Mga Basahon ug mga Leksiyon
Kapitulo 24: Ang Adlaw nga Igpapahulay

Kapitulo 24

Ang Adlaw nga Igpapahulay

A congregation gathered in a chapel for sacrament meeting. They are singing a hymn.

Ang Kahulugan sa Adlaw nga Igpapahulay

  • Unsa ang adlaw nga Igpapahulay?

“Hinumduman mo ang adlaw nga igpapahulay, aron sa pagbalaan niini” (Exodo 20:8; tan-awa usab sa D&P 68:29)

Ang pulong Sabbath nagagikan sa usa ka Hebreohanong pulong nga nagkahulugan og pahulay. Sa wala pa ang Pagkabanhaw ni Jesukristo, ang adlaw nga Igpapahulay nagsaulog sa adlaw sa pagpahulay sa Ginoo human sa Iyang Paglalang. Kini usa ka timaan sa pakigsaad tali sa Dios ug sa Iyang mga katawhan. Atong mabasa diha sa basahon sa Genesis nga gilalang sa Dios ang mga langit ug ang yuta sulod sa unom ka mga yugto sa panahon diin Iyang gitawag og mga adlaw: “Ug sa adlaw nga ikapito natapos sa Dios ang buhat nga iyang gihimo; ug mipahulay siya sa adlaw nga ikapito gikan sa tanan niyang mga buhat nga iyang nahimo. Ug gipanalanginan sa Dios ang adlaw nga ikapito, ug nagbalaan niini” (Genesis 2:2–3). Karon ang Igpapahulay nagsaulog usab sa Pagkabanhaw ni Jesukristo.

Ang adlaw nga Igpapahulay mao ang matag ikapitong adlaw. Kini usa ka balaan nga adlaw nga gi-orden sa Dios alang kanato sa pagpahulay gikan sa atong mga inadlaw nga trabaho ug sa pagsimba Kaniya.

Ang Katuyoan sa Adlaw nga Igpapahulay

  • Unsaon nimo sa pagpasabut sa katuyoan sa adlaw nga Igpapahulay ngadto sa usa ka tawo kinsa wala makahibalo mahitungod sa Igpapahulay?

Mitudlo si Jesus nga ang adlaw nga Igpapahulay gihimo alang sa atong kaayohan (tan-awa sa Marcos 2:27). Ang katuyoan sa Igpapahulay mao ang paghatag kanato og usa ka piho nga adlaw sa semana diin magiyahan ang atong mga hunahuna ug mga lihok ngadto sa Dios. Kini dili lamang usa ka adlaw sa pagpahulay gikan sa trabaho. Kini usa ka sagrado nga adlaw nga igahin sa pagsimba ug sa balaan nga pagtahud. Samtang kita nagpahulay gikan sa atong naandang inadlaw nga mga kalihokan, ang atong mga hunahuna gipapahulay aron sa pagpamalandong og espirituhanong mga butang. Niini nga adlaw kita kinahanglan mobag-o sa atong mga pakigsaad uban sa Ginoo ug mopakaon sa atong mga kalag sa mga butang kabahin sa Espiritu.

  • Paghunahuna mahitungod sa unsay imong mabuhat aron sa pagsunod sa katuyoan sa Igpapahulay diha sa hunahuna samtang ikaw nag-andam alang sa adlaw matag semana.

Kasaysayan sa Igpapahulay

Ang ikapito nga adlaw gipahinungod sa Dios isip usa ka Igpapahulay sa sinugdanan sa yuta (tan-awa sa Genesis 2:2–3). Sukad sa labing unang mga panahon, ang tradisyon sa usa ka sagradong ikapito nga adlaw gipatunhay taliwala sa nagkalain-laing mga katawhan sa yuta. Gibag-o sa Dios ang usa ka sugo kalabut niini nga adlaw ngadto sa mga Israelite, nag-ingon, “Hinunduman mo ang adlaw nga igpapahulay, aron sa pagbalaan niini” (Exodo 20:8.) Ang pagtuman sa adlaw nga Igpapahulay usa usab ka timailhan nga ang mga Israelite mao ang Iyang mga tawo sa pakigsaad (tan-awa sa Exodo 31:12–13, 16; Isaias 56:1–8; Jeremias 17:19–27).

Bisan pa niana, ang pipila sa mga lider nga Judeo mihimo og daghang wala kinahanglana nga mga balaod mahitungod sa Igpapahulay. Sila mihukom kon unsa ang ka lay-on nga ang mga tawo mahimong molakaw, unsa nga matang sa bugkos ang ilang mahimong ibugkos, ug uban pa. Sa dihang ang mga lider nga Judeo misaway ni Jesukristo sa pagpang-ayo og masakiton nga mga tawo sa Igpapahulay, si Jesus mipahinumdom kanila nga ang Igpapahulay gihimo alang sa kaayohan sa tawo.

Ang mga Nephite usab nagtuman sa adlaw nga Igpapahulay sumala sa mga kasugoan sa Dios (tan-awa sa Jarom 1:5).

Sa karon nga mga panahon ang Ginoo mibalik sa Iyang sugo nga kita kinahanglan nga mohinumdom sa adlaw nga Igpapahulay ug sa pagbalaan niini (tan-awa sa D&P 68:29).

Ang Adlaw sa Ginoo

  • Ngano nga ang Igpapahulay gibalhin man gikan sa ikapitong adlaw ngadto sa unang adlaw?

Hangtud sa Iyang Pagkabanhaw, si Jesukristo, ug ang Iyang mga disipulo mipasidungog sa ikapitong adlaw isip ang Igpapahulay. Human sa Iyang Pagkabanhaw, ang Dominggo gihimo nga sagrado isip ang adlaw sa Ginoo agi og paghinumdom sa Iyang Pagkabanhaw nianang adlawa (tan-awa sa Mga Buhat 20:7; 1 Mga Taga-Corinto 16:2). Sukad niana nga panahon, ang Iyang mga sumusunod mihimo sa unang adlaw isip ilang Igpapahulay. Sa duha ka mga sitwasyon adunay unom ka mga adlaw sa trabaho ug usa alang sa pagpahulay ug pagsimba.

Ang Ginoo naghatag kanato og usa ka direkta nga sugo niining mga adlawa nga kita usab kinahanglan nga mopasidungog sa Dominggo, ang adlaw sa Ginoo, isip atong Igpapahulay (tan-awa sa D&P 59:12).

  • Sa unsa nga paagi nga ang paghinumdom sa Pagkabanhaw mo-impluwensya sa atong pagsimba sa Igpapahulay?

Ang Pagbalaan sa Adlaw nga Igpapahulay

  • Unsa ang gipasabut sa pagbalaan sa adlaw nga Igpapahulay?

Ang Ginoo nagsugo kanato, una, sa pagbalaan sa adlaw nga Igpapahulay. Sa usa ka pagpadayag nga gihatag ngadto kang Joseph Smith pagka 1831, ang Ginoo misugo sa mga Santos sa pag-adto sa balay ampoanan ug paghalad sa ilang mga sakrament, sa pagpahulay gikan sa ilang mga trabaho, ug sa paghatag sa ilang mga pagsimba ngadto sa Labing Halangdon (tan-awa sa D&P 59:9–12).

Ikaduha, Siya nagsugo kanato sa pagpahulay gikan sa atong inadlaw nga trabaho. Kini nagpasabut nga kita kinahanglan nga dili mobuhat sa atong trabaho nga mopugong kanato gikan sa paghatag sa atong tibuok nga pagtagad ngadto sa espirituhanon nga mga butang. Ang Ginoo misulti sa mga Israelite, “Dili ka magbuhat, ikaw, bisan ang imong anak nga lalaki bisan ang imong anak nga babaye, bisan ang imong sulugoon nga lalaki, bisan ang imong sulugoon nga babaye, bisan ang imong kahayopan” (Exodo 20:10). Ang atong mga propeta nagsulti kanato nga kita kinahanglan nga dili mamalit, mangayam, mangisda, motan-aw og mga kalihokan sa isport o moapil sa susama nga mga kalihokan niana nga adlaw.

Si Presidente Spencer W. Kimball mipasidaan, hinoon, nga kon kita nagpahayahay lamang nga walay gibuhat diha sa adlaw nga Igpapahulay, kita wala magbalaan sa adlaw. Ang adlaw nga Igpapahulay nagdasig og makaayo nga mga hunahuna ug mga buhat. (Tan-awa sa Mga Pagtulun-an sa mga Presidente sa Simbahan: Spencer W. Kimball [2006], 212.)

Unsa nga mga matang sa mga butang ang mahimong atong buhaton sa Igpapahulay? Si propeta Isaias nagsugyot nga kita kinahanglang molikay gikan sa pagbuhat sa atong kaugalingon nga kalingawan ug kinahanglan ang “pagtawag sa igpapahulay nga usa ka kahimut-an, ang balaan sa Ginoo, nga halangdon” (Isaias 58:13).

Kinahanglang atong hunahunaon ang matarung nga mga butang nga atong mabuhat sa Igpapahulay. Sama pananglit, atong mabalaan ang adlaw nga Igpapahulay pinaagi sa pagtambong og mga miting sa Simbahan, pagbasa og mga kasulatan ug sa mga pulong sa atong mga lider sa Simbahan; pagduaw sa masakiton, sa mga tigulang, ug sa atong mga minahal; pagpaminaw og makapabayaw nga mga himno; pag-ampo ngadto sa atong Langitnong Amahan uban sa pagdayeg ug pagpasalamat; paghimo og mga serbisyo sa Simbahan; pag-andam og mga rekord sa family history ug personal nga mga kasaysayan; pagsaysay og makapaawhag og hugot nga pagtuo nga mga istorya ug pagpamatuod ngadto sa mga sakop sa pamilya ug pagpakigbahin og espirituhanong mga kasinatian ngadto kanila; paghimo og sulat ngadto sa mga misyonaryo ug sa mga minahal; pagpuasa uban ang usa ka katuyoan, ug pagpakigbahin og oras ngadto sa mga bata ug sa uban diha sa panimalay.

Sa paghukom kon unsa ang ubang mga kalihokan nga atong mahimo sa Igpapahulay sa tukma nga paagi, atong mapangutana ang atong mga kaugalingon: Kini ba makapabayaw ug makadasig kanako? Nagpakita ba kini og pagtahud alang sa Ginoo? Naggiya ba kini sa akong mga hunahuna ngadto Kaniya?

Tingali adunay mga panahon nga kita gikinahanglan nga motrabaho sa Igpapahulay. Kinahanglan kita molikay niini kon mahimo, apan kon kini gikinahanglan gayud kaayo, kinahanglan ato gihapong ipabilin ang espiritu sa pagsimba sa Igpapahulay diha sa atong mga kasingkasing kutob sa atong mahimo.

  • Paghunahuna og usa ka butang nga imong mahimo aron sa pagpauswag sa imong mga paningkamot aron sa pagbalaan sa adlaw nga Igpapahulay. Kon ikaw usa ka ginikanan o apohan, paghunahuna mahitungod sa usa ka butang nga ikaw makahimo sa pagtabang sa imong mga anak o mga apo nga masabtan ang kahulugan sa Igpapahulay.

Mga Panalangin sa Pagtuman sa Igpapahulay

  • Unsa ang pipila ka mga panalangin nga atong madawat kon kita mobalaan sa adlaw nga Igpapahulay?

Kon kita mopasidungog sa adlaw nga Igpapahulay, kita mahimong makadawat og mahinungdanon nga espirituhanon ug temporal nga mga panalangin. Ang Ginoo nag-ingon nga kon kita motuman sa adlaw nga Igpapahulay uban sa pagpasalamat ug malipayong mga kasingkasing, kita mapuno sa kalipay. Siya nagsaad:

“Ang kahingpitan sa yuta mainyo, … gani alang sa pagkaon o panaput, o alang sa mga balay, o alang sa mga kamalig, o alang sa mga prutasan, o alang sa mga tanaman, o alang sa mga ubasan;

“Oo, ang tanan nga mga butang nga gikan sa yuta, sa panahon niana, gihimo alang sa kaayohan ug sa paggamit sa tawo, aron sa pagpahimuot sa mata ug sa pagmaya sa kasingkasing;

“Oo, alang sa pagkaon ug alang sa panaput, alang sa pagtilaw ug sa pagsimhot, sa paglig-on sa lawas ug sa pagbuhi sa kalag” D&P 59:16–19.

Dugang nga mga Kasulatan