33.

Faamaumauga ma Lipoti

33.0

Faatomuaga

O faiga faavae i lenei mataupu e masani ona faatatau i iunite e faaaoga ai meafaigaluega o le tausiga o faamaumauga a le Ekalesia i luga o le initoneti, e aofia ai Punaoa mo Taitai ma Failautusi (PTF), Meafaigaluega a Tagata o le Ekalesia, ma le Faasinoala ma Faafanua a le Uarota. O iunite e le maua ai nei meafaigaluega e tatau ona galulue faatasi ma le Matagaluega o Auaunaga i le Lalolagi Atoa po o le ofisa o le eria.

O le tausiga o faamaumauga e taua i taimi uma i le Ekalesia a le Alii. Mo se faataitaiga:

Na tausia e Atamu “se tusi faamanatu” (Mose 6:5).

Na aoao mai Moronae o igoa o i latou o e na papatisoina i le Ekalesia a Keriso sa tusifaamaumauina ina ia “manatua i latou ma tausia i le afioga lelei a le Atua” (Moronae 6:4).

Na faatonuina e Iosefa Samita e faapea, e tatau ona valaauina se tusitalafaamaumau i uarota taitasi ina ia “faia se talafaamaumau moni i luma o le Alii” (Mataupu Faavae ma Feagaiga 128:2).

33.1

Vaaiga Aoao i Faamaumauga a le Ekalesia

E paia faamaumauga a le Ekalesia. O faamatalaga o loo i ai e ma’ale’ale ma e tatau ona malupuipuia. O polokalama o faamaumauga a le Ekalesia e faatagaina le faaaogaina o faamatalaga o pepa faamaumau e faavae i valaauga. E na o i latou ua faatagaina e tatau ona tuu atu i ai le avanoa e maua ai. E tatau ona latou faaaogaina lenei faamatalaga mo na o faamoemoega e patino i o latou valaauga (tagai i le 33.8).

E mafai ona fesoasoani faamaumauga i taitai:

• E faailoa mai po o ai e ono manaomia se tausiga faapitoa.

• E faailoa mai po o a sauniga ua maua e se tagata pe ono manaomia foi.

• Saili tagata o le Ekalesia.

O ituaiga faamaumauga nei e tausia e iunite a le Ekalesia:

• Lipoti o le auai o tagata o le Ekalesia (tagai i le 33.5)

• Pepa faamaumau (tagai i le 33.6)

• Faamaumauga faaletalafaasolopito (tagai i le 33.7)

• Faamaumauga tautupe (tagai i le mataupu 34)

33.2

Faatonuga Lautele mo Failautusi

E tatau i failautusi uma ona:

• I ai se pepa faataga aoga o le malumalu.

• Avea ma tausi faamaumauga faaeteete.

• Avea ma ni faiaoga ma taitai e gafatia.

E tatau i failautusi ona mulimuli ma le faaeteete i aiaiga faavae o loo i ai nei ina ia malupuipuia ai tupe a le Ekalesia ma ia mautinoa o faamaumauga a le Ekalesia ua sa’o atoatoa. E vave ona logo e failautusi ia taitai perisitua i soo se mea e le talafeagai. Afai e tulai mai faigata i le foiaina o mea e le talafeagai, e tatau i failautusi ona faafesootai le Ofisa o Faamaumauga e Lē Faalauaiteleina i le laumua o le Ekalesia. O loo faaali atu i lalo ia faamatalaga e fesootai ai:

Telefoni: 1-801-240-2053 po o le 1-800-453-3860, laina 2-2053

Vili fua (telefoni GSD): 855-537-4357

Imeli: [e-mail]

O le umi o le auaunaga a failautusi e tatau ona lava mo i latou e aoao ai o latou tiute ma faasaoina le faaauauina o a latou galuega (tagai i le 30.5). Ona e le o i latou o nisi o le au peresitene o le siteki po o le au epikopo, e le manaomia ai ona faamalolo i latou pe a toe faatulagaina se au peresitene o se siteki po o se au epikopo.

33.3

Faamaumauga ma Lipoti a le Siteki

33.3.1

Au Peresitene o le Siteki

O le peresitene o le siteki e vaaia le tausiga o faamaumauga i le siteki. E mafai ona ia faamatuuina atu le tele o lenei galuega i ona fesoasoani ma failautusi.

33.3.2

Failautusi a le Siteki

E tatau i siteki uma ona i ai se failautusi o le siteki e agavaa ma galue mataalia. E valaauina o ia ma vaetofia e se tasi o le au peresitene o le siteki. E tatau ona ia umia le Perisitua Mekisateko ma ia i ai se pepa faataga aoga o le malumalu. O ia o se tasi o le aufono a le siteki. E auai o ia i fonotaga a le siteki e pei ona faailoa atu i le 29.3.

E aoaoina le failautusi o le siteki e le au peresitene o le siteki ma galue i lalo o le latou taitaiga. E mafai ona valaauina failautusi fesoasoani a le siteki e fesoasoani (tagai i le 33.3.3).

33.3.2.1

Tiutetauave mo le Tausiga o Faamaumauga

O le failautusi a le siteki, po o se failautusi fesoasoani ua tofia, ua i ai tiutetauave nei:

• Tuuina atu le lagolago faalepulega i le au peresitene o le siteki.

• Tausia se faamaumauga o tofiga ma faaiuga e faia i fonotaga faaleautaitai a le siteki.

• Ia mautinoa e sa‘o atoatoa ma talafeagai faamaumauga ma lipoti.

E tatau i le failautusi a le siteki ona faamasani i meafaigaluega o le tausiga o faamaumauga a le Ekalesia (tagai i le 33.0). Na te faaaogaina nei meafaigaluega e fesoasoani ai i taitai ia iloa:

• Manaoga o tagata o le au paia ma faalapotopotoga.

• O loo maua ia punaoa, e aofia ai mea tautupe.

• Faailo tulaga o loo agai i ai, malosiaga, ma vaivaiga o le siteki.

O isi tiute o le tausiga o faamaumauga e mafai ona aofia ai:

• Faamautinoa o loo lelei ma vave ona faamaumauina ia faauuga i le Perisitua Mekisateko.

• Faaola ia pepa faataga o le malumalu.

• Sauniaina o Fomu mo le Lagolagoina o Taitaima le Lipoti o le Konafesi a le Siteki mo konafesi a le siteki.

• Faamaumauina o faamatalaga mo fono o tagata o le Ekalesia i le siteki (tagai i le 32.9.6).

• Tausiaina o faamaumauga tautupe (tagai i le 34.1.2).

• Faatulagaina ma le faamaopoopoina o le aoina mai o tala mo le talafaasolopito o le iunite. E mafai ona valaauina se tagata tomai faapitoa i talafaasolopito o le siteki e fesoasoani. (Tagai i le 33.7.1.)

33.3.2.2

Iloiloina o Faamaumauga ma Lipoti a le Uarota

E fono le failautusi a le siteki ma failautusi fou taitasi o le uarota i se taimi vave lava pe a uma ona valaauina o ia. E fono o ia ma failautusi a uarota i le tele o taimi e manaomia ai, ae ia le itiiti ifo ma le faalua i le tausaga. E faia nei fonotaga ina ia mautinoa ai:

• O sefuluai ma isi faamaumauga tautupe ua faamaumauina lelei (tagai i le 34.1.2 ma le 34.2.2).

• O pepa faamaumau e vave ona faafouina ma ia sa‘o lelei.

• O tusi faamaonia o faamanuiaga, papatisoga ma faamauga, ma faauuga i le perisitua, e tuuina atu i tagata o le uarota.

• E faatautaia le suegatusi faaleafatausaga o pepa faamaumau ma e vave ona faasa‘oina tuusaunoaga uma o suegatusi (tagai i le 33.6.19).

• E faatulaga ma faamaopoopo e failautusi a uarota le aoina mai o tala mo le talafaasolopito o le iunite. Afai ua valaauina ni tagata tomai faapitoa mo talafaasolopito o uarota, o latou e fesoasoani. (Tagai i le 33.7.1.)

33.3.2.3

Suegatusi

Tagai i le 33.6.19 ma le 34.7.

33.3.2.4

Faamaumauga o Talafaasolopito a le Siteki

Tagai i le 33.7.

33.3.3

Failautusi Fesoasoani o le Siteki

E mafai e le peresitene o le siteki po o se fesoasoani ua tofia ona valaau ma vaetofia se tasi pe sili atu foi ni failautusi fesoasoani pe a manaomia ai. O nei uso e tatau ona umia le Perisitua Makisateko, o ē o i ai se pepa faataga aoga o le malumalu. Latou te galulue i lalo o le taitaiga a le au peresitene o le siteki ma le failautusi a le siteki.

Pe a manaomia, e mafai ona valaauina se failautusi fesoasoani se toatasi i tulaga taitasi nei:

• Failautusi fesoasoani a le siteki

• Failautusi fesoasoani a le siteki—mea tautupe (tagai i le 34.1.2)

• Failautusi fesoasoani a le siteki—pepa faamaumau (tagai i le 33.5 ma le 33.6)

33.4

Faamaumauga ma Lipoti a le Uarota

33.4.1

Au Epikopo

O le epikopo e vaaia le tausiga o faamaumauga a le uarota. E mafai ona ia faamatuuina atu le tele o lenei galuega i ona fesoasoani ma failautusi.

33.4.2

Failautusi o le Uarota

E tatau i uarota uma ona i ai se failautusi a le uarota e agavaa ma galue mataalia. E fautuaina atu o ia e le au epikopo ma valaauina ma vaetofia e se tasi o le au peresitene o le siteki po o se fautua maualuga e tofia. E tatau ona ia umia le Perisitua Mekisateko ma ia i ai se pepa faataga aoga o le malumalu. O ia o se sui auai o le aufono a le uarota. E auai o ia i fonotaga a le uarota e pei ona faailoa atu i le 29.2.

E auauna atu le failautusi o le uarota i lalo o le taitaiga a le au epikopo. E mafai ona valaauina ia failautusi fesoasoani o le uarota e fesoasoani i ai (tagai i le 33.4.3).

33.4.2.1

Tiutetauave mo le Tausiga o Faamaumauga

O le failautusi a le uarota, po o se failautusi fesoasoani ua tofia, ua i ai tiutetauave nei:

• Tuuina atu le lagolago faalepulega i le au epikopo.

• Na te tausia se faamaumauga o tofiga ma faaiuga e faia i fonotaga faaleautaitai a le uarota.

• Ia mautinoa e sa‘o atoatoa ma talafeagai faamaumauga ma lipoti.

E tatau i le failautusi a le uarota ona faamasani i meafaigaluega o le tausiga o faamaumauga a le Ekalesia (tagai i le 33.0). Na te faaaogaina nei meafaigaluega e fesoasoani ai i taitai ia iloa:

• Manaoga o tagata o le au paia ma faalapotopotoga.

• O loo maua ia punaoa, e aofia ai mea tautupe.

• Faailo tulaga o loo agai i ai, malosiaga, ma vaivaiga o le uarota.

Pe a tuufaatasia lipoti e uiga i le auai o tagata o le au paia, e galulue faatasi le failautusi a le uarota ma failautusi e foia faafitauli laiti.

E uunaia e failautusi o uarota ia tagata o le au paia e lipoti atu soo se mea sese i o latou faamatalaga o pepa faamaumau.

O isi tiute o le tausiga o faamaumauga e mafai ona aofia ai le:

• Faamautinoaina o loo lelei ma vave ona faamaumauina ia sauniga.

• Saunia le fomu mo le Lagolagoina o Taitaimo le konafesi a le uarota.

• Faamaumauina o faamatalaga mo fono o tagata o le Ekalesia (tagai i le 32.9.6).

• Tausiaina o faamaumauga tautupe (tagai i le 34.2.2).

33.4.2.2

Aoaoina o Failautusi o Uarota ma Isi Failautusi

O le failautusi a le uarota e aoaoina failautusi fesoasoani a uarota ma failautusi o korama ma faalapotopotoga.

O lenei aoaoga e faapitoa le taua pe afai:

• Ua faato’a valaauina ia failautusi fesoasoani a uarota ma failautusi o korama ma faalapotopotoga.

• Ua faalauiloa mai pe faafouina se meafaigaluega o le tausiga o faamaumauga a le Ekalesia.

• E le o faatumuina lelei faamaumauga.

33.4.2.3

Faamaumauga o Talafaasolopito a le Uarota

Tagai i le 33.7.

33.4.3

Failautusi Fesoasoani o le Uarota

E mafai ona valaauina ni failautusi fesoasoani a le uarota pe a manaomia. E fautuaina atu i latou e le au epikopo ma valaauina ma vaetofia e se tasi o le au peresitene o le siteki po o se fautua maualuga e tofia. E tatau i nei uso ona umia le Perisitua Mekisateko po o le Perisitua Arona. E tatau foi ona i ai a latou pepa faataga aoga o le malumalu. Afai e tofia se failautusi fesoasoani a le uarota i mea tautupe, e tatau ona umia e ia le Perisitua Mekisateko. O failautusi fesoasoani a le uarota e galulue i lalo o le taitaiga a le au epikopo ma le failautusi a le uarota.

Pe a manaomia, e mafai ona valaauina se failautusi fesoasoani se toatasi i tulaga taitasi nei:

• Failautusi fesoasoani a le uarota

• Failautusi fesoasoani a le uarota—mea tautupe (tagai i le 34.2.2)

• Failautusi fesoasoani a le uarota—pepa faamaumau (tagai i le 33.5 ma le 33.6)

33.4.4

Taitai Perisitua ma Faalapotopotoga

O taitai perisitua ma faalapotopotoga e vaaia le tausiga o faamaumauga i a latou faalapotopotoga. E mafai ona latou tofia ia failautusi e faia le tele o lenei galuega. Ia mautinoa e sa‘o atoatoa ma tuutaimi ia faamaumauga ma lipoti.

33.5

Lipoti o le Auai o Tagata

O lipoti e uiga i le auai o tagata o le au paia e fesoasoani i taitai e taulai atu i le alualu i luma ma manaoga o tagata o le au paia. Pe a mafai, e tatau ona iloiloina faaeletonika nei lipoti nai lo le lolomiina. Pe a manaomia ni lipoti lolomi, e tatau ona puleaina ma le faaeteete ina ia faaaloalogia ai le lē faalaua’iteleina o tagata o le au paia ma ia tausisia ai tulafono o le puipuiga o faamaumauga i le lotoifale.

33.5.1

Ituaiga o Lipoti

33.5.1.1

Lipoti o le Auai

O le auai i sauniga faamanatuga ma sauniga a le au perisitua ma faalapotopotoga i Aso Sa e faamaumauina faaeletonika e faaaoga ai le PTF po o Meafaigaluega a le Tagata o le Ekalesia.

Sauniga Faamanatuga. O le auai i sauniga faamanatuga e faamaumauina i vaiaso taitasi e le failautusi a le uarota po o se failautusi fesoasoani a le uarota. O le faitauga o le numera o tagata moni o loo auai i le sauniga pe o maimoaina i se faasalalauga tuusa’o, e aofia ai tagata asiasi. O tagata o le uarota e le o i ai ona e i ai isi o latou tofiga pe o lolotu foi i se isi uarota, e faitauina i le uarota o loo latou auai ai.

Fonotaga a Korama ma Faalapotopotoga i le Aso Sa. O le auai e faamaumauina i vaiaso taitasi e failautusi ma faufautua o korama ma faalapotopotoga. E mafai foi e taitai o le autalavou ona fesoasoani i le faamaumauina o le auai. O le faitauga, o le numera lea o tagata moni o loo auai i le sauniga pe o maimoaina i se faasalalauga tuusa’o, e aofia ai tagata asiasi. O tagata o le au paia o loo auauna atu i le Peraimeri po o taitai o le autalavou i totonu o le uarota e aofia ai foi i le auai. O tagata o le au paia o loo auai i se isi uarota e faitauina i le uarota o loo latou auai ai.

E mafai e le failautusi a le uarota ona faamaumauina le auai e fai ma sui o soo se faalapotopotoga.

33.5.1.2

Lipoti o Faatalanoaga o Auaunaga

Tagai i le 21.3.

33.5.1.3

Lipoti Faalekuata

O numera uma i totonu o se lipoti e fai ma sui o se tagata moni e i ai ni manaoga tulaga ese (tagai i le Helamana 15:13). E tatau i taitai ona sailia le taitaiga mai le Alii a o latou iloiloina po o ai e ono manaomia le latou fesoasoani.

O le Lipoti Faalekuata o loo i ai faamatalaga aoga lea e mafai ona tuuina atu ai i taitai ni malamalamaaga a o latou sailia musumusuga e uiga i a latou taumafaiga faaleauaunaga. O loo maua le lipoti i le Meafaigaluega a Tagata o le Ekalesia po o le PTF.

E tagai e le aunoa ia taitai o le siteki ma le uarota i le Lipoti Faalekuata e iloilo ai le alualu i luma o tagata taitoatasi. O le lipoti e aofia ai faamatalaga e uiga i:

• Le tulaga o le pepa faataga o le malumalu o tagata ua maua faaeega paia ma le autalavou.

• Alii ua ta’i 18–25 tausaga o loo auauna atu pe na auauna atu i se misiona.

• Le tulaga o faatalanoaga o auaunaga (tagai i le 21.3).

• Toeaina faaolioli e manaomia le lagolagosua i le sauniaina e maua le Perisitua Mekisateko.

• Le auai i sauniga o le Aso Sa mo tamaiti, autalavou, talavou nofofua matutua, ma tagata matutua (tagai i le 33.5.1.1).

• Le alualu i luma o tagata fou o le au paia o e na papatisoina ma faamauina i totonu o le 12 masina ua tuanai.

O auai uma ma faatalanoaga o auaunaga o loo faamaumauina i le Meafaigaluega a le Tagata o le Ekalesia po o le PTF. O lenei faamatalaga e otometi lava ona faatumu ai vaega talafeagai o le Lipoti Faalekuata.

E faatumu e uarota uma ma auina atu se Lipoti Faalekuata i le laumua o le Ekalesia. E iloilo e le failautusi le lipoti faatasi ma le epikopo ma auina atu a o le’i oo i le aso 15 o le masina e sosoo ma le faaiuga o kuata taitasi.

E mafai e le au peresitene o le siteki ona iloiloina Lipoti Faalekuata a uarota taitasi. E fesoasoani lea latou te mataituina ai le alualu i luma ma iloa ai le mea e tuuina atu ai le lagolago ma aoaoga. E mafai foi e sui o le aufono a le siteki ona maimoa i Lipoti Faalekuatataitasi.

33.5.2

Lisi o Tagata Auai

O meafaigaluega o le tausiga o faamaumauga a le Ekalesia e tuuina atu ai i taitai le aia i le faaaogaina o lisi o pepa faamaumau. O nei lisi e mafai ona fesoasoani i taitai e faailoa ai:

• Pe o ai tagata o le au paia e le’i mauaina lava sauniga e agavaa i ai i latou.

• Pe o ai alii talavou ma tamaitai talavou ua agavaa e auauna atu i se misiona.

• Pe o ai talavou e le o i ai se pepa faataga aoga o le malumalu.

• Pe o ai talavou e manaomia ona faatulagaina se taimi e fono ai ma se uso o le au epikopo.

E tatau i taitai o korama ma faalapotopotoga ona maua le aia e faaaoga ai lisi o i latou e auai ia latou korama po o faalapotopotoga.

33.6

Pepa Faamaumau

O pepa faamaumau e aofia ai igoa o tagata, faamatalaga e faafesootai ai, auiliiliga o sauniga, ma isi faamatalaga taua. E tatau i le uarota ona i ai se pepa faamaumau mo tagata uma o le au paia o loo nonofo i totonu o ona tuaoi.

O pepa faamaumau e tatau ona teuina i le uarota o loo nofo ai le tagata o le au paia. O tuusaunoaga, ia e seāseā lava ona tupu, e manaomia ai le maliega a epikopo ma peresitene o siteki o loo aafia ai. Ina ia talosagaina se tuusaunoaga, e faaaoga e le peresitene o le siteki le PTF e auina atu ai le talosaga i le Ofisa o le Au Peresitene Sili.

O pepa faamaumau e na o le pau lea o le auala e faamaumau ai sauniga ma isi faatinoga aloaia i faamaumauga tumau a le Ekalesia. O le mea lea, e faamautinoa e le epikopo e tausia e failautusi ia sa’o atoatoa faamaumauga. Na te faamautinoa foi ua faafou e failautusi ia faamatalaga e faaaoga ai le PTF. E taua le faia vave o mea nei:

• Faamaumau ia faamatalaga o sauniga.

• Fesiitai faamaumauga o tagata o le au paia o e siitia atu i totonu po o fafo atu o le uarota.

• Fatu ni faamaumauga mo tagata fou o le au paia ma fanau fou a matua e auai i le au paia.

• Faamaumau le maliu o se tagata o le au paia.

• Faamaumau faamatalaga o le faaipoipoga ma le aiga.

E faamautinoa e le epikopo po o le peresitene o le siteki o loo i ai se pepa faamaumau i le uarota talafeagai a o le’i faatalanoaina se tagata o le au paia ia mauaina:

• Se valaauga i le Ekalesia.

• Se pepa faataga o le malumalu.

• Le Perisitua Mekisateko pe faauuina i se tofi i lena perisitua.

Na te faamautinoaina foi e le o aofia i le faamaumauga soo se mea o mea nei:

• Se faamatalaga faaopoopo

• Se faamatalaga e uiga i se tapuiā‘iga o se faamauga po o se sauniga

• Tapuiā’iga mamafa o le avea ma tagata o le ekalesia

I nisi taimi e le’i nofo ai pea i le uarota le tagata o le au paia mo le le itiiti ifo ma le tasi le tausaga. I lena tulaga, e faafesootai e le epikopo po o se fesoasoani ua tofia le epikopo muamua a o lei faatautaia se faatalanoaga e tuuina atu se pepa faataga o le malumalu po o le fautuaina atu o le faauuga i se tofi o le Perisitua Mekisateko. O le faamoemoega o lenei fesootaiga o le fesili atu lea pe i ai ni mataupu o le agavaa e tatau ona iloiloina. Afai e iloa mai e le fesoasoani se faamatalaga e le faalauaiteleina, na te faamutaina loa le talanoaga. Na te faailoa atu i lana epikopo e faafesootai le epikopo talu ai a o lei faia se faatalanoaga.

I soo se tulaga lava e le mafai ona tuuina atu pe faaali atu pepa faamaumau i soo se tasi e ese mai lo le epikopo po o se failautusi.

E mafai e tagata o le ekalesia ona tagai i faamatalaga o le pepa faamaumau mo i latou lava ma mo soo se fanau e faalagolago ia i latou o loo nonofo i le fale i luga o le polokalama o Meafaigaluega a Tagata o le Ekalesia. E mafai foi ona latou talosagaina ni kopi ua lolomiina o a latou Aotelega o Sauniga o le Tagata mai le failautusi. Afai e i ai ni mea sese e maua ai, ia mautinoa e le failautusi ua faasa’o i luga o pepa faamaumau.

O faatonuga i le auala e fatu ai se pepa faamaumau o loo maua i le PTF.

Mo tulaga e le o talanoaina i lenei vaega, e tatau i taitai ona faafesootai le Matagaluega o Auaunaga i le Lalolagi Atoa po o le ofisa o le eria.

33.6.1

Igoa e Faaaoga i Faamaumauga a le Ekalesia

O le igoa atoa faaletulafono o se tagata, e pei ona faamanino e le tulafono po o le aganuu i le lotoifale, e tatau ona faaaogaina i luga o pepa faamaumau ma tusi faamaonia o sauniga.

33.6.2

Tagata ua i ai Faamaumauga

O tagata ua ta’ua i lalo, o ni tagata ua i ai faamaumauga ma e tatau ona i ai se pepa faamaumau:

• O i latou ua papatisoina ma faamauina

• O i latou e i lalo ifo o le 9 tausaga ua faamanuia ae le’i papatisoina

• O i latou e le mafai ona tali atu mo i latou lava ona o le le atoatoa o le malosi faaleatamai, e tusa lava po o le a le matua.

• O tamaiti e le’i faamanuiaina e i lalo ifo o le 9 tausaga pe a faatatau uma i ai mea nei:

  • O le toatasi o matua po o le toatasi o matua matutua o se tagata o le Ekalesia.

  • Ua tuuina mai uma e matua e toalua le faatagaga e fatu ai se faamaumauga. (Afai e na o le tasi le matua e i ai le vaaiga faaletulafono o le tamaitiiti, ua lava le faatagaga a lena matua.)

O se tagata ua 9 tausaga pe matua atu o loo i ai se pepa faamaumau ae le’i papatisoina ma faamauina, e le o se tagata ua i ai faamaumauga. Peitai, e teuina lava e le uarota o loo nofo ai le tagata ia le pepa faamaumau seia aulia le 18 o le tagata. I lena taimi, afai e filifili le tagata e le papatisoina, e faaleaogaina e le epikopo le pepa faamaumau. E manaomia le faatagaga a le peresitene o le siteki.

E le faaleaogaina pepa faamaumau mo i latou o e e le’i papatisoina ona o se faaletonu o le mafaufau sei vagana ai ua talosagaina e le tagata po o se tagata o tausia faaletulafono, e aofia ai se matua.

33.6.3

Faamaumauga o Tagata Fou o le Uarota

E faafesootai e le failautusi o le uarota po o se failautusi fesoasoani o le uarota ia tagata fou o le uarota i le taimi lava e taunuu ai o latou pepa faamaumau ia iloilo ai le Aotelega o Sauniga a le Tagata mo le sa’o atoatoa.

Mo faatonuga e uiga i le faailoaina atu o tagata fou pe a maua mai o latou pepa faamaumau, po o le uma foi ona papatiso ma faamauina, tagai i le 29.2.1.1.

33.6.4

Faamaumauga o Tagata o e Ua Siitia Ese pe o loo Toesea Mai le Aiga mo Se Taimi Le Tumau

O taitai o le uarota, uso ma tuafafine o auaunaga, po o failautusi latou te saili maia tuatusi o tagata o le au paia i le taimi lava latou te iloa ai ua faamoemoe na tagata e siitia ese. E auina atu e le failautusi ia faamaumauga i le uarota fou pe a siitia ese loa le tagata. E mafai foi e failautusi ona talosagaina faamaumauga o tagata o le au paia e siitia atu i totonu o a latou uarota pe afai e lei auina mai ia faamaumauga e le uarota talu ai.

Afai e le mafai e se failautusi ona iloa le mea na siitia i ai tagata o le au paia, e auina atu le faamaumauga i le lisi o Sailiga o Tagata Leiloloa i totonu o le PTF. E iloilo soo e taitai o le korama a toeaina ma le Aualofa lenei lipoti ma faaaoga punaoa o loo maua e su’e ai nei tagata o le Ekalesia. E mafai foi ona fesoasoani isi sui o le aufono a le uarota po o faifeautalai.

Afai e maua le nofoaga o loo i ai le tagata o le au paia, e auina atu i ai e le failautusi le faamaumauga e pei ona tatau ai. Afai e le o maua le nofoaga o loo i ai le tagata o le au paia pe a uma ona faaaoga punaoa uma e maua ai, e maua e le failautusi le faamaoniga a le epikopo e toe faafoi atu ai le faamaumauga i le laumua o le Ekalesia.

O faamaumauga i le lisi o Sailiga o Tagata Leiloloa o le Ekalesia o loo atofaina atu pea i le uarota, ae e le o faaali mai i lisi ma lipoti a tagata o le au paia, ma e le o aofia ai i fuainumera a le uarota.

Afai e siitia ese se tagata mai se uarota mo le silia ma le tolu masina, e auina atu e le failautusi le pepa faamaumau i le uarota fou se’i vagana ai pe afai o loo fuafua le tagata o le au paia e toe foi mai pe a mavae sina taimi e toesea lē tumau ai pe ona o ni faamoemoega o galuega faavaitaimi po o aoaoga lea atonu e silia ma le tolu masina le umi.

Afai e i lalo ifo o le tolu masina e malaga ese ai se tagata mai se uarota ma faamoemoe e toe taliu mai, e taofi pea lava le pepa faamaumau i le uarota tumau.

Pe a le mautinoa e taitai pe o le a le umi o le a toesea ai se tagata, latou te tausia faamaumauga i le uarota e sili ona fetaui ma manaoga o le tagata o le au paia.

33.6.5

Faamaumauga o Tagata o le Ekalesia e i Fafo Atu o le Iunite

O le pepa faamaumau a se tagata e na’o le tasi le uarota i le taimi e mafai ona teuina ai. E na’o le epikopo o le uarota lenei e mafai ona vaaia le faafouga o le pepa faamaumau, faataunuu sauniga, ma faatautai faatalanoaga mo le tagata o le au paia.

O nisi tulaga e manaomia ai le faamaumauina o le igoa o se tagata o le au paia ma faamatalaga e faafesootai ai i se uarota lona lua (tagai i le 33.6.11 ma le 33.6.13 mo ni faataitaiga). I tulaga nei, e fatu ai e le failautusi o le uarota lona lua se pepa faamaumau o le tagata o le ekalesia i fafo atu o le iunite. Na te faaaogaina le PTF e fatu ai lenei faamaumauga.

O tagata o le ekalesia e i ai se pepa faamaumau i fafo atu o le iunite e mafai ona maua se valaauga i lena uarota. E faaaofia ai foi i latou i lisi faasinoala ma tauvalaauga a le uarota.

33.6.6

Faamaumauga o Tagata o le Au Paia o Loo Auauna Atu i fafo o a Latou Uarota Faalefaafanua

33.6.6.1

Faamaumauga o Tagata o le Au Paia e i ai Isi Tofiga o le Ekalesia

Afai e i ai ni tofiga faale-Ekalesia o tagata i fafo atu o a latou uarota faalefaafanua, o o latou pepa faamaumau ma faamaumauga o mea tautupe e teu pea i le uarota faalefaafanua. Afai o tofiga e moomia ai ona malaga ese ia tagata mai a latou uarota faalefaafanua mo le tolu masina po o le sili atu, ma afai e malaga faatasi ma a latou fanau, e auina atu o latou pepa faamaumau i le uarota fou. (Tagai i le 33.6.4.)

33.6.6.2

Faamaumauga o Faifeautalai Faamisiona

Tagai i le 24.6.2.8.

33.6.7

Pepa Faamaumau o Talavou Nofofua Matutua

O talavou nofofua matutua i le va o le 18 ma le 35 tausaga e mafai ona filifili e avea ma tagata o le au paia a le latou uarota faalefaafanua po o se uarota a talavou nofofua matutua pe afai ua faatuina sea uarota i tuaoi o loo nonofo ai. E teuina le pepa faamaumau i le uarota latou te auai ai.

O nei mataupu faavae e faatatau foi i tagata matutua nofofua i le va o le 36 ma le 45 tausaga o e filifili e avea ma tagata auai o se uarota a le au matutua nofofua.

Afai e fuafua se talavou nofofua matua e auai i se uarota mo se taimi le tumau (mo se faataitaiga, a o auai ai i le aoga), e teuina le pepa faamaumau i le uarota o loo ia auai ai. Faatasi ai ma le faatagaga a le tagata, e mafai e le failautusi o le uarota lea e nonofo ai le aiga o le tagata ona fatuina se faamaumauga i fafo atu o le iunite mo ia (tagai i le 33.6.5).

33.6.8

Faamaumauga o Tagata o le Ekalesia O Ē Nonofo i Falemai po o Fale mo Matua Tausi

O faamaumauga o tagata o le au paia o e nonofo i falemai po o fale mo matua tausi, e teuina i le uarota e sili ona tautuaina ai i latou. I le tele lava o tulaga, o le uarota lea o loo tu ai le falemai po o le fale mo matua tausi.

33.6.9

Faamaumauga o Tagata o loo Tautua i le Militeli

A ulufale atu se tagata o le Ekalesia i le tautua faamiliteli mo a’oa’oga faamasani, e taofi le pepa faamaumau i le uarota faalefaafanua se’ia oo ina tofia o ia i se nofoaga e tiute ai mo se taimi umi lava. O le taimi lena e tatau ai i le tagata o le au paia ona faafesootai le uarota faalefaafanua ma tuuina atu i ai le igoa ma le tuatusi o le uarota fou.

33.6.10

Faamaumauga o Tagata E Le Atoatoa le Malosi Faaleatamai

O se tagata e 8 tausaga pe matua atu e i ai se le atoatoa o le malosi faaleatamai, e fefautuaai faatasi ona matua (i nofoaga e faatatau i ai), ma le epikopo e filima’oti pe fuafua ai pe mafai ona ia tali atu mo ia lava. Afai e filima’oti o le tagata e le mafai ona tali atu mo ia lava, e faailoa mai e le epikopo po o se failautusi le “E Le Mafai on Tali Atu mo Ia Lava” i le vaega o le papatisoga o le pepa faamaumau o le tagata i le PTF. E le faaleaogaina le faamaumauga. E le manaomia ni sauniga mo se tagata o ana faamaumauga o loo ta‘u mai ai e le mafai ona tali atu mo ia lava.

O nisi taimi e fefautuaai faatasi ai mulimuli ane se tagata, o ona matua, ma le epikopo ma filima’oti ai o lena tagata ua mafai ona tali atu mo ia lava i le mavae ai ona tusia le faamaumauga “E Le Mafai Ona Tali Atu Mo Ia Lava.” I lena tulaga, e mafai e le epikopo po o se failautusi (faatasi ai ma le faamaoniga a le epikopo) ona aveesea le faailoga “E Le Mafai Ona Tali Atu Mo Ia Lava”. Mo ni isi faamatalaga, tagai i le 38.2.4.

33.6.11

Faamaumauga o Tagata E Logonoa pe Faaletonu le Faalogo

O tagata e faaaogaina le gagana fai faailoga, ma tagata o o latou aiga patino po o tagata o tausia faaletulafono, e mafai ona filifili e tuu o latou pepa faamaumau o le Ekalesia i soo se nofoaga nei:

• O la latou uarota faalefaafanua

• O se uarota mo tagata o le au paia o e logonoa pe faaletonu le faalogo o e o loo nonofo i totonu o ona tuaoi

• O se uarota e talimalo i se vaega mo tagata o le au paia e logonoa ma faaletonu le faalogo o e o loo nonofo i le eria faalefaafanua na faamaoti mai e le peresitene o le siteki po o le Peresitene Eria

I lenei tulaga, o faamaumauga a se tagata patino po o se aiga e mafai ona i ai i se iunite e tasi, ma atonu o i latou o ni tagata o le Ekalesia i fafo atu o le iunite i se isi iunite. (Tagai i le 33.6.5.)

O tagata o le au paia o e logonoa pe faaletonu le faalogo e mafai ona auai atu faatekinolosi i uarota po o vaega ua faatulagaina mo i latou o e logonoa ma faaletonu le faalogo i fafo atu o le eria faalefaafanua a tagata.

33.6.12

Faamaumauga o Fanau ua Vaetamaina

O faamaumauga o fanau ua vaetamaina e faato’a mafai ona fai pe faafou pe a mae’a lelei ona vaetamaina. O le igoa i luga o le pepa faamaumau e tatau ona ogatasi ma le faaiuga o le vaetamaina. O faamaumauga o matua na vaetamaina e faato’a mafai ona faafou pe a mae’a lelei ona vaetamaina.

33.6.13

Faamaumauga o Fanau ua Tete’a Matua

E faaaoga e pepa faamaumau uma le igoa faaletulafono o se tagata, e pei ona faamanino mai e tulafono po o agaifanua i le lotoifale. E aofia ai i lenei mea ia fanau a matua ua tatala faaipoipoga. O le igoa faaletulafono i luga o le pepa faamaumau e tatau foi ona faamaumauina i luga o tusi faamaonia o faamanuiaga ma sauniga o le perisitua.

O fanau ua tete’a matua e masani lava ona auai i sauniga Lotu a uarota a matua uma. E ui e na o le tasi le iunite e mafai ona taofia ma faafoua se pepa faamaumau aloaia a se tamaitiiti, ae mafai ona fatuina se pepa faamaumau i fafo atu o le iunite i le isi uarota o loo ia auai atu i ai (tagai i le 33.6.5). E faataga e lenei mea le igoa ma faamatalaga e faafesootai ai le tamaitiiti ia aofia ai i lisi a le uarota ma tauvalaauga a vasega.

E mafai ona maua se valaauga o fanau o i ai pepa faamaumau i fafo atu o le iunite i lena iunite.

33.6.14

Faamaumauga e i ai Faamatalaga Faaopoopo

Tagai i le 32.14.5.

33.6.15

Tapu e Faasa ai Ona Aveese Pepa Faamaumau

Afai e masii ese atu se tagata a o faatalitalia ni tapuia’iga mamafa o le avea ma tagata o le Ekalesia po o se isi atugaluga ogaoga, e mafai e le epikopo, po o le failautusi ua faatagaina ona tuu se tapu i luga o le pepa faamaumau e faasa ai ona aveese. Na te faaaogaina le PTF e faia ai lenei mea.

O se faamaumauga o loo i ai se tapu e faasa ai ona aveesea, e le aveese atu i se iunite fou vagana ua faatagaina e le taitai perisitua o le na tuuina i ai le tapuia’iga ia aveese.

33.6.16

Faamaumauga mai le Faila o “Tuatusi Lemailoa”

O nisi taimi e maua ai se tagata o le au paia i le maea ai ona i ai lona faamaumauga i le “faila o tuatusi lemailoa” i le laumua o le Ekalesia. O le faamaumauga o le a aofia ai se savali e uunaia ai le au epikopo, korama, ma taitai o faalapotopotoga e asiasi atu i le tagata i se taimi vave e mafai ai ma faaaumea mai.

33.6.17

Faamaumauina ma le Faasa’oina o Faamatalaga o Sauniga

Tagai i le mataupu 18.

33.6.18

Faamaumauina ma le Faasa’oina o Faamatalaga Faalemalo

Tagai i le 33.6.

33.6.19

Suegatusi o Pepa Faamaumau

E faalua i tausaga taitasi e faamautinoa ai e le failautusi a le siteki po o se failautusi fesoasoani a le siteki ua faatautaia se suegatusi o pepa faamaumau i uarota taitasi e faaaoga ai le PTF. E mafai e le peresitene o le siteki ona valaau atu i isi o e ua i ai le poto masani i le tausiga o faamaumauga o tagata auai ina ia fesoasoani mai i nei suegatusi. O suegatusi e tatau ona oo atu i le aso 15 o Iuni ma le aso 15 o Tesema o tausaga taitasi ua mae’a.

33.7

Faamaumauga o Talafaasolopito

33.7.1

O Talafaasolopito o le Uarota ma le Siteki

Ua poloai mai le Alii e faapea “o se talafaasolopito o mea taua uma” e faatatau i Lana Ekalesia ia tusia ma tausia (Mataupu Faavae ma Feagaiga 69:3; tagai foi i le fuaiupu 5; Alema 37:2).

O iunite taitasi i le Ekalesia e tatau ona tusifaamaumau mataupu taua uma e faatatau i le iunite. O nei mataupu e aofia ai tala faasolopito mai taitai o iunite.

O le tausia o se talafaasolopito o se galuega faaleagaga lea o le a faamalolosia ai le faatuatua o i latou o e tusia ma faitauina. O le tusitusia o tala i le aluga o le tausaga o le a faaleleia atili ai le tulaga maualuga o le talafaasolopito.

E saofaga atu e taitai perisitua ma faalapotopotoga a siteki ma uarota ia tala e faaaoga ai le meafaigaluega o le Talafaasolopito a le Iunite i luga o le ChurchofJesusChrist.org. Ua i ai i failautusi o siteki ma uarota le tiutetauave autu e faatulaga ma faamaopoopo lenei taumafaiga. E mafai e le au peresitene o le siteki ma le au epikopo ona valaau se tagata tomai faapitoa mo talafaasolopito o le siteki po o le uarota e fesoasoani atu. O loo maua faatonuga faaopoopo i le Taiala o le Amataga Vaveo le meafaigaluega.

E mafai e tagata o le ekalesia ona faaaoga le meafaigaluega o le Talafaasolopito o le Iunite e maimoa ai i tala ua faasalalauina e o latou taitai o le uarota ma le siteki. O tala ua faasalalauina e otometi lava ona faasaoina e le Ekalesia.

33.7.2

Talafaasolopito o le Ekalesia

E filifili mai ma teuina ma le faaeteete e le Matagaluega o Talafaasolopito o le Ekalesia faamaumauga o talafaasolopito, e aofia ai faamaumauga patino faaletagata lava ia, ata ma meafaitino taua “mo le lelei o le ekalesia, ma mo tupulaga fai a’e” (Mataupu Faavae ma Feagaiga 69:8). O fesili e uiga i le taua o faamaumauga o talafaasolopito e mafai ona auina atu i le:

Faletusi o Talafaasolopito o le Ekalesia

15 East North Temple Street

Salt Lake City, UT 84150-1600

Telefoni: 1-801-240-5696

Imeli: [e-mail]

33.8

Faamaumauga e le Faalauaiteleina

O faamaumauga a le Ekalesia e le faalauaiteleina, pe o i ai i luga o pepa po o se masini faatekinolosi. E aofia ai tulaga nei:

• Pepa faamaumau.

• faamaumauga o mea tau tupe.

• Faamatalaga mai fonotaga.

• Fomu aloaia ma pepa o faamatalaga (e aofia ai faamaumauga o fono o tagata o le Ekalesia).

E ao i taitai ma failautusi ona malupuipuia ia faamaumauga a le Ekalesia e ala lea i le taulimaina, teuina, ma le faaleaogaina i se auala e puipuia ai le tulaga patino o tagata taitoatasi. E faamautinoa e taitai o faamatalaga e aoina mai tagata o le ekalesia o le a:

• Tapulaa i mea e manaomia e le Ekalesia.

• Faaaogaina mo na o faamoemoega ua faamaoniaina e le Ekalesia.

• E na o i latou ua faatagaina e faaaogaina e tuuina atu i ai.

O faamatalaga o loo teuina faaeletonika, e tatau ona teumaluina ma ia puipuia i tulaga talafeagai (tagai i le 33.9.1). Ia mautinoa e taitai o ia faamaumauga e le faaaogaina mo faamoemoega faaletagata lava ia, faaupufai, pe faapisinisi. O faamatalaga mai faamaumauga a le Ekalesia, e aofia ai faamatalaga o talafaasolopito, e le mafai ona tuuina atu i tagata taitoatasi po o ni vaega o loo faatautaia ni suesuega po o ni sailiiliga (tagai i le 38.8.37).

E tatau i taitai ma tagata o le Ekalesia ona mulimuli i taiala o loo i le 38.8.13 e puipuia ai faasinoala a siteki ma uarota.

33.9

Puleaina o Faamaumauga

E tatau i taitai o le siteki ma le uarota ona avea le puleaina ma le mataalia o faamaumauga o se vaega o a latou faiga faavae i le tausiga o faamaumauga.

33.9.1

Puipuiga

O faamaumauga uma a le Ekalesia, o lipoti, ma faamatalaga e tatau ona puipuia mai ia i latou e le faatagaina ona faaaogaina, suia, faaleagaina, pe faalauiloa atu. O lenei faamatalaga e tatau ona teuina i se nofoaga saogalemu. O faamaumauga e sili ona ma’ale’ale, e aofia ai pepa e lolomi mai le komepiuta e tatau ona teuina i se pusatoso po o se kapeneta e lokaina i totonu o le ofisa o le taitai pe afai e le o faaaogaina.

I nofoaga e mafai ai, o kopi faaeletonika o faamaumauga, lipoti, ma faamatalaga e tatau ona faailogaina ma puipuia i se uputatala. O masini leiloloa pe gaoia a le Ekalesia po o ala o faasalalauga e teuina, e tatau ona vave lipoti atu i le incidents.ChurchofJesusChrist.org. E tatau foi ona lipotia le faaaogaina sese o faamatalaga a le Ekalesia.

33.9.1.1

Igoa Faaaoga ma Uputatala

E le tatau lava i peresitene o siteki, epikopo, ma isi taitai ona faasoa atu a latou igoa faaaoga a le Ekalesia ma uputatala i fesoasoani, failautusi, failautusi faapitoa, po o isi.

E uunaia malosi taitai ina ia faia le faamaoniga lua-laasaga (ua lauiloa foi o ni vaega faamaonia e tele) i luga o a latou faitotoa o le Ekalesia i soo se taimi e mafai ai.

33.9.1.2

Komepiuta e Faaaoga Faatasi ma Le Teuina o Faamaumauga

E le tatau i taitai ma failautusi ona teuina faamatalaga o pepa faamaumau po o mea tautupe i luga o komepiuta e faaaoga faatasi ia e mafai ona maua e isi e le o faatagaina ona maua lenei faamatalaga.

33.9.1.3

Faamatalaga E Lē Faalauaiteleina

Ua faia e le tele o atunuu ni tulafono mo le puipuiga o faamaumauga lea e faatonutonu ai le faagasologa o faamatalaga patino. E aofia ai faamatalaga i pepa faamaumau ma isi faamaumauga a le Ekalesia e faailoa mai ai tagata taitoatasi. O taitai e i ai ni fesili e uiga i le faaaogaina o tulafono o le puipuiga o faamaumauga i le pulega i le lotoifale o faamaumauga a le Ekalesia, e mafai ona faafesootai le ofisa o faamatalaga e le faalauaiteleina a le Ekalesia i le [e-mail].

33.9.2

Faatumau

E tatau ona teuina faamaumauga mo na o le umi e moomia ai mo faamoemoega faalepulega, faaletulafono, ma faasolopito. O faamaumauga tautupe e tatau ona teuina mo le le itiiti ifo ma le tolu tausaga, faaopoopo i ai ma le tausaga o loo i ai nei. O taitai e i ai ni fesili e uiga i le umi e teuina ai faamaumauga, e tatau ona faafesootai le Matagaluega o Auaunaga i le Lalolagi Atoa po o le ofisa o le eria.

33.9.3

Lafoaiina

O faamaumauga ua le toe manaomia e tatau ona faatama’iaina i se auala e le mafai ai ona toe maua mai ia faamatalaga pe toe faufau.

O faamaumauga e i ai se taua faasolopito faamoemoeina e le tatau ona lafoaiina, faatamaiaina, pe tuuina i nofoaga tutotonu a uarota mo punaoa (potutusi). O fesili e uiga i le taua faasolopito o faamaumauga, e mafai ona auina atu i le Faletusi o Talafaasolopito o le Ekalesia (tagai i faamatalaga mo le faafesootaia i le 33.7.2).

33.10

Tagata Tomai Faapitoa mo Tekinolosi a Siteki ma Uarota

O le au peresitene o le siteki e valaauina se tagata se toatasi pe sili atu o le siteki e tautua o se [ni] tagata faapitoa mo tekinolosi a le siteki. O le au epikopo e mafai ona valaauina se tagata se toatasi pe sili atu o le uarota e tautua o se [ni] tagata faapitoa mo tekinolosi a le uarota. E mafai e alii, tamaitai, ma le autalavou ona faatumuina nei valaauga.

O tagata tomai faapitoa mo tekinolosi a le siteki e galulue i lalo o le taitaiga a le failautusi a le siteki. O tagata tomai faapitoa mo tekinolosi a le uarota e galulue i lalo o le taitaiga a le failautusi a le uarota po o le failautusi faapitoa, pe a filifilia e le epikopo. O a latou tiutetauave e mafai ona aofia ai mea nei:

• Fesoasoani i taitai o le siteki po o le uarota e i ai manaoga faatekinolosi.

• A’oa’o tagata o le au paia i le auala e maua ma faaaoga ai ala o faasalalauga, polokalama, ma isi meafaigaluega faatekinolosi a le Ekalesia, e aofia ai le FamilySearch.org.

• Lagolago taitai ma faiaoga o e faaaogaina meafaigaluega faatekinolosi e faataunuu ai o latou valaauga.

• Puleaina le faasalalauina tuusao o fonotaga ma vasega mo i latou e le mafai ona auai (tagai i le 29.7).

Ma le isi, o le tagata tomai faapitoa mo tekinolosi a le siteki ua i ai tiutetauave nei mo le puleaina o komepiuta a le Ekalesia i totonu o le siteki, e aofia ai komepiuta o loo i totonu o ofisa autu o le FamilySearch:

• Faatino faatonuga mai le au peresitene o le siteki e uiga i le mea e tuu ai, faasoaina, toe fesiitai, ma le faatulagaina o komepiuta uma a le siteki.

• Tausisia se lisi o masini komepiuta uma o loo i ai nei i le siteki, faatasi ai ma numera e iloa ai, o ituaiga, o le malolosi, ma nofoaga o loo i ai.

• Ia mautinoa ua malupuipuia (1) komepiuta, polokalama, ma faamatalaga e le faalauaiteleina ma (2) o faila o faamaumauga ua faia e le aunoa se kopi mo le teuina,

• Ia faamasani i aiaiga faavae aoao mo komepiuta a le Ekalesia (tagai i le 38.8.10).

Pe a manaomia ai, o tagata tomai faapitoa mo tekinolosi a le siteki e faamaopoopoa le galuega a tagata tomai faapitoa a le uarota mo tekinolosi.