Paggamit Sining Libro

Ang mga larawan sa sini nga libro ginbahin sa anum ka seksyon: Daan nga Katipan, Bag-ong Katipan, Libro ni Mormon, Maragtas sang Simbahan, Ebanghelyo sa Buhat, kag Mga Propeta sa Ulihing mga Adlaw. Sarang mo gamiton ining mga larawan para sa pagtuon kag pagtudlo sa puluy-an ukon sa simbahan. Ang listahan sa idalom nagahatag sang nagalaragway nga tig-ulo para sa tagsa ka larawan subong man sang mga talamdan sa balaan nga mga kasulatan kag iban pa nga mga palasandigan nga sarang magamit sa pagtuon kag sa pagsugilanon parte sa mga larawan. Ang pagtuon sining magkaupod nga balaan nga mga kasulatan kag mga palasandigan magapadalom sang imo paghangop sang mga hitabo kag mga prinsipyo sang ebanghelyo nga ginalaragway. Binagbinaga ang masunod nga mga ideya sa paggamit sang mga larawan kag mga talamdan:

Agdaha ang mga indibidwal nga magpangita sang balaan nga mga kasulatan ukon iban nga mga palasandigan nga nagabagay sa isa ka partikular nga larawan. Pangabaya sila nga basahon ukon isaysay sing malip-ot ining materyal sa tion sang pagsinugilanon parte sa larawan.
Pangabaya ang mga miyembro sang pamilya ukon klase nga ilaragway ang ila makita sa larawan ukon ano ang ila nabatyagan parte sa larawan. Ano nga mga prinsipyo sang ebanghelyo ang ginatudlo sang larawan? Ano nga mga pagdapat ang sarang mahimo sa aton mga kabuhi karon nga panahon?
Agdaha ang mga indibidwal nga lantawon ang mga larawan. Sarang sila magpili sang duha ka larawan nga ianggid kag ituhay. Ang ila mga obserbasyon kag mga pamangkot parte sa ila makita mahimo magpadulong sa mga paghinambalanay parte sa balaan nga mga kasulatan kag parte sa mga prinsipyo sang ebanghelyo.