4

Fè Plan pou Ede Pitit Ou Yo Gen Siksè

Kesyon pou Diskite

1. Gade foto sa yo. Kisa ou wè?

2. Poukisa li enpòtan pou nou fè plan?

3. Kijan w santi w lè w fin konplete yon plan ou te fè?

Aprann

Si w vle rezoud yon pwoblèm oubyen fè yon bagay, ou dwe deside kòman ou pral fè l. Sa rele fè yon plan. Lè nou ede pitit nou yo aprann fè plan, sa ap ede yo gen siksè.

Oumenm ak pitit ou yo ka fè plan nan kat etap ki fasil:

1. Dekouvri

2. Planifye

3. Aji

4. Reflechi

Gade egzanp ki anba yo pou w wè nan ki fason etap yo ka ede oumenm ak pitit ou yo fè plan.

1. Dekouvri

   Kisa w bezwen pou w amelyore oubyen chanje?

   Pitit fi m nan gen difikilte avèk matematik. Li mande m pou m ede l, men, m pa fò nan matematik.

2. Planifye

   Ki etap ou dwe pran?

   M pral pale avèk enstriktè l la ak lòt paran sou fason pou ede pitit fi m nan avèk matematik.

3. Aji:

   Èske w bezwen plis èd?

   M te priye pou èd. M te santi m ta dwe pale avèk yon manm nan pawas mwen an ki se yon enstriktè. Li te di li t ap bay pitit fi m nan leson. Nou te fikse yon lè pou yo rankontre chak semèn.

4. Reflechi:

   Kisa w te aprann? Èske w bezwen fè yon lòt plan oubyen kontinye avèk plan sa a?

   M bezwen tcheke chak jou avèk pitit fi m nan pou m wè kijan l ap travay sou devwa matematik yo epi pou m revize nòt li yo.

Panse epi Priye

Panse sou sa w aprann yo. Ekri nenpòt panse ou genyen oubyen ide ki soti nan Sentespri a. Kisa w panse Senyè a vle w fè? Kòman w ka tabli yon egzanp pou pitit ou yo nan fè plan ak akonpli yo?

Aktivite

Panse sou yon bagay ou vle amelyore oubyen chanje. Itilize de premye etap yo pou fè yon plan.

Apre w fin fè plan w lan, retounen nan aktivite sa a epi konplete de pwochen etap yo:

1. Dekouvri

   Kisa w bezwen amelyore oubyen chanje?

2. Planifye

   Kòman w pral amelyore oubyen fè chanjman an? Ki etap ou dwe pran?

3. Aji:

   Kòman lafwa nan Jezikri te ede ou akonpli plan w lan? Èske w bezwen plis èd?

4. Reflechi:

   Kisa w te aprann? Èske w bezwen fè yon lòt plan oubyen kontinye avèk plan sa a?

Pale avèk Fanmi Ou

Pale avèk fanmi w sou sa w aprann. Mande manm fanmi w pou yo pataje ide yo epi pou yonn koute lòt.

• Ede pitit ou yo fè plan. Priye ansanm pou w ka konn kisa yo ta dwe fè.

• Ekri plan chak pitit anba la a. Pale sou fason w pral ede chak pitit akonpli plan pa l la.