“37. Siteki, Uarota, ma Paranesi Faapitoa,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai. (2024).
“37. Siteki, Uarota, ma Paranesi Faapitoa,” Tusitaulima Aoao.
37.
Siteki, Uarota, ma Paranesi Faapitoa
37.0
Faatomuaga
E mafai e se peresitene o le siteki ona fautua atu le faavaeina o ni siteki, uarota, ma paranesi faapitoa e tautuaina ai tagata o le ekalesia e pei ona otooto atu i le mataupu lenei. Mo faamatalaga e uiga i le faavaeina o iunite faapitoa i se misiona, tagai i le 36.3.
E amata e se peresitene o le siteki se talosaga fou i le Boundary and Leadership Proposals. Afai e le mafai ona ia faaaogaina le polokalama i le initoneti, e mafai ona ia si’i maia i lalo fomu pepa i le kilikiina o le sooga. E na o le Au Peresitene Sili e mafai ona faamaoniaina le talosaga.
Mo le lagolago i le Iunaite Setete ma Kanata, vili le 1-801-240-1007. I fafo atu o le Iunaite Setete ma Kanata, vili le ofisa o le eria.
37.1
Uarota ma Paranesi a Gagana
E mafai e se peresitene o le siteki ona fautua atu le faavaeina o se uarota po o se paranesi mo se gagana mo tagata o le siteki o ē:
-
Tautala i se isi gagana e ese mai le gagana a le latou iunite.
-
Faaaoga le gagana fai faailoga.
I nofoaga e le lava ai tagata o le ekalesia i se tasi o nei tulaga e faatu ai se paranesi e ese mai ai, e mafai e se peresitene o le siteki ona fautuaina le faatuina o se vaega (tagai i le 37.7).
E mafai foi e se peresitene o le siteki ona fautua atu le faavaeina o se uarota po o se paranesi a se gagana e aofia ai tagata o le au paia mai se siteki tuaoi se tasi pe sili atu foi. O peresitene o siteki e aafia ai, latou te fuafuaina ma faamaopoopoina le talosaga. O se tasi o siteki o loo auai ai, o le a nafa ma le uarota po o le paranesi.
E mafai e se peresitene o le misiona ona fautuaina le faatuina o se paranesi po o se vaega mo se gagana e taulima ai nei lava tulaga e tasi (tagai i le 36.3 ma le 37.7).
O Tulaga Manaomia Aupito Itiiti e Faavae ai se Uarota po o se Paranesi a se Gagana i se Siteki
|
Uarota |
Paranesi | |
|---|---|---|
|
Numera o tagata o le au paia (toaaga ma ē le toaaga mai) | Uarota 125 | Paranesi E leai se tapulaa o le toalaiti |
|
Numera o ē toaaga, i latou e umia le Perisitua Mekisateko e totogi atoa le sefuluai ma e gafataulimaina le auauna atu i tofiga faaleautaitai | Uarota 15 | Paranesi 4 |
O tuaoi mo iunite a gagana e masani lava ona mulimuli i tuaoi faalefaafanua o uarota, paranesi, ma siteki.
O tamaiti ma le autalavou i se iunite a se gagana e mafai ona tuufaatasi ia vasega ma se iunite faalefaafanua pe a mananao ai (tagai i le 29.2.8).
Tagai i le 36.3 mo paranesi a gagana i se misiona. Tagai i le 36.4.2 mo taiala i le faaigoaina o uarota ma paranesi.
37.1.1
Tagata Auai i se Uarota po o le Paranesi a se Gagana
-
E tatau ona nonofo tagata auai i totonu o tuaoi o le uarota po o le paranesi a le gagana.
-
E mafai e tagata o le au paia ona filifili e avea ma tagata auai o le iunite a le gagana po o la latou uarota faalefaafanua.
-
O pepa faamaumau o tagata taitoatasi e tatau ona i ai i totonu o le uarota o loo auai atu i ai le tagata.
37.1.2
Tulaga Faaleautaitai i se Uarota po o le Paranesi a se Gagana
-
E masani lava, o le epikopo po o se peresitene o le paranesi ma ona fesoasoani e valaauina mai i totonu o tuaoi o le iunite a le gagana. E mafai ona faia ni tuusaunoaga mo taitai e le o nonofo i totonu o tuaoi o le iunite pe afai e nonofo i totonu o le siteki e nafa ma le iunite.
-
E manaomia le faamaoniga a le Au Peresitene Sili a o le’i valaauina se epikopo.
-
E masani lava, o isi taitai ma faiaoga e valaauina mai tagata auai o le uarota po o le paranesi.
37.2
Uarota ma Paranesi a le Autalavou Nofofua Matutua i se Siteki Faalefaafanua
E mafai e se peresitene o le siteki ona fautua atu le faavaeina o se uarota po o se paranesi a le autalavou nofofua matutua (mo tagata auai e ta’i 18–35 tausaga) pe afai e lava talavou nofofua matutua o le siteki e mananao e auai ai. O mea nei e tatau ona mafaufau i ai:
-
O le aafiaga o le alualu i luma o le tagata lava ia ma le atinaega faaleagaga o talavou nofofua matutua. E aofia ai i lenei mea lo latou gafatia e auai i vaega uma o le galuega a le Atua mo le faaolataga ma le faaeaga (tagai i le 1.2).
-
O le aafiaga o iunite faalefaafanua lea o le a maua mai ai e le iunite a talavou nofofua matutua ia ona tagata auai.
-
O le taimi o femalagaaiga ma tupe faaalu e manaomia e talavou nofofua matutua ma taitai.
I eria e mafai ona lagolagoina ai, e mafai e peresitene o siteki ona talosagaina le faavae o ni iunite talavou nofofua matutua se lua mo tagata o vaitausaga nei:
-
18–25
-
26–35
E masani lava, o iunite talavou nofofua matutua e lua mo tagata o le ekalesia i nei vaitausaga o le a tautuaina le eria faafaafanua lava e tasi. O le a iloagofie le tasi iunite ma le isi i luga o le faafanua.
E mafai foi e peresitene o siteki ona fautua atu le fatuina o se uarota po o se paranesi e faaaofia ai tagata o le au paia mai siteki tuaoi se tasi pe sili atu foi. E tatau i peresitene o siteki ona mafaufau pe sili atu ona fetaui gaoioiga a siteki tuufaatasi ma manaoga o talavou nofofua matutua nai lo le fatuina o se uarota po o se paranesi. O se tasi o siteki o loo auai ai, o le a nafa ma le uarota po o le paranesi.
O se siteki faalefaafanua e sopo atu ona tuaoi i le siteki a le autalavou nofofua matutua, e le tatau ona faia sana ia lava iunite mo ona talavou nofofua matutua.
O Tulaga Manaomia Aupito Itiiti e Faavae ai se Iunite mo Talavou Nofofua Matutua i se Siteki
|
Uarota |
Paranesi | |
|---|---|---|
|
Numera o tagata auai e toaaga | Uarota 125 | Paranesi 50 |
|
Numera o ē toaaga, i latou e umia le Perisitua Mekisateko e totogi atoa le sefuluai ma e gafataulimaina le auauna atu i tofiga faaleautaitai | Uarota 15 | Paranesi 4 |
E masani lava, o se uarota a talavou nofofua matutua e le tatau ona silia ma le 225 tagata auai e toaaga.
Tagai i le 36.4.2 mo taiala i le faaigoaina o uarota ma paranesi.
37.2.1
Tagata Auai i se Uarota po o se Paranesi a Talavou Nofofua Matutua i se Siteki Faalefaafanua
-
O tagata auai e tatau o ni talavou nofofua matutua (vaitausaga 18–35) o ē nonofo i totonu o tuaoi o le uarota po o le paranesi a talavou nofofua matutua.
-
E mafai e talavou nofofua matutua ona filifili e avea ma tagata auai o le iunite a talavou nofofua matutua po o la latou iunite faalefaafanua.
-
O pepa faamaumau o tagata taitoatasi e tatau ona i ai i totonu o le iunite o loo auai atu i ai o ia.
-
Afai e lagona e le peresitene o le siteki o le a fesoasoani i se talavou nofofua matua o lana siteki ua le toaga mai, e mafai ona ia faamaonia le siitia atu o pepa faamaumau mai le iunite faalefaafanua i le iunite a talavou nofofua matutua. A oo ina toaga le tagata auai sa le toaga, e mafai ona filifili o ia pe auai i le iunite a talavou nofofua matutua po o le iunite faalefaafanua.
-
O matua o talavou nofofua matutua (o le vaitausaga 18–35) e i ai fanau i le fale, e nonofo pea lava i a latou iunite faalefaafanua. E mafai e matua ona auai atu i gaoioiga a le iunite a talavou nofofua matutua.
-
E lē auai tagata o le ekalesia i se iunite a talavou nofofua matutua pe a faaipoipo pe ua atoa foi le ta’i 36 tausaga. Tagai i le 37.5 mo tagata matutua nofofua ua 36–45 tausaga.
-
O talavou nofofua matutua o e auai i se iunite mo i latou e 18–25 tausaga o le a siitia atu i se iunite mo i latou e 26–35 tausaga pe a aulia lo latou ta’i 26 tausaga.
37.2.2
Tulaga Faaleautaitai i se Uarota po o se Paranesi a Talavou Nofofua Matutua i se Siteki Faalefaafanua
-
O le epikopo po o le peresitene o le paranesi e tatau lava o se alii ua faaipoipo ma ua matua le faautautaga ma le poto masani. E manaomia le faamaoniga a le Au Peresitene Sili a o le’i valaauina se epikopo. E masani lava, o le epikopo po o le peresitene o le paranesi e nofo i totonu o tuaoi o le iunite a talavou nofofua matutua. E mafai ona faia ni tuusaunoaga mo iunite a talavou nofofua matutua ia e tautuaina ia iunivesite ma kolisi.
-
E mafai ona avea ma fesoasoani o le epikopo tagata o le iunite. Pe e mafai foi e ni isi alii nofofua pe ua faaipoipo o e nonofo i totonu o tuaoi o le iunite. E tatau o i latou o ni faitaulaga sili. Afai o se alii ua valaauina e fai ma se fesoasoani i le au epikopo e le o se faitaulaga sili, e tatau i le peresitene o le siteki ona mautinoa ua faauuina o ia o se faitaulaga sili a o lei vaetofiaina o ia.
-
O le peresitene o le paranesi ma ona fesoasoani e mafai ona avea o ni faitaulaga sili po o ni toeaina.
-
O isi taitai ma faiaoga e valaauina mai talavou nofofua matutua o loo avea ma tagata auai o le iunite.
37.3
Siteki a Talavou Nofofua Matutua ma a Latou Uarota ma Paranesi
O nofoaga e nonofo ai se aofaiga toatele o talavou nofofua matutua i se eria e tasi, e masani lava e lata i iunivesite po o kolisi, e mafai ona faatulaga ai se siteki se tasi pe sili atu foi a talavou nofofua matutua.
I eria e mafai ona lagolagoina ai, e mafai e peresitene o siteki ona talosagaina le faavae o ni iunite talavou nofofua matutua se lua mo tagata o vaitausaga nei:
-
18–25
-
26–35
E masani lava, o iunite talavou nofofua matutua e lua mo tagata o le ekalesia i nei vaitausaga o le a tautuaina le eria faafaafanua lava e tasi. O le a iloagofie le tasi iunite ma le isi i luga o le faafanua.
O Tulaga Manaomia Aupito Itiiti e Faavae ai se Siteki, Uarota, po o se Paranesi a Talavou Nofofua Matutua
|
Siteki a talavou nofofua matutua |
|
|---|---|
|
Uarota a talavou nofofua matutua i se siteki a talavou nofofua matutua |
|
|
Paranesi a talavou nofofua matutua i se siteki a talavou nofofua matutua |
|
O se siteki faalefaafanua e sopo atu ona tuaoi i le siteki a le autalavou nofofua matutua, e le tatau ona faia sana ia lava iunite mo ona talavou nofofua matutua.
O se iunite a talavou nofofua matutua e i totonu o se siteki faalefaafanua e mafai ona siitia atu i se siteki a talavou nofofua matutua pe afai:
-
E tulata ona tuaoi i le siteki a talavou nofofua matutua.
-
E fautuaina atu e peresitene o siteki uma e lua le siitaga.
Tagai i le 36.4.1 ma le 36.4.2 mo taiala i le faaigoaina o siteki ma uarota.
37.3.1
Tagata Auai i se Siteki a Talavou Nofofua Matutua ma Ona Uarota po o Paranesi
-
O tagata auai e tatau o ni talavou nofofua matutua (vaitausaga 18–35) o ē nonofo i totonu o tuaoi o le uarota po o le paranesi a talavou nofofua matutua.
-
O talavou nofofua matutua uma e toaaga mai ma ē le toaaga mai e i totonu o tuaoi o le siteki, o ē le o nonofo i o latou aiga faatasi ma o latou matua, o tagata auai ia o le siteki a talavou nofofua matutua, sei vagana ua latou filifili e auai i la latou iunite faalefaafanua.
-
O talavou nofofua matutua o loo nonofo i le fale ma o latou matua e mafai ona filifili e avea ma tagata auai o le iunite a talavou nofofua matutua po o la latou iunite faalefaafanua.
-
O pepa faamaumau o tagata taitoatasi e tatau ona i ai i totonu o le iunite o loo auai atu i ai o ia.
-
O matua o talavou nofofua matutua (o le vaitausaga 18–35) e i ai fanau i le fale, e nonofo pea lava i a latou iunite faalefaafanua. E mafai e matua ona auai atu i gaoioiga a le iunite a talavou nofofua matutua.
-
E lē auai tagata o le ekalesia i se iunite a talavou nofofua matutua pe a faaipoipo pe ua aulia lo latou ta’i 36 tausaga. Tagai i le 37.5 mo tagata matutua nofofua (36–45 tausaga).
-
O talavou nofofua matutua o e auai i se iunite mo i latou e 18–25 tausaga o le a siitia atu i se iunite mo i latou e 26–35 tausaga pe a aulia lo latou ta’i 26 tausaga.
37.3.2
Tulaga Faaleautaitai i se Siteki a Talavou Nofofua Matutua ma Ona Uarota po o Paranesi
-
O le peresitene o le siteki, peteriaka o le siteki, epikopo, ma peresitene o paranesi, e tatau lava o ni alii ua faaipoipo ua matua le faautautaga ma le poto masani. E manaomia le faamaoniga a le Au Peresitene Sili a o le’i valaauina se epikopo. E mafai ona tofia i latou mai tua atu o tuaoi o le siteki pe a filima’otia ai e le Au Peresitene o le Eria. O i latou e tuuina atu na valaauga e muai feutagai ma le peresitene o le siteki a le tagata ina ia maua mai ai le faamaoniga. Mo taiala, tagai i le mataupu 30.
-
O fesoasoani o le peresitene o le siteki, fautua maualuga, fesoasoani i au epikopo, ma fesoasoani i au peresitene o paranesi, e mafai o ni alii nofofua pe ua faaipoipo foi. O peresitene o le Aualofa ma fesoasoani e mafai o ni tamaitai nofofua pe ua faaipoipo foi. O peresitene o le Aoga Sa ma fesoasoani, e mafai o ni alii nofofua pe ua faaipoipo foi. O taitai nei e mafai o ni tagata auai o le siteki. Pe e mafai foi ona tofia i latou mai tua atu o tuaoi o le siteki pe a filima’otia ai e le Au Peresitene o le Eria.
-
O fesoasoani o le epikopo, e tatau o i latou o ni faitaulaga sili. Afai o se alii ua valaauina e fai ma se fesoasoani i le au epikopo e le o se faitaulaga sili, e tatau i le peresitene o le siteki ona mautinoa ua faauuina o ia o se faitaulaga sili a o lei vaetofiaina o ia. O le peresitene o le paranesi ma ona fesoasoani e mafai ona avea o ni faitaulaga sili po o ni toeaina.
-
E manaomia le faamaoniga a le Korama a le Toasefululua a o le’i valaauina se peteriaka.
-
I uarota ma paranesi, o isi taitai ma faiaoga e valaauina mai talavou nofofua matutua o loo avea ma tagata auai o le iunite.
37.4
Siteki ma Uarota a Tamaiti A’oga ua Faaipoipo
O siteki ma uarota a tamaiti a’oga ua faaipoipo e mafai ona faavae e tautuaina ai tamaiti a’oga o le ekalesia ua faaipoipo ma e nonofo latalata i le iunivesite po o le kolisi.
O Tulaga Manaomia Aupito Itiiti e Faavae ai se Siteki po o se Uarota a Tamaiti A’oga ua Faaipoipo
|
Siteki a tamaiti a’oga ua faaipoipo |
|
|---|---|
|
Uarota a tamaiti a’oga ua faaipoipo |
|
Tagai i le 36.4.1 ma le 36.4.2 mo taiala i le faaigoaina o siteki ma uarota.
37.4.1
Tagata Auai i Siteki ma Uarota a Tamaiti A’oga ua Faaipoipo
-
O tagata auai e tatau o ni tamaiti a’oga ua faaipoipo o e nonofo i totonu o tuaoi o le uarota a tamaiti a’oga ua faaipoipo.
-
E mafai e tamaiti aoga ua faaipoipo ona filifili e avea ma tagata auai o le uarota a tamaiti aoga ua faaipoipo po o la latou iunite faalefaafanua .
-
O pepa faamaumau e tatau ona i ai i totonu o le iunite o loo auai ai le aiga.
37.4.2
Tulaga Faaleautaitai i Siteki ma Uarota a Tamaiti A’oga ua Faaipoipo
Tagai i le 37.3.2 ma faaaoga ia taiala lava e tasi.
37.5
Uarota a le Au Matutua Nofofua
E masani lava, o tagata matutua nofofua (36–45 tausaga) e sili ona tautuaina lelei i totonu o iunite faalefaafanua. E avea o se tuusaunoaga, e mafai e se peresitene o le siteki ona fautua atu le faavaeina o se uarota a le au matutua nofofua.
E mafai foi e se peresitene o le siteki ona fautua atu le faavaeina o se uarota a le au matutua nofofua i tagata auai mai se tasi o siteki tuaoi pe sili atu. O peresitene o siteki e aafia ai, latou te fuafuaina, ma faamaopoopoina le talosaga. O se tasi o siteki o loo auai ai, o le a nafa ma le uarota.
O Tulaga Manaomia Aupito Itiiti e Faavae ai se Uarota a le Au Matutua Nofofua i se Siteki
|
Numera o tagata o le au paia (toaaga ma ē le toaaga mai) |
125 |
|---|---|
|
Numera o ē toaaga, i latou e umia le Perisitua Mekisateko e totogi atoa le sefuluai ma e gafataulimaina le auauna atu i tofiga faaleautaitai |
15 |
Tagai i le 36.4.2 mo taiala i le faaigoaina o uarota.
37.5.1
Tagata Auai i se Uarota a le Au Matutua Nofofua
-
O tagata auai e tatau o ni au matutua nofofua (36–45 tausaga) o ē nonofo i totonu o tuaoi o le uarota a le au matutua nofofua.
-
E mafai e le au matutua nofofua ona filifili e avea ma tagata auai o le uarota a le au matutua nofofua po o la latou iunite faalefaafanua.
-
O pepa faamaumau o tagata taitoatasi e tatau ona i ai i totonu o le iunite o loo auai atu i ai o ia.
-
O le au matutua nofofua ua avea o ni matua (36–45 tausaga) e i ai fanau i le fale, e nonofo pea lava i a latou iunite faalefaafanua. E mafai e matua ona auai i gaoioiga a le uarota a le au matutua nofofua.
-
E lē auai tagata o le ekalesia i se uarota a le au matutua nofofua pe afai ua faaipoipo pe ua aulia foi le 46 tausaga.
37.5.2
Tulaga Faaleautaitai i se Uarota a le Au Matutua Nofofua
-
O le epikopo e tatau o se faitaulaga sili ua faaipoipo ma ua matua le faautautaga ma le poto masani. E manaomia le faamaoniga a le Au Peresitene Sili a o le’i valaauina se epikopo.
-
E mafai ona avea ma fesoasoani o le epikopo tagata o le iunite. Pe e mafai foi o ni isi alii nofofua pe ua faaipoipo o e nonofo i totonu o tuaoi o le iunite. E tatau o i latou o ni faitaulaga sili. Afai o se alii ua valaauina e fai ma se fesoasoani i le au epikopo e le o se faitaulaga sili, e tatau i le peresitene o le siteki ona mautinoa ua faauuina o ia o se faitaulaga sili a o lei vaetofiana o ia.
-
O isi taitai ma faiaoga e valaauina mai le au matutua nofofua o loo avea ma tagata auai o le uarota.
37.6
Uarota ma Paranesi mo Tagata Auai i Tulaga Faapitoa
E mafai e se peresitene o le siteki ona fautua atu le faavaeina o ni uarota po o paranesi mo tagata o le au paia o i ai i ni tulaga faapitoa, e pei o i latou o loo tausia i nofoaga faapitoa, polokalama faapitoa e togafitia ai, po o falepuipui.
E masani lava, o taitai e tofia e auauna atu i nei iunite e tatau ona nonofo i totonu o le siteki e nafa ma le iunite.
Tagai i le 36.3 mo faamatalaga e uiga i paranesi i se misiona mo talavou nofofua matutua po o le au matutua nofofua; o tagata auai e le tautatala i le gagana masani i le lotoifale; tagata o le au paia o loo tausia i nofoaga faapitoa, polokalama faapitoa e togafitia ai, po o falepuipui; po o tagata o le au paia o i le militeli.
Tagai i le 36.4.2 mo taiala i le faaigoaina o uarota ma paranesi.
37.7
Vaega i Siteki, Misiona, ma Eria
O vaega, o ni potopotoga laiti ua faatagaina o tagata o le au paia e vaaia e se epikopo, peresitene o le paranesi, po o se peresitene o le misiona. E mafai e le peresitene o le siteki po o le misiona ona fautua atu le faavaeina o se vaega i tulaga nei:
-
O femalagaa’iga e faigata mo ona tagata ua onomea i ai, e faatasitasi ai ma se uarota po o se paranesi.
-
O se aofaiga toaitiiti o tagata o le ekalesia e tautatala i se isi gagana e ese mai le gagana a la latou iunite, e aofia ai le gagana fai faailoga.
-
O tagata o le au paia i le militeli e sili ona tautuaina pe a i ai i se vaega (tagai i le 38.9.4).
Ina ia fautua atu le faavaeina o se vaega, e auina atu e le peresitene o le siteki po o le misiona se talosaga i le Au Peresitene o le Eria. E na’o le Au Peresitene o le Eria e mafai ona faamaoniaina le talosaga.
O se vaega e tatau ona i ai e le itiiti ifo i le toalua ni tagata o le ekalesia. O le tasi e tatau ona avea o se ositaulaga agavaa i le Perisitua Arona po o sē o loo umiaina ma le agavaa le Perisitua Mekisateko.
I totonu o siteki, e tofi e le peresitene o le siteki se epikopo po o se peresitene o le paranesi e faatulagaina ma vaavaaia le vaega. I misiona, o le peresitene o le misiona e tofiaina se peresitene o le paranesi e faatulagaina ma vaavaaia.
E masani lava, e mafai ona faavaeina se vaega e tautuaina ai tagata o le ekalesia e nonofo i se iunite se tasi pe sili atu foi i totonu o se siteki po o se itu. O tagata e auai i se vaega e faatapulaa ia i latou o ē nonofo i totonu o tuaoi o le iunite po o iunite o loo auai ai. E le fesopoa’i vaega i tuaoi o siteki po o itu.
E valaau e le peresitene o le siteki, peresitene o le misiona, epikopo, po o le peresitene o le paranesi se taitai vaega ma vaetofiaina o ia. E faatulaga ma taitai e le taitai vaega ia fonotaga po o sauniga faalevaega, lea e aofia ai le faatautaiga o le faamanatuga.
O se taitai vaega na te le umiaina ki o le perisitua, ma e le faatagaina foi o ia e:
-
Taliaina sefuluai ma taulaga.
-
Fautuaina tagata o le au paia e uiga i ni agasala matuia.
-
Tuuina atu ni tapuia’iga mamafa pe māmā o le avea ai ma tagata o le ekalesia.
-
Faatinoina isi tiute e manaomia ai ki o le perisitua.
O le mea masani lava, e faaaoga e vaega le Polokalama a Iunite Faavae (tagai i le 36.6).
O pepa faamaumau o tagata o vaega e teu i le uarota po o le paranesi e vaavaaia le vaega.
E le atofaina atu e le laumua o le Ekalesia se numera iunite i vaega.
Pe a agavaa se vaega, e mafai e le peresitene o le siteki po o le peresitene o le misiona ona fautua atu ia avea le vaega o se paranesi.
37.8
Iunite a le Ekalesia i Nofoaga o le Militeli
Mo faatonuga i le faavaeina o uarota, paranesi, ma auaunaga mo vaega o tagata o le ekalesia e lolotu i nofoaga o le militeli, tagai i le 38.9.4.