Ru’uru’uhia i te Fa’aora nā roto i te mau fafaura’a ’e te mau ’ōro’a
Arata’i ha’api’ipi’ira’a nō te mau ’āpo’ora’a ārea, te mau ’āpo’ora’a fa’aaura’a, te mau ’āpo’ora’a misiōni, te mau ’āpo’ora’a titi, te mau ’āpo’ora’a pāroita ’e te mau ’āpo’ora’a ’āma’a
I roto i teie ha’api’ira’a, e ’ite ’outou ’e e fa’aro’o ho’i ’outou i te mau ’ohipa i tupu nō te mau tamari’i a tō tātou Metua i te ao ra i te mau ta’ahira’a rau, i ni’a i te ’ē’a nō te ru’uru’ura’a ia rātou i te Fa’aora nā roto i te mau fafaura’a ’e te mau ’ōro’a. E fa’aro’o ’outou ’ua nāhea te herera’a, te fa’a’itera’a ’e te tītau-manihini-ra’a i te ta’ata i te tauturura’a ia rātou ’ia haere i mua ma te ’oa’oa i ni’a i te ’ē’a nō te fafaura’a. E ’ite mai ’outou nāhea te fa’a’itera’a i te ’evanelia, te ’ohipa hiero ’e te ’ohipa ’ā’amu ’utuāfare, nā reira ato’a te aupurura’a i te feiā i roto i te ’ati e rave ai i tā rātou tuha’a. Nā ni’a roa atu rā, e ’ite mai ’outou e nāhea teie mau mea ato’a i te « ’āmui […] i te mau mea ato’a i te Mesia ra » (Ephesia 1:10).
Ta’ahira’a 1 o te orara’a : Te mau tamari’i
’A māta’ita’i i te video nō te peresideni Joy D. Jones ’e te mau tamari’i, ’ei reira e ’āparau ai e aha tā ’outou e haere e rave nō te tauturu i te mau tamari’i ’ia ru’uru’u ia rātou i te Fa’aora i ni’a i te ’ē’a nō te fafaura’a.
-
E aha tā te Vārua i ha’api’i mai ia tātou ’a māta’ita’i ai i teie video ?
-
E nāhea te mau parau tumu nō te here, te fa’a’itera’a ’e te tītau-manihini-ra’a i te ta’ata ’ia tauturu i te mau tamari’i ’a tūtava ai rātou ’ia fa’a’ite i te ’evanelia ?
-
E nāhea te ’ohipa tāvinira’a i te tauturu i te mau tamari’i ’ia fa’aea i ni’a i te ’ē’a nō te fafaura’a i muri iho i te bāpetizora’a ?
Ta’ahira’a 2 o te orara’a : Te feiā ’āpī
’A māta’ita’i i te video nō te peresideni Bonnie H. Cordon ’e te peresideni Stephen J. Lund ’e te feiā ’āpī, ’ei reira e ’āparau ai e aha tā ’outou e haere e rave nō te tauturu i te feiā ’āpī ’ia ru’uru’u ia rātou i te Fa’aora i ni’a i te ’ē’a nō te fafaura’a.
-
Nāhea tātou e nehenehe ai e tauturu i te feiā ’āpī ’ia ha’apa’o i tā rātou mau fafaura’a nō te bāpetizora’a ’e ’ia fa’aineine nō te ta’ahira’a nō muri iho i ni’a i te ’ē’a nō te fafaura’a ?
-
E nāhea te mau parau tumu nō te here, te fa’a’itera’a ’e te tītau-manihini-ra’a i te ta’ata i te tauturu i te feiā ’āpī ’ia ’āmui mai i te ’ohipa hiero ’e te ’ohipa ’ā’amu ’utuāfare ?
-
Nāhea tātou e nehenehe ai e tauturu i te feiā ’āpī ’ia putapū i te tīa’ira’a ’e te tā’amura’a ’a ru’uru’u ai ia rātou i te Fa’aora ?
Ta’ahira’a 3 o te orara’a : Te feiā ’āpī pa’ari
’A māta’ita’i i te video nō te peresideni Mark L. Pace ’e te feiā ’āpī pa’ari, ’ei reira e ’āparau ai e aha tā ’outou e haere e rave nō te tauturu i te feiā ’āpī pa’ari ’ia ru’uru’u ia rātou i te Fa’aora i ni’a i te ’ē’a nō te fafaura’a.
-
E aha tā tātou e ha’api’i nei i roto i te here, te fa’a’itera’a ’e te tītau-manihini-ra’a tā te ta’ata e pūpū nei ia tātou ?
-
Nāhea tātou e nehenehe ai e tauturu i te feiā ’āpī pa’ari ’ia putapū i te tīa’ira’a ’e te tā’amura’a ’a fa’arahi ai rātou i te fa’arava’ira’a ia rātou iho ’e te tāvinira’a i te ta’ata ? Nāhea tātou e nehenehe ai e tauturu ia rātou ’ia ’ite ē, e mea hina’arohia rātou i roto i te ’Ēkālesia a te Fatu ?
-
E aha te ’ohipa a te mau ’ātivite maita’i a te ’Ēkālesia, nā reira ato’a te aupurura’a a te feiā fa’atere i ni’a i te ru’uru’ura’a i te feiā ’āpī pa’ari i te Fa’aora ?
Ta’ahira’a 4 o te orara’a : Te feiā pa’ari
’A māta’ita’i i te video nō te peresideni Jean B. Bingham ’e te feiā pa’ari, ’ei reira e ’āparau ai e aha tā ’outou e haere e rave nō te tauturu i te feiā pa’ari ’ia ru’uru’u ia rātou i te Fa’aora i ni’a i te ’ē’a nō te fafaura’a.
-
Tē nāhea ra tā tātou mau fafaura’a i te fa’atae mai i te fa’aorara’a i te māuiui, ’e i te tauturu ia tātou ’ia fa’aea i ni’a i te ’ē’a—noa atu ā te mau taime fifi ?
-
E aha te mau rāve’a tei ’itehia mai ia tātou nō te tauturu i te mau melo ’ia ru’uru’u ia rātou ’e ia vetahi ’ē i te Fa’aora nā roto i te mau fafaura’a e te mau ’ōro’a ?
-
E nāhea te fa’arahira’a i te fa’arava’ira’a iāna iho i te pae vārua ’ia tauturu ia tātou ’ia here, ’ia fa’a’ite ’e ’ia tītau manihini i te ta’ata ?
Mātēria nō te mau ’āpo’ora’a ārea, te mau ’āpo’ora’a fa’aaura’a, te mau ’āpo’ora’a misiōni, te mau ’āpo’ora’a titi, te mau ’āpo’ora’a pāroita ’e te mau ’āpo’ora’a ’āma’a
Nō te mau tamari’i ’e te feiā ’āpī
Hi’ora’a rere ā manu nō Te mau tamari’i ’e te feiā ’āpī
’Ua ’ōpuahia te fa’anahora’a Te mau tamari’i ’e te feiā ’āpī nō te ha’apūai i te fa’aro’o o te u’i ’āpī ia Iesu Mesia, ’e nō te tauturu i te mau tamari’i, te feiā ’āpī ’e tō rātou ’utuāfare ’ia haere i mua i ni’a i te ’ē’a nō te fafaura’a ’a fa’aruru noa ai i te mau tāmatara’a o te orara’a nei. E tauturu te reira i te mau tamari’i ’e te feiā ’āpī i roto i tā rātou mau tauto’ora’a nō te ’āmui i roto i te ha’aputuputura’a o ’Īserā’ela ’e te ’ohipa nō te fa’aorara’a ’e te fa’ateiteira’a, i te mahana ato’a o tō rātou orara’a. ’Ua fa’atumuhia te reira i ni’a i te ’utuāfare, turuhia i te fare purera’a.
Te mau tīa’ira’a nō te u’i ’āpī
Tē tauturu nei Te mau tamari’i ’e te feiā ’āpī i te u’i ’āpī ’ia tupu i te rahi ma te rāve’a rau, nā roto i te heheura’a, te ti’amāra’a ’ia mā’iti ’e te mau tā’amura’a ta’ata. E ha’api’i te hō’ē tamari’i ’ia fāri’i ’e ’ia ’ohipa i ni’a i tāna iho heheura’a ’a fa’a’ohipa ai i te ti’amāra’a ’ia mā’iti ’e ’a mā’iti ai i te mau rāve’a nō rātou iho nō te tupu i te rahi. E tupu ato’a te reira ’ia ha’api’i te feiā ’āpī ’ia fa’atere i roto i te mau peresidenira’a pupu autahu’ara’a ’e piha tamāhine. E ha’amau rātou i te tā’amura’a i tō rātou ’utuāfare, tō rātou feiā fa’atere ’e te mau tamari’i nō tō rātou matahiti ’a ’ohipa ’āmui ai ’e ’a tāvini ’āmui ai, ’e e ’ite mai rātou ē e tā’amura’a tō rātou ’e ’ua hina’arohia rātou i roto i te ’ohipa a te Fatu.
I hea e ha’amata ai i teie mahana ?
E tītau manihini tātou i te mau tamari’i, i te feiā ’āpī ’e tō rātou nā metua ’e nau feiā fa’atere ’ia pūpū ’aore rā ’ia pūpū fa’ahou ā ia rātou nō te riro rahi atu ā mai te Fa’aora te huru maoti te ’āmuira’a i roto i tāna ’ohipa. ’Eiaha teie mau tauto’ora’a ’ia riro ’ei tauto’ora’a rave ’atā ! Teie te tahi mau vāhi ’ōhie e ha’amata ai :
Te mau metua
-
Ha’aputuputu i tō ’outou ’utuāfare nō te tuatāpapara’a ’evanelia. E tauturu mai te mau mātēria Mai, pe’e mai. E nehenehe e fa’atupu i te ’āparaura’a nō ni’a i te mau tumu parau mai te mau fafaura’a, te heheura’a, te ti’amāra’a ’ia mā’iti ’e te mau ha’amaitaira’a patereareha.
-
Fa’anaho i te ’ātivite nō te ’utuāfare. Nāhea ’outou e nehenehe ai e tāvini ma te fifi ’ore i tō ’outou veutupura’a ’aore rā te huira’atira o te ’oire ? Mai te mea tē vai ra, e nehenehe te fa’anahora’a JustServe e tauturu ’ia ’ite mai i te tahi mana’o.
-
Fārerei hō’ē hō’ē i te tamaiti ’e te tamāhine tāta’itahi. Paraparau i te mau mea tā rātou e ’ana’anatae ’e te huru rātou e hina’aro ’ia pa’ari mai. Tauturu ’e fa’aitoito ia rātou i roto i tā rātou iho mau ’ōpuara’a ha’apa’arira’a. Paraparau nō ni’a i te mau fā tā rātou i ha’amau ’aore rā ’o tā rātou i hina’aro e rave.
Te feiā fa’atere Paraimere
-
Ha’amātau i te orara’a ’utuāfare o te mau tamari’i, ’e tītau i te heheura’a nō te tauturu ia rātou tāta’itahi.
-
Ha’amata i te fa’atupu i te mau rurura’a sābati ’e te mau ’ātivite Paraimere, e tae tino roa mai ’aita rā nā te ātea noa (mai te peu e mea fifi ’ore ’e ’ua fa’ati’ahia te reira).
-
’Eiaha e ha’ape’ape’a i te fa’atūa’tira’a i te fā a te tamari’i tāta’itahi i te mau ’ātivite ! Tā ’outou fā, ’o te fa’atū’atira’a ïa ’e te ha’amaita’ira’a i te mau tamari’i ’e tō rātou ’utuāfare—te mau ’utuāfare iho ā rā tei hina’aro ’aore rā tei ani i te tauturu.
Te ta’ata pa’ari feiā fa’atere nō te feiā ’āpī
-
Ha’amata i te fa’atupu i te mau rurura’a sābati ’e te mau ’ātivite pupu autahu’ara’a ’e piha tamāhine, e tae tino roa mai ’aita rā nā te ātea noa (mai te peu e mea fifi ’ore ’e ’ua fa’ati’ahia te reira). Fa’aitoito i te feiā ’āpī ’ia tāmau ’ā’au i te mau parau tai’o ’āpī a te Feiā ’Āpī Tamāhine ’e a te mau pupu autahu’ara’a a Aarona, ’e ha’amata i te mau rurura’a ma te fa’ahiti i te reira.
-
Pi’i, fa’ata’a ’e ha’afaufa’a i te mau peresidenira’a pupu autahu’ara’a ’e piha tamāhine. Tauturu ia rātou ’ia fa’atupu pinepine i tā rātou mau rurura’a peresidenira’a, ’e ’ia fa’anaho ’e ’ia arata’i ho’i i te mau rurura’a sābati ’e te mau ’ātivite. Fa’atupu i te mau ’āpo’ora’a feiā ’āpī a te pāroita, ’e fa’aitoito ia rātou ’ia ’āmui mai i te mau rurura’a fa’aaura’a ’ohipa misiōnare ’e ’ohipa hiero ’e ’ā’amu ’utuāfare. Fa’a’a’o arata’i ’e turu i te mau peresidenira’a mai tei hina’arohia, ’eiaha rā e haru mai i te fa’aterera’a. Tauturu i te mau peresidenira’a ’ia ha’api’i i te ’aravihi nō te fa’aterera’a nā roto i te fa’a’ohipara’a i te mau mātēria nō te mau peresidenira’a pupu autahu’ara’a ’e piha tamāhine.
-
Fa’anaho ’e fa’atupu i te mau pūhapara’a feiā ’āpī, nā reira ato’a te mau ’āmuira’a feiā ’āpī i roto i te matahiti 2021, ma te pe’e i te mau arata’ira’a nō te pārurura’a.
-
’Eiaha e ha’ape’ape’a i te fa’atūa’tira’a i te fā a te tamari’i tāta’itahi i te mau ’ātivite ! Tu’u i tō ’outou ito i roto i te fa’atū’atira’a i te feiā ’āpī iho. E nehenehe ato’a e tauturu i te mau peresidenira’a pupu autahu’ara’a ’e piha tamāhine ’ia fa’atūa’ti i te mau ’ātivite i te mau hina’aro o te feiā ’āpī.
Nō te tahi atu mau ha’amāramaramara’a, hi’o i te ChildrenandYouth.ChurchofJesusChrist.org.
Nō te feiā pa’ari
Te mau vāhi putuputura’a nō te FAPO (Feiā ’āpī pa’ari ’ōtahi)
’Ua hōro’a te Peresidenira’a Mātāmua i te parau fa’ati’a i te mau ārea nō te ha’amau i te mau vāhi putuputura’a nō te feiā ’āpī pa’ari mai te au i te mau hina’aro o te ārea. Te hō’ē vāhi putuputura’a, e vāhi ïa tei fa’ata’ahia i roto i te hō’ē vāhi patuhia e te ’Ēkālesia (mai te hō’ē fare purera’a ’aore rā te fare a te Institut) i reira te feiā ’āpī pa’ari ’ōtahi ’e tō rātou mau hoa e putuputu ai nō te tahi ’aore rā te tā’āto’ara’a o te mau ’ohipa i muri nei (mai te au i te mau hina’aro i reira ’e te mau rāve’a) :
-
Te ha’api’ira’a pae fa’aro’o ’e te ha’api’ira’a ’evanelia (mai te institut ato’a ho’i)
-
Te mau ’ātivite tāvinira’a ’e fa’a’oa’oara’a
-
Te mau ’ātivite ’ohipa hiero ’e ’ā’amu ’utuāfare
-
Te mau ’ohipa fa’arava’ira’a iāna iho ’e te ha’api’ipi’ira’a
-
Te mau ’ātivite misiōnare ’e torora’a i te rima tauturu i te huira’atira
-
Te tahi atu ā mau fa’anahora’a a te ’Ēkālesia
Nō te mau vāhi putuputura’a ato’a, e tītauhia e ’ia ha’amanahia te reira e te peresidenira’a ārea, ’e ’ia hi’opo’ahia e te mau peresideni tītī ’e te mau ’episekōpo.
Mau pi’ira’a nō te feiā ’āpī pa’ari ’ōtahi ’e te feiā pa’ari ’ōtahi
Maoti te mau tauira’a fa’aturera’a ’e te mau ha’amāramaramara’a i hōro’ahia a’enei, i ’āfaro ai te tahi mau mana’o hape ’e te mau peu nō ni’a i te tā’ōti’ara’a i te rāve’a tāvinira’a i roto i te ’Ēkālesia a te Fatu, nō te mau melo ’ōtahi. Tē fa’ata’a nei teie mau tauira’a fa’aturera’a ’e mau ha’amāramaramara’a tei ha’amanahia e te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo i roto i te Buka arata’i rahi ē, e ha’amaita’ihia ’e e ha’amaita’i ho’i te feiā ’āpī pa’ari ’ōtahi ’e te feiā pa’ari ’ōtahi i te ta’ata nā roto i te mau pi’ira’a e rave rahi, mai te mau pi’ira’a feiā fa’atere titi ’e pāroita. ’Ua mana ato’a te reira mau fa’aturera’a i teienei noa atu ā te mau ’āmuira’a a te ’Ēkālesia, mai te mau ’āmuira’a feiā ’āpī pa’ari ’ōtahi ’e te mau ’āmuira’a feiā pa’ari ’ōtahi. ’Ua tātarahia te mau ’ōpanira’a i ni’a i te feiā ’āpī pa’ari ’ōtahi ’e te feiā pa’ari ’ōtahi ’ia tāvini i roto i te mau peresideni titi, te mau ’episekōpora’a ’e te mau peresidenira’a Sōtaiete Tauturu a te titi i roto i te mau ’āmuira’a feiā ’āpī pa’ari ’ōtahi ’e feiā pa’ari ’ōtahi.
E nehenehe te mau melo ’ōtahi ’ia tāvini i ni’a i te ti’ara’a ti’a fa’atere, i roto i te mau peresidenira’a pupu a te pāroita ’e a te titi, i roto i te mau peresidenira’a pupu peresibutero, ’ei tauturu i roto i te ’episekōpora’a, ’ei melo ’āpo’ora’a teitei ’e ’ei tauturu i roto i te peresidenira’a titi.
Hina’aro ’e mānava i te tā’āto’ara’a—Here, fa’a’ite ’e tītau manihini i te ta’ata
’Ia tāfifi te mau melo i te mana’o tā’amura’a ’ore, i te tahi taime e hape te feiā fa’atere ’e te tahi atu mau ta’ata i te paraura’a i te mau parau e fa’arahi atu ā i tō teie mau melo mana’o ē ’aita e tano nō rātou, ’aore rā ’aita rātou i hina’arohia.
’A ha’amana’o ē e ti’a i teie mau parau mau nō ni’a i te here, te fa’a’ite ’e te tītau manihini i te ta’ata e tauturu i te fāri’i-maita’i-ra’a i te tā’āto’ara’a i roto i te ’ohipa ’e te fa’ahoara’a ’e te tā’amura’a i roto i te ’Ēkālesia a Iesu Mesia :
-
E tamari’i herehia nā te Atua te mau ta’ata ato’a, ma te nātura ’e te hope’a hanahana. Nā ni’a i teie mau ha’amaita’ira’a mure ’ore, ’ua parau fafau ’oia i tei ha’apa’o maita’i ē, ’ua hina’aro ’oia e ha’amaita’i i tāna mau tamari’i i teienei, i roto i teie orara’a.
-
’Ua hina’arohia te tamari’i tāta’itahi a te Atua i roto i te ’ohipa nō te patura’a i tōna bāsileia.
-
Nō te tauturu i te hō’ē ta’ata ’ia putapū i tōna tā’amura’a ’e tōna hina’arohia, ’a ha’amata ma te here. ’A fa’aro’o iāna nō te māramarama i te mau ’ohipa i tupu nōna. ’Eiaha e mana’o ē, ’ua ’ite a’ena ’outou i te reira, ’ua māramarama a’ena ’outou.
-
ʼAita tā tātou e pāhonora’a i te mau uira’a ato’a tā tātou ’e tā te ta’ata e fa’aruru nei i roto i teie orara’a. ’Ei hi’ora’a, ’aita tātou i ’ite i te mau tumu te hō’ē ta’ata e fa’aruru nei i te hō’ē fifi ta’a ’ē.
-
’Ia vai matara noa te mana’o, ’eiaha te mana’o ha’avā. ’A fāri’i maita’i i te mau ta’ata ato’a, noa atu ā te vāhi tei reira ’oia i ni’a i tōna tere. ’A hōro’a atu i te tauturu,’e ’a rōtahi noa i ni’a i te parau mau ē, hina’arohia te ta’ata tāta’itahi i roto i te ’Ēkālesia.
-
’Ia hape noa atu ’outou i te paraura’a i te hō’ē parau māuiui, ’eiaha e tata’u rahi atu ; ’a tātarahapa ’a ’imi atu ai i te fa’aorera’a hapa ’e ha’amaita’ira’a ia ’outou iho.
Nō te mau ha’amāramaramara’a nō ni’a i te tauturura’a i te mau melo vaira’a ta’a ’ē, hi’o Counseling Resources [Te mau mātēria tauturu nō te fa’aa’o i te ta’ata].
Te rirora’a mai te fa’afāriura’a o te hō’ē ta’ata ’ei autaea’era’a
Te mau parau tumu nō te here, te fa’a’ite ’e te tītau manihini
Te mau ha’amaita’ira’a i parauhia ’ia here tātou ’e ’ia fa’a’ite tātou ’e ’ia tītau manihi tātou i te ta’ata
