“36. Paghimo, Pag-usab, ug Paghatag og Ngalan sa Bag-ong mga Yunit,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2024).
“36. Paghimo, Pag-usab, ug Paghatag og Ngalan sa Bag-ong mga Yunit,” Kinatibuk-ang Tamdanan nga Basahon.
36.
Paghimo, Pag-usab, ug Paghatag og Ngalan sa Bag-ong mga Yunit
36.0
Pasiuna
Ang mga miyembro sa Simbahan nahisakop sa mga kongregasyon base kon asa sila nagpuyo (tan-awa sa Mosiah 25:17–24). Kini nga mga kongregasyon gikinahanglan alang sa pag-organisar ug paghimo sa buhat sa Simbahan ubos sa tukma nga awtoridad sa pagkapari. Ang mga lider sa mga kongregasyon gihatagan og mga yawe sa pagkapari aron tugotan sa pagpahigayon sa mga ordinansa sa pagkapari. Ang mga kongregasyon motabang usab sa mga miyembro sa paglig-on sa hugot nga pagtuo sa usag usa samtang sila magsimba sa Dios, magkat-on sa mga pagtulon-an ni Jesukristo, ug magserbisyo.
Ang mga kongregasyon sa Simbahan (gitawag usab nga mga yunit) naglakip sa mga stake, mga district, mga ward, ug mga branch. Kini gihimo, giusab, o dili padayunon kon gikinahanglan lamang.
Ang mga lider maningkamot nga madugangan ang espirituwal nga kalig-on sa mga miyembro sa dili pa mosugyot nga maghimo og bag-ong yunit o mousab sa utlanan sa yunit. Ang bag-ong mga yunit kinahanglang himoon lamang kon ang kasamtangang mga yunit may igo na nga kalig-on.
Alang sa suporta diha sa Estados Unidos ug Canada, tawaga ang 1-801-240-1007. Sa gawas sa Estados Unidos ug Canada, tawaga ang buhatan sa area.
36.1
Paghimo o Pag-usab og mga Stake ug mga District
Ang mga stake himoon gikan sa mga district o pinaagi sa pagbahin sa kasamtangang mga stake. Ang presidente sa stake o misyon mosugyot nga maghimo og bag-o nga stake. Siya moseguro pag-una nga kini nakatuman sa kinaminosan [minimum] nga mga kinahanglanon nga gipakita sa mosunod nga talaan.
Kinaminosan nga mga Kinahanglanon sa Paghimo og usa ka Stake
Ang mga district himoon gikan sa mga branch sa usa ka misyon o sa kasamtangan nga stake. Walay kinaminosan nga gidaghanon sa mga miyembro o mga branch ang gikinahanglan aron makahimo og district.
Ang usa ka district kinahanglang adunay lebel sa kalig-on alang sa usa ka stake nga dili mominos unom ka bulan sa dili pa ang presidente sa misyon makasugyot sa paghimo niini nga usa ka stake.
Ang mga utlanan sa usa ka stake o district mosunod sa mga utlanan sa mga yunit nga anaa sulod niini. Sa pagsugyot og kausaban sa mga utlanan sa stake o district o pagbalhin sa usa ka yunit ngadto sa silingang stake o district, ang mga presidente sa stake o misyon moapil sa plano ug magsabot sa rekomendasyon.
Ang presidente sa stake o misyon magsugod og bag-o nga sugyot diha sa “Boundary and Leadership Proposals.” Kon siya dili makagamit sa sistema sa online, mahimo niyang i-download ang mga porma nga papel pinaagi sa pag-klik sa link.
Ang pagtugot sa gisugyot nga mga kausaban sa stake magagikan sa Unang Kapangulohan ug sa Korum sa Napulog Duha ka Apostoles. Kasagaran, ang usa ka desisyon mahimong mokabat ngadto sa walo ka semana human sa pagkadawat sa nakompleto nga sugyot.
36.2
Paghimo o Pag-usab sa mga Ward ug mga Branch diha sa mga Stake
Ang mga ward ug mga branch diha sa mga stake himoon gikan sa kasamtangan nga mga yunit. Ang presidente sa stake mahimong mosugyot sa paghimo og bag-ong ward o branch diha sa stake. Una, siya moseguro nga ang bag-ong yunit nakatuman sa kinaminosan nga mga kinahanglanon nga gipakita sa mosunod nga mga talaan.
Kinaminosan [Minimum] nga Kinahanglanon sa Paghimo og Ward o Branch diha sa Stake
Ang presidente sa stake mahimong mosugyot nga usbon ang usa ka branch ngadto sa usa ka ward kon ang yunit nakatuman sa kinaminosan nga mga kinahanglanon ug siya nakakita og kandidato nga moserbisyo isip bishop.
Ang presidente sa stake mahimong mosugyot nga usbon o dili na ipadayon ang mga ward o mga branch kon adunay klaro nga panginahanglan.
Ang presidente sa stake mosugod og bag-ong sugyot diha sa “Boundary and Leadership Proposals.” Kon siya dili makagamit sa sistema sa online, mahimo niyang i-download ang mga porma nga papel pinaagi sa pag-klik sa link.
Ang pagtugot sa gisugyot nga mga kausaban sa ward o branch magagikan sa Unang Kapangulohan. Kasagaran, ang usa ka desisyon mahimong mokabat ngadto sa unom ka semana human sa pagkadawat sa nakompleto nga sugyot.
36.3
Paghimo o Pag-usab sa mga Branch diha sa mga Misyon
Ang presidente sa misyon mahimong mosugyot sa paghimo og bag-ong mga branch diha sa misyon. Walay kinaminosan nga gidaghanon sa mga miyembro nga gikinahanglan aron sa paghimo og usa ka branch diha sa usa ka misyon. Hinoon, ang bag-ong mga branch sa kasagaran kinahanglang adunay dili mominos upat ka mga naghupot sa pagkapari. Dili mominos ang usa kinahanglang aktibo, naghupot sa Melchizedek nga Pagkapari nga hingpit nga nagbayad sa ikapulo.
Ang presidente sa misyon mosugod og bag-ong sugyot diha sa “Boundary and Leadership Proposals.” Kon siya dili makagamit sa sistema sa online, mahimo niyang i-download ang mga porma nga papel pinaagi sa pag-klik sa link.
Ang Kapangulohan sa Area mahimong mohatag sa kataposang pagtugot o pagsupak sa sugyot sa presidente sa misyon sa:
-
Paghimo ug paghatag og ngalan sa bag-ong branch diha sa misyon.
-
Dili pagpadayon sa branch diha sa misyon.
-
Pag-usab sa mga utlanan sa branch diha sa misyon kon ang kausaban dili makaapekto sa usa ka stake, usa ka district, o laing misyon.
Ang Kapangulohan sa Area kinahanglang mosumiter sa naaprobahan nga sugyot ngadto sa punoang buhatan sa Simbahan alang sa pagproseso sa dili pa mahimo o mausab ang usa ka branch diha sa mga sistema sa Simbahan.
Ang Kapangulohan sa Area mahimong moduso apan dili mohatag sa kataposan nga pagtugot sa sugyot sa presidente sa misyon sa:
-
Pagbalhin sa usa ka branch ngadto sa laing stake, district, o misyon.
-
Pag-usab sa ngalan sa usa ka kasamtangan nga branch diha sa misyon.
-
Pag-usab sa mga utlanan sa branch diha sa usa ka misyon kon ang kausaban makaapekto sa usa ka stake, sa usa ka district, o laing misyon.
-
Paghimo o pag-usab og branch sa misyon alang sa mga young single adult o sa mga single adult; mga miyembro nga nagsulti og pinulongan nga lahi sa pinulongan sa ilang yunit; mga miyembro nga naggamit og sinyas nga pinulongan; mga miyembro kinsa anaa sa mga sentro sa pag-atiman, mga programa sa pagtambal, o mga prisohan; o mga miyembro nga anaa sa militar.
Niini nga mga sitwasyon, ang Kapangulohan sa Area morebyo sa sugyot, ug kon sila moduso niini, sila mosumiter niini alang sa pagtugot. Ang pagtugot sa gisugyot nga mga kausaban sa branch magagikan sa Unang Kapangulohan. Kasagaran, ang usa ka desisyon mahimong mokabat ngadto sa unom ka semana human sa pagkadawat sa nakompleto nga sugyot.
36.4
Paghatag og Ngalan sa mga Yunit sa Simbahan
Ang ngalan sa yunit kinahanglan nga makatabang sa pag-ila niadtong kinsa nagpuyo niana nga dapit. Sa kasagaran, ang mga ngalan sa kasamtangan nga mga yunit kinahanglan nga dili usbon.
Kon ang ngalan sa yunit kinahanglan nga usbon tungod sa kausaban sa utlanan, ang presidente sa misyon o stake mosugod og bag-ong sugyot pinaagi sa paggamit sa sistema sa Boundary and Leadership Proposals. Kon siya dili makagamit sa sistema sa online, mahimo niyang i-download ang mga porma nga papel pinaagi sa pag-klik sa link.
Ang Unang Kapangulohan lamang ang moaprobar niini nga mga sugyot.
Ang mga Kapangulohan sa Area mahimong motugot sa mga sugyot sa paghimo ug paghatag og ngalan sa bag-ong mga branch diha sa mga misyon (tan-awa sa 36.3).
36.4.1
Paghatag og Ngalan sa mga Stake ug mga District
Ang unang pulong sa ngalan sa stake o sa district mao ang mosunod:
-
Ang siyudad diin ang punoang buhatan sa stake o district nahimutang
-
Laing siyudad sa stake o district nga nailhan pag-ayo sa mga miyembro
-
Ang hiyograpikanhong timailhan sulod sa mga utlanan sa stake o district
Sa Estados Unidos ug sa Canada, ang ikaduhang pulong sa kasagaran mao ang estado o probinsya kon asa mahimutang ang stake o district. Sa ubang mga nasod ang ikaduhang pulong mao ang ngalan sa nasod.
Kon labaw sa usa ka stake o district ang anaa sa samang siyudad, ang ikatulong pulong mao ang ilhanan sa lugar nga anaa sa mga utlanan sa yunit. Ang pipila ka madawat nga ilhanan sa lugar alang sa mga ngalan sa stake o district gipakita sa ubos:
-
Mga direksyon sa kompas (amihanan, habagatan, sidlakan, o kasadpan)
-
Komunidad o kasilinganan
-
Hiyograpikanhong timailhan
Ang pipila ka ilhanan sa lugar nga wala itugot alang sa mga ngalan alang sa stake ug district gipakita sa ubos:
-
Ubang mga termino sa direksyon (pananglitan, habagatang kasadpan)
-
Mga ngalan sa mga tawo
Kon ang ngalan sa usa ka siyudad sama sa estado, probinsya, o nasod, kini dili balikon diha sa ngalan. Pananglitan:
-
Idaho Falls Taylor Mountain Stake, dili Idaho Falls Idaho Taylor Mountain Stake
-
México City Azteca Stake, dili México City México Azteca Stake
36.4.2
Paghatag og Ngalan sa mga Ward ug mga Branch
Ang ward o branch hatagan og ngalan subay sa ilhanan sa lugar nga anaa sa mga utlanan niini. Ang pipila ka gitugotan nga ilhanan sa lugar alang sa mga ngalan sa ward ug branch gipakita sa ubos:
-
Siyudad
-
Komunidad o kasilinganan
-
Dalan
-
Parke
-
Eskwelahan
-
Hiyograpikanhong timailhan
Ang pipila ka ilhanan sa lugar nga wala itugot alang sa mga ngalan sa ward ug branch gipakita sa ubos:
-
Mga direksyon sa kompas (pananglitan, silangan o amihanang kasadpan)
-
Mga ngalan sa mga tawo
-
Mga ngalan nga gibase lamang sa makita [view] (pananglitan, Temple View, Mountain View, o River View)
-
Pagtipon sa duha ka ngalan aron maghimo og bag-ong ngalan
Ang ngalan sa usa lamang ka ilhanan sa lugar ang gamiton nga ngalan sa ward o branch. Kon adunay sobra sa usa ka ward o branch nga sama og ngalan, usa ka numero ang idugang isip kabahin sa ngalan, sama sa Preston 1st Ward ug Preston 2nd Ward.
Ang ngalan sa ward o sa branch kinahanglang gamitan sa pinulongan sa dapit. Kon ang pinulongan wala mogamit sa alpabeto nga Romano, ang hubad gamit ang mga letra nga Romano kinahanglang ilakip sa aplikasyon.
36.5
Pag-implemintar sa Gisugyot nga mga Kausaban
36.5.1
Mga Kausaban sa Stake ug District
Ang giaprobahan nga sulat alang sa paghimo o sa dili na pagpadayon sa usa ka stake o district sa kasagaran nagpakita sa petsa sa mga kausaban nga pagahimoon. Kini nga petsa kinahanglang dili ipahibalo hangtod nga ang gisangonan nga Kinatibuk-ang Awtoridad mohisgot sa mga detalye uban sa presidente sa stake o misyon. Ang aktuwal nga mga kausaban dili ipahibalo hangtod sa komperensiya sa stake o district.
Ang mga presidente sa stake o misyon mopahibalo sa punoang buhatan sa Simbahan o sa ilang buhatan sa area human ang mga kausaban nahimo.
36.5.2
Mga Kausaban sa Ward ug Branch
Human nga ang presidente sa stake o misyon makadawat sa pagtugot alang sa mga kausaban sa ward o branch, siya sa kasagaran adunay 90 ka adlaw sa pagpresentar sa mga kausaban aron paluyohan sa mga miyembro. Kon kinahanglan niyang ilangan nga mas dugay pa kay sa 90 ka adlaw, siya mangayo og pagtugot gikan sa Buhatan sa Unang Kapangulohan.
Ang mga presidente sa stake o misyon moimplementar sa sugyot diha sa LCR sa higayon nga ang mga kausaban nahimo na. Alang sa tabang diha sa Estados Unidos ug Canada, motawag sa 801-240-6243 o mo-email sa oiservices@ChurchofJesusChrist.org. Alang sa tabang sa gawas sa Estados Unidos ug Canada, kontaka ang buhatan sa area. Ang mga mapa ug mga yunit dili i-update hangtod nga marekord kini sa punoang buhatan sa Simbahan.
36.6
Batakang Programa sa Yunit
Ang Simbahan mihimo og Batakang Programa sa Yunit nga gamiton sa gagmay nga mga branch o gagmay nga gitugotan nga mga panagpundok sa mga miyembro, nailhan nga mga grupo (tan-awa sa 37.7 alang sa dugang nga impormasyon bahin sa mga grupo). Ang Kapangulohan sa Area mahimong motugot sa paggamit sa Batakang Programa sa Yunit sa gagmay nga mga grupo o mga branch diin ang bisan unsa sa mosunod nga kondisyon magamit:
-
Ang Simbahan bag-o pang nagsugod.
-
Ang mga miyembro sa hiyograpiyang paagi nagkatag.
-
Gamay ra ang mga miyembro ug nagsugod pa lang ang paglambo sa pagpangulo.
-
Ang mga miyembro adunay espesyal nga mga panginahanglan sa pinulongan.
-
Ang mga miyembro anaa sa militar (tan-awa sa 38.9.4 alang sa mga rason nga kinahanglang maghimo og usa ka grupo alang sa mga miyembro nga anaa sa serbisyo).
-
Ang mga miyembro anaa sa mga sentro sa pag-atiman, mga programa sa pagtambal, o mga prisohan.
Ang Kapangulohan sa Area ug ubang mga lider naghatag og gibug-aton nga ang mga yunit nga naggamit sa Batakang Programa sa Yunit [Basic Unit Program] kinahanglang dili mopalapad sa mga organisasyon, mga miting, ug mga programa sa paspas kaayo nga paagi. Ang pagpangulo labing maugmad kon ang mga kapanguhaan sa Simbahan anaa sa tukmang pagbalanse sa mga kahimtang ug mga panginahanglan sa mga miyembro.
Ang mga lider mopakigbahin usab sa mosunod nga mga baroganan ngadto sa mga grupo ug mga branch gamit ang Batakang Programa sa Yunit [Basic Unit Program]:
-
Magtinguha og inspirasyon gikan sa Espiritu aron makahibalo kon unsay angay nga buhaton ug kon unsaon sa pagbuhat niini.
-
Motudlo sa sukaranan nga doktrina ug mga baroganan sa ebanghelyo.
-
Motabang sa mga miyembro sa (1) pagsabot ug pagdawat sa mahinungdanon nga mga ordinansa sa pagkapari ug sa (2) paghimo ug pagtuman sa nag-uban nga mga pakigsaad.
Kini nga mga yunit makapahigayon og mga miting sa Simbahan diha sa panimalay, giabangan nga gambalay, o gipanag-iya sa Simbahan nga gambalay (tan-awa sa 35.3). Ang kapangulohan sa misyon, stake, o district makahatag og impormasyon bahin sa pagbaton ug pagmintinar og usa ka lugar sa panagtigom alang sa grupo o branch.
Kon ang grupo o branch diyotay ra og mga miyembro, magpahigayon lamang sila og usa ka panagtigom alang sa sakramento ug usa ka panahon sa panudlo sa ebanghelyo alang sa tanang miyembro. Alang sa panudlo sa ebanghelyo, ang mga miyembro mogamit sa mga kasulatan ug sa Dali, Sunod Kanako—Alang sa Panimalay ug sa Simbahan. Kon ang mga kasulatan wala pa mahubad ngadto sa pinulongan nga gigamit sa mga miyembro, ang mga miyembro mogamit sa Gospel Fundamentals nga manwal alang sa panudlo sa ebanghelyo. Samtang ang Simbahan nagtubo, dugang nga mga hubad sa mga kasulatan, mga himno ug mga awit, ug mga magasin sa Simbahan ang mahimong maanaa.
Samtang ang yunit nagtubo, ang mga lider sa Simbahan kinahanglang mag-organisar og korum sa mga elder ug Relief Society (tan-awa sa 8.3.3 ug 9.3.2). Samtang ang gidaghanon sa mga miyembro ug sa potensiyal nga mga lider nagtubo, ang presidente sa branch mahimong mag-organisar og mga korum sa Aaronic nga Pagkapari ug mga organisasyon sa Young Women, Primary, ug Sunday School (tan-awa sa 10.3, 11.3.2, 12.3.2, ug 13.2.2).