36.

Faavaeina, Suia, ma le Faaigoaina o Iunite Fou

36.0

Faatomuaga

O tagata o le Ekalesia e auai i faapotopotoga e fua i nofoaga o latou nonofo ai (tagai i le Mosaea 25:17–24). O nei faapotopotoga e tatau ai mo le faatulagaina ma le faiga o le galuega a le Ekalesia i lalo o le pule tatau o le perisitua. O taitai o faapotopotoga e tuuina atu i ai ki o le perisitua e faataga ai le faatinoga o sauniga o le perisitua. O faapotopotoga e fesoasoani foi i tagata o le ekalesia e faamalolosia le faatuatua o le tasi ma le isi a o latou tapuai atu i le Atua, a’oa’o i a’oa’oga a Iesu Keriso ma auauna atu.

O faapotopotoga a le Ekalesia (e ta’ua foi o iunite) e aofia ai siteki, itu, uarota, ma paranesi. E faavaeina, suia, pe le toe faaauauina pe a seiiloga e manaomia.

E galulue taitai e faateleina le malosi faaleagaga o tagata a o le’i fautuaina atu e faavae se iunite fou pe suia ia tuaoi o se iunite. E faato’a tatau ona faavae ia iunite fou pe afai ua lava le malolosi o iunite o i ai nei.

Mo le lagolago i le Iunaite Setete ma Kanata, valaau le 1-801-240-1007. I fafo atu o le Iunaite Setete ma Kanata, valaau le ofisa o le eria.

36.1

Faavaeina po o le Suia o Siteki ma Itu

O siteki e faavaeina mai i itu po o le vaevaeina o siteki o loo i ai. E mafai e se peresitene o le siteki po o le misiona ona fautua atu e faavaeina se siteki fou. Na te muai faamautinoa o le a ausia tulaga manaomia aupito itiiti o loo faaalia i le siata lea.

Tulaga Manaomia Aupito Itiiti e Faavae ai se Siteki

Numera o tagata o le au paia (toaaga ma ē le toaaga mai)	2,000
Numera o ē toaaga, i latou e umia le Perisitua Mekisateko e totogi atoa le sefuluai ma e gafataulimaina le auauna atu i tofiga faaleautaitai	150
Numera o tagata matutua o loo auai	500
Numera o talavou o loo auai (fautuaina atu, e le manaomia)	100
Numera o uarota	5

• Mo nisi faamatalaga, tagai i le ”Boundary and Leadership Proposals.”

O itu e faavae mai paranesi i totonu o se misiona po o se siteki o loo i ai. E leai se numera aupito itiiti o tagata o le au paia po o paranesi e moomia ina ia faavaeina ai se itu.

E tatau i se itu ona i ai le maualuga o le malosiaga e moomia mo se siteki ia le itiiti ifo ma le ono masina a o lei mafai ona fautua atu e se peresitene o le misiona e fai ma se siteki.

O tuaoi o se siteki po o se itu e mulimuli i tuaoi o iunite o loo i ai i totonu. Ina ia fautua atu se suiga i tuaoi o se siteki po o se itu pe siitia atu se iunite i se siteki po o se itu e tuaoi, o peresitene o siteki po o misiona o loo aafia, latou te fuafuaina ma faamaopoopoina le talosaga.

E amata e se peresitene o le siteki po o le misiona se talosaga fou i le “Boundary and Leadership Proposals.” Afai na te le mafai ona faaaoga le polokalama i le initoneti, e mafai ona ia sii maia fomu pepa i le kilikiina o le sootaga.

O le faamaoniga o ni suiga ua fautuaina mai mo se siteki e sau mai le Au Peresitene Sili ma le Korama a le Toasefululua. E masani lava, e oo atu i le valu vaiaso e alu i le faia o se faaiuga pe a uma ona maua se talosaga ua maea.

36.2

Faavaeina po o le Suia o Uarota ma Paranesi i Siteki

O uarota ma paranesi i siteki e faavaeina mai iunite o loo i ai. E mafai e se peresitene o le siteki ona fautua atu le faavaeina o se uarota po o se paranesi fou i le siteki. Na te muai faamautinoa o le a ausia e le iunite fou tulaga manaomia aupito itiiti o loo faaalia i le siata lenei.

O Tulaga Manaomia Aupito Itiiti e Faavae ai se Uarota po o se Paranesi i se Siteki

	Uarota	Paranesi
Numera o tagata o le au paia (toaaga ma ē le toaaga mai)	Uarota 250	Paranesi 20
Numera o ē umia le Perisitua Mekisateko e toaaga, totogi atoa le sefuluai e gafatia ona galulue i tulaga faaletaitaiga	Uarota 20	Paranesi 4
Numera o tagata matutua o loo auai	Uarota 100	Paranesi E leai se tapulaa o le toalaiti
Numera o talavou o loo auai (fautuaina atu, e le manaomia)	Uarota 20	Paranesi E leai se tapulaa o le toalaiti

• Mo nisi faamatalaga, tagai i le ”Boundary and Leadership Proposals.”

E mafai e se peresitene o le siteki ona fautua atu le suia o se paranesi e avea ma se uarota pe a ausia e le iunite ia tulaga manaomia aupito itiiti ma ua ia silafia se tasi e mafai ona avea ma epikopo.

E mafai e se peresitene o le siteki ona fautua atu le toefaatulagaina po o le le toe faaauauina o uarota ma paranesi pe a ua manino se manaoga.

E amata e se peresitene o le siteki se talosaga fou i le “Boundary and Leadership Proposals.” Afai e le mafai ona ia faaaogaina le polokalama i le initoneti, e mafai ona ia sii maia i lalo fomu pepa i le kilikiina o le sootaga.

O le faamaoniaina o suiga ua fautuaina mai mo le uarota po o le paranesi e sau mai le Au Peresitene Sili. E masani lava, e oo atu i le ono vaiaso e alu i le faiga o se faaiuga pe a uma ona maua se talosaga ua maea.

36.3

Faavaeina po o le Suia o Paranesi i Misiona

E mafai e se peresitene o le misiona ona fautua atu le faavaeina o ni paranesi fou i se misiona. E leai se numera faatulagaina aupito itiiti o tagata e moomia ina ia faavaeina ai se paranesi i se misiona. Peitai, o le mea e masani ai, o nei paranesi fou e tatau ona le itiiti ifo i le to’a 4 i latou e umia le perisitua. E le itiiti ifo ma le to’atasi e tatau ona umia le Perisitua Mekisateko e toaga ma totogi atoa le sefuluai.

E amata e se peresitene o le misiona se talosaga fou i le “Boundary and Leadership Proposals.” Afai e le mafai ona ia faaaogaina le polokalama i le initoneti, e mafai ona ia sii maia i lalo fomu pepa i le kilikiina o le sooga.

E mafai e le Au Peresitene o le Eria ona tuu atu le faamaoniga mulimuli po o le teena o se talosaga a se peresitene o le misiona e:

• Faavae ai ma faaigoa se paranesi fou i se misiona.

• Le toefaaauauina ai se paranesi i se misiona.

• Suia tuaoi o le paranesi i se misiona pe afai e le aafia i le suiga se siteki, se itu, po o se isi misiona.

E tatau i le Au Peresitene o le Eria ona auina atu le talosaga ua faamaoniaina i le laumua o le Ekalesia mo le faagasologa a o le’i mafai ona faavaeina pe suia le paranesi i polokalama a le Ekalesia.

E mafai e le Au Peresitene o le Eria ona ioeina ae le tuuina atua le faamaoniga mulimuli o le talosaga a se peresitene o le misiona e:

• Sitiia atu se paranesi i se isi siteki, itu, po o se misiona.

• Suia le igoa o se paranesi o i ai i se misiona.

• Suia tuaoi o le paranesi i se misiona pe afai e aafia i le suiga se siteki, se itu, po o se isi misiona.

• Faavae pe suia se paranesi o se misiona mo talavou nofofua matutua po o tagata matutua nofofua; tagata o le ekalesia e tautatala i se isi gagana e ese mai le gagana masani a lo latou iunite; tagata o le au paia e faaaogaina le gagana fai faailoga; tagata o le au paia o loo tausia i nofoaga faapitoa, polokalama faapitoa e togafitia ai, po o falepuipui; po o tagata o le au paia o loo i le militeli.

I tulaga nei, e iloiloina e le Au Peresitene o le Eria le talosaga, ma afai latou te ioeina, latou te auina atua mo le faamaoniga. O le faamaoniga o suiga o paranesi ua fautuaina atu e sau mai le Au Peresitene Sili. E masani lava, e oo atu i le ono vaiaso e alu i le faiga o se faaiuga pe a uma ona maua se talosaga ua maea.

36.4

Faaigoaina o Iunite o le Ekalesia

O le igoa o se iunite e tatau ona fesoasoani e mataulia ai e i latou o ē nonofo i le eria. E masani lava, e le tatau ona suia igoa o iunite o loo i ai nei.

Afai e manaomia le suia o le igoa o se iunite ona o le toefaatulagaina o tuaoi, e amata e le peresitene o le siteki po o le misiona se talosaga fou i le faaaogaina o le polokalama i le initoneti i le Boundary and Leadership Proposals. Afai e le mafai ona ia faaaogaina le polokalama i le initoneti, e mafai ona ia sii maia i lalo fomu pepa i le kilikiina o le sootaga.

E na’o le Au Peresitene Sili e mafai ona faamaoniaina nei talosaga.

E mafai e Au Peresitene o Eria ona faamaoniaina ni talosaga e faavae ma faaigoa ni paranesi fou i misiona (tagai i le 36.3).

36.4.1

Faaigoaina o Siteki ma Itu

O le upu muamua i le igoa o le siteki po o le itu o se tasi o mea nei:

• O le aai o loo tu ai le laumua o le siteki po o le itu

• Se isi aai i le siteki po o le itu e lauiloa i tagata o le au paia

• O se vaega taua o le faataatiaga faafaafanua i totonu o tuaoi o le siteki po o le itu

I totonu o le Iunaite Setete ma Kanata, o le upu lona lua o le setete po o le itumalo o loo tu ai le siteki po o le itu. I isi atunuu, o le upu lona lua o le igoa o le atunuu.

Pe a sili atu i le tasi le siteki po o le itu e i ai i le aai e tasi, o le upu lona tolu o se uiga e iloagofie ai i totonu o tuaoi o le iunite. O loo faaali atu i lalo nisi uiga e iloagofie ai e faatagaina mo igoa o siteki ma itu:

• Faasinoala faatapasā (matu, saute, sasa’e, po o sisifo)

• Nuu po o le pitonuu

• Vaega taua o le faataatiaga faafaafanua

O loo faaali atu i lalo nisi uiga e iloagofie ai e le faatagaina mo igoa o siteki ma itu:

• O isi faaupuga faasinoala (mo se faataitaiga, sautesisifo)

• Igoa o tagata

Pe a tutusa le igoa o se aai ma le setete, itumalo, po o le atunuu, e le toe ta’ua faalua i le igoa. Mo se faataitaiga:

• Siteki a Idaho Falls Taylor Mountain, ae le o le Siteki a Idaho Falls Idaho Taylor Mountain

• Siteki a le Aai o Mékisikō Asateka, ae le o le Siteki a le Aai o Mékisikō Mékisikō Asateka

36.4.2

Faaigoaina o Uarota ma Paranesi

E faaigoa se uarota po o se paranesi i se uiga e iloagofie ai i totonu o ona tuaoi. O loo faaali atu i lalo nisi uiga e iloagofie ai e faatagaina mo igoa o uarota ma paranesi:

• Aai

• Nuu po o le pitonuu

• Magaala

• Paka

• A’oga

• Vaega taua o le faataatiaga faafaafanua

O loo faaali atu i lalo nisi uiga e iloagofie ai e le faatagaina mo igoa o uarota ma paranesi:

• Faasinoala faatapasā (mo se faataitaiga, sasa’e po o matusisifo)

• Igoa o tagata

• O igoa e faavae i le na’o se vaaiga (mo se faataitaiga, Vaaiga o le Malumalu Vaaiga o le Mauga po o le Vaaiga o le Vaitafe)

• Tuufaatasia o ni igoa se lua e fatu ai se igoa fou

O le igoa e na’o le tasi le uiga e iloagofie ai, e faaaoga i le igoa o le uarota po o le paranesi. Afai e sili atu ma le tasi le uarota po o le paranesi e tutusa igoa, e faaopoopo la i ai se numera e pei o le Uarota a Pesega 1 ma le Uarota a Pesega 2.

O le igoa o le uarota po o le paranesi e tatau ona i ai i le gagana a le eria. Afai e le faaaogaina e le gagana le alafapeta faa-Roma, e tatau ona aofia ai se faaliliuga o mataitusi faa-Roma i le talosaga.

36.5

Faatinoina o Suiga na Fautuaina

36.5.1

Suiga o Siteki ma Itu

O le tusi o le faamaoniga mo le faavaeina po o le le toefaaauauina o se siteki po o se itu, e masani lava ona faailoa atu ai le aso o le a faia ai le suiga. E le tatau ona faasilasila atu lea aso se’i vagana ua talanoaina e le Pulega Aoao ua tofiaina ia auiliiliga ma le peresitene o le siteki po o le misiona. E le faasilasilaina suiga tonu seia aulia le konafesi a le siteki po o le itu.

E faailoa atu e peresitene o siteki po o misiona i le laumua o le Ekalesia po o le latou ofisa o le eria pe a mae’a ona faia ia suiga.

36.5.2

Suiga o Uarota ma Paranesi

A uma ona maua e se peresitene o le siteki po o le misiona se faamaoniga mo suiga o se uarota po o se paranesi, e masani lava e 90 aso e na te tuuina atu ai suiga i tagata o le au paia mo le lagolagoina. Afai na te manaomia ona faatuatuai e sili atu ma le 90 aso, na te talosagaina se faatagaga mai le Ofisa o le Au Peresitene Sili.

E faatino e peresitene o siteki po o misiona le talosaga i le PTF i le taimi lava e uma ai ona faia suiga. Mo se fesoasoani i totonu o le Iunaite Setete ma Kanata, valaau i le 801-240-6243 pe imeli i le [e-mail]. Mo se fesoasoani i fafo atu o le Iunaite Setete ma Kanata, faafesootai le ofisa o le eria. E le faafouina faamatalaga o faafanua ma iunite sei vagana ua faamaumauina e le laumua o le Ekalesia.

36.6

Polokalama a Iunite Faavae

Ua atiina a’e e le Ekalesia le Polokalama a Iunite Faavae mo le faaaogaina e ni nai paranesi toalaiti po o faatasiga laiti o tagata auai o le au paia ua faatagaina, ua ta’ua o vaega (tagai i le 37.7 mo nisi faamatalaga e uiga i vaega). E mafai e se Au Peresitene o le Eria ona faataga le faaaogaina o le Polokalama a Iunite Faavae i ni vaega po o paranesi i soo se mea e faatatau i ai tulaga nei:

• O loo i ai le Ekalesia i ona tulaga tau amata.

• E salalau solo tagata o le au paia i le faataatiaga faafaafanua.

• O le aofai o tagata o le au paia e toalaiti, ma o loo faatoa tau amata foi ona ati a’e le tulaga faaletaitaiga.

• E i ai manaoga faapitoa o gagana o tagata o le ekalesia.

• O tagata o le ekalesia o loo i le militeli (tagai i le 38.9.4 mo mafuaaga e ono faatuina ai se vaega o tagata o le auaunaga).

• O loo i ai tagata o le ekalesia i nofoaga autu mo le tausiga, polokalama o togafitiga, po o falepuipui.

E faamamafa atu e Au Peresitene o Eria ma isi taitai e faapea, o iunite o loo faaaogaina le Polokalama Autu a le Iunite e le tatau ona vave faalauteleina faalapotopotoga, fonotaga, ma polokalama. E sili ona atiina ae le taitaiga pe a paleni lelei punaoa a le Ekalesia ma tulaga ma manaoga o tagata o le ekalesia.

E faasoa atu foi e taitai ia mataupu faavae nei i vaega ma paranesi e faaaoga ai le Polokalama Autu a le Iunite:

• Saili musumusuga mai le Agaga ia iloa le mea e fai ma le auala e fai ai.

• Aoao atu aoaoga faavae ma mataupu faavae autu o le talalelei.

• Fesoasoani i tagata o le ekalesia (1) ia malamalama ma maua sauniga taua o le perisitua ma (2) osia ma tausia feagaiga e fesootai ai.

O nei iunite e mafai ona faia sauniga a le Ekalesia i se fale, se fale totogi, po o se fale e ona ia e le Ekalesia (tagai i le 35.3). E mafai e le au peresitene o le misiona, siteki, po o le itu ona tuuina atu faamatalaga i le mauaina ma le faatumauina o se nofoaga e fono ai le vaega po o le paranesi.

Afai e toalaiti lava tagata o le vaega po o le paranesi, e na o se sauniga faamanatuga ma se periota e aoao ai le talalelei mo tagata uma o le au paia. Mo aoaoga o le talalelei, e faaaoga e tagata o le ekalesia tusitusiga paia ma le Sau, Mulimuli Mai ia te A’u—Mo Le Aiga ma le Ekalesia. Afai e lei faaliliuina tusitusiga paia i le gagana e tautatala ai tagata o le au paia, e faaaoga e tagata le tusi lesona o Gospel Fundamentals mo aoaoga o le talalelei. A o tuputupu ae le Ekalesia, o le a tele atu faaliliuga o tusitusiga paia, viiga ma pese, ma mekasini a le Ekalesia o le a maua.

A o tuputupu ae le iunite, e tatau i taitai o le Ekalesia ona faatulaga se korama a toeaina ma se Aualofa (tagai i le 8.3.3 ma le 9.3.2). A o faateleina le aofai o tagata o le ekalesia ma taitai faamoemoeina, e mafai e le peresitene o le paranesi ona faatulaga korama a le Perisitua Arona ma faalapotopotoga a Tamaitai Talavou, Peraimeri, ma le Aoga Sa (tagai i le 10.3, 11.3.2, 12.3.2, ma le 13.2.2).