4

Fai ni Sini e Fesoasoani i Lau Fanau ia Manuia

Fesili e Talanoa i ai

1. Vaavaai i ata nei. O a mea ua e vaaia?

2. Aisea e taua ai le i ai o sini?

3. O le a sou lagona pe a e faamae’aina se sini na e faia?

Aoao

Afai e te manao e foia se faafitauli pe faia se mea, e tatau ona e filifili pe faapefea ona e faia. Ua ta’ua lenei mea o le faia o se sini. O le fesoasoani i lau fanau e aoao e fai ni sini o le a fesoasoani ia i latou ia manuia.

E mafai e oe ma lau fanau ona faia se sini i ni laasaga faigofie se fa:

1. Iloa

2. Fuafua

3. Faatino

4. Tomanatu

Vaai i le faataitaiga o loo i lalo e iloa ai pe mafai faapefea e laasaga ona fesoasoani ia te oe ma lau fanau e fai ni sini.

1. Iloa:

   O a ni mea e tatau ona e faaleleia pe suia?

   O loo faigata i la‘u tama teine le matematika. Sa ia fesili mai ia te a’u mo se fesoasoani, ae ou te le lelei i le matematika.

2. Fuafua:

   O a laasaga e tatau ona e faia?

   O le a ou talanoa i lona faiaoga ma isi matua e uiga i auala e fesoasoani ai i la‘u tama teine i le matematika.

3. Faatinoga:

   E te manaomia se isi fesoasoani?

   Sa ou tatalo mo se fesoasoani. Sa ou lagona e tatau ona ou talanoa i se tagata o la‘u uarota o se faiaoga. Sa ia fai mai o le a ia aoaoina la‘u tama teine. Sa ma setiina se taimi mo i la’ua e feiloai ai i vaiaso taitasi.

4. Tomanatu:

   O le a se mea na e aoaoina? E manaomia ona e faia se sini fou pe faaauau lenei sini?

   E tatau ona ou siaki i aso uma faatasi ma la‘u tama teine ia iloa ai pe o a mai o ia i ana meaaoga o le matematika ma iloilo ana faamatalaga tusitusia.

Mafaufau ma Tatalo

Mafaufau i mea na e aoaoina. Tusi i lalo soo se manatu o ia te oe po o manatu e sau mai le Agaga Paia. O le a sou manatu i le mea e finagalo le Alii e te faia? E mafai faapefea ona e faatuina se faataitaiga mo lau fanau e ala i le faia ma le faamae’aina o sini?

Gaoioiga

Mafaufau i se mea e te manao e faaleleia pe suia. Faaaoga laasaga muamua e lua e fai ai se sini.

A uma ona e faia lau fuafuaga, toe foi mai i le gaoioiga lenei ma faamae’a laasaga e lua e sosoo ai:

1. Iloa:

   O a ni mea e tatau ona e faaleleia pe suia?

2. Fuafua:

   O le a faapefea ona e faaleleia pe faia le suiga? O a laasaga e tatau ona e faia?

3. Faatinoga:

   Na faapefea ona fesoasoani le faatuatua ia Iesu Keriso ia te oe e ausia ai lau sini? E te manaomia se isi fesoasoani?

4. Tomanatu:

   O le a se mea na e aoaoina? E manaomia ona e faia se sini fou pe faaauau lenei sini?

Talanoa ma Lou Aiga

Talanoa ma lou aiga e uiga i mea ua e aoaoina. Fai i tagata o lou aiga e faasoa mai o latou manatu ma faalogo i le tasi ma le isi.

• Fesoasoani i lau fanau e fai ni sini. Tatalo faatasi ia iloa le mea e tatau ona latou faia.

• Tusi i lalo sini a tamaiti taitasi. Talanoa e uiga i le auala o le a e fesoasoani ai i tamaiti taitoatasi ia ausia lana sini.