5.

Kinatibuk-an ug Area nga Pagpangulo

5.0

Pasiuna

Si Jesukristo mao ang “bato nga gisukaran” sa Iyang Simbahan (Mga Taga-Efeso 2:20). Siya ang naghupot sa tanang yawe sa pagkapari. Siya mitawag og apostoles ug mga propeta sa pagtabang sa buhat sa Dios sa kaluwasan ug kahimayaan. Gitugyan Niya niining pinili nga mga sulugoon ang tanang yawe nga may kalabotan karon sa gingharian sa Dios dinhi sa yuta. (Tan-awa sa Doktrina ug mga Pakigsaad 27:12–13; tan-awa usab sa 3.4.1 niini nga tamdanan nga basahon.)

Pinaagi sa mga propeta ug apostoles, ang Ginoo mitawag og mga lalaki ngadto sa katungdanan sa Seventy aron sa pagtabang sa Iyang buhat sa tibuok kalibotan (tan-awa sa Doktrina ug mga Pakigsaad 107:38). Agi og dugang, ang Tigdumalang Bishopric, Kinatibuk-ang mga Opisyal, ug ubang mga lider nga mga lalaki ug mga babaye gihatagan og importante nga mga responsibilidad sa pagtabang sa buhat.

Kini nga kapitulo naghulagway sa mga tahas sa kinatibuk-an ug area nga mga lider diha sa Simbahan.

5.1

Kinatibuk-ang Pagpangulo sa Simbahan

Ang kinatibuk-ang pagpangulo sa Simbahan naglakip sa Kinatibuk-ang mga Awtoridad ug Kinatibuk-ang mga Opisyal. Ang pulong nga kinatibuk-an nagpasabot nga ang awtoridad ug mga responsibilidad kalabot sa mga calling dili limitado sa hiyograpikanhon nga mga utlanan. Kadtong kinsa naghupot niini nga mga calling mogiya, motudlo, ug mangalagad ngadto sa mga miyembro sa Simbahan sa tibuok kalibotan.

Kini nga seksiyon nagtingob sa mga tahas sa Kinatibuk-ang mga Awtoridad, Kinatibuk-ang mga Opisyal, ug sa mga konseho ug mga komitiba diin sila magserbisyo.

5.1.1

Kinatibuk-ang mga Awtoridad

5.1.1.1

Unang Kapangulohan ug Korum sa Napulog Duha ka Apostoles

Presidente sa Simbahan. Sukad sa karaang mga panahon, ang Ginoo migiya sa Iyang katawhan pinaagi sa mga propeta (tan-awa sa Amos 3:7; Mga Taga-Efeso 4:11–13). Ang Presidente sa Simbahan usa ka propeta, manalagna, ug tigpadayag. Siya usab ang senior nga Apostol. Ubos sa direksyon sa Ginoo, siya nagdumala sa Simbahan ug mao lamang ang tawo sa yuta nga gitugotan nga mogamit sa tanang yawe sa pagkapari (tan-awa sa Mateo 16:16–19; tan-awa usab sa 3.4.1.1 niini nga tamdanan nga basahon). Siya adunay awtoridad nga modawat og pagpadayag ug mopahayag sa kabubut-on sa Dios alang sa tibuok Simbahan. (Tan-awa sa Doktrina ug mga Pakigsaad 43:2–3; 107:91–92; 128:11.)

Unang Kapangulohan. Pinaagi sa Presidente sa Simbahan, ang Ginoo motawag og mga magtatambag aron sa pagtabang sa buhat. Ang Presidente ug ang iyang mga magtatambag mao ang “tulo nga Nagdumalang mga High Priest … [kinsa] mao ang korum sa Kapangulohan sa Simbahan” (Doktrina ug mga Pakigsaad 107:22). Kini nga korum gitawag nga ang Unang Kapangulohan. Ang mga sakop sa Unang Kapangulohan mao ang mga Apostoles ug sa ingon mao ang “linain nga mga saksi” sa ngalan ni Jesukristo (Doktrina ug mga Pakigsaad 107:23). Ang Unang Kapangulohan nagdumala ug naggiya sa tanang kalihokan sa Simbahan.

Si Pedro, Santiago, ug Juan maoy nagtuman niini nga tahas sa karaan nga Simbahan. Kauban sila sa Manluluwas sa pipila ka sagrado nga mga okasyon ug nakadawat sa mga yawe sa gingharian. (Tan-awa sa Mateo 16:18–19; 17:1–5; Marcos 14:32–42; Doktrina ug mga Pakigsaad 27:12–13; 81:1–2.)

Kon ang Presidente sa Simbahan mamatay, ang Unang Kapangulohan mapapas. Ang mga magtatambag mobalik ngadto sa ilang pwesto sa pagka-senior sulod sa Korum sa Napulog Duha ka Apostoles. Ubos sa direksyon sa senior nga Apostol, ang Korum sa Napulog Duha mangulo sa Simbahan. Isip usa ka korum, ilang ikonsiderar kanus-a i-organisar pag-usab ang Unang Kapangulohan. Human magkahiusa sa desisyon, ang senior nga Apostol ordinahan isip ang bag-o nga Presidente sa Simbahan ug motawag sa iyang mga magtatambag.

Korum sa Napulog Duha ka Apostoles. Sa karaan, si Jesukristo mitawag sa napulog duha ka Apostoles aron motabang sa paggiya sa Iyang Simbahan (tan-awa sa Lucas 6:12–13; Mga Taga-Efeso 4:11–13; 1 Nephi 13:40). Sa atong panahon, ang Ginoo motawag sa mga lalaki pinaagi sa Presidente sa Simbahan nga ordinahan isip Apostoles ug moserbisyo diha sa Korum sa Napulog Duha ka Apostoles (tan-awa sa Doktrina ug mga Pakigsaad 18:26–28). Kini nga korum molihok ubos sa direksyon sa Unang Kapangulohan sa pagpalig-on ug pagdumala sa Simbahan sa tanan nga mga nasod (tan-awa sa Doktrina ug mga Pakigsaad107:33). Ang mga sakop sa Napulog Duha mopahayag sa ebanghelyo ngadto sa tibuok kalibotan (tan-awa sa Mateo 28:19–20; Doktrina ug mga Pakigsaad 107:35).

Ang matag Apostol naghupot sa tanang yawe sa gingharian ug mogamit niini nga mga yawe ubos sa direksyon sa Presidente sa Simbahan (tan-awa sa Doktrina ug mga Pakigsaad 112:30–32). Ang Napulog Duha ka Apostoles mao ang “linain nga mga saksi” sa ngalan ni Jesukristo (Doktrina ug mga Pakigsaad 107:23; tan-awa usab sa 27:12). Sila mosaksi ngadto sa tibuok kalibotan sa Iyang pagkabalaan ug pagkatinuod sa Iyang Pagkabanhaw (tan-awa sa Mga Buhat 1:8, 22; 4:33; Doktrina ug mga Pakigsaad 76:22–24).

Ang Apostoles full-time nga moserbisyo sa Simbahan sa nahibilin nilang kinabuhi (tan-awa sa Mateo 4:18–22).

Ang Konseho sa Unang Kapangulohan ug Korum sa Napulog Duha ka Apostoles. Ang tanang sakop sa Unang Kapangulohan ug Korum sa Napulog Duha ka Apostoles mga propeta, mga manalagna, ug mga tigpadayag. Silang tanan mao ang Konseho sa Unang Kapangulohan ug Korum sa Napulog Duha ka Apostoles. Ubos sa direksyon sa Ginoo ug pinaagi sa nagkahiusa nga tingog, kini nga konseho adunay awtoridad sa pagpahayag ug paghubad sa doktrina ug pag-establisar sa polisiya alang sa Simbahan (tan-awa sa Doktrina ug mga Pakigsaad 1:38; 107:27–31).

5.1.1.2

Ang Seventy

Ang katungdanan sa Seventy diha sa Melchizedek nga Pagkapari gihisgotan sa Daan ug Bag-ong Tugon (tan-awa sa Exodo 24:1, 9–10; Numeros 11:16–17, 24–25; Lucas 10:1, 17). Karon, adunay Kinatibuk-ang Awtoridad nga mga Seventy ug mga Area Seventy (tan-awa sa 5.2.2). Sila molihok ubos sa mga yawe ug direksyon sa Korum sa Napulog Duha ka Apostoles. Sila motabang sa Napulog Duha sa pagpalig-on ug pagdumala sa Simbahan sa tanang nasod (tan-awa sa Doktrina ug mga Pakigsaad 107:34–35, 38).

Kapangulohan sa Seventy. Pito ka sakop sa Seventy tawagon isip mga presidente aron modumala sa tanang sakop sa Seventy. Ang usa sa pito ka presidente pilion aron modumala sa laing unom. Sila naglangkob sa Kapangulohan sa Seventy. (Tan-awa sa Mga Buhat 6:2–6; Doktrina ug mga Pakigsaad 107:93–94; 124:138.)

Kinatibuk-ang Awtoridad nga mga Seventy. Ang Kinatibuk-ang Awtoridad nga mga Seventy tawagon sa Unang Kapangulohan aron mahimong linain nga mga saksi kinsa magpamatuod sa ngalan ni Jesukristo ug motudlo sa ebanghelyo sa tibuok kalibotan (tan-awa sa Doktrina ug mga Pakigsaad 107:25; 124:139).

Ang Kinatibuk-ang Awtoridad nga mga Seventy full-time nga moserbisyo diha sa Simbahan. Sila sa kasagaran i-release sa tuig nga sila mag-edad og 70 anyos ug hatagan og emeritus nga estado. Bisan og magpabilin ang katungdanan sa pagka-Seventy, dili na sila makadumala sa mga miting.

Korum sa Seventy. Ang mga sakop sa Seventy, lakip ang mga Area Seventy, giorganisar ngadto sa mga korum. Ang Kapangulohan sa Seventy modumala niini nga mga korum. Ang gidaghanon sa mga sakop sa Seventy ug sa mga korum sa Seventy mahimong dugangan kuyog sa pagtubo sa Simbahan. (Tan-awa sa Doktrina ug mga Pakigsaad 107:95–96; 124:138–39).

5.1.1.3

Tigdumalang Bishopric

Ang Tigdumalang Bishopric naglangkob sa Tigdumalang Bishop ug sa iyang duha ka magtatambag. Ang matag sakop sa Tigdumalang Bishopric usa ka Kinatibuk-ang Awtoridad ug naghupot sa katungdanan nga bishop. Sila gitawag sa Unang Kapangulohan ug maglihok ubos sa ilang direksyon.

Ang Tigdumalang Bishopric mangalagad sa temporal nga mga butang, sama sa welfare, mga panalapi, pisikal nga mga pasilidad, ug makatawhanon nga mga paningkamot, alang sa tibuok Simbahan (tan-awa sa Doktrina ug mga Pakigsaad 107:68). Sila usab motudlo sa ebanghelyo ug molig-on sa gingharian sa Dios sa tibuok kalibotan.

5.1.2

Kinatibuk-ang mga Opisyal

Ang Unang Kapangulohan motawag og mga babaye ug mga lalaki aron maporma ang Kinatibuk-ang mga Kapangulohan sa mosunod nga mga organisasyon sa Simbahan:

• Relief Society

• Young Men

• Young Women

• Primary

• Sunday School

Kining Kinatibuk-ang mga Opisyal moserbisyo ubos sa direksyon sa Unang Kapangulohan, sa Korum sa Napulog Duha ka Apostoles, ug sa gisangonan nga Kinatibuk-ang Awtoridad nga mga Seventy. Sila sa kasagaran moserbisyo sulod sa lima ka tuig.

Ang Kinatibuk-ang mga Opisyal aduna sa mosunod nga mga responsibilidad:

• Motudlo ug mopamatuod mahitungod ni Jesukristo ug sa Iyang ebanghelyo.

• Moserbisyo isip mga sakop sa kinatibuk-ang mga konseho ug mga komitiba sa Simbahan kon gisangonan.

• Motuman sa mga buluhaton sa tibuok kalibotan sa pagpangalagad sa mga miyembro.

• Mohatag og giya alang sa kurikulom, mga programa, ug mga kapanguhaan alang sa ilang mga organisasyon.

• Mohatag og giya sa ilang mga konseho sa kinatibuk-ang organisasyon (tan-awa sa sunod nga parapo).

• Motudlo ug mosuporta sa mga tigtambag sa organisasyon sa area, kinsa moserbisyo ubos sa direksyon sa mga Kapangulohan sa Area (tan-awa sa 5.2.5.1).

Ang matag kinatibuk-ang organisasyon sa Simbahan mahimong adunay konseho nga motabang sa Kapangulohan.

5.2

Pagpangulo sa Area

Ang Simbahan giorganisar ngadto sa hiyograpikanhong mga dapit nga molukop sa tibuok kalibotan. Kini nga seksiyon nagtingob sa pagpangulo sa Simbahan niini nga mga dapit.

5.2.1

Kapangulohan sa Area

Sa matag dapit, ang usa ka Kinatibuk-ang Awtoridad nga Seventy sangonan sa Unang Kapangulohan ug sa Korum sa Napulog Duha ka Apostoles aron moserbisyo isip Presidente sa Area. Duha ka mga magtatambag, kinsa mga Kinatibuk-ang Awtoridad nga Seventy, ang sangonan sa pagtabang sa presidente.

Ang Kapangulohan sa Area modumala ug motambag sa mga presidente sa stake ug misyon sa dapit. Sila mosuporta usab sa mga presidente ug matron sa templo. Sa pagpakitambag sa mga sakop sa Korum sa Napulog Duha ka Apostoles ug sa Kapangulohan sa Seventy diin sila mo-report, sila motino unsaon sa paggamit sa kinatibuk-ang palisiya ug direksyon sa Simbahan aron matubag ang mga panginahanglan sa ilang dapit.

Ang mga sakop sa Kapangulohan sa Area mobiyahe sulod sa gisangon nga dapit nga pangalagaran, sa pagtudlo, ug pag-awhag sa lokal nga mga lider, mga misyonaryo, ug mga miyembro sa Simbahan. Sila sangonan sa Korum sa Napulog Duha ka Apostoles sa pagdumala og mga komperensiya sa stake ug ubang mga miting.

5.2.2

Mga Area Seventy

Ang mga Area Seventy gitawag sa Unang Kapangulohan aron mahimong linain nga mga saksi kinsa mopamatuod sa ngalan ni Jesukristo ug motudlo sa ebanghelyo sa gisangon nilang mga dapit (tan-awa sa Doktrina ug mga Pakigsaad 107:25; 124:139). Naglihok ubos sa direksyon sa Kapangulohan sa Area, sila motabang sa Napulog Duha sa pagpalig-on ug pagdumala sa Simbahan sa ilang dapit.

Ang mga Area Seventy dili tawagon ngadto sa full-time nga pagserbisyo. Sila sa kasagaran moserbisyo sulod sa lima ka tuig. Sila sa kasagaran sangonan sa pagserbisyo sa hiyograpikanhong dapit diin sila magpuyo (tan-awa sa Doktrina ug mga Pakigsaad 107:38, 98). Ang mga Area Seventy paluyohan sa kinatibuk-ang komperensiya.

Ang matag Area Seventy nahisakop sa korum sa Seventy. Kini nga mga korum giorganisar pinaagi sa hiyograpiya. Isip mga sakop niini nga korum, ang mga Area Seventy dumalahon sa Kapangulohan sa Seventy.

Ang mga Area Seventy makigtambayayong ug makigtambag sa lokal nga mga lider sa Simbahan aron sa pagtabang kanila nga matuman ang ilang mga responsibilidad. Ang mga Area Seventy mahimong sangonan sa:

• Pagserbisyo sa konseho sa area (tan-awa sa 5.2.3).

• Pagdumala sa mga miting sa coordinating council (tan-awa sa 5.2.4).

• Pagdumala sa mga komperensiya sa stake ug motudlo sa mga lider sa stake.

• Paghimo o pag-organisar og mga stake, pag-set apart og bag-ong mga kapangulohan sa stake, ug sa pagtugyan sa mga yawe diha sa presidente sa stake.

• Pagpakigsabot sa mga responsibilidad sa tibuok area, lakip sa mga kalihokan (tan-awa sa 20.3.3), JustServe.org (kon anaa), aron maulian gikan sa katalagman, o ubang mga buluhaton.

• Pagsuroy sa mga misyon ug pagtudlo sa mga lider ug mga misyonaryo sa misyon.

• Pagserbisyo isip magtatambag sa Kapangulohan sa Area.

Ang mga Area Seventy modumala sa tanang miting sa Simbahan nga ilang tambongan sulod sa ilang dapit gawas kon adunay Kinatibuk-ang Awtoridad. Hinoon, sila modumala sa inadlaw-adlaw nga buhat sa mga presidente sa templo, misyon, o sa stake. Kini nga mga presidente moserbisyo ubos sa direksyon sa Kapangulohan sa Area.

5.2.3

Konseho sa Area

Sa matag dapit, ang konseho sa area magmiting kon gikinahanglan (kasagaran matag tulo ka bulan) sa pagpakigsabot sa buhat sa Dios sa kaluwasan ug kahimayaan sa ilang dapit. Ang Kapangulohan sa Area modumala sa konseho sa area. Kini nga konseho naglangkob sa Kapangulohan sa Area ug sa mga Area Seventy nga nagserbisyo sa dapit. Ang uban mahimong motambong sa bahin o sa tanan nga mga miting sa konseho kon gikinahanglan ug kon gidapit sa Kapangulohan sa Area.

5.2.4

Coordinating Council

Ang Kapangulohan sa Area moestablisar sa mga coordinating council. Ang matag konseho naglakip sa piho nga mga stake ug mga misyon sa usa ka dapit. Ang Kapangulohan sa Area mosangon og usa ka Area Seventy sa pagpangulo sa matag konseho.

Ang mga presidente sa stake ug misyon motambong sa mga miting sa coordinating council. Ang mga presidente sa templo kansang mga distrito sa templo anaa sa sulod sa mga utlanan sa coordinating council gidapit sa pagtambong kon praktikal.

Ang uban mahimong motambong sa bahin o sa tanan nga mga miting kon gikinahanglan ug kon gidapit sa Area Seventy. Ang mga Area Seventy mokonsiderar sa gilay-oan, sirkumstansiya sa pamilya, ug ang pagbiyahe kon mohimo niini nga mga pagdapit.

Ang katuyoan sa mga miting sa coordinating council mao ang pagtabang sa mga presidente sa stake, misyon, ug sa templo nga mogamit sa mga yawe sa pagkapari diha sa panaghiusa. Sila magtinambagay ug magsabot sa mga paningkamot sa pagtabang sa mga miyembro sa ilang mga responsibilidad sa pag-apil sa buhat sa Dios sa kaluwasan ug kahimayaan.

Ang Area Seventy mopatawag og miting sa coordinating council human dayon sa matag tulo ka bulan nga miting sa konseho sa area (tan-awa sa 29.4). Dugang nga mga miting mahimong himoon kon gikinahanglan.

5.2.5

Mga Calling sa Area

Ang Kapangulohan sa Area mahimong motawag og mga miyembro nga moserbisyo sa mga calling sa area aron sa pagtabang sa Kapangulohan sa Area sa ilang mga responsibilidad. Kadtong nagserbisyo niini nga mga katungdanan tawagon ug i-set apart sa usa ka sakop sa Kapangulohan sa Area o sa usa ka gisangonan nga Area Seventy. Sila dili paluyohan.

Ang mga ehemplo sa mga calling sa area maglakip sa usa ka executive secretary sa area, auditor sa area, direktor sa komunikasyon sa area, tigtambag sa area sa templo ug family history, ug tigtambag sa organisasyon sa area.

5.2.5.1

Mga Tigtambag sa Organisasyon sa Area

Sa gawas sa Estados Unidos ug Canada, ang mga Kapangulohan sa Area mahimong motawag og mga babaye nga moserbisyo isip mga tigtambag sa organisasyon sa area. Kini nga mga tigtambag motabang sa pag-orient ug pagtudlo sa bag-ong mga kapangulohan sa Relief Society, Young Women, ug Primary sa stake, ubos sa direksyon sa mga kapangulohan sa stake niini nga mga lider (tan-awa sa 6.2.1.6). Usa ka sakop sa kapangulohan sa stake o usa ka gisangonan nga high councilor ang moapil niini nga orientation.

Ang mga tigtambag sa Area moserbisyo ubos sa direksyon sa ilang Kapangulohan sa Area. Sila usab makadawat og regular nga instruksiyon gikan sa kinatibuk-ang mga kapangulohan sa organisasyon. Sila sa kasagaran moserbisyo sulod sa tulo ka tuig.