1

E Taua le Aoga

Fesili e Talanoa i ai

1. Vaavaai i ata nei. O a mea ua e vaaia?

2. O faapefea ona aoao faatasi aiga?

3. Aisea e taua ai le aoga?

Aoao

O le aoga o se vaega o le fuafuaga a le Atua. Ua ta’u mai e tusitusiga paia, “Ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). A o tatou aoao ma tuputupu ae, o le a tatou aoao atili e uiga i le fuafuaga a le Atua mo i tatou.

O Iesu Keriso o se faataitaiga o se tagata aoao maoae. Ua aoao mai i tatou e tusitusiga paia e faapea o Iesu “ua tupu le poto” (Luka 2:52). O le a faamanuia oe e le Tama Faalelagi ma fesoasoani ia te oe e aoao. O le a Ia faamanuiaina lau fanau a o latou aoao ma mulimuli i le faataitaiga a Iesu.

Na aoao mai Peresitene Gordon B. Hinckley e faapea “o le a‘otauina o le ki lea o le a tatala ai le faitotoa o avanoa” (“Ia Teuteuina Ou Manatu i le Mama e le Aunoa,” Liahona, Me 2007, 116). O lona uiga o le a‘otauina e mafai ona fesoasoani ia te oe ma lau fanau e aoao ni tomai fou. E mafai ona fesoasoani ia te oe e aoao atu ai isi ma tausia lou aiga.

Mafaufau ma Tatalo

Mafaufau ma tatalo e uiga i mea ua e aoaoina. Tusi i lalo soo se manatu o ia te oe po o manatu e sau mai le Agaga Paia. O le a sou manatu i le mea e finagalo le Alii e te faia?

Gaoioiga

Vaai i ata o loo i lalo. Mafaufau ma talanoa e uiga i mea o loo faia e tagata i ata taitasi. O le a sou manatu e faapefea ona fesoasoani le aoaoina ma le a‘otauina i tagata i nei ata?

Talanoa ma Lou Aiga

Talanoa ma lou aiga e uiga i mea ua e aoaoina. Talanoaina fesili nei. Fai i tagata o lou aiga e faasoa mai o latou manatu ma faalogo i le tasi ma le isi.

• E mafai faapefea e le mulimuli i le faataitaiga a Iesu ona fesoasoani ia te oe i le aoga?

• E mafai faapefea e le a’otauina ona fesoasoani ia te oe i lou olaga?

• O le a se mea e mafai ona tatou faia o se aiga e fesoasoani ai i le tasi ma le isi e aoao ma tuputupu ae ai?