“32. Panangbabawi ken dagiti Konseho iti Kinamiembro ti Simbaan,” Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw (2020).

“32. 32. Paangbabawi ken dagiti Konseho iti Kinamiembro ti Simbaan,” Sapasap a Handbook.

Ladawan

Lalaki ken babai nga aglinlinnamano

32.

Panagbabawi ken dagiti Konseho iti Kinamiembro ti Simbaan

32.0

Pakauna

Kaaduanna a maaramid ti panagbabawi iti nagbaetan ti indibidual, ti Dios, ken dagiti naapektuan iti basbasol ti maysa a tao. Nupay kasta, no dadduma kasapulan a tulongan ti maysa a bishop wenno stake president dagiti miembro ti Simbaan kadagiti panagkagumaanda nga agbabawi.

No tulongan dagiti miembro iti panagbabawi, managayat ken manangipateg dagiti bishop ken stake president. Surotenda ti pagwadan ti Mangisalakan, a nangitag-ay kadagiti indibidual ken nangtulong kadakuada a nangiwaksi iti basbasolda ket immasidegda iti Dios (kitaen iti Mateo 9:10–13; Juan 8:3–11).

Kas nabalabala iti baba, naurnos daytoy a kapitulo a mangiwanwan kadagiti lider babaen dagiti kangrunaan a pangngeddeng ken tignay a kasapulan a makatulong iti maysa a tao nga agbabawi iti nadagsen a basol ken makatulong a mangsaluad iti dadduma.

Ti Akem ti Simbaan iti Panagtulong iti Tao nga Agbabawi. Dagiti Benneg 32.1–32.4 mangilawlawag iti doktrina ti panagbabawi ken pannakapakawan. Ilawlawag pay dagitoy a benneg ti tallo a panggep dagiti panagiget wenno panangikkat iti kinamiembro iti Simbaan. Mainayon pay, ilawlawagda ti akem dagiti bishop ken stake president iti panangtulong iti panagbabawi.
Panangikeddeng iti Setting para iti Panangtulong iti Tao nga Agbabawi. Dagiti Benneg 32.5–32.7 ket mangipaay kadagiti pangiwanwan para iti panangikeddeng no ti maysa a konseho iti kinamiembro wenno personal a panangbalakad ti umno a setting para iti panagtulong iti maysa a tao nga agbabawi.
Panangipatungpal iti Personal a Panagbalakad. Benneg 32.8 mangted kadagiti pangiwanwan para iti personal a panagbalakad ti bishop wenno stake president. Daytoy pay ti mangilawlawag kadagiti saan a pormal a panangiget iti kinamiembro iti Simbaan.
Panangipatungpal kadagiti Konseho iti Kinamiembro ti Simbaan. Dagiti Benneg 32.9–32.14 mangilawlawag no asino ti akinrebbeng para kadagiti konseho iti kinamiembro, no kasano ti mangiturong kadagitoy, ken dagiti mabalin a pangngeddeng. Mailawlawag pay dagiti resulta dagita a pangngeddeng.
Panangipasubli kadagiti Pribilehio iti Kinamiembro iti Simbaan. Dagiti Benneg 32.15–32.17 mangilawlawag no kasano a maipasubli iti maysa a tao dagiti pribilehio iti kinamiembro iti Simbaan babaen ti panagbabawi.

Malaksid no saan a mainotar, ti panangibasar kadagiti stake president ket mayaplikar met kadagiti mission president. Ti panangibasar kadagiti bishop ket mayaplikar met kadagiti branch president.

TI AKEM TI SIMBAAN ITI PANANGTULONG ITI TAO NGA AGBABAWI

32.1

Panagbabawi ken Pannakapakawan

Kinuna ti Apo nga “awan ti narugit a banag a makatawid iti pagarian ti langit” (Alma 11:37; kitaen met iti 3 Nephi 27:19). Dagiti basoltayo ti mangaramid kadatayo a narugit—saan a maikari nga agnaed iti sidong ti Nailangitan nga Amatayo. Dagitoy pay ti mangyeg iti gura kadatayo iti daytoy a biag.

Ti linteg ti Dios agkasapulan iti bunga no agbasoltayo (kitaen iti Alma 42:14, 17–18). Nupay kasta, ti naindaklan a plano ti asi “mabalinna a penken ti kiddaw ti linteg, ket arakupenna[tayo] iti takiag ti kinatalged” (Alma 34:16; kitaen met iti Mosiah 15:9).

Tapno mapasamak ti planona iti asi, imbaon ti Nailangitan nga Ama ti Bugbugtongna nga Anak, ni Jesucristo, tapno mangsubbot iti basbasoltayo (kitaen met iti Alma 42:15). Sinagaba ni Jesucristo ti pannusa nga indawat ti linteg ti hustisia a kasapulan para iti basbasoltayo (kitaen met iti Doktrina ken Katulagan 19:15–19; kitaen met iti Alma 42:24–25). Babaen daytoy a sakripisio, impakita ti agpada nga Ama ken Anak ti awan patinggana nga ayatda para kadatayo (kitaen iti Juan 3:16).

No aramatentayo ti “pammati iti panagbabawi,” pakawanennatayo ti Nailangitan nga Ama, a mangmangted iti asi babaen ti Pannubbot ni Jesucristo (Alma 34:15; kitaen met iti Alma 42:13). No madalusan ken mapakawantayo, matawidtayo ti pagarian ti Dios iti kamaudiananna (kitaen iti Isaias 1:18; Doktrina ken Katulagan 58:42).

Ti panagbabawi ket ad-adda pay ngem iti panangbalbaliw iti ugali. Daytoy ti panangliklik manipud iti basol ken umasideg iti Nailangitan nga Ama ken ni Jesucristo. Daytoy ti mangiturong iti panagbalbaliw ti puso ken panunot (kitaen iti Mosiah 5:2; Alma 5:12–14; Helaman 15:7). Babaen ti panagbabawi, agbalintayo a baro a tattao, a nakipagtunos iti Dios (kitaen iti 2 Taga Corinto 5:17–18; Mosiah 27:25–26).

Ti gundaway nga agbabawi ket maysa kadagiti kaindaklanan a bendision nga inted kadatayo ti Nailangitan nga Ama babaen ti sagut ti Anakna.

32.2

Dagiti Panggep dagiti Panagiget wenno Panagpaikkat iti Kinamiembro iti Simbaan

No mabuniagan ti maysa a tao, agbalin isuna a paset ti “sangakabbalayan ti Dios” (Taga Efeso 2:19). Mairaman iti katulagan ti panagbuniag ti maysa a kari nga agpasnek nga agbiag mayannurot kadagiti pannursuro ken bilbilin ni Cristo. No agbasol ti maysa a tao, aramatenna ti pammatina ken ni Jesucristo ket agbabawi, nga agpanpannuray iti asina a mangpapigsa ken mamakawan.

No aglabsing ti maysa a miembro iti nadagsen a basol, tulongan isuna ti bishop wenno stake president a makapagbabawi. Kas paset daytoy a proseso, mabalin a kasapulanna ti mangiget iti sumagmamano a prribilehio iti kinakameng iti Simbaan para iti sumagmamano a panawen. Iti sumagmamano a situasion, mabalin a kasapulanna ti mangikkat iti kinamiembro ti tao iti sumagmamano a panawen.

Ti panangiget wenno panangikkat iti kinamimebro ti maysa a tao ket saan a nairanta a pangdusa. Ketdi, kasapulan dagitoy a tignay no dadduma tapno matulongan ti maysa a tao nga agbabawi ken mangpadas iti panagbalbaliw ti puso. Dagitoy pay ti mangted iti tao iti panawen a naespirituan tapno mangpabaro ken mangtungpal manen kadagiti katulaganna.

Kitaen ti bishop wenno stake president dagiti panagiget wenno panangikkat iti kinamiembro kas nabalabala iti 32.5–32.14. Mabuyogan dagitoy a tignay babaen dagiti kondision ti panagbabawi. No sipupudno nga agbabawi ti maysa a tao, mabalin a maipasubli kenkuana dagiti pribilehio ti kinamiembro iti Simbaan.

No kasapulan dagiti panagiget wenno panangikkat iti kinamiembro, suroten ti bishop wenno stake president ti pannarabay ti Espiritu Santo ken dagiti pangiturong iti daytoy a kapitulo. Agtignay iti espiritu ti ayat (kitaen iti 32.3).

Mainaig iti Simbaan dagiti panangiget iti kinamiembro iti Simbaan, saan a mainaig iti sibil wenno krimen. Apektuanda laeng ti sasaaden ti maysa a tao iti Simbaan. (Kitaen iti Doktrina ken Katulagan 134:10.)

Dagiti tallo a panggep dagiti panangiget iti wenno panagikkat iti kinamiembro ket dagiti sumaganad.

32.2.1

Tumulong a Mangsalaknib iti Dadduma

Ti umuna a panggep ket tumulong a mangsalaknib iti dadduma. No dadduma mangbutbuteng ti maysa a tao mainaig iti pisikal ken espiritual. Dagiti tignay a mananggundaway, pisikal a pannakadangran, seksual a panagabuso, panagabuso iti sustansia (substance abuse), panagkusit, ken apostasia ti sumagmamano kadagiti wagas a mapasamak daytoy. Addaan iti inspirasion, agtignay ti bishop wenno stake president a mangsalaknib iti dadduma no agbanta ti maysa a tao kadagitoy ken ti dadduma pay a serioso a wagas (kitaen iti Alma 5:59–60).

32.2.2

Tulongan ti Tao a Maaddaan iti Panangsubbot a Bileg ni Jesucristo babaen iti Panagbabawi

Ti maikadua a panggep ket ti panagtulong iti tao a maaddaan iti panangsubbot a bileg ni Jesucristo babaen iti panagbabawi. Babaen daytoy a proseso, mabalin nga agbalin manen a nadalus ken maikari nga umawat iti amin a bendision ti Dios.

32.2.3

Saluadan ti Integridad ti Simbaan

Ti maikatlo a panggep ket mangsaluad iti integridad ti Simbaan. Mabalin a kasapulan ti panangiget wenno panangikkat iti kinamiembro ti tao iti Simbaan no ti ugalina ket nalaus a makadangran iti Simbaan (kitaen iti Alma 39:11). Ti integridad ti Simbaan ket saan a masaluadan babaen iti panangkalub wenno panangpabassit kadagiti nadagsen a basol—no di babaen ti panangrisut kadagitoy.

32.3

Ti Akem dagiti Ukom ti Israel

Ladawan

bishop a makisasao iti lalaki

Maawagan ken mai-set apart dagiti bishop ken stake president nga agbalin nga ukom iti Israel (kitaen iti Doktrina ken Katulagan 107:72–74). Iggemda dagiti tulbek ti priesthood a mangibagi iti Apo iti panagtulong kadagiti miembro ti Simbaan nga agbabawi dagiti dadduma a tumulong iti aramid ti Dios (kitaen iti Doktrina ken Katulagan 13:1; 107:16–18).

Masansan a tumulong dagiti bishop ken stake president iti panagbabawi babaen ti personal a panangbalakad. Mabalin nga iraman daytoy a panagtulong ti impormal a panangiget iti sumagmamano a probilehio ti kinamiembro iti Simbaan para iti sumagmamano a panawen. (Kitaen iti 32.8.)

Para iti sumagmamano a nadagsen a basol, tumulong dagiti lider iti panagbabawi babaen ti panangangay iti maysa a konseho iti kinamiembro (kitaen iti 32.6 ken 32.9–32.14). Mabalin nga iraman daytoy a panagtulong ti pormal a panangiget iti sumagmamano a pribilehio ti kinamiembro iti Simbaan wenno panangikkat iti kinamiembro ti maysa a tao para iti maysa a panawen (kitaen iti 32.11.3 ken 32.11.4).

Tumulong dagiti bishop ken stake president kadagiti miembro ti Simbaan a maawatanda nga ay-ayaten ti Dios dagiti annakna. Gapu ta kayatna ida nga agragsak ken umawat kadagiti bendision, maseknan pay unay Isuna maipapan iti panagtungpal ken panagbabawida.

Managayat ken manangisakit dagiti bishop ken stake president no tulonganda dagiti miembro nga agbabawi. Maysa a pangiwanwan ti interaksion ti Mangisalakan iti babai a naidatag gapu iti pannakiabig ( Juan 8:3–11). Nupay saanna nga insao a napakawanen dagiti basolna, saanna a kinondena daytoy. Ketdi, imbagana kenkuana a “saanen nga agbasol pay”—agbabawi ken baliwanna ti biagna.

Isuro dagitoy a lider nga adda “rag-o … iti langit iti maysa a managbasol a nagbabawi” (Lucas 15:7). Naanus, managsuporta, ken positiboda. Paregtaenda ti namnama. Isuro ken paneknekanda a gapu iti pangsubbot nga ayat ti Mangisalakan, makapagbabawi ken makapagbalin a nadalus ti amin.

Agkiddaw dagiti bishop ken stake president iti pannarabay manipud iti Espiritu tapno mangammo no kasano a tulongan ti tunggal tao nga agbabawi. Kadagiti laeng nadagsen a basol nga addaan ti Simbaan iti naituding a pagrukodan kadagiti tignay a nasken nga aramiden dagiti liderna (kitaen iti 32.6 ken 32.11). Awan ti agpada a dua a situasion. Ti panangbalakad nga ited dagiti lider ken ti proseso ti panagbabawi nga isuroda ket nasken a maparegta ken mabalin nga agdududma para iti tunggal tao.

Ammo ti Apo dagiti kasasaad, kapasidad, ken naespirituan a kinamanakem ti tunggal tao. Ti Espiritu ti mangtulongto kadagiti lider a makarikna no kasano a matulongan dagiti miembro nga agaramid kadagiti kasapulan a pangbalbaliw tapno maimbagan ken maliklikanda ti sulisog a mangulit nga agbasol.

Iti panangtulong iti maysa a tao nga agbabawi, agsubli iti Dios, ken maimbagan babaen ti pannubbot ni Jesucristo ket maysa kadagiti kararagsakan a padas nga adda iti maysa a tao. Ti Doktrina ken Katulagan 18:10–13 ilawlawagna:

“Laglagipenyo a napateg dagiti kararua iti imatang ti Dios;

“Ta, adtoy, nagsagaba ti Apo a Mannubbotyo iti patay iti lasag; gapuna sinagabana ti saem ti amin a tao, tapno mabalin nga agbabawi ti amin a tao ken umasidegda kenkuana.

“Ket nagungar manen manipud iti patay, tapno mayasidegna amin a tao kenkuana, iti kasasaad a panagbabawi.

“Ket ita nalaus ti rag-ona iti kararua nga agbabawi!”

32.4

Panagipudno, Kumpidensialidad, ken Panangireport kadagiti Agturay iti Gobierno

32.4.1

Panagipudno

Agkasapulan ti panagbabawi a nasken a maipudno dagiti basol iti Nailangitan nga Ama. Kinuna ni Jesucristo, “Babaen daytoy mammuanyo no agbabawi ti tao iti basbasolna—adtoy, ipudnona ida ken tallikudanna ida” (Doktrina ken Katulagan 58:43; kitaen met iti Mosiah 26:29).

No aglabsing dagiti miembro ti Simbaan iti nadadagsen a basbasol, mairaman pay iti panagbabawida ti panangipudno iti bishop wenno stake presidentda. Kabaelanna ngarud nga usaren dagiti tulbek ti ebanghelio ti panagbabawi a maipaay kadakuada (kitaen iti Doktrina ken Katulagan 13:1; 84:26-27; 107:18, 20). Daytoy ti mangtulong kadakuada nga agbabawi ken agsubli iti dana ti ebanghelio babaen ti bileg ti Pannubbot ti Mangisalakan.

Ti panggep ti panangipudno ket mangallukoy kadagiti miembro a mangpalag-an iti bagbagida tapno naan-anay a makiddawda ti tulong ti Apo iti panagbalbaliw ken panagpaimbag. Ti panangpaadda iti maysa a “nasneban a puso ken agbabbabawi nga espiritu” ket matulongan babaen iti panagipudno (2 Nephi 2:7). Ipakita ti natallugod a panagipudno nga agtarigagay ti maysa a tao nga agbabawi.

No agipudno ti maysa a miembro, suroten ti bishop ken stake president dagiti pangiwanwan para iti panangbalakad iti 32.8. Nainkararagan nga agkiddaw iti pannarabay maipapan iti maitutop a setting para iti panangtulong iti miembro nga agbabawi (kitaen iti 32.5). Ibilangna no makatulong met laeng ti konseho iti kinamiembro. No idawat ti annuroten iti Simban a kasapulan ti konseho iti kinamiembro, ilawlawagna daytoy (kitaen iti 32.6 ken 32.10).

No dadduma nagbasol ti maysa a miembro iti asawa wenno sabali pay a nataengan. Kas paset ti panagbabawi, gagangay a nasken nga ipudnona iti dayta a tao ken dumawat iti pannakapakawan. Ti maysa nga agtutubo a naglabsing iti nadagsen a basol ket gagangay a maallukoy a mangyuman kadagiti nagannak kenkuana.

32.4.2

Dagiti Nadagsen a Basol a Saan a Naipudno wenno Napaidaman

Gagangay a maammuan ti maysa a bishop wenno stake president maipapan iti nadagsen a basol babaen ti panangipudno wenno manipud iti sabali a tao. Mabalin a maawatna pay dagiti parikna maipapan iti mabalin a nadagsen a basol babaen ti Espiritu Santo. No iparikna kenkuana ti Espiritu a mabalin nga agkarkarigatan iti basol ti maysa a tao, mabalinna a yiskediul ti maysa nga interbyu. Bayat ti interbyu, ibinglayna dagiti pakaseknanna iti nasayaat, nadayaw a wagas. Liklikanna ti ania man a tono ti pammabasol.

No ilibak ti maysa a miembro ti panaglabsingna iti nadagseng a basol nga addan impormasion ti bishop wenno stake president a suportaran, mabalin pay laeng a maangay ti maysa a konseho iti kinamiembro. Nupay kasta, saan nga umdas ti naespirituan nga impresion tapno mangangay iti maysa a konseho (kitaen iti Doktrina ken Katulagan 10:37). Mabalin ti lider ti mangummong iti nayon nga impormasion no kasapulan. Surotenna dagiti pangiwanwan iti 32.4.3 ken 32.10.2.

32.4.3

Impormasion iti Panangummong

Sakbay ti panangangay iti konseho iti kinamiembro, mangummong ti bishop wenno stake president iti adu nga impormasion agingga a kasapulanna. Masansan nga umdas ti impormasion manipud iti panangipudno ti maysa a miembro. Mabalin met nga aggapu ti impormasion manipud iti maysa a miembro ti pamilia, sabali pay a lider ti Simbaan, maysa a biktima, wenno karaman iti basol.

No agummong iti impormasion, nasken nga agusar laeng ti bishop wenno stake president kadagiti pamuspusan a maitutop para iti maysa a lider iti priesthood. Nasken a saan a mangsiput iti pagtaengan ti maysa a tao wenno mangirekord kenkuana nga awan ti pammalubosna. Wenno nasken a saan nga agusar kadagiti kannawidan a maisuppiat iti linteg.

Manmano dagiti palso a pammabasol ngem mabalin a mapasamak. Nasken a naannad dagiti lider iti priesthood no adda basst nga impormasion iti likudan ti balikas ti maysa a tao. Kas pagarigan, mabalin nga ilibak ti maysa a miembro a napabasol iti kaso iti pannakiabig. Ilawlawag dagiti nasantuan a kasuratan a “maiparang amin a balikas a maibusor iti lalaki wenno babai babaen ti dua a saksi ti simbaan” (Doktrina ken Katulagan 42:80). “Dua a saksi” kaipapananna ti dua a nagsina a naggapuan ti impormasion. Mabalin nga iraman daytoy ti pannakaammo ti maysa a nakiraman ken ti maysa a sabali a mapagpannurayan a naggapuan. No dadduma mabalin a kasapulan nga aguray ti maysa a lider iti priesthood tapno agtignay agingga nga addan a magun-od ti ad-adu pay nga impormasion.

No agum-ummong ti maysa a lider ti Simbaan impormasion para iti maysa a konseho iti kinamiembro, nasken nga isardengna a dagus no maammuanna a sireregta nga agpalpalutpot dagiti mangibagi ti linteg iti miembro. Maaramid daytoy tapno maliklikan dagiti posible a panangako a mabalin a linapdan ti lider ti hustisia. Para iti legal a balakad maipapan kadgitoy a situasion iti United States ken Canada, ti stake president ti mangkontak iti Church’s Office of General Counsel:

1-800-453-3860, extension 2-6301

1-801-240-6301

Iti ruar ti United States ken Canada, ti stake president ti mangkontak iti area legal counsel iti area office.

Gagangay a saan a maangay ti konseho ti kinamiembro tapno ibilang ti ugali a maam-amiris babaen ti sibil wenno criminal trial court agingga a nadanon ti korte ti maudi a panangeddeng. Iti sumagmamano a kaso mabalin met a maitutop nga itantan ti konseho iti kinamiembro agngga a di agpaso ti panawen ti legal nga apela wenno saan a naawat ti apela.

32.4.4

Kumpidensialidad

Addaan dagiti bishop, stake president, ken dagiti mamagbagada iti sagrado a pagrebbengan a mangsaluad iti amin a kompidensial nga impormasion a naitalek kadakuada. Mabalin a naammuan daytoy nga impormasion kadagiti interbyu, panagbalakad, ken panagipudno. Maaramat met ti isu met la a pagrebbengan iti kompidensialidad iti amin a makipaset kadagiti konseho iti kinamiembro. Napateg ti kompidensialidad gapu ta mabalin a saan nga agipudno dagiti miembro iti basbasol wenno agkiddaw iti pannarabay no saanto a mapagtalinaed a kompidensial dagiti ipudnoda. Ti panangdadael iti panagtalek ti mangliput iti panagtalek dagiti miembro ken makaigapu iti pannakapukaw iti panagtalekda kadagiti liderda.

Maitunos iti pangrebbenganda iti kompidensialidad, mabalin nga ipakaammo laeng ti maysa a bishop, stake president, wenno dagiti mamagbagada ti kasta nga impormasion kas kadagiti sumaganad:

Nasken a kasaritada ti stake president, mission president, wenno bishop ti miembro maipapan iti panangangay iti maysa a konseho iti kinamiembro wenno dagiti mainaig a pakaseknan a banag. Mabalin met a kasarita ti stake president ti naidutok kenkuana nga Area Seventy. No kasapulan, yasideg ti Area Seventy ti stake president iti Area Presidency. Ti stake president laeng ti mangikeddeng no nasken a maangay ti maysa a konseho wenno ti pagbanagan daytoy.
Umakar ti tao iti baro a ward (wenno no mai-release ti lider iti priesthood) bayat ti pannakaitantan ti tignay iti kinamiembro wenno dadduma pay a serioso a pakaseknan. Kadagitoy a kaso, ipakaammo ti lider iti baro a bishop wenno stake president maipapan kadagiti pakaseknan wenno ti naitantan a tignay (kitaen iti 32.14.7). Ipakaammona pay iti lider no mabalin a mangbutbuteng ti miembro kadagiti dadduma.
Maammuan ti maysa a bishop wenno stake president a ti maysa a miembro ti Simbaan nga agnanaed iti ruar ti ward wenno stake ket mabalin a nairamanen iti nadagsen a basol. Iti dayta a kasasaad, sililimed a kontakenna ti bishop dayta a miembro.
Kasapulan nga ibutaktak ti impormasion kabayatan ti maang-angay a konseho ti kinamiembro. Kumpidensial ti amin nga impormasion a naummong ken naibinglay kas paset ti konseho iti kinamiembro.
Pilien ti maysa a miembro ti mangted iti pammalubos nga ibinglay ti lider ti impormasion kadagiti masinunuo a tattao. Mabalin nga iraman ditoy dagiti nagannak, lider ti Simbaan, wenno dadduma pay a mabalin a mangipaay iti suporta. Saan nga ibinglay ti lider ti impormasion iti likudan ti pammalubos nga inted ti miembro.
Mabalin a kasapulan ti mangibinglay iti bassit nga impormasion maipapan iti pangngeddeng ti maysa a konseho iti kinamiembro (kitaen iti 32.12.2).

Iti amin a dadduma pay a situasion, nasken nga agibasar ti lider iti 32.4.5. Iraman dagitoy a kaso ti no mabalin nga idawat ti linteg a maireport ti krimen, kas iti panagabuso iti ubing, kadagiti agturay iti gobierno.

Tapno matulongan dagiti lider iti panangsaluad kadagiti dadduma ken panagtulnong iti linteg, mangted ti Simbaan iti tulong manipud kadagiti nasanay a propesional. Tapno maawat daytoy a pangiwanwan, tawagan a dagus dagiti lider ti abuse help line ti Simbaan no adda iti lugar a magun-od daytoy (kitaen iti 32.4.5 ken 38.6.2.1). Iti lugar nga awan a magun-od daytoy, ti stake president ti mangkontak iti area legal counsel iti area office.

Iti laeng maysa a situasion a nasken nga ibutaktak ti bishop wenno stake president ti kumpidensial nga impormasion a saan nga agkiddaw nga umuna iti kasta a pangiwanwan. Dayta ti no kasapulan ti panangibutaktak tapno maliklikan ti napeggad a pannakadangran wenno nakaro a pannakadunor ken awanen ti oras tapno agkiddaw iti pangiwanwan. Kadagiti kasta a kaso, napatpateg ti pagrebbengan a mangsalaknib iti dadduma ngem iti pagrebbengan a mangitalimeng iti kumpidensial a banag. Nasken a kontaken a dagus dagiti lider dagiti sibil nga agturay.

No agisurat wenno makisarita dagiti lider iti tunggal maysa iti online, masaluadanda ti pannaka-access daytoy nga impormasion. Maikkatda wenno madadaelda pay ti impormasion no saandan a kasapulaan pay daytoy. Saanda a kasapulan nga ibinglay ti personal nga impormasion.

Nalabit a mangsubok dagiti sibil nga agturay iti kompidensialidad a naidawat iti maysa a lider iti priesthood. No mapasamak daytoy iti United States ken Canada, ti stake president ti mangkontak iti Church’s Office of General Counsel:

1-800-453-3860, extension 2-6301

1-801-240-6301

Iti ruar ti United States ken Canada, ti stake president ti mangkontak iti area legal counsel iti area office.

32.4.5

Panagreport kadagiti Agturay iti Gobierno

Ti panagbabawi iti sumagmamano a basol ket mangidawat iti maysa a tao nga agreprot kadagiti agturay iti gobierno no naglabsing daytoy iti maysa a linteg a sibil. Allukoyen dagiti bishop ken stake president dagiti miembro a mangsurot iti linteg ken mangireport kadagiti kasta a banag. Balakadanda pay dagiti miembro a mangala iti nalaing a legal a balakad no agireport. Annuroten ti Simbaan ti agtungpal iti linteg.

Iti adu a lugar,idawat ti linteg kadagiti lider iti priesthood a mangireport iti sumagmamano nga ilegal nga ugali nga ammoda. Kas pagarigan, adda dagiti estdo ken pagilian a mangidawat nga ireport ti panagabuso iti ubing kadagiti agturay a mangibagi iti linteg.

Iti sumagmamano a pagilian, nangipasdek ti Simbaan iti kumpidensial nga abuse help line a mangtulong kadagiti bishop ken stake president. Nasken a tumawag a dagus dagitoy a lider iti help line maipapan iti tunggal situasion a mabalin a nakaabusuan ti maysa a tao—wenno adda iti peggad ti pannakaabuso (kitaen iti 38.6.2.1). Sidadaan a magun-od daytoy iti 24 nga oras iti aldaw, 7 nga aldaw ti lawas.

Kadagiti pagilian nga awanan iti help line, ti bishop a makaammo iti panagabuso nasken a kontakenna ti stake presidentna, a nasken nga agkiddaw iti pangiwanwan manipud iti area legal counsel iti area office.

Para iti ad-adu pay nga impormasion maipapan iti panangireport iti panagabuso, kitaen iti 18.3 ken 18.4.

PANANGIKEDDENG ITI SETTING PARA ITI PANANGTULONG ITI TAO NGA AGBABAWI

32.5

Dagiti Setting para iti Panangtulong iti Tao nga Agbabawi

Kalpasan a naammuan a naglabsing ti maysa a miembro iti nadagsen a basol, mangala kadagiti addang ti maysa a bishop wenno stake president a mangsaluad kadagiti dadduma. Kiddawenna pay ti pannarabay ti Espiritu Santo iti panangikeddeng iti setting para iti panangtulong iti tao nga agbabawi ken umasideg nga ad-adda pay iti Mangisalakan.

32.5.1

Pakagupgopan dagiti Setting

Nailista iti sumaganad a tsart ti tallo a setting para iti panangtulong iti tao nga agbabawi. Gupgopenna pay ti sumagmamano a konsiderasion para kadagiti lider no mangikeddeng no ania a setting ti mausar.

Dagiti Setting para iti Panangtulong iti Tao nga Agbabawi

Setting	Dagiti Sumagmamano a Konsiderasion ( kitaen met iti 32.7)
Setting Konseho iti Kinamiembro iti Stake	Dagiti Sumagmamano a Konsiderasion ( kitaen met iti 32.7) Para kadagiti miembro nga immawat iti endowment iti templo. Kasapulan no ti maysa a lalaki wenno babai a na-endow ket nalabit a paikkatna ti kinamiembrona iti Simbaan para iti ania man kadagiti nadagsen a basol wenno tignay a nadakamat iti 32.6.1, 32.6.2, wenno 32.6.3.
Setting Konseho iti Kinamiembro iti Ward	Dagiti Sumagmamano a Konsiderasion ( kitaen met iti 32.7) Para iti asino man a miembro. Kasapulan para kadagiti nadagsen a basol a nadakamat iti 32.6.1. Mabalin a kasapulan para kadagiti nadagsen a basol a nadakamat iti 32.6.2 ken 32.6.3. Saan nga umdas no ti maysa a lalaki wenno babai a na-endow ket nalabit a paikkatna ti kinamiembrona iti Simbaan para iti ania man kadagiti nadagsen a basol wenno tignay a nadakamat iti 32.6.1, 32.6.2, wenno 32.6.3.
Setting Personal a Panagbalakad (kitaen iti 32.8.6)	Dagiti Sumagmamano a Konsiderasion ( kitaen met iti 32.7) Para iti asino man a miembro. Mabalin a mangiram kadagiti saan a pormal a panangiget iti kinamiembro iti Simbaan. Mabalin a saan nga umdas para kadagiti nadagsen a basol wenno tignay a pakatulongan ti maysa a konseho iti kinamiembro iti proseso ti panagbabawi (kitaen iti 32.6.2 ken 32.6.3). Saan nga umdas para kadagiti nadagsen a basol nga agkasapulan iti maysa a konseho iti kinamiembro (kitaen iti 32.6.1). Saan nga umdas no ti maysa a lalaki wenno babai a na-endow ket nalabit a paikkatna ti kinamiembrona iti Simbaan para iti ania man kadagiti nadagsen a basol wenno tignay a nadakamat iti 32.6.1, 32.6.2, wenno 32.6.3.

Ti personal a panagbalakad ken dagiti saan a pormal a panagiget ti bishop wenno stake president ket no dadduma saan nga umdas a mangtulong iti tao nga agbabawi kadagiti nadagsen a basol. Nagipaay ti Apo kadagiti konseho iti kinamiembro a mangtulong a mangukom iti Israel kadagitoy a situasion. (Kitaen iti Exodo 18:12–27; Mosiah 26:29–36; Doktrina ken Katulagan 42:80–83; 102.) Para iti sumagmamano a nadagsen a basol, kasapulan iti annuroten iti Simbaan ti maysa a konseho (kitaen iti 32.6.1). Ti panaglabsing kadagiti katulagan iti templo ti mangpadakkel iti panagtarigagay iti panagkasapulan iti maysa a konseho iti kinamiembro (kitaen iti 32.7.4).

Iti maysa a ward, tumulong dagiti mamagbaga ti bishop kadagiti konseho iti kinamiembro. Iti maysa a stake, tumulong dagiti mamagbaga ti stake president. Iti sumagmamano a konseho iti kinamiembro iti stake, makiraman ti nangato a konseho (kitaen iti 32.9.2). Iti maysa a konseho iti kinamiembro, makipagkita ti bishopric wenno stake presidency iti tao iti pudno a kaipapanan ti ayat.

32.5.2

Panangikeddeng iti Setting ken Panangitiempo

No ikeddng no ania kadagitoy a setting ti kasayaatan a makatulong iti maysa a tao nga agbabawi, kiddawen dagiti lider ti pannarabay ti Espiritu Santo. Ibilangda pay dagiti sumaganad a paktor:

Ti kinadagsen ti basol ken ti annuroten ti Simbaan maipapan no kasapulan met laeng ti maysa a konseho (kitaen iti 32.6)
Dagiti kasasaad ti tao (kitaen iti 32.7)

Makiinnuman dagiti bishop iti stake president maipapan kadagiti masinunuo a situasion. Nasken nga umawat iti pananganamong ti stake president sakbay ti panangangay iti konseho iti kinamiembro.

Kadagiti narigat a pakaseknan a banag, mabalin nga agkiddaw ti stake president iti balakad manipud iti naidutok kenkuana nga Area Seventy. Nasken a makiuman ti stake president iti Panguluen ti Area maipapan kadagiti pakaseknan a banag a nabalabala iti 32.6.3. Nupay kasta, ti stake president laeng ti mangikeddeng no nasken a maangay ti maysa a konseho tapno risuten ti galad. No maangay ti maysa a konseho, ikeddeng ti stake president wenno bishop ti pagbanagan.

No ikeddeng ti bishop wenno stake president nga umdasen ti personal a panangbalakad, surotenna dagiti pangiwanwan iti 32.8. No ikeddengna a kasapulan ti konseho iti kinamiembro, wenno no idawat ti annuroten ti Simbaan ti maysa a konseho, ti maysa a mangiturong iti daytoy surotenna dagjiti procedure iti 32.9–32.14.

Sakbay ti panangangay iti konseho, mabalin nga ikeddeng ti bishop wenno stake president a dagiti saan a pormal a panagiget iti kinamiembro ti kasayaatan para iti maysa a panawen. Angayenna ti konseho no daytoy ti kasayaatan a mangallukoy iti napudno a panagbabawi ti miembro. Nupay kasta, nasken a saanna nga itantan ti maysa a konseho no kasapulan a mangsaluad iti dadduma.

32.6

Ti Kinadagsen ti Basol ken ti Annuroten ti Simbaan

Ti kinadagsen ti maysa a basol ket napateg a konsiderasion iti panangikeddeng iti setting a (1) mangtulongto a mangsaluad iti dadduma ken (2) mangtulong iti maysa a tao nga agbabawi. Kinuna ti Apo a “di[na] kitaen ti basol a di mangted iti uray kabassitan a pawayway” (Doktrina ken Katulagan 1:31; kitaen met iti Mosiah 26:29). Saan koma a di ikankano dagiti katulonganna ti ebedinsia ti nadagsen a basol.

Dagiti nadagsen a basol ket nairanta ken dakkel a panaglabsing a maibusor kadagiti linteg ti Dios. Nailista iti baba dagiti kategoria dagiti nadagsen a basol.

Dagiti naranggas a tignay ken panagabuso (kitaen iti 32.6.1.1 ken 32.6.2.1)
Seksual nga imoralidad (kitaen iti 32.6.1.2 ken 32.6.2.2)
Dagiti inuulbod a tignay (kitaen iti 32.6.1.3 ken 32.6.2.3)
Dagiti panaglabsing iti panagtalek (kitaen iti 32.6.1.4 ken 32.6.2.4)
Dadduma pay a tignay (kitaen iti 32.6.1.5 ken 32.6.2.5)

Iladawan dagiti sumaganad a benneg no kasapulan ti konseho iti kinamiembro, no mabalin a kasapulan daytoy, ken no saan a kasapulan daytoy.

32.6.1

No Naidawat a Kasapulan ti Konseho iti Kinamiembro

Nasken a mangangay ti bishop wenno stake president iti konseho iti kinamiembro no ipakita ti impormasion a mabalin a naglabsin ti maysa a miembro iti ania man kadagiti basol a nailadawan iti daytoy a benneg. Para kadagitoy a basol, kasapulan ti maysa a konseho ania man ti lebel ti naespirituan a panagdur-as ken pannakaawat iti ebanghelio ti maysa a miembro.

Kitaen iti 32.11 para kadagiti potensial a pagbanangan dagiti konseho a napagtitipon para kadagiti basol a nailista iti daytoy a benneg. Saan nga opsion dagiti impormal a panagiget iti kinamiembro para kadagitoy a konseho.

32.6.1.1

Dagiti Naranggas a Tignay ken Panagabuso

Panagpatay. Saan a kasapulan ti konseho ti kinamiembro no pumatay ti maysa a miembro iti maysa a tao. Kas nausar ditoy, ti panagpatay ket naigagara, ken saan a nainkalintegan a panaggudas iti biag ti tao. Kasapulan ti panangikkat iti kinamiembro iti Simbaan ti maysa a tao.

Saan nga iraman ti panagpatay dagiti tignay ti polisia wennno militar a naka-duty. Saan a maibilang a panagpatay ti panangpaikkat iti sikog iti daytoy a konteksto. No ipapatay ti gapu ti aksidente wenno babaen ti panangsalaknib iti bagi wenno dadduma, mabalin a saan a maibilang a panagpatay ti pananggudas iti biag ti tao. Mabalin met a pudno daytoy iti dadduma pay a situasion, kas koma no adda limitado a kabaelan iti panunot ti maysa a tao.

Panagrames. Kasapulan ti konseho ti kinamiembro para iti panagrames. Kas nausar ditoy, ti panagrames ket napilit a seksual a pannakinaig wenno pannakinaig iti maysa a tao a saan a makaited iti legal a pammalubos gapu iti kurang a kabaelan iti panunot ken bagi. Kas nausar ditoy, ti panagrames saanna nga iraman ti seksual a panagkanaig ti nagdenna a di pay nagkallaysa a menor de edad nga agpada ti tawenda.

Pannakasentensia iti Seksual a Pammilit. Kasapulan ti maysa a konseho ti kinamiembro no nasentensiaan ti maysa a miembro iti seksual a pammilit.

Panagabuso iti Ubing wenno Agtutubo. Naidawat a kasapulan ti konseho iti kinamiembro no inabuso ti maysa a tao ti maysa nga ubing wenno agtutubo kas nailadawan iti 38.6.2.3.

Panagabuso iti Asawa wenno Sabali pay a Nataengan. Adda maysa nga spectrum ti kadagsen iti abusado nga ugali. Kitaen iti 38.6.2.4 para iti no kasapulan ti maysa a konseho para iti panagabuso iti asawa wenno sabali pay a nataengan.

Naranggas a Mananggundaway nga Ugali. Kasapulan ti konseho iti kinamiembro no madagdagullit a dangran ti maysa a nataengan ti bagi dagiti tao babaen ti naranggas a tignay ken isu ti maysa a pagbutbutngan dagiti dadduma.

32.6.1.2

Seksual nga Imoralidad

Insesto. Kasapulan ti konseho ti kinamiembro para iti insesto kas nailawlawag iti 38.6.10. Dumani kanayon a kasapulan ti panangikkat iti kinamiembro iti Simbaan ti maysa a tao.

Pornograpia iti Ubing. Naidawat a kasapulan ti konseho iti kinamiembro no nairaman ti maysa a tao iti pornograpia iti ubing wenno kas nabalabala iti 38.6.6.

Panagasawa iti Ad-adu ngem Maysa. Kasapulan ti maysa a konseho iti kinamiembro no ammo ti maysa a tao a sumrek iti panangasawa iti ad-adu ngem maysa. Mabalin a mapasamak ti sumagmamano a panagasawa iti ad-adu ngem maysa iti nalimed, a di ammo ti maysa nga asawa maipapan iti maysa wenno ad-adu pay nga asawa. Kasapulan ti panagikkat iti kinamiembro iti Simbaan ti maysa a tao no ammo ti maysa a tao a sumrek iti panangasawa iti ad-adu ngem maysa.

Mananggundaway a Seksual nga Ugali. Kasapulan ti konseho iti kinamiembro no madagdagullit a seksual a dangran ti maysa a nataengan ti bagi dagiti tao ken isu ti maysa a pagbutbutngan dagiti dadduma.

32.6.1.3

Dagiti Inuulbod a Tignay

Mananggundaway nga Ugali iti Pakaseknan iti Kuarta. Kasapulan ti konseho iti kinamiembro no addaanen iti istoria iti naigagara ken madagdagullit a seksual a panangdangran ti maysa a nataengan kadagiti tao a mainaig iti pakaseknan iti kuarta ken isu ti maysa a pagbutbutngan dagiti dadduma (kitaen iti 38.6.2.4). Iraman daytoy ti panagkusit iti investment ken maipada nga aramid. Saan a maibilang a panagkusit ti saan a nairanta a pannakapukaw ti kuarta gapu kadagiti kasasaad ti ekonomia. No adda panagdarum, mabalin nga ikeddeng dagiti priesthood leader ti aguray agingga a pinal ti resulta.

32.6.1.4

Dagiti Panaglabsing iti Panagtalek

Nadagsen a Basol Kabayatan ti Panangiggem iti Napateg a Posision iti Simbaan. Kasapulan ti maysa a konseho ti kinamiembro no naglabsing ti maysa a miembro iti nadagsen a basol kabayatan ti panangiggemna iti napateg a posision. Iraman dagitoy ti General Authority, General Church Officer, Area Seventy, temple president wenno matron, mission president wenno ti companionna, stake president, patriarch, wenno bishop. Saan a mayaplikar daytoy kadagiti branch president. Nupay kasta, dagiti pribilehio iti kinamiembro ti maysa a branch president ket mabalin a maigetan wenno maikkat kas maipada iti dadduma a miembro.

32.6.1.5

Sumagmamano a Dadduma pay a Tignay

Pannakasentensia iti Kadadagsenan a Basbasol. Kasapulan ti maysa a konseho ti kinamiembro iti kaaduan a kaso no nasentensiaan ti maysa a miembro iti kadadagsenan a basbasol.

32.6.2

No Mabalin a Kasapulan ti Konseho iti Kinamiembro

Mabalin a kasapulan ti konseho iti kinamiembro kadagiti sumagmamano a kasasaad.

32.6.2.1

Dagiti Naranggas a Tignay ken Panagabuso

Imbilin ti Apo, “Saankayo … a mamapatay, wenno agaramid iti ania man a kaarngina”” (Doktrina ken Katulagan 59:6; nainayon ti nagiray a balikas). Dagiti naranggas a tignay ken panagabuso a mabalin a pakasapulan iti maysa a konseho iti kinamiembro iramanna (ngem saan a limitado iti) dagiti nakalista iti baba.

Nagandat a Panagpatay. Naigagara a panagpadas a panangpatay iti maysa a tao.

Seksual a Panagabuso, Agraman ti Panagdarup ken Panangbutbuteng. Sakupen ti seksual a panagabuso ti adu a nadumaduma a tignay (kitaen iti 38.6.18). Mabalin a kasapulan ti konseho iti kinamiembro para iti maysa a tao a seksual a dinarup wenno inabuso ti maysa a tao. Kitaen iti 38.6.18.3 para iti no kasapulan ti maysa a konseho.

Panagabuso iti Asawa wenno Sabali pay a Nataengan. Adda maysa nga spectrum ti kadagsen iti abusado nga ugali (kitaen iti 38.6.2.4). Mabalin a kasapulan ti konseho iti kinamiembro para iti maysa a tao a nangabuso iti asawa wenno sabali pay a nataengan. Kitaen iti 38.6.2.4 para iti no kasapulan ti maysa a konseho.

32.6.2.2

Seksual nga Imoralidad

Ti linteg ti Apo iti kinadalus ti dayaw ket panangliklik iti seksual a pannakinaig iti ruar ti kallaysa iti nagbaetan ti maysa a lalaki ken maysa a babai a mayannurot iti linteg ti Dios (kitaen iti Exodo 20:14; Doktrina ken Katulagan 63:16). Mabalin a kasapulan ti konseho ti kinamiembro para iti seksual nga Imoralidad kas nailawlawag iti 38.6.5. Kitaen iti 32.6.1.2 para iti no kasapulan ti maysa a konseho.

32.6.2.3

Dagiti Inuulbod a Tignay

Isuro ti Sangapulo a Bilin, “Dika agtakaw” wenno “agulbod” (Exodo 20:15–16). Mabalin a kasapulan ti konseho iti kinamiembro para kadagiti tignay kas iti panagtakaw, panagbirkog, panagdispalko iti kuarta, ulbod a panagsaksi, ken panagkusit. Kitaen iti 38.8.2 para iti ulbod a pannakipulapol iti grupo. Kitaen iti 32.6.1.3 para iti no ti maysa a konseho ket kasapulan para kadagiti kinukusit a tignay.

32.6.2.4

Dagiti Panaglabsing iti Panagtalek

Mabalin a kasapulan ti konseho iti kinamiembro iti Simbaan no ti maysa a miembro ket:

Aglabsing kadagiti nadagsen a basol kabayatan ti panangiggemna iti maysa a posision ti turay wenno panagtalek iti Simbaan wenno komunidad.
Aglabsing iti maysa a nadagsen a basol nga ammo iti sapasap.

Kitaen iti 32.6.1.4 para iti no kasapulan ti maysa a konseho.

32.6.2.5

Sumagmamano a Dadduma pay a Tignay

Insuro ni Ari Benjamin, “Saanko a maibaga kadakayo ti amin a banag a mabalin a pagbasolanyo; agsipud ta adda dagiti nadumaduma a dalan ken pamuspusan, nga adu unay ket diak ida mabilang” (Mosiah 4:29). Mabalin a kasapulan ti maysa a konseho iti kinamiembro iti Simbaan no ti maysa a miembro ket:

Mangipakita iti maysa a pagtuladan ti pananglabsing kadagiti nadagsen a basol (kitaen iti Doktrina ken Katulagan 82:7).
Naigagara a mangbaybay-an kadagiti pagrebbenganna iti pamilia, agraman ti saanna a panagbayad iti suporta iti anak ken sustento iti asawana.
Aglako kadagiti maiparit a druga.
Aglabsing iti dadduma pay a nadagsen nga aramid a mainaig iti krimen.

Mabalin a kasapulan ti maysa a konseho iti kinamiembro no maysa a miembro ti makiraman, mangyobra, makipagurnos, mangbayad, mangpalugod, wenno mangyallukoy iti panagpaikkat iti sikog wenno aborsion. Kitaen iti 38.6.1 para kadagiti pangiwanwan.

No kasapulan wenno Mabalin a Kasapulan ti Konseho iti Kinamiembro

Kita ti Basol	Kasapulan ti Konseho iti Kinamiembro (kitaen iti 32.6.1)	Mabalin a Kasapulan ti Konseho iti Kinamiembro (kitaen iti 32.6.2)
Kita ti Basol Dagiti Naranggas a Tignay ken Panagabuso	Kasapulan ti Konseho iti Kinamiembro (kitaen iti 32.6.1) Panagpatay Panagrames Pannakasentensia iti seksual a panagdarup Panagabuso iti ubing wenno agtutubo Naranggas a mananggundaway nga ugali	Mabalin a Kasapulan ti Konseho iti Kinamiembro (kitaen iti 32.6.2) Nagandat a panagpatay Seksual a panagabuso, agraman iti panangranggas ken panangbutbuteng (kitaen iti 38.6.18 para iti no kasapulan ti maysa a konseho) Panagabuso iti asawa wenno sabali pay a nataengan (kitaen iti 38.6.2.4 para iti no kasapulan ti maysa a konseho)
Kita ti Basol Seksual nga Imoralidad	Kasapulan ti Konseho iti Kinamiembro (kitaen iti 32.6.1) Insesto Pornograpia iti ubing Panagasawa iti ad-adu ngem maysa Mananggundaway a seksual nga ugali	Mabalin a Kasapulan ti Konseho iti Kinamiembro (kitaen iti 32.6.2) Pannakiabig, pannakinaig ti baro ken balasang (fornication), ken pannakinaig iti kapada a lalaki wenno kapada a babai (same sex relation) Panagdenna a di pay nagkallaysa, sibil a panagdenna ken panagkadua, ken pannakikallaysa iti kapada a lalaki wenno kapada a babai Napalaus ken nainkapilitan a panangusar iti pornograpia a naigapu iti nakaro a pannakadangran iti panagasawa ti maysa a miembro wenno pamilia
Kita ti Basol Dagiti Inuulbod a Tignay	Kasapulan ti Konseho iti Kinamiembro (kitaen iti 32.6.1) Managgundaway nga ugali a mainaig iti pakaseknan iti kuarta, kas iti panagkusit ken maipada nga aramid	Mabalin a Kasapulan ti Konseho iti Kinamiembro (kitaen iti 32.6.2) Panagtakaw, panagbirkog, panagikupit, wenno panagdispalko iti kuarta Panagsaksi iti ulbod
Kita ti Basol Dagiti Panaglabsing iti Panagtalek	Kasapulan ti Konseho iti Kinamiembro (kitaen iti 32.6.1) Nadagsen a basol kabayatan ti panangiggem iti napateg a posision iti Simbaan	Mabalin a Kasapulan ti Konseho iti Kinamiembro (kitaen iti 32.6.2) Nadagsen a basol kabayatan ti panangiggem iti maysa a posision ti turay wenno panagtalek iti Simbaan wenno komunidad Nadagsen a basol nga ammo iti sapasap
Kita ti Basol Sumagmamano a Dadduma pay a Tignay	Kasapulan ti Konseho iti Kinamiembro (kitaen iti 32.6.1) Dagiti pannakasentensia iti kadadagsenan a basbasol	Mabalin a Kasapulan ti Konseho iti Kinamiembro (kitaen iti 32.6.2) Panagpaikkat iti Sikog Pagtuladan dagiti nadagsen a basbasol Naigagara a panangbaybay-an kadagiti pagrebbenganna iti pamilia, agraman ti saanna a panagbayad iti suporta iti anak ken sustento iti asawana Panaglako kadagiti maiparit a druga Dadduma pay a nadagsen nga aramid a mainaig iti krimen

32.6.3

No Makiuman ti Stake President iti Panguluen ti Area maipapan iti no Kasapulan ti Konseho iti Kinamiembro wenno Sabali pay a Tignay

Agkasapulan ti sumagmamano a pakaseknan a banag iti nayon a sensitibidad ken pangiwanwan. Tapno maammuan no kasano a kasayaataan a makatulong, nasken a makiuman ti stake president iti Area Presidency maipapan kadagiti situasion iti daytoy a benneg. Nupay kasta, ti stake president laeng ti mangikeddeng no nasken a maangay ti maysa a konseho tapno risuten ti galad. No maangay ti maysa a konseho, ikeddeng ti stake president wenno bishop ti pagbanagan.

No maangay ti konseho iti kinamiembro para iti maysa kadagiti pakaseknan a banag a nabalabala iti daytoy a benneg, ti pangngeddeng ti konseho nasken nga “agtalinaed iti nasayaat a kasasaad,” “dagiti pormal a panagiget iti kinamiembro,” wenno “panangikkat iti kinamiembro.” Kasapulan ti pananganamong ti Umuna a Panguluen tapno mangikkat kadagiti pormal a panagiget wenno maawat manen ti tao iti Simbaan (kitaen iti 32.16.1, numero 9).

32.6.3.1

Sabali pay a Tignay

No saan a maangay ti konseho ti kinamiembro, mabalin nga iraman ti sabali pay a tignay:

Dagiti saan a pormal a panagiget iti kinamiembro, kitaen iti 32.8.3).
Anotasion iti rekord iti kinamiembro (kitaen iti 32.14.5).
Dagiti panagiget a mainaig iti ordinansa, a mangngiget iti maysa a tao iti panangawat wenno panangaramatna iti priesthood wenno panangawat wenno panangusarna iti maysa a temple recommend.

No makiuman ti stake president iti Panguluen ti Area sakbay a maaramid ti maysa kadagitoy a tignay.

32.6.3.2

Ikakalilis iti Kinapudno wenno Apostasia

Masansan nga adda maysa nga epekto dagiti isyu ti apostasia iti likudan dagiti beddeng ti maysa a ward wenno stake. Nasken a marisut dagitoy a dagus tapno masalakniban dagiti dadduma.

Makiuman ti bishop iti stake president no mariknana a mabalin nga adda pakainaiganna iti apostasia ti tignay ti maysa a miembro. Mabalin ti bishop wenno stake president nga ikabilna ti miembro iti saan a pormal a panagiget iti kinamiembro kas nabalabala iti (kitaen iti 32.8.3). Makiuman a dagus ti stake president iti Area Presidency. Nupay kasta, ti stake president laeng ti mangikeddeng no nasken a maangay ti maysa a konseho iti kinamiembro wenno no kasapulan ti sabali pay a tignay.

Kas nausar ditoy, ti apostasia maitukoy iti maysa a miembro a makiramraman iti ania man kadagiti sumaganad:

Madagdagullit a panagaramidna iti nalawag ken naigagara a panagsuppiatna iti Simbaan iti kaaduan, iti doktrinana, kadagiti annurotenna, ken kadagiti liderna
Panangipapilitna iti panangisuro a kas doktrina ti Simbaan no ania ti saan a doktrina ti Simbaan kalpasan ti panangatur kenkuana ti bishop wenno stake president
Panangipakitana iti maysa a pagtuladan ti naigagara a panangyobrana tapno mangpakapuy iti pammati ken panagaktibo dagiti miembro ti Simbaan
Panagtultuloyna a mangtulad kadagiti pannursuro dagiti kimmalilis a sekta kalpasan ti panangatur kenkuana ti bishop wenno stake president
Pormal a pannakikappengna iti sabali a simbaan ken panangitandudona kadagiti pannursuro daytoy (Ti naan-anay a saan a panagaktibo iti Simbaan wenno ti idadar-ay iti sabali a simbaan ket saan mismo a maibilang iti apostasia. Nupay kasta, no pormal a makikappeng ti maysa a miembro iti sabali a simbaan ken mangitandudo kadagiti pannursuro daytoy, mabalin a kasapulan ti panangikkat iti kinamiembrona.)

Insuro ti Mangisalakan kadagiti Nephite a nasken nga ituloyda ti agserbi iti maysa a tao a nagbasol. “Ngem no saan nga agbabawi saan a maibilang kadagiti taok, tapno saanna a dadaelen dagiti taok” (3 Nephi 18:31).

32.6.3.3

Panagdispalko kadagiti Pondo ti Simbaan

No agdispalko ti maysa a tao kadagiti pondo ti Simbaan wenno agtakaw kadagiti napateg a sanikua ti Simbaan, makiuman ti stake president iti Panguluen ti Area maipapan iti no mabalin a kasapulan ti konseho iti kinamiembro wenno sabali pay a tignay. Ibilang dagiti lider:

Ti gatad ti nadispalko wenno natakaw a kuarta.
No adda napasamak a naulit a panagbayad.
Ti lebel ti panangbabawi ti tao.

Gagangay a, a no agdispalko ti maysa a miembro ti Simbaan kadaggiti pondo wenno agtakaw iti napateg a sanikua ti Simbaan, maikkan iti anotasion ti rekordna iti kinamiembro. No nakumpleton ti panagbabawi, mabalin a kiddawen ti stake president ti pannakaikkat iti anotasion (kitaen iti 32.14.5).

32.6.3.4

Dagiti Indibidual a Transgender

Dagiti bishop ken stake president a mangitartrabaho kadagiti tao a mabigbig a kas transgender ket nasken a surotenda dagiti pangiwanwan iti 38.6.

32.6.4

No Gagangay a Saan a Kasapulan ti Konseho iti Kinamiembro

Gagangay a saan a kasapulan ti konseho iti kinamiembro kadagiti sumagmamano a kasasaad.

32.6.4.1

Saan a Panagtungpal iti Sumagmamano a Pagrukodan ti Simbaan

Saan a maangay ti konseho ti kinamiembro para kadagiti tignay a nailista iti baba. Nupay kasta, kitaen ti eksepsion iti maudi nga aytem.

Saan a panagaktibo iti Simbaan
Saan a panangipatungpal kadagiti pagrebbengan iti Simbaan
Saan a panagbayad iti apagkapullo
Basbasol ti panagliway
Masturbasion
Saan a panagtungpal iti Word of Wisdom
Ti panangusar iti pornograpia, malaksid iti pornograpia iti ubing (kas nabalabala iti 38.6.6) wenno napalaus wenno nainkapilitan a panangusar iti pornograpia a naigapu iti nakaro a pannakadangran iti panagasawa ti maysa a miembro wenno pamilia (kas nabalabala iti 38.6.13).

32.6.4.2

Pannakalugi iti Negosio wenno Saan a Panagbayad kadagiti Utang

Nasken a saan nga usaren dagiti lider dagiti konseho iti kinamiembro tapno mangrisut kadagiti panagsusupiat a mainaig iti negosio. Dagiti pannakalugi iti negosio ken saan a panagbayad iti utang ket saan a rason tapno mangangay iti maysa a konseho iti kinamiembro. Nupay kasta, nasken a maangay ti maysa a konseho para kadagiti nadagsen nga aramid a kinukusit wenno dadduma pay a pangallilaw a nadagsen nga aramid a mainaig iti kuarta (kitaen iti 32.6.1.3).

32.6.4.3

Dagiti Panagsusupiat a Mainaig iti Sibil

Saan a maangay dagiti konseho iti kinamiembro tapno mangrisut kadagiti panagsusupiat a mainaig iti sibil (kitaen iti Doktrina ken Katulagan 134:11).

32.7

Dagiti Kasasaad ti Tao

Kinuna ti Apo, “Nakatanggaya kadakayo ti manangngaasi nga imak, ket asino man nga umasideg, awatek; ket mabendisionan dagiti umay kaniak” (3 Nephi 9:14). Dagiti kasasaad ti tao ti maysa a napateg a konsiderasion iti panangikeddeng:

Ti maitutop a setting para iti panangtulong kenkuana nga agbabawi kadagiti nadagsen a basolna (kitaen iti 32.5 ken 32.6).
Dagiti pangngeddeng a naaramid iti personal a panagbalakad wenno kadagiti konseho iti kinamiembro (kitaen iti 32.8 ken 32.11).

Kiddawen ti bishop ken stake presiden ti panunot ken pagayatan ti Apo para iti tunggal situasion. Ibilangda dagiti sumaganad a paktor iti panangikeddeng no ania a setting ti mausar ken no anianto ti pagbanaganna. Saan nga ibaga dagitoy a paktor ti masinunuo a pangngeddeng. Ketdi, isuda ti pangtulong iti maysa a pangngeddeng a nasken nga aramiden dagiti lider a nainkararagan ken no iwawan ida ti Espiritu.

32.7.1

Kadakkel ti Basol

Ti kinadagsen ti maysa a basol ket marukod babaen iti kadakkelna. Mabalin nga iraman ditoy ti bilang ken kasansan ti panaglabsing kadagiti basol, ti kinakaro ti pannakadangran a nagbanag manipud kadagitoy, ken ti bilang dagiti tao a nadangran gapu kadagitoy.

32.7.2

Dagiti Interes ti Biktima

Ibilang dagiti lider dagiti interes dagiti biktima ken dagiti dadduma. Mabalin a mairaman ditoy ti asawa ti tao ken dadduma pay a miembro ti pamilia. Ibilang pay dagiti lider ti kinakaro ti pannakadangran.

32.7.3

Pakakitaan ti Panagbabawi

Kasapulan ti naespirituan a pannarabay tapno ma-discern no sipupudno a nagbabawi met laeng ti maysa a tao. Maipakita nga ad-adda a mapagtalkan ti kasta a panagbabawi babaen dagiti nalinteg a tignay iti panaglabas ti panawen imbes a babaen ti nalaus a panagladingit kabayatan ti maysa nga interbyu. Dagiti paktor nga ibilang iramanna ti:

Pigsa iti pammati ken ni Jesucristo.
Ti kasasaad ti panagipudno.
Ti kauneg ti panangladingit gapu iti basol.
Panangipasubli kadagiti nadangran a tao.
Panagtungpal kadagiti naidawat a kasapulan ti linteg.
Panagballigi iti pananglipat iti basol.
Kinapudno iti panagtungpal kadagiti bilin manipud pay idi nagbasol.
Kinapudno kadagiti lider iti Simbaan ken iti dadduma.
Kinatallugod a mangsurot iti balakd dagiti lider iti Simbaan.

Ladawan

babai nga agkarkararag

32.7.4

Panaglabsing kadagiti Katulagan iti Templo

Impakdaar ti Apo, “Ta isu nga adu ti naited adu met ti kasapulan” (Doktrina ken Katulagan 82:3). Ti maysa a tao nga immawat iti endowment iti templo ket nagaramid kadagiti katulagan nga agbiag iti maysa a nangatngato a pagrukodan. Ti panaglabsing kadagitoy a katulagan ti mangpadakkel iti kinadagsen ti basol. Daytoy ti mangpadakkel iti pananggusto ti panagkasapulan iti maysa a konseho iti kinamiembro.

32.7.5

Posision ti Panagtalek wenno Turay

Mapadakkel ti kinadagsen ti maysa a basol no naglabsing ti maysa a tao kabayatan ti kaaddana iti maysa a posision ti panagtalek ken turay, kas iti maysa a nagannak, lider, wenno mannursuro.

32.7.6

Pannakaulit

Ti pagtuladan iti panangulit iti isu met la a nadagsen a basol ket mabalin a mangipakita iti siuuneg a nairamuten nga ugali wenno adiksion a manglapped iti panagdur-as nga agturong iti pudno a panagbabawi. Kas nayon kadagiti panagiget iti kinamiembro a mabalin a kasapulan, mabalin a makatulong dagiti programa iti pannakapaimbag iti pannakairuam ken propesional a panagbalakad (kitaen iti 32.8.2).

32.7.7

Edad, Kinamanakem, ken Padas

Ibilang dagiti lider ti edad, kinamanakem, ken padas no balakadan ti maysa a miembro wenno ikeddeng ti pagbanagan ti maysa a konseho iti kinamiembro. Masansan a maitutop ti kinapanuynoy para kadagiti saan pay a manakem iti ebanghelio. Kas pagarigan, mabalin a maitutop ti kinapanuynoy para kadagiti agtutubo a miembro a makiramraman iti imoral a galad no lipatenda ti basol ken ipakitada ti napudno a panagbabawi. Nupay kasta, mabalin a kasapulan ti nadagdagsen a tignay no agtultuloyda iti galad.

32.7.8

Kabaelan iti Panagpanunot

Ti sakit iti panagpanunot, adiksion, wenno limitado a kabaelan iti panagpanunot ket saan a pambar iti maysa a tao a nagaramid iti nakaro a basol. Nupay kasta, ibilang dagitoy a paktor. Kas paset ti panangtulong iti maysa a tao nga agbabawi, kiddawen dagiti lider ti pannarabay ti Apo maipapan iti pannakaawat ti tao kadagiti pagbatayan ti ebanghelio ken iti lebel ti kaadda ti sungsungbatanna.

32.7.9

Boluntario a Panagpudno

Ti boluntario a panagpudno ken panagladingit a mayannnurot iti Dios para kadagiti tignay ti tao ket mangipakita iti tarigagay nga agbabawi.

32.7.10

Panawen iti nagbaetan ti Basol ken Panagipudno

Ti panagipudno ket paset ti panagbabawi ken nasken a saan a maitantan. No dadduma ti maysa a basol ket sarunuen ti napaut a panawen ti panagpasubli ken napudno a panagbiag. No ipudno ti maysa a miembro ti maysa a basol ken dinan inulit daytoy, dayta ti makaipakita a linipatnan daytoy. Iti dayta a kasasaad, mabalin a makumpleton ti panagipudno imbes a mangrugi iti proseso ti panangbabawi.

PANANGIPATUNGPAL ITI PERSONAL A PANAGBALAKAD

32.8

Ti Personal a Panagbalakad ken dagiti Saan a Pormal a Panagiget iti Kinamiembro

Masansan nga umdasen ti personal a panagbalakad a mangtulong iti tao a maaddaan iti panangsubbot a bileg ti Pannubbot ni Jesucristo babaen iti panagbabawi. Makatulong pay ti kasta a panagbalakad kadagiti miembro nga agannad a maibusor kadagiti nadagdagsen pay a basbasol. Iti personal a panagbalakad, mabalin pay dagiti lider ti mangted kadagiti saan a pormal a panagiget iti kinamiembro tapno matulongan ti maysa a tao nga agbabawi iti sumagmamano a nadagsen a basbasol (kitaen iti 32.8.3).

Nasken a saan a tagtagilag-anen dagiti nadagsen a basbasol (kitaen iti Doktrina ken Katulagan 1:31). Ti panaglabsing kadagiti katulagan iti templo ti mangpadakkel iti panagtarigagay iti panagkasapulan iti maysa a konseho iti kinamiembro (kitaen iti 32.7.4).

Dagiti pangiwanwan a mangtulong kadagiti lider a mangammo no mabalin nga umdasen ti panagbalakad ken dagiti saan a pormal a panagiget ket nailista iti baba (kitaen met iti 32.7):

Saan a nagaramid iti basol ti maysa a tao nga agkasapulan iti maysa a konseho iti kinamiembro (kitaen iti 32.6.1).
Nagboluntario a nagipudno ti maysa a tao ket sipupudno nga agbabbabawi.
Agbabbabawi ti maysa a tao iti maysa a nadagsen a basol a linabsingna idin.
Saan a naglabsing ti basol ti maysa a tao kadagiti katulagan iti templo.
Addaan ti tao kadagiti napateg a makapalag-an a kasasaad.

32.8.1

Personal a Panagbalakad

Mayaplikar dagiti sumagad a pangiwanwan no balbalakadan ti maysa a bishop wenno stake president ti maysa a miembro a makatulong kenkuana nga agbabawi.

Agkiddaw iti umdas laeng nga impormasion a mangikeddeng iti (1) ugali ti miembro iti managbasol a tignayna ken (2) ti kasasaad, kasansan, ken kabayag ti ugali. Saan nga agkiddaw kadagiti detalye iti labes ti no ania ti kasapulan tapno maawatan ti situasion. Saan nga agdamag kadagiti saludsod nga agtaud iti bukod a kuriosidad.
Agsaludsod no kasano a nangapekto ti madi a galad kadagiti dadduma.
Agpokus kadagiti positibo a kondision a mangpauneg iti kumbersion ti miembro ken panagkumitna iti Apo. Allukoyen ti miembro a mangala kadagiti masinunuo a tignay a mamagbalbaliw iti ugali ken mangbaliw iti pusona nga agbabawi. Awisen isuna nga umas-asideg pay iti Mangisalakan, nga agkalkalikagum a makagun-od iti pigsana ken mangrikna iti manangsubbot nga ayatna.
Yallukoy dagiti makaitag-ay nga aramid kas iti panagkararag, panagadal iti nasantuan a kasuratan, ken idadar-ay kadagiti miting iti Simbaan. Isuro a ti aramid iti family history ken templo ti makaikkat iti impluensia ti kabusor. Yallukoy ti panagserbi kadagiti dadduma ken panangibinglay iti ebangehlio.

Yallukoy ti panangaramid iti pannakaisubli kadagiti nadangran iti basbasol ken panagkiddaw iti pannakapakawan
Yallukoy ti panangliklik kadagiti dakes nga impluensia. Tulongan dagiti miembro a maaddaan iti pangliklik nga addang a mangkedked kadagiti masinunuo a pannulisog.
Bigbigem a maysa ka a lider ti Simbaan, saanka a propesional a mamagbaga. Kas mainayon iti panangbalakad nga ipaaymo, mabalin nga agbenepisio ti sumagmamano a miembro manipud panagbalakad a mainaig iti ugali. Adda dagiti agsagaba iti sakit iti panunot. No kasapulan, balakadan dagiti miembro nga agpatulong kadagiti kualipikado a medical ken mental health professional.
Agbalin a managkararag ken agkiddaw iti pannarabay ti Espiritu sakbay ti panangted kadagiti saan a pormal a panangiget iti kinamiembro. Mabalin nga agbenepisio ti sumagmamano a miembro manipud iti panangaramat kadagiti pribilehio iti kinamiembro iti Simbaan a naak-aktibo imbes nga aramiden dagitoy a naiget.
Ag-follow up tapno mangted iti panangparegta, mangpatibket iti naespirituan a pigsa, ken mangmonitor iti panagdur-as.

Kalpasan a nagipudno ti maysa a miembro iti maysa a bishop ken stake president, mabalin a mapasamak ti follow-up a panagbalakad iti sumagmamano a wagas. Maipaay mismo ti lider daytoy. Wenno, addaan iti pammalubos ti miembro, mabalinna nga idutok iti maysa kadagiti mamagbagana tapno mangipaay iti daytoy.

Addaan iti pammalubos ti miembro, mabalin ti bishop wenno stake president ti mangdutok kadagiti miembro ti elders quorum wenno Relief Society tapno tumulong iti masinunuo a wagwagas. Para kadagiti agtutubo, mabalinna nga idutok iti panguluen ti Young Women wenno dagiti mamalbalakad iti Aaronic Priesthood quorum tapno tumulong. Dagiti nadutokan a tumulong ket maikarida iti inspirasion a mangipatungpal iti dayta a naidutok nga aramiden (kitaen iti 4.2.6).

No dutokan ti maysa a tao a tumulong iti follow-up a panagbalakad, ited laeng ti lider ti umdas nga impormasion a kasapulan a mangtulong iti miembro. Nasken a pagtalinaeden ti nadutokan a tao ti kompidensialidad. Ipakaammona pay iti bishop ti panagdur-as ti miembro ken dagiti kasapulanna.

32.8.2

Panangtulong iti Tattao kadagiti Pannakairuam wenno Adiksion

No dadduma mairaman iti personal a panagbalakad ti panangtulong kadagiti miembro nga agbabawi iti basbasol a mainaig wenno nakaigapuan dagiti adiksion. Mabalin nga iraman dagitoy nga adiksion dagiti sustansia wenno dagiti nasaknap nga ugali. Mangdadael dagiti adiksion kadagiti indibidual, panagasawa, ken pamilia. Mabalin a balakadan dagiti bishop dagiti miembro nga agpatulongda kadagiti kualipikado a medical ken mental health professional.

Ti dumakdakkel a gagangay a pannakairuam wenno adiksion ket ti panangusar iti pornograpia. Maysa man nga adiksion wenno masansan a kaugalian, napeggad ti panangusar iti pornograpia iti ania man a kita. Ti panangusar iti daytoy ket mangpapanaw iti Espiritu. Daytoy ti mangpakapuy iti kabaelan a maaddaan iti bileg nga aggapu iti panagtungpal kadagiti katulagan. Daytoy pay ti mangdangran kadagiti napateg a pagnanaigan.

Gagangay nga umdasen ti personal a panagbalakad ken dagiti saan a pormal a panagiget iti kinamiembro para iti panangtulong iti maysa a tao nga agbabawi iti panangusarna iti pornograpia. Gagangay a saan a maangay dagiti konseho iti kinamiembro. Para kadagiti eksepsion, kitaen iti 38.6.6 ken 38.6.13. Mabalin a makatulong ti propesional a panagbalakad.

Mangted dagiti stake president ken bishop iti suporta kadagiti miembro ti pamilia no kasapulan. Mabalin a mairaman dagiti nagannak no mangbalbalakad kadagiti agtutubo maipapan iti panagusar iti pornograpia. Mabalin a mairaman ti asawa no mangbalbalakad iti naasawaan a tao.

Para iti ad-adu pay nga impormasion maipapan iti panangbalakad kadagiti miembro, kitaen iti 38.6.13.

32.8.3

Dagiti Saan a Pormal a Panagiget iti Kinamiembro

Kas nayon iti panangyallukoy kadagiti positibo a tignay no agbalbalakad, mabalin ti maysa a bishop wenno stake president a saanna a pormal nga igetan ti sumagmamano a pribilehio iti kinamiembro iti Simbaan para iti maysa a panawen. Nainsiriban a maipatungpal, makatulong dagitoy a panagiget babaen ti panagbabawi ken naespirituan a panagdur-as. Maibilangda a saan a pormal gapu ta saanda a naisura iti rekord ti kinamiembro.

Mabalin nga agpaut dagiti saan a pormal a panagiget iti sumagmamano a lawas, sumagmamano a bulan wenno nabaybayag no kasapulan tapno makapagbabawi a naan-anay ti tao. Kadagiti saan a gagangay a kasasaad, mabalin a napapaut pay ti panawen ngem iti maysa a tawen.

Agkiddaw dagiti lider iti pannarabay ti Espiritu maipapan no ania kadagiti panagiget ti kasayaatan a makatulong iti tao nga agbabawi. Mabalin nga iraman dagitoy ti (ngem saan a limitado iti) panangsuspendido iti pribilehio iti panagserbi iti maysa a calling iti Simbaan, panangaramat iti priesthood, wenno iseserrek iti maysa a templo. Maigetan pay ti lider ti tao iti panangted iti maysa a bitla, lesson, wenno kararag kadagiti setting iti Simbaan. No isuspende ti lider ti karbengan a sumrek iti templo, ikanselana ti temple recommend iti Leader and Clerk Resources (LCR).

Maysa a napateg a paset ti panagbabawi ti pannakiranud iti sakramento. Daytoy koma ti nasken nga umuna a panangiget a naited iti maysa nga agbabbabawi a tao nga addaan iti nasneban a puso ken agbabbabawi nga espiritu. Nupay kasta, no naglabsing ti maysa a tao kadagiti nadagsen a basbasol, mabalin nga isupende ti lider daytoy a pribilehio para iti maysa a panawen.

Gagangay a saan nga ibaga dagiti lider iti asino man maipapan kadagiti saan a pormal a panagigiet malaksid no adda panagkasapulan a mangammo (kitaen iti 32.12.2).

Mabalin ti bishop wenno stake president nga ikkatenna dagiti saan a pormal a panagiget kas iwanwan ti Espiritu no adda masinunuo a panagdur-as ti tao iti napudno a panagbabawina. No agtultuloy ti miembro iti pagtuladan ti basol, mabalin a makatulong wenno kasapulan ti mangangay iti maysa a konseho iti kinamiembro.

Ladawan

babai nga agkarkararag

PANANGIPATUNGPAL KADAGITI KONSEHO ITI KINAMIEMBRO ITI SIMBAAN

Maangay dagiti konseho iti kinamiembro iti Simbaan no ikeddeng ti bishop wenno stake president a makatulongda wenno no idawat ti annuroten iti Simbaan a kasapulan dagitoy (kitaen iti 32.6). Maangayda iti lebel ti ward, stake, branch, district, wenno mission. Mangipaay daytoy a benneg iti impormasion maipapan no kasano nga ipatungpal dagitoy.

32.9

Pannakiraman ken Pagrebbengan

Ipakita ti sumaganad a tsart no asino ti gagangay a makiraman kadagiti konseho iti kinamiembro.

	Dagiti Makiraman kadagiti Konseho iti Kinamiembro
Konseho iti Kinamiembro iti Ward	Dagiti Makiraman kadagiti Konseho iti Kinamiembro Ti tao a pakaang-angayan ti konseho Ti bishop ken dagiti mamagbagana Clerk iti ward Presidente ti Elders quorum wenno Relief Society (opsional; kitaen iti 32.10.1)
Konseho iti Kinamiembro iti Stake	Dagiti Makiraman kadagiti Konseho iti Kinamiembro Ti tao a pakaang-angayan ti konseho Ti Stake president ken dagiti mamagbagana Klerk iti stake Dagiti high councilor (kadagiti limitado a situasion kas nailawlawag iti 32.9.2) Ti bishop ti tao a pakaang-angayan ti konseho (opsional; kitaen iti 32.9.3) Presidente ti Elders quorum wenno Relief Society (opsional; kitaen iti 32.10.1)

32.9.1

Stake President

Ti stake president:

Addaan iti turay kadagiti konseho iti kinamiembro iti stake; nupay kasta, kaaduan kadagitoy a konseho ti angayen dagiti bishop.
Nasken a mangted iti pananganamong sakbay a mabalin ti bishop ti mangangay iti maysa a konseho iti kinamiembro.
Mangangay iti maysa a konseho iti kinamiembro iti stake no ti maysa a lalaki wenno babai nga immawaten iti endowment iti templo ket nalabit a mangpaikkat iti kinamiembrona iti Simbaan.
Mabalinna nga angayen ti konseho no umapela ti maysa a miembro iti pangngeddeng ti konseho iti kinamiembro iti ward.
Nasken a mangted iti pananganamong sakbay a pinal ti rekomendasion ti konseho iti kinamiembro iti ward a mangikkat iti kinamiembro ti saan pay a naendow a tao.

32.9.2

Nangato a Konseho

Saan a gagangay a makiraman kadagiti konseho iti kinamiembro dagiti miembro ti nangato a konseho. Nupay kasta, mabalin a makiraman ti nangato a konseho kadagiti narigat a situasion (kitaen iti Doktrina ken Katulagan 102:2). Kas pagarigan, mabalin nga awisen ti panguluen ti stake ti nangato a konseho tapno makiraman no:

Adda dagiti paktor a nagsisinnupiatda.
Mangnayonda iti pateg ken timbeng.
Kiddawen ti miembro ti pannakiramanda.
Mairaman ti maysa a miembro ti panguluen ti stake wenno ti pamiliana (kitaen iti 32.9.7).

32.9.3

Bishop (wenno Branch President iti Stake)

Ti Bishop:

Addaan iti turay kadagiti konseho iti kinamiembro iti ward.
Makiuman iti stake president ken manggun-od iti pananganamongna sakbay ti panangangay iti konseho.
Mabalin a saan a mangangay iti maysa a konseho no ti maysa a lalaki wenno babai nga immawaten iti endowment iti templo ket nalabit a mangpaikkat iti kinamiembrona iti Simbaan. Mabalin a kasapulan a maangay ti maysa a konseho iti kinamiembro iti stake kadagita a kasasaad.
Mabalin a maawis a dumar-ay iti konseho iti kinamiembro iti stake para iti miembro ti ward a maam-amiris ti kinamiembrona. Nasken nga anamongan ti stake president ken ti tao ti idadar-ayna.

Mabalin nga irekomenda ti konseho iti kinamiembro iti ward wenno branch ti panangikkat iti kinamiembro ti tao iti Simbaan no saan pay a na-endow isuna. Nupay kasta, kasapulan ti pananganamong ti stake president sakbay a pinal ti pangngeddeng.

No dadduma maangay ti konseho iti kinamiembro iti ward para iti maysa a na-endow a miembro ken ipakita dagiti proceeding a nalabit a paikkat ti miembro ti kinamiembrona. Kadagitoy a situasion, yuman ti bishop ti pakaseknan a banag iti stake president.

32.9.4

Mission President

Ti mission president:

Addaan iti turay kadagiti konseho iti kinamiembro kadagiti branch ken district iti mision.
Nasken a mangted iti pananganamong sakbay a mabalin ti district wenno branch president ti mangangay iti maysa a konseho iti kinamiembro.
Angayenna ti maysa a konseho iti kinamiembro no ti maysa a lalaki wenno babai nga immawaten iti endowment iti templo ket nalabit a mangpaikkat iti kinamiembrona iti Simbaan. No ti oras wenno distansia ti maglapped iti daytoy, mabalinna nga idutok iti maysa kadagiti mamagbagana tapno mangidaulo iti konseho. Tudinganna ti dua a sabali pay a Melchizedek Priesthood holder tapno makiraman.
Iti lugar a mabalin, angayenna dagiti konseho iti kinamiembro para kadagiti saan pay a na-endow. No ti oras wenno distansia ti manglapped iti daytoy, mabalinna nga idutok iti tallo a Melchizedek Priesthood holder tapno mangangay iti daytoy. Iti daytoy a kaso, gagangay a ti district president wenno branch president ti miembro ti mangiturong iti konseho.
Mabalinna nga angayen ti maysa a konseho no umapela ti maysa a miembro iti pangngeddeng ti konseho iti kinamiembro iti district wenno branch.
Addaan iti pananganamong ti General Authority manipud iti Missionary Department, mangangay iti konseho iti kinamiembro no aglabsing ti maysa a misionario iti nadagsen a basol iti tay-ak ti mision (kitaen iti 32.9.8). Irebyuna pay ti pakaseknan a banag a kaduana ti maysa a miembro ti Panguluen ti Area ken makiuman iti stake president iti pagtaengan a stake ti misionario.
Nasken a mangted iti pananganamong sakbay a pinal ti rekomendasion ti konseho iti kinamiembro iti maysa a branch wenno district a mangikkat iti kinamiembro ti saan pay a na-endow a tao.

No ipudno ti maysa a misionario ti nadagsen a basol a linabsingna sakbay ti panagserbina iti mision, kontaken ti mission president ti in-field representative-na iti Missionary Department para iti direksion.

No angayen ti maysa a mission president ti maysa a konseho iti kinamiembro, tudinganna ti dua a Melchizedek Priesthood holder a mangtulong kenkuana. Kadagiti laeng karkarna a kasasaad a nasken a dutokanna dagiti agtutubo a misionario tapno tumulong. Surotenna dagiti isu met laeng a procedure kas iti kinamiembro iti stake (kitaen iti 32.10). Nupay kasta, saan a makiraman ti maysa a nangato a konseho wenno konseho iti district.

32.9.5

District wenno Branch President iti Mission

Mabalin ti district wenno branch president iti mision ti mangangay iti maysa a konseho iti kinamiembro no pusgan ti mission president. Saan a makiraman ti konseho iti district.

Mabalin nga isingasing ti konseho iti kinamiembro iti district wenno branch ti panangikkat iti kinamiembro ti tao iti Simbaan no saan pay nga immawat ti endowment iti templo. Nupay kasta, kasapulan ti pananganamong ti mission president sakbay a pinal ti pangngeddeng.

32.9.6

Clerk iti Stake wenno Ward

Ti clerk iti stake wenno ward:

Agitalimeng kadagiti naisurat a note ti konseho laeng no la ketdi kasapulan nga isumite ti Report of Church Membership Council form.
Mangisagana iti form no kiddawen ti lider a mangiturong iti konseho.
Saan a makiraman iti panaglilinnawag wenno pangngeddeng iti konseho.

32.9.7

Pannakiraman kadagiti Karkarna a Kasasaad

No saan a kabaelan a makiraman ti maysa a mamagbaga iti panguluen iti stake iti maysa a konseho iti kinamiembro, kiddawen ti stake president iti maysa a high councilor wenno sabali pay a high priest a kasukatna. No saan a kabaelan a makiraman ti stake president, mabalin a pusgan ti Umuna a Panguluen ti maysa kadagiti mamagbagana tapno mangidaulo a kasukatna.

No saan a kabaelan a makiraman ti maysa a mamagbaga iti bishopric iti maysa a konseho iti kinamiembro, mabalin a kiddawen ti bishop iti maysa a high priest iti ward a mangsukat kenkuana. No saan a kabaelan a makiraman ti bishop, yumanna ti pakaseknan a banag iti stake president, a mangtipon iti maysa a konseho iti kinamiembro iti stake. Saan a mabalin ti bishop a mangdutok iti maysa a mamagbaga tapno mangtipon iti maysa a konseho iti kinamiembro.

No maang-angay ti maysa a konseho iti kinamiembro para iti maysa a miembro ti pamilia ti bishop wenno maysa kadagiti mamagbagana, maangay daytoy iti lebel ti stake. No maang-angay daytoy para iti maysa a miembro ti pamilia ti maysa kadagiti mamagbaga ti stake president, dutokan ti stake president ti sabali pay a high priest a mangsukat ti mamagbaga. No maang-angay ti maysa a konseho para iti maysa a miembro ti pamilia ti stake president, yumanna iti Opisina ti Umuna a Panguluen.

No sumuppiat ti maysa a miembro iti pannakiraman ti bishop dagiti mamagbagana, maangay ti konseho iti kinamiembro iti lebel ti stake. No sumuppiat ti maysa a miembro iti pannakiraman ti maysa kadagiti mamagbaga ti stake president, dutokan ti stake president ti sabali pay a high priest a mangsukat ti mamagbaga. No sumuppiat ti miembro iti pannakiraman ti stake president, wenno no marikna ti stake president a saanna a kabaelan ti mangidaddaduma, makiuman iti Opisina ti Umuna a Panguluen.

32.9.8

Panangikeddeng No Asino a Lider ti Mangangay iti Konseho kadagiti Naisangsangayan a Kasasaad

Dumani kanayon a maangay dagiti konseho iti kinamiembro iti yunit iti heograpia ti Simbaan nga adda ti rekord ti kinamiembro ti tao.

No dadduma kasapulan ti konseho iti kinamiembro para iti tao nga umakar. No iti uneg ti isu met la a stake ti panangakar, makiuman ti stake president kadagiti bishop ti agpada a ward ket ikeddengna no sadino ti nasken a pakaangayanna.

No umakar ti miembro iti ruar ti stake, aginnuman dagiti stake president kadagiti agpada a stake ket ikeddengda no sadino ti nasken a pakaangayan ti konseho. No ikeddengda a nasken a maangay daytoy iti sigud a ward wenno stake, agtalinaed ti rekord ti kinamiembro iti dayta a ward agingga a makumpleto ti konseho. No saan, mayakar ti rekord iti baro a ward. Sililimed nga ipakaammo ti bishop wenno stake president ti agdama a bishop wenno stake president ti miembro maipapan no apay a kasapulan ti maysa a konseho.

No dadduma kasapulan ti maysa a konseho iti kinamiembro para iti maysa a miembro nga agnanaed iti adayo iti pagtaenganna iti saan nga agbayag. Kas pagarigan, mabalin a kasapulan ti maysa a konseho para iti estudiante wenno miembro iti military. Mabalin a mangted iti balakad ken suporta ti bishop iti temporario a pagnaedan ti miembro. Nupay kasta, nasken a saanna nga angayen ti konseho iti kinamiembro malaksid no addan iti yunitna ti rekord ti kinamiembro ken nakiumanen iti bishop ti pagtaengan a ward.

No dadduma aglabsing ti maysa a misionario iti nadagsen a basol iti tay-ak tti mision a saan a naibutaktak agingga a malpas a mai-release isuna. Aginnuman ti bishop ken stake president maipapan no asino ti nasken a mangangay iti konseho iti kinamiembro. Maysa kadakuada ti makiuman iti sigud a mission president sakbay ti panangangay iti daytoy.

32.10

Dagiti Procedure para kadagiti Konseho iti Kinamiembro

32.10.1

Mangted iti Pakaammo ken Agsagana para iti Konseho

Mangted ti bishop wenno stake president iti maysa a miembro iti naisurat a pakaammo ti maysa a konseho iti kinamiembro a maangayto nga agpaay kenkuana. Pirmaanna ti surat. Iraman ditoy ti sumaganad nga impormasion:

“Mangangay ti [bishopric wenno ti panguluen ti stake] iti maysa a konseho iti kinamiembro nga agpaay kenka. Maangayto ti konseho intono [petsa ken oras] iti [lugar].

“Ibilangto daytoy a konseho ti [gupgopen ti di maitutop nga ugali iti sapasap a termino, ngem saan a mangted iti detalye wenno ebidensia].

“Maawiska a dumar-ay iti konseho tapno mangted iti sungbatmo. Mabalinmo ti mangted kadagiti naisurat a palawag manipud kadagiti tao a makaited iti mainaig nga impormasion. Mablinmo nga awisen dagiti kasta a tao nga agsarita iti konseho nga agpaay kenka no anamongan a nasapsapa ti stake president wenno bishop. Mabalinmo pay nga awisen [ti Relief Society president wenno ti elders quorum president] iti ward tapno adda ken mangted iti suporta.

“Nasken iti asino man a dumar-ay a siaayat a makitunos iti naraeman a saguday ti konseho, agraman dagiti procedure ken kompidensialidad daytoy. Mabalin nga awan ti legal counsel ken dagiti sumuporta malaksid kadagiti nadakamat iti ngato.”

Mabalin a mairaman iti maudi a parapo ti maysa a pangipeksaan iti ayat, namnama ken pannakaseknan.

Dagiti pangiwanwan maipapan no asino ti mabalin nga awisen ti tao nga agsarita iti konseho ket maipaay iti 32.10.3, numero 4.

No saan a mabalin a maited a personal ti surat, mabalin nga ibuson daytoy iti registed wenno certified mail, nga adda nakiddaw a return receipt.

Ti bishop wenno stake president ti mangyiskediul iti konseho iti kinamiembro iti oras a nagin-awa para iti tao. Penkenna pay nga adda panawen a magun-od dagiti palawag manipud kadagiti biktima ti di maitutop nga ugali no tarigagayanda ti mangted kadagitoy (kitaen iti 32.10.2).

Ti bishop wenno stake president ti mangisagana iti miembro para iti konseho babaen ti panangilawlawag iti panggep ken procedure daytoy. Ilawlawagna pay dagiti pangngeddeng ta mabalin a madanon ti konseho ken dagiti resultana. No nagpudno ti maysa a miembro, ilawlawag ti lider a ti panagipudno ket nasken a mausar iti konseho iti kinamiembro.

32.10.2

Manggun-od kadagiti Palawag manipud kadagiti Biktima

No ti maysa a miembro ti Simbaan ti maysa a biktima (kas iti insesto, panagabuso iti ubing, panagabuso iti asawa, wenno inuulbod), kontaken ti bishop wenno stake president ti agdama a bishop wenno stake president ti tao. Ikeddeng dagitoy a lider no makatulong met laeng nga ikkan ti biktima iti gundaway a mangted iti naisurat a palawag maipapan iti di maitutop nga ugali ken dagiti epekto daytoy. Mabalin nga ibasa dagitoy a palawag iti maysa a konseho iti kinamiembro (kitaen iti 32.10.3, numero 3). Awan ti turay dagiti lider iti Simbaan a mangirugi a mangkontak kadagiti biktima a saan a miembro ti Simbaan.

Ania man a pannakipagkita iti maysa a biktima para iti daytoy a panggep ket angayen ti agdama a bishopna wenno stake president. No mangted ti maysa a biktima iti palawag, ited daytoy a lider iti bishop wenno stake president a mangangay iti konseho iti kinamiembro. Nasken ti dakkel a panagannad dagiti lider tapno maliklikan ti nakarkaro a trauma.

Ania man a panagsaludsod maipapan iti biktima nga agtawen iti nababbaba ngem 18 ket maaramid babaen dagiti nagannak wenno legal nga agay-aywan ti ubing, malaksid no ti panangamid iti daytoy ket mabalin a mangpapeggad iti biktima.

Para iti impormasion maipapan kadagiti bishop ken stake president nga umaw-awat ti pangiwanwan kadagiti kaso ti panagabuso, kitaen iti 32.4.5 ken 38.6.2.1.

32.10.3

Mangiturong iti Konseho

Madagdagus a sakbay ti rugi ti konseho, ibaga ti bishop wenno stake president kadagiti participant no para iti asino ti konseho ken no ania ti naireport a saan a maitutop nga ugali. No kasapulan, ilawlawagna dagiti procedure ti konseho.

Ti tao, no adda, ket mapasangbay ngarud a sumrek iti kuarto. No naawis ti bishop a dumar-ay iti konseho iti kinamiembro iti stake, maawis met isuna a sumrek iti kuarto iti daytoy a gundaway. No inawis ti tao ti Relief Society president wenno ti elders quorum president iti ward tapno umay ken mangted iti suporta, mapasangbay met isuna a sumrek iti kuarto.

Ti bishop wenno stake president ti mangiturong iti konseho iti maysa nga espiritu ti ayat, kas nabalabala iti baba.

Awisenna ti maysa a tao a mangidaton iti panglukat a kararag.
Dakamatenna ti naireport a saan a maitutop nga ugali. Ikkanna ti tao (no adda) iti gundaway mangkumpirma, mangilibak, wenno mangilawlawag iti daytoy a palawag.
No makumpirma ti miembro ti saan a maitutop nga ugali, ituloy ti bishop wenno stake president iti numero 5 iti baba. No ilibak daytoy ti miembro, idatag ti bishop wenno stake president ti impormasion maipapan iti daytoy. Mabalin nga iraman ditoy ti panangidatag kadagiti mapagtalkan a dokumento ken panangibasa iti napigsa kadagiti ania man a naisurat a palawag manipud kadagiti biktima (kitaen iti 32.10.2). No ibasana ti kasta a palawag, saluadanna ti kinasiasino ti biktima.
No ilibak ti miembro ti saan a maitutop nga ugali, mabalinna nga idatag ti impormasion iti konseho. Mabalin nga isurat daytoy. Wenno mabalin nga agkiddaw ti miembro kadagiti tao a makaited iti mainaig nga impormasion tapno agsarita iti konseho, maysa iti maminsan. Nasken a miembro ti Simbaan dagiti kasta a tao malaksid no inkeddeng ti bishop wenno stake president iti nasapsapa a mabalin a dumar-ay ti maysa a saan a miembro. Agurayda iti sabali a kuarto agingga a makiddaw kadakuada nga agsarita. Pumanaw ti tunggal tao iti kuarto ti konseho no malpas isuna. Nasken a siaayatda a makitunos iti naraeman a saguday ti konseho, agraman dagiti procedure ken kompidensialidad daytoy. Mabalin nga awan ti dumar-ay a legal counsel dagiti miembro. Wenno mabalin nga awananda kadagiti sumuporta iti likudan dagiti nadakamat iti maikadua a parapo iti daytoy a benneg.
Mabalin ti bishop wenno stake president ti agdamag kadagiti saludsod ti miembro iti nadayaw ken naraeman a wagas. Mabalinna pay ti agdamag iti saludsod dagiti dadduma a nagkiddawan ti miembro a mangted iti impormasion. Mabalin met ti agdamag iti saludsod dagiti mamagbaga iti bishopric wenno stake presidency. Nasken nga ababa ti ania man a saludsod ken limitado kadagiti napapateg a kinapudno.
Kalpasan a naidatag ti amin a mainaig nga impormasion, papanawen ti bishop wenno stake president ti miembro iti kuarto. Pumanaw met ti clerk, malaksid no nakiraman ti nangato a konseho iti maysa a konseho iti kinamiembro iti stake. No adda ti bishop ti miembro para iti konseho iti kinamiembro iti stake, pumanaw met isuna. No dumardar-ay ti Relief Society president wenno ti elders quorum president tapno mangted iti suporta, pumanaw met isuna.
Agkiddaw ti bishop wenno stake president kadagiti masao wenno insights manipud kadagiti mamagbagana. No nakiraman ti nangato a konseho iti maysa a konseho iti kinamiembro iti stake, kiddawenna dagiti masao ken insight-da.
Kadua dagiti mamagbagana, nainkararagan a kiddawen ti bishop wenno stake president ti pagayatan ti Apo maipapan iti pakaseknan a banag. Ti stake president ken dagiti mamagbagana wenno ti bishop ken dagiti mamagbagna ti nasken nga adda iti uneg ti kuarto iti daytoy a gundaway. No iraman ti konseho iti kinamiembro iti stake ti nangato a konseho, gagangay a mapan ti panguluen ti stake iti opisina ti stake president.
Ibaga ti bishop wenno stake president ti kadagiti mamagbagana maipapan iti pangngeddengna ket idawatna kadakuada a mangkanunong iti daytoy. No iraman ti konseho iti kinamiembro iti stake ti nangato a konseho, agsubli ti panguluen ti stake iti kuarto ket idawatna kadakuada a mangkanunong iti daytoy. No adda sabali nga opinion ti maysa a mamagbaga wenno high councilor, denggen ti bishop wenno stake president ket kiddawenna a risuten dagiti pagdudumaan. Ti pagrebbengan para iti pangngeddeng ket agpannuray iti mangimatmaton a dadaulo [presiding officer].
Awisenna nga agsubli ti tao iti uneg ti kuarto. No pumanaw ti clerk, maawis met isuna iti uneg ti kuarto. No adda ti bishop ti miembro para iti konseho iti kinamiembro iti stake, maawis met isuna a sumrek iti kuarto. No dumardar-ay ti Relief Society president wenno ti elders quorum president tapno mangted iti suporta, mapagsubli met daytoy.
Ibinglay ti bishop wenno stake president ti pangngeddeng ti konseho iti espiritu ti ayat. No ti pangngeddeng ket tapno pormal a mangiget kadagiti pribilehio iti kinamiembro ti tao iti Simbaan wenno mangikkat iti kinamiembro, ilawlawagna dagiti kondision (kitaen iti 32.11.3 ken 32.11.4). Ilawlawagna pay no kasano ti mangparmek kadagiti panagiget ken mangted iti sabali a pangiturong ken balakad. Mabalin ti bishop wenno stake president ti mangigibus iti maysa a konseho iti apagapaman tapno agsapul iti ad-adu pay a pangiwanwan wenno impormasion sakbay ti panangaramid iti pangngeddeng. Iti dayta a kaso, ilawlawagna daytoy.
Ilawlawagna ti karbengan ti tao nga agapela (kitaen iti 32.13).
Awisenna ti maysa a tao a mangidaton iti pangrikep a kararag.

Adda man ti tao wenno awan, pakaammuan ti bishop wenno stake president isuna maipapan iti pangngeddeng kas nailawlawag iti 32.12.1.

Saan a maipalubos iti participant iti konseho iti kinamiembro nga agusar iti audio, video, wenno naisurat a recording. Mabalin ti maysa a clerk ti agisurat iti note para iti panggep iti panagsagana iti Report ti Konseho iti Kinamiembro iti Simbaan [Report of Church Membership Council]. Nupay kasta, dagiti kasta a naisurat ket saan koma a letra por letra a rekord wenno transcript. Kalpasan a maisagana ti report, dagus a dadaelenna ti ania man a naisurat.

32.11

Dagiti Pangngeddeng manipud kadagiti Konseho iti Kinamiembro

Dagiti pangngeddeng manipud kadagiti konseho iti kinamiembro nasken nga iturong ti Espiritu. Nasken a mangyanninawda iti ayat ken namnama nga idiaya ti Mangisalakan kadagiti agbabawi. Nailadawan iti baba dagiti mabalin a pangngeddeng. No agaramid kadagitoy a pangngeddeng, ibilang dagiti lider dagiti kasasaad a nabalabala iti 32.7.

Kalpasan ti ania man a konseho iti kinamiembro, dagus nga isumite ti bishop wenno stake president ti Report of Church Membership Council form babaen ti LCR (kitaen iti 32.14.1).

Nabalabala kadagiti sumaganad a benneg dagiti mabalin a pangngeddeng manipud kadagiti konseho iti kinamiembro.

32.11.1

Agtalinaed iti Nasayaat a Sasaaden

Iti sumagmamano a kasasaad, mabalin nga inosente ti maysa a tao ken agtalinaed iti nasayaat a sasaaden. Iti sumagmamano a kasasaad, mabalin a naglabsing ti maysa a tao iti basol, nagbabawi a sipupudno, ken agbalin a nasayaat iti sasaaden. Mabalin ti bishop wenno stake president ti mangted iti balakad ken panagannad maipapan kadagiti tignay iti masakbayan. Kalpasan ti konseho, ituloyna ti mangted iti suporta no kasapulan.

Ladawan

agabay a nakatugaw nga agassawa

32.11.2

Personal a Panagbalakad iti Bishop wenno Stake President

Iti sumagmamano a konseho iti kinamiembro, mabalin nga ikeddeng dagiti lider nga awan iti nasayaat ti sasaaden ti miembro—ngem awan ti garantia dagiti pormal a panagiget iti kinamiembro. Kadagitoy a kasasaad, mabalin nga ikeddeng ti konseho a nasken nga umawat ti tao iti personal a panagbalakad ken panagatur manipud iti bishop wenno stake president. Mabalin nga iraman iti daytoy a panagbalakad dagiti saan a pormal a panangiget iti kinamiembro kas nabalabala iti 32.83.

Saan nga opsion ti personal a panagbalakad ken dagiti saan a pormal a panagiget iti kinamiembro no maangay ti maysa a konseho para kadagiti basol a nailista iti 32.6.1).

32.11.3

Dagiti Pormal a Panagiget iti Kinamiembro

Iti sumagmamano a konseho iti kinamiembro, mabalin nga ikeddeng dagiti lider a kasayaatan a pormal nga igetan ti maysa a tao kadagiti pribilehio iti kinamiembro iti Simbaan iti apagapaman. Mabalin nga umdasen dagiti pormal a panagiget para iti amin a kadadagsenan a basbasol wenno situasion, a pakaikkatan ti kinamiembro (kitaen iti 32.11.4).

Dagiti addaan kadagiti pormal a panagiget iti kinamiembro ket miembroda pay laeng iti Simbaan. Nupay kasta, maigetan dagiti pribilehioda iti kinamiembro iti Simbaan kas iti sumaganad:

Saanda a mabalin a sumrek iti templo. Nupay kasta, mabalinda nga itulloy ti panagusar iti garment iti templo no na-endow. No addaan ti miembro iti maysa a temple recommend, ikansela ti lider daytoy iti LCR.
Saanda a mabalin nga aramaten ti priesthood.
Saanda a mabalin ti makiranud iti sakramento wenno makiraman iti panangkanunong kadagiti opisial ti Simbaan.
Saanda a mabalin a mangted iti maysa a bitla, lesson, wenno kararag kadagiti setting iti Simbaan. Wenno saanda a mabalin nga agserbi iti takem [calling] iti Simbaan.

Maallukoyda a dumar-ay kadagiti miting ken aktibidad iti Simbaan no naurnos ti panagtignayda. Maallukoyda pay nga agbayad iti apagkapullo ken daton iti panagayuno.

Mabalin a nayonan ti bishop wenno stake president iti dadduma pay a kondision, kas iti panangliklik kadagiti material a mainaig iti pornograpia ken dadduma pay a dakes nga impluensia. Gagangay a nayonanna kadagiti nasayaat a kondision. Mabalin nga iraman kadagitoy ti regular a pannakimisa iti Simbaan, regular a panagkararag, panagbasa kadagiti nasantuan a kasuratan ken dadduma pay a material iti Simbaan.

No pormal a naigetan dagiti pribilehio iti kinamiembro iti Simbaan ti maysa a tao, naisurat dayta iti rekord ti kinamiembro.

Gagangay a maysa a tawen ken mabalin a napapaut pay ti panawen ti pormal a panagiget. No agaramid ti tao iti masinunuo a panagdur-as nga addaan iti napudnuan a panagbabawi, mangangay ti bishop wenno stake president iti sabali pay a konseho a mangibilang iti panangikkat kadagiti panagiget (kitaen iti 32.16.1). No agtultuloy ti miembro iti pagtuladan ti basol, mabalin mangangay ti lider iti sabali pay a konseho tapno mangibilang iti dadduma pay nga addang.

32.11.4

Panangikkat iti Kinamiembro

Iti sumagmamano a konseho iti kinamiembro, mabalin nga ikeddeng dagiti lider a kasayaatan nga ikkaten ti kinamiembro iti Simbaan ti maysa a tao iti apagapaman (kitaen iti Mosiah 26:36; Alma 6:3; Moroni 6:7; Doktrina ken Katulagan 20:83).

Kasapulan ti panangikkat iti kinamiembro iti Simbaan ti maysa a tao para iti panagpatay (kas nailawlawag iti 32.6.1.1) ken panagasawa iti ad-adu ngem maysa (kas nailawlawag iti 32.6.1.2). Dumani kanayon a kasapulan daytoy para iti insesto kas nailawlawag iti 32.6.1.2 and 38.6.10.

No iturong ti Espiritu, mabalin a kasapulan ti panangikkat iti kinamiembro ti tao kas iti sumaganad:

Para kadagiti namagbalin iti ugalida a nakaro a pagbutbungan dagiti dadduma.
Para kadagiti naglabsing kadagiti kangrunaan a nadadagsen a basbasol.
Para kadagiti saan a mangipakita iti panagbabawi iti nadagsen a babasol (kitaen dagiti konsiderasion iti 32.7).
Para kadagiti naglabsing iti nadagsen a basbasol a nangdadael iti Simbaan.

Mabalin nga isingasing ti maysa a konseho iti kinamiembro iti ward, branch ti panangikkat iti kinamiembro iti Simbaan manipud iti maysa a tao a saan pay nga immawat ti endowment iti templo. Nupay kasta, kasapulan ti pananganamong ti stake wenno mission president sakbay a pinal ti pangngeddeng.

Mabalin a di ma-enjoy dagiti naikkatan iti kinamiembro ti Simbaan dagiti ania man a priibilehio ti kinamiembro.

Saanda a mabalin a sumrek iti templo wenno agkawes iti garment iti templo. No addaan ti tao iti maysa a temple recommend, ikansela ti lider daytoy iti LCR.
Saanda a mabalin nga aramaten ti priesthood.
Saanda a mabalin ti makiranud iti sakramento wenno makiraman iti panangkanunong kadagiti opisial ti Simbaan.
Saanda a mabalin a mangted iti maysa a bitla, lesson, wenno kararag kadagiti setting iti Simbaan wenno mangidaulo iti maysa nga aktibidad iti simbaan. Wenno saanda a mabalin nga agserbi iti takem [calling] iti Simbaan.
Saanda a mabalin ti agbayad iti apagkapullo ken daton iti panagayuno.

Maallukoyda a dumar-ay kadagiti miting ken aktibidad iti Simbaan no naurnos ti panagtignayda.

Dagiti naikkatan iti kinamiembro ti Simbaan mabalin a maibilangda para iti pannakaawat manen babaen ti panagbuniag ken kumpirmasion. Gagangay, nga umuna a kasapulanda nga ipakita ti napudno a panagbabawi uray iti maysa a tawen laeng. Mangangay ti bishop wenno stake president iti sabali pay a konseho iti kinamiembro tapno ibilang a maawat manen (kitaen iti 32.16.1).

Dagiti Pangngeddeng ti Konseho iti Kinamiembro ken Resulta

Pangngeddeng	Resulta
Pangngeddeng Agtalinaed iti Nasayaat a Sasaaden (kitaen iti 32.11.1)	Resulta Awan
Pangngeddeng Personal a Panagbalakad iti Bishop wenno Stake President (kitaen iti 32.11.2)	Resulta Mabalin a saan a pormal a naigetan ti sumagmamano a pribilehio iti kinamiembro. Gagangay nga agpaut iti nakurkurang a maysa a tawen dagiti panagiget; kadagiti karkarna a kasasaad, mabalin a napapautda pay. Maikkat dagiti saan a pormal a panagiget kalpasan ti napudnuan a panagbabawi. Saan a mairekord ti tignay iti rekord ti kinamiembro.
Pangngeddeng Dagiti Pormal a Panagiget iti Kinamiembro (kitaen iti 32.11.3).	Resulta Pormal a maigetan dagiti pribilehio iti kinamiembro. Gagangay nga iti uray laeng maysa a tawen ken mabalin a napapaut pay dagiti panagiget. Mairekord ti tignay iti rekord ti kinamiembro. Maikkat dagiti pormal a panagiget kalpasan ti napudnuan a panagbabawi, ken no kasapulan, maysa a konseho ti kinamiembro, ken ti pananganamong ti Umuna a Panguluen. Maikkat ti membership record indicator no naikkat dagiti panagiget kalpasan ti konseho iti kinamiembo (malaksid dagiti kasapulan nga anotasion; kitaen iti 32.14.5).
Pangngeddeng Panangikkat iti Kinamiembro (kitaen iti 32.11.4).	Resulta Mapaawan bisa dagiti amin nga ordinansa. Maikkat ti amin a pribilehio iti kinamiembro, gagangay nga uray iti maysa a tawen laeng. Maikari ti maysa a tao para iti panangawat manen babaen ti panagbuniag ken kumpirmasion kalpasan ti napudnuan a panagbabawi, ken no kasapulan, maysa a konseho ti kinamiembro, ken ti pananganamong ti Umuna a Panguluen. Maikari ti sigud a na-endow a tao nga umawat iti pannakaisubli dagiti bendisionna babaen laeng ti pananganamong ti Umuna a Panguluen ken kalpasan ti uray maysa a naan-anay a tawen manipud iti pannakaawatna manen (kitaen iti 32.17.2). Para iti sigud a na-endow a tao, maikkat laeng ti indicator iti “Restoration of Blessings Required” manipud iti rekord ti kinamiembro kalpasan a maannong ti ordinansa (agtalinaed dagiti kasapulan nga anotasion; kitaen iti 32.14.5).

32.11.5

Dagiti Saludsod maipapan iti Panangikeddeng kadagiti Narikut a Pakaseknan a Banag

Yuman dagiti bishop iti stake president dagiti saludsod maipapan kadagiti pangiwanwan iti handbook para kadagiti konseho iti kinamiembro.

Kadagiti narigat a pakaseknan a banag, mabalin nga agkiddaw ti stake president iti balakad manipud iti naidutok kenkuana nga Area Seventy. Nasken a makiuman ti stake president iti Panguluen ti Area maipapan kadagiti pakaseknan a banag a nabalabala iti 32.6.3. Nupay kasta, nasken a saan a damagen ti stake president iti Area Seventy wenno General Authority no kasano ti mangikeddeng kadagiti narikut a pakaseknan a banag. Ikeddeng ti stake president no nasken a maangay ti maysa a konseho tapno pagsasaritaan ti galad. No maangay ti maysa a konseho, ikeddeng ti stake president wenno bishop ti pagbanagan.

32.11.6

Turay ti Umuna a Panguluen

Addaan iti pinal a panangituray ti Umuna a Panguluen iti amin a panagiget ken panangikkat iti kinamiembro iti Simbaan.

32.12

Dagiti Notipikasion ken Panangipakaammo

Ti pangngeddeng ti maysa a konseho iti kinamiembro ket maipakaammo iti tao—ken iti dadduma pay no kasapulan—kas nailawlawag iti baba.

32.12.1

Panangpakaammo iti Tao maipapan iti Pangngeddeng

Gagangay nga ibaga ti bishop wenno stake president iti tao ti pagbanagan ti konseho no igibus daytoy. Nupay kasta, mabalinna ti mangigibus iti maysa a konseho iti maysa a panawen tapno agsapul iti ad-adu pay a pangiwanwan wenno impormasion sakbay ti panangaramid iti pangngeddeng.

Ilawlawag ti bishop wenno stake president dagiti epekto ti pangngeddeng kas nabalabala iti 32.11. Gagangay a mangted pay iti balakad maipapan kadagiti kondision ti panagbabawi tapno mabalin a maikkat dagiti panagiget wenno mabalin a maawat manen ti tao iti Simbaan.

Gagangay nga ibaga ti bishop wenno stake president iti tao ti madagdagus a naisurat a pakaammo maipapan iti pangngeddeng ken dagiti epekto daytoy. Naglaon daytoy a pakaammo iti sapasap a palawag a naipatungpal ti tignay kas sungbat iti galad a maibusor kadagiti linteg ken urnos ti Simbaan. Mabalin nga iraman pay daytoy ti balakad maipapan iti pannakaikkat dagiti panagiget iti kinamiembro wenno pannakaawat manen iti Simbaan. Nasken a mangipakaammo daytoy iti tao a mabalinna a yapela ti pangngeddeng (kitaen iti 32.13).

No saan a dumar-ay ti tao iti konseho, mabalin nga umdasen ti naisurat a pakaammo tapno mangipakaammo kenkuana maipapan iti pangngeddeng. Mabalin pay ti bishop wenno stake president a makipagkita iti tao.

Saan a mangted ti bishop wenno stake president iti tao iti kopia ti Report of Church Membership Council form.

32.12.2

Panangipakaammo iti Dadduma maipapan iti Pangngeddeng

No saan a pormal nga igetan ti bishop wenno stake president ti maysa a tao kadagiti pribilehio iti kinamiembro iti personal a panagbalakad, gagangay a saanna nga ipakaammo iti asino man (kitaen iti 32.8.3). Nupay kasta, agpipinnakaamo dagitoy a lider iti tunggal maysa maipapan kadagiti saan a pormal a panagiget no tulonganda dagiti miembro.

No pormal a maigetan dagiti pribilehio iti kinamiembro wenno naikkat iti maysa a konseho iti kinamiembro, ipakaammo ti bishop wenno stake president laeng kadagiti agkasapulan a mangammo. Mayaplikar dagiti sumaganad a pangiwanwan.

Ibilangna dagiti panagkasapulan dagiti biktima ken potensial a biktima ken dagiti rikna ti pamilia ti tao.
Saanna nga ipakaammo ti pangngeddeng no yap-apela ti tao daytoy. Nupay kasta, mabalinna nga ipakaammo a mayap-apela daytoy no mariknana a kasapulan a masaluadan dagiti potensial a biktima. Mabalinna pay nga ipakaammo daytoy tapno masuportaran ti pannakapaimbag dagiti biktima (nupay saanna nga ited ti nagnagan dagiti biktima) wenno tapno masaluadan ti integridad ti Simbaan.
No kasapulan, ipakaammo ti bishop ti pangngeddeng kas panagtalek kadagiti miembro ti konseho iti ward. Daytoy ket tapno pakaammuan dagiti lider a mabalin a mangibilang iti tao a sidadaan para kadagiti calling, mangisuro kadagiti lesson, wenno mangted iti kararag wenno bitla. Daytoy pay ti mangallukoy kadagiti lider a mangidiaya iti pammateg ken suporta iti miembro ken iti pamiliana.
Addaan iti pananganamong manipud iti stake president, mabalin nga isarita ti bishop ti pangngeddeng kadagiti miting iti elders quorum ken Relief Society no ti situasion iramanna:
- Dagiti mananggundaway nga ugali a mabalin a mangbutbuteng iti dadduma.
- Panangisuro iti palso a doktrina wenno dadduma pay a kita ti apostasia wenno ikakalilis iti kinapudno.
- Dagiti nakadidillaw a basol kas iti panangaramat iti panagasawa iti ad-adu ngem maysa wenno panangusar kadagiti pannursuro mainaig iti kulto tapno manggargari iti sumaganad.
- Mangsuppiat iti kaaduan dagiti tignay ken pannursuro dagiti sapasap ken lokal a lider ti Simbaan.
Kadagiti kasta a kaso, mabalin a kasapulan pay ti stake president a mangpusgan iti komunikasion kadagiti miembro ti dadduma pay a ward iti stake.
Iti sumagmamano a kaso, mabalin a marikna ti bishop wenno stake president a makatulong a pakaammuan ti sumagmamano wenno amin a biktima ken dagiti pamiliada. Aramidenna daytoy babaen ti bishop wenno stake presidentda.

No dagiti mananggundaway a galad ti tao ti mangpapeggad iti dadduma, mabalin a mangted ti bishop wenno stake president kadagiti pammallaag a mangtulong a mangsalaknib iti dadduma. Saanna nga ibuktaktak ti kumpidensial nga impormasion ken saan a mangpattapatta.
Iti amin a dadduma pay a kaso, limitaran ti bishop wenno stake president ti ania man a komunikasion iti maysa a sapasap a palawag. Simple nga isaona a dagiti pribilehio iti kinamiembro ti tao iti Simbaan ket naigetan ken naikkat gapu iti galad a maibusor kadagiti linteg ken urnos ti Simbaan. Idawatna kadagiti adda a nakaimatang a saanda a pagsasaritaan daytoy. Saan nga agkiddaw iti pangkanunong a butos.
No adda iti nasayaat a sasaaden ti maysa a miembro kalpasan ti maysa a konseho iti kinamiembro (kitaen iti 32.11.1), mabalin nga ipakaammo ti bishop wenno stake president dayta tapno maiwaksi dagiti sayangguseng.

32.12.3

Panangipakaammo iti Panangikkat iti Kinamiembro

Iti sumagmamano a kaso, mabalin a kasapulan ti bishop nga ipakaammo a nagikkaten ti maysa a tao iti kinamiembrona iti Simbaan (kitaen iti 32.14.9). Saan a mangted ti bishop iti ania man a detalye.

32.13

Panagapela iti Pangngeddeng

Mabalin ti miembro ti mangyapela iti pangngeddeng ti konseho iti kinamiembro iti ward iti stake president: iti uneg ti 30 nga aldaw. Mangangay ti stake president iti maysa a konseho iti kinamiembro iti stake tapno mangibilang iti apela. Mabalinna met nga idawat iti maysa a bishop a mangituloy manen iti maysa a konseho ket ibilangna manen ti maysa a pangngeddeng, nangruna no adda baro nga impormasion.

Mabalin ti miembro ti mangyapela iti pangngeddeng ti konseho iti kinamiembro iti stake babaen ti panagsurat iti Umuna a Panguluen ti uneg ti 30 nga aldaw. Ited ti miembro ti surat iti stake president tapno ipatulod iti Panguluen ti Area.

Iti mision, mabalin ti maysa a miembro ti mangyapela iti pangngeddeng ti konseho iti kinamiembro iti maysa a branch wenno district iti mission president iti uneg ti 30 nga aldaw. Mangangay ti mission president iti maysa a konseho iti kinamiembro tapno mangibilang iti apela. No ti oras ken distansia ti manglapped kenkuana iti panangaramid iti daytoy, surotenna dagiti pangiturong iti 32.9.4.

No ti mission president ti nangiturong iti konseho, mabalin ti miembro ti mangyapela iti pangngeddeng babaen ti panagsurat iti Umuna a Panguluen ti uneg ti 30 nga aldaw. Ited ti miembro ti surat iti mission president tapno ipatulod iti Panguluen ti Area.

Ti tao a mangyapela iti maysa a pangngeddeng ilawlawagna iti panagsurat dagiti naipagarup a biddut wenno saan nga umisu iti procedure wenno pangngeddeng.

No maangay ti konseho iti kinamiembro tapno mangibilang iti maysa nga apela, maysa kadagiti dua a pangngeddeng ti posible:

Pagtalinaeden ti immuna a pangngeddeng.
Balbaliwan ti immuna a pangngeddeng.

Pinal dagiti pangngeddeng ti Umuna a Panguluen ken saan a mayapela manen.

32.14

Dagiti Report ken Rekord iti Kinamiembro

32.14.1

Report ti Konseho iti Kinamiembro iti Simbaan

Kalpasan ti ania man a konseho iti kinamiembro, dagus nga isumite ti bishop wenno stake president ti Report of Church Membership Council form babaen ti LCR. Mabalinna nga idawa iti clerk a mangisaganaa iti report. Penkenna nga awan ti hard copy wenno electronic copy ti form a mapagtalinaed iti lugar. Penkenna a madadael a dagus ti ania man a naisurat a naaramat a mangisagana iti report.

32.14.2

Dagiti Pormal a Panagiget iti Kinamiembro iti Simbaan

Naisurat dagiti pormal a panagiget iti kinamiembro iti Simbaan iti rekord ti kinamiembro iti maysa a tao. Aramiden dagiti headquater ti Simbaan daytoy a panagsurat kalpasan ti panangawat iti Report ti Konseho iti Kinamiembro iti Simbaan [Report of Church Membership Council]. No nagbabawin ti maysa a tao, nasken a mangangay ti lider iti sabali pay a konseho a mangibilang iti panangikkat kadagioy a panangiget (kitaen iti 32.16.1).

32.14.3

Dagiti Rekord Kalpasan a Naikkat ti Kinamiembro ti Tao iti Simbaan

No naikkat ti rekord iti kinamiembro iti Simbaan ti maysa a tao, ikkaten dagiti headquater ti Simbaan ti rekord iti kinamiembro kalpasan ti panangawatna iti Report ti Konseho iti Kinamiembro iti Simbaan [Report of Church Membership Council]. No tarigagayan ti tao, tulongan isuna dagiti lider ng agsagana tapno maawat manen iti Simbaan babaen ti panangbuniag ken kumpirmasion (kitaen iti 32.16.1).

32.14.4

Dagiti Rekord Kalpasan a Naawat Manen iti Simbaan

Kalpasan a naawat manen ti maysa a tao iti Simbaan, isumite ti bishop ti maysa a Report of Church Membership Council form. Saan pay a naaramid ti maysa a Baptism and Confirmation Certificate. Ketdi, nairekord ti panagbuniag ken kumpirmasion iti Report of Church Membership Council form.

No saan a na-endow ti miembro, mangidutok dagiti headquarter ti Simbaan iti rekord iti kinamiembro a mangipakita kadagiti petsa ti sigud a panangbuniagna ken dadduma pay nga ordinansa. Awan ti panangibasar nga aramiden ti rekord iti pannakapukaw ti kinamiembro ti Simbaan.

No na-endow ti miembro, i-update dagiti headquarter ti Simbaan ti rekord iti kinamiembro a mangipakita kadagiti petsa ti baro a panangbuniag ken kumpirmasion. Iraman pay daytoy a rekord ti mensahe a “Kasapulan ti Pannakaisubli dagiti Bendision.” Kalpasan a naisubli dagiti bendison ti miembro (kitaen iti 32.17.2), ma-update ti rekord ti kinamiembro a mangipakita kadagiti petsa ti sigud a panagbuniag ken dadduma pay nga ordinansa. Awan ti panangibasar nga aramiden iti pannakapukaw ti kinamiembro ti Simbaan.

32.14.5

Dagiti Rekord iti Kinamiembro nga Addaan kadagiti Anotasion

No pusgan ti Umuna a Panguluen, ikkan iti anotasion ti headquarter ti Simbaan ti rekord ti kinamiembro ti ti maysa a tao iti ania man a situasion a nailista iti baba.

Mangisumite ti bishop wenno stake president iti maysa a Report of Church Membership Council form a mangipakpakita a pormal a naigetan wenno naikkat ti kinamiembro ti tao para iti ania a sumaganad a galad:
1. Insesto
2. Seksual a panagabuso iti maysa nga ubing wenno agtutubo, seksual nga eksploitasion ti maysa nga ubing wenno agtutubo, wenno nakaro a panagabuso iti bagi wenno rikna ti maysa nga ubing wenno agtutubo
3. Pannakairaman iti pornograpia iti ubing kas nabalabala iti 38.6.6
4. Panagasawa iti ad-adu ngem maysa
5. Mananggundaway a seksual nga ugali ti nataengan
6. Transgender—dagiti tignay iti transision iti kasupadi ti biological a katatao iti pannakaipasngay (kitaen iti 38.6.23)
7. Panagdispalko kadagiti pondo ti Simbaan wenno panagtakaw iti sanikua ti Simbaan
8. Panagabuso iti pagimbagan [welfare] iti Simbaan
9. Pagpeggadan nga ugali (kas iti seksual, kinaranggas, wenno pinasial) wenno galad a mangdadael iti Simbaan
Mangisumite ti bishop wenno stake president iti naisurat a notipikasion a ti tao:
1. Inaklonna ken nasentensiaan iti maysa a krimen a mangiraman iti maysa kadagiti tignay a nailista iti baba.
2. Natakuatan nga agsungbat isuna iti tignay a sibil ti inuulbod wenno dadduma pay nga ilegal a tignay a mangiraman iti maysa kadagiti tignay a nailista iti baba.

No umawat ti maysa a bishop iti adda anotasionna a rekord, surotenna dagiti pangiturong iti anotasion.

Ti laeng Umuna a Panguluen ti mabalin a mangted turay iti pannakaikkat iti anotasion manipud iti maysa a rekord ti kinamiembro. Tapno mairekomenda ti pannakaikkat iti anotasion, usaren ti stake president ti LCR. Ipakaammo kenkuana ti Opisina ti Umuna a Panguluen no naanamongan wenno saan ti rekomendasion.

32.14.6

Panangireport iti Panagtakaw kadagitti Pondo ti Simbaan

No maigetan wenno maikkat ti kinamiembro ti tao gapu iti panagtakawna kadagiti pondo ti Simbaan, ireport ti bishop wenno stake president daytoy kas nabalabala iti 34.9.5.

32.14.7

Yakar dagiti Panagiget kadagiti Rekord ti Kinamiembro

No dadduma umakar ti maysa a miembro iti Simbaan bayat ti pannakaitantan ti tignay iti kinamiembro wenno dadduma pay a nadagsen a pakaseknan. No dadduma kasapulan nga ibinglay ti bishop ti impormasion iti baro a bishop sakbay ti panagyakarna iti rekord iti kinamiembro iti baro a yunit. Kadagitoy a kaso, mabalin ti bishop (wenno clerk no napusgan) ti mangikabil iti panagiget iti panangakar iti rekord iti kinamiembro. Agtalinaed ti rekord iti yunit agingga nga ikkaten ti bishop (wenno clerk no napusgan) ti panangiget. Daytoy ti mangted iti gundaway nga ipakaammo ti bishop dagiti pakaseknan ken impormasion.

32.14.8

Dagiti Rekord dagiti Nakabalud

Adda dagiti miembro a nasentensiaan iti maysa a krimen ken naibaludda. Ti bishop wenno stake president ti yunit a nagindegan ti tao idi naaramid ti krimen ket mangirugi iti ania man a pormal a panangiget wenno panangikkat iti kinamiembro. No naigetan dagiti pribilehio ti kinamiembro, ipatulod ti lider (wenno clerk no napusgan) ti rekord ti kinamiembro iti yunit nga akinrebbeng para iti lugar a pakabuladan ti tao. No naikkat ti kinamiembro, kontaken ti bishop wenno stake president ti lider dayta a yunit. (Kitaen iti 32.15.)

32.14.9

Dagiti Kiddaw a Mangikkat iti Kinamiembro

No kiniddaw ti maysa a miembro a maikkat ti kinamiembrona iti Simbaan, tumulong ti bishop a mangkita no agtallugod isuna a mangilawlawag kadagiti pakaseknan ken mangpadas a mangrisut kadagitoy. Mabalin pay ti bishop ken miembro a makiuman iti stake president. Penken ti lider a maawatan ti miembro dagiti sumaganad a resulta ti panangpaikkat iti kinamiembro iti Simbaan.

Daytoy ti mangikkat iti bisa ti amin nga ordinansa.
Daytoy ti mangikkat iti amin a pribilehio iti kinamiembro.
Mapasamak laeng ti panangawat manen babaen ti panagbuniag ken kumpirmasion kalpasan ti naan-anay nga interbyu ken, iti adu a kaso, maysa a konseho iti kinamiembro (kitaen iti 32.16.2).
Maikari ti sigud a na-endow a tao nga umawat iti pannakaisubli dagiti bendision ti priesthood ken templo babaen laeng ti pananganamong ti Umuna a Panguluen ken kalpasan ti uray maysa laeng a naan-anay a tawen manipud iti pannakaawatna manen (kitaen iti 32.17.2).

No kayat pay laeng ti miembro a maikkat ti kinamiembrona iti Simbaan, mangted iti bishop iti maysa a naisurat, napirmaan a kiddaw. Isumite ti bishop ti kiddaw iti stake president babaen iti LCR. Kalpasanna irebyu ti stake president ket isumitena ti kiddaw babaen iti dayta a sistema. Nasken nga agtignay a dagus dagiti lider kadagiti kiddaw.

Mabalin pay a paikkat ti maysa a tao iti kinamiembrona babaen ti panangipatulod iti maysa a napirmaan, nanotarioan a kiddaw kadagiti headquarter ti Simbaan.

Ti maysa a menor de edad nga agtarigagay a mangpaikkat iti kinamiembrona iti Simbaan ket surotenna ti isu met la a procedure kas iti nataengan, nga adda maysa nga eksepsion: nasken a pirmaan ti menor de edad ti kiddaw (no nasurok a walo ti tawenna) ken pirmaan (dagiti) nagannak wenno (dagiti) agay-aywan nga akin-custody iti menor de edad.

No ti maysa a miembro nga agpapaikkat iti kinamiembrona ket mangpapeggad iti legal a tignay a maibusor iti Simbaan wenno dagiti liderna, suroten ti stake president dagiti pangiturong iti 38.8.24.

Nasken a maaksionan ti kiddaw a mangikkat iti kinamiembro uray no adda impormasion dagiti lider ti priesthood maipapan iti maysa a nadagsen a basol. Mailista ti ania man nga impormasion maipapan kadagiti saan pay a narisut a basol no maisumite ti kiddaw babaen ti Leader and Clerk Resources. Daytoy ti mangpalugod kadagiti lider iti priesthood a mangrisut iti kasta a pakaseknan a bambanag iti masakbayan no agaplikar manen ti tao para iti pannakaawat manen iti Simbaan (kitaen iti 32.16.2).

Saan a nasken nga isingasing ti maysa a lider iti priesthood ti panagikkat iti kinamiembro iti Simbaan tapno maliklikan ti panangangay iti maysa a konseho iti kinamiembro.

Itultuloy dagiti lider ti agministro kadagiti agpaikkat iti kinamiembroda malaksid no kiddawenda a saandan a kontaken.

PANANGIPASUBLI KADAGITI PRIBILEHIO ITI KINAMIEMBRO ITI SIMBAAN

No naigetan wenno naikkat dagiti pribilehio iti Simbaan ti maysa a tao, i-fellowship, balakadan, ken suportaran daggiti lider ti tao no ipalubosna. Ilawlawag daytoy a benneg no kasano a mabalin a maipasubli dagita a pribilehio.

32.15

Agtultuloy nga Agministro

Ti akem ti bishop wenno stake president kas maysa a sapasap nga ukom [common judge] saan nga aggibus no naawaten ti maysa a miembro dagiti panagiget iti kinamiembro wenno nangpaikkat iti kinamiembrona iti Simbaan. Itultuloyna ti agministro, no ipalubos ti tao, tapno mabalinna ti ag-enjoy manen kadagiti bendision ti kinamiembro iti Simbaan. Masansan a makipagkita ti bishop iti tao ken, no makatulong ken maitutop, iti asawana. Insuro ti Mangisalakan kadagiti Nephite:

“Saanyo a papanawen … iti lugar a pagdaydayawanyo, gapu iti kasta agtultuloykayo nga agpaay; gapu ta saanyo nga ammo no kaano ti isusubli ken panagbabawida, ket umayda kaniak nga addaan iti naan-anay a panggep iti pusoda, ket agasakto ida; ket dakayonto ti puon ti pannakayasidegda iti pannakaisalakan” (3 Nephi 18:32).

Ti panawen kalpasan laeng ti panagiget wenno panangikkat iti kinamiembro ti maysa a tao ket narigat ken napeggad para iti pamiliana. Nasken nga agbalin a managrikna dagiti lider kadagitoy a panagkasapulan ket paregtaen ken tulonganda dagiti miembro ti pamilia.

Penken ti bishop a maidutok nga agministro dagiti manangipateg a miembro iti maysa a tao a naigetan wenno naikkat ti kinamiembrona iti Simbaan, no ipalubos ti tao. Agministroda pay iti dadduma a miembro ti pamilia. Mabalin a mabenepisuan dagiti indibidual a naipasango kadagiti panagiget iti kinamiembro manipud iti pannakiramanda iti indexing (kitaen iti 25.4.3).

No umakar ti tao manipud iti ward, ipakaammo ti bishop iti baro a bishop ket ilawlawagna no ania pay ti kasapulan a maaramid sakbay a mabalin nga ikkaten dagiti panagiget iti kinamiembro iti Simbaan. No naikkaten ti kinamiembro ti tao manipud iti Simbaan wenno pinaikkat ti tao ti kinamiembrona, aramiden ti bishop daytoy isu met a panagkontak no impalubos ti tao a tulongan dagiti lider ti Simbaan.

32.16

Panangikkat kadagiti Pormal a Panagiget wenno Pannakaawat Manen iti Simbaan

32.16.1

Dagiti Konseho iti Kinamiembro a Mangikkat kadagiti Pormal a Panagiget wenno Mangawat Manen iti Tao

No naigetan wenno naikkat dagiti pribilehio iti kinamiembro iti maysa a konseho iti kinamiembro, nasken a maangay ti sabali pay a konseho a mangibilang iti panangikkat kadagiti panagiget wenno maawat manen ti tao iti Simbaan. Nasken nga addaan daytoy a konseho iti isu met laeng a lebel ti turay (wenno nangatngato) kas iti immuna a konseho. Kas pagarigan, no nangidaulo ti maysa a stake president wenno mission president iti immuna a konseho, mangidaulo ti maysa a stake president wenno mission president iti konseho tapno mangibilang iti panangikkat kadagiti panagiget wenno mangawat manen iti tao.

Angayen ti agdama a bishop wenno stake president ti konseho. Umuna a penkenna a nagbabawin ti tao ken nakasagana ken maikari nga ag-enjoy kadagiti bendision ti kinamiembro iti Simbaan.

Dagiti pormal a nangpaiget iti kinamiembroda iti Simbaan ket gagangay a nasken a mangipakita iti napudnuan a panagbabawi iti uray maysa laeng a tawen sakbay a maited ti konsiderasion iti panagikkat kadagiti panagiget. Dagiti pormal a nangpaikkat iti kinamiembroda iti Simbaan ket dumani kanayon a nasken a mangipakita iti napudnuan a panagbabawi iti uray maysa laeng a tawen sakbay a maibilangda iti pannakaawat manen. Para iti maysa a miembro a nagiggem iti napateg a posision iti Simbaan iti panawen ti panaglabsing iti nadagsen a basol, gagangay a napapaut ti panawen (kitaen iti 32.6.1.4).

Ti maysa a konseho a mangibilang iti panangikkat kadagiti panagiget wenno panangawat manen ti maysa a tao iti Simbaan ket surotenna dagiti isu met la a pangiwanwan kas kadagiti dadduma pay a konseho iti kinamiembro. Kasapulan ti maysa a bishop ti pananganamong ti stake president tapno mangangay iti konseho. Iti mission, kasapulan ti branch president wenno district president ti pananganamong ti mission president.

Mayaplikar dagiti sumaganad a pangiwanwan no maang-angay ti maysa a konseho iti kinamiembro a mangibilang iti panangikkat kadagiti panagiget iti kinamiembro iti Simbaan wenno panangawat manen iti maysa a tao iti Simbaan. Saan amin kadagitoy a pangiwanwan ti mabalin a mayaplikar iti tunggal kaso.

Irebyu ti immuna a konseho iti kinamiembro Irebyu ti bishop wenno stake president ti Report of Church Membership Council form. Agkiddaw isuna iti maysa a kopia babaen ti LCR. Kalpasan ti panagrebyuna iti form, mabalinna a kontaken ti bishop wenno stake president a nakaangayan ti immuna a konseho tapno agkiddaw iti pannakalawlawag.
Kauman ti tao. Kauman ti bishop wenno stake president ti tao a nasayaat tapno mariknana (discern) ti pigsa ti pammatina ken ni Jesucristo ken ti kapaut ti panagbabawi. Ikeddengna pay no natungpal ti tao dagiti kondision a nabalabala iti immuna a tignay.
Ikeddeng ti kasasaad ti tignay iti korte a mainaig iti sibil ken krimen. No dadduma inaklon ti maysa a tao wenno nasentensiaan iti maysa a krimen. No dadduma natakuatan nga agsungbat ti maysa a tao iti tignay a sibil ti inuulbod wenno dadduma pay nga ilegal a tignay. Kadagitoy a kaso, gagangay a saan a mangangay ti lider iti maysa a konseho agingga a naipatungpal ti tao dagiti kondision ti ania man a pannakasentensia, bilin, wenno panangkedngan nga inaramid dagiti legal nga agturay. Mabalin nga iraman dagitoy ti pannakabalud, probasion, parol, ken multa wenno panangisubli. Kasapulan kadagiti eksepsion ti pananganamong ti Umuna a Panguluen sakbay ti panangangay iti maysa a konseho iti kinamiembro. Mabalin nga iraman kadagitoy nga eksepsion ti maysa a tao a nakakumpleton kadagiti legal a naidawat a kasapulan ken nangipakitan iti napudnuan a panagbabawi ngem adda iti napaut a probasion wenno addaan iti dakkel a multa.
Kontaken dagiti lider iti priesthood dagiti biktima. Kontaken ti bishop wenno stake president ti agdama a bishop wenno stake president ti asino man a biktima (kitaen iti 32.10.2).
Mangted iti pakaammo iti konseho. Pakaammuanna ti tao maipapan iti petsa, oras, ken lugar ti konseho.
Iturong ti konseho. Iturongna ti konseho a mayannurot kadagiti pangiwanwan iti 32.10.3. Saludsodenna iti tao no ania ti inaramidna tapno agbabawi. Saludsodenna pay maipapan iti panagkumitna ken ni Jesucristo ken iti Simbaan. No naidatagen ti amin a mainaig a banag, papanawenna ti miembro. Kaduana dagiti mamagbagana, agkararag a mangpanunot no ania a tignay ti maaramid. Dagitoy ti tallo a posible a pangngeddeng:
1. Itultuloy dagiti panagiget wenno panagikkat iti kinamiembro.
2. Ikkaten dagiti panagiget wenno palugodan ti pannakaawat manen.
3. Irekomenda iti Umuna a Panguluen a maikkaten dagiti panangiget wenno mapalugodan ti pannakaawat manen (no kasapulan mayannurot iti “Agaplikar para iti Pananganamong ti Umuna a Panguluen [Apply for First Presidency approval]” iti baba).
Ibinglay ti pangngeddeng. Kalpasan nga agaramid ti konseho iti maysa a pangngeddeng, ibinglay ti mangimatmaton a dadaulo daytoy iti tao. No kasapulan ti pananganamong ti Umuna a Panguluen, ilawlawagna a ti pangngeddeng ket maysa a rekomendasion iti Umuna a Panguluen.
Isumite ti report. Isumite ti bishop wenno stake president ti maysa a Report of Church Membership Council form babaen iti LCR. Mabalinna nga idawat iti clerk a mangisagana iti daytoy a report. Penkenna nga awan ti hard copy wenno electronic copy ti form a mapagtalinaed iti lugar. Penkenna pay a madadael a dagus ti amin a naisurat a naaramat a mangisagana iti report.
Agaplikar iti pananganamong ti Umuna a Panguluen (no kasapulan). Kadagiti sumaganad a kasasaad, kasapulan ti pananganamong ti Umuna a Panguluen tapno maikkat dagiti pormal a panagiget iti kinamiembro wenno maawat manen ti tao iti Simbaan. Maidawat a kasapulan daytoy a pananganamong uray no napasamak ti madi a galad kalpasan a pormal a naigetan wenno naikkat iti kinamiembro iti Simbaan.
1. Panagpatay
2. Insesto
3. Seksual a panagabuso iti maysa nga ubing wenno agtutubo, seksual nga eksploitasion ti maysa nga ubing wenno agtutubo, wenno nakaro a panagabuso iti bagi ken rikna ti maysa nga ubing wenno agtutubo babaen ti maysa a nataengan wenno babaen ti maysa nga agtutubo nga in-inauna iti sumagmamano a tawen
4. Pannakairaman iti pornograpia iti ubing no adda legal a panagsentensia
5. Ikakalilis iti Kinapudno wenno Apostasia
6. Panagasawa iti ad-adu ngem maysa
7. Panaglabsing iti maysa a nadagsen a basol kabayatan ti panangiggem iti napateg a posision iti Simbaan
8. Transgender—dagiti tignay iti transision iti kasupadi ti biological a katatao iti pannakaipasngay (kitaen iti 38.6.23)
9. Panagdispalko kadagiti pondo wenno sanikua ti Simbaan
Mangted iti naisurat a pakaammo iti pangngeddeng. Penken ti bishop wenno stake president nga umawat ti tao ti madagdagus a naisurat a pakaammo maipapan iti pangngeddeng ken dagiti epekto daytoy.
Buniagan ken Kumpirmaan. No naikkat ti kinamiembro iti Simbaan ti maysa a tao iti immuna a konseho, nasken a mabuniagan ken makumpirmaan manen isuna. No kasapulan ti pananganamong ti Umuna a Panguluen, mabalin nga annongen laeng dagitoy nga ordinansa kalpasan a maawat daytoy a pananganamong. Saan pay a naaramid ti Baptism and Confirmation Certificate (kitaen iti 32.14.4).

32.16.2

Pannakaawat manen kalpasan ti Panangikkat iti Kinamiembro iti Simbaan

No pormal nga inikkat ti maysa a tao ti kinamiembrona iti Simbaan, nasken a mabuniagan ken makumpirmaan tapno maawat manen iti Simbaan. Para kadagiti nataengan, gagangay a saan a maibilang iti pannakaawat manen agingga iti uray maysa laeng a tawen kalpasan ti pannakaikkat ti kinamiembro.

No agkiddaw ti maysa a tao iti pannakaawat manen, mangala ti bishop wenno stake president iti maysa a kopia ti Report of Administrative Action form a karagpin ti kiddaw para iti panangikkat. Mabalinna ti mangala iti daytoy babaen ti LCR.

Kalpasanna kaumaan a nasayaat ti bishop wenno stake president ti tao. Saludsodenna maipapan dagiti gapu para iti sigud a kiddaw ken ti tarigagay para iti pannakaawat manen. Iti espiritu ti ayat, saludsodenna maipapan kadagiti nadagsen a basol a mabalin a linabsing ti tao sakbay man wenno kalpasan ti panangikkat iti kinamiembro. Saan nga ituloy ti lider ti panangawat manen agingga a mapennekna a nagbabawin ti tao ken nakasagana ken maikari nga ag-enjoy kadagiti bendision ti kinamiembro iti Simbaan.

Sumaganad dagiti pangiwanwan para iti pannakaawat manen kalpasan ti panagikkat:

Maangay ti maysa a konseho iti kinamiembro no pormal a naigetan ti kinamiembro ti tao iti panawen ti panagikkat.
Maangay ti maysa a konseho ti kinamiembro no naglabsing ti tao iti nadagsen a basol, agraman ti ikakalilis iti kinapudno, sakbay ti panagikkat iti kinamiembro.

Iti dadduma a kasasaad, saan a maangay ti konseho iti kinamiembro malaksid no ikeddeng ti bishop wenno stake president a kasapulanto daytoy.

No kasapulan ti maysa a konseho iti kinamiembro para iti maysa a tao nga immawaten iti temple recommend, angayen ti stake president daytoy. No kasapulan ti maysa a konseho para iti maysa a tao a saan a na-endow, angayen ti bishop daytoy, nga addaan iti pananganamong ti stake president.

No nakiraman ti tao iti ania man a madi a galad iti 32.16.1, numero 9, sakbay men wenno kalpasan ti panangikkat iti kinamiembro iti Simbaan, kasapulan ti pananganamong ti Umuna a Panguluen para iti pannakaawat manen. No nakiraman ti tao iti ania man a madi galad iti 32.14.5, numero 1, sakbay man wenno kalpasan ti panangikkat iti kinamiembro, maaramidto ti maysa nga anotasion iti rekord iti kinamiembro.

Ti tao nga agkiddaw iti pannakaawat manen nasken a matungpalna dagiti isu met laeng a kualipikasion kas iti dadduma a mabuniagan. No napennek ti bishop wenno stake president a maikari ti tao ken napudno iti panagtarigagayna a maawat manen, mabalin a mabuniagan ken makumpirmaan ti tao. Saan pay a naaramid ti Baptism and Confirmation Certificate (kitaen iti 32.14.4).

32.17

Panagaktibo iti Simbaan, Panangorden, ken Pannakaisubli dagiti Bendision ken Pannakaawat Manen

32.17.1

Panagaktibo iti Simbaan ken Panangorden

Ipakita ti sumaganad a tsart ti maitutop a lebel ti panagaktibo iti Simbaan para iti maysa a tao a naawat manen babaen ti panagbuniag ken kumpirmasion.

	Saan pay a Sigud a Na-endow	Sigud a Na-endow
Dagiti Sigud a Priesthood Holder	Saan pay a Sigud a Na-endow Madagdagus kalpasan ti panagbuniag ken kumpirmasion, mai-confer ti priesthood kadakuada ken maordenanda iti saad [office] ti priesthood nga adda kadakuada idi naibabawi wenno naikkat ti kinamiembroda iti Simbaan. Kasapulan ti pangkanunong a butos. Mabalin a maikkan iti maysa a limited-use temple recommend.	Sigud a Na-endow Saanda a mabalin a maordenan iti ania man a saad [office] ti priesthood. No maisubli dagiti bendisionda iti priesthood ken templo, maisubli dagiti sigud a saadda iti priesthood kas nabalabala iti 32.17.2. Saanda a mabalin a mangannong kadagiti ordinansa agingga iti dayta a panawen. Mabalinda a makiraman iti ania man nga aktibidad a maipalubos iti maysa a di pay na-endow a miembro nga awanan iti priesthood. Saanda a mabalin nga agaruat iti temple garment wenno umawat iti ania man a kita ti temple recommend agingga a maisubli dagiti bendisionda.
Dadduma pay a Miembro	Saan pay a Sigud a Na-endow Mabalin a makiraman iti aktibidad ti Simbaan kas iti maaramid iti baro a convert. Mabalin a maikkan iti maysa a limited-use temple recommend.	Sigud a Na-endow Mabalinda a makiraman iti ania man nga aktibidad a maipalubos iti maysa a di pay na-endow a miembro nga awanan iti priesthood. Mabalin a saan nga agaruat iti temple garment wenno umawat iti ania man a kita ti temple recommend agingga a maisubli dagiti bendisionda (kitaen iti 32.17.2).

32.17.2

Pannakaisubli dagiti Bendision

Dagiti tao a sigud nga immawaten iti endowment iti templo ken naawat manen babaen ti panagbuniag ken kumpirmasion ket mabalinda laeng ti umawat kadagiti bendisionda iti priesthood ken templo babaen ti ordinansa ti pannakaisubli dagiti bendision (kitaen iti Doktrina ken Katulagan 109:21). Saanda a maordenan kadagiti saad [ofice] ti priesthood wenno ma-endow manen. Maisubli dagitoy a bendision babaen ti ordinansa. Maisubli dagiti kakabsat a lallaki iti sigud a saadda iti priesthood, malaksid iti saad ti Pitupulo, bishop, wenno patriach.

Ti laeng Umuna a Panguluen ti mabalin a manganamong ti pannakaannong ti ordinansa ti pannakaisubli dagiti bendision. Saandanto nga ibilang ti maysa nga aplikasion para iti daytoy nga ordinansa a nasapsapa ngem iti maysa a tawen kalpasan a maawat manen ti tao babaen ti panagbuniag ken kumpirmasion. Agaplikar ti bishop wenno stake president para iti pannakaisubli dagiti bendision babaen ti LCR.

No anamongan ti Umuna a Panguluen ti pannakaisubli dagiti bendision, mangdutokda iti maysa a General Authority wenno stake president a manginterbyu iti tao. No maikari ti tao, annongen daytoy a lider ti ordinansa tapno isubli dagiti bendision ti tao.

Para iti impormasion maipapan kadagiti rekord iti kinamiembro iti Simbaan ken ti pannakaisubli dagiti bendision, kitaen iti 32.14.4.

Ladawan

lalaki nga umaw-awat iti sakramento