Tabangi ang mga Higala sa Pagsimba uban Kanato
Alang sa daghang tawo, ang pagtambong og bag-ong simbahan makahadlok. Makatabang kamo sa inyong mga higala nga makabaton og positibo nga kasinatian sa pagsimba uban sa mga Santos sa Ulahing mga Adlaw bisan asa pa sila nagpuyo pinaagi sa pagdala kanila sa mga miting sa Simbahan kauban ninyo o pinaagi sa pagtabang kanila sa pagpangita og kongregasyon duol kanila gamit ang Meetinghouse Locator.
Tabangi ang inyong mga higala nga makahibalo unsa ang lauman atol sa mga serbisyo sa pagsimba sa Domingo. Tubaga ang ilang mga pangutana. Pag-ampo nga sila mobati nga giabiabi ug maadunay usa ka maayong espirituhanong kasinatian sa unang higayong pagsimba nila uban kanato. Ang inyong mga higala makahangyo og tour sa meetinghouse sa dili pa sila mosimba o magpalista aron ang mga misyonaryo motagbo nila sa bilding sa simbahan inig Dominggo kon gusto nila.
Matag higayon nga kamo moadto sa simbahan, pangita ug ipaila-ila ang inyong kaugalingon sa bag-ong mga tawo sa inyong kongregasyon. Kon magtinabangay, kita makahimo sa atong mga serbisyo sa pagsimba ug sa mga meetinghouse nga mahigalaon ug maabiabihon alang sa tanan. Diha sa Simbahan ni Jesukristo adunay luna alang sa tanan.
Sa mga lugar diin ang lokal nga mga lider sa pagkapari mi-aprobar sa livestream nga mga miting, makadapit kamo og mga higala nga dili makatambong sa mga serbisyo sa personal nga paagi sa pag-akses sa inyong lokal nga link sa bidyo pinaagi sa Gospel Stream.