38.

Dagiti Annuroten ken Pangiwanwan iti Simbaan

38.6

Dagiti Annuroten ken Moral nga Isyu

Sumagmamano nga annuroten iti daytoy a benneg ti maipapan kadagiti banag a saan nga “anamongan” ti Simbaan. Gagangay a saan a mapadasan dagiti miembro ti Simbaan dagiti panagiget iti kinamiembro gapu kadagiti pangngeddengda maipapan kadagitoy a banag. Nupay kasta, kangrunaan nga agsungbat ti amin a tao iti Dios para kadagiti pangngeddengda.

38.6.1

Panagpaikkat iti Sikog

Imbilin ti Apo, “Saankayo … a mamapatay, wenno agaramid iti ania man a kaarngina” (Doktrina ken Katulagan 59:6). Suppiaten ti Simbaan ti elektibo a panagpaikkat iti sikog wenno aborsion para iti personal wenno sosial a pagimbagan. Nasken kadagiti miembro a saanda a makiraman, mangyobra, makipagurnos, mangbayad, mangpalugod, wenno mangyallukoy iti panagpaikkat iti sikog wenno aborsion. Dagiti mabalin laeng nga eksepsion ket no:

• Ti panagsikog ket bunga ti napilit a pannakarames wenno panagkanaig nga agkabagian wenno incesto.

• “No inkeddeng ti nalaing a mangngagas nga agpeggad ti biag wenno salun-at ti ina.

• Natakuatan ti nalaing a mangngagas nga adda nakaro a diperensia ti fetus a saan a mangpalugod nga agbiag ti maladaga no maipasngay.

Nupay dagitoy nga eksepsion saan a dagus a mangikalintegan iti panagpaikkat iti sikog. Serioso a banag ti panagpaikkat iti sikog ken masapul a maibilang laeng no nalpasen a nakiuman dagiti tao nga agsungbat iti bishopda ken immawatdan iti nadiosan a pammatalged babaen iti kararag.

Siaannad nga amirisen dagiti mangimatmaton a dadaulo dagiti kasasaad no ti maysa a miembro ti Simbaan ken nakiraman iti maysa a panagpaikkat iti sikog. Mabalin a kasapulan ti maysa a konseho iti kinamiembro no maysa a miembro ti makiraman, mangyobra, makipagurnos, magbayad, mangpalugod, wenno mangyallukoy iti panagpaikkat iti sikog wenno aborsion (kitaen iti 32.6.2.5). Nupay kasta, nasken a saan a maibilang ti konseho iti kinamiembro no nakiraman ti maysa a miembro iti maysa nga aborsion sakbay ti panagbuniag. Wenno saan a maibilang dagiti konseho iti kinamiembro wenno panagiget para kadagiti miembro a nakiraman iti panagpaikkat iti sikog para kadagiti ania man a tallo a rason a nabalabala a nasapsapa iti daytoy a benneg.

Yuman dagiti bishop dagiti saludsod maipapan kadagiti masinuno a kaso iti stake president. Mabalin nga iturong ti stake president dagiti saludsod iti Opisina ti Umuna a Panguluen no kasapulan.

Idinto nga agingga a naipalgak, mabalin nga agbabawi ti maysa a tao ken mapakawan iti basol a panangpaikkat iti sikog wenno aborsion.

38.6.2

Abuso

Ti abuso ket madi a panangtrato wenno panangbaybay-a iti dadduma iti wagas a makaigapu iti pisikal, seksual, emosional, wenno pinansial a pannakadangran. Iti kasasaad ti Simbaan saan a makanunongan ti abuso iti ania man a kita. Dagiti agabuso kadagiti assawa, annak, dadduma pay a miembro ti pamilia, wenno asino man nga aglabsiong kadagiti linteg ti Dios ken tao.

Maallukoy ti amin a miembro, nangruna dagiti nagannak ken lider, nga agalibtak ken agganetget ken aramidenda ti amin a kabaelanda a mangsaluad kadagiti annakda ken dadduma pay a maibusor iti abuso. No adda ammo dagiti miembro maipanggep iti pannakaabuso, ireportda daytoy kadagiti sibil nga agturay ken yumanda iti bishop. Nasken nga ibilang dagiti lider iti Simbaan a serioso dagiti report iti abuso ken saanda a di ikankano dagitoy iti kaano man.

Amin a nataengan nga agtrabaho kadagiti ubbing wenno agtutubo ket nasken a leppasenda ti training iti panangsaluad kadagiti ubbing ken agtutubo iti uneg ti makabulan a pannakakanunongda (kitaen iti ProtectingChildren.ChurchofJesusChrist.org). Nasken nga ulitenda ti training iti tunggal tallo a tawen.

No mapasamak ti abuso, ti umuna ken dagus a pagrebbengan dagiti lider ti Simbaan ket tulonganda dagiti naabuso ken mangsaluad kadagiti nalaka a maabuso manipud iti pannakaabuso iti masanguanan. Nasken a saan nga allukoyen dagiti lider ti tao nga agtalinaed iti maysa a pagtaengan wenno situasion nga adda panagabuso wenno saan a natalged.

38.6.2.1

Abuse Help Line

Iti sumagmamano a pagilian, nangipasdek ti Simbaan iti kumpidensial nga abuse help line a mangtulong kadagiti stake president ken bishop. Nasken a tumawag a dagus dagitoy a lider iti help line maipapan iti tunggal situasion a mabalin a nakaabusuan ti maysa a tao—wenno adda iti peggad ti pannakaabuso. Nasken pay a tawaganda daytoy no maammuanda iti maysa a miembro nga agbuybuya, gumatgatang, wenno agiwarwaras iti pornograpia iti ubing.

Sidadaan a magun-od ti help line para kadagiti bishop ken stake president a matawagan 24 nga oras iti aldaw, 7 nga aldaw ti lawas. Maipakita dagiti numbero ti telepono iti baba.

• United States and Canada: 1-801-240-1911 or 1-800-453-3860, extension 2-1911

• United Kingdom: 0800 970 6757

• Ireland: 1800 937 546

• France: 0805 710 531

• Australia: 02 9841 5454 (manipud iti uneg ti pagilian)

• New Zealand: 09 488 5592 (manipud iti uneg ti pagilian)

Nasken a tawagan dagiti bishop ken stake president ti help line no risrisutenda dagiti situasion a mainaig iti ania man nga abuso. Sungbatanto dagiti legal ken clinical professional dagiti saludsodda. Mangted pay dagitoy a professional kadagiti pangiturong maipapan no kasano a:

• tulongan dagiti biktima ken tulongan a mangsalaknib kadakuada iti ad-adda pay a pannakaabuso.

• Tumulong a mangsalaknib kadagiti mabalin a biktima.

• Agtulnog kadagiti legal a dawdawaten a kasapulan para iti panangireport iti abuso.

Nagkumit ti Simbaan iti panagtulnog iti linteg iti panangireport iti abuso (kitaen iti 38.6.2.7). Aggigiddiat dagiti linteg babaen iti lokasion, ken kaaduan a lider ti Simbaan ti saan nga eksperto kadagiti legal a banag. Ti panagtawag iti help line ti kasapulan para kadagiti bishop ken stake president a mangipatungpal kadagiti pagrebbenganda a mangireport iti abuso.

Nasken pay a pakaammuan ti bishop ti stake presidentna maipapan kadagiti pagarigan ti abuso.

Kadagiti pagilian nga awanan iti help line, ti bishop a makaammo iti abuso nasken a kontakenna ti stake presidentna. Nasken nga agkalikagum a manggun-od iti pannarabay manipud iti area legal counsel iti area office. Maallukoy pay isuna a makiuman iti Family Services staff wenno iti welfare ken self reliance manager iti area office.

38.6.2.3

Panagabuso iti Ubing wenno Agtutubo

Ti panagabuso iti ubing wenno agtutubo ket nadagsen unay a basol (kitaen iti Lucas 17:2). Kas nausar ditoy, iraman ti panagabuso iti ubing wenno agtutubo dagiti sumaganad:

• Pisikal a panagabuso: pannakadangran ti bagi babaen ti pisikal a pannakaranggas. Mabalin a saan a makita ti sumagmamano a pannakadangran.

• Seksual a panagabuso wenno eksploitasion: Kaadda ti seksual a pannakinaig iti maysa nga ubing wenno agtutubo wenno naigagara a panangpalugod wenno panangtulong iti dadduma a mairaman iti kasta nga aramid. Kas nausar ditoy, saan nga iraman ti seksual a panagabuso ti seksual a panagkanaig ti nagdenna a di pay nagkallaysa nga agtutubo nga agpada ti tawenda.

• Emosional a panagabuso: panangusar kadagiti tignay ken sao a nakaro a mangdadael iti panangraem wenno panangipateg ti ubing wenno agtutubo iti bagina. Gagangay nga iraman daytoy ti maulit-ulit ken agtultuloy a pananginsulto, panangmanipula, ken panangdillaw a mangpabain ken mangtagibassit. Mabalin nga iramanna pay ti nalaus a pannakabaybay-a.

• Pornograpia iti ubing Kitaen iti 38.6.6.

No maammuan wenno agsuspetsa ti bishop wenno stake president iti panagabuso iti ubing wenno agtutubo, dagus a surotenna dagiti pangiturong iti 38.6.2.1. Agtignay pay a mangtulong a mangsaluad a maibusor iti ad-adda pay a panagabuso.

Naidawat a kasapulan ti konseho iti kinamiembro iti Simbaan ken anotasion iti rekord no abusuen ti maysa a nataengan a miembro ti maysa nga ubing wenno agtutubo kas nailadawan iti daytoy a benneg. Kitaen met iti 32.6.1.1 ken 38.6.2.5.

No abusuen ti maysa a menor de edad ti maysa nga ubing, kontaken ti stake president ti Opisina ti Umuna a Panguluen para iti direksion.

Ti pisikal wenno emosional a panag-bullying iti nagbaetan dagiti ubbing ken agtutubo nga agpapada iti tawen ket nasken a risuten dagiti lider iti ward. Saan a maangay ti konseho ti kinamiembro.

38.6.2.4

Panangabuso iti Asawa wenno Sabali pay a Nataengan

Mabalin a mapasamak ti panagabuso iti asawa wenno sabali pay a nataengan iti adu a wagas. Iraman dagitoy ti pisikal, seksual, emosional, ken pinansial a panagabuso. No dadduma nangato ti peggad dagiti lallakay ken babbaket, bulnerable, wenno addaan pagkurangan.

Masansan nga awan ti maysa a depinision ti abuso a mabalin a maaramat iti amin a situasion. Ketdi, adda maysa nga spectrum ti kadagsen iti abusado nga ugali. Mangrugi daytoy nga spectrum iti masansan a panangusar kadagiti narusanger a balikas agingga iti nakaro a panagranggas.

No maammuan wenno agsuspetsa ti bishop wenno stake president iti panagabuso iti asawa wenno sabali pay a nataengan, dagus a surotenna dagiti pangiturong iti 38.6.2.1. Agtignay pay a mangtulong a mangsaluad a maibusor iti ad-adda pay a panagabuso.

Agkalikagum a gun-oden dagiti lider ti direksion ti Espiritu tapno ikeddeng no ti personal a panangbalakad wenno ti konseho ti kinamiembro ti kasayaatan a setting a pangrisutan iti panagabuso. Mabalin pay nga iyuman iti direkta a liderda iti priesthood maipapan iti pasamak. Nupay kasta, ania man a panagabuso iti asawa wenno sabali pay a nataengan a rumsua kadagiti lebel a nailadawan iti baba ket agkasapulan iti panangangay iti konseho iti kinamiembro.

• Pisikal a panagabuso: pannakadangran ti bagi babaen ti pisikal a pannakaranggas. Mabalin a saan a makita ti sumagmamano a pannakadangran.

• Seksual a panagabuso: Kitaen dagiti situasion a nadakamat iti 38.6.18.3.

• Emosional a panagabuso: Ti panangusar kadagiti tignay ken sao a nakaro a mangdadael iti panangraem wenno panangipateg ti ubing wenno agtutubo iti bagina. Gagangay nga iraman daytoy ti maulit-ulit ken agtultuloy a pananginsulto, panangmanipula, ken panangdillaw a mangpabain ken mangtagibassit.

• Pinansial a panagabuso: Pananggundaway iti maysa a tao iti pakaseknan iti kuarta. Mabalin nga iraman daytoy ti ilegal wenno saan a naipalubos a panangusar iti sanikua, kuarta, wenno dadduma pay a napateg a kukua ti maysa a tao. Mabalin pay nga iraman daytoy ti kinukusit a pananggun-od iti pinansial a bileg a naagaw iti maysa a tao. Mairaman daytoy ti panangusar iti pinansial a bileg a mangpilit iti ugali. Kitaen met iti 32.6.1.3.

38.6.2.7

Dagiti Legal nga Isyu a Mainaig iti Panagabuso

No naglabsing dagiti abusado nga aramid ti maysa a miembro iti mayaramat a linteg, nasken a gutugoten ti bishop wenno stake president ti miembro a mangireport kadagitoy nga aramid iti law enforcemet personnel wenno dadduma pay a maitutop nga agturay iti gobierno. Mabalin a gun-oden ti bishop wenno stake president ti impormasion maipapan kadagiti naidawat a lokal a kasapulan iti panangireport babaen ti help line iti Simbaan (kitaen iti 38.6.2.1). No adda dagiti saludsod dagiti miembro maipapan kadagiti naidawat a kasapulan iti panangireport, allukoyenna ida a mangala iti kualipikado a legal a balakad.

Nasken kadagiti lider ken miembro ti Simbaan nga ipatungpalda ti amin a legal nga obligasion a mangireport iti panagabuso kadagiti sibil nga awtoridad. Iti sumagmamano a lokasion, maibilang dagiti lider ken mannursuro a makipagtrabaho kadagiti ubbing ken agtutubo “a nabilin a reporter” ken nasken a mangireport iti panagabuso kadagiti legal nga agturay. Kapadana, iti adu a lokasion, asino man a tao a makadamag iti abuso ket kasapulan nga ireportna daytoy kadagiti legal nga awtoridad. Nasken a tawagan dagiti bishop ken stake president ti help line para kadagiti detalye maipapan kadagiti nabilin a reporter ken dadduma pay a legal a kasapulan para iti panangireport iti abuso. Annuroten ti Simbaan ti agtungpal iti linteg.

38.6.5

Kinadalus ti Dayaw ken Pidelidad

Ti linteg ti Apo iti kinadalus ti dayaw isu ti:

• Panangliklik iti seksual a pannakinaig iti ruar ti kallaysa iti nagbaetan ti maysa a lalaki ken maysa a babai a mayannurot iti linteg ti Dios.

• Pidelidad iti uneg ti panagdenna nga agassawa.

Naisangrat nga agbalin a nangayed ken sagrado ti pisikal nga intimasia iti nagbaetan dagiti agassawa. Inordenan ti Dios daytoy para iti panagparsua kadagiti annak ken para iti pangyebkasan iti ayat dagiti agassawa.

Nasken a makinaig laeng a seksual ti maysa a lalaki ken maysa a babai a nagkallaysa a legal ken mayannurot iti linteg kas agassawa. Iti imatang ti Dios, napateg unay ti kinadalus iti dayaw wenno moralidad. Nadagsen unay dagiti panaglabsing iti linteg ti kinadalus ti dayaw (kitaen iti Exodo 20:14; Mateo 5:28; Alma 39:5). Dagiti makiraman saan nga umisu ti panangusarda iti sagrado a bileg nga inted ti Dios a mangparsua iti biag.

Mabalin a kasapulan ti konseho iti kinamiembro iti Simbaan no ti maysa a miembro ket:

• Addaan iti seksual a pannakinaig iti ruar ti kallaysa nga awtorisado ti linteg ti Dios, kas iti pannakiabig, pannakinaig a di pay nagkallaysa, ken pannakinaig iti kapada a lalaki wenno babai (kitaen iti 32.6.2).

• Adda iti kita ti panagasawa wenno panagkadua a saan nga awtorisado ti linteg ti Dios, kas iti panagdenna a kasla agassawa, panagdenna a sibil ken panagkadua, ken pannakikallaysa iti pada a lalaki/babai.

• Agusar iti pornograpia iti kinapalalo wenno kapilitan, a makaigapu iti nakaro a pannakadadael ti panagasawa ti maysa a miembro wenno pamilia (kitaen iti 38.6.13).

Ti pangngeddeng maipapan no maangay ti konseho iti kinamiembro kadagitoy a situasion ket agpannuray iti adu a kasasaad. Nabalabala dagitoy iti 32.7. Kas pagarigan, ti panaglabsing kadagiti katulagan iti templo ket mangpalaus iti panaggusto ti maysa a konseho a kasapulan ti panangtulong iti tao nga agbabawi. Iti sumagmamano a kasasaad, mabalin nga umdasen ti personal a panangbalakad ken dagiti impormal a panagiget iti kinamiembro (kitaen iti 32.8).

Kitaen iti 32.6.1.2 no kaano a ti maysa a konseho ket kasapulan para kadagiti seksual a basol.

38.6.6

Pornograpia iti Ubing

Saan nga anamongan ti Simbaan ti pornograpia iti ubing iti ania man a kita. No maammuan wenno agsuspetsa ti bishop wenno stake president a mairaman ti maysa a miembro iti pornograpia iti ubing, dagus a surotenna dagiti pangiturong iti 38.6.2.1.

Kasapulan ti konseho iti kinamiembro iti Simbaan ken irekord ti anotasion no ti maysa a miembro ket agaramid, agiwaras, agtagikua, wenno mangulit-ulit a mangbuya kadagiti ladawan dagiti ubbing a mainaig iti pornograpia (kitaen iti 32.6.1.2 ken 32.14.5). Gagangay a saan a mayaramat daytoy a pangiwanwan kadagiti ubbing wenno agtutubo nga agarup agpapada ti tawenda nga agiwaras kadagiti seksual a ladawan ti bagbagida wenno ti dadduma. Mabalin nga umdasen ti personal a panangbalakad ken dagiti impormal a panagiget iti kinamiembro kadagitoy a situasion.

Para iti ad-adu pay a pannarabay, kitaen iti 38.6.13.

38.6.10

Insesto (Panagkanaig ti Agama, Agina, wenno Agkabsat)

Saan nga anamongan ti Simbaan ti ania man a kita ti insesto. Kas nausar ditoy, ti insesto ket seksual a relasion iti nagbaetan:

• Ti maysa a nagannak ken ti maysa nga anak.

• Ti maysa a lelang/lelong ken ti maysa nga apoko.

• Dagiti agkakabsat.

• Ti maysa nga uliteg wenno ikit ken ti maysa a kaanakan a babai wenno kaanakan a lalaki.

Kas naaramat ditoy, anak, apoko, kabsat, kaanakan a babai, ken kaanakan a lalaki iramanna dagiti relasion a mainaig iti biolohikal, ampon, siuman, wenno aywan. Mapasamak ti insesto iti nagbaetan ti dua a menor de edad, maysa a nataengan ken maysa a menor de edad, wenno dua a nataengan. No adda dagiti saludsod ti maysa a stake president maipapan iti no ti maysa a relasion ket adda pakainaiganna iti insesto iti babaen dagiti lokal a linteg, agkiddaw iti pannarabay manipud iti Opisina ti Umuna a Panguluen.

No maysa a menor de edad ti biktima ti insesto, awagan ti bishop wenno stake president ti abuse help line ti Simbaan kadagiti pagilian no adda a magun-od daytoy (kitaen iti 38.6.2.1). Iti dadduma a pagilian nasken nga agkiddaw ti stake president iti pannarabay manipud iti area legal counsel iti area office. Maallukoy pay isuna a makiuman iti Family Services staff wenno iti welfare ken self-reliance manager iti area office.

Kasapulan ti maysa a konseho iti kinamiembro iti Simbaan ken irekord ti anotasion no aglabsing ti maysa a miembro iti insesto (kitaen iti 32.6.1.2 ken 32.14.5). Ti insesto dumani kanayon a mamagkasapulan iti Simbaan a mangibabawi iti kinamiembro ti maysa a tao.

No aglabsing ti maysa a menor de edad iti insesto, kontaken ti stake president ti Opisina ti Umuna a Panguluen para iti direksion.

Masansan nga agsagaba iti nakaro a trauma dagiti biktima ti insesto. Agresponde dagiti lider nga addaan iti naimpusuan a panagrikna ken asi. Mangipaayda iti naespirituan a suporta ken panangbalakad a mangtulong kadakuada a mangparmek kadagiti makadadael nga epekto ti insesto.

No dadduma marikna ti bain wenno basol dagiti biktima. Saan a nagbasol dagiti biktima. Matulongan dagiti lider ida ken dagiti pamiliada a makaawat iti ayat ti Dios ken ti pangpaimbag a sumangbay babaen ken ni Jesucristo ken ti Pannubbotna (kitaen iti Alma 15:8; 3 Nephi 17:9).

Kas nayon iti panangawat iti naparegta a tulong dagiti lider ti Simbaan, biktima ken dagiti pamiliada, mabalin a kasapulan dagiti pamilia ti propesional a pannakabalakad. Para iti impormasion, kitaen iti 38.6.18.2.

38.6.13

Pornograpia

Saan nga anamongan ti Simbaan ti pornograpia iti ania man a kita. Ti panangusar iti pornograpia iti ania man a kita mangdadael iti biag ti tao, pamilia, ken kagimongan. Daytoy pay ti mangpapanaw iti Espiritu ti Apo. Nasken a liklikan dagiti miembro ti Simbaan ti amin a kita ti banag a mainaig iti pornograpia ken mangsuppiat iti panangpataud, panangisaknap, ken pannakausarna.

Mangipaay ti Simbaan iti sumaganad a pagadawan wenno resources a mangtulong kadagiti tao a naapektuan iti pornograpia ti biagda.

• AddressingPornography.ChurchofJesusChrist.org

• AddictionRecovery.ChurchofJesusChrist.org

• Helping Those Who Struggle with Pornography (booklet)

• Let Virtue Garnish Thy Thoughts (booklet)

Mangipaay pay dagiti stake president ken bishop iti suporta kadagiti miembro ti pamilia no kasapulan.

Nasken a maamiris dagiti lider iti Simbaan a ti panangusar iti pornograpia ket mabalin nga inkapilitan wenno pannakairuam. Kas mainayon iti naparegta a tulong dagitoy a lider, mabalin a kasapulan ti sumagmamano a miembro ti propesional a pannakabalakad. Mabalin a kontaken dagiti lider ti Family Services para iti tulong. Kitaen iti 31.2.6 para iti impormasion iti panangkontak.

Gagangay nga umdasen ti personal a panagbalakad ken dagiti impormal a panagiget iti kinamiembro no tulongan ti maysa a tao nga agbabawi iti panangusarna iti pornograpia (kitaen iti 32.8). Gagangay a saan a maangay dagiti konseho iti kinamiembro. Nupay kasta, mabalin a kasapulan ti maysa a konseho para iti napalaus ken nainkapilitan a panangusar iti pornograpia a naigapu iti pannakadangran iti panagasawa ti maysa a miembro wenno pamilia (kitaen iti 38.6.5). Kasapulan ti maysa a konseho no ti maysa a miembro ket agparnuay, agiwaras, agtagikua, wenno maulit-ulit nga agbuya kadagiti ladawan dagiti ubbing nga adda pakainaiganna iti pornograpia (kitaen 38.6.6).

38.6.18

Seksual a Panagabuso, Rames, ken Dadduma pay a Kita ti Seksual a Pannakaranggas

Saan nga anamongan ti Simbaan ti seksual a panagabuso Kas nausar ditoy, ti seksual a panagabuso kaipapananna ti panangipapilit iti ania man a saan a tinarigagayan a seksual nga aramid iti sabali a tao. Ti seksual nga aramid iti maysa a tao a saan a mangted wenno makaited iti legal a pammalubos ket maibilang a seksual a panagabuso. Mabalin a mapasamak pay ti seksual a panagabuso iti maysa nga asawa wenno iti relasion ti pannakisinnarak. Para iti impormasion maipapan iti seksual a panagabuso iti maysa nga ubing wenno agtutubo, kitaen iti 38.6.2.3.

Iraman ti seksual a panagabuso ti nalawa a sakup dagiti aramid, manipud iti panangbutbuteng agingga iti panangrames ken dadduma pay a kita ti seksual a panangranggas. Mabalin a mapasamak daytoy iti pisikal, berbal, ken iti dadduma pay a wagas. Para iti pannarabay maipapan iti panangbalakad kadagiti miembro a nakapadasen iti seksual a pannakaabuso, rames, wenno dadduma pay a kita ti seksual a pannakaranggas, kitaen iti 38.6.18.2.

No agsuspetsa dagiti miembro wenno adda ammoda a seksual a pannakaabuso, agtignayda a mangsaluad kadagiti biktima ken dadduma pay a madagdagus no mabalin. Iraman daytoy ti panangireport kadagiti sibil nga agturay ken panangipakaammo a dagus iti bishop wenno stake president. No naabuso ti maysa nga ubing, nasken a suroten dagiti miembro dagiti pangiturong iti 38.6.2.

38.6.18.3

Dagiti Konseho iti Kinamiembro

Mabalin a kasapulan ti konseho iti kinamiembro para iti maysa a tao a seksual a nangranggas wenno nangabuso iti maysa a tao. Kasapulan ti konseho iti kinamiembro no ti maysa a miembro ket nakaaramid iti panangrames wenno naglabsing iti ania man a kita ti seksual a panagranggas (kitaen iti 32.6.1.1)

Nasken pay a maangay ti maysa a konseho para iti seksual nga aramid iti mabalin a biktima [vulnerable] a nataengan. Kas nausar ditoy, ti maysa a mabalin a biktima [vulnerable] a nataengan ket maysa a tao a, gapu iti pagkuranganna iti bagi wenno panunot, saan a mapalugodan ti aramid wenno dina maawatan no ania daytoy.

Tapno marisut ti dadduma pay a kita ti seksual a panagabuso, agkalikagum a gun-oden dagiti lider ti direksion ti Espiritu maipapan no personal a panangbalakad wenno ti konseho ti kinamiembro ti kasayaatan a setting (kitaen iti 32.6.2.2 ken 32.8). Kadagiti nakaro a kasasaad kasapulan ti maysa a konseho. Mabalin a kauman a direkta dagiti lider dagiti priesthood liderda maipapan iti setting.

No agresulta dagiti panagiget iti kinamiembro manipud iti konseho ti kinamiembro a naangay para iti nakabasol [perpetrator] ti seksual a panagabuso, maikkan iti anotasion ti rekord ti kinamiembro dayta a tao.

Para iti impormasion maipapan iti panangbalakad kadagiti kaso ti panagabuso, kitaen iti 38.6.2.2. Para iti impormasion maipapan iti panangbalakad kadagiti biktima ti seksual a pannakaranggas, kitaen iti 38.6.18.2.

38.6.23

Dagiti Indibidual a Transgender

Maipasango dagiti indibidual a transgender kadagiti narikut a karit. Dagiti miembro ken saan a miembro a mabigbig a kas transgender—ken ti pamilia ken gagayyemda—nasken a matratoda iti kinasensitibo, kinasayaat, kinaasi, ken iti nawadwad nga ayat a kas ken ni Cristo. Mapasangbay ti amin a dumar-ay iti miting ti sakramento, iti dadduma pay a miting iti Domingo, ken kadagiti pasken a paglilinnangenan ti Simbaan (kitaen iti 38.1.1).

Ti katatao [gender] ket maysa a napateg a saguday ti kinatao iti plano iti kinaragsak ti Nailangitan nga Ama. Ti nairanta a kaipapanan ti katatao [gender] iti waragawag ti kaamaan [family proclamation] ket biological a katataoda [biological sex] iti pannakaipasngay. Adda dagiti tao a makarikna ti saan a panagtunos ti biological a katataoda [biological sex] ken ti pakabigbigan ti katataoda [gender identity]. Kas bungana, mabalinda a mabigbig kas transgender. Awan ti aramiden ti Simbaan maipapan kadagiti pakaigapuan ti tattao a mangyam-ammo iti bagbagida kas transgender.

Kaaduanna a pannakiraman iti Simbaan ken iti sumagmamano nga ordinansa ket saan a mangidadduma iti katatao wenno gender. Mabalin a mabuniagan ken makumpirmaan dagiti tao a transgender kas nabalabala iti 38.2.3.14. Mabalinda pay ti makiranud iti sakramento ken umawat kadagiti bendision iti priesthood. Nupay kasta, maawat ti ordinasion iti priesthood ken dagiti ordinansa iti templo a mayannurot iti biological a katatao iti pannakaipasngay.

Agbalakad dagiti lider iti Simbaan maisuppiat iti elective medical wenno surgical intervention para iti panggep ti pananggandat a panangbaliw iti kasupadi a katatao ti biological a katatao ti maysa a tao iti pannakaipasngay ( “sex reassignment”) Ibalakad dagiti lider a ti panangaramid kadagitoy a tignay ti mangigapunto para kadagiti panagiget iti kinamiembro iti Simbaan.

Ibalakad pay dagiti lider maisuppiat iti social transitioning. Mairaman iti social transition ti panangbaliw iti kawes wenno panangurnos iti bagi, wenno panangbalbaliw iti nagan wenno sandi, tapno mangyam-ammo iti bagi a maisupadi iti biological a katataona iti pannakaipasngay. Ibalakad dagiti lider a dagiti mangaramid iti social transition ket makapadasto iti sumagmamano a panagiget iti kinamiembro iti Simbaan iti panawen daytoy a transision.

Mairaman iti panangiget ti panangawat wenno panangaramat iti priesthood, panangawat wenno panangusar iti temple recommend, panangawat iti sumagmamano a calling iti Simbaan. Nupay naiget ti sumagmamano a pribelihio ti kinamiembro iti Simbaan, mapasangbay iti dadduma pay a pannakiraman iti Simbaan.

Dagiti indibidual a transgender a saan a mangaramat iti medical, surgical, wenno social transition iti kasupadi a katatao wenno gender ken maikari daytoy ket mabalinna ti umawat kadagiti calling iti Simbaan, temple recommend, ken ordinansa iti templo.

Sumagmamano nga ubbing, agtutubo, ken nataengan ti inikkan iti preskripsion a hormone therapy ti lisensiado a medical propesional tapno mangpaep-ep iti gender dysphoria wenno mangpabassit kadagiti pampanunot a panagpakamatay. Sakbay a rugian ti tao ti kasta a therapy, nasken a maawatanna (ken dagiti nagannak ti menor de edad) dagiti mabalin a peggad wenno pagimbagan. No saan a gangandaten dagitoy a miembro ti transision iti kasupadi a katatao wenno gender ken maikari daytoy, mabalinda ti umawat kadagiti calling iti Simbaan, temple recommend, ken ordinansa iti templo.

No ikeddeng ti maysa a miembro a balbaliwan ti napili a naganna wenno sandi a pangawag, ti napili a nagan mabalin nga isurat iti preferred name field iti rekord ti kinamiembro . Mabalin a maawagan ti tao iti napili a naganna iti ward.

Agduduma unay dagiti kasasaad iti tunggal yunit ken iti tunggal tao. Agiinnuman dagiti miembro ken lider ken makiumanda iti Apo. Tumulongto dagiti Panguluen ti Area kadagiti lokal a lider a nainriknaan a mangrisut a saggaysa kadagiti situasion. Makiinnuman dagiti bishop iti stake president. Nasken nga agkiddaw iti balakad dagiti stake president ken mission president manipud iti Panguluen ti Area (kitaen iti 32.6.3 ken 32.6.3.1).

Para iti ad-adu pay nga impormasion maipapan iti pannakaawat ken panangsuporta kadagiti indibidual a transgender, kitaen iti “Transgender” iti ChurchofJesusChrist.org.

38.8

Dagiti Annuroten nga Administratibo

38.8.2

Palso a Pannakipulapol [Affinity Fraud]

Mapasamak ti palso a pannakipulapol no ti maysa a tao ket manggundaway iti panagtalek wenno kompiansa ti sabali a tao tapno mangallilaw wenno mangloko kenkuana. Mapasamak daytoy no agkagrupo dagiti agpada a tao, kas iti Simbaan. Mabalin pay a mapasamak daytoy babaen ti panangabuso iti saad ti panaggayyem wenno panangtalek, kas iti calling iti Simbaan wenno relasion iti pamilia. Masansan a para iti pannakagun-od iti kuarta ti palso a pannakipulapol.

Nasken a napudno dagiti miembro ti Simbaan iti pannakilangenda ken agtignayda nga addaan iti integridad. Ti palso a pannakipulapol ket nakababain a panangliput iti panagtalek ken kompiansa. Dagiti agbasol iti daytoy ket mabalin a maipasangoda iti kriminal a prosekusion. Dagiti miembro ti Simbaan nga agbasol iti palso a pannakipulapol mabalin a maipasango kadagiti panagiget wenno panangikkat iti kinamiembrona. Kitaen iti 32.6.2.3 ken 32.6.1.3 para iti pannarabay maipapan kadagiti konseho iti kinamiembro para kadagiti aramid a pangallilaw.

Mabalin a saan a dakamaten wenno isingasing dagiti miembro a dagiti pannakipulapolda iti negosio ket inesponsoran, inendorso ti, wenno inrepresenta ti Simbaan wenno dagiti liderna.

38.8.24

Legal Counsel para kadagiti Pakaseknan a Banag iti Simbaan

No kasapulan ti legal a tulong para kadagiti pakaseknan a banag ti Simbaan, nasken a kontaken dagiti lider ti legal counsel ti Simbaan. Iti United States ken Canada, ti stake president ti mangkontak iti Church’s Office of General Counsel:

• 1-800-453-3860, extension 2-6301

• 1-801-240-6301

Iti ruar ti United States ken Canada, ti stake president ti mangkontak iti area legal counsel iti area office.

38.8.24.1

Pannakiraman wenno dagiti Dokumento kadagiti Legal Proceedings

Nasken a saan a makiraman dagiti lider ti Simbaan kadagiti kaso a sibil wenno krimen para kadagiti miembro iti yunitda nga awan ti umuna a panangkonsulta iti legal counsel ti Simbaan. Mayaplikar daytoy met la nga annuroten [policy] iti pannakisarita wenno panangsurat kadagiti abogado wenno court personnel, agraman iti babaen ti email.

Nasken a makisao dagiti lider iti legal counsel ti Simbaan, no iti kabaelanda iti Simbaan, isuda ket:

• Mamatida a nasken nga agpaneknekda wenno makisaritada iti legal a pakaseknan a banag.

• Naidawat a kasapulan ida ti legal a proseso tapno agpaneknek wenno makisarita iti legal a pakaseknan a banag.

• Nabilinda a mangted iti ebidensia.

• Nakiddaw a mangtedda kadagiti dokumento wenno impormasion a sitatallugod.

• Naidawat a makisaritada kadagiti abogado wenno agturay a sibil maipapan kadagiti legal a proceedings, agraman iti panagpataw iti sentensia wenno dagiti parole hearings.

Nupay naplano a nasayaat, dagiti lider iti Simbaan a mangitawtaw iti impormasion iti legal proceedings ket mabalin a sabali ti pannakaipaawatna wenno makadadael. Ti kasta a panangitawtaw ket mabalin a makadangran kadagiti biktima ken dagiti pamiliada. Ti panangsurot iti annuroten [policy] ti Simbaan ket makatulong pay a mangiliklik iti Simbaan iti saan nga umno a pannakairamanna kadagiti legal a bambanag a pakaseknan.

38.8.24.2

Pammaneknek iti Legal Proceedings

Mabalin a saan nga agpaneknek dagiti lider ti Simbaan a para iti Simbaan iti ania man a legal proceeding nga awan ti umuna a pananganamong ti Office of General Counsel. Mayaplikar met daytoy nga annuroten [policy] iti panagpataw iti sentensia wenno dagiti parole hearings. Mabalin a saan a mangted dagiti lider ti Simbaan iti berbal wenno naisurat nga ebidensia iti kapasidad iti kinadauloda nga awan daytoy a pananganamong.

Nasken a saan nga isingasing wenno ipaawat dagiti lider a ti pammaneknekda iti legal proceeding ket mangibagi iti saad ti Simbaan.

Nasken a saan nga impluensiaan dagiti lider ti pammaneknek ti maysa a saksi iti ania man a legal proceeding.

Ti impormasion iti kontak para iti legal counsel ti Simbaan ket maited iti 38.8.24.