38.

Aiaiga Faavae ma Taiala a le Ekalesia

38.1

Auai i Faatinoga a le Ekalesia

E alofa lo tatou Tama o i le Lagi i Ana fanau. “Ua tutusa tagata uma i le Atua,” ma ua Ia valaaulia tagata uma “ia o mai ia te ia ma taumamafa i lona agalelei” (2 Nifae 26:33).

E tele taimi e fesiligia ai taitai ma tagata o le Ekalesia pe o ai e mafai ona auai mai i sauniga a Le Ekalesia a Iesu Keriso o le Au Paia o Aso e Gata Ai, o ai e mafai ona avea ma tagata o le Ekalesia, ma pe o ai e mafai ona auai atu i se malumalu.

38.1.1

Auai i Sauniga Faale-Ekalesia

Ua aoao mai le Faaola e faapea e tatau i Ona soo ona alolofa atu i o latou tuaoi (tagai i le Mataio 22:39). Na valaaulia e Paulo ia tagata fou faatoa liliu mai ia “le toe tagata ese outou po o e ua aumau, a ua nuu faatasi ma le au paia” (Efeso 2:19). Ua a’oa’o mai foi le Faaola e faapea, e lē tatau i tagata o le Ekalesia ona “tulia ese soo se tasi mai … sauniga faitele, e fai i luma o le lalolagi” (Mataupu Faavae ma Feagaiga 46:3).

E talia tagata uma ia auai i le sauniga faamanatuga, o isi sauniga i le Aso Sa, ma gaoioiga faaagafesootai a Le Ekalesia a Iesu Keriso o le Au Paia o Aso e Gata Ai. O le taitai pulefaamalumalu e nafa ma le faamautinoaina o tagata uma o ē auai ai e faaaloalo i le faatulagaga paia.

O i latou o ē auai ai, e tatau ona aloese mai le pisapisao po o mea faalavefau e feteenai ma le tapuaiga po o isi faamoemoega o le sauniga. E tatau ona faaaloalogia tulaga manaomia uma o vaitausaga uma ma amioga o sauniga eseese a le Ekalesia ma mea e fai. E moomia ai i lena mea le taumamao mai amioga suamili fepa’ia’i ma mai lavalava po o teuga e faapogai ai ni mea faalavefau. E lē faatagaina ai foi le faia o ni faamatalaga faaupufai po o le talanoa i aga faalefeusuai po o isi uiga faaletagata i se tulaga e tata’iese ai mai sauniga po o fonotaga e taulai atu i le Faaola.

Afai e i ai ni amioga e lē talafeagai, o le epikopo po o le peresitene o le siteki na te tuuina atu se fautuaga e lē faalaua’iteleina i se agaga o le alofa. Na te fautuaina i latou e lē fetaui a latou amioga mo le sauniga ia taulai atu i le fesoasoani e tausisia se avanoa paia mo tagata uma o loo i ai, faatasi ai ma se faamamafaga faapitoa e tapuai i le Tama Faalelagi ma le Faaola.

O maota tapuai o le Ekalesia e tumau le avea o ni meatotino patino e noatia i aiaiga faavae a le Ekalesia. O tagata e lē mananao e mulimuli i nei taiala o le a talosagaina i se ala faaaloalo e ‘aua ne’i auai mai i sauniga ma mea fai a le Ekalesia.

38.1.2

Avea ma se Tagata o le Ekalesia

O le avea ai ma tagata o Le Ekalesia a Iesu Keriso o le Au Paia o Aso e Gata Ai o loo avanoa mo tagata o e “o mai i luma ma loto momomo ma agaga salamo,” “ua loto e ave i o latou luga le suafa o Iesu Keriso,” ma mananao e osia ma tausia feagaiga paia o le papatisoga (Mataupu Faavae ma Feagaiga 20:37).

Mo le papatisoga o tamaiti laiti ua ta’i 8 tausaga ma matutua atu, tagai i le 38.2.8.2.

38.1.3

Tapuaiga i le Malumalu

O malumalu o nofoaga paia mo tapuaiga ia e maua ai sauniga e tatau ai ma osia ai feagaiga paia. I tagata o le Ekalesia, o malumalu o maota o le Atua. Ona o lenei paia ma feagaiga e osia ai, e na o tagata o le Ekalesia o i ai se pepa faataga o aogā o le malumalu, e mafai ona tapuai i le malumalu. E mafai e tagata o le Ekalesia ona maua se pepa faataga o le malumalu pe a latou tausia ma le faamaoni ia poloaiga moomia ma ola i le talalelei a Iesu Keriso. (Tagai i le mataupu 26.)

38.1.4

Auai ma Faamanuiaga o Tagata o le Ekalesia e Lei Faaipoipo

O tagata uma o le ekalesia, tusa lava pe e lei faaipoipo lava pe le o i ai foi ni aiga i le Ekalesia, e tatau ona tauivi malosi mo le mea aupito sili o le ola lea i se aiga faavavau. O lona uiga o le sauniuni ia faamauina o se tane po o se ava agavaa ma ia avea ma se tama po o se tina agaalofa. Mo ni isi, o le a le faataunuuina nei faamanuiaga seia aulia le isi olaga, ae e tutusa lava le sini maualuga mo tagata uma.

O tagata faamaoni o le ekalesia o e le faatagaina i latou e o latou tulaga e mauaina faamanuiaga o le faaipoipoga e faavavau ma le tulaga faamātua i lenei olaga, o le a mauaina faamanuiaga folafolaina uma i le faavavau, pe afai latou te tausia feagaiga sa latou osia ma le Atua (tagai i le Mosaea 2:41).

38.1.5

Matua e i lalo o le 18 Tausaga le Matutua e Lei Faaipoipo

O se alii talavou e i lalo ifo o le 18 tausaga le matua o le a avea ma tamā ae lei faaipoipo, e mafai ona auai i le korama a le Perisitua Arona po o le korama a toeaina. O lenei faaiuga e tuuina atu i le faautautaga ma le agaga tatalo a le alii talavou, o ona matua, ma le epikopo.

O se tamaitai talavou e i lalo ifo o le 18 tausaga le matua o le a avea ma tina ae lei faaipoipo, e mafai ona auai i Tamaitai Talavou po o le Aualofa. O lenei faaiuga e tuuina atu i le faautautaga ma le agaga tatalo a le tamaitai talavou, o ona matua, ma le epikopo.

I le faiga o lenei faaiuga, e iloilo e le talavou, o matua, ma taitai mea nei:

• Afai e auai le talavou i vasega ma gaoioiga a le autalavou, e le tatau ona alu ma ave lana tama.

• O talavou matutua atu o e filifili e tausi le tamaitiiti e mafai ona aoga mo ia le talia i le korama a toeaina o ni toeaina ua faaolioli po o le Aualofa.

38.2

Aiaiga Faavae mo Sauniga ma Faamanuiaga

O lenei vaega o loo tuuina atu ai aiaiga faavae mo sauniga ma faamanuiaga. O nisi o nei aiaiga faavae e aofia ai tulaga faapitoa. O faamatalaga lautele e uiga i sauniga ma faamanuiaga o loo tuuina atu i le mataupu 18. O faamatalaga e uiga i sauniga o le malumalu o loo tuuina atu i le mataupu 27 ma le 28.

38.2.1

Faamatalaupuina o Sauniga ma Faamanuiaga i se Isi Gagana

E taua le malamalama o se tagata e mauaina se sauniga po o se faamanuiaga i mea o loo ta‘ua. Afai e tatau ai, e mafai e se taitai pulefaamalumalu ona talosagaina se tasi e faamatalaupuina se sauniga po o se faamanuiaga i se gagana e malamalama ai le tagata. E aofia ai le faamatalaupuina o le gagana fai faailoga.

Afai o se tagata e mauaina se sauniga po o se faamanuiaga e logonoa pe faaletonu le faalogo, e mafai ona ia faaaogaina se polokalama o le leo-i-le-tesi. O tagata e logonoa pe faaletonu le faalogo, e mafai foi ona faaaoga le faaliliuga o le gagana fai faailoga po o se polokalama o le leo-i-le-tesi ia malamalama ai i faamanuiaga e tuuina atu i tagata o o latou aiga.

Mo faamatalaga e uiga i faaliliuga tusitusia o faamanuiaga faapeteriaka, tagai i le 38.2.10.5. Mo faamatalaga e uiga i le faamatalaupuina o faamanuiaga faapeteriaka i le gagana fai faailoga, tagai i le 38.2.10.6.

38.2.2

Atapue, Pueina, ma Faamaumauga o Sauniga ma Faamanuiaga

O sauniga ma faamanuiaga e paia. Mo lenei mafuaaga, e leai se tasi e tatau ona pueina ni ata pe faia ni puega o sauniga, faamanuiaga, po o sauniga o papatisoga.

E mafai e se aiga ona pueina le leo ma faamaumauga o faamanuiaga a le tamā. O nei faamanuiaga o loo faamatalaina i le 18.14.1.

Ua tusifaamaumauina faamanuiaga faapeteriaka. Ina ia faafaigofieina lenei mea, e faia e le peteriaka po o lana tusiupu se puega o le leo o le faamanuiaga.

O isi sauniga ma faamanuiaga e le tatau ona pueina pe tusifaamaumauina.

Mo faamatalaga e uiga i le faasalalauina tuusa’o o sauniga, tagai i le 38.2.3.

38.2.3

Faasalalauina Tuusa’o o Sauniga

Pe a mafai, o i latou e mananao e maimoa i se sauniga e tatau ona taumafai malosi e auai patino. A potopoto tagata o le ekalesia ma uo mo se sauniga, latou te lagonaina le uunaiga a le Agaga ma faaaumea e le tasi le isi.

Peitai, afai e le mafai e se tagata mamae o le aiga ona auai patino, e mafai e le epikopo po o le peresitene o le siteki ona faataga le faasalalauina tuusa’o atu o le sauniga ia te ia. E faataga le faasalalauina tuusa’o atu, mo se faataitaiga, pe afai o le tagata mamae o le aiga e:

• Nofo i se nofoaga maotua pe tapulaa foi le gafatia e faimalaga ai.

• I ai ni luitau faalesoifua maloloina faaletino, faalemafaufau, pe faalelagona.

• Le lava le malosi faalenatura e teena ai faama’i pe o loo i ai i se nofoaga mo le tausiga po o se falemai.

• Manaomia se faamatalaupu i le gagana fai faailoga.

• Auauna atu i se misiona talai. (E manaomia le faamaoniga a le peresitene o le misiona.)

E mafai e le epikopo ona faatagaina le faasalalauina tuusa’o o faamanuiaga o pepe, papatisoga, faamauga, ma faauuga i le Perisitua Arona. E mafai e le peresitene o le siteki ona faatagaina le faaslalauina tuusa’o o faauuga i le Perisitua Mekisateko ma le vaetofiaina o faifeautalai.

E le faasalalauina tuusa’o le sauniga o le faamanatuga. Afai e faasalalau tuusa’o atu se sauniga faamanatuga, e tatau ona taofi le faasalalauga i le taimi o le faatinoga o le faamanatuga. E mafai e le epikopo ona faataga se ositaulaga po o se e umia le Perisitua Mekisateko e faatautaia patino le faamanatuga ia i latou o e le mafai ona auai mai i le sauniga (tagai i le 18.9.1).

O le faasalalauina tuusa’o o sauniga e le tatau ona faalavelaveina ai le Agaga. E masani lava, e na o le tasi le masini e tatau ona faaaogaina. E faagaoioia e le tagata tomai faapitoa mo tekinolosi a le uarota po o le siteki. E tatau ona lē iloa atu e isi le masini ma le tagata o loo faaaogaina.

E tatau ona tapeese faasalalauga o sauniga i totonu o le aso e tasi pe a maea le sauniga.

38.2.4

Sauniga mo Tagata E I Ai Manaoga Faapitoa Faalemafaufau

Pe a iloilo pe faatino sauniga mo se tagata e i ai se manaoga faapitoa faalemafaufau, e fefautuaai faatasi le tagata, o ona matua po o le tagata o loo vaaia (pe a talafeagai ai), faatasi ma taitai. Latou te mafaufau ma le agaga tatalo i le manao ma le tulaga o le malamalama o le tagata. E le tatau ona taofia ia sauniga pe afai e agavaa le tagata, ua manao e maua ia sauniga, ma faaalia le tulaga talafeagai o lona tauaveina o le tiutetauave faapea ma le tali atu mo ia lava.

E feutagai se epikopo ma lana peresitene o le siteki pe afai e i ai ni ana fesili e uiga i ni tagata patino. E mafai e le peresitene o le siteki ona faafesootai le Ofisa o le Au Peresitene Sili pe a tatau ai.

O tagata ua le mafai ona tali atu mo i latou lava ona o manaoga faapitoa, ua “faaolaina i le malo selesitila o le lagi” (Mataupu Faavae ma Feagaiga 137:10). Ona o lenei le mafuaaga, ua le manaomia ai ia sauniga pe faatinoina mo i latou. Na pau le tuusaunoaga o le faamauina i matua mo i latou e lei fananau mai i le feagaiga.

Mo faamatalaga e uiga i le faatinoina o sauniga mo i latou e le atoatoa le malosi faaleatamai, tagai i mea nei:

• Mo papatisoga ma faamauga, 38.2.8.1

• Mo faauuga i se tofi i le perisitua, 38.2.9.7

• Mo se faamanuiaga faapeteriaka, 38.2.10.1

• Mo le faaeega paia i le malumalu ma faamauga, 27.2.1.3 ma le 27.3.1.2

38.2.5

Sauniga ma Faamanuiaga e Faatinoina e i Latou ma Mo i Latou e I Ai Manaoga Faapitoa Faaletino

O tagata e i ai manaoga faapitoa faaletino, e pei o le leai o ni aao, supa, po o le tutuli, e mafai ona faatino ma maua sauniga ma faamanuiaga. E faatulaga e taitai fuafuaga mo nei tagata ia mafai ai ona auai i le tele e mafai ai. Afai e i ai ni fesili a taitai e le mafai ona latou foia, e faafesootai e le peresitene o le siteki le Ofisa o le Au Peresitene Sili.

O tagata e logonoa pe faaletonu le faalogo e mafai ona fesootai e ala i le gagana fai faailoga, pe a faatinoina pe mauaina se sauniga po o se faamanuiaga. O se taitai perisitua e vaaia se sauniga, na te faamautinoaina o mafai ona malamalama le tagata o loo tuu atu i ai, e ala i se faamatalaupu po o se isi auala (tagai i le 38.2.1).

38.2.6

Faaaogaina po o le Faamaoniaina o Sauniga

O faamatalaga o loo i lalo ua tuuina mai ai mafuaaga o le a le aoga ai se sauniga. O loo faamatala mai ai foi le ala e mafai ona faaaoga ai pe faamaonia ai le sauniga.

I nisi tulaga, e tatau ona toe faatinoina se sauniga. Pe a tupu lenei mea, e faamaumau e se failautusi le aso fou i luga o le pepa faamaumau, e tusa lava pe le o ogatusa ma aso o isi sauniga.

38.2.6.1

E Lei Fatuina se Pepa Faamaumau po o le Tausaga o loo Misi pe Le Sa’o

Mo faamoemoega o le tausiga o faamaumauga, e le taulia se sauniga pe afai o le tausaga na faatino ai o loo misi pe le sa‘o i luga o le pepa faamaumau. E le gata i lea, e le aoga se papatisoga pe afai e lei fatuina se pepa faamaumau. E mafai ona faamaonia le sauniga i le uluai tusi faamaonia na tuuina atu i le taimi na faatino ai le sauniga. Faatasi ai ma lenei tusi faamaonia, e mafai e le epikopo ona faatagaina se failautusi e faafou le pepa faamaumau.

Afai e le mafai ona maua le tusi faamaonia, e mafai ona faamaonia le sauniga i le molimau a ni tagata se toalua na molimauina. E tatau i molimau e toalua ona:

• 8 tausaga le matutua pe sili atu i le taimi na faatinoina ai le sauniga.

• Sa vaai pe faalogo i le sauniga.

• O ni tagata o le Ekalesia o i ai ni pepa faamaumau i le taimi na tuu atu ai a la molimau.

• Tuuina atu a laua molimau tusitusia, e ta’u atu ai a le o le (1) aso atoa na faatinoina ai le sauniga po o le (2) o le tausaga na faatinoina ai ma le tagata na faatinoina.

• Saini a la molimau tusitusia i luma o se tasi o le au epikopo po o le au peresitene o le siteki.

Faatasi ma lenei molimau, e mafai ai e le epikopo ona faatagaina se failautusi e fatu pe faafou le pepa faamaumau. Ona mafai lea ona tiai le molimau tusitusia.

Afai e le maua le tusi faamaonia po o molimau, e tatau ona toe fai le sauniga.

Afai ua maua e le tagata isi sauniga i le maea ai o le sauniga e le’i faaaogaina, e tatau ona faamaonia e le Au Peresitene Sili. Ina ia talosagaina lea mea, e auina atu e le peresitene o le siteki se tusi i le Ofisa o le Au Peresitene Sili.

38.2.6.2

Sauniga na Maua ae e Le Sa’o le Faasologa

E le taulia se sauniga pe afai e le sa’o le faasologa na maua ai e le tagata. Mo se faataitaiga, o le faaeega paia o se tane e le taulia pe afai na ia mauaina muamua a o lei maua le Perisitua Mekisateko. Ae peitai, e mafai e le Au Peresitene Sili ona faamaonia se sauniga faapena. Ina ia talosagaina se faamaoniga, e auina atu e le peresitene o le siteki se tusi i le Ofisa o le Au Peresitene Sili.

38.2.6.3

Na Faatino le Sauniga a o Lei oo i le Tausaga Talafeagai

E le taulia se sauniga pe afai na faatinoina a o le’i oo i tausaga talafeagai. Mo se faataitaiga, e le taulia se papatisoga pe afai na faatinoina a o lei 8 tausaga o le tagata.

Afai e leai nisi sauniga na mauaina i le mavae ai o le sauniga e lei faaaogaina, e tatau ona toe faatinoina. Afai na maua isi sauniga, e tatau ona faamaonia e le Au Peresitene Sili na sauniga ma sauniga e le i faaaogaina. Ina ia talosagaina lenei mea, e auina atu e le peresitene o le siteki se tusi i le Ofisa o le Au Peresitene Sili.

38.2.6.4

Sa Faatinoina le Sauniga e aunoa ma le Pule Tatau

E le taulia se sauniga pe afai na faatinoina e se tasi sa le o i ai le pule tatau o le perisitua. Mo se faataitaiga, e le aoga se faamauga pe afai na faatino e se tasi e lei umiaina le Perisitua Mekisateko. E faapena foi, e le aoga pe afai na maua le Perisitua Mekisateko e le tagata na faatinoina mai se faasologa e le sa’o pe aunoa foi ma se faamaoniga tatau (tagai i le 38.2.6.2; tagai foi i le 32.17).

Afai e leai ni isi sauniga na maua ina ua maea le sauniga e lei faaaogaina, e tatau ona toe faatinoina e se tasi e i ai le pule tatau. Afai na maua ni isi sauniga, e tatau ona faamaonia e le Au Peresitene Sili na sauniga ma sauniga e le o faaaogaina. Ina ia talosagaina lenei mea, e auina atu e le peresitene o le siteki se tusi i le Ofisa o le Au Peresitene Sili. I ni isi tulaga, e mafai e le Au Peresitene Sili ona faatonu ia toe faatino ia sauniga.

38.2.7

Faaigoaina ma le Faamanuiaina o Tamaiti

Mo faamatalaga lautele e uiga i le faaigoaina ma le faamanuiaina o tamaiti, tagai i le 18.6.

38.2.7.1

O Pepe Ua Mama’i Tigaina

Afai e ma‘i tigaina se pepe fou, e mafai e se tasi e umia le Perisitua Mekisateko ona faatino le faaigoaina ma le faamanuiaga i le falemai po o le fale. Na te le manaomia le faatagaga mai le epikopo. A uma ona tuuina atu le faamanuiaga, na te vave logoina le epikopo ina ia mafai ona fatuina se pepa faamaumau mo le tamaitiiti.

38.2.7.2

O Fanau E Le’i Faaipoipo o Latou Matua (E Aofia ai le Tete’a)

E mafai ona faamanuiaina se tamaitiiti pe a maua mai e le epikopo se faatagaga tuugutu mai matua po o tagata e vaaia. E le manaomia le faatagaga mai se matua po o se tagata e vaaia le tamaitiiti e leai se faavae faaletulafono mo le tetee atu i le faamanuiaga.

38.2.7.3

O Tamaiti E Le o Ni Tagata o le Ekalesia o Latou Matua

O nisi taimi e talosaga ai matua po o e o vaaia le tamaitiiti ina ia faamanuiaina le tamaitiiti e ui lava e le o i latou o ni tagata o le Ekalesia. A tupu lenei mea, e maua mai e le epikopo le faatagaga tuugutu mai matua po o tagata o loo vaaia. E le manaomia le faatagaga mai se matua po o se tagata e vaaia le tamaitiiti e leai se faavae faaletulafono mo le tetee atu i le faamanuiaga.

E faamalamalama e le epikopo e faapea:

• O le a fatuina se pepa faamaumau mo le tamaitiiti.

• O le a faafesootai atu faavaitaimi i la’ua e tagata o le uarota.

• O le a fautuaina atu e ia po o isi taitai o le uarota ina ia saunia le tamaitiiti e papatiso a o latalata atu o ia i le 8 tausaga.

38.2.8

Papatisoga ma le Faamauga

Mo faamatalaga lautele e uiga i le papatisoga ma le faamauga, tagai i le 18.7 ma le 18.8.

38.2.8.1

Tagata e i ai Manaoga Faapitoa Faalemafaufau

O se tagata e i ai se manaoga faapitoa faalemafaufau e mafai ona papatiso ma faamau pe afai e mafai ona manatu lelei ia te ia e mafai ona ia tali atu mo ia lava. E tatau ona mafai ona ia malamalama ma tausia feagaiga o le papatisoga.

O le epikopo e umia ki mo le papatisoga o le tagata pe afai o ia:

• O se tagata o le ekalesia ua 8 tausaga pe matua atu.

• Ua 8 tausaga ma e auai se tasi o matua po o se tagata e vaaia i le ekalesia (tagai i le 18.7.1.1).

E fefautuaai faatasi le tagata, o ona matua po o tagata e vaaia o ia (pe a talafeagai ai), ma le epikopo e filima’oti pe fuafua ai pe tatau ona papatiso ma faamau le tagata.

Afai o le tagata o se tagata e ono liliu mai, e umia e le peresitene o le misiona ia ki mo lona papatisoga (tagai i le 18.7.1.2). I le tulaga lea, e logoina e faifeautalai le peresitene o le misiona. E fefautuaai o ia ma le tagata ma ona matua po o tagata e vaaia o ia (pe a talafeagai ai) e filima’oti ai pe tatau ona papatiso ma faamau o ia. Afai e silafia lelei e le epikopo le tagata, e mafai foi e le peresitene o le misiona ona sailia lona manatu.

O i latou o e e le mafai ona tali atu mo i latou lava, e le moomia ona papatiso tusa lava po o le a le matua (tagai i le Mataupu Faavae ma Feagaiga 29:46–50 ma le 38.2.4 i le tusitaulima lenei).

Mo faamatalaga e uiga i pepa faamaumau o tagata o e le mafai ona tali atu mo i latou lava, tagai i le 13.6.10.

38.2.8.2

Tamaiti e Le’i Aulia Tausaga Faaletulafono e Avea ai ma se Tagata Matua

O se tamaitiiti laitiiti, e pei ona faamatalaina e tulafono i le lotoifale, e mafai ona papatiso pe a ausia tulaga uma nei e lua:

1. E tuuina mai e matua po o i latou e vaaia faaletulafono le faatagaga. E le manaomia le faatagaga mai se matua po o se tagata e vaaia le tamaitiiti e leai se faavae faaletulafono mo le tetee atu i le papatisoga. O tuusaunoaga e moomia ai le faamaoniga a le Au Peresitene Sili.

   O le tagata e faatautaia le faatalanoaga o le papatisoga ma le faamauga e talosagaina lenei faatagaga ina ia tusitusia pe afai na te lagona o le a fesoasoani e taofia ai le le malamalama. I ni isi nofoaga, e manaomia ai le faatagaga tusitusia. E mafai e taitai o le misiona ma le eria ona tuuina atu le taitaiga.

   E tatau i matua po o tagata e vaaia ona malamalama i le aoaoga faavae o le a aoaoina atu i le la tamaitiiti. E tatau foi ona latou naunau e lagolago le tamaitiiti i le osia ma le tausia o feagaiga o le papatisoga.

2. O le tagata e faatautaia le faatalanoaga e iloatino ua malamalama le tamaitiiti i le feagaiga o le papatisoga. E tatau ona ia lagona le mautinoa o le a taumafai malosi le tamaitiiti e tausia lenei feagaiga e ala i le usiusitai i poloaiga, e aofia ai le auai i sauniga a le Ekalesia.

Afai e alu se tamaitiiti i le faaiu o lona tama fai, e mafai ona papatisoina ma faamau le tamaitiiti i lena igoa. E moni lenei mea e tusa lava pe lei vaetamaina aloaia o ia. Ae peitai, o le igoa faaletulafono o le tamaitiiti e pei ona faauigaina ai e le tulafono po o le agaifanua i le lotoifale e tatau ona faamaumauina i luga o le pepa faamaumau ma le tusi faamaonia o le papatisoga ma le faamauga.

38.2.8.3

O Tagata Ua Faaipoipo

O se tagata ua faaipoipo e tatau ona maua le maliega a lona toalua a o lei papatiso.

38.2.8.4

O Tagata o Loo Nonofo Faapouliuli

O se ulugalii e nonofo faatasi ae le’i faaipoipo e tatau ona tautino atu e ola i le tulafono o le ola mama po o le legavia a o lei mafai ona papatisoina se tasi o i laua. E aofia ai i lenei mea le faatinoina o le faatuatua e salamo ai e pei ona faamatalaina i le Mataupu Faavae ma Feagaiga 20:37. E aofia ai foi le le toe nonofo faatasi pe, i le tulaga o se alii ma se tamaitai, o le faaipoipo.

38.2.8.5

O Tagata Na Soloia Mai le Avea Ai ma Tagata o le Ekalesia pe Ua Faamavae Mai le Avea Ai ma Tagata Auai

O tagata ua soloia mai le avea ma tagata o le Ekalesia pe ua faamavae mai le avea ma tagata o le Ekalesia, e mafai ona toe faaulufale mai e ala i le papatisoga ma le faamauga. E le faitaulia i latou o ni tagata liliu mai. E le faatalanoaina i latou e faifeautalai mo le papatisoga. Mo faatonuga, tagai i le 32.16.

38.2.8.6

Tulaga e Manaomia ai le Faatagaga mai le Peresitene o le Misiona po o le Au Peresitene Sili

E manaomia le faatagaga mai le peresitene o le misiona a o lei mafai ona papatisoina se tagata pe afai na ia:

• Faia se solitulafono matuia (tagai i le 38.2.8.7).

• Auai i se faapau pepe (tagai i le 38.6.1).

I tulaga faapenei, e faatalanoa e le peresitene o le misiona le tagata. Afai e tatau ai, e mafai e le peresitene o le misiona ona faatagaina se tasi o ona fesoasoani e faia le faatalanoaga. Na te tuuina atu eseese lenei faatagaga mo faatalanoaga taitasi. O le fesoasoani na te faatautaia, na te lipotia i le peresitene o le misiona, o lē e mafai ona ia faatagaina pe teena le papatisoga ma le faamauga.

E manaomia le faamaoniga mai le Au Peresitene Sili a o lei mafai ona papatiso ma faamauina se tagata pe afai o ia:

• Na faia le fasioti tagata (tagai i le 38.2.8.7).

• Na faasalaina i se solitulafono e aofia ai amioga le pulea faalefeusuaiga (tagai i le 38.2.8.7).

• O loo faanofo vaavaaia i le taimi nei faaletulafono pe palola mo soo se solitulafono matuia po o se solitulafono (e masani lava ona faasalaina i le tasi le tausaga i le falepuipui po o le umi atu) po o soo se solitulafono e aofia ai amioga sese faalefeusuaiga (tagai i le 38.2.8.7).

• Na aafia i faaipoipoga autaunonofo (tagai i le 38.2.8.8).

Mo se taitaiga e uiga i le papatisoina ma le faamauina o tagata taitoatasi o e faailoa mai o ni tagata ua faafoliga i le itupa faafeagai, tagai i le 38.2.8.9.

Afai o loo sailia e le tagata le papatisoga mo le taimi muamua, e faatalanoa o ia e le peresitene o le misiona. Afai na te mauaina le tagata e agavaa ma afai na te fautuaina atu le papatisoga, na te auina atu se talosaga mo le faamaoniga i le Au Peresitene Sili e faaaoga ai le PTF.

Afai sa avea muamua le tagata ma se tagata o le ekalesia o loo sailia le toefaaulufaleina mai, e faatalanoaina uma e le epikopo ma le peresitene o le siteki o ia. E la te mulimuli i faatonuga o loo i le 32.16. Afai la te taufai mauaina le tagata e agavaa ma fautuaina atu le papatisoga, e auina atu e le peresitene o le siteki se talosaga i le Au Peresitene Sili e faaaoga ai le PTF.

Soo se talosaga i le Au Peresitene Sili e tatau ona aofia ai auiliiliga taua uma e pei ona fuafuaina i faatalanoaga.

Tagai i le 6.2.3 e uiga i le tiutetauave o le peresitene o le siteki (po o le misiona) pe a auina atu talosaga i le Au Peresitene Sili.

38.2.8.7

O Tagata Na Faasalaina i ni Solitulafono

O tagata ua faasalaina i solitulafono e le mafai ona papatiso seiloga ua latou faamaeaina o latou tuutuuga o le faafalepuipuiina. E moni lenei mea mo tagata liliu mai ma i latou o loo sailia le toefaaulufaleina mai.

O tagata ua molia i solitulafono po o soo se solitulafono e aofia ai amioga feusuai e le mafai ona papatiso ma faamau seiloga ua latou faamaeaina foi o latou taimi o le faanofo vaavaaia po o le palola. E na o le Au Peresitene Sili e mafai ona faatagaina se tuusaunoaga (tagai i le 38.2.8.6). Ua fautuaina nei tagata ina ia galulue vavalalata ma taitai perisitua i le lotoifale. Latou te tauivi ia faia mea uma latou te mafaia e maua ai le fesoasoani a le Faaola ina ia agavaa ai mo le papatisoga ma le faamauga.

E le aoaoina e faifeautalai faamisiona ia tagata o loo i le falepuipui.

O se tagata na ta’usalaina i le fasioti tagata po o se solitulafono e aofia ai amioga le pulea faalefeusuaiga e le mafai ona papatisoina sei vagana ua tuuina mai e le Au Peresitene Sili le faamaoniga (tagai i le 38.2.8.6). E moni foi lena mo se tagata na ta‘uta’u atu le fasioti tagata, e tusa lava pe na faalilolilo le ta‘uta’u atu i se taitai perisitua. E pei ona faaaogaina iinei, o le fasioti tagatae le aofia ai le faapa’ū pepe po o le faatinoga a leoleo po o le militeli e tusa ai ma le tiute.

Afai o loo sailia e le tagata le papatisoga mo le taimi muamua, e mulimuli le peresitene o le misiona i faatonuga o loo i le 38.2.8.6. Afai o le tagata sa avea muamua ma se tagata o le ekalesia o loo sailia le toefaaulufaleina mai, e mulimuli le epikopo ma le peresitene o le siteki i faatonuga o loo i le vaega lava e tasi (tagai foi i le 32.16).

38.2.8.8

Tagata Matutua na Aofia i Autaunonofo

O se tagata matua na uunaiaina, aoaoina, pe sa aafia ai foi i le faatinoga o autaunonofo, e tatau ona maua se faamaoniga mai le Au Peresitene Sili a o lei mafai ona papatiso ma faamauina.

Afai o loo sailia e le tagata le papatisoga mo le taimi muamua, e mulimuli le peresitene o le misiona i faatonuga o loo i le 38.2.8.6. Afai o le tagata sa avea muamua ma se tagata o le ekalesia o loo sailia le toefaaulufaleina mai, e mulimuli le epikopo ma le peresitene o le siteki i faatonuga o loo i le 38.2.8.6 (tagai foi i le 32.16).

O le talosaga e tatau ona faamatala ai le auai o le tagata i le taimi ua tuanai i faaipoipoga autaunonofo. E tatau foi ona faamatalaina ai lona salamo ma le tulaga faaleaiga o i ai nei.

38.2.8.9

O Tagata Ua Faailoa Mai o ni Tagata ua Faafoliga i le Itupa Faafeagai

E maua le papatisoga ma le faamauga e tusa ai ma le itupa moni na fanau mai ai le tagata. O tagata agavaa e le o tulitulimatagauina ni suiga e ala i taotoga, vai ma fualaau faafomai, pe faaagafesootai e ese mai o latou itupa moni i le taimi e fanau mai ai, e mafai ona papatisoina ma faamauina. (Mo se faauigaga o le suiga faaagafesootai, tagai i le 38.6.23.)

Soo se tuusaunoaga i lenei aiaiga faavae e moomia ai le faamaoniga a le Au Peresitene Sili. Ina ia talosagaina se faamaoniga, mo se tamaitiiti e valu tausaga le matua, e faatalanoa e le peresitene o le misiona, po o le peresitene o le siteki le tagata. Afai na te mauaina le tagata e agavaa ma afai na te fautuaina atu le papatisoga ma le faamauga, na te auina atu se talosaga mo le faamaoniga i le Au Peresitene Sili e faaaoga ai le PTF

Afai e faamaonia mai e le Au Peresitene Sili le papatisoga ma le faamauga, o le a le mafai e le tagata ona maua le perisitua, se pepa faataga o le malumalu, po o nisi valaauga o le Ekalesia a o fesuiai. Peitai, e mafai e le tagata ona auai i le Ekalesia i isi auala.

O tagata taitoatasi o e na faia ni laasaga i le suiga ona toe suia lea i o latou itupa moni na fanau mai ai ma ua agavaa ma tautino atu e tausi poloaiga a le Atua e mafai ona papatisoina ma faamauina.

E talanoaina ma le matuā faaeteete e peresitene o misiona, po o peresitene o siteki ia tulaga taitasi mo se [tamaitiiti e] valu tausaga le matua, faatasi ma le alofa faaKeriso. Latou te sailia fautuaga mai le Au Peresitene o le Eria.

Mo nisi faamatalaga, tagai i le 38.6.23.

38.2.9

Faauuga i le Perisitua

Mo faamatalaga lautele e uiga i faauuga i le perisitua, tagai i le 18.10.

38.2.9.1

Tagata Fou o le Ekalesia

Pe a papatiso se uso ma faamau, ua agavaa o ia e faauu i se tofi i le Perisitua Arona pe afai o le a le itiiti ifo ma le 12 ona tausaga i le faaiuga o le tausaga. E faatalanoa o ia e le epikopo i le taimi lava e maea ai lona faamauga, e masani lava i totonu o se vaiaso. E tuuina atu o ia e se tasi o le au epikopo i le sauniga faamanatuga ina ia mafai ai e tagata o le uarota ona lagolagoina lona faauuga ua fautuaina atu (tagai i le 18.10.3). Ona mafai lea ona faauuina o ia i le tofi talafeagai:

• Tiakono, pe afai o le a atoa lona 12 po o le 13 i le faaiuga o le tausaga

• A’oa’o, pe afai o le a atoa lona 14 po o le 15 i le faaiuga o le tausaga

• Ositaulaga, pe afai o le a atoa lona 16 tausaga pe matua atu i le faaiuga o le tausaga; pe afai e 19 ona tausaga pe matua atu, e faitaulia foi o ia o se toeaina faaolioli (tagai i le 38.2.9.3)

E agavaa se tagata fou o le ekalesia e maua le Perisitua Mekisateko ma faauuina o se toeaina pe afai:

• E 18 tausaga pe matua atu.

• Na auauna atu o se ositaulaga (e leai se taimi patino e manaomia).

• Ua lava le malamalama o le talalelei.

• Ua faaalia le agavaa.

O uso fou faatoa papatiso e le faauuina i le aso e papatisoina ai i latou pe faamauina. E tatau ona faatalanoaina muamua i latou e le epikopo ma lagolagoina e tagata o le uarota.

E le tatau ona tolopoina ia papatisoga o tagata o le aiga se’i mafai e le tamā ona maua le perisitua ma faatino e ia lava ia papatisoga.

38.2.9.2

Alii Talavou E Le’i Faaipoipo o Latou Matua (E Aofia ai le Tete’a)

E mafai ona faauuina se alii talavou i tofi o le Perisitua Arona pe a maua mai e le epikopo le faatagaga tuugutu mai matua po o e o vaaia. E le manaomia le faatagaga mai se matua po o se tagata e vaaia le tamaitiiti e leai se faavae faaletulafono mo le tetee atu i le faauuga.

Afai e alu le alii talavou i le faaiu o lona tama fai, e mafai ona faauuina o ia i lena igoa. E moni lenei mea e tusa lava pe lei vaetamaina aloaia o ia. Ae peitai, o le igoa faaletulafono o le alii talavou, e pei ona faauigaina ai e le tulafono po o le agaifanua i le lotoifale, e tatau ona tusia i luga o le tusi faamaonia o le faauuga.

38.2.9.3

Alii Ua Faamoemoe mo le Tofi Toeaina

O se toeaina faaolioli, o se alii e 19 tausaga pe matua atu o le Ekalesia e na te le o umiaina le Perisitua Mekisateko. O uso ua faaipoipo e i lalo ifo o le 19 tausaga ma e le o umiaina le Perisitua Mekisateko o ni toeaina faaolioli foi.

I lalo o le taitaiga a le epikopo, e galulue vavalalata ai le au peresitene o le korama a toeaina ma toeaina faaolioli e fesoasoani ia i latou e saunia ia maua le Perisitua Mekisateko. Afai e le o se ositaulaga se toeaina faaolioli, e tatau ona faauuina o ia o se ositaulaga i le taimi lava e agavaa ai o ia. E le tau manaomia ona faauuina muamua o ia o se tiakono po o se a’oa’o. E mafai ona faauuina o ia o se toeaina pe afai ua lava se malamalamaaga ua ia atiina ae i le talalelei ma faaalia lona agavaa. E faatalanoa o ia e le epikopo ma le peresitene o le siteki ina ia faia ai lenei filimaotiga po o le faaiuga (tagai i le 31.2.6).

Mo ni isi faamatalaga e uiga i le fesoasoani atu i toeaina faaolioli e sauniuni e maua le Perisitua Mekisateko, tagai i le 8:4.

38.2.9.4

O Uso Ua Suia Uarota i totonu o le Tausaga ua Tuanai

O ni isi taimi o se uso e itiiti ifo ma le tasi le tausaga o nofo ai i se uarota e moomia po o manao ia faauu i se tofi o le Perisitua Mekisateko. I lena tulaga, e faafesootai e le epikopo po o se fesoasoani ua tofia le epikopo muamua e fesili atu pe i ai ni mataupu o le agavaa e tatau ona iloiloina. Afai e maua e se fesoasoani se faamatalaga e le faalauaiteleina, na te faamutaina loa le talanoaga. Na te faailoa atu i le epikopo e faafesootai le epikopo talu ai a o lei faia se faatalanoaga.

38.2.9.5

O Uso i Uarota a Talavou Nofofua Matutua ma Uarota a le Au Matutua Nofofua

O alii agavaa ua 18 tausaga ma matutua atu o loo i uarota a talavou nofofua matutua ma uarota a le au matutua nofofua, e tatau ona faauu o ni toeaina. O i latou e le’i faauuina o ni toeaina o latou o se vaega o le korama a toeaina o ni toeaina faaolioli.

38.2.9.6

Fitafita o le Militeli i Sone o Taua po o Eria Mamao Ese

E masani lava ona faatalanoaina se fitafita o le militeli ma faauuina i le uarota o loo i ai lona pepa faamaumau. Peitai, atonu e le mafai pe afai o lea fitafita e tautua i le sami mo se taimi umi pe o loo tautua foi i se sone o taua po o se eria mamao ese. O tulaga la faapea, e talanoa ai le fitafita ma le taitai o la latou vaega a uso o le ekalesia o loo avea ma fitafita. Afai e lagona e le taitai o le vaega ua saunia le fitafita ina ia faauuina, na te tuuina atu se fautuaga tusitusia i le taitai pulefaamalumalu o le iunite a le Ekalesia lea e vaaia le vaega o tagata tautua. (Afai e leai se iunite faapena a le Ekalesia, na te tuuina atu le fautuaga i le Au Peresitene o le Eria.) E faafesootai e lena taitai le epikopo o le uarota tumau a le fitafita e faamaonia ai le agavaa o le alii.

Mo le faauuina i tofi o le Perisitua Arona, e mafai e le taitai pulefaamalumalu ona faatagaina le taitai vaega po o se failotu o le Au Paia o Aso e Gata Ai e faatalanoa le tagata ma vaaia le faauuga. Mo le faauuina i le tofi o le toeaina, e mafai e le peresitene o le siteki, peresitene o le misiona, po o le Au Peresitene o le Eria ona faatagaina se failotu o le Au Paia o Aso e Gata Ai e faatalanoa le tagata ma vaaia le faauuga. O faauuga uma lava e tatau ona lagolagoina pe faamaonia e pei ona faamatalaina atu i le 18.10.3.

38.2.9.7

O Uso E I Ai Manaoga Faapitoa Faalemafaufau

O se alii o le ekalesia e le atoatoa le malosi faaleatamai, e fefautuaai faatasi ona matua (i nofoaga e faatatau i ai), ma le epikopo pe tatau ona ia maua le perisitua. Latou te fefautuaai e uiga i ona manaoga ma pe o ia te ia se malamalamaaga autu e uiga i le perisitua ma ona tiutetauave.

O i latou e umia le perisitua o loo i ai ni manaoga faapitoa, e tatau ona fesoasoani atu i ai ina ia mafai ona faataunuu o latou tiutetauave i le atoatoa e mafai ai.

38.2.9.8

O Uso Ua Toe Faaulufale Mai e ala i le Papatisoga ma le Faamauga

A toe faaulufale mai se alii e lei maua muamua faaeega paia i le Ekalesia e ala i le papatisoga ma le faamauga, e mafai ona faauuina o ia i le taimi lava e maea ai. E faauuina o ia i le tofi o le perisitua sa ia umia ina ua soloia pe faamavae mai lona avea ai ma tagata o le Ekalesia.

Afai na maua muamua faaeega paia o le alii, e le faauuina o ia i se tofi o le perisitua. Ae, e toefuatai mai lona tofi talu ai e ala i le sauniga o le toefuataiga o faamanuiaga.

Mo nisi faamatalaga ma faatonuga, tagai i le 32.17.

38.2.9.9

O Tagata Ua Faailoa Mai o ni Tagata ua Faafoliga i le Itupa Faafeagai

E maua le faauuga i le perisitua e tusa ai ma le itupa na fanau mai ai se tagata. O se alii agavaa o le Ekalesia e le tulitulimatagauina se suiga faafomai, taotoga, po o se fesuiaiga faaleagafesootai mai lona itupa moni na fanau mai ai e mafai ona maua ma faaaogaina le perisitua. (Mo se faauigaga o le suiga faaagafesootai, tagai i le 38.6.23.)

O alii o le ekalesia o e na faia ni laasaga mo le suiga ona toe suia lea i o latou itupa moni na fanau mai ai ma ua agavaa ma tautino atu e tausi poloaiga a le Atua e mafai ona maua ma faaaoga le perisitua.

E fefautuaai ia epikopo ma le peresitene o le siteki e talanoaina ai tulaga taitasi ma le matuā faaeteete ma le alofa faaKeriso. E sailia e peresitene o siteki ma peresitene o misiona ia fautuaga mai le Au Peresitene o le Eria.

Mo nisi faamatalaga, tagai i le 38.6.23.

38.2.10

Faamanuiaga Faapeteriaka

Mo faamatalaga lautele e uiga i faamanuiaga faapeteriaka, tagai i le:

• Vaega 18.17 o lenei tusitaulima.

• Faamatalaga ma Fautuaga mo Peteriaka.

• Fonotaga Faaleaoaoga a Taitai i le Lalolagi Atoa: O Le Peteriaka.

38.2.10.1

O Tagata o le Ekalesia E I Ai se Manaoga Faapitoa Faaleatamai

O se tagata o le ekalesia e i ai se manaoga faapitoa faaleatamai, e fefautuaai faatasi ona matua (i tulaga e tatau ai), ma le epikopo e fuafua ai pe tatau ona maua sona faamanuiaga faapeteriaka. Latou te mafaufau i manaoga o le tagata ma pe o i ai sona tomai autu e malamalama ai i le faamanuiaga. Afai o lea, e mafai e se tasi o le au epikopo ona tuuina atu se Pepa Faataga mo Faamanuiaga Faapeteriaka. O loo maua faatonuga i le 18.17.

38.2.10.2

Faifeautalai

O se faamanuiaga faapeteriaka e mafai ona avea o se punavai o le malosi faaleagaga mo se faifeautalai. A mafai, e tatau i se faifeautalai ona mauaina se faamanuiaga faapeteriaka a o le’i amataina lana auaunaga faamisiona. Afai e le mafai lenei mea, e mafai ona ia mauaina se faamanuiaga faapeteriaka i le taimi o lana misiona. E faatalanoa e le peresitene o le misiona le faifeautalai ma saunia se Pepa Faataga mo Faamanuiaga Faapeteriaka. O loo maua faatonuga i le 18.17.

O se faifeautalai i se nofoaga autu mo le aoaoina o faifeautalai (NAF) e faatoa mafai ona maua se faamanuiaga faapeteriaka pe a faatatau uma i ai mea nei:

• E sau le faifeautalai mai se eria e leai se peteriaka e mafai ona tuuina atu se faamanuiaga i le gagana moni a le faifeautalai.

• O le a talai le faifeautalai i se misiona e leai se peteriaka e mafai ona tuuina atu se faamanuiaga i le gagana moni a le faifeautalai.

• O loo i ai se peteriaka e lata ane i le nofoaga autu mo le a’oa’oina o faifeautalai e mafai ona tuuina atu se faamanuiaga i le gagana moni a le faifeautalai.

38.2.10.3

Tagata o le Ekalesia E Ulufale atu i le Militeli

O se faamanuiaga faapeteriaka e mafai ona avea o se punavai o le malosi faaleagaga mo se tagata o le ekalesia o loo auauna atu i le militeli. Afai e mafai, e tatau i se tagata agavaa o le ekalesia ona maua se faamanuiaga faapeteriaka a o lei lipoti atu mo tiute faatino.

Afai e le mafai lenei mea, e mafai e le tagata ona maua se faamanuiaga faapeteriaka i lona nofoaga e tiute tumau ai. O se tasi o le au epikopo iina e faatalanoaina le tagata ma saunia se Pepa Faataga mo Faamanuiaga Faapeteriaka. O loo maua faatonuga i le 18.17.

Mo nisi faamatalaga, e mafai e le peresitene o le siteki ona faafesootai le Ofisa o le Korama a Aposetolo e Toasefululua i le [e-mail].

38.2.10.4

Tagata o le Ekalesia e Nonofo i fafo atu o le Siteki a le Peteriaka

E masani lava ona maua e se tagata o le Ekalesia se faamanuiaga faapeteriaka mai le peteriaka i lana siteki. Peitai, e mafai e se tagata o le ekalesia ona maua se faamanuiaga mai se peteriaka i se isi siteki pe afai o ia:

• O se suli tuusao o le peteriaka (fanau, fanau a fanau, po o fanau a fanau a fanau) e ala i le fanau mai po o le vaetamaina.

• Nofo i se siteki e leai se peteriaka o galue ai.

• Nofo i se itu.

• E le tautala i le gagana e tasi e pei o le peteriaka o le siteki, ma o se peteriaka i se siteki lata ane e tautala i le gagana a le tagata.

I nei tulaga taitasi, e faatalanoa e se tasi o le au epikopo po o le peresitene o le paranesi le tagata e pei ona faamatalaina atu i le 18.17. E tatau i se uso o le au peresitene o le siteki a le peteriaka ma le au peresitene o le siteki po o le misiona a le tagata e mauaina ona faamaonia le pepa faataga e ala i le Polokalama mo Faamanuiaga Faapeteriaka.

38.2.10.5

Faaliliuga o Faamanuiaga Faapeteriaka

O musumusuga ma le uiga o se faamanuiaga faapeteriaka e faigata ona faailoa atu i le faaliliuga. Mo lenei mafuaaga, e tatau ai i tagata o le ekalesia ona maua o latou faamanuiaga i le gagana e sili ona latou malamalama i ai. E le tuuina atu e le Ekalesia ni faaliliuga tusitusia o faamanuiaga faapeteriaka.

E le fautuaina tagata o le ekalesia e faaliliu ia faamanuiaga faapeteriaka. Peitai, o nisi taimi e manaomia ai e se tagata o le ekalesia se faamanuiaga ia faaliliuina i se gagana e malamalama ai o ia. E mafai e le tagata ona sue se tagata faatuatuaina ma agavaa o le Ekalesia e mafai ona tuuina atu le faaliliuga. E tatau i le tagata ona filifili se tagata tomai faaliliuupu e malamalama i le natura faaleagaga ma le le faalauaiteleina o le faamanuiaga. O kopi e faaliliuina o faamanuiaga e le teuina i le laumua o le Ekalesia.

E mafai e se peresitene o le siteki ona talosagaina se tusitusiga togitogi o se faamanuiaga faapeteriaka. Na te faafesootaia le Ofisa o le Korama a Aposetolo e Toasefululua i le [e-mail].

38.2.10.6

Faamatalaupuina o Faamanuiaga Faapeteriaka i le Gagana e Fai i Faailoga

Afai e logonoa pe leaga le faalogo a se tagata o le ekalesia, e mafai ona faamatalaupuina lona faamanuiaga faapeteriaka i le gagana faifaailoga. E faailoa mai e le tagata se faamatalaupu. E sili atu pe afai o lenei tagata o se tagata faatuatuaina ma agavaa o le Ekalesia e malamalama i le taua faaleaoaoga faavae o faamanuiaga faapeteriaka. Peitai, afai e le mafai ona maua se tagata o le Ekalesia, e mafai e se isi tagata e gafatia ona fai le faaliliuga.

38.2.10.7

Faamanuiaga Faapeteriaka Lona Lua

I tulaga e seāseā ona tupu, e mafai e se tagata agavaa o le ekalesia ona talosagaina se faamanuiaga faapeteriaka lona lua. Peitai, e le fautuaina lenei mea, ma e ono le faamaoniaina le talosaga. Afai e i ai i le tagata se mafuaaga taua mo sea talosaga, na te talanoaina ma le epikopo. Afai e lagona e le epikopo e tatau ona i ai se faamanuiaga lona lua, na te saunia se Pepa Faataga mo Faamanuiaga Faapeteriaka. O loo maua faatonuga i le 18.17.

Ona faatalanoa lea o le tagata e le peresitene o le siteki ma faitauina faatasi ma ia le uluai faamanuiaga. Afai na te lagona e tatau ona i ai se faamanuiaga lona lua, na te sailia le faamaoniga mai le Ofisa o le Korama a Aposetolo e Toasefululua i le [e-mail].

E logoina e le peresitene o le siteki le tagata e mauaina ma le peteriaka le faaiuga a le Ofisa o le Korama a Aposetolo e Toasefululua. Afai e faamaonia le talosaga, e faamaonia e le peresitene o le siteki le pepa faataga i le Polokalama mo Faamanuiaga Faapeteriaka. E ta‘u atu e le peresitene o le siteki i le tagata e mauaina o le faamanuiaga lona lua e suitulaga i le uluai faamanuiaga. Ona mafai lea e le peteriaka ona tuuina atu se faamanuiaga faapeteriaka lona lua.

38.3

Faaipoipoga Faalemalo

E faamalosiauina e taitai o le Ekalesia ia tagata ina ia agavaa mo faaipoipoga i le malumalu ma ia faaipoipo ma faamau i se malumalu. Afai e faatagaina e tulafono i le lotoifale, e mafai e taitai o le Ekalesia ona faatinoina ia faaipoipoga faalemalo i tulaga e pei o nei:

• Ua fuafua se ulugalii ina ia faaipoipo i se malumalu, ae o faaipoipoga i le malumalu e le aloaiaina faaletulafono.

• O le a faaipoipo se ulugalii i se malumalu, ae o se faaipoipoga faalemalo o le a fesoasoani i matua po o tagata patino o le aiga ia lagona le faaaofiaina.

• O le mauaina o se malumalu e le o avanoa mo se vaitaimi umi.

• E le o fuafua se ulugalii e faaipoipo i se malumalu.

O se faaipoipoga faalemalo e aoga lava mo le umi e soifua ai se ulugalii. E le tumau i talaatu o le olaga faaletino.

O faaipoipoga faalemalo e tatau ona faatinoina e tusa ai ma tulafono o le nofoaga o loo faatinoina ai le faaipoipoga.

O faaipoipoga faalemalo ma sauniga faalelotu e faatatau i ai e le tatau ona faatinoina i le Sapati. E le tatau foi ona faia i ni itula e le masani ai.

E feutagai le epikopo ma lana peresitene o le siteki pe afai e i ai ni ana fesili e uiga i faaipoipoga faalemalo e le o taliina i le vaega lenei. E mafai e le peresitene o le siteki ona auina sa’o atu ia fesili i le Ofisa o le Au Peresitene Sili.

38.3.1

O Ai e Mafai Ona Faatinoina se Faaipoipoga Faalemalo

Pe a faatagaina ai e le tulafono i le lotoifale, o taitai nei o le Ekalesia o loo auauna atu i le taimi nei e mafai ona galulue i o latou valaauga e faatino se sauniga o le faaipoipoga faalemalo:

• Peresitene o le misiona

• Peresitene o le siteki

• Peresitene o le itu

• Epikopo

• Peresitene o le paranesi

E na o le faaipoipoga faalemalo lava i le va o se alii ma se tamaitai e mafai ona faia e nei taitai. O tulaga uma nei e tatau foi ona faatatau i ai:

• O le tamaitai faaipoipo po o le alii faaipoipo o se tagata o le Ekalesia pe ua i ai se aso o le papatisoga.

• O loo i ai pepa faamaumau a le o le tamaitai faaipoipo po o le alii faaipoipo, pe o le a i ai pe a maea le papatisoga i totonu o le iunite o le Ekalesia lea e pulefaamalumalu ai le taitai.

• Ua faatagaina faaletulafono le taitai o le Ekalesia e faatautaia se faaipoipoga faalemalo i le pule aloaia i le nofoaga o le a fai ai le faaipoipoga.

O le aufailotu o le Au Paia o Aso e Gata Ai e galulue i tiute faamiliteli e mafai ona faatinoina faaipoipoga faalemalo e aunoa ma se tau faamaonia muamua.

O le aufailotu ua tofia e iunite Faaleoleo po o le Puipuiga Faaleatunuu e tatau ona maua muamua se faamaoniga mai le Vaega o Mataupu Faamiliteli o le Ekalesia ma Auaunaga a Failotu e faatino ai se faaipoipoga faalemalo. Tagai i faamatalaga e faafesootai ai i le 38.9.10.

O aufailotu e le ni failotu fitafita militeli o e auauna atu i faalapotopotoga ua ta’ua i lalo, e tatau ona maua muamua se faamaoniga mai le Vaega o Mataupu Faalemiliteli o le Ekalesia ma Auaunaga a Failotu e faatino ai se faaipoipoga faalemalo:

• Falemai

• Faalapotopotoga falemai mo tausiga

• Nofoaga autu mo e o soifua e fesoasoani i ai

• Falepuipui

• Leoleo tuaoi

• Matagaluega o leoleo po o tineimu

E le faatagaina le aufailotu ua litaea e faatinoina ni faaipoipoga faalemalo i o latou agavaa o ni aufailotu.

O i latou o e faatinoina faaipoipoga e galulue i o latou valaauga o ni taitai o le Ekalesia po o aufailotu e tatau ona faaaogaina taiala o loo i le vaega lenei. Latou te mulimuli foi i tulaga manaomia uma faaletulafono.

O aufailotu o le Au Paia o Aso e Gata Ai e le faapea o ni taitai pulefaamalumalu o le Ekalesia sei vagana o loo latou auauna o se peresitene o le siteki, epikopo, po o le peresitene o le paranesi. A faatino e se failotu e le o se taitai pulefaamalumalu o le Ekalesia se faaipoipoga faalemalo, e galue o ia o se sui o le malo po o se faalapotopotoga faalemalo o loo ia tautuaina. O le mea lea, ua suia teisi ai le faaupuga o le sauniga o le faaipoipoga faalemalo mo nei aufailotu e pei ona faailoa atu i le 38.3.6.

O aufailotu o le Au Paia o Aso e Gata Ai e mafai ona faatinoina na o se faaipoipoga faalemalo i le va o se alii ma se tamaitai.

O taitai faale-Ekalesia ma aufailotu o e faatinoina faaipoipoga faalemalo mo tagata o le Ekalesia, e tatau ona tuuina atu le faamatalaga manaomia o le faaipoipoga i le failautusi o le uarota po o le paranesi. E faafou e le failautusi pepa faamaumau.

O se taitai faale-Ekalesia po o se failotu e faatinoina ia faaipoipoga faalemalo i lona tulaga faale-Ekalesia e le mafai ona ia taliaina se totogi.

38.3.2

Faaipoipoga Faalemalo mo Tagata o le Ekalesia mai Isi Iunite

E le mafai e se taitai o le Ekalesia ona faatino se faaipoipoga mo tagata o le Ekalesia pe afai e leai ni pepa faamaumau o le tamaitai faaipoipo po o le alii faaipoipo foi i le iunite o le Ekalesia e pulefaamalumalu ai le taitai (tagai i le 38.3.1). E faia se tuusaunoaga mo le aufailotu o le Au Paia o Aso e Gata Ai ma taitai o le Ekalesia o e taitai i le malo.

38.3.3

Faaipoipoga Faalemalo mo i Latou E Le o Ni Tagata o le Ekalesia

E le mafai e se taitai o le Ekalesia ona faatinoina se faaipoipoga pe afai e le o se tagata o le Ekalesia le tamaitai faaipoipo po o le alii faaipoipo se’i vagana o loo i ai se aso o le papatisoga o se tasi po o i la‘ua uma. E faia se tuusaunoaga mo le aufailotu o le Au Paia o Aso e Gata Ai ma taitai o le Ekalesia o e taitai i le malo.

38.3.4

O Faaipoipoga Faalemalo e Faia i totonu o Fale o le Ekalesia

E mafai ona faia le sauniga o se faaipoipoga i totonu o se fale o le Ekalesia pe afai e le faalavelave i le faasologa masani o galuega tauave faale-Ekalesia. E le tatau ona faia ni faaipoipoga i le Sapati po o afiafi o Aso Gafua. O faaipoipoga e faia i totonu o fale o le Ekalesia e tatau ona faigofie ma mamalu. O musika e tatau ona paia, migao, ma olioli.

O faaipoipoga e mafai ona faatinoina i totonu o le falesa, o le fale faafiafia, po o se isi potu talafeagai. O ‘aiga o faaipoipoga e le mafai ona faia i le falesa se’i vagana o se vaega e faaaoga mo le tele o faamoemoega. O faaipoipoga e tatau ona mulimuli i taiala mo le faaaogaina tatau o le falelotu (tagai i le 35.5.3).

E le faatagaina e le Ekalesia ona falelotu po o meatotino ina ia faaaogaina mo soo se faamoemoega e faatatau i le itupa tutusa, autaunonofo, lē tusa ai ma tulafono, po o isi faaipoipoga e le ogatusa ma aoaoga faavae po o aiaiga faavae a le Ekalesia.

I tulaga e le masani ai, e mafai e le epikopo ona faatagaina le faaaogaina o se fale o le Ekalesia mo faaipoipoga e faia e se tasi e le o se taitai o le Ekalesia pe mo i latou e le o ni tagata o le Ekalesia. E muamua ona la fefautuaai ma le peresitene o le siteki. E fefautuaai o ia ma le tagata o le a taitai e faamautinoa ua malamalama o ia i taiala o loo i lenei vaega. E auai se sui o le aufono a le siteki po o le uarota e faamautinoa le faaaogaina tatau ma le tausiga o le fale.

E mafai e le epikopo ona faatagaina se faasalalauga tuusao o se faaipoipoga e faatinoina i totonu o se fale o le Ekalesia (tagai i le 29.7).

38.3.5

Faaipoipoga Faalemalo e Ao Ona Faatinoina e se Taitai Faalemalo po o se Nofoaga Faitele

I nisi o nofoaga, e manaomia e tulafono le faatinoina o se sauniga o le faaipoipoga e se taitai aloaia o tagata lautele. O nisi e moomia ona faatinoina le sauniga i se fale faitele po o se isi nofoaga faitele. I tulaga faapenei, e mafai e se taitai perisitua ua faatagaina ona taitaia se faatasiga puupuu faalelotu pe a mavae le faaipoipoga faalemalo. I lenei faatasiga na te tuuina atu ai fautuaga i le ulugalii.

38.3.6

Sauniga o Faaipoipoga Faalemalo

O le faaipoipoga e paia ma e tatau ona faamamaluina ma faaaloalogia e pei ona tatau ai. O faaipoipoga mo tagata o le Ekalesia e faatinoina i fafo atu o le malumalu e tatau ona atagia mai ai se agaga o le tautinoga ma le olioli.

Sei vagana ai mea ua ta‘ua, o faamatalaga i lenei vaega e faatatau i au failotu o le Au Paia o Aso e Gata Ai faapea foi ma taitai o le Ekalesia.

A o lei faatinoina se faaipoipoga faalemalo, e mafai e se taitai o le Ekalesia ona fautuaina le ulugalii e uiga i le natura paia o tautoga o le faaipoipoga. E mafai ona ia faaopoopo atu i ai isi fautuaga a o taitaiina e le Agaga.

Ina ia faatinoina se faaipoipoga faalemalo, e saunoa atu le taitai o le Ekalesia i le ulugalii ma faapea atu, “Faamolemole ia oulua faatalofa i lima taumatau.” Ona ia faapea atu lea, “[Igoa atoa o le alii faaipoipo] ma le [igoa atoa o le tamaitai faaipoipo], ua oulua faatalofa nei i lima taumatau o le faailoga o tautoga o le a oulua ulu atu nei i ai i luma o le Atua ma nei molimau.” (E mafai e le ulugalii ona filifilia pe tofia nei molimau a o le’i o’o i le taimi.)

Ona faapea atu lea o le taitai i le alii faaipoipo ma fesili atu, “[Igoa atoa o le alii faaipoipo], pe e te avea ea [igoa atoa o le tamaitai faaipoipo] e fai ma au ava faaipoipo faaletulafono, ma pe e te folafola atu ea ma le faamaoni i lou lava loto malie ma lau lava filifiliga saoloto i le avea ai ma ana soa ma tane faaipoipo faaletulafono, o le a e pipii atu ia te ia ae le o se tasi; o le a e tausia uma tulafono, tiutetauave, ma matafaioi e faatatau i le tulaga paia o le faaipoipoga; ma o le a e alofa, faamamalu, ma faapelepele ia te ia po o le a lava le umi e te lua ola ai?”

E tali mai le alii faaipoipo, “Ioe” po o le “O lea lava.”

Ona faapea atu lea o le taitai o le Ekalesia i le tamaitai faaipoipo ma fesili atu, “[Igoa atoa o le tamaitai faaipoipo], pe e te avea ea [igoa atoa o le alii faaipoipo] e fai ma au tane faaipoipo faaletulafono, ma pe e te folafola atu ea ma le faamaoni ia te ia i lou lava loto malie ma lau lava filifiliga saoloto e avea ma ana soa ma ava faaipoipo faaletulafono ma o le a e pipii atu ia te ia ae le o se tasi; o le a e tausia uma tulafono, tiutetauave, ma matafaioi e faatatau i le tulaga paia o le faaipoipoga; ma o le a e alofa, faamamalu, ma faapelepele ia te ia po o le a lava le umi e te lua ola ai?”

E tali mai le tamaitai faaipoipo, “Ioe” po o le “O lea lava.”

Ona faapea atu lea o le taitai o le Ekalesia i le ulugalii, “I le pule faalemalo ua tuuina mai ia te au o se toeaina O Le Ekalesia a Iesu Keriso o le Au Paia o Aso e Gata Ai, ou te fai atu ai ia te oulua, [igoa o le alii faaipoipo] ma [le igoa o le tamaitai faaipoipo], ua avea nei oulua o se tane ma se ava ua faaipoipoina faaletulafono mo le vaitaimi o o oulua soifuaga i le olaga nei.”

(Ia sui faaupuga mo se failotu e le o avea o se taitai pulefaamalumalu o le Ekalesia: “I le pule faalemalo ua tuuina mai ia te au o se failotu i le [lala o le militeli po o le faalapotopotoga faalemalo], ou te fai atu ai ia te oulua, [igoa o le alii faaipoipo] ma [le igoa o le tamaitai faaipoipo], ua avea nei oulua o se tane ma se ava ua faaipoipoina faaletulafono mo le vaitaimi o o oulua soifuaga i le olaga nei.”)

“Ia faamanuia e le Atua la oulua faatasiga faatasi ma le olioli i a oulua fanau, ma se soifuaga faafualoaina i le fiafia faatasi, ma ia faamanuia mai o Ia ina ia mafai ona oulua tausia le paia o tautoga ua oulua faia. O nei faamanuiaga ou te tuuina atu i o oulua luga i le suafa o le Alii o Iesu Keriso, amene.”

O le valaaulia e feasogi o se tane ma se ava e tuu lava i le faitalia, e fua i tulaga masani o le aganuu.

38.4

Aiaiga Faavae o Faamauga

E osia e tagata o le Ekalesia feagaiga paia ma le Atua a o latou mauaina sauniga o le malumalu. O sauniga o faamauga o le malumalu e tuufaatasia ai aiga mo le faavavau a o tauivi malosi tagata o le ekalesia e faamamalu feagaiga latou te osia pe a latou mauaina le sauniga. O sauniga o faamauga e aofia ai:

• Faamauina o se tane ma le ava.

• Faamauina o fanau i matua

38.4.1

Faamauga o se Tane ma le Ava

O loo faamatala mai i le siata lenei le mea e maua ai aiaiga faavae mo le faamauina o se tane ma se ava.

Manaomia	Vaega
Manaomia Sa ou faaipoipo faalemalo ma manao ia faamau i lo‘u toalua.	Vaega 38.4.1.1
Manaomia Ua tatala la‘u faaipoipoga mai se toalua muamua ma ua manao ia faamau i lo’u toalua o i ai nei.	Vaega 38.4.1.2
Manaomia O lo‘u toalua na ou faamau i ai ua maliu. O ai e mafai ona ou faamau nei i ai?	Vaega 38.4.1.3
Manaomia Pe mafai ona faamauina au i se tagata ua maliu lea sa ma nonofo faapouliuli e aunoa ma le faaipoipoina faaletulafono?	Vaega 38.4.1.4
Manaomia E manaomia ona ou talosaga mo se faaleaogaina o le faamauga po o se faamaoniga o le faamauga.	Vaega 38.4.1.5
Manaomia Ou te manaomia ona aveesea se tapuia’iga o faamauga o le malumalu.	Vaega 38.4.1.6
Manaomia Sa ma faaipoipo ma lo‘u toalua mo na o le olaga nei i le malumalu. E mafai ona ma faamau o le tasi ma le isi?	Vaega 38.4.1.7
Manaomia O ai e mafai ona faamau i ai tagata o lo‘u aiga ua maliliu?	Vaega 38.4.1.8
Manaomia E faapefea e le tatalaina o le faaipoipoga ona aafia ai la‘u faamauga?	Vaega 38.4.1.9
Manaomia O a aafiaga o le faaleaogaina o se faamauga?	Vaega 38.4.1.10
Manaomia E faapefea e le faamavaega po o le soloia mai le avea ma tagata o le Ekalesia ona aafia ai la‘u faamauga?	Vaega 38.4.1.11

E tatau i tagata o le ekalesia ona fefautuaai ma o latou epikopo pe afai e i ai ni a latou fesili e uiga i aiaiga faavae o faamauga e le o taliina i lenei vaega. E faafesootai e le epikopo le peresitene o le siteki pe afai e i ai ni ana fesili. E faafesootai e le peresitene o le siteki le Ofisa o le Au Peresitene Sili pe afai e i ai ni ana fesili.

O tagata o le ekalesia e i ai ni atugaluga e uiga i le natura e faavavau o le sauniga o le faamauga ma o latou sootaga faaleaiga ma taitoalua ua fautuaina ina ia faalagolago i le Alii ma saili Lana faamafanafanaga. O le a faamautinoa e le Tama Faalelagi ua maua e tagata taitoatasi faamanuiaga uma e mafai ona faatagaina e ona manaoga ma filifiliga.

38.4.1.1

Faamauga o Tagata o le Ekalesia o loo Soifua pe a Mae’a le Faaipoipoga Faalemalo

O se alii ma se tamaitai sa faaipoipoina faalemalo e mafai ona faamauina i le malumalu i le taimi lava e faatagaina ai e tulaga pe afai e ausia tulaga nei:

• O i laua uma o ni tagata o le Ekalesia ia le itiiti ifo ma le tasi le tausaga (tagai i le 27.3.1 ma le 27.2.1).

• Ua saunia ma agavaa i la’ua.

Pe a tuuina atu pepa faataga mo se ulugalii ina ia faamauina, e faamautinoa e taitai perisitua e aloaia faaletulafono le faaipoipoga faalemalo. Tagai i le 26.3 ma le 27.3.

38.4.1.2

Faamauina o Tagata o le Ekalesia o loo Soifua pe a Mavae le Tatalaina o le Faaipoipoga

Tamaitai. E na o le toatasi le tane e mafai ona faamauina i ai i le taimi e tasi se tamaitai o loo soifua. Afai na faamauina o ia ma se tane ma tatalaina mulimuli ane le faaipoipoga, e tatau ona ia maua se faaleaogaina o lena faamauga a o lei faamau atu i se isi alii i lona olaga atoa (tagai i le 38.4.1.5).

O se tamaitai soifua e le o faaipoipo i le taimi nei pe o faamau i se isi alii e mafai ona faamau i se tane ua maliu na tatala le la faaipoipoga i le ola nei. E tatau ona ia mauaina muamua se maliega ua sainia mai le toalua o lana tane muamua (pe afai e i ai).

Tagai i le mataupu 28 mo faamatalaga e uiga i le faatinoina o sauniga mo se toalua ua maliu.

Alii. Afai na faamauina se alii ma se tamaitai ma tatalaina mulimuli ane le faaipoipoga, e tatau i le alii ona maua se faamaoniga e tatala ai le faamauga a o lei faamauina i se isi tamaitai (tagai i le 38.4.1.5). E manaomia pea se faamaoniga o le faamauga pe afai (1) ua faaleaogaina le faamauga muamua po o le (2) ua maliu le ava muamua.

E manaomia se faamaoniga o le faamauga pe afai ua tatala le faaipoipoga a se alii mai le tamaitai aupito lata mai ona faamauina ia te ia. Mo se faataitaiga, afai e maua e se alii se faamaoniga o le faamauga ina ia faamau ai i se ava lona lua pe a uma ona tatala le faaipoipoga, a e maliu lea o lana ava lona lua, o le a ia le manaomia se faamaoniga o le faamauga ina ia toe faamauina ai.

E mafai ona faamauina se alii soifua i se ava ua maliu lea na tatala le la faaipoipoga i le ola nei. E tatau ona ia mauaina muamua le maliega ua sainia mai le toalua o lona toalua muamua ua maliu lana ava (pe afai e i ai). Afai ua faaipoipo o ia, e tatau foi ona ia maua se maliega tusitusia mai lana avā o loo i ai nei pe afai o loo soifua o ia.

Tagai i le mataupu 28 mo faamatalaga e uiga i le faatinoina o sauniga mo se toalua ua maliu.

38.4.1.3

Faamauina o Tagata o le Ekalesia o loo Soifua pe a Mavae le Maliu o se Toalua

Tamaitai. Afai ua faamau se tane ma se ava ae maliu le tane, e le mafai e le tamaitai ona faamau i se isi alii vagana ua ia maua se faaleaogaina o le faamauga muamua (tagai i le 38.4.1.5).

O se tamaitai soifua e le o faaipoipo i le taimi nei pe lei faamauina i se isi alii e mafai ona faamau i se tane ua maliu (tagai i le 38.4.1.8). Afai na faamuta i le tatalaina o le faaipoipoga, tagai i le 38.4.1.2.

O se tamaitai soifua o loo faaipoipo i le taimi nei, e le mafai ona faamauina i se tane ua maliu e aunoa ma le faatagaga a le Au Peresitene Sili.

Tagai i le mataupu 28 mo faamatalaga e uiga i le faatinoina o sauniga mo se toalua ua maliu.

Alii. Afai ua faamau se tane ma le ava ae maliu le ava, e mafai e le alii ona faamau i se isi tamaitai pe afai e lei faamau o ia i se isi alii. I le tulaga lenei, e le manaomia ai e le alii se faamaoniga o le faamauga mai le Au Peresitene Sili vagana na tatalaina lana faaipoipoga mai lana ava muamua a o le’i maliu o ia (tagai i le 38.4.1.2).

E mafai ona faamauina se alii soifua i se avā ua maliu pe afai e le i faamauina lea avā i se isi tane a o soifua. Afai na faamauina o ia i se isi tane a o soifua, e tatau ona maliliu alii uma sa faaipoipo i ai a o lei faamauina se isi alii ia te ia (tagai i le 38.4.1.8). Afai na faamuta i le tatalaina o le faaipoipoga, tagai i le 38.4.1.2

A o lei faamauina i se avā ua maliu, e tatau i se alii ua faaipoipo ona maua se maliega tusitusia mai lana avā o i ai nei pe afai o soifua o ia.

Tagai i le mataupu 28 mo faamatalaga e uiga i le faatinoina o sauniga mo se toalua ua maliu.

38.4.1.4

Faamauina o se Tagata Soifua i se Tagata ua Maliu o Lē sa La Nonofo Faapouliuli

Tamaitai. E avea o se tuusaunoaga, o se tamaitai soifua e le o faaipoipo i le taimi nei pe lei faamauina i se isi alii e mafai ona faamau i se tane ua maliu sa la nonofo faapouliuli. E na o le pau le taimi e mafai ona faitaulia ai lenei tuusaunoaga pe afai o le la mafutaga sa i ai se natura ma se umi e faaalia ai se naunautaiga e faia mea uma nei:

• Ia faamaoni le tasi i le isi i se mafutaga tumau.

• Faataunuu tiutetauave uma faale-faaipoipoga i le tasi ma le isi.

• Faataunuu tiutetauave uma faamatua i soo se fanau sa i ai.

Afai e lagona e le peresitene o le siteki a le tagata e tatau ona i ai se tuusaunoaga faapena, na te auina atu se talosaga i le Ofisa o le Au Peresitene Sili.

Alii. O se tuusaunoaga, e mafai ona faamauina se alii soifua i se tamaitai ua maliu lea sa la nonofo faapouliuli pe afai e le’i faamauina o ia i se isi alii i le taimi o lona soifuaga. E na o le pau le taimi e mafai ona faitaulia ai lenei tuusaunoaga pe afai o le la mafutaga sa i ai se natura ma se umi e faaalia ai se naunautaiga e faia mea uma nei:

• Ia faamaoni le tasi i le isi i se mafutaga tumau.

• Faataunuu tiutetauave uma faale-faaipoipoga i le tasi ma le isi.

• Faataunuu tiutetauave uma faamatua i soo se fanau sa i ai.

A o lei faamauina i se avā ua maliu, e tatau i se alii ua faaipoipo ona maua se maliega tusitusia mai lana avā o i ai nei pe afai o soifua o ia.

Afai e lagona e le peresitene o le siteki a le tagata e tatau ona i ai se tuusaunoaga faapena, na te auina atu se talosaga i le Ofisa o le Au Peresitene Sili.

38.4.1.5

Talosaga mo le Faaleaogaina o se Faamauga po o le Faamaoniga o se Faamauga

Tagai i le 38.4.1.2 mo faamatalaga e uiga i le faamauina o tagata o loo soifua pe a mavae se tatalaga o se faaipoipoga. Tagai i le 38.4.1.3 mo faamatalaga e uiga i le faamauina o tagata o loo soifua ina ua mavae le maliu o se toalua.

O tagata o itupa e lua e mafai ona sailia se faaleaogaina o le faamauga e tusa lava pe latou te le o sauniuni e faamau i se isi toalua. E tatau i se alii o le Ekalesia ona maua se faamaoniga o le faamauga ina ia faamau ai i se isi tamaitai pe a mavae se tatalaga o se faaipoipoga.

O le faagasologa mo le sailia o se faaleaogaina o le faamauga po o le faamaoniga o le faamauga o loo otooto atu i lalo.

1. E talanoa le tagata ma lona epikopo e uiga i le talosaga.

2. E faamautinoa e le epikopo:

   1. Ua mae‘a le tatalaina o le faaipoipoga.

   2. O loo i ai nei le tagata i tulaga faamalieina uma faaletulafono mo le lagolago o le tamaitiiti ma le toalua e faatatau i le tatalaina o le faaipoipoga.

3. Afai e fautuaina e le epikopo ia tuuina atu le faamaoniga o le faaleaogaina o le faamauga po o le faamaoniga o le faamauga, e na te:

   1. Faatumu se Talosaga i le Au Peresitene Sili mo le tagata e faaaoga ai le Punaoa mo Taitai ma Failautusi (PTF). O taitai e le mafai ona faaaoga le PTF nai lo lena, e latou te faaaoga se kopi faitino o le fomu o le Talosaga i le Au Peresitene Sili. O lenei fomu e maua mai le Ofisa o Faamaumauga e le Faalauaiteleina i le laumua o le Ekalesia.

   2. Auina atu le talosaga i le peresitene o le siteki.

4. E fono le peresitene o le siteki ma le tagata. E faamaonia e le peresitene o le siteki e faapea:

   1. Ua mae‘a le tatalaina o le faaipoipoga.

   2. O loo i ai nei le tagata i tulaga faamalieina uma faaletulafono mo le lagolago o le tamaitiiti ma le toalua e faatatau i le tatalaina o le faaipoipoga.

5. Afai e fautuaina e le peresitene o le siteki le tuuina atu o le faaleaogaina o le faamauga po o le faamaoniga o le faamauga, na te auina atu le talosaga i le laumua o le Ekalesia e faaaoga ai le PTF. Tagai i le 6.2.3 e uiga i le tiutetauave o le peresitene o le siteki pe a auina atu talosaga i le Au Peresitene Sili.

6. Afai e faamaonia le talosaga, e tuuina mai e le Au Peresitene Sili se tusi e ta‘u mai ai le faaleaogaina o le faamauga po o le faamaoniga o le faamauga.

7. A uma ona maua le tusi, e mafai e le tagata ona faatulaga se taimi atofa mo se faamauga i le malumalu. Na te tauaao atu le tusi i le malumalu.

Tagai i le 38.4.1.9.

38.4.1.6

Aveeseina o se Tapuia’iga mai se Faamauga i le Malumalu

O se tagata e mulilua a o faaipoipo atu i se toalua ua faamau i ai o ia, e le mafai ona faamau i le paaga i le mulilua e aunoa ma se faamaoniga mai le Au Peresitene Sili.

E mafai e se ulugalii ona sailia se faamaoniga pe a uma ona la faaipoipo mo le le itiiti ifo ma le lima tausaga. O le faagasologa mo le faia o se talosaga e aveese se tapuia’iga mai le faamauga o le malumalu o loo otooto atu i lalo.

1. E fono le ulugalii ma lo la epikopo ma le peresitene o le siteki.

2. Afai e lagona e nei taitai e tatau ona aveese le tapuia‘iga, e la te tusia ni tusi i le Au Peresitene Sili e avatu ai a la’ua fautuaga. O a la tusi e tatau ona faamatala ai le agavaa o tagata talosaga mo le malumalu ma le mautu o le la faaipoipoga mo le le itiiti ifo ma le lima tausaga. Tagai i le 6.2.3 e uiga i le tiutetauave o le peresitene o le siteki pe a auina atu talosaga i le Au Peresitene Sili.

3. E tusia foi e le ulugalii se tusi o le talosaga i le Au Peresitene Sili.

4. E auina atu e le peresitene o le siteki nei tusi uma i le Au Peresitene Sili. E mafai ona ia auina atu le talosaga faatasi ma se talosaga mo se faaleaogaina o le faamauga po o le tatalaina o le faamauga (tagai i le 38.4.1.5).

5. Afai ua faamaonia le talosaga, e tuuina atu e le Au Peresitene Sili se tusi e ta‘u mai ai ua aveesea le tapuia’iga e faasaga i le faamauga o le malumalu.

6. A uma ona maua le tusi, e mafai e le ulugalii ona faatulaga se taimi atofa e faamau ai. La te tauaao atu le tusi i le malumalu.

38.4.1.7

Faamauga ina ua mavae le Faaipoipoga i le Malumalu mo na o le Olaga Nei

O ulugalii o e na faaipoipo i se malumalu mo na o le olaga nei e masani lava e le faamauina i se taimi mulimuli ane. Mo se faamauga faapea ina ia tupu, e tatau i le tamaitai ona maua muamua mai le Au Peresitene Sili se faaleaogaina o lana uluai faamauga. Afai e lagona uma e le epikopo ma le peresitene o le siteki e ono talafeagai se faaleaogaina, e auina atu e le peresitene o le siteki se talosaga i le Au Peresitene Sili e faaaoga ai le PTF. Tagai i le 6.2.3 e uiga i le tiutetauave o le peresitene o le siteki pe a auina atu talosaga i le Au Peresitene Sili.

Ua le o toe faatinoina ni faaipoipoga mo na o le olaga nei i le malumalu (tagai i le 27.3.3

38.4.1.8

Faamauina o Tagata ua Maliliu

Tamaitai ua Maliliu. E mafai ona faamau se tamaitai ua maliu i alii uma o e sa ia faaipoipo i ai faaletulafono i lona olaga. O le siata lenei o loo faaalia ai le taimi e ono faia ai nei faamauga.

E lei faamauina o ia i se tane i le olaga	E mafai ona faamauina o ia i alii uma o loo soifua pe ua maliliu o e na faaipoipo i ai o ia i le olaga. Afai o loo soifua le alii, e tatau i lana avā (pe afai ua faaipoipo [le alii]) ona tuuina mai se maliega tusitusia (tagai i le 38.4.1.3). Afai ua maliu le alii, e tatau i lona toalua, fafine ua oti lana tane (pe afai e i ai) ona tuuina mai se maliega tusitusia.
Sa faamauina o ia i se tane i le olaga	E tatau ona maliliu uma ana tane a o lei faamauina o ia i isi alii o e na faaipoipo i ai o ia. E aofia ai i lea ana tane muamua o e atonu ua tatala mai ai ana faaipoipoga. O fafine taitoatasi ua oti a latou tane (pe afai e i ai) e tatau ona tuuina mai se maliega tusitusia.

Alii ua Maliliu. O se alii ua maliu e mafai ona faamau i tamaitai uma o e sa ia faaipoipo atu i ai faaletulafono i lona olaga pe afai (1) ua maliliu i latou, pe (2) o loo soifua i latou ae le o faaipoipo, ma e le i faamauina i se isi alii (tagai i le 38.4.1.3).

A o lei mafai ona faamauina se alii ua maliu i se fafine ua maliu o le sa faaipoipo i ai o ia i le olaga, e tatau i le toalua o le alii ua oti lona toalua (pe afai e i ai) ona tuuina atu se maliega tusitusia.

Ulugalii ua Maliliu o e na Tatalaina Faaipoipoga. O ulugalii ua maliliu o e na tatala faaipoipoga e mafai ona faamauina e ala i le fai ma sui ina ia mafai ona faamau a latou fanau ia i latou. Tagai i le 28.3.5 pe afai a le o le tane po o le avā ua soloia le avea ma tagata o le Ekalesia pe ua faamavae foi mai le avea ai ma tagata o le ekalesia.

E manaomia le faamaoniga mai le Au Peresitene Sili a o lei faamauina se ulugalii ua maliliu, o ē na maua se faaleaogaina o la la’ua faamauga a o soifua.

38.4.1.9

Aafiaga o le Tatalaina o Faaipoipoga

Afai na faamau se ulugalii ma tatalaina mulimuli ane le faaipoipoga, o faamanuiaga o lena faamauga e tumau pea le aoga mo tagata taitoatasi o e agavaa (tagai i le 38.4.1.5 ma le 38.4.1.10). O se tagata o le ekalesia e tumau faamaoni i feagaiga o le malumalu o le a mauaina faamanuiaga patino na folafolaina mai i le malumalu, e tusa lava pe ua solia e le toalua o le tagata ia feagaiga pe soloia mai le faaipoipoga. Ua folafola mai e le Atua i Ona atalii ma afafine faamaoni le filemu ma le malosi i lenei olaga ma le ola e faavavau i le lalolagi a sau.

Tagai i le 38.4.2.1mo faamatalaga e uiga i tamaiti o e na fananau mai ua mavae se tatalaga o le faaipoipoga.

38.4.1.10

Aafiaga o le Faaleaogaina o le Faamauga

A o tumau pea le faamauga, o se tagata o le ekalesia e faamaoni i feagaiga o le malumalu o le a maua faamanuiaga patino ua folafola mai i le malumalu. O le tulaga tonu foi lea pe afai e solia e le toalua o lea tagata ia feagaiga pe o ese mai le faaipoipoga. E lē gata i lea, o le a lē manaomia e le Atua se tasi e tumau i se mafutaga faamauina i le faavavau atoa e le tusa ai ma lona loto. O le a faamautinoa e le Tama Faalelagi ua maua e tagata taitoatasi faamanuiaga uma e mafai ona maua e ona manaoga ma filifiliga.

O le taimi lava e tuuina mai ai e le Au Peresitene Sili le faaleaogaina o le faamauga, ua le toe aogā loa faamanuiaga e faatatau i lena faamauga.

Soo se fanau e fanau e se tamaitai ina ua uma ona faaleaogaina lana faamauga i se tane muamua, e le fananau i totonu o le feagaiga vagana ua faamau le tina i se isi alii a o lei fanau le tamaitiiti.

E fefautuaai taitai perisitua ma tagata o le au paia e sailia se faaleaogaina o se faamauga, ina ia fesoasoani ia latou malamalama i nei mataupu faavae. E tatau i taitai i le lotoifale ona faamamaluina le faitalia o tagata o le ekalesia i nei faaiuga.

38.4.1.11

Aafiaga o le Faamavae po o le Soloia mai le Avea ma Tagata o le Ekalesia

A uma ona faamauina se ulugalii i se malumalu, afai e faamavae se tasi o i laua mai le avea ma tagata o le Ekalesia pe ua soloia lona avea ai ma tagata o le Ekalesia, o le a soloia foi ona faamanuiaga o le malumalu. Peitai, o faamanuiaga patino o le sauniga o le faamauga mo le toalua o le tagata ma le fanau e tumau pea pe afai latou te tumau i le faamaoni.

Soo se fanau e fananau mai i se ulugalii ina ua uma ona faamavae se tasi po o i la‘ua uma mai le avea ai ma tagata o le Ekalesia pe na soloia lo la avea ma tagata o le Ekalesia, e le o ni fanau e fananau i totonu o le feagaiga. Tagai i le 38.4.2.8.

38.4.2

Faamauina o Fanau i Matua

E tatau ona faamauina matua i le tasi ma le isi a o lei faamauina fanau ia i latou (tagai i le 38.4.1).

E tatau i tagata o le ekalesia ona fefautuaai ma o latou epikopo pe afai e i ai ni a latou fesili e uiga i aiaiga faavae o faamauga e le o taliina i lenei vaega. E faafesootai e le epikopo le peresitene o le siteki pe afai e i ai ni ana fesili. E faafesootai e le peresitene o le siteki le Ofisa o le Au Peresitene Sili pe afai e i ai ni ana fesili.

O tagata o le ekalesia e i ai ni atugaluga e uiga i le natura e faavavau o le sauniga o le faamauga ma o latou sootaga faaleaiga ua fautuaina ina ia faatuatua i le Alii ma saili Lana faamafanafanaga. O le a faamautinoa e le Tama Faalelagi ua maua e tagata taitoatasi faamanuiaga uma e mafai ona faatagaina e ona manaoga ma filifiliga.

38.4.2.1

Fanau o e na Fananau i le Feagaiga

O fanau o e na fananau ina ua uma ona faamauina lo latou tina i se tane i totonu o le malumalu, e fananau i totonu o le feagaiga o lena faamauga. Latou te le moomia le mauaina o le sauniga o le faamauina i matua.

O nisi taimi o se tamaitai na faamau i se alii ae mulimuli ane i ai se fanau ma se isi alii. A tupu lenei mea, o nei tamaiti ua fananau mai i totonu o le feagaiga o le faamauga aupito lata mai a le fafine se’i vagana ua fananau mai i latou (1) ina ua uma ona faaleaogaina le faamauga po o le (2) ina ua uma le soloia ona o le faamavaega po o le soloia mai le avea ma tagata o le Ekalesia.

38.4.2.2

Fanau E Le Fananau i Totonu o le Feagaiga

O fanau e le fananau i totonu o le feagaiga e mafai ona avea ma se vaega o se aiga e faavavau e ala lea i le faamau i:

• O latou matua moni.

• O latou matua na vaetamaina.

• Se matua moni po o se matua na vaetamaina ma se matua fai (tagai i le 38.4.2.5).

O nei fanau e mauaina faamanuiaga lava e tasi e peiseai na latou fananau mai i totonu o le feagaiga.

Faamauina o fanau o loo ola i matua o loo soifua. O se tamaitiiti o loo soifua e faamauina i le na o ni matua se toalua—o se tane ma se ava. Afai o loo soifua uma matua, e tatau ona faaipoipo ma faamauina le tasi i le isi.

Tagai i le 27.4.1mo faamatalaga e uiga i le tuuina atu o pepa faataga o le malumalu mo fanau e faamau i o latou matua.

O tagata o le ekalesia e 21 tausaga pe matutua atu e tatau ona maua faaeega paia ina ia faamauina ai i o latou matua (tagai i le 26.4.4).

Faamauina o fanau o loo ola i matua ua maliliu. O se tamaitiiti o loo soifua e faamauina i le na o le tasi le seti o matua. E tatau ona faamauina matua i le tasi ma le isi a o lei faamauina fanau ia i laua.

O se tagata o le ekalesia ua matua i le taimi e maliliu ai ona matua, e masani lava ona faamauina i na matua. E pei ona faaaogaina iinei, o le upu matua o lona uiga o matua na fananau mai ai, matua na vaetamaina, po o se matua na fanau mai ai ma se matua fai.

O loo faaalia i le siata lenei filifiliga o faamauga o loo maua mo se tagata na maliliu ona matua a o laitiiti lava o ia pe e le o tali atu foi mo ia lava ona o manaoga faapitoa faaleatamai.

Tulaga	Filifiliga
Tamaitiiti laitiiti	Ia faamauina i matua na vaetamaina, po o tagata o loo vaavaaia faaletulafono o loo tausia o ia Faatali seia avea o ia ma se tagata matua ona filifili lea e faamauina a le o (1) i matua ua maliliu po o le (2) i matua na vaetamaina po o e o vaaia faaletulafono na tausia o ia
O se tagata e le mafai ona tali atu mo ia lava ona o le le atoatoa o le malosi o le mafaufau	Ia faamauina i matua na vaetamaina po o e o vaaia faaletulafono o loo tausia o ia

Tagai i le 27.4.1mo faamatalaga e uiga i le tuuina atu o pepa faataga o le malumalu mo fanau e faamau i o latou matua.

O tagata o le ekalesia e 21 tausaga pe matutua atu e tatau ona maua faaeega paia ina ia faamauina ai i o latou matua (tagai i le 26.4.4).

Faamauina o fanau ua maliliu i matua (o loo soifua pe ua maliliu). O se tagata ua maliu e masani ona faamauina i ona matua na fanau mai ai po o matua na vaetamaina. Ae peitai, o se tamaitiiti ua maliu e mafai foi ona faamauina i:

• Se tina na fanau mai ai ma se tama e le’i fanau mai ai.

• Se tama na fanau mai ai ma se tina e le’i fanau mai ai.

• Matua tausi po o matua o matua o e na tausia le tamaitiiti (tagai i le 38.4.2.4).

• Se ulugalii na fuafua e vaetamaina le tamaitiiti ae le’i mafai ona faamaea le vaetamaga ae maliu le tamaitiiti (tagai i le 38.4.2.4).

O nei faamauga e mafai ona faia e tusa lava pe ua uma ona faamauina le tamaitiiti ua maliu i ona matua na fanau mai ai po o matua na vaetamaina. O faamauga i matua e le o ni matua moni pe le o ni matua na vaetamaina, i tulaga e ese mai i mea ua lisiina i luga, e manaomia ai le faamaoniga a le Au Peresitene Sili.

38.4.2.3

Fanau Tausi po o Fanau Fai o Loo Ola

O fanau o loo ola o ē fananau i totonu o le feagaiga, pe ua faamau i matua, e le mafai ona faamau i nisi matua e aunoa ma se faamaoniga a le Au Peresitene Sili.

O fanau o loo ola o e ua vaetamaina faaletulafono ma e lei fananau i le feagaiga, e lei faamauina foi i matua moni, e mafai ona faamauina i o latou matua fai pe a mae’a ona faamautu le vaetamaina. O se kopi o le poloaiga mulimuli faaletulafono o le vaetamaina e tatau ona tuuina atu i le malumalu. O se faaiuga a le faamasinoga e tuuina atu ai le tausiga faaletulafono e le lava lea e avea ma se faamaoniga mo se faamauga. E leai se mafuaaga e ao ai fua ona faailoa ia matua moni o nei fanau.

E manaomia le faamaoniga a le Au Peresitene Sili mo se tagata o loo soifua ina ia faamauina i matua e tausia. O lenei tulaga manaomia e faatatau e tusa lava pe le o mailoa matua moni o le tamaitiiti tausi. O ia talosaga e faia e le peresitene o le siteki e faaaoga ai le PTF (tagai i le 6.2.3).

38.4.2.4

Fanau Tausi po o Fanau Fai Ua Maliliu

O se tagata na vaetama ua maliu e masani lava ona faamau i ona matua na vaetamaina.

O se tamaitiiti tausi ua maliu e masani lava ona faamauina i ona matua moni.

38.4.2.5

Faamauina o Fanau o Loo Ola i se Matua Moni e Toatasi ma se Isi ua Toe Faaipoipo i ai le Matua

Fanau laiti ma fanau e le mafai ona tali atu mo i latou lava. O fanau laiti o loo soifua ma fanau e le mafai ona tali atu mo i latou lava ona e le atoatoa le malosi faaleatamai, faatoa mafai ona faamau i se matua moni e toatasi ma se matua fai pe afai e ausia tulaga uma nei:

• E lei fanau le tamaitiiti i totonu o le feagaiga pe na faamau muamua.

• E lei vaetamaina le tamaitiiti e se isi matua.

• Ua tuuina atu e le isi matua moni se tusi o le maliega ua sainia mo le faamauga ina ia faia. O se faaiuga a le faamasinoga e tuuina atu ai le tausiga faaletulafono e le lava lea e avea ma se faamaoniga mo se faamauga. O le tusi o le maliega e tatau ona faaaoga ai faaupuga e talitutusa ma faaupuga nei:

  “O a’u, [igoa o se matua na fanau mai ai], ou te tuuina atu le faatagaga mo [igoa o le tamaitiiti po o fanau] ina ia faamauina i le malumalu i [igoa o matua]. Ua ou malamalama o le faamauga o se sauniga faalelotu ma e le i ai ni aafiaga faaletulafono,”

  E tauaao atu lenei tusi i le malumalu a o le’i faia le faamauga.

Afai ua maliu le isi matua moni, po o le, afai ua tineia atoa ana aia tatau faalematua e ala i faatulagaga faaletulafono, e le manaomia se maliega. E faapena foi, e leai se maliega e manaomia pe afai o le tamaitiiti ua manatulia o se tagata matua i le nofoaga o loo nofo ai o ia.

Afai ua le maua le isi matua moni, i le maea ai o taumafaiga maelega uma e su’e o ia, e le manaomia se maliega. I le tulaga lenei, e faamaonia e le epikopo ma le peresitene o le siteki i le faagasologa o le faamaoniga ua le manuia taumafaiga maelega uma e su’e le matua o loo misi. Afai e o’o mai le isi matua moni i se aso mulimuli ane, o le a toe iloiloina le faamauga.

Fanau matutua. E mafai ona faamauina se tagata matua o loo soifua i se tasi o matua moni ma se matua fai pe afai e lei fanau le tagata i totonu o le feagaiga pe na faamau muamua i matua.

O tagata o le ekalesia o e ua 21 tausaga pe matutua atu e tatau ona maua faaeega paia a o lei faamau i se matua moni ma se matua fai.

O tagata o le ekalesia ua faaipoipo e laiti ifo ma le 21 e le manaomia ona maua faaeega paia ina ia faamau ai i se matua moni ma se matua fai. Peitai, e tatau ona i ai a latou pepa faataga aoga o le malumalu ina ia faamau i matua (tagai i le 26.4.4).

Tagai i le 27.4.1mo faamatalaga e uiga i le tuuina atu o pepa faataga o le malumalu mo fanau e faamau i o latou matua.

38.4.2.6

O Fanau na Foafoa i le Tui Faato po o le To Faamili

O fanau na foafoa i le tui faato po o le to faamili e fananau i totonu o le feagaiga pe afai ua uma ona faamauina o latou matua. Afai e fananau mai fanau a o lei faamau o latou matua, e mafai ona faamau i latou i o latou matua pe a mae’a ona faamau o latou matua.

38.4.2.7

Fanau na Fananau i Tina Suitulaga

Afai na fanau se tamaitiiti i se tina suitulaga, e tuuina atu e le peresitene o le siteki le mataupu i le Ofisa o le Au Peresitene Sili (tagai i le 38.6.22).

38.4.2.8

Tulaga o Fanau Pe Afai ua Faaleaogaina pe Soloia se Faamauga

O fanau faamaoni e fananau mai i le feagaiga pe faamauina i matua e mauaina faamanuiaga o le tulaga faamatua e faavavau. E moni lenei mea e tusa lava pe:

• E faaleaogaina mulimuli ane le faamauga a o latou matua.

• O le auai i le Ekalesia o se tasi o matua e mulimuli ane faamavae pe soloia mai le ekalesia.

O fanau e fananau mai ina ua mae’a ona faaleaogaina pe soloia le faamauga a o latou matua, e le fananau mai i totonu o le feagaiga. O nei fanau e mafai ona faamau i o latou matua pe a mae’a ona toefuatai faamanuiaga o le malumalu a o latou matua (pe a talafeagai ai) ma ua aveesea soo se toatuga.

38.5

Laei ma Ofusa o le Malumalu

38.5.1

Laei o le Malumalu

I le taimi o sauniga o faaeega paia ma faamauga i totonu o le malumalu, e ofuina e tagata o le Ekalesia ia laei papae. E ofu e tamaitai ia laei papae nei: o se ofu lima uumi pe tolukuata le uumi o lima (po o se sakete ma se palausi lima uumi pe tolukuata le uumi o lima), o totini po o totini soloatoa, ma seevae fafao po o silipa.

O alii e ofuina laei nei: o se ofutino lima uumi, fusiua po o se faapo, ofuvae, totini, ma seevae fafao po o silipa.

I le taimi o sauniga o faaeega paia ma faamauga e ofuina faaopoopo e tagata ia laei faalesauniga i luga o laei papae.

38.5.2

Mauaina o Laei o le Malumalu ma Ofusa

E fautuaina e taitai o uarota ma siteki ia tagata ua maua faaeega paia ina ia maua o latou lava lavalava o le malumalu. E mafai ona faatau mai ia laei o le malumalu ma ofusa mai le Faletusi o le Ekalesia po o le store.ChurchofJesusChrist.org. E mafai e failautusi o le siteki ma le uarota ona fesoasoani i tagata o le ekalesia i le okaina o laei.

E mafai e le epikopo ona faaaoga tupe o le taulaga anapogi e fesoasoani ai i tagata o loo manaomia le fesoasoani e faatau mai ai lavalava ma ofusa o le malumalu (tagai i le mataupu 22).

O nisi malumalu o loo maua ai foi ia laei o le malumalu e faaune atu. Afai e leai ni laei e faaune atu i se malumalu, e moomia ona malaga mai tagata o le ekalesia ma aumai o latou lava laei o le malumalu. Tagai i le temples.ChurchofJesusChrist.org e iloa ai pe i ai se malumalu faapitoa o maua ai ni laei faaune.

E tausisia e malumalu se sapalai tapulaa o laei o le malumalu e mafai e faifeautalai faamisiona ona faaaoga. E leai se tupe totogi mo laei faaune a o i ai faifeautalai i nofoaga autu e aoao ai, ma pe a oo ina faatagaina i latou e auai i sauniga o le malumalu a o galulue ai i le galuega faamisiona. Afai e manaomia, e mafai ona faaaoga nei laei e faifeautalai pe a maua o latou lava faaeega paia.

E maua le ofusa i ie ma sitaili eseese, e aofia ai [sitali] mo tamaitai o loo maitaga pe o failele(store.ChurchofJesusChrist.org).

O tagata o le ekalesia e manaomia ofusa i se lapopoa e le o maua, e mafai ona faafesootai se faufautua o lavalava e fai se oka faapitoa. O loo maua faamatalaga faafesootai i le store.ChurchofJesusChrist.org/contactus.

Mo faamatalaga e uiga i le faataitaia o ofusa a o lei faatauina, tagai i le store.ChurchofJesusChrist.org.

38.5.3

Ofusa ma Laei o le Malumalu mo Tagata o le Ekalesia E I Ai ni Manaoga Faapitoa pe Afaina i ni Ituaiga Ie Patino

E mafai ona faatau mai ia ofusa e oka faapitoa mo tagata o le ekalesia ua faataotolia i tofaga, e i ai tulaga faaletino matuia faapitoa, pe afaina i ni ituaiga ie patino po o ofusa (tagai i le “Garments and Sacred Clothing,” store.ChurchofJesusChrist.org).

O loo maua ia ofutalaloa pupuu o le malumalu mo tagata o le ekalesia o e faaaogaina nofoa faataavalevae po o i latou e i ai isi manaoga faapitoa (tagai i le store.ChurchofJesusChrist.org).

38.5.4

Gaosia o Laei o le Malumalu

E le tatau i le au paia ona su’iina laei mo sauniga o le malumalu po o ofusa.

38.5.5

Ofuina o le Ofusa

Ua tuuina mai e le Au Peresitene Sili le taitaiga lenei i le ofuina o le ofusa:

“O le ofusa o le perisitua paia e faamanatu mai ai ia i tatou le veli i le malumalu, ma o lena veli o se faatusa o Iesu Keriso. Pe a e ofuina lou ofusa, ua e ofuina se faatusa paia o Iesu Keriso. O le ofuina o se faailoaga lea i fafo o lau tautinoga i totonu e mulimuli ia te Ia. O le ofusa foi o se faamanatu o a outou feagaiga i le malumalu. E tatau ona e ofuina le ofusa i le ao ma le po i lou olaga atoa. A tatau ona aveese mo gaoioiga e le mafai ona faia a o ofuina le ofusa, saili e toefaamaulu i se taimi vave lava. A o e tausia au feagaiga, e aofia ai le avanoa paia e ofuina ai le ofusa e pei ona faatonuina ai i sauniga amata, o le a e maua atili ai le alofa mutimutivale, puipuiga, malosi, ma le mana o le Faaola.”

O le ofusa e tatau ona laeiina i lalo ifo o lavalava i fafo. O se mataupu e faatatau i le e mea sili ona manao i ai le tagata lava ia pe ofu isi ofu laiti i luga po o lalo ifo o le ofusa o le malumalu.

E le tatau i tagata o le ekalesia ona fetuunai pe suia le ofusa ina ia ofi ai sitaili eseese o lavalava.

E le tatau i tagata o le ekalesia ona faaali atu ma le le talafeagai le ofusa ia i latou e le malamalama i lona taua.

Tagai i le 26.3.3.

38.5.6

Tausiga o le Ofusa

O le ofusa o se faatusa paia o Iesu Keriso. O le auala tatou te tausia ai o tatou ofu e tatau ona atagia mai ai lena faatusa paia.

E mafai e tagata o le ekalesia ona su’isu’i masaesae o le ofusa pe afai e le suia ai le uluai mamanu. Ae peitai, afai ua tatala atoa pe misi se faailoga, e tatau i tagata o le ekalesia ona sui le ofusa.

38.5.7

Ofuina o le Ofusa i le Militeli, Fuimu, Faamalosia o le Tulafono, po o se Faitalia Talitutusa

O taiala o loo i lenei vaega e faatatau i tagata ua maua faaeega paia o e e i ai ni tulaga manaomia patino o laei toniga a o auauna atu:

• I le militeli.

• O ni fuimu.

• O ni leoleo e faamalosia le tulafono.

• O ni sui o le puipuiga a le malo.

I tulaga e mafai ai, e tatau ona ofuina e nei tagata le ofusa e pei ona faia e isi lava tagata o le ekalesia. Ae peitai, e tatau ona latou aloese mai le faaaliali atu ma le le talafeagai o le ofusa i isi o e le malamalama i lona taua. E tatau i tagata o le ekalesia ona saili le taitaiga a le Agaga ma faaaoga le atamai, faaiuga poto, ma le faautauta. I nisi tulaga, atonu e sili atu le faataatia ese o le ofusa mo se taimi le tumau ma toe laeiina pe a faatagaina ai e tulaga. Ae peitai, o nai faafitauli laiti lava mo le ofuina o le ofusa ua le faamaonia ai le faataatia ese.

O nisi taimi o tulafono o ia auaunaga e taofia ai se tagata mai le ofuina o le ofusa. I nei tulaga, e le aafia ai le tulaga faalelotu o le tagata. E taulai atu le Alii i le loto ma le mafaufau e naunau (tagai Mataupu Faavae ma Feagaiga 64:34). Afai lava e tumau pea le agavaa o le tagata, o le a ia mauaina pea faamanuiaga e fesootai ma le ofuina o le ofusa. Afai e le mafai e tagata o le ekalesia ona ofuina le ofusa, e tatau ona latou toe ofuina i le taimi lava e faatagaina ai e tulaga e o‘o i ai.

E tatau i tagata o le ekalesia i ia faalapotopotoga ona feutagai ma a latou lava lala o auaunaga i tulaga manaomia patino e tatau i ai laei e ofu i lalo, e pei o le lanu, po o sitaili e gata ai le ua. E mafai e nei tagata o le ekalesia ona auina atu ofu ua faamaonia e le faalapotopotoga lea e fetaui ma taiala o ofusa i laei i le Ofagapi e faailogaina o ni ofusa ua faatagaina. O loo tuuina atu taiala ma faatonuga faaopoopo i luga o Taiala o Ofusa mo le Militeli, Faamalosia o Tulafono, ma le Au Fuimu.

38.5.8

Tulaga Faafomai e Ono Taofia ai Tagata mai le Ofuina o le Ofusa

I tulaga e mafai ai, o tagata o le ekalesia e i ai tulaga faafomai, e tatau ona ofuina le ofusa e pei ona faia e isi tagata o le ekalesia.

E mafai ona faatauina mai ni ofusa e oka faapitoa mo tagata o le ekalesia e i ai tulaga faafomai pe faaaoga foi ni masini faafomai. O tagata o le ekalesia e manaomia ni ofusa e oka faapitoa e mafai ona faafesootai se faufautua o lavalava e fai se oka. O loo maua faamatalaga e faafesootai ai i le store.ChurchofJesusChrist.org/contactus.

O nisi tulaga faafomai po o masini faafomai e ono faafaigata ai i tagata o le ekalesia ona ofuina se vaega se tasi po o vaega uma e lua o le ofusa. E ao i taitai ona sailia le taitaiga a le Agaga i na tulaga. I nisi tulaga, atonu e sili atu le faataatia ese o le ofusa mo se taimi le tumau ma toe laeiina pe a faatagaina ai e tulaga.

Pe a le mafai e se tagata ona ofuina le ofusa ona o se tulaga faafomai po o se masini, e le aafia ai lona tulaga faalelotu. E taulai atu le Alii i le loto ma le mafaufau e naunau (tagai Mataupu Faavae ma Feagaiga 64:34). Afai lava e tumau pea le agavaa o le tagata, o le a ia maua faamanuiaga e fesootai ma le ofuina o le ofusa.

38.5.9

Faaleaogaina o Ofusa ma Laei o Sauniga o le Malumalu

Ina ia faaleaogaina ia ofusa ua masaesae o le malumalu, e tatau i tagata o le ekalesia ona ‘oti ese ia faailoga ma susunuina. Ona ‘oti’oti lea e tagata o le ekalesia ia le ie o loo totoe ina ia le mafai ona iloa ai o se ofusa. E mafai ona tiai le vaega o totoe o le ofu.

Ina ia faaleaogaina ia laei o le malumalu ua tuai ma masaesae, e tatau i tagata o le ekalesia ona ‘oti‘oti le ofu ina ia le mafai ona iloa le mea na faaaoga i ai muamua. Ona tatau lea ona tia’i le ofu.

E mafai e tagata o le ekalesia ona tuuina atu ofusa ma laei o le malumalu o loo lelei pea i isi tagata o le ekalesia ua maua faaeega paia. E le tatau i le au paia ona tuuina atu ofusa po o laei o sauniga o le malumalu i faleoloa o le Tesareta, faleteuoloa o epikopo, malumalu, po o vaega e tuuina atu i ai foai alofa.

38.5.10

Laei o le Malumalu e Falelauasi Ai

Afai e mafai, o tagata ua maliliu o e sa maua faaeega paia, e tatau ona falelauasi pe faaliulefulefuina i laei o le malumalu. I tulaga o aganuu ma faiga o maliu e le talafeagai ai pe faafaigata ai lenei mea, e mafai ona gaugau lelei ia laei ma tuu i tafatafa o le tino.

E na o tagata lava o le ekalesia na maua faaeega paia a o soifua e mafai ona falelauasi pe faaliulefulefuina i laei o le malumalu. O se tagata ua maua faaeega paia, ae na taofi le ofuina o le ofusa a o lei maliu o ia, e mafai ona falelauasi pe faaliulefulefuina i laei o le malumalu pe afai e talosagaina e le aiga.

O se tagata e lei toefuataiina o latou faamanuiaga ina ua uma ona soloia pe faamavae mai le avea ai ma tagata o le Ekalesia, e le mafai ona falelauasi pe faaliulefulefuina i laei o le malumalu.

O se tagata sa maua ona faaeega paia a o soifua ma ua maliu i le pule i le ola, e mafai ona falelauasi pe faaliulefulefuina i laei o le malumalu.

O laei o le malumalu e faaaogaina mo le falelauasiga po o le faaliulefulefuina, e le tau moomia le fou, ae tatau ona lelei ma mama. E mafai ona faaaoga ia laei o le malumalu o le tagata lava ia.

O se tagata o le ekalesia o le a falelauasi pe faaliulefulefu i laei o le malumalu, e mafai ona faaofu e se tagata o le aiga ua maua ona faaeega paia ma o le itupa lava e tasi, po o le toalua foi. Afai e le o avanoa se tagata o le aiga pe le manao foi e faaofu le tino o se alii ua maua faaeega paia, e mafai e le epikopo ona talosagaina le peresitene o le korama a toeaina e valaaulia se alii ua maua faaeega paia e faaofu le tino pe vaai ia faaofuina faalelei. Afai e le o avanoa se tagata o le aiga pe le manao foi e faaofu le tino o se tamaitai ua maua faaeega paia, e mafai e le epikopo ona talosagaina le peresitene o le Aualofa e valaaulia se tamaitai ua maua faaeega paia e faaofu le tino pe vaai ia faaofuina faalelei. E faamautinoa e taitai e tuuina atu lenei tofitofiga i se tagata o le a lē inoino.

O le tino o se alii e faaofuina i ofusa o le malumalu ma laei papae nei: o se ofutino limauumi, fusiua po o se faapo, ofuvae uumi, totini, ma seevae po o silipa. O le tino o se tamaitai e faaofuina i ofusa o le malumalu ma laei papae nei: o se ofu paepae lima uumi pe tolukuata le uumi o lima (po o se lausakete ma se palausi lima uumi pe tolukuata le uumi o lima), totini po o totini soloatoa, ma seevae po o silipa.

E fai laei o sauniga o le malumalu i luga o le tino e pei ona faatonuina ai i le faaeega paia. E tuu le ofutalaloa i luga o le tauau taumatau ma nonoa i le manoa e toso i le itu agavale o le puimanava, O le ufiufi e nonoa mau faataamilo i le puimanava. O le fusi e faataamilo mai i le puimanava ma nonoa faalipine i luga a’e o le itu agavale o le puimanava, O le pulou o se alii e masani ona tuu i autafa o lona tino seia oo i le taimi e tapuni ai le pusamaliu po o se koneteina. Ona tuu lea o le pulou faatasi ai ma le faalipine i luga a’e o le taliga tauagavale. O le veli o se tamaitai e mafai ona fofola i luga o le aluga i tua o lona ulu. O le ufiina o foliga o se tamaitai a o le’i falelauasiina pe faaliulefulefuina e tuu i le faitalia ma e fuafua lava e le aiga.

I nisi o eria e na o se pule faatonu laiseneina o falemaliu po o se tagata faigaluega a le pule faatonu e faataga ona taulimaina se tino maliu. I tulaga faapea, e faamautinoa e se tagata o le aiga ua maua faaeega paia po o se tagata o le au paia ua maua faaeega paia e valaaulia e le epikopo po o le peresitene o le Aualofa ua tuu faalelei laei i luga o le tino.

O nisi atunuu e manaomia ai ona faaofu tagata maliu i laei e le afaina ai le siosiomaga pe a falelauasi. O loo maua laei e le afaina ai le siosiomaga i le store.ChurchofJesusChrist.org.

I eria e ono faigata ona maua laei o le malumalu i le taimi o le falelauasiga, e tatau i peresitene o siteki ona teuina ni seti atoatoa e le itiiti ifo ma se lua o laei e feololo le lapopoa, e tasi mo se alii ma le tasi mo se tamaitai.

Afai e le maua ni laei o le malumalu, e faaofu se tagata ua maliu ua maua faaeega paia i le ofusa ma isi laei e talafeagai ai.

38.6

Aiaiga Faavae mo Faafitauli o Amioga Mama

O ni nai aiaiga faavae o i lenei vaega e faatatau i mataupu e “le fautuaina” e le Ekalesia. E masani ona le oo ia tagata o le Ekalesia i tapuia’iga o le avea ma tagata o le Ekalesia ona o a latou faaiuga e uiga i nei mataupu. Ae peitai, o tagata uma lava e iu ina tali uma atu i le Atua mo a latou faaiuga.

38.6.1

Faapa’ū Pepe

Na poloai mai le Alii, “Aua e te … fasioti tagata, pe e te faia soo se mea faapena” (Mataupu Faavae ma Feagaiga 59:6). E tetee le Ekalesia i le filifiliga o le faapa’ū pepe mo le faamalieina faaletagata lava ia pe faaagafesootai. E lē tatau i tagata o le Ekalesia ona gauai atu, faatino, pe fuafuaina, totogi, ioe i ai, pe fautuaina le faapa’ū o se pepe. E na o le pau se tuusaunoaga pe afai:

• O le ma’itaga na mafua mai i le fai’aiga faamalosi po o le toe ui i fanau.

• Ua tonu i se fomai atamai faapea e lamatia ai le ola po o le soifua maloloina o le tina.

• Ua tonu i se fomai atamai faapea ua i ai ni faaletonu matuia i le pepe e le’i fanau ma o le a lē ola pe a fanau mai.

E oo lava foi i nei tuusaunoaga e le otometi ai ona faamaonia le faapa’ū o se pepe. O le faapau pepe o se mataupu e sili ona ogaoga. E na o le pau le taimi e tatau ona iloiloina ai pe a uma ona maua e tagata e fitoitonu i ai le faamautuuga e ala i le tatalo. E mafai e tagata o le ekalesia ona fefautuaai ma o latou epikopo o se vaega o lenei faagasologa.

E iloiloina ma le faaeteete e taitai pulefaamalumalu ia tulaga pe afai na aafia ai se tagata o le Ekalesia i se faapa’ū pepe. E ono tatau ai se fono o le tagata o le Ekalesia pe afai e gauai atu, faatino, pe fuafuaina, totogi, ioe i ai, pe fautuaina e se tagata o le Ekalesia le faapa’ū o se pepe (tagai i le 32.6.2.5). Peitai, e lē tatau ona iloiloina se fono o le tagata o le Ekalesia pe afai sa aafia ai le tagata i le faapa’ū o se pepe a o le’i papatisoina. E lē tatau foi ona faia ni fono o tagata o le Ekalesia po o ni tapuia’iga mo tagata o le Ekalesia o ē sa aafia i le faapa’ū pepe mo soo se tasi o mafuaaga e tolu na otooto atu muamua i le vaega lenei.

E tuuina atu e epikopo ia fesili i tulaga patino i le peresitene o le siteki. E mafai e le peresitene o le siteki ona tuusa’o atu ia fesili i le Ofisa o le Au Peresitene Sili pe a tatau ai.

E tusa ai ma mea ua faaalia mai, e mafai ona salamo ma faamagaloina se tagata mo le agasala o le faapa’ū pepe.

38.6.2

Sauaina

O le sauaina o le agaleagaina lea po o le lē amana’iaina o isi i se auala e mafua ai le faamanu’aliaina faaletino, faalefeusuai, faalelagona, po o tulaga tautupe. O le tulaga o le Ekalesia e lē mafai ona taliaina le sauaina i soo se ituaiga. O i latou o ē saua i o latou taitoalua, fanau, isi tagata o le aiga, po o se isi lava tagata, ua ia solia tulafono a le Atua ma tagata.

O tagata uma lava, aemaise lava i matua ma taitai, ua uunaia ina ia mataāla ma filiga ma faia mea uma latou te mafaia e puipuia ai fanau ma isi e tetee atu i sauaga. Afai e silafia e tagata o le ekalesia ni tulaga o le sauaina, latou te lipotia i taitai faalemalo ma talanoa i le epikopo. E tatau i taitai o le Ekalesia ona matuā manatu mamafa i lipoti o sauaga ma ‘aua lava ne’i faalēaogaina.

O tagata matutua uma e galulue faatasi ma tamaiti po o le autalavou, e ao ona faamae’aina le aoaoga faamasani o le puipuiga o tamaiti ma le autalavou i totonu o le masina e tasi talu ona lagolagoina o latou tofiga (tagai i le ProtectingChildren.ChurchofJesusChrist.org). E ao ona ta’itolu tausaga ma latou toe faia le aoaoga faamasani lea.

Pe a tutupu ni sauaga, o le uluai tiutetauave muamua lava o taitai o le Ekalesia o le fesoasoani atu lea ia i latou o ē ua sauaina, ma ia puipuia tagata agavaivai mai le sauaina i le lumanai. E lē tatau i taitai ona uunaia se tagata e nofo ai pea i se fale po o se tulaga e sauaina pe lē saogalemu.

38.6.2.1

Laina Fesoasoani mo Sauaga

I nisi atunuu, ua faavaeina ai e le Ekalesia se laina fesoasoani e lē faalaua’iteleina mo sauaga e fesoasoani ai i peresitene o siteki ma epikopo. E tatau i nei taitai ona vave valaau atu i le laina fesoasoani e uiga i tulaga uma o loo ono sauaina ai se tagata—pe ua lamatia ai foi i le sauaina. E tatau foi ona latou valaau atu i ai pe afai latou te silafia se tagata o le Ekalesia o matamata, faatauina mai, pe faasalalauina atu ponokalafi po o ata mataga o fanau.

O loo avanoa lenei laina fesoasoani mo epikopo ma peresitene o siteki e valaau i ai i le 24 itula i le aso, 7 aso o le vaiaso. O loo tuuina atu i lalo ia faamatalaga e faafesootai ai.

• Iunaite Setete ma Kanata: 1-801-240-1911 po o le 1-800-453-3860, laina faaopoopo 2-1911.

• United Kingdom: 0800 970 6757

• Aialani: 1800 937 546

• Atunuu i le Eria Tutotonu a Europa: [phone] po o le [e-mail]

• Ausetalia: 02 9841 5454 (mai totonu o le atunuu)

• Niu Sila: 09 488 5592 (mai totonu o le atunuu)

E tatau i epikopo ma peresitene o siteki ona vili le laina pe a talanoaina tulaga e aofia ai soo se ituaiga o sauaga. O le a taliina e le aufaigaluega faapolofesa faaletulafono ma faalematata a latou fesili. O le a tuuina atu foi e nei au polofesa ia faatonuga i le ala e:

• Fesoasoani ai i ē ua aafia ma fesoasoani ai e puipuia i latou mai nisi sauaga e tulai mai.

• Fesoasoani ai e puipuia tagata e ono aafia.

• Tausisia ai tulaga manaomia faaletulafono mo le lipotia o sauaga.

Ua tautino le Ekalesia na te tausisia le tulafono i le lipotia o sauaga (tagai i le 38.6.2.7). E eseese tulafono i nofoaga, ma o le tele lava o taitai o le Ekalesia e le o ni tagata tomai faapitoa faaletulafono. O le valaau atu i le laina fesoasoani e taua mo epikopo ma peresitene o siteki e faataunuu ai o latou tiutetauave e lipoti i ai sauaga.

E tatau foi i se epikopo ona logo lona peresitene o le siteki e uiga i ni tulaga o sauaga.

I atunuu e leai se laina fesoasoani faapea, e tatau i se epikopo ua silafia se sauaga ona faafesootai lona peresitene o le siteki. E ao i le peresitene o le siteki ona sailia se taitaiga mai le loia a le eria i le ofisa o le eria. E fautuaina foi o ia e fefaasoaai ma le aufaigaluega o le Tautua mo Aiga po o le pule o le uelefea ma le ola tutoatasi i le ofisa o le eria.

38.6.2.2

Fefautuaa’iga i Mataupu Tau i Sauaga

O tagata na aafia fua i sauaga e tele lava ina mafatia i lagona tiga matuia o le ta’usalaina. O peresitene o siteki ma epikopo e tali atu ma le agaalofa ma le loto faamaoni. Latou te saunia ma tuuina atu fautuaga faaleagaga ma le lagolago e fesoasoani ai i e ua aafia fua e faatoilalo ia aafiaga faataumaoi o le sauaina po o le faatautala.

O nisi taimi e i ai lagona o le maasiasi po o le tausalaina i tagata ua aafia fua. O tagata na aafia fua e lē ta’usalaina i le agasala. E fesoasoani taitai ia i latou ma o latou aiga ia malamalama i le alofa o le Atua ma le faamalologa e maua mai e ala ia Iesu Keriso ma Lana Togiola (tagai i le Alema 15:8; 3 Nifae 17:9).

E tatau i peresitene o siteki ma epikopo ona fesoasoani atu ia i latou na faia sauga ia salamo ma ia tuu a latou amioga saua. Afai na faia e se tagata matua se agasala faalefeusuai i se tamaitiiti, e ono faigata tele ona suia le amio. E ono faaumiumi tele le faagasologa o le salamo. Tagai i le 38.6.2.3.

E tatau foi i peresitene o siteki ma epikopo ona popole ma nofouta pe a galulue ma aiga o tagata na aafia fua ma tagata na faatinoina ia sauaga.

O loo maua taiala mo le fautuaina o tagata e aafia fua ma tagata solitulafono i le Abuse: How to Help (Sauaga: Faapefea Ona Fesoasoani Atu).

E faaopoopo atu i le mauaina o fesoasoaniga musuia a taitai o le Ekalesia atonu e moomia foi e tagata ua aafia fua, o e na faatausuai, ma o latou aiga ni fautuaga faapolofesa. Mo faamatalaga, tagai i le 31.3.6.

Mo faamatalaga e uiga i mea e tatau i epikopo ma peresitene o siteki ona fai pe a latou silafia soo se ituaiga o sauaga, tagai i le 38.6.2.1. Mo faamatalaga e uiga i fautuaga i mataupu tau i sauaga faalefeusuaiga, fai ‘aiga faamalosi, po o isi ituaiga o faaoolima faalefeusuai, tagai i le 38.6.18.2.

Tagai foi i le FamilyServices.ChurchofJesusChrist.org.

38.6.2.3

Sauaina o Tamaiti po o le Autalavou

O le sauaina o se tamaitiiti po o se talavou o se agasala matuia faapitoa (tagai i le Luka 17:2). E pei ona faaaogaina i i, o le sauaina o se tamaitiiti po o se talavou ua aofia ai mea nei:

• Sauaga faaletino: Faaoo o manu’a ogaoga i le tino e ala i le limatētē faaletino. O nisi manu’a atonu e le vaaia e mata.

• Sauaga po o le faatautala faalefeusuaiga: O le faia o soo se gaoioiga feusuai ma se tamaitiiti po o se talavou po o le faatagaina ma le loto i ai po o le fesoasoani i isi e faia ia ituaiga o gaoioiga. E pei ona faaaogaina i i, o sauaga faalefeusuaiga e lē aofia ai gaoioiga faalefeusuai i le va o ni tamaiti laiti se toalua e felāta’i tausaga ua malilie i ai.

• Sauaga faalelagona: O le faaaogaina o faatinoga ma upu e faatamaia matuia ai lagona faaaloalo o se tamaitiiti po o se talavou mo ia lava po o lona lava taua faaletagata. O lea tulaga e masani lava ona aofia ai le faisoo ma le faifai pea o faiga faatiga, faiga faatogafiti, ma faitioga e faalumaina ma faamamasagia ai. E mafai foi ona aofia ai le matuā lē amana’iaina lava o le saogalemu o isi.

• Ponokalafi po o Ata Mataga o Fanau: Tagai i le 38.6.6.

Afai e silafia e se epikopo po o se peresitene o le siteki pe masalomia le sauaina o se tamaitiiti po o se talavou, na te mulimulita’ia vave loa ia faatonuga o loo i le 38.6.2.1. Na te faia foi se faatinoga e fesoasoani ai e puipuia ma tetee atu i nisi sauaga.

E manaomia se fono o le tagata o le Ekalesia ma se faamatalaga faaopoopo i luga o pepa faamaumau pe afai e sauaina e se tagata matua se tamaitiiti po o se talavou e pei ona faamatalaina i le vaega lenei. Tagai foi i le 32.6.1.1 ma le 38.6.2.5.

O uiga saua faapalopalo faaletino pe faalelagona i le va o tamaiti po o le autalavou o vaitausaga tutusa e tatau ona talanoaina e taitai o uarota. E lē faia se fono o le tagata o le Ekalesia.

38.6.2.4

Sauaina o se Toalua po o se Isi Tagata Matua

O le sauaina o se toalua po o se isi tagata matua e mafai ona tupu i le tele o auala. O nei auala e aofia ai le sauaina faaletino, faalefeusuai, faalelagona, ma mea tautupe. O tagata matutua ua toeaiina ma olomatutua, augavaivai, po o ē e i ai ni manaoga faapitoa o nisi taimi e matuā lamatiaina lava i sauaga.

E tele taimi e leai se faauigaga se tasi o le sauaina e mafai ona faaaoga i tulaga uma. Ae, e tele āūga ogaoga eseese o amioga faasaua. O lea āūga e faasolosolo mai le faaaogaina i nisi taimi o upu malolosi e oo atu lava i le faaoo o se manu’a matuia.

Afai e silafia e se epikopo po o se peresitene o le siteki le sauaina o se toalua po o se isi tagata matua, na te mulimulita’ia vave loa ia faatonuga o loo i le 38.6.2.1. Na te faia foi se faatinoga e fesoasoani ai e puipuia ma tetee atu i nisi sauaga.

E saili atu taitai i le taitaiga a le Agaga e fuafua ai pe o se fautuaga patino po o se fono o le tagata o le Ekalesia o le faatulagaga sili lea ona talafeagai e taulima ai le sauaina. E mafai foi ona latou fefautuaa’i ma lo latou taitai perisitua fitoitonu e uiga i le faatulagaga. Peitai, soo se sauaga i se toalua po o se isi tagata matua e tulai mai i tulaga e pei ona faamatalaina i lalo, e manaomia ai le faia o se fono o le tagata o le Ekalesia.

• Sauaga faaletino: Faaoo ai manu’a ogaoga i le tino e ala i le limatētē faaletino. O nisi manu’a atonu e lē vaaia e mata.

• Sauaga Faalefeusuaiga: Tagai i tulaga o loo faama’oti atu i le 38.6.18.3.

• Sauaga faalelagona: O le faaaogaina o faatinoga ma upu e faatama’ia matuia ai lagona faaaloalo o se tamaitiiti po o se talavou mo ia lava po o lona lava ia taua faaletagata. O lea tulaga e masani ona aofia ai le faisoo ma le faifai pea o faiga faatiga, faiga faatogafiti, ma faitioga e faalumaina ma faamamasagia ai.

• Sauaga i mea tautupe: O le faaaogaina o se tasi i mea tautupe. O lea mea e mafai ona aofia ai le faaaogaina faasolitulafono pe aunoa ma se faatagaga o meatotino a se tagata, tupe, po o isi mea taua. E mafai foi ona aofia ai le maua i se ala taufaasese o le pulesaua i mea tautupe i luga atu o se tasi. E mafai ona aofia ai le faaaoga o le pulesaua i mea tautupe e fai faamalosi ai amioga. Tagai foi i le 32.6.1.3.

38.6.2.5

O Valaauga i le Ekalesia, Pepa Faataga o le Malumalu, ma Faamatalaga Faaopoopo i Luga o Pepa Faamaumau

O tagata o le Ekalesia e sauaina isi e lē tatau ona tuu atu i ai ni valaauga i le Ekalesia ma e lē mafai foi ona maua se pepa faataga o le malumalu se’i iloga ua latou salamo ma ua aveesea tapuia’iga o le avea ai ma tagata o le Ekalesia.

Afai e sauaina faalefeusuai e se tagata se tamaitiiti po o se talavou pe sauaina matuia faalelagona pe faaletino se tamaitiiti po o se talavou, o le a tuu ni faamatalaga faaopoopo i lona pepa faamaumau. E lē tatau ona tuu atu i ai se valaauga po o se tofiga e aofia ai tamaiti po o le autalavou. O lea tulaga e aofia ai le lē tuuina i ai o se tofiga faaleauaunaga i se aiga e i ai talavou po o tamaiti i le fale. E aofia ai foi le lē avea o se talavou e fai ma ana soa faaleauaunaga. O nei tapuia’iga e tatau ona tumau ai pea se’i vagana ua faataga mai e le Au Peresitene Sili le aveesea o faamatalaga faaopoopo. Tagai i le 32.14.5 mo faamatalaga e uiga i faamatalaga faaopoopo.

38.6.2.6

Aufono a Siteki ma Uarota

I fonotaga a aufono a le siteki ma uarota, e iloilo e le aunoa e le au peresitene o le siteki ma au epikopo aiaiga faavae ma taiala a le Ekalesia e uiga i puipuiga ma le tali atu i sauaga. Latou te aoao atu savali autu o i le vaega o Sauaga o le Fesoasoani mo le Ola i le Potutusi o le Talalelei. Latou te valaaulia ai faatalatalanoaga mai sui o aufono. E saili e taitai ma sui o le aufono le taitaiga a le Agaga a o latou aoao atu ma talanoaina lenei mataupu ma‘ale’ale.

E tatau foi i sui o le aufono ona faamae’a le aoaoga faamasani o le puipuiga o tamaiti ma le autalavou (tagai i le 38.6.2).

38.6.2.7

Faafitauli Faaletulafono e Fesootai i Sauaga

Afai o ni gaoioiga faasaua a se tagata o le Ekalesia ua solia ai tulafono e faatatau i ai, e tatau i le epikopo po o le peresitene o le siteki ona uunaia le tagata ia lipoti atu nei gaoioiga i le ofisa o leoleo po o isi taitai talafeagai o le malo. E mafai e le epikopo po o le peresitene o le siteki ona maua mai faamatalaga e uiga i mea e manaomia i le faiga o lipoti i le lotoifale e ala i le laina fesoasoani a le Ekalesia (tagai i le 38.6.2.1). Afai e i ai ni fesili a tagata o le Ekalesia e uiga i mea e manaomia i le faiga o lipoti, na te fautuaina i latou ia faamautu mai se fautuaga faaloia agavaa.

E tatau i taitai ma tagata o le Ekalesia ona faataunuuina matafaioi faaletulafono uma e lipoti atu ai sauaga i puleaga faalemalo. I nisi o nofoaga, o taitai ma faiaoga o ē galulue ma tamaiti ma le autalavou e manatu i ai o le “aufailipoti faatulafonoina” ma e tatau ona lipotia sauaga i puleaga faaletulafono. E faapena foi, i le tele o nofoaga, soo se tagata lava e iloa se sauaga e manaomia ona ia lipotia i puleaga faaletulafono. E tatau i epikopo ma peresitene o siteki ona vili le laina fesoasoani mo auiliiliga e uiga i le aufailipoti faatulafonoina ma isi tulaga manaomia faaletulafono mo le lipotia o sauaga. O le aiaiga faavae a le Ekalesia o le usita’ia o le tulafono.

38.6.3

Tui Faato (Artificial Insemination)

Tagai i le 38.6.9.

38.6.4

Taofiofia o le Fanauina Mai o Fanau

O lagona faamama’i faaletino i le va o le tane ma le avā ua faamoemoeina ia matagofie ma paia. Ua faauuina e le Atua mo le foafoaga o fanau ma mo le faaalia o le alofa i le va o le tane ma le ava (tagai i le 2.1.2).

O se avanoa mo ulugalii faaipoipo o e ua mafai ona fanauina mai fanau, le saunia o tino faaletino mo fanau agaga a le Atua, o e o le a latou nafa ma le faafaileleina ma le tausiga (tagai i le 2.1.3). O le faaiuga pe toafia le fanau o le a i ai, faapea ma le taimi e maua mai ai e matuai patino lava, ma e matuai ma’oti lava i le ulugalii. E tatau ona tuu lea i le va o le ulugalii ma le Alii. E le tatau i tagata o le Ekalesia ona fefaamasinoai i lenei mataupu.

E le fautuaina e le Ekalesia ia taotoga e faamuta ai le toe fanau e avea ma se auala e taofiofi ai le fanau mai. O taotoga e faamuta ai le toe fanau e aofia ai le aveesea o le faa’autagata ma le nonoaina o le augutu o le faa’autagata. Ae peitai, o lenei faaiuga o se mataupu faaletagata e tuu lava i le faautautaga ma le fuafuaga ma le agaga tatalo o le tane ma le ava. E ao i ulugalii ona fefautuaai faatasi i le lotogatasi ma sailia le faamautuuga a le Agaga i le faia o lea faaiuga.

O taotoga e faamuta ai le fanau o nisi taimi e manaomia mo mafuaaga faafomai. E mafai ona manuia ia tagata o le au paia i le fefautuaai ai ma polofesa faafomai.

38.6.5

Ola Mamā ma le Faamaoni A’ia’i Faaleulugalii

O le tulafono a le Alii o le ola mamā o le:

• Aloese mai sootaga feusuai i fafo atu o se faaipoipoga faaletulafono i le va o se alii ma se tamaitai.

• Faamaoni a’ia’i i totonu o le faaipoipoga.

O lagona faamama’i faaletino i le va o le tane ma le avā ua faamoemoeina ia matagofie ma paia. Ua faauuina e le Atua mo le foafoaga o fanau ma mo le faaalia o le alofa i le va o le tane ma le avā.

Ua na o se alii ma se tamaitai ua faaipoipoina faaletulafono o se tane ma se avā e tatau ona faia sootaga feusuai. I le silafaga a le Atua, e taua tele le mamā o amioga. O le solia o le tulafono o le ola mamā e matuia tele (tagai i le Esoto 20:14; Mataio 5:28; Alema 39:5). O i latou e aafia ai ua latou faaaogaseseina le mana paia na tuuina mai e le Atua e foafoa ai le ola.

E ono tatau ona faia se fono o le tagata o le Ekalesia pe afai o sea tagata:

• E i ai sootaga feusuai i fafo atu o se faaipoipoga faaletulafono i le va o se alii ma se tamaitai, e pei o le mulilua, faitaaga, sootaga o le itupa e tasi, ma feusuaiga faafesagai i luga o le initoneti po o luga o le telefoni (tagai i le 32.6.2).

• O loo i ai i se ituaiga o faaipoipoga po o se faigapaaga e i fafo atu o se faaipoipoga faaletulafono i le va o se alii ma se tamaitai, e pei o le nonofo faapouliuli, faatasiga faalemalo ma faigapaaga, ma le faaipoipoga a le itupa e tasi.

• E faaaogaina malosi ma le faatuinanau o ponokalafi, ua afua ai se faataumaoiga tele i se faaipoipoga po o le aiga o se tagata o le Ekalesia (tagai i le 38.6.13).

O le faai’uga pe faia se fono o le tagata o le Ekalesia i nei tulaga e faalagolago i le tele o tulaga (tagai i le 32.7). Mo se faataitaiga, o le a sili ona manaomia se fono e fesoasoani ai i se tagata o le ekalesia ia salamo pe afai ua ia solia feagaiga o le malumalu pe sa fai soo foi le agasala.

Tagai i le 32.6.1.2 mo le taimi e manaomia ai se fono mo agasala faalefeusuaiga.

I nisi o tulaga, o fautuaga patino ma tapuia’iga māmā o le avea ai ma tagata o le Ekalesia e ono lava ma totoe lea (tagai i le 32.8).

38.6.6

Ponokalafi po o Ata Mataga o Fanau

E ta’usalaina e le Ekalesia ponokalafi o fanau i soo se ituaiga. Afai e silafia e se epikopo po o se peresitene o le siteki se tagata o le Ekalesia o aafia i ponokalafi po o ata mataga o fanau, na te mulimulita’ia vave loa ia faatonuga o loo i le 38.6.2.1.

E manaomia se fono o le tagata o le Ekalesia ma se faamatalaga faaopoopo i luga o le pepa faamaumau pe afai e faia, faasoa atu, umia, pe matamata faafia se tagata o le Ekalesia i ata faaponokalafi o tamaiti (tagai i le 32.6.1.2 ma le 32.14.5). O lenei taiala i se tulaga aoao e lē faatatau i tamaiti po o talavou e talitutusa le matutua i tausaga o ē latou te fefaasoaa’ia ata faalefeusuaiga o i latou lava po o isi. E ono talafeagai se fautuaga patino ma tapuia’iga māmā o le avea ma tagata o le Ekalesia i tulaga na.

Mo nisi taiala, tagai i le 38.6.13.

38.6.7

O Le Foai Atu po o le Faatauina Atu o Suaola po o Fua

O le mamanu o se tane ma se ava e saunia ai tino mo fanau agaga a le Atua ua tofia faaleatua (tagai i le 2.1.3). Ona o lenei le mafuaaga, ua le fautuaina ai e le Ekalesia ona foai atu ia suaola po o fua. Ae peitai, o se mataupu faaletagata lea e i’u lava ina tuu atu i le faamasinoga ma le iloiloga ma le agaga tatalo o le tagata faaolioli e foai atu suaola po o fua. Tagai i le 38.6.9. E lē fautuaina foi e le Ekalesia le faatau atu o suaola po o fua.

38.6.8

Peritome Faatufanua o Tamaitai

E ta’usalaina e le Ekalesia soo se ituaiga peritome faatufanua o tamaitai.

38.6.9

Togafitiga ia Fananau Ai

O le mamanu o se tane ma se ava e saunia ai tino mo fanau agaga a le Atua ua tofia faaleatua (tagai i le 2.1.3). Pe a oo ina manaomia, e mafai ona fesoasoani ia tekinolosi faafua i se tamaitai ma se alii ua faaipoipo i lo latou naunauga amiotonu ia maua ni fanau. O lenei tekinolosi e aofia ai le tui faato po o le to faamili.

E lē fautuaina e le Ekalesia se to faamili e faaaoga ai suaola mai se isi lava e ese mai le tane po o se fua mai se tasi e ese mai le ava. Ae peitai, o se mataupu faaletagata lea e tuu lava i le faautautaga ma le fuafuaga ma le agaga tatalo o se alii ma se tamaitai ua faaipoipoina faaletulafono.

Mo faamatalaga e uiga i le faamauina o fanau o e na fananau mai e ala i le to faamili, po o le vitro fertilization, tagai i le 3.4.2.6.

Tagai foi i le “Vaetama” (Autu ma Fesili, topics.ChurchofJesusChrist.org).

38.6.10

Mata’ifale po o le toe ui i fanau

E ta’usalaina e le Ekalesia soo se ituaiga o mata’ifale. E pei ona faaaogaina i i, o le mata’ifale o sootaga feusuai i le va:

• O se matua ma se tamaitiiti.

• O se matua o matua ma se tama a le fanau.

• Uso/Tuagane/Tuafafine

• O se uso o le tamā po o tuagane o le tinā, uso o le tinā po o le tuafafine o le tamā ma se afafine o le uso, tama teine a le tuafafine po o se atalii o le uso po o se tama tama a le tuafafine.

E pei ona faaaogaina i i, o se atalii/afafine, fanau a fanau, tei, afafine o le uso po o se tama teine a le tuafafine, ma le atalii o le uso po o le tama tama a le tuafafine e aofia ai faiā o matua moni ma fanau moni, vaetamaina, ese le tina pe ese le tama, po o fanau fai. O le mataifale e mafai ona tupu i le va o fanau laiti, o se tagata matua ma se tamaitiiti, po o tagata matutua e toalua. Afai e i ai ni fesili a le peresitene o le siteki pe o se sootaga ua ta’usalaina o se mataifale i lalo o le tulafono i le lotoifale, na te sailia se taitaiga mai le Ofisa o le Au Peresitene Sili.

Pe a afaina fua se tamaitiiti i le mataifale, e vili e le epikopo po o le peresitene o le siteki le laina fesoasoani a le Ekalesia mo sauaga i atunuu o loo maua ai (tagai i le 38.6.2.1). I isi atunuu, e ao i le peresitene o le siteki ona sailia le taitaiga mai le loia a le eria i le ofisa o le eria. E fautuaina foi o ia e fefaasoaai ma le aufaigaluega o le Tautua mo Aiga po o le pule o le uelefea ma le ola tutoatasi i le ofisa o le eria.

E manaomia se fono o le tagata o le Ekalesia ma se faamatalaga faaopoopo i luga o le pepa faamaumau pe afai e solia e se tagata o le Ekalesia le mata’ifale po o le toe ui i fanau (tagai i le 32.6.1.2 ma le 32.14.5). O le mata’ifale e toetoe lava o taimi uma e manaomia ai le soloia o se tagata mai le avea ma tagata o le Ekalesia.

Afai e solia e se tamaitiiti le mata’ifale, e faafesootai e le peresitene o le siteki le Ofisa o le Au Peresitene Sili mo se faatonuga.

O tagata na aafia fua i faiga mata’ifale e tele lava ina mafatia i lagona tiga matuia. E tali atu taitai ma le agaalofa mai le loto ma le loto faamaoni. Latou te saunia ma tuuina atu le lagolago faaleagaga ma fautuaga e fesoasoani ai ia i latou e faatoilalo ia aafiaga faataumaoi o le mataifale.

O nisi taimi e i ai lagona o le maasiasi po o le ta’usalaina i tagata ua aafia fua. O tagata na aafia fua e lē ta’usalaina i le agasala. E fesoasoani taitai ia i latou ma o latou aiga ia malamalama i le alofa o le Atua ma le faamalologa e maua mai e ala ia Iesu Keriso ma Lana Togiola (tagai i le Alema 15:8; 3 Nifae 17:9).

E faaopoopo atu i ai i le mauaina o fesoasoaniga musuia a taitai o le Ekalesia, atonu e moomia foi e tagata na aafia fua ma o latou aiga ni fautuaga faapolofesa. Mo faamatalaga, tagai i le 38.6.18.2.

38.6.11

To Faamili

Tagai i le 38.6.9.

38.6.12

O Faataulaitu

“O le mea e mai i le Atua o le malamalama lea” (Mataupu Faavae ma Feagaiga 50:24). O faataulaitu e taulai i le pogisa ma e tau atu i le taufaasese. Na te faaumatia le faatuatua ia Keriso.

O faataulaitu e aofia ai le tapuai ia Satani. E aofia ai foi ia gaoioiga faaalatua e le ogatusa ma le talalelei a Iesu Keriso. O na gaoioiga e aofia ai (ae le na o le pau ai lea) faamatala-vavalo, o fetu’u, ma faiga faamalolo e taufaata’ita’i i le mana o le perisitua a le Atua (tagai i le Moronae 7:11–17).

E le tatau i tagata o le Ekalesia ona auai i soo se ituaiga o tapuaiga a Satani pe faipaaga i soo se itu ma mea faataulaitu. E le tatau ona latou taulai atu i lena pouliuli i talatalanoaga po o sauniga a le Ekalesia.

38.6.13

Ponokalafi

E ta’usalaina e le Ekalesia ponokalafi o soo se ituaiga. O le faaaogaina o ponokalafi o soo se ituaiga e faatamaiaina ai olaga o tagata taitoatasi, aiga, ma malo. E aveesea ai foi le Agaga o le Alii. E tatau i tagata o le Ekalesia ona aloese mai ituaiga uma o anomea faaponokalafi ma tetee atu i lona gaosiga, faasalalauina, ma le faaaogaina.

Ua saunia e le Ekalesia ia punaoa nei e fesoasoani ai i tagata ua aafia o latou olaga i ponokalafi:

• AddressingPornography.ChurchofJesusChrist.org

• AddictionRecovery.ChurchofJesusChrist.org

• Fesoasoani ia i Latou o Ē Tauivi ma Ponokalafi (tamaitusi)

• Teuteu Ou Manatu i le Mamā (tamaitusi)

E tuuina atu foi e peresitene o siteki le lagolago i tagata o aiga pe a manaomia.

O nisi e aafia i ponokalafi atonu e faafuase’i. O le faaaogaina ma le loto i ai o ponokalafi e faataumaoi—pe mai lea taimi i lea taimi po o le malosi tele.

O fautuaga patino ma tapuia’iga māmā o le avea ai ma tagata o le Ekalesia e masani ona lava ma totoe pe a fesoasoani atu i se tagata ia salamo mai le faaaogaina o ponokalafi (tagai i le 32.8). E lē masani ona faia ni fono o le tagata o le Ekalesia. Peitai, e ono alagatatau se fono mo le faaaogaina malosi ma le faatuinanau o ponokalafi ua afua ai se faataumaoiga tele i se faaipoipoga po o le aiga o se tagata o le Ekalesia (tagai i le 38.6.5). E manaomia se fono pe afai e faia, faasoa, umia, pe matamata faafia se tagata o le Ekalesia i ata faaponokalafi o tamaiti (tagai i le 38.6.6).

E faaopoopo atu i fesoasoaniga musuia a taitai o le Ekalesia, e ono moomia e nisi tagata o le Ekalesia ni fautuaga faapolofesa. E mafai e taitai ona faafesootai le Tautua mo Aiga mo se fesoasoani pe a manaomia. Tagai i le 31.3.6 mo faamatalaga e faafesootai ai.

38.6.14

Faailoga tagata

O tagata uma o fanau a le Atua. O tagata uma o uso ma tuafafine o se vaega o Lona aiga faalelagi (tagai i le “O Le Aiga: O Se Folafolaga i le Lalolagi”). “Na faia e le [Atua] le nuu uma o tagata i le toto e tasi” (Galuega 17:26). “Ua tutusa tagata uma” ia te Ia (2 Nifae 26:33). O tagata taitasi “ua tutusa le pele o le tasi tagata i lana silafaga” (Iakopo 2:21).

O le faailoga tagata e le ogatusa ma le afioga faaalia a le Atua. O le alofagia po o le le alofagia e le Atua e faalagolago i le tuuto atu ia te Ia ma Ana poloaiga, e le o le lanu o le pa’u o se tagata po o isi uiga.

Ua valaau atu le Ekalesia i tagata uma ia lafoai uiga ma faatinoga faailoga lanu i soo se vaega po o tagata taitoatasi. E ao i tagata o le Ekalesia ona taulamua i le faalauiloaina o le faaaloalo mo fanau uma a le Atua. E mulimuli tagata o le ekalesia i le poloaiga a le Faaola ia alolofa atu i isi (tagai i le Mataio 22:35–39). Latou te taumafai malosi ia avea ma tagata agalelei i tagata uma, e teena le faailoga lanu o soo se ituaiga. E aofia ai le faailoga lanu e faavae i le lanu, agaifanua, tagatanuu, ituaiga, itupa, matua, manaoga faapitoa, tulaga faaleagafesootai faaletamaoaiga, talitonuga faalelotu pe le talitonu, ma uiga faaalia i mataupu faalefeusuaiga.

38.6.15

Tosinaga i le Itupa Tutusa ma Amioga a le Itupa Tutusa

E fautuaina e le Ekalesia ia aiga ma tagata o le Ekalesia ina ia aapa atu ma le nofouta, alofa, ma le faaaloalo i tagata o e o loo tosina atu i isi o lana lava itupa. E faalauiloa foi e le Ekalesia i faalapotopotoga i se tulaga lautele e atagia ai ana aoaoga e uiga i le agalelei, faaaofia mai, alofa mo isi, ma le faaaloalo mo tagata soifua uma. E leai se tulaga o le Ekalesia i mafuaaga o le tosina atu i le itupa tutusa.

O poloaiga a le Atua o loo faasa ai amioga uma e lē mama, pe o le itupa e tasi po o itupa uma e lua. E fautuaina e taitai o le Ekalesia tagata o le ekalesia o e ua solia le tulafono o le ola mama. E fesoasoani taitai ia i latou ia maua se malamalama manino o le faatuatua ia Iesu Keriso ma Lana Togiola, le faagasologa o le salamo, ma le faamoemoega o le olaga i le lalolagi. O amioga e le ogatasi ma le tulafono o le ola mama e mafai ona afua ai le faia o se fono o le tagata o le Ekalesia (tagai i le 38.6.5). E mafai ona faamagaloina e ala i le salamo faamaoni.

O le lagonaina o le tosina atu i le itupa tutusa e le o se agasala. O tagata o le ekalesia o e o i ai nei lagona ma e le o tuliloaina pe faatinoina na lagona, o loo ola e tusa ai ma le fuafuaga a le Tama Faalelagi mo Lana fanau ma i aoaoga faavae a le Ekalesia. E lagolago ma uunaia i latou e taitai i la latou faaiuga e ola e tusa ai ma poloaiga a le Alii. O tagata o le ekalesia e i ai nei lagona, e mafai ona maua valaauga i le Ekalesia, umia pepa faataga o le malumalu, ma maua sauniga o le malumalu pe afai o latou agavaa. E mafai e alii o le Ekalesia ona maua ma faaaoga le perisitua.

O tagata uma o le ekalesia o e tausia a latou feagaiga o le a mauaina uma faamanuiaga folafolaina i le faavavau pe faatagaina pe leai foi e o latou tulaga i latou e maua faamanuiaga o le faaipoipoga e faavavau ma le tulaga faamatua i lenei olaga (tagai i le Mosaea 2:41).

Ua saunia e le Ekalesia ia punaoa nei ia malamalama atili lelei ai ma lagolago ia tagata ua aafia o latou olaga i le tosina atu i le itupa tutusa:

• “Tosina Atu i le Itupa Tutusa,” Autu ma Fesili, topics.ChurchofJesusChrist.org

• “Tosina Atu i le Itupa Tutusa,” Fesoasoaniga mo le Olaga, ChurchofJesusChrist.org

E faaopoopo atu i fesoasoaniga musuia a taitai o le Ekalesia, atonu e mafai ona aoga i tagata o le Ekalesia ni fautuaga faapolofesa. E mafai e taitai ona faafesootai le Tautua mo Aiga mo se fesoasoani. Tagai i le 31.3.6 mo faamatalaga e faafesootai ai.

38.6.16

Faaipoipoga i le Itupa Tutusa

I le avea ai ma se mataupu autu faaleaoaoga faavae, e faavae mai tusitusiga paia, ua faamautuina ai e le Ekalesia e faapea, o le faaipoipoga i le va o se alii ma se tamaitai e taua i le fuafuaga a Lē Foafoa mo le taunuuga faavavau o Ana fanau. E faamautu foi e le Ekalesia faapea, e faauiga e le tulafono a le Atua le faaipoipoga o se tuufaatasiga faatagaina ma faaletulafono i le va o se alii ma se tamaitai.

Ua na o se alii ma se tamaitai ua faaipoipoina faaletulafono o se tane ma se avā e tatau ona faia sootaga feusuai. Soo se isi lava la sootaga feusuai, e aofia ai sootaga i le va o tagata o le itupa tutusa, o ni agasala ma e ta’uvaleina ai le foafoaga paia faalelagi o le aiga.

38.6.17

A’oa’oga o Tulaga Faalefeusuai

Ua i ai i matua le tiutetauave muamua mo le a’oa’oina o tulaga faalefeusuai i a latou fanau. E ao i matua ona faia ni talatalanoaga faamaoni, manino, ma faifai pea ma a latou fanau e uiga i feusuaiga lelei ma le amiotonu. O nei talatalanoaga e tatau ona:

• Talafeagai ma tausaga ma le matua o le tamaitiiti.

• Fesoasoani i tamaiti e sauniuni mo le fiafia i le faaipoipoga ma mulimuli i le tulafono o le ola mama (tagai i le 2.1.2).

• Talanoaina le matautia o ponokalafi, le manaomia ona aloese mai ai, ma le ala e tali atu ai pe a latou fetaia’i.

Mo nisi faamatalaga, tagai i le “Sex Education and Behavior” (Autu ma Fesili, topics.ChurchofJesusChrist.org).

E avea o se vaega o lo latou tiutetauave e a’oa’o a latou fanau, e ao i matua ona silafia ma saili atu ma le talafeagai ia uunaia le a’oa’oina o le a’oa’oga o tulaga faalefeusuai i a’oga. E a’oa’o atu e matua ia mataupu faavae sa’o ma lagolago ia a’oa’oga a le a’oga ia e ogatusa ma le talalelei.

38.6.18

Sauaina Faalefeusuai, Fai’aīga Faamalosi, ma Isi Ituaiga o Faaoogalima Faalefeusuai.

E ta’usalaina e le Ekalesia sauaga faalefeusuaiga. E pei ona faaaogaina i i, o sauaga faalefeusuaiga ua faauigaina o le fai faamalosi o soo se gaoioiga faalefeusuai e lē o manao i ai se isi tagata. O gaoioiga faalefeusuai ma se tagata e lē mafai ona tuuina atu se maliega faaletulafono, e faitaulia o se sauaga faalefeusuaiga. E mafai foi ona tupu le sauaga faalefeusuaiga ma se toalua po o se sootaga faaevaga faamasani. Mo faamatalaga e uiga i sauaga faalefeusuaiga i se tamaitiiti po o se talavou, tagai i le 38.6.2.3.

O sauaga faalefeusuaiga e aofia ai se vaega lautele o faatinoga, mai le faapalopalo i le fai’aiga faamalosi ma isi ituaiga o faaoolima faalefeusuaiga. E mafai ona tupu i le faaletino, i faaupuga, ma isi auala. Mo taitaiga e uiga i le fautuaina o tagata o le ekalesia ua oo i sauaga faalefeusuaiga, fai’aiga faamalosi, po o isi ituaiga o faaoolima faalefeusuai, tagai i le 38.6.18.2.

Afai e masalomia e tagata o le ekalesia pe ua silafia foi se sauaga faalefeusuaiga, latou te faia se faatinoga e puipuia ai i latou e aafia fua ma isi i le vave e mafai ai. O lea tulaga e aofia ai le lipotia i taitai faalemalo ma logoina le epikopo po o le peresitene o le siteki. Afai sa sauaina se tamaitiiti, e ao i tagata o le ekalesia ona mulimuli i faatonuga o i le 38.6.2.

38.6.18.1

Laina Fesoasoani mo Sauaga

Afai e silafia e se epikopo po o le peresitene o le siteki se sauaga faalefeusuaiga, fai’aiga faamalosi, po o se isi lava ituaiga o faaoolima faalefeusuaiga, na te viliina le laina fesoasoani a le Ekalesia mo sauaga i atunuu o loo maua ai (tagai i le 38.6.2.1 mo faamatalaga e faafesootai ai). O le a taliina e le aufaigaluega faapolofesa faaletulafono ma faalematata ana fesili. O le a tuuina atu foi e nei au polofesa ia faatonuga i le ala e:

• Fesoasoani ai i ē ua aafia fua ma fesoasoani ai e puipuia i latou mai nisi sauaga e toe tulai mai.

• Fesoasoani ai e puipuia tagata e ono aafia.

• Tausisia ai tulaga manaomia faaletulafono mo le lipotia o sauaga.

I atunuu e leai se laina fesoasoani, e tatau i se epikopo ua silafia e uiga i nei solitulafono ona faafesootai lona peresitene o le siteki. E ao i le peresitene o le siteki ona sailia se taitaiga mai le loia a le eria i le ofisa o le eria. E fautuaina foi o ia e fefaasoaai ma le aufaigaluega o le Tautua mo Aiga po o le pule o le uelefea ma le ola tutoatasi i le ofisa o le eria.

38.6.18.2

Fautuaga mo Tagata e Aafia Fua i le Sauaina Faalefeusuai, Fai’aiga Faamalosi, ma Isi Ituaiga o Faaoogalima Faalefeusuai.

O tagata e aafia fua i sauaga faalefeusuaiga, fai’aīga faamalosi, po o isi ituaiga o faaoolima faalefeusuai, e tele ina puapuagatia i mafatiaga matuia. A oo ina latou faailoa atu i se epikopo po o le peresitene o le siteki, na te tali atu ma le agaalofa mai le loto ma le loto malamalama. Na te saunia ma tuuina atu fautuaga faaleagaga ma le lagolago e fesoasoani ai i e ua aafia fua e faatoilalo ia aafiaga faataumaoi o le sauaina po o le faatautala. Na te viliina foi le laina fesoasoani a le Ekalesia mo sauaga i atunuu o loo maua ai (tagai i le 38.6.18.1).

O nisi taimi e i ai lagona o le maasiasi po o le ta’usalaina i tagata ua aafia fua. O tagata na aafia fua e lē ta’usalaina i le agasala. E le tuua’ia e taitai le tagata ua aafia fua. Latou te fesoasoani i tagata ua aafia fua ma o latou aiga ia malamalama i le alofa o le Atua ma le faamalologa e maua mai e ala ia Iesu Keriso ma Lana Togiola (tagai i le Alema 15:8; 3 Nifae 17:9).

E ui atonu e filifili e tagata o le ekalesia e faasoa ia faamatalaga e uiga i le sauaga po o le faaoolima, ae e le tatau ai i taitai ona taulai tele i auiliiliga. E mafai ona avea ma faatama’iga i tagata ua aafia fua.

E faaopoopo atu i ai i le mauaina o fesoasoaniga musuia a taitai o le Ekalesia, atonu e moomia foi e tagata na aafia fua ma o latou aiga ni fautuaga faapolofesa. Mo faamatalaga, tagai i le 31.3.6.

38.6.18.3

Fono o le Tagata o le Ekalesia

E ono tatau ai se fono o le tagata o le Ekalesia mo se tagata ua faaoolima faalefeusua’iga pe sauaina foi se tasi. E manaomia se fono o le tagata o le Ekalesia pe afai na faia e se tagata o le Ekalesia se fai’aiga faamalosi pe ua nofosala i se isi ituaiga o faaoolima faalefeusuaiga (tagai i le 32.6.1.1).

E tatau foi ona faia se fono mo gaoioiga faalefeusuaiga ma se tagata matua augavaivai. E pei ona faaaogaina i i, o se tagata matua augavaivai o se tagata e lē mafai ona ioe i le gaoioiga pe lē mafai foi ona malamalama i lona natura, ona o tapulaa faaletino pe faalemafaufau.

Ina ia taulimaina isi ituaiga o sauaga faalefeusuaiga, e saili e taitai le taitaiga a le Agaga e fuafua ai pe o se fautuaga patino po o se fono o le tagata o le Ekalesia o le faatulagaga sili ona talafeagai lea e fai (tagai i le 32.6.2.2 ma le 32.8). E manaomia se fono i mataupu matuia. E mafai e taitai ona fefautuaa’i ma lo latou taitai perisitua fitoitonu e uiga i le faatulagaga.

Afai o tapuia’iga o le avea ai ma tagata o le Ekalesia o le faai’uga lea mai se fono o le tagata o le Ekalesia na faia ona o sauaga faalefeusuaiga a le na faia, e tuu faamatalaga faaopoopo i luga o le pepa faamaumau o lena tagata.

Mo faamatalaga e uiga i fautuaga i mataupu tau i sauaga, tagai i le 38.6.2.2. Mo faamatalaga e uiga i le faufautuaina o tagata ua aafia fua i le faaoolima faalefeusuaiga, tagai i le 38.6.18.2.

38.6.19

Fafine Nofofua e Ma’itaga

O tagata o le Ekalesia e nofofua a ua ma’itaga, e fautuaina e o e vaai o latou epikopo. I totonu o le Iunaite Setete ma Kanata, e avanoa ia Tautua mo Aiga mo:

• Feutagaiga ma taitai o le Ekalesia.

• Fefautuaai ma matua nofotoatasi e ma’itaga, ma o latou aiga.

E le manaomia se faasinoga mai le epikopo mo lea auaunaga. E le totogia. Tagai i le 31.3.6 mo faamatalaga e faafesootai ai le Tautua mo Aiga.

I isi eria, e mafai e taitai ona faafesootai le aufaigaluega o le Tautua mo Aiga po o le pule o le uelefea ma le ola-tutoatasi i le ofisa o le eria mo feutagaiga.

O loo saunia ma tuuina atu le taitaiga mo le fautuaina o matua nofotoatasi e ma’itaga i le “Unwed Pregnancy” (Autu ma Fesili, topics.ChurchofJesusChrist.org).

38.6.20

Pule i le Ola

O le olaga faaletino o se meaalofa taua mai le Atua—o se meaalofa e ao ona faatauaina ma puipuia. E matua lagolagoina malosi e le Ekalesia le puipuiga mai le pule i le ola. Mo faamatalaga e uiga i le auala e fesoasoani ai i se tagata ua mafaufau e pule i le ola po o se tasi sa aafia i le pule i le ola, tagai i le suicide.ChurchofJesusChrist.org.

O le toatele o tagata ua mafaufau e uiga i le pule i le ola, e mananao ia maua se mapusaga mai le tiga faaletino, faalemafaufau, faalelagona, po o le faaleagaga. O na ituaiga o tagata e manaomia le alofa, fesoasoani, ma le lagolagosua mai le aiga, taitai o le Ekalesia, ma tagata agavaa faapolofesa.

E saunia ma tuuina atu e le epikopo le lagolagosua faalelotu pe afai ua mafaufauina e se tagata o le au paia e pule i le ola, pe sa taumafai foi e fai. E fesoasoani loa foi o ia i le tagata ia maua se fesoasoani faapolofesa. Na te fautuaina i latou e latalata i le tagata e sailia se fesoasoani faapolofesa e pei ona manaomia ai.

E ui i ni taumafaiga aupito sili a i latou o e alolofa, taitai, ma faapolofesa, e le mapuipuia i taimi uma le pule i le ola. E tuua ai le lototiga loloto, fememea’i faalelagona, ma fesili ua lemataliina mo e pele ma isi. E ao i taitai ona faufautua ma faamafanafana i le aiga. Latou te tuuina atu le faafailelega ma le lagolagosua. E ono manaomia foi e le aiga le lagolagosua ma fautuaga faapolofesa.

E le sa’o mo se tagata le pule i lona lava ola. Ae peitai, e na o le Atua e mafai ona faamasino i mafaufauga, faatinoga, ma le maualuga o le iloa ona tali atu o le tagata (tagai i le 1 Samuelu 16:7; Mataupu Faavae ma Feagaiga 137:9).

O le aiga, i le feutagai ai ma le epikopo, e filimaotiina le nofoaga ma le natura o se sauniga o le maliu mo le tagata. E mafai e le aiga ona filifili e faaaoga fale o le Ekalesia. Afai ua uma ona maua faaeega paia o le tagata i le olaga, e mafai ona falelauasi pe faaliulefulefuina o ia i laei o le malumalu.

O i latou e maliu se e pele ona ua pule i le ola, e mafai ona maua le faamoemoe ma le faamalologa ia Iesu Keriso ma Lana Togiola.

Mo faamatalaga e uiga i le puipuiga mai le pule i le ola ma auaunaga, tagai i le suicide.ChurchofJesusChrist.org.

38.6.21

Taotoga e Faamuta ai le Fanau Mai (E Aofia ai le Aveeseina o Totoga Fanau o Alii)

Tagai i le 38.6.4.

38.6.22

Tina Suitulaga

O le mamanu o se tane ma se ava e saunia ai tino mo fanau agaga a le Atua ua tofia faaleatua (tagai i le 2.1.3). Ona o lenei le mafuaaga, e le fautuaina ai e le Ekalesia le tulaga faatina suitulaga. Ae peitai, o se mataupu faaletagata lenei lea e tuu lava i le faautautaga ma le fuafuaga ma le agaga tatalo o le tane ma le ava.

O fanau e fananau mai i se tina suitulaga, e le fananau mai i totonu o le feagaiga. A mae’a ona fananau mai, e na o le pau le auala e mafai ai ona faamau i matua, o le faamaoniga a le Au Peresitene Sili (tagai i le 38.4.2.7). E tusi e matua se tusi i le Au Peresitene Sili ma tuuina atu i le peresitene o le siteki. Afai na te lagolagoina le talosaga, na te auina atu le tusi faatasi ai ma lana lava tusi.

38.6.23

O Tagata Ua Faailoa Mai o ni Tagata ua Faafoliga i le Itupa Faafeagai

O le itupa o se uiga taua e tatau ai o le fuafuaga o le fiafia a le Tama Faalelagi (tagai i le Kenese 1:27). O le uiga faamoemoeina o le itupa i le “O Le Aiga: O Se Folafolaga i le Lalolagi” o le itupa na fanau mai ai. (Mo i latou e le o manino o latou itupa moni i le fanau mai, tagai i le 38.7.7.)

O nisi tagata e lagona o lo latou faalogona i totonu o se itupa, e le ogatusa ma o latou itupa moni na fananau mai ai. E le tu le Ekalesia i se itu patino i mafuaaga o nei lagona. O nisi e oo i nei lagona ua faailoa mai o ni tagata ua faafoliga i itupa faafeagai.

O nei tagata e tele ina fetaiai ma luitau lavelave. O i latou—ma o latou aiga ma uo—e tatau ona taulimaina ma le faaeteete, agalelei, agaalofa, ma le alofa faaKeriso. O i latou uma o fanau a le Atua ma e i ai lo latou taua paia.

E maua ia sauniga o le faaolataga ma le faaeaga e tusa ai ma le itupa o se tagata na fanau mai ai. Mo se taitaiga e uiga i le faatautaia o nei sauniga, tagai i mea nei:

• Papatisoga ma le faamauga (tagai i le 38.2.8.9)

• Faauuga i le perisitua (tagai i le 38.2.9.9)

• Sauniga o le malumalu (tagai i le 26.5.7)

O tagata agavaa e le faia ni taotoga, faafomai, po o ni suiga faaagafesootai e ese mai o latou itupa moni i le taimi na fanau mai ai, e mafai ona olioli i avanoa uma o le avea ai ma tagata o le Ekalesia.

E le fautuaina e taitai o le Ekalesia le tulitulimatagauina o taotoga, faafomai, po o suiga faaagafesootai mai le itupa moni o se tasi i le taimi na fanau mai ai. (O le fesuiaiga faaagafesootai o lona uiga o le faailoaina ma le loto i ai o se tasi ma faailoa atu o ia lava e ese mai le itupa moni i le taimi na fanau mai ai, ma e mafai ona aofia ai le suia o laei, teuga, igoa, po o soanauna.) E fautuaina e taitai faapea o le faia o nei faatinoga o le a oo ai i ni tapuia’iga mai le avea ai ma tagata o le Ekalesia. O nei tapuia’iga ua aofia ai le taofia mai le mauaina po o le faaaogaina o le perisitua, mauaina po o le faaaogaina o se pepa faataga o le malumalu, ma le auauna atu i nisi o valaauga faale-Ekalesia.

O tagata ua sui mai o latou itupa moni i le taimi e fananau mai ai e taliaina e auai i sauniga faamanatuga ma auai i le Ekalesia i le tele o isi auala. Ua fautuaina nei tagata taitoatasi ma o latou aiga e feutagai ma o latou taitai i le lotoifale e faatatau i le auai i le Ekalesia. E aoao atu e taitai o le Ekalesia upumoni o le talalelei ma auauna atu i se auala faaKeriso. Latou te faitaulia manaoga o tagata uma o loo aafia ai. O vaega o lenei tusitaulima—e pei o le auai i sauniga ma gaoioiga a le Ekalesia (tagai i le 38.1.1), auai i le galuega o talafaasolopito o aiga (tagai i le 25.1 ma le 25.4), auauna atu i isi (tagai i le 22.2.3), ma isi mea faapena—e tatau ona taialaina ai taitai a o latou fefautuaai ma tagata taitoatasi ma o latou aiga. Mo nisi taitaiga i le auai o tagata taitoatasi o le Ekalesia o e faailoa mai o ni tagata ua faafoliga i itupa faafeagai, tagai i nei mataupu faavae taiala.

O tagata o le ekalesia o e ua faia laasaga e suia ona toe suia lea i o latou itupa moni i le taimi na fanau mai ai ma ua agavaa ma tautino atu e tausi poloaiga a le Atua, e mafai ona olioli i avanoa uma o le avea ai ma tagata o le Ekalesia.

E eseese tele tulaga mai lea tagata i lea tagata ma e mafai ona suia i le aluga o taimi. O tagata o le ekalesia o e ua manatu o o latou lagona i totonu o le itupa e le ogatasi ma o latou itupa moni i le taimi na fanau mai ai pe ua faailoa mai o ni tagata ua faafoliga i itupa faafeagai, faapea foi matua po o e o loo vaaia tamaiti laiti o loo feagai ma na tulaga, ua fautuaina e saili se fautuaga mai lo latou epikopo. E fefautuaai le epikopo ma le peresitene o le siteki e talanoaina ai tulaga taitasi ma le matuā faaeteete ma le alofa faaKeriso. E sailia e peresitene o siteki ma misiona ia fautuaga mai le Au Peresitene o le Eria.

E eseese tulafono a le atunuu ma le lotoifale e faatatau i tagata taitoatasi o e faailoa mai ua faafoliga i itupa faafeagai. I totonu o le Iunaite Setete ma Kanata, o peresitene o siteki ma peresitene o misiona o ē e i ai fesili e uiga i tulaga manaomia faaletulafono e tatau ona faafesootai le Ofisa o le Loia Sili a le Ekalesia:

1-800-453-3860, laina 2-6301

1-801-240-6301

I fafo atu o le Iunaite Setete ma Kanata, e faafesootai e nei taitai le loia a le eria i le ofisa o le eria.

Mo nisi faamatalaga e uiga i le malamalama ma le lagolagoina o tagata taitoatasi o e ua lagona o o latou faalogona i totonu o le itupa e le ogatasi ma le itupa moni i le taimi na fanau mai ai pe ua faailoa mai foi ua faafoliga i itupa faafeagai, tagai i le “Transgender” i le ChurchofJesusChrist.org.

38.7

Aiaiga Faafomai ma le Soifua Maloloina

38.7.1

Taotoga o le Tino Maliu mo Suesuega

E mafai ona faia taotoga mo le tino maliu mo suesuega pe afai e malilie i ai le aiga o le ua maliu, ma pe afai e faia lenei taotoga e tusa ai ma le tulafono. I nisi tulaga, e manaomia e le tulafono se taotoga o se tino maliu.

38.7.2

Tanuga po o le Faaliulefulefuina o le Tino Maliu

E fai e le aiga o le tagata maliu le tonu, pe tatau ona tanu lona tino pe faaliulefulefu. Latou te faaaloalogia manaoga o le tagata.

I nisi atunuu, e manaomia ai e le tulafono le faaliulefulefuina o le tino maliu. I isi tulaga, o le tanuga e le o se mea e mafai ona fai pe gafataulimaina foi e le aiga. I tulaga uma lava, e tatau ona taulimaina le tino ma le faaaloalo ma le migao. E tatau ona faamautinoa i tagata o le ekalesia e faapea, o le mana o le Toetutu e faatatau i ai e le aunoa (tagai i le Alema 11:42–45).

O atunuu e mafai ai, o le tino o se tagata o le ekalesia ua maliu a ua uma ona maua ona faaeega paia, e tatau ona faaofu i laei o le malumalu pe afai e tanu pe faaliulefulefu (tagai i le 38.5.10).

O se falelauaisiga po o se sauniga faamanatu e maua ai se avanoa mo aiga e faapotopoto ai ma faaauau sootaga ma tulaga faatauaina faaleaiga (tagai i le 29.5.4).

38.7.3

O Tamaiti e Maliliu a o Le’i Fananau Mai (Maliliu i le manava ma Tamaiti e Fafano).

O matua e oo i le maliu o se tamaitiiti e le’i fanau mai, e mafatia i le faavauvau ma le maliu. E ofo atu e taitai, tagata o aiga, ma uso ma tuafafine o auaunaga le lagolagosua faalelagona ma faaleagaga.

E mafai e matua ona fai se tonu pe fai se sauniga faamanatu po o se sauniga i le tuugamau.

E mafai e matua ona tusifaamaumau ia faamatalaga e uiga i le tamaitiiti i le FamilySearch.org. O loo tuuina atu faatonuga i luga o le uepisaite.

E le manaomia pe faatinoina sauniga o le malumalu mo tamaiti e maliliu a o le’i fananau mai. E le faafitia ai la le avanoa o nei fanau e mafai ai ona avea o se vaega o le aiga i le faavavau. E fautuaina matua e faalagolago i le Alii ma saili atu i Lana faamafanafanaga.

38.7.4

Faaumaina Filemu o le Ola

O le olaga o le tagata o se meaalofa taua mai le Atua. O le faaumaina filemu o le ola o le faamutaina lea ma le iloa lelei o le ola o se tagata o loo mafatia mai se gasegase ua ui po o isi tulaga. O se tagata e auai i le faatinoina o le faaumaina filemu o le ola, e aofia ai le fesoasoani i se tasi e pule i le ola, ua solia ai poloaiga a le Atua ma e ono solia ai foi tulafono i le lotoifale.

O le le faaauauina po o le taliaina o fuataga lagolago mo le faaumiumia o le ola mo se tagata i le iuga o le olaga e le faapea o se faauma filemuina o le ola (tagai i le 38.7.11).

38.7.5

Siama o le HIV ma le AIDS

O tagata o le ekalesia ua maua ai siama o le HIV (Human Immunodeficiency Virus) po o e ua maua i le AIDS (acquired Immunodeficiency syndrome), e ao lava ona taliaina ma le faaaloalo i sauniga ma gaoioiga a le Ekalesia. O lo latou auai e le lamatia ai le soifua maloloina o isi.

38.7.6

Togafiti e faamoe ai

Mo nisi tagata, o togafiti e faamoe ai e mafai ona fetotoa’i ai le faitalia. E le tatau i tagata o le ekalesia ona faaaogaina togafiti e faamoe ai mo faamoemoega o se faataitaiga pe faafiafia ai.

O le faaaoga o togafiti e faamoe ai mo le togafitia o faama’i po o faaletonu faalemafaufau, e ao ona filima’oti i feutagaiga ma fomai faapolofesa iloga.

38.7.7

O Tagata e Le Manino Itupa na Fananau Mai Ai

I tulaga e matuai seasea lava tupu, e fanau mai se pepe ma ni itutinosa e le manino lelei pe o se alii po o se tamaitai (e le manino itutinosa, e lualuagia faaleitupa, pe faafesagai itupa). Atonu e tatau i matua po o isi ona faia ni faaiuga e fuafua ai le itupa o le la tama faatasi ai ma le taitaiga a fomai atamamai. O faaiuga e uiga i taualumaga faafomai po o se faauilavea faaletaotoga e tele ina faia i le vaitau o se pepe meamea. Peitai, e mafai ona faatuatuai vagana ua tatau ona fai i tulaga faafomai.

E manaomia le agaalofa ma le poto faapitoa pe a feagai talavou po o tagata matutua o e fananau mai ma faaletonu tau le itupa ma ni feteenaiga o aafiaga faalelagona e faatatau i faaiuga o le itupa e faia i le tamameamea po o le olaga faatamaitiiti ma le itupa ua avea ma o latou faailoaga.

O fesili e uiga i pepa faamaumau, faauuga i le perisitua, ma sauniga o le malumalu mo talavou po o tagata matutua na fananau mai ma tulaga le manino o itupa, e tatau ona faasino atu i le Ofisa o le Au Peresitene Sili.

38.7.8

Tausiga Faafomai ma le Soifua Maloloina

O le sailia o le fesoasoani faafomai iloga, faaaogaina o le faatuatua, ma le mauaina o faamanuiaga faaleperisitua e galulue faatasi mo le faamalologa, e tusa ai ma le finagalo o le Alii.

E le tatau i tagata ona faaaogaina pe faalauiloa ia faiga faafomai po o le soifua maloloina e fesiligia le faamaoni, faaleagaga, po o le faatulafonoina. O i latou e i ai faafitauli faalesoifua maloloina e tatau ona feutagai ma fomai faapolofesa iloga o e ua laiseneina i eria o loo galulue ai.

E faaopoopo atu i le sailia o le fesoasoani faafomai iloga, e fautuaina foi tagata o le ekalesia e mulimuli i le poloaiga faatusi paia o loo i lea Iakopo 5:14 e “aami atu ia i toeaina o le ekalesia; ia latou tatalo mo ia, pe a uma ona faauu ia te ia i le suauu i le suafa o le Alii.” E tuuina atu faamanuiaga faaleperisitua e i latou o e umia le tofi e tatau ai o le perisitua. E tuuina atu pe a talosagaina ai ma e leai se totogi (tagai i le 18.13).

E le fautuaina tagata o le ekalesia ia sailia faamalologa faavavega pe faamaneta mai se tagata po o se vaega ua fai mai ua i ai ni metotia faapitoa e maua ai le mana faamalolo i fafo atu o le tatalo ma faamanuiaga e faatinoina tatau i le perisitua. O nei faiga e tele ina faasino i ai o se “faamalologa faalemalosiaga.” O loo faaaogaina ai foi isi igoa. O na folafolaga mo le faamalologa e tele ina tuuina atu mo le tupe.

38.7.9

Maruana Faafomai

E tetee le Ekalesia i le faaaogaina o le maruana mo faamoemoega e le-faafomai. Tagai i le 38.7.14.

Ae peitai, atonu e mafai ona faaaoga le maruana mo faamoemoega faafomai pe a ausia tulaga nei:

• O le faaaogaaga e filima’oti ina ia tatau ai i se tulaga faafomai e se fomai ua laiseneina po o se isi tagata ua faamaonia faafomai na te tuuina atu.

• E mulimuli le tagata i le inumaga ma le ituaiga o faatautaiga mai le fomai po o se isi tagata ua faamaonia faafomai na te tuuina atu. E le faamaonia e le Ekalesia le faaaogaina o maruana sei vagana ai ua faatagaina e se e tuuina atu togafitiga faafomai e faalagolago i le tatau ai faafomai.

E le faamaonia e le Ekalesia le ulaina o maruana, e aofia ai mo faamoemoega e faafomai.

38.7.10

Totoga ma Aano e Ofoina atu pe Fesiita’i

O le foaiina atu o totoga ma aano o le tino o se tasi o gaoioiga le manatu faapito lea e masani ona faamanuiaina tele ai tagata e i ai ni faaletonu faalesoifua maloloina.

O le faaiuga a se tagata soifua e foai atu se totoga i se isi, pe taliaina se totoga e ofo mai, e ao ona faia i se fautuaga faafomai iloga ma le fuafuaina ma le agaga tatalo.

O le faaiuga e faataga le fesiitai o totoga po o ni ‘alava mai se tagata ua maliu, e faia e le tagata po o lona aiga.

38.7.11

Faaumiumi o le Ola (E Aofia ai Masini e Faamanava Ai)

A oo ina feagai ma se gasegase ogaoga, e tatau i tagata ona faaaoga le faatuatua i le Alii ma saili se fesoasoaniga faafomai iloga. Ae peitai, afai ua iloatino o le a maliu le tagata, e tatau ona vaai i ai o se faamanuiaga ma se vaega faamoemoeina o le olaga e faavavau (tagai i le 2 Nifae 9:6; Alema 42:8).

E le tatau i tagata o le ekalesia ona manatu ifo faapea o sa latou matafaioi le taofiofi umi o le ola o se tasi i ni auala soona fai. O nei faaiuga e sili ona faia e le tagata, pe afai e mafai, po o tagata o le aiga. E ao ona latou sailia se fautuaga faafomai iloga ma le taitaiga faalelagi e ala i le tatalo.

E ofo atu e taitai se lagolago ia i latou o loo faia le tonu pe aveese pe leai ia masini o loo faamanava ai se tagata o le aiga.

38.7.12

Vaega mo le Malamalamaaga o le Tagata Ia Te Ia Lava

E tele vaega tumaoti ma faalapotopotoga faapisinisi e i ai polokalama lea e faapea mai e faateleina ai le malamalama o le tagata ia te ia lava, lagona lelei o le tagata ia te ia lava, faaleagaga, po o sootaga faaleaiga. O nei vaega ua faamoemoe e folafola mai ni faaiuga vavave i faafitauli ia e masani ona manaomia ai se taimi, tatalo, ma taumafaiga a le tagata lava ia e foia ai. E ui atonu e mafai e tagata o loo auai atu i ai ona iloa se toomaga le tumau o lagona, ae tele lava ina toe foi mai faafitauli tuai, lea e oo atu ai i le faaopoopoga o le faanoanoa ma le le fiafia.

O nisi o nei vaega ua latou tapa seseina pe faaataata atu faapea ua faamaonia a latou polokalama e le Ekalesia po o nisi o le Au Pulega Aoao. Peitai, e le moni nei tautinoga.

Ua lapataia tagata o le Ekalesia e faapea o nisi o nei vaega o loo fautuaina manatu faavae ma faaaogaina ia auala e mafai ona afaina ai. E toatele vaega ua latou tapa ni pili maoae tele ma uunaia ni tautinoga e faia mo ni vaitaimi uumi. O nisi ua nini faatasi manatu faavae faalelalolagi ma mataupu faavae o le talalelei i ni auala e mafai ai ona faaitiitia le faaleagaga ma le faatuatua.

E le tatau i taitai o le Ekalesia ona totogiina, faalauiloa, pe faamaonia ia ituaiga o vaega po o faiga. E le mafai ona faaaogaina fale ma fanua o le Ekalesia mo nei gaoioiga.

O tagata o le au paia e i ai ni popolega faaagafesootai pe faalelagona, e mafai ona latou feutagai ma taitai mo se taitaiga e faailoa atu ai punavai o fesoasoaniga e ogatasi ma mataupu faavae o le talalelei. Mo ni isi faamatalaga, tagai i le 22.3.4.

38.7.13

Tui puipui

O tui puipui e faia e tagata faapolofesa atamamai faafomai e puipui ai le soifua maloloina ma faasao ai le ola. Ua uunaia tagata o le Ekalesia ia malupuipuia i latou lava, a latou fanau, ma o latou nuu e ala i tui puipui.

I le taunuuga, o tagata taitasi e nafa ma a latou lava faaiuga e uiga i tui puipui. A i ai ni atugaluga a tagata o le au paia, e tatau ona latou fefautuaai ma tagata faapolofesa atamamai faafomai ma saili foi le taitaiga a le Agaga Paia.

O faifeautalai faaolioli o e e le’i faia ni tui puipui atonu o le a faatapulaaina i tofiga i o latou lava atunuu.

38.7.14

Upu o le Poto ma Faiga Faalesoifua Maloloina

O le Upu o le Poto o se poloaiga a le Atua. Na Ia faaalia mai mo le manuia faaletino ma le faaleagaga o Ana fanau. Ua faamanino mai e perofeta e faapea o aoaoga i le Mataupu Faavae ma Feagaiga 89 e aofia ai le le tagofia o le tapaa, meainu malolosi (ava malosi), ma meainu vevela (lauti ma le kofe).

Ua aoao mai foi e perofeta ia tagata o le ekalesia ia aloese mai mea e faataumaoi, e faasa i le tulafono, pe ono avea ma vaisu pe faaleagaina ai le faautautaga.

E i ai isi mea faataumaoi ma faiga e le o faamaoti maia i le Upu o le Poto po o taitai o le Ekalesia E ao i tagata o le ekalesia ona faaaoga le poto ma le faautautaga ma le lototatalo i le faiga o filifiliga e faalauiloa le soifua maloloina faaletino, faaleagaga, ma faalelagona.

Na ta’ua e le Aposetolo o Paulo: “Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aia foi outou ia te outou? Aua ua faatauina outou i le tau: o lenei, ia outou vivii atu i le Atua i o outou tino, ma o outou agaga, o mea a le Atua ia” (1 Korinito 6:19–20).

Ua folafola mai e le Alii ia faamanuiaga faaleagaga ma faaletino ia i latou o e usitai i le Upu o le Poto ma le taitaiga a perofeta soifua (tagai i le Mataupu Faavae ma Feagaiga 89:18-21).

38.8.

Aiaiga Faavae Faalepulega

38.8.1

Vaetamaina ma le Tausiga Faatama Fai

O le vaetamaina o tamaiti ma le tuuina atu o le tausiga faatama fai e mafai ona faamanuiaina ai fanau ma aiga. E mafai ona fatuina ni aiga alofa e faavavau e ala i le vaetamaina. Pe o mai fanau i se aiga e ala i le vaetamaina po o le fananau mai, o se faamanuiaga tutusa lava i latou.

O tagata o le Ekalesia o e saili e vaetamaina ni fanau pe tuuina atu le tausiga faatama fai i fanau, e tatau ona usitaia tulafono uma e faatatau i ai a atunuu ma malo e aofia ai.

E le faatautaia e le Ekalesia le vaetamaina o tamaiti. Peitai, i le Iunaite Setete ma Kanata, e mafai e taitai ona faasino atu tagata o le au paia i Auaunaga Faaleaiga e avea o se punaoa mo feutagaiga. Mo faamatalaga faafesootai, tagai i le 31.3.6.

Mo faamatalaga e uiga i matua nofofua e maitaga, tagai i le 38.6.19.

Mo nisi faamatalaga, tagai i le “Vaetama” (Autu ma Fesili, topics.ChurchofJesusChrist.org).

38.8.2

Faatosinaga Taufaasese Mo Teugatupe

E tulai mai faatosinaga taufaasese pe a faaaoga faaimamago e se tagata le faatuatuaina po o le talitonu mautinoa o se tasi e taufaasese ai o ia. E mafai ona tupu lenei mea pe afai o tagata uma e toalua e auai i le vaega e tasi, e pei o le Ekalesia. E mafai foi ona tupu e ala i le faia faatautala o se tulaga o faigauo po o le faatuatuaga, e pei o valaauga i le Ekalesia po o sootaga faaleaiga. O faatosinaga taufaasese e masani lava e mo le maua ai o tupe.

E ao i tagata o le Ekalesia ona faamaoni i a latou fegalegaleaiga ma ia faatino ma le amiosao. O faatosinaga taufaasese o se faalataina ma le mataga o le faatuatuaina ma le talitonu mautinoa. O i latou e faia lea masani e mafai ona molia faasolitulafono. O tagata o le Ekalesia e faia faatosinaga taufaasese e mafai foi ona feagai ma tapuiaiga po o le aveesea mai le avea ai ma tagata o le ekalesia. Tagai i le 32.6.1.3 ma le 32.6.2.3 mo se taitaiga e uiga i fono o tagata o le ekalesia mo amioga taufaasese.

E le tatau i tagata o le au paia ona ta’ua pe faafoliga mai faapea o a latou fegalegaleaiga faapisinisi e lagolagoina, faamaonia e, pe o suia le Ekalesia po o ona taitai.

38.8.3

O Anomea Tau Otiovisio

O anomea tau otiovisio e mafai ona fesoasoani e valaaulia le Agaga ma faalautele ai le aoao atu o le talalelei i vasega ma sauniga a le Ekalesia. O faataitaiga o nei anomea e aofia ai vitio, ata, ma puega o musika. O le faaaogaina o nei anomea e le tatau ona avea o se faalavefau po o le taulaiga autu o le vasega po o se fonotaga/sauniga.

E le tatau i tagata o le au paia ona faaaoga anomea faaotiovisio i sauniga faamanatuga po o sauniga masani o konafesi faalesiteki. Peitai, e mafai ona faaaoga musika ua pueina i nei sauniga pe a manaomia e o faatasi ma viiga.

E ao i tagata o le ekalesia ona usitaia tulafono uma o le puletaofia pe a faaaoga ia anomea tau otiovisio (tagai i le 38.8.11). E ao ona latou faaaogaina na o anomea e ogatusa ma le talalelei ma fesoasoani ai e valaaulia le Agaga.

38.8.4

Saini ma Atapu’e o Pulega Aoao, Taitai Aoao, ma Fitugafulu Eria

E le tatau i tagata o le Ekalesia ona latou sailia saini a le Au Pulega Aoao, Taitai Aoao, po o Fitugafulu Eria. E le tatau foi i tagata o le ekalesia ona fesili atu i nei taitai e saini a latou tusitusiga paia, tusi pese, po o polokalama. O le faia faapea e aveeseina ai le tulaga paia o o latou valaauga ma le agaga o sauniga. E mafai ai foi ona taofia lo latou feiloai atu i isi tagata o le au paia.

E le tatau i tagata ona pueina ata o le Au Pulega Aoao, Taitai Aoao, po o Fitugafulu Eria i totonu o falesa i le taimi o sauniga (tagai i le 29.8).

38.8.5

Pisinisi

O maota tapuai ma isi fale o le Ekalesia, sauniga/fonotaga ma vasega a le Ekalesia, ma uepisaite ma alaleo o faasalalauga a le Ekalesia e le mafai ona faaaoga e faalauiloa ai soo se pisinisi po o ni faalapotopotoga e le o ni totino o le Ekalesia.

E le tatau ona tuuina atu ni lisi o vaega o le Ekalesia po o isi faamatalaga e uiga i tagata o le au paia i soo se pisinisi po o ni faalapotopotoga e le o ni totino o le Ekalesia. O nei mea e aofia ai (ae le na o le pau ai ia) i latou e faalauiloa ni evaga faamasani, aoaoga, ma avanoa faigaluega. Tagai i le 38.8.31.

38.8.6

Tagata Faigaluega i le Ekalesia

E ao i tagata faigaluega i le Ekalesia ona soifua ma tausisia tulaga faatonuina o le Ekalesia i taimi uma. E tatau foi ona latou faaogatusa ma tulafono o galuega i le lotoifale.

Ina ia amata pe toe faaauauina le faafaigaluegaina i le Ekalesia, e tatau i tagata o le ekalesia ona agavaa mo se pepa faataga o le malumalu. Mai lea taimi i lea taimi o le a faafesootai ai e se sui o le Matagaluega o Punaoa mo Tagata o le Ekalesia ia peresitene o siteki po o epikopo ina ia faamaonia ai le agavaa mo le malumalu o tagata o loo galulue nei pe ono galulue foi i le Ekalesia. E tatau i taitai ona tali vave atu i ai.

38.8.7

Mekasini a le Ekalesia

O mekasini a le Ekalesia e aofia ai:

• O Le Uo mo tamaiti.

• Mo Le Malosi o le Autalavou mo le autalavou.

• O Le Liahona mo tagata matutua.

Ua fautuaina e le Au Peresitene Sili ia tagata uma o le ekalesia e faitau mekasini a le Ekalesia. E mafai ona fesoasoani ia mekasini i tagata e aoao ai i le talalelei a Iesu Keriso, suesue aoaoga a perofeta soifua, lagonaina le fesootai atu i le aiga faale-Ekalesia i le lalolagi atoa, faafetaiaia ma le faatuatua ia luitau, ma latalata atili atu ai i le Atua.

E fesoasoani taitai i tagata o le ekalesia ia maua ia mekasini e leai se totogi faapenei:

• Fesoasoani i tagata o le ekalesia e lesitala i mekasini ma faafou a latou lesitala i le MagazineSubscriptions.ChurchofJesusChrist.org po o le lesitala mo i latou e faaaoga ai Punaoa mo Taitai ma Failautusi.

• Faailoa atu i tagata o le ekalesia le ala e maua ai anotusi o mekasini ChurchofJesusChrist.org, le Gospel Library app, ma le Gospel Living app. E mauafua lea anotusi faamata’inumera.

• A uma loa lava ona papatiso ia tagata fou o le ekalesia, faaali atu ia i latou pe faapefea ona maua mekasini faaeletonika po o mekasini lolomi a le Ekalesia.

• Saunia ma tuuina atu lesitalaga faifai pea i tamaiti ma le autalavou o e o mai i le lotu e aunoa ma se matua po o se e vaaia, e faaaoga ai Punaoa mo Taitai ma Failautusi.

E mafai e le epikopo ona valaau se sui o mekasini e fesoasoani ai i tagata o le au paia ia maua meaksini. Pe mafai foi ona latou tofia le failautusi faapitoa o le uarota e fesoasoani (tagai i le 7.3).

O le sui mo mekasini, po o le failautusi faapitoa e mafai foi ona fesoasoani e ao mai aafiaga o le faatupulaia o le faatuatua ma molimau mai tagata o le au paia i le lotoifale ia faasoa mai i mekasini.

E mafai e tagata o le ekalesia ona taulima ia lesitala i le MagazineSubscriptions.ChurchofJesusChrist.org, e faaaoga ai a latou faitotoa a le Ekalesia. Mo se fesoasoani, e mafai e tagata o le ekalesia ona faafesootai le failautusi a le uarota po o le sui [e nafa] ma mekasini.

38.8.8

Igoa o le Ekalesia, Faailogaupu, ma le Faatusa

O le igoa o le Ekalesia, faailogaupu, ma le faatusa o faailoaga autu ia o le Ekalesia. Ua lesitalaina o faailoga aloaia ia pe ua puipuia faaletulafono i le lalolagi atoa. Ua faaaoga e faailoa ai tusitusiga aloaia, talafou, ma mea e tutupu a le Ekalesia.

O faailoaga autu o le Ekalesia e na o tulaga e tusa ai ma taiala o loo avatu i lalo e faaaoga ai.

Igoa tusitusia o le Ekalesia E mafai e iunite i le lotoifale ona faaaoga le igoa tusitusia o le Ekalesia (ae le o le faailogaupu po o le faatusa) pe a ausia tulaga uma nei:

• O le gaoioiga po o le faamoemoega e o faatasi ma le igoa e lagolagoina aloaia e le iunite (mo se faataitaiga, o se polokalama o le sauniga faamanatuga).

• O le igoa o le iunite a le Ekalesia i le lotoifale o loo faaaoga e muamua i luma o le igoa o le Ekalesia (mo se faataitaiga, Paranesi a Campo Rosa O Le Ekalesia a Iesu Keriso o le Au Paia o Aso e Gata Ai).

• O le ituaiga lolomi e lē o taumafai e faafoliga pe tauatagia ai o le faailogaupu aloaia a le Ekalesia.

Faailogaupu ma le faatusa. O le faailogaupu a le Ekalesia ma le faatusa (tagai i le ata o i luga) e na o le pau le taimi e faaaoga ai pe a faamaonia e le Au Peresitene Sili ma le Korama a Aposetolo e Toasefululua. E le mafai ona faaaogaina faapei o ni elemene e teuteu ai. E le mafai foi ona faaaogaina i soo se ala faaletagata lava ia, faapisinisi, pe faalauiloa ai.

E ao ona tuuina atu fesili i le:

Intellectual Property Office

50 East North Temple Street

Salt Lake City, UT 84150-0005

Telefoni: 1-801-240-3959 po o le 1-800-453-3860, laina 2-3959

Fesi: 1-801-240-1187

Imeli: [e-mail]

38.8.9

Fesootaiga i Peresitene o Siteki ma Epikopo mai Tagata Faigaluega ma Volenitia o le Ekalesia

Afai e manaomia e tagata faigaluega o le Ekalesia ma volenitia ona faafesootai se peresitene o le siteki po o se epikopo, latou te tuusa’o le fesootaiga i le failautusi faapitoa a le taitai sei vagana ua matuai faanatinati pe le faalauaiteleina le mataupu. O lenei mea e mafai ai e peresitene o siteki ma epikopo ona taulai atu i le tele o tiutetauave e na o i latou lava e mafai ona faataunuuina.

O tagata faigaluega ma volenitia a le Ekalesia e aofia ai sui o matagaluega uma a le Ekalesia, polokalama faaleaoaoga ma a’oga, faagaoioiga o le uelefea ma le ola-tutoatasi, ma pisinisi fesootai faatasi ma le Ekalesia.

Afai e lei valaauina pe le o galue atoatoa se failautusi faapitoa, e mafai ona faafesootai sa’o atu se taitai.

38.8.10

Komepiuta

O komepiuta ma polokalama e faaaoga i maota tapuai o le Ekalesia e tuuina atu ma puleaina e le laumua o le Ekalesia po o le ofisa o le eria. E faaaoga e taitai ma tagata o le au paia nei punaoa e lagolago ai faamoemoega o le Ekalesia, e aofia ai galuega o talafaasolopito o aiga.

O polokalama uma i luga o nei komepiuta e tatau ona laisene faalelei i le Ekalesia.

O le peresitene o le siteki e vaavaaia mea e tuu ai ma le faaaogaina o komepiuta i le siteki, e aofia ai ma komepiuta o i nofoaga autu o le FamilySearch. O le tagata tomai faapitoa mo tekinolosi a le siteki, e faamautinoaina o loo faafou faalelei polokalama ma tausia e pei ona otooto atu i le 33.10.

38.8.11

O Anomea ua Puletaofia

O le puletaofia o le puipuiga lea ua tuuina atu e le tulafono i tufuga o ē ōna uluai galuega ia o loo faaalia i se foliga faitino moni, (e aofia ai ituaiga faaeletonika), ia e aofia ai:

• Galuega tusitusi, musika, tala faatino, ma galuega tau siva.

• Galuega o ata tusi, ata pu’e, ma le vane faatagata.

• Galuega o leo ma otiovisio (e pei o tifaga ma vitio, CD, ma DVD).

• Polokalama po o taaloga komepiuta.

• Initoneti ma isi utufaamatalaga faaeletonika.

O tulafono e pulea ai galuega fatufatu ma le faaaogaaga ua faatagaina, e eseese lava i atunuu. O aiaiga faavae a le Ekalesia o loo otooto atu i lenei vaega e ogatusa ma tuutuuga faavaomalo o loo faaaoga i le tele o atunuu. Mo le faafaigofieina, o le vaega lenei o loo faasino i aia tatau a se tagata na fatuina, o se “puletaofia.” Peitai, o nisi o nei aia tatau e mafai ona iloa i nisi igoa eseese i nisi o atunuu.

E tatau i tagata o le Ekalesia ona matua usitaia tulafono uma o puletaofia. E masani lava, e na o i latou e i ai le puletaofia e mafai ona faatagaina faaaogaaga nei o a latou galuega:

• Toe kopi (kopiina)

• Tufatufaga

• Faatinoga i nofoaga faitele

• Faaali i nofoaga faitele

• Fatuga o mea mai se faapogai

O le faaaogaina o se galuega i soo tasi o nei auala e aunoa ma le faatagaga mai lē ōna le puletaofia, e le ogatasi ma le aiaiga faavae a le Ekalesia. O na faaaogaaga e mafai foi ona aafia ai le Ekalesia po o le tagata e faaaogaina i se sala faaletulafono.

O se tagata e faaaogaina se galuega e tatau ona mautinoa o loo puipuia e le puletaofia. O galuega e faasalalauina e masani ona aofia ai se faaaliga o le puletaofia e pei o le “© 1959 saunia e John Doe.” (Mo leo e pueina, o le faailoga o le ℗.) Peitai, e le manaomia se faaaliga o le puletaofia mo le puipuiga faaletulafono. E faapena foi, o le mea moni faapea o se lomiga ua le toe lolomiina pe o tuu i luga o upega tafailagi, e le faapea ai e le o puletaofiaina. E le tauamiotonuina ai foi le faia o kopi, tufatufa, faatino, faaali, pe fai mai ai ni fatuga i le faapogai e aunoa ma se faatagaga.

O le Intellectual Property Office IPO (Ofisa o le Meatotino Faaleatamai) a le Ekalesia e fesoasoani i le faagaoioia o talosaga ina ia faaaoga faamatalaga ua i ai le puletaofia, i anomea po o polokalama a le Ekalesia, e aofia ai anomea ua puletaofia e le Intellectual Reserve, Inc. (IRI). O le IRI o se faalapotopotoga e ese mai ai, e le mauaina se tupe faasili, lea e umiaina fatufatuga totino tau i le atamai o loo faaaogaina e le Ekalesia. Mo faamatalaga e uiga i le talosagaina o le faaaogaina o anomea e ōna e le Ekalesia, tagai i le “Aiaiga o le Faaaogaina” i luga o le ChurchofJesusChrist.org.

E mafai ona fesoasoani fesili ma tali o loo mulimuli mai i tagata o le ekalesia ina ia malamalama ma tausisia tulafono o le puletaofia pe a faaaoga anomea ua puletaofia i le lotu ma le fale. Afai e i ai ni fesili a tagata o le au paia e le o taliina i nei taiala, e mafai ona latou faafesootaia le IPO:

Intellectual Property Office

50 East North Temple Street

Salt Lake City, UT 84150-0005

Telefoni: 1-801-240-3959 po o le 1-800-453-3860, laina 2-3959

Fesi: 1-801-240-1187

Imeli: [e-mail]

Pe mafai ona ou kopiina ia anomea lolomi a le Ekalesia? Sei vagana ua taua, e mafai ona kopiina ia anomea a le Ekalesia mo le faaaogaina i mea e le o ni pisinisi a le Ekalesia, i le fale, ma le aiga. O aiaiga o le faaaogaina o loo avatu i se uepisaite po o se polokalama a le Ekalesia o loo tau atu ai pe mafai faapefea ona faaaoga ia anomea o i nei uepisaite ma polokalama. E le mafai ona faaaogaina mea e gaosia e le Ekalesia mo ni faamoemoega faapisinisi e aunoa ma le faatagaga tusitusia patino mai le IPO.

Pe mafai ona ou kopiina ia musika? E i ai tulafono faapitoa o le puletaofia e faatatau i musika. E mafai e se tagata ona kopi mai se musika mai puna nei mo le faaaogaina i mea e le o ni mea faapisinisi a le Ekalesia, aiga, ma le faaaogaina i le fale sei vagana ai ua i ai se faasa o tusia i luga o se viiga po o se pese:

• Viiga

• O Le Tusipese a Tamaiti

• Mekasini a le Ekalesia

O le kopiina o musika ua lolomi pe pueina e aunoa ma le faatagaga mai lē ona le puletaofia, e le ogatasi ma le aiaiga faavae a le Ekalesia.

Pe mafai ona ou kopiina anomea e le o ni mea a le Ekalesia? E masani lava e le mafai. O tulafono o le puletaofia e pulea ai le faaaogaina o mea ua umia tumaoti. E masani lava ona i ai tapu e tuu mai ai tuutuuga e tatau ona mulimulita’ia e tagata lautele a o lei kopiina ni mea e le o ni mea a le Ekalesia. O nei tapu e masani lava ona lisiina e lata i le amataga o se lomiga. E tatau i tagata o le ekalesia ona matua usitaia tulafono uma o le puletaofia.

Pe mafai ona ou faaaliina otiovisio faapisinisi i faatasiga a le Ekalesia? E masani lava e le mafai. E le tatau i tagata o le Ekalesia ona solia ia lapataiga ma faasa ua tuu i luga o oloa otiovisio faapisinisi. E aofia ai tifaga, isi vitio, ma musika. O le faaaogaina o oloa otiovisio i faamoemoega o le Ekalesia e masani lava ona manaomia ai le faatagaga mai i ē ona le puletaofia.

Pe mafai ona ou sii maia pe fai ni ata o ni polokalama faakomepiuta po o nisi polokalama mo le faaaogaina i le Ekalesia? E masani lava e le mafai. O polokalama faakomepiuta ma isi polokalama e le mafai ona kopiina pe auina mai vagana ua faatauina uma ia laisene e talafeagai i ai.

O le a le faatagaga e moomia e tuuina atu ai se faatinoga faamusika po o se tala faatino? O faatinoga e umia e le Ekalesia po o le IRI e mafai ona faatinoina i faatulagaga faale-Ekalesia e aunoa ma se faatagaga mai le laumua o le Ekalesia. Afai o se faatinoga o loo puletaofia ae le o se mea a le Ekalesia, e ao i tagata ona maua mai se faatagaga mai le e ana e faatino uma ai pe na o se vaega i se faatulagaga faale-Ekalesia. E masani lava o le e umia le puletaofia e moomia se totogi po o se tupe tusa lava pe le’i tapā se totogi mo le faatinoga. O faatinoga uma lava e tatau ona i ai le faamaoniga a taitai perisitua i le lotoifale.

38.8.12

Anomea mo Mataupu Aoaoina

Ua saunia e le Ekalesia anomea e fesoasoani ai i tagata o le au paia e aoao ma ola i le talalelei a Iesu Keriso. O nei anomea e aofia ai tusitusiga paia, savali o konafesi aoao, mekasini, tusi lesona, tusi, ma isi punaoa. E fautuaina e taitai ia tagata o le Ekalesia e faaaoga ia tusitusiga paia ma isi punaoa pe a manaomia e suesue ai le talalelei i le fale.

O le aoao mai ma le aoao atu o le Talalelei e ao ona taulai atu i le Faaola ma Lana aoaoga faavae. Ina ia fesoasoani e tausisia lenei taulaiga i vasega a le Ekalesia, e faamautinoa e taitai o loo faaaoga e faiaoga ia anomea ua faamaonia. Mo faamatalaga e uiga i anomea ua faamaonia, tagai i le Faatonuga mo Mataupu Aoaoina.

38.8.13

Faasinoala

Ua fautuaina tagata ma taitai o le ekalesia e faaaoga faasinoala mo tagata auai ua saunia e le Ekalesia. O loo maua nei faasinoala i le Faasinoala ma le Faafanua a le Uarota i luga o le ChurchofJesusChrist.org ma le polokalama o Meafaigaluega a le Tagata o le Ekalesia. O loo aumaia ai faamatalaga faavae e faafesootai ai mo tagata o le ekalesia. E mafai e taitai o siteki ma uarota ona tagatagai i faamatalaga faaopoopo e aoga mo o latou valaauga. E mafai foi e taitai ona tagatagai i nei faamatalaga i Punaoa mo Taitai ma Failautusi.

E mafai e tagata o le ekalesia ona tapui le vaaia o o latou faamatalaga faaeletonika e faafesootai ai. Latou te faia lenei mea i le filifili o tulaga tuma’oti ia latou atatosi faaleaiga.

E ao i taitai o siteki ma uarota ona faaaloalogia ia faatulagaga tuma’oti e filifili e tagata o le au paia. E faamautinoa foi e nei taitai e faaaogaina ia faamatalaga mo na o mea e faamaonia e le Ekalesia.

E masani lava e le manaomia ni faasinoala lolomi a siteki ma uarota. Afai e filima’oti e taitai faapea e i ai se tulaga manaomia moni, e mafai ona fai ni faasinoala lolomi i le faaaogaina na o le Faasinoala ma le Faafanua a le Uarota i luga o le ChurchofJesusChrist.org. O nei faasinoala e le o aofia ai le itupa, tausaga, po o aso fanau o tagata o le ekalesia.

E le tatau ona lolomiina lisi o pepa faamaumau mo le faaaogaina i ni mea e le o ni mea faale-Ekalesia.

38.8.14

Ofu ma Foliga Vaaia

Na foafoaina alii ma tamaitai i le faatusa o le Atua (tagai i le Kenese 1:26–27; Aperaamo 4:27). O tino faitino o se meaalofa paia.

Ua fautuaina tagata o le Ekalesia e faaalia le faaaloalo mo le tino ia latou filifiliga e uiga i ofu ma foliga vaaia talafeagai. O le mea e talafeagai e eseese lava i aganuu uma ma mo tulaga eseese. Mo se faataitaiga, mo sauniga faamanatuga, e ofuina e tagata taitasi o latou ofu sili o i ai mo le Aso Sa, e faaalia ai le faaaloalo mo Iesu Keriso ma le sauniga o le faamanatuga (tagai i le 18.9.3). E faatatau foi le mataupu faavae lea i le auai ai i le malumalu (tagai i le 27.1.5). O le a iloa lava e soo o Iesu Keriso le ala sili e oofu ai ma teuteuina i latou lava.

E le tatau i tagata o le ekalesia ma taitai ona faamasino isi ona o ofu ma foliga. E tatau ona latou alolofa i tagata uma, e faapei ona sa poloai mai ai le Faaola (tagai i le Mataio 22:39; Ioane 13:34–35). E tatau ona talia tagata uma i sauniga ma gaoioiga a le Ekalesia (tagai i le 38.1.1).

Pe a tuuina atu ia pepa faataga o le malumalu ma valaauga i uarota ma siteki, e iloilo e taitai le agavaa ma le taitaiga a le Agaga (tagai i le 26.3, 30.1.1, ma le 31.1.1).

38.8.15

Tapenaga Mautu po o Faiga Faavaega e Tapenapena mo Faalavelave Faafuasei

E uunaia e le Ekalesia le ola tutoatasi. E fautuaina tagata o le ekalesia ia tapena faaleagaga ma faaletino mo luitau o le olaga. Tagai i le 22.1.

Peitai, ua fautuaina taitai o le Ekalesia mai le soona fai o ni tapenaga mo mea matautia e ono tutupu mai. O na taumafaiga e ta’ua i nisi taimi o faiga faavaega e tapena ai mo faalavelave. O taumafaiga e tapena ai e ao ona faaosofia e le faatuatua, ae le o le fefe.

Ua fautuaina e taitai o le Ekalesia ia tagata o le au paia e aua nei nofo aitalafu ina ia faavaeina ni teugā meaai. Nai lo lena, e ao i tagata o le au paia ona faavae se sapalai o meaai e teu i le fale ma se tupe faaagaga mo se taimi. Tagai i le 22.1.4 ma le “Food Storage” (Autu ma Fesili, topics.ChurchofJesusChrist.org).

38.8.16

Aso Anapogi

E mafai ona anapogi tagata o le ekalesia i soo se taimi. Ae peitai, e masani ona latou tausisia le aso Sapati muamua o le masina o se aso anapogi.

O se aso anapogi e masani ona aofia ai le tatalo, e le aai pe feinu mo le 24-itula (pe afai e gafatia faaletino), ma tuuina atu se taulaga anapogi ma le limafoai. O se taulaga anapogi o se foai lea e fesoasoani ai ia i latou e manaomia le fesoasoani (tagai i le 22.2.2).

O nisi taimi e faia ai sauniga a le Ekalesia i le lalolagi atoa pe i le lotoifale i le aso Sapati muamua o le masina. A oo ina tulai mai lenei mea, e filimaoti pe fuafua e le au peresitene o le siteki se isi aso Sapati mo le aso anapogi.

38.8.17

Taaloga Faitupe ma Lulu

E tetee le Ekalesia ma ua fautuaina le tetee atu i soo se taaloga faitupe o soo se ituaiga. E aofia ai taaloga petipetiga ma lulu e lagolagoina e le malo.

38.8.18

Failauga po o Faiaoga Valaaulia

Mo le tele lava o sauniga ma gaoioiga a le Ekalesia, o failauga ma faiaoga e tatau lava o ni tagata o le uarota po o le siteki lava ia.

O se failauga po o se faiaoga valaaulia o se tasi e le o se tagata o le uarota po o le siteki. E manaomia le faamaoniga a le epikopo a o lei mafai ona valaauliaina se failauga aami i se sauniga po o se gaoioiga a le uarota. E moomia le faamaoniga a le peresitene o le siteki e valaaulia ai failauga aami i sauniga po o gaoioiga a le siteki.

E matua vailiili lelei e le epikopo po o le peresitene o le siteki ia failauga po o faiaoga valaaulia. E mafai ona aofia ai le faafesootai o le epikopo a le tagata.

E faamautinoa e le epikopo po o le peresitene o le siteki e faapea:

• E tatau ona ogatasi le tolaulauga ma a’oa’oga faavae autu a le Ekalesia.

• O le aoaoga e le aofia ai ni autu taumatemate (o autu e tatau ona ogatusa ma autu o loo talanoaina i konafesi aoao).

• O failauga po o faiaoga valaaulia e le totogiina, e le o aumaia ni tagata e auai, ma aua ne’i tauanauina ni tagata auai.

• O tupe faaalu mo femalagaaiga a le tagata e le totogiina i ni tupe o le paketi a le iunite i le lotoifale po o tagata foai tuma’oti.

• E tausisia e a’oa’oga folasia ia taiala mo le faaaogaina o fale ma fanua a le Ekalesia (tagai i le 35.5).

38.8.19

Fāi Mai o Tagata

O tagata o le ekalesia e nonofo i o latou laueleele moni, e masani lava ona maua ia avanoa e fausia ai ma faamalolosia le Ekalesia iina. Peitai, o le malaga i se isi atunuu o se filifiliga patino a le tagata lava ia.

O tagata e masi’i atu i se isi atunuu e ao ona usita’ia tulafono uma e faatatau i ai (tagai i le Mataupu Faavae ma Feagaiga 58:21).

E le tatau i faifeautalai ona ofo atu e lagolagoina le femalagaa’i o isi. E le tatau foi ona latou talosagaina o latou matua, tauaiga, po o isi e faia lena mea.

E le lagolagoina e le Ekalesia femalagaaiga e ui atu i galuega a le Ekalesia.

E ofo atu e tagata o le Ekalesia o latou taimi, taleni, ma le faauo e talileleia ai tagata fai mai ma tagata sulufai, o ni tagata o o latou nuu (tagai i le Mataio 25:35; tagai foi i le 38.8.35 i le tusitaulima lenei).

38.8.20

Initoneti

38.8.20.1

Punaoa Aloaia o Initoneti a le Ekalesia

E tausiaina e le Ekalesia faitotoa o uepisaite aloaia, poloka (blogs), ma itulau o faasalalauga faaleagafesootai. O nei punaoa o loo faailoa manino mai ua aloaia e ala i le faaaogaina o le faailogaupu a le Ekalesia po o le faatusa (tagai i le 38.8.8). O loo ogatasi foi ma tulaga manaomia faaletulafono ma aiaiga faavae o meatotino faaleatamai ma le le faalauaiteleina a le Ekalesia.

38.8.20.2

Faaaogaina o le Initoneti e Tagata o le Au Paia i Valaauga Faale-Ekalesia

E le tatau i tagata o le au paia ona fatuina ni uepi saite, poloka (blogs) po o ni itulau o faasalalauga faaleagafesootai mo le Ekalesia pe sui aloaia ai le Ekalesia ma ona manatu, aoaoga faavae, aiaiga faavae, ma faiga faavae. Ae peitai, e mafai ona latou fatuina uepisaite, poloka (blogs), po o itulau o faasalalauga faaleagafesootai e fesoasoani ai i o latou valaauga. Pe a latou faia lena mea, e ao i tagata o le au paia ona ogatusa ma taiala nei:

• O le fatuga o se uepisaite, poloka (blogs), po o le itulau o faasalalauga faaleagafesootai e tatau ona muamua faamaonia e le peresitene o le siteki (mo punaoa a le siteki) po o le epikopo (mo punaoa a le uarota).

• E le mafai ona faaaogaina le faailogaupu a le Ekalesia po o le faatusa pe faata’ita’ia foi (tagai i le 38.8.8).

• O le punaoa i luga o upega tafailagi e tatau ona i ai se faamoemoega ma se sini ma ia faaigoa e tusa ai. O le igoa e mafai ona aofia ai le igoa o se uarota po o le siteki. Peitai, e le mafai ona aofia ai le igoa aloaia o le Ekalesia.

• E le tatau i tagata o le au paia ona faaupuina pe faafoliga mai faapea o anotala o le punaoa i le initoneti, ata, po o isi anomea ua lagolagoina pe faamaonia e le Ekalesia, pe o suitulaga aloaia foi i le Ekalesia i soo se itu. Ae, e ao ona aofia ai se faamatalaga e ta’u mai ai faapea e le o se oloa aloaia pe lagolagoina e le Ekalesia.

• E ao ona talafeauga ia anotala uma mo le aofia faamoemoeina ma e ao foi ona tauagafau lelei.

• O le punaoa i le initoneti e tatau ona aofia ai faamatalaga e faafesootai ai.

• E silia ma le toatasi le taitai e tatau ona nafa ma punaoa i le initoneti. E mafai ona maua ai le faaauauga pe a suia se valaauga po o se tofiga o se tagata. E taofia ai foi le tagata e toatasi mai le avega mamafa o le faafou ma faafoe le punaoa.

• O galuega tau faatufugaga a le Ekalesia, vitio, musika, po o isi anomea e le tatau ona faasilasila faalauaitele sei vagana o lena faaaogaaga ua manino le faatagaina mai e le Tuutuuga o le Faaaogaina o se itulau o le uepisaite aloaia a le Ekalesia po o le Ofisa o Meatotino Faaleatamai a le Ekalesia. O anotala puletaofia mai isi puna e le tatau ona faaaoga sei vagana ai ua muai tuuina mai e le pule o le anotala se faatagaga tusitusia. Mo nisi faamatalaga e uiga i le faaaogaina o anomea ua puletaofia, tagai i le 38.8.11.

• Pe a faaaogaina ata, vitio, po o faamatalaga faaletagata lava ia, e manaomia se maliega mai le e ona le anotala po o tagata o loo aafia ai. E mafai ona maua mai se maliega e ala i se fomu faamatuu, se faasilasilaga faalauaitele, se faailoga ua tuu i luga mo se mea patino e fai, po o se faatagaga tusitusia pe a manaomia. E tatau ona mulimulita’ia tulafono tuma’oti a le atunuu.

• O punaoa i luga o upega tafailagi e le tatau ona toe kopiina meafaigaluega ma vaega ua uma ona i luga o le ChurchofJesusChrist.org, Meafaigaluega a Tagata o le Ekalesia po o isi punaoa a le Ekalesia.

• E ao i taitai ma faifeautalai ona faamaopoopoina pe puipuia fesootaiga e toe fai.

• O punaoa i luga o upega tafailagi e ao ona taofia pe a le o toe manaomia. O ala o faasalalauga taua (e pei o ata ma vitio) e ao ona teuina i le talafaasolopito o le uarota po o le siteki.

Mo taiala faaopoopo, tagai i le internet.ChurchofJesusChrist.org.

38.8.20.3

Faaaogaina o le Initoneti Patino ma Ala o Faasalalauga Faaagafesootai

O le initoneti ma ala o faasalalauga faaagafesootai e tele ona faaaogaaga lelei. Mai nei faaaogaaga, o nisi nei o avanoa e faasoa atu ai molimau e uiga i le Faaola ma Lana talalelei toefuataiina. O poloka (blogs), faasalalauga faaagafesootai, ma isi tekinolosi faa-Initoneti e mafai ai e tagata o le au paia ona faalauiloa ia savali o le filemu, faamoemoe, ma le olioli e o faatasi ma le faatuatua ia Keriso.

E fautuaina tagata o le ekalesia e faasoa atu anotusi faagaeetia. E tatau foi ona latou faataitaia le amiosolia i fegalegaleaiga uma i luga o le initoneti, e aofia ai ala o faasalalauga faaagafesootai. E tatau ona latou aloese mai finauga (tagai i le 3 Nifae 11:29–30; Mataupu Faavae ma Feagaiga 136:23).

E tatau i tagata o le ekalesia ona aloese mai faamatalaga uma o le faailoga tagata i isi (tagai i le 38.6.14). Latou te tauivi ia faapei o Keriso i isi i taimi uma, e aofia ai le initoneti, ma atagia mai ai se faaaloalo faamaoni mo fanau uma a le Atua.

E le tatau i tagata o le ekalesia ona faaaoga ni gagana taufaamata’u, faapalopalo, taufaaleaga, saua, po o isi gagana po o ata faatautala i luga o le initoneti. Afai e tulai mai i luga o le initoneti ni taufaamata‘u o amioga faasolitulafono, e tatau ona vave faafesootai loa lava le ofisa o leoleo.

E le tatau i tagata o le ekalesia ona faafoliga faapea o a latou savali o loo fai ma sui pe o lagolagoina foi e le Ekalesia.

38.8.21

Initoneti, Satelite ma Masini Vitio

O initoneti, satelite, ma masini vitio a le Ekalesia e tatau ona faaaoga na o faamoemoega e le faapisinisi a le Ekalesia. Soo se isi faaaogaaga e tatau ona faatagaina mai e le au peresitene o le siteki po o le au epikopo.

E le mafai ona faaaoga lenei masini e maua ai pe pueina ai ni polokalama e le o lagolagoina e le Ekalesia. E le mafai foi ona faaaogaina punaoa a le Ekalesia e pei o sootaga tau initoneti, e maua ai pe pueina na polokalama.

E na o tagata ua aoaoina lelei e faafoeina ia masini e mafai ona latou faia. E tatau ona loka maluina lelei pe a le faaaogaina. E le mafai ona aveesea masini mai le falelotu mo le faaaogaina e le tagata lava ia.

38.8.22

Tulafono o le Laueleele

E tatau i tagata o le Ekalesia ona usiusitai, faamamalu, ma lagolagoina ia tulafono i soo se atunuu latou te nonofo ai pe asiasi atu i ai (tagai i le Mataupu Faavae ma Feagaiga 58:21–22; Mataupu Faavae o le Faatuatua 1:12). E aofia ai ma tulafono e faasa ai le talaiga.

38.8.23

Loia mo Mataupu Faale-Ekalesia

Pe a oo ina manaomia se fesoasoani faaletulafono mo mataupu faale-Ekalesia e tatau i taitai ona faafesootai le loia a le Ekalesia. I le Iunaite Setete ma Kanata, e faafesootai e le peresitene o le siteki le Ofisa o le Loia Sili a le Ekalesia:

1-800-453-3860, laina 2-6301

1-801-240-6301

I fafo atu o le Iunaite Setete ma Kanata, e faafesootai e le peresitene o le siteki le loia a le eria i le ofisa o le eria.

38.8.23.1

Aafia Ai po o Pepa o Faamatalaga Tusitusia i Taualumaga Faaletulafono

E lē tatau i taitai o le Ekalesia ona faaaafia ai i latou lava i faamasinoga faalemalo po o faamasinoga o soligatulafono mo tagata o le Ekalesia i o latou iunite, e aunoa ma le mua’i feutagai ma le loia a le Ekalesia. E faatatau foi lea lava aiaiga faavae i le talanoa atu po o le tusi atu foi i loia po o tagata o le ofisa o faamasinoga, e aofia ai le ala atu i imeli.

E ao i taitai ona talanoa ma le loia a le Ekalesia pe afai, i o latou tulaga i le Ekalesia, ua:

• Talitonu e tatau ona latou molimau pe talanoa i se mataupu faaletulafono.

• Manaomia i le faagasologa faaletulafono e molimau pe talanoa i se mataupu faaletulafono.

• Poloaiina e tuuina atu se molimau.

• Talosagaina e tuuina atu pepa o faamatalaga po o faamatalaga i lona lava lotofuatiaifo.

• Talosagaina e talanoa ma loia po o taitai faalemalo e uiga i taualumaga faaletulafono, e aofia ai faaiuga o faamasinoga po o palola.

Po o le a lava le lelei o le faamoemoega, o taitai o le Ekalesia e faasoa atu faamatalaga i taualumaga faaletulafono e mafai foi ona faauiga sese ma faataumaoia ai. O na faasoa e mafai ona faatamaia faapitoa ai ia e ua aafia fua ma o latou aiga. O le mulimuli i aiaiga faavae a le Ekalesia e fesoasoani foi e puipuia mai ai le Ekalesia mai le utia sese i mataupu faaletulafono.

38.8.23.2

Molimau i Taualumaga Faaletulafono

E lē faatagaina ia taitai o le Ekalesia e molimau e avea ma sui o le Ekalesia i soo se taualumaga faaletulafono e aunoa ma le muai maua o se faamaoniga mai le Ofisa o le Loia Sili. E faatatau foi lenei aiaiga faavae i faaiuga o faamasinoga ma palola. E le faatagaina taitai o le Ekalesia ona tuuina atu ni molimau tuugutu pe tusitusia i o latou tulaga faaletaitai e aunoa ma lenei faamaoniga.

E lē tatau i taitai ona fautuaina atu pe faaātaāta atu faapea o a latou molimau i se taualumaga faaletulafono e fai ma sui o le tulaga o le Ekalesia.

E lē tatau i taitai ona faatosinaina le molimau a se tagata molimau i soo se taualumaga faaletulafono.

O faamatalaga e faafesootai mo le loia a le Ekalesia o loo maua i le 38.8.23.

38.8.24

Faaaogaina o le Pusameli

I le tele o atunuu, o se solitulafono i tulafono le tuu o soo se anomea e aunoa ma se faailogatusi i luga po o totonu o pusa meli. O lea faasa e faatatau i soo se anomea e fesootai ma le Ekalesia, e pei o lautusi o faasalalauga, tusi o talafou, po o ni faasilasilaga. E tatau i taitai faale-Ekalesia ona aoao tagata ma faifeau faamisiona e aua nei tuuina mea faapena i totonu po o luga o pusameli.

38.8.25

Fesootaiga a Tagata ma le Laumua o le Ekalesia

E le fautuaina tagata o le Ekalesia ina ia telefoni pe tusi atu ni tusi i le Au Pulega Aoao e uiga i ni fesili mo aoaoga faavae, po o ni luitau faaletagata, po o ni talosaga. O le tali patino mai o le a faigata ai i le Au Pulega Aoao ona faataunuu o latou tiute. E uunaia tagata o le au paia e aapa atu i o latou taitai i le lotoifale, e aofia ai le peresitene o le Aualofa po o le korama a toeaina, pe a sailia se taitaiga faaleagaga (tagai i le 31.3).

I le tele lava o tulaga, o mataupu e aumai mai tagata i le Au Pulega Aoao,o le a toe faafoi atu lava i o latou taitai i le lotoifale. O se peresitene o se siteki e manaomia se faamaninoga e uiga i mataupu faaleaoaoga faavae autu ma isi mataupu faale-Ekalesia, e mafai ona tusi atu mo o latou tagata i le Au Peresitene Sili.

38.8.26

Galuega Totogi mo Tagata o le Au Paia

E ao i tagata o le Ekalesia ona sailia galuega e ogatusa ma mataupu faavae o le talalelei ma ia e mafai ona ole atu ma le manatu fuatiaifo lelei i faamanuiaga a le Alii. O se mataupu patino lenei ua tuu atu e fitoitonu ma le faamasinoga ma le faautautaga ma le agaga tatalo a le tagata.

38.8.27

Tagata e I Ai Manaoga Faapitoa

Ua fautuaina taitai ma tagata o le ekalesia e talanoaina ia manaoga o i latou uma e nonofo i totonu o a latou iunite. O tagata o le ekalesia e i ai manaoga faapitoa e faatauaina ma e mafai ona fai o latou sao i ni auala anoa. O manaoga faapitoa atonu e faaleatamai, faaagafesootai, faalelagona, pe faaletino.

E fautuaina tagata o le Ekalesia ina ia mulimuli i faataitaiga a le Faaola mo le ofoina atu o le faamoemoe, malamalama, ma le alofa ia i latou e i ai manaoga faapitoa. E tatau i taitai ona iloa i latou e i ai manaoga faapitoa ma ia faaali atu i ai lo latou naunau faamaoni ma le popole.

E faailoa mai foi e taitai tagata o le au paia atonu e manaomia se tausiga faaopoopo ona e i ai manaoga faapitoa o se matua, toalua, tamaitiiti, po o se tei. O le tausiga o se tagata o le aiga e i ai se manaoga faapitoa e mafai ona tauia ma faigata.

E sailia e taitai ma auauna atu i tagata o le au paia e i ai manaoga faapitoa, o e o nonofo i nofoaga faalevaega po o isi nofoaga e nonofo ese ai mai tagata o aiga.

38.8.27.1

Faateleina o le Silafia ma le Malamalama

E sailia e taitai, faiaoga, ma isi tagata o le au paia ia malamalama i tagata taitoatasi e i ai se manaoga faapitoa, ma ona malosiaga ma manaoga. E mafai ona faateleina lo latou malamalama i le talanoa atu i le tagata faapea ma tagata o lona aiga. O loo maua ia punaoa i le disability.ChurchofJesusChrist.org.

38.8.27.2

Tuuina Atu o le Fesoasoani

E iloilo e taitai ia manaoga o i latou e i ai manaoga faapitoa ma i latou o e tausia. E fuafua e taitai nei pe mafai faapefea ona faaaoga punaoa a le uarota po o le siteki e fesoasoani ai i le taulimaina o manaoga pe a talafeagai ai. E fautuaina e taitai ia tagata o le au paia e fesoasoani ma aapa atu i le alofa ma le faauo.

E mafai e le au epikopo po o le au peresitene o le siteki ona valaau se tagata tomai faapitoa o le uarota po o le siteki mo manaoga faapitoa e fesoasoani i tagata taitasi, aiga, faiaoga, ma isi taitai (tagai i le 38.8.27.9).

E mafai foi e taitai ona faailoa mai punaoa talafeagai a nuu e mafai ona fesoasoani i tagata taitasi e i ai manaoga faapitoa ma o latou aiga.

Mo ni isi faamatalaga e uiga i le lagolago atu i tagata e i ai manaoga faapitoa, tagai i le disability.ChurchofJesusChrist.org. E mafai foi e taitai ona faafesootai le Tautua mo Aiga (i nofoaga e maua ai; tagai i le 31.3.6 mo faamatalaga e faafesootai ai).

E le tatau i taitai ma tagata o le ekalesia ona taumafai e faamatala pe aisea ua i ai manaoga faapitoa o se tagata, pe ua mafua i se a ona i ai i se aiga se tamaitiiti e i ai manaoga faapitoa. E le tatau lava ona latou faapea atu o se manaoga faapitoa o se faasalaga mai le Atua (tagai i le Ioane 9:2–3) po o se avanoa faapitoa.

38.8.27.3

Tuuina Atu o Sauniga

Tagai i le 38.2.4.

38.8.27.4

Saunia o Avanoa e Auauna Atu ai ma Auai i le Faatinoga

E toatele tagata o le au paia e i ai manaoga faapitoa e mafai ona auauna atu toetoe lava o soo se tofiga o le Ekalesia. O taitai e manatunatu ma le agaga tatalo i tomai, tulaga, ma manaoga o tagata taitoatasi ona tuuina atu lea i ai o avanoa talafeagai e galulue auauna ai. E fefautuaai foi taitai ma le tagata ma lona aiga. Latou te iloiloina aafiaga o se valaauga faale-Ekalesia i le tagata ma lona aiga po o le e tausia. (Tagai i le Mataupu Faavae ma Feagaiga 46:15.)

A oo ina mafaufauina ia tofiga faale-Ekalesia po o valaauga mo tagata o loo tausia ia tagata e i ai manaoga faapitoa, ia iloilo toto’a e taitai ia tulaga o tagata e tuuina atu le tausiga.

E tatau i taitai ma faiaoga ona faaaofia ai tagata e i ai manaoga faapitoa i sauniga, vasega, ma gaoioiga i le tulaga atoa e mafai ai. E tatau ona fetuunai ia lesona, lauga, ma metotia faafaiaoga ina ia taulimaina manaoga o tagata taitasi. Mo faamatalaga e uiga i le fetuutuunaiina o lesona, tagai i le disability.ChurchofJesusChrist.org.

E mafai e le au epikopo ona valaaulia se tagata o le uarota e fesoasoani i se tagata e i ai manaoga faapitoa, i se sauniga po o se gaoioiga. Mo se vasega e aofia ai se tagata e i ai manaoga faapitoa, e mafai e le au epikopo ona valaau ni faiaoga e sili atu ma le tasi. E galulue faatasi ia faiaoga e faafetaia’ia manaoga o tagata uma o le vasega.

Afai e le mafai ona auai se tagata i se sauniga, vasega, po o se gaoioiga, e mafai e taitai ma faiaoga ona feutagai ma le tagata ma lona aiga e uiga i se auala e taulima ai ona manaoga. E mafai e le peresitene o le siteki po o le epikopo ona faamaonia le faatulagaina o ni vasega faapitoa po o ni polokalama mo tagata o le Ekalesia e i ai manaoga faapitoa (tagai i le 38.8.27.5). Afai e le mafai ona auai se tagata i sauniga Lotu, e mafai e taitai ma faiaoga ona tuuina atu i ai anomea o lesona, mea na pu’eina o lesona, po o faasalalauga tuusao.

O le faasalalau tuusao atu o mea e tutupu e aofia ai sauniga faamanatuga ma falelauasiga o maliu, ua faamoemoe mo na o i latou e le mafai ona auai patino (tagai i le 29.7). Mo nisi faamatalaga e uiga i le aai ma feinu i le faamanatuga, tagai i le 18.9.3.

E fautuaina e taitai i latou e umia le perisitua e i ai manaoga faapitoa e auai i le faatinoina o sauniga pe a talafeagai ai. E amata atu ia Ianuari o le tausaga e atoa ai o latou tai 12, o e umia le perisitua ma tamaitai talavou o e ua uma ona papatisoina ma faamauina ma e agavaa, e mafai ona papatisoina ma faamauina mo e ua maliliu i se malumalu. Mo taiala e uiga i tagata o le Ekalesia e i ai manaoga faapitoa mo le mauaina o o latou lava sauniga o le malumalu, tagai i le 27.2.1.3 ma le 27.3.1.2.

38.8.27.5

Faatulagaina o Vasega, Polokalama, po o Iunite Faapitoa

O tagata o le ekalesia e i ai faaletonu po o manaoga faapitoa e fautuaina e auai i sauniga i le Aso Sa i a latou uarota tumau, sei vagana ai o nonofo i se nofoaga e tausi ai i latou po o polokalama mo togafitiga i mea e nonofo ai, ma o loo faatulagaina ai ia polokalama a le Ekalesia (tagai i le 37.6).

Iunite ma vaega. E mafai ona faavaeina uarota ma paranesi mo tagata o le ekalesia e i ai ni manaoga faapitoa, e pei o tagata e logonoa ma e faaaogaina le gagana faifaailoga (tagai i le 37.1). E na o le Au Peresitene Sili e aumai ai le faamaoniga.

E mafai ona talosagaina se uarota e faatu ai se vaega mo i latou e i ai manaoga faapitoa, e pei o e e faaaogaina le gagana faifaailoga. Mo faamatalaga e uiga i pepa faamaumau o tagata o e auai i na ituaiga o iunite po o vaega, tagai i le 33.6.11.

O tagata logonoa o le au paia e le nonofo i totonu o se mamao talafeagai mai se iunite a le au logonoa e mafai ona auai ai faaeletonika. E tatau ona latou maua se faatagaga mai taitai o lena iunite. E faamautinoa e taitai o le uarota i le lotoifale ia tausia ai tagata logonoa o le au paia ma maua le avanoa e aai ai ma feinu e le aunoa i le faamanatuga.

Vasega. O tagata o le au paia e i ai manaoga faapitoa e auai i vasega o le Aoga Sa ma tagata o a latou uarota. Peitai, pe a manaomia ona faafetaia’ia ia manaoga o tagata matutua po o le autalavou ma faaletonu faapena, e mafai e se uarota po o le siteki ona faatulaga vasega faapitoa o le Aoga Sa (tagai i le 13.3.2).

Polokalama o gaoioiga mo tagata e i ai manaoga faapitoa. Pe a oo ina manaomia e faafetaiai ia manaoga o tagata matutua o le au paia e le atoatoa le malosi faaleatamai, e mafai e se uarota, vaega o uarota, siteki po o vaega o siteki ona faatulaga se polokalama o gaoioiga a i latou e i ai manaoga faapitoa. O le polokalama lenei e faaopoopo i le auaunaga, sauniga a le Ekalesia i Aso Sa, ma gaoioiga i le iunite i le lotoifale.

O se polokalama o gaoioiga a i latou e i ai manaoga faapitoa e masani ona tautuaina ai tagata e ta’i 18 tausaga ma luga atu. E ao ona faia taumafaiga uma e faaaofia ai tagata o le au paia i lalo o le 18 ia latou uarota ma siteki. I tulaga e le masani ai, e mafai e taitai ona saunia ni gaoioiga faaopoopo mo talavou e amata mai le tausaga e atoa ai lo latou ta’i 12.

Pe a auai ni uarota se toatele i se polokalama o gaoioiga mo tagata e i ai manaoga faapitoa, e tofi e le peresitene o le siteki se epikopo e fai ma sui na te vaaia. Pe a auai ni siteki se toatele, e tofi e le Au Peresitene o le Eria se peresitene o le siteki e fai ma sui na te vaaia.

O le epikopo po o le peresitene o le siteki e fai ma sui, e feutagai ma isi epikopo po o peresitene o siteki o loo auai ai, e filima’oti pe o le a faapefea ona faatupeina nei polokalama.

Taitai o gaoioiga mo tagata e i ai manaoga faapitoa. E mafai ona valaau ia tagata matutua o le au paia e fai ma taitai o gaoioiga a tagata e i ai manaoga faapitoa. E fuafua e nei taitai ma faatino le polokalama o gaoioiga a i latou e i ai manaoga faapitoa. Latou te feutagai ma tagata tomai faapitoa o manaoga faapitoa o uarota ma siteki (tagai i le 38.8.27.9) ia valaaulia tagata o le ekalesia e i ai manaoga faapitoa e auai ai. Latou te fefautuaai faatasi e uiga i auala e faafetaia’ia ai manaoga o na tagata e i ai manaoga faapitoa.

E valaauina taitai o gaoioiga mo tagata e i ai manaoga faapitoa ma vaetofia i lalo o le taitaiga a le epikopo po o le peresitene o le siteki o loo fai ma sui. E mafai foi ona tofia e le peresitene o le siteki se fautua maualuga e auauna atu o se taitai mo gaoioiga mo i latou e i ai manaoga faapitoa.

O taitai e tautuaina i latou o soo se matua e i ai manaoga faapitoa, e tatau ona faamae’aina le aoaoga faamasani i le ProtectingChildren.ChurchofJesusChrist.org Mo nisi tulaga manaomia faaopoopo o le saogalemu mo taitai, tagai i le Gaoioiga mo Tagata e i ai Manaoga Faapitoa.

Pe a valaaulia, e mafai e taitai o gaoioiga a i latou e i ai manaoga faapitoa ona auai i fonotaga faaleautaitai a siteki po o uarota.

Taiala mo polokalama o gaoioiga mo tagata e i ai manaoga faapitoa. O polokalama o gaoioiga mo tagata e i ai manaoga faapitoa e faatulagaina e fesoasoani ai i e auai, e atia’e faaleagaga, faaleagafesootai, faaletino, ma faaleatamai (tagai i le Luka 2:52). E filima’oti e taitai le tele o gaoioiga. Latou te faitaulia le aofai o tagata auai, mamao e femalagaa’i ai, ma isi tulaga.

O nisi tagata atonu e le mafai ona auai ona o tulaga faigata faafomai, faaletino, faaleatamai, po o amioga. E sailia e taitai isi auala e taulima ai o latou manaoga.

Auai ma tulaga faatonuina o le saogalemu. Ia le itiiti ifo ma le toalua tagata matutua faatuatuaina e tatau ona i ai i gaoioiga uma. O tagata matutua e toalua e mafai o ni alii se toalua, tamaitai se toalua, po o se ulugalii faaipoipo. E masani lava, e toatele atu tagata matutua e manaomia e vaavaaia gaoioiga mo tagata e i ai manaoga faapitoa nai lo le manaomia mo isi gaoioiga.

Ia faamaea e taitai matutua e fesoasoani i gaoioiga le aoaoga faamasani i le ProtectingChildren.ChurchofJesusChrist.org. E tatau ona latou mauaina le faamaoniga mai lo latou epikopo a o lei auai ai. Mo nisi tulaga manaomia faaopoopo o le saogalemu, tagai i le “Gaoioiga mo Tagata e i ai Manaoga Faapitoa.”

Afai e tulai mai ni amioga le talafeagai, o le tiutetauave o taitai i le taimi lava lea o le puipuia ma fesoasoani i le tagata e ono afaina. Mo faamatalaga e uiga i le tali atu i le sauaina masalomia, tagai i le 38.6.2.1 ma le abuse.ChurchofJesusChrist.org.

38.8.27.6

O Faamatalaupu mo Tagata o le Ekalesia e Logonoa pe Faaletonu le Faalogo

O tagata o le Ekalesia e logonoa pe faaletonu le faalogo ia amata ona galulue ma taitai e faafetaia’ia manaoga tau fesootaiga. E galulue faatasi tagata o le au paia ma taitai ia faamautinoa o loo i ai ni au faamatalaupu.

E tatau ona i ai au faamatalaupu i mea e mafai e tagata ona vaai atu i ai faapea foi le tagata o loo tautala.

I le taimi o se sauniga po o se faatalanoaga, e nofo pe tu le faamatalaupu e lata i le tagata o loo faatinoina le sauniga pe faatautaia le faatalanoaga. Mo nisi faamatalaga e uiga i le faamatalaupuina o sauniga ma faamanuiaga, tagai i le 38.2.1.

Afai e lava ia faamatalaupu e maua, e feauaua’i pe tusa o le ta’i 30 minute uma e taumamao ai mai le lelavava.

I sauniuniga mo tulaga maaleale e pei o faatalanoaga patino po o fono o le avea ai ma tagata o le Ekalesia, e talanoa taitai ma le tagata logonoa. Pe a manao ai le tagata o le au paia, e sailia e taitai se tagata faamatalaupu e le o se tagata o le aiga ina ia tausisia ai le le faalauaiteleina.

O mataupu faavae lava foi nei e faaaoga mo tagata e logonoa pe faaletonu le faalogo ma e le faaaogaina le gagana fai faailoga ae manaomia se faamatalaupu gutu e fesoasoani ai latou te faitauina laugutu.

E mafai e taitai ona faatulaga ni vasega i le uarota po o le siteki e aoao ai le gagana faifaailoga o loo faaaoga i la latou eria. O se punaoa aoga tele o le Dictionary of Sign Language Terms for The Church of Jesus Christ of Latter-day Saints.

38.8.27.7

Tulaga Tumaoti e Lē Faalauaiteleina

E tatau i taitai ona faaaloalogia le tulaga tumaoti e lē faalauaiteleina o tagata e i ai manaoga faapitoa i le taimi o fonotaga faaleautaitai ma fafo atu lea o loo talanoaina ai manaoga o le tagata. E le faasoaina atu e taitai ia auga po o isi faamatalaga patino e aunoa ma se faatagaga.

38.8.27.8

O Manu Tautua

E mafai e epikopo ma peresitene o siteki ona fuafua pe faatagaina tagata e i ai manaoga faapitoa ona faaaoga taifau tautua ua aoao e fai ma taiala i maota tapuai. O isi ituaiga o meaola, e aofia ai manu e lagolago ai faalelagona (fagafao faamafanafana), e masani lava e le faatagaina i maota tapuai po o mea fai-faale-Ekalesia, sei vagana ai pe a manaomia patino ai e le tulafono. (I se tulaga lautele i le Iunaite Setete, e leai se tulaga moomia faaletulafono o le Ekalesia e faatagaina ai ni taifau taiala po o ni manu e lagolago ai faalelagona i maota o tapuaiga.) O epikopo ma peresitene o siteki e faia faaiuga i le lotoifale. Latou te manatulia ia tulaga manaomia o tagata e i ai manaoga faapitoa ma manaoga o isi i le potopotoga.

Mo taiala faaopoopo e uiga i le faaaogaina o manu tautua i totonu o fale o le Ekalesia, tagai i le 27.1.3 ma le disability.ChurchofJesusChrist.org.

38.8.27.9

Tagata Tomai Faapitoa mo Manaoga Faapitoa

E mafai e le au epikopo po o le au peresitene o le siteki ona valaau se tagata tomai faapitoa o manaoga faapitoa o le uarota po o le siteki. E fesoasoani le tagata tomai faapitoa i tagata e i ai manaoga faapitoa ma tagata e tausia i latou, e auai ai i sauniga ma gaoioiga a le Ekalesia ma ia lagonaina le faaaofia ai o i latou.

O tagata tomai faapitoa e tautuaina tagata ma taitai i auala nei:

• Ia iloa tagata taitasi e i ai manaoga faapitoa ma o latou aiga.

• Tali atu i fesili ma popolega e faatatau i le le atoatoa o le malosi mai tagata e tausia, taitai, ma isi.

• Fesoasoani i tagata taitasi ia maua anomea, fonotaga/sauniga, ma gaoioiga a le Ekalesia. E mafai ona tupu mai e ala i le faaaogaina o tekinolosi ma isi auala (tagai i le 38.8.27.10).

• Faailoa ia avanoa anoa mo tagata e le atoatoa le malosi e auauna atu ai.

• Faailoa manaoga patino o aiga ma, i mea e talafeagai ai, faailoa punaoa faalenuu, uarota, ma le siteki.

E mafai ona fesoasoani le tagata tomai faapitoa i tagata e i ai manaoga faapitoa ma tagata e tausia i latou, e fefaasoaai ma isi ia faamatalaga e uiga i o latou faaletonu.

38.8.27.10

Punaoa

O punaoa mo tagata e i ai manaoga faapitoa, mo o latou aiga ma tagata e tausia, ma mo taitai ma faiaoga o loo maua lea i le disability.ChurchofJesusChrist.org. O loo maua i lenei uepi saite:

• Faamatalaga e fesoasoani e faateleina ai le malamalama i luitau o loo feagai ma i latou e i ai manaoga faapitoa.

• O punaoa e fesoasoani ai i tagata o le au paia e i ai manaoga faapitoa ma o latou aiga ia maua le mafanafana i le talalelei a Iesu Keriso.

• O lisi o anomea a le Ekalesia i mamanu e mafai ona maua e tagata o le ekalesia e i ai manaoga faapitoa (tagai foi i le store.ChurchofJesusChrist.org).

E mafai ona faatuatusi atu fesili i le:

Members with Disabilities

50 East North Temple Street

Salt Lake City, UT 84150-0024

Telefoni: 1-801-240-2477 po o le 1-800-453-3860, laina 2-2477

Imeli: [e-mail]

38.8.28

Auaunaga i Tagata o le Ekalesia na Aafia i Solitulafono ma le Faafalepuipuiina

Ua uunaia taitai o le Ekalesia ina ia mulimuli i le faataitaiga a le Faaola o le ofoina atu o le faamoemoe, malamalama, ma le alofa ia i latou o e aafia i solitulafono ma i latou o e ua faafalepuipuiina (tagai i le Mataio 25:34–36, 40).

E taitaia e peresitene o siteki taumafaiga o auaunaga i le falepuipui. O nei taumafaiga e aofia ai le lagolagoina o tagata matutua ma le autalavou ua loka pe na tatala mai i tua talu ai nei mai le falepuipui. O lenei galuega e aofia ai foi le tausiga mo aiga ma fanau e i ai se matua ua faafalepuipuiina po o se tasi e pele.

O taitai e i ai se falepuipui i totonu o tuaoi o a latou iunite, e tatau ona faia laasaga ia nofouta ai i avanoa mo auaunaga ma manaoga. Mo punaoa ma taiala, e mafai e taitai ona faafesootai le Vaega o Auaunaga o le Falepuipui a le Ekalesia:

Imeli: [e-mail]

Telefoni: 1-801-240-2644 po o le 1-800-453-3860, laina 2-2644

38.8.29

O Isi Faatuatuaga

O le tele o mea e musuia, mamalu, ma faaaloalogia o loo maua i le tele o isi faatuatuaga. E ao i faifeau faamisiona ma isi tagata o le Ekalesia ona nofouta ma ia faaaloalo i talitonuga ma tu masani a isi. E tatau ona latou aloese mai le faatausuai po o le faatiga i isi.

O peresitene o siteki ma misiona e i ai ni fesili e uiga i sootaga ma isi faatuatuaga e tatau ona faafesootai le Au Peresitene o le Eria. O isi taitai i le lotoifale e i ai ni fesili faapea e tatau ona faafesootai le peresitene o le siteki po o le misiona.

38.8.30

Gaoioiga Faapolokiki ma Faaleatunuu

E fautuaina tagata o le Ekalesia e auai i mataupu faapolokiki ma faalemalo. I le tele o atunuu, o lea tulaga e mafai ona aofia ai:

• Palota.

• Auai ai pe tautuaina ni vaega faaupufai.

• Tuuina atu o le lagolago tautupe.

• Fesootai ma taitai o vaega faaupufai ma sui tauva.

• Auai i solotetee filemu ma faaletulafono.

• Tautua i tofiga filifilia pe atofaina i faigamalo i le lotoifale ma faaleatunuu.

E fautuaina foi tagata o le au paia e auai i faamoemoega aoga e avea ai o latou nuu ma nofoaga lelei e ola ai ma tausi ai o latou aiga.

E tusa ai ma tulafono faale-lotoifale, e fautuaina tagata o le au paia e lesitala e palota ma suesue ma le faaeteete i mataupu ma sui tauva. O mataupu faavae e ogatusa ma le talalelei e mafai ona maua i vaega faaupufai eseese. Ua i ai i le Au Paia o Aso e Gata Ai se matafaioi faapitoa e saili, ma lagolagoina taitai o e faamaoni, lelei ma atamamai (tagai i le Mataupu Faavae ma Feagaiga 98:10).

O le Ekalesia e tumaoti e tusa ai ma vaega faaupufai, faiga faavae faaupufai, ma sui tauva mo tofi faapolokiki. E le tuuina atu e le Ekalesia se faamaoniga i soo se vaega faapolokiki po o se sui tauva. Na te le fautuaina foi ona tagata i le auala e palota ai.

I tulaga e ese mai ai, a oo ina aofia ai mataupu tau i le ola mama ma faiga faavae a le Ekalesia, e mafai e le Ekalesia ona tu i lona tulaga e faatatau i mataupu faapolokiki. I tulaga faapena, e mafai e le Ekalesia ona faaa’afia i tautalaga faapolokiki e avatu ai ona manatu. E na o le Au Peresitene Sili e mafai ona faatagaina:

• Faaali atu o le tulaga o le Ekalesia e uiga i mataupu tau i le ola mama.

• Tautino atu o le Ekalesia e lagolago pe tetee ni tulafono patino.

• Faaali atu vaaiga a le Ekalesia e uiga i mataupu faalefaamasinoga.

E le tatau i taitai o le Ekalesia i le lotoifale ona faatulagaina tagata o le ekalesia e auai i mataupu faapolokiki. E le tatau foi i taitai ona taumafai e faatosina le auala e auai ai tagata o le ekalesia.

O tagata o le Ekalesia o e sailia tofiga faalemalo e filifilia pe tofia, e le tatau ona faaataata atu faapea ua faamaonia i latou e le Ekalesia po o ona taitai. E tatau i taitai ma tagata o le Ekalesia ona aloese mai faamatalaga po o ni amioga e ono faauigaina faapea o loo lagolagoina e le Ekalesia soo se vaega faaupufai, tulafono, aiaiga faavae, po o sui tauva.

E oo lava pe a filifilia se tulaga e uiga i se mataupu faapolokiki, e le talosagaina e le Ekalesia ni taitai filifilia e palota i se ala patino pe tu i se tulaga patino. O tagata o le ekalesia ua filifilia o ni taitai, e fai a latou lava faaiuga. Atonu e le femaliliea’i nei taitai i le tasi ma le isi po o se tulaga ua faaupuina lautele o le Ekalesia. Latou te le saunoa atu mo le Ekalesia.

O filifiliga faapolokiki ma fegalegaleaiga e le tatau ona avea ma mataupu o soo se mea e aoao atu pe fautuaina ai ni faatulagaga o le Ekalesia. E faamautinoa e taitai o sauniga/fonotaga a le Ekalesia ma gaoioiga e taulai atu i le Faaola ma Lana talalelei.

E le tatau i tagata o le Ekalesia ona fefaamasinoai i mataupu faapolokiki. O Au Paia o Aso e Gata Ai faamaoni e mafai ona auai i ni vaega faaupufai eseese ma palota mo ni sui tauva eseese. E ao ona lagona e tagata uma le talileleia i faatulagaga o le Ekalesia.

O faamaumauga a le Ekalesia, tusitaiala, ma isi anomea faapena e le mafai ona faaaogaina mo faamoemoega faaupufai.

E le mafai ona faaaogaina fale ma fanua o le Ekalesia mo faamoemoega faaupufai. Peitai, e mafai ona faaaoga ia fale mo faigapalota po o le lesitalaina ai o tagata palota, i mea e le o i ai se isi nofoaga e talafeagai (tagai i le 35.5.6.3).

38.8.31

Tulaga Patino o Tagata

Ua i ai i taitai o le Ekalesia le matafaioi e puipuia ai le tulaga patino e le faalauaiteleina o tagata. O faamaumauga a le Ekalesia, faasinoala, ma isi anomea faapena e le mafai ona faaaogaina mo faamoemoega mo le tagata lava ia, faapisinisi, po o faamoemoega faaupufai (tagai foi i le 38.8.13).

E le tatau i taitai o uarota ma siteki ona teuina pe faasoa atu faamatalaga e le faalauaiteleina a le Ekalesia i fafo atu o faaaogaaga e saunia e le Ekalesia, polokalama, po o auaunaga i luga o upega tafailagi. O faataitaiga o faamatalaga e le faalauaiteleina a le Ekalesia e aofia ai mea nei a se tagata:

• Tulaga o le avea ai ma tagata o le ekalesia.

• Manaoga faaletino.

• Isi faamatalaga patino e le o maua i nofoaga faitele.

Fesootaiga mai isi tagata po o ofisa o le malo e faasino i tulafono o faamatalaga tumaoti e le faalauaiteleina, e tatau ona faasino vave atu i le Ofisa Tuma’oti o Faamatalaga e Le Faalauaiteleina a le Ekalesia.

Imeli: [e-mail].

E le tatau i taitai o uarota ma siteki ona tali atu i nei talosaga.

Mo faasilasilaga tuma’oti a le Ekalesia, tagai i le “Privacy Notice” i luga o le ChurchofJesusChrist.org. E mafai foi e tagata o le au paia ona fesili atu i taitai o le siteki po o le uarota e fesoasoani ia i latou ia mafai ona maua le aiaiga faavae.

38.8.32

Tusitusiga a le Tagata Lava Ia e Lolomi ma Faasalalau

E le tatau i tagata o le au paia ona talosaga i le Au Pulega Aoao, Taitai Aoao, po o Fitugafulu Eria e lagolago atu i le tusiaina o a latou tusi po o le faamaoniaina o tusi a le Ekalesia po o isi tusitusiga a le Ekalesia.

38.8.33

Pu’eina, Faaliliuina, po o le Faasalalauina Tuusa’o o Savali a le Au Pulega Aoao, Taitai Aoao, ma Fitugafulu Eria

E le tatau i tagata o le Ekalesia ona pu’eina, faaliliu, pe faasalalauina tuusa’o savali a le Au Pulega Aoao, Taitai Aoao, ma Fitugafulu Eria. Peitai, o nisi o sauniga e lauga ai nei taitai e mafai ona faasalalau tuusao i lalo o le taitaiga a le epikopo po o le peresitene o le siteki. Mo nisi faamatalaga, tagai i le 29.7.

E mafai e tagata o le ekalesia ona pueina ia faasalalauga o konafesi aoao i masini i le fale mo le faaaogaina e le tagata lava ia, ae le o ni mea faapisinisi.

38.8.34

Faatatau i le Ekalesia ma Ona Tagata

O le igoa o le Ekalesia na tuuina mai e ala i le faaaliga i le Perofeta o Iosefa Samita i le 1838: “Aua o le a faapea ona ta‘ua o la’u ekalesia i aso e gata ai, o O Le Ekalesia a Iesu Keriso o le Au Paia o Aso e Gata Ai” (Mataupu Faavae ma Feagaiga 115:4). O le faasino atu i le Ekalesia ma ona tagata i nei auala o loo faamatala atu i lalo, e faailoa ai se sootaga i le va o Iesu Keriso ma tagata o Lana Ekalesia.

O faasinoga i le Ekalesia e tatau ona aofia ai le igoa atoa i soo se taimi e mafai ai. I le maea ai o se faasinoga muamua i le igoa atoa o le Ekalesia, pe a manaomia muimuli ane ai se faapuupuuga, o faaupuga nei e sa’o ma e fautuaina:

• O Le Ekalesia

• O Le Ekalesia a Iesu Keriso

• O Le Ekalesia toefuataiina a Iesu Keriso

Pe a faasino atu i tagata o le Ekalesia, o faaupuga nei e sa’o lelei ma e manaomia:

• Tagata o Le Ekalesia a Iesu Keriso o le Au Paia o Aso e Gata Ai

• Au Paia o Aso e Gata Ai (o le igoa lenei na tuuina mai e le Alii i Lona nuu o le feagaiga i aso e gata ai)

• Tagata o le Ekalesia a Iesu Keriso

O le faasino atu i tagata o le Ekalesia i isi faalaniga, e pei o “Mamona” po o “AAG” e le fautuaina.

Mamona o loo sa’o le faaaogaina i igoa tonu e pei o le Tusi a Mamona. E sa’o foi lona faaaogaina o se upu faamatala i faamatalaga faasolopito e pei o le “Alasopo o Mamona.”

O le faaupuga Faamamona e le sa’o ma e le fautuaina lona faaaogaina. Pe a faamatala le tuufaatasiga o le aoaoga faavae, aganuu, ma le ituaiga olaga e tulagaese i le Ekalesia, o le fasifuaitau “o le talalelei toefuataiina a Iesu Keriso” e sa’olele ma e manaomia.

38.8.35

Tagata sulufai

E toatele tagata na sosola mai o latou fale i le sailiga o se toomaga mai faiga faatupu vevesi, taua, sauaga faalelotu, ma tulaga taufaamata’u o le olaga. I le avea ai o se vaega o la latou tiutetauave e tausia i latou o e le tagolima (tagai i le Mosaea 4:26), e ofo atu e tagata o le Ekalesia o latou taimi, taleni, ma le faauo e talileleia ai tagata sulufa’i e avea ma tagata o o latou nuu. Tagai i le Mataio 25:35; ChurchofJesusChrist.org/refugees.

38.8.36

Talosaga mo Fesoasoani Tautupe a le Ekalesia

O polokalama faavae a le Ekalesia ua tuuina atu ai le fesoasoaniga tautupe i tagata e manaomia le fesoasoani, ma mo mafuaaga tatau.

O fesoasoani a le Ekalesia i tagata e manaomia le fesoasoani e faatautaia e epikopo (tagai i le 22.3.2). E mulimulita’ia e epikopo ia mataupu faavae ma aiaiga faavae e fesoasoani ai ia mautinoa o loo faaaoga lelei ia tupe a le Ekalesia (tagai i le 22.4 ma le 22.5).

O tagata e manaomia le fesoasoani ua fautuaina e talanoa i o latou epikopo nai lo le faafesoota’ia o le laumua o le Ekalesia pe talosagaina tupe mai isi taitai po o tagata o le Ekalesia. Atonu o le a talosagaina e le epikopo ia taitai mai le korama a toeaina po o le Aualofa e fesoasoani e iloilo ia manaoga.

38.8.37

Sailiiliga i le Ekalesia

O le faamoemoega o sailiiliga a le Ekalesia o le aoina lea o faamatalaga faatuatuaina e lagolago ai le faautaga a taitai aoao o le Ekalesia. O le Vaega Faamaopoopo o Sailiiliga (CRD) e na o le pau lea o le ofisa faatagaina o sailiiliga a le Ekalesia. E mafai foi ona faafesootai e le CRD ia ofisa sui o pati-lona tolu e faatautaia sailiiliga.

Pe a oo ina faafesootai e le au sailiili ua faatagaina e le Ekalesia ia tagata po o taitai o le ekalesia, latou te tuuina atu ia faamatalaga e faafesootai ai tagata faigaluega o le CRD. E mafai e lenei tagata faigaluega ona tali ia fesili e uiga i le sailiiliga.

E saili le CRD e puipuia le faasinomaga ma tali a tagata auai i sailiiliga. E mafai e tagata ona teena le auai i soo se taimi. E mafai ona latou filifili e le talia soo se fesili po o fesili uma foi.

E tatau i matua po o tagata e tausia ona tuuina atu se maliega a o lei valaaulia ia tamaiti i lalo o le 18 tausaga e auai i se suesuega.

E le tatau i taitai i le lotoifale ona faamaonia soo se sailiiliga e fesootai ma le Ekalesia. O lea tulaga e aofia ai le faaaogaina o tagata o le ekalesia e avea o ni mataupu o sailiiliga.

E tausisia e le CRD ia tulafono uma o faamatalaga tuma’oti [pe le faalauaiteleina]. E tatau foi i taitai i le lotoifale ona tausisia nei tulafono ma ia le tuuina atu ia faamatalaga patino o tagata o le ekalesia i tagata sailiili e lei faatagaina ma ofisa sui o sailiiliga.

O nisi sailiiliga e manaomia ai le aoina mai o faamatalaga i sauniga a le Ekalesia. E matua’i moni lena mea pe afai o le fonotaga o le taulaiga lea o le suesuega. I na tulaga, o le a galulue ai le CRD ma taitai i le lotoifale e faamautinoa o le i ai o le au sailiili e le faalavelave i fonotaga/sauniga.

Ina ia faamaonia soo se talosaga o sailiiliga, faafesootai le Vaega o le Faamaopoopoga o Sailiiliga:

Telefoni: 1-801-240--2727 po o le 1-800-453-3860, laina 2-2727

Imeli: [e-mail]

38.8.38

Faaaloalogia o Tapu i Lotoifale mo le Faasoaina atu o le Talalelei

E galue le Ekalesia e faataunuu le poloaiga a Iesu Keriso e ave le talalelei i le lalolagi uma (tagai i le Mataio 28:19). O faifeautalai e galulue i na o atunuu ua talia aloaia ai ma talileleia ai i latou e malo i le lotoifale e auauna ai.

E faaaloalogia e le Ekalesia ma ona tagata ia tulafono uma ma tulaga manaomia e tusa ai ma taumafaiga a faifeautalai. Mo se faataitaiga, i nisi vaega o le lalolagi, e auina atu faifeautalai e na ona auauna atu ai i tagata e manaomia le fesoasoani ma isi misiona faapitoa. O faifeautalai na e le tala’i. E le auina atu e le Ekalesia ni faifeautalai i nisi o atunuu.

38.8.39

Saogalemu i le Faagaoioiga o le Uelefea a le Ekalesia ma Ola Tutoatasi

O le tele o faagaoioiga o le uelefea a le Ekalesia ma le ola-tutoatasi e i ai masini ma meafaigaluega e mafai ona afua ai se manu’a pe afai e le sa’o ona faaaogaina. O peresitene o siteki o loo avea ma sui (po o ē latou te tofia) ma pule o nei faagaoioiga, e tatau ona mautinoa lelei le saogalemu o tagata faigaluega ma i latou o ē e volenitia.

E tatau ona aoaoina e le aunoa ia le aufaigaluega i faiga saogalemu. E tatau ona asiasia faavaitaimi le siosiomaga o galuega. O tulafono uma o le soifua maloloina ma le saogalemu e tatau ona faasa’o. E tatau ona lava le vaavaaiga ina ia mautinoa ai o loo mulimuli tagata faigaluega i faatonuga, faaaoga lelei meafaigaluega ma masini, ma aloese ai mai amioga e ono tutupu ai faalavelave.

E masani lava o i latou o e galulue i nofoaga o loo faagaoioia ai e tatau ona 16 tausaga pe matutua atu. O i latou o e faafoeina masini e tatau ona matutua, ia lava le aoaoina faamasani, ma ia i ai le poto masani i le faaaogaina o masini. E na o tagata matutua e mafai ona faafoeina ni masini e faaaoga ai le eletise.

Afai e tulai mai se faalavelave, e lipotia e le pule o faagaoioiga i ofisa nei:

• Auaunaga o le Uelefea ma le Ola-Tutoatasi: 1-801-240-3001 po o le 1-800-453-3860, laina 2-3001

• Vaega o le Pulega o Faalavelave Matautia i le laumua o le Ekalesia (tagai i le 20.7.6.3 mo faamatalaga e faafesootai ai)

38.8.40

Tusitusiga Paia

38.8.40.1

Lomiga o le Tusi Paia

Ua faailoa mai e le Ekalesia lomiga o le Tusi Paia lea e ogatusa lelei ma aoaoga faavae a le Alii i le Tusi a Mamona ma faaaliga i ona po nei (tagai i le Mataupu Faavae o le Faatuatua 1:8). Ona filifili lea o le lomiga e sili ona fiafia i ai o le Tusi Paia mo le tele o gagana e tautatala ai tagata o le Ekalesia.

I nisi o gagana, e lolomi ai e le Ekalesia lana lava lomiga o le Tusi Paia. O lomiga ua lolomiina e le Ekalesia e faavae i anotusi masani o le Tusi Paia. O faataitaiga e aofia ai:

• O le Lomiga a King James i le faaPeretania.

• O le Reina-Valera (2009) i le faaSipaniolo.

• O le Almeida (2015) i le faaPotukale.

O lomiga ua lolomiina e le Ekalesia o le Tusi Paia e aofia ai vaefaamatalaga, faasino autu o mataupu, ma isi fesoasoaniga mo suesuega.

Afai e mafai, e tatau i tagata o le ekalesia ona faaaoga se lomiga e fiafia i ai pe lolomiina e le Ekalesia o le Tusi Paia i vasega ma sauniga a le Ekalesia. E fesoasoani lenei mea e faatumauina ai le manino i le talanoaga ma le malamalama faifai pea i aoaoga faavae. O isi lomiga o le Tusi Paia e mafai ona aoga mo suesuega faaletagata lava ia pe faaakatemia.

38.8.40.2

Faaliliuga o Tusitusiga Paia

Sa faatonuina e le Alii Ana perofeta ma aposetolo e faasaoina tusitusiga paia i le saogalemu (tagai i le Mataupu Faavae ma Feagaiga 42:56). O le Aufono a le Au Peresitene Sili ma le Korama a Aposetolo e Toasefululua e vaavaaia vavalalata le faaliliuga o tusitusiga paia a le Ekalesia. O le faaaogaina o faagasologa ua faamaonia e fesoasoani e faamautinoa ai le sa‘o atoatoa o aoaoga faavae ma faasaoina faamaoniga o le faapogai o le anotusi.

E auina atu e Au Peresitene o Eria ni talosaga aloaia mo faaliliuga fou o tusitusiga paia i le Matagaluega Faamaopoopo a le Ekalesia.

38.8.40.3

Tusitusiga Paia o Gagana Faaonapo nei

E lei faatagaina e le Aufono a le Au Peresitene Sili ma le Korama a Aposetolo e Toasefululua ni taumafaiga faatagaina e faaliliu pe toe tusi anotusi o mau i se gagana faaonapo nei po o le faasamasamanoa. O lenei fautuaga e le faatatau i lomiga a le Ekalesia mo fanau.

38.8.40.4

Mauaina o Tusitusiga Paia

O loo maua kopi ua lolomiina o tusitusiga paia, e aofia ai nisi o lomiga e fiafia i ai o le Tusi Paia, mai Faletusi o le Ekalesia. O lomiga e fiafia i ai o le Tusi Paia e mafai foi ona maua i faletusi e faatau atu i le lotoifale, i luga o le initoneti, ma polokalama feaveai o le Tusi Paia. O anotusi faaeletonika ma leo pueina o lomiga ua lolomiina e le Ekalesia ma nisi o lomiga e fiafia i ai o loo maua i le polokalama o le Gospel Library ma i scriptures.ChurchofJesusChrist.org. O nei punaoa o loo maua ai foi lisi o mau o loo maua i le gagana.

38.8.41

Sailia o Faamatalaga mai Faapogai Faatuatuaina

I le lalolagi i ona po nei, ua faigofie ona maua ma faasoa faamatalaga. E mafai ona avea lea o se faamanuiaga sili mo tagata o loo saili ia a’otauina ma faailoa atu i ai. Ae peitai, e tele faapogai o faamatalaga e le talitonuina ma e le faagaeetiaina ai. O nisi faapogai e saili e faalauiloa le ita, feitagai, fefe, po o teori faataupulepulega e le faavaea (tagai i le 3 Nifae 11:30; Mosaea 2:32). O le mea lea, e taua ai ia atamamai tagata o le Ekalesia a o latou sailia le mea moni.

E ao i tagata o le Ekalesia ona sailia ma faasoa atu na o faapogai o faamatalaga e talitonuina, faatuatuaina, ma moni. E tatau ona latou taumamao mai faapogai e taumatemate pe faavae i tala feavea’i. O le taitaiga a le Agaga Paia faatasi ai ma le suesue ma le faaeteete, e mafai ona fesoasoani i tagata o le ekalesia e iloatino ai le mea moni mai le mea e sese (tagai i le Mataupu Faavae ma Feagaiga 11:12; 45:57). I mataupu o aoaoga faavae ma aiaiga faavae a le Ekalesia, o faapogai e taitai ai o tusitusiga paia, o aoaoga a perofeta soifua, ma le Tusitaulima Aoao.

38.8.42

Semina ma Tauaofiaga Faapena

E lapataia e le Ekalesia ia tagata o le au paia e tetee i semina ma tauaofiaga faapena e aofia ai tolaulauga e:

• Ta’uvalea, tauemuina ai, pe e le talafeagai lo latou taulimaina o mea paia.

• E mafai ona faamanu’alia ai le Ekalesia, tata’iese ai mai lana misiona, pe lamatia ai le soifua manuia o ona tagata ma taitai.

E le tatau i tagata o le ekalesia ona faatagaina o latou tofiga po o tulaga i le Ekalesia e faaaoga e faalauiloa ai pe faaataata atu ai se faamaoniga o na tauaofiaga.

Mo nisi faamatalaga, tagai i le 35.5, 38.6.12, ma le 38.7.8. (Tagai foi i le Iakopo 6:12.

38.8.43

Lagolago i Tagata o le Ekalesia i Falemai, ma Isi Nofoaga Autu mo le Tausiga

E tuuina atu e taitai le lagolago i tagata o le ekalesia i falemai ma nofoaga autu mo le tausiga i totonu o a latou iunite. Latou te mulimuli i taiala ua faavaeina e nei nofoaga.

Mo faamatalaga e uiga i le faatautaiga o le faamanatuga mo tagata o le ekalesia i nei nofoaga, tagai i le 18.9.1. Mo faamatalaga e uiga i le faavaeina o se uarota po o se paranesi, tagai i le 37.6.

38.8.44

Gaoioiga e Totogi ai Lafoga

E tatau i taitai o uarota ma siteki ona mautinoa o gaoioiga a le Ekalesia i le lotoifale e le lamatia ai le tulaga tuusaoloto o le Ekalesia mai le totogiina o lafoga. Mo taiala, tagai i le 34.8.1.

38.8.45

Lafoga

E tatau i tagata o le Ekalesia ona usita’ia tulafono o lafoga o le atunuu latou te nonofo ai (tagai i le Mataupu Faavae o le Faatuatua 1:12; Mataupu Faavae ma Feagaiga 134:5). O tagata o le ekalesia e le malilie i tulafono o lafoga e mafai ona lu’iina na tulafono pe a faatagaina ai e tulafono a o latou atunuu.

O tagata o le ekalesia e feteena’i ma le tulafono ma aoaoga a le Ekalesia pe afai latou te:

• Le faia ma le loto i ai pe mumusu foi e totogi ia lafoga moomia.

• Faia faamatalaga tetee faaletulafono e aloese ai mai le totogiina o lafoga.

• Mumusu e usitaia se faamasinoga faaiu i se taualumaga o lafoga lea e manaomia ai i latou e totogi lafoga.

O nei tagata e mafai ona le agavaa mo se pepa faataga o le malumalu. E le tatau ona tofia i latou i tulaga faaleautaitai i le Ekalesia.

E manaomia se fono o le tagata o le Ekalesia pe afai na nofosala i se solitulafono o le solia ma le loto i ai o tulafono o lafoga (tagai i le 32.6.1.5).

38.8.46

Aiaiga Faavae mo Femalagaaiga

E le tatau ona malaga faatasi se alii ma se tamaitai na o i la’ua i gaoioiga faale-Ekalesia, fonotaga, po o tofiga sei vagana ua faaipoipo le tasi i le isi pe taufai nofofua foi i la’ua. Mo isi aiaiga faavae mo femalagaaiga, tagai i le 20.7.7.

38.9

Auaunaga o Sootaga Faalemiliteli ma Aufailotu

E fesoasoani peresitene o siteki ma epikopo ia faaavanoa atu faamanuiaga o le auai i le Ekalesia i tagata o loo tautua i le militeli. O le polokalama a le Ekalesia mo sootaga ma le militeli ma auaunaga a le au failotu e aofia ai:

• Lagolago mai siteki ma uarota.

• Faamalamalamaga a le Ekalesia mo tagata o le au paia e ulufale atu i le tautua faamiliteli.

• O le faatulagaga o uarota, paranesi, po o vaega o tagata o le Au Paia o Aso e Gata Ai o loo tautua i le militeli.

• Faamaoniga ma le lagolago mai le aufailotu a le Au Paia o Aso e Gata Ai.

• Faamatalaga i le auala e ofuina ai le ofusa i le militeli.

• Lagolago mai ulugalii matutua faamisiona e tofia i vaega filifilia faamiliteli.

38.9.1

Taitaiga i le Siteki mo Fesootaiga ma le Militeli

Afai e i ai i totonu o se siteki ia nofoaga o le militeli po o tagata o loo tautua i le militeli, e i le au peresitene o le siteki ia tiutetauave o loo otooto atu i le vaega lenei. Afai o i ai ni nofoaga faapea i totonu o se misiona nai lo se siteki, e faataunuuina e le peresitene o le misiona nei tiutetauave.

O se tasi o le au peresitene o le siteki e vaaia sootaga faamiliteli i le siteki. E mafai ona ia valaauina se alii po o se tamaitai e auauna atu o se tagata tomai faapitoa i sootaga faamiliteli. E le manaomia e lenei tagata ona maua se aafiaga faamiliteli. Na te faamautinoaina ua saunia punaoa e lagolago ai tagata o le militeli i le siteki. E aofia ai i lenei mea le aoaoga faamasani o le tautua faamiliteli (tagai i le 38.9.3).

38.9.1.1

Tautua a le Ekalesia i Nofoaga o le Militeli

Afai e fai sauniga faale-Ekalesia i nofoaga faamiliteli, e faatulagaina e le peresitene o se siteki o loo i ai le nofoaga o le militeli se tasi o vaega nei mo tagata o le militeli ma o latou aiga (tagai i le 38.9.4):

• O se uarota e i ai se au epikopo (pe a faatagaina mai e le Au Peresitene Sili)

• O se paranesi ma se au peresitene o le paranesi

• O se vaega o tagata o le ekalesia e tautua faatasi ma se taitai vaega o tagata e tautuaina ma fesoasoani

O le peresitene o le siteki e valaauina, vaetofia, ma vaaia taitai o nei iunite. Na te tuuina atu faamatalaga fesootai a nei taitai i le Vaega o Auaunaga o Sootaga Faalemiliteli ma Aufailotu. E mafai ona ia atofaina se uarota e lagolagoina vaega taitasi o tagata o le ekalesia o loo tautua i le militeli.

E galulue le peresitene o le siteki ma le Vaega o Le Tautua a le Militeli ma Auaunaga a Au failotu e tuuina atu se tusi o le tofiga i epikopo taitasi, peresitene o paranesi, po o taitai vaega. O lenei tusi e faataoto atu ai ona tiutetauave ma faatagaina ai o ia e pulefaamalumalu i le iunite ma taitaia sauniga. E tatau ona auina atu se kopi o le tusi i le failotu ua faatuina.

E manaomia e le militeli a le Iunaite Setete le tuuina atu e se failotu o le vaavaaiga faaletaitai i soo se sauniga faalelotu lava e faia i le nofoaga o le militeli. Afai e i ai se failotu o le Au Paia o Aso e Gata Ai i le nofoaga, e masani lava ona tofia le failotu e le militeli e tuuina atu lea vaavaaiga i se iunite o le Ekalesia e lolotu ai iina. E le pulefaamalumalu le failotu i sauniga tapuai vagana o ia o le epikopo, peresitene o le paranesi, po o le taitai vaega. Peitai, ua faamoemoe e auai o ia ma faatino tiute.

E faamaopoopo e se uso o le au peresitene o le siteki ma le failotu sinia o nofoaga taitasi o le militeli i totonu o le siteki. Na te faamautinoa e faia foi e epikopo o uarota e aofia ai se nofoaga o le militeli i totonu o ona tuaoi le mea lava lea e tasi. E faailoa atu e nei taitai i le failotu le faasologa o sauniga a le uarota, nofoaga e feiloai ai, ma le tagata e faafesootai. E mafai e le failotu ona tuuina atu lenei faamatalaga i tagata o le ekalesia i le nofoaga.

38.9.1.2

Failotu o le Au Paia o Aso e Gata Ai i Siteki

E faatalanoa faaletausaga e le peresitene o le siteki ia failotu taitasi o le Au Paia o Aso e Gata Ai o e nonofo i le siteki. Na te fuafuaina le soifua manuia ma le agavaa o le failotu e auauna atu. E faatalanoa eseese foi e le peresitene o le siteki ia toalua o failotu taitasi i tausaga taitasi.

O aufailotu o le Au Paia o Aso e Gata Ai ma o latou taitoalua e tatau ona i ai ni valaauga i le uarota po o le siteki. O se failotu o loo umia le Perisitua Mekisateko e mafai ona auauna atu i valaauga faaleautaitai, e pei o fautua maualuga po o le pulefaamalumalu i se uarota, paranesi, po o se vaega o tagata o loo tautua i le militeli. Peitai, o lenei valaauga e le mafai ona feteenai ma ona tiute faamiliteli.

E mafai e failotu ona fesoasoani i le peresitene o le siteki i auala nei:

• Lipoti i fonotaga a le aufono a le siteki e uiga i fonotaga a iunite o le Ekalesia i nofoaga o le militeli. O nei lipoti e tatau ona aofia ai faamatalaga e uiga i tagata fou ma tagata ua toe foi mai.

• E auauna atu o se tagata fesootai i le va o taitai o le militeli ma le peresitene o le siteki.

• E fesoasoani i le peresitene o le siteki e faailoa tagata o le ekalesia i le militeli e tofia e avea ma taitai o vaega e tautuaina tagata.

• Fesoasoani i taumafaiga e faamalolosia tagata fou ma tagata ua toe foi mai o le Ekalesia i le militeli.

• Fesoasoani e saunia tagata o le ekalesia i le militeli ia maua sauniga paia ma tausia a latou feagaiga.

38.9.2

Taitaiga i le Uarota mo Fesootaiga ma le Militeli

E fono se tasi o le au epikopo ma tagata o le uarota ae latou te lei tuua mo le tautua faamiliteli. Na te faamautinoaina ua latou maua se avanoa e auai ai i muai aoaoga faamasani a le Ekalesia (tagai i le 38.9.3).

Mo faamatalaga e uiga i pepa faamaumau mo se tagata e ulufale atu i le militeli, tagai i le 33.6.9. O nisi tagata o le ekalesia e tofia i se nofoaga mamao pe mamao ese pe ua aveina atu i se sone o le taua. I tulaga faapenei, e faafesootai e le epikopo le Vaega o Le Ekalesia mo Fesootaiga ma le Militeli ma Auaunaga a Failotu mo le taitaiga e uiga i pepa faamaumau (tagai i le 38.9.10).

E tatau i taitai i le uarota tumau ona fesootai atu e le aunoa i tagata taitasi o le uarota o loo malaga ese atu i le tautua faamiliteli.

E galulue faatasi le epikopo ma le failotu sinia i nofoaga taitasi o le militeli i le uarota.

38.9.3

Aoaoga Faamasani o le Tautua Faamiliteli

O aoaoga faamasani mo le tautua faamiliteli e fesoasoani i tagata o le ekalesia e ulufale atu i le tautua faamiliteli e iloa ai mea e ao ina latou silafia e faatatau i sauniga ma gaoioiga a le Ekalesia i totonu o le militeli. O loo aoao ai foi i latou i le auala e faamalosia ai lo latou faatuatua ma tausia a latou feagaiga i le taimi o le tautua faamiliteli.

E tofia e se tasi o le au peresitene o le siteki po o le au epikopo se faiaoga mo mataupu a o lei o i le tautua faamiliteli, e tuuina atu le aoaoga faamasani. E sili lava le vaai o se faiaoga na i ai muamua se aafiaga tau militeli. Afai e le o maua se faiaoga agavaa, e faafesootai e le peresitene o le siteki po o le epikopo le Vaega o Sootaga Faamiliteli ma le Tautua a Aufailotu mo se taitaiga.

Mo nisi faamatalaga, tagai i le vaega “Faasologa o le Tautua Faamiliteli” i le itulau o Tagata o le Ekalesia i le Militeli.

38.9.4

Iunite a le Ekalesia mo Tagata o loo Tautua i le Militeli

O tagata o le ekalesia i le militeli e masani ona auai i uarota o loo lata ane i o latou nofoaga o le militeli. Peitai, i tulaga nei, e mafai e le peresitene o le siteki po o le misiona ona faatulaga se uarota, paranesi, po o se vaega e tautuaina tagata o le au paia mo tagata o le militeli ma o latou aiga i le nofoaga:

• E leai se uarota i totonu o se mamao talafeagai ma le nofoaga o le militeli.

• E le malamalama le aufaigaluega a le militeli i le gagana o loo tautalagia i le uarota i le lotoifale.

• Ua le mafai e le aufaigaluega a le militeli ona tuua le nofoaga o le militeli ona o tulaga manaomia o aoaoga faamasani po o isi tapu.

• O le iunite a tagata o le ekalesia i le militeli ua avatu po o le a aveina atu i se nofoaga e faatatau i ai se tasi o mea nei:

  • E lei faatulagaina ai le Ekalesia.

  • E le mafai e le iunite o le Ekalesia i le lotoifale ona taulimaina tagata ona o se isi gagana.

  • E le mafai ona auai i sauniga i le lotoifale.

• E auai tagata o le ekalesia i iunite a le Vaegaau Faaleoleo po o le Puipuiga o le Atunuu ma e auai i faataitaiga i faaiuga o le vaiaso po o faataitaiga faaletausaga.

O uarota ma paranesi i nofoaga o le militeli e fatuina e faaaoga ai le faiga faavae o loo otooto atu i le mataupu 37.

O uarota ma paranesi e masani lava ona faavaeina e lagolago ai tagata o le militeli ma o latou aiga. E mafai foi ona faatuina se uarota po o se paranesi mo tagata o le militeli e aunoa ma o latou aiga. O iunite faapena e mafai ona faavaeina mo tagata o le ekalesia o loo auai i aoaoga faavae po o le maualuga atu po o se tofiga mamao. E le masani le militeli ona faatagaina tagata e leai se sootaga ma le militeli, ona i ai i se uarota po o se paranesi e faaaogaina fale o le nofoaga.

Afai e le faamaoniaina e le numera o tagata o le ekalesia po o isi tulaga le faavaeina o se uarota po o se paranesi i se nofoaga o le militeli, e mafai e le peresitene o le siteki po o le misiona ona faatuina se vaega o tagata o le ekalesia e tautua ai. O se vaega o tagata tautua i le militeli o se iunite laitiiti a le Ekalesia e faia lotu faale-Ekalesia ma vaavaaia tagata o le au paia. E le o i ai i le taitai vaega ni ki o le perisitua. Ona o lenei mea, e le faatagaina o ia e talia sefuluai ma taulaga, fautuaina tagata o le ekalesia e uiga i agasala matuia, tapu avanoa o le avea ma tagata o le ekalesia, pe faatino isi tiute e manaomia ai ki (tagai i le 37.7).

Mo faamatalaga e uiga i vaega o tagata auauna atu, tagai i vaega o le “Saili se Nofoaga po o se Taitai o le Ekalesia” ma le “Faamatalaga mo Taitai o Vaega” i le itulau o Tagata o le Ekalesia i le Militeli.

A faavaeina se iunite o le Ekalesia i se nofoaga o le militeli, e galulue faatasi le taitai o le iunite ma le failotu sinia o le nofoaga e faatulaga mo taimi o sauniga ma le faaaogaina o fale o le militeli. Afai e leai se failotu ua atofaina i le nofoaga, e fesootai le peresitene o le siteki ma le taitai o le vaegaau.

38.9.5

Taitai o Vaega i Eria Mamao Ese po o Sone o Taua

O peresitene o siteki po o misiona e masani ona valaauina ma vaetofia taitai o vaega e tautuaina tagata. Peitai, atonu e le mafai lenei mea i nisi o nofoaga mamao po o sone o taua. Talu ai e le tuuina atu i le taitai o vaega ia ki o le perisitua faatasi ma lona valaauga, e faataga ona tofia o ia e aunoa ma le vaetofiaina. O le taitai perisitua o loo nafa ma le nofoaga e mafai ona tofia se e umia ma le agavaa le Perisitua Mekisateko e avea ma taitai vaega. Na te muamua ona faamaonia le agavaa o le alii i lona epikopo ma le peresitene o le siteki. Afai o i ai se failotu a le Au Paia o Aso e Gata Ai i le eria, e mafai e le taitai perisitua ona faatagaina o ia e valaau ma vaetofia se taitai o le vaega.

O taitai o vaega e tautuaina tagata i nofoaga tuufua e mafai ona maua mai sapalai ma anomea a le Ekalesia e ala i le faafesootaia o le Vaega o Le Ekalesia mo Fesootaiga ma le Militeli ma Auaunaga a Failotu (tagai i le 38.9.10).

O nisi taimi e faaesea ai se tagata o le ekalesia o loo tautua faamiliteli mai isi tagata o le Ekalesia. Afai e umia e le tagata o le ekalesia o loo auauna atu le Perisitua Mekisateko po o se ositaulaga i le Perisitua Arona, e mafai e lona epikopo ona faatagaina o ia e faatautaia ma taumamafa i le faamanatuga. Afai e sili atu ma le toatasi le tagata o le ekalesia i se nofoaga, e tatau ona valaauina se taitai vaega.

E tatau ona logoina le Vaega o Le Ekalesia mo Fesootaiga ma le Militeli ma Auaunaga a Failotu pe a valaauina se taitai vaega. O le a auina atu ia te ia se tusi o le tofiga (tagai i le 38.9.1.1).

38.9.6

Auaunaga Faamisiona ma le Matafaioi Faamiliteli

Mo atunuu e i ai auaunaga faamiliteli e faamalosia, e tatau i tagata o le Ekalesia ona faamaea la latou tautua faamiliteli a o lei mafai ona latou auauna atu i se misiona. O nisi atunuu e mafai ona faatagaina le tautua faamiliteli e tatau ona tolopo seia maea le auaunaga faafaifeautalai. E tatau i peresitene o siteki ma epikopo ona faamasani i tulaga manaomia o lo latou atunuu ina ia mafai ai ona latou fautuaina ma le talafeagai ia tagata o le ekalesia. O i latou o loo i le Vaegaau Faaleoleo po o le Puipuiga o le Atunuu e mafai ona auauna atu i misiona pe a maea aoaoga faavae patino ma luga atu.

Mo nisi faamatalaga, tagai i le vaega “Auaunaga Faafaifeautalai ma Matafaioi Faamiliteli” i le itulau o Tagata o le Ekalesia i le Militeli.

38.9.7

Aufailotu o le Au Paia o Aso e Gata Ai

O le Vaega o le Ekalesia mo Fesootaiga ma le Militeli ma Auaunaga a Aufailotu, e faatutotonu le faamaoniga mo aufailotu alii ma tamaitai o e auauna atu i faatulagaga eseese faalemalo ma faatulagaga e lē i lalo o le malo. O nei faatulagaga ua aofia ai:

• Le militeli.

• Falemai.

• Faalapotopotoga o tausiga.

• Falepuipui.

• Nofoaga autu o le faasalaga.

• Matagaluega o leoleo ma tineimu.

• Leoleo tuaoi.

• Faalapotopotoga faalenu’u ma tagata matutua

• Kolisi ma iunivesite.

E faatulaga e faalapotopotoga taitasi ona lava tulaga manaomia faaleaoaoga ma faalegaluega mo failotu. O le tele lava o faalapotopotoga e manaomia le faamaoniga a le Ekalesia a o lei mafai ona auauna atu se tagata o se failotu o le Au Paia o Aso e Gata Ai. O le Vaega o Le Ekalesia mo Fesootaiga ma le Militeli ma Auaunaga a Aufailotu e tuuina atu le faamaoniga mo aufailotu uma o le Au Paia o Aso e Gata Ai. O tusi o le faamaoniga mai epikopo ma peresitene o siteki e le lava ma e le tatau ona tuuina atu.

Aufailotu o le Au Paia o Aso e Gata Ai

• Auauna atu i tagata o faatuatuaga uma, e aofia ai Au Paia o Aso e Gata Ai.

• Ia mautinoa ua i tagata taitoatasi le saolotoga o tapuaiga.

• Fesoasoani e faafaigofie pe taulimaina manaoga faalelotu a i latou o loo latou auauna atu i ai.

Mo nisi faamatalaga, tagai i le “Latter-day Saint Chaplains” i le ChurchofJesusChrist.org.

38.9.8

Ofuina o le Ofusa i le Militeli

Tagai i le 38.5.7.

38.9.9

Ulugalii Matutua Faamisiona

O ulugalii faamiliteli ua litaea e mafai ona valaauina e auauna atu o ni faifeautalai mo sootaga faamiliteli i nofoaga o le militeli ua filifilia. Latou te fesoasoani i taitai perisitua i le lotoifale i le faamalolosia o tagata fou ma tagata ua toe foi mai. Latou te saunia foi le lagolagosua i aiga o tagata o le ekalesia e masii atu e tautua faamiliteli i vaitaimi o le nonofo valavala o le aiga.

38.9.10

Isi Faamatalaga

Mo faamatalaga e uiga i pepa faamaumau o tagata tautua i le militeli, tagai i le 33.6.9.

Mo faamatalaga e uiga i faamanuiaga faapeteriaka o tagata tautua i le militeli, tagai i le 38.2.10.3.

Mo faamatalaga e uiga i le faauuina o tagata tautua i le militeli i eria e mamao ese, tagai i le 38.2.9.6.

Mo faamatalaga e uiga i le tuuina atu o pepa faataga o le malumalu i eria mamao ese, tagai i le 26.3.2.

Afai e i ai ni fesili a taitai o le Ekalesia e uiga i sootaga ma le militeli, e mafai ona latou faafesootaia le:

Military Relations and Chaplain Services Division

50 East North Temple Street, Room 2411

Salt Lake City, UT 84150-0024

Telefoni: 1-801-240-2286

Imeli: [e-mail]