8.

Korum sa mga Elder

8.1

Katuyoan ug Organisasyon

Ang Melchizedek nga Pagkapari nagtabang sa mga anak sa Dios nga mangandam sa pagbalik ngadto sa Iyang presensya. Kini naghupot “sa mga yawe sa tanan nga espirituhanon nga mga panalangin sa simbahan” (Doktrina ug mga Pakigsaad 107:18).

Ang mga katungdanan sa Melchizedek nga Pagkapari mao ang elder, high priest, patriyarka, Seventy, ug Apostol. Kini nga kapitulo naglakip sa impormasyon mahitungod sa mga elder ug sa mga korum sa mga elder.

8.1.1

Katuyoan

Ang takos nga mga lalaki nga 18 ug pataas mahimong modawat sa Melchizedek nga Pagkapari ug i-orden ngadto sa katungdanan sa elder. Ang usa ka lalaki nga gi-orden ngadto niana nga katungdanan misulod ngadto sa usa ka sagrado nga pakigsaad sa pagtabang sa Dios sa pagtuman sa Iyang buhat (tan-awa sa Doktrina ug mga Pakigsaad 84:33–44).

Ang matag elder kabahin sa usa ka naorganisar nga grupo sa mga naghupot sa pagkapari nga gitawag og korum sa mga elder. Ang mga sakop sa korum sa mga elder magtambayayong sa pagtabang sa pagtuman sa buhat sa Dios sa kaluwasan ug kahimayaan. Sila moserbisyo sa uban, motuman sa mga katungdanan sa pagkapari, molig-on sa panaghiusa, ug magkat-on ug mosunod sa doktrina.

8.1.2

Pagkasakop diha sa Korum sa mga Elder

Ang matag ward adunay korum sa mga elder. Kini naglakip sa mosunod nga kaigsoonan:

• Tanang elder diha sa ward.

• Tanang umaabot nga mga elder diha sa ward (tan-awa sa 8.4).

• Ang tanang high priest diha sa ward, gawas niadtong kinsa kasamtangan nga nagserbisyo sa kapangulohan sa stake, sa bishopric, o sa high council, o isip usa ka patriyarka. Kini nga mga lider mga sakop sa korum sa mga high priest sa stake. Alang sa impormasyon mahitungod sa korum sa mga high priest sa stake, tan-awa sa 6.2.1.1.

Ang usa ka batan-ong lalaki mahimong magsugod sa pagtambong sa mga miting sa korum sa mga elder kon siya mag-edad og 18, bisan kon wala pa siya ma-orden nga usa ka elder. Siya magpakitambag sa iyang mga ginikanan ug sa bishop sa paghimo niini nga desisyon. Sa edad nga 19 o kon mobalhin gikan sa panimalay aron moeskwela sa unibersidad o moserbisyo og misyon, siya kinahanglang i-orden nga usa ka elder kon siya takos. Tan-awa sa 10.6.

Ang minyo nga mga lalaki nga ubos sa 18 mga umaabot nga mga elder ug mga sakop usab sa korum sa mga elder.

Alang sa impormasyon mahitungod sa wala makasal nga mga ginikanan nga ubos sa edad nga 18, tan-awa sa 38.1.5.

8.1.3

Pagpahiangay ngadto sa Lokal nga mga Panginahanglan

Ang pipila ka ward adunay daghan kaayo nga aktibong mga naghupot sa Melchizedek nga Pagkapari. Alang niini nga mga ward, ang kapangulohan sa stake mahimong moorganisar og dugang nga mga korum sa mga elder (tan-awa sa Doktrina ug mga Pakigsaad 107:89). Ang matag korum adunay iyang kaugalingong kapangulohan. Kon posible, ang matag korum kinahanglan adunay mga sakop sa nagkalain-laing mga edad ug kasinatian.

8.2

Pag-apil sa Buhat sa Dios sa Kaluwasan ug Kahimayaan

Ang Dios nagdapit sa tanan nga moduol ngadto ni Kristo ug moapil diha sa Iyang buhat sa kaluwasan ug kahimayaan pinaagi sa:

• Pagsunod sa ebanghelyo ni Jesukristo.

• Pag-atiman niadtong nanginahanglan.

• Pagdapit sa tanan nga modawat sa ebanghelyo.

• Paghiusa sa mga pamilya alang sa kahangtoran.

Ang mga lider sa korum sa mga elder magplano og mga miting, mga kalihokan, pagpangalagad, pagserbisyo sa Dominggo ug ubang mga inter-aksiyon aron sa pagtabang sa kaigsoonan nga mga lalaki nga moapil sa buhat sa Dios sa kaluwasan ug kahimayaan. Ang mga sakop sa korum sa mga elder ug sa Relief Society maghiusa sa pagtabang nga matuman kini nga buhat.

Alang sa dugang nga impormasyon mahitungod sa buhat sa Dios sa kaluwasan ug kahimayaan, tun-i ang kapitulo 1.

8.2.1

Pagsunod sa Ebanghelyo ni Jesukristo

Ang mga lider sa korum sa mga elder mosuporta sa mga sakop sa pagsunod sa ebanghelyo ni Jesukristo. Sila mohatag og gibug-aton sa paggamit og hugot nga pagtuo, paghinulsol, pagpalambo sa pagbarog pinaagi sa kinaugalingong paningkamot, ug paghimo og mga pakigsaad uban sa Dios pinaagi sa pagdawat og mga ordinansa. Ang maong mga ordinansa naglakip sa pagtuga sa templo. Tan-awa sa 1.2.1.

8.2.1.1

Pagkat-on sa Ebanghelyo diha sa Panimalay

Kon ang mga miyembro magkat-on ug magsunod sa ebanghelyo diha sa panimalay, ang ilang pagkakabig ngadto sa Langitnong Amahan ug ni Jesukristo molig-on. Ang mga lider sa korum sa mga elder moawhag sa kaigsoonan nga mga lalaki sa pagtuon sa mga kasulatan ug sa mga pulong sa buhing mga propeta, sa tinagsa ug uban sa ilang mga pamilya. Ang Dali, Sunod Kanako ug ubang mga kapanguhaan makadugang sa ilang pagtuon.

Ang mga home evening importante nga paagi sa pagkat-on sa ebanghelyo diha sa panimalay. Kini sa kasagaran himoon sa matag semana sa Dominggo, sa gabii sa Lunes, o sa laing panahon. Kini maglakip sa mga pag-ampo, pagtuon sa ebanghelyo, mga pagpamatuod, pagpanganta, ug makalingaw nga mga kalihokan.

8.2.1.2

Pagkat-on sa Ebanghelyo diha sa mga Miting sa Korum

Ang mga korum sa mga elder magmiting sa mga Dominggo alang sa mosunod nga mga katuyoan:

• Paglig-on sa hugot nga pagtuo.

• Paglig-on sa panaghiusa.

• Paglig-on sa mga pamilya ug mga panimalay.

• Pagpakigsabot bahin sa mga paningkamot sa pagtabang sa Dios sa Iyang buhat sa kaluwasan ug kahimayaan diha sa ward.

Ang mga miting pagahimoon sa ikaduha ug ikaupat nga mga Dominggo sa bulan. Kini molungtad og 50 ka minuto. Ang kapangulohan sa korum sa mga elder moplano niini nga mga miting. Usa ka sakop sa kapangulohan ang mopahigayon.

Ang miting sugdan sa pag-ampo. Dayon ang usa ka sakop sa kapangulohan modumala sa mga sakop sa korum sa pagtinambagay sulod sa lima ngadto sa napulo ka minuto mahitungod sa may kalabotan nga mga hagit, mga panginahanglan, ug mga oportunidad. Ang pagtutok diha sa Manluluwas niini nga pakigtambag makatabang sa mga sakop sa korum sa pagpalig-on sa mga pagpamatuod, pagdawat sa mga ordinansa sa templo, pagtuman sa mga pakigsaad, ug pagpalambo sa pagkadisipulo. Ang kapangulohan sa korum sa mga elder mopili og mga hilisgotan nga angay nga hisgotan sa pakigtambag base sa mga panginahanglan sa mga sakop sa korum.

Igong panahon kinahanglan dayon nga igahin sa makahuloganong panudlo ug panaghisgotan sa ebanghelyo. Kinahanglang motutok diha sa mga hilisgotan sa usa o daghang mga pakigpulong gikan sa labing bag-o nga kinatibuk-ang komperensiya. Ang kapangulohan sa korum sa mga elder mainampoong mopili og mga mensahe sa komperensiya aron hisgotan sa mga sakop sa korum. Sila mohimo niini nga mga pagpili base sa mga panginahanglan sa mga sakop.

Ang mga himno mahimong kantahon sa pagpalambo og usa ka leksiyon.

Ang mga miting kinahanglan nga taposon uban sa usa ka pag-ampo.

Ang korum sa mga elder ug ang Relief Society mahimong magtipon usahay alang sa usa ka leksiyon sa Dominggo. Kini nga mga miting pakigsabotan sa bishopric ug sa mga kapangulohan sa korum sa mga elder ug sa Relief Society.

Alang sa dugang nga impormasyon, tan-awa sa “To Sit in Council.”

8.2.1.3

Mga Kalihokan

Ang mga kapangulohan sa korum sa mga elder mahimong magplano og mga kalihokan. Ang presidente ang modumala sa mga kalihokan. Siya mahimong mohangyo sa usa ka magtatambag o laing sakop sa korum sa pagpangulo sa pagplano ug paghimo niini (tan-awa sa 8.3.5). Ang mga kapangulohan mohisgot og mga kalihokan uban sa bishop isip kabahin sa ilang pagplano.

Ang mga kalihokan kinahanglang makapalig-on sa mga tinguha sa mga sakop sa korum sa paghimo ug pagtuman sa mga pakigsaad ug makahatag nila og mga oportunidad sa pagpundok ug pagtambayayong sa pagserbisyo. Ang mga kalihokan kinahanglang makatabang nga matuman ang mga katuyoan sa mga korum sa mga elder (tan-awa sa 8.1 ug 8.1.1).

8.2.2

Pag-atiman Niadtong Nanginahanglan

Isip mga sumusunod ni Jesukristo, ang mga sakop sa korum sa mga elder adunay responsibilidad sa pagtabang pinaagi sa gugma ngadto niadtong nanginahanglan. Sa tinagsa man ug isip usa ka korum, sila mangita og mga paagi sa pagserbisyo sa uban diha sa ward ug sa komunidad. Kon anaa, ang JustServe.org nagsugyot og mga oportunidad sa pagserbisyo diha sa komunidad.

Alang sa dugang nga impormasyon kon sa unsang paagi nga ang mga sakop sa korum sa mga elder ug Relief Society moatiman niadtong nanginahanglan, tan-awa sa 22.6.2.

8.2.2.1

Pagpangalagad

Ang pagpangalagad mao ang pag-atiman sa uban sama sa buhaton sa Manluluwas. Ang mga sakop sa korum sa mga elder modawat og mga buluhaton sa pagpangalagad gikan sa kapangulohan sa korum. Alang sa dugang nga impormasyon, tan-awa sa kapitulo 21.

8.2.2.2

Mubo og Tagal nga mga Panginahanglan

Ang tigpangalagad nga mga igsoong lalaki magtinguha sa pagsabot ug motubag sa mga panginahanglan niadtong ilang giserbisyohan. Ang mga miyembro tingali manginahanglan og mubo og tagal nga tabang sa mga panahon nga masakit, manganak, mamatyan, mawad-an og trabaho, ug ubang mga sirkumstansiya.

Kon gikinahanglan, ang tigpangalagad nga mga igsoong lalaki mangayo og tabang sa kapangulohan sa korum sa mga elder. Uban sa pagtugot sa bishop, ang kapangulohan mahimong motawag og usa ka service coordinator sa pag-organisar niini nga mga paningkamot (tan-awa sa 8.3.5).

Ang korum sa mga elder ug ang Relief Society magsabot sa mga paningkamot aron sa pagtubag sa mubo og tagal nga mga panginahanglan (tan-awa sa 22.3.2). Ang bishop mahimong mohatag og tabang gikan sa halad sa puasa kon gikinahanglan.

Sa pipila ka dapit, ang mga bishop adunay opsiyon sa paghatag sa mga miyembro nga nanginahanglan og bishop’s order alang sa pagkaon ug ubang nag-unang mga panginahanglan. Ang bishop kasagaran mosangon sa presidente sa Relief Society nga makigkita sa mga miyembro ug mosulat sa porma sa pag-order. Hinoon, siya usab mahimong mosangon sa presidente sa korum sa mga elder. Ang usa ka magtatambag sa Relief Society o kapangulohan sa korum sa mga elder mahimong sangonan kon ang presidente dili makahimo. Ang gisangonan nga lider mosumiter sa nakompleto nga porma ngadto sa bishop alang sa iyang pagtugot.

Alang sa dugang nga impormasyon, tan-awa sa 22.6.2 ug sa “Welfare Resources” diha sa Leader and Clerk Resources.

8.2.2.3

Taas og Tagal nga mga Panginahanglan ug Pagbarog pinaagi sa Kinaugalingong Paningkamot

Sumala sa gisabotan sa bishop, ang mga kapangulohan sa korum sa mga elder ug Relief Society motabang sa mga miyembro nga dunay taas og tagal nga mga panginahanglan ug pagbarog pinaagi sa kinaugalingong paningkamot. Sila motudlo sa mga baroganan sa temporal ug espirituwal nga pagbarog pinaagi sa kinaugalingong paningkamot. Tan-awa sa kapitulo 22 ug “Pagpaningkamot sa Kaugalingon” diha sa Gospel Library nga app.

Kon ang usa ka tawo o pamilya nagkinahanglan og tabang, ang mga presidente sa korum sa mga elder ug Relief Society magtinambagay, sumala sa gisabotan sa bishop, mahitungod kon unsaon sa pagtabang (tan-awa sa 22.4).

Ang presidente sa korum sa mga elder, ang presidente sa Relief Society, o laing lider motabang sa tawo o pamilya sa pagpalambo og Plano sa Pagbarog pinaagi sa Kinaugalingong Paningkamot. Ang tigpangalagad nga mga igsoong lalaki ug mga igsoong babaye makatabang usab sa plano. Sa kasagaran, ang ubang mga sakop sa korum sa mga elder o Relief Society adunay mga kahanas o kasinatian nga makatabang. Ang tanang motabang motratar sa impormasyon nga kompidensiyal. Alang sa dugang nga impormasyon, tan-awa sa 22.3.3 ug 22.8.

8.2.2.4

Kon ang usa ka Miyembro sa Ward Mamatay

Kon ang usa ka miyembro sa ward mamatay, ang mga kapangulohan sa korum sa mga elder ug Relief Society mohatag og kahupayan ug tabang. Ubos sa giya sa bishop, sila makatabang sa lubong.

Kon posible, ang namatay nga mga miyembro kinsa natugahan ilubong o sunogon nga gisul-oban sa sinina sa templo. Ang lawas sa usa ka lalaki mahimong sul-oban sa iyang asawa o sa usa ka natugahan nga lalaki nga sakop sa pamilya. Kon ang usa ka sakop sa pamilya wala o dili gustong mosul-ob sa sinina ang bishop mohangyo sa presidente sa korum sa mga elder sa pagdapit sa usa ka natugahan nga lalaki sa pagsinina sa lawas o sa pagdumala sa pagsul-ob sa sinina. Alang sa dugang nga impormasyon, tan-awa sa 38.5.10.

Ang mga kapangulohan sa korum sa mga elder ug Relief Society, tigpangalagad nga mga igsoong lalaki ug mga igsoong babaye, ug ang uban magpadayon sa paghatag og kahupayan ug tabang human sa seremonya sa lubong.

8.2.3

Pagdapit sa Tanan nga Modawat sa Ebanghelyo

Ang mga naghupot sa Melchizedek nga Pagkapari adunay katungdanan sa pagdapit sa tanan nga modawat sa mga panalangin sa ebanghelyo ni Jesukristo (tan-awa sa Doktrina ug mga Pakigsaad 53:3). Sila mohimo niini pinaagi sa pagpakigbahin sa ebanghelyo, pagpalig-on sa bag-ong mga miyembro, ug pagtabang niadtong dili kaayo aktibo. Tan-awa sa 23.2 ug 23.3.

Sa mga miting sa kapangulohan ug korum, ang kapangulohan sa korum sa mga elder mohisgot og mga paagi nga ang mga kaigsoonan nga mga lalaki makadapit sa tanan sa pagdawat sa mga panalangin sa ebanghelyo. Tan-awa sa 23.1.1, 23.1.2, ug 23.1.3.

Ang presidente sa korum sa mga elder mosangon sa usa ka sakop sa kapangulohan sa pagtabang sa pagpangulo sa mga paningkamot sa pagpaambit sa ebanghelyo diha sa ward. Siya makigtambayayong uban sa gisangonan nga sakop sa kapangulohan sa Relief Society sa pagpakigsabot niini nga mga paningkamot (tan-awa sa 23.6.2).

Kini nga sakop sa kapangulohan sa korum sa mga elder mahimong motuman sa tahas sa lider sa misyon sa ward. Kon ang bishopric mitawag og lider sa misyon sa ward, kini nga sakop sa kapangulohan modumala sa iyang buhat. Tan-awa sa 23.6.1 ug 23.6.3.

Ang lider sa misyon sa ward, kinsa tingali usa ka sakop sa kapangulohan sa korum sa mga elder, mangulo sa senimana nga mga miting sa pagpakigsabot. Ang katuyoan niini nga mga miting mao ang pagpakigsabot sa pagdapit sa tanan nga modawat sa mga panalangin sa ebanghelyo. Kini nga mga miting maglakip sa gisangonan nga sakop sa kapangulohan sa Relief Society ug korum sa mga elder, sa mga misyonaryo sa ward, usa ka kaabag sa korum sa mga priest, usa ka sakop sa kapangulohan sa labing edaran nga klase sa Young Women, ug sa full-time nga mga misyonaryo. Tan-awa sa 23.4.

8.2.4

Paghiusa sa mga Pamilya alang sa Kahangtoran

Ang mga naghupot sa Melchizedek nga Pagkapari nagsuporta sa mga miyembro sa paghiusa sa mga pamilya alang sa kahangtoran. Kini naglakip sa:

• Paghimo og mga pakigsaad uban sa Dios pinaagi sa pagdawat og mga ordinansa, lakip na sa pagtuga sa templo.

• Paghimo sa buhat sa templo ug family history (tan-awa sa 1.2.4).

Sa mga miting sa kapangulohan ug sa korum, ang kapangulohan sa korum sa mga elder mohisgot og mga paagi nga ang kaigsoonan nga mga lalaki makaapil niini nga mga paningkamot.

Ang mga sakop sa kapangulohan magplano usab og mga paagi sa pagtabang sa mga miyembro nga madugangan ang ilang pagsabot ug tinguha sa pagdawat og sagrado nga mga ordinansa ug mohimo og mga pakigsaad uban sa Dios diha sa templo. Awhagon nila ang kaigsoonan sa pagsimba sa templo kanunay kon posible.

Ang kapangulohan moawhag sa mga sakop sa korum nga magkat-on mahitungod sa ilang family history. Sila motabang sa bag-o ug mibalik nga mga miyembro, bag-ong naordinahan nga mga elder, ug sa bag-ong gitawag nga mga misyonaryo sa pagpangita ug pag-andam sa mga ngalan sa katigulangan alang sa mga ordinansa sa templo.

Ang presidente sa korum sa mga elder mosangon sa usa ka sakop sa kapangulohan sa pagtabang sa pagpangulo sa buhat sa templo ug family history diha sa ward. Siya makigtambayayong uban sa gisangonan nga sakop sa kapangulohan sa Relief Society sa pagpakigsabot niini nga mga paningkamot.

Kini nga sakop sa kapangulohan sa korum sa mga elder mahimong mobuhat sa tahas sa lider sa ward alang sa templo ug family history. Kon ang bishopric mitawag og lider sa templo ug family history, kini nga sakop sa kapangulohan modumala niini nga buhat. Tan-awa sa 25.2.2.

Ang lider sa ward alang sa templo ug family history, kinsa tingali usa ka sakop sa kapangulohan sa korum sa mga elder, mangulo sa mga miting sa pagpakigsabot alang sa templo ug family history (tan-awa sa 25.2.7). Kini nga mga miting pagahimoon kanunay. Sila usab molakip sa gisangonan nga sakop sa kapangulohan sa Relief Society, usa ka kaabag sa korum sa mga priest, usa ka sakop sa kapangulohan sa labing edaran nga klase sa Young Women, ug sa mga consultant sa templo ug family history.

8.3

Mga Lider sa Korum sa mga Elder

8.3.1

Kapangulohan sa Stake ug Bishop

Ang presidente sa korum sa mga elder mao ang direkta nga responsable ngadto sa kapangulohan sa stake. Siya makigmiting kanunay uban sa usa ka sakop sa kapangulohan aron modawat og direksyon ug mo-report kalabot sa iyang mga responsibilidad.

Ang presidente sa korum sa mga elder modawat usab og giya gikan sa bishop, kinsa mao ang tigdumalang opisyal diha sa ward. Sila magmiting kanunay. Hisgotan nila ang ilang mga paningkamot sa buhat sa Dios sa kaluwasan ug kahimayaan, lakip sa pagserbisyo sa tigpangalagad nga mga igsoong lalaki. Sila usab maghisgot (1) sa kauswagan ug mga panginahanglan sa mga miyembro sa ward ug sa (2) mga miting, instruksiyon, ug mga kalihokan sa korum sa mga elder.

8.3.2

High Councilor

Ang kapangulohan sa stake mosangon og usa ka high councilor nga morepresentar nila sa matag korum sa mga elder. Ang iyang mga responsibilidad gilatid diha sa 6.5.

8.3.3

Kapangulohan sa Korum sa mga Elder

8.3.3.1

Pagtawag og usa ka Kapangulohan sa Korum sa mga Elder

Human mokonsulta sa bishop, ang presidente sa stake motawag og usa ka elder o high priest nga moserbisyo isip presidente sa korum sa mga elder.

Kon ang yunit may igong gidak-on, ang presidente sa korum sa mga elder morekomendar ngadto sa presidente sa stake og usa o duha ka elder o high priest nga moserbisyo isip iyang mga magtatambag. Siya mobuhat niini pinaagi sa pagkonsulta sa bishop. Ang kapangulohan sa stake mokonsiderar sa mga rekomendasyon. Usa ka sakop sa kapangulohan sa stake o high council mohatag sa mga tawag.

Ang tanang mga rekomendasyon sa pagtawag og mga sakop sa mga kapangulohan sa korum sa mga elder magkinahanglan og pagtugot sa kapangulohan sa stake ug high council.

Usa ka sakop sa kapangulohan sa stake ang mopresentar sa mga sakop sa kapangulohan sa korum sa mga elder diha sa panagtigom alang sa sakramento alang sa pagpaluyo. Ang kapangulohan sa stake mahimo usab nga mosangon og high councilor sa pagbuhat niini.

Usa ka sakop sa kapangulohan sa korum sa mga elder ang mopresentar sa kaigsoonan nga gitawag ngadto sa ubang mga calling sa korum alang sa pagpaluyo diha sa miting sa korum (tan-awa sa 8.3.4 ug 8.3.5).

Ang presidente sa stake mo-set apart sa presidente sa korum sa mga elder ug motugyan kaniya sa mga yawe sa iyang calling. Alang sa dugang nga impormasyon mahitungod sa mga yawe sa pagkapari, tan-awa sa 3.4.1. Ang usa ka sakop sa kapangulohan sa stake o high council mo-set apart sa mga magtatambag.

8.3.3.2

Mga Responsibilidad

Ang presidente sa korum sa mga elder aduna sa mosunod nga mga responsibilidad. Ang iyang mga magtatambag moabag kaniya.

• Moserbisyo diha sa konseho sa ward. Siya moserbisyo isip (1) usa ka sakop sa konseho kinsa motabang sa pagtubag sa mga panginahanglan diha sa ward ug sa pagpangita og mga kasulbaran ug (2) usa ka representante sa korum sa mga elder (tan-awa sa 29.2.5).

• Mogiya sa mga paningkamot sa korum sa pag-apil sa buhat sa Dios sa kaluwasan ug kahimayaan (tan-awa sa kapitulo 1).

• Moorganisar ug modumala sa pagserbisyo sa tigpangalagad nga mga igsoong lalaki. Makigsabot sa mga buluhaton sa pagpangalagad uban sa kapangulohan sa Relief Society, magmiting dili mominos matag tulo ka bulan. Mangayo sa pagtugot sa bishop alang sa mga buluhaton sa pagpangalagad. Mopahigayon og mga interbiyo sa pagpangalagad dili mominos matag tulo ka bulan. Tan-awa sa kapitulo 21.

• Ubos sa giya sa bishop, mopakigtambag uban sa hamtong nga mga miyembro sa ward (tan-awa sa 31.1 ug 31.3). Ang bishop lamang ang motambag sa mga miyembro sa ward mahitungod sa mga butang kabahin sa katakos, pag-abuso, ug pagtugot sa paggamit sa mga pundo sa halad sa puasa. Tan-awa sa Mga Kapanguhaan sa Pagtambag. Alang sa impormasyon mahitungod sa abuso, tan-awa sa 38.6.2.

• Uban sa kapangulohan sa Relief Society, motabang sa pagpangulo sa mga paningkamot diha sa ward sa pagdapit sa tanan nga modawat sa mga panalangin sa ebanghelyo (tan-awa sa 8.2.3 ug 9.2.3). Modumala sa lider sa misyon sa ward kon dunay gitawag.

• Uban sa kapangulohan sa Relief Society, motabang sa pagpangulo sa buhat sa templo ug family history diha sa ward (tan-awa sa 8.2.4 ug 9.2.4). Modumala sa lider sa templo ug family history alang sa ward kon dunay gitawag.

• Makigsabot sa mga paningkamot sa korum sa mga elder sa paglig-on sa kaigsoonan nga mga lalaki nga young adult, dili minyo ug minyo. Usa ka magtatambag mahimong sangonan sa pagserbisyo uban sa mga young single adult (tan-awa sa 14.1.2.2).

• Makigmiting sa matag indibidwal nga sakop sa korum dili mominos makausa sa usa ka tuig. Maghisgot sa mga katungdanan sa pagkapari ug sa kaayohan sa miyembro ug sa iyang pamilya.

• Motudlo sa mga sakop sa korum sa ilang mga katungdanan sa pagkapari (tan-awa sa Doktrina ug mga Pakigsaad 107:89). Kini naglakip sa pagtudlo kanila unsaon paggamit sa pagkapari sa pagpahigayon sa mga ordinansa ug mga panalangin.

• Motabang sa mga sakop sa korum nga makasabot sa gahom, proteksiyon, direksiyon, kamaya, ug kalinaw nga moabot gikan sa pagpalambo og relasyon pinaagi sa pakigsaad uban sa Langitnong Amahan ug ni Jesukristo.

• Modumala ug motabang sa pagpalambo sa pagtudlo diha sa korum (tan-awa sa kapitulo 17).

• Moplano ug mopahigayon og mga miting sa korum.

• Modumala sa mga kalihokan sa korum sa mga elder (tan-awa sa 8.2.1.3).

• Motabang sa mga batan-ong lalaki ug sa umaabot nga mga elder nga mangandam sa pagdawat sa Melchizedek nga Pagkapari (tan-awa sa 8.4).

• Modumala sa mga rekord, sa mga report, ug sa mga panalapi sa korum (tan-awa sa LCR.ChurchofJesusChrist.org). Ang usa ka secretary makatabang (tan-awa sa 8.3.4).

Ang kapangulohan sa stake ug ang gisangonan nga mga sakop sa high council motudlo sa kapangulohan sa korum sa mga elder mahitungod niini nga mga responsibilidad. Sila mahimong mobuhat niini atol sa mga miting sa pagpangulo sa pagkapari sa stake ug sa mga miting sa kapangulohan sa korum, ug personal nga mga pagbisita sa mga presidente sa korum sa mga elder (tan-awa sa 29.3.3).

Pinaagi sa iyang pagserbisyo, ang presidente sa korum sa mga elder nagsuporta sa bishop sa pagtutok sa kabatan-onan ug sa talagsaong mga responsibilidad sa bishop.

8.3.3.3

Miting sa Kapangulohan

Ang kapangulohan sa korum sa mga elder ug ang secretary magmiting kanunay. Ang presidente mopahigayon niini nga mga miting. Ang high councilor nga gisangonan ngadto sa korum motambong matag karon ug unya.

Ang mga hisgotanan mahimong maglakip sa mosunod nga mga aytem:

• Magplano unsaon sa paglig-on sa mga sakop sa korum, (lakip sa umaabot nga mga elder) ug sa ilang mga pamilya.

• Magplano unsaon sa pagtabang nga matuman ang buhat sa Dios sa kaluwasan ug kahimayaan.

• Makigsabot sa misyonaryo nga buhat ug sa buhat sa templo ug family history.

• Motuman sa tambag ug mga buluhaton gikan sa bishop ug sa mga lider sa stake.

• Motuman sa mga buluhaton gikan sa mga miting sa konseho sa ward.

• Mainampoong mokonsiderar sa mga buluhaton sa pagpangalagad.

• Morebyo sa impormasyon gikan sa mga interbiyo sa pagpangalagad. Moplano og mga paagi sa pag-ila sa mga kalig-on ug motabang sa pagtubag sa mga panginahanglan. (Tan-awa sa kapitulo 21.)

• Mokonsiderar og kaigsoonan nga mga lalaki nga moserbisyo sa mga calling ug mga buluhaton.

• Moplano og mga miting ug mga kalihokan sa korum.

8.3.4

Secretary

Uban sa pagtugot sa bishop, ang usa ka sakop sa kapangulohan sa korum sa mga elder mahimong motawag og sakop sa korum nga mahimong secretary sa korum. Siya mopresentar kaniya alang sa pagpaluyo diha sa usa ka miting sa korum ug mo-set apart kaniya.

Ang mga responsibilidad sa secretary mahimong maglakip sa mosunod:

• Moandam og mga hisgotanan alang sa mga miting sa kapangulohan ug sa mga miting sa korum.

• Mosulat sa gihisgotan diha sa mga miting ug mosubay sa mga buluhaton.

• Mo-eskedyul og mga interbiyo sa pagpangalagad (tan-awa sa 21.3).

• Moandam ug mosumiter sa matag tulo ka bulan nga mga report sa nanambong ug sa gidaghanon sa gipahigayon nga mga interbiyo sa pagpangalagad.

• Motabang sa pag-andam og tinuig nga badyet ug mosubay sa mga galastohan.

8.3.5

Dugang nga mga Calling

Ang mosunod nga dugang nga mga calling mahimong makatabang. Ang bishop ug ang presidente sa korum sa mga elder maghisgot kon kini gikinahanglan ba.

• Mga magtutudlo sa korum sa mga elder nga motudlo diha sa mga miting sa korum sa Dominggo

• Usa ka service coordinator aron motabang sa pagplano ug pagpaabot sa serbisyo ngadto sa mga tawo nga nanginahanglan (tan-awa sa 8.2.2.2). Mga kaabag ug mga sakop sa komitiba mahimo usab nga tawagon.

• Usa ka activity coordinator aron motabang sa pagplano ug pagpahigayon sa mga kalihokan sa korum sa mga elder (tan-awa sa 8.2.1.3). Mga kaabag ug mga sakop sa komitiba mahimo usab nga tawagon.

• Kaabag nga mga secretary aron motabang sa secretary sa korum sa mga elder

• Tigpangalagad nga mga secretary aron moorganisar sa mga interbiyo sa pagpangalagad ug motabang sa pag-andam sa matag tulo ka bulan nga mga report

Kon kini o ubang mga calling gikinahanglan, ang kapangulohan sa korum sa mga elder morekomendar og kaigsoonan nga moserbisyo. Sila mohimo niini nga mga rekomendasyon ngadto sa bishopric. Kon ang bishopric motugot, ang usa ka sakop sa kapangulohan sa korum motawag kanila. Siya mopresentar kanila alang sa pagpaluyo diha sa usa ka miting sa korum ug mo-set apart kanila.

Kon gikinahanglan, ang kapangulohan sa korum sa mga elder mahimong mosangon sa kaigsoonan nga mga lalaki sa pagtabang sa mga paningkamot sa korum sa mga elder sa ubang mga paagi. Ang kaigsoonan nga mga lalaki nga adunay mubo og tagal nga mga buluhaton dili kinahanglan nga tawagon ug i-set apart.

8.4

Pagtabang sa Umaabot nga mga Elder nga Mangandam sa Pagdawat sa Melchizedek nga Pagkapari

Ang umaabot nga elder usa ka lalaki nga miyembro sa Simbahan kinsa wala makadawat sa Melchizedek nga Pagkapari ug (1) nag-edad og 19 o pataas o (2) mas bata pa sa 19 ug minyo na.

Ang pagtabang sa umaabot nga mga elder nga mangandam sa pagdawat sa Melchizedek nga Pagkapari mao ang usa sa labing taas nga mga prayoridad sa kapangulohan sa korum. Ang kapangulohan naghatag sa umaabot nga mga elder og mga oportunidad sa pagserbisyo ug sa pagpakigbahin sa ilang mga kalig-on. Ang mahalaron nga tigpangalagad nga mga igsoong lalaki kinahanglang sangonan ngadto sa umaabot nga mga elder.

Ang kapangulohan sa korum ug ang tigpangalagad nga mga igsoong lalaki motudlo sa umaabot nga mga elder mahitungod sa:

• Ang panumpa ug pakigsaad sa pagkapari (tan-awa sa Doktrina ug mga Pakigsaad 84:33–44).

• Mga katungdanan sa usa ka elder, lakip sa katungdanan sa pagpangalagad (tan-awa sa Doktrina ug mga Pakigsaad 20:38–45; 42:44; 107:11–12). Ang umaabot nga mga elder kinsa mga teacher o mga priest makaserbisyo isip tigpangalagad nga mga igsoong lalaki.

• Ang mga katuyoan sa mga ordinansa ug mga panalangin sa pagkapari ug unsaon sa pagpahigayon niini (tan-awa sa kapitulo 18).

• Giunsa sa mga lalaki ug mga babaye sa pagpakigtambayayong aron sa pagtuman sa buhat sa Dios.

Alang sa impormasyon mahitungod niini nga mga hilisgotan, tan-awa sa “Melchizedek Priesthood [Melchizedek nga Pagkapari],” “Priesthood [Pagkapari],” ug “Women in the Church” (Topics and Questions, topics.ChurchofJesusChrist.org).

Kini nga instruksiyon mahitabo sa tinagsa o diha sa usa ka klase nga gihimo nga lahi sa naandan nga mga miting sa Dominggo.

Kon matino na sa bishop ug sa presidente sa stake nga ang usa ka umaabot nga elder andam ug takos, siya mahimong i-orden nga usa ka elder diha sa Melchizedek nga Pagkapari.

8.5

Mga Miyembro nga adunay mga Kakulangan

Ang kapangulohan sa korum sa mga elder mohatag og pihong pag-atiman ngadto sa mga miyembro nga adunay mga kakulangan. Alang sa impormasyon mahitungod sa pagtabang niini nga mga miyembro, tan-awa sa disability.ChurchofJesusChrist.org; tan-awa usab sa 38.8.27 niini nga tamdanan nga basahon.