8.

Doulul eo an Elder ro

8.1

Un eo im Doulul eo

Melkisedek Priesthood eo ej jipan̄ ajri ro nejin Anij kōppopo n̄an jepļaakļo̧k n̄an Ippān. Ej kabwijer “ki ko an aolep kōjeraam̧m̧an ko ilo jetōb an kabun̄ in” (Katak im Bujen Ko 107:18).

Opiij ko ilo Melkisedek Priesthood rej elder, pris eo eutiej, petriak, Jijilimjuonn̄oul, im Rijilōk. Jebta in epād ie meļeļe ko n̄an ritōl ro an elder ro im doulul ko an em̧m̧aan ro.

8.1.1

Jibadbad

Em̧m̧aan ro 18 aer iiō lōn̄lōk im rej mour erreo remaron̄ bōk Melkisedek Priesthood im ekkapit n̄an opiij eo an elder. Juon em̧m̧aan ej ekkapit n̄an opiij eo ej deļōn̄e juon bujen ekwojarjar n̄an jipan̄ Anij ilo kōttōprak jerbal eo An (lale Katak im Bujen Ko 84:33–44).

Kajjojo elder ej m̧ōttan kurup in rikabwijer priesthood ro me em̧ōj kar ejaake me ņa etan doulul eo an elder ro. Ro uwaan doulul eo an elder ro rej jerbal ippān doon n̄an jipan̄ kōtōprak jerbal in lo̧mo̧o̧r eo an Anij im mour ijo eutiej tata. Rej jipan̄ ro jet, kakūrm̧ool eddo ko an priethood, kalōk bōro kuk, im ekkatak im mour kōn katak eo.

8.1.2

Ro uwaan Doulul eo an Elder ro

Kajjojo ward ewōr juon doulul an elder ro ie. Ekoba em̧m̧aan rein rej elaajrak:

• Aolep elder ro ilo ward eo.

• Aolep em̧m̧aan ro rej jan̄in ekkapit n̄an elder ilo ward (lale 8.4).

• Aolep pris ro reutiej ilo ward eo, ijjelo̧kin ro rej kiiō jerbal ilo juon stake būreejtōnji, ilo juon bisoprik, ilo juon high ko̧o̧njeļ, ak āinwōt juon petriak. Ritōl rein rej membōr ro an doulul eo an pris ro reutiej ilo stake. N̄an meļeļe ko kōn doulul eo an pris ro reutiej an stake, lale 6.2.1.1.

Juon likao ej jino pād ilo kweilo̧k ko an doulul eo an elder ro n̄e ejejjet 18 an iiō, men̄e ejjan̄in kar ekkapit n̄an erom̧ juon elder. Ej kapilōk ippān ro jinen im jemān im bisop eo n̄an kōm̧m̧an kāālet in. Ilo iiō ņe 19 ak n̄e em̧m̧akūt jān m̧weo, n̄an an etal im jikuuļ ilo university ak etal im mijen, ej aikuj ekkapit n̄an juon elder eļan̄n̄e ej mour erreo. Lale 10.6.

Em̧m̧aan ro em̧ōj aer m̧are me rej laļ in 18 iiō rej em̧m̧aan ro rejjan̄in ekkapit n̄an Elder im rej barāinwōt membōr ro uwaan doulul eo an elder ro.

N̄an meļeļe ko kōn m̧am̧a im baba ro rejjan̄in m̧are ilaļ in 18 iiō, lale 38.1.5.

8.1.3

Ukukōti pedped wōt ioon Menin Aikuj ko an Jikin eo

Jet ward eļap oran rikabwijer Melkisedek Priesthood ro reniknik ie. N̄an ward kein, stake būreejtōnji eo emaron̄ ejaake bar juon doulul an em̧m̧aan ro (lale Katak im Bujen Ko 107:89). Kajjojo doulul ewōr an make būreejtōnji. Eļan̄n̄e ekkar, kajjojo doulul ej aikuj wōr membōr ro me eoktak iiō ko aer jān doon im kapāāl.

8.2

Bōk Koņaad ilo Jerbal in Lo̧mo̧o̧r eo an Anij im Mour Ijo Eutiej Tata

Anij ej kūr aolep n̄an itok n̄an Kraist im bōk kuņaan ilo jerbal in lo̧mo̧o̧r eo an Anij im mour ijo eutiej tata kōn:

• Mour kōn gospel eo an Jisōs Kraist.

• Kea kōn ro rej aikuj.

• Karuwaineneik aolep n̄an bōk gospel eo.

• Kakobaik baam̧le ko n̄an mour indeeo.

Ritōl ro an doulul eo an elder ro rej karōk kweilo̧k ko an Jabōt, m̧akūtkūt ko, jerbal in karejar, jerbal in jipan̄, im ippān doon ko jet n̄an jipan̄ em̧m̧aan ro bōk koņaer ilo jerbal in lo̧mo̧o̧r eo an Anij im mour ijo eutiej tata. Ro uwaan doulul eo an elder ro im Doulul eo an Kōrā ro rej jerbal ilo bōro kuk n̄an kōtōbrak jerbal in.

N̄an meļeļe ko reļļapļo̧k ikkijeen jerbal in lo̧mo̧o̧r eo an Anij im mour ijo eutiej tata, ekkatak jebta 1.

8.2.1

Mour kōn Gospel eo an Jisōs Kraist

Ritōl ro an doulul eo an elder ro rej rie membōr ro ilo aer mour kōn gospel eo an Jisōs Kraist. Rej kwaļo̧k aorōk in kōmmoururi tōmak ko, ukweļo̧k, kōļapļo̧k un̄n̄are peid make, im kōm̧m̧ani bujen ko ippān Anij ilo ad bōk kain̄i ko. Kain̄i ko jet ekoba menin letok kwojarjar ko an tampeļ. Lale 1.2.1.

8.2.1.1

Ekkatak kōn Gospel ilo M̧ōko

N̄e membōr ro rej ekkatak im mour kōn gospel eo ilo m̧ōko m̧wer, oktak in mour ko aer n̄an Jemedwōj Ilan̄ im Jisōs Kraist ej m̧wūlaļļo̧k. Ritōl ro an doulul eo an elder ro rej kōketak em̧m̧aan ro n̄an ekkatak jeje ko rekwojarjar im naan ko an rikanaan ro remour, kajjojo armej im baam̧le ko aer. Itok, Ļoor Eō im kein jipan̄ ko jet remaron̄ jipan̄ ekkatak eo aer.

Nokon in Jota ko rej juon wāween eaorōk n̄an ekkatak kōn gospel eo ilo m̧ōko. Ekkā aer kōm̧m̧an kajjojo wiik ilo Jabōt, ilo joteen in M̧ande, ak ilo bar juon iien. Remaron̄ kobaik jar ko, ekkatak kōn gospel eo, naan in kam̧ool ko, al, im m̧akūtkūt in kalimomo ko.

8.2.1.2

Ekkatak kōn Gospel eo ilo Kweilo̧k ko an doulul eo an elder ro

Doulul ko an em̧m̧aan ro rej kweilo̧k ilo Jabōt ko kōn un kein rej elaajrak:

• Kōkajoorļo̧k tōmak.

• Kalōk bōro kuk.

• Kōkajoorļo̧k baam̧le ko im m̧ōko.

• Kejeikiik jerbal ko n̄an jipan̄ jerbal in lo̧mo̧o̧r im mour indreo an Anij ilo ward eo.

Kweilo̧k ko rej kōm̧m̧an ilo Jabōt ruo im emān ilo kajjojo allōn̄. 50 minit aeitokan. Būreejtōnji eo an doulul eo an elder ro rej karōk kweilo̧k kein. Juon membōr in būreejtōnji eo ej kōjeikiki.

Kweilo̧k eo ej ijjino kōn jar. Innem juon membōr in būreejitōnji eo ej tōl douluul eo an em̧m̧aan ro ilo kapilōk ippen doon ium̧win ļalem minit ko kōn apan̄ ko rejelet armej, aikuij ko, im iien jipan̄ ko rem̧m̧an . Pedped ioon Rilo̧mo̧o̧r eo ilo iien kapilōk enaaj jipan̄ ro uwaan douluul eo an em̧m̧aan ro kōkajoorļo̧k naan in kam̧ool ko aer, bōk kain̄i ko an tampeļ, im kaļapļo̧k jerbal in karejar. Būreejitōnji eo an doulul eo an em̧m̧aan ro ej kālet unin tōl ko n̄an kenono kaki pedped ioon aikuij ko an doulul eo an em̧m̧aan ro.

Iien ko rebwe rej jerbal n̄an kōmeļeļe in katak ko an gospel eo im ekkōnono ko. Kweilo̧k ko an doulul ej mije wōt unin kōnono ko ilo juon ak ruo ekkōnono ko jān kweilo̧k eo eļap im ekāāl tata. Būreejitōnji eo an doulul eo an em̧m̧aan ro ej jar kake n̄an kālet enaan ko jān kwelo̧k eo eļap n̄an an ro uwaan douluul eo kenono kaki. Rej kōm̧m̧ani kālet ko pedped ioon aikuij ko an membōr ro.

Al al in jar ko n̄an kōkm̧anm̧an im kōļapļo̧k juon katak.

Kweilo̧k ko rej aikuj jem̧ļo̧k kōn jar.

Doulul eo an Elder ro im Doulul eo an Kōrā ro remaron̄ emakijkij aer koba ippen doon n̄an katak ilo Jabōt. Kwelo̧k kein rej karōk jān bisprik im būreejitōnji ro an doulul eo an em̧m̧aan im Kōrā ro.

N̄an meļeļe ko reļļapļo̧k, lale “To Sit in Council.”

8.2.1.3

M̧akūtkūt ko

Būreejtōnji ko an doulul eo an elder ro remaron̄ karōk m̧akūtkūt ko. Būreejitōn eo ej eddoik aolep m̧akitkit ko. Emaron̄ kajjitōk ippān juon rikakpilōklōk ak bar juon membōr in doulul eo n̄an bōk tōl eo n̄an karōki im kōm̧m̧ani (lale 8.3.5). Būreejtōnji eo ej ekkōnono kōn m̧akūtkūt ko ippān bisop eo āinwōt m̧ōttan ļo̧k karōk ko aer.

Aolep m̧akitkit ko rej aikuij kōkajoor kōtōpar ko an ro uwaan douluul eo an em̧m̧aan im n̄an kōm̧m̧an im kejparok bujen ko im leļo̧k iien em̧m̧an n̄an aer kuk tok im jerbal ippen doon. Aolep m̧akitkit ko rej jipan̄ kōtōpar ko an doulul eo an elder ro. (lale 8.1 im 8.1.1).

8.2.2

Kea kōn Ro Riaikuj

Āinwōt rikaļoor ro an Jisōs Kraist, ro uwaan doulul eo an elder ro ewōr juon aer eddo n̄an tōpar ro rej aikuj ilo iakwe. Kajjojo armej im āinwōt juon doulul, rej kappukot wāween ko n̄an jipan̄ ro jet ilo ward im jukjukin pād eo. Ijo ewōr ie, JustServe.org ej elmakot e iien ko rem̧m̧an n̄an jipan̄ ilo jukjukin pād ko.

N̄an meļeļe ko reļļapļo̧k kōn wāween an membōr ro ilo doulul eo an elder ro im Doulul eo an Kōrā ro kōjparok ro rej pād ilo aikuj, lale 22.6.2.

8.2.2.1

Jerbal in Karejar

Jerbal in karejar ej kea kōn ro jet āinwōt an nej kar Rilo̧mo̧o̧r kea. Membōr ro ilo doulul eo an elder ro rej bōk ijjitōn ko ikkijeen jerbal in karejar jān būreejtōnji eo an doulul eo. N̄an meļeļe ko reļļapļo̧k, lale jebta 21

8.2.2.2

Aikuj ko ilo Juon iien Ekadu Kitien

Rikarejar m̧aan ro jeiū ak jatū rej kappukot n̄an meļeļe im tōpar aikuj ko an ro rej jipan̄ er. Membōr ro remaron̄ aikuj jipan̄ ilo juon iien ekadu kitien ilo iien nan̄inmej, ļotak, mej, luuji jerbal, im jekjek ko jet.

Eļan̄n̄e emenin aikuj, rikarejar m̧aan ro jeid ak jatid rej kajjitōk ippān būreejtōnji eo an doulul eo an elder ro n̄an jipan̄. Kōn mālim eo an bisop, būreejtōnji eo emaron̄ kūr juon service coordinator n̄an karōk ak peek kijejeto kein (lale 8.3.5).

Doulul eo an elder ro im Doulul eo an Kōrā ro rej kōttōbalbal kijejeto ko n̄an ņa mejļan aikuj ko ekadu kitier (lale 22.3.2). Bisop eo emaron̄ letok jipan̄ jān joortak in jitlo̧k ko eļan̄n̄e emenin aikuj.

Ilo bar jet jikin, ewōr an bisop eo maron̄ n̄an kāālet n̄an leļo̧k jipan̄ n̄an membōr ro ilo an kōm̧m̧ane wōrtōr eo an ikkijeen m̧ōn̄ā im aikuj ko jet. Bisop eo ekkā an jitōn̄ būreejtōn eo an Doulul eo an Kōrā ro n̄an loļo̧k membōr ro bwe ren kanne peba in wōrtōr eo. Ijoke, emaron̄ barāinwōt jitōn̄ būreejtōn eo an doulul eo an elder ro. Juon rikakpilōklōk ilo Doulul eo an Kōrā ro ak būreejtōnji eo an doulul eo an elder ro remaron̄ jitōn̄ er eļan̄n̄e būreejtōn eo ejjab maron̄ pād. Ritōl eo em̧ōj jitōn̄e ej leļo̧k peba in kanne eo em̧ōj kanne n̄an bisop eo n̄an kōweppāne.

N̄an meļeļe ko reļļapļo̧k, lale 22.6.2 im “Welfare Resources” ilo Leader and Clerk Resources.

8.2.2.3

Aikuj ko ilo juon iien Eaitok Kitien im Un̄n̄are Peid Make

Āinwōt kar kōtōbalbale jān bisop eo, būreejtōnji ko an doulul eo an elder ro im Doulul eo an Kōrā ro rej jipan̄ membōr ro kōn aikuj ko aer ilo juon iien eaitok kitier im un̄n̄are peid make. Rej katakin pedped ko an un̄n̄are peid make ilo kanniōk im jetōb. Lale jebta 22 im “Self-Reliance” ilo Gospel Library app.

Eļan̄n̄e juon armej ak baam̧le ej aikuj jipan̄, doulul eo an elder ro im Doulul eo an Kōrā ro rej ko̧o̧njeļ ippān doon, āinwōt kar kōtōbalbale jān bisop eo, kōn wāween n̄an jipan̄ (lale 22.4).

Būreejtōn eo an doulul eo an elder ro, būreejtōn eo an Doulul eo an Kōrā ro, ak bar jet ritōl rej jipan̄ armej eo ak baam̧le eo ejaake juon Self-Reliance Plan. Rikarejar m̧aan im kōrā ro jeid im jatid remaron̄ bar jipan̄ kōn karōk in. Ekkā, membōr ro jet an Doulul eo an Kōrā ro ak doulul eo an elder ro ewōr aer kapeel ak imminene ko me emaron̄ jipan̄. Aolep ro rej jipan̄ dāpij meļeļe ilo ittino̧. N̄an meļeļe ko reļļapļo̧k, lale 22.3.3 im 22.8.

8.2.2.4

N̄e juon Ward Membōr Emej

N̄e juon ward membōr emej, būreejtōnji eo an doulul eo an elder im Doulul eo an Kōrā ro rej leļo̧k kaenōm̧m̧an im jipan̄. Ium̧win tōl eo an bisop eo, remaron̄ jipan̄ kōn ilomej eo.

N̄e emaron̄, membōr ro remej ro rekar bōk menin letok kwojarjar rej kallūb ak ittil ilo nuknuk in tampeļ. Ānbwinin em̧m̧aan eo maron̄ kanuknuki jān kōrā eo pāleen ak jān juon em̧m̧aan uwaan baam̧le eo me em̧ōj an bōk menin letok kwojarjar eo. Eļan̄n̄e ejjeļo̧k juon uwaan baam̧le eo ej pād ak kāālet n̄an jab kanukuni, bisop eo emaron̄ kajjitōk ippān būreejtōn eo an dolulul eo an elder ro n̄an kajjitōk ippān juon em̧m̧aan em̧ōj an bōk menin letok kwojarjar eo n̄an kanuknuk ānbwin eo ak lale aer kanuknuki. N̄an meļele ko reļļapļo̧k, lale 38.5.10.

Būreejtōnji eo an doulul eo an elder ro im Doulul eo an Kōrā ro, rikarejar m̧aan im kōrā jeid im jatid, im ro jet rej wōnm̧aanļo̧k wōt n̄an leļo̧k kaenōm̧m̧an im jipan̄ ālkin ilomej eo.

8.2.3

Karuwaineneik Aolep n̄an Bōk Gospel eo

Rikabwijer Melkisedek Priesthood eo ewōr an eddo n̄an karuwaineneik aolep n̄an bōk kōjeraam̧m̧an ko an gospel eo an Jisōs Kraist (lale Katak im Bujen Ko 53:3). Rej kōm̧m̧an menin ilo aer kwaļo̧k gospel eo, kōkajoorļo̧k membōr ro rekāāl, im loļo̧k ro eto aer bar jar. Lale 23.2 im 23.3.

Ilo kweilo̧k ko an būreejtōnji im doulul ko, būreejtōnji an doulul eo an elder ro rej ekkōnono kōn wāween ko me em̧m̧aan ro remaron̄ bōk kōjeraam̧m̧an ko an gospel eo. Lale 23.1.1, 23.1.2, im 23.1.3.

Būreejtōn eo an doulul eo an elder ro ej jitōn̄e juon membōr in būreejtōnji eo n̄an jipan̄ tōl kijejeto ko n̄an jaketo jaketak gospel eo ilo ward eo. E ej jerbal ippān membōr eo kar kappeik an Būreejtōnji eo an Doulul an Kōrā ro n̄an kōtōbalbal kijejeto kein (lale 23.6.2).

Juon membōr in būreejtōnji an doulul eo an elder ro remaron̄ kakūrm̧ool jerbal eo an mijen ritōl eo an ward eo. Eļan̄n̄e bisop eo ekar kūr juon mijen ritōl n̄an ward, membōr in būreejtōnji eo rej eddoik jerbal eo an. Lale 23.6.1 im 23.6.3.

Ward mijen ritōl eo, eo me emaron̄ juon membōr in būreejtōn eo an doulul eo an elder ro, ej tōl kweilo̧k in kōtōbalbal ko wiik otemjej. Un eo an kweilo̧k kein ej n̄an kōtōbalbal karuwaineneik aolep n̄an bōk kōjeraam̧m̧an ko an gospel eo. Kweilo̧k kein ekoba membōr ro an būreejtōnji ko an Doulul eo an Kōrā ro im doulul eo an elder ro kar kappeik, ward mijenede ro, juon rijjipan̄ ilo doulul eo an pris ro, juon membōr in būreejtōnji eo an kūlaaj eo erūtto tata an Doulul eo an Jiron̄ ro, im mijenede ro rej jerbal aolep raan. Lale 23.4.

8.2.4

Kakobaik Baam̧le ko n̄an Mour Indeeo

Rikabwijer Melkizidek Priesthood eo ej rie membōr ro n̄an kakobaik baam̧le ko n̄an mour indeeo. Menin ej koba:

• Kōm̧m̧an bujen ko ippān Anij ilo ad bōk kain̄i ko, ekoba menin letok kwojarjar an tampeļ.

• Kōm̧m̧an jerbal ko an tampeļ im menmenbwij ko an baam̧le (lale 1.2.4).

Ilo kweilo̧k ko an būreejtōnji im doulul eo, būreejtōnji eo an doulul eo an elder ro rej ekkōnono kōn wāween ko me em̧m̧aan ro remaron̄ bōk koņaer ilo kijejeto kein.

Ro uwaan būreejtōnji eo rej barāinwōt karōk wāween ko n̄an jipan̄ membōr ro kōļapļo̧k meļeļe eo aer kōn im ikdeelel n̄an būki kain̄i ko rekwojarjar n̄an kōm̧m̧ani bujen ko ippān Anij ilo tampeļ. Rej kōketak em̧m̧aan ro n̄an kabun̄-jar ilo tampeļ aolep iien n̄e epidodo.

Būreejtōnji eo ej kōketak ro uwaan doulul eo n̄an katak kōn menmenbwij eo an baam̧le ko aer. Rej jipan̄ membōr ro rekāāl im ro rej ro̧o̧ltok, elder ro ej kab m̧ōj kar ekkapit, im mijenede ro rekāāl ej kab kar kūr er pukot im kepooj etan ro jibwier im jim̧m̧aer n̄an kain̄i ko an tampeļ.

Būreejtōn eo an doulul eo an elder ro ej jitōn̄e juon membōr in būreejtōnji n̄an jipan̄ tōl jerbal ko an tampeļ im menmenbwij ko an baam̧le ilo ward eo. Ej jerbal ippān membōr eo em̧ōj jitōn̄e an būreejtōnji eo an Doulul eo an Kōrā ro n̄an kōjeikiik kijejeto ko.

Juon membōr in būreejtōnji an doulul eo an elder ro remaron̄ kakūrm̧ool jerbal eo an ritōl eo ej lale jerbal ko an tampeļ im menmenbwij ko an baam̧le. Eļan̄n̄e bisop eo ekar kūr juon mijen ritōl an ward, membōr in ilo būreejtōnji eo ej eddoik jerbal eo an. Lale 25.2.2.

Ritōl eo an ward tampeļ im menmennbwij an baam̧le, emaron̄ juon membōr in būreejtōnji eo an doulul eo an elder ro, ej tōl kōtōbalbal kweilo̧k ko an jerbal in tampeļ im menmenbwij an baam̧le (lale 25.2.7). Kweilo̧k kein rej kōm̧m̧an aolep iien. Rej barāinwōt kobaik membōr eo em̧ōj jitōn̄e ilo būreejtōnji eo an Doulul eo an Kōrā ro, juon rijipan̄ ilo doulul eo an pris ro, juon membōr in būreejtōnji eo an kūlaaj eo erūtto tata an Doulul eo an Jiron̄ ro, im consultant ro an tampeļ im menmenbwij an baam̧le.

8.3

Ritōl ro an Doulul eo an Elder ro

8.3.1

Stake Būreejtōnji im Bisop

Būreejtōn eo an doulul eo an elder ro ej pād ium̧win eddo eo an stake būreejtōnji eo. Ej kweilo̧k aolep iien ippān juon membōr in būreejtōnji eo n̄an bōk tōl im riboot kōn eddo ko an.

Būreejtōn eo an doulul eo an elder ro ej bar bōk tōl jān bisop eo, eo me ej opija eo ej tōl ilo ward eo. Rej kweilo̧k emakijkij. Rej ekkōnono kōn kijejeto ko aer ilo lo̧mo̧o̧r eo an Anij im mour ijo eutiej tata, ekoba jerbal in jipan̄ an rikarejar jeiū im jatū emm̧aan ro. Rej barāinwōt ekkōnono (1) eddōkļo̧k im aikuj ko an membōr ro ilo ward eo im (2) kweilo̧k ko an doulul eo an elder ro, kōmeļeļe in tōl ko, im m̧akūtkūt ko.

8.3.2

Ko̧o̧njeļ eo Eutiej

Stake būreejtōnji eo ej kappeik juon high ko̧o̧njeļ n̄an bōk jikier aolep ilo doulul ko an elder ro. Eddo ko an rej ellaajrak ilo 6.5.

8.3.3

Būreejtōnji eo Doulul eo an Elder ro

8.3.3.1

Kūr juon Būreejtōnji an doulul eo an elder ro

Ālkin bōk kapilōk ippān bisop eo, kūr stake būreejtōn eo an elder ro ak pris eo eutiej n̄an jerbal āinwōt būreejtōn eo an doulul eo an elder ro.

Eļan̄n̄e iunit eo ebwe an kilep, būreejtōn eo an doulul eo an elder ro ej leļo̧k et ko n̄an stake būreejtōn eo juon ak ruo em̧m̧aan ro ak pris eo eutiej n̄an jerbal āinwōt rikakpilōklōk ro. Ej kōm̧m̧ane menin ilo an bōk kapilōk ippān bisop eo. Stake būreejtōnji eo ej ļōmņak kōn et ko em̧ōj liļo̧k. Ro uwaan stake būreejtōnji eo ak doulul eo an high ko̧o̧njeļ eo rej leļo̧k kūr in.

Aolep et ko liļo̧k n̄an kūr membōr ro an būreejtōnji ko an doulul an elder ro emenin aikuj kōmālimi jān stake būreejtōnji im high ko̧o̧njeļ eo.

Juon membōr in stake būreejtōnji eo ej kwaļo̧k etan membōr in būreejtōnji eo an doulul eo an elder ro ilo kweilo̧k in kwojkwoj eo n̄an rejetak. Stake būreejtōnji emaron̄ bar jitōn̄ juon high ko̧o̧njeļ n̄an kōm̧m̧ane menin.

Juon membōr in būreejtōnji eo an doulul eo an elder ro ej kwaļo̧k etan em̧m̧aan ro me kar kūr n̄an kūr ko jet an doulul eo n̄an rejtak ilo juon kweilo̧k an doulul eo (lale 8.3.4 im 8.3.5).

Stake būreejtōn ej kōjeno̧lo̧k būreejtōn an doulul eo an elder ro im leļo̧k ki ko an kūr eo an. N̄an meļeļe ko reļļapļo̧k kōn ki in priesthood ko, lale 3.4.1. Juon membōr in stake būreejtōnji eo ak high ko̧o̧njeļ ej kōjenoļo̧k rikakpilōklōk ro.

8.3.3.2

Eddo ko

Būreejtōn eo an doulul eo an elder ro ewōr eddo ko an kein me rej elaajrak: Rikōkapilōklōk ro an rej jipan̄ e.

• Jerbal ilo ward ko̧o̧njeļ eo. Ej jerbal āinwōt (1) juon membōr in ko̧o̧njeļ eo me ej jipan̄ ņa mejļan aikuj ko ilo ward eo im pukot uwaak ko im (2) juon eo ej jutak ilo etan doulul eo an elder ro (lale 29.2.5).

• Tōl kijejeto ko an doulul eo n̄an bōk kōnaad ilo jerbal in lo̧mo̧o̧r eo an Anij im mour ijo eutiej tata (lale jebta 1).

• Karōk im eddoik jerbal ko an em̧m̧aan ro rej jerbal in karejar. Kōjeikiik ijjitōn̄ ko an jerbal in karejar ippān būreejtōnji eo an Doulul eo an Kōrā ro, kweilo̧k diktata ļo̧kin jilu allōn̄ ak juon kuwōta. Kappukot mālim an bisop eo n̄an ijjitōn̄ ko an jerbal in karejar. Kōm̧m̧ani intōrpiu in jerbal in karejar diktata ļo̧kin jilu allōn̄ ak juon kuwōta. Lale jebta 21.

• Ium̧win tōl eo an bisop eo, kapilōk ippān membōr ro rerūtto an ward eo (lale 31.1 im 31.3). Bisop eo wōt ej kapilōk membōr in ward eo kōn men ko raorōk ikkijeen mour erreo, kakkure, im kōmālim n̄an kōjerbal jāān in joortak in jitlo̧k ko. Lale Counseling Resources. Kōn meļeļe ko kōn kakkure, lale 38.6.2.

• Ippān būreejtōnji eo an Doulul eo an Kōrā ro, jipan̄ tōl kijejeto ko ilo ward n̄an karuwaineneik aolep n̄an bōk kōjeraam̧m̧an ko an gospel eo (lale 8.2.3 im 9.2.3). Eddoik mijen ritōl eo an ward eo eļan̄n̄e juon ej kūr.

• Ippān būreejtōnji eo an Doulul eo an Kōrā ro, jipan̄ tōl jerbal eo an tampeļ im menmenbwij an baam̧le ilo ward eo (lale 8.2.4 im 9.2.4). Eddoik ritōl eo an ward tampeļ im menmenbwij an baam̧le eļan̄n̄e juon ej kūr.

• Kōjeikiik kijejeto ko an doulul eo an elder ro n̄an kōkajoorļo̧k likao rūm̧m̧an ded, jim̧or ro ejjeļo̧k pāleer im ro em̧ōj aer m̧are. Juon rikakpilōklōk emaron̄ ijjitōn̄ n̄an jerbal ippān rūm̧man ded ro (lale 14.1.2.2).

• Kweilo̧k ippān kajjojo ro uwaan doulul ko diktata juon kōttan juon iiō. Rej kōnono kōn eddo ko an priesthood im an em̧m̧an in mour an rikabwijer priesthood eo im baam̧le eo an.

• Katakin ro uwaan doulul eo kōn jerbal ko an priesthood eo aer (lale Katak im Bujen Ko 107:89 Menin ekoba katakin er kōn wāween kōmourrur priesthood ko aer ilo aer kōm̧m̧ani kain̄i ko im kōjeraam̧m̧an ko.

• Jipan̄ ro uwaan douluul eo an em̧m̧aan ro meļeļe kōn kajoor, kejparok, tōl, lan̄lōn̄, im ainem̧m̧an eo ej itok jān ejaake juon bujen jemjerā ipen Jemād Ilan̄ im Jisōs Kraist.

• Eddoik im jipan̄ kōkm̧anm̧anļo̧k wāween katakin ilo doulul eo (lale jebta 17).

• Karōk im kōjeikiik kweilo̧k ko an doulul eo.

• Eddoik m̧akūtkūt ko an doulul eo an elder ro (lale 8.2.1.3).

• Jipan̄ likao ro im em̧m̧aan ro rejjan̄in ekkapit elder kōppopo n̄an bōk Melkisedek Priesthood (lale 8.4).

• Bōk eddo in rekoot ko, riboot ko, im jāān ko an doulul eo (lale LCR.ChurchofJesusChrist.org). Juon rijeje emaron̄ jipan̄ (lale 8.3.4).

Stake būreejtōnji eo im membōr ro em̧ōj jitōn̄e ilo doulul eo an high ko̧o̧njeļ rej katkain būreejtōnji eo an doulul eo an elder ro kōn eddo kein. Remaron̄ kōm̧m̧ane menin ilo iien kweilo̧k ko an ritōl an priesthood ilo stake eo, kweilo̧k ko an doulul an būreejtōnji eo, im loļo̧k ko an juon make ippān būreejtōn ro an doulul eo an elder ro (lale 29.3.3).

Kōn jerbal in jipan̄ eo an, būreejtōn eo an doulul eo an elder ro rej rie bisop eo ilo an mije jodikdik ro im ilo eddo ko rejenoļo̧k an bisop eo.

8.3.3.3

Kweilo̧k an Būreejtōnji

Būreejtōn eo an doulul eo an elder ro im rijeje ro rej kweilo̧k ippān doon emakijkij. Būreejtōn eo ej tōl kweilo̧k kein. High ko̧o̧njeļ eo em̧ōj jitōn̄e enej wōnm̧aanļo̧k wōt im pād ilo doulul eo.

Laajrak in tōl eo emaron̄ koba aitōm̧ kein rej elaajrak:

• Karōk wāween kōkajoorļo̧k ro uwaan doulul eo (ekoba em̧m̧aan rejjan̄in ekkapit n̄an elder) im baam̧le ko aer.

• Karōk ekōjkan n̄an jipan̄ kōtōprak jerbal in lo̧mo̧o̧r eo an Anij im mour ijo eutiej tata.

• Loloorjake jerbal in mijenede im jerbal an tampeļ im menmenbwij an baam̧le.

• Uwaake kapilōk eo im ijjitōn̄ ko jān bisop eo im ritōl ro an stake eo.

• Eo̧ron̄ ijjitōn̄ ko jān kweilo̧k ko an ward ko̧o̧njeļ eo.

• Jar ilo am̧ ļōmņak kōn ijjitōn̄ ko an jerbal in karejar.

• Etale meļeļe ko jān intōrpiu ko an jerbal in karejar. Karōk wāween ko n̄an kakilen kajoor im jipan̄ tōpar aikuj ko. (Lale jebta 21.)

• Ļōmņak kōn em̧m̧aan ro n̄an jerbal ilo kūr im ijjitōn̄ ko.

• Karōk kweilo̧k im m̧akūtkūt ko an doulul eo.

8.3.4

Rijeje

Kōn kōmālim eo an bisop eo, juon membōr in būreejtōnji eo an doulul eo an elder ro remaron̄ kūr juon membōr in doulul eo n̄an erom̧ juon rijeje an doulul eo. E ej kwaļo̧ke etan ļeo n̄an rejtak ilo juon kweilo̧k an doulul eo im kōjenolo̧kk ļeo.

Eddo eo an rijeje eo remaron̄ kobaik men kein rej elaajrak:

• Kōpooj laajrak in tōl ko an kweilo̧k an būreejtōnji eo im kweilo̧k ko an doulul eo.

• Je no̧o̧t ko ilo kweilo̧k ko im lale ijjitōn̄ ko.

• Jikejuuļi intōrpiu in jerbal in karejar ko (lale 21.3).

• Kōpooj im leļo̧k riboot ko kajjojo kuwōta kōn armej ro rej pād ilo kūlaaj im oran intōrpiu ko an jerbal in karejar me rekar kōm̧m̧an.

• Jipan̄ kōpooj juon bajet kajjojo iiō im lale jon̄an joļo̧k jāān.

8.3.5

Kūr ko Jet

Kūr ko jet me rej elaajrak remaron̄ lukkuun jipan̄. Bisop eo im būreejtōn eo an doulul eo an elder ro rej kōnono eļan̄n̄e remenin aikuj.

• Rūkaki ro ilo doulul eo an elder ro rej katkain ilo kweilo̧k ko an doulul eo an elder ilo Jabōt.

• Juon riloloorjake jerbal in jipan̄ n̄an jipan̄ karōk im kōm̧m̧ane jerbal in jipan̄ ko n̄an armej ro rej aikuj (lale 8.2.2.2). Rijipan̄ ro im ro uwaan kamiti ro remaron̄ bar bōk kūr.

• Juon riloloorjake m̧akūtkūt eo me ej jipan̄ karōk im kōm̧m̧ani m̧akūtkūt ko an doulul eo an elder (lale 8.2.1.3). Rijipan̄ ro im ro uwaan kamiti ro remaron̄ bar bōk kūr.

• Rijipan̄ rijeje eo n̄an jipan̄ rijeje eo an doulul eo an elder ro.

• Rijeje eo an jerbal in karejar n̄an kōlaajrake im karōk intōrpiu ko an jerbal in karejar im jipan̄ kōpooj riboot ko aolep kuwōta.

Eļan̄n̄e kūr kein ak ko jet remenin aikuj, būreejtōnji eo an doulul eo an elder ro rej leļo̧k etan em̧m̧aan rein n̄an jerbal. Rej leļo̧k et kein n̄an bisoprik eo. Eļan̄n̄e bisop ej kōmālimi, juon membōr in būreejtōnji eo an doulul eo ej kūr er. Ej kwaļo̧k etaer n̄an rejetake ilo juon kweilo̧k an doulul eo im kōjenolo̧k er.

N̄e emenin aikuj, būreejtōnji eo an doulul eo an elder ro remaron̄ jitōn̄ em̧m̧aan ro n̄an jipan̄ kijejeto ko an doulul eo an elder ro ilo wāween ko jet. Em̧m̧aan ro kōn ijjitōn̄ ko ekadu kitieer rejjab aikuj kūr ak kōjenolo̧k.

8.4

Jipan̄ Em̧m̧aan ro Rejjan̄in Ekkapit n̄an Elder n̄an Bōk Melkisedek Priesthood

Juon em̧m̧aan eo ejjan̄in ekkapit n̄an elder ej juon em̧m̧aan membōr ro an Kabun̄ in eo me ejjan̄in bōk Melkisedek Priesthood im (1) ej 19 iiō ak rūttoļo̧k ak (2) edikļo̧k jān 19 iiō im em̧ōj an m̧are.

Jipan̄ em̧m̧aan ro me rejjan̄in ekkapit n̄an elder kōppopo n̄an bōk Melkisedek Priesthood eo ej juon iaan eddo ko ilōn̄tata an būreejtōnji eo an doulul eo. Būreejtōnji eo ej leļo̧k n̄an em̧m̧aan ro me rejjan̄in ekkapit n̄an elder iien ko rem̧m̧an n̄an jerbal im jeere kajoor ko aer. Rikarejar m̧aan ro jeid ak jatid rej jitōn̄ er n̄an em̧m̧aan ro rejjan̄in ekkapit n̄an elder.

Būreejtōnji eo an doulul eo im rikarejar m̧aan ro jeid ak jatid rej katakin em̧m̧aan ro rejjan̄in ekkapit n̄an elder kōn:

• Kallim̧ur eo im bujen eo an priesthood eo (lale Katak im Bujen Ko 84:33–44

• Eddo ko an juon elder, ekoba eddo eo n̄an jerbal in karejar (lale Katak im Bujen Ko 20:38–45; 42:44; 107:11–12). Em̧m̧an ro rejjan̄in ekkapit n̄an elder rej rūkaki ak pris remaron̄ jerbal āinwōt rikarejar jeiū ak jatū m̧aan.

• Jibadbad eo an kain̄i ko an priesthood eo im kōjeraam̧m̧an ko an im wāween kōm̧m̧ani (lale jebta 18).

• Ekōjkan an em̧m̧aan im kōrā ro jerbal ippān doon n̄an kōttōprak jerbal eo an Anij.

N̄an elōn̄ļo̧k meļeļe ko kōn unin kōnono kein lale “Melchizedek Priesthood,” “Priesthood,” im“Women in the Church” (Topics and Questions, topics.ChurchofJesusChrist.org).

Kōmeļeļe in emaron̄ bōk jikin ippān kajjojo ak ilo juon kūlaaj eo me ej kōm̧m̧an ilkin kweilo̧k ko an Jabōt.

Iien eo wōt bisop eo im stake būreejtōn eo rej kālet juon eo em̧m̧an eo epojak n̄an elder eo im epojak im erreo, emaron̄ ekkapit āinwōt juon elder ilo Melkisedek Priesthood.

8.5

Membōr ro Ewōr Utam̧we ko ilo Ānbwin

Būreejtōnji eo an doulul eo an elder rej kea kōn membōr ro ewōr Utam̧we ko ilo ānbwinier. N̄an elōn̄ļo̧k meļeļe ko n̄an jipan̄ membōr rein, lale disability.ChurchofJesusChrist.org; bar lale 38.8.27 ilo bok in bōk meļeļe in.