Panangaramat iti Daytoy a Libro

Naurnos ti arte daytoy a libro iti innem a benneg: Daan a Tulag, Baro a Tulag, Libro ni Mormon, Pakasaritaan ti Simbaan, Ebanghelio a Maar-aramat, ken Dagiti Propeta iti Ud-udina nga Aldaw. Mabalinyo nga usaren dagitoy a ladawan para iti panagsursuro ken panangisuro iti pagtaengan wenno iti simbaan. Mangted ti listaan iti baba iti mangiladawan a paulo para iti tunggal ladawan kasta met a reperensia iti nasantuan a kasuratan ken dadduma pay a pagadawan a mabalin a maaramat tapno makasursuro maipapan ken mailawlawag dagiti ladawan. Iti panangamiris a naimbag kadagitoy nairagpin a nasantuan a kasuratan ken pagadawan ket mangpauneg iti pannakaawatyo kadagiti pasamak ken pagbatayan ti ebanghelio a nailadawan. Ibilang dagiti sumaganad a kapanunotan iti panangaramatyo kadagiti ladawan ken reperensia:

• Awisenyo dagiti indibidual nga amirisenda a naimbag dagiti nasantuan a kasuratan wenno dagiti dadduma pay a pagadawan a karagpin ti maysa a partikular a ladawan. Idawat kadakuada a mangbasa wenno manggupgop iti daytoy a material kabayatan ti panaglilinnawag iti daytoy a ladawan.

• Idawat kadagiti miembro ti pamilia wenno klase a mangiladawanda no ania ti makitada iti maysa a ladawan wenno no kasano a maparikna ida ti ladawan. Ania dagiti pagbatayan ti ebanghelio nga isursuro ti ladawan? Ania dagiti mabalin nga aramiden a pangyusaran iti panagbiagtayo ita nga agdama?

• Awisenyo dagiti indibidual a kumita kadagiti ladawan iti bukodda. Mabalin a mangalada iti dua a ladawan tapno pagdasigen ken paggidiaten. Dagiti paliiw ken saludsodda maipanggep iti no ania ti makitada ket makaiturong kadagiti pagsasaritaan maipapan kadagiti nasantuan a kasuratan ken maipapan kadagiti pagbatayan ti ebanghelio.

Dagiti dadduma pay a ladawan ti ebanghelio, kasta met dagiti kapanunotan para iti panangaramat iti daytoy a libro, ket masarakan iti LDS.org.