefeusua’iga, faaaoga sese o fualaau ma vailaau, taufaasese, ma le liliuese o nisi ia o auala e mafai ai ona tupu lenei mea. Faatasi ai ma musumusuga, e galue ai se epikopo po o se peresitene o le siteki e puipuia isi pe a faaalia e se tasi se taufaamata’u i nei auala ma isi auala matuia (tagai i le Alema 5:59–60).
32.2.2
Fesoasoani i se Tagata Ia Maua le Mana Togiola o Iesu Keriso e ala i le Salamo
O le faamoemoega lona lua o le fesoasoani lea i se tagata ia maua le mana togiola o Iesu Keriso e ala i le salamo. E ala atu i lea faagasologa, e mafai ai e ia ona toe mamā ma agavaa e maua faamanuiaga uma a le Atua.
Na aoao mai le Faaola e faapea o “le loto momomo ma le agaga salamo” o le taulaga lea Na te manaomia mo le faamagaloga o agasala (3 Nifae 9:20). E aofia ai i lenei tulaga le salamo faamaoni mo agasala ma o latou taunuuga (tagai i le 2 Korinito 7:9–10).
Afai e solia e se tagata se agasala matuia, o tapuia’iga po o le soloia mai le avea ma tagata o le Ekalesia e mafai ona fesoasoani e faafailele ai se loto momomo ma le agaga salamo e manaomia e salamo ai, lafoai moni ai le agasala, ma malamalama ai i taunuuga o le agasala. O lenei malamalama e mafai ona fesoasoani i tagata e faataua loloto ai a latou feagaiga ma le Atua ma naunau ai e tausia na feagaiga i le lumanai.
32.2.3
Puipuia le Amiotonu o le Ekalesia
O le faamoemoega lona tolu o le puipuia lea o le amiotonu o le Ekalesia. O le tapuia’ia po o le soloia mai le avea ma se tagata o le Ekalesia e ono tatau ai pe afai o lana amio ua matuai faatauma’oia ai le Ekalesia (tagai i le Alema 39:11). O le amiotonu o le Ekalesia e le puipuia i le faalafi po o le tuuitiitia o agasala matuia—ae e ala i le talanoaina.
32.3
O Le Matafaioi a Faamasino i Isaraelu
O epikopo ma peresitene o siteki, ua valaauina ma vaetofia e avea ma faamasino i Isaraelu (tagai i le Mataupu Faavae ma Feagaiga 107:72–74). Latou te umia ki o le perisitua e avea ai ma sui o le Alii e fesoasoani ai i tagata o le Ekalesia ia salamo (tagai i le Mataupu Faavae ma Feagaiga 13:1; 107:16–18).
E tele taimi e fesoasoani ai epikopo ma peresitene o siteki i le salamo e ala i fautuaga patino. O lenei fesoasoani e mafai ona aofia ai tapuia’iga māmā o nisi o avanoa o le avea ai ma tagata o le Ekalesia mo se taimi. (Tagai i le 32.8.)
Mo nisi o agasala matuia, e fesoasoani taitai i le salamo e ala i le faia o se fono o le tagata o le Ekalesia (tagai i le 32.6 ma le 32.9–32.14). O lea fesoasoani e mafai ona aofia ai le tapuia’iga mamafa o nisi o avanoa mai le avea ai ma tagata o le Ekalesia po o le soloia mai le avea ma tagata o le Ekalesia mo se taimi (tagai i le 32.11.3 ma le 32.11.4).
E fesoasoani epikopo ma peresitene o siteki i tagata o le Ekalesia ia malamalama e alofa le Atua i Ana fanau. Ona e finagalo o Ia ia latou fiafia ma maua faamanuiaga, e matuai amana’ia ai foi e Ia lo latou usiusitai ma le salamo.
O epikopo ma peresitene o siteki e alolofa ma amana’ia a o latou fesoasoani i tagata ia salamo. O le fegalegalea’iga a le Faaola ma le fafine na molia atu i le mulilua o se taiala lea (tagai i le Ioane 8:3–11). E ui sa le’i fetalai atu o Ia ua faamagaloina ana agasala, ae sa Ia le’i ta’usalaina foi o ia. Ae, sa Ia ta’u atu ia te ia “aua e te toe agasala”—ia salamo ma suia lona olaga.
E a’oa’o atu e nei taitai e faapea, o loo i ai le “olioli … i le lagi i le tagata agasala e toatasi e salamo” (Luka 15:7). Latou te onosai, lagolagosua, ma vaai i itu lelei. Latou te uunaia le faamoemoe. Latou te a’oa’o atu ma molimau atu e faapea, ona o le taulaga togiola a le Faaola, ua mafai ai e tagata uma ona salamo ma mamā.
E saili e epikopo ma peresitene o siteki le taitaiga mai le Agaga ia iloa ai le auala e fesoasoani ai i tagata taitasi ia salamo. E mo na o agasala sili ona matuia e i ai tulaga faatonuina a le Ekalesia ua faatulagaina ai po o a faatinoga e tatau i ona taitai ona fai (tagai i le 32.6 ma le 32.11). E leai ni tulaga se lua e tutusa. O fautuaga e tuu atu e taitai ma le faagasologa o le salamo latou te faatonutonuina, e tatau ona musuia ma e ono eseese mo tagata taitoatasi.
E silafia e le Alii tulaga o tagata taitasi, gafatia, ma le matua faaleagaga. O le a fesoasoani le Agaga Paia i taitai ia iloatino le ala e fesoasoani ai i tagata o le Ekalesia, ia faia suiga e tatau ai ina ia mafai ai ona faamaloloina i latou ma tetee atu i le faaosoosoga e toe fai le agasala.
O le fesoasoani i se tagata e salamo, toe liliu atu i le Atua, ma ia faamaloloina e ala i le Togiola a Iesu Keriso, o se tasi lea o aafiaga sili ona faafiafiaina e mafai e se tagata ona maua. O leMataupu Faavae ma Feagaiga 18:10–13 o loo faamalamalama mai ai:
“Ia manatua ua tele lava le taua o agaga i le silafaga a le Atua;
“Aua, faauta, na mafatia le Alii lo oulua Togiola i le oti i la le tino; o le mea lea na mafatia o ia i le tiga o tagata uma, ina ia mafai ona salamo tagata uma ma o mai ia te ia.
“Ma ua toetu mai o ia mai le oti, ina ia mafai ona ia aumai o tagata uma ia te ia, i luga o tuutuuga o le salamo.
“Ma ua matua tele lava lona olioli i le agaga e salamo!”
32.4
Ta’uta’u Atu, Lē Faalaua’iteleina, ma le Lipoti atu i Taitai o le Malo
32.4.1
Ta’uta’u Atu
O le salamo e moomia ai le ta’uta’u atu o agasala i le Tama Faalelagi. Ua fetalai mai Iesu Keriso, “O le mea lenei e mafai ai ona outou iloa pe afai ua salamo se tagata i ana agasala—faauta, e ta’uta’u atu e ia ma lafoaia” (Mataupu Faavae ma Feagaiga 58:43; tagai foi i le Mosaea 26:29).
Pe a soli e tagata o le Ekalesia ni agasala matuia, o lo latou salamo e aofia ai foi le ta’uta’u atu i lo latou epikopo po o le peresitene o le siteki. Ona mafai lea e ia ona faaaoga ia ki o le talalelei o le salamo mo i latou (tagai i le Mataupu Faavae ma Feagaiga 13:1; 84:26–27; 107:18, 20). E fesoasoani lea ia i latou ia faamaloloina ai ma toefoi mai i le ala o le talalelei e ala i le mana o le Togiola a le Faaola.
O le faamoemoega o le ta’uta’u atu o le faamalosi’auina lea o tagata o le Ekalesia e faasaoloto i latou lava mai avega ina ia mafai ona latou saili atoatoa atu i le fesoasoani a le Alii i le suiga ma le faamalologa. O le atia’eina o se “loto momomo ma le agaga salamo” e lagolagoina e le ta’uta’u atu (2 Nifae 2:7). O le ta’uta’u atu i le lotofuatiaifo, e faaalia ai ua naunau se tagata ia salamo.
Pe a ta’uta’u atu e se tagata o le Ekalesia se agasala, e mulimuli le epikopo po o le peresitene o le siteki i taiala mo fautuaga o loo i le 32.8. Na te sailia ma le agaga tatalo le taitaiga e uiga i le faatulagaga talafeagai mo le fesoasoani i le tagata ia salamo (tagai i le 32.5). Na te lauliliuina pe mata o le a aoga se fono o le tagata o le Ekalesia. Afai e manaomia e aiaiga faavae o le Ekalesia se fono o le tagata o le Ekalesia, na te faamalamalama atua le mea lenei (tagai i le 32.6 ma le 32.10).
O nisi taimi e sese ai se tagata o le Ekalesia i se toalua po o se isi tagata matua. E avea o se vaega o le salamo, o le mea masani lava e tatau ona ia ta’uta’u atu i lena tagata ma saili se faamagaloga. O se talavou e faia se agasala matuia, e masani ona uunaia e fefautuaa’i ma ona matua.
32.4.2
O Agasala Matuia e Le Ta’uta’uina Atu pe Faafitia
E masani ona iloa e se epikopo po o se peresitene o le siteki e uiga i se agasala matuia e ala i le ta’uta’u atu pe iloa mai se isi tagata. E mafai foi ona ia maua uunaiga e uiga i se agasala matuia e ono tulai mai e ala i le Agaga Paia. Afai na te lagona le uunaia e le Agaga e faapea, atonu o tauivi se tasi ma le agasala, e mafai ona ia faatulagaina se faatalanoaga. I le taimi o le faatalanoaga, na te faasoa atu lona popolega i se ala agalelei, ma le faaaloalo. E aloese o ia mai soo se leo o le tuua’iga.
Afai e faafitia e se tagata lona faia o se agasala matuia ua i ai i le epikopo po o le peresitene o le siteki ia faamatalaga e lagolago ai, e mafai lava ona fai pea se fono o le tagata o le Ekalesia. Peitai, o le i ai na o se uunaiga faaleagaga e le lava lea e faia ai se fono (tagai i le Mataupu Faavae ma Feagaiga 10:37). E mafai e le taitai ona ao mai nisi faamatalaga pe afai e manaomia. E mulimuli o ia i taiala o loo i le 32.4.3 ma le 32.10.2.
32.4.3
Aoina Mai o Faamatalaga
A o le’i faia se fono o le tagata o le Ekalesia, e ao mai e le epikopo po o le peresitene o le siteki ia faamatalaga i le tele na te moomia. E tele a ina lava faamatalaga mai mea e ta’uta’u atu e se tagata. E mafai foi ona sau ni faamatalaga mai se tagata o le aiga, se isi taitai o le Ekalesia, se tagata na aafia fua, po o se tasi na auai ai i le faatinoga o le agasala.
Pe a aoina mai faamatalaga, e tatau i le epikopo po o le peresitene o le siteki ona faaaoga na o metotia e talafeagai mo se taitai perisitua. E lē tatau ia te ia ona mata’ituina le fale o se tagata pe pu’e se mea e uiga ia te ia e aunoa ma se maliega. E lē tatau foi ona ia faaaogaina soo se faiga e lē tusa ai ma le tulafono.
E seāseā foi i ai ni tuua’iga sese ae e mafai lava ona tupu. E tatau i taitai perisitua ona faaeteete pe a utiuti ni faamatalaga e ese ai mai upu a le tagata e toatasi. Mo se faataitaiga, o se tagata o le Ekalesia e tuua’ia i le mulilua e ono faafitia le moliaga. O loo faamalamalama mai i le mau e faapea “ia faamautuina upu uma e faasaga i lea alii po o le tamaitai e ni molimau e toalua o le ekalesia” (Mataupu Faavae ma Feagaiga 42:80). O “molimau e toalua” o lona uiga e lua ni puna eseese o faamatalaga. E mafai ona aofia ai mea e iloa e se tagata na auai ai atoa ai ma nisi puna faatuatuaina. E i ai taimi e ono manaomia ai e le taitai perisitua ona faatalitali lana gaoioiga se’ia maua nisi faamatalaga.
Pe a aoina e se taitai o le Ekalesia ia faamatalaga mo le fono o se tagata o le Ekalesia, e tatau ona ia taofia loa lava pe afai ua ia iloa ua faia e le ofisa o leoleo suesuega o le tagata o le Ekalesia. E faia lenei mea ia aloese ai mai ni tagi e ono faia faapea, ua faalavelave le taitai i le faamasinoga. Mo se fautuaga faaletulafono e uiga i ia tulaga i le Iunaite Setete ma Kanata, e faafesootai e le peresitene o le siteki le Ofisa o le Loia Sili a le Ekalesia:
1-800-453-3860, laina 2-6301
1-801-240-6301
I fafo atu o le Iunaite Setete ma Kanata, e faafesootai e le peresitene o le siteki le loia a le eria i le ofisa o le eria.
E masani lava e lē faia se fono o le tagata o le Ekalesia e iloiloina ai le amio na suesueina e se faamasinoga faalemalo o va o tagata po o se faamasinoga o soligatulafono se’i vagana ua maua se faai’uga a le faamasinoga. I nisi mataupu e ono talafeagai foi le tolopoina o se fono o le tagata o le Ekalesia se’ia mae’a le taimi o le apili faaletulafono pe ua teena foi le apili.
32.4.4
Lē Faalaua’iteleina
Ua i ai i epikopo, peresitene o siteki, ma o latou fesoasoani se tiute paia e puipuia faamatalaga uma e lē faalaua’iteleina e faasoa atu ia i latou. O nei faamatalaga e ono oo mai i faatalanoaga, fefautuaa’iga, ma le ta’uta’u atu. O lea lava tiute e tasi o le lē faalaua’iteleina e faatatau foi ia i latou uma e auai i fono o tagata o le Ekalesia. E taua tele le lē faalaua’iteleina aua e ono le ta’uta’uina e tagata a latou agasala pe sailia se taitaiga pe afai o le a lē tausisia le lē faalaua’iteleina o mea latou te faasoa maia. O le solia o se talitonuga mautinoa lea e iloa ai e isi tagata faamatalaga e lē faalaua’iteleina e faalataina ai le faatuatuaga o tagata o le Ekalesia ma mafua ai ona latou lē talitonuina o latou taitai.
I le ogatusa ai ma lo latou tiute o le lē faalaua’iteleina, e na o le pau nei o vaega e mafai e se epikopo, peresitene o le siteki, po o o la’ua fesoasoani ona faasoa atu ai ni faamatalaga faapena:
-
E manaomia ona latou feūtaga’i ma le peresitene o le siteki, peresitene o le misiona, po o le epikopo a le tagata e uiga i le faia o se fono o le tagata o le Ekalesia po o ni mataupu e faatatau i ai. E mafai foi e le peresitene o le siteki ona feūtaga’i ma lona Fitugafulu Eria ua tofia. Afai e manaomia, e faasino atu e le Fitugafulu Eria le peresitene o le siteki i le Au Peresitene o le Eria. E na o le peresitene o le siteki e faia le tonu pe tatau ona faia se fono po o lona taunuuga.
-
Ua masii atu le tagata i se uarota fou (pe ua faamalolo le taitai perisitua), a o faatalitali le faai’uga o le avea ai ma tagata o le Ekalesia po o isi atugaluga matuia. I tulaga nei, e logo e le taitai le epikopo fou po o le peresitene o le siteki e uiga i atugaluga po o le faai’uga o loo tālia (tagai i le 32.14.7). Na te faailoa atu foi i le taitai pe afai e ono faaalia e le tagata se taufaamata’u i isi.
-
Ua silafia e se epikopo po o se peresitene o le siteki e faapea, o se tagata o le Ekalesia o loo nofo i fafo atu o le uarota po o le siteki atonu na aafia i se agasala matuia. I lena tulaga, na te faafesoota’ia ai faalilolilo le epikopo o lena tagata.
-
E alagatatau ona faailoa atu faamatalaga i le taimi o le fono o se tagata o le Ekalesia. O faamatalaga uma sa aoina mai ma faasoa atu o se vaega o le fono o le tagata o le Ekalesia e lē faalaua’iteleina.
-
E filifili se tagata o le Ekalesia e tuu atu le faatagaga mo le taitai e faasoa atu ai faamatalaga i ni tagata patino. O nei tagata e mafai ona aofia ai matua, taitai o le Ekalesia, po o isi e ono aumaia le lagolago. E lē faasoaina atu e le taitai ia faamatalaga i tua atu o le faatagaga na tuuina mai e le tagata.
-
E ono tatau foi ona faasoa atu faamatalaga faatapulaaina e uiga i le faai’uga o se fono o le tagata o le Ekalesia (tagai i le 32.12.2).
I isi tulaga uma, e tatau i le taitai ona tagai i le 32.4.5. O nei tulaga e aofia ai le taimi e ono manaomia ai e le tulafono ona lipoti atu se solitulafono, e pei o le sauaina o fanau, i taitai o le malo.
Ina ia lagolago atu i taitai i le puipuia o isi ma ia tausisia le tulafono, e tuuina atu e le Ekalesia le fesoasoani e tauala mai i tagata ua aoaoina faapitoa. Ina ia maua lenei taitaiga, e vili vave e taitai le laina fesoasoani a le Ekalesia mo sauaga i nofoaga o maua ai (tagai i le 32.4.5 ma le 38.6.2.1). I nofoaga e le o maua ai, e faafesootai e le peresitene o le siteki le loia a le eria i le ofisa o le eria.
E na o le tasi le tulaga e tatau ai i se epikopo po o le peresitene o le siteki ona faailoa atu faamatalaga e lē faalaua’iteleina e aunoa ma le sailia muamua o sea taitaiga. Pe afai lea ua tatau ai ona faailoa atu ina ia taofia ai se aafiaga e lamatia ai le ola po o se manu’aga matuia ae leai se taimi e sailia ai se taitaiga. O tulaga faapena, e sili atu ai ona taua le tiute o le puipuia o isi nai lo le tiute o le lē faalaua’iteleina. E tatau i taitai ona faafesootai vave loa ia taitai faalemalo.
Afai e tusitusi e taitai ni faamatalaga pe fesootai faaeletonika i le tasi ma le isi, latou te malupuipuia le faaaogaina o nei faamatalaga. Latou te tapeeseina foi pe susunuina ia faamatalaga pe a latou lē toe manaomiaina. Latou te lē faasoaina atu ma le lē tatau ia faamatalaga patino.
E ono lu’iina e taitai faalemalo le lē faalaua’iteleina e moomia mai se taitai perisitua. Afai e tula’i mai lea tulaga i le Iunaite Setete ma Kanata, e sailia e le peresitene o le siteki se fautuaga faaletulafono mai le Ofisa o le Loia Sili a le Ekalesia:
1-800-453-3860, laina 2-6301
1-801-240-6301
I fafo atu o le Iunaite Setete ma Kanata, e faafesootai e le peresitene o le siteki le loia a le eria i le ofisa o le eria.
32.4.5
Lipoti Atu i Taitai o le Malo
O nisi tagata ua salamo ua solia tulafono faalemalo. I nisi tulaga, e le o silafia e taitai o le malo lenei mea. E fautuaina e epikopo ma peresitene o siteki ia tagata o le ekalesia e mulimuli i le tulafono ma lipoti mataupu faapena. Latou te fautuaina foi tagata o le ekalesia ia maua se fautuaga mautu faaletulafono pe a tuuina atu se lipoti. O le aiaiga faavae a le Ekalesia o le usita’ia lea o le tulafono.
I le tele o nofoaga, e manaomia e le tulafono ia taitai perisitua e lipoti atu ni amioga faasolitulafono latou te silafia. Mo se faataitaiga, o nisi setete ma atunuu e manaomia le lipotia o le sauaina o fanau i le pulega a le ofisa o leoleo.
I nisi atunuu, ua faavaeina e le Ekalesia se laina fesoasoani e lē faalaua’iteleina mo sauaga e fesoasoani ai i epikopo ma peresitene o siteki. E tatau i nei taitai ona vili vave i le laina fesoasoani e uiga i tulaga uma atonu na sauaina ai se tagata—pe o lamatia ai i le sauaina (tagai i le 38.6.2.1). E avanoa mo le 24 itula i le aso, 7 aso o le vaiaso.
I atunuu e leai se laina fesoasoani, e tatau i se epikopo ua silafia se tulaga sauaina ona faafesootai lona peresitene o le siteki, o lē e tatau ona sailia se taitaiga mai le loia i le ofisa o le eria.
Mo nisi faamatalaga e uiga i le lipotia o sauaga, tagai i le 38.6.2.1 ma le 38.6.2.7.
FUAFUAINA O LE FAATULAGAGA MO LE FESOASOANI I SE TAGATA IA SALAMO
32.5
O Faatulagaga mo le Fesoasoani i se Tagata ia Salamo
I le mae’a ai ona silafia ua faia e se tagata o le Ekalesia se agasala matuia, e faia e se epikopo po o se peresitene o le siteki ia laasaga e puipuia ai isi. Na te sailia foi le taitaiga a le Agaga Paia i le filimaotiina o le faatulagaga mo le fesoasoani i le tagata ia salamo ma ia faalatalata atili i le Faaola.
32.5.1
Vaaiga Aoao i Faatulagaga
O loo lisi atu i le siata lenei ni faatulagaga se tolu mo le fesoasoani i se tagata ia salamo. O loo aotele atu ai foi nisi o mea e iloiloina e taitai pe a filifili pe o le a le faatulagaga e faaaoga.
O Faatulagaga mo le Fesoasoani i se Tagata ia Salamo
|
Faatulagaga |
Nisi o Mea e Iloiloina (tagai foi i le 32.7) |
|---|---|
Faatulagaga Fono o le Tagata o le Ekalesia i le Siteki | Nisi o Mea e Iloiloina (tagai foi i le 32.7) |
Faatulagaga Fono o le Tagata o le Ekalesia i le Uarota | Nisi o Mea e Iloiloina (tagai foi i le 32.7)
|
Faatulagaga Fautuaga Patino (tagai i le 32.8) | Nisi o Mea e Iloiloina (tagai foi i le 32.7)
|
O nisi taimi e lē lava ia fautuaga patino ma tapuia’iga māmā e faia e le epikopo po o le peresitene o le siteki e fesoasoani ai i se tagata ia salamo mai agasala matuia. Ua saunia e le Alii ia fono o tagata o le Ekalesia e fesoasoani ai i se faamasino i Isaraelu i tulaga faapenei. (Tagai i le Esoto 18:12–27; Mosaea 26:29–36; Mataupu Faavae ma Feagaiga 42:80–83; 102.) Mo nisi o agasala matuia, e manaomia ai e aiaiga faavae a le Ekalesia se fono (tagai i le 32.6.1). O le solia o feagaiga o le malumalu e faateleina ai le foliga alagatatau o se fono o le tagata o le Ekalesia (tagai i le 32.7.4).
I totonu o se uarota, o fesoasoani o le epikopo e fesoasoani atu i fono o tagata o le Ekalesia. I totonu o se siteki, o fesoasoani o le peresitene o le siteki e fesoasoani atu. I nisi o fono o tagata o le Ekalesia i le siteki, e auai ai foi ia fautua maualuga i le faatinoga (tagai i le 32.9.2). I se fono o le tagata o le Ekalesia, e talanoa ai le au epikopo po o le au peresitene o le siteki ma le tagata i se agaga o le alofa.
32.5.2
Fuafuaina o le Faatulagaga ma le Taimi
Pe a maua loa se tonu pe o lē fea o nei faatulagaga o le a sili ona fesoasoani ai i se tagata ia salamo, e sailia e taitai le taitaiga a le Agaga Paia. Latou te iloiloina foi mea moni nei:
-
O le matuia o le agasala ma le aiaiga faavae a le Ekalesia pe mata e manaomia ai se fono (tagai i le 32.6)
-
O tulaga o le tagata (tagai i le 32.7)
E fefautuaa’i se epikopo ma le peresitene o le siteki e uiga i ni tulaga fitoitonu. E tatau ona ia maua le faamaoniga mai le peresitene o le siteki a o le’i faia se fono o le tagata o le Ekalesia.
I mataupu faigata, e mafai e le peresitene o le siteki ona sailia se fautuaga mai lona Fitugafulu Eria ua tofia. E tatau i le peresitene o le siteki ona fefautuaa’i ma le Au Peresitene o le Eria e uiga i mataupu o loo otooto atu i le 32.6.3. Peitai, e na o le peresitene o le siteki e filifili pe tatau ona faia se fono e talanoaina ai le amio. Afai e faia se fono, e fai e le peresitene o le siteki po o le epikopo le i’uga.
Afai e filimaoti pe tonu i se epikopo po o se peresitene o le siteki e faapea ua lava se fautuaga patino, e mulimuli o ia i taiala o loo i le 32.8. Afai na te fuafuaina e manaomia se fono o le tagata o le Ekalesia, pe o manaomia e aiaiga faavae o le Ekalesia se fono, e mulimuli lē e faatautaia [le fono] i faiga faavae o loo i le 32.9–32.14.
A o le’i faia se fono, e ono fuafuaina e le epikopo po o le peresitene o le siteki e faapea, o tapuia’iga māmā mai le avea ma tagata o le ekalesia o le faai’uga sili lea mo se taimi. Na te faia le fono i le taimi o le a sili ona faamalosi’auina ai le salamo faamaoni o le tagata. Peitai, e le tatau ona ia tolopoina se fono pe afai e tatau ai mo le puipuia o isi.
32.6
O Le Matuia o le Agasala ma Aiaiga Faavae a le Ekalesia
O le matuia o se agasala o se iloiloga taua lea i le filimaotiina po o le fuafuaina o le faatulagaga o le a (1) fesoasoani ai e puipuia isi ma le (2) fesoasoani ai i se tagata ia salamo. Ua fetalai mai le Alii e faapea, Na te “le mafai ona vaai i luga o le agasala ma sina tikeri itiiti o le faatagaina” (Mataupu Faavae ma Feagaiga 1:31; tagai foi i le Mosaea 26:29). E lē tatau i Ana auauna ona lē amana’iaina faamaoniga o agasala matuia.
O agasala matuia o se tausuai tele ma le loto i ai e faasaga i tulafono a le Atua. O loo lisi atu i lalo ia faavasegaga o agasala matuia.
-
O amioga saua ma sauaga (tagai i le 32.6.1.1 ma le 32.6.2.1)
-
Soliga o le faatuatuaga (tagai i le 32.6.1.4 ma le 32.6.2.4)
O vaega o mulimuli mai o loo faamatala ai le taimi e manaomia ai se fono o le tagata o le Ekalesia, le taimi e ono tatau ai, ma le taimi e lē tatau ai.
32.6.1
Taimi e Manaomia ai se Fono o le Tagata o le Ekalesia
E tatau i le epikopo po o le peresitene o le siteki ona faia se fono o le tagata o le Ekalesia pe a ta’u mai i faamatalaga e faapea, ua solia e se tagata o le Ekalesia soo se agasala o loo faamatala atu i le vaega lenei. Mo agasala nei, e manaomia se fono tusa lava po o le a le maualuga o se tulaga o le matua faaleagaga o se tagata ma le malamalama i le talalelei.
Tagai i le 32.11 mo taunuuga e ono oo i ai ia fono e tauaofia mo agasala o loo lisi atu i le vaega lenei. O tapuia’iga māmā mai le avea ma tagata o le Ekalesia e le o se faai’uga lea mo nei fono.
32.6.1.1
Amioga Faasaua ma Sauaga
Fasioti Tagata. E manaomia se fono o le tagata o le Ekalesia pe afai e fasiotia e se tagata o le Ekalesia se tasi. E pei ona faaaogaina i i, o le fasioti tagata o le faamutaina lea ma le loto i ai, ma le lē ta’uamiotonuina o le ola o se tagata. E manaomia le soloia o le tagata mai le avea ma tagata o le Ekalesia.
O le fasioti tagata e lē aofia ai le galuega a leoleo po o faatinoga faamiliteli i le taimi o tiute. O le faapa’ū pepe e le o faauigaina o se fasioti tagata i le matalalaga lenei. Afai na afua le oti ona o se faalavelave faafuasei, po o le puipuiga o ia lava po o isi, o le faamutaina ai o le ola o se tagata e ono lē faauigaina o se fasioti tagata. E mafai foi ona moni lenei mea i isi tulaga, e pei o le tapulaa o le malosi faalemafaufau o se tagata.
Fai’aīga Faamalosi. E manaomia se fono o le tagata o le Ekalesia mo le fai’aiga faamalosi. E pei ona faaaogaina i i, o le fai’aīga faamalosi o le faia faamalosi lea o le feusua’iga ma se tasi e le mafai ona tuuina mai se maliega faaletulafono ona o le le lava o le malosi faalemafaufau pe faaletino. E pei ona faaaogaina i i, o le fai’aīga faamalosi e lē aofia ai ni feusua’iga ua loto i ai ni tagata laiti e felāta’i tausaga o le matutua.
Faamaoniaga o le Faaoolima Faalefeusua’i. E manaomia se fono o le tagata o le Ekalesia pe afai ua faamaonia se faaoolima faalefeusua’i o se tagata o le Ekalesia.
Sauaina o se Tamaitiiti po o se Talavou. E manaomia se fono o le tagata o le Ekalesia pe afai e sauaina e se tagata se tamaitiiti po o se talavou e pei ona faamalamalama atu i le 38.6.2.3.
Sauaina o se Toalua po o se Isi Tagata Matua. E tele ituaiga o matuia i amioga faasaua. Tagai i le 38.6.2.4 mo le taimi e manaomia ai se fono o se tagata o le Ekalesia mo le sauaina o se toalua po o se isi tagata matua.
Amioga Saua Faatautala e Faamalieina ai Tuinanau. E manaomia se fono o le tagata o le Ekalesia pe afai e faifai pea e se tagata matua le faamanu’alia faaletino o tagata e ala i amioga faasaua ma o se faamata’u i isi.
32.6.1.2
Feusua’iga Lē Mamā
Mataifale po o le Toe Ui i Fanau. E manaomia se fono o le tagata o le Ekalesia mo le mataifale po o le toe ui i fanau e pei ona faauigaina i le 38.6.10. O le soloia o se tagata mai le avea ai ma se tagata o le Ekalesia e toetoe ina a manaomia i taimi uma.
Ponokalafi po o Ata Mataga o Fanau. E manaomia se fono o le tagata o le Ekalesia pe afai ua aafia se tagata i ponokalafi po o ata mataga o fanau e pei ona otooto atu i le 38.6.6.
Autaunonofo. E manaomia se fono o le tagata o le Ekalesia pe afai ua faia ma le iloa e se tagata se autaunonofo. O nisi autaunonofo e ono faia faalilolilo, ma le lē iloa e se toalua o se mea e uiga i se tasi po o isi toalua. E manaomia le soloia o se tagata mai le avea ma tagata o le Ekalesia pe afai e faia ma le iloa e se tagata se autaunonofo.
Amioga Faatautala Faalefeusua’i e Faamalieina ai Tuinanau. E manaomia se fono o le tagata o le Ekalesia pe afai e faifai pea e se tagata matua le faamanu’alia faalefeusua’iga o tagata ma o se faamata’u i isi.
32.6.1.3
Amioga Taufaasese
Amioga Faatautala i Mea Tautupe e Faamalieina ai Tuinanau. E manaomia se fono o le tagata o le Ekalesia pe afai e i ai se talaaga o se tagata matua i le faaleaga pea lava pea o tagata i mea tautupe, ma o se faamata’u i isi (tagai i le 38.6.2.4). E aofia ai i lea mea teugatupe taufaasese ma isi gaoioiga faapena. O gau e le’i faamoemoeina o mea tautupe ona o tulaga o le tamaoaiga e lē faitauina o se taufaasese. Afai ua aofia ai se tagi i le tulafono, e mafai ona filifili ia taitai perisitua e faatali se’ia maua se i’uga o le faamasinoga. Tagai i le 32.6.3.3 pe afai sa aafia se tagata o le ekalesia i le faaaogaina sese o tupe po o meatotino a le Ekalesia.
32.6.1.4
Soliga o le Faatuatuaga
Solitulafono Matuia A o Umia se Tofiga Lauiloa o le Ekalesia. E manaomia se fono o le tagata o le Ekalesia pe afai e soli e se tagata o le Ekalesia se agasala matuia a o umia se tofiga lauiloa. E aofia ai se Pulega Aoao, Taitai Aoao o le Ekalesia, Fitugafulu Eria, peresitene po o le faatina o le malumalu, peresitene o le misiona po o lana soa, peresitene o le siteki, peteriaka, po o se epikopo. E lē faatatau lenei mea i peresitene o paranesi. Peitai, e mafai ona tapuia’ia pe soloia avanoa o se peresitene o le paranesi mai le avea ma tagata o le Ekalesia i le ala lava e tasi e faapei foi o isi tagata o le Ekalesia.
32.6.1.5
O Nisi o Amioga
Solitulafono Matuia e Faamaonia. E manaomia se fono o le tagata o le Ekalesia i le tele o tulaga pe a faamaonia se solitulafono matuia a se tagata.
32.6.2
Taimi e Ono Tatau Ai se Fono o le Tagata o le Ekalesia
E ono tatau se fono o le tagata o le Ekalesia i tulaga nei.
32.6.2.1
Amioga Faasaua ma Sauaga
Na poloai mai le Alii, “Aua e te … fasioti tagata, pe e te faia soo se mea faapena” (Mataupu Faavae ma Feagaiga 59:6; faaopoopo le faatusilima). O amioga faasaua ma sauaga lea e ono tatau ai se fono o le tagata o le Ekalesia, e aofia ai (ae le ona pau ai lea) mea o loo lisi atu i lalo.
Fasioti Tagata Taufuafuaina. Taumafai ma le loto i ai e fasioti se tagata.
Sauaga Faalefeusua’iga, e Aofia Ai le Faaoolima ma le Taufaamata’u. O sauaga faalefeusua’iga ua aofia ai se vaega lautele o faatinoga (tagai i le 38.6.18). E ono tatau ai se fono o le tagata o le Ekalesia mo se tagata ua faaoolima faalefeusua’iga pe sauaina foi se tasi. O le a sili atu ona manaomia se fono e fesoasoani ai i se tagata o le ekalesia ia salamo pe afai ua solia e ia feagaiga o le malumalu pe sa fai soo foi le agasala. Tagai i le 38.6.18.3 mo le taimi e manaomia ai se fono.
Sauaina o se Toalua po o Se Isi Tagata Matua. E tele ituaiga o matuia i amioga faasaua (tagai i le 38.6.2.4). E ono tatau ona faia se fono o le tagata o le Ekalesia mo se tagata sa sauaina se toalua po o se isi tagata matua. O le a sili atu ona manaomia se fono e fesoasoani ai i se tagata o le ekalesia ia salamo pe afai ua solia e ia feagaiga o le malumalu pe sa fai soo foi le agasala. Tagai i le 38.6.2.4 mo le taimi e manaomia ai se fono.
32.6.2.2
Feusua’iga Lē Mamā
O le tulafono o le ola mamā (legavia) a le Alii, o le aloese lea mai sootaga o feusua’iga i fafo atu o se faaipoipoga faaletulafono i le va o se alii ma se tamaitai (tagai i le Esoto 20:14; Mataupu Faavae ma Feagaiga 63:16). E ono tatau ai se fono o le tagata o le Ekalesia mo feusua’iga lē mamā e pei ona faamalamalama atu i le 38.6.5. I nei tulaga, o le a sili atu na ono manaomia se fono e fesoasoani ai i se tagata o le ekalesia ia salamo pe afai ua ia solia feagaiga o le malumalu pe sa fai soo foi le agasala. Tagai i le 32.6.1.2 mo le taimi e manaomia ai se fono.
32.6.2.3
Amioga Taufaasese
Ua a’oa’o mai Tulafono e Sefulu, “Aua e te gaoi” pe “molimau pepelo” (Esoto 20:15–16). E ono tatau ai se fono o le tagata o le Ekalesia mo amioga e pei o le faomea, talepe fale, gaoi, faaaoga sese o tupe, tauto pepelo, ma le taufaasese. I nei tulaga, o le a sili atu na ono manaomia se fono e fesoasoani ai i se tagata o le ekalesia ia salamo pe afai ua ia solia feagaiga o le malumalu pe sa fai soo foi le agasala.
Tagai i le 32.6.1.3 mo le taimi e manaomia ai se fono mo amioga taufaasese. Tagai i le 32.6.3.3 pe afai sa aafia se tagata o le ekalesia i le faaaogaina sese o tupe po o meatotino a le Ekalesia. Tagai i le 38.8.2mo le taufaasese ma le loto i ai.
32.6.2.4
Soliga o le Faatuatuaga
E ono tatau ai se fono o le tagata o le Ekalesia pe afai o se tagata o le Ekalesia:
-
Ua soli se agasala matuia a o umia se tofiga o le pule po o se faatuatuaga i le Ekalesia po o le alalafaga.
-
Ua solia se agasala matuia ua iloa e le toatele.
I nei tulaga, o le a sili atu ona ono manaomia se fono e fesoasoani ai i se tagata o le ekalesia ia salamo pe afai ua ia solia feagaiga o le malumalu pe sa fai soo foi le agasala.
Tagai i le 32.6.1.4 mo le taimi e manaomia ai se fono. Tagai i le 32.6.3.3 pe afai sa aafia se tagata o le ekalesia i le faaaogaina sese o tupe po o meatotino a le Ekalesia.
32.6.2.5
O Nisi o Amioga
Na aoao mai le Tupu o Peniamina, “E lē mafai ona ou taʼu atu ia te outou mea uma e mafai ona outou faia ai le agasala; ona ua tele ala ma auala eseese, ua matua tele lava e lē mafai ona ou faitauina“ (Mosaea 4:29). E ono tatau ai se fono pe afai o se tagata:
-
Ua faaalia se mamanu o le solia o agasala matuia (tagai i le Mataupu Faavae ma Feagaiga 82:7).
-
Ua lafoaia ma le loto i ai ia tiute faaleaiga, e aofia ai ma le lē totogia o le lagolagoina ma le tausiga o le fanau.
-
Taufaamata’u atu ni sauaga faaletino, pe faia patino po o i luga o le initoneti (tagai i le 32.2.1).
-
Faatauina atu o fualaau faasaina.
-
Faia o isi amioga matuia faasolitulafono.
I nei tulaga, o le a sili atu ona ono manaomia se fono e fesoasoani ai i se tagata o le ekalesia ia salamo pe afai ua ia solia feagaiga o le malumalu pe sa fai soo foi le agasala.
E ono tatau ai se fono mo le tagata o le Ekalesia pe afai o le tagata o le Ekalesia ua gauai atu, faatino, fuafua, totogi, pe uunaia se faapa’ūina o se pepe. Tagai i le 38.6.1 mo taiala.
Pe A Manaomia se Fono o le Tagata o le Ekalesia pe Atonu e Ono Tatau Ai Foi
|
Ituaiga o Agasala |
E Manaomia le Fono o le Tagata o le Ekalesia (tagai i le 32.6.1) |
Atonu e Ono Tatau Ai se Fono o le Tagata o le Ekalesia (tagai i le 32.6.2) |
|---|---|---|
Ituaiga o Agasala Amioga Faasaua ma Sauaga | E Manaomia le Fono o le Tagata o le Ekalesia (tagai i le 32.6.1)
| Atonu e Ono Tatau Ai se Fono o le Tagata o le Ekalesia (tagai i le 32.6.2) |
Ituaiga o Agasala Feusua’iga Lē Mamā | E Manaomia le Fono o le Tagata o le Ekalesia (tagai i le 32.6.1)
| Atonu e Ono Tatau Ai se Fono o le Tagata o le Ekalesia (tagai i le 32.6.2)
|
Ituaiga o Agasala Amioga Taufaasese | E Manaomia le Fono o le Tagata o le Ekalesia (tagai i le 32.6.1)
| Atonu e Ono Tatau Ai se Fono o le Tagata o le Ekalesia (tagai i le 32.6.2)
|
Ituaiga o Agasala Soliga o le Faatuatuaga | E Manaomia le Fono o le Tagata o le Ekalesia (tagai i le 32.6.1)
| Atonu e Ono Tatau Ai se Fono o le Tagata o le Ekalesia (tagai i le 32.6.2)
|
Ituaiga o Agasala O Nisi o Amioga | E Manaomia le Fono o le Tagata o le Ekalesia (tagai i le 32.6.1)
| Atonu e Ono Tatau Ai se Fono o le Tagata o le Ekalesia (tagai i le 32.6.2)
|
32.6.3
Taimi e Fefautuaa’i ai le Peresitene o le Siteki ma le Au Peresitene o le Eria Pe Ua Tatau Ai se Fono o le Tagata o le Ekalesia po o Isi Faai’uga
O nisi o mataupu e manaomia ai se nofouta ma se taitaiga faaopoopo. Ina ia iloa le auala sili ona lelei e fesoasoani atu ai, e tatau i le peresitene o le siteki ona fefautuaa’i ma le Au Peresitene o le Eria e uiga i tulaga o loo i le vaega lenei. Peitai, e na o le peresitene o le siteki e faia le tonu pe tatau ona faia se fono e talanoaina ai le amio. Afai e faia se fono, e fai e le peresitene o le sieki po o le epikopo le faai’uga.
Afai e faia se fono o le tagata o le Ekalesia mo se tasi o mataupu o loo otooto atu i le vaega lenei, o le faai’uga o le fono e tatau ona “tumau i se tulaga lelei,” “tapuia’iga mamafa o le avea ma tagata o le Ekalesia,” po o le “soloia mai le avea ma tagata o le Ekalesia.” E manaomia le faamaoniga a le Au Peresitene Sili e aveesea ai tapuia’iga mamafa po o le toefaaulufale mai o le tagata i le Ekalesia (tagai i le 32.16.1, numera 9).
32.6.3.1
O Isi Faai’uga
Afai e lē faia se fono o le tagata o le Ekalesia, o isi faai’uga e mafai ona aofia ai:
-
Tapuia’iga māmā o le avea ma tagata o le Ekalesia (tagai i le 32.8.3).
-
Faamatalaga faaopoopo i pepa faamaumau (tagai i le 32.14.5).
-
Tapuia’iga mai sauniga, ia e tapu ai se tagata mai le mauaina pe faaaogaina le perisitua po o le mauaina pe faaaogaina se pepa faataga o le malumalu.
E fefautuaa’i le peresitene o le siteki ma le Au Peresitene o le Eria a o le’i faatinoina se tasi o nei faai’uga.
32.6.3.2
Liliuese
O faafitauli o le liliuese e tele ina i ai se aafiaga i talaatu o tuaoi o se uarota po o le siteki. E manaomia ona vave talanoaina ina ia puipuia ai isi.
E fefautuaa’i le epikopo ma le peresitene o le siteki pe afai na te lagonaina o se faai’uga mo se tagata o le Ekalesia e ono tulai mai ai se liliuese. E mafai e le epikopo po o le peresitene o le siteki ona tuu le tapuia’iga māmā mai le avea ma tagata o le Ekalesia i luga o le tagata (tagai i le 32.8.3). E vave ona fefautuaa’i le peresitene o le siteki ma le Au Peresitene o le Eria. Peitai, e na o le peresitene o le siteki e faia le tonu pe ua tatau ai se fono o le tagata o le Ekalesia po o se isi faai’uga.
E pei ona faaaogaina i i, o le liliuese e faasino i se tagata o le Ekalesia ua auai i soo se tasi o mea nei:
-
Faatinoina pea lava pea i le manino ma le loto i ai o le tetee faalaua’itele i le Ekalesia, o ona aoaoga faavae, o ana aiaiga faavae, po o ona taitai
-
Faifai pea le a’oa’o atu e fai ma aoaoga faavae o le Ekalesia ia mea e le o se aoaoga faavae o le Ekalesia, ae ua uma ona faasa’oina e le epikopo po o le peresitene o le siteki
-
Faaalia o se mamanu o le galue ma le faamoemoe e faavaivaia le faatuatua ma le toaaga o tagata o le Ekalesia
-
Faaauau pea ona mulimuli i aoaoga a vaega ua liliuese ae ua uma ona faasa’oina e le epikopo po o le peresitene o le siteki
-
Ua auai aloa’ia i se isi ekalesia ma faalauiloa atu ona aoaoga (O le matuai lē to’aga mai i le Lotu pe auai foi i se isi ekalesia, e lē tulai mai ai na o lena mea le liliuese. Peitai, afai ua auai aloa’ia se tagata o le Ekalesia i se isi ekalesia ma lagolagoina ona a’oa’oga, e ono tatau ai loa ona soloia lona avea ai ma tagata o le Ekalesia.)
Na a’oa’o atu e le Faaola ia sa Nifaē e faapea, e tatau ona latou auauna atu pea i se tagata ua agasala. “Ae afai e le salamo o ia, ia le faitauina o ia faatasi ma ou tagata, ina ia le faaumatia e ia ou tagata” (3 Nifae 18:31).
32.6.3.3
Faaaoga Sese o Tupe a le Ekalesia
Afai e faaaoga sese e se tagata o le ekalesia ia tupe a le Ekalesia, pe gaoia meatotino taua a le Ekalesia, e fefautuaa’i le peresitene o le siteki ma le Au Peresitene o le Eria pe ua tatau ai se fono o le tagata o le Ekalesia po o se isi faatinoga. E iloiloina e taitai:
-
Le aofa’iga o le tupe na faaaoga sese pe gaoia.
-
Pe o le faaaoga sese sa na o le tasi le taimi na tupu ai pe sa tupu soo.
-
Pe ua toetotogi.
-
Le tulaga o le salamo o le tagata.
-
O le tofiga o loo umia e le tagata o le ekalesia (tagai i le 32.6.1.4 mo tagata o le ekalesia o loo umia se tofiga iloga o le Ekalesia).
E lipoti atu e le peresitene o le siteki se tasi o mea nei i le Punaoa mo Taitai ma Failautusi:
-
O taunuuga o se fono o le tagata o le Ekalesia
-
Sa ia fefautuaai ma le Au Peresitene o le Eria ma filima’oti ai e le manaomia se fono o le tagata o le Ekalesia
Afai e filimaoti e le Matagaluega Suetusi a le Ekalesia ua faaaoga sese e se taitai po o se tagata faigaluega a le Ekalesia ia tupe po o meatotino a le Ekalesia, e masani lava ona faatonu e le Au Peresitene Sili o le a faaopoopo i ai se faamatalaga i lona pepa faamaumau. O le “Taitai” ua faauigaina o se tagata o loo umia se tofiga iloga o le Ekalesia, faapea foi ma fesoasoani, failautusi, ma au peresitene o paranesi. A oo ina faamae’a le salamo, e mafai e le peresitene o le siteki ona talosagaina le aveesea o faamatalaga faaopoopo (tagai i le 32.14.5 ma le 34.7.5). O se faamatalaga faaopoopo e le faapea ua faia ai se fono o le tagata o le Ekalesia po o se isi faatinoga.
32.6.3.4
O Tagata Ua Faailoa Mai o se Tagata ua Faafoliga i le Itupa Faafeagai
O epikopo ma peresitene o siteki e galulue ma tagata ua faailoa mai ua faafoliga i le itupa faafeagai, e tatau ona mulimuli i taiala o loo i le 38.6.23.
32.6.4
O Taimi e Lē Masani Ona Tatau Ai se Fono o le Tagata o le Ekalesia
E lē masani ona tatau ai se fono o le tagata o le Ekalesia i tulaga o loo ta’ua i lalo.
32.6.4.1
O Le Lē Tausisia o Nisi o Tulaga Faatonuina o le Ekalesia
E lē faia se fono o le tagata o le Ekalesia mo faatinoga o loo lisi atu i lalo. Peitai, matau le tuusaunoaga i le aitema mulimuli.
-
Lē to’aga i le Lotu
-
Lē faataunuuina o tiute faale-Ekalesia
-
Lē totogiina o le sefuluai
-
Agasala o le lē faia
-
Militino/Pule i le Tino
-
Lē tausia o le Upu o le Poto
-
Faaaogaina o ponokalafi, vagana ai ponokalafi po o ata mataga o fanau (e pei ona otooto atu i le 38.6.6) po o le malosi ma le lē pulea o le faaaogaina o ponokalafi ua afua ai se faatauma’oiga tele i se faaipoipoga po o le aiga o se tagata o le Ekalesia (e pei ona otooto atu i le 38.6.13).
32.6.4.2
O le Gau o le Pisinisi po o le Lē Totogiina o Aitalafu
E lē tatau i taitai ona faaaogaina fono o tagata o le Ekalesia e fo’ia ai ni fe’ese’esea’iga tau pisinisi. O le gau o pisinisi ma le lē totogiina o aitalafu, e le o ni mafuaaga ia e faia ai se fono o le tagata o le Ekalesia. Peitai, e tatau ona faia se fono mo gaoioiga taufaasese matuia po o isi faiga taufaasese matuia tautupe (tagai i le 32.6.1.3).
32.6.4.3
Fe’ese’esea’iga i Mataupu Faalemalo
E lē faia ni fono o tagata o le Ekalesia e fo’ia ai ni fe’ese’esea’iga faalemalo (tagai i le Mataupu Faavae ma Feagaiga 134:11).
32.7
Tulaga o le Tagata
Na fetalai mai le Alii, “Ua faaloaloa atu ia te outou lo’u lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au” (3 Nifae 9:14). O tulaga o i ai se tagata o se iloiloga taua lea i le filimaotiina:
-
O le faatulagaga talafeagai e fesoasoani ai ia te ia ia salamo mai agasala matuia (tagai i le 32.5 ma le 32.6).
-
O faai’uga na faia i fautuaga patino po o fono o tagata o le Ekalesia (tagai i le 32.8 ma le 32.11).
E sailia e epikopo ma peresitene o siteki le mafaufau ma le finagalo o le Alii mo tulaga taitasi. Latou te iloiloina mea moni nei i le filimaotiina pe o le fea faatulagaga e faaaoga ma pe o le a foi le taunuuga o le a i ai. O nei mea moni e le o ta’u mai ai se faai’uga faapitoa. Ae, o ni fesoasoani i se faai’uga e tatau i taitai ona faia ma le lototatalo ma e pei ona taialaina ai e le Agaga.
32.7.1
O Le Telē o le Agasala
O le matuia o se agasala e fua i lona telē. E mafai ona aofia ai le aofai ma le faafia ona solia o agasala, o le ogaoga o le manu’a na afua mai ai, ma le numera o tagata na faamanu’alia ai.
32.7.2
Faanaunauga o Lē ua Aafia
E iloiloina e taitai ia faanaunauga o ē ua aafia ma isi. E mafai ona aofia ai le toalua o se tagata ma isi tagata o le aiga. E iloiloina foi e taitai le ogaoga o le manu’a.
32.7.3
Faamaoniga o le Salamo
E manaomia le taitaiga faaleagaga e iloatino ai pe ua salamo faamaoni le tagata. O lena salamo e sili ona faaalia ma le talitonuina e ala i faatinoga amiotonu i le aluga o taimi nai lo le faanoanoa loloto i le taimi o se faatalanoaga e tasi. O mea moni e iloiloina e aofia ai le:
-
Malosi o le faatuatua ia Iesu Keriso.
-
Natura o le ta’uta’u atu.
-
Loloto o le faanoanoa mo le agasala.
-
Toefaalelei ma tagata na faamanu’aliaina.
-
Usitaia o tulaga manaomia faaletulafono.
-
Manuia i le lafoa’ia o le agasala.
-
Faamaoni a’ia’i i le usita’ia o poloaiga talu mai le agasala.
-
Faamaoni i taitai o le Ekalesia ma isi.
-
Naunautaiga e mulimuli i fautuaga a taitai o le Ekalesia.
32.7.4
Soliga o Feagaiga o le Malumalu
Na tautino mai e le Alii, “Aua o ia ua tuu atu i ai mea e tele, e tele mea ua manaomia mai ai” (Mataupu Faavae ma Feagaiga 82:3). O se tagata ua uma ona maua faaeega paia o le malumalu ua osifeagaiga e ola i se tulaga faatonuina maualuga atu. O le solia o nei feagaiga e faateleina ai le matuia o le agasala. E faateleina ai le ono tatau ai o se fono o le tagata o le Ekalesia.
32.7.5
Tulaga o le Faatuatuaina po o le Pule
O le matuia o se agasala e faateleina pe afai na solia e se tagata a o i ai i se tulaga o le faatuatuaina po o le pule, e pei o se matua, taitai, po o se faiaoga.
32.7.6
Faisoo
O le mamanu o le faisoo pea o le agasala matuia lava e tasi e mafai ona ta’u mai ai le amio ua loloto ma maua’a, po o se vaisu e telegese ai le alualu i luma i le salamo moni. E faaopoopo atu i tapuia’iga mai le avea ma tagata o le Ekalesia lea e ono tatau ai, e mafai foi ona fesoasoani tele polokalama mo le toefaaleleia o olaga mai vaisu ma fautuaga faapolofesa (tagai i le 32.8.2).
32.7.7
Tausaga, Matua, ma le Poto Masani
E iloiloina e taitai ia tausaga, le matua, ma le poto masani pe a fautuaina se tagata o le Ekalesia po o le faia foi o se tonu o le taunuuga o se fono o le tagata o le Ekalesia. O le faapalepale e tele ina talafeagai mo i latou o ē le’i lava le matutua i le talalelei. Mo se faataitaiga, e mafai ona talafeagai le faapalepale mo tagata talavou o le Ekalesia o ē o faia amioga le mamā pe afai latou te lafoai le agasala ma faaalia le salamo faamaoni. Peitai, atonu e ono manaomia se faaiuga mamafa atu pe afai latou te faia pea lea amio.
32.7.8
Malosi Faalemafaufau
O gasegase faalemafaufau, vaisu, po o le tapulaa o le malosi faalemafaufau, e le avea lea ma ‘alofaga o se tagata ua solia se agasala matuia. Peitai, o mea moni nei e ao ona iloiloina. I le avea ai ma se vaega o le fesoasoani i se tagata ia salamo, e saili e taitai le taitaiga a le Alii e uiga i le malamalama o le tagata i mataupu faavae o le talalelei ma le tulaga o le mafai ona tali atu mo ia lava.
32.7.9
Ta’uta’u Atu i le Lotofuatiaifo
O se ta’uta’u atu i le lotofuatiaifo ma le faanoanoa faaleatua mo faatinoga a se tasi, e faaalia ai se naunautaiga ia salamo.
32.7.10
Taimi i le va o le Agasala ma le Ta’uta’u Atu
O le ta’uta’u atu o se vaega o le salamo ma e lē tatau ona faatuai. O nisi taimi o se agasala e mulimuli mai ai se vaitau umi o le toefaaleleia ma le ola faamaoni. Afai e ta’uta’u atu e se tagata o le Ekalesia se agasala ma na te le’i toe faia, e mafai ona faaalia i lena mea ua ia lafoa’ia le agasala. I lena tulaga, o le ta’uta’u atu e mafai ona faamae’a ai nai lo le amata ai o le faagasologa o le salamo.
32.7.11
O Agasala e Aofia ai Tagata o le Ekalesia o E Nonofo i Uarota po o Siteki Eseese
O nisi taimi o tagata o le ekalesia o e faia faatasi se agasala matuia e nonofo i uarota eseese po o siteki eseese. I lenei tulaga, e fefautuaai faatasi peresitene o siteki e uiga i le manaomia o tapuiā‘iga o le avea ma tagata o le Ekalesia po o fono o tagata o le Ekalesia. Latou te talanoaina foi pe afai e i ai se taua i tapuia‘iga po o faaiuga o fono e tutusa pe o i ai foi nisi mataupu e ono faailoa mai ai se manaoga mo taunuuga eseese.
FAATAUTAIGA O FAUTUAGA PATINO
32.8
Fautuaga Patino ma Tapuia’iga Māmā mai le Avea ma Tagata o le Ekalesia
O fautuaga patino e tele ina lava lea ma totoe e fesoasoani ai e puipuia isi ma fesoasoani ai i se tagata ia maua le mana faaola o le Togiola a Iesu Keriso e ala i le salamo. O na fautuaga e mafai foi ona fesoasoani i tagata o le Ekalesia e puipuia ai mai nisi agasala matuia. I fautuaga patino, e mafai foi e taitai ona tuuina atu tapuia’iga māmā mai le avea ma tagata o le Ekalesia, e fesoasoani ai i se tagata ia salamo i ni agasala matuia (tagai i le 32.8.3).
E le tatau ona manatu māmā i agasala matuia (tagai i le Mataupu Faavae ma Feagaiga 1:31). O le solia o feagaiga o le malumalu e faateleina ai le ono tatau ai o se fono o le tagata o le Ekalesia (tagai i le 32.7.4).
O loo lisi atu i lalo taiala e fesoasoani ai i taitai ia silafia le taimi atonu ua lava ma totoe ai fautuaga ma tapuia’iga māmā (tagai foi i le 32.7):
-
E le’i solia e se tagata se agasala e ono manaomia ai se fono o le tagata o le Ekalesia (tagai i le 32.6.1).
-
Ua ta’uta’u atu e se tagata i le lotofuatiaifo ma ua salamo faamaoni.
-
Ua salamo se tagata mai se agasala matuia na te le’i faia muamua.
-
O le agasala a se tagata e le’i solia ai feagaiga o le malumalu.
-
E i ai i se tagata ni tulaga taua e tuuitiitia ai.
32.8.1
Fautuaga Patino
O taiala nei e faaaoga pe a fautuaina e se epikopo po o se peresitene o le siteki se tagata e fesoasoani ai ia te ia ia salamo.
-
Fesili mo na o ni faamatalaga e lava e iloilo ai (1) le uiga faaalia o le tagata o le Ekalesia agai i le amioga ua sala ma le (2) o le natura, o le faisoo, ma le umi o le amioga. ‘Aua le fesili mo auiliiliga i talaatu o le mea e tatau ai ina ia malamalama ai i le faafitauli. Aua le faia ni fesili e tulai mai i le fiailoa patino.
-
Fesili pe ua faapefea ona aafia ai isi i le amioga.
-
Taulai i tulaga lelei e faalolotoina ai le liua ma le tautinoga o le tagata i le Alii. Fautuaina le tagata e faia ni faatinoga patino e aumaia ai le suiga o le amio ma suia ai le loto ina ia salamo. Valaaulia o ia e faalatalata i le Faaola, saili Lona malosiaga ma ia lagonaina Lona alofa togiola.
-
Fautuaina gaoioiga faagaeetia e pei o le tatalo, suesue i tusitusiga paia, ma le auai i sauniga a le Ekalesia. Aoao atu o le galuega o talafaasolopito o aiga ma le malumalu e mafai ona faaitiitia ai faatosinaga a le fili. Fautuaina le auauna atu i isi ma le faasoa atu o le talalelei.
-
Fautuaina le toefaaleleiga ma i latou na faamanu’alia i agasala ma talosaga atu mo se faamagaloga
-
Fautuaina le fulitua i tosinaga leaga. Fesoasoani i tagata ia faia faatinoga e puipuia ai ina ia tetee atu ai i faaosoosoga patino.
-
Ia iloa o oe o se taitai faale-ekalesia, ae le o se faufautua faapolofesa. E faaopoopo atu i fautuaga e te tuuina atu, e i ai nisi tagata o le Ekalesia o le a faamanuiaina mai fautuaga tau i le amio. O nisi e mafatia i gasegase faalemafaufau. Pe a manaomia, fautuaina tagata o le Ekalesia e saili fesoasoani mai tagata tomai faapitoa faafomai ma le soifua maloloina faalemafaufau (tagai i le 31.3.6).
-
Ia lototatalo ma saili le taitaiga mai le Agaga a o le’i tuuina atu tapuia’iga māmā mai le avea ma tagata o le Ekalesia. E ono faamanuiaina nisi tagata o le Ekalesia i le faaaogaina atoatoa o avanoa o le avea ai ma tagata o le Ekalesia nai lo le tapuia’ia o i latou.
-
Tulitatao ina ia tuu atu le faamalosi’auga, faamalolosia le malosiaga faaleagaga, ma mata’itū le alualu i luma.
A uma ona ta’uta’u atu e se tagtata o le Ekalesia i se epikopo po o le peresitene o le siteki, e mafai ona faia ni fautuaga tulitatao i ni auala eseese. E mafai ona tuuina atu e le taitai lava ia. Pe, faatasi ai ma le faatagaga a le tagata, e mafai ona ia tofia se tasi o ona fesoasoani na te tuuina atu.
Faatasi ai ma le maliega a le tagata o le Ekalesia, e mafai e se epikopo po o le peresitene o le siteki ona tofia sui auai o le korama a toeaina po o le Aualofa e fesoasoani i ni auala patino. Mo le autalavou, e mafai ona ia tofia le au peresitene o Tamaitai Talavou po o fautua o korama a le Perisitua Arona e fesoasoani i ai. O i latou e tofia e fesoasoani ua i ai le aia tatau i musumusuga e faataunuu ai lena tofiga (tagai i le 4.2.6).
Pe a tofia se tasi e fesoasoani i fautuaga tulitatao, e tuuina atu e le taitai na o faamatalaga tatau e lava e fesoasoani ai i le tagata o le Ekalesia. O le tagata ua tofia e tatau ona tausisia le lē faalaua’iteleina. Na te faailoa atu foi i le epikopo e uiga i le alualu i luma ma manaoga o le tagata o le Ekalesia.
32.8.2
Fesoasoani i Tagata e Talanoaina Vaisu ma le Faaaogaina o Ponokalafi
O nisi taimi o fautuaga patino e aofia ai le fesoasoani i tagata o le Ekalesia ia salamo mai agasala e fesootai pe mafua foi mai vaisu. O nei vaisu e ono aofia ai fualaau po o le tele o ituaiga eseese o amioga. O vaisu ua faatauma’oia ai tagata taitoatasi, faaipoipoga, ma aiga.
E mafai e epikopo ona fautuaina tagata o le ekalesia e saili le fesoasoani mai le Faamalologa e ala i le Faaola: O le Polokalama o le Toe Faaleleia o Olaga mai Aafiaga o Vaisu ma mai tagata tomai faapitoa o le soifua maloloina faafomai ma faalemafaufau. Ua na o le polokalama aloaia a le Ekalesia e tatau ona lagolagoina pe faatino i falelotu o le Ekalesia.
Ua faateleina le taatele o le faaaogaina o ponokalafi. Pe o le faaaogaina o ponokalafi e tele pe o ni isi o taimi, e leaga lava. E tuliesea ai le Agaga. Na te faavaivaia le tomai e utuvai ai mai le mana e maua mai le tausiga o feagaiga. Na te faatauma’oia foi mafutaga faapelepele.
O fautuaga patino ma tapuia’iga māmā mai le avea ma tagata o le Ekalesia, e masani lava ona lava ma totoe lea e fesoasoani ai i se tagata ia salamo mai le faaaogaina o ponokalafi. E le masani ona faia ai ni fono o le tagata o le Ekalesia. Mo tuusaunoaga, tagai i le 38.6.6 ma le 38.6.13. E mafai ona fesoasoani tele fautuaga faapolofesa.
O peresitene o siteki ma epikopo e lagolagoina tagata o le aiga pe a manaomia. E mafai ona faaaofia ai matua pe a fautuaina le autalavou e uiga i le faaaogaina o ponokalafi. E mafai ona faaaofia ai ma le toalua o le tagata pe a fautuaina se tagata ua faaipoipo.
Mo nisi faamatalaga e uiga i le fautuaina o tagata o le Ekalesia o ē ua aafia ai i ponokalafi, tagai i le 38.6.13.
32.8.3
Tapuia’iga Māmā mai le Avea ma Tagata o le Ekalesia
E faaopoopo atu i le uunaiaina o faatinoga lelei pe a tuuina atu fautuaga, e mafai e se epikopo po o le peresitene o le siteki ona tuu atu se tapuia’iga māmā o nisi o avanoa o le avea ai ma tagata o le Ekalesia mo se taimi. O le faatautaia ma le poto, e mafai ai ona fesoasoani nei tapuia’iga i le salamo ma le alualu i luma faaleagaga. Ua manatu i ia vaega e māmā aua e le tusiaina i luga o se pepa faamaumau.
O le umi o tapuia’iga māmā e mafai ona tuu i ai nai vaiaso, ni nai masina, pe umi atu foi pe a tatau ai mo le tagata ina ia salamo atoatoa. I tulaga e le masani ai, e mafai ona umi atu le taimi nai lo le tausaga e tasi.
E sailia e taitai le taitaiga a le Agaga pe o a tapuia’iga o le a sili ona fesoasoani i se tagata ia salamo. E mafai ona aofia ai (ae le ona pau ai lea) le taofia o le avanoa e auauna ai i se valaauga i le Ekalesia, faaaoga le perisitua, po o le ulu atu i se malumalu. E mafai foi e le taitai ona tapu le tagata mai le tuuina atu o se lauga, lesona, po o se tatalo i faatulagaga faale-Ekalesia. Afai e taofia e le taitai le aia tatau e ulu atu ai i se malumalu, na te faalēaogaina le pepa faataga o le malumalu i le Punaoa mo Taitai ma Failautusi (PTF).
O le taumafa i le faamanatuga o se vaega taua lea o le salamo. E lē tatau ona avea ma tapuia’iga muamua e tuuina atu i se tagata ua salamo, o se ua i ai se loto momomo ma le agaga salamo. Peitai, afai na solia e se tagata ni agasala matuia, e mafai e le taitai ona taofia lenei avanoa mo se taimi.
E lē masani ona ta’u atu e taitai i se isi tagata e uiga i tapuia’iga māmā se’i vagana o loo i ai se tulaga manaomia e ao ai ona iloa (tagai i le 32.12.2).
E mafai e le epikopo po o le peresitene o le siteki ona aveesea ia tapuia’iga māmā pe a taialaina ai e le Agaga, pe a faia e le tagata ni tulaga alualu i luma patino e salamo faamaoni ai. Afai e faaauau pea le tagata i le mamanu o le agasala, e ono fesoasoani tele pe ua tatau ai foi ona faia se fono o le tagata o le Ekalesia.
FAATAUTAIGA O FONO O TAGATA O LE EKALESIA
E faia fono o tagata o le Ekalesia pe a fuafua le epikopo po o le peresitene o le siteki e faapea, o le a aoga le fono, pe ua manaomia foi e aiaiga faavae a le Ekalesia (tagai i le 32.6). E faia i le tulaga o le uarota, siteki, paranesi, itu, po o le misiona. O le vaega lenei o loo tuuina atu ai faamatalaga e uiga i le auala e faatautaia ai fono.
32.9
Auai i le Faatinoga ma le Tiutetauave
O le siata lea o loo faaalia ai pe o ai e masani ona auai i le faatinoga o fono o tagata o le Ekalesia.
|
Tagata e Auai i Fono o Tagata o le Ekalesia | |
|---|---|
|
Fono o le Tagata o le Ekalesia i le Uarota | Tagata e Auai i Fono o Tagata o le Ekalesia
|
|
Fono o le Tagata o le Ekalesia i le Siteki | Tagata e Auai i Fono o Tagata o le Ekalesia
|
32.9.1
Peresitene o le Siteki
O le peresitene o le siteki:
-
Ua i ai le pule e faamalumalu ai i fono o tagata o le Ekalesia i le siteki; peitai, o le tele o nei fono e faia e epikopo.
-
E tatau ona tuuina atu le faamaoniga a o le’i mafai e se epikopo ona faia se fono o le tagata o le Ekalesia.
-
E faia se fono o le tagata o le Ekalesia i le siteki pe afai o se alii po o se tamaitai ua maua faaeega paia o le malumalu, o le a foliga mai e ono soloia mai le avea ma tagata o le Ekalesia.
-
E mafai ona faia se fono pe afai e apili e se tagata o le Ekalesia le faai’uga o se fono o le tagata o le Ekalesia i le uarota.
-
E tatau ona tuuina atu le faamaoniga a o le’i tāmauina se faai’uga o se fautuaga a le fono o le tagata o le Ekalesia i le uarota e soloia le tagata e le’i mauaina ona faaeega paia mai le avea ma tagata o le Ekalesia.
32.9.2
Fautua Maualuga
O sui auai o fautua maualuga e le masani ona auai i le faatinoga o fono o tagata o le Ekalesia i le siteki. Peitai, e mafai ona auai ai fautua maualuga i tulaga faigata (tagai i le Mataupu Faavae ma Feagaiga 102:2). Mo se faataitaiga, e mafai e le au peresitene o le siteki ona valaaulia ia fautua maualuga e auai ai pe afai:
-
E i ai ni mea moni o finauina.
-
Latou te faaopoopo atu i ai le taua ma le paleni.
-
E talosagaina e le tagata lo latou auai ai.
-
O loo aafia ai se uso o le au peresitene o le siteki po o lona aiga (tagai i le 32.9.7).
32.9.3
Epikopo (po o le Peresitene o le Paranesi i se Siteki)
O le epikopo:
-
E i ai le pule e faamalumalu ai i fono o tagata o le Ekalesia i le uarota.
-
E feutaga’i ma le peresitene o le siteki ma maua mai ai lana faamaoniga a o le’i faia se fono.
-
E le mafai ona ia faia se fono pe afai o se alii po o se tamaitai ua maua ona faaeega paia o le a foliga mai e ono soloia lona avea ma tagata o le Ekalesia. E tatau ona fai se fono o le tagata o le Ekalesia i le siteki i tulaga na.
-
E mafai ona valaaulia e auai i se fono o le tagata o le Ekalesia i le siteki mo se tagata o le uarota ua toe iloiloina lona avea ma tagata o le Ekalesia. O lona auai ai e tatau ona faamaoniaina e le peresitene o le siteki ma le tagata.
E mafai e se fono o le tagata o le Ekalesia i se uarota po o se paranesi ona fautuaina le soloia o se tagata mai le avea ma tagata o le Ekalesia pe afai e le’i maua ona faaeega paia. Peitai, e manaomia le faamaoniga a le peresitene o le siteki a o le’i tāmauina le faai’uga.
O nisi taimi e faia ai se fono o le tagata o le Ekalesia i le uarota mo se tagata ua maua faaeega paia ae faaalia ai i taualumaga le ono soloia o le tagata mai le avea ma tagata o le Ekalesia. I nei tulaga, e pasi atu e le epikopo le mataupu i le peresitene o le siteki.
32.9.4
Peresitene o le Misiona
O le peresitene o le misiona:
-
E i ai le pule e faamalumalu ai i fono o tagata o le Ekalesia i paranesi ma itu o le misiona.
-
E tatau ona tuuina atu le faamaoniga a o le’i mafai e le peresitene o le itu po o le peresitene o le paranesi ona faia se fono o se tagata o le Ekalesia.
-
E faia se fono o le tagata o le Ekalesia pe afai o se alii po o se tamaitai ua maua faaeega paia o le malumalu ua foliga mai o le a soloia o ia mai le avea ma tagata o le Ekalesia. Afai e le mafai lenei mea ona o le taimi po o le mamao, e mafai ona ia tofia se tasi o ona fesoasoani e pulefaamalumalu i le fono. Na te tofia nisi se toalua e umia le Perisitua Mekisateko e auai ai.
-
I nofoaga e mafai ai, e faia ia fono o tagata o le Ekalesia mo i latou e le’i maua faaeega paia. Afai e le mafai lenei mea ona o le taimi po o le mamao, e mafai ona ia faatagaina ni alii se toatolu e umia le Perisitua Mekisateko e faia. I le tulaga lea, e masani ona faatautaia le fono e le peresitene o le itu po o le peresitene o le paranesi a le tagata.
-
E mafai ona faia se fono pe afai e apili e le tagata le faai’uga o se fono o le tagata o le Ekalesia i le itu po o le paranesi.
-
Faatasi ai ma se faamaoniga a se Pulega Aoao mai le Matagaluega o Faifeautalai, e faia ai se fono o le tagata o le Ekalesia pe afai e soli e se faifeautalai se agasala matuia i totonu o le galuega faamisiona (tagai i le 32.9.8). Na te iloiloina foi le mataupu faatasi ma se uso o le Au Peresitene o le Eria ma fefautuaa’i ma le peresitene o le siteki a le faifeautalai.
-
E tatau ona tuuina atu le faamaoniga a o le’i tāmauina se fautuaga a se fono o le tagata o le Ekalesia i le paranesi po o le itu, ina ia soloia se tagata e le’i maua faaeega paia mai le avea ai ma tagata o le Ekalesia.
Afai e ta’uta’u atu e se faifeautalai se agasala matuia sa ia faia a o le’i auauna i se misiona, e faafesootai e le peresitene o le misiona lona sui i totonu o le misiona i le Matagaluega o Faifeautalai mo se taitaiga.
Pe a faia e se peresitene o le misiona se fono o le tagata o le Ekalesia, na te tofia ni alii se toalua e umia le Perisitua Mekisateko e fesoasoani ia te ia. E na o tulaga e lē masani ai e tatau ai ona ia tofia ni faifeautalai talavou e fesoasoani atu. E mulimuli o ia i faiga faavae e tasi e pei ona faia ai fono o tagata o le Ekalesia i le siteki (tagai i le 32.10). Peitai, e lē auai ai se fautua maualuga po o se fautua o se itu.
32.9.5
Peresitene o le Itu po o le Paranesi i totonu o se Misiona
E mafai e se peresitene o le itu po o le paranesi i totonu o se misiona ona faia se fono o le tagata o le Ekalesia pe a faatagaina ai e le peresitene o le misiona. E lē auai ai fautua o le itu.
E mafai ona fautuaina e se fono o le tagata o le Ekalesia i le itu po o le paranesi le soloia [o se tasi] mai le avea ma tagata o le Ekalesia pe afai e le’i maua ona faaeega paia o le malumalu. Peitai, e manaomia le faamaoniga a le peresitene o le misiona a o le’i tāmauina le faai’uga.
32.9.6
Failautusi a le Siteki po o le Uarota
O le failautusi a le siteki po o le uarota:
-
E tausia faamatalaga tusitusia o le fono mo le umi e tatau ai ina ia auina atu ai le fomu o le Lipoti o le Fono o le Tagata o le Ekalesia.
-
E sauniaina le fomu pe afai e talosagaina ai e le taitai o lē na faatautaia le fono.
-
E lē faia sona sao i le talanoaga po o le faai’uga i le fono.
32.9.7
Auai Ai i Tulaga e Lē Masani Ai
Afai e le mafai ona auai mai se fesoasoani o le au peresitene o le siteki i se fono o le tagata o le ekalesia, e talosagaina e le peresitene o le siteki se fautua maualuga po o se isi faitaulaga sili e nofoia lona nofoa. Afai e le mafai ona auai le peresitene o le siteki, e mafai e le Au Peresitene Sili ona faatagaina se tasi o ona fesoasoani e pulefaamalumalu i lona tulaga.
Afai e le mafai ona auai se fesoasoani o le au epikopo, e mafai e le epikopo ona talosaga atu i se faitaulaga sili i totonu o le uarota e nofoia le nofoa o le fesoasoani. Afai e le mafai ona auai le epikopo, na te tuuina atu le mataupu i le peresitene o le siteki, o le na te taloina se fono o tagata o le siteki. E le mafai e le epikopo ona tofia se fesoasoani e taloina se fono o le tagata o le ekalesia.
Afai e faia se fono o le tagata o le Ekaleisa mo se tagata o le aiga o le epikopo po o se tasi o ona fesoasoani, e faia i luga i le siteki. Afai e faia mo se tagata o le aiga o se tasi o fesoasoani o le peresitene o le siteki, e tofi e le peresitene o le siteki se tasi faitaulaga sili e se’ei i le tulaga o le fesoasoani. Afai e faia se fono mo se tasi o le aiga o le peresitene o le siteki, e feūtaga’i o ia ma le Ofisa o le Au Peresitene Sili.
Afai e teena e se tagata le auai ai o le epikopo po o ona fesoasoani, e faia le fono o le tagata o le Ekalesia i luga i le siteki. Afai e teena e se tagata le auai ai o se tasi o fesoasoani o le peresitene o le siteki, e tofia e le peresitene o le siteki se isi faitaulaga sili e se’ei i le tulaga o le fesoasoani. Afai e teena e le tagata le auai ai o le peresitene o le siteki, pe lagona foi e le peresitene o le siteki e faapea e lē mafai ona ia lē faaitu’au, e feūtaga’i o ia ma le Ofisa o le Au Peresitene Sili.
32.9.8
Filimaotiina Pe O Ai le Taitai e Faia se Fono i Tulaga Faapitoa
O fono o tagata o le Ekalesia e toetoe o taimi uma lava e faia ai i le iunite o le faataatiaga faalefaafanua a le Ekalesia o loo i ai pepa faamaumau o le tagata.
O nisi taimi e tatau ai ona faia se fono o le tagata o le Ekalesia mo se tagata ua masii ese. Afai o masii i totonu o le siteki lava e tasi, e feūtaga’i le peresitene o le siteki ma epikopo o uarota uma e lua ma fai ai le tonu pe o fea e tatau ona faia ai.
Afai e masii i fafo atu o le siteki le tagata, e feūtaga’i peresitene o siteki uma e lua ma fai ai le tonu pe o fea e tatau ona faia ai le fono. Afai e tonu ia i la’ua e tatau ona faia i le uarota po o le siteki talu ai, e tuu ai pea lava pepa faamaumau i le uarota lena se’ia mae’a le fono. A leai, e auina atu pepa faamaumau i le uarota fou. E faailoa atu ma le lē faalaua’iteleina e le epikopo po o le peresitene o le siteki i le epikopo po o le peresitene o le siteki i le taimi nei o le tagata, le mafuaaga ua manaomia ai se fono.
O nisi taimi e tatau ai se fono o le tagata o le Ekalesia mo se tagata auai o loo nofo ese mai le aiga mo se taimi lē tumau. Mo se faataitaiga, e ono manaomia se fono mo se tagata a’oga po o se tagata o le Ekalesia o loo i le militeli. O le epikopo o loo i le mea o loo nofo ai le tagata mo se taimi lē tumau, e mafai ona ia tuuina atu le fautuaga ma le lagolago. Peitai, e lē tatau ona ia faia se fono o le tagata o le Ekalesia se’i vagana o i ai pepa faamaumau i lana iunite ma ua uma ona la fefautuaa’i ma le epikopo o le uarota tumau.
O nisi taimi e soli ai e se faifeautalai se agasala matuia i totonu o le misiona, ae sa le’i faaalia se’ia mae’a ona faamalolo mai o ia. E feūtaga’i le epikopo ma le peresitene o le siteki pe o ai o i la’ua e faia le fono o le tagata o le Ekalesia. O se tasi o i la’ua e feūtaga’i ma le peresitene o le misiona talu ai a o le’i faia.
32.10
Faiga Faavae mo Fono o Tagata o le Ekalesia
32.10.1
Tuuina Atu le Faasilasilaga ma Saunia mo le Fono
E tuuina atu e le epikopo po o le peresitene o le siteki i se tagata o le Ekalesia se faasilasilaga tusitusia e uiga i se fono o le tagata o le Ekalesia o le a faia mo ia. Na te sainia le tusi. E aofia ai faamatalaga nei:
“Ua faia e le [au epikopo po o le au peresitene o le siteki] se fono o le tagata o le Ekalesia mo oe. O le a faia le fono i le [aso ma le taimi] i le [nofoaga].
“O lenei fono o le a lauiliuina ai [aotele le amio na sese i ni faaupuga lautele, ae ‘aua ne’i ta’uina ai ni au’ili’iliga po o ni faamaoniga].
“Ua valaaulia oe e te susū mai i le fono e tuuina mai lau tali. E mafai ona e tuuina mai ni faamatalaga tusitusia mai tagata e mafai ona tuuina mai ni faamatalaga talafeagai. E mafai ona e valaaulia na tagata e saunoa i le fono mo oe, pe afai e vave faamaonia e le peresitene o le siteki po o le epikopo. E mafai foi ona e valaaulia [le peresitene o le Aualofa a le uarota po o le peresitene o le korama a toeaina] e auai ai ma tuuina atu le lagolago.
“Soo se tasi e auai ai e tatau ona naunau e usitaia le natura faaaloalo o le fono, e aofia ai ona faiga faavae ma le lē faalaua’iteleina. O loia ma le au lagolago e ese mai ia i latou na ta’ua i luga e lē mafai ona i ai.”
O se parakalafa faai’u e mafai ona aofia ai se faailoaga o le alofa, faamoemoe, ma le popolega.
O taiala pe o ai le tagata e ono valaaulia e saunoa i le fono o loo tuuina atu i le 32.10.3, numera 4.
Afai e lē mafai ona tilivaina patino le tusi i le tagata, e mafai ona auina atu i se meli puipuia pe ua lesitalaina, faatasi ai ma se talosaga e faailoa mai ai ua maua.
E faatulaga e le epikopo po o le peresitene o le siteki le fono o le tagata o le ekalesia i se taimi e talafeagai mo le tagata. Na te faamautinoaina foi na i ai se taimi e maua mai ai faamatalaga mai tagata na aafia i le amio na sese pe afai latou te mananao e tuuina mai (tagai i le 32.10.2).
E saunia e le epikopo po o le peresitene o le siteki le tagata mo le fono e ala i le faamalamalamaina o lona faamoemoega ma faiga faavae. Na te faamalamalama atu foi i ai ia faai’uga e ono oo i ai le fono ma o latou taunuuga. Afai na ta’uta’u atu e se tagata le agasala, e faamalamalama atu i ai e le taitai o le a manaomia ona faaaoga lea ta’uta’u atu i le fono o le tagata o le ekalesia.
32.10.2
Maua Mai o Faamatalaga mai Tagata na Aafia
Afai o se tagata o le Ekalesia ua aafia (e pei o le mataifale po o le toe ui i fanau, sauaina o fanau, sauaina o le toalua, po o le taufaasese), e faafesootai e le epikopo po o le peresitene o le siteki le epikopo po o le peresitene o le siteki a lena tagata o loo i ai i lea taimi. E filimaoti e nei taitai pe o le a fesoasoani le tuu atu o se avanoa i le tagata ua aafia e tuuina mai ai se faamatalaga tusitusia e uiga i le amio na sese ma ona aafiaga. O faamatalaga nei e mafai ona faitauina i se fono o le tagata o le Ekalesia (tagai i le 32.10.3, numera 3). E lē i ai i taitai o le Ekalesia se pule e amatalia ai ona faafesootai ia tagata ua aafia ae le o ni tagata o le Ekalesia.
Soo se fesootaiga ma se tagata ua aafia mo lenei faamoemoega e faia e lona epikopo po o le peresitene o le siteki o i ai i le taimi nei. Afai e tuuina mai e se tagata ua aafia se faamatalaga, e tuuina atu e le taitai lenei i le epikopo po o le peresitene o le siteki o loo faia le fono o le tagata o le Ekalesia. E tatau i taitai ona matuai faaeteete ia aloese mai le faamatuaia o nisi tulaga ogaoga. Tagai i le 32.4.3 mo isi lapataiga.
Soo se faafesili e uiga i se tagata ua aafia e i lalo o le 18 tausaga e faaui atu i matua o le tamaitiiti po o i latou o vaaia faaletulafono, se’i vagana e lamatia ai lē ua aafia pe a faia.
Mo faamatalaga e uiga i epikopo ma peresitene o siteki e mauaina le taitaiga i mataupu o le sauaina, tagai i le 32.4.5 ma le 38.6.2.1.
32.10.3
Faatautaiga o le Fono
I se taimi vave a o le’i amataina le fono, e ta’u atu e le epikopo po o le peresitene o le siteki i tagata auai lē ua faia ai le fono ma po o le a le amio sese na lipotia mai. Afai e tatau ai, na te faamalamalamaina ia faiga faavae o le fono.
Ona faaulufale atu lea o le tagata i le potu, pe afai o i ai. Afai na valaaulia le epikopo e auai ai i se fono o le tagata o le Ekalesia i le siteki, e valaaulia foi o ia i totonu o le potu i le taimi lea. Afai sa valaaulia e le tagata le peresitene o le Aualofa a le uarota po o le peresitene o le korama a toeaina e auai atu ma tuuina atu le lagolago, e faaulufale atu foi ma ia i totonu o le potu.
E faatautaia e le epikopo po o le peresitene o le siteki le fono i se agaga o le alofa e pei ona otooto atu i lalo.
-
Na te valaaulia se tasi e faia se tatalo amata.
-
Na te ta’u atu le amio na sese na lipotia mai. Na te tuu atu i le tagata (pe afai o i ai) se avanoa e faamautu ai, faafitia, pe faamanino lea faamatalaga.
-
Afai e faamautu e le tagata le amio na sese, e agai atu le epikopo po o le peresitene o le siteki i le numera 5 o i lalo ifo. Afai e faafitia e le tagata, e tuuina atu e le epikopo po o le peresitene o le siteki ia faamatalaga e faatatau i ai. E mafai ona aofia ai le tolaulauina atu o pepa o faamatalaga faatuatuaina ma le faitauina leotele o soo se faamatalaga tusitusia mai tagata ua aafia ai (tagai i le 32.10.2). Afai na te faitauina sea faamatalaga, na te puipuia le faailoaina o le suafa o le tagata ua aafia.
-
Afai e faafitia e le tagata le amio na sese, e mafai ona ia tolaulauina atu ni faamatalaga i le fono. E mafai ona tusitusia lenei faamatalaga. E mafai foi ona talosagaina e le tagata e ona le fono ia tagata e mafai ona tuuina atu faamatalaga talafeagai e saunoa i le fono, ia taitoatasi i le taimi. O ia tagata e tatau o ni tagata o le Ekalesia se’i vagana ai na vave filimaoti e le epikopo po o le peresitene o le siteki e mafai ona auai ai se tagata e le lotu. Latou te faatalitali i se isi potu se’ia oo ina talosagaina i latou e saunoa. E tuua e tagata taitasi le potu fono pe a mae’a lana faamatalaga. E tatau ona latou naunau e tausisia le natura faaaloalo o le fono, e aofia ai ona faiga faavae ma taualumaga ma le lē faalaua’iteleina. E lē mafai ona i ai se loia a tagata o le Ekalesia. E lē mafai foi ona i ai ni au lagolago e ese mai ia i latou o loo ta’ua i le parakalafa lona lua o lenei vaega.
-
E mafai e le epikopo po o le peresitene o le siteki ona faia ni fesili e uiga i le tagata i se ala migao ma le faaaloalo. E mafai foi ona ia faia ni fesili e uiga i isi tagata na talosagaina e le tagata o le Ekalesia e tuuina mai ni faamatalaga. E mafai foi e fesoasoani o le au epikopo po o le au peresitene o le siteki ona faia ni fesili. Soo se fesili e tatau ona puupuu ma faatapulaa i mea moni taua.
-
A mae’a ona tolaulau ia faamatalaga fitoitonu uma, e faataga e le epikopo po o le peresitene o le siteki le tagata e tuua le potu. E faataga foi le failautusi ona tuumuli ese, se’i vagana na auai ai fautua maualuga i se fono o le tagata o le Ekalesia i le siteki. Afai o loo i ai le epikopo o le tagata mo se fono o le tagata o le Ekalesia i le siteki, e faataga foi o ia e tuumuli ese. Afai o auai le peresitene o le Aualofa po o le peresitene o le korama a toeaina e tuuina atu le lagolago, e faataga foi o ia e tuumuli ese.
-
E fesili atu le epikopo po o le peresitene o le siteki mo ni finagalo faaalia po o ni malamalamaaga mai ona fesoasoani. Afai na auai fautua maualuga i se fono o le tagata o le Ekalesia i le siteki, na te fesili atu foi mo ni o latou finagalo faaalia ma malamalamaaga loloto.
-
Faatasi ai ma ona fesoasoani, e sailia ma le lototatalo e le epikopo po o le peresitene o le siteki le finagalo o le Alii e uiga i le mataupu. E na o le peresitene o le siteki ma ona fesoasoani po o le epikopo ma ona fesoasoani e tatau ona i ai i totonu o le potu i le taimi lea. Afai e aofia ai fautua maualuga i se fono o le tagata o le Ekalesia i le siteki, e masani ona ō atu le au peresitene o le siteki i le ofisa o le peresitene o le siteki.
-
E ta’u atu e le epikopo po o le peresitene o le siteki i ona fesoasoani e uiga i lana faai’uga ma talosagaina i latou ina ia lagolagoina. Afai o le fono o le tagata o le Ekalesia i le siteki o loo aofia ai fautua maualuga, e toe foi mai le au peresitene o le siteki i le potu ma talosagaina fautua maualuga ia lagolagoina le faai’uga. Afai e ese se manatu o se fesoasoani po o se fautua maualuga, e faalogo le epikopo po o le peresitene o le siteki ma saili ia fo’ia ia eseesega. O le tiutetauave mo le faai’uga e i luga lea o le taitai pulefaamalumalu.
-
Na te toe valaaulia atu le tagata i totonu o le potu. Afai na faataga le failautusi e tuumuli ese, e toe valaaulia foi o ia i totonu o le potu. Afai o i ai le epikopo o le tagata mo se fono o le tagata o le Ekalesia i le siteki, e toe valaaulia foi o ia i totonu o le potu. Afai o auai ai le peresitene o le Aualofa po o le peresitene o le korama a toeaina e tuuina atu le lagolago, e toe valaaulia mai o ia i totonu.
-
E faasoa atu e le epikopo po o le peresitene o le siteki le faai’uga o le fono i se agaga o le alofa. Afai o le faai’uga o le tapui mamafa mai avanoa o le avea ai ma tagata o le Ekalesia pe soloia mai le avea ma tagata o le Ekalesia, na te faamalamalama atu ia tuutuuga (tagai i le 32.11.3 ma le 32.11.4). Na te faamalamalamaina atu foi le auala e faatoilaloina ai tapuia’iga ma tuuina atu isi faatonuga ma fautuaga. E mafai e se epikopo po o se peresitene o le siteki ona tolopō se fono mo se taimi e saili ai nisi taitaiga po o faamatalaga a o le’i faia se faai’uga. I le tulaga lena, na te faamalamalamaina atu le mea lenei.
-
Na te faamalamalamaina le aiā tatau a le tagata e apili ai (tagai i le 32.13).
-
Na te valaaulia se tasi e faia se tatalo faai’u.
Pe i ai le tagata pe leai, e faailoa atu e le epikopo po o le peresitene o le siteki ia te ia le faai’uga e pei ona faamalamalama atu i le 32.12.1.
E leai se tagata e auai i se fono o le tagata o le Ekalesia e faatagaina ona pu’eina le leo, ata vitio, pe fai se faamaumauga tusitusia. E mafai e se failautusi ona tusia ni faamatalaga mo le faamoemoe e tapena ai le Lipoti o le Fono o le Tagata o le Ekalesia. Peitai, o na faamatalaga e lē tatau ona faamaumauina le upu i le upu po o le tusifaamaumauina o anotala. A uma ona tapena le lipoti, na te susunuina loa soo se tusiga o faamatalaga.
32.11
O Faai’uga mai Fono o Tagata o le Ekalesia
O faai’uga mai fono o tagata o le Ekalesia e tatau ona taialaina e le Agaga. E tatau ona atagia mai ai le alofa ma le faamoemoe na ofoina atu e le Faaola ia i latou o ē salamo. O faai’uga e ono faia o loo faamatala atu i lalo. Pe a faia nei faai’uga, e iloiloina e taitai ia tulaga o loo otooto atu i le 32.7.
I le mae’a ai o soo se fono o tagata o le Ekalesia, e auina vave atu loa e le epikopo po o le peresitene o le siteki se fomu o le Lipoti o le Fono o le Tagata o le Ekalesia e ala i le PTF (tagai i le 32.14.1).
O faai’uga e ono faia mai fono o tagata o le Ekalesia o loo otooto atu i vaega o i lalo.
32.11.1
Tumau i le Tulaga Lelei
I nisi o tulaga, e ono ta’umamāina le tagata ma tumau i le tulaga lelei. I nisi o tulaga, atonu na solia e se tagata le agasala, salamo faamaoni, ma i ai i se tulaga lelei. E mafai e le epikopo po o le peresitene o le siteki ona tuu atu fautuaga ma lapataiga e uiga i faatinoga i le lumanai. A mae’a le fono, e faaauau pea ona ia tuu atu le lagolago e pei ona moomia ai.
32.11.2
Fautuaga Patino ma le Epikopo po o le Peresitene o le Siteki
I nisi o fono o tagata o le Ekalesia, e mafai e taitai ona filimaotiina faapea, e le o i se tulaga lelei le tagata—ae e lē faamaonia ai ni tapuia’iga mamafa o le avea ai ma tagata o le Ekalesia. I nei tulaga, e mafai e le fono ona fai se faai’uga e faapea, e tatau i le tagata ona maua se fautuaga patino ma faasa’oga mai le epikopo po o le peresitene o le siteki. O lea fautuaga e mafai ona aofia ai tapuia’iga māmā o le avea ai ma tagata o le Ekalesia e pei ona otooto atu i le 32.8.3.
O fautuaga patino ma tapuia’iga māmā o le avea ma tagata o le Ekalesia, e le o se filifiliga lea e fai pe a faia se fono mo agasala o loo lisi atu i le 32.6.1.
32.11.3
Tapuiā’iga Mamafa o le Avea ma Tagata o le Ekalesia
I nisi o fono o tagata o le Ekalesia, e mafai e taitai ona filimaoti e faapea, e sili ona tapui mamafa se tagata mai avanoa o le avea ma tagata o le Ekalesia mo se taimi. O tapuia’iga mamafa e mafai ona lava mo agasala uma vagana ai agasala po o tulaga e sili ona matuia, lea o le a soloia ai mai le avea ma tagata o le Ekalesia (tagai i le 32.11.4).
O i latou ua i ai tapuia’iga mamafa mai le avea ma tagata o le Ekalesia, o loo avea pea ma tagata o le Ekalesia. Peitai, ua tapuia’ia o latou avanoa o ni tagata o le Ekalesia e pei ona ta’ua i lalo:
-
Ua le mafai ona latou ulu atu i se malumalu. Peitai, e mafai ona latou ofuina pea ofusa pe afai ua maua faaeega paia. Afai o i ai i le tagata o le ekalesia se pepa faataga o le malumalu, e faalēaogaina e le taitai le pepa i le PTF.
-
E lē mafai ona latou faaaogaina le perisitua.
-
E lē mafai ona latou taumamafa i le faamanatuga pe auai i le lagolagoina o taitai o le Ekalesia.
-
E lē mafai ona latou tuuina atu se lauga, lesona, po o se tatalo i faatulagaga faale-Ekalesia. E lē mafai foi ona latou galulue i se valaauga i le Ekalesia.
E fautuaina i latou e auai i sauniga Lotu ma gaoioiga pe afai e pulea a latou amio. E fautuaina foi i latou e totogi sefuluai ma taulaga.
E mafai e le epikopo po o le peresitene o le siteki ona faaopoopo i ai isi tuutuuga, e pei o le taumamao ese mai anomea faaponokalafi ma isi faatosinaga faatiapolo. E masani ona ia faaopoopo atu i ai tuutuuga lelei. O nei mea e mafai ona aofia ai le auai e lē aunoa i le Lotu, tatalo e le aunoa, ma le faitauina o tusitusiga paia ma isi anomea a le Ekalesia.
Afai ua tapuia’ia mamafa ia avanoa o se tagata mai le avea ai ma tagata o le Ekalesia, e tusia lena mea i luga o le pepa faamaumau.
O le taimi o le tapuia’iga mamafa e masani e lē itiiti ifo ma le tasi le tausaga ma e mafai ona umi atu. Pe a faia e le tagata se tulaga alualu i luma patino i le salamo faamaoni, e toe faia e le epikopo po o le peresitene o le siteki se isi fono e lauiliuina ai le aveesea o tapuia’iga (tagai i le 32.16.1). Afai e faaauau pea e le tagata le mamanu o le agasala, e mafai e le taitai ona faia se isi fono e lauiliuina ai isi fuataga.
32.11.4
Soloia mai le Avea ma Tagata o le Ekalesia
I nisi o fono o tagata o le Ekalesia, e mafai e taitai ona filimaoti e faapea, e sili ona soloia se tagata mai le avea ma tagata o le Ekalesia mo se taimi (tagai i le Mosaea 26:36; Alema 6:3; Moronae 6:7; Mataupu Faavae ma Feagaiga 20:83).
O le soloia mai le avea ma tagata o le Ekalesia e manaomia lea mo le fasioti tagata (e pei ona faauigaina i le 32.6.1.1) ma autaunonofo (e pei ona faamalamalama atu i le 32.6.1.2). E toetoe ina a manaomia i taimi uma mo le mataifale po o le toe ui i fanau e pei ona faamalamalama atu i le 32.6.1.2 ma le 38.6.10.
E pei ona taitaia ai e le Agaga, o le soloia mai le avea ma tagata o le Ekalesia e mafai foi ona tatau ai e pei ona ta’ua i lalo:
-
Mo i latou ua avea a latou amioga ma taufaamata’u ogaoga i isi.
-
Mo i latou ua solia aemaise lava agasala matuia.
-
Mo i latou o e lē faaalia le salamo i agasala matuia, (tagai i iloiloga i le 32.7).
-
Mo i latou o ē solia agasala matuia e faaleaga ai le Ekalesia.
E mafai e se fono o le tagata o le Ekalesia i le uarota, paranesi, po o le itu ona fautuaina le soloia o se tagata e le’i mauaina faaeega paia o le malumalu mai le avea ma tagata o le Ekalesia. Peitai, e tatau ona i ai le faamaoniga a le peresitene o le siteki po o le misiona a o le’i tāmauina le faai’uga.
O i latou ua soloia mai le avea ma tagata o le Ekalesia e lē mafai ona olioli i soo se avanoa o le avea ma tagata o le Ekalesia.
-
E lē mafai ona latou ulu atu i se malumalu pe ofuina ofusa o le malumalu. Afai o i ai i le tagata se pepa faataga o le malumalu, e faalēaogaina e le taitai le pepa i le PTF.
-
E lē mafai ona latou faaaogaina le perisitua.
-
E lē mafai ona latou taumamafa i le faamanatuga pe auai i le lagolagoina o taitai o le Ekalesia.
-
E lē mafai ona latou tuuina atu se lauga, lesona, po o se tatalo i faatulagaga faale-Ekalesia pe taitaia se gaoioiga i le lotu. E lē mafai foi ona latou galulue i se valaauga i le Ekalesia.
-
E lē mafai ona latou totogia sefuluai ma taulaga.
E fautuaina i latou e auai i sauniga a le Ekalesia ma gaoioiga pe afai e pulea a latou amio.
O i latou ua soloia mai le avea ma tagata o le Ekalesia, e mafai ona iloiloina mo le toefaaulufale mai e ala i le papatisoga ma le faamauga. E masani lava, e manaomia muamua lo latou faaalia o le salamo faamaoni mo le lē itiiti ifo ma le tasi le tausaga. E faia e le epikopo po o le peresitene o le siteki se isi fono o le tagata o le Ekalesia e iloilo ai le toefaaulufaleina mai (tagai i le 32.16.1).
Faai’uga ma Taunuuga o Fono o Tagata o le Ekalesia
|
Faai’uga |
Taunuuga |
|---|---|
Faai’uga Tumau i le Tulaga Lelei (tagai i le 32.11.1) | Taunuuga
|
Faai’uga Fautuaga Patino ma le Epikopo po o le Peresitene o le Siteki (tagai i le 32.11.2) | Taunuuga
|
Faai’uga Tapuia’iga Mamafa o le Avea ma Tagata o le Ekalesia (tagai i le 32.11.3) | Taunuuga
|
Faai’uga Soloia mai le Avea ma Tagata o le Ekalesia (tagai i le 32.11.4) | Taunuuga
|
32.11.5
O Fesili e uiga i le Faia o Faai’uga mo Mataupu Faigata
E faasino atu e epikopo fesili e uiga i taiala o le tusitaulima mo fono o tagata o le Ekalesia i le peresitene o le siteki.
I mataupu faigata, e mafai e le peresitene o le siteki ona sailia se fautuaga mai lona Fitugafulu Eria ua tofia. E tatau i le peresitene o le siteki ona fefautuaa’i ma le Au Peresitene o le Eria e uiga i mataupu o loo otooto atu i le 32.6.3. Peitai, e lē tatau i le peresitene o le siteki ona fesili i se Fitugafulu Eria po o se Pulega Aoao pe faapefea ona faia se faai’uga e uiga i mataupu faigata. O le peresitene o le siteki e faia le faai’uga pe tatau ona faia se fono e talanoaina ai le amio. Afai e fai se fono, o le peresitene o le siteki po o le epikopo e faia le faai’uga o le taunuuga.
32.11.6
Pule a le Au Peresitene Sili
O le Au Peresitene Sili ua i ai le pule faai’u i tapuia’iga uma ma le soloia mai le avea ma tagata o le Ekalesia.
32.12
Faailoaga ma Faasilasilaga
O le faai’uga o se fono o le tagata o le Ekalesia e faailoa atu i le tagata—ma isi e pei ona tatau ai—e pei ona faamalamalama atu i lalo.
32.12.1
Logoina o se Tagata e uiga i le Faai’uga
O le epikopo po o le peresitene o le siteki e masani ona ia ta’uina i le tagata le taunuuga o le fono pe a faai’uina. Peitai, e mafai ona ia tolopoina se fono mo se taimi ina ia sailia nisi taitaiga po o faamatalaga a o le’i faia se faai’uga.
E mafai e se fono o le tagata o le Ekalesia i le uarota, paranesi, po o le itu ona fautuaina atu le soloia o se tagata e le’i mauaina faaeega paia o le malumalu mai le avea ma tagata o le Ekalesia. Peitai, e tatau ona i ai le faamaoniga a le peresitene o le siteki po o le peresitene o le misiona a o le’i tāmauina le faai’uga.
E faamalamalama atu e le epikopo po o le peresitene o le siteki ia aafiaga o le faai’uga e pei ona otooto atu i le 32.11. O ia foi e masani ona tuuina atu fautuaga e uiga i tuutuuga o le salamo ina ia mafai ai ona aveesea ia tapuia’iga pe ia mafai ai ona toefaaulufale mai le tagata i totonu o le Ekalesia.
E vave tuu atu e le epikopo po o le peresitene o le siteki i le tagata se faasilasilaga tusitusia e uiga i le faai’uga ma ona aafiaga. O lea faasilasilaga e aofia ai se faamatalaga masani e faapea, na faia lea faatinoga e tali atu ai i le amio ua feteenai ma tulafono ma le faatulagaga a le Ekalesia. E mafai foi ona aofia ai se fautuaga e uiga i le aveesea o tapuia’iga mai le avea ma tagata o le Ekalesia po o le toefaaulufaleina mai i totonu o le Ekalesia. E tatau ona faailoa atu ai i le tagata e faapea, e mafai ona ia apiliina le faai’uga (tagai i le 32.13).
Afai e le sau le tagata i le fono, e mafai ona lava ma totoe le faasilasilaga tusitusia e logo ai o ia e uiga i le faai’uga. E mafai foi e le epikopo po o le peresitene o le siteki ona talanoa ma le tagata.
E lē tuuina atu e le epikopo po o le peresitene o le siteki i le tagata se kopi o le fomu o le Lipoti o le Fono o le Tagata o le Ekalesia.
32.12.2
Faailoaina Atu i Isi e uiga i se Faai’uga
Afai e tapui māmā e se epikopo po o se peresitene o le siteki ia avanoa o se tagata mai le avea ma tagata o le Ekalesia i se fautuaga patino, e masani lava na te lē faailoa atua i se isi lava tagata (tagai i le 32.8.3). Peitai, o nei taitai e fesootai i le tasi ma le isi e uiga i tapuia’iga māmā a o latou fesoasoani i tagata o le Ekalesia.
Afai ua tapuia’ia mamafa ia avanoa pe ua soloia foi se tagata i se fono o le tagata o le Ekalesia, e na o i latou lava e tatau ona iloa e faailoa atu i ai e le epikopo po o le peresitene o le siteki le faai’uga. O taiala nei e faaaoga ai.
-
Na te iloiloina ia manaoga o tagata na aafia ma tagata e ono aafia ma lagona o le aiga o le tagata.
-
Na te lē faailoa atua le faai’uga pe afai o loo apili e le tagata. Peitai, e mafai ona ia faailoa atu e faapea, ua toe apili le faai’uga ma pe afai na te lagonaina e tatau ona puipuia ni tagata e ono aafia. E mafai foi ona ia faailoa atu e lagolago ai le faamalologa o tagata ua aafia (e ui na te lē ta’u atua igoa o tagata ua aafia) pe ia puipuia ai le amiotonu o le Ekalesia.
-
Pe a manaomia ai, e faailoa atu e le epikopo le faai’uga i le talitonuga mautinoa i sui auai o le aufono a le uarota. E faia lea ina ia faailoa atu ai i taitai o ē ono manatu ua avanoa le tagata mo ni valaauga, faiaoga i lesona, pe faia tatalo po o ni lauga. E faia foi ina ia faamalosi’au ai i taitai ia ofoina atu le tausiga ma le lagolago i le tagata ma lona aiga.
-
Faatasi ai ma le faamaoniga mai le peresitene o le siteki, e mafai e le epikopo ona faailoa atu le faai’uga i fonotaga a le korama a toeaina ma le Aualofa pe afai e aofia ai le tulaga lenei:
-
Amioga faatautala e faamalieina ai tuinanau e ono faamata’uina ai isi.
-
A’oa’o atu o aoaoga faavae sese po o isi ituaiga o liliuese.
-
O agasala ua lē nā malelāina e pei o autaunonofo po o le faaaogaina o aoaoga a ituaiga faatosina ina ia ta’a’ina e mulimuli atu ai.
-
O le tetee faalaua’itele i faatinoga po o aoaoga a taitai aoao po o taitai o le Ekalesia i le lotoifale.
-
-
I tulaga faapena, e ono manaomia foi e le peresitene o le siteki ona faataga se fesootaiga i tagata o isi uarota i le siteki.
-
I nisi o tulaga, atonu e lagona e le epikopo po o le peresitene o le siteki o le a fesoasoani tele le faailoa atu i nisi po o tagata uma foi ua aafia ma o latou aiga e faapea na faia se fono o le tagata o le Ekalesia mo lea tagata. Na te faia lea mea e ala atu i lo latou epikopo po o le peresitene o le siteki.
-
Afai e lamatia ai isi i faamoemoega faatautala e faamalieina ai tuinanau o le tagata, e mafai e le epikopo po o le peresitene o le siteki ona tuuina atu ni lapataiga e fesoasoani ia puipuia ai isi. Na te lē faailoaina atu ia faamatalaga e lē faalaua’iteleina ma e lē taumatemateina foi.
-
I isi tulaga uma, e faatapulaa e le epikopo po o le peresitene o le siteki nisi fesootaiga i se faamatalaga lautele. E na ona ia faapea atu, ua tapuia’ia avanoa o le tagata mai le avea ai ma tagata o le Ekalesia, pe ua soloia ona o amioga e feteenai ma tulafono ma le faatulagaga a le Ekalesia. Na te talosagaina i latou o auai ai e ‘aua ne’i talanoaina. Na te le fesili pe latou te lagolagoina pe faatuiese i le faatinoga.
-
Afai o loo i ai i se tulaga lelei se tagata i le mavae ai o se fono o le tagata o le Ekalesia, (tagai i le 32.11.1), e mafai e le epikopo po o le peresitene o le siteki ona ta’u atu lena mea ina ia faate’aese ai tala fe’avea’i.
32.12.3
Talanoaina o le Faamavaega o le Avea ma Tagata o le Ekalesia
I nisi o tulaga, e ono manaomia e se epikopo ona faailoa atu e faapea, ua faamavae se tagata mai lona avea ai ma tagata o le Ekalesia (tagai i le 32.14.9). E lē tuuina atu e le epikopo se isi lava faamatalaga.
32.13
Apiliina o se Faai’uga
E mafai e se tagata o le Ekalesia ona apili le faai’uga o se fono o le tagata o le Ekalesia i le uarota, i le peresitene o le siteki i totonu o le 30 aso. E faia e le peresitene o le siteki se fono o le tagata o le Ekalesia e iloiloina ai le apili. E mafai foi ona ia talosagaina se epikopo e toetalo se fono ma toeiloilo ai se faai’uga, aemaise pe afai o i ai ni faamatalaga fou.
E mafai e se tagata o le Ekalesia ona apili le faai’uga o se fono o le tagata o le Ekalesia i le siteki, e ala i le tusia o se tusi i le Au Peresitene Sili i totonu o le 30 aso. E tuuina atu e le tagata le tusi i le peresitene o le siteki e auina atu i le Au Peresitene Sili.
I se misiona, e mafai e se tagata ona apili le faai’uga o se fono o le tagata o le Ekaleisa i le paranesi po o le itu, i le peresitene o le misiona i totonu o le 30 aso. E faia e le peresitene o le misiona se fono o le tagata o le Ekalesia e iloilo ai le apili. Afai e le mafai ona ia faia ona o le taimi ma le mamao, e mulimuli o ia i faatonuga o i le 32.9.4.
Afai e faatautaia e se peresitene o le misiona le fono, e mafai e le tagata ona apili le faai’uga e ala i le tusia o se tusi i le Au Peresitene Sili i totonu o le 30 aso. E tuu atu e le tagata le tusi i le peresitene o le misiona e auina atu i le Au Peresitene Sili.
O se tagata e apiliina se faai’uga na te faama’oti atu i le tusi ia mea sese na masalomia po o se faiga lē tonu i le taualumaga po o le faai’uga.
Afai e faia se fono o le tagata o le Ekalesia e iloilo ai le apili, o se tasi o faai’uga nei e lua e mafai ona faaaogaina:
-
Ia tumau pea le faai’uga muamua.
-
Toe teuteu le faai’uga muamua.
O faai’uga a le Au Peresitene Sili e tāmau ma e le mafai ona toe apiliina.
32.14
Lipoti ma Pepa Faamaumau
32.14.1
Lipoti o Fono o le Tagata o le Ekalesia
A mavae loa soo se fono o le tagata o le Ekalesia, e vave ona auina atu e le epikopo po o le peresitene o le siteki se fomu o le Lipoti o le Fono o le Tagata o le Ekalesia e ala i le PTF. E mafai ona ia talosaga atu i le failautusi e tapena le lipoti. Na te faamautinoa e leai ni kopi lolomi po o ni kopi faaeletonika o le fomu e teuina i le lotoifale. Na te faamautinoaina foi o soo se faamatalaga na faaaoga e tapena ai le lipoti e vave ona susunuina.
32.14.2
Tapuia’iga Mamafa mai le Avea ma Tagata o le Ekalesia
E tusia ia tapuia’iga mamafa o le avea ma tagata o le Ekalesia i luga o le pepa faamaumau o se tagata. E fai e le laumua o le Ekalesia le faamatalaga lenei i le mavae ai ona mauaina o le Lipoti o le Fono o le Tagata o le Ekalesia. Pe a salamo se tagata, e tatau i le taitai ona faia se isi fono e iloilo ai le aveesea o nei tapuia’iga (tagai i le 32.16.1).
32.14.3
Faamaumauga pe a mavae ona Soloia se Tagata Mai le Avea ma Tagata o le Ekalesia
Afai ua soloia se tagata mai le avea ai ma tagata o le Ekalesia, e aveese e le laumua o le Ekalesia le pepa faamaumau i le mavae ai ona maua o le Lipoti o le Fono o le Tagata o le Ekalesia. Afai e manao ai le tagata, e fesoasoani taitai ia te ia e saunia ina ia toefaaulufale mai i le Ekalesia e ala i le papatisoga ma le faamauga (tagai i le 32.16.1).
32.14.4
Faamaumauga pe a mavae ona Toefaaulufale Mai i le Ekalesia
A uma ona toefaaulufale mai se tagata i le Ekalesia, e auina atu e le epikopo se fomu o le Lipoti o le Fono o le Tagata o le Ekalesia. E lē fatuina se Tusi Faamaonia o le Papatisoga ma le Faamauga. Ae, o le papatisoga ma le faamauga e faamaumauina i luga o le fomu o le Lipoti o le Fono o le Tagata o le Ekalesia.
Afai e le’i maua faaeega paia o le tagata, e atofa e le laumua o le Ekalesia se pepa faamaumau lea e faaalia ai aso o lona uluai papatisoga ma isi sauniga. E lē ta’ua i le pepa faamaumau le taimi sa lē toe avea ai ma tagata o le Ekalesia.
Afai na maua faaeega paia o le tagata, e faafou e le laumua o le Ekalesia le pepa faamaumau ia faaalia ai aso fou o le papatisoga ma le faamauga. O lenei pepa faamaumau e aofia ai foi ma le feau “Manaomia le Toefuataiga o Faamanuiaga.” A uma le toefuataiga o faamanuiaga o le tagata (tagai i le 32.17.2), e faafou le pepa faamaumau ia faaalia ai aso o le uluai papatisoga ma isi sauniga. E lē ta’ua ai le taimi sa lē toe avea ai ma tagata o le Ekalesia.
32.14.5
Pepa Faamaumau e i ai Faamatalaga Faaopoopo
E pei ona faatagaina ai e le Au Peresitene Sili, e tusia e le laumua o le Ekalesia faamatalaga faaopoopo i le pepa faamaumau o se tagata i soo se tulaga o loo ta’ua i lalo.
-
E auina atu e le epikopo po o le peresitene o le siteki se fomu o le Lipoti o le Fono o le Tagata o le Ekalesia e ta’u atu ai e faapea, sa tapuia’ia mamafa le tagata mai le avea ma tagata o le Ekalesia pe sa soloia ona o se tasi o amioga o loo ta’ua i lalo:
-
Mataifale po o le toe ui i fanau
-
Sauaina faalefeusua’i o se tamaitiiti po o se talavou, faatautala faalefeusua’i o se tamaitiiti po o se talavou, po o sauaga ogaoga faaletino pe faalelagona o se tamaitiiti po o se talavou.
-
Aafia ai i ponokalafi po o ata mataga o fanau e pei ona otooto atu i le 38.6.6
-
Autaunonofo
-
Amioga faatautala faalefeusua’i e faamalieina ai tuinanau faaletagata matua
-
Faaaoga sese o tupe a le Ekalesia po o le gaoia o meatotino a le Ekalesia (tagai i le 32.6.3.3)
-
Faatautala i le uelefea a le Ekalesia
-
Amioga taufaamata’u (e pei o feusuaiga, faasaua, po o tulaga tautupe) po o amioga e faatauma’oia ai le Ekalesia
-
-
E auina atu e le epikopo ma le peresitene o le siteki se faamatalaga tusitusia e faapea o le tagata:
-
Ua ioe i se tasi o faatinoga o loo lisi atu i luga.
-
Ua ta’usalaina o ia i se solitulafono e aofia ai se tasi o faatinoga o loo lisi atu i luga.
-
Ua maua ua alagatatau ona tali atu i se faai’uga faalemalo i le taufaasese po o isi aga faasolitulafono e aofia ai se tasi o faatinoga o loo lisi atu i luga.
-
-
Talu ai o nisi o sauniga o le perisitua e faavae i luga o le itupa, o lea e auina atu ai e le epikopo ma le peresitene o le siteki se talosaga e tusi ai faamatalaga i le pepa faamaumau o se tasi ua suia ma le loto i ai mai lona itupa moni na fanau mai ai (tagai i le 38.6.23).
Pe a maua e se epikopo se pepa faamaumau o i ai ni faamatalaga faaopoopo, e mulimuli o ia i faatonuga o loo i le faamatalaga faaopoopo.
E na o le Au Peresitene Sili e mafai ona faatagaina le aveesea o se faamatalaga faaopoopo mai se pepa faamaumau. Afai e fautuaina e le peresitene o le siteki le aveesea o se faamatalaga faaopoopo, na te faaaogaina le PTF (tagai i le 6.2.3). E faailoa atu e le Ofisa o le Au Peresitene Sili ia te ia pe ua faamaonia le fautuaga pe leai.
32.14.6
Lipotia o le Gaoia o Tupe a le Ekalesia
Afai ua tapuia’ia pe soloia le avea o se tagata ma tagata o le Ekalesia ona o le faaaoga sese o tupe a le Ekalesia, e lipoti atu e le epikopo po o le peresitene o le siteki e pei ona otooto atu i le 34.7.5.
32.14.7
Tapuia’iga o le Aveesea o le Pepa Faamaumau
O nisi taimi e masii ese ai se tagata o le Ekalesia ae o loo faatalitali se faai’uga o le avea ai ma tagata o le Ekalesia po o isi faafitauli matuia. O nisi taimi e manaomia ai e se epikopo ona faasoa atu faamatalaga i le epikopo fou a o le’i siitia atu pepa faamaumau i le iunite fou. I tulaga nei, e mafai e le epikopo (po o le failautusi pe a faatagaina) ona tuu se tapuia’iga o le aveesea o le pepa faamaumau. E nofo ai pea le pepa faamaumau i le iunite se’ia oo ina aveese e le epikopo (po o le failautusi pe a faatagaina) le tapuia’iga. O lea faiga e maua ai se avanoa mo le epikopo e faailoa atu ai ni atugaluga ma ni faamatalaga.
32.14.8
Pepa Faamaumau o i Latou o Ē o Falepuipui
O nisi tagata o le Ekalesia ua faasalaina i se solitulafono ma ua faafalepuipuiina. O le epikopo po o le peresitene o le siteki o le iunite sa nofo ai le tagata i le taimi na faia ai le solitulafono, e faagasoloina soo se gaoioiga e tatau ai mo tapuia’iga mamafa po o le soloia mai le avea ma tagata o le Ekalesia. Afai na tapuia’ia ia avanoa o le avea ai ma tagata o le Ekalesia, e auina atu e le taitai (po o le failautusi pe a faatagaina) le pepa faamaumau i le iunite o loo nafa mo le nofoaga o loo faafalepuipui ai le tagata. Afai na soloia mai le avea ai ma tagata o le Ekalesia, e faafesootai e le epikopo po o le peresitene o le siteki le taitai o lena iunite. (Tagai i le 32.15.)
32.14.9
Talosaga e Faamavae mai le Avea ma Tagata o le Ekalesia
Afai e talosaga se tagata e faamavae mai lona avea ai ma tagata o le Ekalesia, e aapa atu le epikopo e vaai pe o naunau o ia e talanoaina ia atugaluga ma taumafai e foia. E mafai foi ona fefautuaa’i le epikopo ma le tagata faatasi ma le peresitene o le siteki. E faamautinoa e le taitai ua malamalama le tagata i taunuuga nei o le faamavae mai le avea ma tagata o le Ekalesia.
-
E faalēaogaina sauniga uma.
-
E aveesea avanoa uma mai le avea ma tagata o le Ekalesia.
-
O le toefaaulufaleina mai e ala i le papatisoga ma le faamauga, e na o le pau lava le taimi e mafai ona tupu ai, o le mavae ai o se faatalanoaga mae’ae’a ma, i le tele o tulaga, o se fono o le tagata o le Ekalesia (tagai i le 32.16.2).
-
O se tagata na maua muamua ona faaeega paia e faato’a agavaa e maua se toefuataiga o le perisitua ma faamanuiaga o le malumalu pe a maua le faamaoniga a le Au Peresitene Sili ma i le mavae ai o le lē itiiti ifo ma le tausaga atoa e tasi talu ona toefaaulufale mai (tagai i le 32.17.2).
Afai o loo manao pea le tagata e faamavae mai le avea ma tagata o le Ekalesia, na te tuu atu i le epikopo se talosaga tusitusia ua sainia. E auina atu e le epikopo le talosaga i le peresitene o le siteki e ala i le PTF. Ona iloilo lea e le peresitene o le siteki ma auina atu le talosaga e ala i le polokalama lena. E tatau i taitai ona vave faagaoioi ia talosaga.
E mafai foi e se tagata ona faamavae mai le avea ma tagata o le Ekalesia e ala i le auina atu o se talosaga ua sainia, ma faamaonia i le laumua o le Ekalesia.
O se tamaitiiti ua manao e faamavae mai le avea ma tagata o le Ekalesia na te mulimulita’ia foi le faiga faavae lava lea e tasi e tutusa ma se tagata matua, faatasi ai ma le tuusaunoaga e tasi: o le talosaga e tatau ona sainia e le tamaitiiti (pe afai ua sili atu ma le 8 tausaga) ma sainia foi e (le) matua po o (le) tagata o loo tausia faaletulafono le tamaitiiti.
Afai e faamata’u e se tagata ua faamavae mai le avea ma tagata o le Ekalesia na te faia se moliaga faaletulafono e faasaga i le Ekalesia po o ona taitai, e mulimuli le peresitene o le siteki i faatonuga o loo i le 38.8.23.
O se talosaga e faamavae mai le avea ma tagata o le Ekalesia e tatau lava ona gaoioi i ai tusa lava pe o i ai i taitai perisitua ni faamatalaga e uiga i se agasala matuia. Soo se faamatalaga e uiga i agasala e le’i fo’iaina, e tusi faamaumauina i le taimi e auina atu ai le talosaga e ala i le PTF. O lea faiga e mafai ai e taitai perisitua ona foia ia mataupu i le lumanai pe afai e talosaga le tagata mo le toefaaulufaleina mai i totonu o le Ekalesia (tagai i le 32.16.2).
E lē tatau i se taitai perisitua ona fautuaina atu le faamavae mai le avea ma tagata o le Ekalesia ina ia aloese ai mai le faia o se fono o le tagata o le Ekalesia.
E faaauau pea ona auauna atu taitai ia i latou ua faamavae mai lo latou avea ai ma tagata o le Ekalesia se’i vagana ua latou talosaga mai ia lē toe fesootai atu.
TOEFAAFOISIA O AVANOA O LE AVEA MA TAGATA O LE EKALESIA
Afai na tapuia’ia ia avanoa o se tagata o le Ekalesia pe na soloia foi, e faaaumea e taitai, fautuaina, ma lagolago i le tagata pe afai na te faatagaina. O le vaega lenei o loo faamalamalama atu ai le ala e mafai ona toefaafoisia ai na avanoa.
32.15
Faaauau ona Auauna Atu
O le matafaioi a le epikopo po o le peresitene o le siteki o le avea ma se faamasino sili e lē muta pe a maua e se tagata ni tapuia’iga o le avea ma tagata o le Ekalesia, po o le soloia o ia mai le avea ma tagata o le Ekalesia. Na te faaauau pea ona auauna atu, pe a faatagaina ai e le tagata, ina ia mafai ona toe olioli o ia i faamanuiaga o le avea ma tagata o le Ekalesia. E feiloai e le aunoa le epikopo ma le tagata ma, pe a fesoasoani ma tatau ai, e feiloai foi ma lona toalua. Na a’oa’o atu le Faaola ia sa Nifaē:
“Aua tou te tulia o ia i fafo mai o … outou nofoaga o tapuaiga, aua o tagata faapena ia outou galulue pea i ai; ona tou te le iloa pe o le a latou toe foi mai ma salamo, ma o mai ia te au ma le faamoemoe atoa o le loto, ma o le a ou faamaloloina ai i latou; ma o le a avea outou ma ala e aumai ai le olataga ia te i latou” (3 Nifae 18:32).
O le taimi faato’a uma ona tapuia’ia pe soloia ai foi le tagata mai le avea ma tagata o le Ekalesia, e faigata ma e ogaoga tele mo lona aiga. E tatau i taitai ona nofouta i nei manaoga ma faamalosi’au ma fesoasoani i tagata o le aiga.
E faamautinoa e le epikopo e tofia ni tagata alolofa o le au paia e auauna atu i se tagata ua tapuia’ia pe ua soloia mai le avea ma tagata o le Ekalesia, pe a faatagaina ai e le tagata. Latou te auauna atu foi i isi tagata o le aiga. O tagata taitoatasi o i lalo o tapuia’iga mai le avea ai ma tagata o le ekalesia e mafai ona manuia mai le auai i le faatinoga o le faavasegaga o igoa (tagai i le 25.4.3).
Afai e masii ese le tagata mai le uarota, e faailoa atu e le epikopo i le epikopo fou ma faamalamalama atu i ai mea o loo manaomia pea ona tupu a o le’i mafai ona aveesea tapuia’iga mai le avea ma tagata o le Ekalesia. Afai sa soloia le tagata mai le avea ma tagata o le Ekalesia pe na faamavae le tagata mai le avea ma tagata o le Ekalesia, e faia e le epikopo lea lava fesootaiga e tasi pe afai na malie le tagata e fesoasoani atu taitai o le Ekalesia.
32.16
Aveesea o Tapuia’iga Mamafa po o le Toefaaulufaleina Mai i le Ekalesia
32.16.1
Fono o Tagata o le Ekalesia e Aveesea Ai Tapuia’iga Mamafa pe Toefaaulufale Mai ai se Tagata
Pe a tapuia’ia ia avanoa o le avea ma tagata o le Ekalesia pe soloia i se fono o le tagata o le Ekalesia, e tatau ona toe faia se isi fono e iloiloina ai le aveesea o tapuia’iga po o le toefaaulufaleina mai o le tagata i le Ekalesia. O lenei fono e tatau foi ona i ai le tulaga lava e tasi o le pule (pe maualuga atu foi) e pei ona i ai le uluai fono. Mo se faataitaiga, afai sa pulefaamalumalu se peresitene o le siteki po o le misiona i le uluai fono, e pulefaamalumalu foi se peresitene o le siteki po o le misiona i le fono e iloiloina ai le aveesea o tapuia’iga po o le toefaaulufaleina mai o le tagata.
O le epikopo po o le peresitene o le siteki o loo i ai nei, e faia le fono. Na te faamautinoaina muamua ua salamo le tagata ma ua sauni ma le agavaa e olioli i faamanuiaga o le avea ai ma tagata o le Ekalesia.
O i latou na tapuia’ia mamafa i le avea ma tagata o le Ekalesia, e masani lava ona manaomia le faaalia o le salamo faamaoni mo le lē itiiti ifo ma le tasi le tausaga a o le’i toe iloiloina le aveesea o tapuia’iga. O i latou na soloia mai le avea ma tagata o le Ekalesia e toetoe lava manaomia i taimi uma le faaalia o le salamo faamaoni mo le lē itiiti ifo ma le tasi le tausaga a o le’i mafai ona iloiloina i latou mo le toefaaulufaleina mai. Mo se tagata o le Ekalesia sa umia se tofiga lauiloa o le Ekalesia i le taimi o le agasala matuia, e masani lava ona umi atu le taimi (tagai i le 32.6.1.4).
O se fono e iloiloina ai le aveesea o tapuia’iga po o le toefaaulufaleina mai o se tagata i le Ekalesia, e mulimuli i taiala lava e tasi e pei o isi fono o tagata o le Ekalesia. E manaomia e se epikopo le faamaoniga mai le peresitene o le siteki e faia ai le fono. I se misiona, e manaomia e se peresitene o le paranesi po o le itu se faamaoniga mai le peresitene o le misiona.
O taiala nei e faaaoga pe a faia se fono o le tagata o le Ekalesia e iloiloina ai le aveesea o tapuia’iga o le avea ma tagata o le Ekalesia po o le toefaaulufaleina mai o se tagata i le Ekalesia. E le o taiala uma foi nei e faaaoga i tulaga taitasi.
-
Toeiloilo le uluai fono o le tagata o le Ekalesia. E iloilo e le epikopo po o le peresitene o le siteki le fomu o le Lipoti o le Fono o le Tagata o le Ekalesia. Na te talosagaina se kopi e ala i le PTF. A uma ona iloiloina le fomu, e mafai ona ia faafesootaia le epikopo po o le peresitene o le siteki i le mea sa faia ai le uluai fono e saili ai se faamaninoga.
-
Faatalanoa le tagata. E faatalanoa mae’ae’a e le epikopo po o le peresitene o le siteki le tagata ia iloatino ai le malosiaga o lona faatuatua ia Iesu Keriso ma le telē o le salamo. Na te filimaotiina foi pe ua ausia e le tagata ia tuutuuga uma na otooto atu i ai i le uluai fono.
-
Fuafua le tulaga o le solitulafono po o le faai’uga a le faamasinoga faalemalo. O nisi taimi e ioeina e se tagata le solitulafono pe sa ta’usalaina i se solitulafono. O nisi taimi e tali atu ai se tagata i se faai’uga faalemalo i le taufaasese po o isi amioga faasolitulafono. I tulaga nei, e lē masani ona faia ai e le taitai se fono se’ia uma ona faataunuu e le tagata tuutuuga uma o se moliaga, poloaiga, po o se faamasinoga na faia e taitai faaletulafono. O nei tuutuuga e mafai ona aofia ai le faafalepuipuiina, nofo vaavaaia, palola, ma sala tupe po o le toetotogi atu. O tuusaunoaga e manaomia ai le faamaoniga a le Au Peresitene Sili a o le’i faia se fono o le tagata o le Ekalesia. O nei tuusaunoaga e mafai ona aofia ai se tasi ua mae’a tulaga manaomia faaletulafono ma ua faaalia le salamo faamaoni, ae o loo nofo vaavaaia mo le olaga atoa pe o i ai foi se sala tupe telē.
-
Faafesootai ia taitai perisitua o tagata na aafia. E faafesootai e le epikopo po o le peresitene o le siteki le epikopo po o le peresitene o le siteki o loo i ai i le taimi nei soo se tagata ua aafia (tagai i le 32.10.2).
-
Tuuina atu se faasilasilaga e uiga i le fono. Na te faasilasila atu i le tagata e uiga i le aso, taimi, ma le nofoaga o le fono.
-
Faatautaiga o le fono. Na te faatautaia le fono e tusa ai ma taiala o loo i le 32.10.3. E fesili atu o ia i le tagata pe o le a le mea sa ia faia e salamo ai. E fesili atu foi o ia e uiga i lana tautinoga ia Iesu Keriso ma le Ekalesia. A uma ona tolaulauina mataupu fitoitonu uma, ona ia faatagaina lea o le tagata e tuumuli ese. Faatasi ai ma ona fesoasoani, e tatalo o ia ia lauiliu pe o le a le faai’uga e fai. O faai’uga e tolu e mafai ona i ai o le:
-
Faaauau pea tapuia’iga po o le soloia mai le avea ma tagata o le Ekalesia.
-
Aveesea o tapuia’iga po o le faataga ona toefaaulufale mai.
-
Fautua atu i le Au Peresitene Sili ina ia aveesea tapuia’iga pe ia faatagaina le toefaaulufaleina mai (pe afai e tatau ai e tusa ma le “Talosaga mo le faamaoniga a le Au Peresitene Sili” o loo i lalo).
-
-
Faasoa atu le faai’uga. A uma ona faia e le fono se faai’uga, e faasoa atu e le taitai pulefaamalumalu i le tagata. Afai e tatau ai se faamaoniga mai le Au Peresitene Sili, na te faamalamalama atu e faapea, o le faai’uga o se fautuaga i le Au Peresitene Sili.
-
Auina atu se lipoti. E auina atu e le epikopo po o le peresitene o le siteki se fomu o le Lipoti o le Fono o le Tagata o le Ekalesia e ala i le PTF. E mafai ona ia talosaga atu i le failautusi e tapena lenei lipoti. Na te faamautinoa e leai se kopi lolomi po o se kopi faaeletonika e teuina i le lotoifale. Na te faamautinoaina foi o faamatalaga uma sa faaaoga e tapena ai le lipoti ia vave susunuina.
-
Talosaga mo se faamaoniga mai le Au Peresitene Sili (pe a tatau ai). I tulaga nei, e tatau ona i ai le faamaoniga a le Au Peresitene Sili e aveesea ai tapuia’iga mamafa o le avea ma tagata auai o le Ekalesia pe toefaaulufale mai ai le tagata i totonu o le Ekalesia. E manaomia lenei faamaoniga tusa lava pe na tupu lea amio ina ua mavae le tapuia’iga mamafa po o le soloia mai le avea ma tagata o le Ekalesia.
Pau le taimi e auina atu ai e le peresitene o le siteki se talosaga i le Au Peresitene Sili pe afai na te fautuaina mai le faamaoniga (tagai i le 6.2.3).
-
Fasioti tagata
-
Mataifale po o le toe ui i fanau
-
Sauaina faalefeusua’i o se tamaitiiti po o se talavou, faatautala faalefeusua’i o se tamaitiiti po o se talavou, po o le sauaina ogaoga faaletino pe faalelagona o se tamaitiiti po o se talavou e se tagata matua po o se talavou e tele tausaga e matua atu ai.
-
O le aafia i ponokalafi po o ata mataga o tamaiti ae o loo i ai se moliaga faaletulafono
-
Liliuese (tagai i le 32.6.3.2 mo mea e aofia ai le liliuese)
-
Autaunonofo
-
Faia o se agasala matuia a o umia se tofiga lauiloa o le Ekalesia
-
Faafoliga i le itupa faafeagai—faatinoga e sui ai ma le loto i ai mai le itupa na fanau mai ai (tagai i le 38.6.23)
-
Faaaoga sese o tupe po o meatotino a le Ekalesia
-
-
Tuuina atu o se faasilasilaga tusitusia e uiga i le faai’uga. E faamautinoa e le epikopo po o le peresitene o le siteki ia vave maua e le tagata se faasilasilaga tusitusia e uiga i le faai’uga ma ona aafiaga.
-
Papatiso ma faamau. Afai na soloia le avea o se tagata ma tagata o le Ekalesia i le uluai fono, e tatau ona toe papatiso ma faamauina o ia. Afai e tatau ai se faamaoniga a le Au Peresitene Sili, e faato’a mafai ona faatinoina nei sauniga pe a uma ona maua mai lenei faamaoniga. E lē fatuina se Tusi Faamaonia o le Papatisoga ma le Faamauga (tagai i le 32.14.4).
32.16.2
Toefaaulufaleina Mai i le mavae ai o le Faamavaega mai le Avea ma Tagata o le Ekalesia
Afai e faamavae aloaia se tagata mai le avea ai ma tagata o le Ekalesia, e tatau ona papatiso o ia ma faamauina ina ia toefaaulufale mai ai i totonu o le Ekalesia. Mo tagata matutua, o le toefaaulufaleina mai e lē masani ona lauiliuina se’ia atoa le tausaga e tasi talu ona faamavae mai le avea ma tagata o le Ekalesia.
Pe a talosagaina e se tagata le toe faaulufaleina mai, e aumai e le epikopo po o le peresitene o le siteki se kopi o le fomu o le Lipoti o I’uga Faalepulega lea na auina atu faatasi ma le talosaga mo le faamavaega. E mafai ona ia maua mai e ala i le PTF.
Ona faatalanoa mae’ae’a lea e le epikopo po o le peresitene o le siteki le tagata. Na te fesili atu e uiga i mafuaaga o le uluai talosaga ma le manao e toefaaulufale mai. I se agaga o le alofa, na te fesili atu ai e uiga i agasala matuia atonu na faia e le tagata a o le’i faamavae mai le avea ma tagata o le Ekalesia, po o le mavae ai o le faamavaega. E lē amataina loa e le taitai le faaulufaleina mai se’ia faamalieina o ia ua salamo le tagata ma ua saunia ma le agavaa e olioli i faamanuiaga o le avea ma tagata o le Ekalesia.
O Taiala nei mo le toefaaulufaleina mai i le mavae ai o le faamavaega:
-
E faia se fono o le tagata o le Ekalesia pe afai sa tapuia’ia mamafa le tagata mai le avea ma tagata o le Ekalesia i le taimi o le faamavaega.
-
E faia se fono o le tagata o le Ekalesia pe afai sa faia e le tagata se agasala matuia, e aofia ai le liliuese, a o le’i faamavae mai le avea ma tagata o le Ekalesia.
I isi tulaga, e lē faia se fono o le tagata o le Ekalesia vagana ua filimaoti e le epikopo po o le peresitene o le siteki o le a manaomia.
Pe a tatau ai se fono o le tagata o le Ekalesia mo se tagata na maua faaeega paia o le malumalu, o le peresitene o le siteki na te faia. Pe a tatau ai se fono o le tagata o le Ekalesia mo se tagata e le’i maua faaeega paia, o le epikopo e faia, faatasi ai ma le faamaoniga mai le peresitene o le siteki.
Afai na auai le tagata i soo se amioga o loo i le 32.16.1, numera 9, a o le’i faamavae po o le mavae ai o le faamavaega mai le avea ma tagata o le Ekalesia, e manaomia la le faamaoniga a le Au Peresitene Sili mo le toefaulufaleina mai. Afai na auai le tagata i soo se amioga o loo i le 32.14.5, numera 1, a o le’i faamavae po o le mavae ai o le faamavaega mai le avea ai ma tagata o le Ekalesia, o le a faia se faamatalaga faaopoopo i luga o le pepa faamaumau o le tagata.
O se tagata e talosagaina le toefaaulufaleina mai e tatau ona ausia tulaga agavaa lava e tasi e pei o isi e papatisoina. Pe a faamalieina le epikopo po o le peresitene o le siteki i le agavaa o le tagata ma faamaoni i le manao e toefaaulufale mai, ua mafai loa ona papatiso ma faamauina le tagata. E lē fatuina se Tusi Faamaonia o le Papatisoga ma le Faamauga (tagai i le 32.14.4).
32.17
Toaga i le Ekalesia, Faauuga, ma le Toefuataiga o Faamanuiaga pe a mavae le Toefaaulufaleina Mai
32.17.1
Toaga i le Ekalesia ma le Faauuga
O le siata lea o loo faailoa atu ai le maualuga talafeagai o le toaga i le Ekalesia mo se tagata ua toefaaulufale mai e ala i le papatisoga ma le faamauga.
|
E Le’i Maua Muamua Faaeega Paia |
Na Maua Muamua Faaeega Paia | |
|---|---|---|
|
Na Umia Muamua le Perisitua | E Le’i Maua Muamua Faaeega Paia
| Na Maua Muamua Faaeega Paia
|
|
O Isi Tagata o le Ekalesia | E Le’i Maua Muamua Faaeega Paia
| Na Maua Muamua Faaeega Paia
|
32.17.2
Toefuataiga o Faamanuiaga
O tagata na maua muamua faaeega paia o le malumalu ma sa toe faaulufale mai e ala i le papatisoga ma le faamauga, ua na o le sauniga o le toefuataiga o faamanuiaga e mafai ai ona maua o latou perisitua ma faamanuiaga o le malumalu (tagai i le Mataupu Faavae ma Feagaiga 109:21). E lē toe faauuina i latou i tofi o le perisitua pe toe faia faaeega paia. O nei faamanuiaga e toefuataiina e ala i le sauniga. E toefuatai atu i uso o latou tofi o le perisitua na i ai muamua, se’i vagana ai le tofi o le Fitugafulu, epikopo, po o le peteriaka.
Ua na o le Au Peresitene Sili e mafai ona faamaoniaina le faatinoga o le sauniga o le toefuataiga o faamanuiaga. O le a latou lē iloiloina lava se talosaga mo lenei sauniga e vave atu nai lo le tasi le tausaga pe a mavae le toefaaulufaleina mai o le tagata e ala i le papatisoga ma le faamauga.
E faatalanoa e le epikopo ma le peresitene o le siteki le tagata e filimaoti ai lona agavaa ma le saunia. A lagona e le peresitene o le siteki ua saunia le tagata, na te talosaga mo se toefuataiga o faamanuiaga e faaaoga ai le PTF. Tagai i le 6.2.3 e uiga i le tiutetauave o le peresitene o le siteki pe a auina atu talosaga i le Au Peresitene Sili.
Afai e faamaonia mai e le Au Peresitene Sili le toefuataiga o faamanuiaga, latou te tofia se Pulega Aoao po o le peresitene o le siteki e faatalanoa le tagata. Afai ua agavaa le tagata, e faatino e le taitai lea le sauniga e toefuatai ai faamanuiaga o le tagata.
Mo faamatalaga e uiga i pepa faamaumau ma le toefuataiga o faamanuiaga, tagai i le 32.14.4.