Noatia i le Faaola e ala i Feagaiga ma Sauniga

O lenei faatonuga mo taitai sa faailoaina mai i le fonotaga a taitai i le konafesi aoao o Aperila 2021.

Otootoga o le Aoaoga mo Aufono a Eria, Faamaopoopo, Misiona, Siteki, Uarota, ma Paranesi

I le aluga o lenei aoaoga, o le a outou tagai ma faafofoga ai i aafiaga o fanau a lo tatou Tama Faalelagi i nofoaga eseese i luga o le ala e oo ai ina noatia i le Faaola e ala i feagaiga ma sauniga. O le a outou faafofoga ai i le ala na fesoasoani ai le alofa, faasoa atu, ma le valaaulia ia i latou e agai ai i luma ma le olioli i luga o le ala o feagaiga. E mafai ona outou silafia ai le ala o le faasoa atu o le talalelei, galuega o le malumalu ma le talafaasolopito o aiga, ma le tausiga o i latou e manaomia, e tofu ma se vaega e fai. Ae o le mea e sili ona taua i na mea uma, atonu tou te matauina ai le ala ua “faaopoopoina [ai nei mea uma] … Ia Keriso” (Efeso 1:10).

Laasaga o le Olaga 1: Tamaiti

Matamata le vitio o i ai Peresitene Joy D. Jones ma tamaiti, ona talanoaina lea po o a mea o le a outou o ma fai e fesoasoani ai i tamaiti ia noatia ai i latou lava i le Faaola i luga o le ala o feagaiga.

• O le a le mea sa aoao mai e le Agaga ia i tatou a o tatou matamata i lenei vitio?

• E faapefea ona fesoasoani mataupu faavae o le alofa, faasoa atu, ma le valaaulia i tamaiti a o latou taumafai malosi e faasoa atu le talalelei?

• E faapefea e le auauna atu ona fesoasoani i tamaiti ia tumau ai i luga o le ala o feagaiga pe a uma le papatisoga?

Laasaga o le Olaga 2: Talavou

Matamata le vitio o i ai Peresitene Bonnie H. Cordon ma Peresitene Stephen J. Lund ma le autalavou, ona talanoaina lea po o a mea o le a outou o ma fai e fesoasoani ai i le autalavou ia noatia ai i latou lava i le Faaola i luga o le ala o feagaiga.

• E mafai faapefea ona tatou fesoasoani i le autalavou e tausia a latou feagaiga o le papatisoga ma saunia mo le isi laasaga i luga o le ala o feagaiga?

• E faapefea e mataupu faavae o le alofa, faasoa atu, ma le valaaulia ona fesoasoani i le autalavou e auai i le galuega o le malumalu ma le talafaasolopito o aiga?

• E mafai faapefea ona tatou fesoasoani i le autalavou ia lagona le faamoemoe ma le avea ai ma ni ō ao latou noatia ai i le Faaola?

Laasaga o le Olaga 3: Talavou Matutua

Matamata le vitio o i ai Peresitene Mark L. Pace ma talavou matutua, ona talanoaina lea po o a mea o le a outou o ma fai e fesoasoani ai i talavou matutua ia noatia ai i latou lava i le Faaola i luga o le ala o feagaiga.

• O a ni mea tatou te aoao mai le alofa, faasoa atu, ma le valaaulia o loo ofo mai e isi ia i tatou?

• E mafai faapefea ona tatou fesoasoani i talavou matutua ia lagonaina le faamoemoe ma le avea ai ma ni ō ao faateleina lo latou tutoatasi ma auauna atu i isi? E mafai faapefea ona tatou fesoasoani ia i latou ia iloa e manaomia i latou i le Ekalesia a le Alii?

• O le a le matafaioi a gaoioiga ‘anoa a le Ekalesia ma taitai agaalofa e fai i le noatia o talavou matutua i le Faaola?

Laasaga o le Olaga 4: Au Matutua

Matamata le vitio o i ai Peresitene Jean B. Bingham ma le au matutua, ona talanoaina lea po o a mea o le a outou o ma fai e fesoasoani ai i le au matutua ia noatia ai i latou lava i le Faaola i luga o le ala o feagaiga.

• E faapefea e a tatou feagaiga ona aumaia le faamalologa ma fesoasoani ia i tatou ia tumau ai i luga o le ala—e oo lava i taimi faigata?

• O a ni auala ua tatou maua e fesoasoani ai i tagata o le au paia e noatia i latou lava ma isi i le Faaola e ala i feagaiga ma sauniga?

• E faapefea e le atinaeina o le faalagolago o le tagata ia te ia lava faaleagaga ona fesoasoani ia i tatou ia alolofa, faasoa atu, ma valaaulia?

Punaoa mo Aufono a Eria, Faamaopopo, Misiona, Siteki, Uarota, ma Paranesi

Mo Tamaiti ma le Autalavou

Vaaiga Aoao mo Tamaiti ma le Autalavou

O le polokalama a Tamaiti ma le Autalavou ua fuafuaina e faamalosia ai le faatuatua o le tupulaga faia’e ia Iesu Keriso ma fesoasoani ai i tamaiti, autalavou, ma o latou aiga ia agai i luma i luga o le ala o feagaiga a o latou fetaiai ma luitau o le olaga. E fesoasoani i tamaiti ma le autalavou i a latou taumafaiga e auai i le faapotopotoina o Isaraelu ma le galuega o le faaolataga ma le faaeaga i o latou olaga i aso faisoo. O loo faatotonugalemuina i le aiga ma e lagolagoina i le lotu.

O Faamoemoega mo le Tupulaga Faia’e

E fesoasoani Tamaiti ma le Autalavou i le tupulaga faia’e ia ola i le tele o auala, e aofia ai e ala i faaaliga, faitalia, ma sootaga. E aoao e tagata taitoatasi ia maua ma faatino ia faaaliga patino a o latou faaaoga le faitalia ma filifili avanoa e tuputupu ae ai mo i latou lava. E tupu foi lenei mea a o aoao le autalavou e taitai i au peresitene o korama ma vasega. Latou te fausia sootaga ma o latou aiga, o latou taitai, ma isi o le latou lava tupulaga a o latou galulue ma auauna atu faatasi ma oo ai ina iloa o i latou o ni ō, ma o loo manaomia i le galuega a le Alii.

O Fea e Tatau ona Tatou Amata ai i le Asō?

Tatou te valaaulia tamaiti, autalavou, ma o latou matua ma taitai e tuuto pe toe tuuto atu i le avea atili e faapei o le Faaola e ala i le auai i Lana galuega. E le faapea e tatau ona faigata nei taumafaiga! O nisi nei o auala faigofie e amata ai.

Mātua

• Faapotopoto mai lou aiga mo suesuega faaletalalelei. E mafai ona fesoasoani punaoa o leSau, Mulimuli Mai Ia Te A’u . E mafai ona tou fuafua e faia ni talatalanoaga e uiga i autu e pei o feagaiga, faaaliga, faitalia, ma faamanuiaga faapeteriaka.

• Fuafua se gaoioiga faaleaiga. E mafai faapefea ona e auauna saogalemu atu i se tasi i lo outou pitonuu po o le nuu? I nofoaga e maua ai, o le JustServe e mafai ona fesoasoani ia te outou e maua ai ni manatu.

• Fono taitoatasi ma atalii ma afafine taitasi. Talanoa i mea latou te fiafia i ai ma talanoa pe o a auala latou te mananao e tuputupu ae ai. Fesoasoani ma lagolago i latou i o latou atina’ega patino. Talanoa e uiga i a latou sini ua faatutu pe mananao e galulue ai.

Taitai o le Peraimeri

• Ia iloa tulaga o aiga o tamaiti, ma saili mo faaaliga e fesoasoani ai ia te i latou taitoatasi.

• Amata ona fai sauniga o le Aso Sa ma gaoioiga faatasitasi a le Peraimeri pe i luga o upega tafailagi (pe a ua saogalemu ma faatagaina).

• Aua le popole i le faafesoota’ia o sini a tagata taitoatasi i gaoioiga! O lau taulaiga o le fesootai ma ia faamanuia tamaiti ma o latou aiga—aemaise pe a latou manaomia pe fesili mai mo se fesoasoani.

Taitai matutua o le autalavou

• Amata ona fai sauniga o le Aso Sa ma gaoioiga faatasitasi a korama ma vasega pe i luga o upega tafailagi (pe a saogalemu ma faatagaina). Faamalosiau i le autalavou e tauloto ma amata sauniga i autu fou a Tamaitai Talavou ma korama o le Perisitua Arona.

• Ia tofia, vaetofia, ma faa’oaina le au peresitene o korama ma vasega. Fesoasoani ia i latou e faia fonotaga masani a au peresitene ma ia fuafua ma taitai sauniga o le Aso Sa ma gaoioiga. Ia fai fonotaga a le autalavou a le uarota ma uunaia le auai i fonotaga faamaopopo faafaifeautalai ma malumalu ma talafaasolopito o aiga. Faufautua ma lagolago au peresitene pe a manaomia ai e aunoa ma le faia e oe lava. Fesoasoani i au peresitene e aoao ia tomai faaletaitai e faaaoga ai punaoa mo au peresitene o korama ma vasega.

• Fuafua ma faia tolauapiga a le autalavou ma konafesi a le autalavou i le 2021, ma mulimuli i taiala mo le saogalemu.

• Aua le popole i le faafesoota’ia o sini a tagata taitoatasi i gaoioiga! Tuu lou malosi i le faia o sootaga ma le autalavou lava latou. E mafai foi ona e fesoasoani i au peresitene o korama ma vasega e faafesootai ia gaoioiga i manaoga o le autalavou.

Mo nisi faamatalaga, tagai i le ChildrenandYouth.ChurchofJesusChrist.org.

Mo Le Au Matutua

Nofoaga e Faapotopoto Ai le YSA [Talavou Nofofua Matutua]

Ua tuuina mai e le Au Peresitene Sili le faamaoniga mo eria e faatutu ai nofoaga e faapotopoto ai le talavou nofofua matutua e faavae i luga o o latou manaoga. O nofoaga mo le faapotopotoina o se vaega lea ua atofa i se fale ua i ai (e pei o se falelotu po o se fale o le inisitituti) lea e mafai ona faapotopoto ai talavou nofofua matutua ma a latou uo e auai ai i nisi po o vaega uma foi nei (e faalagolago i manaoga faalelotoifale ma punaoa):

• Aaoga faalelotu ma aoaoga faaletalalelei (e aofia ai le inisitituti)

• Auaunaga ma gaoioiga faaleagafesootai

• Gaoioiga mo le malumalu ma talafaasolopito o aiga

• Avanoa mo le ola tutoatasi ma le a’otauina

• Gaoioiga faafaifeautalai ma aapa atu ai i nuu

• O isi polokalama a le Ekalesia

O nofoaga uma e faapotopoto ai e tatau ona faamaonia e le Au Peresitene o le Eria ma vaavaaia e peresitene o siteki ma epikopo.

Valaauga mo Talavou Nofofua Matutua ma Tagata Matutua Nofofua

O suiga talu ai nei o aiaiga faavae ma faamaninoga ua foia ai tulaga e ono le malamalama ai ma agaifanua sese e uiga i tapulaa o avanoa mo tagata nofofua e auauna ai i le Ekalesia a le Alii. O nei suiga ma faamaninoga o aiaiga faavae, ua faamaonia e le Au Peresitene Sili ma le Korama a le Toasefululua ma ua aofia ai i totonu o le Tusitaulima Aoao, o loo faamatala atu ai e faapea, o talavou nofofua matutua ma tagata matutua nofofua e mafai ona faamanuiaina ma e mafai ona faamanuiaina ai isi i le tele o valaauga, e aofia ai le avea o ni taitai o le siteki ma uarota. O aiaiga faavae foi lava ia ua faaaoga nei i iunite uma o le Ekalesia, e aofia ai iunite a talavou nofofua matutua ma tagata matutua nofofua. O tapu e faasaga i talavou nofofua matutua ma tagata matutua nofofua e galulue i au peresitene o siteki, au epikopo, ma au peresitene o Aualofa a le siteki i iunite a talavou nofofua matutua ma tagata matutua nofofua ua aveesea.

E mafai ona galulue ia tagata nofofua o le au paia i tulaga faaletaitaiga e aofia ai au peresitene o faalapotopotoga a uarota ma le siteki, au peresitene o korama a toeaina, fesoasoani i le au epikopo, fautua maualuga, ma fesoasoani i le au peresitene o le siteki.

Manaomia ma le Talileleia o Tagata Uma—Alofa, Faasoa Atu, ma le Valaaulia

A oo ina faigata i tagata o le ekalesia ona maua se lagona o le avea ai ma ni ō, o nisi taimi e fai atu ai e taitai ma isi ni tala ma le le mafaufauina e faamalosia ai le talitonu o nei tagata e le fetaui pe e le o manaomia i latou.

O le manatua o nei upumoni e uiga i le alofa, faasoa atu, ma le valaaulia e mafai ona fesoasoani i le talileleia o [tagata] uma i gaoioiga, faaaumea, ma le avea ai ma ni ō o le Ekalesia a Iesu Keriso:

• O tagata taitasi uma o se atalii/afafine faapelepele o le Atua o i ai se natura ma se faasinomaga paia. E faaopoopo atu i faamanuiaga faavavau na Ia folafola mai i e faamaoni, e finagalo o Ia ia faamanuia Ana fanau i le taimi nei, i le taimi o lenei olaga.

• E manaomia atalii/afafine taitasi o le Atua i le galuega o le fausiaina o Lona malo.

• Ina ia fesoasoani i se tasi ia lagona e auai o ia ma e manaomiaina, ia amata i le alofa. Faalogologo ia malamalama i ona aafiaga. Aua le manatu faapea ua uma ona e iloa pe malamalama i ai.

• E le o i a i tatou tali i fesili uma o loo tatou feagai pe feagai ma isi i lenei olaga. Mo se faataitaiga, tatou te le iloa mafuaaga atonu o feagai ma se tagata i se luitau faapitoa.

• Ia lotomatala ma aua le faamasino. Talileleia tagata taitasi, i soo se mea o i ai lena tagata i lana malaga. Ofo atu e fesoasoani, ma taulai atu i le mea moni faapea e manaomia tagata taitasi i le Ekalesia.

• Afai e te fai atu ma le le mafaufauina se mea e tiga, aua e te taupunipuni, faatoese ona sailia lea o le faamagaloga ma le toefaaleleia.

Mo faamatalaga e uiga i le fesoasoani i tagata o i ai i ni tulaga patino, tagai i le Counseling Resources.

E Aoga le Fai Atu

• Talofa! E manaomia ma e alofagia oe. Faafetai mo lou susu mai.

• Aoao mai a’u e uiga i lou aafiaga. O le a se mea e te manao ia ou malamalama ai?

• Matou te faafeiloai atu ia te oe ma e matou te manaomia oe po o fea lava o e i ai i lau malaga. E mafai faapefea ona matou fesoasoani atu? E mafai faapefea ona e fesoasoani ia i matou?

• E finagalo le Atua ia te oe ia e fiafia nei. E aumai e Lana talalelei le faamoemoe ma le fiafia mo Ana fanau uma.

O le Auala na Tuputupu A’e ai se Liuaga se Tasi ma Avea ma se Au Uso

Mataupu Faavae o le Alofa, Faasoa Atu, ma le Valaaulia

O Faamanuiaga Folafolaina a o Tatou Alolofa, Faasoa Atu, ma Valaaulia