5.

Taitaiga Aoao ma Eria

5.0

Faatomuaga

O Iesu Keriso o le “maatulimanu autu” o Lana Ekalesia (Efeso 2:20). Na Te umiaina ki uma o le perisitua. Na Te valaauina aposetolo ma perofeta e fesoasoani i le galuega a le Atua o le faaolataga ma le faaeaga. Na Te faaee atu i luga o Ana auauna filifilia ki uma e faatatau i le taimi nei i le malo o le Atua i le lalolagi. (Tagai i le Mataupu Faavae ma Feagaiga 27:12--13; tagai foi i le 3.4.1 i le tusitaulima lenei.)

E ala mai i perofeta ma aposetolo, e valaau ai e le Alii ia alii i tofi o le Fitugafulu e fesoasoani ai i Lana galuega i le lalolagi uma (tagai i le Mataupu Faavae ma Feagaiga 107:38). E le gata i lea, o le Au Epikopo Pulefaamalumalu, Taitai Aoao, ma isi taitai alii ma tamaitai ua tuuina atu i ai tiutetauave taua e lagolago ai i le galuega.

O loo faamatala atu i lenei mataupu ia matafaioi a taitai aoao ma eria i le Ekalesia.

5.1

Taitaiga Aoao o le Ekalesia

O le taitaiga aoao o le Ekalesia e aofia ai Au Pulega Aoao ma Taitai Aoao uma. O le upu aoao o loo faailoa mai ai faapea o le pule ma tiutetauave e o faatasi ma valaauga e le fuapauina i tuaoi faalefaafanua. O i latou e umia nei valaauga e taitai, faiaoga, ma auauna atu i tagata o le Ekalesia i le lalolagi atoa.

O le vaega lenei o loo otooto atu ai matafaioi a le Au Pulega Aoao, Taitai Aoao, ma aufono ma komiti latou te tautuaina.

5.1.1

Au Pulega Aoao

5.1.1.1

Au Peresitene Sili ma le Korama a Aposetolo e Toasefululua

Peresitene o le Ekalesia Talu mai aso anamua, sa taitai e le Alii Lona nuu e ala i perofeta (tagai i le Amosa 3:7; Efeso 4:11–13). O le Peresitene o le Ekalesia o se perofeta, tagatavaai, ma le talifaaaliga. O ia foi o le Aposetolo sinia. I lalo o le taitaiga a le Alii, e pulefaamalumalu o ia i le Ekalesia ma e na o ia le tagata i le lalolagi e faatagaina e faaaogaina ki uma o le perisitua (tagai i le Mataio 16:16–19; tagai foi i le 3.4.1.1 i le tusitaulima lenei). Ua ia te ia le pule e maua ai faaaliga ma tautino mai le finagalo o le Atua mo le Ekalesia atoa. (Tagai i le Mataupu Faavae ma Feagaiga 43:2–3; 107:91–92; 128:11.)

Au Peresitene Sili. E ala mai i le Peresitene o le Ekalesia, e valaauina e le Alii ia fesoasoani e lagolagosua i le galuega. O le Peresitene ma ona fesoasoani o “Faitaulaga Sili Pulefaamalumalu e toatolu … [o e] ua avea o se korama o le Au Peresitene o le Ekalesia” (Mataupu Faavae ma Feagaiga 107:22). Ua ta’ua lea korama o le Au Peresitene Sili. O uso o le Au Peresitene Sili o Aposetolo ma i lena tulaga o i latou o ni “molimau faapitoa” o le suafa o Iesu Keriso (Mataupu Faavae ma Feagaiga 107:23). O le Au Peresitene Sili e pulefaamalumalu ma taitaia mataupu uma a le Ekalesia.

O Peteru, Iakopo, ma Ioane sa faataunuuina lenei matafaioi i le Ekalesia anamua. Sa latou i ai faatasi ma le Faaola i le tele o taimi paia ma sa mauaina ki o le malo. (Tagai i le Mataio 16:18–19; 17:1–5; Mareko 14:32–42; Mataupu Faavae ma Feagaiga 27:12–13; 81:1–2.)

Pe a maliu le Peresitene o le Ekalesia, e soloia le Au Peresitene Sili. E toe foi ia fesoasoani i o la’ua tulaga o le faasologa sinia i totonu o le Korama a Aposetolo e Toasefululua. I lalo o le taitaiga a le Aposetolo sinia, e taitai ai e le Korama a le Toasefululua le Ekalesia. I le avea ai o se korama, latou te lauiliuina pe o afea e tatau ai ona toefaatulaga le Au Peresitene Sili. I le mae’a ai o se faaiuga autasi, e faauuina le Aposetolo sinia e avea ma Peresitene fou o le Ekalesia ma valaauina ona fesoasoani.

Korama a Aposetolo e Toasefululua. I aso anamua, sa valaauina e Iesu Keriso ia Aposetolo e toasefululua e fesoasoani e taitai Lana Ekalesia (tagai i le Luka 6:12–13; Efeso 4:11–13; 1 Nifae 13:40). I o tatou taimi, e valaauina e le Alii ni tamalii e ala mai i le Peresitene o le Ekalesia e faauuina o Aposetolo ma ia auauna atu i le Korama a Aposetolo e Toasefululua (tagai i le Mataupu Faavae ma Feagaiga 18:26–28). E galulue lenei korama i lalo o le taitaiga a le Au Peresitene Sili e fausia ma faafoe le Ekalesia i malo uma (tagai i le Mataupu Faavae ma Feagaiga 107:33). E folafola atu e uso o le Toasefululua le talalelei i le lalolagi uma (tagai i le Mataio 28:19–20; Mataupu Faavae ma Feagaiga 107:35).

E umia e Aposetolo taitoatasi ki uma o le malo ma e faaaogaina na ki i lalo o le taitaiga a le Peresitene o le Ekalesia (tagai i le Mataupu Faavae ma Feagaiga 112:30–32). O Aposetolo e Toasefululua o ni “molimau faapitoa” o le suafa o Iesu Keriso (Mataupu Faavae ma Feagaiga 107:23; tagai foi i le 27:12). Latou te molimau atu i le lalolagi uma i Lona paia ma le moni o Lona Toetu (tagai i le Galuega 1:8, 22; 4:33; Mataupu Faavae ma Feagaiga 76:22–24).

E auauna atu Aposetolo i le taimi atoa i le Ekalesia i aso uma o totoe o o latou soifua (tagai i le Mataio 4:18–22).

O le Aufono a le Au Peresitene Sili ma le Korama a Aposetolo e Toasefululua. O sui auai uma o le Au Peresitene Sili ma le Korama a Aposetolo e Toasefululua o perofeta, tagatavaai, ma talifaaaliga. O i latou uma faatasi e avea ma Aufono a le Au Peresitene Sili ma le Korama a Aposetolo e Toasefululua. I lalo o le taitaiga a le Alii ma e ala i le leo autasi, ua i ai i lenei aufono le pule e tautino atu ai ma faamatalaina aoaoga faavae autu ma faavae aiaiga faavae mo le Ekalesia (tagai i le Mataupu Faavae ma Feagaiga 1:38; 107:27–31).

5.1.1.2

O Fitugafulu

O le tofi o le Fitugafulu i le Perisitua Mekisateko o loo ta’ua i le Feagaiga Tuai faapea foi ma le Feagaiga Fou (tagai i le Esoto 24:1, 9–10; Numera 11:16–17, 24–25; Luka 10:1, 17). I le taimi nei, o loo i ai Fitugafulu o le Pulega Aoao ma Fitugafulu Eria (tagai i le 5.2.2). Latou te galulue i lalo o ki ma le taitaiga a le Korama a Aposetolo e Toasefululua. Latou te lagolagosua i le Toasefululua i le fausiaina ma le faafoeina o le Ekalesia i malo uma (tagai i le Mataupu Faavae ma Feagaiga 107:34– 35, 38).

Au Peresitene o Fitugafulu. E toafitu uso auai o Fitugafulu e tofia e fai ma peresitene e pulefaamalumalu i sui auai uma o Fitugafulu. O se tasi o peresitene e toafitu e filifilia e pulefaamalumalu i le isi toaono. Ua aofia ai i latou i le Au Peresitene o Fitugafulu. (Tagai i le Galuega 6:2–6; Mataupu Faavae ma Feagaiga 107:93–94; 124:138.)

Fitugafulu o le Pulega Aoao. O Fitugafulu o le Pulega Aoao e tofia e le Au Peresitene Sili e avea ma molimau faapitoa o e molimau atu i le suafa o Iesu Keriso ma aoao atu le talalelei i le lalolagi uma (tagai i le Mataupu Faavae ma Feagaiga 107:25; 124:139).

O Fitugafulu o le Pulega Aoao e auauna atu i le taimi atoa i le Ekalesia. E masani ona faamalolo i latou i le tausaga e atoa i ai lo latou ta’i 70 tausaga le matutua ma tuu atu i ai le tulaga o le faamaloloina ma le mamalu. E ui ina latou umia pea le tofi o le Fitugafulu, ae latou te le toe pulefaamalumalu i ni sauniga.

Korama a Fitugafulu. O uso auai o Fitugafulu, e aofia ai ma Fitugafulu Eria, e faatulagaina i ni korama. O le Au Peresitene o Fitugafulu e pulefaamalumalu i nei korama. E mafai ona faatoateleina le aofaiga o uso o le Au Fitugafulu ma korama a Fitugafulu faatasi ma le faatupulaia o le Ekalesia. (Tagai i le Mataupu Faavae ma Feagaiga 107:95–96; 124:138–39).

5.1.1.3

Au Epikopo Pulefaamalumalu

O le Au Epikopo Pulefaamalumalu e aofia ai le Epikopo Pulefaamalumalu ma ona fesoasoani e toalua. O uso taitasi o le Au Epikopo Pulefaamalumalu, o se Pulega Aoao ma e umia le tofi o le epikopo. E tofia i latou e le Au Peresitene Sili ma e galulue i lalo o la latou taitaiga.

O le Au Epikopo Pulefaamalumalu e faatautaia mataupu faaletino, e pei o le uelefea, tupe, fale ma fanua, ma taumafaiga alofa mo tagata, mo le Ekalesia atoa (tagai i le Mataupu Faavae ma Feagaiga 107:68). Latou te aoao atu foi le talalelei ma fausia le malo o le Atua i le lalolagi atoa.

5.1.2

Taitai Aoao

O le Au Peresitene Sili e tofia tamaitai ma alii e fau ai Au Peresitene Aoao o faalapotopotoga nei a le Ekalesia:

• Aualofa

• Alii Talavou

• Tamaitai Talavou

• Peraimeri

• Aoga Sa

O nei Taitai Aoao e galulue i lalo o le taitaiga a le Au Peresitene Sili ma le Korama a Aposetolo e Toasefululua, ma Fitugafulu Pulega Aoao e tofia. E masani ona latou galulue mo le lima tausaga.

O Taitai Aoao e mafai ona i ai tiutetauave nei:

• E aoao atu ma molimau atu ia Iesu Keriso ma Lana talalelei.

• E avea ma sui auai o aufono aoao ma komiti a le Ekalesia e pei ona tofia ai.

• Faataunuu tofitofiga i le lalolagi atoa e auauna atu ai i tagata o le ekalesia.

• E tuuina atu le taitaiga mo mataupu aoaoina, polokalama, ma punaoa mo a latou faalapotopotoga.

• Tuuina atu le taitaiga i aufono o a latou faalapotopotoga masani (tagai i le isi parakalafa).

• Aoao ma lagolagosua i faufautua o faalapotopotoga i le eria, o e e galulue i lalo o le taitaiga a Au Peresitene o le Eria (tagai i le 5.2.5.1).

E mafai ona tofu faalapotopotoga aoao a le Ekalesia ma se aufono e lagolagosua i le Au Peresitene.

5.2

Taitaiga i le Eria

Ua faatulagaina le Ekalesia i eria i le faataatiaga faafaafanua ua soo ai le lalolagi atoa. O le vaega lenei o loo otooto atu ai le taitaiga a le Ekalesia i eria nei.

5.2.1

Au Peresitene o le Eria

I eria taitasi, e tofia i ai se Fitugafulu o le Pulega Aoao e le Au Peresitene Sili ma le Korama a Aposetolo e Toasefululua e avea ma Peresitene o le Eria. E toalua fesoasoani, o Fitugafulu o le Pulega Aoao po o ni Fitugafulu Eria e tofia e lagolagosua i le peresitene.

O le Au Peresitene o le Eria e pulefaamalumalu ma fefautuaai ma peresitene o siteki ma misiona i le eria. Latou te lagolagosua foi i peresitene o malumalu ma faatina. I le fefautuaai ai ma uso o le Korama a Aposetolo e Toasefululua ma le au Peresitene o Fitugafulu ia latou te lipoti atu i ai, latou te filima’otia pe faapefea ona faaaoga ia aiaiga faavae aoao ma le taitaiga a le Ekalesia e taulima ai manaoga i o latou eria.

E femalagaa’i ia sui auai o le Au Peresitene o le Eria i totonu o le eria e tofia i ai e auauna atu, aoao atu, ma faamalosiau i taitai i le lotoifale, faifeautalai, ma tagata o le Ekalesia. E tofia i latou e le Korama a Aposetolo e Toasefululua e pulefaamalumalu i konafesi faale-siteki ma isi fonotaga/sauniga.

5.2.2

Fitugafulu Eria

O Fitugafulu Eria e tofia e le Au Peresitene Sili e avea ma molimau faapitoa o e molimau atu i le suafa o Iesu Keriso ma aoao atu le talalelei i o latou eria ua tofia i ai (tagai i le Mataupu Faavae ma Feagaiga 107:25; 124:139). I le galulue ai i lalo o le taitaiga a le Au Peresitene o le Eria, latou te lagolagosua i le Toasefululua i le fausiaina ma le faafoeina o le Ekalesia i o latou eria.

O Fitugafulu Eria e le valaauina e auauna atu i le taimi atoa o le soifuaga. E masani ona latou auauna atu mo le lima tausaga. E masani ona tofia i latou e auauna atu i le faataatiaga faalefaafanua o le eria latou te nonofo ai (tagai i le Mataupu Faavae ma Feagaiga 107:38, 98). O Fitugafulu Eria e lagolagoina i konafesi aoao.

O Fitugafulu Eria taitasi e auai i se tasi o korama a Fitugafulu. O nei korama ua faatulaga e tusa ai ma le faataatiaga faalelaueleele. I le avea ai ma sui auai o nei korama, o Fitugafulu Eria e pulefaamalumalu ai le Au Peresitene o Fitugafulu.

O Fitugafulu Eria e galulue ma fefautuaai faatasi ma taitai o le Ekalesia i le lotoifale e fesoasoani ai ia i latou e faataunuu o latou tiutetauave. E mafai ona tofia ia Fitugafulu Eria e:

• Auauna atu i le aufono a le eria (tagai i le 5.2.3).

• Pulefaamalumalu i fonotaga a aufono faamaopoopo (tagai i le 5.2.4).

• Pulefaamalumalu i konafesi faale-siteki ma aoao ia taitai o siteki.

• Faavaea pe toefaatulaga ia siteki, vaetofia au peresitene fou o siteki, ma faaee atu ki i luga o le peresitene o le siteki.

• Faamaopoopoa tiutetauave i le eria atoa, e aofia ai gaoioiga (tagai i le 20.3.3), JustServe.org (i nofoaga o loo maua ai), toefaaleleia mai faalavelave faafuasei, po o isi tofiga.

• Malaga taamilo i misiona ma aoao taitai o misiona ma faifeautalai.

• Avea o se fesoasoani i le Au Peresitene o le Eria.

O Fitugafulu Eria e pulefaamalumalu i sauniga/fonotaga uma a le Ekalesia latou te auai ai i totonu o la latou eria sei vagana ai ua i ai se Pulega Aoao. Peitai, latou te le pulefaamalumalu i galuega mai lea aso i lea aso o le malumalu, misiona, po o peresitene o siteki. E galulue nei peresitene i lalo o le taitaiga a le Au Peresitene o le Eria.

5.2.3

Aufono a le Eria

I eria taitasi, e fono se aufono a le eria pe a manaomia (e masani e ta’i kuata) e faamaopoopo ai le galuega a le Atua mo le faaolataga ma le faaeaga i lo latou eria. E pulefaamalumalu le Au Peresitene o le Eria i le aufono a le eria. O lea aufono e aofia ai le Au Peresitene o le Eria ma Fitugafulu Eria o loo galulue ai i le eria. O isi e mafai ona auai ai i se vaega po o fonotaga uma foi a le aufono pe a manaomia ai ma pe a valaaulia ai e le Au Peresitene o le Eria.

5.2.4

Aufono Faamaopoopo

O le Au Peresitene o le Eria e faatuina fono faamaopoopo. O aufono taitasi e aofia ai siteki ma misiona patino i se eria. E tofia e le Au Peresitene o le Eria se Fitugafulu Eria e taitaia aufono taitasi.

O peresitene o siteki ma le misiona e auai i fonotaga faamaopoopo a aufono. O peresitene o malumalu e i totonu o itulagi o a latou malumalu i tuaoi o le aufono faamaopoopo e valaaulia e auai pe a talafeagai ai.

O isi e mafai ona auai ai i se vaega po o fonotaga uma pe a manaomia ai ma pe a valaaulia ai e le Fitugafulu Eria. E iloilo e Fitugafulu Eria le mamao, tulaga faale-aiga, ma femalagaā’iga pe a faia nei valaaulia.

O le faamoemoega o fonotaga a le aufono faamaopoopo o le fesoasoani lea i peresitene o siteki, misiona, ma malumalu e faaaoga ia ki o le perisitua i le lotogatasi. Latou te fefautuaai faatasi ma faamaopoopo ia taumafaiga e fesoasoani ai i tagata o le ekalesia i o latou tiutetauave e auai i le faatinoina o le galuega a le Atua mo le faaolataga ma le faaeaga.

E talo e le Fitugafulu Eria se fonotaga a le aufono faamaopoopo i le taimi lava e mae’a ai fonotaga taitasi faalekuata a le eria (tagai i le 29.4). E mafai ona fai ni fonotaga faaopoopo pe a manaomia.

5.2.5

Valaauga i le Eria

E mafai ona tofia e le Au Peresitene o le Eria ni tagata e galulue i valaauga i le eria e lagolagosua ai i le Au Peresitene o le Eria i o latou tiutetauave. O i latou e auauna atu i nei tofiga e valaauina ma vaetofia e se tasi o le Au Peresitene o le Eria po o se Fitugafulu Eria e tofia. E le tuuina atu i latou mo se palota lagolago.

O faataitaiga o valaauga i le eria e mafai ona aofia ai failautusi faapitoa o le eria, suetusi a le eria, faatonusili o fesootaiga i le eria, faufautua o le eria mo malumalu ma talafaasolopito o aiga, ma le faufautua o faalapotopotoga a le eria.

5.2.5.1

Faufautua o Faalapotopotoga a le Eria

I fafo atu o le Iunaite Setete ma Kanata, e mafai e Au Peresitene o Eria ona tofia ni tamaitai e avea ma faufautua o faalapotopotoga i eria. O nei faufautua e mafai ona fesoasoani e aoao faamasani ia au peresitene fou o Aualofa, Tamaitai Talavou, ma Peraimeri i siteki, i lalo o le taitaiga a au peresitene o siteki o nei taitai (tagai i le 6.2.1.6). O se tasi o le au peresitene o le siteki po o se fautua maualuga ua tofia e auai i lenei aoaoga faamasani.

O faufautua o eria e galulue i lalo o le taitaiga a o latou Au Peresitene o le Eria. Latou te mauaina foi faatonuga/aoaoga mai au peresitene aoao o faalapotopotoga. E masani ona latou auauna atu mo le tolu tausaga.