9.

Doulul eo an Kōrā ro

9.1

Jibadbad eo im Doulul eo

Doulul eo an Kōrā ej jipan̄ ajri ro nejin Anij kōppopo n̄an jepļaakļo̧k n̄an Ippān. Āinwōt leddik ro nejin Jemed im Jined Ilan̄, membōr ro ilo Doulul eo an Kōrā rej “tipdiki jeje ko rekwojarjar,” “kōketak kabun̄ in,” lōn̄aj bōro ko, im “eddāp n̄an bujen ko [rekar] kōm̧m̧ani” (Katak im Bujen Ko 25:7, 13).

9.1.1

Jibadbad

Doulul eo an Kōrā ro ej juon doulul eo ekwojarjar kar karōke n̄an kōrā ro rerūtto ilo Kabun̄ in. Rikanaan Josep Smith ekar katakin bwe jibadbad eo an Doulul eo an Kōrā ro ej n̄an lo̧mo̧o̧ren jetōb ko im kōmeraik en̄taan ko. Ekar kwaļo̧k bwe Kabun̄ eo an Jisōs Kraist ekar jab lukkuun ejaak mae tōre eo doulul eo an sister ro kar ejaak.

Ro uwaan Doulul eo an Kōrā ro rej jerbal ippān doon n̄an jipan̄ kōtōprak jerbal in lo̧mo̧o̧r eo an Anij im mour ijo eutiej tata. Rej jerbal ro jet, kakūrm̧ool eddo ko an bujen eo, kalōk bōro kuk, im ekkatak im mour kōn katak ko.

Unin tōl eo an Doulul eo an Kōrā ro ej “Yokwe e jāmin jako” (1 Korint 13:8). Unin tōl in ej waļo̧k ilo jiiļ eo an Doulul eo an Kōrā ro.

9.1.2

Ro uwaan Doulul eo an Kōrā ro

Doulul eo an Doulul eo an Kōrā ej juon jem̧doon in sister ro ejjeļo̧k jem̧ļo̧kin. Aolep kōrā ro rerūtto 18 iiō im rūttoļo̧k rej mem̧bōr ro an Doulul eo an Kōrā ro. Rej membōr ro men̄e rejjab maron̄ pād ilo kweilo̧k ko an Doulul eo an Kōrā ro.

Juon jiron̄ emaron̄ jino pād ilo Doulul eo an Kōrā ro ke ej jejjet 18 an iiō. Ej kapilōk ippān ro jinen im jemān im bisop kōn iien. N̄e 19 an iiō ak n̄e ej em̧m̧akūt jān m̧ōko, āinwōt n̄an pād ilo juon university ak mijen, ej aikuj bōk koņaan ilo Doulul eo an Kōrā ro.

Kōrā ro em̧ōj aer m̧are ium̧win 18 iiō rej barāinwōt membōr in Doulul eo an Kōrā ro.

N̄an meļeļe ko kōn m̧am̧a im baba ro rejjan̄in m̧are ilaļ in 18 iiō, lale 38.1.5.

9.1.3

Ukukōt n̄an Aikuj ko an Jikin eo

Jet ward eļap oran kōrā ro rerūtto me rej niknik. N̄an ward kein, bisop eo im stake būreejtōn eo remaron̄ kōmālim an wōr elōn̄ļo̧k jān juon Doulul eo an Kōrā ro an ward. Kajjojo Doulul an Kōrā ro ewōr aer make būreejtōnji. Eļan̄n̄e ekkar, kajjojo Doulul eo an Kōrā ro rej aikuj wōr aer membōr ro me eoktak iiō ko aer jān doon im kapāāl.

9.2

Bōk Koņaad ilo Jerbal in Lo̧mo̧o̧r eo an Anij im Mour Ijo Eutiej Tata

Anij ej kūr aolep n̄an itok n̄an Kraist im bōk kuņaan ilo jerbal in lo̧mo̧o̧r eo an Anij im mour ijo eutiej tata kōn:

• Mour kōn gospel eo an Jisōs Kraist.

• Kea kōn ro rej aikuj.

• Karuwaineneik aolep n̄an bōk gospel eo.

• Kakobaik baam̧le ko n̄an mour indeeo.

Ritōl ro an Doulul eo an Kōrā ro rej karōke kweilo̧k ko aer ilo Jabōt, m̧akūtkūt ko, jerbal in karejar, jerbal in jipan̄, im ikitōltōl ko jet n̄an jipan̄ kōrā ro bōk koņaer ilo jerbal in lo̧mo̧o̧r eo an Anij im mour ijo eutiej tata. Ro uwaan Doulul eo an Kōrā ro im doulul eo elder ro rej jerbal ilo bōro kuk n̄an kōtōprak jerbal in.

N̄an meļeļe ko reļļapļo̧k kōn jerbal in lo̧mo̧o̧r eo an Anij im mour ijo eutiej tata, ekkatak jebta 1).

9.2.1

Mour kōn Gospel eo an Jisōs Kraist

Ritōl ro an Doulul eo an Kōrā ro rej rie membōr ro ilo aer mour kōn gospel eo an Jisōs Kraist. Rej kwaļo̧k aorōkin kōmmoururi tōmak ko, ukweļo̧k, kōļapļo̧k un̄n̄are peid make, im kōm̧m̧ani bujen ko ippān Anij ilo ad bōk kain̄i ko. Kain̄i ko jet ekoba menin letok kwojarjar ko an tampeļ. Lale 1.2.1.

9.2.1.1

Ekkatak kōn Gospel eo ilo M̧ōko

N̄e membōr ro rej ekkatak im mour kōn gospel eo ilo m̧ōko m̧wer, oktak in mour ko aer n̄an Jemedwōj Ilan̄ im Jisōs Kraist ej m̧wūlaļļo̧k. Ritōl ro an Doulul eo an Kōrā ro rej kōketak sister ro n̄an ekkatak jeje ko rekwojarjar im naan ko an rikanaan ro remour, ippān kajjojo armej im ippān baam̧le ko aer. Itok, Ļoor Eō im kein jipan̄ ko jet remaron̄ jipan̄ ekkatak ko aer.

Nokon in Jota ko rej juon wāween eaorōk n̄an ekkatak kōn gospel eo ilo m̧ōko. Ekkā aer kōm̧m̧an kajjojo wiik ilo Jabōt, ilo joteen in M̧ande, ak ilo bar juon iien. Remaron̄ kobaik jar ko, ekkatak kōn gospel eo, naan in kam̧ool ko, al, im m̧akūtkūt in kalimomo ko.

9.2.1.2

Ekkatak kōn Gospel eo ilo Kweilo̧k ko an Doulul eo an Kōrā ro

Kōrā ro rej jelm̧ae doon ilo Jabōt ko n̄an un kein rej ellajrak:

• Kōkajoorļo̧k tōmak.

• Kalōk bōro kuk.

• Kōkajoorļo̧k baam̧le ko im m̧ōko.

• Kejeikiik jerbal ko n̄an jipan̄ jerbal in lo̧mo̧o̧r im mour indreo an Anij ilo ward eo.

Kweilo̧k ko rej kōm̧m̧an ilo Jabōt ruo im emān ilo kajjojo allōn̄. 50 minit aeitokan. Būreejtōnji eo an Doulul eo an Kōrā ro rej karōk ak peek kweilo̧k kein. Juon membōr in būreejtōnji ej tōl.

Kweilo̧k eo ej ijjino kōn jar. Innem juon membōr in būreejitōnji eo ej tōl kōrā ro ilo kapilōk doon ium̧win ļalem minit ko kake apan̄ ko rej jelet er, aikuij ko, im iien jipan̄ ko rem̧m̧an. Peped ioon Rilo̧mo̧o̧r eo ilo kapilōk enaaj jipan̄ kōrā ro ejaake naan in kam̧ool ko aer, bōk kain̄i ko an tampeļ, kejparok bujen ko, im kaļapļo̧k jerbal aer jerbal in karejar. Būreejtōnji eo Eutiej an Doulul an Kōrā ro ej kālet unin tōl ko n̄an kenono pedped ioon aikuij ko an kōrā ro.

Iien ko rebwe rej jerbal n̄an kōmeļeļe in katak ko an gospel eo im ekkōnono ko. Kweilo̧k ko an doulul rej mije wōt unin kōnono ko ilo juon ak ruo ekkōnono ko jān kweilo̧k eo eļap im ekāāl tata. Doulul eo an Kōrā ro rej jaje kake n̄an kālet enaan ko jān kwelo̧k eo eļap n̄an an kōrā ro kenono kaki. They make these selections based on sisters’ needs.

Al al in jar ko n̄an kōkm̧anm̧an im kōļapļo̧k juon katak.

Kweilo̧k ko rej aikuj jem̧ļo̧k kōn jar.

Doulul eo an Kōrā im elder ro remaron emakijkij koba ippen doon nan katak ilo Jabōt. Kwelo̧k kein rej karōk jān bisoprik eo im būreejitōnji kōrā ro im doulul eo an korā im elder ro.

N̄an meļeļe ko reļļapļo̧k, lale “To Sit in Council.”

9.2.1.3

M̧akūtkūt ko

Būreejtōnji ro an Doulul eo an Kōrā ro remaron̄ karōk m̧akūtkūt ko. Būreejitōn eo ej eddoik aolep m̧akitkit ko. Emaron̄ kajjitōk ippān juon rikakpilōklōk ak bar juon sister n̄an bōk tōl eo ilo an karōke im kōm̧m̧ani (lale 9.3.4). Būreejtōnji eo ej ekkōnono kōn m̧akūtkūt ko ippān bisop eo āinwōt m̧ōttanļo̧k karōk ko aer.

Aolep m̧akitkit rej aikuij kōkajoorļo̧k kōtōpar ko an kōrā ro im leļo̧k iien ko rem̧m̧an n̄an aer kuktok im jipan̄ doon. Aolep m̧akitkit rej aikuij jipan̄ katōbrak kōtōpar ko an Doulul eo an Kōrā ro (lale 9.1 im 9.1.1). N̄an meļeļe ko reļļapļo̧k kōn m̧akūtkūt ko an Doulul eo an Kōrā ro ilo stake, lale 6.7.1.

9.2.2

Kea kōn Ro Riaikuj

Āinwōt rikaļoor ro an Jisōs Kraist, sister ro ewōr juon aer eddo n̄an tōpar ro rej aikuj ilo iakwe. Kajjojo armej im āinwōt Doulul eo an Kōrā ro, rej kappukot wāween ko n̄an jipan̄ ro jet ilo ward eo im jukjukin pād eo. Ijo ewōr ie, JustServe.org ej elmakot e iien ko rem̧m̧an n̄an jipan̄ ilo jukjukin pād ko.

N̄an meļeļe ko reļļapļo̧k kōn wāween an membōr ro an Doulul eo an Kōrā ro im doulul eo an elder ro kōn kea kōn ro rej aikuj, lale 22.6.2.

9.2.2.1

Jerbal in Karejar

Jerbal in karejar ej kea kōn ro jet āinwōt an nej kar Rilo̧mo̧o̧r kea. Sister or rej bōk ijjitōn̄ in jerbal in karejar jān Būreejtōnji eo an Doulul an Kōrā ro. N̄an meļeļe ko reļļapļo̧k, lale jebta 21.

9.2.2.2

Aikuj ko ilo Juon Iien Ekadu Kitien

Sister ro rej jerbal in karejar rej kappukot n̄an meļeļe im kake aikuj ko an ro rej jerbal. Membōr ro remaron̄ aikuj jipan̄ ilo juon iien ekadu kitien ilo iien nan̄inmej, ļotak, mej, luuji jerbal, im jekjek ko jet.

Eļan̄n̄e emenin aikuj, sister ro rej jerbal in karejar rej kajjitōk ippān būreejtōnji eo an Doulul eo an Kōrā ro n̄an jipan̄. Būreejtōnji eo emaron̄ leļo̧k ļōmņak in n̄an kūr juon service coordinator n̄an ejaake im karōk kijejeto kein (lale 9.3.4).

Doulul eo an Kōrā ro im doulul eo an elder ro rej kōtōbalbal kijejeto ko n̄an ņa mejļan aikuj ko me rekadu kitieer (lale 22.3.2). Bisop eo emaron̄ letok jipan̄ jān joortak in jitlo̧k ko eļan̄n̄e emenin aikuj.

Ilo bar jet jikin, ewōr an bisop eo maron̄ n̄an kāālet n̄an leļo̧k jipan̄ n̄an membōr ro ilo an kōm̧m̧ane wōrtōr eo an ikkijeen m̧ōn̄ā im aikuj ko jet. Bisop eo ekkā an jitōn̄ būreejtōn eo an Doulul eo an Kōrā ro n̄an loļo̧k membōr ro bwe ren kanne peba in wōrtōr eo. Ijoke, emaron̄ barāinwōt jitōn̄ būreejtōn eo an doulul eo an elder ro. Juon rikakpilōklōk ilo Doulul eo an Kōrā ro ak būreejtōnji eo an doulul eo an elder ro remaron̄ jitōn̄ er eļan̄n̄e būreejtōn eo ejjab maron̄ pād. Ritōl eo em̧ōj jitōn̄e ej leļo̧k peba in kanne eo em̧ōj kanne n̄an bisop eo n̄an kōweppāne.

N̄an meļeļe ko reļļapļo̧k, lale 22.6.4.3 im “Welfare Resources” ilo Leader and Clerk Resources.

9.2.2.3

Aikuj ko ilo juon iien Eaitok Kitien im Un̄n̄are Peid Make

Āinwōt an kōtōbalbal jān bisop eo, būreejtōnji ko an Doulul eo an Kōrā ro im doulul eo an elder ro rej jipan̄ membōr ro kōn aikuj ko aer ilo juon iien eaitok kitien im kōn un̄n̄are peid make. Rej katakin pedped ko an un̄n̄are peid make ilo kanniōk im jetōb. Lale jebta 22 im “Self-Reliance” ilo Gospel Library app.

Eļan̄n̄e juon armej ak juon baam̧le ej aikuj jipan̄, būreejtōn ro an Doulul eo an Kōrā ro im doulul eo an elder ro rej kapilōk doon ium̧win tōl eo an bisop kōn wāween jipan̄ (lale 22.4).

Būreejtōn eo an Doulul eo an Kōrā ro, būreejtōn eo an doulul eo an em̧m̧aan ro, ak bar juon ritōl ej jipan̄ armej eo ak baam̧le eo ejaake juon Self-Reliance Plan. Sister ak Brother ro rej jerbal in karejar remaron̄ bar jipan̄ kōn karōk eo. Ekkā, membōr ro jet an Doulul eo an Kōrā ro ak doulul eo an em̧m̧aan ro emaron̄ wōr aer kapeel ko ak en̄jake me emaron̄ jipan̄. Aolep ro rej jipan̄ dāpij meļeļe ilo ittino̧. N̄an meļeļe ko reļļapļo̧k, lale 22.3.3 im 22.8.

9.2.2.4

N̄e juon Ward Membōr Emej

N̄e juon ward membōr emej, būreejtōnji ko an Doulul eo an Kōrā ro im doulul eo an em̧m̧aan ro rej aikuj leļo̧k kaenōm̧m̧an im jipan̄. Ium̧win tōl eo an bisop eo, remaron̄ jipan̄ kōn ilomej eo.

N̄e emaron̄, membōr ro remej me rekar bōk menin letok kwojarjar eo rej kallūb ak tūļe er ilo aer kaņōk nuknuk in tampeļ ko. Ānbwinin juon kōrā emaron̄ kanuknuki jān ļeo pāleen ak jān juon kōrā uwaan baam̧le eo an me em̧ōj an bōk menin letok kwojarjar eo. N̄e juon membōr ejjab maron̄ pād ilo iien eo ak rejjab kōņaan kanuknuki, bisop eo emaron̄ kajjitōk ippān būreejtōn eo an Doulul eo an Kōrā ro n̄an kajjitōk ippān juon sister n̄an kanuknuki ānbwin eo ak lale aer kanuknuki. N̄an meļele ko reļļapļo̧k, lale 38.5.10.

Būreejtōnji eo an Doulul eo an Kōrā ro im doulul eo an em̧m̧aan ro, jerbal in karejar jeid ak jatid m̧aan im kōrā ro, im ro jet rej wōnm̧aanļo̧k wōt n̄an leļo̧k jipan̄ im kaenōm̧m̧an ālkin ilomej eo.

9.2.3

Karuwaineneik Aolep n̄an Bōk Gospel eo

Membōr ro ilo Doulul eo an Kōrā ro ewōr juon aer eddo n̄an karuwaineneik aolep n̄an bōk kōjeraam̧m̧an ko an gospel eo an Jisōs Kraist (lale Mosaia 18:9). Rej kōm̧m̧an menin ilo aer kwaļo̧k gospel eo, kōkajoorļo̧k membōr ro rekāāl, im tōpar ro eto aer bar jar. Lale 23.2 im 23.3.

Ilo kweilo̧k ko an būreejtōnji im Doulul eo an Kōrā ro, būreejtōnji eo an Doulul eo an Kōrā ro rej ekkōnono kōn wāween an sister ro maron̄ karuwaineneik aolep n̄an bōk kōjeraam̧m̧an ko an gospel eo. (Lale 23.1.1, 23.1.2, im 23.1.3.

Būreejtōn eo an Doulul eo an Kōrā ro ej jitōn̄ juon membōr in būreejtōnji eo n̄an jipan̄ tōl jerbal ko n̄an jaketo jaketak gospel eo ilo ward eo. Ej jerbal ippān membōr eo kar jitōn̄e an būreejtōnji eo an doulul eo an elder ro n̄an kōtōbalbal kijejeto kein (lale 23.6.2).

Membōr eo kar kappeik jān būreejtōnji eo an Doulul an Kōrā ro ej bōk koņaan ilo kōtōbalbal kweilo̧k ko n̄an kejeikiik karuwainene ko an aolep n̄an bōk kōjeraam̧m̧an ko an gospel eo. Ritōl eo an mijen ilo ward eo, eo im emaron̄ juon membōr in būreejtōnji eo an doulul eo an elder ro, ej tōl kweilo̧k kein. Mijenede ro an ward eo, juon rijipan̄ ilo doulul eo an pris ro, im juon uwaan būreejtōnji eo an kūlaaj eo erūtto ilo Doulul eo an Jiron̄ ro, im full time mijenede ro rej jerbal rej bōk koņaer. Lale 23.4.

9.2.4

Kakobaik Baam̧le ko n̄an Mour Indeeo

Ro uwaan Doulul eo an Kōrā ro rej rie membōr ro ilo aer kakobaik baam̧le ko n̄an indeeo. Menin ekoba:

• Kōm̧m̧an bujen ko ippān Anij ilo ad bōk kain̄i ko, ekoba menin letok kwojarjar an tampeļ.

• Kōm̧m̧ane jerbal ko an tampeļ im menmenbwij ko an baam̧le (lale 1.2.4).

Ilo kweilo̧k ko an Doulul eo an Kōrā ro im būreejtōnji ro, būreejtōnji eo an Doulul eo an Kōrā ej ekkōnono kōn wāween an sister ro maron̄ bōk koņaer ilo kijejeto kein. Ro uwaan būreejtōnji eo rej barāinwōt karōk wāween ko n̄an jipan̄ membōr ro kōļapļo̧k meļeļe eo aer kōn im ikdeelel n̄an būki kain̄i ko rekwojarjar n̄an kōm̧m̧ani bujen ko ippān Anij ilo tampeļ eo. Rej kōketak sister ro n̄an kabun̄ jar ilo tampeļ eo iien otemjej ijo epidodo.

Būreejtōnji eo ej kōketak sister ro n̄an katak kōn menmenbwij in baam̧le ko aer. Rej jipan̄ membōr ro rekāāl im rej bar ro̧o̧ltok, membōr ro rekāāl an Doulul eo an Kōrā ro, im mijeneede ro rekāāk rej kab kūr kappukōt im kōpooj etan rūtto ro aer n̄an kain̄i ko an tampeļ.

Būreejtōn eo an Doulul eo an Kōrā ro ej jitōn̄ juon membōr in būreejtōnji eo n̄an j̄ipan̄ tōl jerbal eo an tampeļ im menmenbwij an baam̧le ilo ward eo. Liin ej jerbal ippān membōr eo kar jitōn̄e an būreejtōnji eo an doulul eo an elder ro n̄an kōtōbalbal kijejeto kein (lale 25.2.2).

Membōr eo kar jitōn̄e an būreejtōnji eo an Doulul eo an Kōrā ro ej bōk koņaer ilo kweilo̧k in kōtōbalbal ko n̄an kōtōbalbal jerbal in tampeļ im menmenbwij an baam̧le. Kweilo̧k kein rej kōm̧m̧an emakijkij. Ritōl eo an ward tampeļ eo im menmennbwij an baam̧le, eo emaron̄ juon membōr in būreejtōnji eo an doulul eo an elder ro, ej tōl jerbal in tampeļ im menmenbwij an baam̧le (lale 25.2.7). Rej barāinwōt kobaik juon rijipan̄ ilo doulul eo an pris ro, juon membōr in būreejtōnji eo an kūlaaj eo erūtto an Doulul eo an Jiron̄ ro, im consultant ro an jerbal ko an tampeļ im menmenbwij an baam̧le.

9.3

Ritōl ro an Doulul eo an Kōrā ro

9.3.1

Bisop

Bisop eo ej kweilo̧k ippān būreejtōn eo an Doulul diktata allōn̄ otemjej. Er rej ekōnono kōn jerbal in lo̧mo̧o̧r eo an Anij im mour ijo eutiej tata, ekoba jerbal in jipan̄ eo an sister in jerbal in karejar ro. Rej bar ekkōnono kōn (1) eddōkļo̧k ko im aikuj ko an sister ro ilo ward eo im (2) kweilo̧k ko an Doulul eo an Kōrā ro, kōmeļeļe ko, im m̧akūtkūt ko.

9.3.2

Būreejtōnji eo Eļap an Doulul an Kōrā ro

9.3.2.1

Kūr juon Būreejtōni an Doulul eo an Kōrā ro

Bisop eo ej kūr juon kōrā n̄an jerbal āinwōt būreejtōn eo an Doulul eo an Kōrā ro. Eļan̄n̄e iunit eo ebwe an kilep, ej leļo̧k ļōmņak in n̄an e kōn juon ak ruo kōrā n̄an jerbal āinwōt rikakpilōklōk ro an. Bisoprik eo ej kile ļōmņak im kajjitōk in n̄an leļo̧k kūr ko.

Juon membōr in bisoprik eo ej kwaļo̧k etan ro uwaan būreejtōnji eo ilo kweilo̧k in kwojkwoj n̄an rejetak. Bisop eo ej kōjenoļo̧ke būreejtōn eo an Doulul eo an Kōrā ro. Jabdewōt membōr in bisoprik eo emaron̄ kōjenolo̧k rikakpilōklōk ro an kōrā eo.

Jet iunit jiddik emaron̄ jab wōr juon būreejtōn an Doulul eo an Jiron̄ ro ak Būraimere. Ilo iunit in, būreejtōn eo an Doulul eo an Kōrā emaron̄ jipan̄ jinen im jemān ajri ro karōk kōmeļeļe ko n̄an jodikdik im ajri ro.

9.3.2.2

Eddo ko

Būreejtōn eo an Doulul eo an Kōrā ro ewōr ippāer eddo kein rej ellaajrak. Rikakpilōklōk ro an rej jipan̄ e.

• Jerbal ilo ward ko̧o̧njeļ eo. Liin ej jerbal āinwōt (1) juon membōr in ko̧o̧jeļ eo ņa mejļan aikuj k ilo ward eo im pukōt uwaak ko im (2) juon eo ej jutak ilo etan Doulul eo an Kōrā ro (lale 29.2.5).

• Tōl kijejeto ko an Doulul eo an Kōrā ro n̄an bōk koņaad ilo jerbal in lo̧mo̧o̧r eo an Anij im mour ijo eutiej tata (lale jebta 1).

• Karōk im eddoik jerbal ko an sister ro rej jerbal in karejar. Kōjeikiik ijjitōn̄ ko an jerbal in karejar ippān būreejtōnji eo an doulul eo an em̧m̧aan ro, kweilo̧k diktata juon kōttan ilo aolep kuwōta. Kappukot mālim an bisop eo n̄an ijjitōn̄ ko an jerbal in karejar. Kōm̧m̧ani intōrpiu in jerbal in karejar diktata ļo̧kin jilu allōn̄ ak juon kuwōta. Lale jebta 21.

• Ium̧win tōl eo an bisop eo, kapilōk ippān membōr ro rerūtto an ward eo (lale 31.1 im 31.3). Bisop eo wōt ej kapilōk membōr in ward eo kōn men ko raorōk ikkijeen mour erreo, kakkure, im kōmālim n̄an kōjerbal jāān in joortak in jitlo̧k ko. Lale Counseling Resources. Kōn meļeļe ko kōn kakkure, lale 38.6.2.

• Ippān būreejtōnji eo an doulul eo an elder ro, jipan̄ tōl kijejeto ko ilo ward eo n̄an karuwaineneik aolep n̄an bōk kōjeraam̧m̧an ko an gospel eo (lale 8.2.3 im 9.2.3).

• Ippān būreejtōnji eo an doulul eo an elder ro, jipan̄ tōl jerbal ko an tampeļ im menmenbwij ko an baam̧le ilo ward eo (lale 8.2.4 im 9.2.4).

• Lale kijejeto ko an Doulul eo an Kōrā ro n̄an kōkajoorļo̧k sister ro rem̧m̧an ded ilo ward eo, jim̧ōr ro rejjan̄in m̧are im em̧ōj aer m̧are. Juon rikakpilōklōk emaron̄ ijjitōn̄ n̄an jerbal ippān rūm̧man ded ro (lale 14.1.2.2).

• Kweilo̧k ippān kajjojo ro uwaan Doulul eo an Kōrā ro diktata juon kōttan juon iiō. Ekkōnono kōn mour eo an sister eo im baam̧le eo an.

• Katakin kōrā ro kōn bujen ko an jerbal im kōjeram̧m̧an ko, ekoba kōjeram̧m̧an ko rej itok jān kajoor in priesthood eo jān Anij (lale 3.5 im 3.6). Jipan̄ er meļeļe kōn kajoor, kejparok, tōl, lan̄lōn̄, im ainem̧m̧an eo ej itok jān ejaake juon bujen jemjerā ippen Jemed Ilan̄.

• Eddoik im jipan̄ kōkm̧anm̧anļo̧k wāween katakin ilo Doulul eo an Kōrā ro (lale jebta 17).

• Karōk im kōjeikiik kweilo̧k ko an Doulul eo an Kōrā ro.

• Eddoik m̧akūtkūt ko an Doulul eo an Kōrā ro (lale 9.2.1.3).

• Jipan̄ jiron̄ ro kōppopo n̄an bōk koņaer ilo Doulul eo an Kōrā ro (lale 9.4).

• Eddoik rekoot ko, riboot ko, im jāān ko an Doulul eo an Kōrā ro (lale LCR.ChurchofJesusChrist.org). Juon rijeje eo emaron̄ jipan̄ (lale 9.3.3).

Stake Būreejtōnji eo an Doulul eo an Kōrā ro rej katakin būreejtōnji eo an Doulul eo an Kōrā ro kōn eddo kein aer. Rej maron̄ kōm̧m̧ane menin ilo iien kweilo̧k ko an ritōl an stake, kweilo̧k ko an būreejtōnji eo an Doulul eo an Kōrā ro an ward, im loļo̧k ko an juon make ippān būreejtōn ro an Doulul eo an Kōrā ro (lale 29.3.4).

Kōn jipan̄ eo an, būreejtōn eo an Doulul eo an Kōrā ro ilo ward eo ej rie bisop eo ilo an mije wōt jodikdik ro im eddo ko jet an me rejenoļo̧k.

9.3.2.3

Kweilo̧k an Būreejtōnji

Būreejtōni eo an Doulul eo an Kōrā ro im rijeje eo rej kweilo̧k ippān doon emakijkij. Būreejtōn eo ej kōjeikiik kweilo̧k kein. Laajrak in kobban kweilo̧k ko remaron̄ koba aitōm̧ kein rej ellajrak:

• Karōk wāween n̄an kōkajoorļo̧k sister ro im baam̧le ko aer.

• Karōk ekōjkan n̄an jipan̄ kōtōprak jerbal in lo̧mo̧o̧r eo an Anij im mour ijo eutiej n̄tata.

• Loloorjake jerbal in mijenede im jerbal an tampeļ im menmenbwij an baam̧le.

• Eo̧ron̄ kapilōk im ijjitōn̄ ko jān bisop eo.

• Eo̧ron̄ ijjitōn̄ ko jān kweilo̧k ko an ward ko̧o̧njeļ eo.

• Jar ilo am̧ ļōmņak kōn ijjitōn̄ ko an jerbal in karejar.

• Etale meļeļe ko jān intōrpiu ko an jerbal in karejar. Karōk wāween ko n̄an kakilen kajoor im jipan̄ tōpar aikuj ko. (Lale jebta 21.)

• Ļōmņake sister ro n̄an jerbal ilo kūr im ijjitōn̄ ko an Doulul eo an Kōrā ro.

• Karōk kweilo̧k im m̧akūtkūt ko an Doulul eo an Kōrā ro.

9.3.3

Rijeje

Būreejtōnji eo an Doulul eo an Kōrā ro emaron̄ leļo̧k etan juon sister n̄an jerbal āinwōt juon rijeje an Doulul eo an Kōrā ro. Juon membōr in bisoprik eo ej kūr liin, kwaļo̧k etan n̄an rejtak ilo kweilo̧k in kwojkwoj eo, im kōjenolo̧k e.

Eddo ko an rijeje eo emaron̄ koba ilo ellajrak in:

• Kōpooj laajrak in kobban kweilo̧k eo n̄an kweilo̧k ko an būreejtōnji eo im kweilo̧k eo an Doulul eo an Kōrā ro.

• Je ta ko rej kweilo̧k kake ilo iien kweilo̧k im lali ijjitōn ko.

• Jikejuuļi intōrpiu in jerbal in karejar ko (lale 21.3).

• Kōpooj im leļo̧k riboot ko kajjojo kuwōta kōn armej ro rej pād ilo kūlaaj im oran intōrpiu ko an jerbal in karejar me rekar kōm̧m̧an.

• Jipan̄ kōpooj juon bajet kajjojo iiō im lale jon̄an joļo̧k jāān.

9.3.4

Kūr ko Jet

Kūr ko jet me rej ellajrak me remaron̄ jipan̄. Bisop eo im būreejtōn eo an Doulul eo an Kōrā ro rej ekkōnono eļan̄n̄e emenin aikuj.

• Rūkaki ro an Doulul eo an Kōrā ro rej n̄an katakin ilo iien kweilo̧k ko an Jabōt.

• Juon service coordinator ej n̄an jipan̄ karōk im kōm̧m̧an jipan̄ ko n̄an armej ro rej pād ilo aikuj (lale 9.2.2.2). Rijipan̄ im ro uwaan kamiti eo maron̄ bar kūr er.

• Juon coordinator ikkijeen m̧akūtkūt n̄an jipan̄ karōk im kōm̧m̧ani m̧akūtkūt ko an Doulul eo an Kōrā ro (lale 9.2.1.3). Rijipan̄ ro im ro uwaan kamiti eo maron̄ bar kūr er.

• Rijipan̄ rijeje eo ej n̄an jipan̄ rijeje eo an Doulul eo an Kōrā ro.

• Rijeje eo an jerbal in karejar ej n̄an karōk intōrpiu ko an jerbal in karejar im jipan̄ kōpooj riboot ko an kajjojo kuwōta.

Eļan̄n̄e kūr kein im ko jet remenin aikuj, būreejtōnji eo an Doulul an Kōrā ro rej leļo̧k etan sister ro n̄an jipan̄. Rej leļo̧k ļōmņak im et ko n̄an bisoprik eo. Eļan̄n̄e bisoprik eo ej kōmālimi, juon membōr in bisoprik eo ej kūr er. Ej kwaļo̧k etaer n̄an rejetak ilo juon kweilo̧k in kwojkwoj eo im kōjenolo̧k er.

Āinwōt an menin aikuj, būreejtōnji eo an Doulul eo an Kōrā ro remaron̄ jitōn̄ sister ro n̄an jipan̄ ilo kijejeto ko an Doulul eo an Kōrā ro ilo wāween ko jet. Sister ro ilo kain kamiti ko rejjab aikuj in kūr im kōjeno̧lo̧k.

9.4

Jipan̄ Kōpooj Doulul eo an Jiron̄ ro n̄an Bōk Koņaer ilo Doulul eo an Kōrā ro

Būreejtōnji eo an Doulul eo an Kōrā ro rej jerbal ippān jiron̄ ro, pāāren ro aer, im ritōl ro an Doulul eo an Jiron̄ ro n̄an jipan̄ jiron̄ ro kōppopo n̄an bōk koņaer ilo Doulul eo an Kōrā ro.

Ritōl ro rej leļo̧k iien ejjeļo̧k jem̧ļo̧kin n̄an jiron̄ ro im sister ro ilo Doulul eo an Kōrā ro n̄an ejaake jem̧jerā ko aer. Jerbal ippān doon āinwōt rikarejar kōrā ro ej juon iaan wāween ko raorōk n̄an epaake doon.

Ritōl ro rej jipan̄ jodikdik ro meļeļe eddo ko aer ikkijeen bujen eo aer. N̄e enaaj lukkuun jipan̄ bwe en wōr juon jiron̄ n̄an jerbal in karejar n̄an juon kōrā, maron̄ jitōn̄ e āinwōt juon rikarejar sister n̄e ekōņaan, emaron̄, im erūtto ilo ļōmņak. Maron̄ jitōn̄ e ijjino ilo iiō eo me enej 14 an iiō. Jiron̄ ro rej jerbal āinwōt kampānien ro an sister ro ilo Doulul eo an Kōrā ro (lale 21.2.2).

N̄e rūm̧man ded ro rej koba ippān Doulul eo an Kōrā ro, būreejtōnji eo an Doulul eo an Kōrā ro rej leļo̧k n̄an er iien ko rem̧m̧an n̄an jerbal im kwaļo̧k kajoor ko aer. Būreejtōnji eo ej barāinwōt jipan̄ kōpooj er n̄an kōm̧m̧an im dāpij bujen ko an tampeļ (lale 27.1.1).

9.5

Ritōl ro an Doulul eo an Kōrā ilo Stake

Būreejtōn eo an stake ej kūr im kōjeņoļo̧k juon kōrā n̄an jerbal āinwōt būreejtōn eo an Doulul eo an Kōrā ilo Stake. Eļan̄n̄e juon stake eļap uwaan, ej leļo̧k etan juon ak ruo etan kōrā rerūtto n̄an jerbal āinwōt rikakpilōklōk im bar juon n̄an jerbal āinwōt juon rijeje. Kōrā rein rej kūr im kōjeņolo̧k er jān juon membōr in stake būreejtōnji ak juon high ko̧o̧njeļ eo eutiej em̧ōj jitōn̄e. Kōn meļeļe eo kōn eddo ko an būreejtōnji eo im rijeje eo an Doulul eo an Kōrā ro ilo stake eo, lale 6.7.1 im 6.7.3.

Stake būreejtōn eo ej kweilo̧k iien otemjej (diktata allōn̄ otemjeļo̧k) ippān būreejtōn ak būreejtōnji. Rej kapilōk doon kōn jerbal in lo̧mo̧o̧r eo an Anij im mour ijo eutiej tata. Rej barāinwōt ekkōnono (1) eddōkļo̧k im aikuj ko an sister ro ilo stake im (2) kweilo̧k ko an Doulul eo an Kōrā ro, kōmeļeļe in tōl ko, im m̧akūtkūt ko.

Būreejtōnji eo an Doulul eo an Kōrā ro ej kōmeļeļeik būreejtōnji ko an Doulul eo an Kōrā ro ilo eddo ko aer n̄an jerbal in karejar, jerbal in tampeļ, im ej jerbal an tampeļ im menmenbwij an baam̧le. Rej kōm̧m̧ane menin ium̧win tōl eo an stake būreejtōnji. High ko̧o̧njeļ ro em̧ōj jitōn̄ er n̄an jipan̄. Lale 23.1 im 25.2.

Eļan̄n̄e stake eo ewōr an kamiti an ro rūm̧man ded, juon mem̄bōr in būreejtōnji eo an Doulul eo an Kōrā ro ilo stake ej jerbal ilo kamiti eo. Ejja menin em̧ool n̄e stake eo ewōr kamiti an rūtto ro rejjan̄in m̧are. (Lale 14.1.1.2.)

9.6

Kakobaba ko Jet kōn Laajrak in Unin tōl im Kakien ko

9.6.1

Membōr ro ewōr Utam̧we ko ilo ānbwin

Būreejtōnji eo an Doulul eo an Kōrā ro ej leļo̧k jerbal in lale n̄an membōr ro me ewōr utam̧we ko ilo ānbwinnier. N̄an elōn̄ļo̧k meļeļe ko n̄an jipan̄ membōr rein, lale disability.ChurchofJesusChrist.org; bar lale 38.8.27 ilo bok in bōk meļeļe in.

9.6.2

Riit im Jeje

N̄e emenin aikuj, būreejtōnji eo an Doulul eo an Kōrā ro rej jerbal ippān bisop eo, būreejtōnji eo an doulul eo an em̧m̧aan ro, im ward ko̧o̧njeļ eo n̄an jipan̄ membōr ro ekkatak riit im jeje.