Ko Hono Fakaʻaongaʻi ʻo e Tohí ni

ʻOku vahevahe ʻa e fakatātā ʻi he tohí ni ki ha konga ʻe ono: Fuakava Motuʻá, Fuakava Foʻoú, Tohi ʻa Molomona, Hisitōlia ʻo e Siasí, Ngāueʻi ʻo e Ongoongoleleí pea mo e Kau Palōfita ʻo e Ngaahi ʻAho Kimui Ní. Te mou lava ʻo fakaʻaongaʻi e ngaahi fakatātaá ni ki he ako mo e faiako ʻi ʻapí pe ʻi he lotú. ʻOku ʻoatu he lisi ʻi laló ʻa e fakaikiiki ʻo e hingoa ʻo e fakatātā takitaha mo e ngaahi fakamoʻoni fakafolofolá pea mo ha ngaahi maʻuʻanga tokoni kehe ʻe lava ke fakaʻaongaʻi ke ako mo aleaʻi ʻaki e ngaahi fakatātaá. ʻE hanga ʻe he fekumi ki he ngaahi potu folofola ʻoku ʻoatu fakataha mo e fakatātaá pea mo e ngaahi maʻuʻanga tokoní, ʻo fakalahi ange hoʻo mahino ki he ngaahi meʻa ne hokó pea mo e ngaahi tefitoʻi moʻoni ʻo e ongoongoleleí ʻoku ʻomi aí. Fakakaukau ki he ngaahi tefitoʻi fakakaukau ko ʻeni ki hono fakaʻaongaʻi ʻo e ngaahi fakatātaá mo e fakamoʻoni fakafolofolá:

Fakaafeʻi e niʻihi fakafoʻituituí ke nau fekumi ki he ngaahi potu folofolá pe maʻuʻanga tokoni kehe ʻoku fekauʻaki mo e foʻi fakatātā takitaha. Kole ange ke nau lau pe fakamatala fakanounouʻi e nāunau ko ʻení lolotonga hono aleaʻi ʻo e fakatātaá.
Kole ki he kau mēmipa ʻo e fāmilí pe kalasí ke nau fakamatalaʻi e meʻa ʻoku nau mamata ki ai he fakatātaá pea mo e faʻahinga ongo ʻoku nau maʻu mei he fakatātaá. Ko e hā ha ngaahi tefitoʻi moʻoni ʻo e ongoongoleleí ʻoku akoʻi mai ʻe he fakatātaá? Ko e hā ha founga te tau lava ʻo fakaʻaongaʻi ai ia heʻetau moʻuí he ʻahó ni?
Fakaafeʻi e fakafoʻituituí ke nau vakai ki he tohi fakatātaá ʻiate kinautolu pē. Te nau lava ʻo fili ha fakatātā ʻe ua ke nau fakafehoanaki e meʻa ʻokú na tatau mo faikehekehe aí. ʻE lava ke hanga ʻe he ngaahi meʻa ʻoku nau vakai ki aí mo ʻenau ngaahi fehuʻí ʻo tataki kinautolu ke nau fetalanoaʻaki ʻo kau ki he ngaahi potu folofolá pea mo e ngaahi tefitoʻi moʻoni ʻo e ongoongoleleí.