4.

Panangidaulo ken dagiti Konseho iti Simbaan ni Jesucristo

4.0

Pakauna

Kas maysa a lider iti Simbaan, naawaganka babaen ti pammaregta babaen dagiti napusgan a katulongan ti Apo. Addaanka iti pribilehio ti panangtulong iti aramid ti Nailangitan nga Ama ti “[panangi]patungpal iti saan nga ipapatay ken agnanayon a biag ti tao” (Moises 1:39). Aramidem daytoy babaen ti panangallukoy kadagiti miembro a makiraman iti aramid ti pannakaisalakan ken pannakaitan-ok para iti bagbagida, iti pamiliada, ken iti dadduma (kitaen iti kapitulo 1). Masarakamto ti rag-o bayat ti panagserbim kadagiti annak ti Dios.

Iti panangsurotmo ken ni Jesucristo, masansan nga agserbikanto iti dadduma iti saggaysa. Addaankanto pay kadagiti gundaway a mangipaay iti panangidaulo kadagiti miting ken aktibidad iti Simbaan. Mainayon pay, mabalin a mangtedka iti napateg a serbisio babaen kadagiti konseho. Mabalin nga iraman dagitoy dagiti miting ti panguluen, miting ti konseho iti ward, ken dadduma pay. Mangted dagiti benneg 4.3 ken 4.4 kadagiti pangiwanwan para kadagiti nasamay a konseho. Maited dagiti detalye maipapan kadagiti naipangruna a miting ti konseho iti kapitulo 29.

Agkasapulan iti sakripisio ti oras ti naidaton a serbisiom, ngem saanmo a liwayan dagiti bukodmo a kasapulan ken dagiti kasapulan ti pamiliam. Agkalikagum a manggun-od iti pannarabay ti Espiritu Santo a mangtulong kenka a mangtimbeng ken mangipatungpal kadagiti pagrebbengam (kitaen iti Mosiah 4:27).

4.1

Ti Panggep ti Panangidaulo iti Simbaan

Allukoyen dagiti lider dagiti miembro a makiraman iti aramid ti Dios babaen ti panagbalin a “pudno a pasurot ni … Jesucristo” (Moroni 7:48). Tapno maaramid daytoy, umuna nga ikarigatan dagiti lider ti agbalin a napudno a disipulo ti Mangisalakan babaen ti panangsurot kadagiti pannursuro ken pagwadanna (kitaen iti Lucas 18:22). Kalpasanna makatulongda kadagiti dadduma nga umas-asideg iti Nailangitan nga Ama, ni Jesucristo ken ti Espiritu Santo. Iti proseso iti panangtulong kadagiti dadduma, agbalinda a nasaysayaat a disipulo mismo (kitaen iti Mosiah 18:26; Doktrina ken Katulagan 31:5).

Ti panagbalin a napudno a disipulo tapno mangtulong kadagiti dadduma nga agbalin a napudno a disipulo ket ti panggep iti likudan ti tunggal takem [calling] iti Simbaan. Mairaman iti tunggal takem [calling] dagiti gundaway nga agserbi, mangidaulo, ken mangpapigsa kadagiti dadduma.

4.2

Dagiti Pagbatayan ti Panangidaulo iti Simbaan

Kabayatan ti panagministrona iti daga, impakita ti Mangisalakan ti pagwadan ti panangidaulo para iti Simbaanna. Ti kangrunaan a panggepna ti panangaramid iti pagayatan iti Nailangitan nga Ama ken panangtulong kadagiti dadduma a makaawat ken agbiag iti ebangheliona (kitaen iti Juan 5:30; Mosiah 15:7). Inayatna dagiti indauluanna ken impakitana dayta nga ayat babaen ti panagserbina kadakuada (kitaen iti Juan 13:3–5).

Pinadur-as ti Mangisalakan ti kabaelan dagiti dadduma babaen ti panangtedna kadakuada iti pagrebbengan ken gundaway a dumur-as (kitaen iti Mateo 10:5–8; Juan 14:12). Nangparegta ken nangatur nga addaan iti kinalawag ken ayat (kitaen iti Juan 21:15–17).

Kinuna ti Apo, “Adalen koma ti tunggal tao ti pagrebbenganna, ken agtignay iti takem a nakaitudinganna, iti amin a kinaregta” (Doktrina ken Katulagan 107:99). Maaramat dagitoy a balikas iti amin nga umawat iti pagrebbengan nga agserbi ken mangidaulo iti Simbaan ti Mangisalakan.

Agkalikagum a maaddaan iti pannarabay a makatulong kenka a mangsursuro ken mangipatungpal kadagiti pagrebbengan ti takemmo. Bayat ti panagadalmo kadagiti nasantuan a kasuratan, sapulem dagiti pagbatayan iti panangidaulo nga impakita ken insuro ti Mangisalakan. Ti panangaramat kadagiti pagbatayan iti daytoy a kapitulo ket mangtulongto pay kenka a nasamsamay a mangidaulo iti Simbaan ti Mangisalakan.

4.2.1

Agsagana a Naespirituan

Insagana ni Jesus ti bagina a naespirituan para iti naindagaan a misionna (kitaen iti Lucas 4:1–2). Kasta met nga agsaganaka a naespirituan babaen ti yaasidegmo iti Nailangitan nga Ama babaen ti panagkararag, panagadal iti nasantuan a kasuratan, ken panagtungpal kadagiti bilinna. Ti panangsurot kadagiti propeta ti makatulong pay kenka nga agsagana a naespirituan (kitaen iti Doktrina ken Katulagan 21:4–6).

Agkalikagum a maaddaan iti paltiing tapno maawatam dagiti kasapulan dagiti idauluam ken no kasano ti mangipatungpal iti aramid a nakaawagan ti Dios kenka nga aramidem. Babaen dagiti panagkagumaanmo nga umasideg iti Apo, maawatmo ti pannarabay iti bukodmo a biag, pagrebbengam iti pamilia, ken takemmo iti Simbaan.

Inkari pay ti Apo a mangipaay kadagiti naespirituan a sagut kadagiti agsapsapul kadagitoy (kitaen iti Doktrina ken Katulagan 46:8). No sipapakumbaba nga awagam ti Nailangitan nga Ama tapno umawat kadagitoy a sagsagut, padakkelennanto ti kabaelam a mangidaulo ken mangitag-ay kadagiti pagserbiam.

4.2.2

Agministro iti Amin nga Annak ti Dios

Nagministro a mismo ni Jesus kadagiti tao, a mangtultulong a mangitag-ay ken mangisuro kadagiti nakarikna nga agmaymaysada, naawanan iti namnama, wenno napukaw. Babaen dagiti balikas ken tignayna, impakitana kadagiti tao nga ay-ayatenna ida. Nailasinna ti nadiosan a kababalin ken agnanayon a pateg ti tunggal tao.

Ayatem dagiti tao a pagserbiam a kas iti inaramid ni Jesus. Agkararagka “iti amin a kabaelan ti puso” tapno mapno iti ayatna (Moroni 7:48). Mangipasdek iti napudno a pannakigayyem. Tulongam dagiti mabalin a malidlidayan, agkasapulan iti pannakaliwliwa, wenno addaan iti dadduma pay a kasapulan. Ti ayatmo ti mangbendisionto iti biagda ken mangtulong kadagiti tao nga agtarigagay nga umasideg ken ni Cristo.

Tulongam dagiti indibidual a mangpauneg iti kumbersionda ken mangpapigsa iti pammatida iti Nailangitan nga Ama ken ni Jesucristo. Tulongam ida nga agsagana a mangaramid kadagiti katulagan bayat ti yaawatda iti sumaruno nga ordinansada. Allukoyem ida nga agtungpal kadagiti katulaganda ket makiranud kadagiti bendision ti panagbabawi. Tulongam ida a mangammo a mabalinda ti dumur-as iti pangipatungpalda iti nadiosan a potensialda ania man dagiti karit a sanguenda.

4.2.3

Mangisuro iti Ebanghelio ni Jesucristo

Mannursuro ti amin a lider. Ikagumaanam ti mangsurot iti pagwadan ti Mangisalakan kas maysa a mannursuro (kitaen iti kapitulo 17; Panangisuro iti Wagas ti Mangisalakan). Babaen dagiti balikas ken tignaymo, isurom ti doktrina ni Jesucristo ken dagiti pagbatayan ti ebangheliona (kitaen iti 3 Nephi 11:32–33; Doktrina ken Katulagan 42:12–14). Ti nasamay a panangisuro ti mangparegta kadagiti tao a mangpapigsa iti relasionda iti Dios ken agbiag iti ebanghelio, a dumurdur-as nga agturong iti agnanayon a biag.

Ti panangisuro iti wagas ti Mangisalakan ket ad-adda pay ngem iti panangsarita; iramanna ti panagdengngeg ken panagsaludsod iti wagas nga inaramidna (kitaen iti Mateo 16:13–17).

Dagiti nasamay a mannursuro pay ket dagiti napasnek nga agad-adal. Aramidem ti panagadal iti balikas ti Dios a nangato a proridad iti biagmo. Maawatam a ti panagsursuro ket maysa nga agtultuloy a proseso iti napaut a biag. Agkalikagum nga agsursuro manipud kadagiti dadduma, agraman dagiti sursuruam. (Kitaen iti Doktrina ken Katulagan 88:122.)

Mangisuro manipud kadagiti nasantuan a kasuratan ken balikas dagiti propeta iti ud-udina nga aldaw (kitaen iti Doktrina ken Katulagan 52:9). Laglagipem a “ti panangikasaba iti balikas [addaan] nabilbileg nga amang ti ibungana iti panunot dagiti tao ngem iti … ania man a banag” (Alma 31:5).

Agkalikagumka a manggun-od iti impluensia ti Espiritu bayat ti panagsaganam ken panangisurom. Ti Espiritu Santo ti mangidanon iti kinapudno iti puspuso ken pampanunot dagiti sursuruam (kitaen iti 2 Nephi 33:1).

Isurom kadagiti miembro a mangigaed iti bagbagida iti nainkararagan a panagadal iti ebanghelio agpada a bukodda ken kaduada dagiti pamiliada.

No naawaganka wenno nadutokanka a mangidaulo iti maysa a miting wenno aktibidad iti Simbaan, penkem a ti panangisurom ket makaitandudo ken umno iti doktrina (kitaen iti Doktrina ken Katulagan 50:21–23).

4.2.4

Mangidaulo iti Kinalinteg

Impalgak ti Apo a “para iti kasapulan adda dagiti presidente, wenno mangimaton a dadaulo” iti Simbaanna (Doktrina ken Katulagan 107:21). Dagiti agiggem kadagiti tulbek ti priesthood mangidauloda kadagiti tay-akda iti pagrebbengan, kas iti maysa a korum wenno ward.

Dagiti dadduma pay nga organisasion iti Simbaan, agraman ti Relief Society, Young Women, Primary, ken Sunday School, ket idauluan pay ti maysa a mangimatmaton a dadaulo [presiding officer]. Dagitoy a lider ket awagan ken i-set apart ken maikkan iti naidutok a turay ti maysa nga agiggem kadagiti tulbek ti priesthood wenno maysa a tao a pinusganna (kitaen iti 3.4.3).

Agserbi ti tunggal mangimatmaton a dadaulo babaen ti panangiturong ti maysa a tao nga agiggem kadagiti tulbek ti priesthood (kitaen iti 3.4.1). Daytoy nga istruktura ti mangipaay iti urnos ken nalawag a linia ti pagrebbengan ken kaadda ti sungsungbatan iti panangaramid iti trabaho ti Apo.

Mabalin nga idutok ti maysa a mangimatmaton a dadaulo iti sabali a tao ti temporario a pagrebbenganna a mangidaulo. Kas pagarigan, no awan ti Relief Society president iti miting ti Relief Society iti Domingo, dutokanna ti umuna a mamagbagana a mangidaulo iti miting. No awan met ti umuna a mamagbaga, dutokan ti presidente ti maikadua a mamagbagana a mangidaulo.

Ti maysa a lider a mangidaulo iti maysa nga organisasion, miting, wenno aktibidad iti Simbaan penkenna a maipatungpal dagiti panggep ti Apo. Iti panangaramid iti daytoy, suroten ti lider dagiti pagbatayan ti ebanghelio, pagannurotan ti Simbaan, ken ti panangiturong ti Espiritu Santo.

Dagiti mangidaulo surotenda ti pagwadan ni Jesucristo iti panagserbi nga addaan iti kinadungngo, kinapakumbaba, ken natarnaw nga ayat (kitaen iti Juan 13:13–15). Ti takem [calling] wenno naidutok nga aramiden a mangidaulo ket saan a mamagbalin iti tao nga umawat iti daytoy tapno napatpateg wenno ad-adda nga ik-ikkan pateg ngem dagiti dadduma (kitaen iti Doktrina ken Katulagan 84:109–10).

No naawaganka wenno nadutokanka a mangidaulo, surotem ti panangisuro ti Mangisalakan nga “asino man nga isu ti umuna kadakayo, isunto ti adipenyo” (Mateo 20:27; kitaen dagiti bersikulo 26–28). Makiinnumanka kadagiti dadduma ken agkalikagumka a maaddaan iti kaykaysa iti pannakaawat iti pagayatan ti Apo ken panangaramid iti trabahona (kitaen iti Doktrina ken Katulagan 41:2; kitaen met iti 4.4 iti daytoy a handbook).

Saan a nainsiriban a tarigagayan ti mangidaulo iti ania man nga organisasion iti Simbaan ti Apo (kitaen iti Doktrina ken Katulagan 121:37). Ketdi, sipapakumbaba ken sipupudnoka nga agserbi iti saad a nakaawagam. Ikagumaanam nga ipatungpal ti aramid ti Apo a naitalimudok ti imatangna iti gloriana (kitaen iti Doktrina ken Katulagan 4:5). Agtalekka a mangtedto ti Apo kenka kadagiti gundaway tapno dumur-as ken mangbendison kadagiti annak ti nailangitan nga Ama.

4.2.5

Ipakumit ti Pagrebbengan ken Ipasigurado ti Kaadda ti Sungsungbatan

Inted ti Mangisalakan kadagiti disipulona dagiti napnuan kaipapanan a naidutok nga aramiden ken pagrebbengan (kitaen iti Lucas 10:1). Inikkanna pay ida iti gundaway a mangilanad kadagiti nagapuananda (kitaen iti Lucas 9:10).

Kas maysa a lider, matulongam dagiti dadduma a dumur-as babaen ti panangipakumit kadagiti naidutok nga aramiden kadakuada. Iti kastoy a wagas matulongamto pay ida nga umawat kadagiti bendision a sumangbay manipud iti panagserbi. Ikagumaanam a mangiraman iti amin a miembro iti panangaramid iti trabaho ti Dios.

Ti panangipakumit ti mangaramidto pay a nasamsamay ti panagserbim. No padasem ti agaramid iti adu unay, “di bumurong a mapaksuyankanto” (Exodo 18:18). Agkalikagum a manggun-od iti pannarabay ti Espiritu maipapan no ania ti ipakumit tapno makapagpokuska kadagiti kangatuan a prayoridadmo.

Ti panangipakumit ket ad-adda pay ngem iti panangted ti naidutok nga aramiden. Iramanna pay ti panangisuro ken panagtalek iti sabali a tao a mangipatungpal iti naidutok nga aramiden. Gagangay nga iramanna dagiti sumaganad nga elemento:

• Makipagkita iti tao nga awisem nga agserbi iti Apo iti maysa a naidutok nga aramiden. Tulongam ti tao a makaawat iti naidutok nga aramiden ken dagiti panggepna, agraman no kasano a mangbendisionto iti dadduma ti serbisiona.

• Agiinnuman maipapan iti naidutok nga aramiden, no asino pay ti mabalin nga iraman, ken kaano a nasken a maileppas daytoy. Siguraduem a maawatan ti tao ken sitatallugod nga awatenna ti naidutok nga aramiden. Yebkasmo ti panagtalek kadagiti kabaelanna.

• Allukoyem ti tao nga umawat iti pammaregta maipapan no kasano a maipatungpal ti naidutok nga aramiden. Ipakitam ti panagtalekmo ket tulongam ti tao nga agballigi. Mangipaay iti direksion ken suporta no kasapulan.

• Masansan nga idawat iti tao a mangireport iti naidutok nga aramiden. Awatem dagiti kasayaatan a panagkagumaan ti tao, ken ipeksam ti panagyamanmo para iti inaramidna.

4.2.6

Isaganam dagiti Dadduma nga Agbalin a Lider ken Mannursuro

Insagana ti Mangisalakan dagiti Apostolna nga Agbalin a Lider iti Simbaanna. Kasta met a tulongam dagiti dadduma nga agsagana nga agbalin a lider ken mannursuro. Agpokus ti aramid ti Apo iti panangtulong kadagiti tao, saan laeng a panangimaton kadagiti programa iti Simbaan. Saan laeng nga aggibus dagitoy a programa iti bagbagida. Adda dagitoy tapno matulongan dagiti tao a dumur-as.

Iti panangibilang no asino ti mabalin nga agserbi kadagiti takem wenno naidutok nga aramiden, agbalin a managkararag. Laglagipen nga aramidento ti Apo a maikari dagiti awaganna. No ania ti kapatgan ket ti panagtallugodda nga agserbi, sipapakumbaba nga agkalikagumda iti tulong ti Apo, ken ikarkarigatanda ti agbalin a maikari. Dagiti takem ken naidutok nga aramiden ti makatulong kadakuada a dumur-as babaen ti panangipaay kadagiti gundaway a mangaramat iti pammatida, agtrabaho a napasnek, ken marikna a padpadakkelen ti Dios dagiti panagkagumaanda. Mangted iti pannarabay ken tulong kadagiti agtutubo, baro a miembro, ken dadduma pay a mabalin nga agkasapulan iti nayon a suporta iti panangipatungpal kadagiti takemda.

No dadduma maulit a maawagan dagiti isu met la a tao kadagiti saad iti panangidaulo. Mabalin a daytoy ti mangpadagensen unay kadakuada ken dagiti pamiliada ken mangyadayo kadagiti gundaway manipud iti dadduma. Agkalikagum a mangted iti amin a miembro kadagiti gundaway nga agserbi ken dumur-as.

Para iti ad-adu pay nga impormasion maipapan kadagiti takem [calling] iti Simbaan, kitaen iti kapitulo 30.

4.2.7

Agplano kadagiti Miting, Adalen, ken Aktibidad nga Addaan kadagiti Nalawag a Panggep

Agkalikagum a manggun-od iti pannarabay ti Espiritu iti panangplano kadagiti miting, adalen, ken aktibidad nga addaan kadagiti nalawag a panggep. Nasken a dagitoy a panggep ti mangpapigsa kadagiti indibidual ken pamilia, mangyas-asideg kadakuada ken ni Cristo, ken mangtulong a mangipatungpal iti aramid ti Dios iti pannakaisalakan ken pannakaitan-ok (kitaen kadagiti kapitulo 1 ken 2). No iti panagplano, surotem dagiti pagbatayan kadagiti kapitulo 20 ken 29.

Agaramid kadagiti plano nga atiddog ti agpangna para ti organisasionyo. Agaramid iti tinawen a kalendario. Agpokus iti panangyallukoy iti naespirituan a panagdur-as dagiti miembro.

4.2.8

Panangamiris kadagiti Panagkagumaanmo

Kanayon nga irebyum dagiti pagrebbengam ken naespirituan a panagdur-asmo kas maysa a lider. Ibilangmo pay ti panagdur-as dagiti idauluam. Mabalin nga irebyu dagiti lider iti yunit, korum ti priesthood, ken dadduma pay nga organisasion ti key indicators, ti quarterly report ken dadduma pay a report iti Leader and Clerk Resources tapno mangkita no adda panagdur-as ken no adda potential para iti panagdur-as.

Ti balligim kas maysa a lider ket umuna a marukod babaen ti panagkumitmo iti panangtulong kadagiti annak ti Dios nga agbalin a napudno a disipulo ni Jesucristo. Gapu ta adda karbengan nga agpili ti amin a tao, mabalin nga adda dagiti mangpili a pumanaw manipud iti dana ti katulagan. No dadduma mabalin a daytoy ti mangupay kenka, ngem no umasidegka iti Apo, itag-ay ken liwliwaennakanto (kitaen iti Alma 26:27). Maammuam a maragsakan ti Apo kadagiti panagkagumaanmo bayat ti pannakariknam nga agtartrabaho ti Espiritu babaen kenka.

4.3

Dagiti Konseho iti Simbaan

Impasdek ti Nailangitan nga Ama dagiti konseho kas maysa a napateg a paset ti panangawat iti pammaregta, panagaramid kadagiti pangngeddeng, ken panangipatungpal iti aramidna. Adda dagiti konseho sakbay a naparsua ti lubong. Nakiraman ti tunggal maysa kadatayo kadagitoy a konseho sakbay ti yaay iti daga. (Kitaen iti Doktrina ken Katulagan 121:32; Abraham 3:22–28.)

Iti panangsurot iti daytoy a pagtuladan, ti Simbaan ni Jesucristo ket imatonan dagiti konseho iti tunggal lebel. Kas pagarigan, konseho amin dagiti Konseho ti Umuna a Panguluen ken ti Korum dagiti Sangapulo-ket-dua nga Apostol (kitaen iti 5.1.1.1), dagiti Panguluen ti Area (kitaen iti 5.2.1), dagiti panguluen ti stake, ken dagiti bishopric. Mainayon kadagiti konseho ti stake ken ward, konseho pay ti tunggal panguluen ti organisasion, korum, wenno klase iti Simbaan.

Imbilin ti Apo kadagiti lider ti Simbaanna nga aggiinnuman iti panangaramid iti trabahona (kitaen iti Doktrina ken Katulagan 41:2–3). Dagiti konseho ti mangted kadagiti gundaway a maawat dagiti miembro ti konseho ti paltiing bayat ti panagkalikagumda iti pannakaawat kadagiti kasapulan dagiti annak ti Dios ken agplano no kasano a matulongan a maipaay dagitoy.

4.4

Dagiti Pagbatayan dagiti Nasamay a Konseho

Sumagmamano a pagbatayan dagiti nasamay a konseho ti nabalabala iti daytoy a benneg. Makatulong dagitoy a pagbatayan kadagiti lider kadagiti konseho kasta met kadagiti nagannak kadagiti konseho iti pamiliada.

4.4.1

Dagiti Panggep dagiti Konseho

Kangrunaan a panggep dagiti konseho ti mangtulong kadagiti miembro nga agtitinnulong nga agkalikagum a manggun-od iti nadiosan a pannarabay maipapan kadagiti banag a mangbendisionto kadagiti indibidual ken pamilia (kitaen iti Doktrina ken Katulagan 43:8–9). Mangted dagiti konseho iti naisangsangayan a panangyunay-unay iti panangtulong kadagiti miembro nga umawat kadagiti ordinansa ken agtungpal kadagiti mainaig a katulagan. Agkalikagum pay dagiti miembro ti konseho a maaddaan iti pammaregta maipapan iti panagplano ken panangitunos iti aramid ti Apo iti tay-ak ti pagrebbenganda.

Sumagmamano a pakaseknan nga administratibo, kas iti panagplano iti kalendario, ket mabalin a saan nga agkasapulan iti panaglilinnawag iti maysa a setting ti konseho. Kaaduan ditoy ti mabalin a maasikaso babaen ti komunikasion sakbay ken kalpasan dagiti miting.

Mangted dagiti miembro ti konseho iti naipangpangruna a panangaywan kadagiti indibidual ken pamilia nga addaan kadagiti napalaus a panagkasapulan. Tumulong dagiti konseho a makitinnunos iti tulong. Para iti impormasion maipapan iti sumagmamano kadagitoy a kasapulan, kasta met kadagitoy a resources para iti pannakaawat ken panagtulong, kitaen iti Life Help iti Gospel Library.

4.4.2

Panagsagana para kadagiti Miting iti Konseho

Manamnama a regular nga agmiting dagiti panguluen ken konseho. Addaan iti lider a naawagan ken na-set apart iti tunggal panguluen ken konseho. Agkalikagum dagitoy a lider iti pannarabay ti Apo iti panangplano kadagiti miting ti konseho. Agkalikagumda pay iti input manipud kadagiti miembro ti konseho iti panangikeddeng no ania ti ilawlawag.

Pakaammuan a nasapsapa dagiti lider dagiti miembro ti konseho maipapan kadagiti banag a panaglilinnawagan. Agsagana dagiti miembro ti konseho a mangibinglay kadagiti nalawag a pannakaammo ken pannakaawat maipapan kadagitoy a banag. Para kadagiti konseho ti ward ken stake, mapasamak ti kaaduan daytoy a panagsagana kadagiti miting iti panguluen.

Isagana dagiti miembro ti konseho ti bagbagida a naespirituan a makiraman kadagiti miting ti konseho. Agkalikagumda nga agbalin nga umaw-awat kadagiti parikna ti Espiritu.

4.4.3

Panaglilinnawag ken dagiti Pangngeddeng

Kinuna ti Apo, “Agsisinnublatkayo koma nga agsao ket dumngeg koma amin iti sasawenna, tapno kalpasan a makapagsao ti amin tapno maisagut ti amin, ken tapno maikkan ti tunggal tao iti agpapada a gundaway” (Doktrina ken Katulagan 88:122). Mayaplikar daytoy a pagbatayan kadagiti konseho ti Simbaan.

Kabayatan ti maysa a miting ti konseho, ilawlawag ti lider (wenno ti maysa a tao a dutokan ti lider) ti banag a maibilbilang. Kalpasanna yallukoy ti lider ti panaglilinnawag kadagiti amin a miembro ti konseho, nga agdamdamag kadagiti saludsod ken agkalkalikagumda kadagiti kapanunotan.

Allukoyen ti lider dagiti miembro nga agsarita a siwawaya ken sipupudno. Ti panagduduma dagiti nagtaudan, tawen, padpadas, ken pannirigan dagiti miembro ti konseho ti mangpabaknang iti konseho. Siraraem nga agbibinninglay iti singasing ken agdidinnengngeg dagiti miembro. Bayat ti panagkalikagumda a mangammo iti pagayatan ti Apo, makapagtalinaed ti espiritu ti pammaregta ken panagkaykaysa.

Iti maysa a konseho a mangiraman kadagiti babbai ken lallaki, agkalikagum ti lider kadagiti nalawag a pannakaammo ken pannakaawat ken kapanunotan manipud iti agpada. Masansan nga agduma dagiti pannirigan dagiti babbai ken lallaki a mangted iti kasapulan a panagtimbeng. Mapagnunumuan dagiti lallaki ken babbai dagiti nasaysayaat a pangngeddeng ken addaanda iti dakdakkel a balligi iti panagserbi iti Apo bayat ti panangipategda kadagiti kontribusion ti tunggal maysa ken panagtitinnulongda.

Ti maysa a lider ti mangiwanwan kadagiti panaglilinnawag ti konseho. Nupay kasta, nasken nga ad-adda a dumngeg isuna ngem iti agsarita. No nasapa unay nga ibinglay ti lider ti konseho ti panniriganna, daytoy ti mabalin a manglapped iti kontribusion dagiti dadduma. No kasapulan, siaayat nga iturong wenno ipamaysa manen ti lider ti konseho ti panaglilinnawag.

Kalpasan ti panaglilinnawag, mabalin nga ikeddeng ti lider ti maysa a turongen ti tignay wenno itantanna ti desision bayat ti panagkalikagumna a maaddaan iti nayon nga impormasion ken pannarabay. Nasken a maipakaammo ti pangngeddeng babaen ti panaglilinnawag ken pinatalgedan ti Espiritu. Ti proseso ti konseho ti mangtulong a mangipatungpal kadagiti naparegta a desision a nalablabes iti bukod a kasayaatan a pangngeddeng ti maysa a lider. Mabalin met nga ibaga ti pakaseknan a banag iti sabali a konseho.

No dadduma mabalin a saan pay a natalinaay ti rikna dagiti miembro ti konseho maipapan iti napateg a desision. No mapasamak daytoy, mabalin nga aguray ti lider iti sabali pay a miting tapno ibilang ti banag ken agkalikagum iti nespirituan a pammatalged ken panagkaykaysa. Iti sumagmamano a kaso, mabalin a kayat ti maysa a miembro ti konseho ti makipagkita iti saggaysa tapno ilawlawag dagiti pakaseknanna.

4.4.4

Panagkaykaysa

Binilin ti Apo dagiti disipulona nga “agkaykaysada” (Doktrina ken Katulagan 38:27). Agkalikagum nga agkakaysa dagiti miembro ti konseho iti tarigagay ken panggep iti Nailangitan nga Ama ken ni Jesucristo. Inkarigatanda ti maaddaan iti panagkaykaysa kadagiti pananglilinnawag ken desisionda. Kalikagumanda pay ti agbalin a “sangsangkamaysa ti puso ken panunot” (Moises 7:18).

Nasken a liklikan dagiti miembro ti konseho ti panagsisinnupanget, saan a nalinteg a panangukom, ken panagsaosao (kitaen iti 3 Nephi 11:28–30). No agtignayda iti panagkaykaysa, bendisionanto ti Nailangitan nga Ama dagiti panagkagumaanda.

4.4.5

Tignay ken Kaadda ti Sungsungbatan

Aramiden dagiti miembro ti konseho ti kaaduan ti aramidda sakbay ken kalpasan dagiti miting ti konseho. Kabayatan dagiti miting, agkalikagumda iti pammaregta iti panangpadur-as kadagiti plano a mangipatungpal kadagiti pangngeddeng. Awisen ti lider iti konseho dagiti miembro a mangipatungpal kadagiti naidutok nga aramiden a mainaig kadagitoy a plano. Gagangay nga awisen dagiti miembro ti konseho dagiti dadduma iti organisasionda tapno tumulong. Nasken a saan a madagsenan unay dagiti indibidual kadagiti naidutok nga aramidenda.

Agreport dagiti miembro ti konseho kadagiti naidutok nga aramidenda. Gagangay nga agkasapulan ti panagdur-as iti nakanunongan nga atension ken masurnadan a naidutok nga aramiden.

4.4.6

Kumpidensialidad

Nasken a matrato iti respeto ti amin a personal nga impormasion. Usaren dagiti lider ti nainsiriban a pangngeddeng [discretion] no mangibinglay iti personal nga impormasion iti konseho. Gagangay a kalikagumanda ti pammalubos ti miembro a mangibinglay iti daytoy nga impormasion.

Dayawen ti konseho dagiti tarigagay ti asino man a mangkiddaw iti kumpidensialidad. Nasken a saan nga ibinglay dagiti miembro ti konseho ti personal nga impormasion iti ruar ti konseho malaksid no naidawat a mangipatungpal iti maysa a naidutok nga aramiden manipud iti lider ti konseho.

Sensitibo unay ti sumagmamano a pakaseknan a banag tapno idatag iti sanguanan ti sibubukel a konseho. No maitutop, irebyu dagiti lider dagitoy a banag iti tunggal miembro ti konseho. Wenno mabalinda nga ibaga iti sumagmamano a pakaseknan a banag iti sabali pay a konseho.