“35. Kea mo Yus blong Ol Mitinghaos,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2024).
“35. Kea mo Yus blong Ol Mitinghaos,” Jeneral Hanbuk.
35.
Kea mo Yus blong Ol Mitinghaos
35.1
Stamba Tingting
“Jos i givim ol mitinghaos blong mekem se evriwan we oli kam insaed, bae oli save:
-
Mekem mo riniu ol kavenan tru long ol tabu odinens (luk long Doktrin mo Ol Kavenan 20:75; 59:9–12).
-
Mit tugeta (luk long 3 Nifae 18:22–23).
-
Wosip mo prea tugeta (luk long Mosaea 18:25; Moronae 6:9).
-
Tij mo givhan long wanwan long olgeta (luk long Moronae 6:4–5).
-
Tekpat long ol nara samting we oli apruvum olsem we oli tokbaot olgeta long japta ia.
Wan mitinghaos i save ol defren samting folem ol lokol situesen mo nid. I save wan Jos we oli bildim o wan spes we Jos i pem, wan haos blong wan memba, wan lokol skul o komuniti senta, wan spes we oli lisim, wan nara samting we oli apruvum.
35.2
Ol Rol mo Ol Responsabiliti
35.2.1
Mitinghaos Bilding Dipatmen
Mitinghaos Bilding Dipatmen long ol hedkwota blong Jos i putum ol prinsipol mo gaedlaen blong stap givim mo mentenem ol ples blong wosip. Dipatmen ia i wok anda long daereksen blong Prisaeding Bisoprik.
Ol wokman blong Mitinghaos Bilding oli responsibol blong stap givim mo mentenem ol mitinghaos mo ol nara bilding blong Jos. Hemia oli mekem anda long daereksen blong Eria Presidensi mo eria daerekta blong ol temporol afea.
35.2.2
Mitinghaos Bilding Maneja
Wan mitinghaos bilding maneja we Jos i pem, i helpem wanwan stek blong operetem ol mitinghaos. Hem i arenjem ol bigbigfala ripea, bigfala klinap, mo ol wei blong mentenem ol bilding.
Olsem we i nid, bilding maneja i helpem blong givim instraksen long ol bilding ripresentativ blong stek o wod, long olsem wanem blong klinim bilding mo mekem ol narafala wok. Hem i givim ol instraksen, materiol mo tul.
Bilding maneja i wok wetem bilding ripresentativ blong stek blong manejem ol seves ia mo evri narafala kea blong ol bilding. Hem i save lukluk tru long ol samting we oli spendem mane long hem tu long saed blong bilding wetem ol bisoprik.
35.2.3
Eria Seventi
Eria Seventi we i lukaotem eria i wok kolosap wetem ol stek presiden blong mekem masta plan proses (luk long 35.3).
35.2.4
Stek Presidensi
Stek presidensi i gaedem ol bisop long wei we oli yusum, kea mo lukluk long sekiuriti blong ol mitinghaos. Oli givim wok long wan hae kaonsela blong stap olsem stek bilding ripresentativ (luk long 35.2.5). Oli kaonsel wetem hem blong luklukbak long ol nid mo ol projek.
Sapos ol memba oli nidim moa spes blong wosip, stek presidensi i givim infomesen i go long Eria Presidensi. Hemia oli mekem tru long masta plan proses (luk long 35.3).
35.2.5
Stek Bilding Ripresentativ
Stek bilding ripresentativ i helpem stek presidensi long wei we oli yusum, kea mo lukluk long sekiuriti blong ol mitinghaos taem oli:
-
Stap givim instraksen long ol wod bilding ripresentativ long ol wok blong olgeta (luk long 35.2.9).
-
Stap seremaot ol ki long ol yunit lida.
-
Stap toktok wetem Jos bilding maneja abaot ol nid blong mentenem mo mekem ol bilding oli wok.
35.2.6
Ol Stek mo Wod Teknoloji Speselis
Ol stek mo wod speselis oli help blong setemap mo mentenem teknoloji insaed long ol bilding. Taem i nidim blong instolem wan niu tul, olgeta oli wok wetem bilding maneja. Blong gat moa infomesen abaot ol koling ia, luk long 33.10 (luk tu long mhtech.ChurchofJesusChrist.org).
35.2.7
Bisoprik
Bisoprik (o wod bilding ripresentativ) i tijim ol memba wei blong yusum , kea long, mo sekiuriti long bilding. Bisoprik i seremaot ol ki blong bilding long ol lida blong wod.
Oli mekemsua se oli lidim ol aktiviti long bilding mo long graon, long sef wei (luk long 20.7).
Oli toktok wetem Jos bilding maneja abaot ol nid blong mentenem mo mekem ol bilding oli wok. Oli save luklukbak tu long ol samting we oli spendem mane long hem wetem bilding maneja.
35.2.8
Ejen Bisop
Sapos i gat moa bitim wan wod we i stap mit long wan bilding, stek presidensi i jusum wan bisop blong i ejen bisop blong kodinetem ol wok wetem ol nara bisop. Ol wok ia i tekem tu, blong putum taem tebol, stap klinim, mo mekem bilding i sef. Long wan amaon blong taem, stek presidensi i muvum responsabiliti ia i go raon long ol bisop we ol wod blong olgeta i stap mit long bilding ia.
35.2.9
Wod Bilding Ripresentativ
Bisoprik i talemaot blong singaotem wan wod bilding ripresentativ o no. Sapos oli disaed blong givimaot koling ia, bisoprik i save singaotem wan man o woman memba. Sapos oli no singaotem wan wod bilding ripresentativ, bisop i save givim wok ia long wan long ol kaonsela blong hem, wod klak o asisten wod klak, o eksekutiv sekretari.
Wod bilding ripresentativ i oganaesem ol memba mo ol volontia blong klinim mo mentenem bilding. Hem i tijim olgeta olsem wanem blong mekem wanwan wok wetem ol saplae mo tul we i stap.
Sapos i nid, hem i kasem instraksen i kam long stek bilding ripresentativ blong stap mekem ol samting ia oli wok gud, olsem saon, mekem rum i wom, ea kondisen, mo ol nara sistem blong bilding.
35.2.10
Ol Memba
Anda long daereksen blong bisop, adalt mo ol yut lida oli leftemap tingting blong ol memba blong help blong stap kea mo mentenem bilding. Bisoprik o wod bilding ripresentativ i jenisim ol wok folem ol skil mo hamas olgeta we oli stap wok, oli save mekem. Kea we ol memba i givim oltaem i helpem ol risos blong Jos blong save stap long taem moa olsem we i posibol.
35.3
Stap Givim Ol Mitinghaos
Ol mitinghaos oli defdefren long saes mo stael folem ol lokol nid mo situesen. Wan mitinghaos i save wan Jos we oli bildim o wan spes we Jos i pem, wan haos blong wan memba, wan lokol skul o komuniti senta, wan spes we oli lisim, wan nara samting we oli apruvum.
Ol eria lida mo ol lokol prishud lida oli traehad blong mekem se oli yusum ol mitinghaos we oli stap finis mo oli mas waes blong givim tingting blong askem sam moa spes. Oli folem “Ol Prinsipol mo Gaedlaen blong Gat Wan MitinghaosGaed blong Ol Mitinghaos Bilding).
Ol lida oli rere long ol masta plan evri yia mo yusum Meetinghouse Master Planning Guidelines blong mekemsua se spes blong mitinghaos i inaf. Ol lida oli yusum ol masta plan tu long faenemaot ol fiuja nid blong sam moa miting spes o muv i go long wan nara ples, we i blong salem o letem oli yusum ol mitinghaos mo propeti long ol nara samting.
Blong gat moa infomesen, luk long “Gat Ol Mitinghaos mo Ol Nara Ples blong Wosip” (Gaed blong Ol Mitinghaos Bilding).
35.3.1
Ol Seves blong Graonbreking mo Dediketem Ol Bilding
Oli save mekem ol seves blong graonbreking bifo konstraksen. Taem oli flatem ol niu bilding o ol bigfala samting we oli ademap, oli mas dediketem kwiktaem olsem we i posibol. Ol spes we oli lis long hem oli save dediketem tu.
Blong gat moa infomesen, luk long “Ol Seves blong Graonbreking” mo “Dediketem Ol Bilding” insaed long “Gat Ol Mitinghaos mo Ol Nara Ples blong Wosip” (Gaed blong Ol Mitinghaos Bilding).
35.4
Stap Mentenem Ol Mitinghaos
35.4.1
Stap Klinim mo Mentenem Ol Mitinghaos
Ol lokol lida mo memba, we i tekem tu ol yut, oli gat wan responsabiliti blong help blong kipim wanwan bilding i klin mo stap long gudfala kondisen. Hemia i help blong:
-
Holemtaet tabu fasin blong bilding blong stap olsem wan ples we Spirit i save stap long hem.
-
Leftemap tingting blong gat fasin blong stap kwaet.
-
Givim wan pikja blong respek.
-
Mekem laef blong bilding i longfala moa mo gat yus.
Taem tebol blong stap klinap i no mas stap olsem wan hadwok long ol memba. Eksampol, sapos i had blong travel i go long bilding, ol memba oli save klinap olsem pat blong ol taem long wik taem oli stap finis long bilding.
Blong gat moa infomesen, luk long “Stap Mentenem Ol Mitinghaos” (Gaed blong Ol Mitinghaos Bilding).
35.4.2
Rikwes blong Ol Ripea
Ol memba blong wod mo ol stek kaonsel oli save ripotem ol bilding ripea we i nid. Oli save mekem hemia long Facility Issue Reporting (FIR) tul. FIR i mekem ol lida oli save givim, luk mo save progres blong, mo givimbak tingting long ol ripea mo ol nara rikwes. Ol kaonsel memba oli save kontaktem tu bilding maneja blong gat help.
FIR i stap tu olsem wan ap long Google Play mo long Apple App Store. Ol instraksen blong yusum FIR i stap long Help Center long ChurchofJesusChrist.org.
35.4.3
Mitinghaos Inspeksen
Bilding maneja i jekem evri bilding evri yia. Tingting biaen long hemia i blong faenem ol nid mo ripea blong bilding we bae i blong wan longfala taem. Afta bae bilding maneja i tokbaot ol risal blong inspeksen mo ol nid we i nidim blong mekemaot, wetem stek bilding ripresentativ o ejen bisop.
35.4.4
Sevem Paoa mo Wota
Jos i traehad blong sevem wota, eneji mo ol narafala risos. Ol lida oli leftemap tingting blong ol memba blong sevem eneji mo wota long ol bilding. Eksampol: Taem wan memba i aot long wan rum, oli mas ofem ol laet, tap blong wota, ol tul blong kipim ples i wom o kolkol we oli yusum long taem blong miting o aktiviti. Ol memba oli ripot i go long ol lida abaot eni kondisen we i stap westem eneji o wota.
Ol memba oli save sapotem ol eneji mo wota projek we komuniti i sponsarem. Ol efot ia oli save katemdaon ol bil.
Ol lida mo ol memba oli save kontaktem bilding maneja blong gat moa infomesen abaot yus mo fasin blong sevem wota mo eneji.
35.4.5
Sefti mo Sekiuriti
Ol lida mo memba oli mas:
-
Kipim ol vranda, ol step, ol ples blong kamaot long hem, mo ol rum blong storem ol tul, i klia mo sef blong man i save go kam.
-
No yusum o storem ol materiol we i save laet kwik long faea, insaed long ol bilding.
-
Setemap mo folem ol wei blong lokemap bilding.
-
Kipim ol tul we i blong Jos, i sef blong oli no stilim.
-
Save olsem wanem blong ofem ol samting we oli stap yusum olsem wota, lektrisiti mo gas o fiul.
Olsem we i nid, bilding maneja i save givim wan map blong soemaot ol botel blong kilim faea, fes eid kit, mo ol ples blong ofem ol samting we oli stap yusum. Sam moa infomesen abaot sefti i stap long “Security and Lockup Procedures” insaed long “Stap Mentenem Ol Mitinghaos” (Gaed blong Ol Mitinghaos Bilding). Luk tu long 20.7.
35.5
Ol Polisi long Saed blong Fasin blong Yusum Ol Mitinghaos blong Jos
Ol mitinghaos blong Jos oli ol tabu risos we oli mas yusum blong helpem ol pikinini blong God oli kam moa kolosap long Kraes. Blong stap welkamem ol pipol blong joenem yumi long ol aktiviti long ol mitinghaos, mo stap yusum ol mitinghaos blong yumi blong blesem ol komuniti blong yumi, oli ol wei blong “laet [blong yumi] i saenaot i kasem ol man, blong oli save luk ol gudgudfala wok we [yumi] i stap mekem. Nao bambae olgeta oli save leftemap nem blong Papa blong [yumi], we i stap long heven” (Matiu 5:16).
Seksen ia i gat ol jeneral polisi long saed blong fasin blong yusum ol mitinghaos. Ol polisi ia oli yusum tu long evri propeti blong Jos mo ol fasiliti we i stap raon long mitinghaos. I gat moa infomesen i stap long ol risos we oli mekem lis blong hem long seksen ia.
35.5.1
Ol Besik Prinsipol mo Ol Samting We I Nidim blong Save Stap Yusum Ol Jos Mitinghaos
Ol Jos mitinghaos oli ol praevet propeti blong relijin we oli dediketem blong wosip, stap lanem gospel, felosip, mo ol aktiviti we oli stret we i help blong karem ol pipol i kam long Kraes. Blong yusum ol Jos mitinghaos, hem i wan janis.
Evri yus blong ol Jos mitinghaos, i mas folem ol besik samting we i nidim blong folem:
-
Doktrin, ol polisi, mo ol praktis blong Jos, we i tekem tu tabu fasin mo ol stamba tingting blong ol Jos mitinghaos, oli mas stap semmak.
-
Folem ol loa blong kantri we i stap.
-
Raet blong fri long takis i mas stap semmak long ol ples we i nidim.
-
Tekem ol stret step blong stap longwe, katemdaon, mo manejem ol sefti risk, we i tekem tu ol Jos gaedlaen mo polisi blong protektem ol pikinini mo yut (luk long 12.5.1 mo 20.7.1)
-
Wok folem ol narafala kondisen mo limit we stek presiden o bisop i givim.
35.5.2
Yus blong Ol Jos Mitinghaos
Ol miting, program, mo aktiviti blong Jos oli gat praeoriti ova long ol nara yus blong mitinghaos, sapos i gat wan raorao. Ol yus blong Jos i tekem tu:
-
Ol wosip seves mo ol narafala Sabat miting.
-
Ol lidasip miting.
-
Ol Rilif Sosaeti miting mo aktiviti.
-
Ol Prishud miting mo aktiviti.
-
Praemeri, Aronik Prishud, mo Ol Yang Woman miting mo aktiviti.
-
Seminari, institiut, yang singgel adalt, mo singgel adalt miting mo aktiviti.
-
Wok blong famli histri.
-
Ol misinari miting mo ivent.
-
Ol aktiviti blong stap rere from ol imejensi.
Ol wod mo stek oli save talem tu sam narafala program blong Jos we bae i blong gud blong ol memba mo komuniti. Olgeta ia, i gat:
Stek presiden i mas askem sam tingting long eria ofis blong mekem sua se oli stap folem loa blong kantri.
Blong kasem sam moa infomesen, luk long A Leader’s Guide to Sharing Church Resources.
Long sam ples we i gat wan bigfala namba blong ol Jos memba, moa long wan stek i save yusum wan mitinghaos. Long situesen olsem, ol stek presiden oli toktok tugeta mo mekem wan taemtebol blong yusum bilding. Oli save kontaktem Eria Seventi blong kasem daereksen olsem we i nidim.
I nidim apruvol blong daerekta blong ol temporol afea mo Eria Presidensi, bifo oli yusum wan mitinghaos blong stanemap wan ples blong kam tugeta blong ol yang singgel adalt taem oli askem sam moa tul we i no standet o sam moa risos. Blong kasem apruvol, stek presiden i kontaktem fasiliti maneja.
Evriwan we i yusum mitinghaos i mas tingbaot ol narawan. Oli mas mekem evri efot blong lukluk long ol nid blong ol narawan. Ol efot ia i tekem, blong stap mekem taemtebol blong yusum ol spes, kontrolem noes, mo stap yusum mitinghaos long stret taem we oli putum.
Blong gat moa infomesen abaot ol Jos aktiviti, luk long japta 20.
35.5.3
Olsem Wanem Ol Memba Oli Save Yusum Ol Mitinghaos—Blong Olgetawan mo Famli
Ol memba oli save askem blong yusum wan mitinghaos long stek blong olgeta blong mekem ol aktiviti blong olgetawan o famli. Blong kasem apruvol, oli kontaktem wan memba blong bisoprik blong wan wod we oli stap mit long mitinghaos ia (o wan we i lukaotem mitinghaos ia). Oli mas folem olgeta kondisen ia:
-
Oli mas folem ol besik prinsipol mo ol samting we i nidim blong mekem insaed long 35.5.1.
-
Wan responsibol adalt memba blong wan wod we i stap mit long mitinghaos ia, i mas stap blong mekem sua oli folem ol polisi taem oli yusum bilding.
-
Yus blong bilding i no mas fasfas wetem ol aktiviti blong Jos we oli putum taem blong hem finis.
-
Olgeta we oli yusum bilding oli responsibol fulwan long eni damej long fasiliti o eni kil o nogud samting we i hapen we i go wetem yus blong olgeta long bilding ia.
-
Olgeta we oli yusum bilding oli mas klinap mo putumbak fasiliti olsem we i bin stap, bifo we oli yusum.
-
Olgeta we oli yusum bilding oli mas folem ol daereksen mo rikwes we i kam long ol lokol lida, we i tekem tu ol rikwes we i kam long ol lida blong wan we i lukluk long olgeta taem oli yusum bilding.
-
Ol Jos lida oli save askem eni man o woman o grup blong stop blong yusum propeti ia sapos oli no stap folem ol gaedlaen.
-
Blong ol aktiviti we oli apruvum, ol wod mo stek lida oli mas mekem arenjmen blong save yusum mitinghaos. Ol memba nomo blong wod o stek we oli givim wok ia long olgeta, oli gat ol ki blong bilding.
Luk long 38.3.4 blong yus blong ol mitinghaos blong mekem ol mared mo kaekae blong mared.
Luk long 29.5 blong yus blong ol mitinghaos blong ol fenerol o ol narafala seves blong olgeta we oli ded.
35.5.4
Ol Oganaesesen We Oli No Stap Mekem Mane o Ol Narafala Grup O Wanwan Man, Oli Save Yusum Ol Jos Mitinghaos
Eria lidasip i save givim raet long ol oganaesesen we oli no stap mekem mane, komuniti mo ol nara grup (olsem ol spot tim), o wanwan man o woman we oli no tokbaot insaed long 35.5.3 blong yusum ol Jos mitinghaos blong mekem ol gudfala aktiviti o seves. Ol kondisen we oli putum long 35.5.3 oli aplae.
Blong kasem apruvol blong eria lidasip blong ol yus olsem, stek presiden i kontaktem fasiliti maneja.
Sapos eria lidasip i apruvum wan oganaesesen we i no stap mekem mane blong yusum bilding, bae i nidim wan Temporeri Yus Agrimen. Agrimen ia i gat i stap long eria ofis. I nidim wan setifiket blong Insurens we i kam long oganaesesen ia we i no stap mekem mane, be i save gat wan eksepsen sapos daerekta blong temporol afea i konfemem se Church Risk Management Division i apruvum.
Ol grup insaed long komuniti we oli no kwalifae olsem olgeta we oli no mekem mane, semmak long wanwan man o woman we oli no tokbaot insaed long 35.5.3, oli mas mekem eni samting we i nidim tru long toktok wetem fasiliti maneja.
35.5.5
Ol Imejensi
Oli save yusum ol Jos mitinghaos blong ol impoten komuniti seves long taem blong wan imejensi. Eksampol, wan stek presiden i save letem blong ol disasta-rilif ejensi mo ol narawan we oli mekem semmak wok, blong yusum ol mitinghaos long stek blong hem (luk long 35.5.4). Long ol situesen olsem, hem i wok wetem fasiliti maneja mo welfea mo indipenden laef maneja, mo tu ol nara ripresentativ blong Jos olsem we i nidim (luk long 22.9.1.3).
Sapos bae oli yusum ol mitinghaos blong imejensi, oli leftemap tingting blong ol stek lida blong wok wetem ol komuniti lida.
35.5.6
Ol Yus blong Mitinghaos We Oli No Akseptem
35.5.6.1
Ol Yus blong Mekem Mane
Oli no save yusum propeti blong Jos blong mekem ol tingting blong mekem mane. Eksampol: oli no save yusum ol mitinghaos blong sapotem eni kaen bisnis. Oli no save yusum tu, eni risos we i stap long mitinghaos olsem ol notis bod, blong sapotem wan bisnis (luk long 38.8.5). Ol yus olsem i no go wetem ol stamba tingting blong ol propeti blong Jos. Hem i save mekem problem tu wetem ol lokol o nasonal loa we i letem blong propeti blong Jos i no pem takis (luk long 34.8.1).
Ol eksampol ia blong ol yus blong mekem mane, oli no apruvum:
-
Stap promotem o sponsarem ol bisnis o invesmen
-
Stap pem, salem, o promotem ol samting, ol seves, ol pablikesen, o wok we oli krietem.
-
Stap holem ol fanresing aktiviti we oli no givim raet from (luk long 20.6.5)
-
Blong hostem o lukaotem ol kwaea, spika, instrakta, edukesen grup, o ol nara pipol we oli stap givim ol seves mo oli kasem wan mane blong ol semina, lesen (be i no tekem ol praevet piano o ogan instrakta; luk long 19.7.2), klas, o ol nara aktiviti
-
Stap rentem spes blong ol mared o ol ivent we i go wetem mared
35.5.6.2
Ol Yus blong Hom Skul mo Lukaotem Pikinini
Jos i sapotem strong edukesen mo famli. Be, oli no yusum ol mitinghaos blong hom skul o olsem wan fasiliti blong lukaotem pikinini.
Taem oli folem polisi ia, bae i mekem se i gat moa sefti, mo bae i mekem se bae Jos i no save pem sam takis.
35.5.6.3
Ol Stamba Tingting blong Politik
Jos i no gat saed long politik. Oli no save yusum propeti blong Jos blong mekem ol stamba tingting blong politik mo advokasi. Ol aktiviti we oli no givim raet from i tekem tu ol miting blong politik, mo blong ol politik kampen mo ol advokasi grup. Oli no save mekem ol anaonsmen blong politik long propeti blong Jos, olsem ol notis bod.
Be, oli save letem olsem wan eksepsen blong oli yusum ol propeti blong Jos blong mekem rejistresen blong vot o blong go vot (luk long 38.8.30). Stek presiden i save kasem wan eksepsen olsem tru long fasiliti maneja (luk long 35.5.4).
35.5.6.4
Ol Narafala Yus
Plante taem, oli no stap apruvum Jos mitinghaos propeti blong ol yus ia:
-
Givim bilding olsem wan selta blong slip delaet (be nomo long ol taem blong imejensi; luk long 35.5.5)
-
Stap Kamp
-
Stap rentem o lisim ol bilding mo propeti blong Jos
Ol gaedlaen ia oli aplae long mitinghaos hemwan semmak long evri propeti mo fasiliti raon long mitinghaos we i blong Jos. Sapos stek presiden i filim se i nidim blong mekem wan eksepsen, hem i save rikwestem tru long fasiliti maneja. Eksampol, wan eksepsen hem i blong letem oli yusum mitinghaos blong helpem ol memba we oli travel longfala ples from oli stap go blong go long tempol.
35.5.7
Ol Narafala Polisi mo Standet We I Aplae long Evriwan We I Yusum Ol Mitinghaos
35.5.7.1
Ol Japel
ol japel oli ol rum we ol memba oli wosip mo tekem sakramen long hem. Ol miting mo aktiviti we oli mekem insaed long japel, oli mas gat pis mo fasin blong stap wan wetem ol stamba tingting ia. Blong save abaot ol gaedlaen blong mekem ol kalja art ivent, konset, mo nara presentesen insaed long japel, luk long 19.3. 5.
35.5.7.2
Ol Masket mo Tul blong Faet
Ol masket mo ol narafala tul blong faet oli no letem long propeti blong Jos. Hemia i tekem tu ol tul blong faet we oli haed. Hemia i no aplae long ol loa ofisa.
35.5.7.3
Ol Kijin mo Eria blong Kasem Kaekae
Oli save yusum ol kijin mo ol eria blong kasem kaekae, blong kasem kaekae mo laet kaekae mo blong kipim kaekae i wom o kolkol.
Long sam ples, oli letem blong rere long kaekae insaed long kijin. Be, long Yunaeted Stet, Kanada, mo sam narafala kantri, i gat ol kontrol long fasin blong handelem kaekae mo plante taem i nidim wan setifiket, ol tul, o blong gavman i kam lukluk. Long ol eria ia, oli mas rere long kaekae long wan nara ples mo afta jes karem i go long mitinghaos. Fasin blong soem olsem wanem blong rere long kaekae i save kam wan eksepsen mo oli letem iven taem ol kontrol ia oli stap. Ol fasiliti maneja oli save givim gaed blong wanwan eria.
Blong gat moa infomesen, luk long safety.ChurchofJesusChrist.org.
35.5.7.4
Ples blong Putum Trak
Fasin blong yusum ples blong putum trak long Jos, i mas folem ol gaedlaen long japta ia. Antap long hemia, oli no save yusum ples blong putum trak, olsem wan sot taem ples blong putum trak long hem o ol yus we i semmak, sapos oli no gat raet blong eria daerekta blong ol temporol afea. Ol lida oli save kontaktem bilding maneja sapos oli gat ol kwestin. Ol trak blong ol man mo ol narafala tul blong wanwan man, bae oli no save storem i stap long propeti blong Jos.
Blong gat moa infomesen abaot ples blong putum trak mo blong save yusum ples ia, luk long “Ol Ples blong Pak long MitinghaosGaed blong Ol Mitinghaos Bilding
35.5.7.5
Ples blong Storem Samting
Oli save storem ol tul blong mentenem bilding nomo wetem ol saplae we oli apruvum long ol bilding. Oli save storem ol welfea aetem long ol mitinghaos long taem blong imejensi ( luk long 35.5.5). Ol lida oli save kontaktem bilding maneja sapos oli gat ol kwestin.
35.5.7.6
Sam Moa Infomesen
I gat moa infomesen abaot olsem wanem blong yusum Jos propeti i stap long “Ol Nara Infomesen long Saed blong Ol Mitinghaos Bilding” (Gaed blong Ol Mitinghaos Bilding). Risos ia i gat tu ol infomesen mo instraksen abaot ol artwok, dekoresen, tul, flag, ol fi, saen, olsem wanem oli yusum propeti blong Jos we i emti, mo ol narafala topik.
Blong ol polisi abaot ol kamp blong ol aktiviti o propeti, luk long “Kamp blong Ol Aktiviti” (Gaed blong Ol Mitinghaos Bilding).