Haʻisia ki he Fakamoʻuí ʻi he Ngaahi Fuakavá mo e Ngaahi Ouaú
Fokotuʻutuʻu ki he Ako maʻá e Ngaahi Fakataha Alēlea Fakaʻēliá, Fakafekauʻakí, Fakamisioná, Fakasiteikí, Fakauōtí mo Fakakoló
Lolotonga ʻa e fakahinohino ko ʻení, te ke sio mo fanongo ki ha ngaahi aʻusia ʻa ha fānau ʻa ʻetau Tamai Hēvaní ʻi he ngaahi tafaʻaki kehekehe ʻo e hala ki he haʻisia ki he Fakamoʻuí ʻo fakafou ʻi he ngaahi fuakavá mo e ngaahi ouaú. Te ke fanongo ki he founga kuo faitokonia ai kinautolu ʻe he ʻofá, vahevahé, mo e fakaafé ke nau tupulaki ʻi he hala ʻo e fuakavá ʻi he fiefia. Mahalo te ke fakatokangaʻi ʻa e founga ʻoku nau takitaha fakahoko kotoa ha tafaʻaki ʻi hono vahevahe ʻo e ongoongoleleí, ngāue fakatemipalé mo e hisitōlia fakafāmilí, pea mo hono tokangaekina ʻa kinautolu ʻoku faingataʻaʻiá. Kae hiliō aí, mahalo te ke ʻiloʻi ai ʻa e founga ʻoku “fakakātoa fakataha … ʻia Kalaisi” ʻa e ngaahi meʻa kotoa pē ko ʻení (ʻEfesō 1:10).
Tūkunga Moʻui 1: Fānaú
Mamata ʻi he foʻi vitiō ʻo Palesiteni Joy D. Jones mo e fānaú pea aleaʻi leva ʻa e meʻa te ke ʻalu ʻo fakahoko ke tokoniʻi e fānaú ke nau nofo maʻu ʻi he Fakamoʻuí ʻi he hala ʻo e fuakavá.
-
Ko e hā naʻe akoʻi mai ʻe he Laumālié kiate kitautolú ʻi heʻetau mamata ʻi he vitiō ko ʻení?
-
ʻOku tokoni fēfē nai ʻa e ngaahi tefitoʻi moʻoni ʻo e ʻofá, vahevahé mo e fakaafé ki he fānaú ʻi heʻenau fāifeinga ke vahevahe ʻa e ongoongoleleí?
-
ʻOku tokoni fēfē nai ʻa e ngāue tokoní ki he fānaú ke nau nofo ʻi he hala ʻo e fuakavá ʻi he hili ʻa e papitaisó?
Tūkunga Moʻui 2: Toʻu Tupú
Mamata ʻi he vitiō ʻo Palesiteni Bonnie H. Cordon mo Palesiteni Stephen J. Lund mo e toʻu tupú pea aleaʻi leva ʻa e meʻa te ke ʻalu ʻo fakahoko ke tokoniʻi e toʻu tupú ke nau nofo ki he Fakamoʻuí ʻi he hala ʻo e fuakavá.
-
Te tau tokoniʻi fēfē nai ʻa e toʻu tupú ke nau tauhi ʻenau ngaahi fuakava ʻi he papitaisó mo mateuteu ki he sitepu hono hoko ʻi he hala ʻo e fuakavá?
-
ʻOku tokoni fēfē nai ʻa e ngaahi tefitoʻi moʻoni ʻo e ʻofá, vahevahé mo e fakaafé ki he toʻu tupú ke nau kau ʻi he ngāue fakatemipalé mo e hisitōlia fakafāmilí?
-
Te tau tokoniʻi fēfē nai ʻa e toʻu tupú ke nau ongoʻi ʻa e ʻamanaki leleí mo e kau atú ʻi heʻenau hoko ʻo haʻisia ki he Fakamoʻuí?
Tūkunga Moʻui 2: Kakai Lalahi Kei Talavoú
Mamata ʻi he foʻi vitiō ʻo Palesiteni Mark L. Pace mo e kakai lalahi kei talavoú pea aleaʻi leva ʻa e meʻa te ke ʻalu ʻo fakahoko ke tokoniʻi e kakai lalahi kei talavoú ke nau nofo ki he Fakamoʻuí ʻi he hala ʻo e fuakavá.
-
Ko e hā ʻoku tau ako mei he ʻofa, vahevahe mo e fakaafe ʻoku fai mai ʻe he niʻihi kehé kiate kitautolú?
-
Te tau tokoniʻi fēfē nai ʻa e kakai lalahi kei talavoú ke nau ongoʻi ʻa e ʻamanaki leleí mo fakakau kinautolú ʻi heʻenau tupulaki ʻi he moʻui fakafalala pē kiate [kinautolú] mo e tokoni ki he niʻihi kehé? Te tau tokoniʻi fēfē nai kinautolu ke nau ʻiloʻi ʻoku fie maʻu kinautolu ʻi he Siasi ʻo e ʻEikí?
-
Ko e hā ʻa e fatongia ʻo e ngaahi ʻekitivitī ʻuhingamālie ʻo e Siasí mo e kau taki ʻofá ʻi hono feingaʻi e kakai lalahi kei talavoú ke nau nofo ki he Fakamoʻuí?
Tūkunga Moʻui 4: Kakai Lalahí
Mamata ʻi he foʻi vitiō ʻo Palesiteni Jean B. Bingham mo e kakai lalahí pea aleaʻi leva ʻa e meʻa te ke ʻalu ʻo fakahoko ke tokoniʻi e kakai lalahí ke nau nofo ki he Fakamoʻuí ʻi he hala ʻo e fuakavá.
-
ʻOku ʻomi fēfē nai ʻe heʻetau ngaahi fuakavá ʻa e fakamoʻuí mo tokoniʻi kitautolu ke tau nofo maʻu ʻi he halá—ʻo aʻu pē ki he ngaahi taimi faingataʻá?
-
Ko e hā ha ngaahi founga kuo tau ʻilo ke tokoniʻi ai e kāingalotú mo e niʻihi kehé ke nau nofo ki he Fakamoʻuí ʻo fakafou ʻi he ngaahi fuakavá mo e ngaahi ouaú?
-
ʻOku tokoni fēfē nai ʻa hono fakatupulaki ʻo e moʻui fakafalala fakalaumālie pē kiate kitá ke tau ʻofa, vahevahe, mo fakaafe?
Maʻuʻanga Tokoni maʻá e Ngaahi Fakataha Alēlea Fakaʻēliá, Fakafekauʻakí, Fakamisioná, Fakasiteikí, Fakauōtí mo Fakakoló
Maʻá e Fānaú mo e Toʻu Tupú
Vakai Fakalūkufua ki he Fānaú mo e Toʻu Tupú
ʻOku fakataumuʻa ʻa e polokalama Fānaú mo e Toʻu Tupú ke fakamālohia ʻa e tui ʻa e toʻu tangata kei tupu haké kia Sīsū Kalaisí pea tokoniʻi ʻa e fānaú, toʻu tupú, mo honau fāmilí ke nau fakalakalaka ʻi he hala ʻo e fuakavá ʻi heʻenau fehangahangai mo e ngaahi faingataʻa ʻo e moʻuí. ʻOku tokoni ia ki he fānaú mo e toʻu tupú ʻi heʻenau ngaahi feinga ke kau ʻi hono tānaki ʻo ʻIsilelí pea mo e ngāue ʻo e fakamoʻuí mo e hākeakiʻí ʻi heʻenau moʻui fakaʻahó. ʻOku fakatefito ia ʻi ʻapi pea poupouʻi ʻi he lotú.
Ngaahi Fakatuʻamelie Maʻá e Toʻu Tangata Kei Tupu Haké
ʻOku tokoni ʻa e Fānaú mo e Toʻu Tupú ki he toʻu tangata kei tupu haké ʻi ha ngaahi founga kehekehe, ʻo kau ai ʻa e fakahaá, tauʻatāina ke filí, mo e ngaahi vā fetuʻutakí. ʻOku ako ʻa e fakafoʻituituí ke maʻu mo ngāueʻi ʻa e fakahā fakatāutahá ʻi heʻenau fakamālohia ʻa e tauʻatāina ke filí mo fili e ngaahi faingamālie ke tupulaki maʻanautolu peé. ʻOku hoko foki ʻeni ʻi he taimi ʻoku ako ai ʻa e toʻu tupú ke tataki ʻi he kau palesitenisī fakakōlomú mo fakakalasí. ʻOku nau fakatupulaki ha ngaahi vā fetuʻutaki mo honau ngaahi fāmilí, kau takí, mo e niʻihi kehe ʻi honau toʻú ʻi heʻenau fengāueʻaki mo fetokoniʻaki fakatahá pea ʻiloʻi ʻoku nau kau mai pea ʻoku fie maʻu kinautolu ʻi he ngāue ʻa e ʻEikí.
Ko e Fē ʻOku Totonu Ke Tau Kamata Ai He ʻAho Ní?
ʻOku mau fakaafeʻi atu ʻa e fānaú, toʻu tupú, mo ʻenau mātuʻá mo e kau takí ke nau tukupā pe toe tukupā ke hoko ʻo hangē ange ko e Fakamoʻuí ʻaki ʻenau kau ki Heʻene ngāué. ʻOku ʻikai fie maʻu ia ke faingataʻa ʻa e ngaahi feinga ko ʻení. Ko ha ngaahi feituʻu faingofua ʻeni ke kamata ai:
Ongomātuʻá
-
Fakatahatahaʻi ho fāmilí ki hono ako ʻo e ongoongoleleí. ʻE ala tokoni ʻa e ngaahi maʻuʻanga tokoni Haʻu, ʻo Muimui ʻIate Aú. Te ke lava ʻo fakakaukau ke fealeaʻaki fekauʻaki mo e ngaahi kaveinga hangē ko e ngaahi fuakavá, fakahaá, tauʻatāina ke filí, mo e ngaahi tāpuaki fakapēteliaké.
-
Palani ha ʻekitivitī fakafāmili. Te ke lava fēfē ʻo tokoniʻi ha taha ʻi hoʻo kaungāʻapí pe tukui koló ʻi ha founga ʻoku malú? ʻI he feituʻu ʻoku maʻu aí, ʻe ala tokoni ʻa e JustServe ke ke maʻu ai ha ngaahi fakakaukau.
-
Talanoa fakafoʻituitui mo e foha mo e ʻofefine takitaha. Aleaʻi e meʻa ʻoku nau saiʻia aí pea talanoa ki he founga ʻoku nau fakaʻamu ke nau tupulaki aí. Tokoniʻi mo poupouʻi kinautolu ʻi heʻenau fakalakalaka fakatāutahá. Talanoa fekauʻaki mo e ngaahi taumuʻa kuo nau fokotuʻú pe ʻoku nau loto ke ngāueʻí.
Kau taki ʻi he Palaimelí
-
ʻIloʻi e ngaahi tūkunga ʻo e fānaú ʻi ʻapí, pea fekumi ki ha fakahā ke tokoniʻi fakafoʻituitui kinautolu.
-
Kamata ke fakahoko e ngaahi fakataha he Sāpaté mo e ngaahi ʻekitivitī ʻa e Palaimelí mata ki he mata pe ʻi he komipiutá (ʻi he taimi ʻoku malu mo fakamafaiʻi aí).
-
ʻOua ʻe hohaʻa ki hono fakafehokotaki e ngaahi taumuʻa ʻa e fakafoʻituituí ki he ngaahi ʻekitivitií! Fakatefito hoʻo tokangá ʻi he fakafetuʻutaki mo hono tāpuakiʻi ʻo e fānaú mo honau ngaahi fāmilí—tautautefito ki he taimi ʻoku nau fie maʻu pe kole tokoni aí.
Kau taki kakai lalahi ʻo e toʻu tupú
-
Kamata ke fakahoko e ngaahi fakataha he Sāpaté mo e ngaahi ʻekitivitī fakakōlomú mo fakakalasí ʻo fakahoko mata ki he mata pe ʻi he komipiutá (ʻi he taimi ʻoku malu mo fakamafaiʻi aí). Poupouʻi e toʻu tupú ke nau ako maʻuloto ʻa e ongo kaveinga foʻou ʻo e Kau Finemuí mo e kōlomu ʻo e Lakanga Taulaʻeiki Faka-ʻĒloné pea kamata ʻaki ia ʻa e fakatahá.
-
Uiuiʻi, vaheʻi, pea fakamālohia ʻa e kau palesitenisī fakakōlomú mo e fakakalasí. Tokoniʻi kinautolu ke nau fakahoko maʻu pē ʻa e ngaahi fakataha fakapalesitenisií pea mo palani mo tataki ʻa e ngaahi fakataha he Sāpaté mo e ngaahi ʻekitivitií. Fakahoko ʻa e ngaahi fakataha alēlea fakauōtí, pea poupouʻi ke nau kau ʻi he ngaahi fakataha fakafekauʻaki ʻo e ngāue fakafaifekaú, fakatemipalé mo e hisitōlia fakafāmilí. Akoʻi mo poupouʻi ʻa e kau palesitenisií ʻo fakatatau mo e fiemaʻú kae ʻoua naʻá ke puleʻi. Tokoni ke ako ʻe he kau palesitenisií ʻa e ngaahi taukei fakatakimuʻá ʻo ngāue ʻaki ʻa e ngaahi maʻuʻanga tokoni maʻá e kau palesitenisī fakakōlomú mo e fakakalasí.
-
Palani mo fakahoko ha ngaahi kemi maʻá e toʻu tupú mo e konifelenisi ʻa e toʻu tupú ʻi he 2021, kae muimui ki he ngaahi tuʻutuʻuni ki he tuʻunga malú.
-
ʻOua ʻe hohaʻa ki hono fakafehokotaki e ngaahi taumuʻa ʻa e fakafoʻituituí ki he ngaahi ʻekitivitií! Fakaʻaongaʻi ho iví ke fakafehokotaki mo e toʻu tupú. Te ke lava foki ʻo tokoni ki he kau palesitenisī fakakōlomú mo fakakalasí ke fakafehokotaki e ngaahi ʻekitivitií ki he ngaahi fiemaʻu ʻa e toʻu tupú.
Ke maʻu ha fakamatala lahi ange, vakai, ChildrenandYouth.ChurchofJesusChrist.org.
Maʻá e Kakai Lalahí
Ngaahi Feituʻu Fakatahaʻanga ʻa e YSA
Kuo fakangofua ʻe he Kau Palesitenisī ʻUluakí ke fokotuʻu ʻe he ngaahi ʻēliá ha ngaahi feituʻu fakatahaʻanga maʻá e kau taautaha lalahi kei talavoú ʻo makatuʻunga ʻi he ngaahi fiemaʻu ʻa e feituʻu ko iá. Ko e feituʻu fakatahaʻangá ko ha feituʻu ia ʻi ha fale ʻoku lolotonga ngāue ʻaki (hangē ko ha ʻapisiasi pe fale ʻinisititiuti) ʻa ia ʻoku fakataumuʻa ʻe lava ke fakataha ki ai ʻa e kau taautaha lalahi kei talavoú mo honau ngaahi kaungāmeʻá ke nau kau ʻi he ngaahi meʻa ko ʻení (ʻo fakatatau mo e ngaahi fiemaʻu mo e maʻuʻanga tokoni fakalotofonuá):
-
Ako fakalotu mo hono ako ʻo e ongoongoleleí (ʻo kau ai ʻa e ʻinisititiutí)
-
Ngāue tokoni mo e ngaahi ʻekitivitī fakasōsialé
-
Ngaahi ʻekitivitī fakatemipalé mo e hisitōlia fakafāmilí
-
Ngaahi faingamālie moʻui fakafalala pē kiate kitá mo e akó
-
Ngaahi ʻekitivitī ngāue fakafaifekaú mo e tokoni ki he koló
-
Ngaahi polokalama kehe ʻa e Siasí
Ko e ngaahi feituʻu fakatahaʻanga kotoa pē kuo pau ke fakangofua ia ʻe he Kau Palesitenisī Fakaʻēliá pea tokangaʻi ʻe he kau palesiteni fakasiteikí mo e kau pīsopé.
Ngaahi Uiuiʻi maʻá e Kau Taautaha Lalahi Kei Talavoú mo e Kau Taautaha Lalahí
Kuo hoko ʻa e ngaahi liliu mo e fakamaʻalaʻala kimuí ni ki he tuʻutuʻuní ke fakaleleiʻi ai ʻa e ngaahi taʻefemahinoʻaki mo e ngaahi tukufakaholo fekauʻaki mo e ngaahi fakangatangata ʻi he ngaahi faingamālie maʻá e kau mēmipa teʻeki malí ke ngāue ʻi he Siasi ʻo e ʻEikí. ʻOku fakamatalaʻi ʻe he ngaahi liliu mo e fakamaʻalaʻala ko ʻeni ki he tuʻutuʻuní, ʻa ia naʻe fakangofua ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ʻi he Tohi Tuʻutuʻuni Fakakātoá, ʻe lava ke tāpuekina ʻa e kau taautaha lalahi kei talavoú mo e kau taautaha lalahí ʻe ha ngaahi uiuiʻi kehekehe, ʻo kau ai ʻa ʻenau hoko ko e kau taki ʻi he siteikí mo e uōtí, pea ʻe lava ke nau tāpuekina ʻa e niʻihi kehé. ʻOku fakaʻaongaʻi he taimí ni ʻa e ngaahi tuʻutuʻuni tatau ʻi he ngaahi ʻiuniti kotoa pē ʻo e Siasí, ʻo kau ai mo e ngaahi ʻiuniti ʻa e kau taautaha lalahi kei talavoú mo e kau taautaha lalahí. Kuo toʻo ʻa e ngaahi fakangatangata ke fua fatongia ʻa e kau taautaha lalahi kei talavoú mo e kau taautaha lalahí ʻi he kau palesitenisī fakasiteikí, kau pīsopelikí, mo e kau palesitenisī Fineʻofá ʻi he siteikí ʻi he ngaahi ʻiuniti maʻá e kau taautaha lalahi kei talavoú mo e kau taautaha lalahí.
ʻE lava ke fua fatongia ʻa e kāingalotu tāutahá ʻi he ngaahi lakanga fakatakimuʻá ʻo kau ai ʻa e kau palesitenisī ʻi he ngaahi houalotu ʻi he uōtí mo e siteikí, kau palesitenisī ʻi he kaumātuʻá, tokoni ki he kau pīsopelikí, aleaʻanga māʻolungá, mo tokoni ki he kau palesitenisī fakasiteikí.
Ko Hono Fiemaʻu mo Talitali Lelei ʻa e Tokotaha Kotoa Pē—ʻOfa, Vahevahe, pea Fakaafeʻi
ʻI he taimi ʻoku fefaʻuhi ai e kāingalotú ke nau ongoʻi ʻoku nau kau maí, ʻoku lea faainoa ʻaki ʻe he kau takí mo e niʻihi kehé he taimi ʻe niʻihi ha ngaahi meʻa ʻokú ne fakalalahi e tui ʻa e kau mēmipa ko ʻení ʻoku ʻikai ke nau taau ke kau mai pe ʻikai fie maʻu.
ʻE ala tokoni ʻa hono manatua e ngaahi moʻoni ko ʻeni fekauʻaki mo e ʻofá, vahevahé, mo e fakaafé ki hono talitali lelei e tokotaha kotoa pē ke mālohi, fakafeohi, mo kau mai ki he Siasi ʻo Sīsū Kalaisí:
-
Ko e tokotaha kotoa pē ko ha fānau ʻofeina ia ʻo e ʻOtuá mo ha natula mo e ikuʻanga fakalangi. ʻOku ʻikai ke ngata he ngaahi tāpuaki taʻengata ʻokú Ne talaʻofa ki he kakai faivelengá, ka ʻokú Ne finangalo foki ke tāpuekina ʻEne fānaú he taimí ni, lolotonga ʻa e moʻuí ni.
-
ʻOku fie maʻu ʻa e fānau kotoa pē ʻa e ʻOtuá ki he ngāue ki hono langa hake ʻa Hono puleʻangá.
-
Ke tokoniʻi ha taha ke ne ongoʻi ʻokú ne kau mai pea ʻoku fie maʻu iá, kamata ʻaki ʻa e ʻofá. Fakafanongo ke mahino kiate koe ʻa ʻene ngaahi aʻusiá. ʻOua te ke fakamahamahalo ʻokú ke ʻosi ʻiloʻi pe ʻoku mahino ia kiate koe.
-
ʻOku ʻikai ke tau maʻu ʻa e tali ki he ngaahi fehuʻi kotoa pē ʻoku tau fehangahangai mo ia ʻi he moʻui ní. Hangē ko ʻení, ʻoku ʻikai ke tau ʻiloʻi ʻa e ʻuhinga ʻoku fehangahangai ai ha taha mo ha faingataʻa pau.
-
Loto-tauʻatāina pea ʻoua ʻe loto-fakamaau. Talitali lelei ʻa e tokotaha kotoa pē, ʻo tatau ai pē pe ko e hā e tuʻunga ʻokú ne ʻi aí ʻi heʻene fonongá. Fie tokoni pea nofo taha ʻi he foʻi moʻoni ʻoku fie maʻu ʻa e tokotaha kotoa pē ʻi he Siasí.
-
Kapau te ke lea faainoa ʻaki ha meʻa ʻoku fakatupu loto-mamahi, ʻoua naʻá ke tuli tonuhia; ka ke kole fakamolemole pea feinga leva ke fakatomala mo tupulaki.
Ki ha fakamatala lahi ange fekauʻaki mo hono tokoniʻi e kāingalotú ʻi ha ngaahi tūkunga pau, vakai, Ngaahi Maʻuʻanga Tokoni Faifaleʻí.
Founga Kuo Tupu ai mei ha Ului ʻe Taha ha Ului ʻa ha Niʻihi Tokolahi
Ngaahi Tefitoʻi Moʻoni ʻo e ʻOfá, Vahevahé mo e Fakaafé
Ngaahi Tāpuaki Kuo Talaʻofa Mai ʻi heʻetau ʻOfá, Vahevahé, mo Fakaafé
