5

Aoao Faatasi i le Aiga

Fesili e Talanoa i ai

1. Vaavaai i ata nei. O a mea ua e vaaia?

2. E faapefea ona aoao tamaiti e ala i le galulue ma taaalo faatasi?

3. O le a se mea e te faia i lau fanau e faaopoopo i le aoga e fesoasoani ia i latou e aoao ai?

Aoao

E mafai e aiga ona faia ni nofoaga mo aiga lea e mafai ai e le Agaga Paia ona fesoasoani ia i latou e aoao. E mafai ona latou talanoa e uiga ia Iesu Keriso ma taumafai ia avea atili e faapei o Ia. E mafai ona e faia le tele o mea e valaaulia ai le Agaga Paia i totonu o lou aiga ma faatumauina le malosi o lou aiga. E mafai ona e tatalo ma faitau tusitusiga paia o se aiga i aso uma, ola i le talalelei, ma auauna atu i isi.

A i ai le Agaga Paia i lou aiga, o le a taulimaina e lou aiga le tasi ma le isi i le agalelei ma le alofa. Pe a lagona e lau fanau le alofagia, o le a latou lagonaina le lagolago latou te manaomia ina ia faamanuiaina.

O le a fesoasoani nei mea i lou aiga e avea o se nofoaga o le alofa ma le aoaoina:

• Ia onosai.

• Taumafai e ’aua le ita.

• Faaalu faatasi le taimi ma le aiga.

• Ia fai mea fiafia.

• Faalogo ma le toto’a.

• Vivii lau fanau a o latou taumafai e aoao.

• Faaaoga upu alofa.

Mafaufau ma Tatalo

Mafaufau i mea na e aoaoina. Tusi i lalo soo se manatu o ia te oe po o manatu e sau mai le Agaga Paia. O le a sou manatu i le mea e finagalo le Alii e te faia? O a ni mea e mafai ona e faia ia maua ai pe faaali atili atu ai le alofa i lou aiga?

Gaoioiga

Mafaufau i mea o le a fesoasoani i lou aiga ia faatumulia i le alofa. Tusi ni manatu se lua pe tolu o mea tatou te vaai i ai, faalogo, ma lagonaina pe afai e faatumulia o tatou aiga i le alofa.

O le a se mea e te vaai i ai pe a e tilotilo faataamilo i lou aiga?

• Faataitaiga: Tagata o loo fesoasoani le tasi i le isi.

O le a se mea e te faalogo o fai atu e tagata o le aiga i le tasi ma le isi?

• Faataitaiga: Upu alofa.

O a ni lagona o tagata o le aiga i taimi latou te i ai i le fale?

• Faataitaiga: Latou te lagona le alofagia.

Fesoasoani i lau fanau pe a faigata mea mo i latou. O se faataitaiga lenei o le auala e mafai ona e faaalia ai le alofa pe afai sa feagai lou afafine ma se taimi faigata:

Sa fai e lau tama teine lana suega tele. Sa galue malosi o ia. Ae sa le lelei ona togi ma ua faanoanoa ai. O lea la o le a tatau ona ia toe faia le suega i le ono masina. E tatau foi ona e toe totogia le tau o le suega.

O se mea faigata lenei. E lagona uma e oe ma lou afafine le faanoanoa. O nisi nei o mea e mafai ona e fai atu ia te ia e faaalia ai le alofa ia te ia:

• Ou te alofa ia te oe. Ou te iloa sa e matua galue malosi O loo ou i ai iinei mo oe.

• Ua ou faanoanoa e te le’i maua se togi maualuga i le suega. Ou te iloa o loo e faanoanoa foi. O le a se mea e tatau ona ou fesoasoani ai ia te oe?

Talanoa ma Lou Aiga

Talanoa ma lou aiga e uiga i mea ua e aoaoina. Talanoaina fesili nei. Fai atu i tagata o le aiga e faasoa mai o latou manatu ma faalogo i le tasi ma le isi.

• O le a se mea e mafai ona tatou faia o se aiga ina ia maua atili ai le Agaga Paia i totonu o lo tatou aiga?

• E mafai faapefea ona tatou faaalia le alofa sili atu ma le faaaloalo i le tasi ma le isi?

• E mafai faapefea e le alofa i lo tatou aiga ona fesoasoani ia i tatou uma e aoao?