9.

Relief Society

9.1

Katuyoan ug Organisasyon

Ang Relief Society motabang sa mga anak sa Dios nga mangandam nga makabalik ngadto sa Iyang presensya. Isip mga anak nga babaye sa langitnong mga ginikanan, ang mga sakop sa Relief Society “[mo]patin-aw sa kasulatan,” “[mo]awhag sa simbahan,” [mo]pataas sa mga kasingkasing, ug “[mo]hupot ngadto sa pakigsaad nga [ilang] gihimo” (Doktrina ug mga Pakigsaad 25:7, 13).

9.1.1

Katuyoan

Ang Relief Society usa ka balaang gitukod nga organisasyon alang sa tanang hamtong nga mga babaye diha sa Simbahan. Si Propeta Joseph Smith mitudlo nga ang katuyoan sa Relief Society mao ang pagluwas sa mga kalag ug paghupay sa nag-antos. Siya mipahayag nga ang Simbahan ni Jesukristo wala maorganisar sa hingpit hangtod nga ang mga igsoong babaye naorganisar sa ingon.

Ang mga sakop sa Relief Society magtambayayong sa pagtabang sa pagtuman sa buhat sa Dios sa kaluwasan ug kahimayaan. Sila moserbisyo sa uban, motuman sa mga responsibilidad sa pakigsaad, molig-on sa panaghiusa, ug magkat-on ug mosunod sa doktrina.

Ang motto sa Relief Society mao “Ang gugma dili gayod matapos” (1 Mga Taga-Corinto 13:8). Kini nga motto makita diha sa silyo sa Relief Society.

9.1.2

Pagkasakop diha sa Relief Society

Ang Relief Society usa ka tibuok kinabuhi nga panag-inigsoonay. Ang tanang hamtong nga mga babaye nga 18 ug pataas mga sakop sa Relief Society. Sila mga miyembro bisan dili sila makatambong sa mga miting sa Relief Society.

Ang usa ka batan-ong babaye mahimong mosugod sa pagtambong sa Relief Society kon siya mag-edad na og 18. Siya magpakitambag sa iyang mga ginikanan ug sa bishop mahitungod sa tukmang panahon. Sa edad nga 19 o kon mobiya sa panimalay, sama sa pag-eskwela sa unibersidad o moserbisyo og misyon, siya kinahanglang moapil sa Relief Society.

Ang minyo nga mga babaye nga ubos sa 18 mga sakop usab sa Relief Society.

Alang sa impormasyon mahitungod sa wala makasal nga mga ginikanan nga ubos sa edad nga 18, tan-awa sa 38.1.5.

9.1.3

Pagpahiangay ngadto sa Lokal nga mga Panginahanglan

Ang pipila ka ward adunay daghan kaayo nga aktibong hamtong nga mga babaye. Alang niini nga mga ward, ang bishop ug ang presidente sa stake mahimong motugot nga maghimo og sobra sa usa ka Relief Society sa ward. Ang matag Relief Society adunay iyang kaugalingon nga kapangulohan. Kon posible, ang matag Relief Society kinahanglang adunay mga sakop sa nagkalain-lain nga mga edad ug kasinatian.

9.2

Pag-apil sa Buhat sa Dios sa Kaluwasan ug Kahimayaan

Ang Dios nagdapit sa tanan nga moduol ngadto ni Kristo ug moapil diha sa Iyang buhat sa kaluwasan ug kahimayaan pinaagi sa:

• Pagsunod sa ebanghelyo ni Jesukristo.

• Pag-atiman niadtong nanginahanglan.

• Pagdapit sa tanan nga modawat sa ebanghelyo.

• Paghiusa sa mga pamilya alang sa kahangtoran.

Ang mga lider sa Relief Society magplano og mga miting, mga kalihokan, pagpangalagad, pagserbisyo, ug ubang mga inter-aksiyon sa Dominggo aron sa pagtabang sa mga babaye nga moapil sa buhat sa Dios sa kaluwasan ug kahimayaan. Ang mga sakop sa Relief Society ug sa korum sa mga elder molihok nga magkahiusa sa pagtabang niini nga buhat.

Alang sa dugang nga impormasyon mahitungod sa buhat sa Dios sa kaluwasan ug kahimayaan, tun-i ang kapitulo 1.

9.2.1

Pagsunod sa Ebanghelyo ni Jesukristo

Ang mga lider sa Relief Society mosuporta sa mga miyembro sa pagsunod sa ebanghelyo ni Jesukristo. Sila mohatag og gibug-aton sa paggamit og hugot nga pagtuo, paghinulsol, pagpalambo sa pagbarog pinaagi sa kinaugalingong paningkamot, ug paghimo og mga pakigsaad uban sa Dios pinaagi sa pagdawat og mga ordinansa. Ang maong mga ordinansa naglakip sa pagtuga sa templo. Tan-awa sa 1.2.1.

9.2.1.1

Pagkat-on sa Ebanghelyo diha sa Panimalay

Kon ang mga miyembro magkat-on ug magsunod sa ebanghelyo diha sa panimalay, ang ilang pagkakabig ngadto sa Langitnong Amahan ug ni Jesukristo molig-on. Ang mga lider sa Relief Society moawhag sa mga igsoong babaye sa pagtuon sa mga kasulatan ug sa mga pulong sa buhi nga mga propeta, sa tinagsa ug uban sa ilang mga pamilya. Ang Dali, Sunod Kanako ug ubang mga kapanguhaan makadugang sa ilang pagtuon.

Ang mga home evening importante nga paagi sa pagkat-on sa ebanghelyo diha sa panimalay. Kini sa kasagaran himoon sa matag semana sa Dominggo, sa gabii sa Lunes, o sa laing panahon. Kini maglakip sa mga pag-ampo, pagtuon sa ebanghelyo, mga pagpamatuod, pagpanganta, ug makalingaw nga mga kalihokan.

9.2.1.2

Pagtuon sa Ebanghelyo diha sa mga Miting sa Relief Society

Ang mga Relief Society magmiting sa mga Dominggo alang sa mosunod nga mga katuyoan:

• Paglig-on sa hugot nga pagtuo.

• Paglig-on sa panaghiusa.

• Paglig-on sa mga pamilya ug mga panimalay.

• Pagpakigsabot bahin sa mga paningkamot sa pagtabang sa Dios sa Iyang buhat sa kaluwasan ug kahimayaan diha sa ward.

Ang mga miting pagahimoon sa ikaduha ug ikaupat nga mga Dominggo sa bulan. Kini molungtad og 50 ka minuto. Ang kapangulohan sa Relief Society moplano niini nga mga miting. Usa ka sakop sa kapangulohan ang mopahigayon.

Ang miting sugdan sa pag-ampo. Dayon ang usa ka sakop sa kapangulohan modumala sa mga igsoong babaye sa pagtinambagay sulod sa lima ngadto sa napulo ka minuto mahitungod sa may kalabotan nga mga hagit, mga panginahanglan, ug mga oportunidad. Ang pagtutok diha sa Manluluwas niini nga pakigtambag makatabang sa mga igsoong babaye sa pagpalig-on sa mga pagpamatuod, pagdawat sa mga ordinansa sa templo, pagtuman sa mga pakigsaad, ug pagpalambo sa ilang pagkadisipulo. Ang kapangulohan sa Relief Society mopili og mga hilisgotan nga angay nga hisgotan sa pakigtambag base sa mga panginahanglan sa mga igsoong babaye.

Igong panahon kinahanglan dayon nga igahin sa makahuloganong panudlo ug panaghisgotan sa ebanghelyo. Kinahanglang motutok diha sa mga hilisgotan sa usa o daghang mga pakigpulong gikan sa labing bag-o nga kinatibuk-ang komperensiya. Ang kapangulohan sa Relief Society mainampoong mopili og mga mensahe sa komperensiya aron hisgotan sa mga igsoong babaye. Sila mohimo niini nga mga pagpili base sa mga panginahanglan sa mga igsoong babaye.

Ang mga himno mahimong kantahon sa pagpalambo og usa ka leksiyon.

Ang mga miting kinahanglan nga taposon uban sa usa ka pag-ampo.

Ang Relief Society ug ang korum sa mga elder mahimong magtipon usahay alang sa usa ka leksiyon sa Dominggo. Kini nga mga miting pakigsabotan sa bishopric ug sa mga kapangulohan sa Relief Society ug sa korum sa mga elder.

Alang sa dugang nga impormasyon, tan-awa sa “To Sit in Council.”

9.2.1.3

Mga Kalihokan

Ang mga kapangulohan sa Relief Society mahimong moplano sa mga kalihokan. Ang presidente ang modumala sa mga kalihokan. Siya mahimong mohangyo sa usa ka magtatambag o laing igsoong babaye sa pagpangulo sa pagplano ug paghimo niini (tan-awa sa 9.3.4). Ang mga kapangulohan mohisgot og mga kalihokan uban sa bishop isip kabahin sa ilang pagplano.

Ang mga kalihokan kinahanglang makapalig-on sa mga tinguha sa mga igsoong babaye sa paghimo ug pagtuman sa mga pakigsaad ug makahatag nila og mga oportunidad sa pagpundok ug pagtambayayong sa pagserbisyo. Ang mga kalihokan kinahanglang makatabang nga matuman ang mga katuyoan sa Relief Society (tan-awa sa 9.1 ug 9.1.1). Alang sa impormasyon mahitungod sa mga kalihokan sa Relief Society sa stake, tan-awa sa 6.7.1.

9.2.2

Pag-atiman Niadtong Nanginahanglan

Isip mga sumusunod ni Jesukristo, ang mga igsoong babaye adunay responsibilidad sa pagtabang uban sa gugma niadtong nanginahanglan. Sa tinagsa ug isip Relief Society, sila mangita og mga paagi sa pagserbisyo sa uban diha sa ward ug sa komunidad. Kon anaa, ang JustServe.org nagsugyot og mga oportunidad sa pagserbisyo diha sa komunidad.

Alang sa dugang nga impormasyon kon sa unsang paagi nga ang mga sakop sa Relief Society ug korum sa mga elder moatiman niadtong nanginahanglan, tan-awa sa 22.6.2.

9.2.2.1

Pagpangalagad

Ang pagpangalagad mao ang pag-atiman sa uban sama sa buhaton sa Manluluwas. Ang mga igsoong babaye modawat og mga buluhaton sa pagpangalagad gikan sa kapangulohan sa Relief Society. Alang sa dugang nga impormasyon, tan-awa sa kapitulo 21.

9.2.2.2

Mubo og Tagal nga mga Panginahanglan

Ang tigpangalagad nga mga igsoong babaye magtinguha sa pagsabot ug motubag sa mga panginahanglan niadtong ilang gialagaran. Ang mga miyembro tingali manginahanglan og mubo og tagal nga tabang sa mga panahon nga masakit, manganak, mamatyan, mawad-an og trabaho, ug ubang mga sirkumstansiya.

Kon gikinahanglan, ang tigpangalagad nga mga igsoong babaye mangayo og tabang sa kapangulohan sa Relief Society. Ang kapangulohan mahimong morekomendar sa pagtawag og service coordinator sa pag-organisar niini nga mga paningkamot (tan-awa sa 9.3.4).

Ang Relief Society ug ang korum sa mga elder makigsabot sa mga paningkamot aron sa pagtubag sa mubo og tagal nga mga panginahanglan (tan-awa sa 22.3.2). Ang bishop mahimong mohatag og tabang gikan sa halad sa puasa kon gikinahanglan.

Sa pipila ka dapit, ang mga bishop adunay opsiyon sa paghatag sa mga miyembro nga nanginahanglan og bishop’s order alang sa pagkaon ug ubang nag-unang mga panginahanglan. Ang bishop kasagaran mosangon sa presidente sa Relief Society nga makigkita sa mga miyembro ug mosulat sa porma sa pag-order. Hinoon, siya usab mahimong mosangon sa presidente sa korum sa mga elder. Ang usa ka magtatambag sa Relief Society o kapangulohan sa korum sa mga elder mahimong sangonan kon ang presidente dili makahimo. Ang gisangonan nga lider mosumiter sa nakompleto nga porma ngadto sa bishop alang sa iyang pagtugot.

Alang sa dugang nga impormasyon, tan-awa sa 22.6.2 ug sa “Welfare Resources” diha sa Leader and Clerk Resources.

9.2.2.3

Taas og Tagal nga mga Panginahanglan ug Pagbarog pinaagi sa Kinaugalingong Paningkamot

Sumala sa gisabotan sa bishop, ang mga kapangulohan sa Relief Society ug korum sa mga elder motabang sa mga miyembro nga adunay taas og tagal nga mga panginahanglan ug pagbarog pinaagi sa kinaugalingong paningkamot. Sila motudlo sa mga baroganan sa temporal ug espirituwal nga pagbarog pinaagi sa kinaugalingong paningkamot. Tan-awa sa kapitulo 22 ug “Pagpaningkamot sa Kaugalingon” diha sa Gospel Library nga app.

Kon ang usa ka tawo o pamilya magkinahanglan og tabang, ang mga presidente sa Relief Society ug sa korum sa mga elder magtinambagay sumala sa gisabotan sa bishop, kon unsaon sa pagtabang (tan-awa sa 22.4).

Ang presidente sa Relief Society, presidente sa korum sa mga elder, o laing lider motabang sa tawo o pamilya sa paghimo og Plano sa Pagbar[o]g pinaagi sa Pagpaningkamot sa Kaugalingon. Ang tigpangalagad nga mga igsoong babaye o lalaki makatabang usab sa plano. Sa kasagaran, ang ubang mga sakop sa Relief Society o korum sa mga elder adunay mga kahanas o kasinatian nga makatabang. Ang tanang motabang motratar sa impormasyon nga kompidensiyal. Alang sa dugang nga impormasyon, tan-awa sa 22.3.3 ug 22.8.

9.2.2.4

Kon ang usa ka Miyembro sa Ward Mamatay

Kon ang usa ka miyembro sa ward mamatay, ang mga kapangulohan sa Relief Society ug sa korum sa mga elder motanyag og kahupayan ug tabang. Ubos sa giya sa bishop, sila makatabang sa lubong.

Kon posible, ang namatay nga mga miyembro kinsa natugahan ilubong o sunogon nga gisul-oban sa sinina sa templo. Ang lawas sa usa ka babaye mahimong sininaan sa iyang bana o sa usa ka natugahan nga babaye nga sakop sa pamilya. Kon ang usa ka sakop sa pamilya wala o dili gustong mosul-ob sa sinina, ang bishop mohangyo sa presidente sa Relief Society sa pagdapit sa usa ka natugahan nga babaye sa pagsinina sa lawas o pagdumala sa pagsul-ob sa sinina. Alang sa dugang nga impormasyon, tan-awa sa 38.5.10.

Ang mga kapangulohan sa Relief Society ug sa korum sa mga elder, tigpangalagad nga mga igsoong lalaki ug mga igsoong babaye, ug ang uban magpadayon sa paghatag og kahupayan ug tabang human sa seremonya sa lubong.

9.2.3

Pagdapit sa Tanan nga Modawat sa Ebanghelyo

Ang mga sakop sa Relief Society adunay responsibilidad sa pagdapit sa tanan nga modawat sa mga panalangin sa ebanghelyo ni Jesukristo (tan-awa sa Mosiah 18:9). Sila mohimo niini pinaagi sa pagpakigbahin sa ebanghelyo, pagpalig-on sa bag-ong mga miyembro, ug pagtabang niadtong dili kaayo aktibo. Tan-awa sa 23.2 ug 23.3.

Sa mga miting sa kapangulohan ug sa Relief Society, ang kapangulohan sa Relief Society mohisgot og mga paagi nga ang mga igsoong babaye makadapit sa tanan nga modawat sa mga panalangin sa ebanghelyo. Tan-awa sa 23.1.1, 23.1.2, ug 23.1.3.

Ang presidente sa Relief Society mosangon og usa ka sakop sa kapangulohan sa pagtabang sa pagpangulo sa mga paningkamot sa pagpaambit sa ebanghelyo diha sa ward. Siya makigtambayayong uban sa gisangonan nga sakop sa kapangulohan sa korum sa mga elder sa pagpakigsabot niini nga mga paningkamot (tan-awa sa 23.6.2).

Ang gisangonan nga sakop sa kapangulohan sa Relief Society moapil sa sinemana mga miting sa pakigsabot aron sabotan ang pagdapit sa tanan nga modawat sa mga panalangin sa ebanghelyo. Ang lider sa misyon sa ward, kinsa tingali usa ka sakop sa kapangulohan sa korum sa mga elder, mangulo niini nga mga miting. Ang mga misyonaryo sa ward, usa ka kaabag sa korum sa mga priest, usa ka sakop sa kapangulohan sa labing edaran nga klase sa Young Women, ug ang full-time nga mga misyonaryo motambong. Tan-awa sa 23.4.

9.2.4

Paghiusa sa mga Pamilya alang sa Kahangtoran

Ang mga sakop sa Relief Society mosuporta sa mga miyembro sa paghiusa sa mga pamilya alang sa kahangtoran. Kini naglakip sa:

• Paghimo og mga pakigsaad uban sa Dios pinaagi sa pagdawat og mga ordinansa, lakip na sa pagtuga sa templo.

• Paghimo sa buhat sa templo ug family history (tan-awa sa 1.2.4).

Sa miting sa kapangulohan ug sa Relief Society, ang kapangulohan sa Relief Society mohisgot og mga paagi nga ang mga igsoong babaye makaapil niini nga mga paningkamot. Ang mga sakop sa kapangulohan magplano usab og mga paagi sa pagtabang sa mga miyembro nga madugangan ang ilang pagsabot ug tinguha sa pagdawat og sagrado nga mga ordinansa ug mohimo og mga pakigsaad uban sa Dios diha sa templo. Sila usab moawhag sa mga igsoon babaye sa pagsimba sa templo kanunay kon posible.

Ang kapangulohan moawhag sa mga igsoong babaye sa pagkat-on mahitungod sa ilang family history. Sila motabang sa bag-o ug mibalik nga mga miyembro, bag-ong mga sakop sa Relief Society, ug bag-ong natawag nga mga misyonaryo sa pagpangita ug pag-andam sa mga ngalan sa mga katigulangan alang sa mga ordinansa sa templo.

Ang presidente sa Relief Society mosangon og usa ka sakop sa kapangulohan sa pagtabang sa pagpangulo sa buhat sa templo ug family history diha sa ward. Siya makigtambayayong uban sa gisangonan nga sakop sa kapangulohan sa korum sa mga elder sa pagpakigsabot niini nga mga paningkamot (tan-awa sa 25.2.2).

Ang gisangonan nga sakop sa kapangulohan sa Relief Society moapil sa mga miting sa pagpakigsabot aron sabotan ang buhat sa templo ug family history. Kini nga mga miting pagahimoon kanunay. Ang lider sa ward alang sa templo ug family history, kinsa tingali usa ka sakop sa kapangulohan sa korum sa mga elder, mangulo sa mga miting sa pagpakigsabot alang sa templo ug family history (tan-awa sa 25.2.7). Kini usab maglakip og usa ka kaabag sa korum sa mga priest, usa ka sakop sa kapangulohan sa labing edaran nga klase sa Young Women, ug sa mga consultant sa templo ug family history.

9.3

Mga Lider sa Relief Society

9.3.1

Bishop

Ang bishop sa kasagaran makigmiting sa presidente sa Relief Society dili mominos sa usa ka bulan. Sila maghisgot sa buhat sa Dios sa kaluwasan ug kahimayaan, lakip sa pagserbisyo sa tigpangalagad nga mga igsoong babaye. Sila usab maghisgot (1) sa kauswagan ug mga panginahanglan sa mga igsoong babaye diha sa ward ug sa (2) mga miting, panudlo, ug mga kalihokan sa Relief Society.

9.3.2

Kapangulohan sa Relief Society

9.3.2.1

Pagtawag sa Kapangulohan sa Relief Society

Ang bishop motawag og usa ka babaye nga moserbisyo isip presidente sa Relief Society sa ward. Kon ang yunit may igong gidak-on, ang presidente sa Relief Society morekomendar ngadto kaniya og usa o duha ka mga babaye nga moserbisyo isip iyang mga magtatambag. Ang bishopric mokonsiderar sa iyang mga rekomendasyon ug mohatag sa mga calling.

Usa ka sakop sa bishopric ang mopresentar sa mga sakop sa kapangulohan diha sa panagtigom alang sa sakramento alang sa pagpaluyo. Ang bishop mo-set apart sa presidente sa Relief Society. Bisan hain sa sakop sa bishopric mahimong mo-set apart sa iyang mga magtatambag.

Ang pipila ka gagmayng mga yunit tingali walay presidente sa Young Women o sa Primary. Niini nga mga yunit, ang presidente sa Relief Society mahimong motabang sa mga ginikanan sa pagplano og panudlo alang sa kabatan-onan ug kabataan.

9.3.2.2

Mga Responsibilidad

Ang presidente sa Relief Society aduna sa mosunod nga mga responsibilidad. Ang iyang mga magtatambag moabag kaniya.

• Moserbisyo diha sa konseho sa ward. Siya moserbisyo isip (1) usa ka sakop sa konseho kinsa motabang sa pagtubag sa mga panginahanglan sa ward ug mangita og mga kasulbaran ug (2) usa ka representante sa Relief Society (tan-awa sa 29.2.5).

• Mangulo sa mga paningkamot sa Relief Society sa pag-apil diha sa buhat sa Dios sa kaluwasan ug kahimayaan (tan-awa sa kapitulo 1).

• Mo-organisar ug modumala sa serbisyo sa tigpangalagad nga mga igsoong babaye. Makigsabot sa mga buluhaton sa pagpangalagad uban sa kapangulohan sa korum sa mga elder, magmiting dili mominos matag tulo ka bulan. Mangayo sa pagtugot sa bishop alang sa mga buluhaton sa pagpangalagad. Mopahigayon og mga interbiyo sa pagpangalagad dili mominos matag tulo ka bulan. Tan-awa sa kapitulo 21.

• Ubos sa giya sa bishop, mopakigtambag uban sa hamtong nga mga miyembro sa ward (tan-awa sa 31.1 ug 31.3). Ang bishop lamang ang motambag sa mga miyembro sa ward mahitungod sa mga butang kabahin sa katakos, pag-abuso, ug pagtugot sa paggamit sa mga pundo sa halad sa puasa. Tan-awa sa Mga Kapanguhaan sa Pagtambag. Alang sa impormasyon mahitungod sa abuso, tan-awa sa 38.6.2.

• Uban sa kapangulohan sa korum sa mga elder, motabang sa pagpangulo sa mga paningkamot sa ward sa pagdapit sa tanan nga modawat sa mga panalangin sa ebanghelyo (tan-awa sa 8.2.3 ug 9.2.3).

• Uban sa kapangulohan sa korum sa mga elder, motabang sa pagpangulo sa buhat sa templo ug family history diha sa ward (tan-awa sa 8.2.4 ug 9.2.4).

• Makigsabot sa mga paningkamot sa Relief Society sa paglig-on sa mga sister nga young adult diha sa ward, dili minyo ug minyo. Usa ka magtatambag mahimong sangonan sa pagserbisyo uban sa mga young single adult (tan-awa sa 14.1.2.2).

• Makigmiting sa matag sakop sa Relief Society sa tinagsa dili mominos makausa sa usa ka tuig. Maghisgot sa kahimtang sa igsoong babaye ug sa iyang pamilya.

• Motudlo sa mga igsoong babaye sa ilang mga responsibilidad ug mga panalangin sa pakigsaad, lakip na sa mga panalangin nga moabot gikan sa gahom sa pagkapari sa Dios (tan-awa sa 3.5 ug 3.6). Motabang nila nga makasabot sa gahom, proteksiyon, direksiyon, kamaya, ug kalinaw nga moabot gikan sa pagpalambo og relasyon pinaagi sa pakigsaad uban sa Langitnong Amahan ug ni Jesukristo.

• Modumala ug motabang sa pagpalambo sa pagtudlo diha sa Relief Society (tan-awa sa kapitulo 17).

• Moplano ug mopahigayon sa mga miting sa Relief Society.

• Modumala sa mga kalihokan sa Relief Society (tan-awa sa 9.2.1.3).

• Motabang sa mga batan-ong babaye nga mangandam sa pag-apil sa Relief Society (tan-awa sa 9.4).

• Modumala sa mga rekord, mga report, ug mga panalapi sa Relief Society (tan-awa sa LCR.ChurchofJesusChrist.org). Ang secretary mahimong motabang (tan-awa sa 9.3.3).

Ang kapangulohan sa Relief Society sa stake motudlo sa kapangulohan sa Relief Society sa ward mahitungod niini nga mga responsibilidad. Sila mahimong mobuhat niini atol sa mga miting sa pagpangulo diha sa stake, sa mga miting sa kapangulohan sa Relief Society sa ward, ug personal nga mga pagbisita sa mga kapangulohan sa Relief Society (tan-awa sa 29.3.4).

Pinaagi sa iyang pagserbisyo, ang presidente sa Relief Society sa ward nagsuporta sa bishop sa pagtutok sa kabatan-onan ug sa iyang talagsaon nga mga responsibilidad.

9.3.2.3

Miting sa Kapangulohan

Ang kapangulohan sa Relief Society ug ang secretary magmiting kanunay. Ang presidente mopahigayon niini nga mga miting. Ang mga hisgotanan mahimong maglakip sa mosunod nga mga aytem:

• Magplano unsaon sa paglig-on sa mga igsoong babaye ug sa ilang mga pamilya.

• Magplano unsaon sa pagtabang nga matuman ang buhat sa Dios sa kaluwasan ug kahimayaan.

• Makigsabot sa misyonaryo nga buhat ug sa buhat sa templo ug family history.

• Motuman sa tambag ug mga buluhaton gikan sa bishop.

• Motuman sa mga buluhaton gikan sa mga miting sa konseho sa ward.

• Mainampoong mokonsiderar sa mga buluhaton sa pagpangalagad.

• Morebyo sa impormasyon gikan sa mga interbiyo sa pagpangalagad. Moplano og mga paagi sa pag-ila sa mga kalig-on ug motabang sa pagtubag sa mga panginahanglan. (Tan-awa sa kapitulo 21.)

• Maghunahuna og mga igsoong babaye nga moserbisyo sa mga calling ug mga buluhaton diha sa Relief Society.

• Moplano sa mga miting ug mga kalihokan sa Relief Society.

9.3.3

Secretary

Ang kapangulohan sa Relief Society morekomendar og usa ka igsoong babaye nga moserbisyo isip secretary sa Relief Society. Usa ka sakop sa bishopric ang motawag kaniya, mopresentar kaniya alang sa pagpaluyo diha sa panagtigom alang sa Sakramento, ug mo-set apart kaniya.

Ang mga responsibilidad sa secretary mahimong maglakip sa mosunod:

• Mag-andam sa mga hisgotanan alang sa mga miting sa kapangulohan ug sa mga miting sa Relief Society.

• Mosulat sa gihisgotan diha sa mga miting ug mosubay sa mga buluhaton.

• Mo-eskedyul og mga interbiyo sa pagpangalagad (tan-awa sa 21.3).

• Moandam ug mosumiter sa matag tulo ka bulan nga mga report sa nanambong ug sa gidaghanon sa gipahigayon nga mga interbiyo sa pagpangalagad.

• Motabang sa pag-andam og tinuig nga badyet ug mosubay sa mga galastohan.

9.3.4

Dugang nga mga Calling

Ang mosunod nga dugang nga mga calling mahimong makatabang. Ang bishop ug ang presidente sa Relief Society maghisgot kon kini gikinahanglan ba.

• Mga magtutudlo sa Relief Society nga motudlo sa mga miting sa Dominggo.

• Usa ka service coordinator nga motabang sa pagplano ug pagpahigayon sa serbisyo ngadto sa mga tawo nga nanginahanglan (tan-awa sa 9.2.2.2). Mga kaabag ug mga sakop sa komitiba mahimo usab nga tawagon.

• Usa ka activity coordinator nga motabang sa pagplano ug pagpahigayon sa mga kalihokan sa Relief Society (tan-awa sa 9.2.1.3). Mga kaabag ug mga sakop sa komitiba mahimo usab nga tawagon.

• Kaabag nga mga secretary nga motabang sa secretary sa Relief Society.

• Tigpangalagad nga mga secretary nga moorganisar og mga interbiyo sa pagpangalagad ug motabang sa pag-andam sa matag tulo ka bulan nga mga report.

Kon kini o ang ubang mga calling gikinahanglan, ang kapangulohan sa Relief Society morekomendar og mga igsoong babaye nga moserbisyo. Sila mohimo niini nga mga rekomendasyon ngadto sa bishopric. Kon ang bishopric motugot, ang usa ka sakop sa bishopric motawag kanila. Siya mopresentar kanila alang sa pagpaluyo diha sa miting sa panagtigom alang sa sakramento ug mo-set apart kanila.

Kon gikinahanglan, ang kapangulohan sa Relief Society mahimong mosangon sa mga igsoong babaye sa pagtabang sa mga paningkamot sa Relief Society sa ubang mga paagi. Ang mga igsoong babaye nga dunay mubo og tagal nga mga buluhaton dili kinahanglan nga tawagon ug i-set apart.

9.4

Pagtabang sa Young Women nga Makaandam sa Pag-apil sa Relief Society

Ang kapangulohan sa Relief Society makigtambayayong sa mga batan-ong babaye, sa ilang mga ginikanan, ug sa mga lider sa Young Women aron sa pagtabang sa mga batan-ong babaye nga mangandam sa pag-apil sa Relief Society.

Ang mga lider mohatag usab og nagpadayon nga mga oportunidad alang sa mga batan-ong babaye ug sa mga igsoong babaye sa Relief Society sa pagpalambo og mga relasyon. Ang dungan nga pagserbisyo isip tigpangalagad nga mga igsoong babaye usa ka bililhon nga paagi aron magkasuod.

Ang mga lider motabang sa mga batan-ong babaye nga makasabot sa ilang mga responsibilidad sa pakigsaad. Kon makatabang nga ang usa ka batan-ong babaye mangalagad ngadto sa usa ka piho nga igsoong babaye, siya mahimong sangonan isip tigpangalagad nga igsoong babaye kon siya andam, makahimo, ug hingkod na. Siya mahimong sangonan sugod sa tuig nga siya mag-edad na og 14. Ang mga batan-ong babaye moserbisyo isip mga kompanyon ngadto sa mga igsoong babaye nga Relief Society (tan-awa sa 21.2.2).

Kon ang mga young adult moapil sa Relief Society, ang kapangulohan sa Relief Society mohatag kanila og mga oportunidad sa paserbisyo ug sa pagpakigbahin sa ilang mga kalig-on. Ang kapangulohan motabang usab kanila sa pag-andam sa paghimo ug pagtuman sa sagrado nga mga pakigsaad sa templo (tan-awa sa 27.1.1).

9.5

Mga Lider sa Relief Society sa Stake

Ang presidente sa stake motawag ug mo-set apart og usa ka igsoong babaye nga moserbisyo isip presidente sa Relief Society sa stake. Kon ang usa ka stake may igong gidak-on, siya morekomendar og usa o duha ka hamtong nga mga babaye nga moserbisyo isip mga magtatambag ug ang laing usa moserbisyo isip secretary. Kini nga mga babaye tawagon ug i-set apart sa usa ka sakop sa kapangulohan sa stake o sa gisangonan nga high councilor. Alang sa impormasyon mahitungod sa mga responsibilidad sa kapangulohan sa Relief Society ug secretary diha sa stake, tan-awa sa 6.7.1 ug 6.7.3.

Ang presidente sa stake makigmiting kanunay (dili mominos kada bulan) uban sa presidente o kapangulohan sa Relief Society sa stake. Sila magtinambagay mahitungod sa buhat sa Dios sa kaluwasan ug kahimayaan. Sila usab maghisgot (1) sa kauswagan ug mga panginahanglan sa mga igsoong babaye diha sa stake ug (2) mga miting, instruksiyon, ug mga kalihokan sa Relief Society.

Ang kapangulohan sa Relief Society sa stake motudlo sa mga kapangulohan sa Relief Society sa ward sa ilang mga responsibilidad alang sa pagpangalagad, misyonaryo nga buhat ug sa buhat sa templo ug family history. Sila mohimo niini ubos sa direksyon sa kapangulohan sa stake. Ang mga high councilor sangonan nga moabag. Tan-awa sa 23.1 ug 25.2.

Kon ang stake adunay komite sa mga young single adult, usa ka sakop sa kapangulohan sa Relief Society sa stake ang moserbisyo niini. Ingon usab niana kon ang stake adunay komite sa single adult. (Tan-awa sa 14.1.1.2.)

9.6

Dugang nga mga Lagda ug mga Palisiya

9.6.1

Mga Miyembro nga adunay mga Kakulangan

Ang kapangulohan sa Relief Society mohatag og piho nga pag-atiman ngadto sa mga miyembro nga adunay mga kakulangan. Alang sa impormasyon mahitungod sa pagtabang niini nga mga miyembro, tan-awa sa disability.ChurchofJesusChrist.org; tan-awa usab sa 38.8.27 niini nga tamdanan nga basahon.

9.6.2

Literacy [Kahibalo sa pagbasa ug pagsulat]

Kon gikinahanglan, ang kapangulohan sa Relief Society makigtambayayong sa bishop, sa kapangulohan sa korum sa mga elder, ug sa konseho sa ward sa pagtabang sa mga miyembro nga makat-on sa pagbasa ug pagsulat.