7

Ede Timoun yo Pratike Lekti, Ekriti, ak Matematik

Kesyon pou diskite

1. Gade foto sa yo. Kisa ou wè?

2. Kijan w panse timoun yo santi yo konsènan aprann?

3. Kijan w ka ede pitit ou yo aprann chak jou?

Aprann

Timoun aprann anpil bagay nan lekòl. Yo ka pratike lakay pou ede yo sonje kisa yo te aprann. Men kèk fason pou w ede pitit ou yo pratike lekti, ekriti, ak matematik chak jou:

Li (lekti)

Lekti se yon mwayen trè enpòtan pou timoun aprann. Paran yo ka ede pitit yo konprann kijan lekti ap ede yo nan lekòl ak nan lavi yo. Timoun yo ka aprann li pi byen nan li pou tèt pa yo oswa awotvwa pou lòt moun chak jou. Ou ka mande pitit ou yo pou yo li pou ou pandan w ap fè manje oswa travay nan fwaye ou. Ou ka mande yo pou yo li pawòl oswa vèsè nan ekriti yo tou. Timoun ki pi gran yo ka li pou frè ak sè ki pi piti yo.

Ekri (ekriti)

Ekri ka ede timoun yo panse ak aprann. Lè yo ekri, timoun yo gen kapasite pou yo pataje ide yo epi itilize mo nouvo. Ou ka mande pitit ou yo pou yo ekri yon ti kras chak jou. Gen kèk timoun ki renmen ekri istwa. Gen lòt ki renmen ekri sou bagay ki rive yo. Mande pitit ou yo pou yo li sa yo ekri yo pou ou.

Matematik

Aprann talan matematik enpòtan anpil. Talan sa yo sèvi nan konstriksyon, nan fè manje, ak nan lòt pati nan lavi chak jou nou. Anpil timoun panse matematik difisil. Men li pa oblije konsa. Ou ka ede pitit ou yo aprann matematik chak jou. Mande pitit ou yo pou yo konte lajan oswa peye pou bagay yo nan makèt la. Mande yo pou yo konte bagay nan kay la oswa lè w ap kuit manje. Sa ap ede yo reflechi sou chif yo ak sou fason pou yo itilize matematik chak jou.

Panse epi Priye

Panse sou sa w aprann. Ekri tout ide w genyen oswa ide ki soti nan Lespri a. Kijan w ap ede pitit ou yo pratike lekti, ekriti, ak matematik chak jou?

Aktivite

Gade nan lis ki pi ba la a. Desinen yon mak pou tcheke (✓) nan kazye akote bagay ou ta renmen fè avèk pitit ou yo.

Lekti nan Fwaye a

Avèk pitit ou yo:

• Li yon liv awotvwa.

• Li etikèt ki sou bagay yo.

• Pran tan youn apre lòt pou nou li ekriti yo.

• Li pano ki sou wout yo.

• Site non lèt yo wè yo.

Ekri nan fwaye a

Mande pitit ou yo pou yo:

• Desinen foto epi pale w konsènan yo.

• Ekri lèt.

• Ekri istwa.

• Ekri non manm fanmi yo.

• Ekri nan yon jounal.

Matematik nan Fwaye a

Avèk pitit ou yo:

• Konte bagay yo nan makèt la.

• Mezire atik pou manje yo pandan n ap fè manje.

• Ajoute ak soustrè chif yo.

• Pratike yon pwoblèm matematik ansanm.

• Li lè nan yon revèy.

Pale Avèk Fanmi Ou

Pale avèk fanmi w sou sa w aprann. Diskite kesyon ki pi ba yo. Mande manm fanmi ou pou yo pataje ide yo epi pou youn koute lòt.

• Ki bagay w ap aprann nan lekòl?

• Kijan nou youn ka ede lòt li ak ekri chak jou?

• Kijan nou youn ka ede lòt fè matematik chak jou?