“Kasano a kasaok ti anakko maipapan iti nasalun-at a seksualidad?” Tulong para kadagiti Nagannak (2021)

“Kasano a kasaok ti anakko maipapan iti nasalun-at a seksualidad?” Tulong para kadagiti Nagannak

Ladawan

pamilia a magmagna iti ruar

Kasano a kasaok ti anakko maipapan iti nasalun-at a seksualidad?

Marikna ti adu a nagannak ti panagkedked wenno mabainda a kasarita dagiti annakda maipapan iti seksualidad, wenno mabutengda amangan no mangriing iti ugalida iti seks no kasaritada dagiti annakda maipapan iti seksualidad. Ti kinapudnona, no saanyo a kasaritan dagiti annakyo maipapan iti seksualidad, maammuandanto maipapan iti daytoy manipud iti sabali a paggapuan. Babaen ti kaadda iti regular a panagsasarita kadagiti annakyo maipapan kadagiti saritaan kas iti nasalun-at a seksualidad, matulonganyo ida a makaawat a maysakayo a natalged a maasitgan.

Gagangay a managusisa ti kaaduan dagiti ubbing, ken kayatda a maawatan ti gagangay, a rikna nga inted ti Dios a mapadpadasanda. Maisaganayo ti bagiyo a kasarita dagiti annakyo maipapan iti seksualidad babaen ti panaglaglagip idi kaedadyo ida. Ania ti sumagmamano kadagiti rikna a napadasanyo idi? Ania dagiti kapanunotan, saludsod, wenno pakaseknanyo idi? Sadino ti nagdawatanyo iti impormasion? Ania ti tarigagayanyo a nangngegan koma wenno naisuro koma kadakayo?

Ok laeng no mariknayo a saankayo a sigurado maipapan no kasano ti kasayaatan a panangtengngel kadagitoy a panagsasarita. Mabalinyo nga usaren ti kinalakayo a maasitgan tapno mabangon ti relasionyo kadagiti annakyo. Marikna dagiti annakyo ti ayatyo no napudno a mapagtalkan ken napudnokayo iti pannakisarsarita kadakuada, iti baet ti ania man a pannakaidna a mabalin a mariknayo.

Tapno maparnuay ti nawada a pannakisarita, mabalinyo a:

Rugian no ubbing pay dagiti annakyo babaen ti panangibaga kadagiti paset ti bagi babaen iti umno a nagnaganda. Daytoy ti mangisuro kadagiti ubbing maipapan kadagiti bagida ken mangted kadakuada iti pagsasao a kasapulanda ti agbalin a nasalun-at ken mapakaammuan.
Bay-an a maammuan dagiti annakyo a makapagdamagda kadakayo kadagiti saludsod, ken kalpasanna padasenyo a di unay ag-over react wenno mangted bain kadagiti saludsodda wenno panagipudnoda. Ipakita a makisarsaritada kadakayo, ipakitayo kadakuada ti ayat ken suporta, ket aramidenyo amin a kabaelanyo tapno mapagtalinaed ti panagsasarita.
Liklikan ti agusar kadagiti metapora para iti seksualidad. Kasapulan dagiti ubbing ti impormasion a naipadatag iti nalawag ken mapagtalkan a wagas. Kas pagarigan, adda dagiti agtutubo a mangisarita kadagiti adalen a ti panaglabsing iti linteg ti kinadalus ti dayaw ket maidasig iti nagalgal a babolgam wenno taraon a naipasa iti tunggal tao iti lawlaw ti siled ket ngarud saanen a makaay-ayo. Nupay naigagara unay, dagitoy a kita ti metapora ti masansan a mangitandudo iti panagbuteng iti seksualidad wenno rikna ti nababa wenno saanen a maatur a pateg iti bagi.
Maaddaan kadagiti adalen iti home evening wenno saritaan a mainaig iti seksualidad ket bay-an a dagiti annakyo ti mangisuro no mariknada a nakasaganadan. Saritaan a mabalin nga iraman ti panagbaro wenno banagbalasang (puberty), ladawan ti bagi, ken dagiti positibo nga aspekto ti seksualidad.
Ilawlawag a gagangay ti pannakapadas kadagiti rikna a seksual ken pannakariing a mainaig iti seks. Saan a nasken nga agtignay dagiti ubbing a mainaig kadagita a rikna ken gagar ngem mabalin nga ikasotayo dagitoy. Kayatna a sawen daytoy a pannakadlaw kadagiti rikna a seksual ngem saan a negatibo a pananghusga kadakuada. Impakitan ti panagsukisok a ti panangsanayda iti panangikaso ket makatulong kadagiti ubbing nga agpili iti nasaysayaat a maitunos kadagiti ik-ikkan pategda ken panggepda a tun-oyen.
Padasenyo a saan a makaupay wenno makaunget ti reaksionyo no ar-aramiden dagiti annakyo ti panagap-apros iti bagi wenno no akuen dagiti agtutubo ti inda panagsalsal [masturbating]. No kasano ti panagresponde dagiti nagannak kadagitoy a galad ket mangapekto iti no kasano ti rikna dagiti agtutubo maipapan iti bagida ken iti seksualidadda.
Suruanyo dagiti annakyo dagiti gapu iti likudan dagiti pagrukodan kadagiti relasion ken seksualidad. No isuroyo dagitoy a pagrukodan ken dagiti gapu no apay a napategda, laglagipenyo a nasken unay nga aramidenda ti kasta a saan a mangparnuay iti panagbain wenno panagbuteng.¹