33.

Rekooti ao Ribooti

33.0

Kabwarabwaraana

Aron karaoakiia n te mwakoro aei e kaineti riki nakoia iunite ake a kabongana ana bwai ni mwakuri te Ekaretia n taumwiin-rekooti iaon te intanete, n raonaki ma Leader and Clerk Resources (LCR), Member Tools, ao Ward Directory and Map. Iunite ake aki kona ni kabonganai bwaai ni mwakuri aikai a riai ni mwakuri ma te Global Services Department ke te aobiti n te aono.

Tauan rekooti bon te mwakuri ae kakawaki n ana Ekaretia te Uea. Ibukin te katooto:

Atam e kawakina “te boki ni kauring” (Mote 6:5).

Moronaai e reirei bwa araia naake a tia ni bwabetitoaki nakon Ana Ekaretia Kristo a tauaki mwiia bwa “aonga n uringaki ma ni kamwarakeaki n ana taeka te Atua ae raoiroi” (Moronaai 6:4).

E tuatua Iotebwa Timiti bwa e riai n iai te tia taumwin rongorongo ni weteaki ni uoote ni kabane bwa a na “karaoa te rongorongo ae koaua i matan te Uea” (Reirei ao Berita aika Tabu 128:2).

33.1

Rinanoan Rekooti n te Ekaretia

Ana rekooti te Ekaretia a tabu. Rongorongo ake inanona a tabu ao a riai ni kamanoaki raoi. Ana tititem te Ekaretia n tauan mwiin ana rekooti e kariaia noorakin rongorongoia membwa ae boboto iaon wewete. Ti naake iai kariaiakaia aika a kona n noori. A riai ni kabongana te rongorongo aei ti ibukin te bwai ae kaineti nakon aia wewete (taraa 33.8).

A kona rekooti ni buokiia taan kairiiri:

• N ataia bwa antai ae kainnanoa te tararua ae onoti.

• Taraia bwa tera taian otenanti are e a tia ni karekea te aomata ke ae e kainnanoia.

• Karekean te tabo ae a mena iai membwa.

Aekakin rekooti aika kaotaki aikai a kawakinaki n ana iunite te Ekaretia:

• Ribooti iaon rorokoia membwa (taraa 33.5)

• Te Membwatibu rekooti (taraa 33.6)

• Rekooti n Rongorongon Bwaai Rimoa (taraa 33.7)

• Rekooti ibukin te Mwane (taraa mwakoro 34)

33.2

Kaetieti ni Kabuta ibukiia Kiraaka

Ni kabane kiraaka a riai:

• Ni iai aia beba ni kariaia nakon te tembora ae tuai bane taina.

• Ni mwakuri raoi n taui mwiin rekooti.

• N riki bwa taan reirei ao taan babaire aika konabwai.

A riai kiraaka n irii raoi kaetieti aika bwainaki ngkai n tararua mwanen te Ekaretia ao ni kakoaua bwa a eti raoi ana rekooti te Ekaretia. A na waekoa kiraaka ni kaongoia taan kairiiri n te nakoanibonga rongorongon taekan mwakuri buaka. Ngkana iai te kangaanga ni katokan te mwakuri buaka a riai kiraaka ni kaongoa te Aobiti Ibukin Taumwiin Rongorongo aika Tabu Taekinaia n ana etukuata te Ekaretia. Rongorongon te reitaki e kaotaki inano::

Tareboon: 1-801-240-2053 ke 1-800-453-3860, katomako ma 2-2053

Akea boona (GSD tareboon): 855-537-4357

Imeeri: [e-mail]

Maanin aia tai ni mwakuri kiraaka e riai n tau ibukiia n reiakin tabeia ao ni kateimatoa reitinakon aia mwakuri (taraa 30.5). Bukina bwa tiaki membwa ngaiia n te beretitentii n te titeiki ke bitiobiriki, a aki tangira kamotirawaaia ngkana a manga moan barongaaki beretitentii n te titeiki ke bitiobiriki.

33.3

Rekooti ao Ribootin te Titeiki

33.3.1

Beretitentii n te Titeiki

Te beretitenti n te titeiki e na tararua aron kawakinan rekoti n te titeiki. E kona n anga angiin te mwakuri aei nakoia ana kauntira ao ana kiraaka.

33.3.2

Kiraaka n te Titeiki

Titeiki n tatabeua nako a na riai ni iai aia kiraaka n te titeitki ae rabakau, ae mmwamwakuri. E weteaki man kaokoroaki iroun te membwa n te beretitentii n te titeiki. E riai n iai irouna te Nakoanibonga ae te Merekitereka ao ni iai ana beeba ni kariaia nakon te tembora ae tuai bane taina. Bon te membwa n ana kauntira te titeiki. E kaei bowiin te titeiki n aron are taekinaki n 29.3.

E kataneiaaki te kiraaka n te titeiki iroun te beretitentii n te titeiki ao ni mwakuri iaan aia kairiiri. Kauoman ni kiraaka n te titeiki a kona ni weteaki bwa a na ibuobuoki (taraa 33.3.3).

33.3.2.1

Te Mwioko ni Kawakinan Rekooti

Te kiraaka n te titeiki, ke te kauoman ni kiraaka, iai mwiokoana n aron aikai:

• E na katauraoa ana boutoka n tararua nakon te beretitentii n te titeiki.

• E na taumwiin mwioko ao babaire aika karaoaki inanon boowi ni kairiiri n te titeiki.

• E na kakoaua bwa rekooti ao ribooti a eti ao a tia iaon taia.

E riai te kiraaka n te titeiki n atai ana bwai ni mwakuri te Ekaretia ibukin tauan mwiin rekooti (taraa 33.0). E kabonganai bwaai ni mwakuri aikai ni buokiia taan kairiiri n atai:

• Kainnanoia membwa ao bootaki.

• Tauraoin bwaai n ibuobuoki, n raonaki ma mwaane.

• Rikiraken, korakoran, ao mamaaran te titeiki.

Mwakuri riki tabeua n tauan mwiin-rekooti a kona n raonaki ma:

• Kakoauakin ae a tia ni karinaki raoi mwiin katabu ibukin te Nakoanibonga ae te Meretekira n te tai naba anne.

• Karaoakin ae a na mwakuri beeba ni kariaia nakon te tembora.

• Katauraoan te booma Ibukin Kamatoakiia Aobitia ao te Ribooti n ana Maungatabu te Titeiki ibukin te maungatabu n te titeiki.

• Tauan mwiin rongorongo ibukin te membwatibu kauntira n te titeiki (taraa 32.9.6

• Kateimatoaan rekooti ibukin te mwane (taraa 34.1.2).

33.3.2.2

Rinanoan Rekooti ao Ribootin te Uoote

E na marooro te kiraaka n te titeiki ma kiraaka n te uoote aika boou imwiin are e weteaki. E na marooro ma kiraaka n te uoote n tainako ngkana e kainnanoaki, ma e na riai ni uoua te tai n te ririki. Boowi aikai a karaoaki ni kakoaua bwa:

• Rekooti iaon kabwianibwai ao iaon taekan te mwane ake tabeua a tauaki raoi mwiia (taraa 34.1.2 ao 34.2.2).

• A kabouaki ao ni kaetaki membwatibu rekooti n te tai naba anne.

• Beeba ni Kakoaua ibukin kakabwaia,bwabetito ao kamatoa, ao katabuan te nakoanibonga a na anganaki membwa n te uoote.

• Te tutuo n aia rekooti membwa ni katoa ririki e karaoaki ao kangaanga ni kabane ake a kuneaki n tain te tutuo a kaetaki n te tai naba anne (taraa 33.6.19).

• Rongorongon te uoote ni katoa ririki e na kanakoaki nakon te titeiki ni katoa banen te ririki (taraa 33.7).

33.3.2.3

Oteta

Taraa 33.6.19 ao 34.7.

33.3.2.4

Rekootin Rongorongon ngkoa Te Titeiki

Taraa 33.7.

33.3.3

Kiraaka ni Ibuobuoki n te Titeiki

Te beretitenti n te titeiki ke te kauntira ae mwiokoaki e na wetea ao ni kaokoroa temanna ke e raka riki bwa kiraaka ni ibuobuoki n te titeiki n aron ae kainnanoaki. Taari aikai a riai n taua te Nakoanibonga ae te Merekitereka ao ni iai aia beeba ni kariaia nakon te tembora ae tuai bane taina. A mwakuri iaan aia kairiiri kaain te beretitentii n te titeiki ao te kiraaka n te titeiki.

Ngkana e kainnanoaki, e na weteaki temanna te tia ibuobuoki ni kiraaka nakon nakoa aikai:

• Te tia ibuobuoki ni kiraaka n te titeiki

• Te tia ibuobuoki ni kiraaka n te titeiki—n te mwane (taraa 34.1.2)

• Te tia ibuobuoki ni kiraaka n te titeiki—membwatibu (taraa 33.5 ao 33.6)

33.4

Rekootin te Uoote ao Ribooti

33.4.1

Bitiobiriki

Te Bitiobi e na tararua aron kawakinan rekooti ibukin te uoote. E kona n anga angiin te mwakuri aei nakoia ana kauntira ao ana kiraaka.

33.4.2

Kiraaka n te Uoote

Uoote n tatabeua nako a na riai ni iai aia kiraaka n te uoote ae rabakau, ae mmwamwakuri. E kanakoaki arana iroun te bitiobiriki ao e weteaki ao e kaokoroaki iroun te membwa n te beretitentii n te titeiki ke te kauntira ae rietaata ae e mwiokoaki. E riai n iai irouna te Nakoanibonga ae te Merekitereka ao ni iai ana beeba ni kariaia nakon te tembora ae tuai bane taina. Bon te membwa n ana kauntira te uoote. E kaei bowiin te uoote n aron are taekinaki n 29.2.

Te kiraaka n te uoote e mwakuri iaan ana kaetieti te bitiobiriki. Kiraaka aika taan ibuobuoki n te uoote a na weteaki bwa a na ibuobuoki (taraa 33.4.3

33.4.2.1

Te Mwioko ni Kawakinan Rekooti

Aikai taben te kiraaka n te uoote, ke te kauoman ni kiraaka are e mwiokoaki:

• E katauraoi boutoka n tararua nakon te bitiobiriki.

• E kawakin rekooti ibukin mwioko ao babaire aika karaoaki n aia boowi taan kairiiri n te uoote.

• E na kakoaua bwa rekooti ao ribooti a eti ao a tia iaon taia.

E riai te kiraaka n te uoote n taneiai ma ana bwai ni mwakuri te Ekaretia iaon kawakinan-rekooti (taraa 33.0). E kabonganai bwaai ni mwakuri aikai ni buokiia taan kairiiri n atai:

• Kainnanoia membwa ao bootaki.

• Tauraoin bwaai n ibuobuoki, n raonaki ma mwaane.

• Rikirake, korakora, ao mamaara n te uoote.

Inanon tain ikoikotakin ribooti iaon rorokoia membwa, te kiraaka e mwakuri ma taan koroboki ni buoka katokan kangaanga aika bebete.

Kiraaka n te uoote a na kaungaia membwa bwa ana ribotin kairua n rongorongon aia membwatibu.

Mwakuri riki tabeua n tauan mwiin-rekooti a kona n ae:

• Kakoauaan otenanti bwa a tauaki raoi mwiia ao n te tai naba anne.

• Katauraoan te Booma ibukin Kamatoakia Aobitia ibukin aia maungatabu uoote.

• Tauii mwiin rongorongo ibukin te membwatibu kauntira n te uoote (taraa 32.9.6).

• Kateimatoaan rekooti iaon taekan te mwane (taraa 34.2.2).

33.4.2.2

Reireinakiia Kiraaka ao Taan Koroboki

Te kiraaka n te uoote e na reireiniia kiraaka n ibuobuoki n te uoote ao taan koroboki n te kooram ao bootaki.

E rang kakawaki te reirei aei riki ngkana:

• Kiraaka n ibuobuoki n te uoote ao taan koroboki ni kooram ao ni bootaki a tibwa weteaki nakon nakoaia.

• Ana bwai ni mwakuri te Ekaretia n tauan mwiin-rekooti e a tibwa kamwakuraki ke ni manga kabouaki.

• Aki katiaaki raoi rekooti.

33.4.2.3

Rekootin Rongrongon ngkoa te Uoote

Taraa 33.7.

33.4.3

Kiraaka ni Ibuobuoki n te Uoote

A kona kiraaka n ibuobuoki ni weteaki ngkana a kainnanoaki. A karokoaki araia mairouia bitiobiriki ao a weteaki ao ni kaokoroaki iroun te membwa n te beretitentii n te titeiki ke te kauntira ae rietaata ae e mwiokoaki. A riai taari aikai n iai irouia te Nakoanibonga ae te Merekitereka ke te Aaron. A riai naba ni iai irouia te beeba ni kariaia nakon te tembora ae tuai bane taina. Ngkana te kiraaka ni ibuobuok n te uoote e mwiokoaki ibukin taekan te mwane, e na riai n taua te Nakoanibonga ae te Merekitereka. Kiraaka ni ibuobuoki n te uoote a na mwakuri iaan ana kairi te bitiobiriki ao te kiraaka n te uoote.

Ngkana e kainnanoaki, e na weteaki temanna te tia ibuobuoki ni kiraaka nakon nakoa aikai:

• Kauoman nikiraaka n te uoote

• Te kiraaka n ibuobuoki n te uoote—n te mwane (taraa 34.2.2)

• Te kiraaka n ibuobuoki n te uoote—membwatibu (taraa 33.5 ao 33.6

33.4.4

Taani Kairiiri n te Nakoanibonga ao ni Bootaki

Taani kairiiri n te kooram ao ni bootaki a na taraia bwa e nakoraoi aron tararuaan rekooti n aia bootaki. A na kona ni mwiokoia taan koroboki ni karaoa angiin te mwakuri aio. A na kakoaua bwa rekooti ao ribooti a eti ao a tia i aon taia.

33.5

Ribooti iaon Rorokoia Membwa

Ribooti iaon rorokoia membwa e buokiia taan kairiiri n atai aroia ao kainnanoia membwa. Ngkana e kona, a riai ribooti aikai n rinanoaki n te kaombiuta nakon are e na boretiaki. Ngkana e kainnanoaki te ribooti are e boretiaki, a na riai n taraaki raoi ni karinei kainakin rongorongoia membwa ao n iri tuua iaon kamanoan rongorongo.

33.5.1

Aekan nako Ribooti

33.5.1.1

Ribooti n te Roroko

A bane n tauaki mwiin rorokoia membwa n tain bootakin te toa ao bootaki n te Tabati n te nakoanibonga ao bootaki nako n te kaombiuta ni kabonganakin te LCR ke Member Tools.

Bootaki n Toa. Irakin te bootaki n toa e tauaki mwiina ni katoa wiiki iroun te kiraaka n te uoote ke te kiraaka n ibuobuoki n te uoote. Are e tauaki mwiina bon te mwaiti ake a roko n te bootaki n temanna te aomata ke naake a iria iaon bwaai n reitaki ae maiu, n raonaki ma iruwa. Membwa n te uoote ake aki roko ibukina bwa iai mwiokoaia riki teuana ke a nakon te uoote riki teuana a na warekaki n te uoote are a nako iai.

Bootaki n te Kooram ao Bootaki Nako n te Tabati. E tauaki mwiia aika roko ni katoa wiiki irouia taan koroboki n te kooram ao ni bootaki ao aetuwaitia. A kona naba taan kairiiri irouia Kairake n ibuobuoki n tauan mwiia aika roko. Are e tauaki mwiina bon te mwaiti ake a roko n te bootaki n temanna te aomata ke naake a iria iaon bwaai n reitaki ae maiu, n raonaki ma iruwa. Membwa ake a beku n te Moanrinan ke aia taan kairiiri kairake inanon te uoote a na warekaki naba bwa a roko. Membwa ake a iri ni uoote ake tabeua a warekaki n uoote ake a nako iai.

E kona te kiraaka n te uoote n taua mwiin te roko ibukin te bootaki teuana.

33.5.1.2

Ribooti iaon te Intawiu n te Mwakuri n ibuobuoki

Taraa 21.3.

33.5.1.3

Ribooti ni Katoa Kuata

Te mwaiti ni kabane ake inanon te ribooti e tei ibukin te aomata ni koaua are iai kainnanona ae onoti (taraa Ereman 15:13). A ukora ana kairiiri te Uea taan kairiiri ngkai a kamatebwaia bwa antai ae kainnanoa aia ibuobuoki.

Te Ribooti ni Katoa Kuata iai inanona rongorongo aika bongana aika a kona n anganiia taan kairiiri atatai aika nano ngke a ukoukora te kairi mairoun te Atua ibukin aia mwakuri n ibuobuoki. E tauraoi te ribooti n te Member Tools ke LCR.

Taan kairiiri n te titeiki ao n te uoote a na tataraa te Ribooti ni Katoa Kuata n rinanon ana kekeiaki temanna ma temanna. Iai inanon te ribooti rongorongon:

• Tein aron te beeba ni kariaia nakon te tembora irouia membwa ao kairake.

• Mwaane aika 18–25 aia ririki aika a bon mitinare naba ngkai ke ake a tia ni mitinare.

• Aron intawiu ibukin te mwakuri n ibuobuoki (taraa 21.3).

• Unimwaane aika tauraoi aika a kainnanoa te ibuobuoki ni katauraoia nakon karekean te Nakoanibonga ae te Merekitereka.

• Te roroko nakon te bootaki n te Tabati ibukiia ataei, kairake, kairake n ikawai aika a tuai ni iein, ao ikawai (taraa 33.5.1.1).

• Aia kekeiaki membwa aika boou aika a bwabetitoaki ao ni kamatoaaki inanon 12 te namwakaina n nako.

Mwiin te roroko ao intawiu n te mwakuri n ibuobuoki a bane n tauaki mwiia n te Member Tools ke LCR. Te rongorongo aei are e a bon katabwanina naba iai mwakoron te Ribooti ni Katoa Kuata.

Uoote ni kabane a katiai ao ni kanakoa te Ribooti ni Katoa Kuata nakon ana etukuata te Ekaretia. E na rinanon ribooti te kiraaka ma te bitiobi ao ni kanakoa imwain 15 bongin te namwakaina imwiin tokin taian kuata.

Te beretitentii n te titeiki a na kona ni manga rinanoi uoote nako n aia Quarterly Report. Aio are e na buokiia n tarai waaki ao n ataia bwa e anga ae kainnanoa te boutoka ao te kaetieti. A kona naba kaain te kauntira n te titeiki n tarai n tatabeua nako Ribooti ni Katoa Kuata.

33.5.2

Aara n te Membwatibu

Ana bwai ni mwakuri te Ekaretia n tauan mwiin-rekooti e anganiia taan kairiiri te kona n noori araia membwa. A kona aara aikai ni buokiia taan kairiiri ni kinaia bwa:

• Antai membwa aika a tuai karekei otenanti ake a tau nako iai.

• Antai ataeinimwaane ao ataeinnaine aika a tau ni karaoa aia mition.

• Antai kairake aika akea aia beeba ni kariaia nakon te tembora.

• Antai kairake aika a kainnanoa karekean aia tai n reitaki ma kaain te bitobiriki.

Taani kairiiri n te kooram ao bootaki nako a riai ni kona n noori araia kaain aia kooram ke aia bootaki.

33.6

Membwatibu Rekooti

Iai inanon aia rekooti membwa araia, aia tareboon, taekan aia otenanti, ao rongorongo riki tabeua aika kakawaki. E riai n iai ana rekooti te uoote ibukiia membwa n tatabemania nako aika a maeka inanon tiana.

A riai ni kawakinaki rekooti ibukiia membwa n te uoote are a maeka iai. Ae e aki kaeti nakon aei, are e na bon karako, e kainnanoa aia kariaia bitiobi ao beretitenti n te titeiki ake a irekereke ma ngaia. Te bubuti ibukin kariaiakan ae aki ira nanon aei, te beretitenti n te titeiki e na kabongana LCR ni kanakoa te bubuti nakon ana Aobiti te Moan Beretitentii.

Aia rekooti membwa bon ti te anga n tau mwiin otenanti ao mwakurin te aobiti tabeua inanon ana rekooti te Ekaretia aika teimatoa . Ngaia ae, te bitiobi e na kakoaua bwa a kawakin raoi rekooti aika eti kiraaka. E na kakoaua naba bwa ana kaeti rongorongo kiraaka man kabonganakin LCR. E kakawaki karaoakin bwaai aikai n te tai naba anne:

• Taui mwiin rongorongon te otenanti.

• Kamwaingi aia rekooti membwa ake a mwaing nakon ke ni kitana te uoote.

• Karaoi rekooti ibukiia membwa aika boou ao ataei aika boou aika kaain te aro aia karo.

• Taua mwiin maten te membwa.

• Tauan mwiin rongorongon te mare ao te utu.

Te bitiobi ke te beretitenti n te titeiki e na kakoaua bwa e a tia ana rekooti te membwa n rin n te uoote are nako iai imwain ae e na intawiunaki te membwa ni karekean:

• Nakoana n te Ekaretia.

• Ana beeba ni kariaia nakon te tembora.

• Te Nakoanibonga ae te Merekitereka ke ni katabuaki nakon te nakoa n te nakoanibonga anne.

E na kakoaua naba bwa rekooti a na akea bwaai aikai:

• Te kabwarabwara n totoko

• Te taeka ibukin te kabaebae ke kaotakin tianakin te otenanti

• Membwatibu ae tianaki kamwakurana

N tabetai e aki reitinako maekan te membwa n te uoote naba anne n te maan ae teuana te ririki. Ibukin anne, e na reitaki te bitiobi ke te kauntira ma te bitiobi are mai imwaina imwain karaoan te intawiu n anga te beeba ni kariaia nakon te tembora ke n anga te kariaia ibukin kamatoana nakon te aobiti n te Nakoanibonga ae te Merekitereka. Bukin raoi te reitaki aei bwa e na titiraki ngkana iai waaki tabeua iaon kororaoin te aomata ae e na rinanoaki. Ngkana te kauntira e kunea bwa iai te rongorongo ae kainaki, e na motika te marooro. E tuanga ana bitiobi bwa e na reitaki ma te bitiobi are mai imwaaina imwaain karaoan te intawiu.

Bon akea te anga ae e na anganaki iai ke e na kaotaki nakon temanna riki irarikin te bitiobi ke te kiraaka.

A kona membwa n tarai rongorongo bon ibukiia ao ibukiia natiia aika maeka n te mweenga iaon te Member Tools app. A kona naba n tangiri katotoon aia Individual Ordinance Summaries mairoun te kiraaka. Ngkana iai kaairua aika kuneaki, e na kakoaua te kiraaka bwa a kaetaki iaon te membwatibu rekooti.

Kaetieti bwa kona kanga ni karaoa ana rekooti te membwa a tauraoi inanon LCR.

Ibukin kangaanga aika aki taekinaki n te tiekition aei, a riai taan kairiiri n reitaki ma te Global Services Department ke aobitin te aono.

33.6.1

Aara aika kamanenaaki inanon Rekooti n te Ekaretia

Bwaninin aran te aomata ae kinaaki n te tua, n aron are e kabwarabwaraaki n tuan te aba ke te katei, e na kamanenaaki inanon rekooti ibukiia membwa ao iaon tietebiketi ibukin otenanti.

33.6.2

Membwa n te Rekooti

Aomata n tatabemaniia nako aikai bon membwa n te rekooti ao a riai n iai aia membwatibu rekooti:

• Naake a tia ni bwabetitoaki ao ni kamatoaaki

• Naake a mena iaan 9 te ririki ake a tia ni kakabwaiaki ma a tuai bwabetitoaki

• Naake aki bukintaeka ibukin aki toamaun rabwataia, n aki warekaki aia ririki

• Ataei ake a tuai ni kakabwaiaaki aika a mena aia ririki iaan 9 ngkana a bwaka iaan bwaai aikai:

  • Temanna te karo ke temanna te tibu bon kaain te Ekaretia.

  • Kaaro aika uoman a na anga te kariaia ibukin karaoan te rekooti. (Ngkana ti temanna te karo ae iai kariaiakana man te tua bwa te tia tararuaa te ataei, te kariaia mai iroun te karo anne e bon tau)

Te aomata ae 9 ana ririki ke iaona riki are iai ana membwatibu rekooti ni kaotaki bwa te membwa ma e tuai bwabetitoaki ao ni kamatoaaki e aki katauaki bwa te membwa n te rekooti. E ngae n anne, te uoote are e maeka iai te aomata e na kawakina ana membwatibu rekooti te membwa ni karokoa ae e koro 18 ana ririki. N te tai anne, ngkana e rineia te aomata bwa e na aki bwabetitoaki, te bitiobi e na kamaunaa ana membwatibu rekooti te membwa anne. E kainnanoaki ikai ana kariaia te beretitenti n te titeiki.

Aki kamaunaki aia rekooti naake a tuai bwabetitoaki ibukin mamaran aia iango ti ngkana man ana bubuti te aomata anne ke te tia tararuaia iaan te tua, n raonaki ma te karo.

33.6.3

Rekooti ibukiia Membwa aika Boou n te Uoote

Te kiraaka n te uoote ke te kiraaka n ibuobuoki n te uoote e na reitaki ma membwa aika boou n te tai ae waekoa imwiin rokon aia membwatibu rekooti n rinanoa te Tiamwarii ibukin ana Otenanti te Aomata ibukin kaetakiia.

Ibukin kaetieti ibukin kabwarabwarakiia membwa aika boou imwiin tian reken aia rekooti ke imwiin bwabetitoaia ao kamatoaia, taraa 29.2.1.1.

33.6.4

Rekooti ibukiia Membwa Aika Mwaee ke Ake a kitanii Mwengaia n te tai ae e aki maan

Taan kairiiri n te uoote, taari ao titita n te mwakuri n ibuobuoki, ao kiraaka a na karekei aia aetureti ae boou membwa n te tai naba are a ataia bwa iai aia iango membwa ni kitana te uoote. Te kiraaka e na kamwaing rekooti nakon te uoote ae boou ngkana e a mwaing raoi te membwa. Kiraaka a na bubuti naba aia rekooti membwa ake a mwaing nakon aia uoote ngkana a tuai kanakoaki rekooti man te uoote are mai imwaina.

Ngkana e aki kona n ataia te kiraaka bwa a mwaing n nakea membwa, e na kamwaingaki te rekooti nakon te Finding Lost Members (Kakaeaia Membwa aika Bua) inanon LCR. Ana rinanon te ribooti aei n tainako taan kairiiri n te kooram n unimwaane ao te Bootaki n Aine ao ni kabonganai bwaai n ibuobuoki aika tauraoi ni kakaeia membwa aikai. A kona kaain te kauntira n te uoote ake tabeman ke mitinare n ibuobuoki.

Ngkana e kuneaki te tabo are e mena iai te membwa, te kiraaka e na kamwainga ngkanne te rekooti nako iai. Ngkana e aki kuneaki te tabo are e mena iai te membwa i mwiin kabonganakin bwaai ni kakaae ni kabane, te kiraaka e na karekea ana kariaia te bitiobi bwa e na kaokaki te rekooti nakon ana etukuata te Ekartia.

Rekooti inanon Finding Lost Members (Kakaeaia Membwa aika Bua) a teimatoa n tiku n te uoote, ma aki oti inanon araia membwa ao ribooti, ao aki rin n ana statistics (waare ni kabotau) te uoote.

Ngkana e na mwaing te aomata man te uoote n temaan ae riaon te teniua te namwakaina, te kiraaka e na kamwainga ana rekooti te membwa anne nakon te uoote ae boou ti ngkana e tangiria ni manga oki te membwa imwiin nakona ni mwakuri n te tai ae aki maan ke n nako ni mwakuri itinaniku ke nakon te reirei ae na kona n riaon teniua namwakaina manna.

Ngkana e mwaing te aomata man te uoote n te maan ae kee iaan teniua namwakaina ao e baireia bwa e na manga oki, e na kawakinaki ana rekooti te membwa n te uoote.

Ngkana aki koaua raoi taan kairiiri bwa ana maanra ae na nako iai te aomata, a na kawakin rekooti n te uoote are e na kona ni buoka kainnanon te membwa.

33.6.5

Aia Rekooti Membwa Aika Otinako-Man-te Iunite

Ana rekooti te membwa e kona ni kawakinaki ti n teuana te uoote n te tai anne. Ti te bitiobi n te uoote anne ae na taraa aron kaetakin ana rekooti te membwa, ni karaoi otenanti, ao ni karaoi intawiu ibukin te membwa.

N itera tabeua ao e na kainnanoaki bwa e na tauaki mwiin aran te membwa ao rongorongon ana reitaki n ana kauoua ni uoote (taraa 33.6.11 ao 33.6.13 ibukin te katooto). N aron kangaanga aikai, te kiraaka n te kauoua ni uoote e na karaoa te rekooti ibukiia membwa aika otinako-man-te iunite. E kabongana LCR ni karaoa te rekooti aei.

Membwa ma aia rekooti aika a otinako-man-te iunite a kona ni karekea te nakoa n te uoote anne. A tia naba ni karinaki inanon ana tarekitori ao tabeia uoote.

33.6.6

Aia Rekooti Membwa ake a Mwakuri Itinanikun are bon aia Uoote n aia Aono

33.6.6.1

Aia Rekooti Membwa ma Mwiokoaia ake Tabeua n te Ekaretia

Ngkana iai mwiokoaia membwa n te Ekaretia itinanikun are bon aia uoote n aia aono, a na kawakinaki aia membwatibu ma aia rekooti ibukin te mwane n are bon aia uoote n aia aono. Ngkana mwioko aikai a tangira mwaingiia membwa man aia uoote n aia aono ibukin teniua namwakaina ke e raka riki ao ngkana a iraki irouia natiia, a na kamwaingaki aia rekooti membwa nakon te uoote ae boou. (Taraa 33.6.4.)

33.6.6.2

Aia Rekooti Mitinare Aika Bwanin-Aia Tai

Taraa 24.6.2.8

33.6.7

Rekooti ibukiia Kairake n Ikawai aika Tuai ni Iein

A kona kairake ni ikawai aika a tuai ni iein aika aia ririki imarenan 18 ao 30 n rineia bwa a na tiku n oin aia uoote n aia aono ke te YSA uoote are e kateaki teuana n aia aono. E kawakinaki ana rekooti te membwa n te uoote are a iria.

A kaineti naba tuua aikai nakoia ikawai aika a tuai iein imarenan te roro 31 ao 45 ake a rineia bwa a na riki bwa kaain te uoote ake a tuai iein.

Ngkana te kairake ni mwaane ae e tuai iein e iangoia ni kaea te uoote n te tai ae uarereke (te katooto, n tain kaean te reirei), te membwatibu rekooti e tiku n te uoote are e kaea teuanne ke neienne. Man ana kariaia te membwa, te kiraaka are n te uoote are e mena iai ana utu te aomata anne e kona ni karaoa te rekooti ae ti ibukin te mwaing ibukin teuanne ke neienne (taraa 33.6.5).

33.6.8

Rekooti ibukiia Membwa Ake A Maeka n Onaoraki ke Taabo n Tararua

Rekooti ibukiia membwa ake a maeka inanon onaoraki ke taabo n tararua a riai ni mena n te uoote e na kona ni buokiia. Ni bon koauana, anne te uoote are e mena iai te onaoraki ke te tabo n tararua.

33.6.9

Rekooti ibukiia Membwa inanon te Taanga ni Buaka

Ngkana e rin te membwa n te taanga ni buaka ibukin te kataneiai, e na kawakinaki ana rekooti te membwa anne n ana uoote n ana aono ni karokoa ae e kamwakuraki teuanne ke neienne n aia tabo ni kataneiai tautia ae e na tiku ni maan iai. N te tai anne e riai te membwa n reitaki ma te uoote n ana aono ao n anga aran ao ana aetureti te uoote ae boou.

33.6.10

Rekooti ibukiia Membwa Ake Iai Toabuakan Aia iango

Te aomata ae 8 ana ririki ke iaona ae iai toabuakan ana iango, ana karo teuanne ke neienne (ngkana e riai), ao te bitiobi a na uaia ni maroroakinna ni baireia ngkana e na riai te aomata anne ni bwabetitoaki ao ni kamatoaaki. Ngkana e baireaki bwa e na aki bukintaeka te aomata anne, te bitiobi ke te kiraaka e na koreia bwa “E Aki Bukintaeka” inanon te tiekition n te bwabetito n ana rekooti te membwa inanon LCR. E na aki kamaunaaki te rekooti anne. Aaki riai otenanti ibukin te aomata are e oti n ana rekooti bwa e aki bukintaeka teuanne ke neienne.

N tabetai ao a kona n uaia ni maroro imarenaia n tatabemaniia nako, ana karo teuanne ke neienne, ma te bitiobi n iangoia raoi ngkana te aomata anne e bon bukintaeka raoi imwiin are e a tia ni koreaki bwa e “Aki Bukintaeka.” N te keiti anne, ao e kona te bitiobi ke te kiraaka (man ana kariaia te bitiobi) ni kamaunaa aron kinaakina ae te “Aki Bukintaeka”. Ibukin rongorongona riki tabeua, taraa 38.2.4.

33.6.11

Rekooti ibukiia Membwa Ake A Bonotaninga ke Aki kona n Ongo

Membwa ake a kabongana te taetae n te kanikina, ao aia utu ni kaan ke taan tararuaia iaan te tua, a kona n rinea te tabo ae a na kona ni kawakinaki iai aia rekooti n te Ekaretia n taabo aikai:

• Aia uoote n are bon aia uoote n aia aono

• Te uoote ibukiia membwa aika a bonotaninga ke a bukaaka aia kakaungo ake a maeka inanon tian te uoote

• Te uoote are e tararua te kurubu ibukiia membwa aika bonotaninga ke a buakaka aia kakaungo aika a maeka inanon te aono anne e baireaki iroun te beretitenti n te titeiki ke te Beretitenti n te Aono

Ngkana e riki aei, ana rekooti anne temann ke te utu a kona ni mena n teuana te iunite, ao ni kona n riki bwa membwa aika aki warekanaki n te iunite are teuana. (Taraa 33.6.5.)

Membwa aika a bonotaninga ke ake aki kona n ongo a kona ni kaei uoote ke kurubu rinanon te intanete ae maiu ibukiia nake a bonotaninga itinanikun aia aono are e maeka iai te membwa.

33.6.12

Rekooti ibukiia Ataei Aika Tabekaki

Rekooti ibukiia ataei aika tabekaki a na kona ni karaoaki ke n kaboouaki imwiin tian raoi te tabetabe. Te ara ae oti iaon te rekooti e riai ni ira aron karaoan te tabetabe iaan te tua. Rekooti ibukiia kaaro aika a tabetabe a na kaboouaki imwiin tian raoi te tabetabe.

33.6.13

Rekooti ibukiia Ataei Aika Raure aia Kaaro

Rekooti ni kabane ibukiia membwa a riai ni kabongana aran te aomata ae bwainaki iaan te tua, n aron ae kabwarabwaraaki n tuan ke katein te aba. E raonaki aei ma ataei ake a raure aia karo. E riai aran te membwa ae kinaaki n te tua ni koreaki naba iaon tietebiketi ni kakabwaia ao otenanti n te nakoanibonga.

Ataei aika a raure aia karo aki toki n irira te bobotaki n taromauri man aia uoote ke aia mwaanga aia karo. Ngkai tii teuana te iunite ae e na riai ni kawakin ao ni kaeta ana rekooti te ataei, e kona ni karaoaki ana rekooti te membwa ae aki otinako-man-te Iunite n te uoote are e iriiria teuanne ke neienne (tara 33.6.5). Aio e na kariaia aran te ataei ao rongorongon ana reitaki bwa e na karinaki iaon te beba are iai araia kaain te uoote ao kaain te kiraati.

Ataei ma aia rekooti membwa aika a otinako-man-te iunite a kona ni karekea te nakoa n te iunite anne.

33.6.14

Reekoti ake a raonaki ma Kabwarabwara

Taraa 32.14.5.

33.6.15

Kamwaingan Tianaki iaon te Membwatibu Rekooti

Ngkana e mwaing te membwa ao e tuai n itiaki taekan taian totoko ke te tabeaianga n ana kangaanga ae kakaiaki, te bitiobi ke te kiraaka ae kariaiakaki e kona ni karina ae e kai kona ni kamwaingaki iaon ana rekooti te membwa. E kabongana LCR ni karaoa aei.

Te rekooti are iai taekana bwa e aki kona ni kamwaingaki e na aki kamwaingaki nakon te iunite ae boou ni karokoa te tia kairiiri n te nakoanibonga are e korea te tianaki anne e kariaia bwa e na kamaunaaki te totoko anne.

33.6.16

Rekooti man te Bwaera “Tabo Ae Aki Ataaki” Bwaera

N tabetai te membwa e kuneaki imwiin ae e a tia n rin ana rekooti teuanne ke neienne n te “address unknown file (bwaera ibukin aetureti aika aki ataaki)” n ana etekuata te Ekaretia. E na raonaki te rekooti ma te rongorongo ae na kaungaia kaain te bitiobiriki, te kooram, ao taan kairiiri ni bootaki bwa a na kawara te aomata anne n te tai ae waekoa ao ni karaoa te mwakuri n ibuobuoki nakoina.

33.6.17

Rawean ao Kaetakin Rongorongon Otenanti

Taraa mwakoro 18.

33.6.18

Rawean ao Kaetakin Rongorongoia Aomata

Taraa 33.6.

33.6.19

Otetanakin te Membwatibu Rekooti

Ni katoa ririki te kiraaka n te titeiki ke te kiraaka ae te tia ibuobuoki n te titeiki e na kakoaua bwa otetanakin aia rekooti membwa e karaoaki inanon uoote n tatabeuanako man kabonganakin te LCR. Te beretitenti n te titeiki e na weteia tabeman ake iai aia atatai ni kawakinan rekooti ibukiia membwa n ibuobuoki ma oteta aikai. A riai mwakuri n oteta n tia imwain 30 n Tuun ni katoa ririki.

33.7

Rekooti n Rongorongon Bwaai Rimoa

33.7.1

Rongorongon te Uoote ao te Titeiki

E a tia te uea n anga te kaetieti bwa “rongorongon bwaai ni kabane aika kakawaki” bwaai aika a kaineti ma te Ekaretia aika a na koreaki ao ni kawakinaki (Reirei ao Berita aika Tabu 69:3; taraa naba te kibu 5; Aramwa 37:2).

Iunite n tatabeua n te Ekaretia a na taui mwiin bwaai aika a kakawaki aika a kaineti nakon te iunite. A irianaki bwaai aikai ma rongorongon bwaai ake rimoa mairouia taan kairiiri n te iunite.

Kawakinan te rongorongo bon te mwakuri ae irianaki ma te tamnei are e na kakorakorai aia onimaki naake a koreia ao a warekia. Tauan mwiin karaki rinanon te ririki e na kakorakora aron kakanongoraan te rongorongo.

Taan kairiiri n te nakoanibonga n te titeiki ao n te uoote ao bootaki a kanakoi aia karaki ni kabongana te Unit History tool iaon ChurchofJesusChrist.org. Iai tabeia kiraaka n Titeiki ao n uoote ae kakawaki ni bairei ao n tararua te mwakuri aei. E kona te beretitentii n te titeiki ao te bitiobiriki ni wetea te tibetiriti n rongorongon te titeiki ke te uoote bwa e na ibuobuoki. A tauraoi kaetieti riki tabeua iaon te bwai ni mwakuri ae Quick Start Guide.

A kona membwa ni kabongana te bwai ni mwakuri ae te Unit History ni mataku n taian karaki ake a tia ni boretiaki irouia taan kairiiri n aia uoote ao n aia titeiki. Karaki ake a tia ni boretiaki a otematiki ni kawakinaki n te Ekaretia.

33.7.2

Rongorongon te Ekaretia

Te Tabo n Mwakuri n Rongorongon te Ekaretia e na rinei man kawakin rongorongon ake ngkoa, n raonaki ma bon am rekooti, korotamnei, ao bwainikawai “aika raoiroi ibukin te ekaretia, ao te roro ae rikirake” (Reirei ao Berita aika Tabu 69:8). Titiraki ibukin rongorongo ni kawai aika kakawaki inanon te rekooti e na kanakoaki nakon:

Church History Library

15 East North Temple Street

Salt Lake City, UT 84150-1600

Tareboon: 1-801-240-5696

Imeeri: [e-mail]

33.8

Kainakin Rongorongon Rekooti

Ana rekooti te Ekaretia a tabu taekinaia, bwa tao aika a koreaki iaon te beeba ke n te kaombiuta. A raonaki ma:

• Rekooti ibukiia membwa.

• Rekooti ibukin te mwane.

• Taeka man taian bootaki.

• Booma ao beeba aika a kakawaki (n raonaki ma rekooti n te membwatibu kauntira).

Taan kairiiri ao kiraaka a na kamanoi ana rekooti te Ekaretia man uotakiia, kawakinaia, ao kamaunanakoakiia n te aro are na kamanoa rongorongon temanna ma temanna. Ana kakoaua taan kairiiri bwa te rongorongo are e karekeaki mairouia membwa e:

• Tianaki nakon are kainnanoia te Ekaretia.

• A kabonganaaki ti ibukin ana kaantaninga te Ekaretia aika a tia ni kariaiakaki.

• Anganaki ti naake a kariaiakaki bwa ana kabongana.

Rongorongo ake a kawakinaki n te kaombiuta a riai ni kawakinaki raoi ao ni kamanoaki n ae riai (taraa 33.9.1). Taani Kairiiri ana kakoaua bwa rongorongo a na aki kamanenaaki i bon ibukiia aomata, te tautaeka, ke mwakuri ni iokinibwai. Rongorongo man ana rekooti te Ekaretia, n raonaki ma rongorongon ngkoa aika tauaki mwiia, ana aki anganaki aomata n tatabemaniia ke bootaki ni mwakuri ake a karaoa te kakaae ke te ukeuke (taraa 38.8.37).

A riai taan kairiiri ao membwa n irii kainibaire inanon 38.8.13 ni kamanoi ana tarekitori te titeiki ao te uoote.

33.9

Tararuaan Rekooti

Taani Kairiiri n te Titeiki ao te uoote a na kateimatoa tararuaan rekooti aika a nakoraoi bwa mwakoron aia waaki ni kawakin rekooti.

33.9.1

Kamanoaki

A riai ana rekooti, ribooti, ao ana taata (data) te Ekaretia ni kamanoaki n totokoaki te rin nako iai n akea te kariaiakaki, bitakiia, uruakakiia, ke kaotakiia. E riai ni kawakinaki te rongorongo aei n te tabo ae mano. Rekooti ake iai kanoaia aika kainaki, ni ikotaki ma beeba aika kaeweaki man te kaombiuta, a na kawakinaki n te turooa ae roka ke te kaebineti ae roka n ana aobiti te tia kairiiri ngkana a aki kamanenaaki.

Ngkana e kona, a riai katotoon rekooti man te iti, ribooti, ao taata (data) ni koreaki n aroia aika ana raba iai ao ni bwatiuotenaki. Buan ke kimoakin bwaai ni mwakuri (devices) ae ana bwai te Ekaretia ke rongorongo aika a kawakinaki e riai ni waekoa n ribotinaki nakon incidents.ChurchofJesusChrist.org. A riai naba n ribotinaki aki kabonganakin raoi rongorongon te Ekaretia.

33.9.1.1

Aran te Tia Kabongana ao Bwatiuoote

Aki riai beretitenti n titeiki, bitiobi, ao taan kairiiri riki ake tabeman n aki tibwaua araia are a kabongana ao aia bwaatiuoote ma kauntira, kiraaka, tiakoroboki ni kakoroi mooti, ao tabeman riki aomata.

A kaungaaki taan kairiiri bwa a na karaoi uoua kawain kakoauakina (also known as multifactor authentication) n aia akaunti n te Ekaretia ngkana e kona.

33.9.1.2

Kaombiuta Aika Ibuobuokaki ao Kawakinan Taata (Data)

Aki riai taan kairiiri ao kiraaka ni kawakin rongorongoia membwa ke te mwane iaon kaombiuta aika ibuobuokaki are e kona ni kabonganaki irouia aomata aika aki kariaiakaki bwa a na karekea te rongorongo aei.

33.9.1.3

Taata (Data) Aika Karabaaki

A mwaiti aaba aika a manga kamwakuri tuua ibukin kamanoan taata are e kamwakura aron karaoan te taata. E raonaki aei ma te rongorongo n aia rekooti membwa ao ana rekooti te Ekaretia ake tabeua are e na kaota ataakin temanna. Taan kairiiri ake iai aia titiraki iaon kabonganakin tuua ni kamanoakin taata (data) nakon ana tabo n tararua te Ekaretia n te aono iaon rekooti a kona n reitaki ma ana aobiti te Ekaretia ibukin taata n te [e-mail].

33.9.2

Kateimatoakiia

A na ti kawakinaki rekooti ni maaniia are a kainnanoaki ibukin tararua, te tua, ao ibukin rongorongoia rimoa. Rekooti ibukin mwaane a na kawakinaki inanon teniua te ririki ni ikotaki ma te ririki ae mena te aba inanona. Taan kairiiri ake iai aia titiraki iaon maanin tain kawakinan rekooti a riai n reitaki ma te Global Services Department ke te aobiti n te aono.

33.9.3

Kamaunaakin Bwaai

Rekooti ake a bane taia ke aikoa manga tangiraki a na uruakaki n te aro are te rongorongo e aki kona ni manga kaokaki ke ni manga tomatomaaki.

Rekooti ake iai inanona rongorongon ni kawai aika bongana a na aki karenakoaki, ni uruakaki, ke ni katukaki n te tienta n te uoote ibukin bwaai n ibuobuoki (raiburari). Titiraki ibukin rongorongon rekooti ni kawai aika bongana a na kona ni kanakoaki nakon te Raiburari ibukin Rongorongon te Ekaretia (taraa te rongorongo ni itoman inanon 33.7.2

33.10

Taan Rabakau ni Bwaai n Rabakau n te Titeiki ao te Uoote

Te beretitentii n te titeiki e na wetea temanna ke e raka riki membwa n te titeiki bwa a na beku bwa tia rabakau iaon bwaai n rabakau n te titeiki. Te bitiobiriki e kona ni wetea temanna ke e raka riki membwa n te uoote bwa ana beku bwa tia rabakau ni bwaai n rabakau n te uoote. Mwaane, aine, ao kairake a kona ni kanoai wewete aikai.

Taan rabakau ibukin rabakau aika a boou ake a kabonganaaki n te titeiki a beku iaan ana kairiiri te kiraaka n te titeiki. Taan rabakau ibukin rabakau aika boou ake a kabongaaki n te uoote a mwakuri iaan ana kairiiri te kiraaka n te uoote ke te tia koroboki ni kakoroi mooti, n aron baireaia iroun te bitiobi. A kona tabeia n ronaki ma aikai:

• A na buokiia taan kairiiri n te titeiki ke n te uoote ni kainnanoia iaon bwaai aika a kangaanga aroia.

• A na reireiniia membwa aron rinnakoia ao kabonganakin ana tabo ni kareke rongorongo, apps, ao bwaai ni mwakuri ibukin rabakau aika maiu man te iti te Ekaretia, n raonaki ma te FamilySearch.org.

• Boutokaia mataniwi ao taan reirei aika a kabonganai bwai ni mwakuri aika maiu man te iti ni kakoroi bukin aia wewete.

• Tararuai bootaki ao kiraati ake a karaoaki n te intanete ibukiia naake aki kona n roko (taraa 29.7).

Irarikin anne, aikai taben te tia rabakau ni bwaai aika a maiu man te iti ibukin te titeiki ibukin tararuaan ana kaombiuta te Ekaretia n te titeiki, ni ikotaki ma ake inanon tienta n te FamilySearch:

• Karaoan te kaetieti man te beretitentii n te titeiki ibukin katukan, tibwauaan, manga mwiokoa, ao bairean tain kamanenaan ana kaombiuta ni kabane te titeiki.

• Kateimatoa karaoan te warebwai iaon mwiin bwainimwakuri ibukin kombiuta ni kabane n te titeiki, ma nambwaia nako, aekakiia, korakoraia, ao n neia are a mena iai.

• Kakoauaa bwa (1) kaombiuta, tiaobutuea, ao rongorongo aika kamanoaki ao (2) baera n te taata (data) a teimatoa ni kawakinaki.

• Kataneiako ma kaetieti ni kabuta ibukin ana kombiuta te Ekaretia (taraa 38.8.10).

N aron kainnanoakina, te tibetioriti iaon bwaai n rabakau n te titeiki e na tararua ana mwakuri te tibetioriti iaon bwaai n rabakau n te uoote.